كلمات الأغنية التي سجن بسببها جعفر السقيد مهداة للشرفاء و الشرفاء فقط

و جدتها في البورد الثاني و لا ادري ان كان احدهم قد سبقني في نشرها هنا

فان لم يكن فاستمتعوا بها

و ان كان فعذرا على التكرار


بدر بدر يارواسي نحنا بعاد لحقنا القيف

انتا مدبج ونحنا نقاسي برد ام شير والموج والزيفه



مركبك الماليها مضارق تمشي تقيف تسرح بي كيفك
مره مشارق ومره مغارب انتا تخاف الريح وحفيفها

ساولاه زينه فوقها بيارق وانتا مدبج توب وقطيفه
فيها المات والضارب الفالق والسالمين في حالم حيفها
كل الناس ترزح في كفه وانتا وناسك فوق الدفه
الدايشين والراسمه لفا والشاخصين في مدن الضفه



ساو طبالك فوقهم الفا جوه المويه وريقهم جفا
من العطش النص اتوفي وباقي النص الفضل جيفه



ضاقوا المر والحال انسحسح والشغال واللاحق الحصه
الواصال للرحم اتقصه والهدايه مولاقي الفرصه
الرساي سافر ماوصه خلا محمد واحمد وحفصه
الاطفال العرفو القصه سدت جوه حلوقهم غصه
من الجوع الدم اتمصا واصبح كل الحلمو رغيفه




كل الراكب شاف احلامو دون احساس ماتت قدامو
فنا كتابو وكسر اقلامو للوالدين لاجار مالامو
ناس الحله القعدو وقامو اصر والح يمشي كلامو
هزموهو اخوانو البجوع ناموا وكم خريج مالاقي وظيفه



يالفكيتا وقولتلا سيري وعارف انو الدنيا دميري
لافي ضفاف لاشفنا جزيري لا في الحيري ولا في الطيري
كسرتا جناحه وقولتلا طيري واتملكتا الكانت ميري
يالسودت الناس وعقيري ايد الحق صابونه وليفه



قبلك كم متعلم وقاري يعكس الريح فكولوا الصاري
مشدوهين متعشي وحاري ريسه شلتو والبحاري
كم سنوات علام الباري واقفين هم شايفنها جاري
بقينا هلاك والقيف مضاري لا حجاج لا دوحه وريفه




حسك عينك ماتتمادا تنسي الراكب عندو اراده
الاهوال الشافه وخاضا كان في مدرسه ولا عياده
شفنا الايد الكان اجوادا يامبتوره وياشحاده
وياما رقاب كانت سداده علمت الله من التعريفه



وياريسنا قدر نتبيرق فك الدفه وادها غيرك
احفظ نفسك ترضي ضميرك وقف اوعا تواصل سيرك
كان طاوعتنا شن بيضيرك عرض اكتافك وفك البيرق
لا هني شكرا وكتر خيرك كل انسان في الارض خليفه



هي اغنيه رائعه جدا وخاصه كمان من جعفر السقيد

وكلمات مين ابن الغالي ياسر الدابي


و شكرا للرائع اسير الشوق من البورد التاني

على اتحافه لنا بهذه الكلمات

انتهازي

كلمات مسممه بالحقيقة

والسجن ليها شرف ونضافة

شكرا ليكم الاتنين

ولى جعفر السقيد والدابى

لا هني شكرا وكتر خيرك كل انسان في الارض خليفه

متى أسكتت الزنازين صوت الحقيقه، سؤال محول للطغاة القدامى الذين يعيدون قراءة أرشيف الحسرة في مزابل التاريخ و يتسائلون مندهشين عن ما حدث و من خرق قوانين اللعبه.. أما رواسينا الحصيف فذكاءه لا يقل عن سابقيه في ازدراد حبوب الأمن المستتب المهدئه، حتى يبعد المزعجين عن أحلامه الورديه..

شكرا يا انتهازي..... و التجلة و الاحترام للابداع و الكلمه المناضله

اعتقد انه نشرت هنا في احدي البوستات ولكن نحتاج الي سماعها يا انتهازي

طلبت من اسير الشوق ان يمدني بالشريط

و سيرسله لي بالبريد

و انا هوا بحولا لييييك سي دي

و ارسلا ليييك يا أستاذ

عشان تنزلا لينا



تماضر و ياسر

سلمتم يا شرفاء بلدي الأحرار