الصادق المهدي يصافح (السيد) تاج السر!

هكذا ورد التعليق على الصورة أعلاه في منتديات الختمية ..

تيسير عووضة ... مسكاقمي
معليش ما وضحت لينا مين تاج السر

مرحب حمزاوي ..

تاج السر هو (السيد) تاج السر الذي صافحه الصادق المهدي




أنا أعرف الصادق المهدي (حاف) ولكني لا أعرف السيد تاج السر!

وقبلها ورد هذا التعليق على الصورة أدناه:


(السيد) أمين الميرغني والصادق المهدي ..

نحن من قمنا قلوبا نظيفةعشان كدى تجدنا اقوياء فى الاجتماعيات والمناسبات الدينية حيث لا تفرز الانصارى من الختمى الا بالجلابية لذا نحن اهل و احباب لا تفرق بيننا السياسةوربنا يدوم التواصل بيننا و يكفينا شر ناس فرق تسد

Quote: نحن من قمنا قلوبا نظيفةعشان كدى تجدنا اقوياء فى الاجتماعيات والمناسبات الدينية حيث لا تفرز الانصارى من الختمى الا بالجلابية لذا نحن اهل و احباب لا تفرق بيننا السياسةوربنا يدوم التواصل بيننا و يكفينا شر ناس فرق تسد

اللهم آمين... تسلم الحبيب صديق...

Quote: حيث لا تفرز الانصارى من الختمى الا بالجلابية

أنا برضو يا صديق مهدي زمني دا كلو كنت قايلة كدا
قبل ما أشوف التعليق على الصورتين ديل!

فعلاً فرّق تسد!


وإلا ما أتت أسماء أمين وتاج السر مسبوقة بلقب (السيد) والصادق المهدي في المرّتين حاف

سلامات تسير... نهديك مع محبتنا...



السيد أمين الميرغني يتوسط الإمام الصادق المهدي والإمام أحمد المهدي

مشكور على الهدية يا أبو الحسين



كدا ممكن يكون التعليق مقبول شوية ..

إن كان ولا بد من الألقاب "التشريفية"، فأبسط قواعد اللياقة تتطلب تعريف الاتنين في الحالتين بألقابهما التشريفية "المتعارف عليها"

وسيظل الأنصار والختمية في علاقات مودة وتسامح بإذن الله.

Quote: وسيظل الأنصار والختمية في علاقات مودة وتسامح بإذن الله.

نتمنى ذلك أستاذنا خالد عويس ..

الاخ الحبيب ابو الحسين لك كامل ودى واقول لك فى بداية الثمانينات والسيد الصادق المهدى معتقل فى كوبر ارسل لنا فى نعيمة رسالة بأن تستقبل القرية السيد محمد عثمان الميرغنى استقبال يليق بمكانته لان كل القرية انصار عدا نسيبنا حاج كمبال التاجر الكريم اطال الله فى عمره حيث فرح فرحا شديدا عندما شاهدنى امسك المايك و اهتف بحياة السيد محمد عثمان الميرغنى واقول مرحبا بالسيد العثمان هكذا استقبلنا السيد الميرغنى بنعيمة فى بداية الثمانينات بطلب من السيد الصادق وزى ما قولت يا الحبيب ابوالحسين نحن اهل واحباب نحترم بعضنا البعض ونحترم قادتنا وشيوخنا ختمية وانصارمية المية وربنايدوم المحبة ابها الحبيب الرقيق ابو الحسين

سلامات

سيدي بي سيدو يا تيسير



لعن الله الطّئفية إلى يوم الدّين

Quote: نحن من قمنا قلوبا نظيفةعشان كدى تجدنا اقوياء فى الاجتماعيات والمناسبات الدينية حيث لا تفرز الانصارى من الختمى الا بالجلابية لذا نحن اهل و احباب لا تفرق بيننا السياسةوربنا يدوم التواصل بيننا و يكفينا شر ناس فرق تسد

صدقت والله اخي صديق

شاهدت صور عقد قرآن المراغنة في النت
ما شاء الله والله امم من البشر ومحبي الطريقة الختمية
يبغروا في الترابط والمحبة لله في الله
مبروك عليهم عقد القرآن وربنا يهني العرسان


سلام وتحية تيسير والضيوف الكرام

مرحب بيك يا سوما ..

شد ما أعجبني في هذا البوست ردود الإخوة في حزب الأمة ..

ـ


الفتنة نائمة ..

مرحب مولانا دهب ..

الأخوة في حزب الأمة "جُمال شيل"
الله يديهم العافية والقوة والمروة ..





فتنة أكتر من سيدي وسيدك مافي!
هسي دا لو كان زول من جماعتك كنت جيت بشّرت فوقو

مرحب علاء ..


لن يتقدم السودان شبراً طالما كان هنالك حتى الآن من يعتقد في نفسه "السيادة" دون البشر ..



وطالما بقيت الإنقاذ على سدة الحكم

خلو الصادق المهدي، أنا غايتو لو في صورة زي دي لن أقبل بأقل من أن يأتي اسمي مسبوقاً بالسيدة تيسير عووضة
أو يذكر اسمينا معاً دون ألقاب ..

حكى لي مولانا سيف الدوله حمدنا الله أنه عندما كان بالسودان خدمة مدنية
كانوا يخاطبون منسوبيها في الدرجات العليا بلقب (سيد) يسبق الإسم تقديرا وتبجيلا ،
ويكون الموظف مؤهلا للقب سيِّد عندما يدخل (القروب) وحدث أن كان إسم أحدهم الأصل في
شهادة الميلاد (سيد) وعند ترقيته أصبحوا ينادونه ب (سيد سيد)، فقال له أحد أصحابه
مازحا : والله إنت ما استفدت من لقبك الجديد دا أي شئ ، زي الإجازه الواقعه يوم جمعه.

يا تيسير هناك أناس تُشرِّفهم الألقاب وهناك من تتشرف بهم الألقاب.

Quote: وحدث أن كان إسم أحدهم الأصل في شهادة الميلاد (سيد) وعند ترقيته أصبحوا ينادونه ب (سيد سيد)، فقال له أحد أصحابه مازحا : والله إنت ما استفدت من لقبك الجديد دا أي شئ ، زي الإجازه الواقعه يوم جمعه.

Quote: يا تيسير هناك أناس تُشرِّفهم الألقاب وهناك من تتشرف بهم الألقاب

يسلم وعيك يا أستاذنا ..

Quote: وسيظل الأنصار والختمية في علاقات مودة وتسامح بإذن الله.

الله يكملك بي عقلك أُستاذ خالد عويس...

السيدة/ تيسير كبف الحال و كيف حال السيد/ عثمان و السيد/ سعد
عساكم جميعا بخير

تقبلوا تحيات السيد(ارامكس)

السيد محمد البشرى السيد الخضر ..


نحن نؤيد لقب السيد





السيد أراميكس بيسلم عليكم وبيقول ليكم الأمانة حتصل بكرة أو بعدو بالكتير ..

Quote: أنا غايتو لو في صورة زي دي لن أقبل بأقل من أن يأتي اسمي مسبوقاً بالسيدة تيسير عووضة أو يذكر اسمينا معاً دون ألقاب ..

أرجو من الأخ بكري تعميم ذلك على البورداب..
مع تثبيت صورة بالسراي..
يعني حفيدة شكال القارح هينه والا هينة..
أسأل الله أن يصرف بصيرة قيقاومن لف عكسه عن هذا ال..
..
تحياتي.

مولانا الملك ..

Quote: يعني حفيدة شكال القارح هينه والا هينة..

لا كرامة لنبي في وطنه
لو الحكاية بالطريقة دي يبقى عايزين لينا قانون أو دستور ينظم القصة دي




دستور يا أسياد



ــــــــــ
البوست بقى كلو مولانات
مولانا السيد عصام دهب
ومولانا السيد محمد المرتضى حامد
ومولانا السيد محمد على طه الملك

وعارفه يا تيسير
بقولوا السيد وما بقولوا السيدة بقولوا (ستنا)
او ستى فلانه ..
اها قول لى ود البشرى دا ما تلفح ...
بقولوا ستى امنه وستنا تيسير وكدا ..
انتى ماسامعه من زمان بقولوا
شارع على عبد اللطيف ( بالرغم من السفارة الامريكية)
وشارع السيد/ عبدرحمن ؟؟

يعنى لو فى واحده اسمها ستنا يا تضى برضو
بكون اسمها ستنا ستنا .. طيب دى عرفناها
بطرس بطرس غالى دى من شنو ؟

Quote: سيدي بي سيدو يا تيسير

وعشان كدا يا علتى العلعاله بتقولوا
السيد / البشير ؟
اها المره دى لو استعدل وصلحت شريعتوهو
زوجناهو احدى الرايسين
كونداليزا رايس او سوزان رايس
( قلت ليك علمنى صف الوشوش الخدرا دا ياخ )












ـــــــــــــ
وبفضل السؤال الكارثى قائم يا تيسير
هم اسياد منو ؟؟
لازم اماتنا يرجعو يولدونا احرارا ياخ ..

Quote: وعارفه يا تيسير بقولوا السيد وما بقولوا السيدة بقولوا (ستنا) او ستى فلانه .. اها قول لى ود البشرى دا ما تلفح ... بقولوا ستى امنه وستنا تيسير وكدا .. انتى ماسامعه من زمان بقولوا شارع على عبد اللطيف ( بالرغم من السفارة الامريكية) وشارع السيد/ عبدرحمن ؟؟

يا دندون ..

يعني هسي ما ينفع يقولوا لي السيدة تيسير وتبقى ستي و ستنا تيسير؟
طيب أنا من الليلة اسمي (الليدي) تيسير سبنسر




وشفتي البي أحمر دا ياهو أس مصايبنا في السودان يا دينا!
ومعاك بقول سيد نفسك مين أسيادك ..

الاخوة الافاضل للامانة انا انصارى لكن سوف احكى لكم قصة حكاها لى عبدو تبيدى وهو رجل معروف واسرته معروفة هذه القصة عن الشريفة زوجة السيد على الميرغنى طيب الله ثراهما حيث التقيته فى القاهرة فى أواخر التسعينات وقال لى ياصديق انا سوف احكى لك قصة وانا شاهد عيان وهى عن كرم الشريفةزوجة السيد على الميرغنى فقال لى والكلام لعبدوتبيدى كان والدى يملك دكان دهب فى الخرطوم بحرى فى مرة من المرات وانا اساعد والدى فى الدكان السوق كله قفل قلت يا ابوى نحن ما نقفل عشان الوقت اتأخر قال لى يا ولدى نحنا منتظرين الشريفة فعلا الشريفة جات ومعاها الخلفاء و احضرت صفيحةدهب وقالت لابوى دقها لنسوان الخلفاء رحم الله هذه الشريفة بقدر ما قدمت من خير والعايز يسأل عبدو تبيدى حى يرزق فى السودان وهكذا شرفاء السودان كرم فى السر جزاهم الله عنا كل خير و على رأسهم هذه الشريفة النقية الطاهرة الا رحمها الله رحمةواسعة

حكايات الأولياء والصالحين وكرمهم وكراماتهم - مع إحترامي - لن تغير مما ورد في هذا البوست شيئاً يا صديق مهدي
بل بينت بوضوح كيف ينظر الختمية لمن هم مثلهم من البشر ومن ضمنهم الصادق المهدي نفسه الذي يخاطبه أنصاره وغير أنصاره أيضاً بالسيد!
كما وأن ردود الأنصار رغم دبلوماسيتها لن تغير شيئاً من الواقع الذي رايته وأدهشني الآن!



يا قوم
كلكم "أنصار على ختمية" لآدم .. وآدم من تراب ..

الختمية والانصار صفا واحد لن ينهار

Quote: الختمية والانصار صفا واحد لن ينهار

تمام


عجلوا بالنصر والفرج ..

Quote: الاخوة الافاضل للامانة انا انصارى لكن سوف احكى لكم قصة حكاها لى عبدو تبيدى وهو رجل معروف واسرته معروفة هذه القصة عن الشريفة زوجة السيد على الميرغنى طيب الله ثراهما حيث التقيته فى القاهرة فى أواخر التسعينات وقال لى ياصديق انا سوف احكى لك قصة وانا شاهد عيان وهى عن كرم الشريفةزوجة السيد على الميرغنى فقال لى والكلام لعبدوتبيدى كان والدى يملك دكان دهب فى الخرطوم بحرى فى مرة من المرات وانا اساعد والدى فى الدكان السوق كله قفل قلت يا ابوى نحن ما نقفل عشان الوقت اتأخر قال لى يا ولدى نحنا منتظرين الشريفة فعلا الشريفة جات ومعاها الخلفاء و احضرت صفيحةدهب وقالت لابوى دقها لنسوان الخلفاء رحم الله هذه الشريفة بقدر ما قدمت من خير والعايز يسأل عبدو تبيدى حى يرزق فى السودان وهكذا شرفاء السودان كرم فى السر جزاهم الله عنا كل خير و على رأسهم هذه الشريفة النقية الطاهرة الا رحمها الله رحمةواسعة

نسبٌ من الرحمن محفوظٌ فلا... يلحقه نسبٌ في الوجود مبرَّأُ
دُرٌ تنضَّدَ من قديمٍ عاااالي... يعلُو على الجوزاءِ نورٌ أسنأٌ
____________

شكراً الحبيب صديق... والتحية والتقدير لآل تبيدي...

Quote: هكذا ورد التعليق على الصورة أعلاه في منتديات الختمية ..

وانتي عادة بتمشي تقري منتديات الختمية يوم السبت؟

السيدة عزاز السيد محمد شريف السيد شامي ..



تقولي شنو بس يا بت أمي
الشلاقة




ودتني في الحقيقة ريحة الفتة ..

Quote: تمام عجلوا بالنصر والفرج .

وانتو بتعجلو بشنو
ههههههههههههههههههههههههههههههههه شر البلية مايضحك
التقدميين والثوريييين بقى عندهم خشم بتكلمو
الختمية والانصار عجلو بالاستقلال وبا اكتوبر وابريل
لكن انتو عجلتو بشنو انا كنت ناوى اخش فى سخف معاك عشان انهى البوست دا
ومانبقى فى قصة معيار وكلام فارغ لكن الظاهر انكم مناوين تجيبوها للبر
واتمنى للمشاطات ارسلو رسائل ويضربو تلفونات لايقاف محمد عادل
فصراحة البوست دا لمه لمه صاح ولمه مابتتلمه الا فى قعده

محمد عادل ..

Quote: وانتو بتعجلو بشنو ههههههههههههههههههههههههههههههههه شر البلية مايضحك التقدميين والثوريييين بقى عندهم خشم بتكلمو الختمية والانصار عجلو بالاستقلال وبا اكتوبر وابريل لكن انتو عجلتو بشنو انا كنت ناوى اخش فى سخف معاك عشان انهى البوست دا ومانبقى فى قصة معيار وكلام فارغ لكن الظاهر انكم مناوين تجيبوها للبر واتمنى للمشاطات ارسلو رسائل ويضربو تلفونات لايقاف محمد عادل فصراحة البوست دا لمه لمه صاح ولمه مابتتلمه الا فى قعده

عايز تتناقش بتهذيب إتفضل
عايز تبداها بي مشاطات وقعدات يفتح الله ..

Quote: الختمية والانصار عجلو بالاستقلال وبا اكتوبر وابريل

وين دا؟

الإستقلال يمكن




لكن أكتوبر وأبريل دا صنع الشعب السوداني ما صنع حزب ولا حزبين ..

اها.. عرفتي ليه انا سألتك؟

اتاريها يا عزاز ما بترد.

الأسياد حمور وعزاز ..




في كتلوج ؟

اوووه (السيد حمّور) احضرنا بالله في الحاصل
في ناس مصرة تفهم (السيدة) تيسير (السيد) عثمان عووضة خطأ
وانا ما حابة ابتدي الاسبوع بتوتر و شد اعصاب

لأول مرة يتغاتتوا( السادة) الأنصار والختمية
على السيدة تيسير السيد عووضة.

"وتلاغت" قمم يامرحى من قبل.
وتلاقت قمم يا مرحى من بعد

يديم المحبة والتواصل على الجميع .

لك التحية ياتيسير

يا السيد عبد المنعم ..

يتغاتتوا على روحهم!

دي اسمها أنا وأخوي على ابن عمي وأنا وابن عمي على السيدة تيسير السيد عووضة

Quote: "وتلاغت" قمم يامرحى من قبل. وتلاقت قمم يا مرحى من بعد

يا أخوانا الموضوع ما داير ليهو ذكاء

تيسير قرت البوست ده

أفراح السادة المراغنة بالخرطوم بحري... صور.. صور.. صور...

قامت لقت فيهو اللنك ده بودى لمنتديات الختميه وفيهو الصوره سيدة البوست

مشاهد مصورة من عقد قران السيد عبد الله المحجوب بن السيد محمد عثمان الميرغني...

بس ده كل الموضوع


------------------
تيسير نسيت أقول ليك سلامات

Quote: كما وأن ردود الأنصار رغم دبلوماسيتها لن تغير شيئاً من الواقع الذي رايته وأدهشني الآن!

الانصار حاولو يكونو دبلوماسيين و ما يقولو البغلة في الابريق و الختمية بعد ما لكزتيهم مشو عدلو الرابط لـــ الامام لكن يظل واقع عدم المهنية من جانب محرر الصفحة واضح

Quote: إن كان ولا بد من الألقاب "التشريفية"، فأبسط قواعد اللياقة تتطلب تعريف الاتنين في الحالتين بألقابهما التشريفية "المتعارف عليها"

طالما كتبت تيسير العبارة دي فأنا (مغمضة) بثق إنه دة السبب الخلاها تكتب البوست ...مش محاولات (فتنة) و(تفرقة) وبعض ما ورد في هذا البوست!!!
تيسير دي ندى شقيقتي، وثقتي فيها لمعرفتي بنضافتها ودوغريتها وتربيتها وأهلها..فما زولة لف ودوران ولا زولة ممكن تكتب شيء ظاهره شيء وهي في الخفاء قاصدة شيء تاني..دي ما تبقى تيسير عووضة..
ويا الحبيب محمد عادل
ممكن تتكلم مع تيسير باحترام أكتر؟؟؟هي بتستحق مش إحترام أكثر بل كل الاحترام وكل التقدير وكل المعاملة الطيبة وما معنى اختلاف وجهات النظر في أي ملف في البورد دة تبقى نهب لسياط الكلمات...أنا مش ما حأرضى بالكلام دة وبس بل حأتصدى ليهو...
التعصب عمره ما خدم قضية...التعصب لشخص أو جهة..أومجموعة أو كيان...
ولك شكري مقدماً يا حبيب..وخليك محمد الزمان داك كلك براءة وطيبة ومحبة للناس وشتارة(:(:(:
لنا

د. نجاة اخرى

Quote: طالما كتبت تيسير العبارة دي فأنا (مغمضة) بثق إنه دة السبب الخلاها تكتب البوست ...مش محاولات (فتنة) و(تفرقة) وبعض ما ورد في هذا البوست!!! تيسير دي ندى شقيقتي، وثقتي فيها لمعرفتي بنضافتها ودوغريتها وتربيتها وأهلها..فما زولة لف ودوران ولا زولة ممكن تكتب شيء ظاهره شيء وهي في الخفاء قاصدة شيء تاني..دي ما تبقى تيسير عووضة.. ويا الحبيب محمد عادل ممكن تتكلم مع تيسير باحترام أكتر؟؟؟هي بتستحق مش إحترام أكثر بل كل الاحترام وكل التقدير وكل المعاملة الطيبة وما معنى اختلاف وجهات النظر في أي ملف في البورد دة تبقى نهب لسياط الكلمات...أنا مش ما حأرضى بالكلام دة وبس بل حأتصدى ليهو... التعصب عمره ما خدم قضية...التعصب لشخص أو جهة..أومجموعة أو كيان... ولك شكري مقدماً يا حبيب..وخليك محمد الزمان داك كلك براءة وطيبة ومحبة للناس وشتارة(:(:(: لنا

محمد عادل لا ايده لا كراعه ياحبيبه

كلام تيسير كان انتي قريتيه كده
نحن كلنا قريناه (يالانصار تعالوا شوفوا الختمية كاتبين سيد تاج السر وما كاتبين سيد صادق) يعني مديدة حارة بدون دغمسة




اهلي الختمية الف مبروك عقد القران وربنا يجعله بيت مال وعيال

الكونت ..


أياً كانت الطريقة القريتوا بيها الكلام في خلل كبير حاصل
أنا شخصياً ما بسكت عليهو والغتغتة ما ريكومندد هنا!



مش لو سميتوها مديدة ..

تسلمي يا لنا يا عزيزة ودا من طيب أصلك ..


عادي جداً الناس تسيب (عضم الموضوع) وما يستحق النقاش فعلاً ويتجهوا لمناقشة أو مهاجمة مواضيع جانبية من ضمنها صاحب الرأي أو الموضوع
دا ما بغير في حقيقة الحصل ولا بيغير في حقيقة الشخص نفسو ويظل الحال كما هو عليه لا يتعرف الغلط ولا يتصلح لي قدام ..



محمد عادل يا لنا خليهو بي راحتو
أثق في أصالتو وطيب معدنو لكن إندفاعو وتفلتات لسانو الكتيرة بالإضافة لإني ما قاعدة أفهم كتير من الحاجات البيكتبها من أقوى الأسباب البتخليني ما أعشم إني أدخل معاهو في نقاش مثمر في يوم من الأيام
مع ذلك هو أخوي الصغير وليهو كامل الإحترام وأنو بعتبرو زول شجاع وود رجال (بس من غير ما يتكلم )

مرحب يا محجوب ..


خايفة أقول الأنصار طوالي في حالة ما دايرين يقولوا البغلة في الإبريق (تُقرأ دبلوماسيين) يجوا يجاهدوا فيني



محرر الصفحة كتب ما يمليه عليه العقل الباطن !

(السيدة) عزاز .. اعتقد ان (السيدة) تيسير حتشرب بنخرينا الشريفة .. و حتشوف شعاع الأنوار الطاهرة ..
و انصحها أن تسمع نصيحة (السيد) الختم :
ان كنت في ضيق و هم و كربة فنادني يا ميرغني اتيك بسرعة
عليه السلام سيدي خاتم الاولياء

السيد حمور ..

Quote: (السيدة) عزاز .. اعتقد ان (السيدة) تيسير حتشرب بنخرينا الشريفة .. و حتشوف شعاع الأنوار الطاهرة .. و انصحها أن تسمع نصيحة (السيد) الختم : ان كنت في ضيق و هم و كربة فنادني يا ميرغني اتيك بسرعة عليه السلام سيدي خاتم الاولياء

دا لو ما سختوني الأسياد لي قرد ..

مرحب يا ناصر ..



قلت ليهم ودتني ريحة الفتة أبوا يقتنعوا ..

(السيد) حمّور ...
خسمتك النبي ما تخليني آخد راحتي
في هذا المقام علشان الشمس البتسطع
ما تبقى لي رهاب رهاب

Quote: ويا الحبيب محمد عادل ممكن تتكلم مع تيسير باحترام أكتر؟؟؟هي بتستحق مش إحترام أكثر بل كل الاحترام وكل التقدير وكل المعاملة الطيبة وما معنى اختلاف وجهات النظر في أي ملف في البورد دة تبقى نهب لسياط الكلمات...أنا مش ما حأرضى بالكلام دة وبس بل حأتصدى ليهو... التعصب عمره ما خدم قضية...التعصب لشخص أو جهة..أومجموعة أو كيان... ولك شكري مقدماً يا حبيب..وخليك محمد الزمان داك كلك براءة وطيبة ومحبة للناس وشتارة(:(:(: لنا ]

محمد عادل يا اخوي امسك في كلام الهبيبة لنا ده كويس
بعدين يا اخي لمتين تقعد تطبظ و تخلي كللللللل الانصار شغالين قصادك كدة

_______________________
التوقيع
انصاري سابقا و متمرد حاليا

بصراحة يا (سيدة) عزاز انا بقترح نخلي (السيدة) تيسير تاخد هذا الخازوق بدون مساعدة من جانبنا. لأن هذا يوفر لنا مادة حوارية في (الحضرة الشريفة).
عليه ادين و اشجب تدخل (الأميرة) لنا. انت وكت ما (سيدة) التحشر ليك شنو ؟

السيد حمور السيد محمد زيادة ..




قالوا النسى قديمو تاه

حفظ الله سيدي الامام الصادق المهدي الذي احبه لا لشخصه الضعيف الفاني ولكن لانه يجسد تطلعاتي نحو القيم والمبادئ...........

كل الحب والاحترام للساده المراغنه والساده ال الامام محمد احمد المهدى علية السلام مهدى الله
ولو فى قعدة شعر نحنا قاعدين

Quote: لن يتقدم السودان شبراً طالما كان هنالك حتى الآن من يعتقد في نفسه "السيادة" دون البشر ..

ستهم تيسير بمعيار انصار السنة




تبقي سيادة البشر هي سيادة البشر و هو سيد ولد ادم كامل الصفات عليه افضل التسليم والصلوات وال بيته الاخيار

وتبقي سيادة مالك الملك و الملكوت الحي القيوم لا تنبغي لاحد عبيده و لا تسعها الصفات في اذهان من خلقهم ليعبدون

يا رب بهم و بآلهم عجل بالنصر و بالفرج

يا رغيم ..


إنت كان كدا ما بتعرف معيار أنصار السنة

مرحب يا عمر فضل المولى ..

Quote: دا لو ما سختوني الأسياد لي قرد ..

اعلق ؟

المهم ..
اعملي حسابك .. سيدي علي بينشبك.

Quote: يعني حفيدة شكال القارح هينه والا هينة.. Quote:

الأخت تيسير
إنتي حفيدة (عووضة القارح) ؟؟؟

....... تحياتي للأخوة الكرام
أولا .. إن كان هناك خطأ - في عدم إسباغ صفة السيادة علي الإمام الصادق المهدي - وهو سيد في قومه - فيتحمل الخطأ محرر الصفحة الإلكترونية لمندتيات الختمية ! ثانيا مخاطبة المشائخ والزعامات الدينية - بالقاب السيادة هي إرث صوفي عام ويصعب إنتزاعه قسرا
ثالثا يجب أن نقر أن ما يسمي بالطائفية بالسودان وعلي علاتها- قد حفظت النسيج الاجتماعي للبلد حيث ذوبت الجهوية والقبلية في كيانات
أعلي في السلم -الإجتماعي - من القبيلة والجهة وأدني من الوطن وتميزت علائق تلك الطوائف- فيمابينها ومع غيرها بالتسامح والتعائش والإسلام السوداني - البسيط -المتناغم مع تركيبة المجتمع رابعا سياسيا يحفظ التاريخ لهذه الطوائف الدينية إنهالم تثب للسلطة
علي ظهردبابة وإن مجموع فترة حكمهامابعد الإستقلال - لم يتعدي العشرة أعوام ! خامسا سلبيات الـطوائف الدينية تعالج عبر التوعية والتنوير والإصلاح السياسي والاجتماعي والإقتصادي والإنفتاح والرهان علي حركة المجتمع وتطوره سادسا علميا يجب أن نفعل مفهوم الإحلال والابدال والازاحة:-
إضعاف وهدم الطوائف بلا منهج أو رؤيةبديلة يقود للعدمية - والي عودة النعرات الجهوية والقبلية وتفكك المجتمع أو الي ردة وإنتكاسة إذا ماكان البديل قوي سلفية أو أصولية أو الي كارثة إذا كان البديل هو حركات الإسلام السياسي - شخصيا آقف مع الرؤية التي تراهن علي علي التطور الإجتماعي السلمي وأن يكون البديل هو منظمات مجتمع مدني حديثة وأحزاب قومية قوية وسط ويسار- وحركات تنويرية وثقافية وأن يطال التطور والتغيير - بنية الاحزاب التقليدية بحيث تواكب المتغيرات - وأن يكون البديل أيضا _- مواطن واعي بذاته وحقوقه ووطن قوي يستوعب التنوع والتعدد ويصهر القبليات والجهويات ويحسم العلاقة مابين الدين والدولة وإشاعة قيم الديموقراطية والحرية الفردية لتبدأ من أدني مؤسسات المجتمع وصولا لقمة الدولة ..
ختاما أؤمن علي أهميةنقد أحزابنا الوطنية وطوائفنا الدينية- بغرض أصلاحها بل وحتي تجاوزها ببديل وطني ولكني لا أقبل أن يكون نقدي وهجومي مدخلا لإحلال قوي الهوس الديني أو الإسلام السياسي محل ما يسمي بالطائفية فالطائفية مقارنة بالانقاذ-
- لم تفرط في سيادة وتراب البلد -ولم تمزق نسيجه الاجتماعي - ولم تربط الوطن بالارهاب والتطرف
- ولم تجعل من وطني مسرحا لتصفية حسابات دول وقوي أجنبية
- ولم تثب علي كرسي السلطة من علي ظهر دبابة
أقول هذا مع تأكيدي علي رؤيتي الشخصية- أن يتفرغ السيد الميرغني للطريقة الختمية وأن يبتعد عن رئاسة الحزب والنشاط السياسي المباشر وأن لا يجمع السيد الصادق بين الامامة والرئاسة وأن تسود قيم المؤسسية والديموقراطية والتحديث أطر أحزابنا التقليدية

Quote: يا رب بهم و بآلهم عجل بالنصر و بالفرج

النصر والفرج بيعجل بيهم رب العالمين براهو ما بيعجل بيهم شخص وآله..
سلام يا حمور ....إنتا لي حسة كويس؟؟؟؟(:(:(:(:(::::::::::::::::::::::(:

شكرا تيسير

Quote: سيد نفسك مين اسيادك

تسلم يا حيدر ..

Quote: النصر والفرج بيعجل بيهم رب العالمين براهو ما بيعجل بيهم شخص وآله..

الليلة وووووووب يا قول أميرة ..

سلامات الأخت تيسير والمرور الكريم... نهديكم مع محبتنا...

الإمام الصادق المهدي يحيي جموع الختمية المُرحبين بمقدمه الكريم...

شكراً أبو الحسين على الصورة
ربنا يديم الإحترام والمعروف بين الناس ..

المحترم كمال عباس ..

Quote: أولا .. إن كان هناك خطأ - في عدم إسباغ صفة السيادة علي الإمام الصادق المهدي - وهو سيد في قومه - فيتحمل الخطأ محرر الصفحة الإلكترونية لمندتيات الختمية !

ومن أتي بعده من الختمية وقرأ
لماذا ينتظرون حتى يأتي التنبيه من الخارج؟

Quote: ثانيا مخاطبة المشائخ والزعامات الدينية - بالقاب السيادة هي إرث صوفي عام ويصعب إنتزاعه قسرا

لنفس السبب تقريباً كان هذا البوست!
مع تحفظي على اللقب وإحتفاظي بحقي في إنتقاد الفكرة ككل، لم أطالب بإنتزاعه من أحد
بالعكس قلت حرفياً إن كان لابد منه فيجب منحه بالشكل المتعارف عليه لا نحن الأسياد وغيرنا حاف ..

Quote: ثالثا يجب أن نقر أن ما يسمي بالطائفية بالسودان وعلي علاتها- قد حفظت النسيج الاجتماعي للبلد حيث ذوبت الجهوية والقبلية في كيانات أعلي في السلم -الإجتماعي - من القبيلة والجهة وأدني من الوطن وتميزت علائق تلك الطوائف- فيمابينها ومع غيرها بالتسامح والتعائش والإسلام السوداني - البسيط -المتناغم مع تركيبة المجتمع

هنا أختلف معك!
من أكثر العوامل التي أدت لترسيخ الجهوية هي الأحزاب الطائفية
حتى أن أحزاب معينة أصبحت تعرف بقبائل شيوخ تلك الطوائف
فعلى سبيل المثال "معظم" الختمية من قبائل الشايقية وما يتاخمها وأهل الشرق
و"معظم" الأنصار من قبيلة الدناقلة وأهل الغرب ..

Quote: رابعا سياسيا يحفظ التاريخ لهذه الطوائف الدينية إنهالم تثب للسلطة علي ظهردبابة وإن مجموع فترة حكمهامابعد الإستقلال - لم يتعدي العشرة أعوام !

بل وثبت للناس بما هو أشد قتكاً من ظهور الدبابات "روشتة السياسة بنكهة الدين"
وحتى الآن، في سبيل أن يجدوا ريح السلطة يبذلون الغالي والنفيس

Quote: خامسا سلبيات الـطوائف الدينية تعالج عبر التوعية والتنوير والإصلاح السياسي والاجتماعي والإقتصادي والإنفتاح والرهان علي حركة المجتمع وتطوره

أتفق معك تماماً
وبالمناسبة هم ليسوا شراً مطلقاً
بل بالعكس دورهم مهم جداً في تغذية الجانب الروحي في الإنسان وحفظ التوازن النفسي والمجتمعي لمن يرون أن الحياة ليست بجوانبها المادية فقط ..
كل هذا يتحقق ما بعدوا عن الخرافة وتقديس البشر وإمتطاء الدين للوصول للسلطة ..

Quote: سادسا علميا يجب أن نفعل مفهوم الإحلال والابدال والازاحة:- إضعاف وهدم الطوائف بلا منهج أو رؤيةبديلة يقود للعدمية - والي عودة النعرات الجهوية والقبلية وتفكك المجتمع أو الي ردة وإنتكاسة إذا ماكان البديل قوي سلفية أو أصولية أو الي كارثة إذا كان البديل هو حركات الإسلام السياسي - شخصيا آقف مع الرؤية التي تراهن علي علي التطور الإجتماعي السلمي وأن يكون البديل هو منظمات مجتمع مدني حديثة وأحزاب قومية قوية وسط ويسار- وحركات تنويرية وثقافية وأن يطال التطور والتغيير - بنية الاحزاب التقليدية بحيث تواكب المتغيرات - وأن يكون البديل أيضا _- مواطن واعي بذاته وحقوقه ووطن قوي يستوعب التنوع والتعدد ويصهر القبليات والجهويات ويحسم العلاقة مابين الدين والدولة وإشاعة قيم الديموقراطية والحرية الفردية لتبدأ من أدني مؤسسات المجتمع وصولا لقمة الدولة ..

أتفق معك في مسألة الإحلال والإبدال التدريجي
ولكن أضيف أنهم كلهم (بشكلهم الحالي) في نظري إسلام سياسي!
الإسلام السياسي ما بالضرورة يكون وهابيين وسلفيين بس
كل من يزج الإسلام في السياسة ويحاول إتخاذه ورقة رابحة للوصول للحكم ينطبق عليه هذا التوصيف ..

Quote: أقول هذا مع تأكيدي علي رؤيتي الشخصية- أن يتفرغ السيد الميرغني للطريقة الختمية وأن يبتعد عن رئاسة الحزب والنشاط السياسي المباشر وأن لا يجمع السيد الصادق بين الامامة والرئاسة وأن تسود قيم المؤسسية والديموقراطية والتحديث أطر أحزابنا التقليدية

كلام من ذهب ..



تقديري ..

الأستاذ خالد عويس ..

Quote: الأخت تيسير إنتي حفيدة (عووضة القارح) ؟؟؟

يقولون !!!

Quote: فالطائفية مقارنة بالانقاذ- - لم تفرط في سيادة وتراب البلد -ولم تمزق نسيجه الاجتماعي - ولم تربط الوطن بالارهاب والتطرف - ولم تجعل من وطني مسرحا لتصفية حسابات دول وقوي أجنبية - ولم تثب علي كرسي السلطة من علي ظهر دبابة

سلامات اخي كمال عباس ... مع التأكيد على مجمل كلامك واحترامنا لقناعات الآخرين
ولكن لا يكفي ما قلت اعلاه لتبرئة رموز الطائفية (السياسية) من دورها في اطالة عمر الانقاذ ...

وبصراحة مطلقة، أقدر تماماً حرية الاختيار، ولكن يصعب علي فهم قبول شخص في هذا العصر لفكرة (السيد) و (التابع)
تحت أي مسمى أو صورة أو مبرر ... لا أرى أي (بشر) كائن من كان جديرا بأن يكون "سيدي" مهما كانت حظوته من العلم
أو الدين أو الملك أو السلطة .. الكبير هو الله سبحانه وسيدي هو نبيه محمد صلى الله عليه و سلم .. فقط!

لا استسيغ أي شكل من أشكال السلطة طائفية - وأجدها امراً محبطاً للغاية و معطلاً للتعاطي الموضوعي مع قمم الهرم الاجتماعي و السياسي.

تيسير بت عم عثمان ، سلام عليك و علي والديك
الطائفيه جزء من مشاكل السودان المتراكمة و من حقك و حق أي شخص نقدها و ما أظن الأخوان في حزب الأمه و الاتحادي عندهم مشكله في نقدهم : المشكله لمن يكون النقد في شكل تهكم و سخريه و إقلال من شان ناس لهم إحترام يصل لمرحلة التقديس - مستمد من فهمهم للدين - و من إرث صوفي ( كما تفضل أخونا كمال ) متجذر في خلايا المجتمع : المسالة دي بتؤدي لاستحالة النقاش و بتخلي البوست عباره عن مهاترات أعلم يقينا انها لم تكن بالك و لا مقصدك !!









--------
صوره للاخ حمور زياده !!

Quote: تيسير بت عم عثمان ، سلام عليك و علي والديك الطائفيه جزء من مشاكل السودان المتراكمة و من حقك و حق أي شخص نقدها و ما أظن الأخوان في حزب الأمه و الاتحادي عندهم مشكله في نقدهم : المشكله لمن يكون النقد في شكل تهكم و سخريه و إقلال من شان ناس لهم إحترام يصل لمرحلة التقديس - مستمد من فهمهم للدين - و من إرث صوفي ( كما تفضل أخونا كمال ) متجذر في خلايا المجتمع : المسالة دي بتؤدي لاستحالة النقاش و بتخلي البوست عباره عن مهاترات أعلم يقينا انها لم تكن بالك و لا مقصدك !!

الحبيب أمين
أنا ما بقبل يطلق على كيان الانصار كيان طائفي لأنه ما طائفي من حيث تعريف الطائفية ..وما بقبل أن يقال أن الإمام الصادق المهدي له احترام يبلغ درجة التقديس..
وما بقبل يتم التعامل مع الإمام الصادق المهدي بقداسة لأنه دة ما من مقاصد الأنصارية ولا مباديء حزب الأمة وهو نفسه أعلنها زمان :( لا قداسة مع السياسة)..
وأنا بفتكر إنه لا قداسة مع أي شيء مش مع السياسة بس لأنه من حيث المبدأ لا قداسة لبشر..كثيرون ارتضوا قيادة الصادق المهدي للحزب منذ بدايةانخراطه في العمل العام لقناعتهم أنه مختلف ويدعو لفكر منفتح ويود أن تكون العقليات المنخرطة في حزب الأمة عقليات نقدية..ويود أن تكون عضوية الحزب أناس يفكرون ويقررون لا يرمون بأعبائهم ومسئولياتهم على القيادة يفوضونها في كل شيء ويقبلون بكل ما يأتي منها بدون تبصر..
ولو كانت القصة قصة قداسة لرحم مهدوي وقرابة بالمهدي الكبير لكان الناس تبعوا من هو أقرب رحماً للإمام المهدي ...
والحق يقال الإمام الصادق ما بتفرق معاهو ينادوهو يا سيد أو يا بوي أو يا الحبيب الإمام أو يا عمي الصادق أو يا الصادق ساكت ممن هم في مثل عمره ...نهائي...بالنسبة له لا يشكل الأمر مشكلة ولا هاجس..وما بيقبل يقبّلوا يده ولا يتبركوا به ومثل هذه الخزعبلات ...دي حاجات شفتها بي عيني ما حكوها لي..ولمن يهتف الناس لن نصادق غير الصادق يقول لهم:" لا تقولوا ذلك بل قولوا لن نصادق غير صادق"...
تثبيت حقه في هذا الجانب حاجة يا الحبيب أمين وانتقاد سياساته وقيادته للحزب والرؤى حول إعادة انتخابه وغيرها من الأمور المشروعة تجاه قيادة فصيل سياسي حاجة تانية...

تيسير و ضيوفها الكرام سلام

شكراً يا بروف أمين على المداخلة المميزة
أكثر ما يثير الإعجاب في هذا البوست أن الطائفيين ليسوا كما الصورة النمطية المرسومة عنهم
جوهولابسين المرقع و بالحراب سووها غابة
بل ترفعوا عن المهاترات و العك
طبعاً لنا ملاحظات و اعتراضات على مفهوم السيد و لكن هنالك عجز في تحليلها كمفهوم و ليست كلفظ و لهذا تكون النتيجة كما نرى هنا
هل كلمة سيد مرفوضة عندي من حيث أنها كلمة؟
قطعاً لا، فلا مانع لدي بأن أقول السيد حمور زيادة أو السيدة تيسير عووضة أو السيدة عزاز شامي
و لكن الإعتراض على كلمة سيد من حيث الدلالة اللفظية
في الحقول الدينية و السياسية و الإجتماعية
عندما أقول السيد الصادق المهدي فهي قطعاً لا توازي قولي السيد أمين محمد سليمان
إذا كان إتجاه النقد هنا فهو بالطبع سيكون مفيداً و قابلاً للنقاش مع الطائفية السيدة لنا مهدي :) :) :)

Quote: إذا كان إتجاه النقد هنا فهو بالطبع سيكون مفيداً و قابلاً للنقاش مع الطائفية السيدة لنا مهدي :) :) :)

السيدة سمو الأميرة لو سمحت وجيب إستيكة فراولة للطائفية دي(:(::(:

ياخي الختمية احبابنا مؤدبين بشكل
الصادق المهدي سمعتوا كم مرة بيقول لا أحب المناداة بالسيد - احب الصادق حافة - لتصبح صفة
والختمية ناس خير وبركة وأدب جم - لا يحبون مناداة الفرد بما يكره
ربنا يحفظهم لينا الحزبين الكبيرين الوطنيين من اجل الخلاص.

تحياتي أختي العزيزة و الحصيفة عزاز شامي
كتبت

Quote: سلامات اخي كمال عباس ... مع التأكيد على مجمل كلامك واحترامنا لقناعات الآخرين ولكن لا يكفي ما قلت اعلاه لتبرئة رموز الطائفية (السياسية) من دورها في اطالة عمر الانقاذ ... وبصراحة مطلقة، أقدر تماماً حرية الاختيار، ولكن يصعب علي فهم قبول شخص في هذا العصر لفكرة (السيد) و (التابع) تحت أي مسمى أو صورة أو مبرر ... لا أرى أي (بشر) كائن من كان جديرا بأن يكون "سيدي" مهما كانت حظوته من العلم أو الدين أو الملك أو السلطة .. الكبير هو الله سبحانه وسيدي هو نبيه محمد صلى الله عليه و سلم .. فقط! لا استسيغ أي شكل من أشكال السلطة طائفية - وأجدها امراً محبطاً للغاية و معطلاً للتعاطي الموضوعي مع قمم الهرم الاجتماعي و السياسي.

الموضوع معقد ومركب ياعزيزتي فهل رفض التبجيل وإضفاء سمات السيادة سيكون قاصر علي رموز " الطائفية الدينية -السياسية" أم سينسحب ليشمل رموز الطرق الصوفية البعيدين عن السياسة علما بأن التركبية الإجتماعية والثقافية يطغي عليها الخطاب الصوفي ? بالنسبة للطوائف ذات البعد السياسي فأنا أعلنها وبلالبس: -
مع فصل الامامة والرئاسة في حزب الامةو وأن يكتفي الامام الصادق في هذه المرحلة بإمامة الانصار وأن يبتعد الميرغني عن رئاسة حزبه ويتفرغ للطريقة الختمية وأن تخضع هذه الاحزاب لعملية إصلاح وتطوير ومؤسسية وتداول للقيادة وتجديد للأفكار والبرامج والاستجابة للمتغيرات وأري أن سلبيات الـطوائف الدينية تعالج عبر التوعية والتنوير والإصلاح السياسي والاجتماعي والإقتصادي والإنفتاح والرهان علي حركة المجتمع وتطوره ............. أنا ياعزيزتي لا أسعي لتكريس الامر الواقع أو التصالح مع السلبيات بل أسعي لتغيره ولكني وفي ذات الوقت أخشي من الاسواء لذا أشدد علي ترتيب الأولويات وعلي أهمية عامل الازاحة مقرونا بالاحلال والإبدال لأني وكما قلت أري:-

Quote: أن إضعاف وهدم الطوائف بلا منهج أو رؤيةبديلة يقود للعدمية - والي تفاقمالنعرات الجهوية والقبلية وتفكك المجتمع أو الي ردة وإنتكاسة إذا ماكان البديل قوي سلفية أو أصولية أو الي كارثة إذا كان البديل هو حركات الإسلام السياسي!! - شخصيا آقف مع الرؤية التي تراهن علي علي التطور الإجتماعي السلمي وأن يكون البديل هو منظمات مجتمع مدني حديثة وأحزاب قومية قوية وسط ويسار- وحركات تنويرية وثقافية - وأن يكون البديل أيضا _- مواطن واعي بذاته وحقوقه ووطن قوي يستوعب التنوع والتعدد ويصهر القبليات والجهويات ويحسم العلاقة مابين الدين والدولة وإشاعة قيم الديموقراطية والحرية الفردية لتبدأ من أدني مؤسسات المجتمع وصولا لقمة الدولة ..

لا أريد أن نصحو لنجد أن السلفية والفكر الوهابي ( الذي يحارب التصوف ومظاهر السيادة والتبجيل ) قد قام بشغل الفراغ وبني نموذج معادي
للإبداع والتطور وقيم العصر - يرجعنا للقرون الوسطي ! أو نصحو لنجد جماعات الإسلام السياسي قد ور ثت جماهير الختمية والانصار والصوفية ونزعت عنهم قيم التسامح والتعائش والإسلام الشعبي وإعاد ت شحنهم بخطاب إيدلوجي وإقصائي وشمولي وبنسخة إسلاموية أكثر تشددا وإستغلالا للدين وأكثر سعيا لتوظيف المعتقدات لخدمةأجندةدينيويةوسياسية ! ....لاحظي أن الدين يظل طرفا في كل المعادلات السابقة ! والسؤال كيف نتمكن من المحافظة علي دور الدين في حياة الفرد والمجتمع وصرفه عن أن يكون أداة كبح وفرملة لحركة المجتمع أوعنصر إستغلال وقهر وخنوع وإستسلام ? كيف نناي بالدين عن أن يكون سلما للوصول للسلطة وسلاحا لضرب الخصوم وستارا لتغطية الفساد ووسيلة لخداع البسطاء ?
........المدخل يا أختي يبدأ من حسم موضوع الدين والدولة والرهان علي الديموقراطيةودولة المواطنة والإعلاء من إنسانية الانسان لابد من التركيز علي التنوير والتوعية وبناء منظمات مجتمع مدني ونهضة ثقافية وتطور فكري يشحن الانسان بالطاقة والامل والثقة بذاته ليستعيد إرادته السليبة ويقوم بصنع مستقبله وتقرير مصيره ومساره ! وحتي تحين تلك اللحظة ليس من الحكمة التعامل مع الواقع بعدمية أو القطيعة مع المجتمع أو إستفزاز مكوناته !! أو إستعداء الطوائف الدينية والطرق الصوفية أوترك جماهير الانصار والختمية لقمة سائغة لقوي أكثر خطورة من قيادات تلك الجماعات ! لن نحرث التربة لتغرس فيها بذور الهوس والتطرف أو تزرع فيها نبتة شجرة زقوم الاسلام السياسي ! !! لا بل نشتل نحن فيها ما ينفع الناس ونؤيد تطور الايجابي في شجيرات أحزابنا التقليدية وتجاوز العقيم وغير المواكب فيها ......... لست بحاجة لأذكر مثلك أن الواقع يحتاج لقراءة متأنية ولتعامل نقدي هادئ وهادف-يرفض السلبي ويثبت علي الايجابي ويختزل ويطور ويقدم بدائله- يحفر ويهدم ليبني ! ................ كتبتي

Quote: مع التأكيد على مجمل كلامك واحترامنا لقناعات الآخرين ولكن لا يكفي ما قلت اعلاه لتبرئة رموز الطائفية (السياسية) من دورها في اطالة عمر الانقاذ ...

لا أختلف معك بطبيعة الحال في هذه النقطة وهي من الجوانب التي ننتقد فيها تلك القيادات.........
وختاما تقديري وإحترامي ياعزاز.........
حاشية:- ا لصوفي بصورة عامة ( ومع الاختلاف مع بعض التراكمات السالبة و بعض الاساليب المرفوضة في علاقة الشيخ أوالسيد بمريديه وأتباعه) ا لصوفي - - لايجبرني أن أنادي شيخه بالسيد فلان ولايفرض علي طريقته وأوراده ولايفرض رؤيته الدينية علي الاخريين أو يطبقها عبر الدولة! بينما تقوم جماعات الاسلامية بفرض رؤيتها وإجتهادها الديني علي وتهيمن علي مفاصل الدولة وتقصئ الاخر!..... أنظروا لتجربة الانقاذ و نموذج الجبهة وطالبان وأنظروا لتطبيقات النسخة الوهابية في السعودية !
حاشية ثانية:- يري البعض أن الزعيم الديني -إن أراد الإحتفاظ بمكانته الروحية فعليه أن يقتصر علي رعاية طائفته أو طريقته الصوفية ذلك لأنه سيكون عرضة للهجوم والحدة والتجريح لأن هناك من سيتعامل معه من منطلق أنه سياسي وبس ! نسب للزعيم السوداني يحي الفضلي قوله " ذبحت القداسة علي أبواب السياسة"!!
ومن ناحية أخري فإن الدلالات والإشارات ذات البعد الديني - في الحقل السياسي تفرض شئيا من السـطوة والتهيب وتشل روح النقد والاختلاف مع الزعيم وتضفي عليه شئيا من الحصانة وهذا يضر بالعمل المؤسسي!!

Quote: صوره للاخ حمور زياده !!

( السيد ) حمور زيادة







ـــــــــــــ
مايو يا خال ؟

انا قبيل قلت البوست دا ماشى فى اتجاه معين

مستغربة مداخلة خالد عويس (الاولى) من بين كل مداخلات البوست

Quote: الحبيب أمين أنا ما بقبل يطلق على كيان الانصار كيان طائفي لأنه ما طائفي من حيث تعريف الطائفية ..وما بقبل أن يقال أن الإمام الصادق المهدي له احترام يبلغ درجة التقديس.. وما بقبل يتم التعامل مع الإمام الصادق المهدي بقداسة لأنه دة ما من مقاصد الأنصارية ولا مباديء حزب الأمة وهو نفسه أعلنها زمان :( لا قداسة مع السياسة)..

السيدة لنا
تحيات طيبات
أرجو التوضيح عما قلته بأن كيان الأنصار ما طائفى من حيث تعريف الطائفية. وأن القداسة (لإمام الأنصار) ما من مقاصد الأنصارية.
ومتى أعلن السيد الإمام الصادق المهدى (لا قداسة مع السياسة)؟

وما رأيك فى الختمية هل هى طائفة من حيث تعريف كلمة طائفة أم غير ذلك؟

مع تقديرى

Quote: Quote: Quote: صوره للاخ حمور زياده !! ( السيد ) حمور زيادة ـــــــــــــ مايو يا خال ؟

كمان بقيت ألجن؟؟؟؟(::::::::::(:(:(:(:

Quote: وسيظل الأنصار والختمية في علاقات مودة وتسامح بإذن الله.

لكن أظن عدل بيها مداخلة كانت موجودة قبلها وكان في عجلة من أمره

Quote: : المشكله لمن يكون النقد في شكل تهكم و سخريه و إقلال من شان ناس لهم إحترام يصل لمرحلة التقديس - مستمد من فهمهم للدين - و من إرث صوفي ( كما تفضل أخونا كمال ) متجذر في خلايا المجتمع : المسالة دي بتؤدي لاستحالة النقاش و بتخلي البوست عباره عن مهاترات أعلم يقينا انها لم تكن بالك و لا مقصدك !!

أمينو أزيك
ياخ التهكم والسخرية أبسط مايمكن أن تقابل وتهضم به الواقع المرير البيقول أننا في منتصف القرن الواحد والعشرين ولسة فينا من يعتقد أن هناك بشر مقدسين ويمكن أن ينوروا بالليل .
صوفية وين؟ وصوفية منو ؟ ..الساكين الزايلة ديل وطالبين الحكم والجاه؟؟

سيداتي آنساتي سادتي

هوي يا علمانيات وعلمانيون
قدموا السبت تلقو الأحد ؛)
بكره واحدة فيكن ولا واحد فيكم يمِسو جان ولا ما يلد؛) تجو جاريين للأسياد..
___
السيِّد أب تِفة ؛)

لكن أظن عدل بيها مداخلة كانت موجودة قبلها وكان في عجلة من أمره

الأخت رواية
لا، ليس الأمر كما ذهبت إليه. ببساطة كنت أكتب على صفحتين، هذه الصفحة وصفحة أخرى هي صفحة مقالي الأخير عن حادثة بورتسودان، وبدلاً من كتابة مداخلتي لذلك البوست في مكانها الطبيعي قمت - عن طريق الخطأ - بكتابتها هنا، لذا عدلتها.

الأخ كمال عباس
أوافقك الرأي تماماً، فهو رأي ينطلق من فهمٍ عميق جدا لطبيعة المجتمع السوداني وكيفية التغيير والإصلاح دون حرق المراحل التي أدخلتنا - عبر مايو ويونيو - جحر ضبٍ خرب تريد بعض النخب السودانية إعادة إنتاج الجحر ذاته مرةً ثالثة !!

السيدة تيسير
والسيدات والسادة زوار البوست
تحياتى

لقب السيد مستخدم لدى الجماعات والطوائف الدينية فى العالم الإسلامى، سنة وشيعة

حسب ملاحظتى ـ أرجو التأكيد أو التصحيح ـ فى السودان يستخدم لقب السيد لدى الختمية والأنصار فقط
يقال السيد على الميرغنى والسيد عبد الرحمن المهدى ..(لم ألحظ أن الإمام محمد أحمد المهدى يلقب بالسيد)

وباقى الطرق الصوفية وجماعة السنة تستخدم لقب الشيخ .. الشيخ البرعى، الشيخ الهدية، الشيخ دفع الله الصايم ..

وكلا اللقبين السيد والشيخ تستخدم إحتراماًوتبجيلاً لشخصيات لها وضع دينى ومكانة وريادة وسط الجماعة الدينية

إن صحة ملاحظتى لماذا إقتصر لقب السيد على الأنصار والختمية؟

Quote: خلو الصادق المهدي، أنا غايتو لو في صورة زي دي لن أقبل بأقل من أن يأتي اسمي مسبوقاً بالسيدة تيسير عووضة أو يذكر اسمينا معاً دون ألقاب ..

ديشاااااااااك
المولد فاتني رسمي!!!

يا سيدي م ع الملك عليك الله تاني ما تدعو علي ياخ!

صدقي او لا تصدقي يا تيسير ( سليقة ساي ) انو دعوة الملك دي هي الصرفتني عن البوست و صرفتو عني!
و لّ كان يكون ل فيو مقيل و قول آخر.



----------

الزعيم
وضعي الاميي ما بسمح لي بقبول لقب اقل من ( القائد ) .. بالميت ( العقيد/ عقيد الخيل )

قلت ليك يا تيتي


صاحبي دكتور عمار حسن

كان بدرس في احد الجامعات الخاصة


بعدين حب يعمل تلطيف للمحاضرة

سال الطلاب من هما السيدين

زول جاوب مافي


تاني كرر السؤال والجماعة كان علي روؤسهما الطير


رمي الطباشيرة وقال ليهم


علي الطلاق تاني ما ادرسكم

Quote: ديشاااااااااك المولد فاتني رسمي!!!

انا ما فاتنى المولد ... لاكين ابيت ادخل عشان ما يقولوا بتاع "البليلة حرقتنى" ...

لاكين بى صراحة ... لامن قريت العنوان ...

كنت قايل الكنتة بتاعة البوست فى "يصافح" ... لأنو الإمام الصادق المهدى ... أبعد نفسو عن "السيادة" طوعاً واختياراً ...

فارتفع بذلك مرتبةً عندى ....








... المهم ....

Quote: كنت قايل الكنتة بتاعة البوست فى "يصافح" ... لأنو الإمام الصادق المهدى ... أبعد نفسو عن "السيادة" طوعاً واختياراً ... فارتفع بذلك مرتبةً عندى ....

وأبعد نفسو عن الإمامة برضو؟




أقول ليك كلام غريب يا تبارك
والكلام دا لا زلت أردده
ويمكن قلتو لأصدقائي من الأنصار

لو سألني زول قال لي عددي خمسة مفكرين سودانيين الصادق المهدي حيكون من بينهم
ليه؟
ما لازم تتفق مع المفكر في أفكارو وآرائو دي عشان يبقى عندك مفكر
الصادق المهدي من ناحية فكرية بيطرح آراء مؤثرة
وكاتب مجيد
أتفق معاهو ولا لا دا موضوع تاني ..
ولكنه يستحق لقب مفكر

الصادق المهدي من ناحية إجتماعية
مواصل ومحترم وعفيف اللسان جداً
ويعجبني تقليد إنو بيجرتق العرسان

الصادق المهدي من ناحية دينية (وبعيداً عن التقديس وحكاية حفيد المهدي المنتظر وإنو بينور بالليل والخرافات دي)
لا أرى ما يمنع "أخلاقياً" إضطلاعه بإمامة المسلمين
يتوفر فيهو كثير من مواصفات الإمام

لكن


اللحظة اليحاول فيها إستغلال فكره والكاريزما بتاعتوالإجتماعية والدينية لتحقيق غرض سياسي
تسقط عنه الهيبة التي أحيطها به ويصبح عندي محض سياسي إنتهازي في محل إنتقاد الليل مع النهار ..



شفت المعادلة دي غريبة كيف؟

العزيزات والأعزاء
الليلة أول الأسبوع والشغل كتير



يمكن ما أقدر أدخل تاني إلا آخر اليوم




برجع بعدين
مداخلاتكم بتحفز الزول للنقاش ..

يا ناس هوي
انا روحي دايرة تمرق في ستي نفيسة
دحين يا بنات الحلال ما بلقى لي صورة لستي؟

يا راوية عتوتي جاهز و شايلو نضر
زمان وعدتيني تلكميني ببركات ستي نفيسة قدس الله سرها تلحقنا و تفزعنا

سلام تيسير و ضيوفها الكرام

شكرا أخي العزيز خالد عويس

Quote: الأخ كمال عباس أوافقك الرأي تماماً، فهو رأي ينطلق من فهمٍ عميق جدا لطبيعة المجتمع السوداني وكيفية التغيير والإصلاح دون حرق المراحل التي أدخلتنا - عبر مايو ويونيو - جحر ضبٍ خرب تريد بعض النخب السودانية إعادة إنتاج الجحر ذاته مرةً ثالثة !!

نعم ياخالد لابد من فهم تركيبة المجتمع وقيمه وأرثه الثقافي ومكوناته الوجدانية ولابد من تحليل الظواهر الاجتماعية وربطها بجذورها وفهمها في هذا السياق وفي إطار الصيرورة التاريخية وصولا لإعمال منهج والية للتغيير الفاعل لذا لابد من التناول الفكري العميق وعدم الإكتفاء بلمس المظهر أو تجاهل الاولويات والقفز علي المراحل ...
كنت أتمني أن أجد وقتا للتعمق أكثر ولكني وللأسف الشديد مشغول جدا هذه الأيام الربيعية وسأكون أكثر مشغولية وحركة في الفترة القادمة - - لاعليك - هناك محاور كنت بصدد الكتابة فيها وهي تعريف مفهوم الطائفية كمصطلح أكاديمي وعمل مقاربة ومقارنة بين تجارب لبنان والهند وباكستان ومدي دقة تلبيس هذا المصطلح علي وضعية الاحزاب التقليدية وسحب المصطلح علي - الجبهة الإسلامية وتوضيح مدي تطابق هذا المفهوم مع تركيبتها......
وكنت أتمني أن أتوسع أكثر في حديثي عن تذويب ما يسمي بالطائفية للقبليات والجهويات بالبلد فالطائفة تقع في مرحلة أعلي من الوسط
في السلم الاجتماعي ( يبدأ السلم بمؤسسة الاسرة وينتهي بقمة مؤسسات الدولة ) فطائفة الانصار نجحت في التقريب بين الفور والبقارة وبين هولاء وحسانية النيل الابيض وجعلية العكد وكذلك فعلت الختمية في الجانب الاخر وقد أتسمت علائق هذه الطوائف فيما بينها بالتسامح والتعائش والترابط نعم الطوائف كمؤسسات إجتماعية أسهمت نسبيا في بناء حس وطني وكذلك فعل خليل فرح ووردي ونادي الهلال !
وكنت أتمني أن يسعفني الوقت لأتناول إيجابية رهان وسعي الاحزاب التقليدية للوصول للسلطة عبراليات ومواعين الديموقراطية لا علي ظهور
دبابات العسكر ! قد يقول قائل ولكنها أمتطت الدين ووظفته لكسب التأييد والدعم ....نعم ولكنها لم تفرض رؤيتها الدينية والسياسية عبر إنقلاب عسكري بمثل مافعلت الانقاذ ! وكنت أرجو أن أتطرق بالرصد التاريخي الناقد لأخطأ الحزبيين إبتدأ من - كارثة إتفاق السيدين عام 1956 لأسقاط حكومة الاستقلال - حكومة الازهري - وحتي الان !!

يا بروف مرحب بيك ..

Quote: الطائفيه جزء من مشاكل السودان المتراكمة و من حقك و حق أي شخص نقدها و ما أظن الأخوان في حزب الأمه و الاتحادي عندهم مشكله في نقدهم : المشكله لمن يكون النقد في شكل تهكم و سخريه و إقلال من شان ناس لهم إحترام يصل لمرحلة التقديس - مستمد من فهمهم للدين - و من إرث صوفي ( كما تفضل أخونا كمال ) متجذر في خلايا المجتمع : المسالة دي بتؤدي لاستحالة النقاش و بتخلي البوست عباره عن مهاترات أعلم يقينا انها لم تكن بالك و لا مقصدك !!

لو أنهم فهموا الدين بشكل صحيح لما قدسوا بشراً مثلهم!

ويا أمين لم نقلل من شأن أحد - فقط - أنزلناهم من حيث هم لمنازل البشر العاديين حيث يجب أن يكونوا
وحيث يقول العقل والفطرة السليمة، يصحبهم في المنزلتين إحترام غير ممسوس .. فعذراً إن بدا لك كأنه تقليل شأن!


أما سخريتنا المريرة فبمقتضى الأحوال يا أخي .. أو قل: إحدى طرق التعبير عن "المغسة"

Quote: وبصراحة مطلقة، أقدر تماماً حرية الاختيار، ولكن يصعب علي فهم قبول شخص في هذا العصر لفكرة (السيد) و (التابع) تحت أي مسمى أو صورة أو مبرر ... لا أرى أي (بشر) كائن من كان جديرا بأن يكون "سيدي" مهما كانت حظوته من العلم أو الدين أو الملك أو السلطة .. الكبير هو الله سبحانه وسيدي هو نبيه محمد صلى الله عليه و سلم .. فقط! لا استسيغ أي شكل من أشكال السلطة طائفية - وأجدها امراً محبطاً للغاية و معطلاً للتعاطي الموضوعي مع قمم الهرم الاجتماعي و السياسي.

يسلم وعيك يا ست الراي والفهم ..

سلامات اخي كمال و اشكرك على الرد الضافي و الافكار المرتبة كعادتك دائما ...

Quote: لا أريد أن نصحو لنجد أن السلفية والفكر الوهابي ( الذي يحارب التصوف ومظاهر السيادة والتبجيل ) قد قام بشغل الفراغ وبني نموذج معادي

ده الخوف الحقيقي أخي كمال، بس العشم أنو "العقل" يكون هو الحكم بعيدا عن الغيبيات .. فصل الدين عن الدولة مالو؟ اعلم تماما انه خيار امامه درب عسير لذا اتفق مع كلامك ادناه تماماً:

Quote: ........المدخل يا أختي يبدأ من حسم موضوع الدين والدولة والرهان علي الديموقراطيةودولة المواطنة والإعلاء من إنسانية الانسان لابد من التركيز علي التنوير والتوعية وبناء منظمات مجتمع مدني ونهضة ثقافية وتطور فكري يشحن الانسان بالطاقة والامل والثقة بذاته ليستعيد إرادته السليبة ويقوم بصنع مستقبله وتقرير مصيره ومساره ! وحتي تحين تلك اللحظة ليس من الحكمة التعامل مع الواقع بعدمية أو القطيعة مع المجتمع أو إستفزاز مكوناته !! أو إستعداء الطوائف الدينية والطرق الصوفية أوترك جماهير الانصار والختمية لقمة سائغة لقوي أكثر خطورة من قيادات تلك الجماعات ! لن نحرث التربة لتغرس فيها بذور الهوس والتطرف أو تزرع فيها نبتة شجرة زقوم الاسلام السياسي ! !! لا بل نشتل نحن فيها ما ينفع الناس ونؤيد تطور الايجابي في شجيرات أحزابنا التقليدية وتجاوز العقيم وغير المواكب فيها ......... لست بحاجة لأذكر مثلك أن الواقع يحتاج لقراءة متأنية ولتعامل نقدي هادئ وهادف-يرفض السلبي ويثبت علي الايجابي ويختزل ويطور ويقدم بدائله- يحفر ويهدم ليبني !

بصراحة مطلقة (كلاكيت تاني مرة) لا اجدني قادرة على الخوض في أمر الطائفية بشكل لا يجرح مؤيدها،
لأني يا كمال لم انشأ في جوها واتعامل معها abstract من دون معايشة أو مخالطة عميقة لمجتمعها
زد على ذلك عدم قبولي لها من الاساس لرفضي لمبدأ الوساطة الدينية المتعارف عليه في الصوفية
تجذبني في الصوفية سمات أخرى، ولكني أنأى منها عنها عندما تتخذ منحى سياسي ...
أؤيد حق الفرد في الاعتقاد، ولكني ضد ان تحكم عقيدة فئة من المجتمع -- مهما كانت قاعدتها عريضة --
الدولة و خصوصا لو كانت هذه الدولة متنوعة ثقافيا و اثنيا ...


ولك وافر الاحترام

Quote: كنت قايل الكنتة بتاعة البوست فى "يصافح" ... لأنو الإمام الصادق المهدى ... أبعد نفسو عن "السيادة" طوعاً واختياراً ... فارتفع بذلك مرتبةً عندى ....

لوووووووول
ابعد نفسو كيف يعني؟

تعرف الصادق المهدي دا زول كويس .. بس مشكلتو انو المهدي
ما لم ينفصل كيان الانصار عن حزب الامة .. مافي فايدة كلو كلو!!؟


استغرب في حكاية الكلام عن الكريزما دي .. كريزما كيف يعني؟
لشخصو و ل عشان ( المهدي ) و العاطفة التاريخية؟
و لّ عشان تاريخ الدولة المهدية؟
و لّ عشان شنو بالضبط؟
طائفية؟

دا البجنن بوبي ذاتو!!




-------

انت ليه الصادق دا في الانتخابات بجي ينزل عندنا في دوائر النيل الابيض!؟
الخرطوم محل بينوم دي ملا؟ .. ما زول مفكر ما يقنع ناس الخرايتم المسغفين ديل!؟
مش حاجة غريبة؟ مفكر يعتمد على عاطفة مريدين و دراويش؟

لاحظ انا قاعد اقول الصادق سااااااي
على مسئولية الصادق همسلف و عهدتك انت القلت الكلام اعلاه.

Quote: استغرب في حكاية الكلام عن الكريزما دي .. كريزما كيف يعني؟ لشخصو و ل عشان ( المهدي ) و العاطفة التاريخية؟ و لّ عشان تاريخ الدولة المهدية؟ و لّ عشان شنو بالضبط؟

كاريزما كدا عديل يا قيقا!
"لشخصو" وليس لأي سبب آخر

لاحظ الكلام دا أتى من زولة لا تقتنع بتاريخ المهدية العنصري ولا بما إدعاه المهدي على الإطلاق
وبالتالي ليس هنالك أية عواطف تاريخية

Quote: انت ليه الصادق دا في الانتخابات بجي ينزل عندنا في دوائر النيل الابيض!؟ الخرطوم محل بينوم دي ملا؟ .. ما زول مفكر ما يقنع ناس الخرايتم المسغفين ديل!؟ مش حاجة غريبة؟ مفكر يعتمد على عاطفة مريدين و دراويش؟

المفكر لما يحاول يوظف فكرو ودينو لجذب عاطفة المريدين والدراويش"الكلمة التي تحاشيت ذكرها من بداية البوست حرصاً على مشاعرهم"
بيبقى دجال وإنتهازي لا أكثر ..


لذلك أرى - وكثيرين غيري - أن يتفرغ الصادق المهدي للإمامة والكتابة الفكرية والمجاملات الإجتماعية ويترك السياسة نهائياً
ونتفرغ بعدها نحن للممارسة إحترامنا له كشخصية عامة ..

Quote: لذلك أرى - وكثيرين غيري - أن يتفرغ الصادق المهدي للإمامة والكتابة الفكرية والمجاملات الإجتماعية ويترك السياسة نهائياً ونتفرغ بعدها نحن للممارسة إحترامنا له كشخصية عامة ..

من دقوا حجر السياسة في التاريخ المعاصر للبلد المنكوب دا سمعت ليك بسياسي اعتزل؟
دنت بتحلمي يا ماما .. او كما قال!

يا خوفي عليهم كلهم من سوء الخاتمة السياسية .. ربنا يمد في آجالهم اجمعين .. لكن بس بعد من روسينا ياخ!

كفاية .. اصلو شنو هو ياخ!!؟

انا اقترح توسعي الاقتراح بتاعك دا ليشمل الجميع .. و نعمل ليهم حفل تكريم كبييير يليق
و على قولة زهير × الباقير .. ح يحتفظوا بلقب " القيادة التاريخية " .. مش احسن ليهم ..
المافي شنو!؟


------

انت " دراويش " دي قايلاها كلمة كعبة؟
في الصوفية - و شعبنا صوفي بالفطرة - كلمة سمحة يا عزيزة
بس لمن تتطلع و تتفسح في حيزها الدلالي برة الاطار الديني ، و تتلب في السياسة هي الكعبة!
و لا فرق هنا - طالما بعيد من الدين - بين الامة و الشيوعي.
كلو محصل بعضو
دراويش و لاقوا مداح
و الشغلة هاصت

Quote: لوووووووول ابعد نفسو كيف يعني؟

انا كنت - واحتراماً لمقام الرجل وسط طائفته - اشير إليه فى كتاباتى بلقب "سيادة الإمام الصادق المهدى" ...

فقد كان معلوماً لديّ بلقب "السيد الصادق المهدى" إلى أن بايعه الأنصار إماماً ... فلم تسقط عنه السيادة بالإمامة ...

فأبعد نفسه عن السيادة بخطبةٍ عصماء ... ألقاها فى صلاة الجمعة منذ حوالى شهرين (عمر عبدالرازق جيب الكوت) ... فصار الأنصار يلقّبونه "الحبيب الإمام" ...

انا لا استنكر عليه حبًّا ... ولكن "الحبيب" لديّ ليست لقب رسمى بما تستدعي متطلبات الكتابة المحترفة ...

فالإمام الصادق المهدى احبه واحب نهجه الفكرى والسياسي ... ولكني لن أكتب عنه بلقب "الحبيب الإمام" ... فالموضوعية فى الكتابة تستدعي تحييد العواطف ...

أمّا مسألة "الصفاح" الواردة فى العنوان ... فهى من خبث نفسى وسوء نيّتى ... حمانا الله من شرور أنفسنا وسيئات أعمالنا ...






... المهم ....

Quote: لو أنهم فهموا الدين بشكل صحيح لما قدسوا بشراً مثلهم!

يا بت هووووى ...

نحن نقدّس الرسول .... وهو من أتى بالوحى الذي يأمره:

قل "إنما أنا بشر مثلكم" ....

تقديس البشر كمان فيهو عيب؟ نحنا قدّسنا الحجر (كان حجّيتى ولاّ عمّرتى) كمان لامن البشر الكرّمو رب العالمين؟

ما تفتحي ليّ "الذات الأنصارية المستبطنة" ... عشان اوريك كيف يكون تقديس الإمام ...

عموماً لكل طائفة معاييرها الداخلية ... ولا يصح الإتيان بمعايير خارجية للحكم على طائفة ... وتوجد معايير علمية فى الآنثروبولوجى لدراسة وتحليل الطائفة وظاهرة الطائفية ... ولكنها معايير لا تطلق أحكام اخلاقية أو سياسية على الطائفة ...

وما يحمد للإمام الصادق المهدى ... أنه رغم موقعه الطائفى المجيد ... إلاّ أن أداءه السياسي يرتكز على فكر راسخ وثقافة عالية ومعرفة موسوعية ... وليس على موقعه الطائفى ... فقد حوّل رمزيته الطائفية ومايتعلّق بها من تاريخ طائفة الأنصار إلى ذخيرة سياسية نابعة من ذلك التاريخ ... وهذه حنكة سياسية أكثر من كونها انتهازية طائفية ....

فالخلط بين الموقع الطائفى والوزن السياسي يمكن أن يحدث للمراغنة ... ولبعض آل المهدى ... ولكن ليس للإمام الصادق المهدى ...






... المهم ....

سلاااام عليكم ـ/ تيسير
الموضوع ختمية وانصار ( وبين قوسين اسياد )
ما عارف حق الفيتو بتاعى بيخول لى الدخول ولا كـــيف
ننتظر الاجابة
حق الفيتو بعد الهامش
برضو اهلنا الانصار لو حابين يسحبو حق الفيتو يخطرونا مسبقا










قاسم المهداوى
هامش
يسارى ود انصار

..... موضوع له صلة بالحوار الدائر هنا:-
السلفيين فى مصر يهدمون قباب وضرائح اولياء الصوفيه !!
مقتبسات منقولة من بوست للزميل ناظم إبراهيم يحمل العنوان أعلاه
مقدمة:_

Quote: بدأت الحرب أو الفتنة بين الجانبين بإطلاق قيادات سلفية فتوى تحرم الصلاة في المساجد التي تضم قبورًا أو أضرحة لمن يطلق عليهم "أولياء الله الصالحين وآل البيت"، مع ضرورة هدم تلك الأضرحة سواء الموجودة المساجد أو المقامة من دون مساجد، ومنع إقامة الموالد الخاصة بهم، ومن أشهر المساجد والموالد التي استهدفتها الفتوى في مصر: الحسين، السيدة نفيسة، السيدة زينب، و السيدة عائشة بالقاهرة، السيد البدوي بمدينة طنطا، سيدي إبراهيم الدسوقي بمدينة دسوق، المرسي أبوالعباس، سيدي بشر، بمدينة الإسكندرية، سيدي عبد الرحيم القناوي بمدينة قنا، وتضم مصر الآلاف من الأضرحة بعضها مقام بمساجد وبعضها الآخر مقام وسط المنازل من دون مصلى.

رأي سلفي وهابي: الشيخ سعيد محمود أحد قيادات جماعة أنصار السنة المحمدية:
:

Quote: ما يفعله الصوفيون من إقامة الإحتفالات بموالد من يصفونهم بـ "أولياء الله الصالحين أو آل البيت" محرم شرعًا، لاسيما أن تلك الإحتفالات يقع فيها الكثير من المحرمات وتمارس فيها أنواع شتي من الدجل والشعوذة، وينبغي إلغاؤها فورًا، كما أن الإسلام يدعو إلى تسوية القبور بالأرض، وعدم بناء المساجد فوقها أو وضع قبر داخل مسجد، لأنها من مظاهر الوثنية والشرك بالله، لكن ذلك لا يدعو لتغييرها من قبل العامة مباشرة، وإنما يكون من خلال القضاء أو الحاكم، وأعتقد أن من قاموا بهدم الأضرحة في محافظة المنوفية، إذا كانوا من السلفية، فقد قاموا بذلك استنادًا إلى الحديث النبوي القائل "من رأى من منكرًا، فليغريه بيده، وإن لم يستطع فليغريه بلسانه، وإن لم يستطع بقلبه، فذلك أضعف الإيمان".

وشيخ سلفي آخر:- الشيخ محمود عامر زعيم السلفيين بمحافظة البحيرة،

Quote: إن "الصلاة لا تجوز على الإطلاق بمساجد تضم أضرحة، ويجب أن تهدم، وتعتبر الأفعال التي يأتي بها الصوفية أثناء أقامة موالد من يعتبرنهم أولياء الله الصالحين من موجبات الكفر، كما أنها تكون سببًا في إرتكاب الكثير من الأفعال غير الأخلاقية فضلًا على المعاصي، ويجب أن يتم إيقاف كل تلك المهاترات التي لا أساس لها من الدين، وتعتبر من المنكر الواضح الذي يجب تغييره فورًا، مشيرًا إلى أن التغيير يكون من خلال الحاكم، وليس من خلال العامة، وأضاف أنه من الضروري إستحداث شرطة للأمر بالمعروف والنهي عن المنكر، تكون تابعة لوزارة الداخلية، تكون مهمتها تنفيذ تلك الأمور الواضحة، والتي يتفق عليها العلماء".

والصوفية يقولون
أحمد الطيب شيخ الأزهر، والذي يعتبر أحد كبار مشايخ الصوفية يصف السلفيون :

Quote: بأنهم "خارجون عن الإسلام"، وأوضح أن "من يحرمون الصلاة فى المساجد التى يوجد بها أضرحة هم أصحاب فكر فاسد، والصلاة ليست باطلة وإلا كانت الصلاة فى المسجد النبوى باطلة ولأبطلت صلواتهم أيضًا والمسلمين منذ 1400 عام"، ولم يقف الأمر عند هذا الحد، بل قال فيهم أيضًا "هؤلاء على استعداد أن يتصالحوا مع نتانياهو ولا يتصالحون مع السيد البدوى رضى الله عنه، فهؤلاء خارجون عن إجماع المسلمين".

ويضيف شيخ صوفي آخر الشيخ عبد الهادي القصبي شيخ الطرق الصوفية :

Quote: إن التيار الصوفي قادر على حماية الأضرحة أوالمساجد التي تضم أضرحة، سواء كانت مساجد آل البيت أو مساجد أولياء الله الصالحين، وقال لـ"إيلاف" إن جموع الصوفيين سوف يتصدون لأية محاولات للإعتداء على الأضرحة أو المساجد أو الإحتفالات، وحذر التيار السلفي من مغبة الإقدام على هدمها، داعيًا إياهم إلى انتهاج الإسلام المتسامح الذي يرفض العنف والتشدد، ويقبل الحوار مع الآخر. منوهًا بأن التهديدات التي خرجت بهدم الأضرحة صدرت من أشخاص غير مسؤولين، وليست لديهم دراية بصحيح الإسلام. واعتبر إصدار فتاوي تبيح هدم الأضرحة هو فعل بمثابة النفخ في النيران، لأحراق مصر كلها.

ويقول شيخ محائد ;الشيخ علي أبوالنجا أستاذ العقيدة في جامعة الأزهر:

Quote: إن الخلاف بين السلفيين والصوفيين قديم جدًا، وأوضح لـ"إيلاف" أن الفريق الأول ينظر للأخير بوصفه مشرك، أو كافر، لأنه يتبرك بالأضرحة ويرفع آل البيت وأولياء الله الصالحين لمراتب الأنبياء والصحابة، بل يرفعون بعض مشايخهم إلى مرتبه الإله. مما يستوجب قتالهم وقتلهم، فيما يرى الصوفيون أن السلفيين متشددون، ولا يفهمون صحيح الإسلام، ويكذبون على الرسول، من خلال أحاديث موضوعة أو إسرائيليات، وأنهم يعملون لحساب الحكام، ويتخذون من مبدأ التقية دستورًا لممارسة الدعوة.وأشار إلى أن الجانبين لديهما أفكار مغلوطة، ويجب التصدي لهما من جانب الأزهر، وأضاف أن ظهور تلك التيارات والمذاهب جاء نتيجة لتراجع دور الأزهر كمؤسسة تعلم الناس الدين الإسلامي المعتدل، بدون مغالاة أو تفريط، ولن يختفي هؤلاء إلا لو عاد علماء الأزهر إلى العمل بجد، مع ضرورة فتح وسائل الإعلام أمامهم، فقد كان التليفزيون الرسمي في السابق مفتوحًا أمام السلفيين والصوفيين، من أجل تغييب المصريين، من خلال الحديث عن أوصاف الجنة والنار.

ويضيف هذا الرجل هذه النقطة الهامة عن التكسب السياسي :

Quote: وأرجع الصراع بين الجانبين حاليًا نتيجة لأرتداء كلا الفريقين لباس السياسة، وسعيه نحو الحصول على مكاسب سياسية بعد نجاح الثورة في الإطاحة بالنظام السابق.

تلاحظ أن كل الاطراف تستند علي الدين والنصوص وهو ذات الشئ في مسألة التوسل بالأولياء ووصف البشر بالسيادة - الصحابة وأمهات المؤمنيين مثلا! والشاهد في هذا أنك تجد الدليل والسند وما يناقضه في ذات الحقل الديني وتجد أن الفتوي ونقيضها - المظاهرات والثورات مثلا - تأتي مستندة علي أدلة ممايوضح مخاطر زج الدين في السياسة وكارثية إستغلال المقدسات لخدمة أجندة حزبيةأومذهبية ولتصفية الحسابات !!

شكرا للأخت العزيزة عزاز

Quote: ده الخوف الحقيقي أخي كمال، بس العشم أنو "العقل" يكون هو الحكم بعيدا عن الغيبيات .. فصل الدين عن الدولة مالو؟ اعلم تماما انه خيار امامه درب عسير لذا اتفق مع كلامك ادناه تماماً:

ليس السلفيين وحدهم من يسعي لوراثة جماهير الانصار والختمية بل هناك من هم أخطر - الكيزان لأنهم يستخدمون جهاز الدولة لتدمير مؤسسة الطوائف الدينية وإحتواء جماهيرها " وإعاد ت شحنهم بخطاب إيدلوجي وإقصائي وشمولي وبنسخة إسلاموية أكثر تشددا وإستغلالا للدين وأكثر سعيا لتوظيف المعتقدات لخدمةأجندةدينيويةوسياسية ! ..."

Quote: فصل الدين عن الدولة مالو؟ اعلم تماما انه خيار امامه درب عسير

we are sailing in the same boat
ياعزاز !
وفصل الدين عن الدولة هو أحد مداخل العلاج بالاضافة لروشتة التنوير والتوعية وعمل تغيرات جذرية -إجتماعية وسياسيةوإقتصادية وثقافية تهز البالي والمتكلس وتتجاوز المتحجر والعاجز عن السباحة في مجري التاريخ وتفرز الجديد والمتطور والمنفتح علي الحياة وتعلن ميلاد إنسان كامل الإرادة والحرية لاتكبله قيود التخلف والجهل والامية ولايغبش وعيه أو يشله الإستغلال السلبي للاديان!!..........

Quote: أؤيد حق الفرد في الاعتقاد، ولكني ضد ان تحكم عقيدة فئة من المجتمع -- مهما كانت قاعدتها عريضة -- الدولة و خصوصا لو كانت هذه الدولة متنوعة ثقافيا و اثنيا ...

ودي الزبدة والخلاصة ياعزاز !!
أشكرك علي الإضافة ونشكر هذا الإختلاف المبدع ( التكيتكي = إختلاف وسائل التعاطي ) الذي أغني وأثري الحوار .........
تقديري

السيدة تيسير السيد عثمان...

Quote: اللحظة اليحاول فيها إستغلال فكره والكاريزما بتاعتوالإجتماعية والدينية لتحقيق غرض سياسي تسقط عنه الهيبة التي أحيطها به ويصبح عندي محض سياسي إنتهازي في محل إنتقاد الليل مع النهار ..

وهل فعل ؟
حاشاه سيدي الإمام حفظه الله في حله وترحاله أن يستغل محبة اهله و انصاره في غرض سياسي

Quote: الصادق المهدي من ناحية فكرية بيطرح آراء مؤثرة وكاتب مجيد أتفق معاهو ولا لا دا موضوع تاني .. ولكنه يستحق لقب مفكر

ؤ انت دي ما بتستحقي لقب مفكر؟
طبارك الذي بيده الفرشة دا ما بستحق لقب مفكر؟
بالنسبة لي افكاركم اكتر وسامة مية مرة من مفكركم دا


دروشة منكم بس!!

ما ياها دي الدروشة و الزهد القاصدا انا! انت قايلاني بتكلم عن شنو؟..
ابداً ما غيرا!!؟

دا ضنب ككو ما بالساهل تمسكونا ليو تاني ..
كفاية ياخ! .. اخدوا فرصتم ..
نصف قرن من الزمان نسمع جعجعة و لا نرى طحين!! بس كلام × كلام
يدوا فرصة لغيرم .. دايرين نشوف جكتكم انتو ديل.
كان دايرين تواصلوا دروشة كمان اقنعونا .. المافي شنو!؟
ترانا قاعدين .. و بدون فورة .. بخروج المهزوم بس
مع تحذير واضح و صريح .. قنابيرنا ما معانا .. انا غايتو قمبوري اديتو لواحد صاحبي كان عندو حفة ضنب ككو .. ؤ لسة ما رجعوا لي

الأخت الفاضله أم الوليد ، سلام

Quote: أنا ما بقبل يطلق على كيان الانصار كيان طائفي لأنه ما طائفي من حيث تعريف الطائفية ..وما بقبل أن يقال أن الإمام الصادق المهدي له احترام يبلغ درجة التقديس.. وما بقبل يتم التعامل مع الإمام الصادق المهدي بقداسة لأنه دة ما من مقاصد الأنصارية ولا مباديء حزب الأمة وهو نفسه أعلنها زمان :( لا قداسة مع السياسة).. وأنا بفتكر إنه لا قداسة مع أي شيء مش مع السياسة بس لأنه من حيث المبدأ لا قداسة لبشر..كثيرون ارتضوا قيادة الصادق المهدي للحزب منذ بدايةانخراطه في العمل العام لقناعتهم أنه مختلف ويدعو لفكر منفتح ويود أن تكون العقليات المنخرطة في حزب الأمة عقليات نقدية..ويود أن تكون عضوية الحزب أناس يفكرون ويقررون لا يرمون بأعبائهم ومسئولياتهم على القيادة يفوضونها في كل شيء ويقبلون بكل ما يأتي منها بدون تبصر..

تعلمي مدي احترامي و تقديري لك لكن المساله ما مسالة انك تقبلي ولا لا : المساله اننا عندنا وجهات نظر مختلفه في شان عام خلينا نتفق و نختلف بدون ما نفرض قبول أي منا لراي الأخر من عدمو .
حزب الأمه ما حزب طائفي كيف يا لنا : و رئاسة الحزب و مراكزو القياديه تورث مع أراضي السقاي و بيوت الملازمين ؟! الحزب ده مش اسسو السيد عبدالرحمن و خلفو ابنو السيد الصديق و خلفو ابنو السيد الصادق و حا تخلفو بنتو السيده مريم ولا ده حزب تاني ؟! ما حزب طائفي كيف و عضويتو - في معظمها - جايه من طائفة الأنصار وارثين الأنصاريه عمن سلف من ابائهم و أجدادهم ( و دي في حد ذاتها ما منقصه ) !
الأمام الصادق يقول (لا قداسه في السياسه ) و ينصب نفسو إمام علي الأنصار - بما في كل مافي تسمية الأمامه من معاني - لو دي ما ركضا وراء القداسه يبقي شنو ؟

Quote: ولو كانت القصة قصة قداسة لرحم مهدوي وقرابة بالمهدي الكبير لكان الناس تبعوا من هو أقرب رحماً للإمام المهدي ...

و منو القال ليك إنو الناس ما تابعين رحم المهدي الكبير ؟! رئاسة هذا الحزب - منذ تاسيسه - كانت حكرا علي أبناء و أحفاد الأمام المهدي و مش كده و بس حتي عند تشرذمو تبع الناس ال المهدي : الأمام أحمد المهدي عندو كومو و ولي الدين إبن الأمام الهادي عندو كومو و الصادق إبن الأمام الهادي عندو كومو و كل الرابط بين الناس دي ياها الدماء الزرقاء المستمده من رحم الأمام المهدي !!
و المساله ما إنو الأقرب رحما هو الأعلي منزلة ، المساله انها محصوره فيما بينهم : يعني ال المهدي يتداوسو فيما بينهم و البجي مارق منهم ياهو الأمام و رئيس الحزب !!!!

Quote: والحق يقال الإمام الصادق ما بتفرق معاهو ينادوهو يا سيد أو يا بوي أو يا الحبيب الإمام أو يا عمي الصادق أو يا الصادق ساكت ممن هم في مثل عمره ...نهائي...بالنسبة له لا يشكل الأمر مشكلة ولا هاجس..وما بيقبل يقبّلوا يده ولا يتبركوا به ومثل هذه الخزعبلات ...دي حاجات شفتها بي عيني ما حكوها لي..ولمن يهتف الناس لن نصادق غير الصادق يقول لهم:" لا تقولوا ذلك بل قولوا لن نصادق غير صادق"... تثبيت حقه في هذا الجانب حاجة يا الحبيب أمين وانتقاد سياساته وقيادته للحزب والرؤى حول إعادة انتخابه وغيرها من الأمور المشروعة تجاه قيادة فصيل سياسي حاجة تانية...

لمن كتبت تعليقي لتيسير و حمور القصد كان انهم ينتقدو الختميه و الأنصار زي ما عايزين لكن ما يستفزوهم لانو في ناس عندهم إحترام يصل لمرحلة التقديس لقادة الحزبين : كان في البال الختميه و ال الميرغني أكتر من الأنصار و ال المهدي !! و الحقيقه إنو المقارنه معدومه تماما بين أبناء الأسرتين فيما يختص (القداسه علي المستوي الشخصي ) : عبدالرحمن الصادق كان معانا في الأهليه المتوسطة ما شفنا فرق بينو و بين أي طالب و لا حتي حبة (طنقعه ) ساي إنو ود الصادق المهدي ، أولاد الأمام أحمد : محمد أحمد (حمام) و الفاضل أصحاب و فرد منذ ألف سنه ما شفتهم يوم إتعاملو مع زول بفوقيه و ( لا اتنين سنتمتر ) و كل ال المهدي البعرفهم و اتعاملت معاهم - علي المستوي الشخصي - تختهم في الجرح يطيب : ناس محترمة و بتحترم الناس ، لكن دي ما المساله : المساله إنو الناس الجاريه في دمهم الدماء الزرقاء دي عندهم حظوه و مقدره علي سبق باقي أعضاء الحزب في مقاعد القياده بمجرد ميلادهم و جريان الدماء الزرقاء المستمده من رحم الأمام المهدي : دي العله الأساسيه و دي القداسه المقصوده ( لال المهدي بالذات ) !!
الساده المراغنه المساله مختلفه و نوع القداسه ذاتو مختلف باعتبار نسبهم للرسول صلي الله عليه و سلم و نظرة اتباعهم ليهم من هذا الجانب !!
ما عايز أطلع البوست من موضوعو لكن أنا شايف انك - و معاك مجموعة مقدره من الأخوان (عويس و العمده ) كامثله - بتتكلمو عن حزب لا يوجد علي أرض الواقع و عن أشياء لا نراها - نحن عوام الناس ديل - :
انتو تقولو حزب الأمه ما حزب طائفي و الواقع يقول رئاسة الحزب تورث و لو كانت الرئاسه تقسم لكان حظ الذكر فيها لال المهدي مثل حظ الأنثيين !!
تقولو نحن حزب معارض و قايدين المعارضه و الواقع يردد مع رئيس الحزب اننا متفقين مع الحكومه في 85% من القضايا !!
تتكلمو و تدعو للديمقراطيه و ديمقراطيه في حزبكم مافي و اليوم الوحيد - السمعت بانتخابات ديمقراطيه في حزبكم - و أعضاء حزبكم اختارو أمين عام قلتو الزول ده أمنجي و ما بيمثلنا !!
صوتكم في المنبر قوي و مصادم للحكومه و صوت حزبكم في الواقع مدجن و يسير مع الحكومه و خط الحكومه !!
الشاهد يا لنا أني أظن - و ليس كل الظن إثم - انكم تتبعون و تتبنون خط ما عندو علاقه بخط حزب الأمه علي أرض الواقع : المساله دي انعكست علي رؤيتكم و خلتكم ما عارفين و ما شايفين الطائفيه في حزبكم و لا قداسة ال المهدي فيه و لا أن حزبكم حزب مدجن و موالي لهذا النظام !
لك الود و الأحترام

الكلام لكمال سالم في بوست فتحه اليوم:

Quote: ونقولها بالفم المليان بأن رؤساء الأحزاب السودانيه الأربعه هم فى نظرنا مثلهم ومثل عمر البشير وعصابته . لا مكان فى تاريخ السودان القادم للصادق أو نقد أو الترابى أو سيدى محمد عثمان .

وهذا هو الرابط:

Re: إختيار عنوان للجمعه الأولى والجمعه الثانيه ,, جمعتان لإسقاط النظام .

تنهدات: تعال ياشيخ بشاشة الحقنا وافزعنا ...

عزيزي كمال
أفكارك التي طرحت في هذا البوست محل اهتمامي واتفاقي.
أرى أن النقد السياسي في السودان هو في ذاته يعاني خللاً عميقاً جداً، فهو يصوّب سهامه تجاه (نظام الحكم القائم) أياً كان ونحو (الحزبين الكبيرين) ويستثني (طوائف) من النخب السودانية هي ذاتها في حاجة لنقدٍ عريض، سواء كانت هذه النخب مسيّسة أو غير مسيّسة. واحدة من إشكالات هذه النخب المعنية بحديثنا هي أنها تقع في تناقض رهيب بين رؤيتين: (1) النظرة (الاستصغارية) والدونية لهذين الحزبين وطبيعة الانتماءات والارتباطات في داخلهما، فالمثقف (أو المتعلم) يستنكف المشاركة السياسية من خلال هذين الحزبين (2) في الوقت ذاته ينشط هذا المثقف (أو المتعلم) في الحديث عن (الشعب) السوداني، وكأن أعضاء الحزبين يمثلون شعباً آخر !!
أعتقد أن (فهم) طبيعة المجتمع السوداني مسألة ضرورية جداً وتستلزم جهداً بحثياً جباراً حتى نُلم بإشكاليات الحزبين على نحوٍ عميق ودقيق، وحتى نتمكن من طرح مبادرات جادة و(علمية) في الإصلاح والتغيير. إصلاح المجتمع وإصلاح الحزبين عمليتان مترابطتان ومتداخلتان، والعمليتان مرتبطتان أيضاً بإصلاحات جوهرية في:
الدولة
مناهج التعليم
التعليم الديني
نقد (العقل) أو (العقول) السودانية وتراكماتها التاريخية وخاصةً (الوعي) الذي أنتجته (سنار) بقبابها ونظامها البطريركي وأنظمتها الاجتماعية وبنياتها الدينية والاقتصادية
أنظمة وطبائع التدين و(النظرة) إلى الدين
القبيلة وسُبل الارتقاء بأشكال الانتماء وصولاً إلى (القومية)
ولعلّ هذه النقطة الأخيرة بالذات أفاض في وصفها المفكر الكيني – الأميركي، بروفسير علي المزروعي معتبراً إياها هي وهشاشة تكوين (الدولة الحديثة) عاملين رئيسين في عرقلة النهضة والتطور في إفريقيا.
المسألة ليست بالبساطة و(الخفة) الفكرية التي تجعلنا ننظر للمشكلة من جانب واحد هو (عجز) هذين الحزبين وتخلفهما. الحقيقة أننا بإزاء مجتمعٍ متخلف، عمّقت تخلفه محاولات بعض النخب في حرق المراحل بل وتجاهل الواقع الاجتماعي بكامله من خلال مايو والإنقاذ، والغريب يا كمال أن هذين الحزبين بالذات وقياداتهما (المتخلفة، الطائفية، الـ.. والـ) تصدت بمسؤولية لدورها في استرداد الديمقراطية، دفع الشهيدان الإمام الهادي والسيد الشريف حسين حياتيهما ثمناً لها، وكان الإمام الصديق هو قائد المعارضة في سنوات عبود، خلفه الإمام الهادي والسيد الصادق المهدي. والأنظمة الشمولية تستهدف أوّل ما تستهدف هذين الحزبين، بل وتصادر ممتلكات شخصية تخص قياداتهما، و(لا يحق لهذه القيادات حتى أن تطالب باسترداد ممتلكاتها) هذا في (وعينا) طبعاً، مع أن الواحد منا لو صادرت الدولة منه متراً واحداً فلن يسكت.
إذا كان هذان الحزبان متخلفين، فهذا نتاج أنظمة اجتماعية متخلفة ومجتمع متخلف. وإذا كنا لا زلنا في خانة التخلف، فهذا لأن الديمقراطية التي كانت لتكفل التطور والتقدم وئدت في كلِّ مرة نتيجة (مغامرات) النخب. والغريب أن هذه النخب حين تصل السلطة (الترابي نموذجاً) يضيق صدرها عن أقل قدرٍ من النقد، فتقتل وتعذب وتنسى ثقافتها وكل شيء، في مقابل سعة صدر (الطائفيين!!!)..(السيد الصادق المهدي نموذجاً) !!
والنتيجة، النتيجة يا كمال لمحاولات القفز في الظلام هذه، دون مشروع فكري وتحديثي حقيقي ومتكامل وعميق يراعي واقعنا فعلاً، النتيجة هي (الردة) باتجاه القبلية والجهوية التي نتكرع علقمها الآن !!
أليس مثيراً فعلاً أن كياناً قديماً ككيان الأنصار استطاع أن يصهر كل قبائل السودان وجهاته في بطنه، في حين فشلت الحركة الإسلامية فشلاً ذريعاً وخلقت أكبر ردة اجتماعية و(أخلاقية) يشهدها السودان !!

Quote: الكلام لكمال سالم في بوست فتحه اليوم: Quote: ونقولها بالفم المليان بأن رؤساء الأحزاب السودانيه الأربعه هم فى نظرنا مثلهم ومثل عمر البشير وعصابته . لا مكان فى تاريخ السودان القادم للصادق أو نقد أو الترابى أو سيدى محمد عثمان . وهذا هو الرابط: Re: إختيار عنوان للجمعه الأولى والجمعه الثانيه ,, جمعتان لإسقاط النظام . تنهدات: تعال ياشيخ بشاشة الحقنا وافزعنا ...

المنحط بدر الدين الأمير : بعد وصفك للرسول صلي الله عليه و سلم ب(العاشق الولهان) و إنو دعا سيدنا زيد عشان يطلق السيده زينب عشان يتزوجها هو لانها كانت جميلة الجميلات : ما عندك من الأخلاق و لا المصداقيه انك تنتقد أي زول ...
و لانك جاهل بدرجة جنرال و جبا ن بدرجة أرنب جريت لبكري عشان يسحب البوست و تداري جهلك و إنحطاطك الفات الكبار و القدرو !!!
لما تكتب كلام حقو تبقي راجل و تستحمل تبعاتو لانو الجري لبكري ما بحلك و لا حا يحلك !!!

سلام يا راويه

Quote: أمينو أزيك ياخ التهكم والسخرية أبسط مايمكن أن تقابل وتهضم به الواقع المرير البيقول أننا في منتصف القرن الواحد والعشرين ولسة فينا من يعتقد أن هناك بشر مقدسين ويمكن أن ينوروا بالليل . صوفية وين؟ وصوفية منو ؟ ..الساكين الزايلة ديل وطالبين الحكم والجاه؟؟

أنا رايى قريب لرايك لكن كمان ما ممكن نحجر علي الناس أراءهم طالما ما إستفزو الناس و عقائد الناس ، و لو في زول شايف الناس دي علي ضلال اليجادلهم بالتي هي أحسن ما يستفزهم بكلام سيدكم البولع و بنور بالليل !!

يا بروف ياخ ما قال ليك الكلام لكمال سالم همسلف

Quote: الكلام لكمال سالم في بوست فتحه اليوم:

مع التحية و الاحترام الذي يليق للزميل كمال سالم

لكن بالجد من قبيل محتار في الامير قاصد شنو بالمداخلة دي!!؟
شنو يعني كمال سالم قال؟
ياخ مش هو عندو باسوورد .. و بدخّلو البوست دا؟
الفكرة شنو يا بدر؟
بتضارا بيو مثلاً لانك خجلان و انبطاح استباقي خوفاً من جنس تصريحات البروف الفالتة دي؟!
و لّ المقصو انو ما دام كمال سالم قال خلاس نحن نتنفض و نمنع الفارغة و نمش بيوت؟
الفكرة شنو بالضبط؟



------

يا بروف
ما اعتقد انو للامير اي يد في حذف البوست .. جا واصل عااااااادي .. و لا خصاهو!
و جابو آخر كمان في علمانيتو القاطعا من سفنجاتو ديك؟
غايتو لحدي ما اتحذف البوست انا قدرت افهم منو انو العلمانية=الاساءة للرسول الكريم
بس!!

ياخ ما تحرف البوست دا
امش افتح ليك بوست

تحياتي ياعزيزي خالد عويس
علي هذه المداخلة العميقة والرؤية النافذة :-

Quote: النتيجة يا كمال لمحاولات القفز في الظلام هذه، دون مشروع فكري وتحديثي حقيقي ومتكامل وعميق يراعي واقعنا فعلاً، النتيجة هي (الردة) باتجاه القبلية والجهوية التي نتكرع علقمها الآن !!

قبل أن أعلق:- يجب أن أوضح أننا هنا ننتقد ذهنية وطريقة التعاطي مع الظواهر الاجتماعية والسياسية بصورة عامة وكلامنا ليس موجه لصاحبة البوست أو أي شخص بعينه أو تقليلا من قدر أي إنسان - في هذا المنحني من الحوار - فكلنا نقف في ذات الضفة وننشد التغيير للأفضل قد تختلف الوسائل والأساليب ولكن تظل الغايات واحدة - - ...نعم ياخالد لابد أن نضع في الإعتبار طبيعة المجتمع العشائري والقبلي والوعي الابوي والذكوري والتركيبة القبلية والجهوية والتنوع والتبائين اللغوي والثقافي والنمط الصوفي المشائخي وحداثة نشأة الدولة السودانية بشكلها الحالي -1820 وعدم تبلورها النهائي في شكل أمة ودولة ناضجة وصلبة ! ومن المؤسف أن التهميش والهيمنة المركزية وإضعاف الاحزاب والطوائف من دون بروز بدائل أدي لتمزق نسيج البلد وأحدث ردة ونكسة كبري تمثلت في عودة الناس للتحصن بالقبيلة والكيانات الجهوية وعمق هذه الظاهرة إستقواء قيادات المؤتمر الوطني بقبائلهم وجهوياتهم وإستخدام سلاح العرق والقبيلة في حسم الصراعات المطلبية والسياسية !
والمحصلة النهائية كانت التمزق والتفكك وشبح العودة لأوضاع ماقبل الفتح التركي ! ممن السودانيين كان يعرف شئيا عن قبيلة عبود ? الم يكن نوبة الشمال في طليعة من قاموا بالاطاحة بنميري ?
هل يعرف معظم الناس الي أي القبائل كان ينتمي الشريف حسين الهندي ?
ماذا حدث إذا ولماذا إنهار البناء ولماذا إنتكسنا وتهاوت أعمدة أركان
الدولة وضعف الحس القومي وتعالت النعرات الجهوية والعنصرية ? وكيف
يتم التفريـط في السيادة والتراب وتتقطع أوصال البلد من دون أن نقوم
علي الاقل بتشخيص العلة وإستئصال أس الداء ! ?

يا أستاذ فتح الرحمن !!!

Quote: يا بروف ما اعتقد انو للامير اي يد في حذف البوست .. جا واصل عااااااادي .. و لا خصاهو! و جابو آخر كمان في علمانيتو القاطعا من سفنجاتو ديك؟ غايتو لحدي ما اتحذف البوست انا قدرت افهم منو انو العلمانية=الاساءة للرسول الكريم بس!! ياخ ما تحرف البوست دا امش افتح ليك بوست

بكري لمن يشيل بوست بختو في المكتبه - طبعا الكلام ده إنت ما بتعرفو باعتبارك قاعد أم افكو بدون مكتبه - بوست الجاهل ده خفي من وجه البسيطه الأسفيريه ظاهر باطن !!
بعدين موضوع شنو البغيرو في البوست : البوست ده موضوعو اتغير من يوم فتحو و بقي فيهو سجالات ثنائيه و ثلاثيه كمان و في مواضيع مختلفه : عزاؤنا إنو البوست بتاع تيسير يعني ممكن نتمدد زي ما دايرين !!!

سلام يا كمال
على سبيل التغيير خلونياعمل مقاطعة ليكم ( ملاحظة البروف سليمة كل الناس اتنين اتنين ، الا اللغات على قدر الجماعة و لا فرح)

Quote: وعدم تبلورها النهائي في شكل أمة ودولة ناضجة وصلبة ! ومن المؤسف أن التهميش والهيمنة المركزية وإضعاف الاحزاب والطوائف من دون بروز بدائل أدي لتمزق نسيج البلد وأحدث ردة ونكسة كبري تمثلت في عودة الناس للتحصن بالقبيلة والكيانات الجهوية وعمق هذه الظاهرة إستقواء قيادات المؤتمر الوطني بقبائلهم وجهوياتهم وإستخدام سلاح العرق والقبيلة في حسم الصراعات المطلبية والسياسية !

و انت بتسرد في التقرير اعلاه، مش لو رجعتو لاسبابو بكون افيد.
ليه190 سنة ما خلقت دولة مدنية في السودان؟
و محتاجين كم سنة /قرن تاني ؟
و نحن شعب السودان الحالي الفضل دا .. سلمة ساي يتسلق شع السودان الح يفضل و يج بعدنا؟
ما نعيش مع السادة ديل يعني عشان مجتمعنا من سنة 1820م عشائري و قبلي؟
هل الغول هبط من السماء؟
ام الجبهة حاكمانا الـ190 سنة دي كلها؟
ليه بتعفي الطائفية المستفيد و المسئول الاول، و النخب المدمنة للفشل دي؟
السؤال الاهم السواد الاعظم من شعوب السودان دا مخلوقين من طين عشان يقدسوا القلة المخلوقين من زبادي؟
وين حقنا نحن ديل في الحياة الكريمة .. ح ناخدو متين؟ في الحياة القادمة مثلاً؟
وكت اصلو حالتنا ميئوس منها، و التاريخ بأكد انو المستفيدين ما بنتازلوا باخوي و اخوك عن مصالحم، طيب الثورة مش خيار كويس .. و لّ شنو؟
في كل البؤس دا ح نخسر شنو غير الاغلال؟

الزعيم

--------

يا بروف
لا تنابزو بالالقاب بالله
انا من الليلة لقبي الزعيم .. استاذ بتاع الساعة كم؟

تحياتي يا قيقراوي

Quote: انت بتسرد في التقرير اعلاه، مش لو رجعتو لاسبابو بكون افيد. ليه190 سنة ما خلقت دولة مدنية في السودان؟ و محتاجين كم سنة /قرن تاني ؟ و نحن شعب السودان الحالي الفضل دا .. سلمة ساي يتسلق شع السودان الح يفضل و يج بعدنا؟ ما نعيش مع السادة ديل يعني عشان مجتمعنا من سنة 1820م عشائري و قبلي؟ هل الغول هبط من السماء؟ ام الجبهة حاكمانا الـ190 سنة دي كلها؟ ليه بتعفي الطائفية المستفيد و المسئول الاول، و النخب المدمنة للفشل دي؟

ما قمت بالتعليق عليه دا رصد وتحليل ! ياريت لو قمت بقراءة كامل رؤيتي من دون إستعجال وأبتسار ! القراءة الخاطئية والاستنتاج المتعجل يقود بالضرورة لنتيجة مغلوطة وأحكام متعسفة ! ... وكأنك لاتعرفني ولا تعرف أفكاري !
تقول في الخلاصة:-

Quote: وكت اصلو حالتنا ميئوس منها، و التاريخ بأكد انو المستفيدين ما بنتازلوا باخوي و اخوك عن مصالحم، طيب الثورة مش خيار كويس .. و لّ شنو؟ في كل البؤس دا ح نخسر شنو غير الاغلال؟

Quote: طيب الثورة مش خيار كويس ?

ودا سؤال ياقيقا ? .......

Quote: انت بتسرد في التقرير اعلاه، مش لو رجعتو لاسبابو بكون افيد. ليه190 سنة ما خلقت دولة مدنية في السودان؟ و محتاجين كم سنة /قرن تاني ؟ و نحن شعب السودان الحالي الفضل دا .. سلمة ساي يتسلق شع السودان الح يفضل و يج بعدنا؟ ما نعيش مع السادة ديل يعني عشان مجتمعنا من سنة 1820م عشائري و قبلي؟ هل الغول هبط من السماء؟

أنا لا أتحدث عن مدنية الدولة من عدمها هنا! أنا أتحدث عن حداثة نشاة
الدولة السودانية وهشاشتها ! وعدم نضج وإكتمال القومية ! وقد قلت أننا كنا ننتطور ونرتقي ببط في سلم التصاعد نحو القومية الناضجة - كنا في الستينات حتي بعيد أكتوبر- أكثر وعيا بذاتنا وثقة بقدراتنا - حدث تلاقح وتجانس وتطور ولكن !
........ حديثي عن مايسمي بالطائفية - ليس رغبويا أومزاجيا وإنما هو أستقراء للواقع والتاريخ وتحليل لحيثيات ومفردات معاشة- أري الطوائف- كمؤسسات إجتماعية social institutions - عتبات في سلم التطور الاجتماعي نحو الافق القومي - وأسعي لتجاوزها عبر مشروع بديل متكامل - طرحت معالمه في مداخلاتي مع الاخت عزاز! وزدت عليه بالتثبيت علي ضرورة فصل الطوائف الدينية عن المؤسسات الحزبية والإصلاح داخل بني الاحزاب التقليدية !
........قلت أني لاأتعامل مع الواقع والتغيير برؤية عدمية أو طوباوية أو برؤية إستسلامية وتصالحية خانعة وإنما -برؤية جدلية - تنفي وتختزل - تثبت وتطور !
تقول

Quote: هل الغول هبط من السماء؟ ام الجبهة حاكمانا الـ190 سنة دي كلها؟

الجبهة الاسلامية لم تحكمنا -الـ190 سنة الماضية ولكنها أجهضت التطور الطبيعي والسياسي والثقافي الممتد طيلة تلك الاعوام ! ........ نعم للأحزاب التقليدية والنخب السياسية سلبياتها ولكن تظل كوارث ما يسمي بالحركة الإسلامية هي الابرز - لأنها كوارث نوعية !
.........

Quote: السؤال الاهم السواد الاعظم من شعوب السودان دا مخلوقين من طين عشان يقدسوا القلة المخلوقين من زبادي؟

سؤال غريب !
وهل أنا من أنصار تلك القدسية أو من إنصار إستغلال الدين لتحقيق مكاسب إجتماعية أو سياسية ?
كتبت

Quote: وين حقنا نحن ديل في الحياة الكريمة .. ح ناخدو متين؟ في الحياة القادمة مثلاً؟

... قيقراوي أرجع وأقرأ مداخلاتي ! أقرأ مجمل سجالي مع الاخت عزاز لتري رأي ورؤيتي - وليس مجرد تحليلي -!
هاك :-

Quote: فصل الدين عن الدولة هو أحد مداخل العلاج بالاضافة لروشتة التنوير والتوعية وعمل تغيرات جذرية -إجتماعية وسياسيةوإقتصادية وثقافية تهز البالي والمتكلس وتتجاوز المتحجر والعاجز عن السباحة في مجري التاريخ وتفرز الجديد والمتطور والمنفتح علي الحياة وتعلن ميلاد إنسان كامل الإرادة والحرية لاتكبله قيود التخلف والجهل والامية ولايغبش وعيه أو يشله الإستغلال السلبي للاديان

سلامات يا كمال

Quote: سؤال غريب ! وهل أنا من أنصار تلك القدسية أو من إنصار إستغلال الدين لتحقيق مكاسب إجتماعية أو سياسية ?

مجرد سؤال
مضايق مالك؟

Quote: فصل الدين عن الدولة هو أحد مداخل العلاج بالاضافة لروشتة التنوير والتوعية وعمل تغيرات جذرية -إجتماعية وسياسيةوإقتصادية وثقافية تهز البالي والمتكلس وتتجاوز المتحجر والعاجز عن السباحة في مجري التاريخ وتفرز الجديد والمتطور والمنفتح علي الحياة وتعلن ميلاد إنسان كامل الإرادة والحرية لاتكبله قيود التخلف والجهل والامية ولايغبش وعيه أو يشله الإستغلال السلبي للاديان

اها انا دايرا جرعة واحدة .. مرة و الى الابد
و ما مقتنع بمماحكتكم دي







--------

بعدين يا كمال القصة ما قصة قراءة خاطئة و لّ سليمة .. و لا متعلقة بيك انت.
زي ما قلت انت اختلاف تكتيكي .. اها طريقتكم ما بتخارج معاي
انا رافض القديم دا كلو .. و دي كط بوينت حاسمة .. قطيعة نهائية.
في نظري المعركة واااحدة و حاسمة .. و الطريق واحد و واضح بالنسبة لي.
حقي و لّ لا؟

الزعيم

تحياتي يا قيقراوي (جيفارا )
الغريبة زمان كنت قائلك ماركسي لكن قمت لقيتك فورباخي قح !
لا علينا فلنعتبرك .. revolutionist وإعتبرنا مجرد reformist .. إصلاحيين !! ......... بس أنا بعتبر نفسي ثوري يؤمن بمبدأ - الإختزال والتثبيت والتطور !! ويمكن دا يكون نتاج إختلاف أمزجة أو ثقافات أو فارق سن بينا- أقول دا بمناسبة تأهبي لوداع عام من عمري وميلاد عام جديد .. .. تقول:-

Quote: اها طريقتكم ما بتخارج معاي انا رافض القديم دا كلو .. و دي كط بوينت حاسمة .. قطيعة نهائية. في نظري المعركة واااحدة و حاسمة .. و الطريق واحد و واضح بالنسبة لي. حقي و لّ لا؟

طيب ومالوا وبرضو رأي ! إمضي في طريقك ياصديقي ودعنا نحفر ونعافر
بطريقتنا !! .......
نجد للجد شوف ياقيقراوي واقع البلد بقول أنو نحن في مفترق طرق إذا لم تندلع الثورة (أو التغيير) بفعل وإرادة إنسانية واعية- أي نضج وتهيوء العامل الذاتي -وأخذه لزمام المبادرةوالمبادأة - فقد تأخذ الثورة البشرية طابع ثورات الطبيعة العمياء - البراكين مثلا -بحيث يصعب التحكم في مسارها والتنبوء بنتائجها فقد تطيح بكل البني الاجتماعية والسياسية القائمة وتهدم كل القديم وتقيم علي إنقاضه واقعا جديدا وتفرز قيادتها وشعاراتها وبرامجها من داخلها - وقد يصبح ثوري اليوم - قيقراوي مثلا في نظر ثوار تلك اللحظة رجعيا أو ترقيعيا - بل قد تطيح مقاصل الثورة ببعض قيادتها - الثورة تأكل إبنائها - كما حدث في أم الثورات الحديثة -الثورة الفرنسية !
المشكلة ياصديقي أنو إطراف البلد تبدو أكثر التهابا وتمردا والمركز يبدو -ظاهريا -أقل حساسية وتفاعلا مع حجم الكارثة وا لمخاطر مما سيفرز عملية disharmony
Lack of harmony or ودا سيقود لتفكك البلد صامولة.. صامولة وحتة حتة ! فقد تراكمت المظالم والمرارات والقمع وتفاقم الجوع والمرض والإحساس بالقهر والدونية في كل البلد وإن تفاوتت درجات الإحساس بالتهميش ولهيب الحروب والتشريد ! وإذا لم يتم التعجل بالتغيير وإعادة التوازن فسيتداعي الوطن وتتهاوي أركانه وتصبح إفكارنا مجرد تهويم في الفضاء لأن الواقع والارض الصلبة ستكون قد تغيرت خارطتها وإنمحت معالمها !
.

كيمو يا صيقي كل سنة و انت طيب ياخ!
و خلينا نبدأ من هنا .. ما ياها دي المشكلة ذااااااااتا
العداد رامي و المحصلة بيييييييق زيرو!!

Quote: طيب ومالوا وبرضو رأي ! إمضي في طريقك ياصديقي ودعنا نحفر ونعافر بطريقتنا !! .......

كيف الكلام دا؟
يعني تمسكوني ضنب الككو بـ " جيفارا " دي و اعمل ليكم ثورة براي الله و رقبتي؟ اعملا من دخان سجائري؟
يا صديقي انت الادرى انو الثورة محتاجة كل الناس الراغبين في التغيير .. كل الـstakeholder .. اصحاب المصلحة الحقيقية في التغيير .. او قول كل المتضررين من الوضع القائم.
لا حينجزا فرد، و لا حزب، و لا اي مجموعة .. و زخمها بتستمدو من عرض قاعدتها.

اما المخاطر فستظل قائمة بكل الاحوال ..

Quote: نجد للجد شوف ياقيقراوي واقع البلد بقول أنو نحن في مفترق طرق إذا لم تندلع الثورة (أو التغيير) بفعل وإرادة إنسانية واعية- أي نضج وتهيوء العامل الذاتي -وأخذه لزمام المبادرةوالمبادأة - فقد تأخذ الثورة البشرية طابع ثورات الطبيعة العمياء - البراكين مثلا -بحيث يصعب التحكم في مسارها والتنبوء بنتائجها فقد تطيح بكل البني الاجتماعية والسياسية القائمة وتهدم كل القديم وتقيم علي إنقاضه واقعا جديدا وتفرز قيادتها وشعاراتها وبرامجها من داخلها - وقد يصبح ثوري اليوم - قيقراوي مثلا في نظر ثوار تلك اللحظة رجعيا أو ترقيعيا - بل قد تطيح مقاصل الثورة ببعض قيادتها - الثورة تأكل إبنائها - كما حدث في أم الثورات الحديثة -الثورة الفرنسية ! المشكلة ياصديقي أنو إطراف البلد تبدو أكثر التهابا وتمردا والمركز يبدو -ظاهريا -أقل حساسية وتفاعلا مع حجم الكارثة وا لمخاطر مما سيفرز عملية disharmony Lack of harmony or ودا سيقود لتفكك البلد صامولة.. صامولة وحتة حتة ! فقد تراكمت المظالم والمرارات والقمع وتفاقم الجوع والمرض والإحساس بالقهر والدونية في كل البلد وإن تفاوتت درجات الإحساس بالتهميش ولهيب الحروب والتشريد ! وإذا لم يتم التعجل بالتغيير وإعادة التوازن فسيتداعي الوطن وتتهاوي أركانه وتصبح إفكارنا مجرد تهويم في الفضاء لأن الواقع والارض الصلبة ستكون قد تغيرت خارطتها وإنمحت معالمها !

لحدي اسي انفصل الجنوب .. و مشورة شعبية في جنوب النيل الازرق و جنوب كردفان..
كم صامولة دي؟
كم سنة و ح يكون الفكفكة شبر شبر .. زنقة زنقة .. بيت بيت
بالضبط وجه اعتراضي جاي من هنا ..
نحن مجرد متفرجين ساي!! كورال و اناشيد.. محض منشور .. عرض بوستر .. و بعض محضر
و الحزب الماركسي السوداني تحول لمجر ملاحظ .. و مرات مرات بتفوت عليو و ما بلاحظ أي حاجة ذاتو!!

كدا كدا منتهين ..
ح نخسر شنو غير الاغلال لو غامرنا ..
على الاقل بنكون متنا بنعافر .. و في أمل


-----------

فيورباخي مرة واحدة!! .. هشام بزعل منك كدا .. حصري الزول دا
يا عزيزي انا لا هذا و لا ذاك ..
[ ««أنا ماركسي علي سنة الله ورسوله»» على سبيل التمييز و التميز " عبد الوهاب المسيري**" ]

Quote: كتب الاستاذ / محمد ابراهيم نقد في " مبادئ و موجهات لتجديد البرنامج " : [ ( من العبارات الشهيرة لستالين، العبارة التي وردت في خطابه في تشييع لينين، قال فيها (هناك ماركسية جامدة و ماركسية خلاقة، مبدعة، و انا التزم جانب الثانية). ويشهد التاريخ بنقيض ما ادعى استالين الذي صك مصطلح الماركسية اللينينية آنذاك و اتخذها غطاء لتدشين الجمود وتبرير افكاره و ممارساته). ] يا بدر كلنا خاضعين لحكم التاريخ علينا .. يا ترى ح يشهد بشنو؟ قدامنا ( شباب ) بصنعوا في تاريخهم، زي ما مجايليهم صنعوا اعظم تاريخ في ازاحة الاستعمار التاني الصادر ثورات التحرر، باسم الوطنيةمرة و باسم التخويف و القمع الف مرة.. الشعوب الحرة استأنفت مشوار التثوير يا بدر .. و نحن قاعدين ماسكين لينا كتلوج مكتوب من القرن القبل الفات!؟

** مع انو هو ذاتو الله يرحمو " بنور بالليل" لكن دا البهمني اسي :

Quote: في يناير 2007 تولى منصب المنسق العام للحركة المصرية من أجل التغيير (كفاية) وهي الحركة المعارضة لحكم الرئيس محمد حسني مبارك وتسعى لإسقاطه من الحكم بالطرق السلمية ومعارضة تولي ابنه جمال مبارك منصب رئيس الجمهورية من بعده.

شكراااااااااان يا عزيزي
و عليك الله اعفي لي لو بى ليك ما يضرس في خرمجات اخوك دي

سلام ياقيقراوي ياعزيز

Quote: يعني تمسكوني ضنب الككو بـ " جيفارا " دي و اعمل ليكم ثورة براي الله و رقبتي؟ اعملا من دخان سجائري؟ يا صديقي انت الادرى انو الثورة محتاجة كل الناس الراغبين في التغيير .. كل الـstakeholder .. اصحاب المصلحة الحقيقية في التغيير .. او قول كل المتضررين من الوضع القائم. لا حينجزا فرد، و لا حزب، و لا اي مجموعة .. و زخمها بتستمدو من عرض قاعدتها قال تعالى: (اذهب انت وربك فقاتلا انا ها هنا قاعدون ) !!

لا ياعزيزي براحة وبالهداوة كدة - نحن مامختلفينا في ضرورة الثورة وحتميتها أو حتي في وجوب تصعيد وتائرها وإشعال فتيلها ! لا نحن مختلفيين في الاتي
أنت عاوز ثورة تلغئ وتنسف وتعدم كل مكونات الحاضر والماضي وأنا مع ثورة تثبت علي الإ يجابي وتطويره ونسف أو نفي السلبي وميلاد الجديد! كانت هناك جماعات ثورية في القرن ال 19 تنادي بإجتثاث الاديان والغاء
الدولة والرأسمالية ونسف كل مكونات الحاضر والقطيعة مع الماضي ( فوضويون وعدميون ) وعشان كدة الواحد حذر جدا في إنتقاء المفردات وتوضيح مراده بصورة لاتحتمل اللبس ! تقديري وإمتناني ياقيقا!
كتبت العزيزة تيسير عثمان آل عووضة

Quote: هنا أختلف معك! من أكثر العوامل التي أدت لترسيخ الجهوية هي الأحزاب الطائفية حتى أن أحزاب معينة أصبحت تعرف بقبائل شيوخ تلك الطوائف فعلى سبيل المثال "معظم" الختمية من قبائل الشايقية وما يتاخمها وأهل الشرق و"معظم" الأنصار من قبيلة الدناقلة وأهل الغرب ..

يبدو ياسيدتي المحترمة أن خلافنا لم يحسم بعد في بعض النقاط !ولكن وبالرغم من الخلاف والإختلاف (في طريقة التعاطي والوسائل والإشكالات الثانوية يجمعنا ماهو جوهري تجمعنا الغايات والإهداف الخ ) ولايفوتني أن أطالب من قرأ بوست تيسير بصورة مغلوطة ومتعسفة ( مع إحترام حقهم في الإختلاف ) أن يعيدوا قراءة الكتابة وإستيعاب المقصد وعدم مصادرة حقها في الإنتقاد وأن يتركوا الإحكام المتعسفة وإستخلاص النتائج الحادة و المتعجلة ! أقول هذاليس دفاعا عنها - فهي لاتحتاج لدفاع - وإنماإحقاقا للحق - ..... إحترامي وإعزازي ...

Quote: الأخت الفاضله أم الوليد ، سلام Quote: Quote: أنا ما بقبل يطلق على كيان الانصار كيان طائفي لأنه ما طائفي من حيث تعريف الطائفية ..وما بقبل أن يقال أن الإمام الصادق المهدي له احترام يبلغ درجة التقديس.. وما بقبل يتم التعامل مع الإمام الصادق المهدي بقداسة لأنه دة ما من مقاصد الأنصارية ولا مباديء حزب الأمة وهو نفسه أعلنها زمان :( لا قداسة مع السياسة).. وأنا بفتكر إنه لا قداسة مع أي شيء مش مع السياسة بس لأنه من حيث المبدأ لا قداسة لبشر..كثيرون ارتضوا قيادة الصادق المهدي للحزب منذ بدايةانخراطه في العمل العام لقناعتهم أنه مختلف ويدعو لفكر منفتح ويود أن تكون العقليات المنخرطة في حزب الأمة عقليات نقدية..ويود أن تكون عضوية الحزب أناس يفكرون ويقررون لا يرمون بأعبائهم ومسئولياتهم على القيادة يفوضونها في كل شيء ويقبلون بكل ما يأتي منها بدون تبصر.. تعلمي مدي احترامي و تقديري لك لكن المساله ما مسالة انك تقبلي ولا لا : المساله اننا عندنا وجهات نظر مختلفه في شان عام خلينا نتفق و نختلف بدون ما نفرض قبول أي منا لراي الأخر من عدمو .

الحبيب أمين
العفو العفو يا حبيب مليون مرة العفو (ما بقبل) دي لازمة كدي من لوازم أختك ما تشبث بالرأي لأن الإنسان عندما يقبل أن يكون طرفاً في حوار من المفترض أن يعتبر رأيه فروضاً لا مسلمات فقط كي يفهم الطرف الآخر...لك العتبى

Quote: حزب الأمه ما حزب طائفي كيف يا لنا : و رئاسة الحزب و مراكزو القياديه تورث مع أراضي السقاي و بيوت الملازمين ؟! الحزب ده مش اسسو السيد عبدالرحمن و خلفو ابنو السيد الصديق و خلفو ابنو السيد الصادق و حا تخلفو بنتو السيده مريم ولا ده حزب تاني ؟! ما حزب طائفي كيف و عضويتو - في معظمها - جايه من طائفة الأنصار وارثين الأنصاريه عمن سلف من ابائهم و أجدادهم ( و دي في حد ذاتها ما منقصه ) ! الأمام الصادق يقول (لا قداسه في السياسه ) و ينصب نفسو إمام علي الأنصار - بما في كل مافي تسمية الأمامه من معاني - لو دي ما ركضا وراء القداسه يبقي شنو ؟

يللا أقول ليك حزب الأمة المؤسسون الأوائل له هم الإمام عبدالرحمن زائد مثقفين زائد زعماء عشائر فما ممكن نقول أسسه آل المهدي لوحدهم..
رئيس الحزب في كل مرة جاء فيها على رأس الحزب وحتى كإمام للأنصار انتخب انتخاباً حراً مباشراً ولم ينصب نفسه وممكن في الحالة دي نتكلم عن عدم إعادة إنتخاب الصادق المهدي أو عن الفصل بين إمامة الأنصار وقيادة الحزب مش عن التوريث لأنه ما موجود ولن تسمح به عضوية وكوادر الحزب في المستقبل..

Quote: Quote: Quote: ولو كانت القصة قصة قداسة لرحم مهدوي وقرابة بالمهدي الكبير لكان الناس تبعوا من هو أقرب رحماً للإمام المهدي ... و منو القال ليك إنو الناس ما تابعين رحم المهدي الكبير ؟! رئاسة هذا الحزب - منذ تاسيسه - كانت حكرا علي أبناء و أحفاد الأمام المهدي و مش كده و بس حتي عند تشرذمو تبع الناس ال المهدي : الأمام أحمد المهدي عندو كومو و ولي الدين إبن الأمام الهادي عندو كومو و الصادق إبن الأمام الهادي عندو كومو و كل الرابط بين الناس دي ياها الدماء الزرقاء المستمده من رحم الأمام المهدي !! و المساله ما إنو الأقرب رحما هو الأعلي منزلة ، المساله انها محصوره فيما بينهم : يعني ال المهدي يتداوسو فيما بينهم و البجي مارق منهم ياهو الأمام و رئيس الحزب !!!!

أنا بتكلم يا الحبيب عنا نحن أعضاء حزب الأمة القومي لا عن سوانا..

Quote: Quote: Quote: والحق يقال الإمام الصادق ما بتفرق معاهو ينادوهو يا سيد أو يا بوي أو يا الحبيب الإمام أو يا عمي الصادق أو يا الصادق ساكت ممن هم في مثل عمره ...نهائي...بالنسبة له لا يشكل الأمر مشكلة ولا هاجس..وما بيقبل يقبّلوا يده ولا يتبركوا به ومثل هذه الخزعبلات ...دي حاجات شفتها بي عيني ما حكوها لي..ولمن يهتف الناس لن نصادق غير الصادق يقول لهم:" لا تقولوا ذلك بل قولوا لن نصادق غير صادق"... تثبيت حقه في هذا الجانب حاجة يا الحبيب أمين وانتقاد سياساته وقيادته للحزب والرؤى حول إعادة انتخابه وغيرها من الأمور المشروعة تجاه قيادة فصيل سياسي حاجة تانية... لمن كتبت تعليقي لتيسير و حمور القصد كان انهم ينتقدو الختميه و الأنصار زي ما عايزين لكن ما يستفزوهم لانو في ناس عندهم إحترام يصل لمرحلة التقديس لقادة الحزبين : كان في البال الختميه و ال الميرغني أكتر من الأنصار و ال المهدي !! و الحقيقه إنو المقارنه معدومه تماما بين أبناء الأسرتين فيما يختص (القداسه علي المستوي الشخصي ) : عبدالرحمن الصادق كان معانا في الأهليه المتوسطة ما شفنا فرق بينو و بين أي طالب و لا حتي حبة (طنقعه ) ساي إنو ود الصادق المهدي ، أولاد الأمام أحمد : محمد أحمد (حمام) و الفاضل أصحاب و فرد منذ ألف سنه ما شفتهم يوم إتعاملو مع زول بفوقيه و ( لا اتنين سنتمتر ) و كل ال المهدي البعرفهم و اتعاملت معاهم - علي المستوي الشخصي - تختهم في الجرح يطيب : ناس محترمة و بتحترم الناس ، لكن دي ما المساله : المساله إنو الناس الجاريه في دمهم الدماء الزرقاء دي عندهم حظوه و مقدره علي سبق باقي أعضاء الحزب في مقاعد القياده بمجرد ميلادهم و جريان الدماء الزرقاء المستمده من رحم الأمام المهدي : دي العله الأساسيه و دي القداسه المقصوده ( لال المهدي بالذات ) !!

يا الحبيب أمين المقاعد ما بتكون مؤمنة منذ الميلاد...كلو كلو ما سمعت زول من آل المهدي سقط في انتخابات الحزب للترفيه للمؤسسات؟ حصلت كتييييير وأحياناً لقراب جداً من الإمام وما حأقول منو(:(:(:

Quote: ما عايز أطلع البوست من موضوعو لكن أنا شايف انك - و معاك مجموعة مقدره من الأخوان (عويس و العمده ) كامثله - بتتكلمو عن حزب لا يوجد علي أرض الواقع و عن أشياء لا نراها - نحن عوام الناس ديل - : انتو تقولو حزب الأمه ما حزب طائفي و الواقع يقول رئاسة الحزب تورث و لو كانت الرئاسه تقسم لكان حظ الذكر فيها لال المهدي مثل حظ الأنثيين !! تقولو نحن حزب معارض و قايدين المعارضه و الواقع يردد مع رئيس الحزب اننا متفقين مع الحكومه في 85% من القضايا !! تتكلمو و تدعو للديمقراطيه و ديمقراطيه في حزبكم مافي و اليوم الوحيد - السمعت بانتخابات ديمقراطيه في حزبكم - و أعضاء حزبكم اختارو أمين عام قلتو الزول ده أمنجي و ما بيمثلنا !! صوتكم في المنبر قوي و مصادم للحكومه و صوت حزبكم في الواقع مدجن و يسير مع الحكومه و خط الحكومه !! الشاهد يا لنا أني أظن - و ليس كل الظن إثم - انكم تتبعون و تتبنون خط ما عندو علاقه بخط حزب الأمه علي أرض الواقع : المساله دي انعكست علي رؤيتكم و خلتكم ما عارفين و ما شايفين الطائفيه في حزبكم و لا قداسة ال المهدي فيه و لا أن حزبكم حزب مدجن و موالي لهذا النظام ! لك الود و الأحترام

نحنا عشان جوة الحزب أكتر ناس عارفين الحزب فيهو شنو وما منفصلين منه بل وتجمعنا اجتاماعات بالقيادة وعارفين مستوى سخونة النقاش بتصل ياتو درجة...ياخي لو قدر ليكم تحضرو جلسة مكتب سياسي ولا مكتب تنسيق أعلى والله إلا تعتذرو لكل فرد في الحزب دة اعتذاراً مغلظاً عن تهم القداسة... وحزبنا فيهو انتخابات ممكن تكون فيها شوائب لكن انتخابات وعقد الحزب سبعة مؤتمرات عامة..أما كون الحزب مدجن وموالي للنظام فدة غير صحيح يا حبيب لي يوم الليلة الجاريين بي قلبهم وربهم دايرين يخلونا نتآلف مع المؤتمر الوطني مساعيهم بائرة...فدة دليل شنو؟

سلااام
لانو ماف زول رد على قلت اعمل للموضوع فوق
وكــــــــــــــدا بس
يلا سلااام










قاسم المهداوى

Quote: سلااام لانو ماف زول رد على قلت اعمل للموضوع فوق وكــــــــــــــدا بس

لووووووووول
مهداوي يا قيقراوي*

ازيك ياخ

هنا قلع بس ..

ما شايفنا نزعنا القداسة و الحصانة عن السادة
و كل زول لصق لنفسو ما يحب و يرضى ان ينابز به من ألقاب؟


الزعيم


-----

* العهدة على حبيبنا القيقراوي الطيب رحمة .. الامس كان معانا

لي عودة ..