مستشار البشير: الشعب السوداني كان مثل «الشحاتين» قبل قدوم «الإنقاذ»

الثلاثـاء 21 ربيـع الاول 1430 هـ 17 مارس 2009 العدد 11067

مستشار البشير: الشعب السوداني كان مثل «الشحاتين» قبل قدوم «الإنقاذ»
الرئيس السوداني يعلن «سودنة» العمل الإنساني

الرياض: تركي الصهيل الخرطوم: إسماعيل آدم
شبه مصطفى عثمان إسماعيل، مستشار الرئيس السوداني، شعب بلاده بـ«الشحاتين»، قبل تسلم الرئيس عمر البشير مقاليد الحكم ومجيء «ثورة الإنقاذ الوطني» عام 1989. مبرزا أن هناك فرقا كبيرا بين سودان اليوم، وسودان الماضي. ورفض في مؤتمر صحافي عقده أمس قبل مغادرة الرياض، أن تكون لغة العنتريات قد طغت على الخطاب الرسمي السوداني خلال الأسابيع الماضية. وقال «لو كنا نتعامل بالعنتريات، لما كان حال السودان اليوم مقارنة بما كان حاله من قبل. هذه الحكومة عندما جاءت إلى السلطة الشعب السوداني كان مثل الشحاتين.. حينما جاءت هذه الحكومة لم يكن هناك سكر، الشعب السوداني كان يشرب الشاي بـ(الجكه)».
إلى ذلك وفي تصعيد جديد مع الدول الغربية، قرر الرئيس عمر البشير طرد كل المنظمات الأجنبية العاملة في البلاد خلال عام، فيما أطلق على الخطوة «سودنة» العمل الطوعي في البلاد.
وقال البشير في خطاب أمام عناصر القوات المسلحة، إنه وجه وزارة الشؤون الإنسانية بـ«سودنة العمل الإنساني وعمل المنظمات العاملة في البلاد خلال عام»، وقال: «لا كبير لدينا إلا الله، ونحن لسنا محتاجين لإغاثة»، وأضاف:«سبق وأن استضفنا أكثر من مليوني إريتري وإثيوبي، ومليونا من تشاد وأفريقيا الوسطى وقت المجاعة التي ضربت أفريقيا في السابق».
وكشف البشير أن هناك منظمات استغلت العمل الإنساني لعمل استخباري مدمر، حسب تعبيره، وأضاف: «لدينا كل الوثائق التي تثبت ذلك، وأن هناك مسؤولاً أمنياً إسرائيلياً كبيراً يقول إنهم موجودون في السودان وفي دارفور لتفكيك السودان». وقال: «نحن رفعنا كرتاً أحمر لبعض المنظمات (الأجنبية)، وفي نفس الوقت رفعنا كرتاً أصفر لكل منظمة»، وجدد القول بعدم حاجة بلاده لهذه المنظمات.


الشرق الأوسط

المشكلة اتحولو من شحاتين لحرامية

هذه هي نظرة وتفكير صعاليق الإنقاذ و(.........)يها للشعب السوداني....بلا خجل وأمام وكالات الأنباء العالمية....نقول للطفل المدلل السفيه...مصطفي إسماعيل...نقول له الحمد لله أن أصبح لديكم حسابات في سويسرا...وتسكنون أنتم وأسركم القصور...تلبسون الحرير وتأكلون في موائد الكرام....أطفالكم يتنعمون ويلبسون ويدرسون مع الأكابر وأولاد الذوات.....أما الشعب الشحات ....فله الله ....والمعسكرات والملاجئ....ووكالات الإغاثة.....نقول لهذا الطفل الصفيق....تنعم أنت وملتك من مستجدي النعمة ....تنعم بالمال السحت الحرام....الممهور بعرق ودماء هذا الشعب الطيب الأبي والمغلوب علي أمره.....والحساب ولد...والأيام دول بيننا......

راشد

الاخ Rashid Elhag
مع التحية


التسول والشحاده والفقر يقاس بعدد المنظمات الانسانيه التى تقدم الطعام للجوعى والدواء للمرضى والكساء للعرايا من اهل السودان
كم منظمة اغاثه تعمل الان فى السودان
وهذا امر لم يشهده اهل السودان من قبل الا فى عصر تجار الدين وسماسرة الوطن

أحمد الله أنى سودانى , ابن هذه الارض
التى أحتضنتنى بين ربوعها .. منذ مولدى و حتى خروجى مستهل التسعينات
و فى مدارسها علمتنى ...مجانا
و قرأت الكتب فى مكتبات مدارسها.. و انشطة مدارسها المجانية من الجمعية الادبية الى الفنون مرورا بالموسيقى و التصوير .. مجانا ..
و فى مستشفياتها .. أستشفيت .. مجانا
و عندما درسنا فى الخارج .. كانت تقدم لى إعانة شهرية تكفينى شر الحاجة ..
________________________
أى أنها منعتى حتى خروجى مستهل التسعينات.. من ان أكون شحاتا !!

مستشارين لله



كرامة لله

Quote: شبه مصطفى عثمان إسماعيل، مستشار الرئيس السوداني، شعب بلاده بـ«الشحاتين»، قبل تسلم الرئيس عمر البشير مقاليد الحكم

Quote: مقارنة بما كان حاله من قبل. هذه الحكومة عندما جاءت إلى السلطة الشعب السوداني كان مثل الشحاتين.. حينما جاءت هذه الحكومة لم يكن هناك سكر، الشعب السوداني كان يشرب الشاي بـ(الجكه)».

نعم كان هناك و لا يزال الكثير من المصاعب الاقتصادية
و الفقر يعم أنحاء كثيرة من السودان ، بل هو حال السواد الاعظم
ارتفاع الاسعار الان
و ندرة السلع فى الماضى هما وجهان لعملة واحدة ..
لكن .. لولا هذا الشعب و هذه الارض .. فى ذلك الزمان .. أين كنت ... ستكون يا دكتور مصطفى ..
لو كانوا كما قلت ..
لما تعلمت .. أم أنك خريج مدارس و جامعات خاصة .. و تخصصت على حسابك و سافرت بتذاكر من حر مالك ..
برضو ممكن !!!!!!!!!!!!!!
لولا تلك الايام ابن كنت ستكون يا دكتور !!!

أخشى .. و بقوة عين
أن يصرح قائلا : أن تصريحاته تم تأويها من قوى الاستكبار العالمية و أن هناك مؤامرة عالمية تحيكها تلك القوى ضده !!


تركي بن صالح الصهيل المحرر الصحافي في صحيفة الشرق الأوسط

في ونسة .. نص في السما.. ونص في الأرض
أمي طلبت من الرئيس يرفدني ووافق لكن بشرط !!

حوار من الإرشيف بتاريخ 9/3 مع وزير الخارجية السابق د. مصطفي عثمان اسماعيل احد مستشاري الرئيس حالياً .. اجراه معه خليفة حسن بلة واسمهان فاروق
> أين اتولدتَ ؟
- انا اتولدتَ في قرية البكري محلية القولد محافظة دنقلا على ضفة النيل الغربية.
> يبدو عليك انك شاب ؟
- «يبتسم» اتولدت سنة 1955م مع ارهاصات الاستقلال .
> انتو دناقلة ؟
- نحنا ننتمي لفرعين من قبيلة عربية .. قبيلة الشويحاب وقبيلة البديرية ديل اتزاوجوا واختلطوا .
> يعني ما دناقلة يا سعادتك ؟
- كلمة دنقلاوي ودناقلة بتعني المكان الجغرافي اكثر مما تعني القبيلة .. يعني زي لما تقول صعايدة بنقصد بيهم كل سكان الصعيد المصري .. وعندنا هنا في الدناقلة بتلقي قبائل ذات اصول عربية وغيرها ذات اصول نوبية وقبائل خليط .
> .....................؟
أبوي كان مزارع واسرتنا متوسطة الحال ومتصوفين .
> .....................؟
- الطريقة العجمية .. وعموما مجتمعنا كله كان متدين ومتصوف وعشان كده بتلقي فيه صفات التعاون والتسامح واعانة الضعيف ومساعدة المحتاج .
> بتذكر مواقف تدلل بيها ؟
- كانوا يتلاقوا في يوم محدد كل اسبوع يمدحوا الرسول (صلى الله عليه وسلم) وفي الملاقاة دي يعرفوا حال وظروف بعض ويقوموا بالواجب اضافة لهذا عندنا الفزع يعني يفزعوا عشان يحصدوا زراعة واحد او حش حواشتو وبرضو في حفر القبور ودفن الموتى وغيرها .. مجتمعنا متماسك جداً.
> مراحلك الدراسية كلها كانت هناك ؟
- ايوه .. قريت الابتدائى في مدرسة البكري ومع ثورة اكتوبر انتهينا من الابتدائية ودخلنا القولد المتوسطة 1965م ودي مدرسة انشأها التيار الوطني ايام الاستعمار وكانت قوية اكاديميا لوجود الداخلية والاساتذة الاكفاء . > ودخلت الثانوي هناك برضو ؟
- جلسنا لامتحان الثانوي سنة 1969م ونحنا منتظرين النتيجة قامت مايو دخلنا مدرسة دنقلا الثانـوية سنة 1970م هسة اسمها دنقلا النموذجية .
> يعني انتقالاتك في المراحل التعليمية مربوطة بالثورات والتغييرات ؟
- والجامعة برضو دخلناها سنة 1973م مع ثورة شعبان وكنا نحنا وقودها ودي كانت علامة في النضال الوطني .
> قريت شنو في جامعة الخرطوم ؟- طب .
> رغبتك ؟
- قراية الطب عموما بتكون رغبة الأهل ، وبالنسبة لي كانت رغبة ابوى .
> ليه الطب ؟
- الاسرة بتدفع اولادها يقروا طب لانو معروف يشتغل شنو لانو الطبيب في القرى شخصية محورية وعندو تقدير عالي جدا لدرجة انهم بسمو عليه اولادهم لكن في القرية ما بتلقي مهندس او محامي او بيطري وصيدلي وكده .. اضافة لي انو الجامعة بتأخذ المجموع الكبير للطب. > يعني الطبيب نجم الحلة ؟
- ايوه .. برضو المعلم ليه مكانتو الكبيرة جدا بعدهم ضابط الجيش وضابط الشرطة.
> ورغبتك انت كانت شنو ؟
- انا شخصياً كنت معجب بوظيفة المعلم لاثره الكبير وبرضو لانه معظم اقربائى معلمين عشان كده اخترت بعد التخرج التدريس في الجامعة .
> اتخرجت من الطب سنة كم ؟
- اتخرجت من طب الاسنان سنة 1978م وقضيت مدة في وزارة الصحة في مستشفيات السودان طفت معظم مدنه ده في سنتين .
> خليتها ؟
- رجعت الجامعة مساعد تدريس شعبة الكيمياء الحيوية لغاية ما مشيت بريطانيا للماجستير في الكيمياء الحيوية .
> رجعت؟
- لا .
> زغت ولا شنو ؟
- «يضحك» لا ياخي بس في الماجستير نلت جائزة احسن طالب لطلاب ما وراء البحار وبي قيمة الجائزة دي درست الدكتوراة في علم امراض المناعة .. وبعدها اشتغلت استاذ في جامعة بروست لغاية سنة 1988م جيت راجع لجامعة الخرطوم وواصلت في شعبة الكيمياء الحيوية وجات الانقاذ.
> ودخلت السياسة في الوقت ده ؟
- لا .. دخلت السياسة من نهايات المرحلة المتوسطة .
> .....................؟
- في صفوف الحركة الاسلامية ودي دخلتني الاتحادات الطلابية في الثانوي وفي الجامعة كنت رئيس رابطة طلاب طب الاسنان وعضو في رابطة طلاب الطب وبره السودان في بريطانيا كنت رئيس اتحاد الطلاب السودانيين في بريطانيا وايرلندا وقبلها كنت سكرتير عام وبعدها رئيس جمعية الطلاب المسلمين غير الناطقين بالانجليزية وبرضو كنت رئيس لاكبر تجمع في اوروبا اسمه الاتحاد الفدرالي للجمعيات الطلابية الاسلامية وده بضم اعداد ضخمة جدا من كل العالم .
> دي مسيرة غنية جدا ً ؟
- ولسة .. اسسنا مع رؤساء الاتحادات الاسلامية اتحاد الجمعيات الاسلامية في اوروبا وده الآن من انشط الاتحادات ونحنا اسسناه في المانيا والآن هو في فرنسا .
> وكانت عندكم انشطة كبيرة ؟
- جدا .. مثلا مشينا سنة 1988م لماليزيا لحضور المؤتمر العام للاتحاد الاسلامي العالمي للمنظمات الطلابية وده اعلى هيئة اسلامية طلابية في العالم .
> مشيت بي ياتو صفة ؟
- ممثل لاتحاد بريطانيا وهناك انتخبوني امين عام للاتحاد واتعرفت فيه على الاخ انور ابراهيم النائب السابق لرئيس وزراء ماليزيا .
> جيت السودان وقامت الانقاذ وانت استاذ كيف دخلت السياسة كممارسة رسمية ؟
- سنة 1991م انشأت مجلس الصداقة الشعبية واستمريت استاذ وفي المجلس لغاية ابريل 1996م اتعينت وزير دولة بوزارة الخارجية .
> وخليت الجامعة ؟
- طبعا بقي صعب التوفيق بيناتهم استمريت وزير دولة لغاية فبراير 1998م بعد استشهاد المشير الزبير محمد صالح تم تعيين الاخ علي عثمان محمد طه نائب للرئيس وهو كان وزير خارجية واتعينت انا في محلو وزير خارجية حتى الآن .
> كدي خلينا في المرحلة قبل التوزير .. شنو ابرز انجازاتك فيها ؟
- مثلا في الاتحاد الاسلامي للمنظمات الطلابية قمنا بترجمة الكتاب الاسلامي بلغات العالم كلها ووزعناه نشرا للوعي والمعرفة الاسلامية 120 لغة حتى اللغات المحلية وده ساهم في الصحوة الإسلامية في اوروبا وامريكا ولو جيت للتدريس في الجامعة انا كنت دائما بقول ومؤمن جدا بأنو الاستاذ يجب ان يكون مع الطلبة اينما كانوا في المدرج او الداخلية والمكتب والمعمل وانو الطالب مفروض يلقاك وقت داير هو ما وقت انت داير بس .
> وكنت بتعمل كده ؟
- ايوه والدليل اني سكنت معاهم في داخلية حسيب وغرفتي فاتحة ليهم طوالي بل بتلقاني معاهم في المكتبة وهم بذاكروا وباكل معاهم في صفرتهم .
> طيب نجي للدبلوماسية .. شنو الفرق بين الدبلوماسية الشعبية ـ مجلس الصداقة الشعبية ـ والدبلوماسية الرسمية ـ وزارة الخارجية ؟
- الفرق كبير .. الشعبية مدخل للتعامل مع الآخرين تتعرف على افكارهم وثقافاتهم .. هنا ما عندك حدود .. لكن في الدبلوماسية الرسمية عندك حدود .. الشعبية فيها حرية تعبير اكثر والدولة ما بتتحمل البنتج عن التعبير ده .. وفي الرسمية لابد تحسب كل كلمة بتقع وين واثرها عاجلاً وآجلاً .
> يعني في مشكلة بين السودان ودولة التعبير يختلف في الشعبية والرسمية ؟
- شوف الحكاية دي انا بشبهها بي نهر ماشي لاقاهو جبل ... لو النهر ده دبلوماسية شعبية بتلف وتدور حول الجبل لغاية ما تتجاوزوا وتواصل سيرها .. اما لو كان النهر ده دبلوماسية رسمية طوالي حيقيف النهر ده ويطرق البوابة الى ان يفتح له ولابد ان تتأكد انو اذا انفتح الباب حيتم استقبالك لانك بتمثل دولة .
> سفر وزير الخارجية .. مزعج لمصطفى عثمان اسماعيل ؟
- لو حسبت ايامي في السفر وايامي في البلد بتلقى ايام السفر ترجح كفة قعادي في السودان .
> عندك قصص اكيد مع السفر الطوالي ده؟
- آخر سفرياتي كنت مع الاخ النائب الاول في نيويورك وطلعت منها لجولة اوروبية ومن هناك لانجمينا عشان احضر القمة وقابلت الرئيس الاخ عمر البشير في مطار انجمينا وبعد السلام قال لي اها متين حتذور السودان (ضحكنا) .. ولاحظ بعد القمة الرئيس رجع وانا واصلت لجنوب افريقيا وغيرها.
> وعمل ليك مشاكل ؟
- مرة امي كانت عيانة في المستشفى والرئيس جاء زارها قامت قالت ليه مصطفى ده اعفوه من السفر خلوهو يقعد في الواطة دي .. قال ليها موافقين بس بي شرط اننا نعرس ليه تاني .. طوالي غيرت رأيها قالت لا لا كان كدي خلوهو في الخارجية. > واكيد هناك مهام عالقة بذهنك ؟
- اكيد .. الصومال مثلا .. ايام أزمته وصلتنا معلومات انو محتاجين لمساعدات انسانية وناداني الرئيس وطلب مني امشي اوصل مساعدات واحاول اصالح المتخاصمين هناك .
> .....................؟
- كان في صراع بين علي مهدي في رئاسة الجمهورية ومحمد فرح عيديد في البرلمان والصراع وصل لمرحلة الحرب .
> وسافرت ؟
- ايوه ومعانا مساعدات ومهندسين لاصلاح الكهرباء والاذاعة .. وصلت المطار والطيار مالقي اي طريقة يتصل بالبرج .. المهم اتشاورنا في اننا ننزل او نرجع .
> ليه ؟
- لانو ما معروف اذا في مسلحين في المطار بضربوا الطيارة لانو مافي وسيلة اتصال توريهم نحنا منو وجايين لشنو .
> والقرار ؟
- شاوروني قلت ليهم ننزل ونتوكل على الله .. وقد كان .
> طبعا لقيتو المطار خلا .؟
- بالعكس لقينا جموع غفيرة جدا ومعاهم وزير التربية استقبلونا وانا مندهش الناس ديل عرفو كيف بي جيتنا دي .
> ولقيت تفسير ؟
- ايوه وانحنا ماشين للرئيس علي مهدي سألت وزير التربية كيف عرفتو اننا جاينكم ؟ قال لي بعد ما ضحك ضحكة كبيرة جداً الحقيقة نحنا ما عارفنكم جايين لكن الصوماليين بتوقعوا اى طيارة نازلة المطار جايبة «قات» ونحنا جينا نستقبل القات .. نزلتو انتو استقبلناكم .. وضحكنا (ونحنا برضو ضحكنا) .
> ونجحت مهمتكم ذي ما قالت الاخبار ؟
- الحمد لله قدرنا نوفق بين علي مهدي وعيديد والمهندسين بتاعننا صلحو الكهرباء والاذاعة وبقينا على السفر ماشين على المطار الجماعة المرافقين لينا راكبين في عربية ورانا الظاهر ظهروا ليهم مسلحين واخدوا منهم كل القروش المعاهم وشنطنا وجوازاتنا وقت وصلنا المطار لقينا ما معانا اى جواز رجعنا ثاني لمقديشو الفندق وجانا مدير الشرطة كان اسمو عبد الرحمن رشيد من الشمال .. قال لينا الجوزارات ممكن نلقاها ليكم وترجع لكن باقي الحاجات ما اظن تتلقي .. فعلا في اليوم الثاني جابو لينا الجوازات ومشينا المطار ولقينا كارثة ثاني .
> وفي كارثة اكبر من دي ؟
- نحكي ليك .. في المطار لقينا الجماعات المسلحة عندها مدافع في المطار ولقينا طيارتنا مليانة صوماليين دايرين يطلعوا من الحرب نزلنا اتصلنا بالشرطة جات نزلتهم اها كل ما الكابتن يجي يطير المسلح يوجه علينا المدفع يقيف يجي صومالي يقول في شنطته في الطيارة واتكرر الموقف ده .. المهم في النهاية سافرنا وبعد ما خلاص طلعنا من الصومال قاموا طلعوا لينا من تحت الشنط حوالي (12) صومالي طبعا بلا جوازات ولا ورقة حتى .
> .....................؟
- كان مفروض نبيت في اثيوبيا عندنا شغل في اديس ابابا فاضطرينا نخلي الاخوة ديل في الطيارة ونمشي نعمل شغلنا ونجي راجعين طوالي وجبناهم معانا الوطن .
> شخصيات توقفت عندها ؟
- حأذكر ليك غير السودانيين .
> جداً ؟
- الاستاذ انور ابراهيم من الاسلاميين النشطين وتقلد عدة مناصب في ماليزيا لغاية نائب الرئيس وساهم في فتح اول تمثيل دبلوماسي لينا في ماليزيا ووقت كان وزير مالية ساعد كثير جدا في اعادة عضويتنا لصندوق النقد الدولي .. ومن الشخصيات عبد الله قول وزير خارجية تركيا وبرضو من اثيوبيا وزير خارجيتها وطبعا عمرو موسي .
> كولن باول ؟
- بالرغم من انو حياتو عسكرية لكنه في التعامل معاه دبلوماسي جدا ويميل للتشاور مع الآخرين ويتعامل تعامل انساني .
> المآخذ عليه شنو ؟
- هو انو عندو ولاء كبير جداً للرئيس بوش .. صحي وزير الخارجية بالضرورة يكون عندو ولاء للرئيـــس لكن تديهو الحقيقة وتوضح وجهة نظرك .
> وده ما حاصل مع باول وبوش ؟
- لا وبالامثلة .. مثلا باول ما كان مقتنع بالحرب ضد العراق وما كان مقتنع بوجود اسلحة دمار شامل فيها لكن وقت لقي نفسو قدام بوش مشى في طريق بوش .. وبرضو ما كان مقتنع بابادة جماعية في دارفور لكن وقت بقي الامر ليهو علاقة بالمنافسة الانتخابية بين بوش وكيري قرر يخدم بوش وقال في ابادة جماعية لكن عموما هو رجل فيه دماثة خلق واحساس انساني واعتقد انو ممكن يساعد من خلال المجال الدبلوماسي او المنظمات الوطنية والدولية.
> أولبرايت ؟
- رغم انها ما عندها علاقة بالعسكرية لكنها اقرب للعمل العسكري في الدبلوماسية جافة جدا وتميل الى الغلظة والحسم وفظة .. ولو قريت كتاب ( 5 سنوات في بيت من زجاج) لبطرس غالي حتعرف كيف كانت اولبرايت متسلطة وهي القادت حملة عزل بطرس ومنعه من الترشح لدورة اخرى في الامم المتحدة بالرغم من اجماع 14 دولة من جملة 15 دولة لكنها نجحت وذهب بطرس غالي .
> احداث في الذاكرة ؟
- اذكر عندما توفي الملك حسين عليه رحمة الله في نفس الزمن اتوفي عمي عليه رحمة الله وعملنا فراش هنا في الخرطوم وثاني يوم اخواني واهلي مشوا البلد للعزاء هناك انا سافرت مع الرئيس لحضور مراسم تشييع الملك حسين في الاردن .. هناك امي سألت اخوي وين مصطفى ؟
قال ليها مشى دفن الملك حسين قالت ليه ؟ مصطفى ما جا يعزي في عمو يسافر للمك حسين!
> قابلت الرئيس الامريكي ؟
- عدة مرات .. مرة في غداء عملتو الجمعية العامة للأمم المتحدة بعد الجلسة الافتتاحية وانا قلت الليلة لازم اقابل كلنتون والوقت داك العلاقات مقطوعة تماما بيننا بعد ضرب مصنع الشفا .. كلنتون والامين العام للامم المتحدة ومعاهم بعض الرؤساء كانوا قاعدين في تربيزة وسط القاعة وبياكلو وانا جنب وزير خارجية الفلبين وانا ما باكل منتظر فرصة .. سألني وزير خارجية الفلبين انت مريض ؟ قلت ليه ايوه عندي صداع .. بمجرد ما شفتهم انتهوا من الاكل مشيت عليهم سلمت عليه وعرفتو بي نفسي قام على حيله وسلم علي بحرارة وقال انو مهتم جدا بالسودان .. اخذنا مع بعض ذي 3 أو 4 دقائق.
> وما انتاقشتوا في مواضيع رسمية ؟
- قلت ليه يا سيادة الرئيس ما اظن اقابلك ثاني عشان كده يا ريت لو تعين لينا مبعوث منكم نتناقش معاه في حل المشاكل البينا دي .. في المساء رسل لي وكيل الخارجية توماس بيكرن ودي كانت بداية الحوار .
> هل كانت في صعوبة انك تقابله ؟
- طبعا .. بعدها قابلني كوفي عنان قال لي يا مصطفى انا مستغرب جدا انو الجماعة بتاعين الـ (FBI) ديل مالين المنطقة كلها وانتو عندهم متهمين انكم ارهابين كيف خلوك تصل كلنتون وانا كنت بتخيلهم حيكسرو عضامك .

الصحافة العدد رقم: 5297
2008-03-18

للتكرار

للتكرار

للتكرار

للتكرار

للتكرار

للتكرار

للتكرار

للتكرار

للتكرار

للتكرار

للتكرار

للتكرار

للتكرار

للتكرار

كأحد أبناء الشعب السودانى العملاق

أطالب هذا الرجل بتقديم إستقالتة فورا مع الأعتذار على وسائل الأعلام للشعب السودانى

ده إذا كان فيه ذرة من الحياء

للأسف تيتاوى على رأس أحدى وسائل الأعلام ولم تسقط إسائتة للشعب السودانى بالتقادم

اذا اتتك مذمة من ناقص

ما مشكلة شحاتين شحاتين قبل وبعد اذا كان ده بيحل في الازمة حاجة او بيقدم شيء

بس المهم هم يمشوا ويخلوا الشعب السوداني في حاله

Quote: بس المهم هم يمشوا ويخلوا الشعب السوداني في حاله

لن أزيد يا مايا...تحية

راشد

Quote: طالب هذا الرجل بتقديم إستقالتة فورا مع الأعتذار على وسائل الأعلام للشعب السودانى ده إذا كان فيه ذرة من الحياء

الأخ الفاضل عبد الحافظ...سلامات....الإعتذار لن يفيد...لا نريد منهم إعتذارآ....علي هذه الحكومة أن تذهب في ستين داهية غير مأسوفآ عليها..

تحياتي

راشد

الحبيب أسعد..سلامات...في الوصلة أدناه مقال للكاتب طارق الحميد...وبالرغم من أنه ليس سوداني فلقد تأذي وإستهجن هذا الأسلوب المتعالي ممن يفترض فيه أن يمثل شعبه بتراثه وتاريخه وسمعته التي يشهد له بها العالم أجمع.....أين الكرامة وأين الإحترام... وأين... وأين....كل يوم تسقط الأقنعة عن هؤلاء المجرمين...إنهم لا يشبهوننا أبدآ....لعنة الله عليهم....أشكر لك رفدك البوست بكل هذه المعلومات....ولك تحياتي ومودتي الأكيدة

طارق الحميد : طائرة البشير و«الشحاتين»


راشد