إلى العزيزة تماضر والاعزاء د متوكل، ويحيىفضل الله، والموصلى، والمسافر

إلى العزيزة تماضر والاعزاء د متوكل، ويحيىفضل الله، والموصلى، والمسافر

أولاً الشكر الكثير لترحيبكم الحار ودمتم إخوة أعزاء، واشكر القائمين بأمر هذا المنتدى الذين سنحوا لى الفرصة لأنال شرف الإنضمام الى هذه الكوكبة الفريدة.ولا أخفى عليكم من ان قلمى يرتعد خوفاً ويحمر خجلاً امام اقلام فطاحلة الكُتاب العرب منهم والعاربة والعجم الذين يكتبون فى هذا المنتدى لان تجربتى تكاد تكون معدومة ولا اريد ان ان اقع فى ذلك او ذاك الخطأ الذى وقع فيه احد المعارف والذى كان يكتب خطابا لاحد مسنى القرية يعمل إبنه بالمملكة بقصر المرحوم الملك خالد إذ كتب العنوان فى الظرف (الى الملك خالد بن عبد العزيز ومنه مشكوراً الى إبننا محمد خليل ، لذا استسمحكم فى ان اتقلب فى كتاباتى مابين الدارجة والفصحى وقد اقحمكم ببعض مفردات الرطانة إن إستدعى الامر.

الاخت تماضر – والله كنت خايف تلصق فينى لحمة ساطور. نقول ساطور يعنى ممكن شوية لكن تلصق معاها كمان لحمة كانت تبقى مشكلة.
الدكتور متوكل محمود. ياخى والله ليك وحشة ، كمان ما أنسى أدويتك اللى كانت كمدة فى الرمدة لكن تقد الجيب، بتذكر يوم قلت لى وردى ساطور ده بيجينى بى امراض غريبة،لا انسى لفتتكم البارعة بتكريمى وحفل وداع زوجتى والذى لن أنساه الى الابد، هذه عادتك دائما يا اخى دمت ودامت يدك الممدودة دائما لمساعدة بنى وطنك ، يالشايل هموم الناس وهمك برضو قادر تشيلو.مع تحياتى للعزيز عبدالخالق بدر.

شاعرنا الكبير يحيى فضل الله - ياريت لو كنا لسع كفنجية فى السودان ، اما عن قصة تملأ صندوق الاكورديون بما لذ وطاب ،فإنت دى عملتها يعنى ما تقول ياريت وبتذكر ما خليت ضلعة طايرة وأنت أدرى بالباقى. أعرف يايحيى إنو الفنان ما بيقدر يعيش خارج وطنه ولكن انت لها وما حتلوى راسك للريح . ومنتظرين دايما منك المزيد، وما أنسى يا يحيى لمن قلت لىّ دخلنى فى الراجل ده وكنت تقصد الغائب الحاضر المرحوم مصطفى سيد احمد وكأنك تنبات بنجاح مشترك وكان ما توقعت .
العزيز يوسف - وينك يا أبو هديل باين القراية الكتيرة نستك الجديد، شايف إمتحاناتك مولعة وربك يوفق ، بس كل ما يقولوا يوسف عنده إمتحانات بتذكر كلام واحد صاحبنا لمن سأل وين أخونا يوسف الموصلى ؟ قالوا ليه يوسف مسافر
مسافر وين؟
القاهرة
يسوى شنو فى القاهرة؟
والله ماشى يحضر ماجستير فى الموسيقى
يلا يا يوسف كمل الباقى للزملاء فى المنتدى -
مع تحياتى الحارة للاخت سكينة والاسرة الكريمة ومنتظرين
جديدك يا ابو هديل.

إلى الاخ الكريم المسافر : اتشرف بمعرفتك يا أخى وشكراً على ترحيبك بى فى هذا المنتدى ويكفى انك من عطبرة المدينة التى ترعرعت فيها وسأفتخر بها إلى الأبد.

مع تحياتى الى كل الزملاء والزميلات بالمنتدى

أبوعلا

ساطور
رسل لينا
حبة حنان اكورديوني وانا اسمعك الالحان الجديده
واوعه تقول لي ماقاعد تعزف

الحبيب ساطور ونور وعلاء
ذي مابيقول فاروق جويده الشاعر القدير
لاالبعد يعني غياب الوجوه ولا الشوق يعرف قيد الزمان
أفتقدك بشده لكن الزمن غدار سوف ننتظر و
لو وشوش صوت الريح في الباب
يسبقنا الشوق قبل العينيين
وياتماضر وموصلي ويحيي فضل الله ساطور سأله أمريكا فرقت معاك قال أيوه قالوا ليه كيف؟
قال ياحليل أمريكا تجي شايل قزازة العرقي الساعه خمسه عينك ياتاجر بالمفتشر زول بيسألك مافي لكن هنا في السعوديه والله سفه ما تقدر تشيلها هاهاها...هاهاها
ياهوساطور صمت دهرا ونطق كفرا
برضه الكعبه ماسوت فيك حاجه البركه في علاء قالوا مطوع سبحان الله يخرج الحي من الميت
سلامي وذي مابغني هاشم ميرغني العظيم
يا حمام الايكي
أغريه مني السلام
قل ليه الزمان فرقنا
والكون بقالي ضلام
أشواقي
ودمتم
أخوكم د.متوكل

بوعلا
علا ياحليل تلفونات الليل.
اذا كنت كما انت عبق..فاحترق
ــــــــــ المخرج /اسماعيل محمد الحسن

لحمة ساطور،

قريبك كتب منه مشكورا دى؟؟؟؟؟ لووووووول

اظنك فى السعودية بقيت عشرة كيلو احمة ساطور، غير القطع

لكن قصة الموصلى لازم نسمع باقيها، مش بديتها؟؟؟؟ تتمهما

شكرا على تحياتك الخالصة

ولك منى اجمل منها ،


ولنور ولجميع من صافاك وخاواك فى الغربة


وهاك الاكورديون دة

http://www.suntrapyasociados.com/wafir

نؤيد تماضر ونطالبك باكمال القصه نسبة لعجزنا الكامل ولما نتمتع به منذاكره خربه تسمي ذاكرة الدجاجه

شكلك عايز تلبسنى وش القباحة يا يوسف لانو صاحب الموضوع فنان معروف
المهم لمن قالوا ليه يوسف مشى يحّضر ماجستير فى الموسيقى قام قّبل صاحبنا على العازفين اللى معاه وقال ها ياخوانا المزيكة كمان دايرة ليها قراية؟

اسمحوا لي اهل الموسيقى والفن الراقي ان ادخل داركم لكي ارحب بالفنان احمد ساطور ترحيب خاص اولا باعتباره ود اهلي وثانيا ترحيب خاص بهذا الفنان الحساس الجميل
وحقيقي يمكن الظروف والزمن العجيب جعلوني لا ارى احمد ساطور طوال سنوات غربته في امريكا ولمدة 14 عاما، ولكن تعلمت من هذه الدنيا ان هناك اشخاص مهما تبعدك السنوات عنهم وتفرقك الايام منهم فان رصيدهم الانساني الجميل في داخلك يجعل سنوات الابتعاد والزمن مجرد سطور وهمية تتلاشى بمجرد ان تسمع صوتهم وتتحدث معهم وتراهم
فذلك هو احمد ساطور
فمرحبا بك يا احمد بعيدا عن كل كلمات المجاملة ولتعزف كلماتك حتى لو كانت بالدارجي ولا بالرطانة الحانا جميلة تجعلك تعود لموسيقاك الحلوة
ولك تحية برطانة اهل بلدنا
سلام وو غيبفيا كر بلدتا نوروسو
مايا

بوعلا
وهذه دعوه لكم للاستماع لبعض اعمال الفنان الموسيقار احمد ساطور من اخر البوم موسيقى نفذ بامريكا بعنوان ريتم اوف سودان٠٠٠وياحليل تلفونات اخر الليل
اذا كنت كما انت عبق..فاحترق
ــــــــــ المخرج /اسماعيل محمد الحسن
htt://www.Yazoal.com/musicpage.html

العزيز : إسماعيل والعزيزة هدى والابناء الحلوين
شوق شديد ليكم ولقفشاتك الحلوة التى كانت تخفف عنا مرارة الغربة ولى عودة قريباً ان شاء الله

عزيزتنا مايا :
الشكر الجزيل على ردودك الحلوة دائماً وياختى انا ما ده كلو، ذكرتينى القصة اللى حكاها صاحبنا العزيز خليل عبد الرحيم عن المتظلم الذى ذهب الى المحكمة ووجد العرضحالجى وطلب منه ان يكتب له مظلمته بطريقة منسقة حتى يدخل بها للقاضى ، بعد إنتهاء العرضحالجى من من كتابة القصة بدأ فى قراءة القصة ولكن اصابته الدهشة عندما وجد المتظلم يبكى بحرقة شديدة ، فسال المتظلم عن سبب بكائه فرد المتظلم، ما كنت عارف إنى مظلوم للدرجة دى.
و دمت فخراً لنا يا بنت البلد.

العزيز الشرنوبى : تحياتى الخاصة لك ،وما زالت الدعوة قائمة لك لنذهب سوياً إلى كويكة كما ذكرت لك فى الرسالة السابقة.

العزيزة تماضر: تحية عطزة وإيه اخبار الثنائى رشا والوافر.
.

بوعلا تصحيح
وهذه دعوه لكم للاستماع لبعض اعمال الفنان الموسيقار احمد ساطور من اخر البوم موسيقى نفذ بامريكا بعنوان ريتم اوف سودان٠٠٠وياحليل تلفونات اخر الليل
اذا كنت كما انت عبق..فاحترق
ــــــــــ المخرج /اسماعيل محمد الحسن
htt://www.Yazoal.com/musicpage.htm

احمد ساطور

كيفك يا قريبى

مرحب بالفنان المرهف أحمد ساطور
ومرحب بالذكرى الطيبة
كانت أيام جميلة
وعطبرة السبعينات
والنيل والعطبراوي والفن الراقي
يوم كانت حفلة وردي في الصناعية ولا حفلات الدوحة
وأيام عبد اللطيف وردي
وشن طعم الدروس ما دام مكانها مشي قطر
وصاحبك سعيد

عزيزنا احمد ساطور
ما قلنا ليك ده بعيد عن كل كلمات مجاملة والناس ترى ما لاتراه انت
فمرحبا بك مرة اخرى
ومعلييش انا حاقطع كلمات الترحيب وحادخل في موضوع اخر مختلف تماما
فقبل ايام كنت اشاهد في قناة المحور المصرية جواهر اعتقد تكون سمعت عنها وحقيقي ما بقدر اقول فنانة لانه في رأي ده فيه ظلم لفنانيين حقيقيين وكالعادة تغني حواهر في لقاءاتها التي رايتها فيها بطريقةplayback
وفجاة قالت للمذيعة انها ستغني اغنية نوبية يحبها الاخوة النوبيين في جنوب مصر وفي السودان واسمها سابا وعندما بدأت تغني وجدت ان هذه السابا ما هي الا اغنية حبشية سبق وان تغنت بها حنان بلوبلو وجواهر تصر وتلح ان هذه الاغنية محبوبة جدا عند الاخوة النوبيين لانهم يفهمون ويعرفون كلماتها جيدا
دهشت الى ما لانهاية
ذكرن هذه القصة لسببين اولهم لاقول لك ان كل شيء اختلط ببعضه في الموسيقى والفن وفي كل شيء
ثانيا لاكرر واقول بان كلمة فنان لا تقال الا لمن يفهمون ويعون ما هو معنى الفن الحقيقي
يعني يا ساطور لما نقول ان احمد ساطور فنان حساس وجميل يبقى حقيقي هو كده في زمن اصبحت الموسيقى والغنا تجارة كل تاجر ياريت تفتونا وتفيدونا في زمن اصبح فيه الفن مهنة ما لا مهنة له
ودمت
مايا

العزيزة مايا

هذى زمانك يامهازل فامرحى - نظرة سريعة إلى ما يجرى فى الوقت تكفى بان هذة الفقاعات هى التى اصبحت مسيطرة ،واقول فقاعات لانك تدرين مدة الفقاعة ، فلا عجب ففنانى هذه الحقبة يتناسب وجودهم مع مجريات الاحداث فى المنطقة، وامثال جواهر التى خطفت اللقمة من فم حنان بلوبلو كثيرين .
الموضوع الثانى تقولين انها تغنت باغنية إثيوبية وقالت ان هذه اغنية نوبية وهذا دليل على عدم مصداقيتها حتى مع سلطات الهجرة المصرية حيث انها طلبت الجنسية المصرية على اساس انها نوبية من جنوب مصر اصلاً، هذا إلى جانب انها لاتحمل مثقال ذرة من مقومات ان نطلق عليها فنانة ، فلا تشغلى نفسك اختاه بمثل هذه الفقاعات لانى ارى نهايتهم ولم ارى لهم بداية.

ساطور
الود و الاشواق
طبعا يا ساطور انت واحد من الوناسيين و عندهم تكنيك في الحكي و قد كنا نتحلق و انت تحكي و عالقة بذهني حكاية عن جدك الذي ربط الحرامي علي كراع العنقريب و راح ياكل في البلح و يغرز النواة علي راس الحرامي يا ريت لو تحكيها و لك حكايات ممتعات عن الفنان المخضرم حسن خليفة العطبراوي و انت في الثانوي كنت تعزف له و بالمناسبة ساطور جاء المعهد مصلع و كنا نعول كثيرا علي هذه الصلعة المعتبرة في حالات الطوارئ و الازمات و ما علينا ان يقدم ساطور صلعته والتي تعلن عن الهيبة و المقام الرفيع فتفتح الدروب امامنا صحي ساطور في قسم الموسيقي لكنه لصيق بناس المسرح لدرجة ممارسة التقمص و ساطور هو الذي عرفني بمصطفي فقد اخذ مني قصيدة يا ضلنا ليوصلها لوردي و حين قراءها لمصطفي اخذها منه و لا زلت اذكر كيف داهمني مصطفي في قسم المسرح وهو يحمل النص في يده و دخلنا بعد ذلك في نقاش حول شارك فيه الصديق الشاعر و الكاتب محمد محيي الدين اضافة هنا و تعديل هناك و كانت هذه الاغنية
ساطور انت هسه عندك اكورديون و لا ماشي اعزل من الموسيقي ما تقول لي اورغون انا بسال عن اكورديون ساطور ما تخاف حاستعمل صندوق الاكورديون لحمل حزمة من الذكريات من ضمنها ضحكة وكيكا تلك التي لاتفسر
ولك من الحب و عبق الذكريات

الله الله
اول سلام يا جميل
والله سرور جميل نسمع منك وان شاء الله طيب
وليك وحشه وفاقداك مسارح الخرطوم
من شارع 67 ولى عند قاعة الصداقه وداخلية الديم والصحافه ظلط
ونادى الفنانين وكافتريا السكه حديد وكل الاماكن التى عطرتها بذلك الاكوردين ذو النكهه الساطوريه
تعال ونسنا واحكى لينا ما فضل غير الذكريات؟
يا الله ترجع الزمن الجميل
ونسمع فى حفله واحده ساطور معاهو كمال ميرغنى وصديق الطيب
وفايز مليجى
وبتاع الحافله يكون قاشر قدر المستوى
نشتاقك
انور عبد الرحمن

يا ضلنا المرسوم على رمل المسافة - بتذكر المرحوم مصطفى لمن قال لى، دى اجمل هدية قدمتها لى يا ساطور. ونحن بقينا فى مسافات من كل بلد والله رجعتنى عشرين سنة يايحيى ، اما عن قصة الراجل اللى بيربط الحرامى ده كان بيحكيها لينا واحد عن جده انا للاسف ما شفت جدى لكن اذا لميت فى صاحب الشأن إنشاء الله حاجيب ليك منو قصص طريفة . اما اخونا وكيكا فاخباره مقطوعة ، وفعلا كان عنده ضحكة مابتقدر تفسرها، ايه اخبار محمد محى الدين بالله ادينا اخباره.

العزيز الفنان انور (ابو غيداء) ياخى والله فى فترة وجودى فى امريكا الناس كانت بتسأل منك ووين إختفيت ياخى الناس راجية منك كتير، وانت باين إنشغلت بالاطفال،يتربوا فى عزك ياراجل اما الايام اللى انت بتقول عنها دى، باين ما حترجع ، مع تحياتى للمدام وولى العهد ياسين.

احمد رسلت ليك اكثر من ماسنجر
ما لقيت رد
القصة شنو

وله عشان ما من خريجين معهد الموسيقى والمسرح