يا جماعة .. شوفوا الزول !!

يا جماعة شوفوا الزول دا !!

سلام بورداب وارجوكم كلامى ده ما تشطبوه لانو اخونا محمد بسأل عن كيفية الاشتراك فى البورد ودايرين نوريهو الطريقة بس وما حاتشوفونا الا متصفحين يا بكرى0
يااخ محمد هنالك طريقتين لدخول البورد بتاع ناس بكرى
الطريقة الاولى لعمل البورد
المقادير:
30 عصاية مضببة بجلد تور والضبح يكون فتيحابى
51 جنزير حديد 8بوصه
خوده بلون مموه
نص دسته عصابة راس ماركة حزب الله
(كوز) كبير لزوم اللغف اقصد الغرف بكسر الراء لو سمحتم
حبل متين من نوع فاخر(وفاخر دى عشان يقطع الفاخوره ويمرق المخ)
سكاكين من انتروود
صوت جهورى من نوع الاسد النتر صحا المرافعين خوف
دقن طويله ؛جلابيه قصيره ولازم بيضاء مكويه0 عشان ما يسحروك لى)
تفتى فى المذاهب الاربعه وتكفر من شئت
ان يكون مبلغ علمك فى الفقه الحيض والنفاس وان لايزيد اطلاعك على دلائل الخيرات
الدخول عن طريق افغانستان والتقديم عن طريق تورابورا والزحف اقصد الصف ببدا من باكستان يعنى كلها سنتين تلاته وتصل البورد وقدر ما نفسك الامارة تقول ليك ما بدخلوك ازجرها وقول لها صبرا طويلا والله المستعان0
اما الطريقة الثانيه للدخول هى :
تغش بكرى وخالد الحاج وعادل والبورد ذاتو والماسنجر (والبوث ديو)الما سمعنا بيهو من زمن الجمعيه التاسيسيه وتقول ليهم انا اسمى باسكال وقريت (politacal Science) وبعمل فى ام اس سى ومولودة فى الخليج ولازم تعطش الجيم شديد لما يقتلها الظمأ والماء فوق ظهورها محمول وانا ديسابورا جديده ومتوحشه وواحشانى مامى شديدونفسى ارجع(ما تنسى تعطيش اى جيم تمر بيك) السودان واتفرج فى ناس امبده وهم الواحد نائم وخااتىخرطوش المويه جوه الجلابيه(جوه والجلابيه ديل جيجميم كارترتين ما تنساهم من صالح التعطيش) عشان المويه لما تجى تصحيهو وياسلام من منظر الغروب فى مزرعة بابى وبعدين لو واحد قال ليك شرمبز قول ليهو سوفاخ استاكوزا ,
والبجيب سيرة ابوقوته وام سقطه وام طرقا عراض قول ليهم ياى وماتستعمل لوووول بتاعتهم وقول ليهم
primative scoiety
وتعال شوف الجماعه الكبكابات ناس سجيمان ومعتصم دفع الله وشتات وودقاسم (والرزيله معهم برافو بدرالدين شنا)طالبنى 100ريال عليها نرحب بالاخت باسكال ووين يابسبوسه وتعالى على كومنا يابسبس ويابت يا بيبسى مرحب بيك مع الميرندا وكان قحيتى فى بوست ساكت يقولو ليك ما عشرقت ليك حلاتك دى ويقوم امين الموقع ذاتو ينازل ليك باقة الزهور الما خمج ويقول ليك منوره وخالد الحاج طوالى يقول ليك زهور هولندا شنو مرحب بالعبير وعمك جهينة يقطع قول كل (خبيُث) ويقول ليك اسفين على التاخير ونعتذر بطول شوارع الرياض وهاك يا حباب وهاك يا ترحاب من الرجفات وبعد داك يلمن فيك بنات العباسى وتماضر وبيان وعشه بتفاطنه وبقية المستضعفات ويقولن ليك والمخاخيت تجارى الرجال يتجازو ما شفتيهم كيف كردو موناليزا(يالله كانت الطيش) وزعمطوا هناية ووقعوا ليك فى علانه دق وقرش وشنو ما عارف ومرحب بيك رفيقة مناضله وبت الاحفاد تقول ليك (جزاك الله خير) اضافه حقيقيه وبت قضيم تقول ليك يا بت حشاى ما عارف شنو وخليك فى الفيلم ده لكن اوعى يموت ليك عزيز لديك وتقوم تنعيهو يعنى سبل اى زول عشان ماتنكشف ويعرفوا انك محمد والله كل زولك حياك يتف من خشمو كده ياحماده تقدرتعيش أمن بس ببقى الخوف عليك من ناس هوبفل واساسى وياالرفدت ناسى
وشوف ليك صورة اى ملكة جمال لبنانيه وقول ليهم ما لقيت غير الصوره الشينه دى 0سجمك نسيت ما تكون لبنانيه عشان الايام دى راغب علامة ومع انو قال ليهم الله يقطعنى حته حته حته حته ما قلت كده لكن الجماعه ما صدقوه وهم يا اخى ما صدقوا الموناليزا مع انو شاهدها خالد الحاج يجو يصدقوا المقطع ده
اها يا امحمد اخوى دحين انا نصحتك وعينك فى راسك تعرف خلاصك وكان مكضبنى اسأل سامر المصنقر جنب بابهم من خمسه سنوات ودحين ودعتك الله لامن القاك بى جوه .

معتصم دفع الله
الله يجازي محنك..
تعرف خالك ليهو أربعة أيام بقش في (المخاخيت) إنت قايل
الكرد ده أي زول بيقدر عليهو
وبعدين إنت كنت وين قبل أسبوع كان الواحد شال منك الوصفة السحرية
دي..المقادير:

Quote: 30 عصاية مضببة بجلد تور والضبح يكون فتيحابى 51 جنزير حديد 8بوصه خوده بلون مموه نص دسته عصابة راس ماركة حزب الله (كوز) كبير لزوم اللغف اقصد الغرف بكسر الراء لو سمحتم حبل متين من نوع فاخر(وفاخر دى عشان يقطع الفاخوره ويمرق المخ) سكاكين من انتروود صوت جهورى من نوع الاسد النتر صحا المرافعين خوف دقن طويله ؛جلابيه قصيره ولازم بيضاء مكويه0 عشان ما يسحروك لى) تفتى فى المذاهب الاربعه وتكفر من شئت ان يكون مبلغ علمك فى الفقه الحيض والنفاس وان لايزيد اطلاعك على دلائل الخيرات

ونسيت حاجة مهمة.ركوب الموجة أيا كان إتجاها وطعن الحبايب في الضهر .

الخال خالد الحاج

تحياتي وسلامي ..
كرده تفوت ولا حد يموت ..

تسلم

هذا المقال الظريف لأخونا وصديقنا الصحفي صديق الموج من ظرفاء مدينة الرياض كاتب متمكن كلماته تنساب بسلاسة وروعة يتحفك بقفشاته الرائعة وحضوره الساخر ، كتب هذه المقالة من خلال متابعته المتواصلة للبورد منذ فترة طويلة ومعرفته التامة لجميع الاعضاء ومشاركاتهم في المنبر وإهتمامه بما يكتب فيه ، يبحث عن مؤطي قدم بينكم/ن ...

معتصم دفع الله

لك تحياتى وتحيه خاصه لمحمد

صديق الموج ..
ذلك البرق القبلي الموعود بالبشارة .. قادم من عواصف المدن التى تصنع الفرح ..
ينفرد من بين تلال الكلام .. ليهدينا مفتاح الدخول إلى حيث اللقاء المموسق بضحكة وابتسامة وقلب كالأزهار .. يصنع للفرح مساكن .. من حلاوة النيل وظلال النخيل ورائحة الجروف ..
يهدينا دوما اكليلا من البنفسج وغابة من القوافي المسافرة .. فتتسع مساحات التلاقي فى مرافىء التلاقي .. وتحيا الابتسامة فى موكب الأشواق ..
صديق الموج .. موعد للنكتة الشفيفة والضحكة اللطيفة .. مهرجان فى احتفائية الأماسى ..
وأماسي تصافح فجر العطاء .. يصعد بنا دوما إلى روابى الاخوة والوفاء .. فتعود عصافير فرحنا .. ونستشرف معاني الحياة الراقد بجلال والمترعة بحب الناس والمبادىء والأوطان ..
صديق الموج ..
منح الجزيرة مواصفات عطر قادم ..
وأعطي لكنة الشمال لحن اضافى
داعب أولاد الغرب وغنى مع الهدندوة
صديق الموج ..
أخ كريم .. سمح الروح .. طيب الخصال ..
صديق الجميع .. حبيب الكل ..
نكهة الرابطة الرياضية والثقافية بالرياض وروحها المتجددة
صديق الموج ..
النكته المستمرة والبديهه الحاضرة ..
الاطلالة الحلوة .. الحضور الثابت والتعليق الشيق ..
التحية للأخ صديق ..
ممزوجة بعطر الياسمين وأنفاس القرنفل
ومرحبا به فى رحاب سودانيزاون لاين

صلاح / شتات

أخي صلاح

صديق الموج رجل يجبرك على إحترامه والإستماع إليه ..
عرفناه أخاً كريما .. شهما .. تظل البسمة تعلو وجهه الجميل ..
نفتح له صدورنا ليدخل دون إستئذان ..
فله ولك التحية والتجلة ..

الأخ مجدي

لك التحية ..
وشكراُ لزيارتك وطلتك ..

العزيز معتصم

مشكور على نقل هذا الحقل الغنى ذى السنابل المكتنزة بالبسمات الخضراء والبيضاء، وأحمل تحايانا للأستاذ صديق

بعدين أسمع

يعنى بس نحن نفوت الرياض بى جاى، إنتو تظهروا بى جاى

دى خيانة والله

بس ما منكم، من الزمن اللئيم الحرمنا بستمتع ونسعد بلقياكم الجميلة

وليك الود

أبوذر

الحبيب أبا ذر

هكذا القدر يريد لنا شيئاً آخر غير ما ننشد ..
ودي ما خيانة .. أعتبرها غيمة تحلق في سمانا لم تهطل بعد ..
ونقول لك لقاءنا قادم .. قادم .. إن شاء الله ..
شكرا على تحيتك لأخونا الموج القادم بقوة صديق الموج ..
ننتظره بفارق الصبر ليزين ويجمل لنا هذا المنبر ..
ولتكتمل سعادتنا بوجوده ..
ولك خالص التحايا والتقدير ..

المعتصم أيها الهمام
لك التحية
إنت غبت يوم الجمعة عن ورشة عمل رابطة الصالحية ,ويمكنك متابعة الموضوع في بوست خاص أنزلته اليوم بالبورد ، ( الرابطة الرياضية للسودانيين .... )
وفي ذاك اليوم قابلت الأستاذ صديق الموج ، واستمعت إليه ، وكان رصينا وابن بلد وحبوب ،،
آمل أن لا يتردد الأخ بكري في منحه عضوية البورد ..

الخال ودقاسم

تحياتي وسلامي ..
غيابي كان لظروف العزاء ..
وسوف أكمل معك موضوع ورشة عمل الرابطة في البوست الخاص بذلك ..
ونحمد الله أنك عرفت الأخ صديق الموج عن قرب وسوف يكون إضافة حقيقية ..
للمنبر الحر ولبورداب الرياض إن شاء الله ..
لما يتمتع به الرجل من خصال حميدة وروح مرحة تنشرح لها الصدور ..
ونحن في الإنتظار ..