Post: #1
Title: حالة إحراج... حكاية وقصة
Author: GeerTor Tong
Date: 01-10-2009, 05:11 PM
الإخوة والأخوات بالمنبر العام
افتح هذا البوست للجميع
فيه يكتب كل من أطلع على الموضوع قصة إحراح تعرض له وفي النهاية صار من الطرائف
المهم سوف ابدأه بنفسي.
الزمان كان عام 1997 م
المكان كلية التربية جامعة الجزيرة بحنتوب.
وانا اسير قادما من تجاه الحدائق الواقعة على النيل الأزرق متجه شمالاً وقد وصلت ميدان كرة القدم،
وكان اثناء سيري هذا يتوجه نحوي اربع من بنات الكلية اعرفهن جميعهن لكن لسن من نفس القسم الذي انا فيه..
واجهتني مشكلة تتمثل في أنني نسيت إسم إحى القادمات نحوي وانا بدوري اتقدم نحوهن لأن اي محاولة
الزوغان سيدخلني في مشكلة لا نهايو لها..
وتقابلنا وانا اصافح واحدة وقد قررتُ الا انادي على اي منهن حتى لا أكشف لهن بأنني نسيت إسم إحداهن..
وبدأت المصافحة من يميني وكانت تلك ÷ي آخر واحدة تقف على الصف....
وبعد أن أكملت الثلاث زميلات وفي اثناء مصافحتي لآخر واحدة ... تفاجأت بتلك تمسك بيدي وتقول لي
(يا قير إنت نسيتني واللا شنو)...
في تلك اللحظة .. وحتى يوم كتابتي هذه الكلمات لا اعرف السبب.. جاء إسم في الذاكرة فقلت لها
كيف انساكي..
وطبعاً في الوكت داك قلت:إنتي مش فلانة؟ فضحكت .. أما انا فقد تماسكت وعملت فيهو
عارف كل شئ وواصلت حديثي معها ..عشان انا ما ناديت على كل واحدة انتي قايلااني نسيتكم؟ انتو مش
فلانة وفلانة وفلانة... فضحكن جميعاً وإفترقنا
وبعد ذهابهن سالت نفسي ماذا كان يمكن أن لو أنني لم أتذكر إسم تلك الفتاة؟
يلا دوركم يا شباب ويا شابات
قير تور
|
Post: #2
Title: Re: حالة إحراج... حكاية وقصة
Author: الكباشى البكرى
Date: 01-10-2009, 05:21 PM
Parent: #1
الاخ قير تور
سلامات
حقيقه مواقف محرجه,, يتعرض لها الكثيرين منا
وتضعنا في مواقف لا نحسد عليها
ولكن هنالك الهام الهي يبقا رديف مثل هذه المواقف
ويمثل مخرج لصاحبه
|
Post: #3
Title: Re: حالة إحراج... حكاية وقصة
Author: GeerTor Tong
Date: 01-10-2009, 05:35 PM
Parent: #2
يا الكباشي ..إنت ود شيوخ؟
المهم إنت موقفك المحرج شنو؟ واللا خايف ؟
كدا ورينا ...
شكراً على المرور
|
Post: #4
Title: Re: حالة إحراج... حكاية وقصة
Author: ismeil abbas
Date: 01-10-2009, 06:05 PM
Parent: #1
الجميل قير
من المواقف المحرجة..وأنا خارج من الهلتون وقصاد الهلتون من جهة النيل الطريق المؤدى لأم درمان منتظر المواصلات..ده زمن ابورجيلة..وقف البص وركبت .وطبعآ أبورجيلة بفتح من ورا للراكب والنازل من قدام.وجلست بالقرب من الباب..وقبل ما يتحرك ركبت بنت وراى وكانت ماشة موضة..وفجا’ وقبل ما البنت تركب كويس وعلى عجلتهم تلك المعهودة تحرك صاحب البص قبل أن تجلس البنت وكان البص شبه فاضى..وسمعت بطقة وكانت طقت شرطت ألأسكرت من أعلى..لحظة من الجهجهة للبنت لاتدرى تمسك عشان ما تقع وللآ تمسك ألأسكرت..وفجأة لميت ليك البنت وقمت وجلستها مكانى....شكرتنى وهى حانية الرأس..ولكنى حمدت الله كثيرآ بأن لم يتنصل ألأسكرت كاملآ..
العبايات واللبس الواسع مريح.....
مودتى................إسماعيل محمد احمد عباس..........
|
Post: #5
Title: Re: حالة إحراج... حكاية وقصة
Author: GeerTor Tong
Date: 01-12-2009, 04:26 PM
Parent: #4
اها... وبعد جابت تاكسي واللا شنو؟
شكراً على المرور يا اسماعيل
________________
في مرة ..
في عام 2003 م
المكان :مجلس تنسيق الولايات الجنوبية.
الفريق معاش مهدي بابو نمر في تصريحات صحفية بعد مقابلته
مع الدكتور رياك قاي كوك.
وبعد ان تحصلنا على التصريحات المطلوبة..
كانت معنا صحفية تعمل في إحدى الصحف اليومية الصادرة بالخرطوم
هذه الصحفية هتفت بصوت اعلى قليلاً وهي تخاطب مهدي بابو نمر قائلة
(لو سمح انت كنت وزير شنو؟)...
هذا السؤال خلاني اتمنى لو وجدت تربة ادفن نفسي فيها...
طبعاً... الرد كان قاسياً ليس على تلك بل على كل صحفي!!!
هل يعقل الا تعرف صحفية ....وزير صحة سابق ورئيس هيئة الاركان من قبل؟
رايك شنو في الإحراج دا؟
|
Post: #6
Title: Re: حالة إحراج... حكاية وقصة
Author: GeerTor Tong
Date: 01-12-2009, 04:36 PM
Parent: #4
| Quote: وكان البص شبه فاضى.. |
شبه فاضي دا بيعني شنو يا اسماعيل؟ ما فهبو ناس واللا شنو؟
كلامك دا هسع ما محرج برضو 
|
Post: #7
Title: Re: حالة إحراج... حكاية وقصة
Author: ismeil abbas
Date: 01-12-2009, 08:29 PM
Parent: #1
يا أخوى قير
Quote: شبه فاضي دا بيعني شنو يا اسماعيل؟ ما فهبو ناس واللا شنو؟
كلامك دا هسع ما محرج برضو |
بلاش إحراجات كتير.........مودتى...........................................................إسماعيل محمد احمد عباس...
|
|