Post: #1
Title: اكتبوا .......... اجمل رسالة وصلتكم بحلول عام 2009
Author: علوبه
Date: 12-31-2008, 07:03 PM
ابداء ليكم
وصلتنى هذه الرسالة من اخى وصديقى عبدالعظيم حاج على من السودان
( ليس استباقا، للاحداث , ولكن لهفة منى فى تمنى كل جميل لاجلك )
( سنة سعيدة عليك )
|
Post: #2
Title: Re: اكتبوا .......... اجمل رسالة وصلتكم بحلول عام 2009
Author: خالد الجبل
Date: 12-31-2008, 11:44 PM
Parent: #1
(كل عام ونحن نبني من رخام الود جسرا للمحبة و الإخاء)
|
Post: #3
Title: Re: اكتبوا .......... اجمل رسالة وصلتكم بحلول عام 2009
Author: عبدالله الامين صالح
Date: 12-31-2008, 11:53 PM
Parent: #2
وصلتنى هذه الرسالة م بداية العام الجديد من صديق لى
( حول لى 5 ج رصيد ضرورى الان)
|
Post: #4
Title: Re: اكتبوا .......... اجمل رسالة وصلتكم بحلول عام 2009
Author: سلمى الشيخ سلامة
Date: 01-01-2009, 01:32 AM
Parent: #3
لو بحثت عن خط (عبور مشاة) أو (أمامك مدرسة) أو(منحنى) فى كل (العاصمة) ولم تجده ...تبقى أكيد فى السودان*****لو إنت فى بلد فيهو سنه سابعة وسنة تامنه ابتدائى… تبقى أنت أكيد فى السودان*****لو طالعت إعلانات لشركات (مسئول) كبير وهو لا زال (فى الخدمة)… تبقى أنتأكيد فى السودان
*****
لو (لبد) ليك شرطى (مرور) فى نهاية شارع (إتجاه واحد) وخلاك لمن دخلت وجاك بى (دفتر إيصالاتو)… تبقى أنت أكيد في السودان
*****لو لقيت فى بلد ما فيهو (معينات البحث العلمى) وكل يوم الجامعات تناقش(خمسين) رسالة دكتوراة و(ميتين) رسالة (ماجستير)... تبقى أنت أكيد فى السودان*****لو أنت في بلد وزارة الصحة فيهو قالت (الدواء) ده (فاسد) أحظروهو .. وبعد شويه قالت (ما فاسد) خلوهو .. وبعد شويتين قالت (فاسد) أمنعوهو …. تبقى أنت أكيد في السودان*****لو لقيت فى بلد (الصحف) بتتقفل بى (مادة) فى القانون (معموله للمطاعم) …تبقى أنت أكيد فى السودان*****لما تلاقى الترزي كاتب على باب المحل بتاعو آية بتقول ( وفصلنا كل شئ تفصيلا) صدق الله العظيم … تبقى أنت أكيد في السودان*****لما تخلص موضوع فى مكان ما، وتجى تركب عربيتك وتلاقى (المساحات) مرفوعه عشان تعرف على طول انو فى واحد مسحها ليك وح ياخد منك واحد جنيه … تبقى أنت أكيد فى السودان
*****
لو قرأت الصحف فى 1987 أو فى 2000عن (إنتهاء قطوعات) الكهرباء ولقيت نفس الكلام فى صيف 2030 … تبقى أنت أكيد فى السودان
*****
لو زوجة الوزير مليانة دهب بتتجدع بيه بالعلن في الشارع من غير حساب وأطفالها بيملطشوا اولاد الجيران... تبقى أكيد إنت في السودان
*****
لو أهم (كبرى) فى عاصمة البلد صيانتو عاوزة ليها (سنتين)… تبقى أنت أكيد فى السودان*****لو بهدلوك في اي مكان واشتكيت للشرطة قالوا دا مش اختصاصنا امشي اشتكي في الثروة الحيوانية ... تبقى أكيد أنت في السودان*****لو لقيت أنو وزارة الداخلية عندها مؤسسات (تعليمية) ووزارة التعليم عندها مؤسسات (صحية) ووزارة الصحة عندها (شركات إنشائية)… تبقى أنت أكيد فى السودان
*****
لو دخلت (الوزارة) وأنت مؤجر في (زقلونا) وطلعت وعندك عمارتين في (قاردن سيتى )..تبقى أنت أكيد في السودان*****لو اشتغلت في الخدمة المدنية 30 سنه وأدوك معاش شهرى يساوى 6 كيلو لحمة ...تبقى أنت أكيد فى السودان*****
لو توقفت (الحركة) إثناء ساعات (الذروة) وإكتشفت أن السبب (كشه).... تبقى أنت أكيد فى السودان*****لو عدمت (التعريفة) وكمان دخلت فى (ديون) للإيفاء بنفقات (فراش) قريبك الذى توفى إلى رحمة الله... تبقى أنت أكيد فى السودان*****لو وجدت أن (ترخيص عربتك) يساوى (ربع) قيمتها …. تبقى أنت أكيد فى السودان*****لو تقدم إبنك (المهندس) لشغل وظيفة وكان (الإنترفيو) عن (صلاة الجنازة)... تبقى أنت أكيد فى السودان*****لو (فجأة) إكتشف (المسئولون) أن (الخريف) على الأبواب).... تبقى أنت أكيد فى السودان*****لو عندك (الكلية) اليمين متعطلة وعاوزين يشيلوها ليك قامو (إستأصوا) الشمال السليمة لأنو الدكتور كان ماسك الأشعة (بالمقلوب)... تبقى أنت أكيد فى السودان*****
لو مكث (مرتبك) معك (تلاته ساعات وإطناشر دقيقة) هى الفترة من لحظة إستلامه من الصراف إلى حين عودتك للمنزل... تبقى أنت أكيد فى السودان*****لو فاز فريقك الذى تشجعه على الفريق الخصم فى مباراة الذهاب 8/صفر وخسر فى مباراة الإياب 12/صفر…. تبقى أنت أكيد فى السودان*****لو لقيت لوري التراب وكومر البلدية من سنة 50 شغال بالاضافة للركشة في نفس الشارع... تبقى اكيد انت فى السودان*****لو وجدت أن رؤساء (الأحزاب) هم (رؤساء) مدى الحياة... تبقى أنت أكيد فى السودان
*****لو وجدت أن نسبة الفقر تزداد بإزدياد (معدل النمو تبع الحكومة) …. تبقى أنت أكيد فى السودان*****لو ضربتك عربية حكومة و مشيت القسم و طلعتا انت الغلطان... تبقى اكيد انت في السودان*****لو خشيت مؤسسة حكومية ولقيت الموظفين مافي اثناء الدوام.. تبقى اكيد انت في السودان*****لو طلعت مستحمي و متريح وماشي عرس و دخلت العرس زي الكأنك كنت بتلعب كورة... تبقى انت اكيد و اكيد في السودان*****لو ماشي مشوار 20 كيلو متر و وصلتا في 4 ساعات... تبقى انت اكيد في السودان*****لو لقيت مطعم وقدامو دورات مياه... تبقى اكيد انت في السودان*****لو مشيت الحوادث و قالو ليك لو (عندك رصيد اضرب للدكتور لانو نايم)... تبقى انت اكيد في السودان*****لو شغال في السوق و قالو ليك ادفع ضريبة ميزان ... تبقى اكيد انت في السودان*****لو لقيت (اجنبي عواطلى) وعندو صلاحية اكتر منك و الناس كلها تحترمو... تبقى انت اكيد في السودان*****لو اعلنو عن 3000 وظيفة و مشيت تقدم في اليوم الاول و قالو ليك (تعال بكرة لانو لجنة المعاينة ما اكتملت) و جيت تاني يوم و لقيت التقديم قفل... تبقى انت اكيد في السودان*****لو لقيت حي ساكن فيهو (مسؤول كبير) و الكهرباء فيهو ما بتقطع نهائى... تبقى اكيد انت في السودان*****لو محتاج حاجة و لقيت اقرب حتة تجيبا منها على بعد 3 كيلو متر... تبقى اكيد انت في السودان
*****
لوقريت الكلام دا وما علقتا ولا جنيت وكنت بارد شديد ومستسلم.... تبقى أكيد أنت من السودان
*****ولو ما مرت بيك اي حاجة من الفوق دي... تبقى اكيد انت ما من السودان
نقلت هذه الرسالة كما وردتنى فى بريدى
|
Post: #8
Title: Re: اكتبوا .......... اجمل رسالة وصلتكم بحلول عام 2009
Author: علوبه
Date: 01-01-2009, 07:11 PM
Parent: #4
كل عام وانت تمام
اختنا العزيزة سلمى تسلم ايامك
ماعايز اعكر صفاك ( اذكرى ايام صفانا)
حزنت جدا فى عـــام 2008 لفراق ووفاة الانسان الخلوق المهذب المطرب جدا
الفنان الخالدى ربنا يرحمه
الرسالة التى وصلتك عبارة عن ملخص للحياة فى السودان وكيف اهلنا هناك يقبضون على النار والجمر وحرارة الاشواق والاشواك
شكرا على الاضافة
واللــــــــــه يديك الفى مرادك
|
Post: #7
Title: Re: اكتبوا .......... اجمل رسالة وصلتكم بحلول عام 2009
Author: علوبه
Date: 01-01-2009, 07:04 PM
Parent: #3
كل عام وانت تمام
ياباشمهندس عبدالله الامين
انشاء اللــــــــه حولتها ليهو ؟؟؟؟؟؟؟
صاحبك الظاهــــــــر مزنوووووووووووووق !!!!
وانشاءاللــــــــــه يوم زنقتك مايجــــــــــى
شكرا على الاضافــــــــــــــــــــــــــــــــه
|
Post: #6
Title: Re: اكتبوا .......... اجمل رسالة وصلتكم بحلول عام 2009
Author: علوبه
Date: 01-01-2009, 06:59 PM
Parent: #2
كل عام وانت تمام
ياباشمهندس خالد الجبل
وانشاءالله تطلع جبل عرفات
شكرا على الاضافة .... ياشفيف ........يارايق
|
Post: #5
Title: Re: اكتبوا .......... اجمل رسالة وصلتكم بحلول عام 2009
Author: نزار باشري ابراهيم
Date: 01-01-2009, 12:58 PM
Parent: #1
وصلنى للتومن صديق
كل عام وأنت بخير أحسن حالا وأهدأ بالا وأكمل صحة وعافية
|
Post: #9
Title: Re: اكتبوا .......... اجمل رسالة وصلتكم بحلول عام 2009
Author: خدر
Date: 01-01-2009, 07:13 PM
Parent: #5
يا (....) امي عاوزاكـ ,, اتصل بيها
__
رسالة بذيئة من اخوي 
|
Post: #10
Title: Re: اكتبوا .......... اجمل رسالة وصلتكم بحلول عام 2009
Author: علوبه
Date: 01-01-2009, 07:18 PM
Parent: #5
كل عام وانت تمام
اخى نزار باشرى
الرسالة معبرة وملئية بدعوة صادقة ربنا يحقق كل ماتتمناهو وماهو جميل
شكرا على الاضافة
|
|