إعتذار مستحق للدكتور بشرى الفاضل ..

كبيرنا وأبونا د. بشرى ..


يا الأبيض ضميرك
صافي زي قلب الرضيع


ودا ما كلامي براي


كلام صاحبك عثمان عووضة
الذي أثق في كلامه
أكثر من ثقتي في أي شيء في هذا الكون

والذي شاركك نفس الغرفة
ونفس الهواء
وسطى وثانوي وجامعة

والذي ما جاءت سيرتك يوماً إلا وردد بجدية نادرة ما أحفظه أنا عن ظهر قلب

بشرى الفاضل دا جواهو قلب طفل لا بعرف ضغينة ولا زعل
بشرى دا شدة ما نقي ممكن يدمّع لو شعر إنو جرح زول


امسحا لي في وشي يا صديقي الكبير ..

امسحا لي في وشي يا صديقي بشرى

لأن الإساءة جاتك من صديقي عادل

دفاعاً عن صديقي محسن ..




شفت الورطة؟

ما أنت بالحاسد ولا الحاقد ولا البغران



بل أنت كبيرنا الذي علمنا "الطيران"


ودا ما كلامي ..

دا كلام صديقنا محسن خالد

الذي كان "يسمّع" أمامي حكاية البنت التي طارت عصافيرها
وكان يلقبك بـ تشيكوف السوداني ..

ولا أظنني في حوجة للتنويه بأن ميقات هذا البوست ليس له علاقة بما آلت إليه مهدية صديقنا المعجنو ربو
فذاك أمر محسوم منذ بدايته بالنسبة لي ..

بالنسبة لي يا تيسير ، فقد اكتشفت بان دكتور بشرى مازال تحت تأثير ال positivism
النقاش ابعد من الحسد والتراشق

ثم (أتمنى) أن يعتذر الصديق عادل عبد العاطي عن العنف اللفظي المريع الذي مارسه ضدك

هذا مع حفظ حقك في رؤية الأمر والتعبير عنه من الزاوية التي تراها صحيحة
وحفظ حق عادل في رؤية الأمر والتعبير عنه من زاوية مغايرة يراها أيضاً صحيحة "أتفق معها إجمالاً" ..

سلام تيسير والمتداخلون
بشري الفاضل رقم يصعب تجاوزه في مسيرة الادب السوداني
وهو ليس فوق النقد وهو يعلم ذلك جيدا لذلك لم انزعج كثيرا من الهجوم الذي شناهو عليه بعض الاعضاء
فمن يعرف بشري الفاضل سيعرف سعة صدره لكل انواع النقد فالتحيه له

Quote: بالنسبة لي يا تيسير ، فقد اكتشفت بان دكتور بشرى مازال تحت تأثير ال positivism النقاش ابعد من الحسد والتراشق

وهذا في حد ذاته يدعو للأسى!


مع كامل الإحترام، ولكن أدهشني إتخاذ الدكتور بشرى للعلم والمنطق منصة وحيدة للحكم على والتعامل مع المسألة ككل

ألا ترى يا منصور أن الآية معكوسة هنا؟؟


فعادل عبد العاطي الذي لا يثق في معرفة دون أن يكون مصدرها العلم ولا يعتد بغير ما يقوله ويثبته المنطق قد أبدى تفهماً كبيراً (للحقيقة أدهشني) لما جاء به محسن، فما بال الدكتور بشرى وهو المبدع والكاتب والعارف بمتلازمات الإبداع والكتابة والطيران يصر على أن الأمر مجرد تهاويم؟؟



هذا غريب غريب غريب ..

Quote: بشري الفاضل رقم يصعب تجاوزه في مسيرة الادب السوداني وهو ليس فوق النقد وهو يعلم ذلك جيدا لذلك لم انزعج كثيرا من الهجوم الذي شناهو عليه بعض الاعضاء فمن يعرف بشري الفاضل سيعرف سعة صدره لكل انواع النقد فالتحيه له

ألف ألف تحية له ولك يا فالكاو ..

هو ليس فوق النقد بالطبع، وأنا ممن لم يعجبني موقفه إطلاقاً
ولكنه فوق الإساءة والتجريح والإتهام بالحسد ..



نعم صدره وسع كل شيء ومحبة قلبه كبيرة

ومحبتنا له أكبر ..

العزيزة تيسير تحايا ومحبة.

انا اندهشت جدا من توظيف العلم في خيط الحبيب محسن، ولا احد يستطتطيع تعريف ما يدور عند محسن الا محسن وممكن محسن زاتو ما يصل لما يدور به. ده بيندرج تحت وما اوتيتم من العلم الا القليل.

احكي ليك حكوة حصلت لي شخصيا، في ايام الجامعة، شغل وقراية ومعافرة جد وفلس وجوع وغربة وكل حاجة صعبة ممكن تتخيليها هنا في انجلترا، واثناء الامتحانات تتضاعف المسألة، شرح للشباب وسهر -ياخي لامن اتذكر الايام ديك شعرة جلدي بتقوم- المهم ، يوم شايف ليك نفسي طائر من السرير، وانا ادخل في كتاب واخرج من كتاب، وصحيت اليوم التاني لقيت نفسي انو رجليني ما بيلامسو الارض، لحدي هنا طبيعي، البس هدومي وامشي في الشارع ورجليني لا يلامسو الارض او هكذا يخيل لي ، وانا ماشي وجدت نفسي احفظ مرجع من مراجع الطب، كده بس ههههه، وانا جوة المحاضرة كنت بعرف الجمل المستقبلية للدكتور وهو بيشرح، ده كلو هين، انا ماشي وقدامي علي الهواء صور الامتحانات وشكلها، وطبيعة الاسئلة، وحتي نوعيتها، هذه الحالة استمرت اسبوع، واثناء الشرح للطلاب كنت اقول افتحوا الصفحة رقم كذا وحتلقو كذا ولم يكن لي اطلاع علي ذاك المرجع من قبل وبتكون صحيحه لانو انا شايف صورة ليها ماثلة امامي. وبرضو استطيع ان اشوف مثلا ستاتي عربة لونها احمر بونوعها بعد دقائق من الان، وستاتي، واشياء اخري


للان لا اعرف ذلك ولن اعرف وتحدثت مع علماء اصدقاء ولم اعرف

تيسير، عليك الله كلمي عادل عبدالعاطي (استاذ عادل زي ما كنت بناديه قبل ما اكبر )، قولي ليه انا برضه زعلانه .... والله زعلته زعل امس دايره اطقّ.. وكلمي صاحبك محسن بنفس الكلام، والله كنت اتمنى ان يكون مصيبا، بدل هذه المصيبة!

أما د.بشرى.... فامسحا لي في وشي بعد تمسحها في وش تيسير...



غايته يا محسن خالد شكيتك على الله! عافين ليك لله والرسول، لكن عايزه مصران جديد....

Quote: وكلمي صاحبك محسن بنفس الكلام، والله كنت اتمنى ان يكون مصيبا، بدل هذه المصيبة!

والله رأيت هذه "المصيبة" وبالتفصيل رأي العين يا مريوم
خفت أقول كدا يقولوا لي أها يااا المعجنا ربها

Quote: غايته يا محسن خالد شكيتك على الله! عافين ليك لله والرسول، لكن عايزه مصران جديد....

مصران جديد؟
قولي دايرة إسبيرات بالكامل


أنا غايتو لو مكانكم ما أعفي ليهو كلو كلو
قال ألا تحبون أن يغفر الله لكم قال

قلت ليكم ما تندهشوا

مع محسن خالد مش حتئدر تغمض عينيك
ولا تفتحهم زاتو ..

آمنة بت الحسين بتي الكبيرة - آماليا بتي الصغيرة -

معليش لو زعلتك ما بحب ازعلك ؛
لكن ما متفق معاك وتيسير في هذا الامر نوهائي.

لكن خشيت عشان موضوع تاني :
اموت عشان اعرف معلومات عن بتي اسراء ( ثريا)


لو عندك اي معلومات عنها او ايميل شغال او تلفون
اجدعيها لي بالتلفون


اتمناها تكون بكل خير .

لذلك يا تيسير فإنّ مقاربة عادل عبد المتعاطي تبدو لى متماسكة جداً ( أعني من غير الزبد طبعا، فهو زائل لا محال كما تشير الآية الكريمة ) من الناحية التصور للظاهرة . استند هنا بشكل أساسي لقراءة الظاهرة. القرانية لمالك بن نبي. و نقاشات جماعات ما بعد الحداثة لدراسة للظواهر .

حلوة عينيك زي صحابي
عنيدة كيف !
تشبه شريحتين من شبابي
حلوة عينيك زي صحابي
وزي عِنب
طوّل معتـّق في الخوابي
وسمحة زي ما تقول ضيوفاً دقـّوا بابي
فرحي بيهم سال ملا حتى الكبابي

د. بشرى: الإبداع دا كلام زول يحاجج ويجيب سيرة العلم والمنطق؟؟

مرّة طربان شلت صوتك شان أغني
قلت آه ياليل .. وآه
إنتى أول .. وإنتى تانى
وإنتى تالت .. وإنتى رابع
نافرة زى صيد الخلا
وصافية زى نبع المنابع
وقلتى لى غناي خلاص!

عادل عبد العاطي: الإبداع دا كلام زول تقول ليهو معينك نضب؟


قلت ليك غياظ خلاص!

انا مقدر موقف عادل جداً وان خالفته الالفاظ
لعادل كامل الحق يقرأ (المكتوب) ببصيرتو
د. بشرى كان بكتب لا وعيو لمن يصف محسن خالد بـ(الاديب) في نص المعمعة ديك!
هل نحن كنا في مقام ادب اصلاً!؟













----------

والاعتذار لبشرى الفاضل مني
لكن ما كان بنحتاج لكل دا لو قلت رأيك مقتضباً وانصرفت راشداً

Quote: بشرى الفاضل دا جواهو قلب طفل لا بعرف ضغينة ولا زعل بشرى دا شدة ما نقي ممكن يدمّع لو شعر إنو جرح زول

العزيز تيسير:

شكراً على هذا الأسلوب المتحضر في الإعتذار ..

والتحية عبرك لزميلي الدراسة بشرى وعثمان عووضة .. وما قال عووضة
إلا الحقيقة عن رجل النقاء هو أس وأسيس تعامله مع الآخرين..

تعديل للمداخلة بعد قراءة كامل البوست
وليس المساهمات الاولى فيه ...

الجد الشرير

Quote: اعتذري عن نفسك لكن ليس من حقك أن تعتذري عني ولا عن اي موقف لي اؤمن بصحته !

أنا هسي قلت معتذرة عنك؟


ما عشان نشافك دا قلت (أتمنى) إنك تعتذر
وبعض الأمنيات عصية




لكن ما على قلبك الكبير
عارفاك قلبك طيب وبتعملا

Quote: فرحي بيهم سال ملا حتى الكبابي

هسّي دا شعر شنو دا ...
الحكاية عرقي ولاّ مريسة ؟!
يا حليل الشعر والشعراء ... قالت إبداع قالت
























ــــــــ
كااااااااااااااااااك
طبعاً بمزح .. وإبداع يشبه أُغنيات ود الأمين

Quote: وسمحة زي ما تقول ضيوفاً دقـّوا بابي فرحي بيهم سال ملا حتى الكبابي

تحياتي الطيبة يا تيسير



والله انا مرااات بعتقد ان البوستات مثل هذه تلفت نظر من لم يمر علي الشتائم في مكانها

كان تتحدثي عن ابداع الدكتور بشري

وتطلبي من عادل ان رايت انه يتوجب عليه الاعتذار

عموما الاتنين هما محل تقدير لي



وربما ايضا لك رؤية ونظر في فتح البوست لازالة ما ترينه

لكني اري ان من لم يعرف او تعرف سيمر من هنا لمرفة ما قيل

لك الاحترام والسلام

العزيزة تيسير رأيت أن استعيد هذا البوست على ما في ذلك من ارباك لي بسبب الثناءات ؛ لأحيي زميل الدراسة
الأخ الزاكي عبدالحميد ووالدك عثمان شيخ عوض الشهير بعووضة . الأخ الزاكي عبدالحميد الذي قال هنا

Quote: والتحية عبرك لزميلي الدراسة بشرى وعثمان عووضة .

زميل عزيز وقد انقطعت صلتي به لعقود وأرجو ان نستعيدها كما استعدت صلتي بعووضة والدك وبالمناسبة لم ندرس الوسطى
معاً لكن درسنا معاً وسكنا بداخلية واحدة في مدرسة حنتوب الثانوية ودرسنا معاً بالجامعة وسكنا بحجرة واحدة. لعثمان عووضة التحية
والاحترام وقدعملنا معاً في مجالات عديدة في الجامعة .ويا أخ الزاكي دونك بريدي الرجاء مراسلتي
[email protected]