Post: #1
Title: الأسـتاذ محمود محمد طه والقـطة ( الكديسة)
Author: منصوري
Date: 03-18-2009, 07:20 PM
أنا ما عارف إسم الكديسة.. دا السودانيين جابوه من وين؟
في الخليج نخجل نقول كديسة..
هم هنا يقولوا ليها( قطوة) بفتح القاف..وتسكين الطاء
يعني برضو أحسن مننا قريبة لى كلمة قطة..
البنت الخليجيةاشتكت الأبلة السودانية لمدير المدرسة قالت ليهو المعلمة السودانية
تدرسنا الإنجليزي.. لما سألتها أية يعني كلمة( كات) بالعربي قالت لى يعني ( كديسة)..
.............
كل الحكاية جابتها كلمة كديسة دي.. ربي أكرمها وأكرمنا كما هي في السيرة إلتهمت الثعبان الذي كاد أن يقفز على نبينا عليه أفضل الصلاة والسلام..
..........
عادة يصوم الأستاذ محمود محمد طه عدد كبير من أيام كل شهر.بالإضافة لرمضان وغالباً ما يكون فيها الأيام البيض...
صادف في رمضان..
كان الميدان الذي يقع أمام منزل الأستاذ محمود معد لمكان إفطار الأستاذ وتلاميذه.. طيلة أيام الشهر المبارك..يتراوح العدد كل يوم مابين خمسمائة شخص أو يقل أو يزيد في أيام الجمع والعطلات قد يصل الى الألف
في رمضان يفرغ أحد منازل تلاميذ الأستاذ محمود لتعد فيه مائدة الإفطار الجماعي.. لكل هذا العدد.. تفرغ الأخت الجمهورية تماماً من أي عمل منزلي في الفطور لتتفرغ للعبادة وقيام الليل
كزوجة أو أم أو طالبة..
أما فطور الأستاذ محمود فيخرج من داره.. عبارة عن بليلة العدسي وعصيدة بملاح أم رقيقة بدون لحم..مشاركة لوجبة الفقراء.. في وطننا الكبير
وفطور تلاميذه يخرج من الدار المفرغة لعمل الإفطار برضو عصيدة وملاح وبرميل ليمون يوضع في الميدان.. وبلح..
حلقات حول الأكل..
صينية الأستاذ يجلس عليها عدد من الجمهورين قد يكونوا من كبارهم أو من صغارهم أو أواسطهم بالإضافة لبعض أصدقاء الجمهوريين. وبعض المساكين وعابري السبيل.. والأطفال..
صينية الأستاذ يتبادل تلاميذه المواقع عليها كلما أكل فوج يجي الآخر.. تعرضاً للمرافقة واحتراما..
صادف في ذلك اليوم أن كنت في صينية الأستاذ محمود
واحد صاحب للأستاذ محمود اسمو سليمان لكنه لم يصل لدرجة جمهوري تلميذ.. ولم يعرف أدب الجمهوريين في حضرة بعضهم البعض وفي حضرة أستاذهم.. هو تصرف بسيط لكن لايمر على سالك في الطريق النبوي بصورة عادية
المهم التصرف كان هكذا..
جاءت قطة تموء بقرب سليمان.. وتتضور من الجوع
فنهرها وضربها وابعدها.. بس.. بس.. بس.. هكذا..
ضحك الأستاذ محمود في هدوء وقال له( يا سليمان ..مالو حكمك.. حكم أب تكو.. كدة؟ الجعان بيضربوهو والله بيدوهو أكل)
هسه عشان نجعل لك شرف المبادرة
وتصحيح الخطأ وكسب الأجر عند ربك
ما حا نقول لواحد تاني أديها لقمة
حا نقول ليك إنت ذاتك أديها لقمة؟
أيه رايك؟
حا توافق؟
طبعاً وافق سليمان
حيث لم يتدخل أحد في حريته
ومهد له الطريق لتصحيح الخطأ
|
Post: #2
Title: Re: الأسـتاذ محمود محمد طه والقـطة ( الكديسة)
Author: Haydar Badawi Sadig
Date: 03-18-2009, 08:33 PM
Parent: #1
هكذا كان! لا تمر لحظة في حياته إلا وفيها عبرة لمن يعتبر.
شكرا، يا صديق.
|
Post: #3
Title: Re: الأسـتاذ محمود محمد طه والقـطة ( الكديسة)
Author: منصوري
Date: 03-19-2009, 05:33 AM
Parent: #2
| Quote: هكذا كان! لا تمر لحظة في حياته إلا وفيها عبرة لمن يعتبر |
هو كدة بالضبط يا دكتور حيدر
.........
والله والله والله .. لو عرف الشعب السوداني إنو الأستاذ محمود بيحبو زي شنو؟ كان بكى من هسه لغاية يوم القيامة
...
وأظنك تعلم يا دكتور حيدر أن الأستاذ محمود بيحب الشعب السوداني أكثر من أسماء بنتو؟ودي حقيقة مؤكدة
........
كان الأستاذ محمود يقول لتلاميذه
الشعب السوداني دا إنتو ما بتعرفوهو كويس
بعرفوا أنا
|
|