Post: #1
Title: وإن قالها فقد صدق..كنّا شحادين !!
Author: عمر الفاروق
Date: 03-21-2009, 08:36 AM
كالعادة في سودانيز اون لاين كل مرة بتطلع موضة جديدة وموضوع جدييد يلوكوهو ويلتو فيهو ويعجنو إلى ان يظهر موضوع جديد ..
إنتهينا من الطهور ومن اوكامبو وبنقول يا هادي وجاتنا موضة وزير الخاريجة السابق الدكتور مصطفى عثمان اسماعيل ونعته للعشب السوداني بالشحادين حسب ما ورد في اللقاء او عبر صحيفة الشرق الاوسط ..
وبغض النظر عن التأكيد من النفي من الدكتور مصطفى عثمان قاله ام لم يقله فقبل الإنقاذ نحن فعلا كنا شحادين ..
هي الشحدة دي كيفنها ؟؟؟
شحادين وكل الرؤساء كانوا يتسولون في الخليج عقب كل فترة لتجميع الاموال وما تجود به قريحة اهل الخليج من منظمات ومؤسسات من فتافيت الميزانية..
كنا شحادين ونحن بنقول ليهم ادونا قروش نعمل مستشفى وادونا قروش نعمل كهربا وادونا قروش للإغاثة ..
كنا زي الشحادين ونحن واقفقين في صفوف البنزين للدرجة اللي بتخليك تشوف المواطن في الشارع شايل الباقة والخرطوش وواقف ليك في الظلط عشان تلحقو بي خط خطين ..
كنا شحادين تحت غطاء التكافل الاجتماعي وانت بدق لي جارك عشان يديك رطل سكر عشان جوكم ضيوف وانتو ما عندم سكر..
كنا شحادين ونحن بنشوف التفاح والعنب في المسلسلات وفي شارع الجنة كما يحب ان يطلق عليه امثالنا في العمارات ..
لا عليك يا دكتور فقد كنا شحادين بس شحادين مقننين لا نحتاج ان ندعو ونحن نشحد :
الله يعرس ليك الجمبك دي ..الله يخليك ..الله يديك الفي مرادك ..
كنا شحادين ولمن نجلس على ابواب المساجد فنحن شحادين "مودرن" خااااالص..
مفهوم الشحدة عندنا انو لازم تكون شاييل كورية وجلابيتك مشروطة ولا بأس بي عصاية بتاعت زول كراعو مقطوعة..
كريم ..الله كريم ..ربنا كريم ..
|
Post: #3
Title: Re: وإن قالها فقد صدق..كنّا شحادين !!
Author: على محمد على بشير
Date: 03-21-2009, 08:50 AM
Parent: #1
قالوا يا فاروق
فى قبيلتين فى غرب السودان اتغالطوا فى من اكثرهما شجاعه وفروسيه من الاخر
واتفقوا انو يعملوا امتحان للقبيلتين بأن يجيبوا لكل قبيله اسد ويطلقوه فى
وسط فرسان القبيله ومن طريقة قتلهم للاسد يبين الشجاع الباسل
اطلقوا اسد هصور للقبيله الاولى وانطلق الفرسان يضربه الاول وحينما يلتفت اليه
الاسد يزوغ الفارس ويجيه من خلفه فارس اخر ويضربه بالسيف ويزوغ وياتى اخر وهكذا
الى ان خر الاسد صريعا .. فصاح فرسان تلك القبيله واطلقوا صيحات النصر وزغردت
نسائهم فرحا
وجاء الدور على القبيله التانيه واطلقوا اسدا هصورا اخر بينهم وما كان من فرسان
تلك القبيله عملوا حلقه وجعلوا الاسد فى وسطها ووقعوا فيهو ضرب الى ان خر ساقطا
واسلم الروح الى بارئها فى خلال ثوانى معدودات
وغاظ هذا الامر القبيله الاخرى للحد البعيد .. وجاءوا اليهم قائلين
- هوى ها .. شغلكم دا رجاله والا غشامه !!
|
Post: #4
Title: Re: وإن قالها فقد صدق..كنّا شحادين !!
Author: Zomrawi Alweli
Date: 03-21-2009, 09:02 AM
Parent: #3
يا عمر الفاروق انت تحمل اسم ذو معني خليك مع الحق ولا تفرق
بالله عليك ما تستحي على ويهك
الوقوف في صفوف البنزين ما تعتبر شحدة
الوقوف في صفوف العيش ما تعتبر شحدة
لان الوقوف انتظارا يعني انك تملك المال لتشتري به
اما اليوم فالشحدة عينك يا تاجر يجيك الجار ويقول ليك بالله اديني حق المواصلات دا لمن يكون عنده كرامة وهذا اكرم الناس حاليا اما الذين لا يملكون الكرامة فحدث ولا حرج.
الشحدة فوق الارض والبترول من باطن الارض تذهب لجيوب اناس مرتفعون من الارض وهم قلة..
|
Post: #6
Title: Re: وإن قالها فقد صدق..كنّا شحادين !!
Author: humida
Date: 03-21-2009, 09:14 AM
Parent: #4
| Quote: وانت بدق لي جارك عشان يديك رطل سكر |
ما قال ما بنعرف السكر ..
كيف تدق لجارك تسأله عن حاجة ما متعارف عليها في ذلك الوقت ..
يا عمر .. الكلمة شينة .. ما مفروض تطلع من شخص في منصب مستشار جمهورية ..
انت شغال بنظرية خالف تذكر .. مرات بتصدق معاك لانه الناس الهنا دي بتدير الامور بعنترية كضابة ..
لكن في دي ما عندك حق ..
حقيقة انا واحد من الناس ما كنت شحاد .. و لا أعلم عنك انت ..
حاجاتي كانت مكفياني .. و لا يعنيني ان تسول رئيس لبناء مستشفى و لا بناء عمارة لاولاده ..
ممكن كان يجي يقول الاوضاع الاقتصادية هسع بقت احسن .. بكون فيها قولان .. و الناس بتتناقش في الامر ..
لكن تجي تنبذ الناس و في مؤتمر فيهو مليون صحفي ما سوداني .. دا الكلام العيب ..
ياخي هو كدا كدا العرب ديل ما مريحننا ..!!
..
..
خليك في الهلال و صلاح ادريس و يوسف السماني ونانسي عجاج .. وطارق الامين .. ناطح العظماء ديل ..
وخلي الشعب ..
|
Post: #5
Title: Re: وإن قالها فقد صدق..كنّا شحادين !!
Author: عزاز شامي
Date: 03-21-2009, 09:11 AM
Parent: #1
تاني يا عمر؟
انت قاصدني يا جنى ولا شنو؟
| Quote: وإن قالها فقد صدق..كنّا شحادين !! |
غايتو السوتو فيكم الانقاذ ما بيطلع بأخوي و أخوك!
بالله يا ود الفاروق وقفة الصف بقت شحاتة؟
الشحات بيقيف في الصف علشان يكب بنزين؟
وكما شايل قروش يدفع بيها؟
الشحاتة غيروها هي؟
تعال نقول شحاتين، الغلط غلط منو؟
موش دولة و ميزانية ولا غلط الشعب (الشحات)؟
معاه حق يقول شحاتين، فقد قيل في الأثر يا فرعون من فرعنك قال ما لقيت حد يلمني!
مد كراعك يا مصطفى و أهنئ ...الشحاتين فوق العليهم من الفقر سلموك قيدهم للآخر!
ماشة تمام سياسة التمكين و سياسة اطعم الفم تستحي العين!
|
Post: #7
Title: بختك
Author: طلحة عبدالله
Date: 03-21-2009, 09:22 AM
Parent: #1
والله يا ود الفاروق القليص أول مرة تقول كلام اتفق فيهو معاك ..
بختك أبسط يا عم .
|
Post: #8
Title: Re: وإن قالها فقد صدق..كنّا شحادين !!
Author: عمر الفاروق عبد الله الشيخ
Date: 03-21-2009, 09:26 AM
Parent: #1
"للعشب السوداني " ده عشب استاد الخرطوم الصناعي ولا شنو
ياخي الله يدينا ويديك
|
Post: #9
Title: Re: وإن قالها فقد صدق..كنّا شحادين !!
Author: Hawari Nimir
Date: 03-21-2009, 09:40 AM
Parent: #8
الاخ عمر..
سلامات و علك بخير..
طيب لما الشعب السوداني...ده شحاااااد..ومادي يده للسؤال!!
البخلي السيد المستشار..و الساده الوزراء..و حتي المشير ده..الخلاهم ...يتعالجو
ويتعلمو..بي قروش الشحده شنو؟؟؟؟
موش نفس الناس دي..
درست..في مدارس السودان و جامعاتها..وكان كمان بدوهم رواتب
موش اتعالجو في المستشفيات..و العلاج المجاني...
موش سافرو علي نفقه الحكومه..و القروش حفن الحكومه..جايه من جيب منو؟؟
موش ياهم الناس الغبش..الشغاله..الكادحه...وعشان تعلم اولادها..
ويجي في النهايه..يقول عليهم شحاديين...
طيب لما شحاديين...ليه اتعلمتو و اتعالجتو من قروش الشحده..
و الله عينو قويه
باخي عيب...عيب و الله
لكن الله في..
الله في..
|
Post: #10
Title: الفاروق
Author: عبد اللطيف بكري أحمد
Date: 03-21-2009, 09:44 AM
Parent: #1
أحييك أخي عمر ، فأنت دائم تقول رأيك ومايعجبني فيه أنه مبرأ
من الهوى ومن الغرض ،، رأيك لا تمليه عليك جهة، فمن تخالفه الراي
اليوم قد توافقه غدا، لذا يستحيل أن تخالف أحداً طول العمر أو توافقه
الرأي على عمى طول العمر أيضا،،
==
لأول مرة أستمع هذا الصباح للتسجيل من رابط الشرق الأوسط والحديث
عادي لا يستحق هذه الضجة الكبرى وأوافقك الرأي في كثير مما ذكرت
من الحالة التي كان يعانيها الناس في السودان ايام الأحزاب:
أنا شخصيا : أخر شيء قلته في حق حكومة الصادق المهدي : ان شاء الله
ماتصبح للصباح وقد بحثت عن خبز وعن وقود وعن سجائر فلم أجده فنمت
دون كل ذلك ، وجاءني من كان حاضرا بالأمس مسرورا : ما صبحت والله!!
الرئيس السوداني والوزراء الحاليون ينتهجون نهجاً فيه تهور كبير
وهم أحسن من يصنعون الأعداء لأنفسهم في زمن أصبح الإعلام فيه يتصيد
الأخطاء ولا يلقي بالاً لما هو حسن!!! قولوا خيراً أو أصمتوا فذلك
أفيد ألف مرة من أن تناطحو العالم بعبارات تسوقنا كالقطيع إلى
الهاوية،،
=
الشرق الأوسط أقول لها مقلته للزميل مصطفى سري : لو كانت شجاعة
قول رأيكم في أمور كل الدول بالتساوي لتقبلنا فكرة أن تكونوا
جريدة العرب الدولية ، اما وأن تختاروا السودان بمبدأ من يهن
يسهل الهوان عليه فبين ظهرانينا من لا يزال بحتفظ بكبرياء،،
ونفس القول ينطبق على قناة الجزيرة : فلتستضيف معارضا
لقطر أو مخالفاً للشيخ أو فلتدعو مرة واحدة بعودة والدة الشيخ من منفاه!!
=
|
Post: #11
Title: *
Author: عمر الفاروق
Date: 03-21-2009, 09:45 AM
Parent: #1
يا جماعة مبدئياً كده وإجابة عن سؤال اخونا حميدة ..:
انا كنت شحــــــــــــــــاد..
والقصة ما عايزة خالف تذكر.. وبعدين اخالف منو وفوق كم ولي شنو ؟؟
اسة قول المنبر ده كللللللللو بعد خالفت قام صفق لي اها سوو وت ؟؟
طبعا بين الشحدة والتكافل في ALT+Shift عايز تعملا شحدة تدوس ALT+Shift البي اليمين ..عايز تقنع الناس انها تكافل تدوس ALT+Shift البي الشمال ..
تدق الباب لي صاحبك عشان تشيل منو قميصو الهزاز الكاروهات عشان ماشي عرس عايدة فده تكافل اجتماعي..
يجيك زول شايل عكاز فيها شوال معلقو في كتفو يدق الباب يقول ليك عايز لي هدمة البسا تقول ليهو الله يدينا ويديك ..
الشعب السوداني شحد في الفترة مابين 84-91 لمممن الله غفر ليهو بما فيها الفترة الاولى من الانقاذ دي زاتا..
قبل كده ما كنا شحادين واسة ما شحادين ..
|
Post: #12
Title: Re: *
Author: humida
Date: 03-21-2009, 10:29 AM
Parent: #11
| Quote: قبل كده ما كنا شحادين واسة ما شحادين |
لا هسع الله يخلي لينا الصين يا اخت بلادي يا شقيقة ..
من ناحية خالف تذكر دي .. عندك منها كتير .. و قد تكون مشهور بيها عديل .. ابسط يا عم ..
بعدين تحديدا ياخي .. انا ما شحدت لي قميص هزاز من زول .. لانه ما لبست هزاز .. و لا مسطردة ..
اكتر حاجة مارستها في عالم البشتنة و التقطع .. مشيت حفلة ود الامين بجزمة زيزي .. لانه الكهربا كانت قاطعة و ما لقيت جزمتي ..
ما تعمم عمايلك علي الناس .. افرز ياخي ..
مش في ناس في المدرسة كانوا بجوا حاشين جبنة و زيتون .. اها انا كنت واحد منهم ..
و في الثانوي .. كان عندي عربية .. حتي ممكن تسأل الرشيد ابرسي ..
و في الجامعة ما كان عند حق المواصلات .. و دي ممكن تسأل منها محمد بشير ..
و هسع مديون و متغرب ..
انت اصلو ما سمعت بنظرية التطور .. ما ممكن نكون ماشين بالناقوسي كدا ..
..
..
افصل واقعك عن واقع الجماهير الكانت مرتاحة ..
|
Post: #13
Title: *
Author: عمر الفاروق
Date: 03-21-2009, 10:40 AM
Parent: #1
| Quote: اكتر حاجة مارستها في عالم البشتنة و التقطع .. مشيت حفلة ود الامين بجزمة زيزي .. |
بما إنو زيزي جزمة جكس فاكبر مقاس ممكن يكون لافي منها في السودان مقاس 39 وعشان التطور خلينا نقول 40..
حميدة انت بتلبس 44 زيزي اللبستها دي الا تكون جكساية بطوط ..
بالمناسبة الزيزي اخير منها الهزاز .. فالمرة الجاية لو راودتك فكرة تحضر حفلة لي ود اللمين جرب الهزاز اصلو الهزاز مفيد جداً للجبنة ..
بالمناسبة وبما انك كنت واحد من البيحشو جبنة وزيتون فاكيد اكيد حا اكون في فسحة الفطور جيتك قبل كده وقلت ليك جيب قرمة ..
مش قلت ليك انا كنت شحاد!!!
|
Post: #14
Title: *
Author: عمر الفاروق
Date: 03-21-2009, 10:47 AM
Parent: #1
محمد عبد الرحمن :
والله كان اخير باسووردك ده يكون رايح لحدي اسة ..
يعني لمممممن يجيبوهو ليك تقوم تدعم لي اجابتك بي لينك لي حميدة !!!!
غايتو ...
ابو علوة :
اها الفاز منو ؟
ولا التحكيم لاحق تحكيم الممتاز ؟
عمر يا فاروق:
والله العشب القاصدو انا ده بيكون عشب نجيل الهلال اللحدي اسة ما شوفناهو ده ..
|
Post: #15
Title: Re: *
Author: humida
Date: 03-21-2009, 11:30 AM
Parent: #14
| Quote: حميدة انت بتلبس 44 |
الوكت داك ما كان في مقاسات .. كنا ماشين بالمذهب المنسعاوي .. ( أمر الله من سعة ) ..
كلو بخش ..!!
|
Post: #16
Title: Re: *
Author: khaleel
Date: 03-21-2009, 11:54 AM
Parent: #15
يا عمر الفاروق
في شحدة وفي تكافل اجتماعي
في عهدهم شحدنا كيف ندخل الكلية الحربية وكيف ندخل كلية الشرطة شحدنا الواسطة
وفي عهدهم شحدنا كيف نزوغ من الخدمة الالزامية وفي عهدهم شحدت الطالبات حق العشاء
وفي عهدهم شحدنا المغتربين يرسلو فيزا حتي لو بتاعة راعي
عشان نتخارج من بلدنا
|
Post: #17
Title: Re: *
Author: tmbis
Date: 03-21-2009, 12:24 PM
Parent: #15
Quote: اكتر حاجة مارستها في عالم البشتنة و التقطع .. مشيت حفلة ود الامين بجزمة زيزي .. لانه الكهربا كانت قاطعة و ما لقيت جزمتي ..
ما تعمم عمايلك علي الناس .. افرز ياخي ..
مش في ناس في المدرسة كانوا بجوا حاشين جبنة و زيتون .. اها انا كنت واحد منهم ..
و في الثانوي .. كان عندي عربية .. حتي ممكن تسأل الرشيد ابرسي ..
|
Quote: بالمناسبة وبما انك كنت واحد من البيحشو جبنة وزيتون فاكيد اكيد حا اكون في فسحة الفطور جيتك قبل كده وقلت ليك جيب قرمة ..
مش قلت ليك انا كنت شحاد!!! |
.. الاعــزاء عمر وحميدة.
ياخ أنا القدامكم دا .. كنت بصحى من النوم باكل طعمية .. مع الشاي بشرب الشاي بالطعمية .. بمشي حاشي ساندوتش المدرسة فول بالطعمية وبيدوني المصاريف .. كان عندي حصالة برمي فيها الباقي بتاع اليوم بجي راجع من مدرسة الرشاد بطلع في حيطة الموتمر من قصاد بيت ناس اسامة المحامي .. لحدت ركن مدرسة سوميت .. باكل في ساندوتش طعمية .. لم اصل البيت بقول ليهم اعملوا لي طعمية بالطعمية .. في نص التمرين في فريق البواسل في ميدان ابوعنجة عندي بريك .. بمشي مطعم الحاج اضرب ساندوتش طعمية .. لكن المرة دي بالجبنة .. برجع الميدان تاني لحدت ما التمرين يخلص ونعمل لجنـة بيكون يدي فيها زيت الطعمية .. بتعشى بي طعمية .. ما كنت بشرب حليب ولا باكل لحم لاني نباتي .. عندي قفص جداد وقفص حمام .. مربيهم للزينة . وكان عند محمد ببغاء كنو بنعلمو الكلام .. قام واحد من الجماعة اياهم علمو كلمتين ما في مكانم .. قووم يا ببغاء خلي كلامنا كلو وامسك في الكلمتين ديل .. وقوم يا ببغاء قول الكلمتين ديل لي ام الزول صاحبنا دا .. ما عارفو قاصد واللا ما قاصد المهم قالم .. واليوم القبليها قال لي وين ياطعمية .. اظن في واحد سرب ليهو معلومات عن حبي للطعمية .. الحمد لله ما قال لي كلام تاني قدام الناس كنت كتلتو..
المهم
انا ما شايف داعي للاختلاف .. لانو الناس بتنظر ليكم كاصدقاء .. وابناء منطقة واحدة ـ وعايشين في منطقة اغتراب واحدة .. هذا الكلام لا يشبهكم ..
يعني يا عمر انا قريت ليك قبل فترة انك بتحب الاندومي .. اكبرت المسالة دي فيك جدا .. لانك متصالح مع نفسك لابعد حد فلما الأخ حميدة يقول ليك انو كان بيحشي ساندوتشات جبنة بزيتون أو ما رتدلا .. حقو تقبل الحاجة دي منو لانو برضو متصالح مع نفسو واحتمال كبير يكون بيحب الحمضيات .. وفي النهاية اختلاف (الحشوات ) لا يفسد للود قضية ..
يعني إنت بي اندومي وانا بي طعمية ومرات مرات معاها فول .. وحميدة بي زيتون وجبنة واحتمال علبة العسل الخدرا الفيه راس الاسد ديك .. ما ملاحظ انو ممكن نعمل وجبة غذائية كاملة ..؟
ملحوظة:
الأخ عمر الفاروق .. وانا بكتب في المداخلة دي اتذكرت موضوع الكوستليته والزبادي.
|
Post: #18
Title: رد
Author: مهدى الصادق السيد
Date: 03-21-2009, 01:05 PM
Parent: #1
اخي عمر الفاروق الموضوع الان اكبر من حديث د/ مصطفي الجاء يكحلها عماها الموضوع الان خارج السيطرة والخطاب الاعلامي فيه كثير من الصياح والعويل بعيدا والتهريج الاعلامي ...
حديث د/ مصطفي جارح وفيه شق للصف السوداني والذي توحد واجتمع دفاعا عن السيادة الوطنية ولكن حديث د/ مصطفي وكل وزراء السودان نفر كثير من الذين تعاطفوا علي الاقل مع الموقف الوطني وانا اولهم حتي لحظة حديث د/ مصطفي كنت واقف بشدة وبقاتل ولكن ان يأتي وزير ووزير خارجية سابق بعبارات لاتليق بفرد عادي من عامة كوادر المؤتمر الوطني ناهيك عن وزير خارجية سابق ومستشار رئيس الجمهورية .......
علي د/ مصطفي عثمان ان يعتذر للشعب السودانى الذي يقف معه الان رقم مررات الخط الاعلامي للحكومة ومن شايعها .
|
Post: #19
Title: *
Author: عمر الفاروق
Date: 03-21-2009, 01:16 PM
Parent: #1
عزاز ال شامي:
ياخ والله انا زاااتي لمممن إتعقدت :)..
كل ما اقرا ليك مداخلة واجي القا تعليقك بتاع مقصودة ده اعيد قرايتي لي الكتبتو والاقي فعععلا إنو ماف اييييي إحتمال تاني غير إني بكون قاصدك :D
ياخ اديني إيمليلك وتاني قبل ما اكتب الكلام حا ارسل ليك منو نسخة (منقحة ومزيدة) عشان الابروفل وكده لانو بالجد ظهرتها عاااملة انا :)
بالنسبة لي صفوف البنزين دي ما شحدة انا قصدت إنو بي سبب صفوف البنزين بقينا نقيف في شارع الظلط بي الخرطوش والباقة ونشحد البنزين وطبعا نحن ما بنسميهو شحدة بنسميهو وقفة المسلم مع أخيه المسلم ..
وإن شحدنا فاكيد يا عزاز السبب فعلا الحكومات وفي عهد الإنقاذ دي زاااتا شحدنا لمن قلنا بس والانقاذ دي شدت الناس زي خمسة سنة كده مش خلتها تشحد بس لالالا وصلت ناس تانيين إنهم عشان ما يشحدو يبيعو شرفهم عديييل ..
حالياً الوضع فعلاً إختلف رضينا أم ابينا وده ما بينكره إلا مكابر..
تخريمة :
كدي خلينا في المهم ونعمل براكتز ..عايز لي خمسة الف ريال :)
|
Post: #20
Title: *
Author: عمر الفاروق
Date: 03-21-2009, 01:25 PM
Parent: #1
إستوقفني حديث الأخ العزيز علاء الدين منصور تمبس ..
فعلاً أخي تمبس هو ذاك ..
نبهتني لنقطة مهمة جداً وكدت أن انجرف مع هذا التيار الذي لا يشبهني ولا يشبه الأخ الصديق محمد عبد القادر..
ساتوقف عند هذا الحد واتقد باعتذار للاخ حميدة إن كنت قد تجاوزت الحد ..
شكراً لك مرة أخرى أخي علاء الدين ..
ياخ قوم لف كده يا تمبس دي شنو البيضنة دي :D:D:D:D:D:D:D:D:D:D:D:
والله قعدت اضحك ضحك ...
ياخ انت زول ما جادي..
|
|