كلو هيّن .. الكلام الفاضي !

زمااان في السودان بتاعين الدكاكين ما بيدوك قزازة بيبسي تمشي بيها بيتكم لو ما جبت "الفاضي"
ولو دعى الأمر لإنهم يكبوا البيبسي في جك ..




كلو ولا الدقسة وتكرار نفس الخطأ !

ناس بتقول (لا تعبر الجسر قبل أن تصله)


بالعكس ..

يجب أن يُعبر الجسر
ويجب أن نتهيأ لمرحلة ما بعد الجسر
وإلا سنجد أنفسنا قد رجعنا من حيث جئنا

بس المرة دي بي تحت الكبري



وما أظن محتاجين أمثلة!

جهزوا الفاضي ..





عشان ما يبقى القرد أوعى مننا !

Quote: زمااان في السودان بتاعين الدكاكين ما بيدوك قزازة بيبسي تمشي بيها بيتكم لو ما جبت "الفاضي" ولو دعى الأمر لإنهم يكبوا البيبسي في جك ..

تجيب الفاضي او تدفع امنية او تكون صاحب سيد الدكان شديييييييد واذا ما اتوافرت كل الشروط سالفة الذكر تنسى الفكرة

يا الخير ..


المرة الأولى سيد الدكان كان صاحبنا شدييييييد
المرة التانية دفعنا أمنية


لكن المرة دي يا الفاضي
يا ننسى الفكرة ..

امس يا تيسير
وانا اتابع اخبار عن المظاهرات
فكرت على هذا النحو التشاؤمى

مظاهرات
انتفاضة
شهداء
رحيل النظام

نبدا حكومة ائتلافية
يقوم
الصادق المهدى
يرشح ولدو عبد الرحمن لوزارة الدفاع
والميرغنى يرشح
ولدو جعفر لوزارة الاوقاف

لكن برضو
احسن نجهز الفاضى
ونرفع درجة الحذر والاستعداد

Quote: مظاهرات انتفاضة شهداء رحيل النظام نبدا حكومة ائتلافية يقوم الصادق المهدى يرشح ولدو عبد الرحمن لوزارة الدفاع والميرغنى يرشح ولدو جعفر لوزارة الاوقاف

تف من خشمك يا محمد سيد أحمد ..


غايتو لو دا حصل تكون باقية علينا حكاية الـ For Loop في لغات البرمجة



الفاضي
والضمان أمان ..


ــــــــــ

Quote: In computer science a for loop is a programming language statement which allows code to be repeatedly executed A for loop is classified as an iteration statement

(ويكيبيديا)

ومش أي فاضي ..



عن نفسي أتمنى أن يكون غير شمالياً هذه المرة ..

لوبتنا (loop) يا تيسير ولا تمر الناس أو الما ناس بالأحرى.. المستغرب ليه ناس الحكومة بقولوا في نفس الكلام (الشعب لا يريد اللوبة). وناس الما حكومة وما (انصار) اللوبة بقولوا في نفس الكلام: الشعب ما عايز لوبة ولا لالوب.. ولولا بنا لا تمـر الناس (زي ما قراها صاحبنا من على ظهر الحافلة).. يبقى (الكلام الفاضي) يجي كيف.. المشكلة إنتو ـ شعب اللوبة النيّة ـ لا جهـزتوا الفاضي ولا دايرين يكبوا ليكم في الجك (أو الكوز).. تبقى عليكم البقت في المصريين: ووبين من مرسي وأربعة من شفيق..

لا يا عيسى
(لا) لوبتنا ولا تمر الناس
الدوم دا مالو؟ عيبوا لي

لوبتنا دي كل مرة بتجيب لينا أكعب من القبلها >> بقت لوبة عفن عديل

Quote: المشكلة إنتو ـ شعب اللوبة النيّة ـ لا جهـزتوا الفاضي ولا دايرين يكبوا ليكم في الجك (أو الكوز)..

لأننا مصرين على فاضي البيبسي بس !
طيب لو ما جاهز في مية فاضي غيرو وأحسن منو كمان
بس كيف نفتح عيونا على الخيارات التانية القدامنا
مش تبقى القصة يا بيبسي يا لأ ..

Quote: تبقى عليكم البقت في المصريين: ووبين من مرسي وأربعة من شفيق..

وإنت الصادق ..
ووبين من مرسي وبيق لوب من شفيق

أصلها باقية علينا من سنة ستة وخمسين
راسنا لف زاتو


أصلو ما ممكن لكن يا الكيزان يا الجكوك؟


مافي حذف إجابتين؟؟

يا أبو التا..
نظريا الكلام سليم بل ومتأخر كمان
حكومة الظل و شكل الحكم و الدستور أو طريقة كتابته و الإستفتاء عليه دا إكسرسايز كان مفروض يتعمل من يوم واحد سبعة تسعة وتمانين
لكن حاليا كونو في جذوة أمل حقيقية قد تقود لشي ايجابي فالوقت ما مناسب غير لدعمها و المحافظة على استمرارها
اسوأ الفروض المتوقعة مهما كانت ما دام فيها حرية وفصل سلطات و رقابة حقيقية ح افضل من الحالي

Quote: المرة الأولى سيد الدكان كان صاحبنا شدييييييد المرة التانية دفعنا أمنية

والتالتة واقعة

ازيك يا تايسا ياخ وبعدين فكرة سيد الدكان دي جاتك من وين هههه

مراحب يا الخير ..



وفي رواية أخرى التالتة تابتة ..

تيسير ازيك

انتي من زمن الفاضي
هسع بقى في موبائل
وعبوات بلاستيكية

شدو الحيل

الحمد لله البوست ما جا من رمادي!
كان لحقوكـ السفينة القاعدين ينطوا منها الناس!!



_
عموما الجبهة العريضة* قاعدة منتظراكم!!

ود الصايم ..

يا زول سفينة شنو
الناس بقت زي حكاية مين الحرامي السرق الروب
أنا سرقو ومن سرقو هذا سرقو

أي زول لبس توب النبي لمن الروب زاتو قال الروب

Quote: عموما الجبهة العريضة* قاعدة منتظراكم!!

الناس ديل اسمهم الكامل الجبهة الوطنية العريضة لإسقاط النظام
براهم قالوها


نحن بقى دايرين ناس ما بعد إسقاط النظام
ناس ما بعد حرف الميييييم ..

عربي الفنان ..


خلي فاضي البيبسي
الغاز برضو لازم تجيب (أو تدردق) الفاضي


ولا يكونوا عملوا الغاز سنترال كمان !

Quote: حكومة الظل و شكل الحكم و الدستور أو طريقة كتابته و الإستفتاء عليه دا إكسرسايز كان مفروض يتعمل من يوم واحد سبعة تسعة وتمانين

يا ود البشرى شعب يمجد ويهلل ويحتفي بالإنقلابات العسكرية بين قوسين إغتصاب حقو الدستوري في إختيار من يحكمه هل من أولوياتو في الوكت داك تكوين حكومة ظل ودستور وإستفتاء؟ >> واحدة قريبتنا دايرين يعرسوا ليها ود عمها غصب، أخواتو قالوا ليها يلاكي معانا إختاري حاجاتك .. قالت ليهم جيبوا البيعجبكم هو أنا إخترت العريس عشان أختار الشيلة؟

تقول لي إكسرسايز ..

Quote: لكن حاليا كونو في جذوة أمل حقيقية قد تقود لشي ايجابي فالوقت ما مناسب غير لدعمها و المحافظة على استمرارها اسوأ الفروض المتوقعة مهما كانت ما دام فيها حرية وفصل سلطات و رقابة حقيقية ح افضل من الحالي

وين الغضاضة في إننا ندعم الجذوة دي ونهب ليها النار كمان وفي نفس الوكت نفكر في مرحلة ما بعد الجذوة؟
أي جذوة ما وظفنا نارها ونورها من البداية بشكل فعال وصحيح حتستحيل لي رماد يكيل حماد وحلة حماد زاتا ..

بالنسبة لأسوأ الفروض الحتكون أفضل من الحالي
هل تصدق يا ود البشرى إنو لحدي الليلة اليوم في عراقيين بيقولوا سقى الله أيام صدام؟
صدام المجرم السفاح بقى يا حليلو بسبب الفوضى الحصلت بعدو لأنو أعلى سقف لآمال العراقيين كان إسقاط صدام
بعد حرف الميم شنو الله كريم !!

أيوة الله كريم لكن برضو نجهز الفاضي and it's never too late

ما بعد الإنقاذ = ما قبل الإنقاذ = الإنقاذ






ـــــــــــــــ
إلاّ في حال أن صار الناس سواسية كأسنان المشط

Quote: ما بعد الإنقاذ = ما قبل الإنقاذ = الإنقاذ ـــــــــــــــ إلاّ في حال أن صار الناس سواسية كأسنان المشط

الشكر أطنان يا صبري
دي زبدة الزبدة ..

Quote: وين الغضاضة في إننا ندعم الجذوة دي ونهب ليها النار كمان وفي نفس الوكت نفكر في مرحلة ما بعد الجذوة؟

ما فيش غضاضة أبداً، بس ما ننسى
قبلها كان في جذوات، وكذلك "ثورات غضب"
مرت وكأن لم يكن هناك شيء!
وبعدها لا قلنا لماذا؟ ولا كيف؟
من ناحية أمل، بنأمل أن تمتد هذه التظاهرات، وتتحول إلى تغيير شامل!
لكن مفروض على الأقل عشان ما يحصل الخاف منو محمد سيدأحمد:
أن نسعى منذ الآن لإقامة النظام الذي نحلم به في نفوسنا أولاً،
من خلال حوار جاد ذو شفافية!

مع تحياتي لك ولضيوفك الكرام!





(لكي لا تكون مظاهراتنا أشبه بصحوات متقطعة لزول مستغرق في النوم!)

يا تيسير في الغالب البمشي الدكان وشائل الفاضي هو البستلم المليان !
ولكن المشكلة وين ؟ سيد الدكان شال الفاضي فمافي مشكلة ،
والجاب الفاضي واستلم المليان فبزضو مافي مشكلة .
المشكلة في البشرب القزازة ده ! لا شالها ولا جابها ودائما هو المستفيد وانتهازي كمان
وده اياهم المتطرين عيونن دل ومنتظرين النهاية عشان نسمع صوتهم وحساب وزاراتهم !

يا عوض المسلمي لو البيمشي الدكان أو قول البيتكبد مخاطر الذهاب للدكان كل مرة يشربوها منو ويخلوا خشمو ملح ملح يبقى بصراحة يستاهل


شراب شنو ليهو
يشرب الحمت رمت ..

Quote: شراب شنو ليهو يشرب الحمت رمت ..

الضاق عرق السوس ممكن عادي يشرب اللي انتي قلتي عليهو ده

Quote: نحن بقى دايرين ناس ما بعد إسقاط النظام ناس ما بعد حرف الميييييم ..

بسسسسسسس
كـدا معاكم

Quote: بسسسسسسس كـدا معاكم

الأيام دي المامعاكم حيبقى معاكم




ــــ
عارفاك طعمية ما فلول

تسلم يا صلاح فقير ..

Quote: وبعدها لا قلنا لماذا؟ ولا كيف؟

الجذوات همدت لأن مبلغ آمال البعض هو مجرد إيقادها
لذا فهم غير معنيين بالسؤال الذي يأتي بعدها !

Quote: لكن مفروض على الأقل عشان ما يحصل الخاف منو محمد سيدأحمد: أن نسعى منذ الآن لإقامة النظام الذي نحلم به في نفوسنا أولاً، من خلال حوار جاد ذو شفافية!

النظام البنحلم بيهو يوماتي ما حتقوم ليهو قايمة ونحن بنحاور في أنفسنا وما بنسمع غير صوت أنفسنا وإعتراضات أنفسنا
حكومة شمالية بتعارضها أحزاب شمالية ولعبة الكراسي مدورة وباقي السودان جمهور متفرجين ..

أكتر من نصف قرن دايرين في نفس اللوب القلناها فوق والحاجات بتتكرر بي باترن محدد
وعارفين إنو في غلط كبير حاصل وفي ظلم أكبر حاصل بس ما دايرين نعترف بيهو كلو كلو ..

فيما يخص الفاضي ..

في ناس قالوها عديل:
لو إسقاط الحكومة ماشي يجيب لينا أبان أضان زرقا يحكمونا أخير لينا الإنقاذ
نار البشير ولا جنة ديل !


غايتو أنا لو كنت ضمن المكلفين بصياغة دستور السودان المادة الأولى حتكون

ما دايرين حكومة ذات أغلبية شمالية
ولا عسكرية
ولا إسلامية

أقل شي خمسين سنة كدا لي قدام لمن السودان الفضل يقدر يقيف على حيلو بعداك نديهم فرصة تانية
ودي زاتا لولا دواعي العدالة وسداً لذريعة الإقصاء كان تاني يشموها قدحة ..

عفوا

من هو البديل في حالة ذهاب النظام ؟؟

شكراً يا محمد على رابط البوست وليك السبق
دا هاجس كتيرين الأيام دي فمعذرة لو ما شفتو ونزلت دا


مطروحة فيهو نقاط منطقية ونقاش موضوعي



كلي أمل إنو تساؤلاتنا دي نلقى ليها إجابات تشفي إحباط سنين ..

هنالك من يقول ،،، كلام فاااااااارغ المضمــون


واخرين يقولون

الفاااااااضى يعمل قاااااضى


فتأمل ( مع حفظ حقوق ملاسى )

كمال مبارك ..

Quote: هنالك من يقول ،،، كلام فاااااااارغ المضمــون واخرين يقولون الفاااااااضى يعمل قاااااضى

ما سمعتا عاطف خيري رضي الله عنه بيقول "رجع فاضي الكلام مليان"؟





غايتو مطيط الكلام دا شغل زول يا مغبون شديد يا غبيان شديد
التانية دي ما عندي فوقا يد
لكن لو الأولى فحقك علينا لو زعلان وآخرا كوم تراب ..

تيسير ..سلامات ..


المشكلة مافي الفاضي
المشكلة في البيبسي الماموزع كويس وبكمية تكفى الجميع ..



تحياتي ،،

تيسير عووضة

سلامي وتحياتي،،
المشكلة مش الفاضي ولا المليان يا تيسير
المشكلة في ال rule البتحكم عملية التبدل دي
وعملية تبادل الفاضي والمليان محكومة بقوانين
وتتم برضى الطرفين سيد الدكان والمشتري صاحب الفاضي
لو الناس اتفقت على ال rule دي يبقى ماف مشاكل
الفاضي بتملي والمليان بتشرب ... والله صحي

Quote: النظام البنحلم بيهو يوماتي ما حتقوم ليهو قايمة ونحن بنحاور في أنفسنا وما بنسمع غير صوت أنفسنا وإعتراضات أنفسنا حكومة شمالية بتعارضها أحزاب شمالية ولعبة الكراسي مدورة وباقي السودان جمهور متفرجين .. أكتر من نصف قرن دايرين في نفس اللوب القلناها فوق والحاجات بتتكرر بي باترن محدد وعارفين إنو في غلط كبير حاصل وفي ظلم أكبر حاصل بس ما دايرين نعترف بيهو كلو كلو ..

دي البداية الصحيحة للتعايش والتصحيح
خصوصاً وانو الانقاذ دي فسخت النسيج دا بالقبلية والعنصرية
ولا بد من رتقه أولاً
يبقى عليكـ استخدام الأمر End في نهاية ال statement
أو في ال declaration فوق تحددي مدى (range) للوب دا

Quote: في ناس قالوها عديل: لو إسقاط الحكومة ماشي يجيب لينا أبان أضان زرقا يحكمونا أخير لينا الإنقاذ نار البشير ولا جنة ديل !

ديل وصلتهم اشارات سالبة من الطرف الآخر
يبقى على الطرف الآخر ارسال تطمينات قوية للجميع
وعليهم تكوين احزابهم ووضع السلاح والدخول في اللعبة الديمقراطية
لأنك لا يمكن تحكم ليك ناس بالقوة مهما يكن
ولا لعزل احد شمالي ولا جنوبي ولا غرابي ولا شرقاوي
على الجميع الاحتكام الى الصناديق وقانون اللعبة الديمقراطية
وبعدها يجب أن لا يجدوا حرجاً في أنفسهم مما قضت به الصناديق
..
..



خارج النص:
________
محاولة اقصائك للناس القلتيهم فوق ديل
ينفي عنكـ صفة الليبرالية ........ والله صحي ()
ببساطة لأن الاقصاء هو اعادة انتاج للازمة

حيني انا


الكلام ده ما بنبح فيه من جينا البرود ده
في البورد قلناه
في الجزيرة قلناه
بنحلم قلناه

ركبو لينا دبابير بسببو
اشمعنى ؟

هسع بتكوسوا في الفاضي بعد ما العربية جاية تشيل الراجع؟؟؟؟
وكانما مصنع الببسي ده فتحوهو الليلة

لماذا نهاجم النظام بعد ان كنا نعارض المعارضة ؟

أساسي شكلها القيامة قربت ياخوي



للأسف الشديد جداً متفقة معاك مبدئياً في كلامك دا ودي المصيبة
لكن خليني أديهو قرية تانية مصحوبة بملعقتين سوء ظن وتلاتة ملاعق نظرية مؤامرة عسى ولعل ألقي فيهو نقاط إختلاف

Quote: حيني انا

الكلمة دي يعني شنو يا وليد؟

Quote: الكلام ده ما بنبح فيه من جينا البرود ده في البورد قلناه في الجزيرة قلناه بنحلم قلناه ركبو لينا دبابير بسببو اشمعنى ؟ هسع بتكوسوا في الفاضي بعد ما العربية جاية تشيل الراجع؟؟؟؟ وكانما مصنع الببسي ده فتحوهو الليلة

هو شنو الإشمعنى؟
ومنو الركب ليك دبابير؟ أنا دي؟

أنا ما فتئت "ملاحظ ليها؟ لمن عملت لي أبو الشهيق"
ما فتئت أكورك وأنادي وأدعم الفاضي
حتى لو الفاضي دا يبقى وليد محمد المبارك

شفت الحيرة بتعمل شنو؟


بعدين الفاضي دا أنا مشيت فتشتو قبل سنوات من هسي
ولمن رضيت أنتمي سياسياً ما إنتميت غير لحزب قيادتو من الهامش
لأنو دي بداية التغيير الحقيقي في رأيي
واليوم البقت فيهو القيادة شمالية زيها وزي عشرات الأحزاب فقدت عنصر التميز بالنسبة لي
ويمكن يكون دا من الأسباب القوية الحتخليني أسيب القصة كلها


قال دبابير قال
دبابير يقرموا ليك راسك الغلط دا ..

يا تيسا

Quote: الكلمة دي يعني شنو يا وليد؟

حي : مفرده هوائية تفيد الالم
انا : ضمير المتكلم

Quote: شفت الحيرة بتعمل شنو؟

والله حالتكم صعبة

Quote: ديل وصلتهم اشارات سالبة من الطرف الآخر يبقى على الطرف الآخر ارسال تطمينات قوية للجميع وعليهم تكوين احزابهم ووضع السلاح والدخول في اللعبة الديمقراطية لأنك لا يمكن تحكم ليك ناس بالقوة مهما يكن ولا لعزل احد شمالي ولا جنوبي ولا غرابي ولا شرقاوي على الجميع الاحتكام الى الصناديق وقانون اللعبة الديمقراطية وبعدها يجب أن لا يجدوا حرجاً في أنفسهم مما قضت به الصناديق ..

لوووووووووولز يا بشاري
تطمينات عديل؟

ما إشارات سالبة، بل مطالبات مشروعة وأولها القصاص
الناس ديل أصحاب حق يا أمين وصاحب الحق ما بيخاف وإن كان مظلوم

يعني يتظلموا ويطلبوا الإنصاف بالتي هي أحسن البشير يقول ليهم الدايرا يشيلا بالسلاح
ولمن يشيلوا السلاح ويمرقوا طالبين حقهم وحق أهلهم الإتقتلوا وينادوا بالقصاص الناس هنا يجقلبوا ويطلبوا "تطمينات"
قال ليك يا أمين (أمنت لما أقمت العدل بينهم فنمت نوم قرير العين هانيها)
موقفي من حمل السلاح لا يقبل المزايدة لكن لما يكون راس البلد ظالم وعلى العليهو مستفز بلقى ليهم عذر

بعدين ياتو يوم السودان دا إتحكم بغير القوة وكان ما القوة الإنتهازية
هسي لمن جات عليهم بقت كعبة؟



ــــــــــ
ناس الجنوب يكتلوا فيهم من سنة خمسين
قرضوهم قبلوا على ناس الغرب لمن قربوا يكملوا
يجي بشاري بي طريقة الحاجة ماري أنطوانيت يقول ليك الديموقراطية والرضا بقضاء الصناديق


أنا إستخدام مصطلحات وقتية مثل الديموقراطية والصناديق والإقصاء كحصان طروادة للحيلولة دون تطبيق العدالة والإنصاف قاعد يعمل لي خلل في وظائف البنكرياس ..

تيسير

سلام من تاني......
آي تطمينات لأنو ماف قيم أعلى من قيم حياة الانسان وعرضه وماله
وديل خط أحمر عند أي زول .

Quote: الناس ديل أصحاب حق يا أمين وصاحب الحق ما بيخاف وإن كان مظلوم

وكلنا مقرين بحقهم دا وبالظلم الوقع عليهم
لكن هل دا مبرر لكي يمارسوا هم انفسهم ما عانوا منه من هذا النظام
نعم ياخدوا حقهم وزيادة كمان...... من الناس الظلموهم
الطريقة الوحيدة لتداول السلطة سلمياً هو الالتزام بقواعد
اللعبة الديمقراطية وحكاية يا نحكم يا نتمرد دي ما كويسة
وجربناها مع الجنوبيين وأهم في النهاية انفصلوا
اذا لم تنحني ظهرك فسوف لن يستطيع احد الركوب على ظهرك
زمان كان بعد المركز وقلة انتشار المتعلمين بين ابناء الهامش
هو السبب في سيطرة المركز او لنقل الشماليين على حكم البلاد
الامور دي كلها انتهت يا تيسير تقريبا
يبقى عليهم تنظيم انفسهم وتكوين احزابهم والاستعداد للعبة الديمقراطية
من ناحية عددية كدا هم الأكثر عددا يبقى عليهم ينقعوا الناخب بإنو يصوت ليهم
المافي شنو؟
وبكدا يكونوا جابوا انفسهم بانفسهم بدل ما يمتن عليهم اهل بالتنازل
عن السلطة والكلام البتقولي فيهو دا
الناس كلها تقعد وتؤسس للدولة السودانية الحديثة دولة المواطنة والعدالة والمساواة
دولة المؤسسات ودولة القانون

تحياتي

هلا بيك يا ود القاضي ..

Quote: المشكلة مافي الفاضي المشكلة في البيبسي الماموزع كويس وبكمية تكفى الجميع ..

دا اسمو سوء الإدارة في أوضح صوره
وناس الإقتصاد بيسموهو bad allocation of scarce resources
أو سوء تخصيص/توزيع الموارد الشحيحة


التوزيع القائم على أسباب عرقية/جهوية وأيدلوجية بيكون عامل كدا ..



ـــــــــ
للحديث بقية :)

Quote: شكراً يا محمد على رابط البوست وليك السبق دا هاجس كتيرين الأيام دي فمعذرة لو ما شفتو ونزلت دا مطروحة فيهو نقاط منطقية ونقاش موضوعي كلي أمل إنو تساؤلاتنا دي نلقى ليها إجابات تشفي إحباط سنين ..

مامهم النزل اول منا ,,, المهم نلقى حلول قبل ما الفاس تقع في الراس

مودتي

معليش أرجع ليك تاني يا تيسير، قلتِ:

Quote: النظام البنحلم بيهو يوماتي ما حتقوم ليهو قايمة ونحن بنحاور في أنفسنا وما بنسمع غير صوت أنفسنا وإعتراضات أنفسنا حكومة شمالية بتعارضها أحزاب شمالية ولعبة الكراسي مدورة وباقي السودان جمهور متفرجين .. أكتر من نصف قرن دايرين في نفس اللوب القلناها فوق والحاجات بتتكرر بي باترن محدد وعارفين إنو في غلط كبير حاصل وفي ظلم أكبر حاصل بس ما دايرين نعترف بيهو كلو كلو

طيب ليه ما نوسع دائرة الحوار، ليشملنا ويشمل الآخرين!؟
لماذا الاستسلام للعجز؟
لأنو بدون ذلك، تراوح الأزمة في مكانها،
وبناءً على موقفك الموضوعي ينطلقوا آخرين، ويمارسوه بصورة عنصرية،
تستثير حاسّة الدفاع عن النفس (عند الأولانيين)،
ويفلت العيار!

يا صلاح ..

الزمن دا كلو الناس دي بتقول في شنو؟
توسيع الدوائر كلها وليس دائرة الحوار فقط لتشمل الجميع


هي مشكلة السودان اساساً بتتلخص في كلمة الجميع دي !

صحيح!
لكن طبعاً البداية البديهية،
بتكون بدائرة الحوار،
وتوسيع الدائرة كلها بكون هو الهدف!
شكراً لك!

Quote: عن نفسي أتمنى أن يكون غير شمالي هذه المرة

جبتي النجيضة يا تيسير ..
LIKE

Quote: تجيب الفاضي او تدفع امنية

المرة دي الامنية موجودة! و المؤكد أنه سوف لن يظلم أحد! السلام لصاحبة البوست و ضيوفها

إيييييه يا ودالباوقة، تعال شوف الناس وصلت وين وأنته لسه تقول الخرطوم هادية!!
---
سلامات يا تيسير
الفاضي بمشي لاهاي، وما بعد الميم بتكرَب، مافي أكعب من الفات، بي دي نحن حنكون انجزنا 3 ثورات في أقل من 50 عام
البمنعنا شنو نقلع الجاي لو ما نفع معانا! ونكون على الأقل كسبنا التجربة
---
يا شعبنا
يا والدا أحبنا
يا من منحت قلبنا ثباتك الاصيلا
اليك هذه الرسالة القصيرة الطويلة
اليك من زنزانة تخاصم الفصولا
اليك رغم انف كل بندقية
وحقد بربرية
وكلمة شقية
اليك مني الحب والسلام والتحية
ودمت يا حبيبنا
وبعد
أدبتنا أحسنت يا أبي
فلم نتابع الهوى
لكنه غوى
وما أرعوى
وكم عوى
أراد للدماء أن تسيلا
ونحن مثلما عرفت يا أبي
أشرس الرجال حينما نقاوم
نموت لا نساوم
ندوس كل ظالم
ونفتح الصدور للمدافع الثقيلة
ومن هنا أبنائك الرفاق
باسمك العظيم اقسموا فصيلة فصيلة
ان يثأروا لفرحة الأمومة الجليلة
بطفلة جميلة
تنفست قليلا
رصاصة في جنبها
وطعنة في قلبها
ولم تعش طويلا
لكنما مليون مثلها سينجب النضال
فيا أبي حقيقة
فكم حديقة تفتحت على حطامها حديقة
وكم مكان نخلة هوت
علت نواتها وزادت إرتفاعا
أجمل الأطفال قادمون ساعة فساعة
عيونهم أشد من عيوننا بريقا
صدورهم بما وهبت يا أبي أكثر إتساعا
وحين يكبرون سيوفهم تزيد عن سيوفك الطوالا طولا

مراحب يا نادر ..

Quote: الفاضي بمشي لاهاي، وما بعد الميم بتكرَب، مافي أكعب من الفات، بي دي نحن حنكون انجزنا 3 ثورات في أقل من 50 عام البمنعنا شنو نقلع الجاي لو ما نفع معانا! ونكون على الأقل كسبنا التجربة

لو البعد الميم ما إتكرّب يبقى الفات داك كلو مناظر والفيلم قدام .. وبعدين بتقولوا قالت

ومعليش يا نادر شديد
الثورات ما إنجاز
الثورات إشعار بالرغبة في الإنجاز

الثورات ما زر سحري بنضغطو ونمشي نقعد وهو يقوم بالتغيير المنشود براهو
ودي الحاجة الحاولت أقولها في البوست دا وغيرو
الشغل الجد بعد الثورة
والإنكرابة الجد بعد الثورة ..

لو كنا إشتغلنا هوم وورك ما بعد الثورة الأولى كما يجب ما كنا إحتجنا لتلاتة ثورات في أقل من خمسين سنة
وكنا وفرنا على أنفسنا وعلى البلد وكت ثمين ومجهود جبار بدل حكاية محلك سر دي !!
ياخ الثورة الفرنسية القبل قريب 250 سنة لغاية الليلة ما أبالغ لو قلت العالم كلو مش فرنسا براها إستفاد من ثمارها
ليه؟؟ لأنو الفرنسيين بدوا الشغل الجد والتغيير الجذري بعد الثورة ..

نحن مش بنعيش في حاجة عاشتها شعوب قبل ربع قرن من الزمان
لا وبنكرر فيها بشكل دائري مريع ومنتظرين معجزات السماء
حاجة توجع الفؤاد ياخ


وما أهلك الذين من قبلنا إلا إنتظار الفجر الكاذب ..

تيسير عوضه وضيوفها لكم مني التحايا

أسمحي لي يا يا تيسير اختلف معاك في نقطة الفاضي دي ...فانا وجهة نظري انها المشكله ما مشكلة فاضي بقدر ما هي معايير ضبط الخلطه نفسها وفق قوانين صارمه
البلد دي وعبر تاريخها ابدا ما كانت مشكلتها مشكلة بديل واجب تجهيزه سلفا قبل الشروع في عملية التغيير بقدر ما انها مشكلة قوانين وانظمه ومواثيق لها القوه الجبريه في
حماية التغيير... البلد دي ما مشكلتها من سيحكم لكن حقيقه المشكله كيف يحكم هذا المن وهل نحن مشاركين في انتاج هذا الكيف ؟ وهل لنا يد فاعله في الرقابه علي تفعيله؟

Quote: البلد دي ما مشكلتها من سيحكم لكن حقيقه المشكله كيف يحكم هذا المن وهل نحن مشاركين في انتاج هذا الكيف ؟ وهل لنا يد فاعله في الرقابه علي تفعيله؟

سلامات يا ود سلفاب ..

أنا غايتو مختلفة معاك ومع د. جون قرنق زاتو صاحب المقولة دي

مشكلة السودان الأساسية في من وليس كيف

لو (من) دا ما إتغير
(كيف) عمرو ما حيتغير

Quote: المرة دي الامنية موجودة! و المؤكد أنه سوف لن يظلم أحد!

نتمنى ذلك !


شكراً عمر ..

تسلم يا فتحي ..



في رأيي دي الخطوة الأولى في مشوار التغيير ..

Quote: في رأيي دي الخطوة الأولى في مشوار التغيير ..

وسيكون ذلك مدعاة لتلبية مطالب غالبية المهمشين . ووقف الحرب المشتعلة في دارفور وكردفان والنيل الأزرق اضافة لارساء أسس التعاون بين الشمال والجنوب .

تسلم يا محمد ..

وربنا يحفظ الوطن وانسان الوطن ..

عارفة يا تايسا .. دخلت هنا بسوء ظن ، لأن هذه العبارات وما على شاكلتها ( البديل شنو ) ، تعودنا أن يقولها ناس الإنقاذ وأذيالهم ..

ولكن( يا للغرابة) وجدت نفسى أتفق مع مجمل كلامك ...خاصة هنا :

Quote: ما دايرين حكومة ذات أغلبية شمالية ولا عسكرية ولا إسلامية أقل شي خمسين سنة كدا لي قدام لمن السودان الفضل يقدر يقيف على حيلو بعداك نديهم فرصة تانية ودي زاتا لولا دواعي العدالة وسداً لذريعة الإقصاء كان تاني يشموها قدحة ..

والواقع حا يفرض نفسه ..

لأن نحن المهمشين ما حا نرضى تانى بالفتات .

Quote: مشكلة السودان الأساسية في من وليس كيف

تحياتي تيسير ..

تصدقي مشكلة السودان في (من) و (كيف ) ..
عشان التوزيع يبقى عادل ويكفي الجميع بدون تمييز زي ما قال ودالقاضي ..



سلام كتار ..

مراحب يا معتصم ..

كلامك أقرب للصحة من بتاعي أنا وود سلفاب
بس يمكن لأننا ملدوغين من الـ(من) شديد



نعم ..
من وكيف مع بعض حيصنعوا سودان المستقبل ..

أووو أمونة ..
شفتينا لذاذ كيف يعد الهدنة؟

Quote: والواقع حا يفرض نفسه .. لأن نحن المهمشين ما حا نرضى تانى بالفتات

نفسي أعيش في الدنيا دي لغاية ما أشوف المظالم ردت لأهلها
وإتبنى سودان تاني غير العرفناهو دا
سودان قائم على المساواة وتكافؤ الفرص

مش شغل العصابات والنخاسة وعشيرتهم الأقربين !!

يعني يا ابو التا تاني بدل ننتخب القوي الأمين و نساله فكرك شنو وبرنامجك شنو وانجازاتك شنو في الدنيا دي
نسأل المرشح اهلك من وين وخارطتك الجينية كيفنها ؟

يا ود البشرى سيب القراءة المبتسرة




أدناه ردي على معتصم:

Quote: نعم .. من وكيف مع بعض حيصنعوا سودان المستقبل ..

ـــــــ
بعدين إنتو الكان القاعد يشاوركم منو في فكر وبرنامج وإنجاز قبال كدا عشان تستفسر من إستبدالهم بالقبيلة والجهة؟

الفاضى كتير
المهم القزازة البتعجب أمريكا

هو نحنا بدون ماما أمريكا عندنا ببسى يملا الغطاية؟

يا دكتور ..

وبيها برضو ما كان مالي الغطاية!



بعدين ماما أمريكا هي البدت سكة التغيير وأدت العالم مرتين بيان بالعمل
ولكم في إنتخاب أوباما عبرة يا أولي الألباب!

هههههه طيب هاك ليها من غير ابتسار قراية:
يعني تاني بالإضافة لمؤهلات و فكر و برنامج المرشح نساله اهلو من وين و اصله شنو

يا تيسير - نظريا - لو زبط تعريف الـ "كيف" والتزمنا بيه ما اظن الـ "من" تكون إيشو

ود البشرى :
حكومة الظل و شكل الحكم و الدستور أو طريقة كتابته و الإستفتاء عليه دا إكسرسايز كان مفروض يتعمل من يوم واحد سبعة تسعة وتمانين
---------------------------------------------------------------------------------------------------------------------------------------

لكي لا نبدأ من الصفر ، هناك اعمال وخطط و اوراق انجزها طيب الذكر التجمع
اهمها ماعرف بمقررات اسمرا ، ومؤتمر القضايا المصيرية و مصوع
نراجعها وننقحها ، نشطب منها ، ونضيف عليها

تيسير عووضة والإخوة الزملاء

أتفق مع البشاري :

Quote: الناس كلها تقعد وتؤسس للدولة السودانية الحديثة دولة المواطنة والعدالة والمساواة دولة المؤسسات ودولة القانون

من : يتفق عليه الجميع.( من : اسم شرط للعاقل بفتح الميم)بكسر الميم هذه مضت مع الشمولية البغيضة..يقدم رجل المرحلة الأكفأ على إدارة التنوع وليس إدارة السودان من بتري حتى الغابة !!

كيف : الحوار الديموقراطي ...

Quote: من : يتفق عليه الجميع.( من : اسم شرط للعاقل بفتح الميم) بكسر الميم هذه مضت مع الشمولية البغيضة.. يقدم رجل المرحلة الأكفأ على إدارة التنوع وليس إدارة السودان من بتري حتى الغابة !! كيف : الحوار الديموقراطي ...

البي أحمر دي ثبت بالتجارب المريرة المتوالية فشل الشماليين فيها


يكفي ما قد ضاع يا حلاوي ..

يا أبو ساندرا رغم موضوعية الفكرة لكن أنا بقيت لمن يجيبوا سيرة التجمع دي جسمي بقوم شوك شوك

يا ود البشرى ..

الحاجة الإنت مستهون وبتضحك بيها دي بيق إشو لأكتر من 65% من أهل السودان



صدق أو لا تصدق؟

تجميل ما لا يجمّل



تدهشني محاولات البعض في إعادة تلميع الميرغني والصادق المهدي كبدائل في حال إسقاط الحكومة


قيل في الأثر:
لست خباً ولا الخب يخدعني !!

مهما علا صوت الناقمين فإن القوى المنظمة في أحزاب وكيانات هي التي ستستأثر بالسلطة المقبلة. ولننظر في تجربة شباب الثورة في مصر وتاكتيكاتهم الماكرة التي هدوا بها اركان النظام وكدهم والدماء التي سكبوها ثم بعد ذلك في الكيفية التي تم بها خطف ثمارها منهم.