لمزيدا من الجمال والأبداع : مرحبا عادل سعيد (ابحقادو)

(سودانيو الدوحة )(حقوق الملكية لصلاح عبدالله )
بارعون فى تقديم النجوم الى هذا المنبر ...
..نجوم فى شتىء المجالات ..وقادرون بالطبع
على ابتكار الجديد والمستعصى على الاخرين ..و(حوائهم)
مازالت حبلى بالكثير ..
دلف الينا يوم الجمعة الشهير بالخور ..ذلك اليوم الذى تمايزت
فيه الصفوف ..تمايز ليس لى كأى تمايز ..تمايز مزج الارواح
وجعلها مؤتلفة ..متحابة ..دلف الينا فى ذلك اليوم الفنان عادل
ابجقادو ...وللشهرة كلمة وللابداع سحر ينفذ الى القلوب وينساب
كما الماء ..لذلك فرض عادل قبوله عند الناس من اول وهلة ..
واستطاع فى تلك الليلة ان يفرغ ما بنا من (احتقان ) ..وكان
سلاحه (النكتة ) ...والنكتة فى علم المجتمعات الحديث (معيار)
واداة من ادوات قياس الرأى والتحليل ..فطنت اليها مجتمعات
قبلنا واستخدمتها واجادت وبرعت فيها ..وكان لنا من هذا
الفن نصيب ..وتحكى الطرفة انه قيل للسادات ان السودانيون
اصبحوا يصنعون النكات ...فأجاب (يبقى اكيد جاعوا ) ...
فالشعب حين تضيق عليه من كل جانب يلجا للسخرية والملحة
والطرفة ..و(كان لنا فى هذا الضرب نصيب )....وكان عادل
ابجقادو و(فرقة الجو الرطب) ..وطارق الامين والهيلاهوب ..وغيرها
من الفرق المسرحية التى برعت فى هذا المجال ..
فى منتصف الثمانينات عندما كانت فرقة الفرسان الكبار (فرقة الجو
الرطب ) يعطر ابداعها سماوات الخرطوم ...بل قل كل السودان
كان عادل سعيد فى ذلك الوقت اكثرهم نجومية وشهرة ...لابداعه الثر
وللمساحات التى يحلق فيها حول شخصيته التى كونها (ابجقادو )..
وكلكم يعرف ان الانطلاقة حينها كانت من جامعة القاهرة الفرع
(هووى الكلام دا ماحضرتو دا نقلا عن عبدالكريم الامين ) ...نالت
شخصية ابجقادو القبول والرسوخ والشهرة لانها كانت شخصية كثيرة
التماسك فى بنائها الدرامى ...وغذاها عادل بروحه الجميلة ووجدانه الخصب
والهامه الشفيف ...وسر الابداع عند الفنانين والكتاب وقبيلة المبدعين بصورة
عامة يرتبط ارتباطا وثيقا بالبيئة ..البيئة هذا الكائن الخلاق ..والطريق الى
العالمية فى الابداع هو مقدرتك على تصوير ا لبيئة التى نشأت فيها
ومقدرتك على التعبير عنها سواء كان شعرا او ادبا او مسرحا ..ومن نخيل
الشمالية ورمالها ونيلها سمق الطيب صالح ووصل المدى ..ومن اذقة وحوارى
القاهرة و(فتواتها ) و(ومقاهيها ) عانقت مصر نوبل لاول مرة فى تاريخها ..
ونجح ماركيز فى وضع الادب اللاتينى فى المصاف حين استطاع ان يعبر
عن ماتعانيه امريكا اللاتينية من ظلم وفساد ..وكانت (مائة عام من العزلة )
و(خريف البطريك ) و(الحب فى الزمن فى الكوليرا) ...اروع ماكتب فى الادب
العالمى ..وعادل ابجقادو ابن مدنى ولاكون اكثر دقة ابن( الدباغة)

وماادراك
ما (الدباغة ) ...التمازج الثقافى فى ابهى صوره ..والتعايش الذى لاتعكر
صفوه الازمات ..حيث الجميع يجتمعون فى المساء على وجبة (اقاشى ) .
وقد تراضو على الاقاشى بجميع سحناتهم ..واصبح عامل ثقافى مشترك
يميزهم ..وتراضو على الكثير من العوامل الاخرى وشكلوا هذا المجتمع
المتمازج المؤتلف .. والاقاشى فى قاموس اهل (النشيشبة ) يعنى الكثير
والكثير من الحكاوى والذكريات ..لذلك فاللدباغة حضورها الذى يخصها وحدها
وسحرها الذى لايشبه غيره ..من هنا خرج ابجقادو ..فأبجقادو فى الدباغة
يمشى فى الطرقات ويأكل الاقاشى فى الامسيات ...كل هذاالتراكم الثقافى
والمعرفى جعل من عادل سعيد (منلو درامى ) فريد ..واصبح بين عشية وضحاها
نجم النجوم ...فعادل سعيد فى درامته التى تعتمد عل الحلمنتيش (حلمنتيش المواقف )
يحاكى مسرح الرجل الواحد ..الحديث الدرامى لشخصية مرحة ..خصبة ..كثيرة
المواقف ..ولها لغة موحدة البناء وخاصية متفردة ..يغزى هذه الشخصية بزجل
المواقف ..والقضايا الاجتماعية التى يتم تناولها فى قالب كوميدى يرسل بها شعاعا
من الضياء حول القضية ويقدم الحلول لها .....والنكتة وطريقة ادائها عند عادل
تصنفه وتجعله فى مقام عالى ..فالنكتة عند ابجقادو موقف وقضية ..نابعة من واقعنا
المعاش ويؤديها بتخصص عالى الجمال ... ومنشأ النكتة هم البسطاء ..عمال سكب
القصب ، والمساعدية ، وعمال المنطقةالصناعية ، والسمكرجية والفقراء ...

ذلك هو عادل سعيد ابجقادو ..فافتحوا له قلوبكم وافتحوا له الشرفات والمنابر
ليساهم فى زراعة الجمال ويهدم قلاع القبح الذى اصبح له فى هذا المكان
صولات وجولات .....

اوووووووووووووه...

كلام عجيب...معقول عادل ابو جقادو..

معقول اسهاق وهارون وابكر...الناس الداعكين دعك شديد في سكب القصب في كنانة..

الناس المشو لندن ولعبو (جر الهبل) مع الخواجات..

الناس المشوا لندن ولمن الهمامة ركي ليهم في كتفهم قاموا كسرو كراع الهمامة...

...الناس المشوا لندن وجو راجعين..في الطيارة المضيفة لمن قالت الان نهن في الاجواء السودانية..

قالوا ليها....كدابة..!!!!

المضيفة قالت: وهات الله!!!!!!

صديقي عادل ابجقادوا..مرحب ومرحبتين,,

والدار دار ياملك الدهشة والجمال...

وجايك بمزاج...يا (ادل)

ياكيكى (على قول رباح ) ..

حبابك والله ..

معقول

Quote: اسهاق وهارون وابكر...الناس الداعكين دعك شديد في سكب القصب في كنانة.. الناس المشو لندن ولعبو (جر الهبل) مع الخواجات

وعشان الخيال السمح دا والقدرة على تقمص الشخصيات دى ..

نحن الليلة بنحتفى بعادل ابجقادو ..

خليك قريب ..وشكرا على مرورك ..

شكرا..اخي الحبيب محمد..

فمثل المبدع عادل سعيد جديرين بالاحتفاء والترحيب..

فعادل فنان عالي الكعب ومسرحي لايشق له غبار ونجم النجوم..

فالاحتفاء بعادل هو احتفاء وترحيب بكل مبدعي السودان...

فعادل ظل بعيدا عن الوطن ملهمه الاول لايزوره الا كالطيف..وكان رغم ذلك

ظل (عادل)..هو عادل الذي عطر الليالي والامسيات في ذلك الزمان بكوميدته الراقية

وفنه العميق الجذور الضارب تماما داخل المجتمع السوداني....

ومرة اخري مرحب(اسهاق)..ومرحب (هارون)..ومرحب (ابجقادو)...

ودمت يا محمد عبدالرحمن

سلامات
وعوافي
محمد عبدالرحمن شكرا جميلا علي تقديم الفنان المبدع عادل ابوجقادو وهو واحد من الذين (خيتوا) امسيات الخرطوم بالضحك الطويل .. ابجقادوا الف مليون مرحبا بك بيننا ..
يلا ياشباب غنوا معانا ...

ودرملية ..

مرحبتين حبابك ..وشكرا على المرور والترحيب ..

.
و الله يا محمد عبدالرحـمـن
ناس الدوحـة ديل أنا خايف عليهم من العـين
و بالتحـديد عيني أنا..
لووووول
أب جقادو ماااااا..؟؟
الفرع..امتداد ناصر..البنك الزراعي..قرص البرنجية البت النّـديفة ما شافتو..أب جقادو ماااااا..منتصف التمانينات..كانت الفكاهة لوجه الفن قبل سمسرة الكاسيت و الفن القيصري القميء..كان عادل سعيد يضحك ضيوفنا..و زملاءنا..حبيب هذا الرجل..أبلغه المعزّة و التحايا..
عندكم في الدوحـة ناس سمحين كتار..هذا ليس عدلآ..
نحن عاوزين إعادة تقسيم الفرح
عادل سعيد
عادل التجاني
محمد السني دفع الله
عبد اللطيف خضر ود الحاوي
الأستاذ المنصوري
عبدالقادر الكتيابي
هاشم كرار
محمد الربيع محمد صالح (و دة كااااارثة لوحديها، بيشتغل توو تراكس..عربي و انجليزي زي بعض..زي جلابية الأنصار..و ما تعرف ياتا فيهن لغة أمو)
أهـا..و تاني منو؟
طبعآ ناس أبوساندرا و معتصم الطاهر ديل بيكفّوا العين..
ياخ الله يحفظكم..أنا حااااااسـد و ما داسّـيها..أمشوا اتبخّـروا يلاّ..
.

عزيزى الطيب بشير

تحياتى ..وشاكر جدا مرورك ..

انتو كمان بتعرفو تسحرو ..لو عليك انت
الحبة مابتجينا ..ولو سحرونا بنجيك للعلاج
وعقيدتنا عندك ..

ودى ياالطيب ..وتشكر كتير

****

عادل سعيد والفصل للصالح العام واتضامن معه لارجاعه او تعويضه

اللجنه يعمل علي رئاستها فاروق ابو عيسي وعادل ضمن المفصولين

وهل يسمي فصل انسان صالح عام اي وساخة اتي بها حملت البخور

وبائعي الوهم ناس الجبهة قصر ومنشية ومنتشه

عادل سعيد ورحلة الدوحة اواخر 1998 والي الان عالم عريض وفسيح

عادل يا عادل يا حرف الام m /a

له محطة خاصة باركويت بها واثق والجمال وامال وحليتي وعدم العشا

لانو بشرق جايه من الشرقه

لكن في الرياض والمنشية الاكل سمح لذلك البطن بتضاير ليهو

سلامي لك محمد عبد الرحمن ول عبد الكريم وللسودانيين والجميع

محمد عبدالرحمن

كونك تقدم فنان فهذا طبعك

لكن لغة البيانات فى تقديمك ابجقادو توحى بانك ناطق بسم 00000

وليس مستنطق لفن فنان والاجابة عند ابجقادو

محمد عبد الرحمن

سؤال لوجهه الله (ولا نكترث كثيرا لاجابته)
الزول ده جاي براهو ولا معاهو ولدو؟؟؟؟


مرحبا
بعادل سعيد بيننا في هذا الفضاء (البديل )بيت من لا بيت له

مرحبا عادل
ولك ان تصهل فينا هنا
وتكمل ما ابتداءته من مشاوير
او ابتدرته في يوم ما هنا في الدوحه (وانت في اقصى حالات اللا توازن)
من هنا ممكن نتوازن كلنا (فقط لانهم يشبهون حلمنا)
ولك النشيد الاحتفالي

ولهم الفرحة بك

ولمحمد عبدالرحمن نافذة القلب

خاص بصديقنا زمان /عادل

(ان مشيت كمل نومك بنقول ليك تصبح على خير )

وذلك فى اخر عهدنا بك
لك مليون تحيه
والف مرحب بيك فى هذه الديار
وشكرا محمد عبدالرحمن فى محاولتك لنشر الفرح عبر الفرح نفسه (ابجقادوا هو ما ابن كلب)

يااحبابنا حبابكم والف مرحب ..

بجيكم لما امشى البيت ..

ودى

محمد عبد الرحمن لك التحية وانت تقدم هذا الفنان الرائع

عادل سعيد ابو جقادو باقة عطر وسماحة قلب ولحظات جميلة نسرقها من قبضة الزمان الشين

فهو يضحكنا منذ سنوات حتى عندما يغيب عنا نتخيله ولما نلتقيه نضحك قبل ان ينبس بكلمة

التقيته قبل اسبوع وطلبت منه ان ينضم الى سودانيز اونلاين ليمنح صلابة الكلمات وقسوة العبارات

الحايمة قليلا من الترطيب والانعاش واتفقنا على اشياء كثيرة ولكن .. المشاغل عادت من جديد

لتعرقل مشاريعنا الحلوة وهانت عزيزى محمد تلتقط قفاز المبادرة كعهدنا بك

معقولة .. سلاه ياسلاه ياهرف الان

مرحبيتين حبابك
الاستاذ عادل سعيد
نتمنى لك اقامة طيبة..فى وطن الابداع
شكرا للراقى محمد عبد الرحمن

مرحب ابو جقادو واليوم السعيد الليلة جابو...نزلت اهلا..وشكرا محمد عبد الرحمن
وانت تقود المبدعين الى هنا،،،

محمد عبدالرحمن

تحياتي

عادل سعيد ( أبوجقادو ) فنان من طراز نادر جداً ، هو وأميز وأول من بدأ في تقليد أهلنا (الفلاتة) ، وارتبط لقب أبو جقادو به منذ زمن طويل بسبب براعته في تقليدهم منذ أيام جامعة القاهرة الفرع ، وكان القاسم المشترك الأعظم في معظم فعاليات ومناشط الاسر والروابط والجمعيات في الجامعة ، وكان يشاركنا في (جمعية الموسيقى بالجامعة) في كل انشطتنا ، وكان ولا يزال (فردة صاقعة ، وضحّاك لمن غلط ، أنا غايتو ما في زول بيكتلني من الضحك زي عادل).

الطيب بشير ، الفراعي القديم ، يا حليلك ، كان بيجيبك لينا في جمعية الموسيقى (قريبك عمّار) الزول الغناّي . لكم حب و معزة خاصة في القلب أيها الفراعة ، يا ناس الزمن السمح ، أنت وابو جقادو ورقية وراق ، وتراث ، وأماني ،رأيتكم وقرأتكم هنا ، دائماً مع شريط من الذكريات ..

تحياتي

صلاح عبدالله

we are waiting
a very welcome in advance

الاعزاء

صبرى الشريف
بدرالدين الامير
فيصل عباس
صلاح عبدالله
عامر تيتاوى
عبدالمنعم سيد احمد
صديق الموج
صلاح عبدالله
محمد خالد ابونورة

تحياتى ....

وشاكر جدا المرور والترحيب ...وفى انتظار عادل ابوجقادو
ليطل عليكم ..

محبتى لكم

مرحب حبابك
ابوجقادو
الفنان الرائع
والممثل الذي ضل طريقه وغطس في في مدنى وقلع في نوملي
سبح عكس التيار
وصنع نفسه ولمع اسمه كوميديا مبدعا والان يعود من جديد الى التمثيل من خلال الفرقة المسرحية بالدوحة
مرحب حباب ود ابوجقادوووووووووو

تشكر كتير اخ محمد عبدالرحمن وانت تقود الابداع المتحرك ابجقادو

اه يالحرامي لييييييي مدني اشان تأمن ..والبرنجيه والنديفه وادم بتاالمويه في امبده

وكاس البرنجي ..ما احلي تلك الايام الجميله

بجامعة القاهره الفرع وغرفة الموسيقي وكلنا وعادل معنا في الحفلات الخاصة

لكن سعدت كتير بلقاء الاخ الحبيب صلاح عبدلله صاحب الصوت الشجي.. لكن كان دائما ببخل علينا

ذكرتوني ايام يا حليله الفاتح محمد احمد كرمي (اكورديون ) سامي واشرف دردم عمار الخير

التاج, عصام كلوبيس سادو وعامر الجوهري وعمار السنوسي والزين ادروب وعبد الرحيم

الكابلي وعبداللطيف ضرار وهناك من نسيتهم.. عامل الزمن والرأس الخفي

تحياتي ليك عادل ابجقادو وتحياتي لك اخ صلاح عبدالله واخوك وحيد بلغه كتير السلام..

تسلم اخ محمد عبدالرحمن

..عماد عويس

يا محمد عشان إنت زول رائع ..
بتجيب الناس الرائعين ..

ألــــ1000ــف مرحب بالمبدع أبجقادو ..
ولنا معه مساحة كبيرة من التواصل الجميل ..

لكما كل التقدير ..

اهلا بكم ايها الاعزاء الاحباب ............


اهديكم من نبض الحروف ما فاض به الخاطر فى لحظات التجلى وانتم تكيلون علــى هذا الثناء والاطراء عبر نافذتكم المدهشه سودانيـــــيز اون لاين .

وكنت اود ان ارد لكم على تلك الكلمات الرائعات فى شخصى الضعيف على جناح عصفور ولكن خفت عليكم من (انفلونزا الطيور) وفى انتظار اذن الدخول فالشكر موصول لكل من كتب عنى حرفا عبر هذة النافذة حتى ضاقت بى الارجاء وسعا وتمنيت ان اعانق هاماتكم الساميه وهذة شهاده من اناس اكن لهم كل الحب والتقدير سوا ان كانو فى داخل السودان او خارجه وقلاده شرف اضاءو على صدرى واعتز بكم كثيرا وثنائكم هذاهو الدافع لنا لمزيد من العطاء رقم الشح والمعاناة .

فتحيه خاصه من ابوجقادو الذى كان يقف بجوار بائع الثلج ليشترى منه قطعه من ذلك اللوح الثلجى فتطاير ذلك الرزاز الثلجى على صدره فقال للبائـع (شنــو ياابن العــم ما اثلجتم صـدورنا وكـده).

فحقا فقد اثلجتم صدرى بتلك المداخلات الرائعه فلكم الحب ولى ما اريد.....

100000000000000000000 مليون مرحب ب عادل سعيد

ابجقادو ما (ابن كلب )

معقولة ( قأر شجرة زاتو معانا هنا )

اامل حسابك الكرسى دا ما يجازفوا وكدا يعنى

مرحب ياعادل .. ترطيبة منعشة للمنبر الحر وجناح عصفور ما عندو انفلونزا طيور

مرهب...يادل

تمام السعادة والفرح بقدومك ايها النبيل..

مرحب يافردة ياصاقعة...يا نار منقد!!

ويلا.(سوي ترتيب مال جمال...عشان الناس تامن ذاتتو)

التحيه لكم ايها العقد الفريد فالنبداء معا مشوار غد سعيد

صديق احمد عمر

محمد عبد الرحمن

عبدالكريم الامين

فيصل عباس

الطيب بشير

عامر تيتاوى

بدرالدين الامير

صديق الموج

صلاح عبدالله

عماد عبدالله

ضحيه ابراهيم

عبدالمنعم سيداحمد

محمدخالدابونوره

عمادشمت

معتصم دفع الله

ودرمليه

صبرى الشريف

محمدالسنى دفع الله

نادوس

ودالعباسيه

Quote: فتحيه خاصه من ابوجقادو الذى كان يقف بجوار بائع الثلج ليشترى منه قطعه من ذلك اللوح الثلجى فتطاير ذلك الرزاز الثلجى على صدره فقال للبائـع (شنــو ياابن العــم ما اثلجتم صـدورنا وكـده).

الخطييييييييييييير ابو جقادو ،،،

مرحب بيك فى هذا العالم ،،،

فوق
عشان ابجقادو ما يأأمل نايم .. سهيي النوم يافردة

المبدع عادل

لك التحايا و الأمنيات الطيبة

واننا لسعداء بتواجدك بيننا

إقامة طيبة بين أحبابك

فمرحبا بك مجددا

شكرا محمد عبد الرحمن


مودتي

يازرياب ..

ازيك وكدا ..

ياخى مامقبولة منك الزيارة المتأخرة دى ..
البوست دا عينك فيهو ليك كم يوم ..جايينى اسى
بعد ماوصلك طرف السوط ..

على العموم كتر خيرك و(بطريك ) ليها ..

محبتى

العزيز ، ود ودمدني البار ، أبوجقادو
لا أدري كيف أعبر عن سعادتي بلقياك عبر الأثير !!!
ذلك على الرغم من أن مثل هذا التلاقي لا يشفي غليلاً ولا يروي ظمأ ،
فلقاء أبوجقادو على الطبيعة يجعلك تنسى هم الدنيا والغربة وفراق
أم المدائن مدني ، والتي أقول فيها ما قاله الشاعر في محبوبته :
مشتاق ليك كتير يالجوة قلبي سكونك
لقيـاك منيتي وقبلة سعادتي عيونك
شوقك شال منامي وشـن حياتي بدونك

* واحد حكى نكتة لي صاحبه ما ضحك.. قابله بعد اسبوع سأله:
أها.. يا اخينا عملت لينا شنو في نكتة الاسبوع الفات!![/B
مرحباً بك أيها الرائع ، وحبابك ألف

عادل

مرحب بيك هنا ومعانا ..

شيل معانا ..

يادوب بقى المنبر رطب ..

عادل ..
مراحب كتيييييييره ..

أدخل أمرقنا بالله من دائرة القباحة و الشنا ..
و .. ( ودينا ألآ الدل كده شويه بس )
ضل الكوميديا الجميلة و العارفه سكتها ..
إنت و السني و طارق راجياكم شيلة تقيلة ..

و نحن غايتو بنديكم مرة مرة يدنا .. ( آجر و صلي .. آجر و صلي )
مرحب بيك يا صاحبي
ومشكور يا محمد السمح

حباب عادل سعيد ودابجقادو يقلب الليل ضحي ويمسح سوادو حباب الدوحه كسبت باصطيادو رب العزه يدي الفي مرادو

وين يا ادل ..وشنو دافن دقن؟؟؟

اطلع وبان يا جاسوس ..وبتل الانكبة والشنكبة!!!!!!!!!!!

شنو ياكيكى

الفرد عاملين لبتن

يكون من شنو ده

عشان السخانه جات

والله ليهم حق البلد تقول ميت فيها مكوجى

ويا طارق الامين

ابقى عشره على الهيلاهوب

وابحث عن المزيد من المبدعين فى السودان

لدعم الفرقه وشوقى ليكم بقدر مساحتو

زرياب / معتصم الطاهر

تحياتى ليكم والشكر موصول لكم على الترحيب

وبالمناسبه دى وحده سريعه

واحد مرتوا ماتت جاصاحبو فى العزاء فقال لى الوليه ماله

قالى نطحا تور قال لى الرجال الواقفين ديل كلهم جاين يعزوك فيها

قال ليهو ابدا جاين يستلفوا التور

هاهاهاهاهاهاهاهاهاهاهاهاهاه

هااهاهاهاهاهاهاهاهاهاها

للاكين أبجقادو ما إبن كلب وتفتيحة!!
مرحبا به فى الواحة
جنى

الاخ محمد عبدالرحمن شكرا للتقديم الرائع للمبدع عادل

والاخ عادل سعيد مرحب بيك وحبابك الف بين اهلك وعشيرتك
ونورت البورد
وفى انتظار مساهماتك النيرة

وشكرا للاخ بكرى ابوبكر للفرصة السمينة


محمد عبدالله ـ الزنجي

كنت اسمع عن ابجقادو فى اوائل التسعينات قبل ان اغادر البلد..

لم احظ بلقائه ولكنى كنت اضحك ملء اشداقى من محاكاة نورى لعادل ابحقادو وهو يقلد هذه الشخصية اب جقادو ..


والله كانت شخصية ممتعة لى للغاية قبل مرضة "حقوق الانسان" التى ألمت بنا أخيرا..


والله مرة كنت دايرة اكتب بوست اقول "هل التمثيل فن عنصرى؟" لان الممثل يتقمص الشخص بكل خلفياته الثلاثة ..النفسية والجسدية والثقافية ..وهى البتجيب "الهوا"..من لغة ولهجة واسلوب..

المهم مرحب بيك يا جقد..فى البورد..

لو لقيتنى مبوزه منك ..ما تزعل ..دى بتكون حقوق الانسان.. والفلاته مالهم..؟؟


اهديك هذا البوست حتى يقع ليك كلامى

الممثلة حنان ترك وممثل اخر مصرى يستهزئون بالسودانيين

عادل سعيد...الشهير بابجقادو

عندما كنا نقيم اسابيعنا الثقافية في قريتنا (ودهاشم ملي)..الواقعة في قلب المنطقة

التي يحاكي عادل لغة غالبية اهلها في شخصيته تلك ابوجقادو....

في ذلك الزمان تكونت فرقة(السغلي) المسرحية الموسمية النشاط..وكان احد افرادها

يحفظ اعمال (عادل) عن ظهر قلب..وكنا اكثر ترددا وخوفا من تقديم تلك الفقرة التي

تحاكي ذلك العربي (المكسر)..!!! بين اهلي الفلاتة الملي والقري المجاورة في ودهاشم

عرب ...مروه _ ومايرنو الغنية بالارث الافريقي واللغة التي تشابه..(ابو جقادوا تماما)..


وتمت المغامرة..وقدمت الفقرة التي تحاكي(ابو جقادوا)..وسط مخاوف من تكسير المسرح

وضرب المسرحيين..(كان هذا ظن الكثيرين منا في ذلك الزمان!!!)

..الا ان العكس تماما قد حصل...فقد تجاوب الجميع مع هذا العرض وانفعلوا معه انفعال

حقيقي ..ولم اشهد انفعال جمهور مع مسرح بسيط وفقير مثل ذلك اليوم....!!!

....عادل ابوجقادوا يحاكي في مسرحه شخوص ولغة موجودة اساسا وسط قطاع كبير من السودانيون

ذوي الاصول من (غرب افريقيا)..والعجمة التي في لسانهم فرضتها ضرورة التعايش مع

اللغة العربية ,,,

ليس هنالك نقص او قصور ان يتحدث شخصا بمثلها...وايضا لا يمثل عقدة لهم لانهم يعتزون

باصلهم ونسبهم وتاريخهم العريق الذي سما في الغرب الافريقي..!!!

عادل..يحاكي مسرح الواقع والحقيقة..ويلمس جزء من نتائج التعايش والانصهار...


وان ذهبت...جلقني_امدرمان فلاتة_ السريو_ روصيرص_ بنزقة_ مايرنو_ ام شوكة_

ودهاشم مروة_سنار_ الدباغة_ احياء الفلاتة بكسلا_ حي الفلاتة الابيض_وكل مناطق الفلاتة في السودان


لوجدت..(ابوجقادوا)..هناك..رجل اكثر ذكاء وصدق ووفي ومعتز بنفسه ..وايضا غتيت..

ولنا عودة..لفلفلة...الكوميديا..عند ابو جقادو الفنان!!!!

ياجقجق .. انت وين آمل نايم ولا شنو ..ولا آمل شتات هالى مهتات وكده؟

شكرا للاخت تماضر

على تلك المداخلة وربنا يرد غربتك
لان الساحه الفنيه افتقدتك كثيرا ونتمنى عودتك
للتالق من جديدوالحقيقه انا لم احدد قبيله بعينها
فى شخصيه ابوجقادوبل هى مجموعه قبائل اتت الينا من
غرب افريقيا واستوطنت معنا فى السودان ومع احتفاظهم
بلهجتهم الا انهم يتحدثون تلك اللغه العربيه المكسره
واعتقدانو الاخ عبدالكريم (كى كى ) اختصر على كثيرا من
الشرح فلك التحيه والتجلى الى ان نلتغى
والشكر موصول الى الاخوان على الترحيب

الاخوان جنى والزنجى تحياتى ليكم كتير على المداخله

وين ياضاحى حتقعد كتير كده ممحن

ابو جقادو عليك الله ما تفوت لحدى ما اجى راجع
محمد ولد ادر حمان
مالك ومال السياسه الدربها شين وقاسى
خليك مع الجمال الزى دا .اشكرك من هنا (عاصمة العالم) لحدت عندك
ياخى شكرا اديييييييييييييل كده
ودمتم

Quote: وكان عادل ابجقادو و(فرقة الجو الرطب) ..وطارق الامين والهيلاهوب ..وغيرها من الفرق المسرحية التى برعت فى هذا المجال .. فى منتصف الثمانينات عندما كانت فرقة الفرسان الكبار (فرقة الجو الرطب ) يعطر ابداعها سماوات الخرطوم ...بل قل كل السودان كان عادل سعيد فى ذلك الوقت اكثرهم نجومية وشهرة ...لابداعه الثر وللمساحات التى يحلق فيها حول شخصيته التى كونها (ابجقادو ).. وكلكم يعرف ان الانطلاقة حينها كانت من جامعة القاهرة الفرع

آآآبجقادو شخصياً؟ والله مشكلة كبيرة.

أديك نص عمري لو ترجع لي يوم واحد ترطيبة في الفرع ولو في الركن الأخضر.

بالله وين ناس أكرم
وناس لؤي
وكل الحلوين

وكل شلة (بيت_هوفن)


عوض الله

الاخ / عادل
لك خالص التحايا
والف مرحب بيك
وانت اضافة كبرى لبورداب الدوحة

لك الشكر محمد عبد الرحمن
ويلا تعمل حفل استقبال لابجقادو واكيد حايكون حفل بهجة ومتعة للجميع ،،،