تـقول لي بـوش مـا عنـدو شنـب؟؟

الخطاب الذي قدمه بوش للكونغرس عن مفاوضات سلام السودان أكد لدي قناعة راسخة قديما أن بوش من لحويي أمريكا ، وأن أسلافه الذين تركوا البطانة في الزمان الغابر لإشاعة قيم التسامح النبيلة في تلك البلاد البعيدة ثم إعادة تصديرها للسودان حينما راح له الدرب في الموية أو فقد رأس الخيط . فالناظر إلى مفردات الخطاب وكيف أنه يحاول باستماتة منع يد الكونغرس القوية المرفوعة من أن تهوي على أم رأس السودان بعقوبات لا سابق لها ... يعضد زعمي هذا ما يقاتل دونه بوش في ساحة أخرى من ساحات الرحمة والانسانية إذ يجادل الطغاة في مجلس الأمن من أجل رفع العقوبات الظالمة عن العراق ويقنعهم في استماتة متفردة أنه أصلاً لا توجد أسلحة دمار شامل في العراق ، فلم العقوبات إذن؟؟ والله كلام عقل ..

قناعتي بلحوية بوش تحل لي لغزاً قديما حول مربع دوبيت داير في راسي لا أعرف قائله ويتأكد لي الآن أن قائله أحد أسلاف هذا المقاتل الهمام ، وهو :

أبعدنا الزمان من اللهيجو بشيقنا
عاودنا السهر والنوم بقى مو رفيقنا
لامتين نلاقيهو المنشف ريقنا
ناخد بيعة من كف إيدو نحيي طريقنا

وكان ما أخاف الكضب أقول أن بوش بيسف ويشرب الجبنة السودا مررررة قاعداً على بنمبر بسرواله الديك فجغ كجانة وطاقيته الحمراء ..

العزيز اهل العوض

لك التحية

لعل بوش اخى يريد للسودان ان يستوى على نار هادئة حتى تتسبك الطبخة تماما ولن يقصر اعوانه فى ذلك فهو الربان الماهر..

Quote: أبعدنا الزمان من اللهيجو بشيقنا عاودنا السهر والنوم بقى مو رفيقنا لامتين نلاقيهو المنشف ريقنا ناخد بيعة من كف إيدو نحيي طريقنا

لعل الدوبيت اعلاه يكون لسان حال الكثيرين فى السودان وهم يتطلعون لليوم الذى يحن فيه بوش ويتعطف ويأمر بغزو السودان

وخلينا نصبر لى يوم باكر اكان فى العمر مدد ونشوف

لك الود كله

يا عمدة : النار الهادية دي نحن عليها من متين ، استوينا زمااان وحاتك ات .. بس قول ربك يوكي الجراب على العقاب .

بسم الله الرحمن الرحيم

أهل العوض كيفنك؟

مصداقاً لي كلامك دا قالوا في روايتين الأولى بتقول
إنو في البطانة الزول لمن يمرق ولا يطش بقولوا فلان مرق (بوشو) ولا ختر (بوشو) أو قعد (بوشو) .. أها بوشو بوشو بوشو لامن بقت بوش

والرواية التانية بتقول

الزول دا جدو كان إسمو (بشرى) أها قبل الحرب العالمية أمو ولدت جابت ليها واو بقى (بوشرى) ولمن قامت الحرب العالمية التانية ومن ضمن الخسائر قامت الراء إتماصت في الألف اللينة وبقت بوش بس


بدرالدين شنا

يا بدر الدين!! لا إله إلا الله والحمارة ماتت !!! مليح الشفناك طيب ما قالو قايم عليك وجع الضهر اليومين دي .. لكن والله الزول أترتو ولا كسرت نفسو كسر .. عليك أمان الله ياهو زااااتو كتلتو طب ، لاكين اتغابى فينا العرفة ساي .. الله يكفينا شرو

اهل العوض
السلام مليون
زمن افتش في بوست ليك لانو ادعودتك تدخل تعطر بوستات الاخرين باحلي واجمل الحروف وتمرق

لكن داير اسألك
الزول دا الخلا يغير رايو في حكومة السودان شنو
والله انا خايفو تحت تحت يكون من الجماعة

غايتو في كل الاحوال الله يكفينا شرو
الزول المابختشي ولا بخجل دا

عبدالله جعفر

أديبنا الكبير عبدالله جعفر ، ياخ بالراحة علينا نقوم نصدق كمان ، وبعدين العين ما بتعلى على الحاجب ونحن إنما نغترف من مواعين الكرام زيكم .

وبعدين كلامك كلو صاح وأخشى ما أخشاه أن يطلع هذا البوش من القاعدة ومدسوس على النظام العالمي الجديد .. وأظن أن الحردلو تنبأ بذلك حينما قال

يوم بوش العصير مرقت عليه امونة
خلت جيلو كلو تقول كياييل شونة

ولا أظن أن أمونة هذه إلا قنقليسة بت الريس