عذرا حميد .. خالد عويس .. وكل محبى حميد .. ما قصدت التشويه

بسم الله الرحمن الرحيم
ست الدار فى زمن اخر
عذراً للاستاذ المبدع حميد .. ماقصدت التشويه .. ولكنها محاولة للتعلق باهداب
ذلك الالق .. والابداع .. ونقل ست الدار لزمن اخر من ازمنتنا المرة .. عسى ان تجد ادنى مراتب القبول ..

ـــــــــــــــــــــــــــــــــــــــــــــــــــــــــــــــــــــــــــــــــــــ
رسالة اولى
*******
ست الدار بت احمد جابر
كيف احوالك .. مشتاق ليك
كيف الصحة .. والاولاد
راشد بقرا ..
ولا بزوغ من مدرستو
وكيف احوالن التومات
ربى يكونن لى طيبات
اما احوالى فربك يستر
يظهر انو بدا المشوار
فى يوم الخدمة جانا مديرنا
وديه حصل فى خميساً فات
قبال شهرين ..
سلم ورحب ..
هلل وكبر ..
وقرا ايتين ..
قال المصنع ماشى تمام
وزاد انتاجنا الطاق طاقين
وجابلو كلاماً ما مهضوم
بعث حضارى ..
جهاداً ضارى ..
وبلا متضارى ..
وخرم سب الامريكان
واخر الجلسة ياريتو ماقال
قال المصنع راح يتخصخص
بره جلسنا فى ايدنا الشاى
كنا حداشر ..
لسة حداشر ..
زائد واحد .. اريت لو كان النوباوية
كنا نناقش فى الاحوال
مصنع بنتج كيف يتخصخص
مصنع بربح كيف يتخصخص
والله عجاب .. والله عجاب
وخضنا كمان فى الامريكان
هوى يامطرطش
مالك ومال الامريكان
تخطب ود البنك الدولى
وتمشى تسب الامريكان
مالك ومال الامريكان
بلدك كل شبرين فى ايد
وماشى تناطح الامريكان
مالك ومال الامريكان
سلاحك دوشكا
وجوز هليكوبتر
وماشى تناطح الامريكان
مالك ومال الامريكان
وقلنا كلاماً مالو حدود
عن .. وعن .. وعن ..
وصلوا قولنا مدير المصنع
وزولك ابداً تب ما قصر
وصل قولنا كلاب .....
وتانى المشهد زاتو اتكرر
تذكرى جعفر ؟
تارى الراجل رغم قساوتو
كان وحياتك الطف وارحم
بدل النقطة .. وكف العسكر
شفنا عمايل ..
ضقنا هوايل ..
وربك اكبر
وبعد الشهر اتطاول وعدى
وشفنا خلالو الذل والويل
كنا حداشر زول مرفود
والواحد اترقى ..
ما تشيلى هموم ..
ربك قادر وما بنسانا
والارزاق ما هى المصنع
الا وحاتك وبترجاك
راشد .. راشد .. والتومات
لازم ينجحو .. لازم ينجحو
وبختم ليك بى شوقى وودى
ودعوة ربى يغطى سماك
الزين ود حامد
ملحوظة
ـــــــــــ
مرسل ليك مع صالح مية
يمكن اطول لى شهرين
مدى رجولك قدر لحافك
واوعك تطرى دروب الدين

رسالة ثانية
*******
سيد الناس الزين ود حامد
علك طيب ..
جانى جوابك من يومين
شالنى الخاطر ساقنى بعيد
لى زمناً اغبر ..
ما تتكدر ..
وزى ما قلت الخالق قادر
وبكرة الحال لازم يتغير
ما زعلانة على الرفدية
ولا زعلانة على الماهية
الا عليهو البلد الصابر
متين يرتاح ترحل احزانو
متين ينجم .. يتلم كيانو
اول البارح جبت الراديو
يمكن فيهو تجينا بشارة
من اخبارو فى ديك الجمعة
ابداً تب ما جابلو عديل
نحنح فيهو مذيعو وبرطم
جانا بلاغ من قائد الجيش
جيشنا الباسل وديمة جسور
حرر فشلا والبيبور
وسابو الخونة سلاح وعتاد
ومية خارج .. وخمسة شهيد
والحلال طلعوبا مسيرة
ساحة المولد فى حلتنا
دفسوها خلق .. اول واخر
عمالنا وطلبة ..
حرووم وصبين ..
ميرى وملكى ..
دفاع وعساكر ..
وشيخ الحلة اب كرشاً زير
جانا معاهو افندى وزير
سلم ورحب ..
هلل وكبر ..
وقرا ايتين ..
تارى مديركم ماهو وحيد
والبلد الصامد بين نارين
نار من مدفع شايلو مجاهد
ونار من مدفع شايلو معارض
والله وكيل ..
الله وكيل ..
حكم الجور ما بروح بى طلقة
الاستبداد ما تغيرو دوشكا
صوت الشارع اقوى وابلغ
من مية مدفع ومن ترسانة
ومن العسكر ودباباتو
وصوت جبخانة .. ومن زنزانة
ارمو سلاحكم يلا تعالو
نملا الشارع .. نملا سجونم
فى الخرطوم والبقعة وبحرى
ارض نضالنا وديه مكانا
ايد على ايد
الخوف يتبدد
ايد على ايد
الامل يتجدد
ايد على ايد
الغضب يتمدد
وصوت الواحد يبقى الف
الله معاك يا لصادق ودغرى
واصل دربك ما تتردد
مهما سواد الليل غطانا
بكرة خيوط النور راح تطلع
والحرية تعود من تانى
بعد كفاح الشاب والشفع
عقابك زين ما تشيلو هموم
فيهو ام راشد والتومات
امانة على ارعاهم واسهر
وما يحتاجو قريب .. لا غريب
حتى الغمة تفوتنا وترحل
تعود تملالنا البيت ضحكات
ست الدار بت احمد جابر
رسالة اخيرة
********
ست الدار بت احمد جابر
شوق وسلام ..
زى ما عرفتك ديمة اصيلة
وبلد اجدادك فى عينيك
همك خيرو وعزة ناسو
وديمة همومو بتسهر بيك
قولك غسل الحزن الكامن
وزاد القلب ثبات وسكينة
وبكرة حا يملا الشارع صوتنا
نفجر غضباً كامن فينا
الطغيان بت احمد جابر
مهما اتطاول ليهو نهاية
وزى ما ضاق النصر فى يوم
بكرة بلوك المر وهزيمة
وزى ما سقانا الذل والويل
بكرة شرابو من البسقينا
وزى ما ملابنا بيوت اشباح
بكرة يكون الحسرة سجينا
ده التاريخ ما بتنسى دفاترو
ارجعى فتشى فى ماضينا
نحن كفاحنا بايداً فاضيه
وقلب ملان ايمان وعزيمة
وصدرنا فاتح .. بسترو الله
هو معانا .. وهو البحمينا
نحن سلاحنا الصوت الهادر
صوت الحق النصرو بجينا
وفجر الثورة .. الغابت شمسو
بكرة يشابى ويطلع لينا
نورو يضوى طريقنا القاتم
يهزم فينا سواد الليل
يرقص رمل الشارع فرحة
يشيل شبال من شجرو النيل
تمسح مدناً باكية عيونا
تجر النم .. تغنى نشيدا
تقلع توب حداداً طــا ل
تفش العتمة بى ايدا
وتمرق لى صباح اجمل
تضم احضانو يوم عيده

الزين ود حامد


ارتيقه

ارتيقا
بى نضارتك و احه ثانية
و ثانية عيون الشغالين
ابداعاتك متلالاة
و قصيدتك كاربة
جيل حميد و اشعار الوطنية لا تموت
ايد العامل هى العاد تنتج
و لقدام

ارتيقا
عفوا واصل
قصيدتك اكثر من رائعة
اعني ما اضفته او عدلته على رائعة حميد

العزيز / اسامه الخاتم

كل الود

دفعة معنوية مقدرة

عسى ان تكون الكلمات فى حجم الوقت المضاع لاجل قرأتها

تشكراتى

خالد عويس

شهادتك وسام يزين صدر كلماتى

اما الاضافة والتعديل .. فأن كلماتى وافقى اوهى

من ان يفعلانها فى روائع حميد .. انما هى الفكرة

ليك التقدير

على الحرام كان ما لحقتها كانت

ماشة الصفحة العاشرة عديل

اها رفعتها براى بدون حاجات تانية

up

ابداع

artiga
سلام يازول ياابداع

لك ولحميد الشكر
كم اتمني ان تواصل مابدأت
ولمثل تلك الانشودة ينبض القلب

لك الود
عبدالله جعفر

العزيزه رؤى

اتمنى يوماً الوقوف على حافة خارطة الابداع

ولا عشم لى ان اكتب مبدعاً

ليك الود


عبد الله جعفر

سعدت كثيراً بزيارتك الاولى الصامته

وليتك ما وضعتنى فى هذا المأزق الثانى

حيث يجب على الرد مسترسلاً .. لا موجزاً .. ولعمرى

هذا هو المأزق عينه .. فلا احسبنى قادراً على مجارات

نبض كلماتك ..التى ادهشتنى فى اكثر من موضع .. ومعك

باقى حبات العقد النضيد

سلمت .. ولك كل الود