Post: #1
Title: رحلة بين طيات السحاب
Author: طارق جبريل
Date: 12-29-2008, 12:44 PM
Parent: #0
مهداة لزهير الزناتي وعزاز شامي
ـــــــــــــــــــــــــــــــــــــــــــــــــــــــــــــــ
تليفون...
لطيفة اخرباش (مدير المعهد العالي للاتصال بالرباط): سي طارق كي داير توحشناك شحال هادي ما شفناك
طارق: اهلا استاذتنا لطيفة... والله غير مع الخدمة راك عارفة هاد الحرفة كي دايرة
لطيفة: يا سيدي السفارة الفرنسية غادي تدير سمنار على الاعلام في نواكشوط وانا منسقة السمنار بغيتك تشارك معانا
طارق: ما كاين حتى شي مشكل غير خص تحددوا ليا وقتاش باش نقدر نستأذن من الجورنان
لطيفة: ميرسي بالزاف وغدا غادي نعطيك لا ديتاي ديالو
طارق: كون هانية يا للا انا معاك
يومين اتحدد وقت السمنار واتحدد السفر لنواكشوط...
عملت لينا السفارة الفرنسية الفيزا وادونا التذاكر وبعد يومين مشينا علي المطار
مسيو جيرارد بونجور... مسيو تاريك بونجور... مسيو استيفان بونجور سي مسيو تاريك اليه سودانيه... اووه بونجور مسيو تاريك..
دخلنا علي الطيارة يا الحبان وقعدت جنب الجناح وقعد جنبي فرنسي خبير في النخيل شايلو كتابا غليد كله ((تمُر))... بونجور ... بونجور
مواعيد الطيارة تكره 3 صباحا.... واحد قدامنا دخل ومعاهو ((مهد)) أليل كلبي رمادية علي البشاورة
والخرابة حاجزلها كرسي عديل جنبو قعدوا قدامنا...الله بيسألني المهد أليل البشاوري دي أحسن من مراتبنا الكانت بتنجدن لينا امي رحمها الله زمان....
قلت في نفسي وحات الله كلاب الخواويج ديل أحسن من وليداتنا يهتموبا ويهنجكوها...
ودلع اصلي ما شفت زيو... ونحن بالله بعد شهر من يقطعولك الحبل السري تكون لافي في الشارغ ورجلينك مغبرات واصابعينك كلهن طين
ومخاخيتك تتسايل خيران خيران وتمسح فيهن بي يديك ووشك كله يتجلبط ووكتين ينشفن في جضومك علي الرقاق... نحمد الله ترانا عايشين وهم عايشين مع كلابهم..
اها شويتين جن المضيفات المغربيات طلعن مصارين التنفس ديك...
ووكتين يقع كدي تسوي كدي ووكتين كدي سووا كدي... لامن وصلن منافذ الاغاثة..
وانا ديل من عرفت ركوب الطيارات عيني ليهن لامن الطيارة دي ترك في الارض...
المهم شويتين الكابتن اعلن انه خلاص دايرين نطير... وحاتك يا الحبان الطيارة كلها خواويج حقين السمنار وخمسة مغاربة وجزائري والعبد لله...
قربت اقولهم انا ماني ماشي معاكم واريتم الموريتانيين طايرين وان شاء الله لا اتعلموا اعلام لا شيتين...
المهم الخرابي دي قامت تجري في الرن وي دة ومكناتها يوجوجن ...
وانا اصلي كنكشت كله كله في حتتي ويديني في الكرسي القدامي بي عتلة ما تقلعن
يمين من شدة ماني ضاغط الكرسي القدامي قربت اقلعو كله كله... واصلي ما خليتلي آية حافظها ما قريتها...
والساعة الطيارة القامت من الارض وبقت تدخل وتخرج في الجناح الصغيروني داك علي غتاية الحلة وكتين يتاقوها فشان مويتها تشرب
انا اصلو قلبي دة وصل عند رجلي وحاتكم حسيتبو جنب ركبي زي اللباس الزمان البيسوهو النسوان براهم داك ويلبسوهو ليك وانت شافع
وتنصلو لي ركبتك وكتين تجي تقضي حاجتك (اكرمكم الله).. اها قلبي بس بقى زي نصلي اللباس دة...
اها شويتين كابتن الجن دي قام تكاها علي اليمين... ولقيت نفسي فوق والناس التانين متكين تحت مننا...
وحاتكم لقيت نفسي بهضرب: ووووووووووووب علينا كفاها... لحدي ما الخويويج الجنبي بقى يشوف فيني
ولقيت نفسي اخرخر عرق وبي الله ويامين حتى اقدر امسحوا وارجع تاني اكنكش في الكرسي القدامي....
ربكم رب الخير ... الطيارة استعدلت تاني وطفوا الانوار ألات الحزام ديك...
والشي الغايظني اتاوقت اشوف في الخويويج الجنبي لقيتو حاضن كتاب التمُر ونايم
وفي نفسي قلت الخرابة المجنون دة ينزل من طيارة ويركب طيارة فشان التمُر أليل العرقي دة... يمين ماهو نصيح
شويتين جابولنا الفطور.. وحاتكم كل شي طعمو مالح مالح في خشمي من الخلعة الدخلت فيني...
الخواويج ديل كلهم ناموا ومعاهم المغاربة... ولقيت نفسي مصنقر وحدي انا والجزائري...
شويتين يا الحبان الطيارة دي تجي فوق من جبال كدي وبقت ترجف....
وحاتكم اعاين لي جنحاتها يترجرجن علي الجلي... وبطني بقت توجعني
واتمنيت لو شلتلي بامبرس من أليل ولدي محمد وختيتو احتياطي معاي..
بقيت اعضعض في لساني قربت اقطعو... وقلعت عيوني زي الزول الضاربنو ابرة ملاريا...
والفقع مرارتي الخويويج القدامي يلاعب في كلبتو... نحن الموت قدامنا والراجل يلاعب في الكلبي.. شفتوا المحنة دي
شويتين احسلك الطيارة دي تناتل دايري تطلع لااا فوق..
نفسي قام واضنيني صنن كله كله... وبقيت اتشهد.. واستغفر..
واصلو خيالي دة ما اتذكرلو حسني سويتها كله كله.. كل الاتذكرتو السيئات ولقيت نفسي عندي قدر سيئات
اتذكرت وكتين غشيت امي وقلتلا في المدرسة دايرلهم ريال عشان الجمعية الادبية.. وهم كان دايرين شلن بس
والشلن الباقي كملتو كله داندرمة... واتذكرت وكتين غشيت اختي وقتلا امي وكتين جات من العرس
طرف توبها كان فيهو حلاوايي ويحيدي ... وهن كانن اتنين لغفتهن فِرِد مرة..
وحاتكم سيئات بالكوم... شي هني وشي وقت القرايي في مصر وشي في السودان...
اصلي حتة حسنايي كدي ما لاقتني يا كافي البلا...
ومع الهزيز أليل الطياري لقيت ليكم اسناني يكركبن في بعضن علي علبة النيدو الخاتين فيها قروش ((الختة))
بقيت في الحالة دي وحاتكم لامن الطيارة نزلت في نواكشوط الجن دي...
ووكتين نزلت لقيت نفسي ماشي مكلوج في سلم الطيارة ورويحتي دايري تمرق...
اقولكم شي مافي زول فيكم عارفلو طريق اربعين بين المغرب والسودان
|
Post: #2
Title: Re: رحلة بين طيات السحاب
Author: عماد محمود علي
Date: 12-29-2008, 12:55 PM
Parent: #1
| Quote: اقولكم شي مافي زول فيكم عارفلو طريق اربعين بين المغرب والسودان |
هسع الله بسعلك أنت بالجد كده عايز تمشي ؟ ماياك طول اليوم بتداعي عليهم شن موديل ليهن ؟ الله يايابا الغراب اليأكل في عنقرتك دي .... 
|
Post: #3
Title: Re: رحلة بين طيات السحاب
Author: طارق جبريل
Date: 12-29-2008, 01:16 PM
Parent: #2
| Quote: هسع الله بسعلك أنت بالجد كده عايز تمشي ؟ ماياك طول اليوم بتداعي عليهم شن موديل ليهن ؟ الله يايابا الغراب اليأكل في عنقرتك دي ... |
كمان دايرني أخليلم السودان
موش كفايا خليتلهم الحفلات والسهرات
|
Post: #4
Title: Re: رحلة بين طيات السحاب
Author: عواطف ادريس اسماعيل
Date: 12-29-2008, 01:28 PM
Parent: #3
Quote: واصلو خيالي دة ما اتذكرلو حسني سويتها كله كله.. كل الاتذكرتو السيئات ولقيت نفسي عندي قدر سيئات
اتذكرت وكتين غشيت امي وقلتلا في المدرسة دايرلهم ريال عشان الجمعية الادبية.. وهم كان دايرين شلن بس
والشلن الباقي كملتو كله داندرمة... واتذكرت وكتين غشيت اختي وقتلا امي وكتين جات من العرس
طرف توبها كان فيهو حلاوايي ويحيدي ... وهن كانن اتنين لغفتهن فِرِد مرة..
وحاتكم سيئات بالكوم... شي هني وشي وقت القرايي في مصر وشي في السودان |
أنا لما قلت ليك عفريت ما خاتية عليك , عموما أنا خليت سناء ثابت تقرا العفرتة بتاعتك دي , لكن يا طارق الليلي بي كلامك دة ذكرتني عمات أولادي لمن يتكلمن ويكسرن الكلام وهم مستغربين للكلام العجيب
وغريب دة وما قادرين يعرفوا عماتهم ديل بيقولن في شنو 
|
Post: #5
Title: Re: رحلة بين طيات السحاب
Author: عماد محمود علي
Date: 12-29-2008, 01:38 PM
Parent: #4
| Quote: نان هي جنس سيئات شي هني وشي وقت القرايي في مصر وشي في السودان |
الليلة وووووووووووووب !!!! ( مع الاعتذار لصاحبتها ) .....
|
Post: #9
Title: Re: رحلة بين طيات السحاب
Author: طارق جبريل
Date: 12-29-2008, 04:22 PM
Parent: #5
Quote: Quote: نان هي جنس سيئات شي هني وشي وقت القرايي في مصر وشي في السودان
الليلة وووووووووووووب !!!! ( مع الاعتذار لصاحبتها ) .....
|
يا عمدة قول بسم الله
|
Post: #6
Title: Re: رحلة بين طيات السحاب
Author: طارق جبريل
Date: 12-29-2008, 01:53 PM
Parent: #4
Quote: لكن يا طارق الليلي بي كلامك دة ذكرتني عمات أولادي لمن يتكلمن ويكسرن الكلام وهم مستغربين للكلام العجيب
وغريب دة وما قادرين يعرفوا عماتهم ديل بيقولن في شنو |
عاد يا عواطف ديل علي توديهم كريمي ياخدولم كورس صيفي في الشايقي
ياخي سلمي علي سناء ثابت شديد
محبتي الاكيدة
|
Post: #7
Title: Re: رحلة بين طيات السحاب
Author: العوض المسلمي
Date: 12-29-2008, 02:11 PM
Parent: #1
| Quote: رحلة بين طيات السحاب |
طارق سلام
وكل سنه وانت بخير
طيب نزل الاغنيه ,,,
ولا نشوف مطوع ينزلها بدلا عنك
ومروس وين ؟؟
|
Post: #8
Title: Re: رحلة بين طيات السحاب
Author: صلاح الأحمر
Date: 12-29-2008, 02:27 PM
Parent: #7
وعامل لي فيهاأبو الرجاله وانا السنجك وانا الكعب
وانا الشافو خلو ونحنا الشوايقه ديل صعبين خلاس
ماتشوف غنانا وحنانا الكتير ده ووكت الحاره أنحنا
اسيادها وماعارف شنو000000000000
ياعمي قوم كده ولاكده ده انت طلعت أي كلام،،،،
سناجك جبانات،،،
كل عام وانت بخيروسنه هجريه سعيده عليك وعلى الأولاد0
|
Post: #14
Title: Re: رحلة بين طيات السحاب
Author: طارق جبريل
Date: 12-29-2008, 05:43 PM
Parent: #8
ابو رضا كيفنك
وحاتك يا ود اللحمر
المك نمر ذاتو ان بقى شاف الخجة ألت الطيارة دي
كان قالهم اللهم الدفتردار ولا خجة الطيارة دي
كل سنة وانت طيب يا الحبيب
وقول لي بتك السمحة دي تاني ما تتقاطم
مع اولادنا وتطردهم من اوضتها
|
Post: #10
Title: Re: رحلة بين طيات السحاب
Author: طارق جبريل
Date: 12-29-2008, 04:24 PM
Parent: #7
Quote: طارق سلام
وكل سنه وانت بخير
طيب نزل الاغنيه ,,,
ولا نشوف مطوع ينزلها بدلا عنك
ومروس وين ؟؟ |
ود المسلمي كيفنك
الحجي مبروكة يا يااابا
وشوفلك زول ينزلنا الاغنية
نان بت حيمورة خلتلنا محل نروس فيهو
وحاتك تحت الباطنية ما عندنا حل
|
Post: #11
Title: Re: رحلة بين طيات السحاب
Author: ASHRAF TAHA
Date: 12-29-2008, 05:06 PM
Parent: #1
الساعة 8 مِسا لكن يا دوب يومي بدا
مباااالغة
|
Post: #15
Title: Re: رحلة بين طيات السحاب
Author: طارق جبريل
Date: 12-29-2008, 05:45 PM
Parent: #11
اشرف كيفنك ياخ
الله لا وراك خججان الطيارات
|
Post: #12
Title: Re: رحلة بين طيات السحاب
Author: أشرف البنا
Date: 12-29-2008, 05:08 PM
Parent: #1
طارق ...
كل عام و انت بخير ...
ياخي لهجة الشايقية مع رطانة المغاربة زي السمك بالمنقة ( ما عارف ياتي المنقي و ياتي السمك ) ...
لكن من الليلة حنسميك طارق طيارة على وزن النجم الهلاريخي علاء طيارة ( سبعة وجوه ضاحكة ) ...
مودتي ...
|
Post: #13
Title: Re: رحلة بين طيات السحاب
Author: صلاح الأحمر
Date: 12-29-2008, 05:29 PM
Parent: #12
| Quote: لطيفة اخرباش (مدير المعهد العالي للاتصال بالرباط) |
أها الزوله العزمتك دي بقت وزيره(كاتبة الدولةفي الخارجية والتعاون)
طيب انت حتبقى وزير متين؟
قول آمييييييييييييييين0
|
Post: #18
Title: Re: رحلة بين طيات السحاب
Author: طارق جبريل
Date: 12-29-2008, 11:04 PM
Parent: #13
عاد انا يا ود اللحمر شبه وزارات
يا زول هووووووووي انا طُلبة مهضلم ساي
|
Post: #16
Title: Re: رحلة بين طيات السحاب
Author: طارق جبريل
Date: 12-29-2008, 05:50 PM
Parent: #12
النبي فيك يا دكتور اشرف
ابعدني من الطيارات ديل
خلني مع الطُلب والبنايين
سمحين وحنينين
كل سنة وانت طيب ياخ
|
Post: #17
Title: Re: رحلة بين طيات السحاب
Author: moaz elsir
Date: 12-29-2008, 06:12 PM
Parent: #1
| Quote: والخرابة حاجزلها كرسي عديل جنبو قعدوا قدامنا |
حبيبنا طارق
" الكلب تذكرة كاملة ولا نص تذكرة"؟
|
Post: #19
Title: Re: رحلة بين طيات السحاب
Author: محمد عثمان
Date: 12-29-2008, 11:42 PM
Parent: #17
من قبيل قااعد بقرا عشان اعرف
الحااصل شنو..؟؟؟
ما عرفت دى رطانه ولا عربى ولا شنو..؟؟
غايتو يا طارق عندك الحكااوى
و عماد لابد ليك...
|
Post: #22
Title: Re: رحلة بين طيات السحاب
Author: طارق جبريل
Date: 12-30-2008, 10:08 AM
Parent: #19
Quote: ما عرفت دى رطانه ولا عربى ولا شنو..؟؟
|
ود ناس عثمان كيفنك
باقيلي جنيت انت نسيت كلام اهلك ولا شنو
وعماد دة خلو انا عارفه قليبو رهيييييييف
|
Post: #21
Title: Re: رحلة بين طيات السحاب
Author: طارق جبريل
Date: 12-30-2008, 10:06 AM
Parent: #17
Quote: " الكلب تذكرة كاملة ولا نص تذكرة"؟
|
حبيبنا معاذ
انا باقيلي بالشافتو عيني دة
الكلب دة تذكرة ونص
|
Post: #20
Title: Re: رحلة بين طيات السحاب
Author: ياسر عبدالكريم محمد
Date: 12-30-2008, 00:17 AM
Parent: #1
الاخ طارق
حمد الله على السلامة
من رحلة السجم دى
إسلوبك فى الكتابة
ممتع خالص
الغريبة الطيارة دى
بتمشى فى الواطة اسرع
من الجو مع كدة
مصرين يعلقونا
بين السماء والارض
واشريرى انا
|
Post: #24
Title: Re: رحلة بين طيات السحاب
Author: طارق جبريل
Date: 12-30-2008, 01:24 PM
Parent: #20
ازيك يا ياسر ياخ
الله يخلي ليك الحلوين الفي البروفايل ديل
|
Post: #25
Title: Re: رحلة بين طيات السحاب
Author: ناهد بشير الطيب
Date: 12-30-2008, 02:49 PM
Parent: #1
اقرا وغنى طوالى ياود عمى ....
الطايرة بعدك محزنة
ناس طارق فارقهم الهنا
ده حرام عليك
ياخويج * مابصح ليك
تعمل كده
*******
مابصح ليك تنزل هنا
موريتانيا دى مامن هنا
جد ياطيار لجمتنا
******
سواقنا خفف سرعتك
خليتنا فى خوف وعنا
بالله خفف سرعتك
عشان يطول عمر ...الهنا
_______________
ياود عمى ...ماتحكى لمحمد عثمان قصة عمى حسن مع الطيارة دييييك
|
Post: #27
Title: Re: رحلة بين طيات السحاب
Author: محمد عثمان
Date: 12-30-2008, 04:07 PM
Parent: #25
| Quote: ياود عمى ...ماتحكى لمحمد عثمان قصة عمى حسن مع الطيارة دييييك |
ناااهد...
مشتاقين ياخى
و كل سنه و انت طيبة..
خىص منتظر الحكاااية..جيبا يا طارق فى الليل...
|
Post: #28
Title: Re: رحلة بين طيات السحاب
Author: طارق جبريل
Date: 12-30-2008, 10:11 PM
Parent: #25
ناهد بت عمي
وحات الله ما بسالك
وشيت عمي حسن ان بقيت حكيتو هني بيطردوني
|
Post: #26
Title: Re: رحلة بين طيات السحاب
Author: alfatih
Date: 12-30-2008, 03:02 PM
Parent: #1
طارق
لاباز عليك وبوليفيا كلها
Quote: ونحن بالله بعد شهر من يقطعولك الحبل السري تكون لافي في الشارغ ورجلينك مغبرات
واصابعينك كلهن طين
|
ياخ وحات الطاحونة لامن قربت اقع من الكرسى .. ليه بس بتذكّرنى انا
حمدا لله على سلامة الوصول .. مش اخير من الطيارة الرابطين جناحا بملاية
|
Post: #31
Title: Re: رحلة بين طيات السحاب
Author: طارق جبريل
Date: 12-31-2008, 10:29 AM
Parent: #26
الفاتح كيفنك
لكن طيارة الملاية دي بالغتة فيها عدييييييييييييل
|
Post: #29
Title: Re: رحلة بين طيات السحاب
Author: عبد اللطيف بكري أحمد
Date: 12-31-2008, 07:18 AM
Parent: #1
ود الخالة ،،
مشتاقين برشا!!!
ملطم اللغات لكن ماعندك!!!
يعيشك!!
==
أما سردك الجميل فقد أعاد لي ذكريات مريرة وكأني بك توصف حال أخوك وهو قادم
من رحلة 9 ساعات و33 دقيقية بين شنغهاي ودبي!! ياخي دي (أتفه سفرية) خلقها الله!!
=
الصور أعلاه لرحلة أخرى أخذتها قبل أسبوع في سماء البحرين قادم من بومباي وأجتهدت
أصور غتاية الحلة لقيت العذابة أدوها كوز ومافي داعي للتهوية،،
=
-في السفر فقط أكتشف أني حصيلتي القرآنية لا تسعفني إلى خمسة دقائق طيران فقط ولا برتل
سريع ماعارف،،
- اللحظات الوحيدة التي تمنيت فيها ان أكون مثل الإسرائيلي بجانبي في المقعد: ضرب ليك
زي كم فتيل من الصغويرونات ديلك وحاتك ياغالي فريد نومة إلا قلنالو اتزحزح يالعين خلنا الننزل!!!
- الخطوط الأماراتية ولمزيد من الخلعة تعلن لنا إفتتاح خطها المباشر للوس أنجلوس 16 ساعة بلا توقف
تقول لي درب الأربعين؟؟؟
سؤال أخير : انت مشيت وين يوم حلة الشلباية والسفن آب؟؟؟
- ياخ جهجهت علينا العربي حقنا،، اوروفوار!!
|
Post: #30
Title: Re: رحلة بين طيات السحاب
Author: صلاح أبودية
Date: 12-31-2008, 08:42 AM
Parent: #29
أولاد خالتى :
تعرفوا أجمل حاجة فى الطيارة دى شنو ..؟
أجمل حاجة لمن تفتح الباب وهى بين السحاب وتولبوت تتلب من فوق ..!!
وتفرد يدينك للريح ...
وتشد كرعينك جاى جاى وتتحاول تتوازن ..!!
والهواء يدخل بى نخرينك ويمرق بى حتة تانية !!
وخمسة ألف أربعة ألف ,,, وتفتح المظلة ..!!
وتاوق بطرف عينك تشوفا فتحت ولّ الضحك شرطك !!
يا سلام لمن المظلة تفتح !!
شعور إنك بتتولد كبير وفى السماء !!
تبرطع فى السماء وتعمل فيها هيرو !!
وبعد داك تمد صباعك الفى النص للطيارة !!
إنعل أبوك إن شاء الله تقعى بعد ما مظلتى فتحت !!
|
Post: #33
Title: Re: رحلة بين طيات السحاب
Author: طارق جبريل
Date: 12-31-2008, 10:45 AM
Parent: #30
ود ابو دية ود خالتي
كيفنك والبطان
اها وان بقيت لقيت الطيارة ما فيها برشوت تقع وين
|
Post: #32
Title: Re: رحلة بين طيات السحاب
Author: طارق جبريل
Date: 12-31-2008, 10:38 AM
Parent: #29
عبد اللطيف كيفنك آآآآيابا
وخالتي نعلها طيبي ونصيحي في عضمها دة
بمناسبة القزيزات الصغيري ديك
عارف عندي عمي محجوب الله يطراهو بالخير
كان في السعودية بتاع الحركة قام اداهو مخالفة دفع فيها 100 ريال
قام قال لي بتاع الحركة:
الله يسألني تمن قزَيزي
|
Post: #34
Title: Re: رحلة بين طيات السحاب
Author: طارق جبريل
Date: 01-04-2009, 02:29 PM
Parent: #1
عزاز وزهير ديل وينهم
|
Post: #35
Title: Re: رحلة بين طيات السحاب
Author: سلمى الشيخ سلامة
Date: 01-04-2009, 04:34 PM
Parent: #34
غايتو يا طارق لقيتك زى الواطة دى
انت زول فنان وكتاااااااب موت
تعرف اول ما اخت كراعى فى الطيارة
تدور ليك اغنية رحلة بين طيات السحاب
واتجدع واغنى ليك بصوت عالى ومرتاح
واعاين من شباك الطيارة
وبزعل جنس زعل لمن ما اكون قاعدة جمب الشباك
تقول مفطومة بجناح طيارة
مرات بسافر بالليل برضو بكون زعلانه لانه فى مناظر كده بتفوتنى
وطيات السحاب دى الله عليها
تحس انك ماشى عليها عديل
اخر مرة سافرت قبل اسبوع تقريبا كنت فى تكساس
نزلت فى مطار فورتوورث
الشى ما مطار نصاح
ماهل مهلة ما بتعرف تمشى الا بخريطة طريق
وشوف عينى ناس البلد "ظاتن" ؟ بسالو عن المداخل والمخارج
قول كدى ركبت قطر من مدخل للمدخل التانى
خمستاشر دقيقة ونحنا معلقين فى الكوبرى
والقطر كل ما نصل محطة ينضم وينضم
لمن وصلت محلى المنو وبسافر لهيوستن
والنحدسك ما بريد السفر فى الطيارات الصغار
بخاف الله واحد علا الكبار والماكنات ديل ما بخاف طب
لكن اقول ليك سر
عندى اصحابى اتنين واحد اول حرفه السنى دفع الله والتانى عبدالرحمن نجدى
ديل يا طارق برجفوا رجفة عدوك فى الطيارة
وبخافو النبى عربى من سفر الطيارات
علا نحنا القلب قوى بكترت السفر وقطعة المحيط
اتناشر ساعة بنات حفرة انت والسما فوقك وتحتك المحيط
اها النحكى ليك دى قبال امشى
واحد ماشى الحج من اهلنا ناس بربر
قوم ياالراجل اوصل بورتسودان ووقف فى المينا
سال الناس المعاهو
ـ انتو البابور دا بصل جدة فوق كم ساعة ؟
قالو ليهو اربعة وعشرين ساعة
"دا كان زمان هسى ما بعرف"
عاين جاى وجاى وقالهم
ـ اها يا الحبان وكتين توصلو لابو فاطنة عليه الصلاة والسلام
قولو محمد ودعطا منو يغريك السلام
وركب رجع بربر
شفت الخوف الماخوفك
اقعد عافية ود امى
|
Post: #36
Title: Re: رحلة بين طيات السحاب
Author: طارق جبريل
Date: 01-05-2009, 11:07 AM
Parent: #35
سلمى بت الشيخ كيفنك
وكل سنة وانت طيبة
انت متأكدة الزول بتاعكم دة جعلي من بربر
قسما بالله دة فاتني في الجرسة
وحاتك الفوبيا بتاعة الطيارة دي ابت تفوتني كله كله
غنيت ما نفع
قراية ما نفعت
اتونست ما نفع
في النهاية رست علي الكنكشة في الكراسي
|
Post: #37
Title: Re: رحلة بين طيات السحاب
Author: Tabaldina
Date: 01-05-2009, 11:33 AM
Parent: #1
مكرر
|
Post: #38
Title: Re: رحلة بين طيات السحاب
Author: Tabaldina
Date: 01-05-2009, 11:51 AM
Parent: #1
..
.
| Quote: واتمنيت لو شلتلي بامبرس من أليل ولدي محمد وختيتو احتياطي معاي.. |
هيييييييع السنج الاسد النتر ..
كلا شنو يا زول هه ..
__________
ما كان الطيارة يرميها لينا فيناالصحراء الغربية
وتجنى فى قندهار كدارى .. نفس مقطوع وريقك ناشف
|
Post: #41
Title: Re: رحلة بين طيات السحاب
Author: طارق جبريل
Date: 01-05-2009, 11:42 PM
Parent: #38
Quote: ما كان الطيارة يرميها لينا فيناالصحراء الغربية
وتجنى فى قندهار كدارى .. نفس مقطوع وريقك ناشف |
ان شاء الله يا تبلدينا يرموك في قفص اسود ليها شهرينا ما اكلت*
.......................
المشكلة انت ياكلوا فيك شنو
|
Post: #39
Title: Re: رحلة بين طيات السحاب
Author: عبد الدائم سيد أحمد
Date: 01-05-2009, 12:13 PM
Parent: #1
| Quote: مهداة لزهير الزناتي وعزاز شامي |
كدى نتخارج لحدى المعازيم ما يجو
|
Post: #43
Title: Re: رحلة بين طيات السحاب
Author: طارق جبريل
Date: 01-06-2009, 10:36 AM
Parent: #39
Quote: كدى نتخارج لحدى المعازيم ما يجو
|
قلت كدي يا النضيف
|
Post: #40
Title: Re: رحلة بين طيات السحاب
Author: ميسرة سيد أحمد
Date: 01-05-2009, 03:08 PM
Parent: #1
طارق جبريل ،،، تمساح أم كبلو
الدود النتر ،،،، صح المرافعين خوف
الضاقوا بزقوه
المر ،،، الحسكنيت ،،،،،،
محمد الهادي قال:
قرية جقوري تحي الثورة
حنا عطاشا بندور الألمي
نفاثات نفاثات ،،،،،
أنا والله ما فاهم حاجة ،،
دي المغرب أم طيراً عجم
لك مننا التحية والود
|
Post: #42
Title: Re: رحلة بين طيات السحاب
Author: القلب النابض
Date: 01-06-2009, 01:30 AM
Parent: #40
عاد يا ود العمة ماني قايلاك فوبياني
لكن الحكي الحكاو صلاح دا سواهو
ما كان بتاع مظلات وبتلب من السماء للأرض
"
"
"
بس ما تكلم بنات العمات والخالات
بيشيلو حالك بالبلد
وكل سفرية وانت طيب
|
Post: #48
Title: Re: رحلة بين طيات السحاب
Author: طارق جبريل
Date: 01-06-2009, 11:01 AM
Parent: #42
Quote: بس ما تكلم بنات العمات والخالات
بيشيلو حالك بالبلد
|
بت الخال كيفنك
عاد بنات العمارات ديل ان قلنالن الشي دة
يانا الواطاتنا اصبحت
|
Post: #45
Title: Re: رحلة بين طيات السحاب
Author: طارق جبريل
Date: 01-06-2009, 10:50 AM
Parent: #40
Quote: طارق جبريل ،،، تمساح أم كبلو
|
اوووووووووووه الريس ميسرة شخصيا هنا
يا حبيبنا دة مغربي علي شايقي علي فرنسي
يعني كمونية عدييييييييييييييل
|
Post: #44
Title: Re: رحلة بين طيات السحاب
Author: انعام عبد الحفيظ
Date: 01-06-2009, 10:41 AM
Parent: #1
ان شاء الله يا تبلدينا يرموك في قفص اسود ليها شهرينا ما اكلت*
يا طارق تبلدينا دا مالك عليهو براحه ياخ
|
Post: #46
Title: Re: رحلة بين طيات السحاب
Author: نجوان
Date: 01-06-2009, 10:51 AM
Parent: #44
طارق جبريل..
دي رحلة بين طيّات السحاب
ولا طيّات القواميس..
فهمت جملة جملتين والباقي شختك بختك..
(راعو مشاعرنا يا ناس )
|
Post: #50
Title: Re: رحلة بين طيات السحاب
Author: طارق جبريل
Date: 01-06-2009, 11:06 AM
Parent: #46
Quote: فهمت جملة جملتين والباقي شختك بختك..
|
نجوان صباحاتك وردية
المغربي ممكن نشرحه ليك
لكن الشايقي دة نشرحوا كيفن عاد
|
Post: #49
Title: Re: رحلة بين طيات السحاب
Author: طارق جبريل
Date: 01-06-2009, 11:04 AM
Parent: #44
Quote: يا طارق تبلدينا دا مالك عليهو براحه ياخ
|
يا انعام كيفنك ياخ
ياخي انا متمني تبلدينا دة يكون ماشي للصافية ويطلع ليه قطيع من الأسود
|
Post: #47
Title: Re: رحلة بين طيات السحاب
Author: زهير الزناتي
Date: 01-06-2009, 10:52 AM
Parent: #1
مسجلين حضور ومتابعين ومستمتعين
|
Post: #51
Title: Re: رحلة بين طيات السحاب
Author: طارق جبريل
Date: 01-07-2009, 10:41 AM
Parent: #47
Quote: مسجلين حضور ومتابعين ومستمتعين
|
هلا باو الزهور
|
Post: #52
Title: Re: رحلة بين طيات السحاب
Author: عمر صديق
Date: 01-07-2009, 07:32 PM
Parent: #51
دكتور
كيفنك
وتحياتي
ياخ البارح شربنا موية حلوة من زيركم القدام البيت واتاريكم ساكنين في العمارات شارع اثنين وستين
وان سنة 87 كنت ساكن بين طيات السحاب في سوق الجوهرة
|
Post: #53
Title: Re: رحلة بين طيات السحاب
Author: عمر صديق
Date: 01-08-2009, 01:07 PM
Parent: #52
دكتور طاااااااااااااااااااارق
كيفنك
وتاني البارح شربت من زيركم كية فيك
عشان انت ما قادر تشرب منو
وامكن الليلة تاني اشرب لك منو
__________
ونسخة كتاب حمور سلمتها ليك ناصر
|
Post: #54
Title: Re: رحلة بين طيات السحاب
Author: طارق جبريل
Date: 01-08-2009, 01:21 PM
Parent: #53
ود صديق كيفنك ياخي
بالله شربت من الزير البارد داك
وقعدت جنب الحاج في الدرابزين
يعلم الله حاسدك
بعدين ياخي نسخة الكتاب دي ما لقيت غير ناصر تديها ليه
حا تصلني بعد سنتين
|
Post: #55
Title: Re: رحلة بين طيات السحاب
Author: عمر صديق
Date: 01-08-2009, 01:28 PM
Parent: #54
دكتور طارق
تحياتي
ياخ افتح الماسنجر ناصر دا عاوزك
|
Post: #56
Title: Re: رحلة بين طيات السحاب
Author: طارق جبريل
Date: 01-08-2009, 01:31 PM
Parent: #55
Quote: "إنتي ضايقي مالك؟؟ ما قال لمن تصلوا الفندق.
|
قول ليه تدفع كم
انا شغال في الصفحة الاولى
|
Post: #57
Title: Re: رحلة بين طيات السحاب
Author: Safia Mohamed
Date: 01-08-2009, 01:38 PM
Parent: #1
مبااالغة
يا دكتور
ابداع
بس
خليتنا نتمنى نجي المغرب
ونركب الطيارة عشان نشوف حسناتنا باقي سيئات كو
|
Post: #59
Title: Re: رحلة بين طيات السحاب
Author: طارق جبريل
Date: 01-09-2009, 10:18 AM
Parent: #57
Quote: خليتنا نتمنى نجي المغرب
ونركب الطيارة عشان نشوف حسناتنا باقي سيئات كو
|
يا دكتورة كيفنك وكل سنة وانت طيبة
متمنين جيتك المغرب
بس ابعدي من الطيارات
|
Post: #58
Title: Re: رحلة بين طيات السحاب
Author: زهير الزناتي
Date: 01-08-2009, 02:57 PM
Parent: #1
في صباح شتوي أستعدت الطائرة البوينج للتوجه نحو مدرج الإقلاع في مطار الخرطوم الدولي متوجهة
نحو مدينة جوبا وفجأة توقفت لما يزيد عن الخمسة عشر دقيقة والأبواب مغلقة ولا منفذ للهرب ،
أطل علينا أثنان من الإرهابيين شاب وشابه يرتدون زي إرهابيين متشابه ، ويؤدون حركات متناغمة
مع صوت الإرهابية الأخري والتي تسمي زورا كبيرة المضيفين ، وعرض الصوت والصورة هذا يحذرنا بأن
الكارثة وشيكة وأن الطائرة ساقطة أو محروقة لا محالة لذلك ويجب عمل الأحتياطات اللازمة بربط الأحزمة
علي أجسادنا حتي لا نهرب من مصيرنا (اللهم أرحم إبراهيم عوض) وبعد أن شاهدوا الرعب علي ركاب الطائرة
رقت قلوبهم قليلاً وأعطونا بصيص من الأمل بالهروب عبر منافذ موجودة علي جانبي الطائرة ، (أين كانت هذه
المنافذ حينما أحترق الناس في مطار الخرطوم الدولي قبل عدة أشهر) ، ثم اشاروا لكمامات مثل تلك الموجودة
في غرف العمليات قيل لنا بأنها ستسقط تلقائياً عندما ينعدم الأكسجين من الطائرة ، ولم يدروا بأننا الآن في
أمس الحوجة لها ، ولم ينسوا أن يشددوا علينا بالتنبيه المتكرر بإغلاق الهواتف النقالة حتي لا نودع الأحبه
والأهل في لحظاتنا الأخيرة أو نتصل بالثلاثة تسعات (999) لإنقاذنا من هذه الورطة والتي وضعنا أنفسنا فيها
بعد أن دفعنا من حر مالنا لسخرية القدر ، وبعد قليل جاءنا صوت من مكبرات الطائرة يعلن أن المدرج مشغول
بهبوط وإقلاع طائرات أخري ، ولم نصدق الكذبة ، ولكن لا مناص لنا سوي الإنتظار ... بعد مرور الدقائق ثقيلة
والجميع يفكر في كل الاحتمالات المتوقعة لكارثة تهز اركان المطار الذي تعود عليها ،،، لم يجد الأرهابي
الجالس لجواري وعضو المنبر مبارك جادين سوي تلك الصحيفة البغيضة ليطالعها ، ولم يفتح الله عليه بكلمة
واحدة ليطمئن بها قلبي ،، وكأن الأمر لا يعنيه ، وتهادت الطائرة بعد قليل علي المدرج وكأنها عربة لوري
موديل 60 في شوارع ترابية شهدت كل أمطار المناطق الإستوائية ..... وما هي إلا دقائق وكانت الطائرة
ترتفع عن الأرض بسرعة تخيلت أن الكابتن ضغط علي أبنص السرعة دون وعي منه .... أغمضت عيني ليفاجئني
الموت دون أن أراه ،، ثم إنحرفت تلك الملعونة لتتجه جنوباً وهي في وضع الصعود ،،، والقلوب صعدت معها
للحلوق بضربات تعدت الثلاثمائة في الدقيقة ، وجفت كل سوائل الفم ،، ودرجة حرارة الجسد دون الصفر
المئوي ،،، يا لغباء هذا الكابتن الم يكن أفضل له ولنا وللطائرة أن يستوي علي ارتفاع تحليقه المعتاد
ثم يستدير جنوبا حتي لو كانت هذه الإستدارة عند وادي حلفا ، عوضاً عن هذا الإرهاب المتعمد ،،، نظرت نظرة
خاطفة نحو الأرض وجدت نهر النيل العظيم والذي ما أن تقف عند أحد ضفتيه إلا وتري عند الضفة الأخري الأشياء
ما هي إلا أشباح مصغرة من إتساع النهر.. وجدته لحسرتي لا يتجاوز عرضه عرض شارع اسفلتي في مدينة صغيرة ...
وجاري الإرهابي يبدل صحيفة بأخري من صحف الخرطوم المتشابهة وكأنه جالس علي كرسي في صالون منزله ، وجاره
المسكين تتدهور حالته النفسية بنفس سرعة صعود الطائرة .... تذكرت في تلك اللحظة لاعب المريخ الحالي والهلال
السابق علاء الدين بابكر وأكتشفت كم هذا اللاعب عبقري وتجاوز عصره حينما رفض رغم كل الإغراءات والتهديدات
لصعود هذا الأختراع المرعب المسمي طائرة .. وأشترط عند تسجيله للمريخ عدم ركوب الطائرات مهما كانت الأسباب
(طياره مافي يا جماعة) ...
بعد أن أستوت الطائرة علي ارتفاع يزيد عن الثلاثين ألف قدم فوق سطح الأرض حسبما قال طاقم الطائرة والذي تعود الكذب
علينا قدرت انا الأرتفاع بـ تسعمائة الف متر فوق سطح البحر ،، لأننا حينما كنا صغاراً كنا نصعد جبل التاكا الشاهق
والذي ذكر لنا معلم الجغرافية أن أعلي قمة فيه أرتفاعها 1000 متر فقط وعندما كنا نصعد عند نبع توتيل كأعلي مكان
يمكننا صعوده لم نكن نتجاوز ثلث أرتفاع الجبل ، كانت كسلا تحتنا تبدو بعيدة ولا نري سوي أشجار النيم تغطي المدينة
وعمارة الضيقي في سوق كسلا .. أي أن ذلك الأرتفاع لم يكن يتجاوز 300 متر ، فما بال نهر النيل تحول لشارع أسفلتي
والجبال تحتنا تبدو ككومة تبراب أمام عمارة تحت التشييد ،، أكيد سقوط الطائرة من علي هذا العلو يعني بأننا لن
نصل الأرض إلا أشلاء .... وبدأ المضيفون في التحرك ذهاباً وأياباً وهم مستمعون بما تم من إرهاب لهؤلاء الرهائن المساكين
والذي يطلق عليهم علي سبيل السخرية ركاب بل أحتفلوا بإنجازهم بتوزيع المأكولات والمشروبات المختلفة علي الرهائن بأبتسامة
تعبر عن سادية مرضية ... كمرحلة متقدمة في إذلالنا ....
وضعت صندوق الأكل علي الكيس المثبت في الكرسي الأمامي ، وشربت قليلاً من الماء لتبتل مسامات فمي ،، وجاري الإرهابي يتونس معي
وكأننا علي مقهي قراند كافيه في شارع المطار ... وحينما لم يجد أستجابة مني ، لدهشتي أغمض عينيه ونام قرير العين هانئاً ،،،
( بالله عليكم شوفوا الزول دا وقوة قلبه ما قلت ليكم إرهابي) وبعد مرور عدة ساعات حسب توقيتي نظرت للساعة في معصمه وجدت أن
ما مضي من وقت منذ إقلاعنا لم يتعدي سوي خمسة وعشرون دقيقة حسب ساعته الإرهابية .... ومضي الوقت ثقيلا متثاقلا بطيئاً متباطئاً
ومؤشر الثواني يزحف ببطء يحسد عليه ، ومر كل شريط حياتي أمامي أفراحه وأتراحه إنتصاراتي وإنكساراتي وتذكرت أطفالي الصغار
وأمهم الحبيبة ، ووالدتي وأهلي وأحبابي وأصدقائي وملذات الحياة ، وايقنت بما لا يدع مجال للشك بأني وقعت ضحية مؤامرة كبري
، وأن هذه الطائرة بكل تأكيد مملوكة للمؤتمر الوطني ، والذي لم يجد وسيلة للتخلص مني بأعتباري معارض وشيوعي كافر سوي هذه
الوسيلة البشعة والتي تسافر بك مباشرة إلي الجحيم ، وحينما أنظر للإرهابي مبارك جادين وهو يغط في نومه العميق أجزم بأن الحركة
الشعبية هي الأخري مشاركة في هذه المؤامرة وبعثت بأحد قياداتها للتنفيذ ، والطائرة لعجبي في هذا الفضاء الرحب تعلو وتهبط كركشات
غرب الحارات تماماً ، قال لي جاري الآخر بأن هذه مطبات هوائية ، أراد أن يستغفلني هو الآخر ولا بد أن له دور في المؤامرة ، وفكرت في
أولئك البشر الذي يعبرون الأطلنطي بمثل هذا الصندوق المرعب ، أو الذين يتجهون نحو الصين واليابان لساعات طوال تتجاوز ساعات اليوم ....
وأولئك الطيارون والمضيفون والذي يمكثون بين السماء والأرض أكثر مما هم علي ارض الله الواسعة ، أيقنت بأن العالم ملئ بالمجانين ، ولا بد
من تقديم هذا المخترع لمحكمة الإرهاب وجرائم الحرب الدولية ويجب ألا تسقط جريمته بالتقادم لأنه أسهم في إرهاب ورعب ملايين الناس حول العالم
ومعه كل من فكر في الطيران منذ الإرهابي الأول عباس بن فرناس وحتي الصديق مبارك جادين والذي أسهم في رعبي وخوفي ببروده في التعامل مع هذا
الأختراع المخيف ، وبعد أن بلغت الروح الحلقوم ، سمعنا عبر مكبرات الطائرة بأن الطائرة ستهبط في مطار جوبا الدولي لم أصدق إلا بعد أن سمعت
عجلات الطائرة وهي تصطدم بمدرج المطار ، وكانت اسعد لحظات حياتي ،، ومباشرة سألت عن الطرق البري بين جوبا والخرطوم فقيل لي لا طريق إلا عبر واو
وقد تأخذ الرحلة شهراً ، فتذكرت المثل القائل (درب السلامة للحول قريب) وعرفت أن من أطلقه هو أول راكب مسكين للطائرة وبالتأكيد لهذا المثل تراجم في كل لغات العالم ....
من بوست :
الطائرة أسواء أختراع ويجب محاكمة مكتشفه في محكمة دولية ...الإرهابي مبارك جادين
ياجبريلا قلنا نساندك عشان ما يقولوا خواف براك ،
لكن عليك بي زي طيارتك ودا لا بجامل فيها ، يمين الله بابها ما اعتبه ، وهي واقفة ما أخش جواها
يا زول هوي هو العمر بعزقة ولا بعزقة ...
|
Post: #60
Title: Re: رحلة بين طيات السحاب
Author: طارق جبريل
Date: 01-10-2009, 11:58 PM
Parent: #1
Quote:
ياجبريلا قلنا نساندك عشان ما يقولوا خواف براك ،
|
|
Post: #61
Title: Re: رحلة بين طيات السحاب
Author: محمد أبوالعزائم أبوالريش
Date: 01-11-2009, 09:01 AM
Parent: #1
طارق ..... عالسلامة ...
غايو أنا لاني زهير الزناتي، ولا عزاز شامي ..
علي جاي أشمت لي فيك شماتة
وبعدين ياخ ...
| Quote: ومخاخيتك تتسايل خيران خيران وتمسح فيهن بي يديك ووشك كله يتجلبط ووكتين ينشفن في جضومك علي الرقاق |
هسي - يا المسنوح - تاني الواحد يا كللو صحن الليل رقاق كيفن؟
لكن عارف؟ مرات النصيبي دي بتكون متل الآبري الأبيض .... وزي ما قالت الحنكوشة (عصير تشوز)
|
Post: #62
Title: Re: رحلة بين طيات السحاب
Author: طارق جبريل
Date: 01-12-2009, 01:30 PM
Parent: #1
Quote: هسي - يا المسنوح - تاني الواحد يا كللو صحن الليل رقاق كيفن؟
|
ود ابو العزايم كيفنك
هههههههههههههه
النبي فوقك ما بتشبه الرقاق
ههههههه
|
|