Post: #1
Title: قال جندر قال
Author: omdurmani
Date: 04-05-2003, 10:53 AM
بالله دا كلام دا
.................
شابكننا مساواة وجندر......كيفن نان.....ونحن...عمرنا كلو يشدوا فينا...ويجلدونا بسوط العنج في...............عارفينها..........
ومدرسة البنات الجمبنا.....بجلدوهن في يديهن.....
........................
كنت بردف تقيل....ومرة اخوكم خاتى ليهو قطعة بتاعت لستك عربية برانى.....اها اليوم داك اكلت لي اربعين سوط...من يد الصول...زى الباكل في لبانة...
اها سؤالي....لاقتكم بت مردفة........
.........
قال جندر قال..
.......
shereef shereef
|
Post: #2
Title: Re: قال جندر قال
Author: Ahlalawad
Date: 04-05-2003, 01:25 PM
Parent: #1
وانا بقول شفتك ويييين؟
لكن اعمل حسابك .. الصول (الجندرية) في المنبر دا
ردف كويس
جيب ليك لستك عجل دبابة
اليومين دي مية بي قرش
|
Post: #3
Title: Re: قال جندر قال
Author: أبكر آدم إسماعيل
Date: 04-06-2003, 06:19 AM
Parent: #2
يا أم درماني يا أخوي
والله كلنا كنا قاعدين نعمل كدة
بس الكركاسة بتاعتنا من اللستك الجواني مش البراني
بعدين الغريبة إنو مدرسة البنات دايما "أخت الفندك بالصريف أعاين" وأغلب أسباب الجلد تأتي من هناك
أظنه كان أحسن يلمونا وخلاص يعني
Co-education
لأنو على الأقل دة كان حيريحهم من حكاية طابور النظافة وما شابهه
دة إذا ما ساهم ولو بالقدر اليسير في ردم ما الهوة الجندرية
تصور يا أم درماني يا أخوي مرة جابو لينا بت واحدة بس في المدرسة بتاعتنا
تعرف المدرسة كلها بقت تمشي البير عشان تستحم الساعة 6 صباحا حتى في أيام الشتا!!؛
لكن مهما كان، ما أظن الاختلافات في طريقة الجلد دي تتغير
دة طبعا لأنه لكل مقام مقال
على كل حال ما حصل أنا شفت البت الكانت معانا دي جلدوها خالص
عشان كدة ما حأقدر أوكد أو أنفي
أبكر آدم إسماعيل
|
Post: #4
Title: Re: قال جندر قال
Author: Kabar
Date: 04-06-2003, 06:56 AM
Parent: #1
امدرمـاني اخـوي حبابك..
والـله يا اخوي الجندر البيجلدو فيهو البنات ده نحن بره منو..
و بعدين انت في ده ولا في قصـة اخونا واحد..كان مدرستنا فيهو شوية بنات اكتر من بت ناس ابكر ادم..وكل مايقوم الاستاذ بتوزيع العين الحمرة المصحوبة بتلات ارباع تكشيرة..يقوم اخونا يجر رجليهو في البلاط..يوم قام الاستاذ نادهو وسألو عن هذا الاحتجاج العجيب ..فقام صاحبنا قال للاستاذ:كلامك كلو صاح يا استاذ..بس العوجة الوحيدة العين الحمرة في وش البنات والعيال قاعدين..ادينا الحمرة وخلي الباقي ليهن ..فقال الاستاذ:البنات زي العيال وما فرق وانت زول متعلم و مال الأمي يقول شنو..فقال صاحبنا:والـله يا استاذ ، وبدون حقارة، دي العوجة الأكبر من عوجة العين الحمرة للبنات والعيال قاعدين..
ودمتم
كبر
|
Post: #5
Title: Re: قال جندر قال
Author: Abdalla Gaafar
Date: 04-06-2003, 07:03 PM
Parent: #1
الاخ امدرماني
لك السلام
ياخوي نحنا زمان قرينا في مدرسة مختلطة لكن والله اربعة سنة ما شفتا لي بت جلدوها ليه مابعرف
يديك العافية
عبدالله جعفر
|
Post: #6
Title: Re: قال جندر قال
Author: الجندرية
Date: 04-07-2003, 11:24 AM
Parent: #5
امدرماني المناكف
ما قول خشمك قلت فهمت الجندر يعني شنو
المساواة ياعزيزي ليست هي الجندر
ونرفع ليك بوست الجندر وما ادراك مرة ثانية لعل وعسى
|
Post: #7
Title: Re: قال جندر قال
Author: ود العجمى
Date: 04-07-2003, 12:04 PM
Parent: #1
الجندرية
يا خى الجندر بتاعتك دى زى اللوحة السريالية
كدى عليك الله فى كلمتين تلاتة ورينا معناها ببساطة كدا أصلو الفهم قسمة
|
Post: #8
Title: Re: قال جندر قال
Author: الجندرية
Date: 04-09-2003, 09:54 AM
Parent: #7
ود العجمي الفهم قسمة فعلاً مرة ثانية
تعريف الجندر هو
البنية الثقافية السائدة في مجتمع ما ومكان ما وزمن ما القائمة على العادات والتقاليد والأعراف والقوانين التي تحدد مفاهيم الأنوثة والذكورة المقبولة والمرفوضة تبعاً للطبقة والشريحة الاجتماعية
والسلالة او العرق كواقع مجتمعي
يمكنك العودة لبوست الجندر مرة اخرى
يمكن ربنا يفتح عليك المرة دي
|
Post: #9
Title: Re: قال جندر قال
Author: ود العجمى
Date: 04-09-2003, 10:30 AM
Parent: #1
ايوااااااااة
شكرا على التوضيح يا جندرية
______________________________
توقيع: المرة كان فاس ما بتقطع الراس
|
|