Post: #1
Title: عودتي واندهاشى
Author: Halema2
Date: 05-11-2003, 04:49 PM
تحياتى لكم جميعا وشكري لكل من بارك لي بالزواج..
وأريد ان احكى لكم ما ادهشني في السودان ،،لكن البندوس لا يسمح والكي بورد لايساعدني..
المهم عدت الي السودان بعد غياب سته سنوات وبعد ان توفيت امي العزيزه..رحمها الله..
عدت وكلي شوق وحب لوطنى الحبيب وبدأت ابكى منذ ان بدأت الطائره تحلق في الاجواء السودانيه ،،اه واه بكيت بشده لدرجة ان هناك خواج اتي جنبي وسألني عن سبب البكاء وطلب لى كوب ماء ...المهم بعدها استغفرت ولملمت نفسى وبدأت استعد للنزول..
لكن لا ادري رفضت دموعى ان تقيف وزادت عند رؤيتى لاخي الحبيب واطفاله او بالاصح بناته, صارو فتوات وماشاء الله ..
اول شئ صدمني هو نهرت رجل الامن لى عندما بدأت تصوير اهلى بكميرة الفيديو الصغيره..فكان ترحيبه لى جميل جدا..
المهم طول الطريق من المطار الى بيتنا العظيم في امدرمان وفي طول الطريق نتوقف في نقطة تفتيش ،،شئ مخيف وغريب البلد كانها في حالة طواري ...لا ادري شعرت بالرعب ..عساكر صغار السن يحملون السلاح بكل بساطه ،،فاتني ان اذكر لكم اننى وصلت الساعه 3 صباحا..
المهم وبعد زيارتى اولا لمقابر احمد شرفي حيث ترقدامى الحبيبه وكن الوقت متأخر والظلام حالك وقام أخى بتوجيه نور العربه ..اه لا استطيع ان اكمل..اعذروني كانت لحظت صعبه شديد..رحمها الله..
ما ادهشني فى السودان كتير لكن اكتر شيئين مدهشين ومضحكيين:
ـالكل شايل موبابل والله الببيع التمر والنبق شايل موبايل...الغريبه الاخوات ،كل واحده شايله موبايل واحدث الانواع ويشتكو من المعيشه ..حاجه عجيبه
ـالحاجه التانيه ،،يوم عرسى اي مره تجى تسلم على تقول لى انتى جيتى من البلد ديك ،،عليك بتعرفى على ولدى ولا محمد والله اى مره عندها ولد ولا بت بره،،حاجه مخيفه الفضل منو ماعارفه...
وللحديث بقيه..
تحياتى للجميع
حليمه2
|
Post: #2
Title: Re: عودتي واندهاشى
Author: Elkhawad
Date: 05-11-2003, 05:01 PM
Parent: #1
العزيزه حليمه حمد الله بالسلامه ومبروك مره تانيه وتالته ورابعه و...........
المفارقات في السودان اصبحت طابع للحياة
وكل منا يري الاشياء بعيونه
فدعينا نراها ولو لي برهه
|
Post: #3
Title: Re: عودتي واندهاشى
Author: اساسي
Date: 05-11-2003, 05:05 PM
Parent: #2
الاخت حلمية 2
اولا مبروك الزواج
وان شاء الله بيت مال وعيال
وحمد لله علي سلامتك
نورت البورد
وعليك الله واصلي في السرد
الجميل للمشاهد
بمنظور زول غايب ليه فترة
|
Post: #4
Title: Re: عودتي واندهاشى
Author: خالد عويس
Date: 05-11-2003, 05:10 PM
Parent: #3
الاخت العزيزة حليمة
اولا الف مبروك الزواج وبيت مال وعيال انشاء الله
ثانيا مرحب بيك مرة تانية فى البورد
ثالثا لا زلنا ننتظر تكملة ما بدأتيه من حكاوي وانطباعات عن الوطن الحبيب
|
Post: #5
Title: Re: عودتي واندهاشى
Author: anwar abu gaidaa
Date: 05-11-2003, 05:21 PM
Parent: #4
اصبرى ؟؟ بجيك وبجيب ليك القش عشان المباركه؟؟
باقى اليومين ديل شدرنا خدر خدرتن سمحه وبى فوق شال ليهو نوار اها وحات الله انا والعيال ايانا الجايينك وجايبنو ليك
حمدا لله على السلامه وافتقدناك وتلفوناتكم عامله اضان الحامل؟؟
اثق كثيرا فى سردك بالله ادينا نا ابو تقيل ومن المدسدس؟؟
ليك الود
انور عبد الرحمن
|
Post: #6
Title: Re: عودتي واندهاشى
Author: noha_g
Date: 05-11-2003, 05:26 PM
Parent: #1
Halema2
مرحبا بعودتك
و مبارك لك بيتك و أسرتك متعك الله بالصحة و العافية و السعادة
و هدوء البال
لأمك الرحمة
و للسودان الرحمة
أصبحت تلك من المسلمات في السودان حتى أن الذين لم يتلفحوا الغياب يرونها عادية ربما
لك التحية
و يا بلادا كلما ابتسمت حط على شفتيها الذباب
لك مليون تحية
و جزء من شجن
|
Post: #7
Title: Re: عودتي واندهاشى
Author: maia
Date: 05-11-2003, 05:30 PM
Parent: #1
مرحبا بعودتك حليمة والف مبروك الزواج
وهكذا كتبت عليناالدهشة كلما ابتعدنا وغبنا عن السودان لنعود ونجد ان الكثير والكثير الذي يجعلنا في حالة دهشة مستمرة
فما كان موجودا بالامس غاب وحل محله شيء جديدغريب في احيان كثيرة
ويظل السودان الوطن الواحد ما قد كان وما سيكون
وتمنياتي ان تكوني قد قضيتي لحظات جميلة حتى وان اختلطت بالدهشة
ولك كل الود
|
Post: #8
Title: Re: عودتي واندهاشى
Author: Halema2
Date: 05-11-2003, 07:08 PM
Parent: #7
الاعزاء..اساسى،خواض،خالد عويس
لكم الشكر والتقدير ..
نواصل..
اغرب شئ فى السودان انو اى شئ موجود فى السوق ،،،الجبن بالانواع الفواكه كلها ،،المشروبات بكل الاشكال..
لكن...من يشترى ؟
اغليه جدا من يقفون امام بائع الفواكه ليشتروا والاغلبيه تتفرج وتتحسر...
شئ اخر ادهشنى وغاظنى تلك المدعوه الرقشه والله ثقيله ثقاله ومداقره للعربات فى الشارع وعامله شخصيه والغريب الكل يحبها والذ حاجه مره مشينا بيت بكى انا واختى وولدها وانا خايفه اول ما ركبنا قلت لاختى مافي احزمه نربطها والله ضحكو فينى وود اختى الفنطوط قال لى انتى فايقه يا خالتو..وبتاع الرقشه الساعه الشغل ليك المسجل وبدأ يغنى معاه باعلى صوت ،،متتتت متى يسعفونى والله انا ضحكت على طريقة الغنى وكنت خايفه لحدى ما وصلنا وبالمناسبه سواقيين الرقشه كلهم شفع..
اها ارتاح شويه واجيكم
حليمه المسكينه حسب رأى ناس السودان
لنا عوده
|
Post: #9
Title: Re: عودتي واندهاشى
Author: Halema2
Date: 05-11-2003, 07:28 PM
Parent: #8
العزيز ابو غيداء ..
سلام مربع ومرحب بيكم وراجينكم وما تنسو القش ..تلفونى اتغير وعنوانىكمان ...كله اتغير ..سوف نتصل بكم ..تحياتى لاولادك
عزيزتى نهى...شكرا وعقبالك والحزن فى برغم الفرح
maia
شكرا ليك والله قضيت لحظات جميله رغم الدهشه والاحزان وختمتها بفرح جميل
|
Post: #10
Title: Re: عودتي واندهاشى
Author: Elkalakla_sanga3at
Date: 05-11-2003, 07:50 PM
Parent: #9
سسسسسسسسسلام يا حلوين انتو شفتو حاجة نحنا هناك في المناطق المهمشة بقت من شروط رعاة البهايم عندنا قبل السكن والاكل والسكر والشاي والراديوالموبايل داء اهم شرط كدي اصبرو ليا شوية اوريكم ناس حلتنا كيف
|
Post: #11
Title: Re: عودتي واندهاشى
Author: أبنوسة
Date: 05-11-2003, 09:59 PM
Parent: #10
حلوم الخاتية اللوم
والله ألف مبروك وبيت مال وعيال
وللفقيدة الوالدة الرحمة
==============================
وننتظر تفاصيل التفاصيل يعني بالله ما تخلي ليك ولا شماراية
|
Post: #12
Title: Re: عودتي واندهاشى
Author: جدو
Date: 05-11-2003, 10:19 PM
Parent: #11
اللللللللف مبرووووك حليمة 2
وبيت مال وعيال
وحمدلله على السلامة
وفي انتظار البقية
جدو
|
|