نقاش حول حلقة صلاح ادريس في هارموني

قبيلة سودانيزاون لاين
تحياتي
هذه دعوة لفتح هذا الموضوع مرة أخري لنقاشة من زاوية تانية
سأعود

هلا و مرحبا
سيد الشئ زاتا

الاخ/معتصم الجعيلي

تحياتي ؛؛؛

مرحب بيك في سودانيزاونلاين.


بعيدا عن موضوع البوست :

أخي معتصم التكرار في قناة هارموني مضر جدا ؛ويفقدها حيويتها

عليكم بالطازج .

يعني يمكن اعادة الحلقات في فترات متباعدة.

بشير أحمد

سلام

نعم التكرار كثير ولكن تكلفة إنتاج البرامج مكلفة بشكل لا يمكن ان تتصوره !


عامة نسعى للتطوير وعدم الاعادة في القريب باذن الله

يا استاذ

سؤالين صغيرونات

اول حاجة في الحلقة صلاح ادريس كان بيحرك يدو كتير جدا لتسريح شعره مش مفروض المخرج ينبهوا للحته دي سالت السؤال ده لي نادية عملت طنااااش ولا عشان الراجل عندو قروش مافي زول بيسعلو
بعدين السؤال بتاع جبت القروش دي من وين مافي ليها داعي لانو الاجابة ما ح تكون حقيقية
تاني حاجة واحد اريتري قال لي انا الحته المزعلاني من هارموني شعارها قناة هارموني لكل السودانيين

طيب نحن عشان حبش ولا شنو عشنا في السودان وبنحب السودان وبنتابع اخبارو وقنواتو قال لي ممكن يعملوها قناة كل الناس الحلوين .




تحياتي

زاتوووو

الزول زاتو سلام


ونحنا بنحب الحبش ونعتبرهم أخوانا السودانيين عشان كده مافرقت شعارنا يكون قناة كل السودانيين ولا كل الأحباش لاننا اخوان ولا شنو ؟


أهلا بهم مشاهدين أعزاء لهارموني

الأخ عثمان رغيم

اهلا بيك وشكرا على الترحيب الطيب

معتصم

شخصي الضعيف من المعجبين بقناة هارموني....وبالزول المرسوم القاعد يجي يدوبي فيها داك

وبصلاح ادريس

وبنجاة غرزة

وبنعلات صلاح بن البادية

وعمة كل من ترباس والقلع عبد الحفيظ

وسُكسك حمادة بت

وقرد ندى القلعة

ورقبة محمود عبد العزيز

وعكاز حوا الطقطاقة

وحنة سمية حسن

واخيرا وليس اخرا.... معجب بالعراقي حقي الاشتريتو بعشرة تلاف من السوق الشعبي!

الرجل الفنان معتصم الجعيلي


يا اخي والله كان اجلت عودتك دي شوية...

ناس المنبر ديل روحهم محرقاهم واحدين من الغربة وواحدين من الفلس
وواحدين من حريمهم الفي الغربة...وواحدين من البشير وواحدين من خليل

وواحدين عاملين فيها مناضلين اكتر من نضال ابو نضال...وواحدين
وواحدين اتعولموا...ديل كان قلبت ليهم هارموني دي (ثعلب) حا يقولوا
ليك ...ليش ما لبست المذيع داك حمالات...


انا وناس بيتنا غير قناتكم دي ما عندنا شغلة
نحارسها الجمعة من الصباح لي المساء..
والعجب التلات بنات اللابسات تياب ومقنعات

يا اخي فعلا نقلت لنا ثقافات سودانية كنا نجهلها وذلك وحده في نظري يكفي

أما موضوع صلاح ادريس دا ...فالامر لا يخلو من حسادة...سائر اهل السودان

وجدودهم بنو حاسد من اليمن كما قال الامام الصادق ربي يرضي عليه

نزار حسين

أشكرك
وانا زاتي كتير روحي بتكون محرقاني والاسباب كتيرة
حأحاول اعمل هارموني دي ثعلب ونشوف
تحياتي ليك ولي ناس البيت

Quote: وسُكسك حمادة بت وقرد ندى القلعة ورقبة محمود عبد العزيز

يعني مشيتو وجيتو لي بوستى القبييييييييييييييييييييييل

الرجل الظريف سجيمان

سلامات

ويسعدني ان تجد في هارموني ماتحبه وهارموني من أجلكم جاءت وبكم ستواصل جهودها باذن الله

قبال تعود يا معتصم .. الحلقة اتأجل بثها المدة الطويلة دي ليه.

ملاسي
الحلقة إتأجلت لصعوبة مونتاجها
فالضيف يطلع من سؤال ويدخل في تراك تاني وحتي ضبط الموضوع والعودة لتراك السؤاال ... دة موضوع براه
علي كل زمنها الحقيقي ٣ ساعات ونص

(*)

مرحباً بك اخي (معتصم) ..
وأرجو أن يكون الحوار (موضوعياً) و(منهجياً)
بعيداً عن (الإنطباع) والحكم على الأمر من منطلق موقف (صاحب الرأي )
من (صلاح إدريس) نفسه ..!!
وأرجو أن يبتدر وفي ذهننا الآتي:
ماهو دور (هارموني) و(منافذ الإعلام ) عموماً حين تستضيف أحدهم ؟
هل تقديم (الشخص) كماهو ..؟
أم تقديمه كما يحب المشاهد أن يراه (الكاره له يريد له أن يمثل به)
و(المحب يريد أنه يراه ملمعاً ومتماسكاً ومسكتاً لكارهيه)..
أم كما يحب هو أن يرى نفسه (أي بإعتبار القناة كوسيط علاقات عامة) ..

؟سأرفعه في إنتظار هذا السجال ..
وسأعود ..
محبتي ..

من أجل هارموني
القناة التي نتوقع منها الكثير..
هي فعلاً نافذة يطل منها السودان على العالم
كبلد يزيده تنوعه الثقافي قوة وليس العكس!

شكراً معتصم وربنا يوفقك..

وإذا كان لا بد من التكرار (لشح المادة مثلاً
بالنسبة لقناة جديدة) يفضّل أن تكون المادة
المكررة مادة تعريفية بالسودان..يعني مثلاً
معلومات من وقت لآخر عن قبيلة من القبائل
دون الحاجة لانتقال الكاميرا إلى موقع القبيلة..
يعني شوية موسيقى مع بعض المواد من الأرشيف
ممكن تؤدي الغرض..وشوية شوية ومشوار الميل يبدأ
بخطوة!

تحياتي
الزاكي

مرحبا معتصم الجعيلي

وبما انك مبدع بلا شك ستكون سندا لاهل الابداع ,,,

اما النقاش حول السهره فما اظن تبقي شئ ليتم التداول حوله ,,

حبابك بين بورداب الخرطوم ,,,

Quote: نقاش حول حلقة صلاح ادريس في هارموني

فقط للتذكير حتى لا يتحول الأمر إلى محاكمة (هارموني)
وتقييمها ..

الأخ الأستاذ معتصم الجعيلي...

أولا :التهنئة الخالصة (وإن جاءت متأخرة) بولوج هارموني عالم الفضاء لتكون منارة للمعرفة..
ثانيا: أنت فنان ولا تحتاج من أحدنا أن يريك ما أنت فاعل بهذه القناة.
ثالثا: أتمنى من كل قلبي أن تكون هذه القناة صوتا للسودانيين جميعا شمالا وجنوبا وشرقا وغربا ولا تكون بوقا
للنظام الحاكم الذي يحتكر لنفسه كل أدوات الإعلام من صحافة وتلفزيون ومسرح ...الخ
رابعا: لماذا لا تكون القناة صوتا للحق، مثلا تستضيف قادة المعارضة والحكومة
في مناظرات مفتوحة، تُفتح فيها الهواتف ليتحدث الناس بحرية، أم أن سياسات القناة مكرسة
لغير السياسة، الرياضة والغناء مثلا.
خامسا: لاحظت أن قناة هارموني بدأت تقترب من تلك القنوات العربية التي تغني وترقص 24 ساعة،
أليست هنالك برامج جادة تصب في مصلحة الوطن والمواطن؟ أين التحقيقات القوية الجادة؟
سادسا: الكتابات التي تظهر على أسفل الشاشة، أقل ما يُقال عنها، إنها تفتقر للموضوعية
ولغتها ركيكة وأغلبها هلال/مريخ وكأنما أُختزلت مشاكلنا في هذه الكرة المتدهورة البئيسة!
سابعا: لماذا لا تقدم قناة هارموني برامج ثقافية تستضيف فيها المبدعين الجادين من فنانين
وملحنين وشعراء وكتّاب قصص قصيرة وروائيين وتخصص كل أسبوع حلقة لمدة ساعة حتى تحرك البحيرة
الساكنة فينا وتكون قناة هارموني فعلا أداتنا الثقافية الفاعلة في ظل إحتكار النظام لكل أدوات
الثقافة.

سيدي...
تدفقت هذه النقاط مني لمحبتي لهذه القناة الوليدة، والتي لا نشك إطلاقا بريادتها وإستقلاليتها، عكس
قناة الشروق، سفيرة النظام الحاكم وعينه التى ترى وأذنه التي تسمع، تلك القناة الباهتة التي تزين
للحكومة الباطل حقا والحق باطلا على خطى القناة المختطفة (السودانية) وساهور ...!

لا بد من تثوير العمل في قناة هارموني حتى تصير قناة من لا قناة له وصوت من لا صوت له ووطن من
لا وطن له لتصل كل الدنيا من أقصاها الى أقصاها وعفوا إن طالت مداخلتي...

وشكرا..

الاستاذ عبد الاله زمراوي
تحياتي
اشكرك علي التهنئه
هارموني هي صوت السودانيين كلهم شمالا وجنوبا وشرقا وغربا
بالنسبة لاسضافة الحكوميين والمعارضيين.. هذا ليس طرح القناة..
هارموني تمارس السياسة علي طريقتها الخاصة مستندة علي كل السودانيين .. وهي وحدوية وداعية سلام
اقتراح المناظرات .. جيد ولكن لابد من رؤية لعرضة بشكل لايدخلنا في التأويلات
أعود .. واقول هارموني قناة منوعات إجتماعية ثقافية فنية و... رياضية انشا الله

بخصوص البرامج الجادة لمصلحة الوطن والمواطن
هل رايت هارموني قريبا.. فيها هذه البرامج
تابع كل جمعة برنامج افتح الصفحة
اما الشريط الذي يحوي الرسائل ف..
هارموني غير مدعومة وتقاتل بشدة من اجل البقاء.. وهذا الشريط هو شريانها الذي يساعدها علي البقاء وكتابات هلال مريخ هي البلسم الذي يضخ في شرايينها
فالمعادلة صعبة.. والتكلفة عالية ولابد من البقاء او نتحول الي تاريخ كان وشاشة سوداء تنتحب.
هارموني مفتوحة للجميع والمبدعين الجادين من فنانيين وملحنيين وشعراء
مع تحياتي

هارموني بوابة مفتوحة للابداع

الصديق العوض المسلمي

شكرا لكلامك الطيب وترحيبك الجميل

ويسعدني أن أكون من بورداب الخرطوم ويسعدني أكثر أن أكون زميلا للجميع في هذا الصرح الشامخ سودانيز أون لاين

الاخ الزاكي
التكرار
والله سببة ،، قلة المواد والانتاج المكلف
لكن نحن نجتهد واقتراحك دة ممتاز وحتشوفه
ومشوار الميل صاح
لك شكري

الاخو التداخلين
ابدأ بك صديقي كمال
ولما فتحت الموضوع دة هو استنادا علي مكالمتنا في بداية هذه الحلقة
ووجهة نظري كالاتي

اولا نحن لاندافع عن صلاح ادريس.. وكما ذكر هو فانه شخص عام يثير مايثيرة في تصريحاته
غالبية من لم يعجبهم اللقاء،، تجد انهم كانو يتوقعون صلاح ادريس رئيس نادي الهلال... وهذا الرئيس لم يكن هو هدف السهرة
هدفنا هو صلاح ادريس الآخر... الفنان الملحن الصحفي.. بتاع كله
الاهم..
قناة هارموني ارادت ان تعرض صلاح ادريس كما هو... كيف يفكر .. كيف يجاوب . كيف يري نفسه... كيف يري الاخرون
ليس دورنا تحسين او تشويه الشخص.. بل هي محاولة اولي لصناعة تلفزيون الواقع علي الطريقة السودانية ..وضمن المغامرة والفكرة الكبيرة في نظري الإسمها هارموني
المريخاب شامتين
الهلالاب زعلانين
الاخرون .. توقعو شئ واتاهم شئ اخر
..اوكي
ننظر الي الجزء الاخر من الصورة
ظهر صلاح ادريس وهو يغني!!!
ظهر وهو يلحن!!
تحدث عن رأية في الاسهام مع البسطاء
ظهر صلاح ادريس السعودي
دة.. كلو ما كفاية
والا .. لماذا تحدثت الصحف والمنتديات وثارت كل هذه الضجة

كل هذه الضجة هي ما تريده هارموني .. ان نطرح مواضيع تثير النقاش وتحرك الراكد

نأتي الي نادية مختار
هذه الرائعة التي لاتكل ولاتمل من العمل والبحث عن النجاح..
النقد لها مفيد ويغذيها بمزيد من النجاح.. هي ليست اوبرا وينفري .. لكن نديها فرصة وستجدوا نادية أخري نتفخر بها جميعا
دي حتة ونواصل

.

Quote: الاخو التداخلين ابدأ بك صديقي كمال ولما فتحت الموضوع دة هو استنادا علي مكالمتنا في بداية هذه الحلقة ووجهة نظري كالاتي اولا نحن لاندافع عن صلاح ادريس.. وكما ذكر هو فانه شخص عام يثير مايثيرة في تصريحاته غالبية من لم يعجبهم اللقاء،، تجد انهم كانو يتوقعون صلاح ادريس رئيس نادي الهلال... وهذا الرئيس لم يكن هو هدف السهرة هدفنا هو صلاح ادريس الآخر... الفنان الملحن الصحفي.. بتاع كله الاهم.. قناة هارموني ارادت ان تعرض صلاح ادريس كما هو... كيف يفكر .. كيف يجاوب . كيف يري نفسه... كيف يري الاخرون ليس دورنا تحسين او تشويه الشخص.. بل هي محاولة اولي لصناعة تلفزيون الواقع علي الطريقة السودانية ..وضمن المغامرة والفكرة الكبيرة في نظري الإسمها هارموني المريخاب شامتين الهلالاب زعلانين الاخرون .. توقعو شئ واتاهم شئ اخر ..اوكي ننظر الي الجزء الاخر من الصورة ظهر صلاح ادريس وهو يغني!!! ظهر وهو يلحن!! تحدث عن رأية في الاسهام مع البسطاء ظهر صلاح ادريس السعودي دة.. كلو ما كفاية والا .. لماذا تحدثت الصحف والمنتديات وثارت كل هذه الضجة كل هذه الضجة هي ما تريده هارموني .. ان نطرح مواضيع تثير النقاش وتحرك الراكد نأتي الي نادية مختار هذه الرائعة التي لاتكل ولاتمل من العمل والبحث عن النجاح.. النقد لها مفيد ويغذيها بمزيد من النجاح.. هي ليست اوبرا وينفري .. لكن نديها فرصة وستجدوا نادية أخري نتفخر بها جميعا دي حتة ونواصل

الاستاذ معتصم

مع احترامى لشخصك الكريم ليس موضوع خلافنا صلاح ادريس فهو الضيف على القناة نحن خلافنا كانت على طريقة الاعداد والتقديم
كانت ضعيفة جداً وانا متاكد ان سبب حجب اللقاء كل هذة الفترة كان لنفس السبب فيا استاذي الزمن الان زمن محترفين وليس للهاويين
فكان من الاجدر بكم ان يكون هناك اعداد جيد وتدريب جيد للمذيعين فانتم لا تمثلون انفسكم وانما تمسلون السودان لذا يجب التانى والتاكد من جودة العمل قبل بثة
على اي حال الناس كلها مستاءة ما عدا الناس العايزة تجامل اللقاء كان ضعيف وصلاح ادريس لم يجد من يحد من استفزازاتة وطريقة اجوبتة
الاخت المذيعة بحاجة لدورات مكثفة في التقديم والاعداد وطريقة المخاطبة التلفزيونية
مع محبتي

العزيز الأخ معتصم

يا مليون مرحب بك

والله مشتاقين اطنان اخبارك

الفترة طالت كانت ايام جميلة وجميلة جدا

تحياتي لك واسرتك الكريمة

مرحب بيك يا سيد الشي زااتا

لكن استفهامات كثيرة حول الحلقة المعنية ونقاش سيكون مطول

فقط رحابة الصدر والبال الطويل لانو بيجوك ناس ويناقشوك من الوان الطيف الكروي المختلف بحكم اتجاه الضيف ولونو الازرق(أقصد أبو الهل)

مرحب الأستاذ/ معتصم الجعيلي

نحن في إنتظارك
لدينا إستفسارات بالكوم عن قناة هارموني ومقترحات مطر
بس شرفنا

مع تحياتي

الاستاذ الجعيلي

لاحظت:
1) الجلسة كانت في منزل غالبا منزل صلاح ادريس و الاضاءة ليست علي مايرام و كذلك الصوت. و الصوت عموما مشكلة في هارموني سواء كان في منزل صلاح ادريس او تسجيل في فندق.
2) الحوار كان جيدا و مقدمة البرنامج انطلقت من موقع الندية و طرقت اكثر من موضوع يشغل بال الكثيرين.
3) مشاركة الفنان سيف الجامعة كانت ضعيفة و متأثرة بصلاح ادريس و امواله. لا انس لحظة اصرار سيف الجامعة ان يرد علي ما قالته نادية عثمان علي لسان فنانة لم تذكر اسمها ان صلاح ادريس يلاحقها و هي (الفنانة) لن تغني له مهما فعل. انظلق سيف الجامعة في اصرار عجيب محاولا الرد و صلاح ادريس يقول له له لماذا ترد انت. اعتقد ان هذه اللحظات كان لا بد تقطع من الحلفة. و كان لا بد من تنبيه سيف الجامعة.


بصورة عامة: احيانا كثيرة لا تظهر الكتابة التي توضح اسم فنان او ضيف و السبب ان السطرين التحت في الشاشة يحجبوا هذه الكتابة.
رجاء اغاني الفنان سيدي دوشكا.

التحية للجميع والشكر للاخ معتصم الجعيلي على هذه المبادرة غير المسبوقة !!!أتمنى لو تكون الخطوة متبوعة بخطوات اكبر وليتها تكون الانموذج لخطوات من آخرين في مواقع مسؤولية اخرى ليآتوا بأنفسهم لنفتح حوار مباشر مهم .بناءاً عليه أعتقد أن نكون بذات حماسة الرجل ونضع الاسئلة في قالب المطلوب تحديدا وهو فتح حوار مرة اخرى في حلقة صلاح ادريس ونستأذن الرجل لحوار شامل حول هارموني علنا نضيف لها فالكثير يحتاج الى حوار ومن ضمه الملاحظة المتفق عليها والتي جاءت تحت اسم الزميل والصديق بشير احمد حول التكرار المنفر.
عموما اعتقد أن حلقة صلاح ادريس وجدت تقدمة اعلانية كبيرة لذلك لم تأتي كما توقعناها جراء تكثيف الدعاية للحلقة ثم حجبها ثم بثها كدا فجأة ؟؟؟ لذلك طُرحت الاسئلة وكان الاهتمام المبالغ بها أعتقد ان الضيف وو رجل الاعمال الكبير صلاح ادريس قد انتزع من الاستاذة الزميلة نادية عثمان انتزع منها فاعلية كثير من الاسئلة واعاد صياغتهاواجاب في حدود ما يوده هو وكذلك تهرب من كثير من الاجابات المباشرة ... لعل الحلقة هي دردشة كانت اكثر منها حلقة حوارية تغوص في اعماق هذه الشخصية المحاطة بكثير من الغموض حول الثراء والاهمامات المتباينة لصلاح ادريس الفنان الملحن المهتم بالرياضة ورجل الاعمال والصحافي وربما هذه الاسئلة الاجدر بالاجابة عليها صلاح ادريس بنفسه لكن سؤالي لهارموني وللاستاذ الجعيلي هل تعتقد ان الحلقة كانت بمستوى ما سبقها من ضجة اعلامية وهل غطيتم كامل جوانب شخصية مثيرة للجدل في كل المحاور والانشطة كصلاح ادريس ؟؟؟؟؟.




......................................................................................حجر.

ياشباب انا ما مؤمن بحكاية شخص مشهور
يجى يتحاور معنا...غير ناسنا القدام
امثال موصلى وتماضر الكتيابى وبقية اهل زمن البورد الجميل

معتصم الجعيلى,,,مزمل ابو القاسم
ومن لف لفهم ...ديل شغالين بقصة اضرب واهرب,,,

البورد داير ناس فايقين...دوامهم على النت
او ناس كايسين الشهرة,,,,زي ابحراز وابقوتة

مرة معتصم دا قال لفنان شباب ..انكم بتغنو من اجل العداد
الولد قال ليه لا ياستاذ الفن رسالة..
رد عليه قال ليه انا ما بؤمن بالمقولة دى
انتو بتغنو من اجل العداد ومعها حدرة وعين حمراء
والله لو انا كنت ذلك الفنان لتركت الغناة ومشيت




وبعدين زول سجيمان دا شيلوه من القناة لانه
عاوز يجنن بنتى,,وانا بحلم تكون مقدمة برنامج
دحين ما تكرهوها الاعلام من اسى
نسيت احيك يامعتصم.لانك تستحق القومة زى للقومة للوطن
..ونحن راجين عودتك

ارحب بصديقي القديم
معتصم الجعيلي
واقدم التهاني والتباريك بالنجاحات
يعجبني دوما اصرارك وتصميمك
معتصم اخوي النقاش الانت طارحو ده محتاج وجودك
تسلم
==================
صنفره علي قول ناذر الخليفة

Quote: مرة معتصم دا قال لفنان شباب ..انكم بتغنو من اجل العداد الولد قال ليه لا ياستاذ الفن رسالة.. رد عليه قال ليه انا ما بؤمن بالمقولة دى انتو بتغنو من اجل العداد ومعها حدرة وعين حمراء والله لو انا كنت ذلك الفنان لتركت الغناة ومشيت

كان صحي قلت للفنان الكلام ده
انا بقول مالو العداد عيبو لي
يعني هسع قناة هارموني الحلوه دي بتقدر تستمر تبدع بدون عداد؟؟؟
اخ استنوني لمن اجيكم في السودان
وجه ضاحك

ابو هديل
صديقى القديم...والله مشتاقين,,,

الحلقة قاعدة ...بس البد ليها بعيدوها تانى

هى حلقة مخرجين...فيها محمد نعيم سعد
وشكر الله خلف الله...وعلى ما اعتقد ابو العزائم الابن

والاستاذ معتصم لابس قميص شرط جنز نصف كم,,,
بصراحة الفنان اول مرة اشوفوه,,
وما ادوه فرصة كتيرة عشان يغنى اكثر
كانت حلقة كلام
زى حلقة الرئيس الملحن الشاعر الصحفى رجل الاعمال
طيب انت ما دام عندك الاخيرة الباقى دير بيه شنو

تسلم

والله كونو صديقي معتصم يعطي المسؤولية لمقل هذه الاسماء
انما هذا يحسب له

Quote: ÇÈæ åÏíá ابو هديل صديقى القديم...والله مشتاقين,,,

سلام وشوق كتير والله يا
ابوقوته

صلاح ادريس رغم سحابة السوء التي تظله وثوب الفشل الذي يلاحقه ,شخصية مثيرة
للجدل ولكن في الغالب يحظي صلاح ادريس بمحاور ضعيف التجربة قليل الحيلة
فيخرج (دون كيشوتة)بانتصار وهمي

هارموني قناة كل السودانيين

** *** ** *** **

اتمني ان يكون هذا الشعار كما اريد له ان يكون

بهاء عيسي
اولا شكرا
سوف تكون قناة كل السودانيين

للرائع معتصم الجعيلي ألف تحية

لهارموني برضــو..كل الطاقم

أنا ما شاهدت حقة صلاح ادريس، سمعتو بس بيغني في جزء منها، أو لنقل يرتكب شيئآ يشابه أفعال الغناء و المغنين، و قـدّرت أن مواهبه في الغناء و التلحين و الشعر و إدارة الأندية الرياضية لا ترقى لمستوى شهرته!
لكن..لدينا فرحة غامرة بوجود قناتكم في متناول الأثير، و نسعد بالركون غليها و أخريات في ظل الهجير الفضائي..دمتم واحة..و مزيدآ من الهارموني..

ملهوزة...

نعتذر عن الإسترسال في حضرة هارموني

.

الاخ معتصم ..

تحياتى ...
كما قال اخوى عبد الاله زمراوى واخوى كمال على الزين هل يمكن للقناه أن تفتح ملفات ساخنة او تسلط الضوء هنا وهناك على اوجه القصور الموجودة فى الوطن لمحاولة اصلاحها أم ان القناه ملتزمة فقط بمجال الغناء والترفيه...
فى رأيى المتواضع انك اذا فتحت مجالا للملفات الساخنة الناقدة عبر برامج قوية تنتقد بموضوعية وتستخلص آراء واقتراحات بناءة فإنك لامحالة ستحقق للقناه انتشارا وقوة تعود بفوائد كبيرة للقناه على مستوى الدخل الذى يضمن لها البنيان القوى الثابت لضمان استمراريتها وكذلك تحقق للقناه انتشارا اكبر لدى مساحات الرأى الواسعة ..
ننتظر الرد ..

الاخ معتصم مرحب بيك مرة تانية واحسنت اختيار البوست لان هناك الكثير الذي يجب ان يقال عن هذ الحلقة

انا شخصيا عدت اشاهدا لقنوات السودانية من جديد بعد هذه الحلقة ساعود بشيئ من التفصيل

مرحبا بلاستاذ /معتصم الجعيلي

شنو ياعمكـ......
اغاني الرطانة كانت اول الغيث
بالنسبة للقناة طيرتها ويييييييييييين......؟

وينو الفتح البوست ومشي وما رجع تاني

هل ذهب الاستاذ معتصم لمشاهدة الحلقة مرة اخرى وتحليلها ولا الحاصل شنو

الحلقة بكل امانة وبدون مجاملة كانت ضعيفة والحلقة الاضعف كانت المذيعة
عدم اعداد جيد
طرح اسئلة بطريقة غير منظمة
الضحك بدون سبب
وغيرها من الامور التى سوف نناقشها معك فى هذا البوست

ألأخ/معتصم الجعيلى

السلام عليكم ولك التحية ..وكم نحن سعداء بوجودك بيننا بالرغم من أن محبى هارمونى لم يقصروا فى تناول هذا الموضوع...ولكن لايفتى ومالك فى المدينة..

لأدارة النقاش حول الموضوح يجب أن نشترك بأرضية واحدة بأن الحلقة كانت من وجهة نظرى جيدة..وقد ادت ألأخت/نادية عثمان الدور المنوط بها جيدآ..

ولكن فى مثل هذه الحوارات لايمكن ان تحكم الشخص المضيف فى إطار معين لنجاح الحلقة..وقد فلت ألأخ/صلاح إدريس من أسئلة كانت تشكل كثير من ألأشكاليات للمشاهد..

الضيوف ألأخرين ..الفنان حمد الريح والفنان سيف الجامعة..كان من ألأفضل طرح أسئلة مشتركة تجعلهم يتفاعلوا مع الحلقة حتى يرفعوا من حيويتها وجودهم الجامد معظم الحلقة نقص من درجاتها..

هارمونى من القنوات التى تبشر بمستقبل واعد. ...................مودتى...إسماعيل محمد احمد عباس...

مرحبا بك بيننا الفنان الجعيلي
لاشك ان الحلقة اخذت ابعادها لكونها الاولي للرجل اللغز على وسيلة اعلامية... وزاد رونقها الاداء الندي من المحاورة المقنعة جدا الزميلة نادية عثمان... يلاحظ ان المونتاج لم يكن موفقا في قطع العديد من لقطات اللقاء.... وهناك ثغرة قانونية تمثلت في تناول الحديث عن فنانة مرموقة بينها والضيف سجالات وكانت سقطة سيف الجامعة كبيرة في الرد على هذا الامر على وجه الخصوص بينما حاول الضيف الالتفاف على الحقيقة التي تناولتها العديد من وسائل الاعلام في فترة سابقة، وهذه النقطة يمكن ان تكون مستندا قانونيا في السجال قد تجر معها القناة في متاهات هي في غنى عنها.

استاذ معتصم ..

للأسف هذه الحلقة تحديداً لم اشاهدها .. وشاهدت فيها مقطعاًًًُ بعد الاعادة يوم الجمعة السابق وكأن تصويرها كان في (سارية) على ما اظن ..... ولكن والحق يقال ان مستوى مشاهدتها كان عالى جداً .. بدليل اننى قد انزلت في الحلقة اعلان عن بنك المال المتحد و مدارس الاندلس الخاصة بكوستى .. ووجد هذا الاعلان تجاوباً منقطع النظير بفضل من شاهدوا هذه الحلقة ولاحقونى بالتلفونات بعد مشاهدة الاعلان فى الحلقة المذكورة - رغم معاناتى فى اجراءآته الفنية والادارية (وهذا ليس محله) ..

الاستاذ الجعيلى
كنت من المتابعين لقناتكم والشروق والنيل الازرق
فترة اجازتى فى السودان
سؤالى ليك وللبورداب هل القنوات دى يمكن مشاهدتها عندنا فى امريكا
سناء مرسى

الاستاذ المحترم الجعيلي

تحياتي يا رجل وحبابك مليون بيننا

انا ما يهمني صلاح ادريس ولا الكورة

طلبي الوحيد من قناة هارموني الجميلة ان توحد السودانيين مع بعضهم البعض

وتساعد في حل مشكلة دارفور وعدم انقسام السودان

وده كل همي

اخوك زميل اعلامي وهمه الوطن وبس

تعيش يا حبوب

ووالله نورت المنبر وسعيدين بجوارك بيننا

أشرف مصطفى

سلام

الذي تقول به هو ماجاءت به هارموني التي تسعى بجد لتحقيق قومية الشاشة السودانية لتسع السودان باتجاهاته الأربعة دون تمييز ..

Quote: نأتي الي نادية مختار هذه الرائعة التي لاتكل ولاتمل من العمل والبحث عن النجاح.. النقد لها مفيد ويغذيها بمزيد من النجاح.. هي ليست اوبرا وينفري .. لكن نديها فرصة وستجدوا نادية أخري نتفخر بها جميعا دي حتة ونواصل

الأستاذ معتصم..حبابك
اولا مرحب بيك في سودانيز اونلاين..ونتمنى أن يساهم بعض النقاش في تطوير العمل في قناة هارموني..
و جيد أن تتاح الفرصة لمن يصنع الإعلام مع من يتلقى الرسالة..


معليش الإقتباس الفوق ده لفت انتباهي..و كما فهمت من حديث الأصدقاء و الصديقات في سودانيز اونلاين.ز انك انت الـ Boss ..في قناة هاروموني..فروعة المذيعين و المذيعات و المخرجين و المخرجات..و الفنين و الفنيات.. دي خليها لينا نحن المواطنين و المواطنات..لكن انت كاٍدراي.. الأفضل ألأ تتحدث عن واحد من موظفيك أو موظفاتك..و في مكان عام..ولا كلامي ده أعوج؟..

تجربة هارموني تجربة مهمة..و حرصنا عليها و عليك و على القائمين على أمرها هو ما دفعنا لهذه المشاترة..

و دمت..

كبر

الاستاذ كبار
تحياتي
لم اكن في عمري ذلك الاداري الذي تتصوره
هارموني كقناة ومكاتب وموظفين وموظفات واداريين
are in real harmony
ماقلته عن نادية هو مااعتقدة .. وهو لن يضيف لها علاوة .. صدقني.. ارجو قبولنا كما نحن

مرحب بالأستاذ معتصم الجعيلي ...

لي تعليق إذا سمحت عن هذا اللقاء ..

كانت هنالك إشكالية واضحة في الصوت ، بحيث جعلت المشاهدين والمستمعبن في حالة من عدم الركيز بسبب خلل واضح تسبب فيه القائمون على أمر الصوت ..

وكنت قد تطرقت في عدة مساحات أخرى عن هذه المسألة وهي مسألة عامة تعاني منها جميع المؤسسات الإعلامية وخاصة التلفزيونية منها دون إستثناء ..!!

صوت صلاح إدريس كان منخفضا أثناء الحوار على العكس تماما من صوت الزميلة نادية عثمان .. والمشكلة ان البون شاسع بين درجة الصوتين ، وأقسم بالله أنني كنت أتابع اللقاء وفي يدي الريموت كنترول وعلى اهبة الإستعداد والترقب ! ، فحين يتحدث صلاح إدريس أقوم بسرعة برفع درجة الصوت كي لا يفوتني شي ! وعندما تتحدث نادية أقوم بذات السرعة بخفض درجة الصوت وهكذا ، وذلك في حت ذاته مرهقا جدا بالنسبة لمن يريد أن يتابع ويستمتع بالمشاهدة ..

هذا الامر يحتاج لمعالجة في مقبل الايامات .. وبالمناسبة حدث ذلك أيضا في لقاء كابو مع كمال ترباس ..


وافر التحايا .

ناذر
اتفق معك تماما في مسألة الصوت
الحلقة سجلت قبل فترة وبرضة حلقة ترباس
الان لم هذه المشكلة موجودة .. وتابع
أخيرا ..لازلنا في مرحلة البناء للقناة وتصليحها واعدادها لتكون قناة السودانيين الاولي..
وعلينا نواصل الاجتهاد

كتو
ياخي علي الاقل قول شكرا ماتبقي من الروحهم محرقاهم

اعانك الله اخي معتصم علي الردود الكثيرة

لا تهتم بالرد علي تعليقي فانا جد مشفق عليك من كثرة هذه الردود التي تشيب الراس

مؤنة عشرة اعوام من الود

أشرف
تحياتي
بصراحة..
ماقايل الموضوع كدة
ربنا يسهل
للان مارجعت البيت

الاخ الاستاذ الجعيلي

تحياتي

مرحبا بك في سودانيز اونلاين اضافة نوعية لمساحة الابداع في البورد

Quote: هدفنا هو صلاح ادريس الآخر... الفنان الملحن الصحفي.. بتاع كله

مراحب بالفنان الجعيلي...

عاوز أقول إنو زمان درسونا في التاريخ عن فرعون مصري أسمه :أمحتب"

كان طبيب وشاعر وموسيقي... ومهندس وكاهن...أصلا ما كنت بصدق ...

لكن بعد ما سمعت ما قلته وما يخلع على صلاح إدريس... بطل العجب...

حاسد أبدا والله .. طالما آخرها كوم تراب..who cares

الجعيلى

مرحبا بك

تحياتي الصديق من على البعد الاستاذ معتصم الجعيلي:
غايتو انا جاييك واقول ليك عدييييل كده اديني برنامج الرياضة وبعد داك اسألني عن هارموني :D
ومن اسة انا حجزت ليهو اسم الداااافووووري ويا كده يا ما عايز هيييييييييييييع ابوك يا محمد او كما يقول استاذنا الموصلي:)
كل التمنيات للقناة بالتوفيق وموضوع صلاح ده بنجيهو بي رواقة هو ومعاهو كمان المحاكمة ..

أستاذي المبدع ود الجعيلي

سعيدة بوجودك هاهنا وسط قبيلة سودانيز أون لاين الأعزاء

وأرجو أن يطيب لك المقام

متابعة ردودك بإعجاب وفرحة

ربنا يحفظك أستاذي العزيز جدا ود الجعيلي

الاستاذ الجيعلى
ابتداء نحيك على التجربة الشجاعة جدا حيث ان المجزافة برأس المال فى المجال الاعلامى عموما تعتبر غير مأمونة فى السودان ونسأل الله ان توفق فيها وتحقق ربح مادى يضمن لنا إستمراريتها
وإذا عدنا لموضوع البوست اسمح لى و مع كامل احترامى للزميلة نادية الإ ان محاورة نادية لصلاح ادريس كان فيه اجحاف فى حق نادية عثمان قبل ان يكون كسب لها لأن صلاح ادريس سوى اتفقنا معه او اختلفنا فهو رجل بمقدرات خاصة فهو رجل اعمال و صحفى وادارى وملحن و سياسى (خمسة@واحد)ونادية حديثة التجربة فى التلفزيونية نسبيا كما ان مقدم البرنامج الحوارى يشترط فيه التخصص فلا يمكن لمقدم برامج الرياضة ان يحاور الفنان و هذا الامر يشمل معد الحلقة ايضا لابد ان يكون متخصص وما اقصده ليس التقليل من شأن المقدم او المعد بقدر ما اريد ان اعكس مدى صعوبة اجراء حوار مع شخص مثل صلاج ادريس والذى استطاع ادارة الحوار كيفما شاء فهو قد عرك الحياة بكافة دروبها
اخيرا ارى القاء فى حد زاته يعد سبق اعلامى لهارمونى واذا كان هنا مؤشر لنسبة المشاهدة قد تكون من اعلى النسب المسجلة لمشاهدة برنامج على القنوات السودانية
ونتمنى مزيد من التقدم لهارمونى
كسره
البنات السمان بتاعت الاغانى المصورة دى اعمل ليهم رجيم قبل التسجيل
ولك خالص اعجابى

كدا بداية سلام ناس هارمونى ( زاتا ) او كما يقول زمينا
سيد الشى ذاتو ... مرحبا
من باب الامانه لم اشاهد الحلقة ولذا لا داعى للخوض فى التفاصيل ... وكما يقال
يكمن( الشيطان فى تفاصيل التفاصيل )
اولا من بشرنا بهارمونى هو صديق جليل له مكانه خاصة فى نفوس كل البورداب
الا وهو الصديق( معتصم دفع الله) وقلنا اكيد معتصم لا ياتينا بشى لا يستحق
ثانيا سبق وفتحت بوستا فى رمضان الماضى بخصوص حلقة ( الدراميين ) ناس جمال حسن سعيد
والبقية من المشاركين ولكنى اوقفتة لاسباب عدة منها حداثة التجربة البرامجية للقناة
ثم ناتى للاهم :
ايضا حلقة او لقاء ندى القلعة ؟؟؟؟!!!! بوست متواجد فيه شىء من الجدية واخرى من الكلام
(الفاضى وخمج ).... ايضا لاسباب عدة منها انسياق هارمونى عكس رغبات المشاهدين والتجريب
يثبت ذلك
عموما مرحب بيك وحبذا مبررات مقنعة لتعم الفائدة اولا ومن ثم فكرة الانطلاق نحو فضاءات ارحب
واوسع .....


قاسم المهداوى

قاسم المهداوي يا صديقي ..
مشتاقين كتير وكيف المعاك ..
شكراً لكلامك الطيب ..

هارموني وضعت أقدامها بثبات ورسمت صورة طيبة لدى المشاهدين ببرامجها المتنوعة وعكسها للتراث السوداني وثقافاته المتعددة ..
المشوار طويل وفي يقيني أن معتصم الجعيلي قادر على هذا العمل فهو إنسان مبدع وفنان ..
وهذا النقد دليل على أن الناس وجدت متنفس لها وتريد تجويده أو أن يكون بصورة أفضل لأنه غير متاح في القنوات الأخرى وأنا متأكد من أن كل كلمة تجد أذآن صاغية من الأستاذ معتصم الجعيلي وطاقم القناة بأكمله ..


تحيات كتار يا قاسم ..

استاذ الجعيلى
خالص التحايا ...ومبروك الباسويرد
طبعا دخلت طوالى بدون شوشرة
وداخل على الشغل ...ياخى ادخل نرحب بيك كدى فى الاول
غايتوا الله معاك ...


السلام لكل قبيلتك انت كمان

اولا مرحب بيك استاذ معتصم الجعيلى
تعود بى الذاكرة الى النصف الاول من التسعينات
قبل الهجرة من السودان . وقتها كانت هارمونى ببحرى خلية نحل
بالنسبة لنا زيارات ومشاريع افكار وغيره ..
كنا نأتى انا وشذى عبد الرحمن وكان هناك الصديق عوض حسن الإمام
(عوض شكسبير)وعبد السلام وآخرين . وكانت هارمونى تسعى لمشروع
عظيم وهو انتاج اول فلم كرتون سودانى للاطفال. كم كان عظيما ذلك
المشروع رائعا ،لا اعرف الى اين وصل الآن ؟؟؟
وانقطعت الصلة ولم اسمع سوى ان هارمونى اصبحت اذاعة مرئية ملء
السمع والابصار وإن لم تتح لنا فرصة مشاهدتها بحكم وجودنا فى اوربا .
ولكننا لا زلنا نحمل الإحساس بانها منا والينا .
تحياتى لك ولهارمونى وللعزيزة نادية عثمان وهو اختيار صادف اهله
ونحو مزيد من الحوار المنتج حول اجهزتنا الإعلامية .
ضياء ميرغنى

مرحبا بالأخ معتصم الجعيلي و وجوده أكيد اضافة للمنبر..

المشكلة الأساسية ان الكثير من المشاهدين كانوا يركزوا على : صلاح ادريس صاحب المال و هذه لم تأخذ حظها ، صلاح ادريس رئيس الهلال ماذا يحمل من أحلام للهلال..و هارموني كانت مركزة على صلاح ادريس الملحن و المهتم بالغناء لذلك جاء المشاهدون بتوقعات للقاء لم يجدوها..
نادية عثمان تحمل مقومات النجاح و سعت له.. لكن أعتقد ان الاعداد للحلقة في الجزء الأكبر منه مسئولية آخرين و الاعداد لم يكن كما يجب.. ...سيف الجامعة حاول أن يشارك و لكن كان خيرا له أن يصمت كما فعل حمد الريح..

في كل الأحوال لقاء شخصية أثارت و ما زالت تثير الكثير من الجدل يعتبر نجاح لقناة تعتبر جديدة نسبيا..

Quote: العزيزه ناديه كنت عاوز أقول بعض الملاحظات : الضيف حاول إدارة الحوار فى كثير من أوقات الحلقة ـ طبعا ده ما معناه ضعف منك أو فى الإعداد لكن تنازلتى كثيرا فى أكثر من سؤال من الوصول الى اجابة واضحة وطبعا الأخ والصديق/ صلاح إدريس(وله منى التحايا) له من الخبره فى ذلك مهندس الصوت أخفق كثيرا فى ضبط ( صوتك تحديدأ ) كان يظهر عاليا فى كل مداخلاتك تقريبا مما عرضك لأن تكونى فى موضع غريب ( يعنى صوتك كان فارق شديد ) منظر الكرسى الفاضى كان شئ غير جميل ؟؟؟ وضع طبق الفواكه فى منطقه واحده شئ مش جميل ولديكم أكثر من ضيف وفى أكثر من موقع مع ملاحظة أن الأخ/ صلاح كان بيتناول منها فى أكثر من مره ؟؟؟؟ محاولة إستضافة صلاح إدريس ( رجل أعمال وملحن وفنان ورئيس الهلال ووو ..الخ ) أكسبت السهره حجم كبير كان ينتظره المشاهد ــ وكانت المحصلة أقل من ذلك لذلك وقعت فى تقييم بعد العرض أقرب للضعيف !! لك التقدير وأحى من خلال هذه المداخله كل أسرة هارمونى

الرجل الفنان الجعيلى

لكم التقدير فى كل ما تقدمونه وحقيقة مؤشر الريسفر

دائما تكون بدايته بقناة هارمونى ونشوف الماده المعروضه لو مكرره

نبدأ فى إدارة المؤشر الى البدائل الأخرى

وطبعا نتمنى لكم مذيد من الدعم لتصبح هارمونى غنيه بموادها

وهل من الممكن إيجاد برنامج رياضى يغطى النشاط الرياضى وبتناوله بالتحليل

وحقيقة كل برامجنا الرياضيه فى القنوات الأخرى تفتقر للعلميه وتتجه فى تناولها

للمواضيع الرياضيه الى مع أو ضد ولا يوجد المقدم المتخصص والبعيد عن الحزبيه

معتصم .. أخوي ..
مالو .. نتناقش .. ما كعب النقاش ..
وياسيد الأمنتي بيك أنا المرة الفاتت ختيت رأيي في الحلقة دي
بس كان رأي يدور حول تحضير أختنا المتألقة نادية للبرنامج
وتقديمها اللي ما كان مقنع وده أكيد بيكون ليهو مسببات ما ساكت ..
بس المرة دي إنت فنان يا معتصم وأنا من منطلق إنه أنا من قبيلة الفنانين
بقول ليك دون مجاملة شغلكم سمح إخراجكم سمح موادكم سمحة
بعدين أكان صلاح إدريس أو غيره المهم الشغل اللي بيتقدم يكون ماخد وضعه
وفي دي مافي تقصير
بس بيني وبينك .. صلاح إدريس شايف نفسه ..
ويا دنيا إتهدي .. ما عليك أدي .. ما تجاوب إنت ..
خلي الباقين يجاوبوا .. مش صاح ؟؟

الجعيــــــلي ياخ
والله مرحب بيك اولا
وبجيك بي روقه
تحياتي للشباب كلهم
والسيد امام حسن


عليش

الأستاذ معتصم السلام عليكم ورحمة الله

فتره طويله جدا لم اراك فيهااولا اهنئك بالقناة السودانيه والتى نالت استحسان من الجميع

وكان ودى ان اشارك فى نقاش الحلقه المذكورة ولكن للأسف الشديد لم اشاهدها لك تحياتى مع تمنياتى لك

بالنجاح والتوفيق .

ابو ختم (ابن خالة الأستاذ أنور )

الاستاذ معتصم الجعيلي ..

بالله كتروا لينا من محجوب كبوشية دا ويا حبذا لو تجيبوه كل يوم مرتين ...
التحية لك ولكل العاملين بقناة هارموني ولمشاهديها ..
بسال من الزول البحننو فيهو دا لميتو فيهو ين ؟؟؟؟

يا جماعة الخير الراجل طلب نقاش لموضوع حلقة صلاح ادريس ليعرف اراءكم ويعرف السلبيات والايجابيات

بس انا شايف البوست تحول لمجاملات وتهنئة وتناسيتم موضوع البوست

الاستاذ الجعيلي التحية لك ولاسرة هارموني

هارموني في الرياض اقامت لقاء فنيا جميلا للاستاذ الباحث النوبي مكي على ادريس قبل اكثر من 7 اشهر وحتى هذا اليوم لم ير ذلك اللقاء النور بالرغم من ان كثير من اللقاءات تمت بعدها وعرضت، هل هنالك توجهات من الحكومة بعدم بث تلك الحفل كون ان الفنان مكي معارض ام ماذا؟

الاخ معتصم الجعيلى
حبابك هنا
حتسمع مليون رأى مع او ضدَ بس شيل الصبر غيتو شبكت نفسك شبكة عجيبة
هشام كمال

الرائع الفنان معتصم الجعيلي ..
حبابك ألف بين ظهراني أحبابك وأخوانك ...
فعلاً الواحد سعيد برؤية إسمك بالبورد ..

والتحية عبرك لهارموني ...
وللطاقم الفنان الذي يقف خلف كل هذا الإبداع ...

النقد البناء بالتأكيد أفضل وأهم ما يدفع بمسيرة هارموني إلى آفاق أرحب وإلى تجويد أكثر للعمل ..
لكن - في رأيي - حتى مسألة تقييم أن هذا النقد بناء وهذا ( حداد ) مسألة في حد ذاتها في غاية الصعوبة ...
فالرأي في هكذا مسائل يعتمد على خلفية مبدي الرأي وبيئته وثقافته ..
وميوله وتركيبته النفسية ، بل في حالة صلاح إدريس كمان الحالة المادية ، والميول الكروية هلالابي ولا مريخابي ولا ...منظراتي ساكت و و و و..
ومن الصعوبة بمكان وضع أسس ومعايير لكل نوع ولكل ( حالة ) ..
موضوع حلقة صلاح إدريس ..
ومع أني ما شاهت منه لا النذر اليسير إلا أنني كنت متأكداً مسبقاً من شراسة وضراوة النقد المتوقع ...
فهنالك قاعدة ولا حكمة ما عارف .بتقول كل ذي نعمة محسود ..
والضيف ( وعينا باردة ) ربنا أكرمه وخصه بنعم ظاهرة وباينة للعيان ...
فهو إن لم يكن محسوداً على ماله ونجاحه في هذا الجانب ..
فهو بالتأكيد محسود على كتاباته ...ولا أحد يستطيع أن ينكر ضلوعه في لغة الكتابة ..
والشعر ..
وشيئ من الموسيقى ..
والتلحين ..
ياخ على الأقل إهتماماته الأدبية والفنية وإحتوائه للمبدعين من كل نوع ...
كل ده خلونا نقارنه برأسماليينا الذين ما عرفنا منهم من إبداع إلا في مجال الكروش والعمم الكبيرة .. وغالباً رؤوس خاوية ...

أخواني الغاليين
لماذا نطالب نادية بأن تؤدي دور المحقق البوليسي ؟؟؟
الحلقة حسب ما نما إلى علمي أنها كانت عبارة عن دردشةفلا ينبغي أن يقيدها إلا قيد زمن الحلقة والمحاذير الأساسية المعروفة ..
فيما عدا ذلك فهي حلقة دردشة في جوانب أدبية وفنية وعامة..
وما يزيد على القناة صعوبة إجراء الحوار أنه كان مع شخصية عامة ومثيرة للجدل ..
فمابالنا نطالب نادية بأنهاكان عليها أن تملك دفة الحوار أو أن تقيد الضيف وتحاصره بالأسئلة المعدة من قبل والتقيد بها ..وأن الضيف إستحوذ على التقديم وصار يحور الأسئلة بما يناسبه ..
طيب عايزنوا يجاوب على حاجة مش عاوز يجاوب عليها ..؟
ما هو ده التحقيق الذي يتنافى مع طبيعة الحلقة ..!
؟
يحضرني تعليق كان من الأخ كمال الزين في ذات الموضوع عن أن للمسألة علاقة بما توارثناه والفناه من ( فرمالات ) وأشكال ثابته في كل حاجة ، وبالتالي صعب علينا تقبل الشكل الجديد من الإبداع ...

أو كما قال ..

فبراااااحة على هارموني وخلونا داعمين ليها مش مثبطين ...
التحية للمبدع المقدام
الجعيلي ...

الاستاذ معتصم الجعيلي

تحياتي ليك ولطاقمك العامل واول الغيث قطره وانا عندي ليك برنامج خطير وشعبي بس كلو شي بتمنو لو جيت السودان بطرحو ليك عن صلاح ادريس الكلام يكتر ولكن صلاح ادريس حافي القدمين وحامل حذاءه في يده من اجل الهلال صوره تعبر عن كل شئ صلاح اعظم رئيس علي الهلال للان ولو أخطأ وكلنا خطاؤون وخير الخطاؤون التوابون تحياتي ليه واضرب ياصلاح بيد من حديد من اجل الغد كان شداد كان غيره


استاذ معتصم طرفكم سهره كامله لابناء طابت بالرياض مع الفنان عمار السنوسي الماده موجوده من رمضان السابق مهم بثها ولو بدون عمار فارجو التكرم بالافاده وجميع معلوماتي بالملف

شكرا ليك ولمجهودكم المقدر

الأخ : معتصم الجعيلى !!

لك الود والتحية !!

لم أشاهد الحلقة موضوع النقاش !!

حضرت لأهنئك على مجهوداتك ...

ولأرحب بك فى المنبر !!

شرفت واهلا وسهلا !!

المحترم عثمان دغيس

سلامات

وشكرا على قولك الموضوعي والحقاني هذا ولك الف تحية وللجميع مثلها

Quote: أخواني الغاليين لماذا نطالب نادية بأن تؤدي دور المحقق البوليسي ؟؟؟ الحلقة حسب ما نما إلى علمي أنها كانت عبارة عن دردشةفلا ينبغي أن يقيدها إلا قيد زمن الحلقة والمحاذير الأساسية المعروفة .. فيما عدا ذلك فهي حلقة دردشة في جوانب أدبية وفنية وعامة.. وما يزيد على القناة صعوبة إجراء الحوار أنه كان مع شخصية عامة ومثيرة للجدل .. فمابالنا نطالب نادية بأنهاكان عليها أن تملك دفة الحوار أو أن تقيد الضيف وتحاصره بالأسئلة المعدة من قبل والتقيد بها ..وأن الضيف إستحوذ على التقديم وصار يحور الأسئلة بما يناسبه .. طيب عايزنوا يجاوب على حاجة مش عاوز يجاوب عليها ..؟ ما هو ده التحقيق الذي يتنافى مع طبيعة الحلقة ..! ؟ يحضرني تعليق كان من الأخ كمال الزين في ذات الموضوع عن أن للمسألة علاقة بما توارثناه والفناه من ( فرمالات ) وأشكال ثابته في كل حاجة ، وبالتالي صعب علينا تقبل الشكل الجديد من الإبداع ... أو كما قال ..

Quote: نقاش حول حلقة صلاح ادريس في هارموني

أستاذ معتصم


أهلين ومرحبتين



أولا جيتك وحماسك لنقاش الموضوع من أول بوست ليك ..دلالة كويسة على أنك عايز تسمع من الناس وترد وتفند و تستفيد إذا

رأيت في كلامهم شي مفيد ، لانو ما بالضرورة اي شخص بنتقدك داير ينال منك او من النجاحات وأنت سيد العارفين .


أها ده بمثابة ترحيب ...وبنجي تاني للنقاش كان الله هون .


مودتي

أجمل الاخبار الفاتتنا في فترة غيابنا
هي اكتساب الباشمهندس معتصم الجعيلي عضوية المنبر
نورت المنبر ومرحب بيك ألف

أعيد لك ما قلته من قبل
لا يعنيني في الرجل أمواله ولا الحانه ولا اتحاديته
ان الذي يهمني في صلاح ادريس فقط انه رئيس امة الهلال...
لذلك فان أكثر ما يشغلني هو التعرف علي اسباب تأخير بث الحلقة
حتي تجاوز الزمن القضايا الرياضية التي كان يمكن اثارتها معه
خاصة فيما يتعلق بالصراع مع اتحاد شارع البلدية الذي يتحكم فيه شداد


ممكن سؤال يا الجعيلي ؟؟
هل هناك امكانية لاستضافة الارباب من جديد (كجزء ثاني)
يستصحب ما دار من نقاش حول الحلقة السابقة ؟؟؟

الرائع معتصم الجعيلي
لك التحية و التقدير وأنت تطل عبر سودانيز أون لاين بس طول لينا بالك كلامنا قد لا يروق لك بعض الشئ ولكننا نتفق علي "إنك رجل طوح ومثابر وفرضت وجودك بين الجميع رغم الإمكانات الضعيفة و الوأقع المحبط ..." ,شكراً إطلالتك الجميلة وبجيك صادي بي روأقه خلينا النستعدل ليك ...

مودتي الأكيده
عمر مصطفي محمد الحاج
بورتبيل

اولا
اهلا بك في المنبر وفي بادرة غير مسبوقة للتحاور مع مجموعة متابعة لمجريات الامور..
فحتما ستكون هذه الخطوة داعمة للمجهوداتك القيمة في هارموني .
فهنلك اراء ومقترحات واطروحات كثيرة آن لها ان تتبوتق في وعائها.
ولي ان انقل ملاحظتي السابقة والتي وردت من قبل .. الى نادية عثمان .. وقناة هارموني ..والجالية المقيمة في مصر !!!

....

عزيزى أستاذ معتصم الجعيلى

تحية حارة
لكى تعرفنى فأنا قريب صلاح المبارك وأحمد يوسف مقيم بالمانيا ولقد قدمت لقناة هارمونى فيديوكليب لأحد أغنياتى. هذا الكليب صورته هنا فى المانيا وهو بطرفكم منذ نوفمبر العام الماضى مع كل التنازلات القانونية المطلوبة وأنتم حتى الأن لم تبثوه لعل المانع خير وهل ضاعت المادة أم هى بين الكواليس؟ أرجو عاجل إهتمامكم مع فائق شكرى.

د. إبراهيم عبد الحليم

يا جماعة الزول ده يشوف شغلوا ولا يقعد
يرد عليكم ..

ما ح تخلص يا الجعيلي ..

حقو تعين ليك موظف خاص
للردود .. أو أعلن الانسحاب ونحن فاهمين..
يعني ما بنزعل ..

غايتو ناس القناة ديل ح يرفدوك
لو واصلت هنا ، ناهيك من رفدية
ناس البيت !!!

أصبر .. ح يجيلك كلامي بعد شوية ..!!

انا نفسي افهم هارموني قناة شنو
اغاني
منوعات
اعلانات
تجارية بتاعت ناس عاوزين بزنس
استثمار كيزان
ولاغسيل امول
هل يعقل ان يطير الجعليي من تصوير حفلات الاعراس الي قناة
لم نسمع بان الجعيلي صاحب الملاين حتي يمتلك قناة
نفسي افهم بس بدون مانتخم

الاستاذ/ معتصم
تحياتى

ما دام موضوع البوست نقاش حول الشهرة الضجة فلدى بعض الاستفهامات كمشاهد ومتابع للقناة

هل هذا اللقاء نال رضاء ك كمخرج؟؟

بالرغم من معرفتنا التامة بالظروف الصعبة التى تحيط بالقناة خصوصا مسالة التمويل ،، هل تقبل القناة على نفسها باستحكام الضيف وحتى اذا كان هو راعيا للبرامج الذى يستضاف فيه ان يسير دفة الحوار حسب ما يتماشى مع اهوائه؟؟

أستاذ معتصم

محبة وتقدير

أولاً كل الأمنيات بالنجاح لقناة هارموني والتوفيق فيما تقدمه..

ثانياً ليكون شعار هارموني شاملاً كل السودانيين (وأخص من هم فى الشتات كحالنا) أتمني وأرجو أن ترفع على النايلسات (فيرتكال) حتى يتسنى لنا مشاهدتها فى شمال غرب أوربا وبالتحديد فى هولندا ..

وحتى نتمكن من مشاهدت برامجها وهي تسهم في تطور الإعلام السوداني و بث ونشر فنوننا وثقافتنا وما يمثل ويشكل مجتمعنا السوداني في كل ضروب حياته.. ربما كان طلبي هذا صعباً ولكنه ليس مستحيلا إذا ما إستعصي رفعها علي (بدر عربسات)..

وهنا فى هولندا يقام سنوياً معرض لأهم وأحدث ما أنتج فى مجال الميديا والبرامج وتحضر الهيئة القومية للإذاعة والتلفزيون ومعظم شركات الإنتاج الفني السودانية وفود منها سأرفق لك هنا رابط هذا العام أرجو أن يكون مفيداً

http://www.ibc.org/cgi-bin/displaypage.cgi?pageref=100

وستجد تلفوناتي مع الأخ أنور عبدالرحمن أو فى البروفايل هنا بسودانيز أونلاين وأنا علي أتم الإستعداد للإسهام فيما هو بمقدوري

عبدالعزيز خطاب
خريج معهد الموسيقي والمسرح - قسم الموسيقي

شكرا أستاذ معتصم على الرد ..

ولكن ,,

Quote: الحلقة سجلت قبل فترة وبرضة حلقة ترباس الان لم هذه المشكلة موجودة .. وتابع

هذه المشكلة still موجودة ,, وحتى الان بالنسبة لي كمشاهد للقناة يتطلب الامر أن يكون الريموت كنترول في يدي طوال الوقت للتنقل بين أزرار الصوت مخافة الإزعاج والصوت العالي الفجائي ..!

قبل ساعة أو ساعتين من الان ، وجدت برنامجا يغني فيه فنانا كنت أتمنى الاستماع إليه ومشاهدته يعزف على العود وهو الفنان عادل الصديق ، ولكن أصابني الإحباط !!

يغني عادل الصول فأضطر إلى تقليل معدل الصوت وحينها لا أسمع صوت العود !!
يتوقف عادل عن الغناء ويبدأ في العزف قلا أسمع صوت العود فأضطر لزيادة معدل الصوت من الريموت !!!

هذه عملية مزعجة يا أستاذ الجعيلي ..!!

وأضطررت بعدها لتغيير القناة حتى أشاهد وأسمع بشكل سليم ..


أرجو مراجعة هذا الامر ..

يا أخي ناذر
حظي معاك سئ
صدق او لاتصدق دي المواد القديمة
نعمل شنو
ارجو الاتصال بي

معتصم يا فنان ..
حبابك ألف المنبر إزدان بطلتك ..

الاخ العزيز الفنان معتصم وضيوفه الكرام


أولا مرحب بيك في البور يا معتصم ووصيتي ليك طول بالك

وأبقي زولا صدرك واسع كما أنت ،،

ونحن في انتظار الموضوع الاصلي

قبل قليل في حلقة الجزلي مع شرحبيل أحمد ..

عندما غنى بالعود أو الجيتار ، لم نستمع سوى لصخب صوتي يمكن أن يحسب في خانة الإزعاج مع صوت الجيتار والعود العالي جدا ..

أما شرحبيل أحمد فبالكاد سمعنا صوته ..!!

Quote: انا نفسي افهم هارموني قناة شنو اغاني منوعات اعلانات تجارية بتاعت ناس عاوزين بزنس استثمار كيزان ولاغسيل امول هل يعقل ان يطير الجعليي من تصوير حفلات الاعراس الي قناة لم نسمع بان الجعيلي صاحب الملاين حتي يمتلك قناة نفسي افهم بس بدون مانتخم

اولا مرحباً بالاستاذ معتصم الجعيلي وتشكر على طرحك الموضوع للنقاش وهذا ان دل انما يدل على حرصك على تجويد عملك في مقبل الايام بالاستفادة مما سيسفر عنه هذا النقاش من أراء
ولكن اناشد الاخوة المتداخلين أن يحموا الاستاذ من مثل المداخلات اعلاه فيجب علينا ان لا نمر عليها مرور الكرام بل يجب أن نعلق علي سلبيته وعدم موضوعيته حتى لا يشعر الاخ الجعيلي بشيئ من الامتعاض يؤثر في استعداده للردود والتعامل مع كل الأراء المطروحة

سلام يا استاذ معتصم

لماذا دخلت منبر سودانيز اون لاين في هذا التوقيت بالذات

الم تسمع بهذا المنبر من قبل !!!

كثير من المبدعين السودانيين اثروا هذا المكان من سنين قدموا لنا الكثير

بلا من ولا ينتظرون شكرنا، منهم تعلمنا واستفدنا الكثير

ارجو ان لا يكون وجودك هنا دعاية رخيصة لقناتكم هارموني او التبشير والدعاية لصلاح ادريس

انت شهادتك مجروحة لتقييم هارموني ،،،،

رجل في قامتك ننتظر منه النقد والنقد الذاتي لما تعج به فضاءاتنا من وسائط،،،

الاعزاء المتداخلين
اوضحت وجهة نظري في موضوع سهرة صلاح ادريس
وسنلتقي في مواضيع أخري
ولمن لم أرد علي مداخلاتهم العتبي حتي يرضوا
فالمشاغل كثيرة
تحياتي للجميع

يا استاذ معتصم..تحية وتقدير

اعصرو لينا على عمر الحواري.


والمذيعة سارة الصادق ادوها فرصة.
يديك العافية.

Quote: والمذيعة سارة الصادق ادوها فرصة. يديك العافية

وود الجيران عاطل ممكن يشتغل عندكم مذيع

الاخ / معتصم الجعيلى
نعلم امكانياتك الذاتيه والابداعيه ...
ونعلم مدى صبرك للوصول الى ماتصبوا اليه ..
ونعلم مقدرتك على الموازنه بين الدوافع التجاريه والرساله الاعلاميه
ونعلم جرئتك وحبك للمغامره ..
كما نثق تماما بنجاحك .. ونجاح هارمونى فى نقل رساله اعلاميه مشرفه
# كتب الاخ / ضياء ميرغنى

Quote: وكانت هارمونى تسعى لمشروع عظيم وهو انتاج اول فلم كرتون سودانى للاطفال. كم كان عظيما ذلك المشروع رائعا ،لا اعرف الى اين وصل الآن ؟؟؟

حسب علمى فان انتاج الفيلم قد تم وبصوره جيده كما تم انتاج اول فيلم متحرك (البلطيه )وبواسطه شباب تم تاهيلهم بواسطه هارمونى . كما نرجوا من الاخ / معتصم تصحيح هذه المعلومه اذا كانت هناك بعض المعلومات الغير صحيحه
# اما بخصوص الحلقه المزكوره فانا لم اشاهد الحلقه ولذلك لم اخوض فى تفاصيلها ولكن اتمنى ان يتم النقاش بصوره متخصصه فى جزء كبير من النقاش ( اخراج - اضاءه - اعداد - تقديم - ديكور ) بالاضافه الى رؤيه المشاهد العادى
تحياتى لك الاخ/ المبدع الجعيلى .. والاخت / اميمه والمبدعه ناديه والاخوان انور ومصعب وفتحى برير

السيد الجعيلي.

كنت أتمنى أن يكون هذا البوست يتحدث عن قناة هارموني وكيفية تطوير برامجها لكي تغطي جميع انحاء السودان وبمختلف إثنياته، وليس عن حلقة سجلت مع احد رجال الاعمال المشبوهين.

دينق

Quote: استاذ معتصم طرفكم سهره كامله لابناء طابت بالرياض مع الفنان عمار السنوسي الماده موجوده من رمضان السابق مهم بثها ولو بدون عمار فارجو التكرم بالافاده وجميع معلوماتي بالملف

Quote: احد رجال الاعمال المشبوهين.

ليه يا دينق كده والزول دا كان مشبوه ولا عضو في الموتمر ولا امنجي ولا عندو مصالح مع الوالي الموتمرجي

يا دينق انتي مريخابي ولا شنو

تحياتي ليك اكيده

Quote: الاعزاء المتداخلين اوضحت وجهة نظري في موضوع سهرة صلاح ادريس وسنلتقي في مواضيع أخري ولمن لم أرد علي مداخلاتهم العتبي حتي يرضوا فالمشاغل كثيرة تحياتي للجميع

ما قلت ليكم ؟؟؟
الزول سمع كلامي و انسحب ..
خاف من الرفدية !!!!

كلام عقل يا الجعيلي !!!

الاخ العزيز معتصم .. تحياتى
قبل أن أسترسل فى الحديث .. أحب أن انوه فقط للعنوان
وأتساءل :


* /ماهى الاسباب والدوافع والتى جعلت من معتصم مناقشة حلقة
الاستاذ / صلاح أدريس .. علما بأن هنالك حلقات كثر تريد
المناقشة ؟ فلماذا هذه الحلقه ؟؟

*/ العنوان لم يكن حديث البوست إلا قليلا ؟

*/هذه الحلقة أخذت وقتا طويلا قبل أن يتم بثها.. مما جعل
الكثير من الشخوص يتسأءلون عن ذك السر والذى جعلها تتأخر
كل هذا التأخير ؟ حتى مقدمة الحلقة كانت تتساءل ؟؟ ماسبب
ذلك التأخير ؟

هذا مايخص حلقة الاستاذ /صلاح أدريس

أما المحور الثانى من مناقشتى معك أخى معتصم .. أراك
قد تجولت كثيرا فى مناطق المملكة العربية السعودية وأخذت
أراء كثيرة من الاخوة .. إلا أنك لم تحضر لجدة وهى أكثر
المناطق التى تعج بالسودانيين ؟ ربما أستفدت أكثر من الاراء
والافكار ؟

القناة لازالت فى سنه أولى .. ويلزمها الكثير والكثير
ليجنبها كثرة التكرار الممل ؟

أبعد عن الترضيات التى لاتخدم بل تهدم ؟

مشاركة المغتربين فى القناة مهمة لان هذه الشريحة لايستهان
بها.. فهى الشريحة الوحيدة الاكثر متابعة لقناة هارمونى
والقنوات الأخرى ؟ فلاتظلموها !!

الابتعاد من كثرة المحاور مع الضيوف إلا للضرورة لقد شبعنا
حتى التخمة من تلك المقابلات والحوارات التى لاطعم لها ولا
رائحة ؟

اشعر بأنك إنسان على أستعداد كامل للمناقشة لذلك أناقشك
ونفسى مرتاحه لهذا الفهم وتلك الارايحية ..

لك شكرى وتقديرى ماحييت

أخوك
تاج السر
00966508730423
[email protected]

الحبيب... معتصم ياخي جد ابداع وابتكار هي قناة هارموني وفكرتها.... ... ولي قدام ...اما موضوع الحلقه وضيف الحلقه... ده موضوع طويل ومتشعب وعلشان كده بختصر بتهنئتكم علي القناة الجميله ومتفهم تماما لموضوع الاعاده والتكرار بنسبتالتكلفة الانتاج العاليه ...... ولي قدام يالحبيب معزتي واحترامي وتقديري لكم وكل الجميلين في فريقك

اخي الاستاذ/ معتصم الجعيلي
تحية عطرة وليك وحشة ياراجل
ان ماتقدمه هذه القناة الرائعة يعتبر دفع لعجلة
الثقافة السودانيةومع ان كل بداية لها عثراتها
ولكن كانت اقدامكم ثابتة من اول وهلة.
وما لفت الانظار هو اهتمامكم بنشر التراث السوداني
بشتى انواعه دون اي تحيز لعكس ثقافات المليون ميل
مربع لقبول الثقافات التي من خلالها يتوطد التواصل
بين كل فئات الشعب السوداني دعماً لوحدتنا الإجتماعية
التي هي اساس قوتنا وعزتنا.
ولعل تلك الفترة التي قضيناها معا في موقع قناتكم
العامرةاثلجت صدورنا وكان احساسنا بان ثقاقتنا بايد امينة.
لكم التحية مجددا وانتم تحملون الوطن على عاتقكم.
والتحية لكل اسرة هارمني وخاصة الاستاذة انتصار والمصور
القدير حسام.
لايفوتني ان احيي الاستاذ صلاح ادريس وهو شخصية سودانية
نكن له كل احترام وتقدير والسهرة كانت رائعة بلا شك.
تحياتي

Quote: كنت أتمنى أن يكون هذا البوست يتحدث عن قناة هارموني وكيفية تطوير برامجها لكي تغطي جميع انحاء السودان

مع الود

Quote: Quote: الاعزاء المتداخلين اوضحت وجهة نظري في موضوع سهرة صلاح ادريس وسنلتقي في مواضيع أخري ولمن لم أرد علي مداخلاتهم العتبي حتي يرضوا فالمشاغل كثيرة تحياتي للجميع

والله انا ما عارف الاستاذ معتصم فتح البوست دا لية
يرد لية ردين ويقول المشاغل ما كان فى داعى تفتح البوست من اساسة طالما انت مشغول للدلرجة دي
ما شاء الله القناة شعارها اعادة وتكرار وهو لا يريد ان يناقش موضوع البوست

قلنا راينا بوضوح الحلقة كانت فاشلة والمذيعة لم تكن بمستوي جيد وياريت يحترمون عقول المشاهد السودانى