شكيتكم على الله يا بوش وبليير

اول الحكي
اتامر ضدك انا والشوق
وتسريحه بت الجيران وغناء الاطفال
ساعة مطره
مكتوب اسمك بي نديان
قوسين وفلان
تاكيت الباب واستنيتك
صيفين وشتاء
ورشة مطره

الكلام لنجلاء عثمان
___

هترشه على طبول الحرب

شكيتكم على الله يا بوش وبليير ؟؟؟

قضيت ليلتي كلها تقريبا وجزء كبير من صباحي وانا مصنقره امام التلفزيون وكلي يتابع الاخبار ... مؤتمر صحفي لبوش وكلام لبليير ورأيتهم كيف يجيبون على اسئلةا لصحفيين وابتسامات عريضة تملا وجوههم وايقنت تماما ان الحرب واقعة واقعة .. ثم تابعت اخبار الحرب عندنا في دارفور . واصابني الطمام من حديث اولياء امورنا ادام الله عزهم . .
وايقنت ان البلاد عندنا مقسومه مقسومه . جنوب . غرب .. شرق .. واخيرا ح تصفي ليها على حكومة محشورة في النص والشمال . وتذكرت كيف كان اصحاب الجلالة واصحاب الفخامه يتبادلون الشتائم والنبز عينك ياتاجر .. وايقنت ان نهاية العالم وشيكة وشيكه .
وضحكت انا اتذكر مقولة ان الرئاسة للاغبياء . بوش لامريكا وبلير لانجلترا وصدام للعراق .. وعيال سعود للسعوديه . والبشير للسودان والقزاقي للييبا وهلم جرا . ورفعت يدي ودعيت عليهم .. شكيتكم على الله يا الجبتوا لينا البلاء .. ومن ساعتها وانا مصابة بنوع غريب من الدبرسة .
كيف سيكون شكل العالم بعد ضرب العراق ؟؟ كل العالم يعرف الاجابه ، لكنه فشل في تخييل ما الذي ستوؤل له رداءة الوضع ورداءة الانسان كفرد مكلف بتعمير الارض لا بخرابها .. الحفاظ على وحدته لا على تجزئته . عيني تورمت من البحلقه وجضومي انطفقت من كثرت شدي عليهما بيدي ..
لا ادري ماذا حدث لي .. اذ تخليت فجأة عن كرسي وسريري ودنقرت تحت سريري اجر شنطه كبيره تكومت فيها مجلات ميكي ورجل المستحيل .. ومجلة ماجد وكتب ومجلات وعناوين لاحداث يعود تاريخها الى اكثر من عشرة سنوات .. واصبحت تماما مثل ستات الفول والقنقليز وانا منكبة على الاوراق مثل المجنتره انكش فيها .. اوراق كتبت عليها مسودة اسئلة امتحانات وخرابيط ورسائل لم ترسل .. وورق عليه بقع من شاي بالنعناع .. ولا ادري ما الاحباط الذي اصابني فسملني الى حالات من الجنتره .
ومن دربي طوالي ندهت الى نصف شغالتنا السيرلانكيه لنجر الشنطة لمنتصف غرفتي . ثم افرغت كل مافيها ونزلت في كومة هذه الاوراق بحثا وتنقيبا ..وطلبت من صديقتي السيرلانكيه ان تسوي لي عصير جزر وشاي بالهبهان :-
- سيري انت في ايس سوي ؟؟؟
_ انت سوي شاي وجيبيهو بعدين انا في كلام ؟
- انت اول في كلام ايس في
- الله يشوي عنقرتك .. ماعايز شايك المعفن دا .
وضحكت ملء حنجرتها من هذه العنقره التي لم تعرف اصلها .ومع ذلك ضحكت ربما من شكل غيظي ..
ورجعت الى نفسي ورقت شوية .وتساءلت ماذا تعني هذه العنقرة .. حقيقة والله لا اعرف ، لكن ارتبط عندي عدم سواة الشاي بشوي العنقرة . وكفي ..
وعدت الى اوراقي افتش فيها . يا الهي ماذا افعل انا .. عناوين لمجلات وجرايد .. اكثر من ساعة وانا اقلب في هذه الاشياء .حتى صارت ارضيه غرفتي وعلى امتدادها مغطاة بورق الجرائد ومجلات واوراق قديمه .. وفجأة نط لي عنوان واحتل كامل مساحة الغرفة ..
الاكتئاب يطوق العالم . وزحيت كل الاوراق الاخري من عليه ونكشته نكشا حتى استبانة اجزاء من صفحاته .. ودخلت كلي في كومة الاوراق لملاحقة موضوعي .اين بقية هذا الموضوع .. يا لي من فتاة محظوظة .. هذا ماكان ينقصني . لقد عرفت مرضي مبكرا .. ان العالم كله مقدم على الاصابة بهذا المرض الخطير ..
ياويلي .. ساعدني يارب لاكشف للناس اصل هذا الدواء .. شيري ايتها المنقذة للبشريه والطبيبة المداوية .. اسرعي في تطويق هذا المرض ..وطافت ببالي وانا متفنة على هذا الوضع ملامح لاناس اعرفهم تتجلى فيهم اعراض هذا المرض .. ودخلت السيرلانكيه ورأت ان بقعة الاوراق ازداد شتاتها وحادثتني والتفت اليها...
_______________
للهترشه بقيه
ابقوا معنا

اول الحكي
ماصوتك كان نديان
وبخير
والزمن الما بلمني بيك
يكون منحاز
ريحتو دقيق
نسوان السوق عاسنو
فطير ميتان حيلو
مازمنك ما بقبل غيرو
ولاغيرك غير
سكران بالهم

الكلام لنجلاء عثمان
______________________

هترشة بشكل الاكتئاب

لكني لم اكلمها لانني كنت اعاين للاعراض الخارجية لمرض الاكتئاب فيها وقستها .. وهززت رأسي بالموافقة .. ثم هرولت هذه المجنتره باقصي سرعتها حتى تعثرت بالطاولة وسمعت وقعتها طااااااخ حتى قالت احييييي . وضحكت بهسهتيريه وانا اتخيل كيف تكون وقعتها .. وتاكدت نصف شغالتنا انني فعلا رحت في الباياباي حينما سمعت قهقهتي.. وثواني ودخلت علي هي وماما .. ونادوني ..وبما انني كنت منهمكة في بحثي الدؤب .. فلم انتبه لدخولهما علي .. حتى سمعت صوت ماما وهي تكورك في اضاني
-يا قصفه .. ياقصفه . يابت مالك مالك جنيتي ..
والتفت اليهما وانا اقيس حالتها بالاعراض المتوفره لدي . وجدتها . منزعجة .. خائفه .. مرتابه .. ترتجف .. لونها مخطوف ..
وهززت رأسي وانا اوافق هذه .. ثم عدت الى بحثي الدوؤب .
- سجمي بتي الوحيده ماجنت .. يا اولاد .. يا شفع .. سجمي الليلة البت ماراحت مني .. تعالوا شوفوا اختكم دي مالها .
وجاء اخي الصغير ، ثم اعقبه اخي الوسطاني .. وغاب بابا واخي الاكبر لوجودهما خارج المنزل في عملهما .وتراص اربعتهم على بابي
وانا ابحلق فيهم .. ثم عدت الىاوراقي احاول ان اجد الملمح الرابع من اعراض هذا المرض الخطير .. وخطر على بالي الاسئلة التي يجب ان اسالها لهم مثل ما يفعل اطباء العيادات النفسيه .. ورفعت نظارتي وسألتهم :-
- تفتكروا انو الحياة قاسيه ولا موش كئيبة ولا موش على قدري كده ..؟؟
- طيب حياتكم العايشنها هسع دي . انتم راضين بها ؟؟
- طيب هل تفتكتروا انو الحياة تستحق ان نعيشها ؟؟ طيب ليه ماراضين عن نفسكم ؟
- هل عندكم فكره انو الزول البيضع حد لنهاية حياتو ح يدخل النار ؟
- طيب الحرب لو قامت حا تعملوا شنو ؟
- هل انتو حاسين انو في حاجة اسمها محور شر ؟
وهنا لم تطق امي صبرا .. فانكبت على مولولة .. وهي تجس كل شبر في جسمي . .سجمي الليلة وووب علينا .. البنيه ما اترمدت
وتدخل اخي الصغير :
- يا امي بالله عليك جلينا من بتك المجنتره دي ؟ انا امشي هسع اجيب ليها 3 حبات باتنجان اختهم ليها هنا تقوم ليك زي الحصان .
عليك الله خليها في جنترتها دي .. بعد شوية تطلع لينا في الطربيزة ولا تقول ليك تعال امسك السلم دا عايزين ندق لوحه ولا تقوم ترسلنا جيبوا لي جزر ولا خياااار ..
ونظرت الى شغالتنا ، يا بت انا موش قلت ليك جيب شاي حليب ؟ ووجلت السيرلانكيه وجفلت ثم نطت مبتعده مني . ثم انسحبت خارج غرفتي
- يا ماما انا مالي .. وحات الله نصيحه .. بس انا عايزه اعالجكم من مرض الاكتئاب ..
وضربتني على ضهري ، ثم مضت ..انشاء الله الاكتئاب اللي يغمتك انت يا سنيحه ..
_________
طولوا بالكم شويه
للهترشه بقيه
خليكم معانا

اول الحكي
كيف تستبقيني وأنت موغل في الغياب
وأنت تحاصر شوقي
تحسب كل خطوي
تبتدرني بكل اللاءات المستحيلة
كيف تستبقيني؟؟
وأنت تحد من لقاءاتنا
وان التقينا
تبادر في الرحيل
تمتلك زهوا كل أعذار الذهاب
الكلام ل ريــل
_____

هترشه واحدة
مخوفاها الحرب

وعندما جاء العصر وجاءت بشكة جيراننا وجلسن في الصاله يتبادلن كلهن الحديث حته واحده . ويقطعن ويشمشرن ويسمعن الاخبار في قناة الجزيرة ويتابعن في المسلسل على القناة الثانيه المصريه .ثم يقطعن حديثهم ليعلقن على حديث فلاشر الناطق الرسمي باسم البيت الابيض وكل ما ظهرت صورة جورش بوش او بلير . ارتفعت حلوقهن بالدعاء عليه .. انت يا ود الحرام .. انشاء الله المرض الياخدك انت والشؤم بتاعك دا . .ثم يغيرن قناة حديثهن كانهن ماسكات ريموت لكلامهن .
شفتي يا محاسن فستان يسرا اللابساهو .. شوف عيني امبارح شفتي في سوق النجار في محلات الكواكب .. سالتو قال لي بالف وخمسمائة ريال .. قلت ليهو فوق كم ؟ انشاء الله الف وخمسمائة شيطان يركبوك .. لكن هو مافستان ..؟
ثم يعدن ليسألن .. هيا اخواتي الراجل الفقر النقر دا مامصر على الحرب دي . ؟
شكيتكم على الله يا بوش وبلير ..يا معشر الشر .الكان بقيتو لي قيامتنا سبب
عاد يا اخواتي لو الحرب دي وقعت .. ما القيامه وقامت ..
باقي ليك ياسعاد صدام دا بقدر على الامريكان ديل ؟
شان بقدر .. والله خليهو يرجي الراجيهو ساكت .. والله فرد دوم همك ولا كيناوي الا يخلي ليك العراق دا زي الشمله .. وتقصد بتول ان تقول توم هوك والكيماوي .
وتنط ليك سعاد العارفه بامور شمارات الرؤساء والحصيفه والسياسية التي لا يشق لها غبار :
والله قال ليك العند صدام امريكا ذاتها ماعندها ..والله يا بتول شوف عيني دي . يوم داك جابوا ليك الجنود العراقيين ديل يفكوا ليهم في الكيماوي والواحد زي الاسد النتر ، يتلقف ليك الكيماوي دا بسن بندقيتو . وجججججبببب يبلعوا . والدخان دا من خشمو يسوا فووووووووووو ..
انت قايله العلماء بتاعينهم هينين ولا هينين . ديل هم ذاتهم الجابو للامريكان الجمره الخبيثة ..
ونطت عشه :-
هي نان قالوا ليكم جنس جمره .. والله قالوا ليك لمن يوم داك الامريكان قالوا كده وديك يا القدله ودفقوا ليك ديك ياالجمر الخبيث .. وميدان التدريب دا انقلب احمر احمر احمر من الجمر .. خلوهو يليك يراري من حمارو .. بس يقوم كده ناس الفريق التاني ولابسين ليك في وشوشهم ديك يا الكمامات الماخمج وشايلين ليهم عصاية مربوط في قدومها ملقاط بتاع الجمر والساعة اللي يدلي ليك العصاية كده ويلقط ليك الجمره ويدخلها في الانبوبه الشايله . .لمن تسوي تتتتتتششششششش . تنطفئ ويقبل ليك على التانيه في دقائق الميدان دا عدموهو ليك من اسم الجمرايه الخبيثايه.
دي امريكا يا بت امي بتنـقدر !!!!.. والله ديل ماخلو شي للعلم . هسع عارفنن بنقول في شنو ؟
ولم اطق صبرا وانا بعيده عنهم اراقبهم بعين دارسه وعقل حصيف . حينما تأكد لي انهن جميعا مصابات بالاكتئاب الحاد .
وسلمت عليهن في خدودهن واحدة بعد الاخري . ثم اخدت فنجاني وصببت لنفسي شاي . وبدأت بالبمسله
امهاتي . .اخواتي .. جاراتنا ..
الحرب على العراق وشيكه .. وشيكه .. فقط المسألة مسألة وقت . اها . الضغوطات والعالم الذي يرقد الان على شفير الهاوية
والمستقبل الظلامي الذي ينتظرنا . تستوجب منا .. ان نكون حذرين في التعامل مع انفسنا .. فهنالك امراض خطيره تصيب الانسان ولا يعرفها .. ومنها الاكتئاب النفسي . ماظنيتكم بتعرفو شي عن الاكتئاب النفسي ، ياخالتو بتول انت بس اسمعيني وانا سوف احدثكم عنه .. لاني اعتقد جازمة انكن جميعكن مصابات به . حتى اخي الصغيرون داك المصاب بعقدة الجزر وساديته الباتنجانيه الشديده هو برضو عندو اكتئاب . انا ح اقول ليكم صفات مرض الاكتئاب النفسي وانتو قارنوها . عن نفسي انا متأكده انكن مصابات بهذا المرض .. بس بقولها ليكن انتن بس عشان تآآآآآمنوا
- فقدان الاحساس بالمتعة بالنشاطات التي تكون ممتعة بالنسبة للانسان العادي او لنفس اي واحدة منكن لمن تكون عاديه
- الاحساس بالخوف والفشل والضياع والياس وموت الامل .
- ضعف الطاقة الجسمانيه وضعف الشهيه للاكل . (رغم انكن ماشاء الله مامقصرات في الاكل تاكلن وتنكنرن ..والحيل الميتان الواحدة فيكن لو طلعت سلمه واحدة تجي تشتكي ) . وكراهية الجنس الاخر
- بطء التفكير (يعني البلاده ) وبطء الحركة ..
- وجود افكار انتحاريه نتيجة للياس ونتيجة لكل ماسبق .
تفتكروا لو انتو كنتم مكان صدام حسين . كنتو حا تسوا شنو ؟؟ هل ح تخلوا الرئاسة ولا ح تفكروا في الذي يعقب تخليكم عن الرئاسة . مثلا ح تضعوا في بالكن انه لا دولة سوف تأويكم . وحتى لو اوتكم سوف تسلمكم لمحاكم جرائم الحرب في لاهاي . ح نتنتحروا .. تفكتروا كيف بنظر لنا العالم .. انت قادرين تختاروا محور الشر براكم ولا اخترتوا لمن الاخبار قالتوا .؟؟
ورفعت نظارتي وانا ارفع وجهي من ورقي لارى وقع حديثي عليهن . فلم اجد ولا واحدة منهن .. ثم حملت اوراقي وذهبت اليهن في غرفة الحريم .. وجدتهن يتكلمن كلهن بصوت واحد ويشاهدن الاخبار ويشاهدن المسلسل . ويشربن القهوة وهذا كله في وقت واحد ..
ولما رأينني . بادرنني بصوت واحد ..
ياشيري يا بتي . عليك الله خلي القهوة دي تخش راسنا . ماتطيرها لينا .. ماتبقى علينا انت والراجل ابو رويس دا .. جننا مقدور عليهو . نحن من دربنا دا . ماخدين امك دي وماشين نشوف ليك الشيخ يقرا ليك الكتاب ..
_______
انتهي الهترشه ولم
تنتهي الهرشه
حتى نلتقي هترشه جايه
كان الموت نسانا
وبوش خلا ضرب العراق

http://عالم مقرف

العزيزة شيري صدقيني كل اوراقك لن تخرجك من حالتك وانا اقترح عليك


وعلى الاخ ود العجمي جرعات يومية من كتاب كولن ولسون(اللامنتمي)

ستجدون فيه مايخرجكم من حالتكم النفسية .

سلام مربع
ابو يسرا
سلمت للطله ياسيدي
وسلمت للنصيحة
بس الوصلة مافتحت
كدي شوفها اوع يكون الحرب قامت
وقطعوها

يا شيرى ..

رغم بعدى عن البورد برسل سلامى
ليك كل الثناء وجل احترامى

قرات اخر "الهترشات"توقعت اشارة ولم اجدها فى هذه المره
وهى وصية منك الى السيدات الاوائل فى لندن وواشنطن
خاصة وان التى فى لندن اسمها "شيرى" على ما اظن والثانية
لا يعرف اسمها احد

لكن التحية والسلام شيرى

شيرى

والله بقؤأ فى الشكية باستمتاع . فجأ لقيت أبويسرا . جاب سيرتى
و سأعود للمداخلة ولكن ليس الان الان سأقول لعزيزى ابويسرا . أن هناك بوست غير هذين البوستين يحمل نفس القرفة من الشى الحاصل فى الدنيا هذه الايام . أظن أن صاحب البوست اسمه عماد. أما كولن ولسون سيحل هذه المشكلة انا على يقين ولكن ليس باللامنتمى وإنما بكتابة سقوط الحضارة . وبرضو أقول أين هى الحياة التى أصعناها فى سحف العيش ؟ شكرا شيرى وما نزعجك . لكن برضو لنا عودة

شيــــــري

ما عندك سندويتشات خفيفة......بدل البوش ده

طششت عديل كدة

شيري

عالم مقرف

شيري الرائعة العزيزة.. اختاري.. فأنت كلاهما...

لا تعليق سوى.. دعواتكم.. لنا ولهم ولكم..



الله لا يظلم أحداً.. نحن من نظلم أنفسنا...





بنت الحسين

بعد إذنك
أنا مستمتع بالسرد .. ممكن تواصلي
وما ح أقول أي حاجة
عشان ما تجيبي سيرة البحر
واصلي ،، أها ودوك للشيخ ولاّ أثبت حالة الإكتئاب عندهن

العزيزة شيرى

استمتعت كثيرا بكتاباتك ..

سيرى الى الأمام .. أتوقع لك مستقبلا قصصيا باهرا ..

...

عمك العجوز
أرنست

سلام مربع
للذين دخلوا وتسمموا بهذه الاحباطات
التي هريتهما بها
وسلام مربع ايضا
للذين تركوا اساميهم
ورائحتهم المميزة ومضوا
رغم الحال الحرن
ورغم رداءة الظروف
ورغم تربص الاعداء
فاهدي تحيه صباحية
لكل حندي عراقي مرابط على حدود الوقت
وتقديرات المستحيل
ونبوءة الانتصار
والي الذين يحترق نبضهم كل ثانيه وهم
يرفعون اكفهم بالدعاء لاخوتهم في العراق بالنصر والثبات
رغم يقينهم انهم يودعونهم وداعهم الاخير
والي الذين يودون الذهاب الى تلك المناطق لنصرتهم
لكل ما باليد حيله
ورغم بعدي برسل سلامي ودعواتي
الى كل هؤلاء واولئك
ابعث سلامي المربع
بمساحة كل نزيف مشاعري
عسى ان تغطيهم من كل شر واذيه
واليكم انتم احبائي اهدي كثيرا
من سلامي المربع نفسه

سلام مربع
الى الذين تركوا اساميهم
ونكهتهم ومضوا

ود العجمي :
اجمل يشء حاولت افتح البوست بتاعك من الوصلة اللي كتبها ابو يسرا . كتر خيرو . وابت تفتح معاي ، وبالصدفة وحدت البوست بعد كده قدامي . وضحكت وقلت في نفسي بشوف القلب .. وقرأته .. وفعلا توارد توارد خواطر .. وفعلا عالم بلا نكهة ولا بلا طعم .. عالم مقرف عديل كده
عمو قرجه
عمو عمو .. انت بتتعب ليه ؟ عمو عمو انا عندي ليك نضاره ..
امازحك ايها الشفيف .. فقط هي محاولة للخروج من هذه الاحباطات
والخراب الذي يمد لنا لسانه مغايظاً .
سلمت ياسيدي للطله .. وانشاء الله تسلم عيونك ياعمو
مشـــــتاق
مشتاااااااااااق .. مشتاق . بتقول مشتاق ..
سلمت ياسيدي للكلام الناعم الذي وصلني معناها ..
سلمت اكثر للطله ..
ابو يسرا
عالم مقرف بجد .. وعالم كريه ..
سلمت ياسيدي للوصله .. وسلمت للطله
مريم بت الحسين
حبيبة البي ..
كنت متفنه عندك بي هناك .. ولست ادري هترشت هترشات ، لا ادري كيف طلعت شكلها ..
عموما لديك نكهة مميزة في الكتابة .. تعجبني .. وتعجبني اكثر صراحتك ووضوحك ..
سلمت لطله وسلمت اكثر للاطراء ..
الشــاعر
هو انا اقدر اجيب سيرتو تاني ؟؟ توبة لي حبوبة ..
في المرة دي لسعة ما قدرو يقنعوني انو انا المحتاجة شيخ ، لاني اقنعتهم ليك خنق فطس انه هم جميعا وبدون استثناء مصابين بمرض الاكتئاب النفسي الحاد .. لكن في مرات كثيرة غير هذه يا ما زرت شيوخ ..
وقالوا وقالوا عليا ...
سلمت ياسيدي للطله وسلمت اكثر للاطراء ..
جدو ارنست العجوز
الله يعافيك ياسيدي وانشا الله تسلم
وانا الممتنه لحروفك التي تنقط عسل عديل كده
وسلمت ياجدو للطله وسلمت اكثر لهذا الاطراء

سلام مربع

ياساتر من الامريكان
ياساتر من نيتهم
السوده
اخيرا تحدث بوش الى الامه الامريكيه
واستمع اليه العالم كله
في كلمة استغرقت 13 دقيقة فقط ليقولها
رغم انها لم تأت بجديد .. فما قاله جورج بوش في كلمته
التي قيلت في وقت مبكر من صباح اليوم
لم يكن جديدا ويبدو ان العالم كله لم يتفاجأ به
حتى صدام سبقه ورد على طلبه
انه لن يخرج من العراق
يعني ابييييت عديل كده .
وتحدى اكثر من 255 الف جندي امريكي
وقوات تقدر كلفته الة حربها باكثر
من 95 بليون دولار
لشن حرب في اول سابقة في التاريخ الحديث من اجل تغيير نظام دولة
وخلع رئيسه وتدمير اراضيه ومكتسباته كلها بغرض نزع اسلحة الدمار التي يمتلكها
بوش وعد العراقيين انه سوف يحافظ على النفط بتاعهم وقال فيما معناه انه ثروتكم وانتم المسئولين عنها لذلك لاتحاولوا ان تدمروا ابار نفطكم والذي سوف يصبح نفطنا

كدي بالله بالعقل كده .. كيف نكسر بيتنا ونحرقه كله . .عشان
نبيهو من تاني ..
طيب ليه من الاول حارقينو ..
يعني غالبهم يفكوا واحد صاروخ من الخليج يدمر الرئيس وبيته فقط
دون الحاجة الى تدمير كامل جسد العراق

وفي نفس الوقت الذي كان يهنق فيه الرئيس الاميركي اعلنت وزارة الامن الداخلي الاميركية ان مستوى الانذار الارهابي في الولايات المتحدة رفع من المستوى الاصفر (المرتفع) الى المستوى البرتقالي (المرتفع جدا) بسبب مخاطر وقوع اعتداءات مرتبطة بحرب محتملة في العراق

والسؤال الذي اطرحه هنا
ماذا فعلنا نحن لرفع مستوي الانذار بالمخطر
المحدق بالمنطقة كلها ؟؟

تاني جيتكم.. كان تفوت مني الهرشه دي
انشاء الله يايمه اريتو بوش وبليير
بالخراب اللي يغمتو
قولوا معاي امين

لاننا اصحاب عقيدة قوية وراسخة وهم يعرفوا ذلك
وهي اشياء ذاهبة الي ما سيصل اليه اخر الزمان
الله المستعان علي كل حال
امس كنت اسمع الراديو بس لانوا احسن من التلفاز بكثير اول حاجة لن يزيد الاحباط وتاني حاجة ممكن تدوري في حاجة تانية بجانب الراديو
ودورت غسيل حتي الفجر والان نعسان نعاس ما عادي وما في طريقة مع الدوام العجيب دا ننوم ومع جماعتك ديل مافي نوم
حتي ياتي صلاح الدين سنعيش علي هذه الحال

سلام مربع

مهاجر

وحات الله انا عنقرتي اللي انشوت . هانذي عدت اليكم سريعا
بعد ان تكرم اخي الفاضل مانج
بتوضيح معني العنقره
وقد طلب مني ادنكل دعوات ماحقات في
حق كل من بوش وبليير
شكيتهم علي الله
فانا اليوم تقريبا كله قضيته هنا النيت
رغم انني كنت اتصفح في مواقع اخرى
لمن عيوني بقبقت
وتخيل هذه الفكره التي عملت بها
ان تستمع الى الراديو
وتعمل شغلة تانيه
كثيرا ما اعملها لانها تتيح لك الاستفادة من وقتك
بس الراديو عندنا هنا
كلو اغاني لابسات البراقع
والذي منو
وقام سموه .. وضبح سموه
وكشر سموه
سلمت ياسيدي للطله
واظن صلاح الدين جيتو اتأخرت

Hi, Ya Shiry
Would you please tell us more about Nagla Osman
and post some of her work if possible.
Thank you

وهاك دعوة زيادة
اشناء الله يخش عليهم بالساحق والماحق والبلا المتلاحق بركة الجمعة الجامعة والكلمة العند الله سامعة، ويبقا ليهم اربعا وعقاب شهر بركة الليل الأمسى والأوقات الخمسة،
آآآآآآمين

سلامات
شيري
قد اجدت التنفس واخرجت هترشاتك برونق بهي التفاصيل
وبوش وصدام وبلير ايضا تنفسو كل بقراراته
ولكن دعيني اسالك
كيف بي اتنفس مثلك فاخرج بركانا من الوحشة
اذا ادعوك لبوست جديد
انتي من تكتبه
عنوانه
ماقادر يتنفس
ونتلاقا هناك ياشيري

luky

سلام مربع

نجلاء عثمان
شاعرة سودانيه ناعمة
الحس
ومفرداتها مخملية الملمس

قرأت لها في صحف سودانيه كثيرة
لكني لم اطلع على ديوانها بعد
وهذه قصيدة طويلة
ساحاول ان اكتبها كاملة
تسلم ياسيدي للطله

serenader

ماتقول لي لكن
الدعوات الماحقات
الساحقات
الموديات في ستين داهية
ماعندك
نفسة كربتي
وفشيت كبدتي
شوية
فيهم تاني بالله زي ديل كده


ود رمليه

تسلم ياسيدي للاطراء
وانشاء الله ماعدمناك
وظبط ليك عدد واحد بوست
مخصوص عشان خاطرك
هذه دعوة مني للالتقاء هناك
سلمت ياسيدي للطله

شيري سلام
هذا هو المكان الوحيد للتنفس
اتجول بين محطات التلفزيون المختلفه ساعيا وراء الاخبار
فاجد الساعه امامي في هذه المدينه الموحشه القاسيه كقسوة اهلها
الذاهبين للحرب وكانهم خارجين في نزهة صيد
هذه الساعه علقوها امامي منذ ان خرج كبيرهم واذاع بيانه الشهير بطرد صدام من وطنه
هذه الساعه ماشه في عدها التنازلي حتي يحين ساعة الموت للاشرار
حلف الشيطان
ختي يستريح عمنا بوش وعمنا بلير الذي لم يذق طعم النوم والراحه
مسافرا من بلد لاخر
ليس مهما لديه ان الراي العام في بلده ضد الحرب
ليس مهما ان يستقيل الوزراء
ليس مهما ان يقف العالم كله ضده
هذه الحرب المقدسه
وهذا النفط الرهيب
وهذه العقود اعدت منذ امد لاعادة التعمير
قبل الخراب تعاقدوا علي اعادة التعمير
ارسل الي احد الاصدقاء دعاء قال لي اقراءه وارسله لمن تعرف
والله اني استحي من الله ان اساله النصر
ان تنصروا الله ينصركم
فهل نصرناه؟
كيف يستجاب لنا وماكلنا ومشربنا وملبسنا
كيف نطلب النصر ولم نعمل له؟
ونحن نرزخ تحت حكم الشيوخ والتيوس وكمان قالوا الجنرال الورع
امه ضعيفه هزيله
حينما يلتقي البطال في مواجهة باطل اخر فالنصر حليف القوي والاكثر جهوزيه

هترشه كتيره؟
ولكن انا والله مهموم
علي قول احمد زكي يماني انا والله مهموم من اوبك ومغموم
اها اوبك الخا تودينا في داهيه
سلام واسف للاطاله والكلام الما عندو معني

حسن -6
سلام مربع

ياهذا كل هذا الكلم الدسم
وبرضو تقول عليهو ماعندو معني
طيب اي كلام بعده يحمل
معاني؟؟
يا اخي والله انا ايضا
من موقعي في المطبخ
خلف حلل لا ادري ماذا تحوي لانني
بصراحة لم يفوضوني يوما لاقرر ما الذي يجب
ان اطبخه لهم ..
فقط يسالوني ماذا تريديني وفي مرات كثيرة
لعلك ماطفحت .. ومع ذلك بكل دناوة الدنيا
اطفح ..
وهذا الطفح يذكرني هنا اسياد الجزيرة العربية
وهم لا يخيرونهم ..بل يؤمرونهم ان يطفحوا ماطبخوه لهم
كل العالم مهموم وكله مغموم
حتى الامريكان الذين جاطوا الدنيا وتركوك وحدك
مع ساعة معلقة على الجدار
تهرول مسرعة صوب الخراب
هم ايضا مغمومين ومحبطين
نعم نحن لم نفعل مايستوجب الاتكال على الدعاء
لكن مع ذلك نحن في ارض الله وتحت سمعه وبصره
وارضه وسماه
اين نفر .. ؟؟ وليس لنا اله سواه
ولا ملجأ منه الا اليه
لذلك سوف نرفع اكفنا بالدعاء
لانه هو ربنا .. وربهم
ونحن المظلومين والمغلوب علينا
لذلك لا تييأس ولا تغنط من رحمة الله
مهما كانت خطاياينا فانه ايضا سوف يغفر لنا
ان استغفرنا وان جعلنا تكالنا عليه
سلمت ياسيدي للطله
وسلمت اكثر للكلام الحلو الذي زينت به صدر البوست

HOZY

تسلمي يا اموره
وعليك الله كتري ليك من الدعوات
الماحقات
الساحقات
ولملميها وجيبيها لي
انت ادعو
وانا بدعو
الله يرحمها حبوبتي
افتقدها بشدة
لو كانت في . كانت دعوة واحدة منها
كانت لحقتم امات طه
سلمت ياسيدي للطله
وسلمت اكثر للاحساس التضامني

والله شكيتكم على الله يابوش وبلير
كان مليته شيري بالكوابيس وخليتونا نهضرب ليها بي جاي

والله يستر من اللي جاي

شيرى سا اشتر الزهاجى
وانبل المدبرسين
واذكى المجنترين

انا دى الشكيت زهجتى على الله الما خلتنى اقرا بوستك دة
كان زاتو ما زهجت
جنترتك بطعم الهزيمة ورائحة النعناع
والله يا شيرى انتى فنانة
بس جرى شنطك وانكتى ورقك وشككى اهلك فيك وداعى اصحاب الفخامة وكبى ليهم شاى حار فى فخامتهم ان شا الله تنشوى زى عنقرة سيرلانكيتكم
وموصى جلالتهم فى كورة وكبى ليها موية وتلجة واشربيها
وسوى لى معاليهم الوجع
الوجعة الترضرض عروشهم وتجلبط كروشهم كان بشتنوا علينا فهمنا ، ومسخوا علينا العالم

ووالله انتى فنانة

شيري انت اشتغلت في صالون حلاقة

والله الحلاقين خلو النضمي الكتير دا

وكفارة سمعنا انك كنت متوعكة

انا طبعا قلت بيكون جاها داء الكيبورد

يعني الكيبورد عندك بيكون حلج

لك التحية

تماضرتي
حبيبةالبي

يا انت يا شكل الابداع
واستاندر كل الفنون
ملأتيني فرح وفشيتي
كل كبدي وكلاويني
وبطيني الايسر قبل ايمنه
بدعواتك التي افرحتني
واخرجتني من قرفي واحباطاتي
وحالتي انا كنت جاريه اشد لي سلك
عندي عمه في ديار الشايقيه
وريثة حبوبتي واللي هي امها
في الدعوات الحامضات
التي تسحق وتمحق
وتهرد الكبد من ما تطلع من الخشم على طول
كدي شيلي نفسي وانجمي
وااخدي ليك جغمة موية
بردي جوفك .. وتعالينا يابت امي
في السهلة ديك ومن غير مانكشف رسينا
وشايفه سيريندر برضو ماهين في الدعاء
ونعلن مسيرة مليونيه دعاوية
وكل زول يشيل ويدعو عليهم
انشاء الله بحق جاه النبي
ويابركة دعاء الوالدين
يابوش ويا بلير
تصبح من دربكم عميانين وطرشانين
وخرسانين
لا تلقوا اليقودكم ولا تلقوا اليفهمكم
ولا البفتشكم يلقاكم
كل امريكا وكل بريطانيا
تشيل تدور عليكم وانتو لا هنا ولا هناك
انشاء الله البتفكروا فيهو لا يتم ولا يبدأ
تفضلوا كده لافين صينيه
امين يا رب العالمين

سلمت يا تماضر للطله وسلمت اكثر
للدعوات الماحقات الساحكات

نقلا من بوست الاخ ياسر حنا
امنوا على هذا الدعاء

امنوا معانا ياجماعة



يا ودود يا ودود، ياذا العرش المجيد، يا مبدئ يا معيد، يا فعالاً لما يريد،

أسألك بنور وجهك الذي ملأ أركان عرشك، وأسألك بقدرتك التي قدرت بها على جميع خلقك،

وأسألك برحمتك التي وسعت كل شيء، لا إله إلا أنت، يا مغيث أغثنا يا مغيث أغثنا يا مغيث اغثنا


آميييييييييييين يارب العالمين

اساسي
سلام مربع

العتب عليك انك عملت الرد في النص
عشان كده ماشفتوا

انت اشتغلت حلاق قبل كده برضو
؟؟
انا الهترشه .. عايشه بيها
تفتكر الحلاقيين ح يشتغلوا
في ايام الحرب دي
؟؟