Post: #1
Title: ماذا يقول السودانين العاديين (اوف لاين) عن البشير والجنائية؟
Author: أحمد أمين
Date: 03-01-2009, 02:59 PM
Parent: #0
؟
|
Post: #2
Title: Re: ماذا يقول السودانين العاديين (اوف لاين) عن البشير والجنائية؟
Author: أحمد أمين
Date: 03-01-2009, 03:01 PM
Parent: #1
هذه (عينة عشوائية ) من تعليقات حقيقية اخذت من ناس عاديين ليس لديهم سلطة او جاه او لقب، تمت فى ونسات عابره، لكنهم يمثلون شرائح واسعه فى المجتمع، اصواتهم لا تعكسها اجهزة الاعلام الرسمية او حتى الغير رسمية (المراقبة). غالبية من فى هذه العينه يبدو انهم بشكل او اخر يؤيدون قرار المحكمة الجنائية بتوقيف الرئيس عمر البشير، لكن هناك تخوف واضح من المجهول. يبدو ان الغالبية ايضا تهمهم قضاياهم المعيشية اليومية ولايهمهم مصير الرئيس، ويتمنون أن لا يؤثر مثل هذا القرار عليهم.
هناك اليائس و المغبون، والذى طاش صوابه، والمطحون بمختلف الات السلطة الحاكمة (المحلية، المعتمدية، ناس الحركة، النفايات..............الخ) ويعتقد ان قرار المحكمة مخرج له، هناك من يريد ان يفش غبينته، هناك من ينشد العدالة للمظلوم، هناك من يتحسر على الماضى، وهناك من يهدد بالفوضى والقتل، هناك من يقف ضد المحكمة لأنه لايصدق ان مايحدث فى دارفور حقيقة بل هو خيال منسوج.
|
Post: #3
Title: Re: ماذا يقول السودانين العاديين (اوف لاين) عن البشير والجنائية؟
Author: أحمد أمين
Date: 03-01-2009, 03:03 PM
Parent: #2
مواطن زهجان جدا
يازول خليهو يمشى يركب طيارتوا و يسلم نفسو للاهى بلا كلام فارغ بلا عواليق.
سواق امجاد:
تعرف ديل كرهونا العيشة خليهم كلهم يروحوا فى ستين داهية
ست شاى:
انشاء الله اوكامبو يجى يكشهم كلهم يريحنا من كشة ناس المحلية دى
|
Post: #4
Title: Re: ماذا يقول السودانين العاديين (اوف لاين) عن البشير والجنائية؟
Author: أحمد أمين
Date: 03-01-2009, 03:05 PM
Parent: #3
راعى فى الخلا:
تعرف قالوليك ابوكمبو (يقصد اوكامبو) ده حيجى يخطف البشير كف من الخرطوم ويمشى
اه ه زوول زولك امانه ماوقع وقع شينه خلاص
بائع خضار:
انشاء الله يشيلوهم كلهم كرهونا العيشة
محامية مفلسة
ياخوى انا عندى شنو بخاف عليهو
لا عمارة ولا رصيد فى بنك
يستاهلوا البيحصل ليهم ده كله عذبوا الناس
|
Post: #5
Title: Re: ماذا يقول السودانين العاديين (اوف لاين) عن البشير والجنائية؟
Author: أحمد أمين
Date: 03-01-2009, 03:07 PM
Parent: #4
جزار
والله البلد دى اتشقلب حالها من يوم ما مسكوا الحكم عارفة المنطقة دى كانت بيوت ناس معروفين ونضيفة جدا عربات النظافة كانت بتغسل الشوارع الناس كانت عايشة، هو السووا فى البلد شوية خليك من دارفور البعيدة دى هنا دة فى محلنا القاعدين فيه ده السووا فيها حقوا يعاقبوهم عليه.
سواق امجاد (2):
والله الزبائن ما لاقنهم طفشوا مره واحده
ياخى اوكامبو ده جهجه الناس كلهم
ياخى خلى يجو يسوقوه (يقصد البشير)
و يخلونا نشتغل
|
Post: #6
Title: Re: ماذا يقول السودانين العاديين (اوف لاين) عن البشير والجنائية؟
Author: أحمد أمين
Date: 03-01-2009, 03:09 PM
Parent: #5
بائع رصيد موبايل:
ياخى البشير مستهدف من الغرب وانا واقف معاهو
انا ماعارف هم (ناس الحكومة) عملوا شنو فى دارفور
ماقادر اصدق الكلام البيقولوا الناس ده حصل
عسكرى بوليس
خلى يسوقوه ياخى نحن استفدنا منهم شنو ومهيتنا كم، نصنا بقى محتال والتانيين حرامية عديل كده.
|
Post: #7
Title: Re: ماذا يقول السودانين العاديين (اوف لاين) عن البشير والجنائية؟
Author: أحمد أمين
Date: 03-01-2009, 03:10 PM
Parent: #6
بتاع مؤتمر وطنى مهمش
نحن قاعدين معاهم خوف وعشان نأكل عيش بصراحة
خلى يجو يقبضو يريحونا منهم
مواطن (افقده واقع الحال توازنه)
يردد لوحده: الجنائية تنفع، اوكامبو ياخى.....................
عامل نظافة
تعرف الناس المسخنين (يقصد الفقراء والمعدمين) كلهم مع القرار ده
انا ذاتى مبسوط من اوكامبو
|
Post: #8
Title: Re: ماذا يقول السودانين العاديين (اوف لاين) عن البشير والجنائية؟
Author: أحمد أمين
Date: 03-01-2009, 03:32 PM
Parent: #7
بتاع ركشة
تعرف اليومين دى دخل مافى كله كله
ماعارف السبب شنو
زمان كنت فى اليوم بطلع ب 70 الى 75 جنيه
اليومين دى لو عملت 30 جنيه فى اليوم بكون محظوظ
فنى الكترونيات
مؤيد كلام المحكمة دى (الجنائية يقصد) سمح شديد
بصراحة جد انا كانسان دارفورى
نحن ظلمنا فى السودان
ونحن يجب ان يكون لينا حقوق زى باقى الناس
الناس البسطاء الزينا كده يؤيد هذا القرار
بائع ملابس فى السوق
حصلينا ظلم شديد ياخى
لا تعليم لا صحة ولا اى خدمات
انا موافق تمام على القرار
صاحب طبلية سجائر
انا فى رأى قرار المحكمة ده تمام
مؤيد القرار
|
Post: #9
Title: Re: ماذا يقول السودانين العاديين (اوف لاين) عن البشير والجنائية؟
Author: أحمد أمين
Date: 03-01-2009, 03:36 PM
Parent: #8
انصارى (حضر مؤتمر حزب الامة)
ياخى تحت تحت كده الناس دى كلها مؤيده القرار
لكن السيد (يقصد الصادق المهدى) بيلعب سياسة معاهم
طبيب اسنان
تعرف اليومين دى مافى زبائن
الحاصل شنو انا ماعارف؟
عامل بناء
ياخى انا مع القرار ده
عايز ناس المحكمة ينفذوه
لكن مايبقى قرارساكت غير منفذ
لأنه ديل (الحكومة) حيعذبوا الناس لو القصة دى طالت
موظفة (مهددة بالفصل نتيجة للخصصة)
والله انحنا متظرين يوم الاربعاء ده بفارغ الصبر
يمكن تفرج علينا
|
Post: #10
Title: Re: ماذا يقول السودانين العاديين (اوف لاين) عن البشير والجنائية؟
Author: أحمد أمين
Date: 03-01-2009, 03:38 PM
Parent: #9
مواطن- مؤيد للمؤتمر وطنى
والله نجوطه جوطه
خليهم يصدروا القرار ده ساكت
ياخى عملنا كله شئ اتفاقيات سلام الخ
مانفع....
مزارع من دارفور
اى انسان ارتكب جريمة فى حق دارفور يجب ان يتلقى عقابه
ده رأى
عامل مصنع
انا ماراضى بقرار المحكمه الجنائية
افتكر حيضر البلد
ربة منزل
بس خايفين من البيحصل
لكن هم (ناس الحكومة) يستاهلوا من العملوا فى الشعب ده
سمسار (فى سوق الله اكبر)
يازول والله السوق واقف تب
ياخى قرش واحد حايم مافى
ناس كان عندهم قروش والله الليلة متجرسين
ديل يفوتوا وين يخلوا الراحات العايشين فيها دى
نتعب انحنا بس
|
Post: #11
Title: Re: ماذا يقول السودانين العاديين (اوف لاين) عن البشير والجنائية؟
Author: أحمد أمين
Date: 03-01-2009, 03:41 PM
Parent: #10
سيدة اعمال
اى شئ واقف فى السوق اليومين دى
ياخى الليلة سعر الدولا وصل 2.55 جنيه
بيكونوا عملوها (ناس الحكومات) شكلوا شركات جديدة كواجهات جديدة تحسبا للقرار
وعملوا تسويات لناسهم نضفوا البلد من الدولارات
والله الناس قاعده تتفرج منتظره البيحصل شنو
يعنى توجس من المجهول
|
Post: #12
Title: Re: ماذا يقول السودانين العاديين (اوف لاين) عن البشير والجنائية؟
Author: أحمد أمين
Date: 03-02-2009, 10:46 AM
Parent: #11
عامل يومية
انا راى انه يحكمه طوالى
لانه دارفور مستهدف
هو القائد الذى امر بذلك
مزارع
عمر البشير يتحاكم لانو الناس فى دارفور ماتو كتير خلاص
طباخ
انحنا اهلنا ماتوا
الزول ده لازم ده يمشى امام المحكمة
عامل بناء
يمشى طوالى يسلم نفسه
الناس ديل كتلوا الناس
|
Post: #13
Title: Re: ماذا يقول السودانين العاديين (اوف لاين) عن البشير والجنائية؟
Author: Safia Mohamed
Date: 03-02-2009, 11:18 AM
Parent: #12
أستاذ احمد
سلام
شكرا ليك عكست لينا آراء او نبض الشارع
متبعا منهجية علمية
ولم تدعي التعميم بل عكست كل الاراء السلبية والايجابية
هاك دي شوية ونسة من نسوان الحلة
والله غايتو قالو يا انتي البلد حتجوط
ليه في شنو
ما البشير (انشاء الله يطير)
مالو
اجي انتي قاعدة وين ياختي لا بتشمعي رادي لا تلفزيون لا وليداتك ساي جابو ليك سيرة
ما قالو البشير سايقنه هناك في لندن
لندن شنو يا ماما
دي اسمها المحكمة الدولية
انا بعرفو يا بتي
ما ياهن كلهن خواجات
اجي هو كدي
عاد شاحدة ربي وسيدي علي
يطيره زي ما كتلو وليداتنا
يطيرو زي ما طفش الباقين
لعنة ...
المد لله على كل حال
لكن كان البلد حتجوط نقبل وين
جوطة البلد ما بندورها لكن
الله في
واحد ما عنده علاقة بالسياسة- مواطن عادي:
البشير نتفق او نختلف معه هو رمز السيادة الوطنية واي مساس بيه هو مساس لقدسية وتراب الوطن
,سياسي آخر
البشير مجرم ما فيها اتنين تلاتة لكن يتحاكم داخليا لن نسلمه للأجنبي لمحاكمته
ومواطن عادي اتخرج من الجامعة من سنة 1997 وقاعد عاطل
يطير هو وغيره كان كرهونا البلد
فيبدو ان المواقف تتشكل بناءا على التجارب الذاتية
فكل من عانى من مشكلة ذاتية موقفه كان سلبيا والعكس صحيح
يعني برضو بنلف وبندور حول شخصنة الاشياء
ودي لانه يوجد تعتيم اعلامي
الناس ما ممتلكة الحقايق وبالتالي بتبني آراءها وفق ما ترى او تعايش
تحياتي
صفية
|
Post: #14
Title: Re: ماذا يقول السودانين العاديين (اوف لاين) عن البشير والجنائية؟
Author: أحمد أمين
Date: 03-02-2009, 12:39 PM
Parent: #13
شكرا صفية
بالله كترى من نبض الشارع
انا من البشير اقرا الكلام ده لأنه هى الحقيقة الفى الشارع- وهم معزولين من الناس بيسمعوا (التطبيل، والتهليل
- وناس البلع- وده مابفيد فى لحظات حرجه زى دى)
واى واحد قاعد فى السودان بس يمرق فى الشارع ( وعشاوائيا) يتكلم مع الناس غالبا ما تلقى دى ردود فعلهم
|
Post: #15
Title: Re: ماذا يقول السودانين العاديين (اوف لاين) عن البشير والجنائية؟
Author: أحمد أمين
Date: 03-02-2009, 12:42 PM
Parent: #14
عسكرى بالمعاش
بالنسبة لقرار المحكمة الخاص بدارفور هم السبب وكتلوا ابرياء كتار
وانا من كردفان اصلا لكن بفتكر دى غلطة كبيرة و اى انسان مجرم لازم يتعاقب
ياخى انا حكليك الجيش السودانى ده جرائمه كتيره انا اشتغلت فيه لغاية ما وصلت درجة رقيب
فى سنة 97 فى منطقة امبيلى فى بحر الغزال، والدنيا رمضان هاجمنا القرية لكن لقينا سكانها مسلمين
بيفطروا فى رمضان، الملازم قائد الفرقة اصر على الهجوم على الناس ديل اهى دى كان شكل الاوامر
مافى فرق بين مدنين او متمردين مسلمين او غير مسلمين.
فى سنة 98 شرق الاستوائية فى منطقة جبل ملح جاتنا اوامر نحرر المنطقة، لكن ايضا كان فى معسكرات نازحيين حول المنطقة، ابراهيم شمس الدين ده طبعا كان دموى- انا شفته صفنا ناس قدامنا، قال لينا عايزكم تمسحوا المنطقة دى، ياخى ناس كتار ابراياء ماتوا. دى ياها جرائمهم من زمان
تعرف الحكومة اليومين دى بتجهز فى قوات اسمها "الحمى النازفة" يدوك مرتب 3مليون فى الشهر، ومرتب شهرين مقدم وطوالى يسفروك دارفور.
|
Post: #16
Title: Re: ماذا يقول السودانين العاديين (اوف لاين) عن البشير والجنائية؟
Author: جعفر محي الدين
Date: 03-02-2009, 12:56 PM
Parent: #15
| Quote: تعرف الحكومة اليومين دى بتجهز فى قوات اسمها "الحمى النازفة" يدوك مرتب 3مليون فى الشهر، ومرتب شهرين مقدم وطوالى يسفروك دارفور. |
دا كلام خطير نتمنى أن لا تستمر الحكومة في عنجهيتها هذه
|
Post: #17
Title: Re: ماذا يقول السودانين العاديين (اوف لاين) عن البشير والجنائية؟
Author: عبدالأله زمراوي
Date: 03-02-2009, 02:46 PM
Parent: #16
أ. أحمد أمين...
هذا من واقع الحال والحال يغني عن السؤال في بلد المحال...
نتابع كلماتك التي تمشي بين الناس على قدمين..!
|
Post: #18
Title: Re: ماذا يقول السودانين العاديين (اوف لاين) عن البشير والجنائية؟
Author: Mahjob Abdalla
Date: 03-02-2009, 07:00 PM
*
|
Post: #19
Title: Re: ماذا يقول السودانين العاديين (اوف لاين) عن البشير والجنائية؟
Author: انور التكينة
Date: 03-02-2009, 10:11 PM
Parent: #18
| Quote: والله البلد دى اتشقلب حالها من يوم ما مسكوا الحكم (عارفة )المنطقة دى كانت بيوت ناس معروفين ونضيفة جدا عربات النظافة كانت بتغسل الشوارع |
احمد امين .......انت مؤنث و لا مذكر ؟؟؟؟؟
القصة فيها شك
|
Post: #21
Title: Re: ماذا يقول السودانين العاديين (اوف لاين) عن البشير والجنائية؟
Author: محمد على طه الملك
Date: 03-02-2009, 10:41 PM
Parent: #20
الأخ احمد سلامات ..
الملاحظ إن الشكوى من الركود بدأت من حسع ..
وما معروف الحال بكون كيف بعد سته أشهر من القرار؟
|
|