اللهم شماتة ..

المذكرات بقت تتطاقش




والحركة تريد إصلاح النظام







ــــــ
إصلاح عند الجماعة ديل يعني جيب خبرو

لطالما فاخروا وتفاخروا بحسن ترتيب بيتهم الداخلي





تاريهو طلع كلو كنس تحت السجادة

Quote: والحركة تريد إصلاح النظام

وفجاة كده
الحركة تريد اصلاح الحركة...

----------

والحركة دي تاني بوليس الحركة الشهير(ببريش) ما يصلحها

أنا من رأيي يا كيكي عمك بريش يقطّع الجماعة ديل كلهم إيصالات




ويمشوا يستلموا رخصهم من القسم الجنوبي

إنتو المذكرة/ات دي طلعت بعد مقتل خليل ولا من قبلو؟





الإجابة مهمة شديد ..

غايتو الحكاية ما خاتية تعلوب دا

ما مقلقني شي غير تضارب التصريحات الحاصل دا

واحدين يقولوا ليك المذكرة "المزعومة" في إشارة تشكيكية حول من كتبها
واحدين يقولوا ليك هم زاتهم ما تامين ألف

وواحدين قالوا شفنا الشافا ..

ولا يكون تعلوب بريء المرة دي ونسمات الربيع العربي أيقظت في الجماعة ديل الأمل من تاني


خصوصاً إنو الربيع العربي يا عيني تم إختطافه بواسطة خريف الإسلاميين



ــــــ
مع الإعتذار لخريف البطريرك يا ماركيز يا صاحبي فالهم واحد ..

Quote: ما مقلقني شي غير تضارب التصريحات الحاصل دا واحدين يقولوا ليك المذكرة "المزعومة" في إشارة تشكيكية حول من كتبها واحدين يقولوا ليك هم زاتهم ما تامين ألف وواحدين قالوا شفنا الشافا ..

وواحدين قالوا شفنا الشافا

عجبتني واحدين قالوا شفنا الشافا دي .ز آه منها الفي الضمير ماذيانا وشفنا عيونا في سيقانا

إن كان هنالك مذكرة
فإنها دليل عافية النظام
فأبشروا بطول اقامة للنظام
ولا نامت اعين المتربصين

متربصين مين يا ميدو؟


غايتو الكتبوا المذكرة/ات دي عفيت منهم
كان ما عملت شي
كفاية إنها خلتكم تمشوا وتتلفتوا

عايني جنس دا:
لمن من الاسلاميين هذه المذكرة ( مذكرة اخرى جديدة )



دي بس ذكرتني حكاية ياخوانا دا قميص منو؟

Quote: آه منها الفي الضمير ماذيانا وشفنا عيونا في سيقانا

دي الحركة؟

Quote: دي الحركة؟

دي آمنة الفي الضمير ماذيانا واحدين قالوا شفنا الشافا وسابل ديسا فات أكتافا

يا فقيري نحن هسي مع المذكرات


آمنة ملحوقة ..

يسوا شنو يعني يا تيسير؟
انتظرونا عشرة سنين ابينا نجدعم..
قامو هم جدّعو روحم وقعدو تاني عشرة سنين..
لما برضو شافونا ناخين قالو تاني نعارض روحنا برانا ونتمها تلاتين ..
امال أيه .

لوووولز يا مولانا الملك
ما حك جلدك مثل ظفرك



مش هم قاعدين يقولوا الزارعنا غير الله يجي يقلعنا؟
أها ربنا داير يوريهم القلع الما خمج


قلع منو وفيهو وهو أشد إيلاماً لو يعلمون ..

تيسير عووضه

اذيييك

زمان حصل الكلام دا من ايام النميرى

دا شغل بتاع مراكز قوى

والنظام بدا ياكل بعضو

وناس داخل النظام تم تهميشم

عندك صلاح قوش وماجد حاج شنو كدا ماعارف وعيييك

الحقيقه بتقول انو النظام بموت من الداخل

يعنى موت دماغى وشلل رباعى

لعنة الله عليهم اجمعين

خضر الطيب

زمن نميري بتاع أول أمبارح دا


ياخ دا ناموس الحياة وسنة الحضارات والدول والحكومات
سادت ثم بادت بعد أن قالوا ما أظن أن تبيد هذي أبداً

بقت على الإسلاميين يعني؟




خليهم ياكلوا بعضهم إن شاء الله يعدموا نفاخ النار ..

Quote: وانخرطت تلك القيادات فى مناوشات وحروب فى الجنوب ومع الدول الكبرى مما جر البلاد الى حروب باهظة التكاليف ( لم تسبر غاياتها ولم يحسن التخطيط لها ولم تدبر سبل الخروج منها ) وتكالبت دول كثًر على السودان تحت دعاوى محاربة الارهاب حتى وضع فى قائمة الدول الداعمة والراعية للارهاب فتحول المشروع الاسلامى برمته تحت الحصار والحرب من مشروع ثقافى فكرى مفتوح يتدرج نحو مسار التفويض الشعبى الى مشروع عسكرى / امنى منغلق على نفسه يضيق بالديمقراطية فى داخله ويُضيق مسالكها فى الخارج فتحولت البلاد الى الاستقطاب العسكرى الحاد لقوى المعارضة .

الجزئية أعلاه مقتبسة من المذكرة

لاحظوا باللون الأحمر: من مشروع ثقافي فكري مفتوح يتدرج نحو مسار التفويض الشعبي إلى مشروع عسكري/ أمني منغلق على نفسه يضيق بالديمقراطية - إنتهى

أنا بس حأناقش الجزئية دي

من متين كان خطاب الحركة الإسلامية يسع ديمقراطية أو مشروع ثقافي فكري مفتوح

يعني نعتبر إنو الإنقلاب على الحركة الإسلامية صاحبة المذكرة والتي هي ديمقراطية وثقافية فكرية مفتوحة وتنادي بالتفويض الشعبي دا كان من زمن صالحوا النميري في السبعينات

ومروراً بالفترة الديمقراطية التي كانت فيها إحدى شبيهات الحركة الإسلامية ممثلة في البرلمان بكذا وخمسن عضو

ومن زمان أين كانت مثل هذه المذكرات من الحركة الأصلية صاحبة المذكرة والتي هي حركة تنتهج الثقافة والفكر المفتوح وتتسع للديمقراطية !

هل كانوا طوال هذه السنوات يعملون تحت الأرض

هل الشيخ/ حسن الترابي هو من الذين إنقلبوا على الحركة الأصلية وهذه المذكرة موجهة إليه أيضاً كما هي موجهة للمؤتمر الوطني ؟

أم أن هناك حركة إسلامية حقيقية خفية لم نسمع بها ولم تظهر على الساحة السياسية السودانية والآن فقط تريد أن تطالب بحقها في البروز كحزب جديد نظيف وخالي مسؤولية من كل التاريخ الملوث؟

يا أخوانا إحترموا عقولنا نقسم أنه بالرغم الجوع والتشريد والتنكيل والإضطهاد الذي نعانيه كمواطنين سودانيين ما زالت عقولنا تفكر وتستطيع أن تميز وتفرز بين الحلم والحقيقة

وما زلنا نعرف نهاية المسلسل العربي من قولة تيت ومشاهدة المشهد الأول

وحتى المسلسلات التركية بقينا نعرف نهايتها قبل ما تبتدي خليك من المسلسلات السودانية البتكون قصتها محكية قبل التمثيل

يا ناس يا هوي نقسم بأننا ما زلنا نشك ولا نشك في أننا نشك إذاً نحن نفكر إذاً ما زلنا أحياء

Quote: فتحول المشروع الاسلامى برمته تحت الحصار والحرب من مشروع ثقافى فكرى مفتوح يتدرج نحو مسار التفويض الشعبى الى مشروع عسكرى / امنى منغلق على نفسه يضيق بالديمقراطية فى داخله ويُضيق مسالكها فى الخارج

كلهم على بعضهم مستهبلين يا فقيري

أي دولة ثيوقراطية تلك التي تؤمن بالثقافة والفكر المفتوح؟
الله يفتح راسهم بركة سيدي الحسن


لا وشوف الإفتراء: نحو مسار التفويض الشعبي
ياتو شعب دا الفوضكم ومتين؟


تحالف الإسلاميين مع العسكر لم يفرز لنا غير كيان أكثر تشوهاً هو الوصل البلد للي هي فيهو هسي دا

عايزين يلحقوا آخر عربية في قطار الديموقراطية اللي ما حسوا بقيمتها إلا لما إتحرموا منها هم زاتم بعدما كانوا حارمين منها شعبنا؟
ولا عايزين يعملوا حقانيين ويبرؤا ساحتهم من إثم السكوت عن الحق طوال السنين الفاتت ويبقوا شاهد ملك تخرجه شهادته من زنقة المحاسبة التي هي قادمة لا محالة؟


الشعب حيقول ليهم بلوا مذكرتكم دي واشربوا مويتها "يا قولو"

Quote: اللهم شماتة ..

قريت العنوان ولظني الحسن ونيتي الطيبة دخلت اشمت فيمن ظنيت ..
لكن لقيت الشماتة عايزة سوء ظن ..


ياتيسير المذكرة الاولى كانت في جسم تنفيذي واحد فانقسم نتيجة لذلك ..
لكن دي من ناس هم خارج الفعل الحاسم رغم ان عيارهم قد يدوش ..



تحياتي ،،

Quote: مش هم قاعدين يقولوا الزارعنا غير الله يجي يقلعنا؟

باقي لي الزول ده زودها خالص..
متين الترابي بقى دا كلو؟
احكي ليك نكتة من أهلك الضناقلة يا بت عووضة..
على أيام الانتخابات في الديموقراطية الأخيرة..
الجبهجية طالقين الكلام وسط النسوان بقولوا ليهن أدن صوتكن لى الله ما تدن الشيطان..
المره مشت صوتت وجات لقت راجلها قاعد في ضل الضحى يفتل في الحبال ..
قالت ليهو ما مشيت التصويت ؟
قال ليها لا..
بعدين رجع سألها اديتي صوتك لى منو؟
قالت ليهو اديتو ربونا إ
رفع راسو عاين ليها وقال:
هو كمان السنة دي نازل!؟

تيسير عزيزتي
الكيكة صغرت شديد
و الضرع نضب
و جاء وقت الفرار

قلت شنو يا عاصم ثقافة؟
ثقافة ما حكم سارق خمر الذمي
و لاه غيرها؟


تحاياي

_____
عاصم راجع الايميل رجاءا

غايتو يا تيتا

حكاية الموتمر الوطني يرفع للمذكرة للموتمر الوطني

ذكرتني معارضي المفضل قاعونة من ولاية نهر النيل تم اختياره

في المجلس الولائي وهو موتمر الوطني

قومي يا الكهرباء والموية اقطعي في الدامر

قوم يا قاعونة طلع الناس مظاهرات ويهتف


الماء والنور مطلب جمهور

قال معمر القذافي متحدثاً عن المتظاهرين
لو كنت اعلم ان لهم مطالب حقيقية كنت انا اول واحد يطلع يتظاهر معهم
عصابة بعضها من بعض ، كل الدقون مرت علينا وكل الايادي المتوضئة صافحت بنوك بلادنا وكل الجباه المختومة بختم الجودة مرغت انف شعبنا في التراب وكلهم لم نر منهم خيراً حروب كبت غلاء هجرة نزوح تسلط ، فقدوا كل مبررات البقاء ولم يبق لهم الا ان نحسن دفن مشروعهم الهراري .
مذكرة ما ماذكرة ما بتحل ، الربيع جاي جاي
المذكرة دي زي قصة حاطب ابن ابي بلتعة رضي الله عنه

العزيزة تيسير عووضة
سلام و مودة

ما جاء فى المذكرة سئ جدا
و بصراحة ما تفعله الانقاذ هو احسن من الافكار المتطرفة التى تعج بها المذكرة
هذه المذكرة فى رايئ صاغها النظام بنفسه و يهدف منها لتخويف الناس من وجود جيوب متطرفة
تريد اعادة الساعة الى زمن اول الانقاذ فيقبلون ب (جن) الانقاذ الحالى

عزيزنا د. عوض

Quote: ما جاء فى المذكرة سئ جدا و بصراحة ما تفعله الانقاذ هو احسن من الافكار المتطرفة التى تعج بها المذكرة هذه المذكرة فى رايئ صاغها النظام بنفسه و يهدف منها لتخويف الناس من وجود جيوب متطرفة تريد اعادة الساعة الى زمن اول الانقاذ فيقبلون ب (جن) الانقاذ الحالى

كان غيرهم أشطر!

لم تعد الشعوب تلك الطيور التي يتم تخويفها بالـ scarecrows سواء كانت التطرف والإرهاب أو إنعدام الأمن أو غيرو
الشعوب وعت وتفتحت وخرجت عن الطوق
ما جاء في المذكرة نعم سيء ولكنه لا يعنينا - نحن الشعب - في شيء، كيزان في بعض فخار يكسر بعض
وسيذهبوا أجمعين لبئس المصير كمن سبقوهم ..

"إذا لم يجد اللص فرصة ليسرق ظن نفسه شريفاً"
مسؤوليتنا الآن تتلخص في تفويت الفرصة عليهم للعب دور الشرفاء الحقانيين ناشدي مصلحة الشعب
ومعاملتهم بنفس ما سيعامل به مجرمي النظام الحاكم فهم لا يختلفون عنهم كثيراً إن لم يكونوا أعنف وأسوأ ..


لك المودة والتقدير ..

محمد عمر الفكي ..

إنت قايلو ما عملها؟

قالوا قبل كدا طلع مع الشعب مظاهرات ضد الحكومة
مش القذافي؟ بيعملها!ّ

Quote: عصابة بعضها من بعض ، كل الدقون مرت علينا وكل الايادي المتوضئة صافحت بنوك بلادنا وكل الجباه المختومة بختم الجودة مرغت انف شعبنا في التراب وكلهم لم نر منهم خيراً حروب كبت غلاء هجرة نزوح تسلط ، فقدوا كل مبررات البقاء ولم يبق لهم الا ان نحسن دفن مشروعهم

أهو دا الكلام
شعبنا واعي يا ود الفكي
وما حينطلي عليهو شغل البيضة والحجر بتاع الدجالين ديل ..

خليل يا خلة

قاعونة مفتّح
لو صبر شوية الناس حيطلعوا مظاهرات ضدو هو قال أحسن بيدي لا بيد عمرو

Quote: الماء والنور مطلب جمهور

الماء والنور بس؟
يا حليل الجمهور الكان بيقول: راس نميري مطلب شعبي



هسي الرؤوس دي كلها ما عليها طلب؟

عزيزنا ثروت ..

Quote: الكيكة صغرت شديد و الضرع نضب و جاء وقت الفرار

بس قلتها
الضرع نضب
وفجأة كدا قرروا يبقوا ناس حق ونصيحة !!


زمان كل واحد يضرب ضربتو ويجي يقول ليك خلوها مستورة


كل واحد عامل بيكشف في المستور دا ويقول ليك فساد الكيزان
كان هم البيكشفوا الفساد


طيب الفاسد منو؟

Quote: باقي لي الزول ده زودها خالص.. متين الترابي بقى دا كلو؟

يا مولانا ربونا نفسو قال ليك وجعلنا لكل شيء سبباً
غايتو لو جعل ليهم الترابي سبب يكون بالغ معاهم

ويمكرون ويمكر الله والله خير الماكرين

دا هو اللي بيقول يا بيه



وبعدين يا مولانا زولتكم دي من دناقلة وين؟
لأنو الدناقلة الجد جد ما بيدو صوتهم لي الله ناس شيطان ساي ..

Quote: يا مولانا ربونا نفسو قال ليك وجعلنا لكل شيء سبباً

أو فيما معناه ..

Quote: قريت العنوان ولظني الحسن ونيتي الطيبة دخلت اشمت فيمن ظنيت .. لكن لقيت الشماتة عايزة سوء ظن ..

طيبتك خذلتك يا صاحب الضريح دورين ..


خلي ظنك دايماً سيء
سوء الظن من حسن الفطن

Quote: ياتيسير المذكرة الاولى كانت في جسم تنفيذي واحد فانقسم نتيجة لذلك .. لكن دي من ناس هم خارج الفعل الحاسم رغم ان عيارهم قد يدوش ..

يا ود القاضي أنا هنا ما قصدت المذكرة الأولى بتاعة المفاصلة


أنا قصدت المذكرة الأخيرة والتي تلتها والتي قد تتلو أيضاً
ما الحكاية بقت خل ..

أحمد ولدي في أول ثانوي .. و امتحاناتو الاسبوع الجاي
جاني و أنا قاعد في صمة خشمي - و هو صمٌ قد يؤدي لالتهاب العصب الخامس ، ثم يمكن عوجة قدوم من أثر زعلة من الشيطان أب لمبة الراسو ضرب و بقى يجقلب -
و سرحان كنت في طقيش الكلامات و الكتابات و الجرايد و المنابر بالبنابر و المحللين و المحرمين و المعلقين و المعولقين ، و المديدة التي هي حاره ، و الثعلب أب كشيمه ، و تلك التي دخلت المولد لقتو حولية ، و قام بجماعتو ، نزل بجماعتو , و الإصلاح و الإرتاح ، و الصدع المرؤوب و الضبع أبو مركوب .. و و و ..
قهمني الولد : ( بابا .. قالوا لينا جيبوا مذكرات ) !!!!
هرشت الولد المسكين من شدة خلعتي و الدوشة الفي الراس في تلك الهُنيهة بت الكـلــب :
شنو ؟؟ .. مُذ شنو ؟ .. نحنا الشعب ، مذكرات شنو البنجيبا ؟ ..
علي الطلاق نحنا " نراعي ليكم " سااااااكت تتطاقشوا مذكرات و كشكول و حسن و الصفارة و النعيم في قصرو و جر واطي و مسكنة و إنبعلال ..
و بعدها " نسقّطكم " في امتحان ابن لذينا و ... لم ينجح أحد . إنتو قايلين مافي إمتحانات ؟؟
نطط عيونو الولد ، و كذلك فعلت أنا .
و المرة دي أبداً ما لعنت ابليس ..
حنيت عليهو إبليس ياخ المرة دي ، أتاريهو طلع كيشة .


.........
داير إيثكريم باااااارد يا ود يا طايسا ..
عندكم ؟

المقام مقام شماتة
اعلنتها تسير
عديل كدة

نهديكم حكاية بشرى الفاضل دى
فى مقام التامل والنظر




أغلبية
كان هنالك حقل من البصل (أخضار!) وخضرة البصل تسر الناظر. عاش لعدة شهور في إلفة ورواء ومنعة، إلى أن جاء يوم ظهرت فيه أعراض المرض على بصلة في منتصف الحقل. واجتمع البصل الذي حولها وقرر أن يقتلعها حتى لا تنقل العدوى للحقل. وبينما كان البصل السوي يتشاور مع جماعاته العديدة، ظهرت أعراض المرض على جارات البصلة، فقررت جموع البصل اقتلاع البصلة المريضة وجاراتها. واحتجت الجارات البصليات، ودخلن في مشادات مع كبار البصل ومع المسمس على السواء. واستمرت المعارك الكلامية لأسبوع كامل انتقلت خلاله العدوى إلى دوائر بصلية جديدة. وهكذا ظل البصل يتناقل ميكروب المرض ويتحاور يومياً ويباصر إلى أن أصبح الحقل كله موبوءاً بمرض البصارة، عدا بصلة واحدة في طرف الحقل. وفاحت في أجواء الحقل روائح نتنة من سائر البصل، عدا بصلة واحدة، كانت في ركن الحقل، رائحتها كالمسك..
وقررت البصلة السوية، التي أصبح صوتها جهورياً، والحقل يهمس، أن تنفي البصل التالف حتى لا يعديها. ولكن ذلك البصل كان أكثرية في الحفل، لذلك صاح فيها بصوت واحد:
- تقلعينا؟
وأردف متهكما:
- بالله؟!
وفي حركة خاطفة حدث النقيض، إذ هجم البصل التالف الغاضب على البصلة السوية المتطاولة فاقتلعها ورمى بها بعيداً وهو يزفر حنقا ويشهق غيظاً ومع ذلك فإن البصل الذي أصبح سيدا للحقل كان قد أدرك أن غلبته بلا طائل فهي غلبة خائبة، لذا أصابته هاء السكت فسكت.

تسلم أستاذنا محمد سيد أحمد على إيراد قصة تشيكوف السوداني د. بشرى الفاضل



له ألف تحية وتقدير ..

عماد الظريف

موضوع الامتحانات دا
متجهزين ليهو بترسيب الاسئلة
وتحضير البخرات
ورشوة المراقب

Quote: طيبتك خذلتك يا صاحب الضريح دورين ..

قلبك بنى ومابتنسي ..

ود الكازي (بالباكستاني)


الكلام دا شفتو بعد البتاع إترحل




غايتو كراماتك مرقتك ساي

Quote: داير إيثكريم باااااارد يا ود يا طايسا .. عندكم ؟

يا عماد طايسا كايسه ..
حلك لامن تلقى طلبك ..
هاك البارد ده مني..
قالوا عسكري كان مشارك في انقلاب هاشم العطا..
سألو في التحقيقات انت شاركت ليه؟
قال ليهم ادونا اوامر نشيل طغمة النميري ونجيب طغمة هاشم العطا..
فما تشمت في عساكر المذكرة دي ساكت.

Quote: شنو ؟؟ .. مُذ شنو ؟ .. نحنا الشعب ، مذكرات شنو البنجيبا ؟ ..

نعم نعم يا عمدة يا أصلي
نحن الشعب والشعب نحن

لو الدنيا ماشة عديل
نخلف رجل فوق رجل ونقول نحن الشعب .. نحن المجد


مذكرات دي يجيبوها ناس الكبكبة والقراية المسلوقة زي الليلة وبكرة الإمتحان وشغل الإسبوتنق اللي يا صاب ياخاب

المرة دي الأستاذ جايب الإمتحان صعب شديد وبرة المقرر يعني لو ما ذاكرت المذكرات العملها الأستاذ ما بتنجح
وما في إعادة للسنة وما في قراية تاني إلا من منازلهم (العشرية والمئوية والألفية) حسب مذكراتهم العاملة زي درس المتواليات دي

Quote: داير إيثكريم باااااارد يا ود يا طايسا .. عندكم؟

آيسكريم شنو في البرد دا يا فنان؟
معزوم معنا هوت شوقوليت يا قول الفليبينو ..

تيسير بت عووضة حبابك

تعرفي يا تيسير ، وإنت ست العارفات ، أعمار الشعوب لا تقاس بأعمار الأفراد ولا حتى الأنظمة.. ولذلك تجربة زي البيمر بيها
نظام المتأسلمين في السودان تجربة ليست فريدة وإنما مكررة قياسا على تجارب أنظمة أخرى في بلدان أخرى وأزمنة أخرى.
لكن ، كدا قولي لي منو البيقرا التاريخ من بين كل طغاة العالم؟ ومنو البيتلفت حوالينو وبيشوف تجارب البغاة الحوالينو وسقوطهم
المدوي؟
لا أحد!!
ولذلك زي ما قالوها الغربيين:..."the harder they fall..."
وغدا كان الله مد في العمر سنرى ما ستتمخض عنه (مذكرة الألف متأسلم عاطل) دي... هذا إذا لم تتم الإطاحة بنظام المتأسلمين
المتداعي لأسباب أخرى..

تقبلي محبتي في كل أحوالك

أديبنا وعزيزنا أبو عسل ..

Quote: لكن ، كدا قولي لي منو البيقرا التاريخ من بين كل طغاة العالم؟ ومنو البيتلفت حوالينو وبيشوف تجارب البغاة الحوالينو وسقوطهم المدوي؟ لا أحد!! ولذلك زي ما قالوها الغربيين:..."the harder they fall..."

ما أنا دا المحيرني
الناس دي ما بتتعظ؟

قالوا السعيد يشوف في غيرو
بعد الحصل لصدام حسين بسبب عنادو وقوة راسو
أبداً ما تخيلت السيناريو ممكن يتكرر وبشكل أسوأ كمان

ليه كل مرة بيستنوا لما الموية تصل تحت رجليهم وتبدا تغرقهم حتى يستسلموا دا لو إستسلموا زاتو

القذافي
علي عبد الله صالح
الأسد مكنكش لسه

وعمر البشير مركب مكنة صلاح غريبة عديل

أصلو شنو هو؟

Quote: هو صمٌ قد يؤدي لالتهاب العصب الخامس ، ثم يمكن عوجة قدوم من أثر زعلة من الشيطان أب لمبة الراسو ضرب و بقى يجقلب

قريبك يا عماد طقاهو ليك إلتهاب العصب الخامس دا والإسم العلمي بتاعو طبعاً ضربة الشيطان
قالوا ليهو ياحاج محمد ساتي العندك دا اسمو ضربة شيطان
قال ليهم: شيتان؟ وأنا سبت إيه هو قال عليه وما عملتوش علشان يدربني؟

فووووووووووووووووووق حتى الماشاف يشوف الشماتة ...




ياخي جيت الصباح مالقيتو ..
مفروض يكلموني لاني صارف فيهو مداد كتير ...