Post: #1
Title: شــن أقـول
Author: kabashi
Date: 03-10-2003, 10:46 AM
يا زمن طال البعاد
الدنيا غيمة غابت شمس الأمجاد
غالبني القول في الزمن الرماد
شـن أقول لسيف جدي الماضـي؟
شـن أقول لدماء سالت عزيزة روت البلاد
وشـن أقول للشهداء البقوا للوطن أوتاد
للمهدي البطل النبيل فارس الجياد
لأمنا مهيرة مهر الوطن الممداد
كيفن أردد مع الخليل
عزة قومي كفاك نومـك.. ؟
وعيوني يوما ما عرفت سهاد؟
شـن أقول لشيكان الأنتصار
لكرري .. للنخيلة .. لأم دبيكرات..
لأبطال أرعبوا المـوت بالثبات؟
شـن أٌقول لفروة التعايشي الما مـات
شـن أقول لأخـتي سـت البنات
زمان الفوارس والأبطال عدى فـات؟؟
غالبني القول والله.. والكلام بقى محـال
السيف نام في الغمـد وتكسرت في أيدينا النصال
وملأ سماءنا صياح أشباه الرجال
وسودت جدرانا كلمات النضال
لحن مشروخ مل من الترداد
قولوا لـي
كيفن عاد غاب قاموس الجهاد
وأستبدلت سيف جدي الصارم بعصا البليارد..؟؟
كيفن لففنا بياض تاريخنا بأعلام السواد؟؟
فالوطن الممدود يعبث فيه الجراد
وعرين الليوث يغزوه الجداد
|
Post: #2
Title: Re: شــن أقـول
Author: almohndis
Date: 03-10-2003, 09:56 PM
Parent: #1
اخى
kabashi
قول يالطيف
|
Post: #3
Title: re:المهندس
Author: kabashi
Date: 03-11-2003, 08:22 AM
Parent: #1
اخي العزيز المهندس
ما قلنا يالطيف من تبينا لكن كمان يا لطيف دايره لها جكه كما في الحكايه(قالوا الجماعة دخلوا ليهم معركة ومعاهم واحد فكي وكان الطرف الآخر متفوق عليهم في العدد الا أن الفكي طلب منهم أن يقعدوا وما يخافوا وهو بيعمل ليهم ساتر بياسين وبالتالي الحراب ما تصيبهم وبعد شويه الحربه وقعت جوار الفكي وهنا قال لجماعته يا أخوانا هوي يس دي عاوزه تساعدوها بجكه) لذا فالجكه مطلوبه ولنقرأ قليلا عن تاريخ انتصارات لنستلهم دروس الانتصار ومارس /ابريل ليست بعيدة.. مع المودة
|
|