سيرة السُرَّة بت عوض الكريم

جات داخلِي
زيْ مرقة غضبْ
من جُوف حليم
في زمن صعبْ
رمت السلام
زي شنطة
من كتف المسافر
بي تعبْ
زي رُدْخَة
ربْ
الله يا رب
قعدت على طرف
العِنِْيقرِيب
المحاذي الواطة
ضايرت التراب
كُسَر العَوِيش
الفوقُو
شالت بإصبعَه
وشختت شخِيت
الله يا رب .
عاينّا فيها
نكُوس سبب
للكفرنة
وفورة الزهج
من دروة البال
الوهيط
ما عودتنا
تدس عوج
تكتم فرح
زي حالة
الزول البسيط
صنقعنا
في قعدتنا
راجعت الوشوش
دنقرنا
عند رفعة وشيها
المُتعَب
الجاد
الرحيم
الطيِّب
السمح
المعافى
رِهاب .. رهاب
ينشاف وسيم
إنوهطت
فوق العنيقريب
القديم
ومن تاني
ضايرت التراب
كُسَر العويش
الفوقو
شالت بإصبعه
وشختت شخيت
وقالت ..
تصدِّقوا ؟!
يا ولادي
بقيت
أبيت الليل
مكتَّفة
في التميرات
القُدر فوق رأسَه
ما خمّت سبِيط
غلبَه الجرُورة
الفوق ضهرنا
تنزِّلَه
وتطلُق وشينا
مع الجماعة
إشِن دهانا ؟!
دي كم سنين ؟
والحال وقف
قطَّ وحلف
ما فيهُو لَو نُقَّاط
بسيط
كان بوشنا
في حشَّ التمور
الليلي دُوشنا
معَ اللقيط
أي لا حِكت
هِي ولا بِقت
ما كُنّا قايلين
في حياتنا
يجينا أقسى
من المضى
ساعة مروق
الإنجليز
قُلنَّا الظُلم
فات وإنقضى
تاريهُو كَمْتَر
وقام دقون !
حلْفِي !
وعُشر !
مَعَيُوقَة !
نال ؟!
دِمْسِيسْ !
ضِرِْيسِي ؟
وشوك جُمال ؟!؟
...
...
الله يارب
كُربَك كُرب
عاوْلِي التمور
الأرضِ بُور
الناس حطب
باجُور شهور
غلبان يدور
ما فيش مطور
ويجيك بعد دا
علِم طَلَب ؟!
...
...
الله ..
يا ربَّ
العالمين
الما جحدنا نِعِمْتُو
في الشُوف
والسمَع
راحة الولادي
ولا قلوبنا عِمَن
ولا غيَّرنا دين !
في الجابُو
ما قصَّر حَمُد
في الشالُو
ما قلنَّا لُو
وين
ماشيبو ؟
وين ؟!
...
...
عدَلت نعال
مقلوبة
في الجيهِة اليمين
حدَرت يسار
زمناً مو دا
الحيكومة
كانت بت حلال
بي حالَه
بي حرب الجنوب
بي قِلَّة المال
في الجيوب
كانت
رخيِّة العيشِة
إلاَّ تَرَا العوِين
الكِبْرُوا
كِبْرُوا مليَّسِين !؟
عِلِمُن يطير !؟
إن كان هُو
ما صلَّح عوج
ما فادنا شي
ومحَق القبيل
لمِّينا
هِينْ × هِين × هِين
آ حليل رجالاً
سكّتن
غدراً غشاهن
بالقفا
ولليلِة سيفُن
في الجفير
يهرِج سنين ؟!
...
...
دا زمن قواسي
زمن ضلالة
أوانطجية
زمن حقارة
زمن مُهين
لاقين هواكُن
ضرُّوا
ضرّ يا عسكرياً
ما اتَّعظ
كتل الرُقاب
بيودِّي وين !؟!
ضرِّي
آجلاليباً رُهاف
زمماً خُفاف
ضرَّ يا ضرَر
ضرَّ يا دقين !؟
منسلبطين عَرَق النبي !
وبالنار بتلعبو
يا عَوين
للحُول قريب
درب السلامِة
تخوجُو
بي درب الحرب !
غطيي قلب ؟
ولاَّ الحرب
بقرة حلِب
والأرض صين ؟!
ما كان عمل
ما كان دا دين !
يا أرزقيِّة
تخمجوا دم
والدم مُو
مُويا
ومانا طين ؟
منسلِّطين في الناس
دَحِين
لامِن يجي
اليوم الفصِل
والحق يبين
وين
تمشُوا
وين
تنسلُّوا
وين ؟!؟
وكان طال
وكان قِصر الزمان
الحين بحين
كَب يا رجالاً
سكّتُن
غدراً غشاهُن
بالقَفا
ولليلِة سيفُن
في الجُراب
يهرجِ سنين ؟!
...
...
وإتاوَّهت ..
وحسِّيت
بأعماق الشوارع
والتواريخ المجيدة
إتأوّهت
وأدَّتني عين !
صنَّت شِوَيْتِْين ..
كُوركَت ..
يا بت ..
شمشنا إندهدَهَت
هُوي
يا بِنيِّة وِكتنا راح
شُوفِيلي
شافِع بت فطين
جاء من الطحين ؟!
الله !!
فترنا
من الطحين !!؟
...
...
وكان الوكت
زالَف عصر
عين الشمش
مشدوهة
بي دوْشَة سحاب
عرَق المراكبيِّة
البعاد
راحِل
معَ ريحة التساب
ما تدري مارقِة
من البيوت
الحلِّة
ولاّ من التراب !؟
التاس تقول
مدقُوقَة
طالعِة على الحُقاب
مفلوقة
بي حجر الصعاب
المُرَّة
نازلِة على البحر
مشروقة
بي موية السراب
الفرَّ
مشنوقة عقاب ؟
يا الحُرَّة
كيف بِقت الرُقاب
مسْيوقة
بي قيد السلاب
وإنشرَّ
من نشر الحجاب
في عروقَه
أشكدِّي الخراب ؟!
من بعدِ
ما انبلج الفرج
من ضِْيقتا
خدعوها
بي حيلة كتاب
رفعوهو فوق
سِن الحراب
ودهت الهزائم
خِلْقَتا
فالناس بدَل
عن نِقَّتا
التلقى فكَّة ريقتا
وبدل القصور
الفي الخيال
التبقى ماهلِة
كِرِْيرْقَتَا !!
وما جاتَه راحةً
طَلَقَتا
إلاَّ التعمِّر
طَلْقَته
في بندقيةً
حقَّتا
وبي ها الشوارع
وبقَّتا
تنسدَّ منَّك
دقَّتا
ودم فلْقَتا
ومُر شرْقَتا
ونار شنْقَتا
يا دقن
دينك سرْقَتا !!؟
قطعَت وضوها
إنشرَّفت
مسحَت وشيها
إنشهَّدت
قالت نِست
ما تاقت الأوضة
التِحِت
عند مرْقَتا !؟
دارت تقوم
جَبَد العَنيقريب
الحنيِّن
طِرْقَتا
عند نتْقَتا
رجَفَت بِشيش
رجفت بِشيشي
من الغضَبْ
ولاَّ من التعَبْ ؟
فتَر السنين ؟
ولاَّ الكُبر ؟
دا الما قِدِر
يمْسَح
سماحة خِلْقتا ؟!
زي نِيَّتا البيضاء
الشَعَر
وموِّيج بحر
كان الجبين ؟!
...
...
مدِّيت يميني
أساعِدَه
ردَّت يسارَه
تباعِدَه ؟!
وقالت لِي
أبوي ..!
وفِّر ضُراعك
للبلد ؟
وأدخُر مُرُوَّتَك
آولد
لي يوم بحين !
أحفض كرامتك
تحفضك ؟
الموت !
ولا العيش المهين ؟
الموت
نَفاد الما نَفَد
الموت
حياة الميِّتين
أَخَتاها جنِّة
معَ الفِقَر
وأدخُل
جحيم المتعَبين
وإن ما قِدرْتَ
علي دا
أبوي !
رب لك
دقين ؟!
وضحكت ..
حمدنا الله
الحنون
جِيدَن خَلَقْنا
بلا دقون !!؟
وضحكنا زين
!!؟
؟؟!
وتاقَت حديثَه
على الخراب
الشُوفتُو
ما دايرا لَه عين
عقبت متاقاتَه
الرياح
رفعت قُران
شوكة سنط
ساسُويِي
جايي من المراح
يا خيري ودَّ
دي المستراح !
والشوكي
تحت الدُوكي
يا
داك الركين
الشوك
بَمُرْقَ الشوك ؟!
وشوكاً فينا شين ؟
مرّاقو ربَّ العِزّة
شعباً ماب يلين
الجايي
حيكومتنا
لكن الزمن
دِبُّويي
داير النهمِة
وينكن !!
يا الخزين ؟؟
ما قلَّ حاشا صَبُرْنا
لَكِن لا مِتِْين ؟!؟
دعكت عيونَا
التوَّّعت
مسحت وشيها
وصنْقَعَت
كان الغيوم
إنجمَّعَت
تِقْلَت على الريح
النصيح
كان المطور
شوَْْوْوْ
ترَّعَت
زي باكي
فوق دمَّ الحِسين ؟!
لكن دا وين !؟
والتاني وين!؟
وإتلوَّعت
معقول !
في ناساً ما وِعت؟!
لليلِة
بالن بيَن بِْين !!
وكيف
وإنتو نوحنا
من الدَعَت
مؤمنَّا
من جُحر الدقون
الكاكي
يلدَغ مرَّتين
والتالتِة
قرْصَة أبُو الحِصين !
وحسِّيت بأنها
دمَّعت
شهقت عيونّه
الدمعتين
حسِّيت بأنِّي
مِتل حجر
جدعوهو
في نُصَّ البحر
قام البحر
بنَى فوقُو طين
حسِّيت
بأعماق الشوارع
والتواريخ البعيدة
إتأوَّهت
وأدتني عين !
...
...
ومرقت ..
...
...
متِل دخْلَة
غَضَب
صدر المسامح
والحليم
في أيام عجاف
كرَمَت ..
صداها ..
قفا السنين
...
"الجايي
حاكومتنا
كيف !
ومتين !
وين ‍؟"
...
ومرقت ..
مَرَاة
مرَقت
مرَاة
...
...
دي السُرَّة
بت عوض الكريم
مرَاة ..
ماب تلاوِز
لاب تخاف
زي الضفاف
الماب تهاب
ضَنَب التماسيح
والكلاب
قُومة البحر
ولاَّ الجفاف !
مَرَاة من قديم
مَرَاة بت قبائل
قالوا
لا
واختاروا في الحق
الجحيم
ومن رِفقة الفَسِل
الخلاء
وكانت نَعم
تدِّي النعيم
...
مرأة من صميم
ضَهَر الغلابى
الماب تنكِّس رأسه
غير ساعة الصلاة
أو ترمي تيراب
في التراب
أو تستشِف
وجهَ الأديم
...
...
السُرَّة
بت عوض الكريم
ما فيها
من عادة الحريم
غير السماحة
القدَّمت
قُدم الدهب
حافضنو
في حُقاً قديم
في أقصى كِيم
ما فيها
من طبع الرجال
غير الأيادي
الخشْنِة
زي قولة النصيحة
وكت تعكِّم
في الصميم
ساعة يكون
الحُكمِ ضِيم
...
...
...
تسعين سنة ؟!
ويا السُرَّة
بت عوض الكريم
بصرِك بصير
سمعِك سميع
نضمِك نضيم
بالِك محلُّو
صبي وسليم
تسعين سنة ؟!
وعُودِك أمدَّاً
ما انحنَى
شامخ
بلا البان القديم
تسعين سنَّة !
ومن فِتنتِك
إستغفر الله العظيم .؟!
...
...
جُوكي الرجال
آ السُرَّة
بت عوض الكريم
مِن وين
ووين !
لا الكلُّو طين
أغراكي !
لا السمِح الوسيم!
آ السُرَّة
صددتي المشايخ
والعُمد
مُرساله ليك
ضيعتي بي أنِفة
البشارة
عليهو
كيف قلبك
صَمَد
يا بت
قصاد المغريات
والبشروك بالجنِّة
من فُقراء البلد
أسقوكي بالغفلة
المحايات
ما نفَع
رُتباً كبار
قلتِي له لع
شعراء ومغنِّين
ختَّ فيك
دُوداي غناهُن
ما شفَع !!؟
الجان يجن
والهام يهيم؟!؟
والإنجليزي
أسلَم
عشان
خاطر هواك
ساعة طلعتي
تجيبي
عود السِْيسَبان
إنصيَّدِك
يا السُرَّة
بت عوض الكريم
مرقَنُّو
كرعين الحصان ؟!
والجاك ناط!
كتَّفتي بالليل
في اللمينِي ؟!
معَ الفجر
طلبِك عفُو
وسُترة !!
وعفيتي
سترتي
يا السرة القويِّة
بقت لُو
توبة سوِّية
من هتك العرض!؟
يا بت ها ..
كيف بعد الحسين
ما تاورِك قلبك
على زول
في الأرض ؟!

؟!؟
؟!؟
ستِّين سنة !
ويا بت
بلا النيل
وحَّّدِك
واقفاها !
هُو النيل
انحنى !؟!
ستّين سنة !
وما جهْجَهِك
فقْدَ الحسن ؟!
لا يفْقَهِك
فجع الجنا ؟!
فجع الجنا الوِيحيد
تحت خيل
ميجر السجم الرماد
الإنجليزي
وكِت مرورُه
على العباد
وجناكي
ناش عين الحصان
بالنبلة
ناش طربوشو ؟
"قِيحَا" العسكري
إنحمَّى وحَمَطْ ْْْ
بالسوط
جناك
فِطْنَ المِسيمع
وما إتلفَت؟
والهاشم الواقف
وقع
والدم هدرْ ْ ْ ْْ ْ
كان
زي محمِّر
في الكجَر
في إيدُه
قابض نبلتو
وفي التاني
غامِد للحجر !؟
صرخَت "صليحة"
وشكَّعت
فوق قيحا
كلبينا الزُرق
ومن يوما داك
ما شافتن !!
صيحة البطان
قـيـ ي ي يحا
البغل ؟!
نهمت غناء
غضب البنات
عند زفَّتن
فِسْ يا كديس
الإنجليس
كلب التُرك
يطفُر من الفأرة
وينِيص
يا مكْرِي صبْرَك
يا رخيص
الفافنُوس !
البوص !
لِحايةَ الهَرْدَبِيس !
تمر البلد
شال شيلة جَدْ
إلاَّ الحصايتك
شيلَه صيص
كُوس لك بلد
بلدك وأباك
رفَسَك رَفيس
نفَضَك نفِض
بلدك تضاضي
ولا مغيث
قلبَت عليك
بطْنَ الرجال
شقِّيش تقبِّل
يا خَسيس !؟
آ قيحي
حظّك في الحياة
وفي الميتي
أماني
هُو
مُو التعيس؟؟
؟؟!
عِفْنَت كَرِشْتَك
دُون تُرَبْ
منفوخة للغربان
فطيس !
وفوق سكَّة
الماظ الصَعَب
هاشم حلالي
قدل
عريس ..
هيلا ..
آ .. رجالاً
عرْسِتُن
شمش المشارق
ليها مِيس
هيلا ..
آ ..
رجال !؟
هتفت نفيسة
وحرقت توبَا
الوحيد
عقَدَت شديد
قُرقابَه ..
حافي
ودون قميص
جرَت الكَرارِق
زي بَرِق
لفحت
من السحَّارة
لي هاشم
حريرة ..
وقرمصيص
؟!؟
؟!؟
وكان الفريق
إنخمَّ
ما فضَّل بشر
ما هزَّ
زلزال الفجيعة
المُرَّة
والدمََّاع طَفَر
دايرات
يَوَيْوِيِن
الحريم
صنن ..
وكِت صوتِك
نَهَر
وكيفِن
زفتِّي وشي
ونعلتي قفاهُو
شيخ الحلِّة
حين قال لِك
قَدَر
ولمِّيتي هاشمِك
ونبلتو
وفي إيدو الحجر
صبغ الحريرة
القرْمَصِيص
الدم مَلاك
لمِّيتي
زي لمَّة ملاك
آخر عمل خير
في البشر
جاكي الصبُر
من وين ؟
ولا قلبك رَجَف
لا آهة ..
لا دمعاً طفَر
رشرشتي
بي إبريق أبو
وبي دمُّو
نِبْلَتُو
والحجر
خيط الحريرة
القرمصيص
كفنتي
بي رَفَت القماش
الساكُوبِْيس
الخاتَّة
لي يوم الطَهُورة
مرقتي ..
لاقوكي الرجال
بين الغلُب
ينقلَّبو
ومتحزمين
زي يوم أبُو
ودمع الرجال
هزّاكي
آه ..
خارَت قواك
طفرَت دموعك
والحريم كسرَن
عليك
قلدوك
رجالات الفريق
فوقِك ضيْ الشمش
إنتكى
وبعض المراضى
المُقْرِفين
قلدوكي
لي شي
بلا
البكاء ؟!؟
؟!؟..
؟!؟..
وكانت دي
أوَّل مَرَّة
ينبكي في الفريق
وبي حُرقة
زي كل الرجال
الخيِّرين
درفون ..
ضَرَب بالنبلة
طربوش إنجليز
عوَّر
حصان الإنجليز
ولا إنزحَّّ
لا زاغ
لا جرى؟!
وكانت دي
أوّل مرة
شافع في الفريق
وبي حُرقة
زي كل الرجال
الناس تشقَّ لُو
ود لَحَد
في مقبَرة
سبَّلتي
ما انقطع الدرب
دفقتي
بي قرعُو
الطَشِت
فنِّيتي في البئر
النحاس
جاء
طشت جديد
وقرع جديد
ونحاس جديد
وما إنترّوا ناس
ناساً تقلّب الواطة
من فوق لي تحت
لَوْ لاقي رأس ؟!
...
...
دور والمعاك
ما اتفرقوا
وين وشِّك
الصعَب
الصلِب
كان صرَّ
في الريح
بعزَقُو
وإن ترَّ للغيم
دفَّقُو
وإن حرَّ
في الموج
غرَّقو !؟!
آبت كِضب
معروفة
ما مِن قوةً
تحمي الفرح
ولاَّ الترح
حين إندلاقُو
على القلِب
...
...
...
لي دُور
حديث المُنْغَلين
ما إندلَّى
من فُورتُو
وهَبَد
دمّاً صعَد
من ها التراب
لابدَّ من
ينزل مطر
رحمة وسعَد
مابروح سراب
هاشم
نجمة الفنجرة
نشهد
على إنّك ولد
طمّنت
بي فعلك بلد
من أولَّه
ولي آخِرَه
رجَّعتَ أبوكا
من القبر
قصّرتَ لسنات
الكُتُر
بكَّّمتَ
خشْمَ المسْخَرَة
فزِّيت رجال
جوفُن غريق
بس كيف نضيق ؟
ضيقاً عميق
ويبقى الحجر
فلْخَة جبل
والنِبلة تصبِح
منجَنيق
أو بندقية
معمَّرة ؟!
ساق نخلة
في الطين الطري
نازف
تفِجَّ المقبرة
قصب التواريخ
ينبري
ودمّك
عمار المحبرة
نشهد
على إنّك ولد
يركان جسارة
ومفخرة
زي ما شهدنا
على أبوك
فرسان قبيلتك
من وراء
ويا السرّة
بت عوض الكريم
إنَّك مَرَة
ولدك جَدَع
ماب يندبُو
حَيْ
في وليداتنا
الدَشَر لِعبُن
طعيم النوم
أبُوه
ولدك بخيت
ما دام رقد
في صدر أبو
ولدك شفيعنا
مع النبي
ولدك يمين
يكفينا كلّنا
مغفرة
وهنا دا الدرب
حِرّة قلِب
صرَّة وشي
وولدِك وعدنا
بكل شي
ومافي إيدنا
حاجةً نخسرَه ؟!
...
...
ويا السرّة
بت عوض الكريم
معَ إنّو
كم سنوات
ولا بحراً طمح
لا سمانا
كانت ممطرة
كان كلِّ ما نحفِر
يلاقينا الترى
عند جينا
لي دفن الترب
حسِّينا
كم ملكاً دفَن
جات غيمة
من دون الوكت
جات نسمة
هبهبت الكفن
وبي دمُّو
نبلتو
والحجر
خيط الحريرة
القرمصيص
دُخرينا نام
يا السرة
في صدر الحسن
فاتونا
بي قدم الصلاح
سبقوك
على جنّة عدن
وسابوكي نخلة
وسط رياح
بين الزمن
لكن ضراعِك
هو الضراع
على رغمِ
أقداراً قِسَن
ماسكِة الشُباطين
في ا لصراع
لا بودي
لا سُوس
لا وَهَن
تابِِر قليبك
زي شعاع
ما غيَّرن لونُو
المِحَن
بالِك متل ضلّك
وهيط
عبَرَت مراكبك
بي شراع
صبر إحتمالك
كم محيط
وورُّونا
في الزمن العبيط
يا التُربة
يا كلَّ الوطن
ما فيش وسيط
إلاَّ الصراط
المســــتقيم ؟!؟
...
السُّرة
بت عوض الكريم
الله
أيا مَرَاة
من زمان
الله أيا مرَاة
من قديم
سلطان
وعند فزع البلد
مملوك ..
نشيط ..
عاديِّة
زي قولة سلام
حلوة لسان
لكن إذا تغضب
سليط
...
...
مرَاة ..
ماب تفرِّط
في الزمن
وفيها الزمن
لحظاتو أبن
ساعة
مروق الإنجليز
ضبحَت
غِنِْيمايةَ اللبن
طلعت
علي ناس القبور
كشحت وراء
طَرَف القُبب
عِْيشَه المجوِّدَه
للطيور
ومن زمْزَمِيْتَا
والدموع
رشَّت قبر هاشم
عقُب
قبر الحسن
والباقي فوق
كل القبور
وفي توبَه
صرَّت هين
من القبرين
بعد ما إنبركت
بَرَكَة عِشق
بَرَكَة شُكر
بركة وفاء
غيبة الشمش
جَبَرَت خُطاها
على الرجوع
والقلبِ
من شوق
ما اكتفى
ولسّع في غيمة
من الدموع
تبراها
لي طرَف الفريق
شيلة نَفَس
تطَلَع مطر
ختَّة نَفَس
تطفي الحريق
يا السُرَّة
يا دُوب يندمِل
بين الضلوع
جرحاً غريق
فاتُوا إنجليز
فوق دمَّها
أوعي
من إنجليز ؟!؟
...
...
...
مبرووووك
وحِمْدِْيل السلامِة
يذكِّرِك
ليلة الحسن
سار لِك عريس
أم مِن ضراوتُو
يذكِّرك
كتل المنيحيس
التعيس؟!
؟؟
؟؟
...
...
ناس تملأ
في الأزيار
وناس
في كل كِيم
واقدَا لَه نار
ناس نازلة
في الحيشان
تقُشْ
وناساً ترجِّع
في المضى
والجايي
سودانية مُش !؟
...
...!
...
السُرَّة
ليلَه قلَب نهار
الواطة غَبشِة
الناس غُبُش
والروح خدار
من حِلَّتَه النوم
فرَّ .. طار
باكر .. دُغُش
شدّت علي صنب
الحمار
أحموها
للمِْيجَر تَخُشْ
عقبت علي
"بِْيفَن" عَصُر
قصرت مع بتُّو
الحديث
دَهَت المشايخ
والعُمد
سفهَت
عمايل الإنجليس
"ظلم الحُكُم
ياهو الظُلُم
كان من جوامع
كان كَنِيس
يبرى السماء
تبرى
آ ..
محمد سيَّدي
ويبرى المسيح"
...
...
ورجعت
بلا الموية
الروَت حيضانَه
لي جدول فسيح
لي دُور
معلِّقِي للبخُور
في دارَه
عامِر بالمديح
لي دُور
تزغرِد
ما انقَرَش
يا السُرَّة
حسَّها
كيف نصيح
لي دُور
مع الشاي
والزلابيَة
مع الضبيح
الجُوكي
بالخرفان
سُمان
والجار لُو تُور
لي دُور
كِبِْيقاتِك تدُور
ما قصَّر الطنباري
جاك
ملك الدلِْيب
رحلت
برُوش الزاوْيَة
عِنْدِك
في الفريق
يا السُّرَة
ما خِلا عنقريب
آ .. السرة
بينات الخلوق
مرَّاتاً
الليل
آب يحوق
لي دُور
وتُكْلِك
قاجْ
تكيِّة
آ .. السُّرَة
دارك ماج
ضريح !
لي دُور
على كتف الفرح
تتعب عيونك
وتستريح
...
,,,
,,,
...
وأيام
بعد سقت الخدار
وَد إيدا
جيَّهَت العَقاب
قامت معاها
تِسِعْ رجال
وتلات حريم
بي نُوبة
فوق ضهر البخار
قالت عليها
نذُر عزيز
واقِع عليها
حَلِف قديم
إن حيِّة في الدنيا
ونصيحِة
إن كان تشوف
بي عينَا
فُوتَّ الإنجليز ؟!
إن كان
تطُق زِغْرِْيدة
في ضُلَّ العَلَم
خلُّوها
تدخُل للخَتِم
حرموها
يكفيها
الضريح ؟!؟
شُوف عين
تشوف الأزهري ؟!؟
وبي ما يكون !!؟
وصحَّ النذُر
ما راح وهَم
دمّاعه رقرق
في العيون
عن ساعة
المحجوب
نَضَم
وإنشرَّه
عند زرُّوق
بذَم !
ما كان تكون
يا قيحي
حيْ
وأنا أفِشّ مغستي
وأصفِّي دمْ
من تاني
يا رَخَم الوَخَم !؟
...
...
...
ما دام حرتناها
الأرض
تِْيربنا
بوَّغنا
ومسَحنا
قمحنا
هسّع في الوَحَم
هاشم
ولا أسفاً عليك
وعلي رفاقتك
لا ندم
ما دام بقينا
أسياد أرض
ما فُتُّو يوم
أبداً .. قَسَم
والفوَّتك
يا الإنجليس
يعقِب
علي باقي السَجَم
آفاتُن
أولاد الحرام
أكْتَر
من آفات العجم
...؟
!...
...؟
دي السُرَّة
بِت عوض الكريم
سُرَّة عَقاب
سُرَّة تواصُل
بينَّا
بين
رحم التراب
والجايي
في الزمن
الرحيم
مرَاة من قديم
ما فيها
علْقَنةَ الرجال
لا فيها
دلْقَنْةَ الحريم
مرَاة بت قبائل
قالوا
لا
واختارُوا في الحَق
الجحيم
ومن رِفقة الفسِل
الخلاء
وكانت نَعَم
تدِّي النعيم
مرَاة
من صميم
ضهر الغلابى
الماب تنكِّس
رأسَــه
غير ساعة الصلاة
أو
ترمي تيراب
في التراب
أو
تستشِف
وجهَ الأديم
.؟.
.؟.
.؟.
جات داخلِة
زي مرْقَةْ
غَضَب
من جُوف حليم
في زمن صعب
ومرقت
متِل دخْلَةْ
غَضَبْ
مرَقَت
مَرَاة
مرقَت
مرَاة
يا الُسَّرة
لِيم ..
يا السُرَّة
لِيم ..
يا السُرَّة
لِيم
يا ..
...
...
...
-
يا جماعة الله الشاطر فيكم يوهِّط السُرَّة فوق البوردويخلِّيها تأخُد راحتها في الكتابة عشان تنقري كويِّس ..وسلام وأهلاً بكل الذين بهم مسٌ من وطن ودائماً حِم ميد إن سودان

استاذنا هل لنا ان نطمع بكرمك
وتتحفنا بالجديد من الاعمال

خواض

ممكن أطمع معاك؟


وتحية لهذا المبدع الأصيل




ودعزة

واحلالنا بيك

حميد اخوي
هميم الود و كثيف الحب و الاشواق
انا سعيد و انت تنسم هذا الحوش الالكتروني الوسيع
تستفزني الي درجة الطرب شخصياتك الدرامية و احمل عبء تقصيري في الكتابة عنها و حتما سافعل و لكني الان احاول ان اخلص تفاصيل الحلم عن تفاصيل الكابوس
هل قابلت عبد التام ذلك الذي غرز فأسه في الطلحة و هجا الي السعودية؟
هل استطاع راشد ان ينجو من مطاردة دفارات الخدمة العامة ؟
هل لا زالت الجابرية تحيي الثورة؟
وماهي اخبار تلك المكواة التي يغشاها الزبديين حين يتكرفس توب التقوي؟
وهل لا زال الحمام ينقر خرج الوكت؟
حميد
تحياتي و دعني لحلمي بلقاء قريب

الزول السمح حميديمضي الزمان وتبقي واقفا كالسيف وحدك

تظل مشدود
علي ضهر المسافة الفاصلة بين الضحكة والوجع البهد الحيل
وما تقدر تفوت قدرك
مهاجر ديمة لا مات الحلم جواك لا تعبن ضهور الخيل
الاخ الخواض لك الشكر واضم صوتي لي صوتك وصوت ود عزة
راجين الزول حميد
عبدالله جعفر

Up

up

التحايا لكم
ولهذة الكوكبة
و
لهذا الكم من الابداع
ربنا يحفظكم

اخوي حميد
ما اروعك
وما اروع السرة
وتصلك الصور قريبا

امريكان فى كل مكان

ديل غالين الخلق غلى

كلمات حميد

.
.
.
.
.
.
UP

الانسان الشفاف حميد
لك الحب 000والحب الاكيد
يمكن الان ان نقول لقد ان موعد نوريق ذلك القيساب من الشوق
وفي انتظارك دوما يا زول ياصاح زمن الغلط0000ودمت ايها الرائع

حميد
حميد
حميد

يا حميد
أقيف
شوف الخلوق
محنانة

.
.
.
يا روعتك

Dear Himmaid
Al-Salaamu aleikum wa Ramadan Kareem.
Firstly I would like to thank you for your wonderfull poem.
I'm not sure wheither I'm writing to(Himmaid) Mohamed elHassan Hassan Salim or someone else.....because I want to get in touch with him as an old friend ,and very eager to talk to him.
Secondly I would like you to continue to post more of Himmaid's poems if possible, he is The Greatest poet I've ever met. God bless him for his wonderful words to reflect our true,wounded, violated society as Sudanese.
Best regards
Wad elHussein---------alAraak
With Love

ya humaid .. i wanna make sure you are humaid -i mean the original one- the one who made in Sudan
AFTONA

العزيز جداً
والغالي خالص .. حميد

أكاد لا أصدق عيني .. أن ألقاك في هذا البورد .. وبعد المكالمة الهاتفية أمس بخصوص (عروس الطين) .. كنت أود مهاتفتك اليوم لإبلاغك بأن الفنان يوسف الموصلي قد حصل على الموافقة ..

الجماعة هنا كلهم كويسين .. الطيب الشيخ .. الكارب .. أحمد حسين .. والبقية ..

لا زلنا نقبض على الجمر .. وعلى وعدنا...



نجم الدين علي حسن

لو كنت وزير تعليم كنت قررتها بدل المعلقات والعينيات

تكريم منو مادام حاكمنا الجبر فرقنا بالدين البلمنا
تكريم شنو مادام لساتو ندهي البنادي حي علي الودار حاجز سمانا من دعانا وردتنا لي دار اهل , عرب رطانة , حبيب وخل

نضميك وليدعزة حار حر
يا حر



أبنوسي

تعظيم سلام حميد

جايبالك خبير شفع العرب الفقارى
فضت الايد واتغيرت القطارا
قطارة الحاجة التلخ
وقطارة الايد التجخ
يجروا وين ياحميد ديل فطسو عديييل
والله فى

الصديق الجميل حميد

فقط واصل
وكل سنة وانت طيب

شاعرنا المجيد/ حميد
سلامات
طالما تركتنا في هذا اليتم والصحاري اليابسة، حيث غادرتنا
فأرم لنا من هناك .
ولا تغب طويلاً .

عذراً أحبابي
هذا البوست قديم لو رجعتم لتأريخه، فقط قمت برفعه لأن القصيدة لا تستحق القاع تستحق أن تكون فوق ها هنا

وعلى العموم مثلكم أتمنى أن يكون حميد مواصل البورد كي يرى كل هذا الحب ويحسه

دمتم
نادر

سلام نادر
وابشرك ..
Auditor
»dreams
»Elmosley
»farda
»haneena
»Haydar Badawi Sadig
»HOPEFUL
»kamalabas
»Mayada
»osama elkhawad
»Raja
»Rawia
»waleed500
»Yasir Elsharif
»zumrawi
»إيمان أحمد
»حميد»حنين
»خضر حسين
»دورنقاس
»عبدالله
»مارد
»مراويد
»نصار