عضوه جديده, خايفه من الكتابه !!!

السلام عليكم ورحمة الله تعالي وبركاته
الأخوه والأخوات الأفاضل

قام الأخ بكري أبوبكر مشكورا بقبولي للمشاركه في البورد..
حدث هذا قبل يومين من التهكير (يعني يا فرحه ما تمت)..
ولأني من المتصفحين الدائمين والمتابعين متابعه لصيقه للبوردلأكثر من سنتين,
كان طلب مشاركتي بناءا علي رغبه مني (بعد تردد طويل) في طرح أفكاري و التداخل في العديد من المواضيع الثره التي يتم طرحها..

لغاية هنا كله تمام..

المشكله أني كل ما أود أن أفتح بوست أو أتداخل بتجيني حالة بتاعة رعب ما عاديه..
يعني بفتح الصفحه حقت التداخل و بقهي ...

بقعد أتذكر ناس فلان وفلان الماحيعجبهم كلامي,
وناس كده حيمصمصوا شفايفهم لما يقروا لي,
وناس تانين حيطلعوني ظلاميه, وفي نفس الوقت حأتصنف معارضة ضل بارد عند ناس تانين..
ولو كتبت قصه وللا موضوع بعيد عن السياسه أحتمال يجوني ناس تانين برضه أنا عارفاهم و يطلعوني من فصيلة القلم مابزيل بلم..
أها بعد داك أنا بحب الكوره.. معناتها لو هلالابيه وللا مريخيابيه في الحالتين رشاشه وتبع الصهاينه.

بقوم بقرأ المداخلات كويييس ورايي بحتفظ بيه لنفسي وبقفل الصفحه.

تصدقوا أول مداخله عملتها كانت في بوست عزاء لزميل لي,
جيت الليله لقيت مداخلتي الوحيده القدرتها أعملها بقلب جامد (لأنه دا زميلي و مافي زول حيغالطني فيه) مسحها الهكر ماعارفه ليه؟ عليكم الله ده مش رعب...

المشكله أنه الحاله دي لو أستمرت كتير, أحتمال كبير أرجع الباسورد لصاحبه ويادار مادخلك شر..

هسي أنا بكتب في الكلام ده وخايفه, فيا جماعة الخير محتاجه تشجيعكم, ونصائحكم..

أحترامي للجميع بدون فرز..

اول حاجة يا اماني مرحب بيك
سم سانيا ما تلاوزي

Quote: تشجيعكم, ونصائحكم..

اها شجعت ( الشين مشددة ومضمومة والجيم والعين مضمومات كذلك والتاء ساكنة )
ونصحت ( نفس القصة )




خالص الود

الأخ ياسر بيناوي:

طبعا من شدة ماخفت لما لقيت ردك علي البوست, (باعتبارك أول متداخل),
أظني طبزت حاجه غلط في اللاب توب, قام علق وأضطريت أقفل الصفحات كلها وغايتو..
شفت الرجفه دي كيف..
المهم الحمد لله لقيتك مشجع, وناصح..

شكرا,,

يازولة شوتي واسكتي ساكت
ومحل ما تكتبي يمرررري

الأخ صلاح ليون:

شوت أكتر من البوست ده, هسي دي الحاله كلام الطير ساكت ومع ذلك الخوف كاتلني.
ذاتو قدرته أرسلو كيف ما عارفه.

شكرا علي مرورك..

امانى الامين
قولى بسم الله

Quote: لغاية هنا كله تمام..

الأخ عبد الدائم سيد أحمد:

بسم الله الرحمن الرحيم
لكن بيني وبينك الكتابه في البورد ده عايزه سورة البقره عديل..
يمكن الزول يترحمن شويه..

مشكور,,

أماني الأمين ..
حبابك مليوووون ..
إزيك ..أنا برضو كنت زيك كدا ..
لكن اهو الأمور بتمشي في النهاية ..
بس خليك كوووول خالص ..
ولو زول هاجمك .. طنشي ..
لأنوالمشكلة كلها بتكمن في البوستات السياسية ..
وإنتي عارفة إننا نحن أكتر شعب منظر في السياسة..
برغم فشلنا السياسي على مر الدهور .. بنتكلم بس لكن مافي عمل..
وزمان قالها سجيمان ..لو الواحد عايز يدخل سودانيز أون لاين من الصباح
لازم يكون شايل عكازو معاهو..

الأخ فريد:

المشكله زولتك النوع الحسحاس شديد (حسحاس دي من يتحسحس وكده),,
هسي جبت سيرة العكاكيز القعده غلبتني,

شكرا ,,

أولاً
بتمني ليكي إقامة طيبة ومعقولة في المنبر
يا زولة أكتبي ساي
السوق هنا كعب شديد
أهو يمكن تمرقينا من الحاصل دة ،
نصيحة ما تشتغلي بالآخرين خصوصاً (ترزية) المنبر
وحاولي قدر قدرتك إنك تكوني إنتي يعني ما زول أو زولة غيرك
إحساس الخوف دة شيليهو بعيد
البشرية دي كلها لو عملو زيك ما كان في زول جر حرف هنا
لكن زي ما قلت ليكي السوق كعب وممكن تكوني سبب في إصلاح الحال




أبقي داخلة !

الأخت/ أماني

مرحب بيك في المنبر
وزي ما قال ليك أخونا خضر شيلي الخوف
من قلبك وأكتبي زي ما عايزة المنبر ده زي سوق البصل
كل واحد بعرض بصلو وما تشيلي هم ، بس لو سألتك قلت
ليك لما إمتحنت الشهادة كنت خايفة ؟
ختي الرحمن في قلبك ونحن معاك

مع تحياتي

الأخ الفاضل: سيف الدين الفاضل:

بعد التحيه,,

سوق البصل يعني كيف, يعني سوق وكلله بصل ..

لا ياخ في فواكه, وفي خضار, وفي واحد بيبيع أكياس و في برضو البوليس بتاع بسط الأمن الشامل,
وفي حراميه مره مره بيختفو ليهم حاجه ويجروا (زي الهكر), وكده,,

بعدين أمتحان الشهاده بيدوك نتيجتك وخلاص, لكن هنا بعد النتيجه في جلد..

مشكور,,

ملحوظه: انتو الوشوش بتجيبوها من وين؟

سوق البصل يعني كيف, يعني سوق وكلله بصل ..

لا ياخ في فواكه, وفي خضار, وفي واحد بيبيع أكياس و في برضو البوليس بتاع بسط الأمن الشامل,
وفي حراميه مره مره بيختفو ليهم حاجه ويجروا (زي الهكر), وكده,,

بعدين أمتحان الشهاده بيدوك نتيجتك وخلاص, لكن هنا بعد النتيجه في جلد..

الأخت/ أماني

يا ستي سوق البصل تلقي واحد يبيع بالكوم والتاني بالكيلة وآخر بالربع
وغيرو بالملوة عشان كده المنبر بقول عليه سوق بصل لكن زي ما قلتي برضو فيه فواكه وخضار وأكياس
وأنا إن شاء الله من الناس البجو شايلين أكياس مش عشان يبيعوها لا عشان يخمو الفواكه
دي والخضار من ناس أماني . أما ما قلتيه عن إمتحان الشهادة صاح ليها نتيجة وما تخافي هنا مافي جلدولا غيرو والبتعده حدودو صوت عنجنا موجود ..
يلا ربنا يوفقك وتتحفينا بالدرر الغوالي ونحن في الإنتظار

مع تحياتي ومودتي

ألأخ خضر حسين خليل:

شكرا لترحيبك, من المتابعين بأعجاب لكتاباتك..
مبروك الخامس..

هسي بمبروك الخامس دي أحتمال أكون أتصنفت شيوعيه عند ناس كتار,
مش لي حق ألاوز, غايتو أحتمال أجي راجعه أمسحها بعد شويه,,

شكرا,,

الاخت اماني مرحب بيك في حوش بكري... وبعدين يااختي شوتي ساي والله هنا الناس شايتنها مصنقعة وفي الاخر اخدو وسام المناضلين... وفي ناس شايتنها ولا عارفين بكتبوا في شنو اخدوا وسام ايضا. وفي ناس الواحد يفتح بوسط ويضع نقطة وتلقي الردود بالكوم.. اهم شي قبلي ما تشوتي حاولي اعملي ليك اتفاقيةمع مجموعة من البورداب تتفقي معاهم يردوا ليك في كل بوسط وذلك بالمثل وحتى لو ما كتبتي ولا دخلتي المنبر يلحقوك وين اماني مشت واماني طولت .........

وظلامية والاسامي الثانية دي منتظرك وهذا اضعف الايمان.

تحياتي
امين

الأخ الأمين:

أهلا بيك, والله ضحكتني شديد, تصدق أنه أنا دخلت المنبر ده مابعرف فيه ولا زول معرفه شخصيه,
بس متمنيه أطلع منه بصداقات طيبه وعلاقات أخويه..
القروبات دي بتذكرني الجامعه الجامعه..

شكرا,,

أماني.

مرحب بك في البورد.


دينق

مرحباً بك يا أخت أماني
والدار منورة بيك

الأخت الفاضلة عبري عن رأيك بكل حرية وشجاعة
وفي نهاية الأمر مهما اتخلتفنا نظل اخوان
والأختلاف لا يفسد للود قضية في فهم الواعية/ الواعي
المدرك للغياية التي من أجلها نعبر في المنبر عنما
في نفوسنا ودواخلنا

تحياتي ومودتي

الأخ خالد المنسي:

نصيحتك غاليه,
وأختلافنا كسودانيين أون لاين هو أجمل حاجه في البورد,
زي ما أجمل حاجه في الوطن السودان أنه بيشمل كل التباين والتنوع ده,
التنوع اللي ربنا قال عليه:" انا جعلناكم شعوبا وقبائل لتعارفوا"..
يبقي الأختلاف في المنبر فطره لو أمتزجت بتعارف وتالف نكون حققنا حكمه الهيه,,

مشكور,,

الأخ أيمن دياب:

شكرا علي مرورك وعلي الترحيب,,

الأخ دينق:

والله أنا مما شفت الرد حقك القعده غالباني,
غايتو قمت وقعدت كم مره, ومشيت أشتغلت شويه وعملت حاجات كتيره خلاص..
يعني أنا لو قايلاك شخصيا كده بترحب بي, كان غلبني أكتب البوست ده ذاتو..

المهم عندنا كلام كتير لقدام..


أحترامي,,

اخت امانى مرحب بيك وبدايه موفقه إن شاء الله

اخت امانى

بعض الناس هاريننا بوستات

تلاتة بوستات فى اليوم ورابع عند اللزوم!!

جايب معاى هدية تشجيعية !!

الأخ حسن مكاوي:

النفوس كان اتطايبت البورد بشيل عادي,,
خلي الناس تكتب وتمتعنا,
علي فكره التصفح ده جميل خلاص,
ما بتكون شايل هم أي حاجه, بس عايز الناس تكتب وتبدع ,,

شكرا علي الهديه التشجيعيه,,

الأخ مصطفي ساتي:

شكرا علي البطاقه الأنيقه, وعلي مرورك,,

Quote: المشكله أنه الحاله دي لو أستمرت كتير, أحتمال كبير أرجع الباسورد لصاحبه ويادار مادخلك شر..

بدايه موفقه ..
شكلك واضح حكايه شديد ..
وده المطلوب ....
ألف مرحب بيك !!
كل الود
محمد كابيلا

مكث جاليلو خمسة عشر عاما في ديره العلمي يفكر بطريقه (كيف يقول للعالم والرهبان والمتجولين في السوق وساسة الخيل والعربجيه

والذين يقرعون الاجراس في كل صباح احد( سيندثر تحت انقاض السبت الذي سبقه!)

وعندما خرج عليهم بقولته الشهيره( ان الارض كرويه)؟

قرأوا علي روحه فاتحات كل الكتب السماويه, وطالب بعضهم بصلبه وحرقه ثم, إرساله لجحيم خاص بالزنادقه!؟؟

ثم..............

اليوم ننعم بكرويتها وندور معها كيفما شاءت وكيفما نشاء ..

اكتبي كما تشاء حروفك وليقرأها من يريد.... ولا يريد في أحايين أخر

وعندها (سيكون الجحيم هو الاخرين).. الكلام الخير دة لجان بول سارتر

ياخ مرحب بيك اضافه للجمال وطبز عين القبح... امسكي في كلام خضر دا كويس

الأخ أبراهيم كوجان:

كلماتك أنيقه ومرتبه,,

عندنا في علم الوراثه واحد زي جاليليو ده, أسمه جريجور مندل,,
أفني عمره في أبحاثه الصغيرة في حديقة الدير على نباتات البازلاء وزهورها وبذورها,
ولم يعرف أحد عنه شيئا حتي مات,
نشر أبحاثه عام 1866 ليعثر عليها العلماء ويجعلوا منها أساسا لعلم الوراثه التقليديه عام 1900


أمل كفيل ببعث روح المثابره في كل متردد,,

شكرا,,

الأخ محمد كابيلا:

والله عندي حكايات كتيره خلاص, مما بكري أداني الباسوورد طشت,,

بقت عندي متلازمة فتح الصفحه والقهيي,,

خوف شديد بعيد عنك,,

شكرا علي مرورك,,

الزميلة أماتى
ألف مرحب بيك
وفى انتظار أول كتاباتك ( بدون خوف )

الأخ سمير:

شكرا علي الترحيب

حبابك يا غـــاليه
مرحب بك في المنبر..طــله جديده و امــــل
اكثر واكثر
_______________________________________________

ليتهم يعلمون ان عمر اللحظـه في بعـدك يا خـرطـوم سنين طـوال.
د شهـاب الفاتح ـ كوالالمبـور

هلا يا اخت اماني الامين
وحبابك ومرحب بيك في سودانيز اونلاين..
ويازولة زي ماقال ليك صلاح الليون شوتي واكتبي عقلك وجدانك
وماتشيلي هم وتسلحي بشجاعة الدفاع عن ارائك ان كنتي علي صواب ومرونة الاعتذار وامتصاص الخلاف
وتحويله الي امر ايجابي بكل اريحية...
كوني اماني كما تعرفين روحك فحتما سيكتب لك النجاح باذن الله

الأخ عبد الكريم:

أول حاجه أسمح لي أقول ليك يا كيكي, (لو ما حصري)..
ثانيا أنا من أشد المعجبين ببوستاتك, وكلامك كلو علم وفن وهندسه,,

الصلابه والمرونه في ان واحد, نصيحه غاليه من شخص مثقف وناجح أسفيريا,,

شكرا علي مرورك,

الأخ دورنقاس:

شكرا علي الترحيب

د. شهاب الفاتح:

أسلوبك دائما أنيق ومهذب..


مشكور,,

يا بت شوتى سااااااااي

انتى قايلة الناس البتكتب هنا دى ارجل منك

ابقي شايتة

ولا يهمك فى ياتو قون

المهم الكورة تكون معاك طوالى

لانو لو قلعوها منك حا تمشي المدرجات


اهلا بيك

أمانى،
بعد كلام الناس الفوق دى كلها،
ما بقدر أقول ليكى غير،

أسمعى نصيحة الأقدم منك،،،،،


و مرحب بيك......

يااااااااااختي ..
الناس دي سايطنها بعود
مرحب بيك ..










يا رشاشه ............!

مرحب يا اماني


- خارج النص : انتي اماني بتاعت الصين ؟ - مع الترحيب في كل الاحوال !

أهلااااا د. وليد:

أيوه والله أماني بتاعت الصين,,

الصينيين اليومين ديل عندهم أعياد الربيع ورأس السنه الصينيه (الكاليندر حقتهم مختلفه)..

المهم شغالين ألعاب ناريه زي المتفجرات واحد ليهم تلاته يوم,,

رعب صاح بقينا زي ناس غزه (سابقا), اتخيل لي نفسهم في حرب بس مالاقين طريقه,,

أضف الي ذلك الرعب من تجربة الكتابه في المنبر,,


قاعده أقرأ ليك طوالي وعندي معاك كلام كتير في بوستاتك القيمه,,


أحترامي,,,

Quote: مبروك الخامس.. هسي بمبروك الخامس دي أحتمال أكون أتصنفت شيوعيه عند ناس كتار, مش لي حق ألاوز, غايتو أحتمال أجي راجعه أمسحها بعد شويه,,

طلعتي شيوعية و الدليل

آلولو.


مرحبآ بك على متن السفينة

أماني
سلام ولي قدام
أول حاجة انا جديد (لنج) بالمنبر
زيك كدة ..
مرحب بيننا وبينهم ..

الحاجة التانية :
انا غايتو ما كنت متردد أصلاً في الكتابة
لأني طلبت العضوية بكامل قواي العقلية
( يعني عندي كلام عايز أقولوا هنا )
وانت كذلك في تقديري الخاص عندك أفكار ورؤى
كثيرة جداً وخصوصاً وانت من رواد المنبر قبل
فترة حسب ما ورد في حديثك ..
عشان كدة نحن كلنا أمل في أن ترى هذه الأفكار
النور من خلال بوابة سودانيزاونلاين ..


الف مرحب
وياريت تكتبي



عبد الهادي ابراهيم

الأخ عبد الهادي:

مشكور علي شجاعتك, وعلي تشجيعي,,
ما كان حيكون عندي أحساس بالخوف, لوما كنت متابعه ,,
السودانيين بقو مامستحملين بعض,, روحهم حرقتهم خلاص,,
ما في زول عايز يسمع غير رايو, ده غير الأستخفاف بالغير,,

يعني العاقل اللي يشتري دماغه علي قول المصريين,,

ربك يسهل,,

شكرا مره تانيه,,

الأخ فيصل:

أهلا بيك, السفينه ياتها, غايتو لو حقت سودانيز أون لاين يا هلا,,

الشيوعيين يستحقوا التبريكات,,
بعد ما كان مافي زول بيقدر يلمح لي أنه هو شيوعي, بقوا يعملو مؤتمر في قاعة الصداقه,,
وكمان بقيت الأحزاب السياسه تشارك,

الجدير بالأشاده التجربه في حد ذاتها
لأنه الناس مابقت تخاف تعبر عن ارائها,

وده نفس الحصل لما الناس طلعت ملايين في تشييع السيد أحمد الميرغني,
ديل قالو للناس نحن أتحاديين وختميه بالصوت العالي,
وكان معاهم بقيت الأحزاب السياسيه برضو..

ونفس الحصل لما ناس دال وكجبار وقفوا قدام الوالي بمنتهي التحضر وهتفوا هتافاتهم وعبروا عن رأيهم,,

ده المطلوب لو في المنبر وللا بره في الشارع,

نساند بعض, ونختلف بتعقل,,

يا اختاه

Quote: وناس تانين حيطلعوني ظلاميه, وفي نفس الوقت حأتصنف معارضة ضل بارد عند ناس تانين

..
اذا انتي ظلامية خليكي في ظلاميتك عشان النور بجهرك
اما اذا بقيتي معارضة فتعالي لينا في كجبار عارض معانا مافي حد بيحوشك

بقيت معارضة واحدة فقط اسع في الساحة
معارضة السدود في المنطقة النوبية بس

معارضة الحكومة مافي تاني لانهم كلهم اسع داخل الحوش
بيرصرصو في كراسيهم عشا يستقبلوا المصوتين الغلابة عشان يشربوهم بيبسي تحت خيمة هجير الظلال وظلال الهجير.

أماني
انا شايت عكس الجماعة البجملو ليك الطريق ديل

ياما حاتتعبي وتحردي المنبر وترجعي تاني

طالعي سفر ود البشرى في خصوص تكتيكات الكتابة للبرالمة امثالك

القاليك توري خلق الله هنا انك خايفة منو

برضو مرحب بيك شقيش ماتكتبي

الأخ حيدر حسن ميرغني:

عارفه والله, وده المخوفني ذاته,
بخصوص سفر ود البشري, الرابط لو سمحت, لأني ما عارفه أعمل أقتباس,
الكلام بيجيني بكود لأنه الوندوز ما عربي, قصه غريبه كده,,

شكرا,,

الأخ زمراوي:

تاني مره الأشاده بأهلناالنوبه علي مواقفهم القويه والمتحضره,,

لما بشوف الفيديو بتاع الوالي ولاللسد, بحس أنهم بالجد رجال,,
عارف من النادر أنك في السودان تشوف مظهر راقي زي ده,,
يعني كتبو لافتات بوضوح وهتفوا من أماكنهم بشجاعه, لاعملوا شغب ولا شتموا زول,
سمعوا صوتهم عالي للناس..

أما حكاية معارضه وظلاميه فما لازم أكون تبع ديل وللا ديل,,

أنت عارف أني كتبت الكلام ده علي سبيل الجمع بين المتناقضات لاأكثر..

مشكور,,

الأخ عبد الله كع:

برضو رشاشه؟؟!!

عارف البوست ده زي تمارين الكوره كده, بمشي زي الترتيب لكن بعدين اللعبه كيف؟
مابتقدر تحدد ..

مشكور,,

الأخت هاله:

سعيده جدا بمرورك وبنصيحتك..

شكرا ليك..

الأخ خالد:

بالجد سودانيز أون لاين عندها رهبه,
المتصفح للبورد بيحس بيها لما يجي يكتب,
وأقرب مثال التصحيح اللغوي الدقيق من بعض الزملاء,
والمسائله القويه عند الخطأ,
غير المتخصص (زيي كدا) لازم يعد من واحد لألف وبعدين.. تاني يعد...

مشكور,,,

يازولة اكتبي ساكت
ولا يهمك

اوعك بس من هناي داك

كامل تضامنا مع اماني الرجافة

انا لا مبدع ولا كاتب ولا موسيقي ولا قاص ولا شاعر ولا ولا ولا ولا

بالرغم من كده قاعد من سنة 2002م يعني من زمن البورد كان شغال بالفلوبي دسك

الناس الجايطه دي كلها موديل جديد وبودي ماحديد لووول يكه يعني اقل صدمة طوالي الحلبي ( الخرده)

عشان كده ماتشيلي هم صولي وجولي وفضي الفي بطنك كلو ولا يهمك قول فلان او علانة المهم تريحي ضميرك

يقولوا شيوعية يقولوا حركة شعبية يقولوا مهمشة يقولوا جلابية بيضه مكوية ولا يهمك واثقين منك

برطعي سااااااااكت مابتجيك عوجه بس امشي بالهاي وي الطرق الفيها الحفر ابعدي منها

اهدي ليك اغنية عبدالقادر سالم

انت عابر سكه فايت ولا جيت قاصد تزورنا

اسف للاطالة

تحياتي

زاتووووو

الأخ :ALZOLZATOO

قاعد من سنة 2002 يعني ليك 7 سنين في البورد,,
حردت فيهم كم مره؟, وزعلت كم مره؟,,
بس أكيد تجربه ناجحه والدليل الأستمرار,,

كلامك علي العين والراس,,

وهديتك مقبوله,
شكرا,,,

اهلا بيك كتير ومنورة المنبر ..
اها بعد ده حبيبه نجى لحكاية التعامل فى المنبر لو قعدتى تفكرى بالطريقة تاكدى انك ماهتكتبى حرف ..
وان كان انا هسه شايفه انو البوست ده ذاتو فى حد نفسو زى مابيقولو تحرر من الحاله العندك ..
اكتبى رايك الانتى مقتنعه بيهو وشايفه انو بيعبر عن قنعاتك وختى فى راسك وانتى بتكتبى انو المنبر
ده ماحق ناس محددة صاحبو بكرى ابوبكر بس واحنا كلنا ضيوف عندو كتر الف خيرو.. وفى الحالة كلنا متساويين قديم على جديد
فى الحقوق نملك حق ابداء الراى حتى وان لم يعجب الاخريين .. طالما قلنا راينا بدون تجريح وتاكدى مافى اى مصمصة خشم ولاحاجه
والعايزة ولا العايز خليهو انتى البيهمك انك تكتبتى المقتنعة بيه وبس ..
تسلمى من كل شـر يارب ...

الأخت الحبيبه ماجده عوض خوجلي:

شكر عميق علي نصيحتك,
كلامك كله في المليان, كل كلمه وكل سطر عباره عن خلاصة تجربه,
شكرا علي نقلك ليها بمنتهي الوضوح والشفافيه,

سعيده بمرورك,,

الاخت امانى مرحب بيك
وانا سمعت الناس بقولو (الصقر إن وقع كترت البتابت عيب)!!
دحين ابقى لا جوه وقولى

تحياتى بلا حدود

Quote: المشكله أنه الحاله دي لو أستمرت كتير, أحتمال كبير أرجع الباسورد لصاحبه ويادار مادخلك شر..

.. رجعيو..
المانعك شنو عليك الله ما ترجعيو ..؟
اموووت واعرف بكري بجيب زي ناس اماني ديل من وين ..؟
قالت تفتح البورد وتقعد مقهية .. وفي ظرف يومين كاتبة ليها خمسين رد ..
يعني كان قعدتي يومين تاني بكري يسجل ليك الصفحة بتاعت تحميل الصور دي واللا شنــو..؟
اكيد كــوزة الزولة دي .. اصلو الجلابة والجلابيات من ما يجو البورد دا الواحد/ة ( ) تتمسكن بعد يومين التقول البورد دا حقها .


ـــ

أهلا الأخ علاء (تمبس):

هسي حتقول الزوله دي بتعرفني من وين؟؟
والله أنا ضحكت جدا لما قريت مداخلتك,,
أنت من الكتاب اللي أنا ما بفوت ليهم بوست أبدا,, أسلوبك بسيط, سلس وجميل,
وأحسن حاجه صراحتك دي,

طيب يا سيدي,
أول حاجه البوست ده, أول فرصه لي أنه الناس اللي أنا كنت بقرأ ليهم ,ومعجبه بكتابتهم (زيك كدا),
أتعرف بيهم, ويتكلموا معاي وكمان يشجعوني, (شفت الهنا اللي أنا فيه),,
يبقي لازم أي زول كلف نفسه مشقة أنه يكتب نصيحه أو يشجعني ساكت,
أرد عليه وأسمع نصيحته, وأعلق عليها كمان..

زي الكتابه دي مابتخوف لأنها زيها وزي التعامل العادي مع الناس, ما صعب,,

لكن الصعب انك تقول لي زول أنا بختلف معاك, أو انت في الحته دي ما صاح,
أو أنك تقول لي زول قضيتك الأنت مؤمن بيها دي من وجهة نظري المحدوده,, ما عادله,,
والأمثله كتيره وأنت سيد العارفين,,

ما عارفاك جادي وللا ما جادي في حكايت كوزه دي, لكن ماتتسرع في أنك تحكم علي الناس,,
خبرتك في البورد أنا محتاجه ليها, وصراحتك برضو, عشان كده خليك قريب,,,

شكرا علي وقتك الغالي,,

الأخ علي أحمد النعيم:

شكري بلا حدود

Quote: ولقد نشأت الحياة وسط الخوف.. قال تعالى في ذلك: ((لقد خلقنا الإنسان في كبد)) والكبد المشقة، ولقد دفعت هذه المشقة، التي وجدت الحياة نفسها محاطة بها، الخوف في أعماق الأحياء.. ولولا الخوف لما برزت الحياة، في المكان الأول، ولما ارتقت وتطورت، في المكان الثاني. ثم هي إن لم تنتصر على الخوف، في آخر المطاف، لا يتم كمالها.. وإنما تنتصر الحياة على الخوف عندما تقوى الحاسة السادسة (وهي الدماغ.. ووظيفتها الادراك المحيط، والموحد ((بكسر الحاء) لمعطيات الحواس الأخرى - اليد، والأذن، والعين، واللسان، والأنف - في الحس، والسمع، والبصر، والذوق، والشم.. فإذا قويت يكون إدراكها لكل شئ عظيم الشمول، فكأنها تحسه، وتسمعه، وتراه، وتذوقه، وتشمه، في آن واحد)، وتدرك الأمر على ما هو عليه، على النحو الذي وصفنا، ويومئذ سيظهر لها أن الخوف إنما هو مرحلة صحبت النشأة في إبان جهلها، وقصورها، وأنه ليس هناك ما يوجبه في حقيقة الأشياء.. فإذا بلغت الحاسة السادسة هذا المبلغ، انبسطت الحاسة السابعة - القلب - واطمأنت، وانطلقت من الانقباض الذي أورثها إياه الخوف، وأخذت تدفع دم الحياة قويا إلى كل ذرات الجسد، وكل خلايا الجلد، تلك التي كان الخوف قد حجرها، وجعل منها درقة، ودرعا لصيانة الحياة البدائية.. وبذلك يعود الشعور لكل الجسد، ويصبح حياً كله، لطيفاً كله، جميلا كله، غاية الجمال..

(أنا خايف) لأني لو قلت ليك الكلام ده جبتو من وين الهاكر ح يجي يدخل هنا وبوستك ده في الخور ما حا تلمي فيهو..

ولو أبديتي اعجابك بيهو يمكن يقطعوا راسك!

لكن أكيد في ناس كتيرين (مصنفين ومنبوذين) حافظنو عن ظهر قلب!

فمرحب بيك ونورتي

وبوستك ده في حد ذاتو
دليل على "شجاعتك"

حبابك الف
اكتبي سااااي
ما تخافي

وه

واحد متلبت في ركن البوست

Quote: النفوس كان اتطايبت البورد بشيل عادي,, خلي الناس تكتب وتمتعنا, علي فكره التصفح ده جميل خلاص, ما بتكون شايل هم أي حاجه, بس عايز الناس تكتب وتبدع ,, شكرا علي الهديه التشجيعيه,,

...

Quote: حبابك الف اكتبي سااااي ما تخافي

...

مرحب بيك امانى .. مدخل مناسب

عفوا خضر ونعيم

وشكرا ًبرضو ..

..

.

Quote: أيوه والله أماني بتاعت الصين,,

يا اماني
اهااا ممكن تكتبي لينا عن القهاوي في الصين بدون خوف
صحي الجرسون بيقول :( وعندك الفين شاي وصلحو )










_
حبابك

عبد الوهاب علي الحاج:

حبيب عموم بورداب الخرطوم,,

حكاية الشاي دي ممكن لأنو الشاي هنا ألف صنف ونوع,,
يعني أي زهره أو ورقة شجر عملوا منها شاي,,

أتشرفت بمرورك,,

الأخ خطاب:

مرحب بيك, وصباحك خير

أهلا نعيم:

والله أنا بس خايفه منك أنت دا..
ما بترد علي في الفيس بوك ليه؟

شكرا,,

الأخ العوض الطيب:

اسفه لتأخر الرد, بس أمبارح أدرك شهرزاد الصباح,
وبما اننا في أقاصي الشرق, فليلنا بليل أول ناس,

قلت لي جايب معاك شرك للهكر,

شكرا علي الترحيب والمرور,,

الأخت فدوي الشريف:

أهلا بيك,

هناي منو اللييييييييييييله,,
يعني أنا يادوب ثبت شويه وبقيت أرسل ردود وأكتب لي سطر سطرين,

مالك عايزاني أقعدأتلفت,,

شكرا علي مرورك,,

تحياتي

نصائحي

كوني متوازنة.

أبعدي عن الكيمان كوني (محايده).

أبعدي عن المناكفات.

أبعدي عن تكسير التلج.

ولا أقول ليك (خليك في العزاءات - والأفراح)

عموماً أكثر ما يمكنني أن أختم به (ترحيب كبير بيك) هنا.

أماني الأمين
كيف حالك وجيداً جيتي والبيت بيتك أستريحي لي قدام
بس جيتك أتزامنت مع الهكر يا كافي البلا

Quote: كان طلب مشاركتي بناءا علي رغبه مني (بعد تردد طويل) في طرح أفكاري و التداخل في العديد من المواضيع الثره التي يتم طرحها..

ونحن منتظرين أفكارك عشان نقوم نصنفك أنت تابعة لأي جهة أحزاب التوالي ولا الحركات المسلحة ولا معارضة الضل البارد لازم نعرفك لازم نعرفك مافي طريقة وهل أنت من الهامش والمركز منتظرين التصنيف الخاص بك .

Quote: المشكله أني كل ما أود أن أفتح بوست أو أتداخل بتجيني حالة بتاعة رعب ما عاديه.. يعني بفتح الصفحه حقت التداخل و بقهي ...

والله يا أماني الحذر واجب في إبداء طرح الرأي أصلو في ناس في المنبر دا لو أشربكوا فيكي أحلك منهم رب العالمين .

Quote: أها بعد داك أنا بحب الكوره.. معناتها لو هلالابيه وللا مريخيابيه في الحالتين رشاشه وتبع الصهاينه.

أها يا أماني مافي طريقة إلا أن تفصحي عن نفسك رشاشة ولا صهيونية يعني أنت مع محمد عادل ولا مع هارون دياب بلاهي لو سمحتي جاوبي بسرعة سؤال لا يتحمل التأخير .

Quote: بقوم بقرأ المداخلات كويييس ورايي بحتفظ بيه لنفسي وبقفل الصفحه

ما ينفعش تحتفظي برأيك لنفسك لازم تكتبي رأيك عشان نحن نقرأ رأيك ونقوم نجيهك في الرد .

Quote: مسحها الهكر ماعارفه ليه؟

ما الهكر دا عارفك برلومة لسة أسمك بقلم الرصاص .

Quote: المشكله أنه الحاله دي لو أستمرت كتير, أحتمال كبير أرجع الباسورد لصاحبه ويادار مادخلك شر..

لا عليك الله ما ترجعيه أديني ليه عشان عندي واحد منتظر باسورد ليهو فترة بكري لسة ما نظر في أمرة .

Quote: هسي أنا بكتب في الكلام ده وخايفه, فيا جماعة الخير محتاجه تشجيعكم, ونصائحكم..

الخواب ربى عيالوا ونشجعك تشوتي ضفاري على طول وتنتقدي كل من يخالفك الرأي وتتهددي وتتوعدي وتبرزي العضلات والعين الحمرة لناس المنبر هههههههه

Quote: وفي حراميه مره مره بيختفو ليهم حاجه ويجروا (زي الهكر), وكده,,

الليلة شيلي شيلتك يا أماني تشبهي أخونا الهكر بالحرامية السواد والسجم على باسوردك
.
.
أماني والله الكلام الفوق دا كلوا عبارة عن مزح ساكت بمزح معاك ما تزعلي وحبابك مليون ونتمنى أن تكوني إضافة حقيقية للمنبر والكل هنا إخوة

مرحبا بيك

فعلا هذا المنبر حافل بكل صنوف المحن السودانية, ولكنه ليس مدعاة

للخوف ابد, فالاهم ان تعبري عن نفسك مهما كانت الكلفة ومهماتكن النتائج

ومااظنك في حاجة لشهادة حسن سير وسلوك من احد, فكوني كما انت, تكن

الاشياء كما تريدين

Stay well

ـــــــــــــــــــــــــــــــــــــــ
حبابك شرفتي

الاخ محمد عثمان محمد طه:

الأغنيه جميله, والبت دي غنايه وشجاعه,

(بس في التلفزيون قاعده ترفع لي ضغطي)

شكرا, أتشرفت بيك,,

الأخ Hisham Osman

المنبر حافل بناس مثقفين ومتخصصين وليهم خبره طويله في المجال ده,
وده المخوفني, زولتك أول مره تكتب في بورد, أتخيل, هسي في شجاعه أكتر من كده,,
أول مره وفي سودانيز أون لاين شخصيا,,

ربنا يستر,,

شكرا جزيلا,,,

الأخ حسن مضوي:

أنا لو بقدر أقول وأصرح ماكان الرجفه دي حصلت,
وناس المنبر قعدوا يهدوا فيني,,

ربنا يثبت اليقين,,

أما أخونا الهكر فربنا يجعل كلامنا خفيف علي قلبه,,

شكرا علي الترحيب,,

الأخ عادل التجاني:

قربت تقول لي ولا أقول ليك خليك متصفحه ساي,,

نصيحتك صادقه وأنا فهمتها,,

مشكور,,,

امانى
اهلا وسهلا.

الأخ :Zakaria Joseph

يا أهلا بيك, مشكور علي الطله,
وأنشاءالله دائما بينا تواصل جميل,,

يا الف مرحب اختى امانى الامين وإياكى والخوف من اى شئ (وش كلو رجاااااااااااااااء)











كل التحايا


شول اشوانق دينق
_____________________
جينا بدون تراحيب والله يا امانى ياخ تصدقى!!!

ألف مرحب بيك يا أمانى ,, وأدخلى ساى المسأله مامحتاجه
كل الرهبه دى ,, يمكن إنت تكونى أحسن من كتيرين هنا ,,
بس طلب عاجل قبل ما تعملى أى حاجه , أركبى ليك حافله ولا
بص ولا رقشه وأمشى جيبى لينا دوما وتعالى . طالما إنت فى
الصين ,, يلا منتظرنك ,, تحياتى ,,

الأخ كمال سالم:

أنا ذاتي عايزه أوصل دوما وألاقيها,,

مش يمكن تعقلني وتخليني أغير رأيي, وأجلي موضوع الكتابه ده,,

شكرا علي الترحيب,,

أهلا أهلا:
شول اشوانق دينق
حبيب الكل شخصيا,

لما بقرأ ليك,
روحك الطيبه والتسامح اللي أنت قاعد توزعه علي الناس هنا,
بيخلوني أقول يارب لو في بس 10 زي شول ده في جنوب سوداننا الحبيب,
حنكون دايما مع بعض حاجه واحده,

لكن عارف يا شول, في,, كتاااار أنا بعرفهم,, كلهم طيبه وتسامح,

عشان كده حقو نتفائل أنهم يغلبوا الناس اللي عايزين يفصلوا جنوبنا عن الشمال,

من جوه أو من بره,

تحياتي وأحترامي,,

أماني مبروك الباسويرد

عشان أمورك تمشي في المنبر ده لازم تكوني واحد من الحاجات دي

معارضة منضالة من الدرجة الأولي وتشبي لي أي زول في حلقو وهاك

يا خنق كده الكل بعمل ليك حسابو وبوستاتك بكون عدادها رامي

يا خفيفة وشليقة وظريفة وهنا حيطبقو عليك الرشاقة الكتلت إشراقة والهكر لو لما في مسنجرك

دي مامسؤليتي

أها يا تسوقي الدلال علي الجماعة وبوستاتك تكون من نوع وصفوا لينا بيتكم وأقعدوا أشربو قهوة وقهوتك جنزبيلا كتير فمعروف في المنبر ده القهوة والدلال بتلم النحل والنحل بقرص


في النهاية الأقلام المحترمة والتي تلقي الإحتفاء الذي يعادل ماتخطه تعد علي أصابع اليد

خشي لي جوة وإتطقشي

سلام

الأخ محمد الطيب يوسف:

غايتو نتوكل علي الله ونبقي لي جوه زي ما قالو,,

والتصنيف يجي لي قدام,

كلامك ميه الميه,,

مشكور

Quote: أيوه والله أماني بتاعت الصين,,

امانى أمين
معليش شكلك داخلة متنكرة للمنبر وما دايرة زول يعرفك بدليل اضافة الاف واللام لاسم أبوك وبقيتى أمانى الأمين بدل أمانى أمين الاسم ال عرفناك بيه فى جامعة الخرطوم .. لكن طبعا السودانيين شيالين حال .. لو مشيتى الصين ذاتها بعرفوك .
واتأكدت انه دى انتى من اسلوبك فى الكتابة .. وماتخافى ما ح أفضحك مع الناس ديل وأقول ليهم البت أمانى دى على درجة من الثقافة والاطلاع وعندها تجارب مميزة فى مجال الكتابة واهتمامات عديدة بالأدب و( السياسة كمان ) بس الفترة طالت ما عارفك هسة ( سياسيا ) شايتة وين .. وكمان ما ح أقول ليهم انك دارسة فلسفة أيام جامعة الخرطوم كانت جامعة .. عشان كدة ما تخافى وسرك فى بييييييييير .
بعد السنبن الطويلة دى غريب انى اتذكرتك الليلة قبل اقرا البوست حقك .. لقيت شهادة جامعية بتاعتك كان مفروض استلمها لسفرك .
أمانى .. أهلا بيك تانى ( بتاعت معرفة ) المرة دى ومشتاقين .

امانى ....
صحى الصين ... فيها حصين

الأخ سمير شيخ أدريس:

أولا: أنا أسمي أماني الأمين يعني بالألف واللام معرف.

ثانيا: أنا قريت في جامعة الخرطوم لكن ما فلسفه ولا اداب أصلا
ولو قريت المداخلات الفوق حتعرف أني ما عندي علاقه بالمجال ده,

ثالثا: دي أول مره (والله علي ما أقول شهيد) أكتب في الملأ كده,
يعني ما حصل كتبت والناس قرت لي, ما عدا أصحابي المقربين,

رابعا: قلت لي الفتره طالت, وأيام الجامعه كانت جامعه
الغريبه أنا أتخرجت 2004

خامسا: طيلة فترة الجامعه أنا كنت من ناس القرايه, ولي هسه من ناس القرايه وحياتك
يعني أركان زاتو مره مره, بس ده مابيمنع أنه يكون عند ارائي الخاصه,,

أخيرا: حقو قبل ما تتكلم بثقه كده تسألني كم سؤال يمكن تتأكد بيهم أنك بتعرفني
بعدين تحكي الحكايه دي كلها,


بأختصار أنا ما عارفه أنت بتتكلم عن منو, لكن والله أنا مالزوله الأنت بتتكلم عنهادي,,

والحمد لله أنه د. وليد معانا هنا في البورد, ونعيم ديل علي الأقل شافوني وبيعرفوني,,


عموما أتشرفت بمعرفتك من هنا ولقدام,,

أحترامي,,,

الف مرحب بيك يا اماني
اتمنى لك اقامة طيبة بيننا

الأخ خال العبيد:

شكرا علي أمنياتك الطيبه

مرحب بيك
Just say what is right
and don't even bother if the whole world collapsed because of that

WELCOme


SHE was one of the BIG and BIG
???????????KOZAH
at khartoum University


TIMBUS you are abousltely right she is KOZAH
???????????

الأخ El hadi A.bashir:

والله العظيم؟؟؟!!!

كمان معاها welcome
هسي أنا مافهمت ده بناءا علي كلام الأخ سمير وللا ده شنو؟؟

أمال وين "فتبينوا أن تصيبوا قوما بجهالة فتصبحوا علي ما فعلتم نادمين"

مش قلت ليكم,,,, الحاله أنا ما كتبت حاجه لسه,,

حسبي الله ونعم الوكيل,,,

الأخ نصر:

ربنا يسهل,,

شكرا علي النصيحه,,

يا مراحب يا اماني
لو في الصين نحنا جيران
كونق سي فانساي





شايفة التحرشات بدأت كوزة وسجم رماد خلاص حيهدر دمك..

عادة لما تجي واحدة يلا بتحرشو بيها يغلطو فيها لزوم لفت نظر بعداك يصالحوها
وهاك يا ماسنجر...

اقري البوست دا معد خصيصا للناس الجداد

كومى... وكومو.... وكومك

ودا كمان

وتمبس بهظر ساكت الايام دي مركب ليه مكنة مناضل ضل بارد وكد(وش مادي لسانو)ا

هداية الضهبان فى فرز الكيمان... للقادمين الجدد

دكتوره نجاة:

شكرا علي الهدايا القيمه
سوف أعكف علي قرائتها بتأني

مودتي

مرحب بيك يا أمانى

الأخ طارق أبوشنب :

مشكور علي الترحيب

مرحبا بالأبنة أماني الأمين في رحاب
سودانيز اون لاين إضافة جديدة لبورداب
الصين علي قلتهم وشح مشاركاتهم بعد
اختفاء قلم الحكيمة الأخت دوما وننتهز
هذه السانحة لنناشدها بالعودة استجابة
لنداءات عشاق قلمها ونقول لها "المنبر
بعدك أصبح خلاء"

يحيي

الأخ يحي مصطفي:

شكرا جزيلا

مرحبتين با امانى
عليكى بالآتى
1- حبتين للطمام
1- تربطى عيونك وتطلعى الفى بطنك
2- وتقولى البيرضيك

بس بأكد عليكى حبتين الطمام
هشام

الأخ هشام كمال:

شكرا علي الوصفه الطبيه

وعلي الترحيب,,

امانى الامين
الف مراحب
اكتبى اكتبى كما تحبين ....
منتظرينك ...

Amany

I didnot rely or state my quiry because of certain circustances or someone said so and so.....
I have no single doubt you are KOZAH

I think no need to cover your political affilation???
secondly, this web side full of all walks of colors

and welcome again
????????

Quote: الأخ دينق: والله أنا مما شفت الرد حقك القعده غالباني, غايتو قمت وقعدت كم مره, ومشيت أشتغلت شويه وعملت حاجات كتيره خلاص.. يعني أنا لو قايلاك شخصيا كده بترحب بي, كان غلبني أكتب البوست ده ذاتو.. المهم عندنا كلام كتير لقدام.. أحترامي,,

أماني.

واضح أنك مكونة فكرة معينة, طيب خلينا نمشي لقدام علشان نعرف الفكرة دي شنو بالضبط وما نسبق الاحداث.


دينق

Quote: أهلا أهلا: شول اشوانق دينق حبيب الكل شخصيا, لما بقرأ ليك, روحك الطيبه والتسامح اللي أنت قاعد توزعه علي الناس هنا, بيخلوني أقول يارب لو في بس 10 زي شول ده في جنوب سوداننا الحبيب, حنكون دايما مع بعض حاجه واحده, لكن عارف يا شول, في,, كتاااار أنا بعرفهم,, كلهم طيبه وتسامح, عشان كده حقو نتفائل أنهم يغلبوا الناس اللي عايزين يفصلوا جنوبنا عن الشمال, من جوه أو من بره, تحياتي وأحترامي,,

هههههه

أماني.

ده كلام شنو ده?

أنتي لسه جديدة وأنا بديك حسن الظن The benefits of the doubts

كده راجعي كلامك ده كويس وشوفي الغلط فيهو وين


دينق

الأخ دينق:

يامرحبا,,

أبدا والله بس أنا بخاف من أمتحاناتك دي,
ناس راجعي ورقتك, وشوفي أنتي غلطتي وين,,

المهم أنا قصدي أنه الأخ شول علاقاته طيبه وبينشر في المحبه..
وفي رائي المتواضع أنه التسامح والمحبه هم المطلوبين,
وهم موجودين أصلا في أغلب الحالات,
ولو قريت تحت شويه حتلقي انه قلت انه في كتاااار وأنا بعرفهم,,
حكاية في 10 وفي 15 فهي لازمه تقال للشخص علي سبيل الأطراء,
يعني أي زول رائع في أي مكان بيقولو ليه لو في 10 زيك يا سلاااام, وكده,,

المهم لو الكلام فيه خطأ أو زعلك,,
اسفين يا سيدي, وخليك دائما في حسن الظن,,,

أحترامي

أمانى الامين
آسف للخلط بينك وأمانى أمين المقصودة ..والصدفة وحدها عى ال خلقت تشابه الاسماء .. ايضا أمانى امين مقيمة فى الصبن منذ فترة .. فاتخيلت انها هى ..شوفى السودانيين بقوا كتار فى الصين لدرجة تشابه الاسماء .. عموما صاحبتنا أمانى أمين فى الصين ولو انتى هناك فتشى عنها واعرفيها وهى انسانة اكثر من رائعة وجديرة بالعرفة .. ومنها تدينا خبرها المقطوع عننا من زمن .
شكرا وبعتذر تانى للخلط فى الأسماء

الأخ سمير:

أعتذارك مقبول

عادي يا سيدي

السودانيين في كل مكان وتشابه الأسماء موجود,

شكرا,,

منوره

وحبابك ملايين

الحاج العوض المسلمي

عمدة أو رئيس بورداب الخرطوم شخصيا

شكرا علي ترحيبك ومرورك

اماني الف مرحب بيك ياحبيبة

وكوني انتي..لاغير

انحنا لينا قرابة الست سنين ولسه جداد...يعني مافي حاجة اسمها برالمة وسناير هنا...حسب رأيي الشخصي.
مرحب بيك.

الأخت الحبيبه حنين:

متابعه لبوستاتك وسعيده بالتعرف عليكي

خليكي قريبك لأنه خبرتك,
الصداقات والاحترام البتتعاملي بيهم
والوعي المستمره بيه

يخلوني عايزه أتعلم منك

مشكوره,,

الاخت أمانى

مرحبتين حبابك

الشباب ماقصروا معاكى فى تقديم النصائح . مدام أنتى متابعه عارفه الحاصل شنو .

أكتبى بحريه تامة والناس حره فى التعليق ما دام الاراء مطروحه للكل . كما ترين

هدا المنبر للونسه والاجماعيات والمجاملات المواضيع الجاده قليله وروادها قليلين

ومرات تكون فيها كتاحه.

عليك بنصيحة الدكتوره الشله أم شىء .

العزيزة أماني

عدت الآن فقط لمتابعة هذا الخيط ,

وددت أن اتقدم باعتذاري كون السؤال عن الصين جاب ليك المشاكل والشبك دي ...

يعني كان ممكن أرسل ليك في ال e-mail وخلاص , لكن طبعا انا ما اتخيلت القصة ح تجر كدا ...

عموما أكرر ترحيبي بأماني الأمين التي لا علاقة لها بأماني أمين ولا بتخصص الدراسة المشار اليه .





.

الأخت اسيا

والله متابعه لكن طبعا من بره ما زي من جوه

من ما دخلت رجلي بقيت أتلفت,,

زمان بقرأ وبطلع بالمضمون أو الخلاصه

لكن هسي جنس تدقيق

الكلام ده صعب شديد وحياتك

مودتي ومشكوره

و منو ال قال ليكم أمانى أمين ال قاصدها أنا ( كوزة ) بغض النظر عن اتجاهها يكفى انها كانت من شرفاء المقاطعة بالجامعة وضيعت سنة ريبيت من أجل قضية طلابية عادلة حول تصفية السكن والاعاشة وقاومت فى ظل قبضة السلطة الحديدية .. دة العرفتو من مزاملتها زمااان فى الجامعة.
ومعليش يا أمانى الأمين لو جبت ليل الهوا

الأخ سمير:

مداخلتك تلتها مداخلة الأخ El hadi A.bashir
وقد قمت بالربط بين المداخلتين
لأنه قام بذكر جامعة الخرطوم ايضا
شعرت كأنه استقي المعلومه من كلامك
خصوصا انه لا بعرفني ولا بعرفه

ولكن بعد توضيح الأمور واعتذارك
زي ما قلت ليك
كأنه ما في حاجه حصلت

بشكر د. وليد لعودته بما هو كفيل بفض هذا التشابه في الأسماء
عادي يا دكتور وليد مشكور,,

Quote: الأخ دينق: يامرحبا,, أبدا والله بس أنا بخاف من أمتحاناتك دي, ناس راجعي ورقتك, وشوفي أنتي غلطتي وين,, المهم أنا قصدي أنه الأخ شول علاقاته طيبه وبينشر في المحبه.. وفي رائي المتواضع أنه التسامح والمحبه هم المطلوبين, وهم موجودين أصلا في أغلب الحالات, ولو قريت تحت شويه حتلقي انه قلت انه في كتاااار وأنا بعرفهم,, حكاية في 10 وفي 15 فهي لازمه تقال للشخص علي سبيل الأطراء, يعني أي زول رائع في أي مكان بيقولو ليه لو في 10 زيك يا سلاااام, وكده,, المهم لو الكلام فيه خطأ أو زعلك,, اسفين يا سيدي, وخليك دائما في حسن الظن,,, أحترامي

الاخت أماني.


أنتي كتبتي"لو في بس 10 زي شول ده في جنوب سوداننا الحبيب,
حنكون دايما مع بعض حاجه واحده"
كأنك هنا توحين بأن سبب المشكلة في السودان هم أهل الجنوب. كلامك ده واضح جدا يا اماني ولا يوجد له تفسير أخر رغم مبراراتك التي كتبتيها. عندما اعطيتك حسن ظني بك كنت اتوقع منك أن تتداركي ما كتبتيه ولكنك لم تفعلي ذلك


دينق

Quote: حكاية في 10 وفي 15 فهي لازمه تقال للشخص علي سبيل الأطراء, يعني أي زول رائع في أي مكان بيقولو ليه لو في 10 زيك يا سلاااام, وكده,,

اماني
انت صااااااااح

الأخ دينق:

طبعا أنا حسيت انه انت فهمت كده..
فقمت مسبقا بتوضيح ماأقصد..
وبالأعتذار لك عن أي فهم مغلوط يمكن أن تكون قد استنبطه,,

احترامي,,

الأخ عبد الوهاب علي الحاج:

ده مش أول بوست
لكن فيه كترت اعتذارات وسوء تفاهم
غايتو الله يستر لي قدام

شكرا لتفهمك,,

مرحب بك يا أماني..

اكتبي مايرضي فكرك وضميرك..
وكوني أنت..

كل سنه وانت طيبة..

مرحب بيك..

مرحبا بك اضافة طيبة
لمبدعى البورد
فانت صاحبة الدار ونحن هاهنا الضيوف
وياهلا

الأخ عبد المنعم سيد أحمد:

شكرا للكلمات الطيبه

وكرم أستقبالك

مشكور

الأخت ساره علي:

ياهلا

مرورك أسعدني

مشكوره علي الترحيب

أهلا بالملكه مني خوجلي

شكرا لترحيبك ونصيحتك الغاليه

منوره يا اماني ..

شكلك زوله حبوبه
الخوفه في المنبر دا في الاساس من الاحراج المتوفر بكثره


ما عليك ... قوي قلبك وبردي الاعصاب

اماني
الف مرااحب ..اكتب واكتبي واكتبي
كلنا ولاد حفرة انا زاتي جديد
اكتبي ولا ترددي
وكوني بخير

الأخ باسط المكي

أهلا بيك

يعني احنا دفعه في المنبر

انشاءالله بالتوفيق

مشكور

الأخت دلال عزالدين:

شكرا علي التشجيع

أتمني نكون دائما علي تواصل

سعيده بمعرفتك

مرحب بالزميله اماني



يا اخوانا انا مشتت ليكم سكر بهناك

والله في ناس سودانيز اوون لاين حقارين







ناس ماشه معاهم قندراني طحنيه وناس ولا دي

الأخ محمد المعتصم:

يامرحب

أبدا وحياتك بس الناس ديل, ..

لقوني ضاربه هستيريا قالوا ندخل نهديها(بتشديد الدال)..


شكرا علي المشاركه في التهدئه..

الأخت : أماني الأمين

عارفة! أنا أكتر حاجة بكرها في الأيام شنو؟ أيام الأعياد والمناسبات عموماً، لأننا بنقى فيها زيّ الببغاوات بنعيد ونكرر نفس الكلام: "كل سنة وانت طيب .. وانت الصحة والسلام" أو كمان "البركة فيكم ... البركة في دين محمد" ورغم أهمية العزاءات والمناسبات السعيدة في حياتنا باعتبارها واحدة من نتاج تفاعلنا الطبيعي كبني آدمين؛ إلاّ إنو الكلام المكرر ببقى مسيخ!

حسي مناسبة الكلام ده شنو؟ إنو بجي أنا أقول ليك "مرحب بيكِ" وحتردي عليّ "تسلم وأشكرك على الترحيب" وحيفضل الكلام ده مدوّر لمن تزهجي زاتو. "أنا شخصياً بزهج من الكلام ده.

خلاص القول: أخير تبقي كوزة ولا شيوعية وعندك مبدأ ورأي واضح، بدل ما تكون كوزة ولا شيوعية، وخايفة من الإفصاح عن ماهيتك دي، قناعات الزول يا أماني (أياً كانت) ما المفروض حاجة تخجّل، ولو الزول بيخجل من قناعاتو، يبقى أخير ليهو راجعا لأنها أكيد ما بتمثلوا أبداً.

وزيّ ما في شابات وشباب قالوا ليك قبال كدة (شوتي ساي)، فأنا كمان بقول ليك نفس الكلام (أها شفتي الكلام المكرر ده كيف!) وما تهتمي لرأي أيّ زول، المهم تكوني إنت مقتنعة بالكلام ده زاتو، والأهم من ده إنو تكون عندك القدرة تدافعي عن قناعاتك، لأنو (كافي البلا) المكان ده فيهو ناس بيبلّعوك الكلام في خشمك، لمن تتوهمي زاتو.

حبابك يا زولة

الأخ هشام ادم

كل سنه وانت طيب,, (وجه ضاحك)..

أكيد الخوف ما من الأفكار
عدم القبول للاخر أصبح عاده اذا اختلف عما نؤمن به
وطبعا الخوف من الفهم والتأويل الخاطئين

المهم قمت اتشجعت وكتبت البوست ده

بسم الله نبدأ: الهيمنه الذكوريه.. دعوه الي التأمل..

شكرا علي وقتك وعلي النصيحه

التعديل لاضافة الرابط (مستجده وكده)..

الأخ الهكر:

شكرا علي مرورك

بس مافي داعي للكذب

يعني تقول أكتبي وما تخافي وليس لأحد منعك من الكتابه..

وبعدين تهكر البوست..

حكايه غريبه !!!!!

اكتبى ولاتخافى فليس لاحد منعك من الكتابة