Post: #1 Title: أسكتوا... ما قلت ليكم Author: غادة عبدالعزيز خالد Date: 11-02-2007, 04:31 PM Parent: #0
بائعة أمريكية شقراء، لطيفة ذات ضحكة خفيفة، في نهاية عقدها الثالث أو في بدايات العقد الرابع. نزورها في المحل أنا وأختي فنراها من خلال الزجاج قبل أن ندخل فترتسم على شفاهنا بسمة وترانا هي فتهتف " يا إلهي، الأختان مرة أخرى" ونضحك. فقد كنا نقضي معظم وقتنا في حديث ودعابات معها وبعض مغايظات ونتبادلها كلمة من هنا وأخرى من هناك. ونلتقي في ذات الزيارة بامرأة أمريكية أخرى في الخمسين عن عمرها ولكنها غاية في المحافظة حتى لتحسبها في عمر البائعة الظريفة التي لم تكمل الثلاثين ربيعاً. وكان للمرأة الأولى حفيدة في الثانية من عمرها. ومرت الأيام وصارت تربطنا بهما علاقة صداقة قوية حتى سمعنا الخبر الذي كان مفاجأة بالنسبة للجميع.
. . .
Post: #2 Title: Re: أسكتوا... ما قلت ليكم Author: غادة عبدالعزيز خالد Date: 11-02-2007, 04:32 PM Parent: #1
شاب عربي في أوائل العشرينات من عمره حضر إلى مدينتنا طالبا. كان مهذباً تبدو على ملامحه الطيبة. وفي يوم جمعة جامعة بعد حضوره بوقت قليل قام بعقد قرانه على الجدة الأمريكية، وطار عقل الكثيرين. هي أمريكية وهو عربي. هو لا يتحدث الإنجليزية وهي لا تتحدث العربية. هو في العشرين وهي في الخمسين. هو لم يتزوج من قبل وخبرته في الحياة قليلة. وهي متزوجة ولديها أبناء وبنات بل وحفيدة، هو أول مرة يطأ بقدمه الأراضي الأمريكية. وهي لم تزر يوما في حياتها دولة عربية. وتقفز في البال تلك المفارقات الغريبة كلما نظرت إلى العربي العريس وعروسته "اللقطة" القديمة. وأتي يوم أتتنا فيه الزوجة الجدة وهي ترتدي غطاءا أبيض فوق رأسها وعلمنا أنها قد أشهرت إسلامها وأسمت نفسها (عائشة)، وتوثقت صلتنا بها بعد سكن عائشة في شقة تجاورنا مع زوجها الشاب وأسرتها الأخرى. وفي يوم ذهبت إلى محلى لأرى بائعتي الصديقة وابتسمت تلك الابتسامة الخفيفة ودلفت إلى المحل. وبدلا من أن تبادرني بالتحية أو الدعابات النقية كالعهد بها، سألتني، مشيرة إلى عائشة، بنبرة خفيضة وبعينيها نظرة خبيثة:
-أها، ما عندك لي قطيعة!
. . .
Post: #3 Title: Re: أسكتوا... ما قلت ليكم Author: غادة عبدالعزيز خالد Date: 11-02-2007, 04:33 PM Parent: #2
وبهت في تلك اللحظة ظنا مني أن الأمريكيين هم قوم مباشرون لا يعرفون (اللف) أو الدوران. قوم يتصرفون على سجيتهم، يتركون الناس في حالهم، ولا يفهمون في قلنا وقالوا. كنت أظن أن للقطيعة والنميمة وكلاء حصريون في المجتمعات الشرقية والغرب منها براء. وأذكر أن جدي لأبي رحمة الله كان يأتي مارا فيرى زوجته ووالدتها الحاجة فاطمة، رحمهم الله، يتسامران بأصوات خفيضة. فيقول لهن محذرا "أوعا تقطعوا أو تتكلموا في سيرة الناس" فتجيبه الحاجة فاطمة بسخريتها المعروفة "أبدا والله إحنا ما بنقطع في زول، بس جايبين شوطهم سااااي."
. . .
Post: #4 Title: Re: أسكتوا... ما قلت ليكم Author: غادة عبدالعزيز خالد Date: 11-02-2007, 04:34 PM Parent: #3
وظهرت دراسة أمريكية حديثا تحذر من القطيعة وتقول أن البشر أميل إلى تصديق القطيعة والنميمة أكثر من الحقيقة وإن ثبتت بالأدلة والبراهين. ونحن نصدق القطيعة حتى وإن تضاربت مع معرفتنا بالشخص "المقطوع فيه" و تجربتنا معه. قامت الدراسة، التي نظمتها أكاديمية العلوم، بإحضار 126 طالبا وأجلستهم أمام شاشات الكمبيوتر. ويقوم الطلاب بالتعامل المالي مع بعضهم البعض من بين شاشات الكمبيوتر. ومطلوب من الطالب أن يكتب تعليقا عن الآخر بعد نهاية التعامل بينهما حتى وإن لم يكن ذلك التعليق صحيحا، مثل أن يقول أحدهم "هذا الشخص كريم جدا!" أو أن يقول آخر "أحذروا هذا الشخص، فهو بخيل جدا!". ووجدت الدراسة أن الطلبة قد تأثروا بالنميمة التي كتبها بعضهم عن البعض حتى وإن ثبت لهم أن تلك القطيعة، بعد تجربتهم الشخصية معهم، لم تكن صحيحة. تقول بروفيسور "دوريان تروب":
- إن النميمة سواء أكانت كاذبة أو صحيحة فهي بلا شك تؤثر في تعامل الآخرين معنا وهذه خطورتها، فنحن لا نستطيع التحكم فيما يقوله الآخرون عنا."
. . .
Post: #5 Title: Re: أسكتوا... ما قلت ليكم Author: غادة عبدالعزيز خالد Date: 11-02-2007, 04:35 PM Parent: #4
أما دكتور "درو ينسكي" أستاذ الطب النفسي بجامعة كاليفورنيا فيرجع تاريخ القطيعة لسنوات وقرون في التاريخ بعيدة. فقد كانت وسيلة لتبادل تجارب الحياة. فالنساء يجتمعن في فترة ويتناقشن كيف يربين أطفالهن وأين يجدن أفضل الأسعار. وصارت ذات المجالس وسيلة للحديث وتبادل الأخبار ومن ثّم القطيعة والنميمة. وينصح د. ينسكي المجتمع أن يتمهل ويتروى قبل أن يتبادل (القطيعة)، فالقطيعة تؤثر على حياة الآخرين وعلى الطريقة التي يتعامل بها المجتمع مع كل شخص. وتقول هاريت كول المحررة بمجلة (أبوني)، إنه من الصعب علينا التحكم في القطيعة التي تثار حولنا ، بل وقد تقود محاولة تغيير صورة القطيعة عن الشخص إلى حروب كلامية وأحاديث تفتح أبواب جديدة للقطيعة مما يؤثر على محاولة تصحيح القطيعة التي بدأنا بها. وكل ما يمكن للإنسان فعله هو أن لا يعير القطيعة إلتفاتة وأن يتمسك بمبادئه التي أنتهجها. ففي النهاية، لا يصح إلا الصحيح!
. . .
Post: #6 Title: Re: أسكتوا... ما قلت ليكم Author: غادة عبدالعزيز خالد Date: 11-02-2007, 04:36 PM Parent: #5
وتوصلت الدراسة إلى أن الإنسان سميع للنميمة ومصدق لها ولذلك يقوم ضعاف النفس باستخدام النميمة كسلاح، إما لاغتيال شخصية من يختلف معهم أو لإعادة تأهيل شخصيتهم هم. وقد ساعدت التكنولوجيا الحديثة على سرعة انتشار القطيعة بل ووفرت لها منافذ جديدة من خلال الجرائد الإليكترونية والمواقع الإسفيرية التي من الممكن خلالها ترويج القطيعة حتى بأسماء وهمية لا تعرف بعدها من الذي نشر تلك النميمة ولماذا. ولذلك نهانا الله عنها في كتابة الكريم مشبها القطيعة والنميمة بمن يأكل لحم أخيه ميتا فكرهتموه. أعاذنا وأبعدنا الله عنها!
. . .
Post: #7 Title: Re: أسكتوا... ما قلت ليكم Author: غادة عبدالعزيز خالد Date: 11-02-2007, 04:38 PM Parent: #6
آخر قطيعة:
أسكتوا.. ما قلت ليكم! القطيعة ما طلعت ظاهرة عالمية، حتى الأمريكان كمان بيقطعوا!
Quote: وبهت في تلك اللحظة ظنا مني أن الأمريكيين هم قوم مباشرون لا يعرفون (اللف) أو الدوران. قوم يتصرفون على سجيتهم، يتركون الناس في حالهم، ولا يفهمون في قلنا وقالوا
سلام يا غادة
ياخي الناس ديل أقطع من يمشي على الارض, ما أن تدي ضهرك للواحد/ه, حتى ينزل فيك قـطيعة, والخبر يتفشى عندهم بسرعة البرق, هذه سمة مميزة لهم, على اختلاف درجات تعليمهم أو طبقاتهم!
Post: #16 Title: Re: أسكتوا... ما قلت ليكم Author: غادة عبدالعزيز خالد Date: 11-02-2007, 07:09 PM Parent: #9
Quote: ياخي الناس ديل أقطع من يمشي على الارض, ما أن تدي ضهرك للواحد/ه, حتى ينزل فيك قـطيعة, والخبر يتفشى عندهم بسرعة البرق, هذه سمة مميزة لهم, على اختلاف درجات تعليمهم أو طبقاتهم!
والله يا معروف لم أكن أتوقع وقتها أن الأمريكين قطاعين للدرجة دي لكن والله طلعوا أصعب مننا
ودي الكبير غادة
Post: #20 Title: Re: أسكتوا... ما قلت ليكم Author: سيف الدين مصطفى كرار Date: 11-02-2007, 08:10 PM Parent: #6
الاستاذة غادة ازيك
شوفى , الانسان هو الانسان سواء كان غربى او شرقى ,لكن الناس ديك تفوقت على الشرقيين كثيرا
التقبناوقرانا وعشنا لحظات معهم وتاكد لنا انهم تفوقوا على هذة الامة فى بعض المسائل الاجتماعية,طريقتهم تختلف عن المجتمعات الشرقية,
المواضيع التى ذكرتيها ليست غريبة عنهم فهم اساتذة فى ذلك.
Post: #54 Title: Re: أسكتوا... ما قلت ليكم Author: غادة عبدالعزيز خالد Date: 11-03-2007, 01:25 AM Parent: #20
Quote: المواضيع التى ذكرتيها ليست غريبة عنهم فهم اساتذة فى ذلك.
الأخ الكريم سيف الدين
معذرة، فلم أرى مداخلتك إلا الآن لكن والله الجماعة ديل أنا كنت مصدومة جدا وأنا أعرف إنهم بيقطعوا زيهم زينا وكمان أحسن مننا والله غايتو.. حاجة تحير
مودتي بلا حدود
غادة
Post: #21 Title: Re: أسكتوا... ما قلت ليكم Author: سيف الدين مصطفى كرار Date: 11-02-2007, 08:10 PM Parent: #6
الاستاذة غادة ازيك
شوفى , الانسان هو الانسان سواء كان غربى او شرقى ,لكن الناس ديك تفوقت على الشرقيين كثيرا
التقبناوقرانا وعشنا لحظات معهم وتاكد لنا انهم تفوقوا على هذة الامة فى بعض المسائل الاجتماعية,طريقتهم تختلف عن المجتمعات الشرقية,
المواضيع التى ذكرتيها ليست غريبة عنهم فهم اساتذة فى ذلك.
اربعة اصدقاء يتسامرون فيما بينهم كل يوم الى اخر الليل . ولكن كل واحد يـــود ان يكون الاخير في الانصراق حتى لا يتعرض ( للقطيعة ) من بقية الجالسين عموما كل ما يذهب واحد الجماعة يدوه في الجامد الى ان تبقى منهم اتنين وعندما استاذن احدهما وودع الاخير ما كان منه الا وان اخذ كومة من التراب وقذفه بها من الخلف قائلا له اول انت اخير منهم ..
حمانا الله من القطيعة ..
ود الباوقة
Post: #10 Title: Re: أسكتوا... ما قلت ليكم Author: نادية عثمان Date: 11-02-2007, 05:06 PM Parent: #8
ندوية الشمار السوداني على الأقل فيهو نكهة يعني، لزوم رائحة البهار وتسبيكة الكلام لكن قطيعة الأمريكان ديل، صدقني صعبة خلاص
محبتي وسعيدة بطلتك
Post: #17 Title: Re: أسكتوا... ما قلت ليكم Author: غادة عبدالعزيز خالد Date: 11-02-2007, 07:12 PM Parent: #8
Quote: اربعة اصدقاء يتسامرون فيما بينهم كل يوم الى اخر الليل . ولكن كل واحد يـــود ان يكون الاخير في الانصراق حتى لا يتعرض ( للقطيعة ) من بقية الجالسين عموما كل ما يذهب واحد الجماعة يدوه في الجامد الى ان تبقى منهم اتنين وعندما استاذن احدهما وودع الاخير ما كان منه الا وان اخذ كومة من التراب وقذفه بها من الخلف قائلا له اول انت اخير منهم ..
الأخ الكريم ود الباوقة يا كافي البلا، حتى الزول براهو بيقطع
Quote: حمانا الله من القطيعة ..
اللهم آمين
تحياتي للأمورة علا والأسرة
Post: #11 Title: Re: أسكتوا... ما قلت ليكم Author: Nasr Date: 11-02-2007, 05:18 PM Parent: #1
You so useful; you so positive. May God bless you.
Post: #31 Title: Re: أسكتوا... ما قلت ليكم Author: غادة عبدالعزيز خالد Date: 11-02-2007, 10:36 PM Parent: #11
Quote: You so useful; you so positive. May God bless you
الأخ العزيز نصر
كتابتي أحاول أن أوزن فيها ما بين الجانب الترفيهي، الإجتماعي والدراسي أحيانا والموضوعي ليس دوما سهلا، ولكنني أحاول رعاك الله ورعانا أجمعين
تقبل خالص المودة
غادة
Post: #12 Title: Re: أسكتوا... ما قلت ليكم Author: عاطف عمر Date: 11-02-2007, 05:19 PM Parent: #1
أتت إحدى صديقات والدتي يوماً لزيارتها ، وبعد السلام والمطايبة أنبأتها
" والله يا بت التلب ( كنية الوالدة ) أكان أول أمس شرقتي اعفي لينا " فاستغربت الوالدة وأجابتها بأن لله والرسول لكين في شنو ؟؟ استمرت الصديقة " يوميها كنا قاعدين عند ناس فلانة وما كان لينا سيرة غير سيرتك " فأجابتها الوالدة " والله كتر خيركن ، وما قاعدة أعمل أكتر من الواجب ، لكين دا كلو من ذوقكن بس " فاستغربت الصديقة وأجابت ( بخبث ) " عرفتي كيف كنا بنقول فيك كلام سمح ، إمكن كنا بنقطع فيك بى كلام شين " هنا أطلقت الوالدة حكمتها " أجييي يا بت أمي ، أنا بت الليلة ؟؟؟، متيمنة لو كان كلام شين كان قبال ما تقومن من قعدتكن وصلني ، أصلو الكلام الشين ليهو كرعين "
القطيعه بتمشي أكتر وتنتشر وسط أوساط بتمارسها.. يعني لو الزول سمع قطيعه وماكان من "مريديها" وما نقلها بيقل انتشارها.. والأنجلبز مشهورين جدا بالقطيعه..والشمارات زي مابنقول عند العجايز بالذات.. .... ....
شوفتي اليوم داك حصل شنو؟ عليك الله ما تكلمي زول..ده كلام خطر جدا وما عايزه زول يعرفه..سمح أمي؟ أها قالوا والله يكفينا شر قلنا وقالوا..قالوا..
........
........
.......
بس!
علي فكره يا غاده..
الحجاب فيك حلو شديد خالص..
Post: #33 Title: Re: أسكتوا... ما قلت ليكم Author: غادة عبدالعزيز خالد Date: 11-02-2007, 10:44 PM Parent: #14
Quote: عليك الله ما تكلمي زول..ده كلام خطر جدا وما عايزه زول يعرفه..
سلامات يا منى
لدينا صديق عزيز بيحب الكلام جدا ولكن (عامل) فيها إنو ما بيحب القطيعة فيسأله أصدقاءه عن شيء فيقول ليهم والله أنا محلفيني ما أقول حاجة فأحد الأصدقاء بيعرف ليهو كويس
فبيقوم يقول له
-أها طيب راس البيت (الموضوع)
صاحبك يقول طوااالي يتعدل في جلسته وبيدأ الحكي بقوله
-طيب ما دام الكلام جاب الكلام.. النحكي ليكم
Post: #32 Title: Re: أسكتوا... ما قلت ليكم Author: غادة عبدالعزيز خالد Date: 11-02-2007, 10:40 PM Parent: #12
Quote: أصلو الكلام الشين ليهو كرعين
الكلام الشين يا عاطف في مليون زول مستعد في لحظة يوصلة والكلام السمح يتغاضى الناس عنه خالتي آمنه، والدة معز بتقول على البيوصلو القطيعة
الأخت غادة أخبارك و معز و الأولاد؟ القطيعة عند الجماعة ديل جزء من ثقافتهم و ما عندهم فرق بين مكان شغل ولا غيره الـgossip شي أساسي و مهم. و هم يمارسونها بطريقة لا تخطر على بال الجالسات عندنا في حلقات الجبنة و الودع. أيام الجامعة اشتغلت في صيف مع ناس الطرق. كان الفريق بتكون من أربعة طلاب بالإضافة للمشرف و النظام إنو بصورة دورية واحد أو واحدة من الطلاب بكون واقف في الشارع يوجه الشاحنات البتورد التربة لرصف الطريق و بقية التيم متحركة بالعربية بتعمل في أعمال مساحة. أها زولنا أو زولتنا الفي الطريق بيسلخوه سلخ ما يخلو ليو حاجة و عادي يجي تاني يوم اركب و يمشي بدلو زول تاني و الجماعة يقعوا في الزول التاني. اللذيذة الظاهر أي زول عارف انو لما يكون غايب بقطعوا فيهو لكن ما ظاهر عليهم بحاولوا اعرفوا الاتقال فيهم شنو؟ بيني وبينك كان نفسي أعرف بقولو عني شنو. طبعا في ناس مهذبين في قطيعتهم. لكن في واحدين تلقيهم بقولو علي: بالله شفت العب دا قال شنو؟
Post: #15 Title: Re: أسكتوا... ما قلت ليكم Author: هاشم أحمد خلف الله Date: 11-02-2007, 05:47 PM Parent: #13
غدّو يا غالية اول هام: قالوا بوستات البنات كلها كسير تلج عشان كدة خليني أبدأ بالكسير دة: ليك يا ستي وحشة ومشتاقين ومنورة البورد تاني هام انا قطيعة الامريكان حأسمع عنها منك انتي .. لكن غايتو اتخيل لي قطيعتنا نحن السودانيات في التاريخ ما حصلت ولا اظن في زول بيلحقنا .. ولما تجي تبدي أي وجهة نظر سالبة على الموضوع دة يسكتوك بي انه (القطيعة دي ما بهارات الونسة) وهم في الحقيقة عارفين انها ما البهارات انما الطبق الرئيسي ذاتو.
واهم شي طبعا يا غادة قطيعة اهل العريس في اهل العروس خاصة اذا كانت اول زيارة .. الجماعة لازم يثبتوا بي أي طريقة انه اهل العروس ديل ما بيتفوقوا عليهم بي أي حاجة. اذكر يا غادة مرة في زيارة من النوع دة ونحن اهل عريس في دعوة عشاء عند نسابة جديدين لنج، وحيث انه النسابة ديل ناس هاي لايف وكانوا مقطعنها للآخر فكان العشاء تمام التمام و serve yourself وكدة .. عندنا واحدة من النسوان النوع اللسانها متبري منها ولازم تلقى ليها أي عيب تمسكو عليهم .. المهم عاااااينت لقت كل شي عشرة على عشرة وما عندها أي طريقة فأهتدت في الآخر لانها تعلق على البوفيه المرصوص بدراية تامة: أسة الرز الفي العشاء دة كان في ليهو داعي .. لما قمنا للعشاء الرز دة طلع كمية كبيرة من الجبنة البيضاء المبشورة بجانب الزيتون .
الحمد لله يا غادة في الغربة دي كان عاوزين نقطع ذاتو ما بنلقى زول نقطع معاه بس الله يقدرنا على شهرين الاجازة
مودتي
Post: #52 Title: Re: أسكتوا... ما قلت ليكم Author: غادة عبدالعزيز خالد Date: 11-03-2007, 01:19 AM Parent: #19
Quote: عندنا واحدة من النسوان النوع اللسانها متبري منها ولازم تلقى ليها أي عيب تمسكو عليهم .. المهم عاااااينت لقت كل شي عشرة على عشرة وما عندها أي طريقة فأهتدت في الآخر لانها تعلق على البوفيه المرصوص بدراية تامة: أسة الرز الفي العشاء دة كان في ليهو داعي .. لما قمنا للعشاء الرز دة طلع كمية كبيرة من الجبنة البيضاء المبشورة بجانب الزيتون
شيماء يا عسل والله قريبتك دي (سعبة) خلاس يا ربي بعد داك قالت شنو؟ دقيقة، ما تقولي لي خليني أخمن.. تكون قالت الناس ديل ما بيعرفوا يرصوا ولا شنو الجبنة يا كافي البلا شكلها زي الرز
غايتو، حاجة كيف كيف كده
Post: #50 Title: Re: أسكتوا... ما قلت ليكم Author: غادة عبدالعزيز خالد Date: 11-03-2007, 01:16 AM Parent: #15
Quote: ومنتظرين قوالتك ( قطيعتك ) حصل شنو
هاشم.. شاعرنا اللطيف...
آخر قطيعة لي (إن شاء الله) كانت في الأمريكان أنهم ناس قطاعيييييين خلاص
شفت الشمار ده كيف؟
تحياتي لأم أحمد والأسرة
Post: #36 Title: Re: أسكتوا... ما قلت ليكم Author: غادة عبدالعزيز خالد Date: 11-02-2007, 10:58 PM Parent: #13
Quote: بالله شفت العب دا قال شنو؟
أحكي ليك حاجة يا العوض بمناسة هذا الموقف في صديق عزيز لينا من جنوب أفريقيا يتحدث اللغتين الإنجليزية والفرنسية بطلاقة وبينما هو في ولاية نيويورك وفي أحد فنادقها الراقية ركب معة في (الاسانسير) شخصان يبدو أنهما فرنسيان وبدأ الشخصان في التحدث عن صاحبنا وهما لا يعرفان أنه يتحدث الفرنسية فيقول أحدهم للآخر
-شايف الأسود ده لابس أنيق كيف؟
ويرد عليه الآخر
-وكمان نازل في فندق غالي
وأستمر الحوار على هذه الشاكلة وصاحبنا صامتا حتى وصل الجميع إلى بهو الفندق وبدأ الشخصان في محاولة التفاهم مع عامل الفندق الذي لا يتحدث الفرنسية وتعبوا لفترة وصاحبنا في إنتظار صديق له في البهو فما كان منه إلى وأن إقترب من الجمع وبدأ في الترجمة وأصحابنا الفرنسيين واجمين المهم، بعد داك تتخيل كمية الإعتذارات
بس طبعا قطيعة عالمنا ده عشان فيها الكلام (اللكة ) بتلقيها لايوقة شوية واجمل منظر لما تشوفي التعبير البيترسم على وشوش الناس لما يسمعوا جملة ( شمار حار) والذي تتبعه بالتاكيد قطيعة احر منه
لوووووووووول
Post: #53 Title: Re: أسكتوا... ما قلت ليكم Author: غادة عبدالعزيز خالد Date: 11-03-2007, 01:23 AM Parent: #22
Quote: ديل بتكون قطيعتهم تلاتة جكوك وكوزين كمان
مايا يا حبيبة
والله الجماعة ديل قطاعين بشكل.. إنت عارفة، بعد ما بديت الشغل لقيت ليك الحكاية دي حاجة ما عادية.. شفت فلانة حصل ليها شنو؟ وفلان رفدوهو؟ وبعدين لمحة الدهشة على الوجة..وتخت ليك الواحدة يدها في سدرها كده وتدق بقوةو تقول
Oh My Goooooooooood, why? what happened تقولي بتردح بس
العزيزة غادة اعتقد انه القطيعة هي تحايل علي محددات العلاقة بين الناس.. مثلا عندنا ضرورة الترابط الاجتماعي علشان كدا بتمارس النقد في غياب الشخص المعني تفادي للتصادم و التسبب في خلخلة في العلاقة الاجتماعية.. و هنا في الغرب الخوف بكون من القانون بتفادي المواجهة الممكن تتطور لتصل مرحلة الخصومة القانونية.. هنا الالمان مستحيل واحد يغادر مجلس و يتقفل وراهو باب او بتعد مسافة لا يتمكن معاها من سماع جلساءه, اقول مستحيل انه ما يكون موضوع اول متحدث,, و هاكذا دواليك و آخر واحد بيقطع في سره.. مرات اتخارج من مجموعة و ارجع بسرعه,, المتحدث يقعد يربرب ما يعرف يتخارج كيف.. و هم ما عندهم قشة مرة عادي الزوجين يقطعوا في بعض و الاصدقاء و كله يقطع في كله.. بجودوا شغلهم زي صناعاتهم.. و اكتر قطيعة بين العمال في المصانع لانه مافي حاجة تانية يتسلوا بيها اثناء العمل..
Post: #24 Title: Re: أسكتوا... ما قلت ليكم Author: Raja Date: 11-02-2007, 09:27 PM Parent: #23
غادة يا حبيبة..
سلامات ومحبات..
متأخر جدا إكتشفت إنو أكتر الناس البتعرف القطيعة هم الخواجات ديل.. بتذكر كنت مسافرة بالقطار من النمسا لألمانيا برفقة نصار ده زاتو والجميلة فيروز عمر.. أها ادوني الوصايا العشر للتعامل مع الألمان. واول شئ قالو لي إنو الألمان ديل من أكتر الشعوب البتريد القطيعة.. إستغربتا لأني طول عمري قايلاهم (هتلر) و(رومينجة).. والإتنين ديل وشهم صاري وما بتكلموا مع الجنبهم، فما بالك بجيبة سيرة التانين كمان؟؟ بتذكر إنهم قالو لي لو كنتو 3 وواحد فيكم دخل اوضة تانية.. الإتنين على طول بيقطعوا فيهو.. ولما يرجع ويغيب تاني بيكون هو مادة القطيعة.. وهكذا المهم.. مشيت وزي ماحكوا لي فيروز ونصار.. الجماعة ما قصًروا واثبتوا لي بالفعل.. اللذيذ بهاء أخوي كان بيترجم لي القطيعة الكانت بتحصل قدامي بالألماني.. وطبعا كانوا مطمًنين إني ما ناقشة حاجة ..
أما الأمريكان.. فديل عايزين بوست بحالو .. .. الفرق بين قطيعتنا وقطيعتهم إنو قطيعتنا ممكن تكون من أجل الونسة (وبرضوا أرفضها). أما قطيعتهم فلا علاقة لها بالونسة وإنما لإضافة نقاط ضد خصومك لإستخدامها لاحقا..
مشكلة العرب انوا نميمتهم ظاهرة عياناً بياناً بالحركات والعيون ...الخ. أما الأمريكان بشكل عام بيعملوا بماخفي أعظم... الواحد فيهم يتبسم وهو من خلف الابتسامة بيجهز في أرض جو.
تقديري غادة
Post: #58 Title: Re: أسكتوا... ما قلت ليكم Author: غادة عبدالعزيز خالد Date: 11-03-2007, 01:36 AM Parent: #25
Quote: الواحد فيهم يتبسم وهو من خلف الابتسامة بيجهز في أرض جو
سلامات يا سلومة
عارفة، أنا كنت بستغرب جدا في الحكاية دي أنا من الناس الفي قلبي بيظهر في وجهي طواااالي ولو متضايفة من زول أو حاجة ما بقدر أتظاهر بغيرها لكن الناس ديل الواحد يشتكي ليك مر الشكوى من زول بعد شوية تلقيهم بيتنسوا ليك ويشربوا القهوة مع بعض وزي الما حاصل حاجة
والله حاجة تحير
Post: #57 Title: Re: أسكتوا... ما قلت ليكم Author: غادة عبدالعزيز خالد Date: 11-03-2007, 01:34 AM Parent: #24
Quote: الله يكفينا شر الخواجات وقطيعتهم ومصايبهم..
رجوية اللذيذة.. مشتاقين
عارفة.. أول مرة أشتغل مع الأمريكان هنا كنت ليك زولة مسكينة خلاص وفي واحدة كده من الناس الشغالين كانت صعبة ومضوقاني ليك الويل وأنا مسكينة وماسكة خشمي عليّ مرة كده بالغلط إبتديت أحكي لواحدة زميلة لي وبعد كده إكتشفت ليك عن تارخ الزولة الصعبة دي العجب العجاب وبديت أدخل عام الأمريكان ديل في الشغل ولقيتهم ليك صعبين خالص خالص وبقيت أنا البقول ما دايرة أقطع وبهرب منها عدييييييييل
Post: #56 Title: Re: أسكتوا... ما قلت ليكم Author: غادة عبدالعزيز خالد Date: 11-03-2007, 01:30 AM Parent: #23
Quote: هم ما عندهم قشة مرة عادي الزوجين يقطعوا في بعض و الاصدقاء و كله يقطع في كله
النحكي ليك حاجة يا نصار
عارف، كنت إبتديت شغل جديد ومع معز زوجي في نفس المكان وبما أنني كنت لسة بادية ومفلسة جدا فكنت بقوم بتصل بمكتبو أو أمشي عليهو طواااالي وأخش توووووش وأقول ليهو عاوزة قروش بس وحياتك يقوم يديني ليك وشكلو كده متغااااظ بس، مرة قمت عملت نفس الحركة دي وكان قاعد مع أصحابه وأخذت القروش وأنا طالعة كده وقربت من الباب أسمعو ليك بيقول لأصحابه بضحكة كده
-والله لما تكون مرتك شغالة معاك في نفس الحتة صعب تقدر تتدس منهاوتشيل قروشك وما تقدر تفتح خشمك
بس جيتو راجعة.. وقلت ليهو
-على فكرة، أنا لسة ما طلعت كلو كلو ولسة سامعاك بس.. وليك تتخيل المنظر
مرحبا بالأستاذة رجاء. لأن الأخت رجاء مرتبطة في ذهني بمصر أول ماشفتها اتذكرت ألذ و أغرب قطيعة سمعتها في حياتي. كنت راكب ورا راجلين في بص في القاهرة واحد فيهم بشتكي من واحدة و التاني شغال يعلق لا دي كدا تبقي بتستغلك... و داك يحكي عنها و عن معاملتها لضيوفو و بصوت عالي المهم أنا خمنت تكون جارتو بالذات انو التاني شتمها ليهو ما خلا ليها حاجة. بعد ربع ساعة امكن أسمع ليك التاني بقول للراجل البشتكي أصلها خايفاك تطلقها. والله ما عرفت أضحك ولا أعمل شنو... دا كلوا قطيعة في زوجتو؟
Post: #27 Title: Re: أسكتوا... ما قلت ليكم Author: Raja Date: 11-02-2007, 10:08 PM Parent: #26
العزيز العوض..
سلام وتحية..
(نمًة) المصريين دي ليها نكهة تانية خالص.. تسمع ليك كلام حلو تقرًب تصدقه.. لو بس إتأملتا فيهو تلاقيهو يحمل وجهين
الملاحظاهو لما أسمع اتنين مصريين بيتكلمو الغالب هو جملة (ألت له) (قلتا ليهو) أو (آل لي).. يعني في كل الأحوال (الأوالة) حاصلة
تحياتي
* يا غادة أعفي لينا (القطيعة) البي جنبة دي في المصريين ..
Post: #35 Title: Re: أسكتوا... ما قلت ليكم Author: عاطف عمر Date: 11-02-2007, 10:53 PM Parent: #27
غايتو يا رجاء ... .... ... بتظهري ( بس ) مع القطيعة ؟؟؟
تخريمة
ياخ راوية دي عسل بس والله كان ما ظروف الشغل الحكتها لينا كنا ( دسينا جواز السفر )
غادة بعد إذنك
Post: #37 Title: Re: أسكتوا... ما قلت ليكم Author: Raja Date: 11-02-2007, 11:01 PM Parent: #35
إزيك يا عاطف..
سلامات وأشواق من عندي لغاية داركم العامر..
طبعا أنا اليومين دي ماشة بنظرية (الما عنده تيلة، يسوي الحد حيلة) (لأنه ما عندي تشكيل للحروف الحد هو الحداد) يعني ربطة اليد الفترة الفاتت جات في وقتها.. المنبر بقى (غير). الزول يدخله ويطلع منه وما يفهم ولا يقدر يقرأ اي حاجة.. وما صدقنا غادة جابت لينا القطيعة لغاية عندنا ..
تحياتي لسعدية والبنيات والأمين
Post: #62 Title: Re: أسكتوا... ما قلت ليكم Author: غادة عبدالعزيز خالد Date: 11-03-2007, 04:07 AM Parent: #35
Quote: غايتو يا رجاء بتظهري ( بس ) مع القطيعة ؟؟؟
إنت يا عاطف مسؤل عن الخير صحي رجوية دي يتريد القطيعة؟
رجاء مشت تنوم قمنا نقطع فيها
Post: #93 Title: Re: أسكتوا... ما قلت ليكم Author: غادة عبدالعزيز خالد Date: 11-03-2007, 11:49 PM Parent: #35
Quote: ياخ راوية دي عسل بس والله كان ما ظروف الشغل الحكتها لينا كنا ( دسينا جواز السفر )
كدي دقيقة يا عاطف... قلت لي راوية دي كيف.. أدينى الشمار أها، عسل قالت شنو وعملت شنو وظروف شغل شنو... والله الليلة نحير ليك الشمارات ظااااتها
Quote: غادة بعد إذنك
يا أبو نسب إنت سيد البوست
Post: #61 Title: Re: أسكتوا... ما قلت ليكم Author: غادة عبدالعزيز خالد Date: 11-03-2007, 04:04 AM Parent: #26
Quote: دا كلوا قطيعة في زوجتو؟
يا زول على الأقل الاصحاب كانوا براهم في البص وبيقطعوا في زوجة واحد حسة هي تلقاها لامة نسوان الحلة كلهم وتحكي ليهم وكمتن تكون واقفة في البلكونة تقص وترص وإللي ما يشتري يتفرج
نواصل في قطيعة المصريين لغاية ما تجي ست البوست. صراحة يا رجاء لما الواحد يكون في الشارع في مصر بكون كأنه جوة مسرحية و بي جوة دي أنا قاصد في نص خشبة المسرح و بعاين للممثلين في وجوههم واحد ورا التاني. يعني عندهم طريقة عجيبة في التعامل و الكلام. ألذ واحد يحكي ليك عن حياتو في مصر أخونا عضو البورد هاشم نوريت والله مرة معانا واحد فلسطيني و هاشم بدا يحكي الراجل بقى يضحك لما وقف على حيلو و دموعو تجري و يحاول يقعد يغلبو من الضحك.
القطيعة دي بقت علم في أمريكا و بسموهاأل(information system)
مع تحياتي...
Post: #70 Title: Re: أسكتوا... ما قلت ليكم Author: غادة عبدالعزيز خالد Date: 11-03-2007, 02:42 PM Parent: #30
Quote: القطيعة دي بقت علم في أمريكا و بسموهاأل(information system
سلامات يا ملامح وأنا كنت بقول الناس ديل بيتجسسوا على بقية خلقالله الزينا المسلمين الإرهابيين علشان الأمن والأمان وغيرها من الأعذار الغريبة الجماعه تاريهم في قطيعة رايحة ليهم
Post: #72 Title: Re: أسكتوا... ما قلت ليكم Author: غادة عبدالعزيز خالد Date: 11-03-2007, 02:48 PM Parent: #28
Quote: ألذ واحد يحكي ليك عن حياتو في مصر أخونا عضو البورد هاشم نوريت والله مرة معانا واحد فلسطيني و هاشم بدا يحكي الراجل بقى يضحك لما وقف على حيلو و دموعو تجري و يحاول يقعد يغلبو من الضحك.
ومن هنا نناشد دبايبو هاشم نوريت مع أخونا العوض عاوزين نسمع بعض الحكي.. وينك يا هاشم
العزيزة رجاء ههههههههه خلوك تآمني موش??? في الشغل كان معاي زميلين من الالمان الهربوا من هتلر و ديل كانوا في بولندا لحد انهيار المعسكر الاشتراكي.. طول اليوم يورجغوا بالبولندي لمان فكرت استعين بصديق و طبعا ح يكون عادل عبد العاطي.. مرة حكيت ليهم قصد صاحبنا درس في بولندا و متزوج بولندية و بجيد اللغة طبعا يوم في الاسانصير شلة بولنديين دوروا فيهوا قطيعة بولندية ابو كديس لمان وصلوا طابقهم ودعهم صاحبنا ببولندية فصيحة و ممكن تتصوروا ردة فعلهم.. بعد حكيت القصة دي بقوا الزميلين يعملوا حسابهم و اعتقدوا اني برضو بعرف لغتهم و بتغاتت عليهم...
Post: #34 Title: Re: أسكتوا... ما قلت ليكم Author: Raja Date: 11-02-2007, 10:47 PM Parent: #29
ههههههههههههههه يا نصار ..
أنا شخصيا سمعتا القطيعة فيني مرتين في أسانسير.. الغريبة الإتنين من سودانيين كانوا فاكريني حبشية.. وطبعا القطيعة بالعربي. الأولى كانت في القاهرة ومن شخصيتين سياسيتين. والتانية كانت في أسمرا من فنانين جميلين أنا بحبهم كتير..
الكويس القطيعة ما كانت كلام كعب.. وإلا كنتا رديت في الحال الغريبة في المرتين خجلتا اقول ليهم يا جماعة الخير أنا سودانية زيي زيكم.. ولما بعد داك عرفوني.. هم الخجلو ..
يا العوض صحي الحياة في مصر زي مسرحياتهم بالضبط.. ولأننا بنريد المسرحيات دي فالحياة هناك متعة بالرغم من الزحمة وصوت (الكلاكس) البوري..
Post: #38 Title: Re: أسكتوا... ما قلت ليكم Author: غادة عبدالعزيز خالد Date: 11-02-2007, 11:02 PM Parent: #34
إلى جموع القطاعين هنا والبيتاوقوا بس هدية من الأخت الحبيبة شيماء
من أصدقائي { المساخيت } من شبه ذات يوم القطيعة ... وكأنها تلك { الجغيمات } التي يتناولها الصائم العابث وهو يتوضأ للصلاة , فهي قليلة لكن لها مفعول نوعي بالغ الأهمية ولما تعين على إستكمال الصيام لبقية اليوم.
وصديق آخر كان يعتبر أن أقصى مرادات العمل السياسي السوداني تتجلي فى { حديث المضاجع }
أما تجربتي الشخصية فى مضمار الإلتحاق بمنظومة كندية فى مجال العمل , فتؤكد لي أن الإمكان إضافة الكنديين للأمريكان فى ريادتهما لمشروع القطيعة الإجتماعية بشمال أمريكا... إبقى حقوا الناس إفتشوا عن مين الما بقطع ... بحكم الندرة.
I HATE GOSSIP
وإنتم تتجادلون فى الأمر ... ليتني أرى إضاءة على إلحاق كلمة شمار كشفرة للقطيعة , فأظن أن هذا عهد قريب ... فما القصة ؟
شكر ... غادة ... والبركة فى قطيعة الأمركان ده الجابتك راجعة لأحبابك وقرائك فى هذا البورد .
رجوية ... من ديك وعيك ... يعني إلا رمضان الجايي, ... طيب ... ويييين الكنافة .
مع مودتي
Post: #40 Title: Re: أسكتوا... ما قلت ليكم Author: Raja Date: 11-02-2007, 11:26 PM Parent: #39
حيدر يا عزيز..
سلامات ومحبة..
Quote: رجوية ... من ديك وعيك ... يعني إلا رمضان الجايي, ... طيب ... ويييين الكنافة .
يااااااه.. الزمن جرى.. مشيت القاهرة لحقتا لي يومين في رمضان.. يوم حقنا ويوم أخًروا لينا فيهو العيد .. طبعا ما قصًرتا في الكنافة واللذي منه.. كانت تستاهلكم
ما بين زحمة الشغل، والفوضى الحاصلة هنا. حاسة بغربة وزهج.. دعواتك.. التعديل كان لحذف كلمة مكررة..
Post: #73 Title: Re: أسكتوا... ما قلت ليكم Author: غادة عبدالعزيز خالد Date: 11-03-2007, 02:58 PM Parent: #39
Quote: أما تجربتي الشخصية فى مضمار الإلتحاق بمنظومة كندية فى مجال العمل , فتؤكد لي أن الإمكان إضافة الكنديين للأمريكان فى ريادتهما لمشروع القطيعة الإجتماعية بشمال أمريكا... إبقى حقوا الناس إفتشوا عن مين الما بقطع ... بحكم الندرة.
I HATE GOSSIP
العزيز حيدر قاسم
زمان كان تسمع إن السودانيين بيحبوا القطيعة والنسوان ديل ما عندهم شغلة غير يقطعوا في بعض أولم يذكر أن النساء هم من أكثر أهالي النار بسبب ألسنتهن؟ حاجة تخوف!! ولكن إحتككاكنا بعد ذاك بالعالم الغربي وجدت أن هذه القضية غير قاصرة على السودانيين أو حتى على المجتمعات الشرقية لكن في المجتمعات الغربية كثيرة جدا في دراسة حديثة وجد أن الأمريكيين أكثر ما يضايقهم في مجال العمل هي النميمة هذه وبرضو يقولوا ليك أنا ما بحب أقطع في زول لكن كدي جيب لي أضانك النقول ليك حاجة
سعيدة برؤيتك يا حيدر فلوجودك دوما نكهة خاصة تحياتي للأسرة الكريمة.. وخليها تدينا الإذن علشان عاوزة أقطع فيها هنا في البوست ده ممكن؟
شفتوا ليكم زول بيستأذن قبل ما يقطع؟
Post: #71 Title: Re: أسكتوا... ما قلت ليكم Author: غادة عبدالعزيز خالد Date: 11-03-2007, 02:46 PM Parent: #29
Quote: بقوا الزميلين يعملوا حسابهم و اعتقدوا اني برضو بعرف لغتهم و بتغاتت عليهم...
من عرف لغة قوم عرف شرهم وفي حالتك دي يا نصار،، من عرف لغة قوم آمن قطيعتهم
Quote: توافقا مع روح البورد الشمارية لا أملك إلا أن أسأل الأخت العزيزة رجاء.... قالوا شنو؟
انا ذااااااااااااتي الشمار كتلني لكن بس خجلتا اسأل
ــــــــــــــ غادة الحقي البوست بتاعك إستُلِب
Post: #44 Title: Re: أسكتوا... ما قلت ليكم Author: Raja Date: 11-02-2007, 11:54 PM Parent: #43
شيماء يا عزيزة..
سلامات كتااار..
الظاهر ردودنا كانت في لحظة واحدة.. راجعي الرد السابق للعوض ..
تصدقي عمرك أطول من عمري.. كنت عايزة اقول لغادة هسع أكيد في جماعة هنا حيقطعو فينا ويقولو البوست إتنهب ..
تحياتي
Post: #45 Title: Re: أسكتوا... ما قلت ليكم Author: Shayma Date: 11-03-2007, 00:02 AM Parent: #44
ازيك يا رجاء وكل سنة وانتي بألف خير وربنا يحقق امانيك
Quote: تصدقي عمرك أطول من عمري.. كنت عايزة اقول لغادة هسع أكيد في جماعة هنا حيقطعو فينا ويقولو البوست إتنهب ..
يا زولة غادة باين مشت نامت ونحن كتر خيرنا ما قصرنا والحكاية مش كلها قطيعة X قطيعة يبقى ما طلعنا برة الموضوع
ودي
Post: #46 Title: Re: أسكتوا... ما قلت ليكم Author: Raja Date: 11-03-2007, 00:13 AM Parent: #45
سلامات يا شيماء تاني..
تعرفي مرة كنا عازمين راجل بت خالتنا كان في زيارة للقاهرة.. أها قام إتاخر شدييد على وقت الغدا.. الساعة 4 جات ومشت وهو ما جا، الساعة 5، الساعة 5 ونص.. لقيت مافي أي طريقة أنتظر مع ناس البيت لغاية ما يجي.. ودنكلتا صحني بمزاج وقعدتا آكل. أمي قالت لي: البياكل قبل ضيفانو بيقولو عليه بريد القوالة .. ما عارفاها جابت الحكمة دي من وين غايتو ردي ليها: اولا الجوعة كتلتني. تانيا أنا شغلتي الباكل منها عيش هي الصحافة الكلها (قال فلان وذكر علان.. )
* أنا زاتي النعسة حصلت وساعتي مشت لواحدة.. أجيكم باكر لو ربنا مد في العمر..
ودي
Post: #47 Title: Re: أسكتوا... ما قلت ليكم Author: سلمى الشيخ سلامة Date: 11-03-2007, 00:37 AM Parent: #46
القطيعة حقت الامريكان باطن وظاهر بالله اللزى يا غادة يقربن يكشحن ليك ترابة بنات بربر وما كنت قايلاهن قطاعات وقطاعين كدى يوم راكبة فى الباص قاعد جمبى زول عجوز فى المحطة الاخيرة نزلن بنات اظنهن مكسيكيات سماااااااان ومبظبظات اها قام قال لى شفتى البت النزلت دى صغيرة لكنها سمينة شديد وعمرها ما اكتر من عشرين سنه قلت ليهو وكان مصادف يوم عيد ميلادى الخمسين اها شنو قولك انا الليلة تميت خمسين سنه وترانى سمينة احمد الله عاين لى شديد وقال لى ما تكلمى زول ما باين عليك وبعد داك دور ليك جنس قطيعة ما خلى زول فى الباص ولمن نزلت بدا حزنان لانه الظاهر ما بقدر يلقى ليهو زول من ناس بربر زى حالاتى شفتى القطيعة دى كيف وما حكيت ليك بالمدرسة المعاى فى الفصل نسوان بربر شنو يا زولة دى بربر زاتا ما يجى مار زول الا تسال دا منو تردى عليها تمرق ليك كيف فطموه اجى يا الامريكانيات هيلكن غلب اقعدى عافية
Post: #80 Title: Re: أسكتوا... ما قلت ليكم Author: غادة عبدالعزيز خالد Date: 11-03-2007, 06:38 PM Parent: #47
الأستاذة الحبيبة سلمى الشيخ سلامة
في مرة قررت مديرتي ترك العمل وتم الإعلان عن وظيفتها على جدران المكان وبدأ الناس في التساؤل عن أسباب تركها الوظيفة كان أسمها راندا وهي متزوجة منذ خمس سنوات ولم يرزقها الله بطفل فقامت بالإتفاق مع بعض من الزملاء بأن (يطلعوا) ىإشاعة أن هي حامل.. وقصت لي الموقف وهي تضحك وظننتها داعبة المهم بعد خمسة أو عشر دقائق كده.. ذهبت إلى قسم آخر من أقسام العمل وجاءتني واحدة مسرعة وسألتني بدة مقدمات
-هي صحيح راندا مخلية الشغل علشان حامل؟
وعلى قولك، اجى يا الامريكانيات هيلكن غلب
محبتي
Post: #48 Title: Re: أسكتوا... ما قلت ليكم Author: نصار Date: 11-03-2007, 01:08 AM Parent: #1
في الحيبتاعنا واحدة خرسا امهاتنا في الضهرية بيتلم في واحد من البيوت,, نجي من برة يقومو يسألون صحي حصل كدا وكدا,, نقوليهم الجاب الاخبار دي منو?? يقولو لينا فلانة البكما,, و حكمت الله هي مركز اعلامي خطير جدا مع انه لا مصدر اخبارا و لا المتلقيين بعرفوا لغة الاشارة,,
الاسكتش الفوق دا بوضح بجلاء القطيعة معرضة لخطر العولمة و الحداثة شوفو تلقائية و مهارة سعاد و شوفو الشابة كيف التصنع واضح في اداءها.. واحدة زميلتنا حداثية خالص في الاجازة امها تجبرا تجامل في المناسبات و البكيات الحصلت في غيابا,, مشت تبارك لجارتهم انها ولدت الزميلة دخلت الجارة شمال و قالت ليها ان شاء الله البركة فيكم و المرا اتشاءمت منها من يومادك.. يا سلمة قدامكم مهمة تاريخية في حماية هذا التراث المجيد من دواهي الزمن,, looool
Post: #49 Title: Re: أسكتوا... ما قلت ليكم Author: غادة عبدالعزيز خالد Date: 11-03-2007, 01:12 AM Parent: #48
والله كنت قايلة نفسي قطااااعة
لكن تاريني كويسة
Post: #51 Title: Re: أسكتوا... ما قلت ليكم Author: ماجدة عوض خوجلى Date: 11-03-2007, 01:18 AM Parent: #1
غدو كيفك حبيبه غايتو انتى تانى ماتقولى ، شفتى الجامعة ديل والله قطاعين اكتر مننا وشنافين بصورة غريبة واظنها من الصفات العالميه المشتركة للشعوب تحياتى لكل الاسرة وسلام خاص من الحجة تسلمى
Post: #84 Title: Re: أسكتوا... ما قلت ليكم Author: غادة عبدالعزيز خالد Date: 11-03-2007, 10:56 PM Parent: #51
Quote: واظنها من الصفات العالميه المشتركة للشعوب
الأخت الجبيبة ماجدة
أعتقد أنها من الصفات العالمية المشتركة ما بين البشر ولكن كان إكتشاف بالنسبة لي بعد حضوري إلى أمركيا وبالذات الغربيين ديل والله يا ماجدة يا أختي، أصلو ما كنت قايلاهم كدي اللهم أمنعنا من القطية يا رب
سلامات وباقات محبة مني لماما جارة بنحبك يا ماما جاااااارة
Post: #55 Title: Re: أسكتوا... ما قلت ليكم Author: تاج السر حسن Date: 11-03-2007, 01:30 AM Parent: #1
سلامات با غاده
Quote: أسكتوا... ما قلت ليكم
منتظرنك تقولى وتسكتى الخشامه !!
Post: #59 Title: Re: أسكتوا... ما قلت ليكم Author: غادة عبدالعزيز خالد Date: 11-03-2007, 01:41 AM Parent: #55
أها يا ناس القطيعة النحكي ليكم قصة بهذه المناسبة
أحد الأصدقاء قال إنه كان قاعد في بيتهم في آمانة الله فدخل عليه أحد الأصدقاء وبيده شخص غريب عنه وكانوا بيتاقشوا في ترتيبات حفل كبير في جاليتهم السودانية وأقترح الزائر أسم أحد الفنانين الكبار فقال له الصديق بلهجة قوية
-ياخي الفنان ... ده شنو الحتجيبو لينا ده كدي شوف لينا واحد غيرو
فبس الناس صنت شوية كده، وبعدين قام الزائر بتعريف الشخص الغريب وكان هو نفس ذلك الفنان الكبير فإتحرج صديقنا جدا وقبل أن يعتذر نظر صوب الفنان الكبير وقال له
-يا أخي أنا حاحكي ليك حكاية
. . .
Post: #60 Title: Re: أسكتوا... ما قلت ليكم Author: غادة عبدالعزيز خالد Date: 11-03-2007, 01:45 AM Parent: #59
وأعتدل الصديق في جلستو وقال له
كان عندنا ود أهلنا زمان بيقطلع ليهو في زول وكان بيكرهو شديد ومتغاظ منو جدا جدا وما خلى ليهو حاجة قدام الناس ومافي زول بيرد عليهو فقام فجأة نظر خلفة ووجد أن نفس ذلك الشخص الذي بيطع فيه موجود خلفة وواقف يستمع في صمت لكل ما يقول فما كان من قريبة إلا، وبسبب (الخلعة) التي أصابته أن مد يده بسرعة وضرب الشخص الذي كان بيقطع فيه على وجهه ضربة قوية..
وأستمر صديقنا قائلا للفنان
-أها، أنا حسة مهجوم زي قريبنا داك فعاوز تنسى الموضوع ولا أقوم أديك كف شديد
Post: #63 Title: Re: أسكتوا... ما قلت ليكم Author: Aymen Tabir Date: 11-03-2007, 06:24 AM Parent: #60
دكتوره شمارات سلام كثير وزمممممممممممممممممممن عارفه يا غاده البورد ده برضو فيهو شمارات انا كنته قايل المرضه كيبورد وبس طلع انو في شبكات وتلفونات و......الخ لكن كلو كوم والكنديين ديل عندهم مرضه تانيه غير القالوا حيدر -(البري)-الواحد لو طلع مشه اللنش وجه راجع الله يحلك تاني لو ما حكه ليك صحن السلطه بي بهاراته ما بفكك ، عندي زميل لي راجل كبير كده كل ما نكون شغالين بحكي لي بالـtrailer بتاعتو وياريت على التفاصيل وبس بي رسمه التوضيحي والله فيوم بدا داير يحكي فزهجته قاطعتو ، قلته ليهو لو الداهيه انته حكيته لي قبل كده ، نطه هو وقال لي لا لا ... دي حاجه جديده انا اشتريت تلفزيون فلات سكرين ـ طبعا طوالي طلعته من المكتب !! اها رايك شنو في الشمار ده ؟؟ كوني بخير دايما راعي الفراشات
Post: #86 Title: Re: أسكتوا... ما قلت ليكم Author: غادة عبدالعزيز خالد Date: 11-03-2007, 11:21 PM Parent: #63
أيمن كيف يا صديق
خلاص، كده الكنديين كمان إنضموا للقائمة وموافقين عليهم بختم كمان عندي خالي الله يرحمه كان بيزهم من زميل ليهو في الشغل زي زولك ده.. كل مره يحكي ليهو نفس الحكاية أول مرة سمعها وضحك.. تاني مرة سمعها مجاملة ليهو تالت مرة، أول ما بدأ الزميل يحكي قام الخال خت يده في رأسو فزميله فال ليهو ياأخي أنا الحكاية دي حكيتها ليك قبل كده؟ فالخال وبتعبير أقرب للبكاء.. رد ليه ثلالالالالالالالالالالالالالالاث مرات
غايتو حالتك إن شاء ما تصل لحالته
شكرا يا راعي
Post: #64 Title: Re: أسكتوا... ما قلت ليكم Author: زهير حيدر صديق Date: 11-03-2007, 06:26 AM Parent: #60
العزيزة غادة كعهدنا بك تطرقين دروباً متميزة من المواضيع. تابعت سردك الشيق باستمتاع يفوق الوصف. تخريمة: ربنا يكفينا ويكفيك شر القطيعة والنميمة لكن الشاب العربي ده فكرتو شنو في عرسو من الحبوبة دي؟
Post: #65 Title: Re: أسكتوا... ما قلت ليكم Author: ali elhassan Date: 11-03-2007, 07:31 AM Parent: #64
ازيكم وبس هسع وبجيكم بعد انقطاع عشنان اسلم على الجميع ونعيد عليكم ونقول ليكم رمضان كريم
سلام لجميع
على الحسن
Post: #88 Title: Re: أسكتوا... ما قلت ليكم Author: غادة عبدالعزيز خالد Date: 11-03-2007, 11:30 PM Parent: #65
Quote: ازيكم وبس هسع وبجيكم بعد انقطاع عشنان اسلم على الجميع ونعيد عليكم ونقول ليكم رمضان كريم
سلام لجميع
الأخ العزيز على الحسن
أولا، ما تتخيل مدى سعادتي برؤيتك كيف,.. تذكرتك والله قبل أيام وتساءلت أن أين أنت وأقول ليك شمار
كدت أن أرسل لك ماسنجر أو أفتح بوست لولا المشغوليات.. لكنك والله في البال وسعيدة برؤيتك أيما سعادة
تسلم يا أخي وإن شاء الله نشوفك دائما
ودي غادة
Post: #66 Title: Re: أسكتوا... ما قلت ليكم Author: Nasser Mousa Date: 11-03-2007, 08:09 AM Parent: #64
موقف مشابه لي قصة الفنان بتاعكم ده يا غادة ايام العزوبية وكده والرياض ( 1999/2004 ) كنا ساكنين مجموعة ومن ضمن المجموعة اتنين اخوان ناصر محمد نور احمد محمد نور المهم وفي يوم من الايام جبنا شريط وكنا مبسوطين بيهو جدا للفنان عصام محمد نور( اسم على اسم ) ولا توجد اي علاقة بين الشباب ديل والفنان عصام المهم شغلنا الشريط ده وكان في واحد بيناتنا ما بحب ليك عصام ده لله بس كده واول ما سمع الشريط بس وقام هاج ... ده شنو المشغلينو ده وده فنان ده وكلام كتير ... ونحن كلنا عايزين نسمع الشريط فانا سريع كده فكرت احرجو ليك قدام الشباب وطوالي باغتو ليك بي سوال ياخي انت اكيد ما عرفت الفنان ده وانت قاصد شخص تاني قال لا انا قاصد ده ذاتو قولت ليهو اكيد ما قاصد لانو ده عصام محمد نور ... حاول يقاطعني ويتكلم لكن انا واصلت ... اخو الشباب ديل ناصر واحمد فطوالي جر واطي وقال فعلا انا ما كنت عارفو منو هو بالله ده عصام محمد نور ولكن للاسف الشديد برضو ما سمعنا الشريط لانو الناس امتلك الضحك من منظر صاحبنا المصدوم بالخبر في انو اخوان الفنان الهو بكجنو الاتنين هم اصحابو وهو اول مرة يعرف القصة ده . فارتسمت اندهاشة كبيرة على وجهه ممااضطررنا ان نذيل عنه الاشتباك وكلمناهو بالحقيقة
تحية وسلام للاخت غادة . الكلام البسيط الفوق ده من باب المشاركة مع التحايا والود للعزابة وايام لا تنسى
ناصر موسى
Post: #90 Title: Re: أسكتوا... ما قلت ليكم Author: غادة عبدالعزيز خالد Date: 11-03-2007, 11:38 PM Parent: #66
Quote: فطوالي جر واطي وقال فعلا انا ما كنت عارفو منو هو بالله ده عصام محمد نور
بالغتو والله يا ناصر مع صاحبكم ده مع أنو أنا عصام ده والله بحب غناهو جدا غايتو يا العزابة.. عندكم جنس محن
تحياتي يا ناصر للأسرة الكريمة
معزتي الكبيرة غادة
Post: #87 Title: Re: أسكتوا... ما قلت ليكم Author: غادة عبدالعزيز خالد Date: 11-03-2007, 11:25 PM Parent: #64
Quote: العزيزة غادة كعهدنا بك تطرقين دروباً متميزة من المواضيع. تابعت سردك الشيق باستمتاع يفوق الوصف. تخريمة: ربنا يكفينا ويكفيك شر القطيعة والنميمة لكن الشاب العربي ده فكرتو شنو في عرسو من الحبوبة دي؟
الأخ العزيز زهير
وكعهدي بك.. حضورك دوما رائعا وبراقا
وبعيد كده من القطية والنميمة، والله يفينا شرها لكن كانت القطائع وقتها تذهب في إن الشاب العربي ده كان كل همه التحصل على الورق الأمريكي عارف، مرات كده بيفكوا الشكلة وكل واحد بلغته هل تكورك وتردح كده بالإنجليزي وهو بيشاكلها بالعربي.. لحد ما مره قالت مشت جابت الديكشنري وبقت تفتح ليهو على الكلمات الهي عاوزة تقولها ليه دحين أنا حسه قلت ليك حاجة؟ اللهم أبعد عنا القطيعة
Post: #85 Title: Re: أسكتوا... ما قلت ليكم Author: غادة عبدالعزيز خالد Date: 11-03-2007, 10:58 PM Parent: #55
Quote: منتظرنك تقولى وتسكتى الخشامه !!
تاج السر إزيك وإزي الكورة معاك أنا قطيعتي قلتها أول البوست ناس أمريكا ديل قطاعين قطيعة ما عادية تخيل، إحنا السودانيين طلعنا مساكين خلاص
تقبل خالص التحايا
غادة
Post: #67 Title: Re: أسكتوا... ما قلت ليكم Author: هند محمد Date: 11-03-2007, 08:20 AM Parent: #1
Quote: ياخي الناس ديل أقطع من يمشي على الارض, ما أن تدي ضهرك للواحد/ه, حتى ينزل فيك قـطيعة, والخبر يتفشى عندهم بسرعة البرق, هذه سمة مميزة لهم, على اختلاف درجات تعليمهم
من ناحية قطاعين قطاعين ودى طبيعة النفس البشرية الآمارة بالسوء على اختلاف الاجناس ..لكن يبدو لى احنا الحكاية زايدة عندنا حبتين خاصة بين النساء .. سلامات ياغادة هبشتى بسردك الجميل موضوع حساس ومزعج ومع الآسف متفشى ..تسلمى ..
Post: #68 Title: Re: أسكتوا... ما قلت ليكم Author: omar altom Date: 11-03-2007, 08:51 AM Parent: #1
بت الاصول
ازيك وليك وحشة...........
اهم حاجة الزول لما يكون عايز يقطع يختار الزول الصاح اليقطع معاه ....لانو اللفحي من طرف سااااااي مرات بيجيب مشاكل........
زي المرة قريبتناالقاعدة في مناسبة ودايرة تقطع مع المرة القاعدة جنبها قامت قالت ليها.....
- تعالي هنا ياختي...البت الشينةالحايمة دي بت منو؟؟؟؟؟
ردت عليها المرة وقالت....
-اجي؟؟؟.......دي ما بتي انا!!!!!!
المرة الاولي ردت سريييييع وقالت.......
-حلااااااااتها......!!!!!!!!
Post: #69 Title: Re: أسكتوا... ما قلت ليكم Author: معتصم دفع الله Date: 11-03-2007, 09:22 AM Parent: #1
غادة إزيك .. غايتو كعبة قطيعة النسابة هسي المصطلح دا تغير وبقى شمار وشمشرة لزوم العولمة وكده .. الفنان اللحو عنده أغنية ( يوم سيرتك يجيبوها أهلي كتير بعزوها ) .. وهنا الكلام للمحبوبة .. وحالياً ( شمشرة ومقدرة راجل المره دا حلو حلا ) .. وحاجات كتيرة من زي دي يعني قطيعة عديل كده ..
لكن العالم دي عندهم جنس شمشرة يعني نحن ما طلعنا برانا ..
أبقي طيبة ..
Post: #103 Title: Re: أسكتوا... ما قلت ليكم Author: غادة عبدالعزيز خالد Date: 11-04-2007, 02:06 PM Parent: #69
Quote: هسي المصطلح دا تغير وبقى شمار وشمشرة لزوم العولمة وكده ..
نفسي أعرف يا معتصم منبع كلمة شمار لكن سيكون من الصعب محاولة تقفي أثرها شباب المصريين لديهم تعبيرات مثل الروشنة.. وحاجة بيئة.. وغيرها من تعبيرات الشباب حلوة أخت نفسي مع الشباب دي
Quote: لكن العالم دي عندهم جنس شمشرة يعني نحن ما طلعنا برانا ..
أسكت ساي يا معتصم.. دحين أنا ما قلت ليك والله بقية العالم ده قطاع قطيعة وعنده جنس نميمة..خليها لله بس مودتي بلا حدود
Post: #74 Title: Re: أسكتوا... ما قلت ليكم Author: Raja Date: 11-03-2007, 03:31 PM Parent: #1
سلام على الجماعة بتاعين الونسة..
طبعا يا غادة الفيديو ما حصل. وبجد ده البيحصل. دايما ما أقول إنو عشا وحفلة العرس دي خسارة ما بعدها خسارة.. لأنه المعازيم يجو، وياكلو، ويمشو يشنًفو أها نبقى في جنس ده..؟
موضوع بتاع قطيعة (حاااااااااار) مع ام هاشم لكن عذرا ممنوع اصطحابكم
حيكون في المسنجر
Post: #104 Title: Re: أسكتوا... ما قلت ليكم Author: غادة عبدالعزيز خالد Date: 11-04-2007, 02:10 PM Parent: #75
Quote: العقول الكبرى تناقش الافكار العقول الوسطى تناقش الاحداث العقول الصغرى تناقش الناس
اليونترا روسوفلت زوجة الرئيس الامريكي السابق روسوفلت Eleanor Roosevelt
Great minds discuss ideas Average minds discuss events Poor minds discuss people
العزيز..معز
تعرف، لو ترك كل منا الآخرين في حالهم وركز على فكره هو وتطوير نفسه وحياته لتكورت الدنيا وتغيرت حياتنا معها إن حديث السيدة روسوفلت ليس عبثا وإنما نابع من تحارب شهدتها قبيل الإنتخابات وبعدها.. لا أعتقد أن من وصل إلى إعلى المراكز يقوم بالقطيعة وبتناول سيرة الناس ليلا ونهارا وإلا لما تقدموا قيد أنملة
الروس ووووووب من الروس في النتش والقطيعة والقوالات
اما البوسنيات ادوني احساس انه اللغة بتاعتم بتحتوي على كلمتين قالوا وقلنا
كاكوسي
Post: #82 Title: Re: أسكتوا... ما قلت ليكم Author: Raja Date: 11-03-2007, 10:26 PM Parent: #81
Quote:
Quote: اتاريييييييييييينا انا ورجاء و(ام هاشم) امبارح الليل كله نناقش في الافكار
رجاء دي غايتو أنا ما برضى فيها
معز يا غالي.. سلامات ومحبات من عندي لغااااااية عندكم وتسلم يا سيدي على الثقة..
عاد بعد الكلام ده يا شيماء.. الشافني متحكرة في بوستات القص والرص والسياسة الما خمج يكون كضاب ..
تحياتي
Post: #83 Title: Re: أسكتوا... ما قلت ليكم Author: غادة عبدالعزيز خالد Date: 11-03-2007, 10:52 PM Parent: #82
والله يا جماعة مع إنو قلت تاني ما حأقطع لكن بصرااااحة معلق مبارةا المريخ وتونس ده حيرني.. ولا أنا البقيت موهومة عدييييل ما عارفة أها يا جماعة الخير، سامعاه المباراة كلها قاعيد يقول، وبسرعة شديدة
المهم بعد ما سمعتها زي الخمسة وعشرين ألف مرة كده بقا لي زي القاعد يقول
أصفخسي أصفخسي أصفخسي
وطبعا بحاول ما آخذ الموضوع بصفة شخصية أو حتى وطنية
Post: #89 Title: Re: أسكتوا... ما قلت ليكم Author: غادة عبدالعزيز خالد Date: 11-03-2007, 11:35 PM Parent: #83
Quote: اهم حاجة الزول لما يكون عايز يقطع يختار الزول الصاح اليقطع معاه ....لانو اللفحي من طرف سااااااي مرات بيجيب مشاكل........
سلامات يا عمر أها للتأمين على كلامك نحكي ليك قصة مشابهة لقصتك قالوا في واحد شاف ليهو بنية سميحة كده ماشة في الشارع بس وحياتك قام مشى وراها قال يعرف بيتهم وين.. بس وهو راجع كده لاقاهو واحد صاحبو، بس دخل ليك فيهو شمال وقال ليهو
-ياخ والله الليلة أنا عندي ليك جنس شمار شفت لي بت سمحة سماحة شطة بس.. ومشيت ليك وراها لحد ما عرفت ليك بيتهم وين
وصاحبو ما كضب، طوااالي سألو
-عليك الله، أها طلعت ساكنة وين
-بس شفت اللفة البعد السهريج، ألو بيت تخليهو تاني بيت تفوتو.. تالت بيت على يدك الشمال
-عليك الله، ده ما بيتي أنا
فصاحبك إتهجم ورد عليهو بسرعة
- أها البيت ده، بس تسيبو وتمشي طواااالي
Post: #91 Title: Re: أسكتوا... ما قلت ليكم Author: غادة عبدالعزيز خالد Date: 11-03-2007, 11:40 PM Parent: #82
Quote: معز يا غالي.. سلامات ومحبات من عندي لغااااااية عندكم وتسلم يا سيدي على الثقة..
عاد يا شيماء... أنا وإنتي نطلع منها شايفة معز ورجاء ماكلين الجو
أها، النتمو بالمسنجر
Post: #92 Title: Re: أسكتوا... ما قلت ليكم Author: غادة عبدالعزيز خالد Date: 11-03-2007, 11:46 PM Parent: #91
Quote: سلامات ياغادة هبشتى بسردك الجميل موضوع حساس ومزعج ومع الآسف متفشى ..تسلمى ..
هندوية الشفية.. الرقيقة الدواخل نعم، للأسف الأمر متفشي جدا للأسف هنالك نوعين من الناس.. النوع الأول الذي يقوم بالقطيعة والنميمة والنوع الثاني هو المتلقي والنوع الثاني نفسه في إعتقادي بينقسم في أناس تستمع إلى القطيعة بغرض الإستمتاع بسيرة الناس ومعرفة أكبر قدر من المعلومات عنهم حتى تلك التي لا برغبون الآخرين في معرفتها وأنا أحيانا لا يملكون خيارا.. لو رفضوا الإستماع يبقوا دخلوا في مشكلة أخرى مع ناقل القطيعة وسيصيروا هم أنفسهم مادة لنفس ذاك الذي يقطع ولو أستمروا ستكون كثير من آثام ومخاطر أن ينتشر الحديث ويدخلوا في دوامة لا يعلم بها إلا الله وهو لم ينهانى عنها إعتباطا هكذا
شكرا لحضورك النقي
محبتي
غادة
Post: #107 Title: Re: أسكتوا... ما قلت ليكم Author: غادة عبدالعزيز خالد Date: 11-04-2007, 02:20 PM Parent: #81
Quote: الروس ووووووب من الروس في النتش والقطيعة والقوالات
اما البوسنيات ادوني احساس انه اللغة بتاعتم بتحتوي على كلمتين قالوا وقلنا
سلامات يا راوية عارفة، عندنا صاحبتنا كانت بتدرس في روسيا ومعاهم واحد أفريقي لونه أسمر شديد مصاحب ليهو بت روسية.. المهم، بعد فترة قررت البت أن تعرفه بأهلها وهم بيسكنوا في منطقة نائية في ريف روسيا.. بس وحياتك والظاهر الناس هناك ما متعودين على الغرب الزول لقى ليك ناس البيت بيبحلقوا فيهو زي النزل ليهم من الفضاء بعد شوية دخل ليك ونام.. صحى كده بإحساس غريييييب وفتح عينو لقى ليك في زول كده قاعد يبحلق فيهو رفع راسو كده.. لقا ليك أبو البت واقف قدام الباب وفي طابور طوييييل وراهو.. صاحبك خاف قام جاري على محطة القطر ولقى ليك الناس دي كلها قاعدة تجري وراهو.. أها من يومها، صابتنا ديك فكاها ليك عكس الهوا
يسعد صباحك وايامك ياغادة من ذوقك وانت واولادك الاعسل
انا ممكن اكون تمام بس ارسى على بلد الاول على قول انعام اليومين ديل انا بن بطوطة كل ما اتصل بيها بكون في مطار وماشة على بلد تانية غايتو احذروا لاني ممكن اجي متلبة ليكم في كلفورنيا(لي فيها ايام جميلة وبالمناسبة شفت حلقة رمضان والكتراز فعلا من الاماكن المثيرة بالرغم من اني زرته لكن لا امانع من زيارته تاني غايتو شكرا ليك على الحلقة وشكرا كمان للنبيل سيف)
عندي ملاحظة على الحلقة اقولها ليك ولا لا
Post: #121 Title: Re: أسكتوا... ما قلت ليكم Author: غادة عبدالعزيز خالد Date: 11-05-2007, 05:08 AM Parent: #112
Quote: عندي ملاحظة على الحلقة اقولها ليك ولا لا
راوية يا حبيبة متأسفة لم أرى ردك في حينه لربما رددنا في نفس الوقت أو شخص آخر رد بعدك ولم أرى مداحلتك يبدو في حينها قبل شوية رجعت للبوست لكي أتأكد أنني رددت على الكل رأيت ردك.. معلييييش وأمسحي لي في وشي
أها، ملاحظتك مستنينها
محبتي يا (عثل)
Post: #106 Title: Re: أسكتوا... ما قلت ليكم Author: غادة عبدالعزيز خالد Date: 11-04-2007, 02:14 PM Parent: #76
Quote: لكن ما قلت ليكي عن قطيعة الهنود
معنا في العمل تعالي شوفي ديل
يتهايلي مافي مثلهم في القطيعة
والشمشرة ،،
الأخت الحبيبة خالد البدوي
في مره أصدقاء عاشوا في الهند وعلقوا نفس التعليق وبرضوا لم أنتبه له لحدي ما مرة صاحبت هندو وإبتدأت أتعامل معاهم ياخي ديل ممكن يمدوا ليك رأسهم في نص الحاجة اللي إنتي بتعمليها ويبحلقوا فيك كده.. غايتو جنس شمشرة.. حاجتنا المعروفين بيها دي بقوا يتخاتفوها مننا خلينا العالم كلو لي الله
سعيدة رؤيتك يا خالدة محبتي بلا حدود
غادة
Post: #94 Title: Re: أسكتوا... ما قلت ليكم Author: Hawari Nimir Date: 11-04-2007, 00:06 AM Parent: #1
غادة سلامات و علك طيبة.. شكرا جميلا (للشمار) عفوا ..اقصد البوست الجميل ...الفيديو لكن .....مجنووووووووووووون ... و الاستاذة\سعاد محمد الحسن...لها قدرة قريبة علي الاضحاك ...و الكوميدا ..و خاصة(العم متذكر) ....بس...كدي قول لي ...الفرق ما بين الشمار...القطيعة...القوالة شنو؟؟ ....المهم قبل سنوات و في السودان ...و الجو شتاء.و وقت الفطور في محل فول,وبداء يصلح في الفول,و انا جيعان و بداء بالملح و الثوم و الجبنة و اها....انا معاه و منتظر الصحن و الجو بارد سالني صاحب المطعم..و هو بصلح في الصحن و قال لي.. اعمل ليك قوالة و جمجرة... شنو؟؟؟؟؟؟؟؟؟ قال لي ما تحمر لي كده دي ما الكسبرةو الشمار من اليوم داااااااااااك و انا بعاين لي كل بهار ..بي اسم جديد و كل سنة و (شمار.كوم) هواري
Post: #95 Title: Re: أسكتوا... ما قلت ليكم Author: Mouiz Hashim Date: 11-04-2007, 02:09 AM Parent: #94
اذكر عندما كنت في الصف الأول كان أستاذ (.....) يقوم بتدريسي بالمساء بالمنزل وكان يتكرر علينا بالمنزل حتى صار كل أفراد الأسرة (الصغيرة والكبيرة) يعرفونه جيد المعرفة. وفي أحد الأيام قامت إحدى الجارات بالسؤال عن من هو أستاذ (....) الذي تتحدث عنه كل الأسرة. فتطوعت ابنة خالتي التي تكبرني بأكثر من عقد بالرد على الجارة وقالت لها -والله أنت أكان شفتيهو، طويييييل وشيييييين وأخدااااااااااااااااااااار ولسوء حظهما سمعت أنا الحديث كله وأغضبني جدا وصفهما لأستاذي ولم تمضي نصف الساعة إلا وأوصلت الكلام (بضبانتو) لأستاذ (....) وأوقعت بتوصيل القطيعة الأسرة في حرج وقامت ابنة خالتي والجارة بالشكوى للوالد ولطوب الأرض من الموقف الذي وضعتهما فيه. ونفس قدر التوبيخ الذي وصلني من الوالد نالت الفتاتان حظهما من البهدلة للقطيعة التي صارت معروفة للجميع
Post: #96 Title: Re: أسكتوا... ما قلت ليكم Author: HAYDER GASIM Date: 11-04-2007, 03:09 AM Parent: #95
Quote: شفتوا ليكم زول بيستأذن قبل ما يقطع؟
إلا كان إكون زولا ... تعلمجي ساكت, لكن إنت بالذات ... إذنك معاك .
بمناسبة الشمار وإلتحاقه بمداخل القطيعة إجتماعيا { أي حصرا سودانيا } ... وأيام كان الشمار شمار والسلام ... وكان وقتها يؤدي وظيفته الطبيعية فى إضافة النكهة المطلوبة لملحات الخدرة والرجلة والمحشي والطعمية وما يتصل ... فحدث وأن أعلنت بنية برجوازية عن رغبتها فى النزول إلى {زنك الخضار} بالخرطوم ... وحدث أن ذهبت وشافت الحاجات مرصوصة كيمان كيما ورفوف رفوف ... وسألت عن أشياء وأسعارها وهكذا, ثم جاء دورها على الشمار ... فسألت البائع ... ده شنو ؟ فقال ليها ده شمار أخضر , فقالت ليهو ما عندكم شمار { بيجي } ؟
فحاولوا بالله وإنتو بتتناولوا فى { المسائل الفكرية ده } أن توردونا أشمرة مختلفة الألوان والنكهات ... إستجابة لأغراض المجتمع البرجوازي وحتى لا ترجع أي من بناته { مكسوفة } على عدم حظيانها { بالشمار } الذي تريد.
غادة ... أقطعي فينا زي ما عاوزة ... بس أكان بقى الكلام { شكر } ... ما بكون قطيعة ... فمن خصائص القطيعة ... المرارة ... ويا حبذها بالعتي.
مع مودتي
Post: #97 Title: Re: أسكتوا... ما قلت ليكم Author: ابوبكر يوسف إبراهيم Date: 11-04-2007, 06:23 AM Parent: #96
الأخت العزيزة غادة
صبحك بالخير
لقد إفتقدناك كثيراً وافتقدنا الكتابات الجميلة .. ما عرف العريس هو اللقطة ولا العروس؟! للناس فيما يعشقون مذاهب ولكن عليّ أيضاً أن أقطع .. أخونا ده ضاربو السلك بعدين لما ينظم أمورو الرؤية حتوضح وأنا خايف بعد ما الجدة أسلمت حترجع تكون ألدّ أعداء الإسلام .. والله يستر .. وياما في الغربة بلاوي!!! جميل هذا القلم وهذه الأنامل التي تطرق موضوعات ودراسات جديرة بالتناول. دمتِ لنا أختاً عزيزة
Post: #111 Title: Re: أسكتوا... ما قلت ليكم Author: غادة عبدالعزيز خالد Date: 11-04-2007, 02:54 PM Parent: #97
Quote: ما عرف العريس هو اللقطة ولا العروس؟! للناس فيما يعشقون مذاهب ولكن عليّ أيضاً أن أقطع .. أخونا ده ضاربو السلك بعدين لما ينظم أمورو الرؤية حتوضح وأنا خايف بعد ما الجدة أسلمت حترجع تكون ألدّ أعداء الإسلام .. والله يستر .. وياما في الغربة بلاوي!!!
أبو بكر.. أيها الشفيف
تحياتي
علشان أواصل معاك القطيعة أنا ما شايفة أنو أي منهم لقطة.. فهنالك تباين كبير ما بينهما هي لم تجد لقطة لان الشاب أصغر منها بكثير وغير متوافق معها وهو لك يجد لقطة لأنها أيضا أكبر منه وتختلف عنه في كثير أخاف حقيقة أن ترجع عن الإسلام ويرعبني التفكير في مالات الأمور إذا لم يتفقا أكثر
وحقيقة، ياما في الغربة بلاوي
تحياتي
Post: #110 Title: Re: أسكتوا... ما قلت ليكم Author: غادة عبدالعزيز خالد Date: 11-04-2007, 02:49 PM Parent: #96
Quote: بمناسبة الشمار وإلتحاقه بمداخل القطيعة إجتماعيا { أي حصرا سودانيا } ... وأيام كان الشمار شمار والسلام ... وكان وقتها يؤدي وظيفته الطبيعية فى إضافة النكهة المطلوبة لملحات الخدرة والرجلة والمحشي والطعمية وما يتصل
والله يا حيدر.. هذه من أجمل التعبيرات التي قرأتها حديثا لكن الشباب لديهم طريقتهم في إفراد كلمات وتأليف عبارات يصعب تحديد من قالها أولا ومن سمعها ثانيا ومن بدأ بتناولها ثالثا.. وكما قلت في مداخلتك أعتقد أن القطيعة من صفاتها المرارة وتكون حاملة معاني غير طيبة في أغلب الأحيان لكن الشمار ليس بالضرورة، على ما أعتقد، أن يكون سيئا ومن الممكن أن يكون طيب الطعم ويضيف نكهة على الحديث كما يضيف نكهة على الملاحات المختلفة في ذات الوقت علشان كده أنا أحسن أحول كلمتي في حق الأسرة الكريمة لشمار بدلا من القطيعة أها.. نبدى الشمار
مرة يا جماعة الخير، حبيت ألقي التحية على الأخ حيدر فقد إلتقيته مرة واحدة في السودان وكان زواج أختي فلم نستطع أن (نقعد) ونتونس ونقص ونرص المهم، لقيت ليكم نمرة البيت مكتوبة في البروفايل.. فما كذبت الخبر وإتصلت طواااالي..
ـأها يا مداد إزيك ونعلك طيبة
والله طلعت شخصية لطيفة جدا جدا وتحدثت معها فترة طويلة كأننا صحابات من يوم ما الله خلقنا.. ربنا يحفظها ليك يا حيدر لكن ما دام الموضوع ما شكر.. ندي الناس الشمار عرفت بعد كده إنو المداد رجعت بتقرأ وبقت بتمشي الجامعة تاني .. والله حاجة جميلة جدا لكن عرفت تحت تحت كده إنو الجماعة قاعدين (يكاوها) فالأخ ياسر طيفور، كما ذكرت، يجي يلقاها في السلم ويقيف يقول ليها
-محتاجة مساعدة.. أشيل ليك الشنطة ولا حاجة
وكثير من التعليقات اللطيفة لطف المدام والله لكن سعلتك الله ما تزعلي مني علشان كلمنا الناس ديل عارفه عندي أختي الوحيدة سيدة بتقول
-غادة دي الزول أصلو ما يقول ليها حاجة يا بتلقاها في جريدة الصحافة يا إما في سودانييز أونلاين
محبتي
Post: #109 Title: Re: أسكتوا... ما قلت ليكم Author: غادة عبدالعزيز خالد Date: 11-04-2007, 02:37 PM Parent: #95
Quote: ولسوء حظهما سمعت أنا الحديث كله وأغضبني جدا
الظاهر الطبع ده فيك من زمان يا معز هاشم
المشكلة أن الواحد لما يكبر بيبدأ بعدها بتقييم الكلام الذي سيقوله ويعرف النتائج التي ستجرها (قوالته) ويحرص على عدم توصيل الكلام.. لكن في معظم الأحيان نصمت أيضا على المتحدث ونلقى بذلك نصيبا من الآثام
Post: #108 Title: Re: أسكتوا... ما قلت ليكم Author: غادة عبدالعزيز خالد Date: 11-04-2007, 02:34 PM Parent: #94
Quote: ...الفرق ما بين الشمار...القطيعة...القوالة شنو؟؟
هواري..سلامات
أنا ما عارفه تحديدا، لكن عندي نظرية في الموضوع ده الشمار يعني خبر.. ممكن يكون خبر كويس وممكن يكون خبر غير طيب يعني ممكن أسمع كلام كويس عن هواري.. أوقم بحكم الصحوبية أقول ليك -والله الليلة يا هواري عندي ليك شمار تقييييل وأحكي ليك الحاجات الكويسة إللي إتقالت عنك
القطيعة دي إنك تجيب سيرة الناس، وغالبا ما أعتقد أنها ستكون بسيرة ما كويسة.. لكن أنا بحتار متى تكون القطيعة يعني لو عندك زول زعلان منه وبتحكي لشخص آخر و(تلتو وتعجنو) في السيرة هل هذه قطيعة؟ ولا القطيعة أجي أقعد جنبك وأقول ما شفت فلان عمل شنو وفلان سوى شنو؟
المهم، القوالة حاجة أعتقد أنها سلوك غير طيب ومن الممكن أن يثير الكثير من المشاكل والفتن بين الناس يعني نفس الشمار السابق، لو كان حديث سيء عنك بجي أقول ليك
-أسكت يا هواري، فلان (وبحدد الإسم غالبا) قال عنك كذا وكذا وكذا
وبذلك إنت بتشيل في قلبك من ذلك الشخص ومن الممكن أن تتوسع فتنة القوالة
اللهم أبعدنا يا رب
تحياتي
Post: #98 Title: Re: أسكتوا... ما قلت ليكم Author: Mohammed Ibrahim Othman Date: 11-04-2007, 07:06 AM Parent: #1
Quote: ووجدت الدراسة أن الطلبة قد تأثروا بالنميمة التي كتبها بعضهم عن البعض حتى وإن ثبت لهم أن تلك القطيعة، بعد تجربتهم الشخصية معهم، لم تكن صحيحة. تقول بروفيسور "دوريان تروب":
- إن النميمة سواء أكانت كاذبة أو صحيحة فهي بلا شك تؤثر في تعامل الآخرين معنا وهذه خطورتها، فنحن لا نستطيع التحكم فيما يقوله الآخرون عنا."
الاخت غادة خالد ... اشكرك جداااااااااااااا على موضوعك الهادف ... مشكلتنا تكمن في القطيعة والنميمة والاشاعات ... الواحد لا يهمه يفك اشاعة في مجموعة من البشر بدون تحري الدقة ويفتكر الموضوع هيّن ... مما تودي لفتن وقطيعة بين البشر ... ومفتكر ان الله لن يحاسبو ... ربنا يغفر لنا زلاتنا ... وياريت كلنا نراعي ما نكتب ..ونخاف الله في ما نكتب ...
Post: #113 Title: Re: أسكتوا... ما قلت ليكم Author: غادة عبدالعزيز خالد Date: 11-04-2007, 03:02 PM Parent: #98
Quote: الواحد لا يهمه يفك اشاعة في مجموعة من البشر بدون تحري الدقة ويفتكر الموضوع هيّن ... مما تودي لفتن وقطيعة بين البشر ... ومفتكر ان الله لن يحاسبو ...
الأخ الكريم محمد
ما تتخيل لكم هي مزعجة قصة القطيعة والنميمة هذه الشهص الذي تتم القطيعة فيه يشعر بإحساس جارح وربما بألم غير معقول خصوصا وأن الإشاعات دائرة والمصيبة أن الإشاعة حينما تنتشر كما الألقاب والكلمات لا تعرف لها مصدرا ومن الممكن أن تتوه الحقيقة بعدها ولا يستطيع الإنسان أن يصحح المعلومة التي إنتشرت حوله والمصيبة الأكبر أن الدراسة أثبتت أن حتى بعد ما يتعامل معك الشخص ويثبت لك بالدليل القاطع أن الإشاعة والمعلومة عن الشخص خاطئة تظل تؤثر على سمعته.. ولكن لماذا يطلق شخص إشاعة ويوصم شخصية بأوصاف وتهم يعرف هو تمام المعرفة أنها غير صحيحة؟ غالبا لتحقيق أغراض في نفس يعقوب، إما لكي يسيء لشخص غريم له أو متفوق عليه أو لكي يحسن من سمته السيئة هو.. ويجب عليهم أن يتوقفوا.. خوفا من الله وإحتسابا وتوقعا ليوم الحساب وكما قلت، لن نستطيع أن نتحكم في كلام الناس عنا وكل ما يمكن للإنسان فعله هو أن لا يعير القطيعة إلتفاتة وأن يتمسك بمبادئه التي أنتهجها. ففي النهاية، لا يصح إلا الصحيح!
تحياتي
Post: #99 Title: Re: أسكتوا... ما قلت ليكم Author: الطاهر عثمان Date: 11-04-2007, 07:45 AM Parent: #1
الاخت غادة .. تحياتي وتقديري
لسبب متعلق بزرة في قطيعة برضو وقفت خالص من القطيعة مع اي زول والحمد لله حتى مع المدام كل ما تحاول بس فتح موضوع فيهو قطيعة طوالي اقوليها استغفر الله ونضحك ونغير الموضوع... ودي نعمة من الله لكن إكتشفته ليك حجم كلام القطيعة القاعدين نتكلم بيهو يوميا بدون ما نحس !!!
Post: #114 Title: Re: أسكتوا... ما قلت ليكم Author: غادة عبدالعزيز خالد Date: 11-04-2007, 03:05 PM Parent: #99
Quote: ودي نعمة من الله لكن إكتشفته ليك حجم كلام القطيعة القاعدين نتكلم بيهو يوميا بدون ما نحس !!!
الأخ الكريم الطاهر
حقيقة، أنها لنعمة كبيرة من الله أن تتوقف من إنك تجيب سيرة الناس أنها معضلة كبرى أن تستطع أن تنهى نفسك ناهيك عن الآخرين وحتما ستأتي السيرة ونتحدث أحيانا بدون أن نقصد.. لكن المهم، هو أن نتوقف حالما أكتشفنا أن حديثنا هو مجرد قطيعة لا تودي ولا تجيب
تحياتي
Post: #100 Title: Re: أسكتوا... ما قلت ليكم Author: الفاتح يوسف جبرا Date: 11-04-2007, 07:47 AM Parent: #1
أها يا غاده وعشة حصل ليها شنو؟
Post: #115 Title: Re: أسكتوا... ما قلت ليكم Author: غادة عبدالعزيز خالد Date: 11-04-2007, 03:10 PM Parent: #100
Quote: أها يا غاده وعشة حصل ليها شنو؟
الأستاذ جبرا شخصيا أها، نديك شمار يا أستاذ والله ما كنت أتخيل ردك عليّ أو أنك تقرأ لي لكن أنا ممنونة وسعيدة جدا عن عشة، بعد فترة من السكن بجانبنا ومعاصرتنا معها لكل المشاكل التي مرت بها أسرتها تركوا السكن بجانبنا لكي يكونوا بجانب إبنتها وحفيدتها فقد كانتا تحتاجان مساعدة الجدة لهما في الحياة.. فإبنتها كانت لا تزال في الجامعة.. وببعدهم عنا وإنشغالنا نحن في الجامعة والعمل تقطعت أواصل الصلة بيننا.. حتى عملها التي كنت ألقاها فيه أحيانا تركته وعملت في فرع آخر للمحل قرب سكنها الجديد أها.. النمشي نتشمشر ليك من الناس نشوف ليك أخبارها
مودتي
غادة
Post: #101 Title: Re: أسكتوا... ما قلت ليكم Author: osman righeem Date: 11-04-2007, 08:12 AM Parent: #1
اختنا الغالية غادة سلامات وزي ما قالت مني:
Quote: والأنجلبز مشهورين جدا بالقطيعه..والشمارات زي مابنقول عند العجايز بالذات..
كنت اسكن مع اسرة انجليزية ( في فنيشلي سنترال - شمال لندن )وكانت الاسرة مكونة من الاب و الام وبنتهم ذات الخمسة وعشرون عام وكان يسكن معنا صديق البنت يعني مؤجر مثلي وحيث ان البنت وصديقها ما كانو يلتزمون بالحضور اوقات الوجبات فكان موضوع الحديث يوميا القطيعة في البنت وصاحبها وبعد ان كنت مستمع بدأت بالمشاركة يعني حأكون احن عليها من امها وابوها .
اها ياغادة قعدات القطيعة دي اتعلمت فيها السجاير
Post: #102 Title: Re: أسكتوا... ما قلت ليكم Author: بابكر عثمان مكي Date: 11-04-2007, 10:18 AM Parent: #101
الكريمة غادة ، سلام
وانا طالب بجامعة الخرطوم كنت لا احضر المحاضرات الخاصة بالاقتصاد التطبيقى لان توقيتها يكون بعد منتصف النهار والجو خانق لا يساعد على الاستيعاب فاكتفى بتصويرها وفهمهاوحفظها فيما بعد لذلك لم ارى دكتور الاقتصاد التطبيقى طوال فترة السنة.
قطيعتى كانت فى الوش مباشرة ولدكتور الاقتصاد التطبيقى .. كنت دالف الى كفتريا اقتصاد مبتهجا" فوجدت زميلتاى يتوسطهن شاب لطيف .. فسلمت عليه وجلست معهن ، برغم التعريف وكلمة دكتور الا اننى لم انتبه ، فقلت لهم
اها (الفقر) دا اداكم شنو الليلة ؟؟؟
فساد الصمت وعفصتنى احداهن فى رجلى
وايضا" لم انتبه
ولكنى تحسست من صمتهن فقلت ربما لديهم موضوع خاص مع هذا الشاب الغريب فقررت الانسحاب
فقمت وقلت لدكتور الاقتصاد بكل ظرافة
فرصة سعيدة ياخى انا ماتعرفت بيك كويس
فعرفنى باسمه شاملا" حتى وظيفته فى الجامعة
وايضا" لم انتبه
وعرفته بنفسى تعريفا" كاملا" فانتبه وصمت
. . .
تركتهم وذهبت
لم ادرك كارثة هذا اللقاء الغبى برغم تقريع صديقاتى الا بعد ظهزر النتيجة ..
بابكر زيكو
Post: #118 Title: Re: أسكتوا... ما قلت ليكم Author: غادة عبدالعزيز خالد Date: 11-05-2007, 04:47 AM Parent: #102
Quote: لم ادرك كارثة هذا اللقاء الغبى برغم تقريع صديقاتى الا بعد ظهزر النتيجة ..
زيكو ... سلامات
بالرغم من تخيلي لحجم النتيجة ومدى صعوبة تقبلها آنذاك إلا أنني ضحكت على الموقف وعلى الطريقة اللطيفة التي كتبته بها.. مثل هذه المواقف بالرغم من صعوبتها وسخفها في لحظتها إلا أنها تبقى دروسا تنير طريق الحياة ولا تنسى
مودتي
Post: #116 Title: Re: أسكتوا... ما قلت ليكم Author: غادة عبدالعزيز خالد Date: 11-04-2007, 03:13 PM Parent: #101
Quote: فكان موضوع الحديث يوميا القطيعة في البنت وصاحبها وبعد ان كنت مستمع بدأت بالمشاركة يعني حأكون احن عليها من امها وابوها .
والله يا عثمان بالغت يعني لو البنية أمها وأبوها بيقطعوا فيها جات عليك إنت المسيكين ده
Quote: اها ياغادة قعدات القطيعة دي اتعلمت فيها السجاير
أها، السجائر عارفاك خليتها قعدات القطيعة كيف؟
Post: #117 Title: Re: أسكتوا... ما قلت ليكم Author: osman righeem Date: 11-04-2007, 03:29 PM Parent: #116
Quote: قعدات القطيعة كيف؟
شغالة وانا اصلي عندي فيها خبرة اجنبية احلي حاجة في قطيعة الانجليز ما فيها الاستهلال بتاع ما شفتي اليلة يا ماقلت ليك ما سمعت لكن المتحدث يبدأ مباشرة في القطيعة من المكان الوقف فيهو امس او يدخل في الموضوع اذا كانت فقرة جديدة ولكن بربطه بموضوع مثلا بتساءل هل سوف تتمكن ميري من الذهاب الي هايقيت بارك في هذا الجو الممطر لاني سمعتها تواعد هاري علي التلفون ان تلاقيه هنالك بعد الدوام ولكنهما لا يكترسان سوف يدخلان الي اي بار ويظلان يتسكعات ما بين الحمام وحجرة البلياردو لانهم ليس معهم قروش و وتبدأ القطيعة المتل تشليح السيارات في الاسكراب ما يخلوا ليهم صفحة وخاصة انا كان عندي مشاكل مع هاري في الحمام المشترك بيننا لكن من فوائد المساهمة في قعدات القطيعة كسبت الاب و الام الي صفي
Post: #120 Title: Re: أسكتوا... ما قلت ليكم Author: غادة عبدالعزيز خالد Date: 11-05-2007, 04:53 AM Parent: #117
Quote: احلي حاجة في قطيعة الانجليز ما فيها الاستهلال بتاع ما شفتي اليلة يا ماقلت ليك ما سمعت لكن المتحدث يبدأ مباشرة في القطيعة من المكان الوقف فيهو امس او يدخل في الموضوع اذا كانت فقرة جديدة
ما قلت ليكم... إحنا تارينا ما قطاعين شديد شفتوا الناس ديل أخطر مننا كيف؟
فخورة إنك لم تعد للسجائر مرة أخرى يا عثمان بالتوفيق دوما...
Post: #105 Title: Re: أسكتوا... ما قلت ليكم Author: انعام عبد الحفيظ Date: 11-04-2007, 02:12 PM Parent: #1
غايتو الناس الدخلو هنا قطّاعين جنس قطيعة
Post: #119 Title: Re: أسكتوا... ما قلت ليكم Author: غادة عبدالعزيز خالد Date: 11-05-2007, 04:49 AM Parent: #105
Quote: غايتو الناس الدخلو هنا قطّاعين جنس قطيعة
إنعام الرقيقة... في أول البوست قلت لمجموعة رجاء العباسي ونصار والعوض وشيماء.. إنو أنا كنت قايلة نفسي قطااااعة لكن والله تاريني طلعت طويسة
البوست إزداد جمالا بحضورك
شفت الشمشرة دي كيف؟
محبتي بلا حدود
Post: #122 Title: Re: أسكتوا... ما قلت ليكم Author: انعام حيمورة Date: 11-05-2007, 07:52 AM Parent: #1
والله امبارح عملت مداخلة هنافي البوست دا هسي ما لقيتها .. تكون راحت في شربة قطيعة ..
لاني امبارح ضحكت لما شرقت
وما حا اعيد مداخلتي تاني ..
اكتر شي ضحكني شمار الاستاذ جبرا وسؤالوا عن عشة (هههههههه)
غادة محبتي الشديدة
Post: #125 Title: Re: أسكتوا... ما قلت ليكم Author: غادة عبدالعزيز خالد Date: 11-05-2007, 12:38 PM Parent: #122
Quote: لاني امبارح ضحكت لما شرقت
والله يا نعومة إتخيلتك وإنت بتضحكي الحقيقة والشهادة لله.. أنا ما شفت إنعام حيمورة دي إلا ووجهها باسم وضاحكة جدا جدا.. قلبها أبيييييض زي اللبن أها شفتوا الشمار ده كيف مداخلتك الفاتت يا نعومة زي الوصلت.. ومداخلتك دي زي العسل يعني زيك كده بالظبط ربنا يحفظك ويوفقك يا إنعام في كل ما تسعين إليه
محبتي (لي بعد بكرة)
Post: #123 Title: Re: أسكتوا... ما قلت ليكم Author: mamkouna Date: 11-05-2007, 09:09 AM Parent: #1
القطيعة..النميمة..الشمار..الغيبة.. دي صفات عادية (( مذمومة طبعاً )). ممكن تكون في أي بني آدم..و هي غالباً غير مؤذية.. تزيد سيئات الفاعل..و..تزيد حسنات المفعول به.
الخِبٌير..الفضول..التلصُص..التحسُس..التجسُس.. دي صفات غير عادية...و أكيد مذمومة ..و قد تكون مؤذية... تثبت مرض الفاعل...و تُثير غضب المفعول به.
القوالة..الصواطة..نقل الكلام..الفتنة... دي صفات شيطانية بحتة..و في منتهى الأذية و تَتسبب في خراب البيوت و قطع صلات إنسانية كتيرة. و يتأذى منها..الفاعل و المفعول به.
من ما سبق ذكره يا غادة.. ياتو أهون الشرور ؟؟!!!
Post: #126 Title: Re: أسكتوا... ما قلت ليكم Author: غادة عبدالعزيز خالد Date: 11-05-2007, 03:39 PM Parent: #123
بصراحة يا ممكونة
القطيعة بفظاعتها دي كلها
أرحم
محبتي
Post: #124 Title: Re: أسكتوا... ما قلت ليكم Author: ابراهيم تون Date: 11-05-2007, 09:20 AM Parent: #1
النصيحة ياغادة الشماااااااااااااااااااااااااااااااااار كاتنى استاذك شكلو كيف نفس الوصف ولا فى وصف تانى اخدااااااااااااااااار ولا اصفاااااااااااااااااار
Post: #127 Title: Re: أسكتوا... ما قلت ليكم Author: غادة عبدالعزيز خالد Date: 11-05-2007, 03:42 PM Parent: #124
والله يا إبراهيم أنا لو قطعت ليك على أستاذي ما حيكون عندي مشكلة.. أغلب أساتذتي كانوا ما سودانيين فتجوز في هذه الحالة القطيعة؟
ده كلو كوم والبيحصل فى وسطناالصحفي ده كوم تانى طبعا المابيعرفو بيفتكرو وسط صفوى وواعى والمفروض يكون خالى من الامراض دى لكن ياكافى البلا هو أكبر بؤر القطيعة..النميمة..الشمار..الغيبة وضرب البعض تحت الحزام شي عادى واكل لحوم البعض شي طبيعي وحسد نجاحات بعض كائن بيمشي على قدمين والحقد ده مش دفين وبس .. ده ابوالدفان ذاتو ( ابوالدفان ده اسم نوبي لنوع من الثعابين ) طبعا مابقول ليك كلهم ياغادة لكن اكون كذاب لوماقلت ليك السواد الاعظم منهم السواد الاعظم ده همو كلو من الصباح للمساء بس انو يفتشك تفتيش ويلقى ليهو شينة يلف بيها الجرائد والموبايلات و لو مالقى بيخترعا اختراع .. وطبعاعندهم عبقريةالاختراع دى بصورة مابتتخيليها.. عادى جدا يقرا ليك خبر او مقال او تحليل ويطلع من الشي المكتوب ده ما يوافق هوى نفسو الدنيئة.. ( عامل حوار مع الصادق بيكون قابض ) ( جايب تصريح من نقد خلاص اشتراه ) ( مهاجم موقف من مواقف الحركة خلاص المؤتمر بيكون دفع ليهو .. مشكر موقف من مواقف الحركة خلاص الحركة دفعت ليهو ) ( لبيت دعوة اوكامبو ياخى ديل ماعملاء ودفعو ليهم بالدولار ) ( لبيت دعوة ولاية خلاص الوالى دفع ليك ) .. وهكذا ، عبقرية على صناعة القبح بصورة تحير عبقرينو ذاتو ..واصلا مابيفكر يناقش بعقلو في الشي المكتوب طبعا ده غير القطيعة ولفيق التهم اللى هم اساتذة فيهابدون برهان وفي تصنيفات جاهزة برضو بتاع نسوان بتاع اولاد مرتشي و... و... غيرو مودتى بالمناسبة قبل شهر تقريبا واحد ضرب تلفون ، بعد السلام والحباب توووووش سألنى ( صحى فلان ده متزوج فلانة دى بالعرفي ..؟) قلت ليهو انت ضارب لى للموضوع ده مخصوص يعنى ..؟ قام اتلعثم وتعتع شوية قلت ليهو ( كدى تعال لى دايرك فى موضوع مهم شوية ) جانى نص النهار بعد ما سلم وقعد .. طلبت ليهو القهوة وشلت التلفون وطوالى ضربت لى فلان وسالتو ( صحى انت متزوج فلانة زواج عرفي ..؟) طبعا بحكم العلاقة البينى وبينو ضحك وقعد يهظر معاى بى جدية كدة قلت ليهو ( والله يا استاذ انا جادى في سؤالى ده ) قال لى القال ليك منو ؟؟ قلت ليهو ( هاك الزول القال لى الكلام ده ) .. وطوالى مديت ليهو التلفون وقلت ليهو يلا اسالو لو متوزج عرفي ولا سنى .. وتعالى شوفى التوتر والجقلبة والعرق ولى يوم الليلة عامل فيها زعلان منى .. طبعا يطرشق وافتكر دى افضل وسيلة لمكافحة القطيعة والنميمة في مجتمعك او على الاقل وسيلة بتبعد الامراض دى ومرضاهاعنك بصدمة المواجهة وماتنسي البينقل ليك برضو بينقل منك ومودتى
لمن القي فرصة واحكيها ليك.. ولا اقول ليك لمن اجيكم هناك
القطيعة كانت مباشر
انا او طلحة اتقابلنا في المغرب
جينا يوم الجمعة
اعفي لينا عشان احكيها ليك
Post: #137 Title: Re: أسكتوا... ما قلت ليكم Author: غادة عبدالعزيز خالد Date: 11-08-2007, 09:02 PM Parent: #136
Quote: واللة مشتاقين لي شكلات النسابة
القطيعة ما بتتحكي هنا
هيييييي يا زرياب هيييييييي با أبو جيكيتات سود القطيعة دي لازم تتحكي
أها، بالله موش ما نسيت الشكل أنفع نسيبة والله الله يكبركم يا هاشم وشهاب ولحدي وقتها، الله يخلي لي زرياب والنسابة نمارس فيهم الشكل
مودتي
Post: #130 Title: Re: أسكتوا... ما قلت ليكم Author: Emad Abdulla Date: 11-05-2007, 05:34 PM Parent: #128
مساء الخير يا غادة .. تغيبي و ترجعي باللذيذ المفيد .
قالوا ( و العهدة على محمد سعد ) : يجلس بعد إحالته للمعاش وقد كل بصره و أصبح شبه أعمى و ثقل سمعه , يجلس أمام مدخل الدكانة الصغيرة الوحيدة في الحي , في ذات الكرسي , و ذات الساعة العصرية ( لزقة أمريكي ) . يأتي أحدهم للدكانة مشتريا , فيرخي عمك عبدالرازق أضانه المعاشية , يستمع للحوار بين صاحب الدكانة و الزبون المشتري . ما أن يغادر الزبون إلا و يبتدر عمك عبدالرازق السؤال لصاحب الدكانة المغلوب على أمره : - إنت الجنى ده هول منو ؟ - ده حسين ود طه . - كدي !! .. طه ود عصمان أزرق ؟ .. - أيوه . - قالوا طه الحيكومي مرقتو من الشغل , سرق الجاز اليل البابور , ما يخاف الله ؟ - سمعت كدي أنا زاتي .. الله أعلم . - أسعلني أنا .. سرق الجاز و قالولك زروهو في بطن بيتو ده مخزنو , أها .. و الوليد ده داير شنو ؟ - كان دايرلو سكر و صلصة . - أهاااا .. يبقى سكرهم خلص .. المره دي ظنيتا قاعدة تسويبو الحلاوة سكر الجن ده .. حلاوة شنو الماشه تنفعها , ولية متجوهلة ساكت . هو زاتو طه ده إن ما ساكت .. زولاً يسولو حلاوة .. ؟؟ إنت يا عمر !! ..البارح دي ماجه الجنى ده زاتو بي هديماتو المشرطات ديل و شاللو رطل دحين ؟ - أيوة صاح .. أول البارح . - غايتو الزمن ده , مخير الله ؟؟ .. دايرلو كم رطل سكر قال ؟ - رطلين يا حاج عبدالرازق .. رطلين . - بس ؟ - آآآي .. رطلين . - في رمضان صينيتو ما بيمرقا مع الناس طه ده .. سكرهم ده ميتين بيهو برااااهم لا حولا و لا قوة . - الصيني دي شوفتنا ليها قبال ستة سنين .. من يوم عصمان الله يرحمو مات يخربهم ما جاهم خير . - أها و السكر أديتو ياهو بي كم ؟ - ألفين . - و الصلصي ؟ .. كمها ؟ - علبة واحدة يا حاج . - كبيري ؟ - لأ .. صغيرة . - بالله شوف .. !! هسع دفع فيها كم العليبي دي ؟ - ألف يا حاج .. ألف . - ما شا الله البيت ملان خلق , العلبي الصغيري ده ماشه تسويلم شنو ؟ - و الله ما عارف . - أها و تاني شال شنو ؟ - بس ياهن ديل الشالن . - و أديتن يا ؟؟ - أيوه . - شالن و مشى ؟ - أيوه . - هيه كضب !!. و هكذا ..
كل زبون , بسيناريو " قطيعي " شماراتي جديد . أنا زاتي في ملل زي داك و قلة شغلة , كنت ح أتشمشر بمزاج ..
كل سنة و إنتي طيبة يا غادة .
Post: #134 Title: Re: أسكتوا... ما قلت ليكم Author: غادة عبدالعزيز خالد Date: 11-06-2007, 01:18 PM Parent: #130
Quote: أنا زاتي في ملل زي داك و قلة شغلة , كنت ح أتشمشر بمزاج ..
عماد.. أيها الفنان الرقيق.. مشتاقين
قصة محمد سعيد وخروجه للمعاش ومن ثّم الفراغ الذي يجعله يبحث في حتى أدق خصوصيات الناس.. من الذي أشترى ماذا؟ ولماذا؟ ويكون التعليق في أشياء (لو عندك أقل شغلة) إنت زاتك ما بتشتغل بيها لكنك لمست جزء كبير من المشكلة أعتقد أن عدم الشغلة والملل يجعل الإنسان يفعل ما لم يكن يتخيله في يوم من الأيام طبعا هنالك أشخاص يفعلون هذا لانو (طبعهم) كعب سااااي كده
سعيدة بك يا عماد معزتي
Post: #131 Title: Re: أسكتوا... ما قلت ليكم Author: غادة عبدالعزيز خالد Date: 11-05-2007, 09:06 PM Parent: #128
Quote: طبعا ده غير القطيعة ولفيق التهم اللى هم اساتذة فيهابدون برهان
عارف يا الطاهر.. الظاهرة دي حاجة خطيرة جدا وغير صحية بالمرة تخيل أن يسود المجتمع الخوف من القيل والقال ويقطع كل شخص علاقته بالآخرين خوفا مما قد يثيروه حوله وتنعدم الثقة بين الناس ويسود الفساد المجتمع أما قصة صديقك هذه فبالنسبة لي كانت مفاجأة شديدة وأقرب إلى الصدمة تخيل القطيعة تعدت فلانة إشترت توب وبكم وإتشاكلت مع علانه وصاحبت فلتكانه لإشاعات تمس الشرف والزواج العرفي... يكون في زول شافهم مرة ولا مرتين في حته وقام بإطلاق بالإشاعة التي تمس أشخاص وسمعة فتاة ناسين أن إطلاق الإشاعات على المؤمنات الغافلات هي من الكبائر أقول ليك حاجة يا الطاهر
حتى هذه اللحظة بهز في رأسي
وأقول ليك حاجة ثانية
عرفنا الرجال كمان بيقطعوا
تحياتي
غادة
Post: #133 Title: Re: أسكتوا... ما قلت ليكم Author: HAYDER GASIM Date: 11-06-2007, 03:29 AM Parent: #131
Quote: ده كلو كوم والبيحصل فى وسطناالصحفي ده كوم تانى
الطاهر ... كيفنك,
... وأضيف الوسط الرياضي كمان
غادة ... فتحت أوسع أبواب المرور السوداني,
شيطانة خلاس .
مع مودتي
Post: #135 Title: Re: أسكتوا... ما قلت ليكم Author: غادة عبدالعزيز خالد Date: 11-06-2007, 03:45 PM Parent: #133
Quote: غادة ... فتحت أوسع أبواب المرور السوداني,
شيطانة خلاس .
العزيز حيدر,,, بعدما كتبت الموضوع (كظاهرة عامة) وبعد نشره في عمودي بجريدة الصحافة وبعد كثير من مداولات هنا بالمنبر بدأت تخطر على بالي الكثير من الظواهر الخاصة وهنالك مشكلة مع إنسانة أعرفها بصفة شخصية وهمها كل الحديث عن الناس وسيرتهم في البداية كنت أسمع لها وأحاول أن أخفف عنها وأجد الأعذار جاهدة لكل من تغضب منه أو منها ولكن لا أجد دوما سبيلا.. فهي دوما الضحية وبعد فترة.. بصراحة.. تعبت من المناهدة إحترت ماذا أفعل.. فقمت بتحجيم حديثي معها، ولكن لم يفلح.. فحالما تلقاني تكون سيرة الناس، فقط سيرتهم من أجل (القنا والقالوا) وعملوي لي وقلت ليهم.. فحاولت أن أحصر العلاقة، برغم تشبكها، في الأعياد والمواسم الرسيمة.. لكن المشكلة بقيت أنا زاتي.. هي مالها، أنا عملت ليها شنو.. وخلتني ليه وبقيت هي ضحيتي أنا التي غدرت بها وتركتهاوصداقتها خلفي بلا رجعة
تنهيدة يعني تسمع ووووب... تسكت.. وبيييييين
شفت أبواب المرور السوداني الشخصية أحيانا ضيقة كيف؟
..
..
؟؟!!!