البت الخدرا و الولد الازرق و الشعر القصار... البت السمينه

ثقافتنا السودانيه (سقافه) غريبه جدا خصوصا في موضوع لون البشره و الشعر و حديثا (بعد العولمه) البت السمينه, 75 في الميه من الشعب السوداني ازرق او اخدر و برضوا لمن يوصفوا زول بيقولوا الزول الازرق ولا الاخدر و كان زراقه و لا خداره عيب او شئ مميز بيه لدرجة انه لمن يوصفوه بيه انت مفروض تعرفوا طوالي, ياخي البت الزرقاء الامس جاتنا دي. من ولادة الطفل اول سؤال اها ابيض ولا ازرق, ازرق اكيد جبدوه عماته, خلاص لون الجماعه هدا فيه, اها البت شعرها كيف اوعى يكون زي حبوبتها, دي بت منو الزرقاء دي؟؟؟ المولود اضانه زرقا؟ كان زرقا معناها لونه بيقلب بعد شويه اتمقلبتوا عليك النبي شفتي البابو, لونه بس السكن, هي مالك شحمتي كده؟؟؟ لا حول الله, محمود جاء من السعوديه بجنس كرش دي الكبسه قالوا ليك اصلوا ناس السعوديه غير الكبسه ما بياكلوا شي, سلوى جات بيضا و سمحه, كانه الجمال بس في البياض. الشئ الغريب انه الزول البيعلق ده تلقى كرشه متر و لونه زي الصاج و شعر بقرش ما عنده. ثقافة انه الزول الابيض جميل ثقافه غريبه جدا و منتشره حتى بين الاطفال عشان كده تلقى البنت من 13 سنه بتتجلبط بديانا حقت اختها الكبيره و بعد شويه تشتري الكلي و تتمسح, و الوش يبقى لون و الايد لون ثاني خالص و الرجل لون ثالت, مره في اجازه في السودان دار نقاش بيني و بين بنت خالتي في اضرار الكريمات و حاولت اقنعها انه وشها اتسلخ و بقى زهيف زي عجوز النصارى (على قول حبوبه) لكن من غير فايده و شارك في الموضوع بت جيرانهم في صفها, بعد شويه مشينا زياره لناس و انا كنت قاشره قشره صح فل ميكب و شعر مكوي سيف, في شافعه مسلطه 7 سنين عمرها تعاين لي من ساسي لراسي و تجري لحبوبتها , انا سامعها, حبوبه البت اللابسه بنطلون دي جات من وين, و الحبوبه تقرصها, حبوبه البت دي شعرها حلو و عيونها حلوه و انا اشيل و ابتسم من الفرحه, بعد شويه الصدمه, لكن وشها ازرررققققققققق و مطتها متر, و طبعا بنت خالتي الشماته بانت في عيونها مع ابتسامه خبيثه. لمن طلعنا قالت لي حتى الشافعه قالت وشك ازرق من هنا دربنا سعد قشره اشتري لك كريمات بدل الفضايح دي, بصراحه الموضوع ما زعلني عشان فجأة عرفت اني زرقاء يعني شينه لكن حزنت على الطفوله و تفكيرها يعني البنت دي (على فكره هي لونها غامق) بتكره شكلها و بتكره نفسها و لونها لانها مقتنعه انها شينه لانها زرقااااء. حوار ثاني شاركت في رغم محاولاتي المستميته اني اسد خشمي, دايره لي عروس لولدي قال يخطبوا ليه, قلت ليه لازم تكون صغيره و بيضاء و شعرها طويل العروس الزرقاء ما بتخش علينا. الشئ الغريب انه العريس و امه لونهم زل كحل الدلال و الام شعرها بس العنقره, خشمي حرقني ما قدرت, قلت ليها يا خاله لكن العروس شكلها حيكون غريب وسطكم, و موش ولدك احتمال بيحب الزرق, بري والله زرقاء ما دايرها, و طبعا امي تقرص فيني, لكن ما قدرت, قلت ليها يعني انت شايفه الزرقاء شينه؟ يعني انت شايفه نفسك شينه؟ يا جماعه ده مش كلام غريب من ناس سود؟؟ الشى الغريب انه احيانا بتوصل لدرجة انهن بيتكتروا على الزول الازرق, مثلا اسمعي يا دي بت فلانه الزرقاء ديك قالوا في لندن بيودوها تتدرب على الباليه, هسع في زمتها امها الشافعه الزرقاء دي باليه شنو ليها وسط الخواجيات البيض زي الجبنه ديل, معارف لنا ابنهم و زوجته الطبيبه في السعوديه تبنوا طفل اسود, ردة فعل الحبوبه في السودان عبدالرحمن ولدي دي عوير ولا شنو, ما لقى غير الولد الازرق ده, وكت داير يتبنى ما كان يجيب من السعوديين البيض الطاهرين ديل. يعني في مفهومها انه الابيض طاهر و الاسود نجس؟؟؟؟

العروس شعرها بس ليفة السلك, البت شعرها قرقدي دي بس يوالوه ليها كركار و دهن الساق يمكن شويه يتصلح, داير لي واحده شعرها طويل, طيب انت ياخي راسك من رقبتك ما معروف من الصلعه, و التقليعه الجديده’, البت السمينه, و دي زي ما قلنا فوق بعد العولمه, زمان البت السمينه كان عندها سوق و كانوا بيسمنوا العروس مخصوص لكن هسع طلعوا بره الفورمه لانه دخلت البت الاستايل, البتقدر تلبس سكيني جينز, طيب الام الماعاوزه عروس زرقاء و شعرها قصير و العريس الما عاوز غير شعر طويل و بت ستايل, عاينوا لنفسهم في المرايه.؟؟؟ يمكن العروس عندها راي فيك.؟؟ سألتوها هي طلباتها شنو؟؟؟

هل نحن شعب نكره انفسنا و نكره الواننا و شعرنا؟؟ البتنتقد البت الزرقاء هل هي تنتقد نفسها بطريق غير مباشر, ليه بيرموا الكلام الجارح على الاطفال من غير ما نفكر تاثيره شنو؟؟ هل هو جهل؟ ام كره للنفس؟ أم اعتراض على خلق الله؟؟

الولد بيشبه ابوه بس ازرق زي خيلانه
البت دي زرقاء كده مالها؟؟
دي بنت منو الشينه دي؟؟
العروس سمينه
لا لا ما دايرها البت دي, ياخي سمينه و زي الرابطه ليها لستك عربيه في نصها
انا ولد اختي فدر الولد دي, و فيه ملامح منه لكن داك ابيض
ساره حلوه لكن سمينه
رشا بيضا لكن شعرها ليفة عده بس, دي شنو
البت الزي نملة السكر دي, بيضاء و شعرها احمر و خشن
البت الكلي دي, سكن الصاج بس
الولد لونه زي بنطلوني ده,
الكريمات المبيضه و البتفتح و البتسلخ الوش ليها رواج فظيع في السودان و من كم سنه كمان الجونتيات و في اجازه اكثر شئ لفت نظري الجونتيات لمن سالته قالوا عشان يدينا ما تزرق, طيب ما هي زرقاء خلقه و ما تزرق كان زرقت,, المشكله شنو؟؟؟ انا شخصيا بفكر اعمل لي بزنس بتاع كريمات تفتيح لكن بشرط البتشتري لوشها لازم تشتري ليدينها كمان. كم وش جميل اتسلخ و اتقشر و تبشتن و برضه الناس بتشتري, لدرجة انه الناس موهومه في كريمات ما لينا اي تأثير لكن الناس بتشوف انه مفعولها سحري,
ايام زواجي واحده من صديقات الوالده كل يوم تسِأل اها العروس ما بدت تستعمل الكريمات؟؟ البت دي منتظره شنو و لمن ما قدرت تصبر جاتني بالدرب يا بت وشك دي ازرق ماله ما عملتي ليه حاجه. لا يا خالتوا, ما بحب الحاجات دي ووب علينا العرس قرب (كان المازون ما حيعقد) ما كان تقولي من زمان كنا جبنا ليك ديانا من السودان, والله الخاله بكره مشت مشوار 45 دقيقه و جابت لي ديانا من واحده حبشيه و كل يوم تتصل تسأل اها قول ليها صباح و مساء و ما تقابل الشمس, بعد اسبوع جات لتطمن بنفسها, لا شويه الوش فتح, يوم العرس اها العروس ماشاء الله وشها نور, جبت ليها الديانا من دكان مرحبا الحبشيه, شوفي وشها فتح كيف, الديانا دي زيها مافي, سافرت سنه و رجعت و ولدت ولدي و الخاله جات للزياره و ديانتها لسع في محلها في التواليت و تعليقها الصدمني انه اها شفتي لمن واظبتي على الديانا وشك بقى منور كيف؟؟ ايوه خليك كده كل ما تخلص جيبي الثانيه, ما عارفه انه دي ديانتها التاريخ صلاحيتها انتهى من زمان, المهم انها مقتنعه اني استعملت ديانتها عشان كده وشي فاتح,

الموفيت و البتوفيت و الفير و فاير و وايت و سكن سككسس و البليج و الامبي فاشن و الوايتنينق و فاير و بيوتيفل اخيرا كريم الليمون الفلقوا بيه النيجيريين و اخير طلع صابون معقم للجروح

يا ناس ارحمونا ربنا خلقنا زرق و نحن شعب ازرق يمكن فينا صفره او حمره و ليس الابيض جميل و لا الاسود قبيح ارحموا الاطفال و ما تعقدوهم ارحموا انفسكم و عاينوا لنفسكم في المرايه و دعو الخلق للخالق و بطلوا الكريمات جبتوا لنفسكم الكلى و السرطان و برضه مستمرين و مجربين و خالطين الصباعات بتاعت الحساسيه و البرص مع الديانا و الروز و الفير, احييي انا الفير الكله زيبق و الروز الكله كورتيزون و و دومامين و دمتهم زرق و خدر و بيض و صفر و بنفسج كمان.

حول رأي (خالد القشطيني) فى الفتاة السودانية ..!!!

شكرا دانيـة

طرح موضوعي


أحمـد

أحمد سلامات

بعد الأطلاع على المداخلات في موضوع القشطيني يبقي السؤال هل نحن شعب نكره اشكالنا و الواننا و نقارنها بباقي الشعوب و بنينا مقاييس الجمال عليهم؟ يعني هل بقينا مقتنعين ان الجمال او الشكل السوداني بعيد عن الجمال الابيض و الشعر الطويل و الجسم النحيل؟؟ يعني لمن نعاين في المرايه بنشوف نفسنا شينين و لا بنشوف الجمال الوصفوا القشطيني و السؤال ده للرجال و النساء.

دمت بخير

مين يسمع يا دانيا؟؟
الناس ريقهـا نشف و الحال لسه في حالــو ...

سلامات دانية

Quote: البت السمينه

Quote: و حديثا (بعد العولمه) البت السمينه,

Quote: هي مالك شحمتي كده؟؟؟

Quote: البت السمينه,

Quote: زمان البت السمينه كان عندها سوق

Quote: و بت ستايل,

Quote: العروس سمينه

Quote: لا لا ما دايرها البت دي, ياخي سمينه

Quote: ساره حلوه لكن سمينه

بعد كلامك ده الواحد الا يدخل الدير

الأخت دانيا

سلام

ما ذكرتيه هو الحقيقة المرة التي تعيش في دواخل العديد من السودانيين..
إن لم نقل جلهم..
الإعلام المتخلف عندنا له ضلع كبير في هذه المفاهيم المغلوطة.. زيادة على
التغول الثقافي الأجنبي منذ عشرات السنين..
تلفزيونا لا يعرف سوى مسلسلات وأفلام المصريين والشوام أو السينما الهندية..
وهي كلها تحمل قيم الجمال في ذات اللونية..

ذكرت في مداخلة لبوست مشابه قبل فترة مشهد وحكي عن الجمال.. حيث كنت في
مطلع التسعينات من القرن الماضي مدرسا في ليبيا.. وبينماكنت وسط
مجموعة من المدرسين الليبيين والمصريين وهم يحكون عن الجمال: تلك شعرها أشقر.
وتلك بيضاء.. وفجأة التفتوا علي ساخرين: ماهي قيم جمال المرأة السودانية؟
فما كان مني إلا أن قلت: يزداد جمال المرأة عندنا كلما زاد سوادها..

لك تحياتي
عبدالعزيز

Quote: و حاولت اقنعها انه وشها اتسلخ و بقى زهيف زي عجوز النصارى (على قول حبوبه)

الاخت دانيا.

ما هذا?


دينق

Quote: ما هذا?

عنصرية مضادة يا دانيا؟



____
الناس اللونها غير أخدر تعبانة معاكم والله..
في واحدة آفريكان أميركان قالت في منبر عام،
نحن (السود).. بشرتنا جميلة وليست باهتة كالبيض..
الكلام ده قاعد إتقال هنا كتير..
(ونلوم العنصريين من الأعراق الأخرى إن إنتقدونا)..


____
ومعاك في بعض ما ذهبت اليه من نقاط أخرى (خلاف ما إقتبسه الأخ دينق)..

موضوع البدانة والنحافة
يجب أن ينظر اليه من منظور صحي من قبل الشابات نفسهم.. قبل الامهات والنسيبات.. الخ..
حبوباتنا لا يفضلن النحافة الشديدة.. ولا السمن الفايت الحد..
لكن .. سمن وبس (بمقاييس ال بي ام آي)، المجتمع عموما يبدو مرحب به..
وهو ليس بمقياس على آية حال..
my two cents
والسلام

الأخ دينق

هدا مثل دارج يشير الى صاحبات البشره البيضاء زمان في السودان, ولا يشير الى الدين, نسبى لانه الاقباط و النقاده بشرتهم بيضاء جدا و المعروف ان البشره البيضاء لمن تعجز بتبقى رهيفه و رقيقه جدأ, المقصود به توضيح المفاهيم و ليس اساءه لاحد او دين معين, و على العموم اعتزر لو الجمله دي زعلتك أو اصابت وتر حساس عندك, و التحيه.

نجوان خليك مصحضر خير,

تحياتي لك دانيا
وتحياتي للتشكيلي عبدالعزيز عيسي
.........
.........
.........
والجديد والأسوأ هو اذا كان هناك شخص يريد ان يتقدم لواحدة
يختار الناس الذين بلون فاتح عشان يمشوا في الخطوبةو الشبكة ،
ويستبعد حتي أهلة الشديدي السمرة
............
...........
...........
مايزال السودانيون يظنون انهم شعب الله المختار
ماشافوا الالمانيات الحسناوات اللاتي سكنّّّ في السودان وتزوجنّّ سودانيين
.........
.........

هل الامانيات حسناوات لانهن بيض و شعرهم اشقر??
الموضوع ده بيدخلنا في زقاق ضيق هل مقاييس الجمال مفروض تكون موحده ام لكل شعب موصفات مختلفه مثل ما هو سائد الان.؟ هل ثقافة البت البيضاء الاتفرضت علينا نحن اقتنعنا بيها و لا كسل مننا ما عاوزين نفكر في مواصفات تناسبنا؟؟؟


ريهان, تبري من الدير يا أختي, كل فوله و ليها كيال,

مصطفى بشار, الزول البيسوق الناس الفاتحين للخطوبه ده عنده عقده لكن للاسف في كثيرين

شكرا جميعا على المداخلات,

الصيبه انه رغم اننا بنعاني من العنصريه من الناس التانيين, بنمارسها مع بعض و مع انفسنا, السؤال يبقى ليه سمحنا لغيرنا يحددوا لينا مقاييس جمالنا؟ ليه ما انتبهنا انه اليك ويك (عارضة ازياء سودانيه) جميله؟؟ لا لمن الخواجه قال لينا بعد ما أكتشفها؟؟ حتى داخل الاسره الاسره الواحده, بين الابناء الكبير اخدر و الصغيره بيضاء, حلاتها. هل لو ولدي ولا بنتي خدر حأشوف انهم اقل جمالا من اولاد جيرانا الصفر؟؟؟ هل الثقافه دي بس في شمال السودان و الوسط و الشرق ام انها تمتد للجنوب و الغرب؟ و ما هي مقاييس الجمال في كل أجزاء السودان.؟؟؟؟

و دمتهم,,

كلامك سمح لكن موضوع السمنة دا الناس عندها حق ياخ و الله ما صدقنا البنات بقو يفكروا في
to look sexy u have to be slim

أخ ناجي سلام,

شكرا على المداخله سؤال مين البيحدد السمينه سكسي ولا الضعيفه؟ هل هي وجهة نظر الرجل, و هل يعرف الرجل ما هي المقاييس عند المرأه ليصبح في نظرها سكسي؟؟ الشخص البيحدد ده يا ربي شاف نفسه في المرايه؟؟ تلقى البتقول البت الزرقاء شينه هي ازرق منها و البيغيظني هل هي غير راضيه عن نفسها و مظهرها الخارجي؟؟ زي واحد كرشه متر و صلعة يفول ليك ما عاوز بت سمينه و شعرها قصير, طيب البت الضعيفه الشعرها طويل الجميله دي تعرسك انت ليه؟؟ ما برضه تشوف ليها واحد رشيق و شعره مسبسب و لك الود

البحدد نظرة انو البت slim
sexy or not
الغالبية من سكان العالم
حيث تغيرت النظرة الان
قديما المراة السمينة كانت ال model
و الدليل الشعر الجاهلي و ماكمة يضيق الباب عنها ........
المهم النظرة اتغيرت تدريجيابفعل العولمة و هذه احدي محاسن العولمة فاصبحت ال slim
هي ال model
فلو جبتي 100نفر من مختلف سكان العالم بنات و لا اولاد
.....white,black,hispanic,chinese
و سالتيهم
which one is more sexy the slim or the fat woman
80% منهم حا يقولو ليك ال slim
و بنفس المقياس المراة لها كامل الحق انها تحدد مواصفات الرجل ال sexy
النظرة العامة الان انه يكون muscular
ما عنده كرش flat belly
حكاية الزرق و الخضرة و البيضة و البنفسجية صدقيني نحن متفقين فيها انا كلامي محدده في السمنة obesity
و طبعا عارفة المشاكل الطبية المتعلقة بيها

الأخت العزيزة دانيا
من وجهة نظرى الخاصة ان المراة السودانية مظلومة فى كل هذا فهى دائما تبحث عن ما يرضى الرجل
اكاد اجزم بان 90% من الرجال سود وخضر وسمر وبيض وجميع الوانهم فى هذا العصر يحبونها بيضاء صافية البشرة حريرية الشعر

فى عصر مضى كان الرجل السودانى يتغزل فى المراة ذات الشلوخ العراض والشفة السوداء
وفى سبيل ارضاء الرجل تعرضت المراة بل عرضت نفسها بنفسها لاقسى انواع الالم والجروح

الاخت دانيا
تحياتي
.......
.......
.......
كنت اقصد ان الالمان من الجنس الآري، وينظرون الي انفسهم ، انهم افضل الشعوب ،هاهم يتزوجون من كل الاعراق الاخري ، ليس لهم تعقيدات مثل ما هي في المجتمع السوداني الغريب .
.....
.....
واحترامي

الأخ ناجي

المراه في كل مكان تتعرض لالام غريبه جدا من اجل الجمال و من أجل ارضاء الرجل, لكن يبقى السؤال من وضع قواعد الجمال دي؟ المراه ام الرجل, اجزم بنسبة 90 في المائه انها المراه نفسها,

بشار فهمت مداخلتك بس حبيت اسأل هل الالمانيه تعتقد انها حسناء لانها بيضاء؟؟ و ما هي مواصفات الجمال.

دانيا،

شكرا لإقتحامك هذا الموضوع الشائك،،

فعلا،
الثقة فى النفس مطلوبة،
و على البنات (الواعيات) مهمة تقيلة،
الا و هى تحديد مقاييس الجمال (الطبيعية)،
و الثبات عليها،،،
كفانا جريا وراء القشور،،،،

Quote: الموفيت و البتوفيت و الفير و فاير و وايت و سكن سككسس و البليج و الامبي فاشن و الوايتنينق و فاير و بيوتيفل اخيرا كريم الليمون الفلقوا بيه النيجيريين

أنا جاهلة جدا فى كل ما تقدم،
و لذلك أعتبر نفسى برة الفورمة بجدارة،،،

Quote: الأخ دينق هدا مثل دارج يشير الى صاحبات البشره البيضاء زمان في السودان, ولا يشير الى الدين, نسبى لانه الاقباط و النقاده بشرتهم بيضاء جدا و المعروف ان البشره البيضاء لمن تعجز بتبقى رهيفه و رقيقه جدأ, المقصود به توضيح المفاهيم و ليس اساءه لاحد او دين معين, و على العموم اعتزر لو الجمله دي زعلتك أو اصابت وتر حساس عندك, و التحيه.

الاخت دانيا.

بغض النظر عن ماهو المقصود أو من الذي أستعمل تلك العبارة ولكنها سخيفة وعنصرية وأنتي اضفتي لها عبارة عنصرية اخرى وهي كلمة "نقادة". شكرا لأعتزارك الحضاري لي ولكن هذا الامر لا يسئ لي بطريقة مباشرة لكي استحق اعتزار شخصي منك.


دينق

الأخت دانيا السلام عليكم ورحمة الله
أشكرك على طرح هذه القضية المعقدة
موضوع اللون وكراهية الذات موضوع مهم
كنت قد راجعت الأدب المنشور حول الموضوع
في خيط زودته بالكثير من المراجع والمصادر
للأسف أتى عليه الهكر فلم أجده الأرشيف
أرجو أن أمدك ببعض الروابط التي قد تجدينها
ذات صلة بمادة خيطك هذا

بحمد الله وجدت الخيط أو بعضا منه :

التبييض ظاهرة عالمية :
__________________________
ألاين كاونتر (Allen Counter)استاذ علم الأعصاب وعلم النفس العصبي
في جامعة هارفارد وهو ايضامهتم وخبير بالآثار الصحية للزئبق. أجرى بروفيسر
كاونتر أبحاثا لدراسة التسمم بالزئبق فقادته نتائج أبحاثه إلى أن أعراضا
متشابهة من التسمم بالزئبق تعتري نساء مختلفات عرقيا ومن من مناطق جغرافية
مختلفة ومتباعدة عن بعضها البعض جدا مثل المكسيك ونيجيريا وكينيا وتنزانيا
والمملكه العربية السعودية.
وبعد مزيد من الفحوص تبين له أن السبب المشترك الذي كان وراء هذه المشاكل
الصحية لدى هؤلاء النسوة هو استخدام مستحضرات التبييض
http://www.boston.com/news/globe/health_science/article..._skin_can_be_deadly/
ويقول البروفيسر الغاني ( Agyeman Badu Akosa) إن الأدلة البيانية
تشير الى ان ما يصل الى 50 -60 ٪ من نساء غانا البالغات قد تعرضن لعملية
التبييض (bleaching) على الأقل مرة كما أن نحو 30 ٪ حاليا منهن يقمن بالتبيض.
وويقدر الرجال المبيضون بنسبة 5 ٪ . ويشير البروفيسور إلى أن المقلق حقا هو
نسبة المراهقين والذين يبيضون سواء كانوا من الطلاب أو من غيرهم .
http://www.ghanahealthservice.org/articles.php?nd=18&tt=Skin%20Bleaching

بينت دراستان أجراهما الدكتور جوسلين ماكاي ،
أستاذ علم النفس المساعد في جامعة جنوب كونيكتيكت ،أن
اكثر من 200 الطلاب الغانيين الذين تتراوح اعمارهم بين 8 الى 18
يربطون كلا من (الجاذبيه ، وفرص القبول والسلطة) مع لون الجلد الفاتح
http://www.diverseeducation.com/artman/publish/article_6004.shtml
In Africa, the practice of skin-whitening is traditionally associated with white colonial oppression . Those who practiced skin-whitening, were and are still condemned as self-hating dupes, suffering from an inferiority complex. Consequently, those engaging in this practice often do so covertly. So it is only when users of skin-whitening seek medical help from the devastating effects of bodily damage caused by the use of toxic skin-whitening creams that news about this practice gets to the public domain. Tsitsi Dangarembga's novel Nervous Conditions (1988) succinctly captures the contradiction between the colonizing effects of white supremacy and African women's yearning for respectability and idealized feminine aesthetics of beauty.

Lucia was my mother's sister, several years younger than my mother and a wild woman in spite of ­or may be because of her beauty. She was dark like my mother, but unlike my mother her complexion always had a light shinning from underneath the skin, so she could afford to scoff at the skin-lightening creams that other girls used.
http://www.counterpunch.org/mire07282005.html
don’t tend to be as attracted to chocolate women and that includes many of the most “enlightened” black men. There are many chocolate women among us. This is about as deep as it gets! Many times, even many of the black men who write and speak out, and criticize other men about this issue do NOT have chocolate girlfriends and wives themselves! HELLO! They tend to claim they dated dark-skinned sistas, but just happened to fall in love with a brown or light-skinned woman. LOL!

So what can black people do about this? Evia has mentioned in her blog her husband’s suggestion that black men need to deliberately re-train themselves to see black women as beautiful .
عجبتني حكاية إعادة التدريب دي


http://racialrealist.wordpress.com/2006/08/27/colorism-...s-racialized-sexism/

هاله سلام, فعلا مفروض البنت او المراه هي اللي تحدد مقاييس الجمال و تثبت عليه, بنلقى دايما المراه المتزوجه اكثر انتقادا من الغير متزوجه, يمكن لانها ضمنت العريس و طلعت بره المنافسه (في اعتقادها طبعا) و مجتمع المتزوجات له مقاييس اضافيه, و يقال ان المراه قبل الزواج تتزين للرجل و بعدالزوراج تتزين لصديقاتها لانه الزوج في الغالب لا ينتقد وزنها ولا لونها(لو ما عجبه الحال ممكن يشوف غيرها) ولا عدم حنتها بعكس صديقاتها.


الاخ محمد سليمان, شكرا على الروابط و حأرجع ليك برواقه, موضوع التبييض ده دائما بيشدني جدا رغم انه منطقه محظوره لدي و دايمابفكر انه المستفيد الوحيد من نشر ثقافة الجمال الابيض هم اصحاب مصانع الكريمات دي, و دايما تجدني في المحلات اتجه لكاونتر كريمات التبييض من باب حب الاستطلاع من يشتري و من وجهه تشوه ولا زال يبحث عن البياض, هل تصدق ان هناك صابونه لا تكفي لغسل الوجه لمدة اسبوع ثمنها خمسه و سبعون دولار؟؟ الغريبه انه المراه اللي بتحاول تبيعها لي بتحلف انها بتستخدمها من اكثر من 3 سنوات و انها افضل شئ في السوق, مع انه وشها مشوه و ممسوخ بصوره فظيعه و لكن ما المشكله مادام وجها ابيض

لي عوده

Quote: انه المستفيد الوحيد من نشر ثقافة الجمال الابيض هم اصحاب مصانع الكريمات دي,

هذا أمر يمكن التحقق منه بمراجعة بيانات المبيعات
وحصص السوق ونسبة الإعلان والترويج

Quote: نجوان خليك مصحضر خير,

قصدنا خير والله يا دانيا


(بس لأني عارفاك حقانية من كتابتك هنا،
حبيت ألفت نظرك..)

Quote: كانه الجمال بس في البياض. الشئ الغريب انه الزول البيعلق ده تلقى كرشه متر و لونه زي الصاج و شعر بقرش ما عنده. ثقافة انه الزول الابيض جميل ثقافه غريبه جدا و منتشره حتى بين الاطفال

Quote: Black people were whitewashed into believing that everything African or Black was inferior, backward and ugly, while everything White or Caucasion was superior, beautiful and desirable. Yet this perceptual distortion could not be effective without a kind of mental slight-of-hand regarding the historical and cultural validity of Africa and African "Black" beauty standards."

*

قيسي على هذا عقلية فاضلابي الناشط المناصر للمركزية الأفريكانية :


فاضلابي هنا يحتقر المرأة ذات الملامح الأفريقية
ويحاول قهرها ساخرا من سوادها وسحنتها
مطالبا أن تمنح مرآة وصورة مطربة لبنانية
بيضاء للمقارنة

Quote: The problem with this perspective is that it reeks with racism in that it assumes that White women (or those that look White) are the standard bearers for beauty and attractiveness and it makes these assumptions at the expense, neglect and denigration of the multitudes of Black women (in particular) and women of color(in general) through out the world. It is also disturbing because it is done without even a hint of the offensiveness and utter absurdity of it all.

*

*http://usa.mediamonitors.net/content/view/full/13226

I will be back guys, trying to fix my computer, no arabic on this one.

Quote: هل تصدق ان هناك صابونه لا تكفي لغسل الوجه لمدة اسبوع ثمنها خمسه و سبعون دولار؟؟ الغريبه انه المراه اللي بتحاول تبيعها لي بتحلف انها بتستخدمها من اكثر من 3 سنوات و انها افضل شئ في السوق, مع انه وشها مشوه و ممسوخ بصوره فظيعه و لكن ما المشكله مادام وجها ابيض

تعرفي يا دانية

الاخوات السودانيات عندهن تبرير متكرر وعجيب في آن واحـد,

هــو (نســوي شــنــو ؟؟؟؟؟ )

إذن فالدولارات مصـروفة مصـروفـة وعلى ما يشـوه الشكل الذي لا سبيل لتغييره,


أحمد الشايقي

الاخت العزيزة دانية أم احمد

تحياتي

لك الشكر علي تناولك الجرئ لهذا الموضوع الشائك والحساس
اعتقد ان الجمال شئ نسبي فما هو جميل في نظر شخص ما قد لا يجد
هوي عند الاخرين.
والانسان بطبعه لا يقتنع بما قسم له فدائما ما يتطلع الي ما عند الاخرين
فالاسود غير مقتنع بلونه وما استعمال الكريمات وغيره الا دليل علي ذلك
والابيض غير مقتنع بلونه وما بذل الخواجات لدولاراتهم في ال sun shower وال tanning
الا اكبر برهان علي ذلك.
وصاحب الشعر الناعم يحبه ان يكون مجعدا.
وصاحب الشعر المجعد يصرف ما يصرف ليصير شعره ناعما.
اما ثقافة السمنة والنحافة فتختلف باختلاف الازمنة والامكنة
فقديما كان من اهم معايير الجمال الصحة الجيدة وشيئا فشيئا تحولت الفكرة
فصارت البنت ال style والولد ال slim هم المرغوبين عند كثير من الناس
ولكن حتي الان هنالك في موريتانيا مهمنة المسمنة وهي التي تقوم بتسمين البنت
لان تلك من اهم مقاييس الجمال هناك.

ولنري ماذا قال الشاعر عنترة ابن شداد في وصف امه

قال :

انا ابن سوداء الجبين كأنها ذئب ترعرع في نواحي المنزل
الســاق منها مثل ساق نعامة والشعــر مثل حــب الـفلفـل

تري هل كان هذا مدحا ام ذما في ذلك الزمان؟

دانية الشكر علي البوست المثير مرة اخري ولعله يعيد العهد الذهبي لبوستات
سودانيز اونلاين.
الاخوة والاخوات المتداخلين لكم العذر حتي ترضوا ان اختلفت مع منكم في الرأي
فكل القصد اثراء النقاش لتصحيح المفاهيم الخاطئة.

عبدالله الرشيد ابوشوارب

الاخ محمد سليمان شكرا جزيلا و لكن اود مناقشة الموضوع بأسلوب علمي و فلسفي و ليس مناقشة اراء الاخوه الاعضاء التي لا بد ان نحترمها حتى و ان اختلفنا معها لاننا لن ننصب انفسنا بوليس للبورد, الاخ فاضلابي حر في رايه و ان رغب ان يشاركنا فلا مانع و اشكرك على الماده الهامه التي زودتنا بها


عبدالله الموضوع نور, اخيرا قررت تشارك,

الاخ ناجي , شكرا على اثرائك الموضوع و لكن بعيد عن المشاكل الصحيه للسمنه, نود مناقشة الموضوع من وجهة نظر اجتماعيه, و اسلوبنا كشعب في انتقاد الاخرين و عيوبهم اللونيه و الجسمانيه رغم ان كثير ان لم يكن جميع المنقدين مصابين بها.

نرجع لموضوع انه ليه السودانيين بيفضلوا اللون الابيض رغم انهم ما بيض.

و دمتهم.

Quote: لا بد ان نحترمها حتى و ان اختلفنا معها لاننا لن ننصب انفسنا بوليس للبورد, الاخ فاضلابي حر في رايه

ام أحمد

سلامات

الخدره النايره ( اسمر جميل فتان - ويا حليلك يا اسمر - وما لي غيرك حياة يا اسمر )


ازرق طويل الباع ( طويل اخضر قيافة حماده ده )



ومأكمة يضيق الباب عنها وكشحاً قد جننت به جنونا .


تخريمه مشتورة

احسن زووووووووووووووووووووووووووول نسأله من الموضوع ده ابو أحمد

Mohamed E Suleiman

Don't be upset, what I meant is we should discuss the topic from a general point of view, and not what other members said and wrote. I don't like to get into debates over personal opimion online.

أتفهم موقفك
شكرا

أرجو أن يؤول هذا الخيط إلى مادة قيمة تستحق النشر على مستوى أعلى

دانيا
لو محمد اي جاب الخيط كامل لعرفت أن هذه المداخلة كانت في سياق مختلف تماما عما يحاول الترويج له

كان رأيي أن روضة تظن نفسها عربية لكراهية ذاتها الأفريقية

و هو بالمناسبة أمر يصب في صالح موضوعك المكتوب هذا

محمد إي هذا كذاب نمرة واحد

لزم التوضيح و أعتذر عن حرف مسار الخيط

واصلي في موضوعك

Thank you Fadlabi and Mohamed Suleiman, happy to see you both here, let's continue our discussion< sorry my computerr broke, sometimes I don't have access to Arabic

محمد الواثق سأعود بعد قليل للتعليق على مداخلتك, أبو أحمد ده انا حأحرش بكري ما يديه باسورد عشان ما يشتغلني في بوستاتي, خليه مستمع

شكرا Dania Elmaki
رغم أن فاضلابي اتهمني بالكذب
وهو يرى كلامه موثقا أمامه

حذاء نادية , حذاء دانية و أحذية أخرى....!!!!!!!!!!

ممكونه سلام
يطرشني كا فهمت حاجه من بوستيك, دانيه و ناديه مالهم؟؟

نحنا غايتو مع الخدرة الدقاقه
....
....
....
يعيش ..يعيش
و(حلايب) سودانيه

I will reply soon.

دانيا يا عسل
بوست عجبني جدا ومسكني منك الشديد القوي
(الهكر) اها جئت لابقى هنا.


ومعا من اجل قيم ومعايير افضل للاختيار بين الطرفين.

Aesthetic Resistance to Commercial Influences: The Impact of the Eurocentric Beauty Standard on Black College Women*
http://findarticles.com/p/articles/mi_qa3626/is_200310/ai_n9248761/print

Quote: to look sexy u have to be slim

يا ناجي لو كنت بدلت كلمه sexy بكلمه healthy
كان الاتفقو معاك كتار
slim قدر شنو ده سؤال تاني

Dania
موضوع قديم مطروح بصوره جميله و جديده

سلام يا رحاب

معليش لكن ما بقدر اغلف الكلام

i really meant what i said. nothing wrong about expressing your what is in your mind and every man ' mind diretly.

و عشان نتهذب شوية ممكن نضيف
healthy

slim
يعنى
to have a body that has normal female curves
علي الاقل

UP

ناجي salam
تغليف الكلام ما سمح، و ده ما القصد من مداخلتي
I also like things straight from the shoulder, not wrapped
مداخلتي بصوره اخري:
الضعفه دي خشم بيوت، و حتي السمنه. يعني الشايفاها ثقافه معينه ضعفه، ثقافه تانيه بتشوفها سمنه و اخري بتشوفها العكس،
و حتي في السودان، الضعفه عندي مختلفه من زميلاتي، و عندنا ليها مسميات كتيره، زي رويانه، و مبلبله و و

لكن الصحه دي، وااحده

القصه ما تهذيب علي قدر ما هي تركيز علي المفاهيم الصح
دليل علي كلامي انه الحاجه دي نسبيه، شوف كلامك الخاتم بيهو مداخلتك، إنت دايره slim ولا with curves

في الثقافه الغربيه، slim دي not necessarily فيها curves مع انك خاتيها كحد ادني
-------
of course you are entitled to your likings, whether you like a woman slim or with curves or both, but to generalize and say most people would agree, does not add much, since the degrees of freedom are a bit wide here to determine how far is this "slimness" from our old "non-slim models"

تراجي شرفتي الموضوع :) على فكره اول مره اكتب حاجه تعجبك, مرحب بيك و في انتظار مداخلتك للمناقشه ما تتأخري علينا

رحاب خليفه, سكسي ولا هيلتي مين البيحدد المقياس هل هو الطبيب ام الرجل البعاين الى ان المراه مفروض تكون مفصله حسب ما يعجبه ام المراه التي تنتقد نفسها و اخواتها.

المؤلم في الموضوع انه الناس بتنتقد من غير مراعاه لمشاعر الناس, يعني البينتقد طفل ده لو قالوا ليه نفس الكلام يا ربي حيكون شعوره شنو؟؟ و هل جرح مشاعر الاطفال هو السبب في انهم لمن يكبروا بيكرهوا لونهم و شعرهم؟"" نرجو من اصحاب الاختصاص التداخل.

الأخت Dania
سلام واحترام

شكرا على طرح الموضوع. أتفق معاك في إن البنات مأخوذات جدا بما يمليه عليهن الفهم العام، بتاع (لونها أبيض وشعرها طويل)، لكن أختلف معاك فيما ذكرتيه واعترض عليه الأخ دينق، لأنك في سبيل ما تحاربي مشكلة وقعتي في مشكلة تانية ضد (عجايز النصاري والنقادة) كما ذكرت في حديثك.

ناجي أحمد
Thanks for being honest

Rihab Khalifa
You read my mind... I just put it as my own word instead; (healthy) in place of Nagi's (sexy)c

الأخت Dania مرة تانية

Quote: رحاب خليفه, سكسي ولا هيلتي مين البيحدد المقياس هل هو الطبيب ام الرجل البعاين الى ان المراه مفروض تكون مفصله حسب ما يعجبه ام المراه التي تنتقد نفسها و اخواتها.

الصحة عندها مقاييس فيزيولوجية، منها الوزن المثالي للطول المعين لكل من النساء والرجال، ثم نسبة الدهون في الجسم ونسبة المياه في الجسم... وكلها معايير علمية ومتفق عليها، ولها علاقة بكون الإنسان عرضة للكثير من الأمراض. يعني لا دخل مباشر للطبيب الممارس في تحديد مين الصحيحة ومين الجميلة، فالطبيب يتبع هذه المعايير التي تم وضعها منذ سنوات عديدة وموجودة في كل كتب علم وظائف الأعضاء.

مع تحياتي للجميع

إيمان

أيمان أحمد شكرا لمداخلتك, و ما جاء اعلاه في موضوع النصارى و النقاده ماهو الا مثل دارج و يمثل نوع من العنصريه المضاده في مجتمعنا ضد اصحاب البشره البيضاء و لنا عوده مع العنصريه ضدهم في المجتمع السوداني, ارجو التريث حتى يكتمل الموضوع, و هي جمله جاءت كمثال مثل الامثله التي قيلت في أصحاب البشره السوداء او الزرقاء او الخدرا, و لي عوده,

أيمان أحمد شكرا لمداخلتك, و ما جاء اعلاه في موضوع النصارى و النقاده ماهو الا مثل دارج و يمثل نوع من العنصريه المضاده في مجتمعنا ضد اصحاب البشره البيضاء و لنا عوده مع العنصريه ضدهم في المجتمع السوداني, ارجو التريث حتى يكتمل الموضوع, و هي جمله جاءت كمثال مثل الامثله التي قيلت في أصحاب البشره السوداء او الزرقاء او الخدرا, و لي عوده,