ليه بس كدة يا بكري

ليه بس يا بكري تقفلو الباب على الناس الجداد انهم يسجلو، وانا حارقة بنزيني كللللللل يوم وطالعة مداعي على الناس انو شوفو الفورم بتاع سودانيز اونلاين، مش عيب الكلام دة منك يا ولد!!!

يا ولد شكرا ليك والله يسامحك
على كل حال دى امكانياتى و لمن الظروف تصلح بنزيد الباندوث و نفتح التسجل الى كل من هب ودب
و بالمناسبة بنتى عمرها 8 سنوات

شكرا ليك انت يا كبير
والله يسامحك ويسامح الجميع يا زعيم
اعتب على الأخت ميادة لرفع الكلفة ومخاطبتك بياولد
ولكن على ما اظن لاحساسها الذى نحسه جميعا انك أخ
والبيت بيتنا ياباشمهندس
نحترم الكثيرين ونعلم ان لكل مقام ولكننا ليس
من هب ودب ومن يطلب العضوية من بعدنا ليس من هب ودب

مع التحية

,

أمسحه لينا فى وشنا يا عمنا
وخليك أنت الكبير
وما تزعل مننا

الأستاذ بكري
بعد السلام

بالله دا شكل ولد... دا راجل كبير يعني عمو
وكان نظرنا للصلعة ممكن نقول جدّو بكري

معليش ياعمو بكري ... اهو في ناس بعتبروك شباب لسع كمان... بختك

شكرا يا بب
بس المقصود بكل من هب و دب السفهاء و الهاكرز
العزيزة وجن صدقنى ما زعلان و انا لاقى ابقى ولد بس ما بطريقة دى
المهندس الهميم الكباشى يا ليتنى ارجع وا كون ولد و بمناسبة يا الجماعة نسيت اضيف انو عندى ولد و الان عمره 9 شهور
و صدقينى يا العزيزة ميادة فتح باب التسجيل سوف يجعل المنبر بيتا للدعارة و سب الاديان و الرسل اسالى مجرب و البورد ده عمره اكثر من 3 اعوام و مر بعدة مصائب الله لا وراك ليها و اتمنى ان لا يوثر كلامى هذا فى نشاطك فى البورد

احبابي ...
الاخ بكري...

تحياتي

في الحقيقه ان المنبر الان يعتبر من اسمي المنابر السودانيه ...لقد استقطب هذا المنبر الكثيرين من الاقلام الجسوره وان هذا المنبر بكل فخر يجمع تريبا كل اوجه التعدديه الحزبيه والسياسيه في السودان ...نتناقش ونختلف ونتجادل وكلنا همنا واحد السودان الواحد...والوطن العربي الكبير ...وفي الاونه الاخيره استقطب هذا المنبر الاستاذ منصور خالد والاستاذ الفذ احمد سليمان المحامي ...ونتمني ان نري الكثيرين من السياسيين والكتاب والمثقفين ....لنتعلم منهم ولنسطر التاريخ ...ولنجعل من هذا المنبار النافذه التي نخاطب بها حكومتنا في السودان من ارض الغربه....

وتاكيدا علي كلام الاستاذ بكري مررت ببعض البوردات ...وفيها من يسب الي اعظم الخلق اجمعين..الرسول صلي الله عليه وسلم ...ومنها من يستعمل الالفاظ السوقيه....نعم لقد كانت لنا هفواتنا هنا لكن الحمد لله لم تصل الي هذا المستوي من النقاش الذي رأيناه في بعض المنابر الاخري...

وحتي عندما كنا نتناقش ونتجادل عن جون قرنق ومنصور خالد وانا شخصيا وصفتهم بالقاتل والسفاح ...لقد اتصل بي الاخ الاستاذ بكري وبعد ان رحب بي وتبادل معي اطراف الحديث ...واكد لي ان هذا المنبر منبر حر ولكل انسان حر في طرحه ...وحقيقة احرجني عندما قال لي ان وصف البشر بالقاتل والمارق والسفاح ليست من شيمنا نحن السودانيين .....انتهز هذه الفرصه اخي بكري ...واشكرك علي تصويبك ...وحرصك من ان يكون هذا المنبر منبر سليم معافي ..
دمت اخي بكري ....

الحبيب الشحات
شكرا للمداخلة غايتو العلينا بنسويها و المثل بقول الواحد يمد كرعينه قدر لحافك

والله يا جماعة عقدتوني عدييييييييل كدة، انا ويعلم الله ما قاصدة التصغير او الاستفزاز من السيد الباشمهندس بكري ابوبكر، لكن بس انا قلتها من باب الاخوة ما اكتر ولا اقل دة اولا وتانيا لانها اصلا كلمة في لساني، فعذرا يا باش مهندس ولك العتبى حتــــــــــــــــــــــــــى ترضى..

الغالية ميادة و لا يهمك
وادعى لى فى بلاد ال عبد العزيز كان ربنا يرجعنى ولد ايام كنا بنلعب البلى و ام الحفر فى زقاقات الحلة و قزازة الميرندا بتعريفة و السهرة بمسلسل احلام الفتى الطائر او الرجل الخارق
ولك حبى و تقديرى
المخلص
بكرى

اخي بكري لك التحية والاجلال ... على فكرة يا بكري اذا ماقابلت هذه الكلمات بالرضاء والتسامح لما كنت كبيرنا يا اخي فانت اهل لذلك .


امين

ياها المحرية فيك ياود امي

الأخ باشمهندس بكرى
من ما اتولدنا ولغاية الليلة ونحن بنسمع ونقرا انه اى مشكلة فى السودان سببا ضعف الأمكانيات واراك لم تشـذ عن القاعدة
ودمتم

بكرى


تحية خاصة لك و انت تحافظ على نظافة هذا البورد من كثير من القاذورات و البالوعات الرعناء التى تكيل السباب للناس باقذع الالفاظ ، و تكيل السباب للاديان و للرسل صلوات الله و سلامه عليهم
و لا تفرق بين حرية التعبير و احترام معتقدات الناس و مشاعرهم
اقول ذلك و قد عانينا - و ما زلنا نعانى - فى بورد سودانت من كثير من السفه و شنيع القول و السباب و الجهوية و العنصرية البغيضة ، و قد بح صوتنا للمشرفين على البورد و ادارته بان يوقفوا العبث ، و لكن وحياتك لا حياة لمن تنادى ... يسب الاسلام ، و يسب الرسول صلى الله عليه و سلم بالفاظ دعارية مهترئة و لا يحرك ذلك لا مدير الموقع و لا مشرفيه و كل ذلك بسبب فتح باب العضوية لكل من هب و دب

اخى بكرى

مع احترامى لرأى الاخت ميادة ، الا اننى اشد على يديك الاثنين - بيدىّ الاثنين- و اقول برافو لانك لم تترك هذا المنبر العظيم ليتعرض لغزو من حثالة البشر و مرضى النفوس و عديمى المواهب ... فجاء بوردك ناصعآ و متراصعآ بتلاقح الافكار النيّرة و تنافس ذوى الفكر السليم دونما مساس بشعور الآخرين و دونما ما اساءة لديانة او نبى او قبيلة او شخص


سلمت يداك اخى بكرى .. و ليوفقك الله فى هذه المهمة السهلة الممتنعة : ان تجتذب لبوردك لا اقول الصفوة و لكن اقول من يحترم حرية الفكر و الاختلاف بعيدآ عن الضجيج المزيف الذى لا يرفع لصاحبه صوتآ اكثر من سقف حلقه

مع تقديرى و احترامى و تقييمى لمجهوداتك الضخمة التى تبذلها من اجل المحافظة على علو هذا البورد و الارتقاء به يومآ عن يوم للآفاق الارحب التى تود و التى نهفو لها جميعآ

تحياتى لولى العهد الصغير .. اخو ميادة

الأخ كوسـتا
مع عظيم احـترامى لرأيك السـابق لكن اسـمح لى ان اخـتلف معك فى رأيك حـول اداء بعض الأخـوة المشـتركين فى البـورد لأنه انا شـخصيا مشـترك فى بورد تانى يصـدر عن صحيفة عربيـة مشـهورة لا أحب هنا ان اسـميها لكنك ياأخ كوسـتا لو قرأت مسـاهمات تلك العضـوية وما تحويه من بذاءآت وشـتائم تعف نسـاء الشـوارع هن ترديدها وما تحويه من تفاهة وضحـالة فكـرية وقارنتها بمشـاركات الأخوة والأخوات فى بورد سـودانيز اون لاين لآمنت بأن هذا البـورد ملئ بالثقافة والفن والأدب والسـياسة وخفة الدم بصورة لاتصـدق ولآمنت بأن الشعب السـودانى من اكثر الشعوب ثقافة وادبا وخفة دم وذلك بعكس ما يشـاع عنه
ودمتم
اخوك قـلقو