Post: #1
Title: عـورتكم إنكـشفت وكـل الـخلق شـاهدين (قصيدة بمناسبة الغارة الاسرائيلية)
Author: Ahmed Alim
Date: 03-28-2009, 09:26 AM
Parent: #0
ياحليل خرطوم الفيل
الما حام حداها عميل
ياحليل تمساح النيل
الكان للقوة دليل
******
صِبح الورل قدال
ومعاهو القرد طبال
وإنت يا قرنوق خد ليك كم شبال
والثعلب المكار رافع شعارو نضال
وصقرك الطاير إترصد الاحوال
فيك الذئاب تنهش.. وتقطع الاوصال
فيك الكلاب تنبح تغير الاقوال
شعبك الغلبان يحكي في الجوال
مابتسمعوا الرادي؟؟ الرادي ما شغال؟؟
******
ورجعوا للقصة....قصة النبي سليمان
وسلطان زمانوا الطال..
أصحوا يا حالمين ...أصحوا يا غافلين
حاكمنا ما سليمان وللهدهد ما راجين
حكمونا بالكهنوت..خدعونا باسم الدين
جونا جيعانين وكانوا عريانين
آخر الاحسان نعتونا شحادين!!!
أكلونا أكل السحت ولسه ماراضين
قسمو البلد كيمان وزادو بل الطين
حلبوا النعاج التسعة ..وإتقسموا التسعين
طاولتوا في البنيان جاوزتوا سور الصين
بسياسة التمكين زدتوا في الذرية..
ونكحتوا حور العين...
عددتوا في النسوان..
أدمنتوا للفيتمين!!
يا ساسة يا عاطلين
ياساسة يافاشلين
جاتكم الغارة...عملتوا زي نايمين..
عرفوا الخبر دسوا الخمسة في الاتنين...
صبحوا محتارين!!
ندفنوا في الواطة؟ نمسكوا عاد لمتين؟؟
عورتكم إنكشفت كل الخلق شاهدين...
قصّو الدرب شوفوا أعرفوا الضربكم مين..
حاكمنا ما سليمان وللهدهد ما راجين...
"القصيدة للصديق خالد أحمد"
|
Post: #2
Title: Re: عـورتكم إنكـشفت وكـل الـخلق شـاهدين (قصيدة بمناسبة الغارة الاسرائيلية)
Author: حسين نوباتيا
Date: 03-31-2009, 05:55 AM
| Quote: والثعلب المكار رافع شعارو نضال |
الله يكفينا شرو..
.........................................................
هذا الخالد لم يطرق شئ ولم يجيده ..
لكنى لم اتوقع ابدا ان له في الشعر دروب ..
تحياتى لهذا العبقري ..
يا ريت اذا جاء واحد من النقاد و قيم لينا هذه المحاولة الجادة..
شكرا ابو ماريا..
|
|