بورداب الرياض واللقاء الأسـري الجامـع ..

في حضرة من أهوى ..
عبثت بي الأشــواق ..
حدقت بلا وجهٍ ورقصت بلا ساق .. (الفيتوري)
بالأمس رقصنا ورقصت دواخلنا فرحة بهذا اللقاء ..
لقاء الأحـبة والمحـبة ..
في جو عائلي بهيج امتد حتى الساعات الأولى من صباح يوم الجمعة ضم بورداب الرياض وضيوفهم الكرام كان التسامر وكان الفرح يملأ القلوب العامرة بالحب والإلفة ..
من شرق المملكة جاءنا لؤي شمت ومن الرياض حضر الريس عبدالمنعم عبدالعال رئيس الرابطة الرياضية للسودانيين العاملين بالخارج (الصالحية) وحضر عبد العزيز أبوعاقلة عن الحركة الشعبية وكانت جمعية المحبة والسلام ممثلة في كوثر اللدر وجمعية التراث والثقافة ممثلة في الأستاذ الشاعر حسين حمزة وحرمه الأستاذة حياة العبادي والأستاذة الصحفية حنان باشري ..
كان بورداب الرياض كالعهد بهم تسبقهم الابتسامة وصدورهم مفتوحة عند اللقاء ..
تحدث الريس أبو جهينة مرحباً بالجميع وتلا ملامح السهرة الأسرية وأعقبته الأستاذة حليمة محمد عبد الرحمن بكلمة ضافية تحدثت وأبانت وبعدها الابنة فاتن خالد المحرب متحدثه عن أبناء البورداب ودورهم في دعم ترابط أسرهم ثم جاء (وزير المالية) خالد الأرباب ممسكاً بورقة طويلة عريضة فيها الكثير من مسيرة اللجنة طيلة الفترة الماضية والصعوبات المالية التي تواجهها وأمن على وجود دار البورداب التي طال انتظارها وثنى عليه الجميع ..
وبعدها شدى الفنان ياسر الحلفايا بروائع الغناء فأطربنا وأشجى الجميع ..
وجاءت الفقرة الرئيسية والخاصة بالتعارف وتبادل الكلمات بين الجميع وكل يدلو بدلوه ويعرف نفسه ويحكي ما يجيش بخاطره فتجلى البورداب جميعاً نساء ورجال في هذا الدور وسمعنا الأشعار والنكات والطرفة من الجميع وكانت بحق فقرة شيقة ..
وعند ود الشيخ خلف الله الغناء الأكيد والكلم السمح غنى وأطرب وأسعد ولكن الظرف لم يسعفه حتى يكمل للنهاية ..
وكانت هناك مداخلة للريس عبد المنعم عبد العال أمن فيها على تماسك ووحدة البورداب والدور الكبير الذي يقومون به في مدينة الرياض وحرصه التام على تلبية جميع دعواتهم ..
وعلى الحب افترقنا على أمل اللقاء والجميع يردد لن ننسى هذه الليلة الجميلة ..

..
.

الوجيه معتصم
سلام
شغلتنا الشواغل وما استطعنا الحضور ، أكيد كانت ليلة كما عودتمونا دائما ، وفي انتظار تفاصيل الليلة بالصورة والصوت وأكيد الأخوان محمد عبد لجليل وتمبس الفنان حيخلونا نسمع ونشوف ونستمتع .

سلام أخي اسحق ..
فعلاً إفتقدنا الكثيرون الذين غابوا عنا لظروف خاصة ..
أكيد الجايات أكتر من الرايحات ..
أبقى طيب وخليك قريب ..

حلوين وجميلين
وانشاء الله دايما ملمومين على الحب والخير
وراجين الصور

اللهم لا حسد



.
.

معتصم
اوعى بس تكونوا أكلتو شيتى
و صندوق منقتى


.
.

الاخ معتصم كانت ليله جميله ونحن محتاجين لاجواء زى دى بحق وحقيقه
ونتمنى ان تدوم مثل هذه التجمعات الجميله فيها ترويح لنا.
ولاطفالنا.وانا تعرفت على كثير من الاخوه فى هذه الامسيه .
شكرا لكم وكتر خيركم على المجهود الرايع ده .

الأخ معتصم والإخوة الرياضيون (من الرياض)

ألحقونا بالصور


والتفاصيل

متابعكم بى لهفة وشوق

مع تحياتى لكل الاحباب فى الرياض وضيوفكم الميامين

معتصم كانت ليله زي العسل تسلمو ليناانشاء الله دايما ملمومين
ومبسوطين سعدت جدا بجميع الاخوات والاخوان
وبالاخص انت 0
الاستاذه الفاضله خالده البدوي
والاخ الفاضل ود الباوقه وحرمه المصون
الرائعه ساميه 0والاخت الفاضله انعام الموج0
كما سررت بوجود الشاعره المخضرمه حنان باشري
والاخت حياة العبادي
كتر خيركم كتير والشكر موصول عبركم
الي القامه الريس ابوجهينه واكيد
تمبس

الليلة كانت جميلة بيكم يا عفاف ..
حقيقي قمتن جميعاً بدور رائع ومقدر من تجهيز وجبة العشاء ..
ومشاركاتكن الجميلة التي كان لها الأثر النفسي لدى الجميع ..
شكراً أن جملتن هذا اليوم بحضوركن الأنيق ..
وكذلك الأفكار التي قدمتونها لدعم بورداب الرياض ..
وأنا كمان سعدت بهذا اللقاء وهذه المعرفة الطيبة ..
ربنا يديم المحبة بين الجميع ..

تقديري ..

ونحن مشتاقين ليك كتير يا ساطور ..
الرياض وبوردابها يفتقدونك بشدة ..


كل التحايا والحب ..

أستاذنا أحمد سلااام ..
أها جيناك بالصور والفيديو في الطريق كمان عند تمبس ..


كل الحب والتقدير ..

اليوم كان جميل بيكم يا خالد ..
شكراً لك ولأسرتك الكريمة التي أضافت بحضورها الكثير ..
وفعلاً زي ما قلت نحن محتاجين لمثل هذه اللمات والتي تقربنا مع بعض أكتر ..

لك كل التحايا والتقدير ..

تصدقي يا غادة خاتي ليك صحن شية بي شطتو على جنب ..
وكمان معاهو كرتونة منقه كاملة

أبقي طيبة وبألف خير ..

تحياتي نهال ..
شكراً لهذا الشعور الجميل ..
أكيد البورداب في جميع أنحاء العالم يشكلون تواصل جميل ..
وبكم تدوم المحبة ..
الصور في الطريق إن شاء الله ..

محبتي ..

موو الجميل

تجددت كل معاني الألفة والود

بلقاء البورداب وزوجاتهم واطفالهم

كنا سعيدين بحضور الجميع الا من قست

ظروفه فتخلف عنا ..

وسعادتنا لا توصف بوجود البورداي لؤي شمت



* زوجة البوردابي عماد محمد علي والامورة الحلوة

* زوجة البوردابي ود الباوقة بأطفالها الحلوين

* البوردابية ايمان ( ميادة ) زوجة البوردابي محمد الشيخ ( الكردنال)

* البوردابية عفاف ابوحريرة زوجة البوردابي خالد المحرب

* البوردابية حليمة محمد عبدالرحمن وزوجها مصدق وابناءهم الجميلين

* زوجةالبوردابي عبدالحليم التلب ( ليمو ) واولادها الجميلين

* زوجة البوردابي صديق الموج وابنائهم الجميلين

* زوجة وشقيقة وزوجة صديقهم ياسر للبوردابي عمران وابنهم حمودي الراقي المزاج

* زوجه البوردابي هاشم خلف الله وابناءهم الجميلين

* زوجة البورداب فنان الكركتير الجميل مصدق حسين

* زوجة البوردابي عادل جباره وابناءهم الجميلين

* زوجة البوردابي وليد طه ورغد واخوتها

* زوجة البوردابي أحمد حنين والحلوين

* زوجة البورداب وليد ( حبيب بلدو ) وابناءهم الجميلين

* زوجة وشقيقة البوردابي طارق عبداللطيف نقد وبناهم الحلوين

* الحلوات بنات البوردابي د/ محمد حسن

* زوجة البوردابي البوردابي ادريس علم الهدى

* زوجة البوردابي الشاعر نصـار الحاج واولادهم الحلوين

* صديقات البورداب حياة العبادي

* صديقة البورداب كوثر بخيت اللدير

* صديقة البورداب حنان باشري

* صديقة البورداب أمل

افتقدنا ..

* زوجة البوردابي ريس ابو جهينةوالجميلات وذلك لظروف سفرهم لجدة

* البوردابية د/ رشا سالم وكانت معنا على الهاتق لظروف

وكانت لآخر لحظة سوف تحضر .

* البوردابية عزاز الشامي

* زوجة البوردابي محمد سليمان ( ولياب )

* زوجة البوردابي د/ محمد حسن ولكن اتحفونا الجميلات

* زوجة البوردابي علا حيمورة وهي بالسودان وابنتهم هبة الله

* زوجة البوردابي عبدالرازق الطالب واباءهم الحلوين

* زوجة البوردابي امير وابناءهم

* زوجة البوردابي عبدالباقي الجيلي والصغيرة

* زوجة البوردابي الصادق الخليفة

* زوجة البورداب اسماعيل وراق وابناءهم الحلوين

* زوجة البوردابي وليد399 والأمورة ايمان

* زوجة مصطفى الشايقي شحرفان والجميلة الصغيرة

* زوجة البوردابي خالد سعيد وزير المالية والصغار الحلوين


برجع يا معتصم اتمنى اكون ما نسيت ..


تعديل صغير يا معتصم كوثر بخيت اللدير من جبال النوبه

وليست جمعية المحبة والسلام للتنوية .


لي عودة ،،

محبتي للجميع ،،

Quote: * زوجة البوردابي ود الباوقة بأطفالها الحلوين * البوردابية ايمان ( ميادة ) زوجة البوردابي محمد الشيخ ( الكردنال) * البوردابية عفاف ابوحريرة زوجة البوردابي خالد المحرب * البوردابية حليمة محمد عبدالرحمن وزوجها مصدق وابناءهم الجميلين * زوجةالبوردابي عبدالحليم التلب ( ليمو ) واولادها الجميلين * زوجة البوردابي صديق الموج وابنائهم الجميلين * زوجة وشقيقة وزوجة صديقهم ياسر للبوردابي عمران وابنهم حمودي الراقي المزاج * زوجه البوردابي هاشم خلف الله وابناءهم الجميلين * زوجة البورداب فنان الكركتير الجميل مصدق حسين * زوجة البوردابي عادل جباره وابناءهم الجميلين * زوجة البوردابي وليد طه ورغد واخوتها * زوجة البوردابي أحمد حنين والحلوين * زوجة البورداب وليد ( حبيب بلدو ) وابناءهم الجميلين * زوجة وشقيقة البوردابي طارق عبداللطيف نقد وبناهم الحلوين * الحلوات بنات البوردابي د/ محمد حسن * زوجة البوردابي البوردابي ادريس علم الهدى * زوجة البوردابي الشاعر نصـار الحاج واولادهم الحلوين * صديقات البورداب حياة العبادي * صديقة البورداب كوثر بخيت اللدير * صديقة البورداب حنان باشري * صديقة البورداب أمل

***** إنت يا هاشم أنا الجات معاي دي كان راجل ولا شنو ؟!!!!! *******

غايتو يا خلود دي ما بفوتا ليك خالص ، يوم الخميس جاياني بعد منتصف الليل وما خليتيني أشوف جمودي زي الناس ، أها هسه كمان كاتبه ديل كلهم وطلعتينا منهم .
طيب كان على الأقل تكتبينا مع ديل :

Quote: افتقدنا .. * زوجة البوردابي ريس ابو جهينةوالجميلات وذلك لظروف سفرهم لجدة * البوردابية د/ رشا سالم وكانت معنا على الهاتق لظروف وكانت لآخر لحظة سوف تحضر . * البوردابية عزاز الشامي * زوجة البوردابي محمد سليمان ( ولياب ) * زوجة البوردابي د/ محمد حسن ولكن اتحفونا الجميلات * زوجة البوردابي علا حيمورة وهي بالسودان وابنتهم هبة الله * زوجة البوردابي عبدالرازق الطالب واباءهم الحلوين * زوجة البوردابي امير وابناءهم * زوجة البوردابي عبدالباقي الجيلي والصغيرة * زوجة البوردابي الصادق الخليفة * زوجة البورداب اسماعيل وراق وابناءهم الحلوين * زوجة البوردابي وليد399 والأمورة ايمان * زوجة مصطفى الشايقي شحرفان والجميلة الصغيرة * زوجة البوردابي خالد سعيد وزير المالية والصغار الحلوين

** غايتو ياهاشم وعادل جبارة أنا من هسه مضرب وما جاي تاني خالص أوعكم تتصلوا علي وتقولوا لي تعال . شفتوا معتصم وخالدة ديل قاصدني كيف .......، أها فتكم بعافية ونتلاقى في النادي هناك أحسن .

يا عمدة انت المتلك بنسوه ..
كدي شوف صورتك هنا منورة كيف ..
تحية خاصة لأسرتك الكريمة والأولاد الرائعين الذين قاموا بخدمة الضيوف ..
وشكلوا مع أبناء الموج ومصدق حسين وودالباوقة وليمو تواصل جميل ربنا يحفظهم ويخليهم ..
بعدين النادي ما بحلك ولا بتنفك مننا يعني سيك سيك ..

لك وللأسرة الكريمة كل الحب والتقدير ..

اودي صاحبي

صدقني ما قصدي

وصدقني كنت فاكرة اولادك بالسودان وما موجودين

هنا وانا ابري في تلفونات زوجات البورداب لي

اسبوعين وما عارفة زوجتك موجودة .

وبعدين اقوليك دي ما فتنه لكن كان انت كل يوم

مع ناس علا تمبس ومعتصم ناس ست الريد البقت قساية

ديل اعمل ليك شنو والله انت ست ريدك بقت سافارة ..

يا غالي والله ما قصدي ..

بالعكس انا سلمت عليهم واتعرفت بهم بس كان على عجاله

لانه ذي ما شايف كانت حالتي كيف ..

يا خوي مافي ليكم طريقة تاني سيك سيك معلقه فيك

لصققققققققققققققققققققققققققققققه بس كان ما عاجبك

يا تامبا ...

اودي لك العتبى حتى ترضى ..



محبتي لكم ..


تخريمة / قولي سامحتك عشان زعلك ما بقدر عليه

العزيزة خلود .....

صباحك زين ......

Quote: تخريمة / قولي سامحتك عشان زعلك ما بقدر عليه

مسامحك .... مسامحك .... مسامحك ... مسامحك لوجه الله تعالى . ( المسامح كريم ) .

غايتو يا خالدة مهمتك بقت كبيرة ..
هسي عماد كاشف حالنا وقال ما ذكرناه وأسرته وأنا خاتي ليهو صورة كبيييرة ..
واصلي في تغطية ما فاتنا من الحفل وذكر ما سقط مننا سهواً من أسماء وسوف نقوم بانزال الصور تباعاً ..
بكم الحفل كان رائعاً ومجهوداتكن مقدرة وجميلة ..
واصلن في ما بدأتن به ولعمري أنه يصب في مصلحة المجموعة ..

تحياتي وودي ..

غايتو يا موو ما إنسترتوا إنت وخلود خالص . هسه في واحد إتصل علي وقال لي إنت تقول لي ديل أولادي وهم أساساً ما كانوا متواجدين يعني بتتسلبط في أولاد الناس ذي ما متسلبط في صورة البنت الفي البروفايل يا سلباط . هسه الزول ده ما شايف زول متسلبط في البروفايل غيري هسه ما ياها دي عفاف أبو حريرة خاته صورة بنت ما بنتها في البروفايل مالك ما قلت ليها الكلام ده ولا خلاص ناس معتصم وخالدة ديل أدوك فرصه فيني . غايتو يا موو اللوم بجي بالغفلة . ســـلام يا صحبي .


تخريمة :

غايتو إنت يا خلود إستني بس وأرجي الراجيك ....

الريس أبو جهينة تحدث عن لجنة البورداب ..

الأستاذة حليمة محمد عبدالرحمن تحدثت نيابة عن البوردابيات وأسر البورداب ..

الأستاذ خالد سعيد (وزير المالية ) وخطابه عن الميزانية ..

عمران حسن صالح ووليد399 ..

حبيب بلدو ..

محمد الحسن ..

وليد طه ..

محمد عبدالجليل وخالد المحرب ..

هاشم أحمد خلف الله ولؤي شمت ..

البوردابية مهجة ووالدها أحمد حنين .. مهدي الصادق ..

أحمد العمار ومن خلفه مصدق أبوخالد..

الأستاذة عفاف أبوحريرة وعلى يمينها زوجة البوردابي حبيب بلدو وفي الخلف البوردابي الصغير أحمد إدريس علم الهدى ووالدته ..

زوجة البوردابي عمران حسن صالح وزوجة صديق البورداب مهندس ياسر والبوردابي الصغير محمد عمران حسن صالح ..

البوردابيات ميادة وخالدة البدوي وعلى يسارهما كوثر اللدير والأستاذة أمل ..

زوجة البوردابي نصار الحاج وخالة البورداب انعام الموج وزوجة البوردابي ودالباوقة ..

أخت وزوجة البوردابي طارق نقد وزوجة البوردابي إدريس علم الهدى ..

البوردابيات الشباب لينا خالد المحرب وإخلاص الموج ..

معتصم
اوعا تنزل صورتي انا ودكين وعمر الفاروق

الأخ الحبيب معتصم دفع الله , أرسل عبرك خالص التحايا للجنة المنظمة لهذا التجمع الأسري الكبير , وقد بذلتم مجهود جبار جداً من أجل إنجاح

هذا اليوم الخالد والذي كان بحق جميلاً جداً وقد إلتقيت فيه بعدد كبير من البورداب الذين لم يسبق لي مشاهدتهم علي الطبيعة وخاصة الأخ الخلوق

لؤي شمت وكعادة أعضاء اللجنة المنظمة ( جنود مجهولون ) عملوا بكل سخاء لإسعادنا .

وأعود مرة أخري لاشكر المهندس بكري أبوبكر والذي لولاه لما كنا هنا في هذا المحفل الراقي الرائع الجميل ولي عودة أخري لاني أكتب الأن

وكلي إجهاد وتعب منذ سهرة الخميس مروراً باليوم الأسري لرابطة أبناء مدينة الصحافة يوم الجمعة وإنشاء الله سافتح به بوست خاص مع الصور .
تصحبون علي خير والصباح رباح إنشاء الله .

Quote: * زوجه البوردابي هاشم خلف الله وابناءهم الجميلين

الأخت الحبيبة
خالدة

بينى و بينك كدة
و ردك حيكون سر بيناتنا


زوجة هاشم خلف الله مستبدة؟
و الله شكلها عسل بس


تحياتى للأخ العزيز لؤى شمت
نفتقدك بشدة

غادة

Quote: الاخ معتصم كانت ليله جميله ونحن محتاجين لاجواء زى دى بحق وحقيقه ونتمنى ان تدوم مثل هذه التجمعات الجميله فيها ترويح لنا. ولاطفالنا.وانا تعرفت على كثير من الاخوه فى هذه الامسيه . شكرا لكم وكتر خيركم على المجهود الرايع ده .

الف مبروك اهلي بورداب الرياض على هذا التواصل الانساني الرائع

الاخ خالد المحرب الاخت ام احمد يعجبني حضوركم البهي في كل الملمات التي تجمع اخوتنا في ارض الشتات - نحييكم من هنا ولتهناوا بهذا الابداع .

لكم عميق مودتي

بسم الله الرحمن الرحيم

أولاً : التحية لكل من شارك و ساهم و حضر أو إعتذر لظروف قاهرة.
الحفل كان بسيطاً و لكنه كان كبير المعنى و الهدف

ثانياً : الصراحة زيها مافي. ففي أول البوست ذكر الأخ معتصم :

Quote: ثم جاء (وزير المالية) خالد الأرباب ممسكاً بورقة طويلة عريضة فيها الكثير من مسيرة اللجنة طيلة الفترة الماضية والصعوبات المالية التي تواجهها وأمن على وجود دار البورداب التي طال انتظارها وثنى عليه الجميع ..

و كان هذا هو بيت القصيد ...
فرغم أن وزير المالية أكد على أن هناك عجز في الميزانية و أن البعض يتحمل هذا العجز من أعضاء اللجنة ..
إلا أنه و للأسف .. لم يقم بالدفع ليلتها إلا 4 أشخاص من مجمل الذين إستحق عليهم الدفع برغم الحضور الكبير.

4 أشخاص فقط دفعوا ... رغم تكرار مسألة أهمية دفع الشتراك و خاصة أنه أمامنا مشروع الإستراحة المستديمة.

و هذا شيء محبط للغاية ..

محبط للذين يدفعون.
و ننتظر من الذين لا يدفعون
فماذا أنتم فاعلون؟

: * زوجه البوردابي هاشم خلف الله وابناءهم الجميلين




الأخت الحبيبة
خالدة

بينى و بينك كدة
و ردك حيكون سر بيناتنا


زوجة هاشم خلف الله مستبدة؟
و الله شكلها عسل بس


تحياتى للأخ العزيز لؤى شمت
نفتقدك بشدة

غادة


الأخت العزيزة غادة أولاً نشكرك علي الإهنمام والسؤال وفعلاً والله زوجتي عسل لكن برضو متسلطة زيها زي غيرها من الزوجات الأخريات

ولا إنت رايك شنو يا بت عبد العزيز .( يعني أقوم هسع برفع بوست تسلط الزوجات ولا شنو ؟؟؟ ) .

صديقي الشفيف موو

Quote: تحدث الريس أبو جهينة مرحباً بالجميع وتلا ملامح السهرة الأسرية وأعقبته الأستاذة حليمة محمد عبد الرحمن بكلمة ضافية تحدثت وأبانت وبعدها الابنة فاتن خالد المحرب متحدثه عن أبناء البورداب ودورهم في دعم ترابط أسرهم ثم جاء (وزير المالية) خالد الأرباب

أمانة في زمتك دي بديتو بالريس .... غاتيو حقنا دائماً مهضوم ، أها من هسه كده جهزوا تمبس يتلو ليكم المره الجاية .

سلام ريس أبوجهينة ..

أولاً نشكركم على هذه الجهود المقدرة التي تقومون بها من أجل إنجاح أي عمل لبورداب الرياض وسعيكم لجعل مكان واحد يضم الجميع دون عناء البحث عن الإستراحات ومكان نجمتع فيه كل مره ..
ونشكر لكل من تجاوب مع هذا العمل من البورداب ونتمنى المزيد من الإلتفاف حول هذا الجسم ليكون كما خططنا له رابطة أسرية همها الأول الترابط والعمل من أجل المجموعة وما هو متاح لخدمة أهلنا جميعاً ..

تقديري وإحترامي ..

تحياتي أخي الطيب شيقوق ..

هكذا عودونا بورداب الرياض دائماً في ملماتهم ..
إن شاء الله نسعد بي شوفتك يا حبيب ..
وتحية لأسرة خالد المحرب على وجودهم بيننا ..

محبتي ..

Quote: بينى و بينك كدة و ردك حيكون سر بيناتنا زوجة هاشم خلف الله مستبدة؟ و الله شكلها عسل بس

غادة الحبيبة

قربي شوية اضانك

عشان الكلام خطير ولو سمعو هاشم

بشوف نفسه علينا كدة ما عارفين حاجة

اقولك يا اختي اسمها هويده

وزوله ياهـ

حاجة كدة

عسل بنقط وما تشوفي صاحبنا هاشم ده

بريده جنس ريده اللهم لا حسد ..

بيني وبينك هي تتراد ..

Quote: تحياتى للأخ العزيز لؤى شمت نفتقدك بشدة

اعتبريها وصلت ، اسعدنا وجوده بيننا

ولك مثلها من التحايا يا هاشم ..
حضوركم كان له دور كبير في انجاح هذا اليوم ..
نتمنى أن تتواصل مثل هذه اللقاءات ..
وتحية عبرك للؤي شمت وهو طبعاً بوردابي مننا رغم تجواله المستمر ..
وتحية خاصة للريس بكري الذي جعل هذا المكان ممكناً وبه يمتد التواصل ..
وتحية خاصة لجميع أسر البورداب ..

محبتي ..

يا الأمين حاولنا بشتى الطرق وبعد أن أدخلنا الكاميرا إلى المعمل لاستخراج صورة لكم مع الوغد دكين وعمر الفاروق لكن فشلت كل عملياتنا الجراحية في ذلك ..


فلك العتبى حتى ترضى

Quote: يا الأمين حاولنا بشتى الطرق وبعد أن أدخلنا الكاميرا إلى المعمل لاستخراج صورة لكم مع الوغد دكين وعمر الفاروق لكن فشلت كل عملياتنا الجراحية في ذلك .. فلك العتبى حتى ترضى

العتبى وين وشبرا الخمية وين يا حبيب
باين عليك لسه ما اتخلصت من اثر السهر
انا قلت ليك ما تنزل الصورة الفيها انا وعمر الفاروق ودكين
تقول لي ما لقيتها ولك العتبى
يا خي انا اصلا ما انتظرت التصوير
انا طلعت معاكم انت وادريس وقت ماشين تجيبوا العشاء



معاك الكميرا الخفية يا معتصم

أهم ما في هذه الجلسة كسرت حاجز التخويف والإرهاب الذي يقوم به عمنا حمزاوي في البورد ..
فكل ما علمت لي عملة يقول أووووووخخخخخخخخخخخ بجيب ليك ود أم بعلّوا وأووووووووخخ بنادي ليك البعاتي ..
بحمد الله تمكنّا من تجاوز نظرات عم شنبو أخونا وحبيبنا خالد المحرب والذي جاء وفي يده سوط عنج بي قطرانو ورغماً عن ذلك ركزنا للجلد هيييييييييييييييييع تاااااااايتنك..
أسعدنا كثيراً تشريف لؤي شمت الرجل الخلوق والراقي صاحب (الشُرّابات ) الملوّنة

سلام للجميع ..
وكان فعلا يوم اسري مميز .. وتجاوب وتفاعل معه الجميع .. ولاول مرة اشوف شفع سودانيين في الرياض .. وسخانين ومليانين طين ومغبرين
طبعا مافي زول لاحظ للحركة دي لانهم اخدو راحتهم خالص في الجزو التاني البي هناك .. ودي مسالة كويسة كونو الأطفال يطلعوا من حيز الشقق الضيقة ويقابلو اكتر من شخص واكتر من وجــه ..
اعجبتني حركة الأطفال وابتهاجهم باللمة دي .. والأطفال دائما هم المؤشر الحقيقي لان دائما معاهم البهجة والبهجة بيستمدوها من الجو المحيط بيهم البوردابي محمد عمران حسن صالح ومعاهو خالد ود الباشمهندس ياسر صديق البورداب .. كانو عاملين ثنائي خطير جدا .. وكلما ابعد منهم الكاميرا غصبا عني بلقى العدسة قدامهم .. لينا اللذيذة بنت الشاعر الأستاذ نصار الحاج ادهشتنا بقصيده جميلة وحضور عجيب جدا .. طبعا امها قالت لي كانت مصره انها تقول القصيدة دي .. ومن أجل ذلك الحدث قامت اتجهزت وطلعت الجزمة بتاعته .. علشان كدا موعودين بي شاعرة وحساسة جدا .. وماشاء الله ... ( عصومي ) الأرباب الصغير ود المحــرب .. كان مصر جدا إنو يوريني المركوب بتاع جلد الأصلة بتاعو .. بعد ما مل من كلمات الإعجاب بتاعتي .. قال لي عندي كلام سر عايز اقولو ليك جيب اضانك .. قربت ليهو قال لي بشكل جميل جدا ومهذب خالص :
يا عمو علاء بتقدر تكلم الجماعة ديل عن مركوبي طبعا دي امتع حاجة لاقتني في الحفلة دي ..
فقدت ( جــدو) بن الأرباب خالد سعيد .. بعدين كان ح تقابلنا مشكلة بتاعت ( صراع جينات ) سوط العنج الجايبنو مخصوص لي عمر الفاروق .. كان مستلمو عصومي ود المحــرب .. ولو كان جدو ود الأرباب خالد سعيد موجود .. ربما كان هناك فاصل بتاع بطان حريف جدا . ما بعيد المسالة دي .. خاصة إني صرحته في حال اسمع لي زغروده ح اقوم اعمل الحركة ديك .. زي ما عمله المناضل أحمد حنين .. والمناضل دكين .. والاتنين الله مرقهم الزمن داك البلد كان بقدل فيها الورل .. قامو يتسعرضو علينا الدقيناهو بي حبل .. والدقيناهو بي مصاصمة بتاعت عصير .. كدي تاني النشوف لينا زول يقول عايز يتباطن عشان يطير ليكم في راسكم.. ( السوفت وير في ) .. والمبرمج جاهــز
المهم:
بالرغم من الحضور الجميل جدا والمشرف .. إلا اني اتكلمت عن الأطفال .. واشيد هنــا برضو بي زوجات البورداب .. وضيوفهم .. بالإضافة للجـو العائلي اللطيف الوفروهو لينا .. وبالإضافة للضيافة المنزلية الاتسارعن في تجهيزها من وقت مبكر .. واجتهدن في تجهيزها وترتيبها في الإستراحة .. اكتشفت انهن قاموا بعمل جماعي .. وكسرن به حاجز رتابات اللقاءات المفتوحة الزي دي .. وقامن ببادرة حميمية ( وجمعن شيرنق ) خاص بيهم ح يديرو بيهو الأمور المتعلقة بالجانب النساي البوردابي ..
فمن حسع يا معشر البوردابيات .. لو ف فكرة ( صندوق ) انا بدخل معاكم .. وتدوني اول صرفه .. وكان شفتوني تاني .. اكون بالغته ..
..
التحية لزوجات البورداب .. وهم العنصر الأول في نجاح هذا اليوم. . وعلى الوعد بي نجاحات قادمة ... طالما كن هن في الخطوط ( الخلفية الأمامية ) يعبرن عن انفسهن .. ويتسارعن في الدعم المادي . الذي عجزت لجنتكم المؤقرة في توفيره .. ليس عن فقر أو عدم توفــر فاقلانا قادر على أن يتكفل بكامل مبلغ الأستراحة وإيجارها السنوي ..
لكن:
يؤسفني أن اقول أن هناك شئ ما ليس في مكانه الطبيعي .. يجب مراجعته للسيطرة عليه .. وحتى تتمكنوا من السيطرة على هذا الخلل .. اكرر التحية للعنصر النسائي وبوجوده القوي ... وإذا استمر الحــال بما هو عليه ..
أقترح ان تحل اللجنة .. وتسلم مقاليد الأمور للجنة من زوجات البورداب .. وبعداك غايتو اركزو .. لانو الفوره ح تكون ألف وخمسمية .. والبفتح ليهو بوست هنــا ما راكب عدلو .. ح يرجعوهو ( بي كرتونة خبيزو ) والحمد لله نحن لسه في السيف سايد

تامبا يا شقيق ..
مجهوداتكم والمجموعة مقدره ولها دور كبير في إنجاح أعمالنا وحفلاتنا ..
دائماً خليكم على العهد وواصلوا فيما بدأتوه ..
فعلاً أطفال البورداب أضافوا الكثير من البهجة وساعدوا كذلك في تقديم وجبة العشاء ولقد رأيت الفرحة في عيونهم وكل شوية أسأل واحد فيهم أها إن شاء الله مبسوط من اليوم دا يجري والإبتسامة تعلو محياه دليل فرحة وإنبساطة ..

لكم الشكر والتقدير ..
بس في حاجة بسيطة صلاح شتات ما قدر يعبر عن مشكلتك

غايتو يا عمر الفاروق صاحبك محمد مرق من (جلدة) خالد المحرب ..
وأنا أشيل وأطمن فيهو يا زول (أدارق) بس لمن يجيك الصوت

Quote: بحمد الله تمكنّا من تجاوز نظرات عم شنبو أخونا وحبيبنا خالد المحرب والذي جاء وفي يده سوط عنج بي قطرانو ورغماً عن ذلك ركزنا للجلد هيييييييييييييييييع تاااااااايتنك..

والله كما الإحتياطات الأمنية العملناها ليك كان لي هسي نفس قائم

أبقى طيب ..

Quote: أهم ما في هذه الجلسة كسرت حاجز التخويف والإرهاب الذي يقوم به عمنا حمزاوي في البورد ..

برضو كان ظاهر عليك الخوف
والسوط في
وانت ما جبت سيرة البحر

Quote: وانت ما جبت سيرة البحر

ما دي المخوفاهو يا خال ..

كما تم في هذه الليلة المباركة خطوبة تيمبس والوغد سابقا دكين الى كريمات محمد حسن
بعد جرسة شديدة جدا من دكين
وفرح الجميع لهذه الخطوبة وتمنياتنا لهم بالسعادة والرفاه
طبعا معتصم ما ذكر الخبر ده لاحساسه بالغيرة لانه وهو وجيه الحفلة طلع ملوص من الخطوبة السريعة دي

بسم الله الرحمن الرحيم

أولاً : التحية لكل من شارك و ساهم و حضر أو إعتذر لظروف قاهرة.
الحفل كان بسيطاً و لكنه كان كبير المعنى و الهدف

ثانياً : الصراحة زيها مافي. ففي أول البوست ذكر الأخ معتصم :


Quote: ثم جاء (وزير المالية) خالد الأرباب ممسكاً بورقة طويلة عريضة فيها الكثير من مسيرة اللجنة طيلة الفترة الماضية والصعوبات المالية التي تواجهها وأمن على وجود دار البورداب التي طال انتظارها وثنى عليه الجميع ..



و كان هذا هو بيت القصيد ...
فرغم أن وزير المالية أكد على أن هناك عجز في الميزانية و أن البعض يتحمل هذا العجز من أعضاء اللجنة ..
إلا أنه و للأسف .. لم يقم بالدفع ليلتها إلا 4 أشخاص من مجمل الذين إستحق عليهم الدفع برغم الحضور الكبير.

4 أشخاص فقط دفعوا ... رغم تكرار مسألة أهمية دفع الشتراك و خاصة أنه أمامنا مشروع الإستراحة المستديمة.

و هذا شيء محبط للغاية ..

محبط للذين يدفعون.
و ننتظر من الذين لا يدفعون
فماذا أنتم فاعلون؟

الريس أبو جهينة والاخ معتصم ،

فعلاً كانت ليلة ليلاء جميلة ، ضمت كل الحلوين
من بورداب الرياض وضيوفهم الكرام .
وكم سعدنا بوجودنا وأسرتنا وسط تلك الكوكبة
من الاخوة الأعزاء الذين لم نكن لنعرفهم أو
نلتقي بهم لولا حوش الباشمهندس بكري أبوبكر ،
فجزاه الله عنا خير الجزاء ، حيث صار فعلاً حوشه
الماهل والواسع ، وطناً لنا كلنا جمعنا في
بوتقة واحدة رغم اختلاف التوجهات وتباين الآراء .

وكم كان بودي أن نكمل معكم تلك السهرة الرائعة ،
ولكن توعك زوجتي وشعورها بهبوط مفاجيء من جراء
داء السكري أفسد علينا بهجة الليلة وحرمنا من
مواصلة السهرة حتى النهاية ، حيث هرولنا بها
للمستشفى لمدة ساعتين حيث أجري لها اللازم، ثم للمنزل ،
(على وش الصبح) .

نأمل أن تتكرر مثل هذه اللقاءات الأسرية (ولا تتكرر مثل
حالة زوجتي فيها) . آمين يارب (في الحالتين) .


الريس أبوجيهينة :

Quote: 4 أشخاص فقط دفعوا ... رغم تكرار مسألة أهمية دفع الشتراك و خاصة أنه أمامنا مشروع الإستراحة المستديمة.

تسلم يا ريس ،

كم كان مهماً التنويه في ثنايا بوست الدعوة للحفل لأهمية الالتفات لأمر الاشتراك والاستعداد له ،
حيث أحسب أن معظم الاخوة لم يأتوا وفي بالهم أمر الدفع وقتها . وعلى كل حال ، ممكن مواصلة الجمع
للاشتراك حتى لو عبر اللقاءات في أي محفل أو تجمع يتواجد فيه الاخوة ، ليتم على ضوء ذلك موضوع
الاستراحة الدائمة ، خاصةً أن استراحة الخميس الماضي ، رغم روعتها إلا أنها ضيقة ، كماأن النساء (كما ذكرت لي زوجتي) اشتكين من حرارة الصالةالتي كن فيها ، رغم أن المكيف بها كان يعمل ، لكنه كان (كحياناً) ولا هواء فيه ، ويبدو أنه كان يعاني من (ضيق في التنفس) ؟! .

تخريمة : أخي الحبيب الشفيف معتصم(مو) ،

لك مودتي وأنت تقوم بجهدٍ مقدر ً، وكنت شعلة من النشاط والحركة ، ماشاء الله عليك وربنا يديك
الصحة والعافية و كمان (بت الحلال) حتى تلحق برفيقيك (تبمس و دكين) .
لكن يا أخوي تعال هنا .. إنت جهرتني بكشاف كاميرتك ، ورغم ذلك ما شفت صورتي مع الأخوين
محمد عبدالجليل وخالد المحرب (أنظر فوق) ، رغم أنني كنت بجوارهما ، أم تراه كان (فلاش) ساكت ؟!
على كلٍ .. هذا لا يقلل من روعة إخراجك للحفل في ثوبٍ قشيب بمساعدة البقية من تلك الشلة الزاهية.

دمتم ودامت الأفراح والليالي الملاح دوماً في حضرتكم وحضرة من نهوى ، حتى نحدق بلا وجهٍ ونرقص بلا ساق .

محبتي ،



( ليمو )

Quote: و كمان (بت الحلال) حتى تلحق برفيقيك (تبمس و دكين) .

الأخ الكريم ليمو


صباحك زين ، ،،

Quote: ولكن توعك زوجتي وشعورها بهبوط مفاجيء من جراء داء السكري أفسد علينا بهجة الليلة وحرمنا من مواصلة السهرة حتى النهاية

لا بأس طهور إن شاء الله وسلامة المدام وما تشوف شر إن شاء الله . رجاء طمئنا عليها .

Quote: نأمل أن تتكرر مثل هذه اللقاءات الأسرية (ولا تتكرر مثل حالة زوجتي فيها)

آمين يا رب العالمين . ومرة أخرى سـلامات للمدام .

ســلامي


عمده

ليلة جميلة بحضوركم يا ليمو ..
لقد سعدنا بيكم وبي جيتكم وطلتكم علينا ..
إن شاء الله دائماً ملمومين في السمح ..
وربنا ما يحرمنا من جياتكم ..
ألف سلامة للمدام إن شاء الله ما تشوف شر ..

شكراً لكلماتك الحلوة دي المجموعة كلها تؤدي العمل بروح واحدة ودا نتاج مجهوداتهم ..
أما العرس غايتو دكتور محمد حسني (جلاني) ساي ومشى لي دكين وتمبس تاني كان جاني ياني الناطي

تخيل لقد نزلت صورتك قبل ما أقرا كلامك ..
هناك الكثير من الصور تحتاج فقط لبعض الوقت ..
أرجو من الجميع أيجاد العذر لنا ..

كامل تقديري ومحبتي يا ليمو ..

Quote: توعك زوجتي وشعورها بهبوط مفاجيء من جراء داء السكري أفسد علينا بهجة الليلة وحرمنا من مواصلة السهرة حتى النهاية ، حيث هرولنا بها للمستشفى لمدة ساعتين حيث أجري لها اللازم، ثم للمنزل ، (على وش الصبح) .

الفاضل عبدالحليم التلب

ألف سلامه للمدام وما تشوف شر

افتقدها وكان رد ود بنتي انكم مشيتو

لأن سهام تعبانه وفكرت الموضوع تعب فقط

ما تشوف شر يا رب والف سلامه عليها ..

ناس الرياض ..
لكم التحية مثني وثلاث ورباع
دائما تامين ولامين وحلوين.
ربنا يديم الود واجتماعكم في الخير.
اعتذر عن الحضور هذه المرة والمرات القادمة ايضا
حيث انني عزابي ومتعقد شديد من الحاجة دي وناس الرياض كلهم ما شاء الله متأهلين
وكل يكنى بأبو أحمد وابو وضاح وأبو سلمي
حتى عمر الفاروق الفقري دا بقي يكني بأبي فاروق ..
أها الزي حالتنا الا يقولو ليهو (أبو النوم)
..

يا معاذ ما تتحسس ياخ الحال من بعض
أنا والكاشف أخوان (تمبس وشتات) زيك كده ..
هي دعوة للم الشمل والتلاقي والتأخي يا معاذ ..
نجتمع هنا كأخوة وأهل لنزيح حرّ الغربة وهجيرها ..
ليتك كنت معنا يا معاذ فقد كان يوماً جميلاً ورائعاً ..

ننتظرك في الجايات وضيوفك كمان ..

والله يا معتصم الواحد ما عارف يشكركم كيف انت وبقية اعضاء اللجنة وفى مقدمتهم الريس ابوجهينة فعلا عمل جميل جدا وليلة اسرية بكل ما فى الكلمة من معانى .
تقديمك انت والاخ طارق كان تلقائى وجميل ، وكل الحضور كانوا رائعين وتشرفنا بلقاءهم وطبعا دى كانت من فوائد هذا الليلة .

ان شاء الله تكرر هذه اللقاءات بشكل دورى .



حفظكم الله والى الامام



أحمد العمار

الشكر ليكم انتو يا أبوحميد لقد جعلتم اليوم جميل بيكم وبي حضوركم ..
ربنا يقدرنا ونكون عند حسن الظن بنا دائماً ..
ويتواصل هذا العمل وهذا الجمع في حب ووئام ..

محبتي وتقديري ..

هذا وقد شرف الحضور الأستاذ :/ عمر الفاروق شيخ الدين محمد أحمد **** ( وزير الشباب والرياضة المُرشح) والذي اعتذر بعدم تمكنه من إكمال الحفل (بعد أن بدأ جواله يرن كل دقيقتين ) ... ذاكراً أنه بصدد الذهاب لشراء العيش ( وقهقه ضاحكاً متذكراً نكتة مرت على خاطره في تلك اللحظة ) .........
هذا وقد تلاحظ بأن الأرباب خالد سعيد كان في أحسن حالاته مما دعانا أن نتجاوز عن وصفنا بالشايقي صاحب الماكينة (تايوان) .....
هذا وقد اتضح للحضور بأن الريس (سابقاً) ود الباوقة كان منحازاً وبصورة حادة إلى إحدى المناطق (الجهوية ) من خلال نكاته التي قام بإلقائها مما دعانا إلى أن ننظر في أمر ترشيحه مرة أخرى لمنصب الرئاسة .
هذا وفي لقاء (جانبي) إتسم بالصراحة والوضوح مع الأستاذ / عبد العزيز حول إجازته السابقة بوطنه السودان سرد لنا سعادته بعض الأخبار (غير قابلة للنشر) عن بعض المفاهيم والمصطلحات الجديدة الذي صار الشارع السوداني يتناولها هذه الأيام والتي تعلمها من الأستاذ(كوجاك) علماً بأن هذه الأخبار لن يسمح لنا بنقلها للملأ إلا بعد مرور خمسة عشر عاماً حسب النظام المتبع عالمياً في مثل هذه الأحوال ) ........
(نقلاً عن وكالة صواطات للأنباء المنبرية )



**** كتابة إسمه تحتاج إلى قلم (BIG) كامل

يا عمران بالله الكلام دا عرفتو كلو وانت في الحفلة دي ؟
غايتو وكالة سواطات دي قووووية


يلا أكتب الاسم ولا يهمك نحن بنعمل ليك حماية

دكتور / خطبتهن من هسه

عشان لمن يروح المفعول والله شنو ؟؟

Quote: طبعا معتصم ما ذكر الخبر ده لاحساسه بالغيرة لانه وهو وجيه الحفلة طلع ملوص من الخطوبة السريعة دي

انتو يا دكتور شنو الغتاتة الليكم دي ياخ ..
عملت الحاجة دي سكوتي وما وريتنا من بدري ليه ..
أها أنا غايتو كان تمبس ودكين ديل نطو وانا عارفهم بعملو كده ح اجلي الموضوع واقفله بالضبة والمفتاح

ربنا يخليهن ليك ويحفظهن ..

لمة جميلة...

نسأل الله يديم لمتكم وخوتكم ياااااااااااااارب...

ولك كميات مودتي صديقي معتصم... وتشكرات على الصور كأن الواحد بينكم...


أبو الحســـــــين...

المعتصم .. والاعزاء الجميلين .. سلام كتير
لقاء جميل .. ناس جميلين .. تضيق مساحات
الكلمات عن وصف الناس البتلملموا بسهولة
ويحيوا مع بعضهم ساعات جميلة بتدفق علـى
السليقة .. بدون بروتوكولات وكلام مقعر ..
ياسلام على الدنيا لما تجي الحاجات عفــو
الخاطر .. كان الحضور الأسري كبيرا وفعالاً
وكادت حليمة بكلماتها المعبرة أن تكون بطلة
الحفل وهي تسرد قضايا المرأة وتتناول
مسيرة المرأة السودانية في خطوط عامــة
بدءاً من الملكات السودانيات المحدقـــات
للشمس منذ أكثر من الف وخمسمائة سنة ..
وحتى تأسيس الشيخ بابكر بدري لأول مدرسـة
للبنات قبل مائة عام .. كان الحضور جميلاً
أطفالا ونساءاً ورجالاً .. وكانت الحميميــة
طافحة على الوجوه .. وكان خالد سعيد الأرباب
وهو يقرأ ميزانية بورداب الرياض ورغم أنه
قد ذكر أن الحساب ولد .. ورغم ما في هذه
الكلمة من تحامل على المرأة .. ولكنـــه
تحدث حديث الإخوان في مسألة بدأها بأننـا
سنتحاسب كـ (تجار) وكلو زول يدفع ما عليه
من إشتراك لتستمر ليالي الفرح .. ولو علم
ما قاله الزعيم الهندي (نهرو) لما فعل ما
فعل .. فقد قال نهرو (من خلال تجربتي تأكد
لي أن أصعب شيء في العمل العام هو أن تقول
للناس جيبو قروش) .. ولعل هذه لا تصدق تماماً
على بورداب الرياض .. فقد أثبتوا بأن أمورهم
تسير بإنسياب حتى دون مناشدة كثيرة .. غير
أني أرى أن يكون هنالك مبلغاً (إشتراكاً) محدداً
يفي بأغراض الرابطة .. ويدفع في أيام اللقاءات
بإعلان واضح في الميكروفون كل زول يدفع مساهمته
وقدرها (كذا) .. والحميمية التي تطورت بين
البورداب ستجعل من لا يستطيع المساهمة في تلك
اللحظة لا يطاله أي حرج ولكنها تضمن أن يقـوم
غالب الناس بدفع المساهمة الملزمة ومن زاد
عن المحدد المبلغ المحدد فأجره على الله ..
أخذني الحديث عن القروش .. عن سرد جوانب
الفرح التي جعلت تلك الأمسية إضافة جديدة
وكان كل شيء كالقمر يبدو وهيجاً .. وكان تمبس
يحمل الكاميرا كعادته ويصورنا على حين غره
فتأتي صورتي على غير ما أشتهي .. وكان الريس
أبوجهينة يجلس بعيداً يراقب أن الجميع راض
بما يرى ويسمع .. وكان طارق نقد ومعتصم دفع
الله يقدمان للحفل بإنسيابية وكلمات أنيقة وهما
يوزعان الفرص على جميع الحضور أطفالا .. رجالاً
نساءاً .. فكأني ببورداب الرياض وهم يسيرون
بخطاهم الواثقة الثابتة لهذه الرابطة الحبلى
بالكثير ..
أرجو أن يقوم أعضاء سودانيزونلاين بسداد
مساهماتهم للأخ خالد سعيد ليستمر الفرح
وتستمر رابطة بورداب الرياض تنجز مهامها
الاجتماعية والوطنية بنفس وتائر ثباتها
الناشدة إلى أعلى وشكراً للجميع ..

هكذا أنتم دوماً يا محمد عبدالجليل حينما تلتقون ..
تجملون المكان بأريحيتكم وحفاوتكم البالغة ..
تزرعون الفرح وتمشون بيننا بالمحبة والسلام ..
الكلمة التي ألقيتها كانت ضافية ومعبرة وحينما دلفت على الشعر وقفنا عندك ..
حتى عبرت مع الشمس من مشرقها إلى مغربها في رحلة الدوران الغير إعتيادية ..
أما ترى أنك قد (هبشت) شتات وأوجعت جوانبه ..
حدثنا عنها يا محمد وحينما ولجت إلى شباك مداخلك ..

نتمنى أن يمتد هذا التواصل وهذه اللقاءات التي عودتونا لها بمزيد من الحب ومزيد من التكاتف والإلفة ..

محبتي ..

يديك العافية صديقي أبو الحسين ..
حقيقي أنت دوماً معنا ومشارك في جميع بوستات تجمعاتنا ..
تسلم كتير يا حبيب وربنا يديم المحبة بيننا ..

محبتي ..

خالد المحرب وعبدالحليم التلب ليمو ..

محمد ولياب ومعه أحد الضيوف ..

هيثم سعيد وعادل جبارة ..

صلاح شتات ومصدق حسين ..

علاء تمبس كاميرا مان ..

الثنائي الفنان ياسر الحلفايا وخلف الله ودالشيخ ..

عبدالسلام أبو شنب وعلى يمينه ولياب ..

الأخوة بورداب الرياض،،،

وصاحب البوست الوجيه معتصم،،

تحية تحملها موجات البحر الأحمر عروس الغربية جده تحمل بين ثناياها

موده خالصه لكل احبابنا برياض المملكة ونحي فيكم روح المحبة والإخاء

واللمه الحلوة دي دائما يارب مجتمعين ومتحابين ومتواصلين معنا بالصورة

والصوت والكلمة العذبه المعبرة الصادحه من الجميلين ياسر الحلفاية وخلف الله

ودالشيخ ولحامل التوثيق تمبس والي كل الرائعيين وهذا هو السوداني في كل مكان

محب وودود ومترابط الي درجة الأنصهار وما خبر المصاهرة للأخوين تمبس ودكين إلا

تجسيد حي وربنا يسعدهم وعقبال أخونا الجميل معتصم يلحق بالركب جميل كان تعارفنا

عبر الكلمة والآن أصبحت صورة وغدا تصبح رؤيا وتصافح بأذن الله وتغار منكم جده بشواطيها

وغدا تصبح معكم في دوحة واحده وتكون شجرة أغصانها بورداب الرياض وأوراقها بورداب جده

وجذورها ضاربه في هذا الموقع الذي يحتوينا جميعا تحت مظلته الجامعة ودمتم،،أبوقصي،،

الحبيب أبوقصي ..
تحياتي وسلامي ..
ربنا يديم المحبة دي ونسعد بلقائك ونزيد الولف ..
هكذا دوماً السودانيين رغم إختلافاتهم وتوجهاتهم إلا أنهم تجدهم متحابين متسالمين ..
وهذا المكان جمع الكثيرين وله دور كبير في جمع الشتات ..
التحية للأخ بكري أن جعل هذا ممكناً وساحة نلتقي فيها ..

خالص محبتي وتقديري أخي مجدي ..

الأخوة البورداب الأحباء ..
لكم تحية طيبة ملؤها المودة والود والإحترام ,،
أولاً : دعونا نشكر الله عز وجل على هذه النعمة الطيبة التي منها الله علينا ألا وهي سودانيز أون لاين التي آلفت بين قلوبنا وجمعتنا في كل تلك الإحتفالات الطيبة الراقية التي فيها خيري الدنيا والأخرة . . الدنيا بالترويح عن أنفسنا وأسرنا وقضاء أوقات ملؤها الصفاء الروحي والمحبة .. والآخرة عبر تلك الأعمال الخيرة التي كانت إنطلاقتها من هذه الجمعات الطيبة .. مثل إفطار رمضان وغيرها من الأعمال التي يفسدها الإفصاح ..
كما أود أن أرسل أيضاً شكراً خاصة إلى ذلك الرجل الكريم الذي جمعنا في هذا الوطن الطيب فالتحايا والإحترام إلى الريس بكري أبوبكر وله شكرنا وتقديرنا على كل مايقوم به .
حقيقة خلال الفترة الماضية التي إمتدت إلى أكثر من 10 أشهر قامت اللجنة بكثيراً من الأعمال :
1. في 11/8/2006م إستراحة الجرادية إجتماع الجمعية العمومية .
2. ندوة سودانيز أون لاين عن القرار 1706
3. إفطار رمضان للبورداب
4. حفل تكريم الفنان الأستاذ/ السني دفع الله
5. حفل ليلة التسامح الكبري
6. مصاريف تجمع البورداب اليوم الخميس 3/5/2007م
وكل هذه الأعمال كان لابد من التجهيز لها والصرف عليها ، والحمد لله خرجت بالصورة المرضية وذلك بفضل الله ثم بدعم البورداب ، وكان دائماً مايكون هنالك عجز ولكن الأخوان كانوا دايماً شيالين تقيله .. ودعوني هنا أرسل تحية كبيرة للأخ / يوسف السماني الذي إفتقدناه بشدة .. وهو رجل له معزة خاصة بقلوبنا .. وشيال تقيلة . . وكثيراً من البورداب هم كذلك ..
كما أن هنالك من الأخوان الذين جعلونا نتحاشى أن نذكر أمامهم إسم المال .. لأنهم يفتنون المال ولايفتتنون به ، فنحن نقول لهم نسأل الله أن يجعلها في ميزان حسناتكم .. ولكن هدفنا في اللجنة أن يكون العمل جماعي .. نتشاركه سواسياً .. كل منا له نصيبُُ معلوم .. حتى نكون شركاء في العمل ونرعاه حتى يكبر ويعبر عنا وعن طموحاتنا ..
الإشتراكات .. موضوع يحتاج إلى بصارة .. لأن الأخوان كلهم لديهم الرغبة في المشاركة في هذا العمل وحريصين عليه .. ولكن يبدوا أن الآلية لجمع الإشتراكات تحتاج إلى مراجعة .. فإيد على إيد حتى نتمكن من إكمال إستئجار الإستراحة الذي قطعنا فيه شوطاً كبيراً .
ختاماً دعوني أرسل شكر خاص إلى أخوة دائماً مايدخلوني في حتات ضيقة جداً .. لأنوا مرة كان في عجز فكل واحد فيهم دفع مبلغ .. فأنا قلت في نفسي يا أرباب الجماعة ديل مايكونوا أرجل منك .. قمت دفعت 100 ريال .. لكنني تذكرت الأمام الذي أجاد في خطبة الجمعة وتحدث بإتقان عن فضل الظهر وبعد إنتهاء الصلاة ذهب إلى الشواية وإشترى 5 دجاجات وأنتم تعلمون المكانة الكبيرة للجداد المشوي في السودان .. ولكنه كان لايعلم أن هنالك أحد المصلين يقف بجواره .. ففاجأه قائلاً يامولانا والله ماعندي حق الغده .. فبهت مولانا وقال له خذ جداجة لكين إنعل أبو اليبقى ليكم إمام تاني ..
فأنا دفعت المية ريال وقلت ليهم كان دي طريقتكم شوفوا ليكم زول يبقى وزير مالية غيري..
خالد الأرباب
وزير المالية

تامبـا : تعرف أنا ماجبت جدو ليه ( لأنوا جعلي حار لو شاف السوط كان بيحلف طلاق إلا يجلد .. وان جلدتوه .. كان بشيل السوط ويحلف طلاق إلا يجلد الجماعة القاعدين .. خصوصاً ود الفاروق الجايي من الخرطوم وممسح ) .
عماد محمود ( عمـده )
والله ماعرفتك في الإستراحة .. أشف قرايتك للقرآن أصدقك ..
أشوف مداخلاتك ... برضوا أصدقــك .. أعمل شنــــو ..

يا أرباب أنا غايتو من شفت بدلتك الخضراء دي قلت الليلة في كلام كتير ..
الأرباب جاكم متحمس وزير مالية عديل كده ويمكن عينه على رئاسة الوزاء أو وزارة من وزارات إدريس الخليفة وطارق نقد
بعدين كلامك جاء مرتب وكلام سمح ليت وزرائنا يستشفون منك الكلام دا ..
وتاني حاجة خطاب ميزانتك قوي بس تقول وزير مالية بريطانيا لووول ..

شكراً يا خالد على المجهودات الكبيرة البتبذلوها لقيام مثل هذه اللمات ..
وشكراً للجنة عموم ..

تحياتي ..

بورداب الرياض

عيني باردة والله

انشاء الله تامين وسالمين دايماً

وفي السودان كمان ملمومين





ويا خالدة البدوي

شايفة موضوع المتحركات جاب نتيجة

والمرة دي زوجات البورداب وأسرهم حضورهم كان مميز

نعومه الحبيبة

اسكتي ساكت أنا من متين وانا

ادقدق في التلفونات

اصلهم الرجال ديل ما بوصلوا

الكلام ويعتذروا انهم اشغلو

وحاتك المرة دي كلمتهن بنفسي

وما اجملهن متجاوبات ولذيذات

دون فرز ويحملن بدواخلهن مذيد

من الجمال ..

المرات القادمة سوف تشاهدي

ما عندهن من ابداع ...

افتقدناك بيننا ..

نجتمع في ساعات الخير

وفي حضن الوطن ييييييييييا رب ..

تسلمي يا انعام ..
ربنا يجمعنا بيكم في أرض الوطن الحبيب ..
وانتو سالمين تامين ..

شكراً جميلاً ..

يكفي حضورك وإبتسامتك دي يا ملكي ..


سلاااااام كتااااار ..

الصورة دي لي صلاح شتات في الحفلة الأمبارح ويظهر معاهو اخونا مصدق..


الصورة دي لي صلاح شتات في حفلة للبورداب قبل أكثر من ستة أشهر ويظهر معاهو عمر الفاروق..



وعليه يمكنني يا مصدق أن أتنبأ بالحوار الذي دار بينكم ..
الظاهر كده صلاح شتات ده حنكو واااااااااحد ..

Quote: وعليه يمكنني يا مصدق أن أتنبأ بالحوار الذي دار بينكم .. الظاهر كده صلاح شتات ده حنكو واااااااااحد ..

إنهــا الأرجنتين ورقصة التانقــو

والله الواحد بعدا لبوست دا جاهو احساس انه البورداب ديل كائنات حية تمشي في الاسواق وتأكل القديد

الواحد طول عمره متخيل انه البورداب كائنات اسفيرية ساكت

عينا باردة عليكم يا كائنات الرياض

Quote: عينا باردة عليكم يا كائنات الرياض

سـجـمـي

اعتقد انه المرة دي خطاب ابو جهينة ابتدأ بــ:
الاخوة اعضاء سودانيز اون لاين .. الاخوة الضيوف .
وسقطت عبارة : الاخوة المتصفحين


التحايا لقدامى الــ Explorers

أساسي

تحياتي يا زول يا زين
حليل أيامك يا أساسي ..
ياخي ما تاخد ليك خفسة لصحراء نجد.

Quote: اعتقد انه المرة دي خطاب ابو جهينة ابتدأ بــ: الاخوة اعضاء سودانيز اون لاين .. الاخوة الضيوف . وسقطت عبارة : الاخوة المتصفحين

تعرف في واحد قال لي : بلاش كلمة متصفحون دي بالله
قلت ليهو : ليه ؟
قال لي : بتديني إحساس إنو نحن بقينا زى الصفايح .. متصفحين تصفح شديد .. زى المتكربن كما الكربون ..

تصدق بالله يا ابو جهينة يوم الاربعاء المدير اصر اصرارا شديدا علي سفري الي الرياض مرافقا له ... طبعا الموضوع ميت لكن داير يكبر كومه وكدا وطبعا مافي احسن مني تكبر به الاكوام لكن والله اجتهدت جدا في انه اوزغ منه الا ان فلحت بانه مافي (حجز) لم اتذكر موضوع هذا اللقاء ساعتها والا كنت حاضرا اساسيا تلك الليلة لكن لي موعدا معكم ووضيوف المنبر والاكسبلولر بحر هذا الشهر باذن الله

كانت امسية حق للقائمين يها ان يعتزوا بها
ورغم ان عدد الفيميل كان اكثر مما يدل
على ان البوردابس يتواجدون في محافلهم باسرهم
حتى ولو غابوا بداعي العمل او المجاملات الاخرى
يعني كصديقي صديق الموج اكيد كان في حتى تانية
ولكن ما شاء الله اسرته الكريمة تواجدت

الريس ابو جهينة كان في آخر الصفوف مع المدخل لاستقبال الضيوف
وانتشى عندما جاء مجموعة من بنى جلدته النوبيين
ورغم اننا النوبيون تواجدنا كضيوف الا انه في مثل
هذه اللقاءات الاجتماعية يتم ذكر الضيوف عند الدخول
وكان التعارف يتم بين البوردابيين المعروفين لدى بعضهم البعض

وانا لا زلت اجهل من هم البوردابيون (هل يعملون كاعضاء في نادي ثقافي
ام كل من يكتب في هذا البوست يعتبر بوردابيا؟؟).
وكيف يتم الانتساب لغضوبة البورداب؟؟

ولكم التحية،،

Quote: تلقائيا .. ما دام أنت عضو بالمنبر .. فأنت منتسب لعضوية البورداب.. ( يولد المرء منا على الفطرة .. حتى يتأنْتَر .. أيْ ينتسب لموقع بالإنترنت فإذا دفع الإشتراك صار مرضيا عنه من خالد سعيد و معتصم

سلام أخي زمراوي ..
شكراً لتواجدكم الذي اضاف للحفل الكثير ..
زي ما قال ليك الريس أبوجهينة البوردابي هو من له عضوية في سودانيزأون لاين وموجود في مدينة الرياض وما جاورها يعني المسألة ما مختصرة على مجموعة معينة وباقي الكلام الفوق دا

تقديري ..

تعرف يا هالك ..
كائنات حية دي أحسن من دبابين ..
قبل كده قدمنا ليك دعوة وطلبنا منك رسمياً تنضم لبورداب الرياض ..
لكن راحت عليك يا منقة ..

ما عارف الواحد هسي يقول ليك اساسي ..
ولا أبا ليلى المهلهل ..

الأستاذ مصدق ( أبوخالد ) ..

الأستاذ مصطفى عثمان ( شحرفان ) ..

الأستاذ عماد محمود ..

الأستاذ جمال هباني ..

الشعراء يوسف حمد النيل أبووجيدة ونصار الحاج ..

الخال حمزاوي ..

صديق البورداب مهندس ياسر ..

الأستاذ حاتم السر ..

الدكتور حسن الملك وباشمهندس مزاحم الضوي ..

Quote: إنهــا الأرجنتين ورقصة التانقــو

كان بقت على دي هينة يا تمبس..
الله يستر من ايطاليا والاسباجتي وسقراط واليونان وارشميدس وقانو الطفو

تخريمة :
شنو يا معتصم انتو بديتو التصوير بعد اتخارجنا ولا شنو ؟

ألأخ/معتصم


ألأحوة بورداب الرياض.هنيئآ لكم يومكم الجميل وأنتم دائما ما شاء الله عليكم حلوين وجميلين من ألأخ تمبس وخالد سعيد الذى يقابلك بأبسامة دائمة أو قفشة حلوة أو نكتة وألأخ أبوجهينة الذى دائمآ يشكل حضورآ جميلآ وكل ألأخوة وألأخوات المشاركات...........


كم تمنيت أن أكون بينكم ولكن لظروف أسرية قاهرة لم أتمكن من الحضور وبأذن الله الجايات أكتر من الرايحات...

إسماعيل محمد أحمد عباس.......أم درمان...

كانت لمة جميلة
شكراً للجنة المنظمة وشكر خاص للأخوة معتصم وتمبس على المجهود المقدر

كانت امسية حق للقائمين يها ان يعتزوا بها
ورغم ان عدد الفيميل كان اكثر مما يدل
على ان البوردابس يتواجدون في محافلهم باسرهم
حتى ولو غابوا بداعي العمل او المجاملات الاخرى
يعني كصديقي صديق الموج اكيد كان في حتى تانية
ولكن ما شاء الله اسرته الكريمة تواجدت

الريس ابو جهينة كان في آخر الصفوف مع المدخل لاستقبال الضيوف
وانتشى عندما جاء مجموعة من بنى جلدته النوبيين
ورغم اننا النوبيون تواجدنا كضيوف الا انه في مثل
هذه اللقاءات الاجتماعية يتم ذكر الضيوف عند الدخول
وكان التعارف يتم بين البوردابيين المعروفين لدى بعضهم البعض

Quote: وانا لا زلت اجهل من هم البوردابيون (هل يعملون كاعضاء في نادي ثقافي ام كل من يكتب في هذا البوست يعتبر بوردابيا؟؟). وكيف يتم الانتساب لغضوبة البورداب؟؟

سأظل اسأل واسال حتى تتم الاجابة يا تمبس ويا ريسنا ابو جيهنة
ولكم التحية،،

إبن العم زمراوي

سلام كبير

Quote: وانا لا زلت اجهل من هم البوردابيون (هل يعملون كاعضاء في نادي ثقافي ام كل من يكتب في هذا البوست يعتبر بوردابيا؟؟).

كل من يكتب في سودانيز أونلاين و يسكن في الرياض أو ما جاورها من قرى و أمصار و هِجِر ... فهو بوردابي ..

Quote: وكيف يتم الانتساب لغضوبة البورداب؟؟

تلقائيا .. ما دام أنت عضو بالمنبر .. فأنت منتسب لعضوية البورداب.. ( يولد المرء منا على الفطرة .. حتى يتأنْتَر .. أيْ ينتسب لموقع بالإنترنت فإذا دفع الإشتراك صار مرضيا عنه من خالد سعيد و معتصم

فعلاً يا حبيب بلدو اللمة كانت جميلة وانتو كنتو أجمل ..
ربنا يديم المحبة واللمة الحلوة دي تستمر في حب ووئام ..

تسلم يا حبيب ..

بالجد إفتقدناك أخي إسماعيل وبعض الذين تخلفوا بسبب ظروف طارئه ..
وزي ما قلت الجايات اكتر من الرايحات ..
إن شاء الله دائماً نشوفكم ملمومين ومبسوطين ..


تحياتي ومحبتي ..

ضيوف الليلة ..

الريس عبدالمنعم عبدالعال رئيس الرابطة الرياضية للسودانين بالخارج (الصالحية) ..

الأستاذة حنان باشري والأستاذة حياة العبادي ..

الشاعر حسين حمزة وعلى يساره الأستاذ عبدالمنعم عبدالعال ..

الأستاذة حنان باشري والأستاذة أمل والأستاذة كوثر اللدر عن جمعية جبال النوبة ..

الأستاذ عبدالعزيز أبوعاقلة عن الحركة الشعبية ..

الأخ نورالدين بالجلابية صديق لؤي شمت ومعه صديقه لم أتشرف بمعرفة اسمه ..

بصفتي وزير المالية أصرح بهذا البيان فقط ( لوكالة صواطات للأنباء المنبرية )
ولمديرها الفني والإداري الأرباب عمران ...
أولاً : اللقاء ناجح تماماً ..
إلا كما قال شقوري في لوري الخزين ..
العلاج لاتنسى رسلو لي دحين
العوينات ياجناي شوفن ضنين

فنحن نقول للبورداب
الإشتراكات لاتنسو رسلوها لي دحيــن ..
القرشيات يابوردابنا بقي شوفن ضنيــن ...

بالنسبة للحملة الإنتخابية .. لم تكن بالصورة المطلوبة حيث كان من المتوقع أن تأتي أؤكلها في تلك الليلة ويتم إعادة إنتخاب الوزارء .. فلذا على جميع الوزراء مراجعة مسجل الوزراء .

الحركة النسوية البوردابية ..
كانت في أوج عنفوانها .. مما ولد لدينا إحساس بإنه ممكن نتنازل لحرمنا المصون عن منصب وزير المالية .. في حالة تم فوز البوردابيات وتم تكوين لجنة من البوردابيات فقط .. وفي الآخر زيتنا في بيتنا ...

وزارة الصحة ممثلة في الدكتورة رشا ( رمز الحقنة ) كانت غائبة لظروف خارجة عن إرداة الوزارة ولكننا نيابة عن الصحة ووزارتها الموقر نرسل أمنياتنا مع باقة ورد إلى زوجة البوردابي ليمــو ونقول ليها إنشاء عافية سلامة .. ولتفادي إرتفاع السكر في حفلات البورداب نرجوا من البورداب يحاولوا أنو مايكونوا ذي العسل في إحتفالاتهم ... وهذا تحزير رسمي من وزارة الصحة البوردية .. سوف يتم وضعه مع أي دعوة خاصة بالبورداب على جانب ظاهر من علبة السجاير .. عفوًاً على علبة الدعوة .

وزير الشباب والرياضة كالعادة ... تهرب من رواتب الفرق والأندية والإشتراكات .. بحجة إنو محصل العيش .. ونحن نقول ليه الكلام ده مابيأكلك معانا عيش .. بأكلك لحمــة بس ..
وكلمة أهمس لك بها في إذنك .. لو إستمريت في البتعمل فيهو ده .. سوط الأرباب واصلك واصلك

نشيد بوزير الري الذي روى وأروى .. وكذلك وزير الثروة الحيوانية .. لم أتعرف عليه نسبة لتعديه على إختصاصات وزيرة الإذاعة والتلفزيون الوزيرة خالدة البدوي .. تاركين إختصاصاتهم وكذلك الشفيف وزير المواصلات الذي تقدم بإلتماس لكي يتم تعديل مسمى وزارته من وزارة المواصلات فقط إلى وزارة المواصلات السلكية واللاسلكية حتى يتسنى له التعامل مع المايكروفون ( ونرجوا أن يكون المايكرفون لاسلكي ) حتى يتماشى مع مسمى وزارته بعد التعديل .

ختاماً :
الإشتراكات لاتنسو رسلوها لي دحيــن ..
القرشيات يابوردابنا بقي شوفن ضنيــن ...
لو الإستراحة مجان .. ماكان طلبنا البعين ..
إلا الساوند ... دايره .. كميــــــن ..
والكراسي كمان .. البيدفعه ميـــــن ..
الزمن يابوردابنا ماحقاهو السنين
البعيش في الدنيا مابعيش مرتين
العمل العام داير له كمية يقين
سلامي للبورداب مطرز للبنيات والبنين
الإشتراكات لاتنسو رسلوها لي دحيــن ..
القرشيات يابوردابنا بقي شوفن ضنيــن ...

الأرباب
وزير المالية

وزير المياه إدريس الخليفة ووزير الثروة الحيوانية طارق نقد وعلاء حيمورة يتحدث للأخت غادة نورة مبلغاً دعوات وأمنيات بورداب الرياض لها بالصحة والعافية والشفاء التام ..

دكين والريس ودالباوقة وحديث جانبي ..

الكاردينال محمد الشيخ وصلاح شتات ..

البوردابي المشاغب أحمد إدريس الخليفة مع والده ..

أخى معتصم حامل الشعلة
لك التحية يا أحد أبناء
الأسرة الواحدة المتحدة بورداب الرياض
لهم منى الحب والتقدير والأجلال الكبير
( ناس نقاوه ووجه مشرق للسودان البلد الموعود بشمس شتات التى سوف تسطع)
( التلاقى ولم الشمل جميل ومفيد لكم منى التحية

ان شاء الله دايما ملمومين في الفرح والسعادة
وربنا ما يحرمكم من بعض يا رب
والله بس ذكرتوني بورداب الدوحة
بس ما عندكم شاطئ

بورداب الرياض !!!

سلامات ,,,

عاد عيني باردة عليكم وعين الحسود فيها عود ,,, ربنا يحفظكم ويغتيكم و من الشر يحميكم خمسة وخميسة

ويا هشومي عاد شايفاك مستلم الجو يا طويل العمر ولا .... ربنا يسعدكم إنشاء الله .

الأخت الفاضلة إنعام عبد الحفيظ

Quote: والمرة دي زوجات البورداب وأسرهم حضورهم كان مميز

لا يا إنعام أنا زوجتي وعيالي ما كانوا موجودين ...

Quote: عاد عيني باردة عليكم وعين الحسود فيها عود ,,, ربنا يحفظكم ويغتيكم و من الشر يحميكم خمسة وخميسة

عواطف سلااااام ..
ياخي دعواتك دي براها بالدنيا ..
تسلمي يا ذوق وربنا يجمعنا في أرض الوطن الحبيب ..

محبتي وتقديري ..

شكراً أخي معتز القريش ..
ونحن برضو نسعد جداً بلمتكم وبرامجكم الشيقة ..
تحياتي لكل بورداب الدوحة ..

محبتي وتقديري ..

ولك من الحب والتحايا أضعاف أخي عثمان ..
ربنا يجمعنا على أرض الوطن الحبيب وهو ينعم بالخير والسلام ..
كلامك الطيب دا بحفزنا لمزيد من الترابط ومزيد من الإلفة ..

كن بألف خير ..
محبتي وتقديري ..

الأخ وزير المالية :
قف..
نشجعكم ونشد من أزركم ..
قف..
نعم شغلتنا أموالنا وأهلونا في تلك الليلة فما أكملناها وكان العيش سبباً مقنعاً للخروج وكووووووووووووبح قمنا جبنا العيش..
القرشينات كما يقول أهل كفر العنزة وكفر الدوار وكفر ووتر فهي عصب الحياة ويكفي أن إسمها الضحاكات وهو الاسم الذي جعلني أعرف سبب تبسمك دوماً في وجه أخوانك يا وزير المالية فليست الصدقة هي السبب ولكن لأنك تملك من الريالات ما يكفي لشراء مشروع زراعي من سندس وانت طالع ناهيك عن التركتورات والدقاقات ..
نعم يا وزير المالية ضحكاتك سمعها سكان الجرادية والجنادرية والجندر كذلك والسبب ورقات الملك عبد العزيز رحمه الله ..

رغم خروجي مبكرا لارتبـــاط اخر 0 الا أني كالعادة سعــــدت جدا بتلك الجلسة
البوردابية 0 ومـــن هنا التحيــة لصنـاع الفـــرح 0
خاصة توأم الابداع تمبس ومعتصم دفع الله 0 ورفاقهم في اللجنة فلهم الشكر علي الجهد المقدر 0

أخي العزيز معتصم ود دفع الله
سبقني الأخوة المتداخلون في وصف تلك الليلة ذات البهاء والصفاء .. المحفوفة بالألفة والمحبة .. المطرزة بجماليات لقاء الأخوة .. حقاً هي كل ذلك وأكثر ونتمى تواصل جهودكم نحو لم هذا الشمل المتناسق والمتوافق روحاً وفكراً ..
هنا بعض الأنطباعات السريعة عن تلك الليلة :
حليمة .. خطفت الأضواء وتألقت وكانت نموذجاً حياً جسد معاني مهرجان مئوية تعليم المرأة
عماد محمود علي .. لأول مرة أجد نفسي أوافقه الرأي .. !! وبالفعل كان يستحق أن يسمى لاعب ضربة البداية ..
من خلال تجاربي البسيطة أعتقد أن بورداب الرياض بإمكانهم تنظيم لقاءات أكثر إعدادا وتنظيما .. واختيار موقع آخر يليق بهذا التجمع الفريد فقط بعض الأستجابة لنداء الريس أبو جهينة لسداد الأشتراكات والمبادرة الشخصية في ذلك دون إنتظار طلب من اللجنة ، ويبدو جلياً أن الأخ خالد سعيد يواجه حرجاً في الأتصال المباشر بالأعضاء لأسباب مقنعة فعلاً ولذا أرى أن تكون المبادرة بالسداد منا نحن شخصياً بما شاهدناه من مجهودات بذلت من قبل هذه المجموعة المتطوعة مشكورين حيث سعوا للم شملنا والترفيه عنا
نصار الحاج .. شاعر يحق لنا أن نفخر بأنه ضمن هذه المجموعة الفريدة .. وبفكر متواضع أعتقد بأنه سيكون له شأن كبير في المستقبل القريب
حنان باشري .. إسم كبير في ساحات العمل العام لأول مرة أشاهدها شخصياًواسمع لها قراءات شعرية جميلة .. فقط أتمنى أن تراجع نفسها في مداخلتها ومشاركتها الأخيرة .. حسب وجهة نظري تلك الطرفة لم تكن موفقة ولا تشبه شخصيتها ومكانتها وقصيدتها المعبرة
مصطفى عثمان .. صوته به لمحة جمال .. لكن يبدو أن ( كهربته زايدة ) فقد خَرَّبْ المايكرفون !!
خالدة البدوي .. جاءت متأخرة ؟؟
هيثم سعيد .. والله العظيم أقولها صادقاً ،، يستحق العضوية أكثر من بعض الأعضاء !!
الريس عبد المنعم عبد العال مدير خدمة التلي موني بالبنك العربي الوطني .. مشاركة فاعلة مع البورداب كعادته دائماً .. قدم عرضا مغرياً للتعاون مع البورداب .. ولكن هذا التجمع الإسفيري ( الحر ) مكبل بمحازير عديدة .. أرى أهمية المناقشة المباشرة من كافة الجوانب النظامية خاصة القانونية منها ..
هذا ما وددت طرحه .. فإن أصبت فمن الله .. وإن أخطأت فمن نفسي .. وأسألكم العفو ..

Quote: عماد محمود علي .. لأول مرة أجد نفسي أوافقه الرأي .. !!

يا هاشم ده كلام يتقال ده ... غايتو الله يجيبك يا أمير الجمري . وبلداً ما فيها التمساح يقدل فيها الورل ..

تخريمة :

يا هاشم ما خلاص جاب أولاده تاني نحن بنقدر عليه بس غايتو يحلنا الحلا بله .... لكن بجي الخريف ...

شكراً ليك يا عادل ولأسرتك الكريمة التي أضافت الكثير للمجموعة بحضورها وشكراً لإنطباعاتك الحلوة أيضاً عن هذا اليوم وكلامك الجميل ..
نحن لا نزال في مسعانا لأيجاد إستراحة تضم البورداب وأسرهم ودي بجهودكم إن شاء الله ..
لقد قمنا بايجار إستراحة الجرادية في هذا اليوم لإعتبارات كثيرة أولها قربها للجميع ومعروفة لديهم وكان الغرض من ذلك حضور أكبر عدد من البورداب وأسرهم وطرح فكرة المكان المناسب للفترة القادمة ودي كانت مؤقتة لذلك اليوم ونحن نبحث عن مكان يكون متوافق للجميع وقريب ..
خليكم قريبين فبكم تكتمل كل معاني المحبة والإلفة وربنا يجمعنا دائماً على خير ..

محبتي وتقديري ..

فعلاً فقدناك يا محمد الحسن في فقرة التعارف ..
وبحق كانت فقرة جميلة وشيقة كان فيها الشعر والنكتة والكلام العابر ..
شكراً لجيتك السمحة ولمتكم البتسعد الواحد ..

محبتي ..

كانت ليله ليلاء
وكان حضور زوجات البورداب مشرف
بس في بوردابيات ما جابو ازواحهم
وانا مع اقتراح تكون لجنه من الجندر للبوردابيات وصديقاتهم
وبعد فتره نعمل جرد ونقيم عمل كل لحنه
واذا هزمونا نتنازل ليهم ونطلقهم
ولا الرأي شنو يا شباب

Quote: بورداب الرياض !!! سلامات ,,, عاد عيني باردة عليكم وعين الحسود فيها عود ,,, ربنا يحفظكم ويغتيكم و من الشر يحميكم خمسة وخميسة ويا هشومي عاد شايفاك مستلم الجو يا طويل العمر ولا .... ربنا يسعدكم إنشاء الله .

عطوفة الحبيبة تسلمي إنشاء الله من كل شر وربنا يبارك ليك في زوجك واولادك واهلك

مشكورة كتيرة علي المرور وربنا يجمع كل بورداب سودانيز اون لاين في منطقة واحدة وهي السودان

الكبير .

Quote: وانا مع اقتراح تكون لجنه من الجندر للبوردابيات وصديقاتهم وبعد فتره نعمل جرد ونقيم عمل كل لحنه واذا هزمونا نتنازل ليهم ونطلقهم ولا الرأي شنو يا شباب

يا طارق نحن ما محسوبين معاكم ..
أعملو جردكم براكم ونحن بنقيف نتفرج بس
بعد الحفلة الحلوة دي ناس التلفزيون قدمو طلب قالو عايزين طارق نقد
بس على شرط (شحرفان) ما يجي معاك ..
يمكن يمسك المايك ويقول عايز يغني وبكره نلقى شرايطه في الأسواق

بقلم هيثم سعيد

الاخوة الاجلاء السلام عليكم ورحمة الله

من النادر جدا ان تجد فرقة او اناس فى مدينة الرياض بتلك الاريحية والتفاهم مثل اسرة بورداب الرياض وده السبب الاساسى البشجع الواحد انو يسعى وراى تفعيل عضوية فى موقع سودانيز اون لاين والشى اللفت نظرى لجلسة كانت نهار جمعة 13/04/2007 للاخوة الاعزاء هو ( اختلاف الاراء لا يفسد للود قضية). رغم ان البعض يختلف فى الاراء ولكل واحد قضية يعبر عنها فى المنبر بس تجدهم اجتماعيا اكثر من الاخوان.
الاخ عادل جبارة يكفى ان اقول ان الواحد اول مايشوفك يحبك فى الله والحاجة الشفنها فى جميعة الصحافة تخلى الواحد يتمنى ان يكون له بيت فى مدينة الصحافة ثم لكم شكرى وتقديرى.
تعجبت لعدم عضوية عمنا واستاذنا مصطفى شحرفان ومن هذا بطل تعجبى لعدم تنشيط عضويتى مثل هذا الرجل يجب ان يكون عمدة البورداب .

فلكم منى الشكر والاحترام
هيثم سعيد


العطبراوى


عضو قديم

صدقت يا هيثم والله ودي أدبيات بورداب الرياض روح التسامح والمحبة الفيهم رغم اختلاف الأفكار والتوجهات ..
يتناقشون يتفاكرون يتشاكلون وكل هذا في محبة وصفاء تام ..
سعيدون بوجودك معنا يا هيثم ويا ريت دائماً تكون معنا ونتشرف بعضويتك كذلك ..
شكراً لكلامك الطيب يا حبيب ..

تحياتي وتقديري ..

توضيح بسيط ..
يظهر في الصورة الأخ ياسر والأخ نورالدين وهو متصفح للمنبر ومتابع له من فترة طويلة ..
نشكر لهم حضورهم الجميل ونتمنى أن يداومو على مواصلتنا في جميع لقاءاتنا ..

http://up.9q9q.net/up/index.php?f=bb6FedJhE

ابن الرشيد ..
لماذا وضعت هذا اللنك هنا ؟
ماذا تظن بربك ؟

الاخ معتصم

هنيئاً لكم باللمة الجميلة الفاتتني قصباُ عني ودون ارادتي

وهنا بقدم اعتزاري الشديد لعدم حضوري و إعتزار خاص للاخت خالدة البدوي.

يا سيدي سبب تأخيري كان بسبب نومه أقلقت كل اهلي ومعارفي ، في تمام الساعة الواحدة ونصفة وانا عائد من الدوام اتصلت على ابن اخي و طلبت منه ان يحضر للمنزل( حسب طلب المدام ) ليأخذ عائلتي معه لحي الروضة لعمل ترتيبات اللقاء حسب اتفاق بين ام محمد والاخت خالدة البدوي و اتفقت معهم بعد ان انتهي من محاضرتي من الساعة الرابعة والنصف حتى الثامنة ونصف سوف احضر للروضه و نحضر للاستراحة لحدي هنا كانت كل الامور اوكي .
ذهبوا هم للروضة و انا قلت اقفوا لي 10 دقائق وبعدها اذهب للمحاضرة و سكرت الجوال و طلبت من ابن عمي كان متواجد لحظتها ببيتي ان يصحيني في تمام الساعة الرابعة وربع .
لم يحصل هذا و استمرت النومة حتى الساعة الثانية عشره ونصف ولم اصحي الا على صوت الجرس وهو يضرب بصورة مستمرة حيث كان احد الجيران ارسل بواسطة وزارة الداخلية ليستبين الامر ان كنت على قيد الحياة . يا عم انت نايم ومسكر الجوال و الدنيا مقلوبة عليك ، سألته ايه الحاصل و كم الساعة ، قال لي يا سيدي الساعة 12:30 منصف الليل و الحاصل انو ام وليداتك عاوز تموت اجرى حصلها في الروضه .
اكرر اعتزاري

يا معتصم:


لم اري بيالة شاي واحدة...!!

ان شاء الله دائما ملمومين بالخير يا ناس يا حلوين

هذا وقد اتضح للحضور بأن الريس (سابقاً) ود الباوقة كان منحازاً وبصورة حادة إلى إحدى المناطق (الجهوية ) من خلال نكاته التي قام بإلقائها مما دعانا إلى أن ننظر في أمر ترشيحه مرة أخرى لمنصب الرئاسة .


عمران .. ابو احمودي .. يا اخوي والله ولو ما الاذان كان قلت ليك حقت الجعلى العتالي .. عشان تكون الكفة متعادلة ...

الحفلة الجاية ان شاء الله ..

والله يا جماعة خلينا الناس كلها وبقينا بس مع الناس الحلوين ديل بورداب الرياض واصدقاؤهم ..

عيني باردة عليكم . اخرجي يا عين يا عانية ...

شكرا لكل الاخوة في اللجنة المنظمة .
شكرا للمايسترو تامبا .. الشفيف معتصم .. الارباب خالد . ود علم الهدى ... والمذيع اللامع طارق نقد .


ود الباوقة

أخى معتصم

لك التحية

ولكل بورداب الرياض

وصلك الرد له أكثر من ساعة دوامك إنتهى ولاشنو

شايفك مارديت

لكم جميعاً منى كل الود

شكراً ابن الرشيد على ردك ..
زي ما انت عارف الواحد بغيب كتير عن المنبر ودي بسبب المشاغل ..

ولك مني الود أجزله ..

لم اري بيالة شاي واحدة...!!


اخي ناصر يا اخوي نحنا عندنا بيالة شاي واحدة شايلا هس صلاح غريبة مالك ما شفتها



ود الباوقة

سلام يا نزار ..

تعرف الشاي دا كان مدور دوير ومعاهو جبنه كمان ..
غايتو الا تمبس يجي ينزل الفيديو عشان تشوف الحاجة دي
ونتمنى أن نلتقي بك أيضاً وفي أرض الوطن الحبيب ..

تسلم يا ذوق ..

بورداب الرياض

لامين شاملين دائماً يارب

كانت ليله تنسمنا فيها كل الجمال

كان الجو خليط من الموسيقى ..

والادب ...

والشعر ..

والفلسفة ..

والفكاهه ..

...

والكثير من ابداع الرائع

ادخل في نفوسنا السرور والاريحية ..

والتعرف بمن لم نجتمع بهم من قبل ..

سعيدين ..

وانشاء الله تتواصل اللمات ..

شكراً بكري ابو بكر لاتاحة هذة المساحة للقيا

شكراً ريس ابوجهينة على تواصلك وسعيك في لم الشمل ..

شكراً العقد الفريد من بورداب الرياض على هذا الاهتمام وتوفير

الجو المناسب ..وغلى الامام لجمع بقية البورداب ..

شكراً زوجات البورداب والاطفال على تجاوبكن وتواصلكن كنتن

أجمل ما في الليلة ..

حاضرين ريس ابو جهينة لدفع الاشتراكات حتى

يتواصل هذا الجمال وهذا الجو المعافى وسط زحمة

الحياة القاسية ..

اسفففففففففففة على التأخير في تلك الليله

لظروف كثيرة مجتمهة غلب علي ...

محبتتتتتتتتتتتتتتي لكم ،،،

الحبيب الصادق خليفة تسلم كتير وإن شاء الله ما تشوفو شر بالجد فقدناكم ألف حمد لله على السلامة ..
غايتو دي نومة رسل لينا منها لينا زمن محتاجين لي حاجة زي دي
كنا نمنى نفسنا بلقياكم ولكن الجايات اكتر من الرايحات ..

تحياتي وتقديري ..

Quote: سبب تأخيري كان بسبب نومه

نوم العافية اخوي الصادق الخليفه

الجايات اكثر من الرايحات ..

البركة في نومتك مع الدوامات البايخة دي

كفاية حسك معانا..

تحياتي لام محمد والاولاد...

الاحباء بورداب الرياض
سلام
مانتنفعكم الجلسة دي يامعتصم .
بورداب الرياض ماعندكم عشرة مااذكرتونا حتي بكلمة .

عارف تمبس ومعتصم ديل لمن يلقو الجكس بنسو اسماهم لكن الريس وخالد سعيد ووزير الري ونقد وودالباوقة ديل بقو بحبو بعد الخرف دا .

الله يخلي بورداب الخرطوم الحلوين

يا عمك ننساك ..
انت انت بتتنسي ..
ياخي ليك وحشة شديدة يا يوسف هسي انت ما احسن مننا اهو في السودان مع بورداب الخرطوم الحلوين وظريفين ..
لمن تجي بنعمل ليك لمة حلوة عشان جيتك بس ما تجي تقول السودان حلو حلا زي راجل المره

أرقد عافية ..
وما تنسى الوصية مهمة جداً ..

الوجيه يوسف السماني


مشتاقين يا أخ ... وين البيك .. ســوداني أصيل

أها مبروك ليكم التعادل يايوسف قالوا الجماعة شالوا ( البرينس ) وطافوا بيهو ام درمان كلها فرحاً بالتعادل المكسب للهلال. فلتوا من دي بس الجاي أحلى . ســـلام .