يا مجنــــــــونه

Post: #1
Title: يا مجنــــــــونه
Author: عاطف عبدون
Date: 02-01-2009, 02:02 PM

كنا نحكي عن الشعر

روايات عن بلقيس نزار

وحكاوي عن عفاف وعركي ( ونحن القدرنا علي التعب حرقتنا السنة اللهب)

عن هاشم صديق والبنت (( البتقطع نفس خيل قصائده))

عن النواب وامنيات علي قارعة الطريق ومرثية لأنهار من الحبر الجميل

وفي عَتْمة الأشياء في سرِّها كان ادونيس وهو يضيّئ خيطَ الأشياء في صوت آخر

تدروشنا في عالم درويش في شعره وحبه حزنه وغضبه وجربنا معه الله جربنـــــــــــــاه

ونحن في قمة نشوتنا بالبحث عن الاخر

قـــــــــــــــــــال أحد الحضور :

Post: #2
Title: Re: يا مجنــــــــونه
Author: عاطف عبدون
Date: 02-01-2009, 02:09 PM
Parent: #1

تعشقون الشعر ولا تكتبونه

قلت نعم ربما لاننا نعشقه

قلت للذي يجاورني مجلسا اذاً اقرأ لنا ما تيسر من الشعر

صاح اخر ( عليك الله وجدي شنو اليكتب شعر قال شعر قال )

قصدنا شرفة المنزل لعل هنالك من يسمعنا صوته

بعيدا عن ضجيج ( الكوشتينه) و(دخان الشيشه)

قلت لوجدي اقرأ وحبك الاول

تنهد ... تمدد علي ذاكرة شعره قال

كنا مجانين ....... كانت مجنونه

ترنح من نشوة الذكري وقال

Post: #3
Title: Re: يا مجنــــــــونه
Author: عاطف عبدون
Date: 02-01-2009, 02:16 PM
Parent: #2

نص

Post: #4
Title: Re: يا مجنــــــــونه
Author: عاطف عبدون
Date: 02-01-2009, 02:26 PM
Parent: #3

صدق الفؤاد

لكن وجدي رفض دعوتي لتسجيل القصيده

ورفضت رفضه

وظللت ألح عليه الا ان اهداني النص

وها انا اهديكم

يا مجنونه

بصوتي

ولعلها تخرج وجدي من صمته

ولعله يصدقني حين قلت له

انه وقصيدته مجانييييييييييييييييين

Post: #5
Title: Re: يا مجنــــــــونه
Author: سلمى الشيخ سلامة
Date: 02-01-2009, 02:53 PM
Parent: #4

يازول يا جميل
انت ووجدى

كنت معاك قبال القاك

من اجمل الكلام

شكرا لامتاعنا بالاداء الرصين
الالقاء الماهل المتمكن حيث مخارج الحروف واضحة
والموسيقى التصويرية
والصور المصاحبة للنص
عرض جميل

Post: #6
Title: Re: يا مجنــــــــونه
Author: عاطف عبدون
Date: 02-01-2009, 09:54 PM
Parent: #5

سلمي سلامه بي جلالة قدرها

هنا؟

مشتاقين

ونص وخمسه

وجدي يا سلمي زول كتاب محتاج يكتشف ادغال الابداع الجواني

كلامك عن الاداء طول قامتي لي حد الشمس

إختيار الموسيقي لي فنان صاحبنا اسمو عبودي
.
.
.
.
.
.

شكرا علي كلامك الجميل

Post: #7
Title: Re: يا مجنــــــــونه
Author: عاطف عبدون
Date: 02-02-2009, 01:09 AM
Parent: #6

يـــا مجنــــــــــــــــــــــــــــــــــــــــــــونه

انا ما مديت للشمس ايدي

شان اسرق ضئ

او اتجاوز حد الممكن والمعقول

ما تماديت في الحس والشوق

وما ناديت خبايا القول انا كنت جواك واقف برجاك

مستني عروقك تحكي تقول

اول كلمه تاتاها الريد

يا مجنونه

انا ما لاقيتك بين البين امبارح صدفه

انا كنت معاك قبال القاك

كنا اتنين في رحم النطفه

وحياة عينين

وحياة الريد

وحياه والشوقوالخوف واللهفه

دي ما مطرايه سحابه صيف

انتي البحر الضارب فيني

انتي الريح والموج والمرفي
و
كان غنيت غنايتك بلفه انتي احساس الروح بالالفه

يا مجنونه ليه عايزاني اموت بالشوق

ماكنا وكان الليل تالتنا

لما انفاسك طلعت همسه

قلت علي جواي امتد

خش ضلوعي هناك ادسي

اسي نسيتي اواتناسيتي

ما ظنيت احساسك ينسي

اول قبله واول لمسه

واول كلمه ريد اتقالت جوه حشاش الروح تتحسي

ولسه ولسه

ريقك ريحتو معاي لي اسع

يا مجنونه

يا ضوايه ضل الليل

يا مارقنك من جواي

ما كت في نص الليل غناي

وكنتي بترقصي في مغناي

وكنتي بترقصي مع نغمات الوتر الاشتر

اكان الريد الفيكي الماتك

طالع من نظراتك اكبر

اكان الضحكه التمرق منك تجبر لون المسا يتغير

طعم الدنيا بيصبح ضو

اسه الريد الفيك اتودر

لون عينيك اتلاشي اتبعتر

يا مجنونه

ضلع الغلط الكامن فيك انا ما هبشتو

وما اتماديت عليك بالقوه

ما كان احساسك زي حسي

حس محفور في جوه الجوه

شوق الشوق جمع انفاسنا

عرق الريد سكر احساسنا

حقي وحقك انو نكون

يا مجنونه

مخلوقه عشاني خطاك وحياتك

ولو راجعت فؤادك وذاتك تلقي حروفي ملت خلجاتك

لون عينيك شبه شوقي

راسمه عيوني علي بصماتك

حتي الاهه البين كلماتك جاريه تسابق في شوقك لي

وحياة عيني لسه تراي ساساق في دربك

وبحلف ليك بالريد بي ربك

اصدق قول بقولو في حبك

واصدق كلمه بقوله بحبك

بحبـــــــــــــــــــك

Post: #8
Title: Re: يا مجنــــــــونه
Author: عاطف عبدون
Date: 02-02-2009, 04:18 PM
Parent: #7

دعوه للهروب الي........... ((حضرة الشعر))

والشعر اذا تنفس ....... ( فيديو)

Post: #9
Title: Re: يا مجنــــــــونه
Author: خضر حسين خليل
Date: 02-02-2009, 05:00 PM
Parent: #8

عارف ياعاطف مهما زغت ومهما طرت ووين ما ركيت حتفضل عاطف سميرة البطلع ........ الواحد
بالحاجات السمحة ! سمعت صوتك بعد غيبة والأغرب من دة كلو اني ما عرفت اركز بين النص
المكتوب وبين النص الجاي من حبال صوتك ياخ انعل صليبكم كان انت كان وجدي !
هسي أنتو ممكن تتصرفو

أنا أقبل وين ياصاحب
وين أقبل بس!!

أذيتوني الله يشهد يا عاطف سميرة ويا وجدي !
لو عندي تاني حاجة زي دي أعمل ليك إعلان قبل أسبوع !

Post: #10
Title: Re: يا مجنــــــــونه
Author: خضر حسين خليل
Date: 02-02-2009, 05:09 PM
Parent: #9

Quote: فنان صاحبنا اسمو عبودي

بس ما تقول لي عبود الالا صاحبنا !!

تبقي كارثة !

Post: #11
Title: Re: يا مجنــــــــونه
Author: عاطف عبدون
Date: 02-02-2009, 07:53 PM
Parent: #10

Quote: بس ما تقول لي عبود الالا صاحبنا !!

تبقي كارثة !

( عبودي ألالا) مختفي ولي زمن منو

لكن غُنا ابوهو معاي يوماتي

اما عبودي دا لمتني بيهو اسافير النت الاوسع من ارض الله

وبالمناسبه دي نقول ليهو الف مبروك لانو الايام دي عريس

وعقبال عندك يا صديقي

.......
راجع لي سطورك تاني

Post: #12
Title: Re: يا مجنــــــــونه
Author: rosemen osman
Date: 02-02-2009, 09:15 PM
Parent: #11

عمل جميل

شكرا ...

Post: #14
Title: Re: يا مجنــــــــونه
Author: عاطف عبدون
Date: 02-03-2009, 06:54 PM
Parent: #12

وادركنا بالحب والشعر والجمال

أن بين العقل والجنون

مساحة طولها وعرضها جنون

شكراً روزمين

Post: #15
Title: Re: يا مجنــــــــونه
Author: عاطف عبدون
Date: 02-07-2009, 09:16 PM
Parent: #11

ياهو دا الود المجنون وجدي يا خضر

Post: #13
Title: يا مجنــــــــونه
Author: عاطف عبدون
Date: 02-03-2009, 01:43 PM
Parent: #9

سلام يا خضر يا نضر

Quote:
أنا أقبل وين ياصاحب
وين أقبل بس!!

تقبل حسب وجهة قليبك يا صديق

وزي ما وصانا هاشم صديق

اختار جمر حرفك صديق

اختار قلق عقلك رفيق

اقبض عذابك

ايد حديد

لا تفرحك مدن السفر

تشرد من النار

والخطر

وتهيم على

رمل المضيق

عن مجنونه هي الجننت وجدي (السركمتاوي)

وانا الجنيت بيها

حبيتها اكتر من حبي لي الحبيبه ذاتها ( استغفر فينوس )

تعرف كانت بتنفع ((كولنق)) في الاهليه في حالات

لمن تتفقوا في وجهة قليبكم

وتختلفو في شكل الوطن