اليوم أتممت 30عاماً على سطح الكرة الأرضية - المرسوم العيني ..

الليلة تميت 30 سنة


راجعت فيها كل الإنجازات/الإخفاقات التي مرت علي منذ مولدي الميمون
وجدت أنني وبحساب الربح والخسارة "كسبانة" ويا للحظ ..
فقد حققت معظم ما تمنيته وخططت له في حياتي
ثلاثون عاماً كانت حافلة بكل أنواع الأحاسيس الإنسانية بكل تناقضاتها
فرح .. حزن .. نجاح .. فشل .. غضب .. رضا .. طموح .. يأس
رغم حالات الإحباط التي كانت تعتريني حين أفشل
وحالات اليأس التي تصيبني عندما لا أبلغ هدفي
أستطيع أن أقول أن هذا الفشل كان بمثابة طاقة دفع للأمام
مكّنتني من تحقيق ما أريد

أي شيء سيحدث لي أو تجربة سأمر بها بعد هذا العمر فهي بمثابة recycling
أو إعادة تدوير لما حدث مسبقاً ..
كل ما يمكن أن يفعله المرء في حياته
على الصعيد الأكاديمي أو المهني أو الإجتماعي مر علي
ولكن هذا لا يمنع أن يكون الطعم المعاد تدويره أحلى وأعذب

مثل هذا اليوم من كل عام أصدر مرسوماً ملكياً يعرف بالمرسوم العيني ..
يضم ويحتوي على كل ما تمت مراجعته و/أو تغييره في عملية تقييمية يطلق عليه البعض "النقد الذاتي"
ومنشأ كلمة العيني آت من كون كل الأمور التي تتم مراجعتها وتقييمها لاحظت أنها تبدأ بحرف العين
يأتي على رأسها:
عائلة
عقل
علم
عمل
عاطفة
عبادة
قمت بإخفاء بعض "العينات" لدواعي ضبط الجودة
طبعاً مسألة المراجعة والتقييم غير قابلة للنشر والإطلاع
ولكن أحببت إشراككم في ثلاثينيتي هذه والإحتفاء معي بها
وعقبال الثلاثينية القادمة


كل سنة وأنا طيبة
وعقبال الشمعة الستين

بس ما تكوني مريخابية










كل سنة وانتي زي ما تحبي

يا ميدو ..

وإنتي طيبة يا بت يا طيبة






طبعاً مريخابية
كيتاً في ناس كدة ..



تحت تحت أنا بشجع أي نادي بيلعب فيهو [كاكا] لو يبقى الهلال العاصمي

تيسير العزيزة
كل سنة وأنت بألف خير
أدام الله أفراحك

Quote: مثل هذا اليوم من كل عام أصدر مرسوماً ملكياً يعرف بالمرسوم العيني .. يضم ويحتوي على كل ما تمت مراجعته و/أو تغييره في عملية تقييمية يطلق عليه البعض "النقد الذاتي" ومنشأ كلمة العيني آت من كون كل الأمور التي تتم مراجعتها وتقييمها لاحظت أنها تبدأ بحرف العين يأتي على رأسها: عائلة عقل علم عمل عاطفة عبادة

بي ( عيناتك ) الكتيرة دي
بقيتي لى الصادق المهدي الصادق المهدي

________________________

أول مرة - رغم الصداقة - أعرف أنك أكبر مني بى سنتين بس

صحبي عاطف عمر ..

Quote: بي ( عيناتك ) الكتيرة دي بقيتي لى الصادق المهدي الصادق المهدي

إنت خليت فيها عينات إسمك شال نصها

بعدين الصادق المهدي خليهو يخلص "الأونات" وبعدين يقبل على العينات

تشكرون يا دفعة

Quote: كل سنة وأنا طيبة وعقبال الشمعة الستين

تيسير كل سنة وانتى طيبة

الستين حبة اتمنى ليك 100 عام بس ما من العذلة

ياخى انت ر صيد يضاف للمراة السودانية


كل عام وانتى بخير والحركة النسوية للامام

Quote: الليلة تميت تلاتين سنة

في تخفيضات ولا شنو ؟؟
ده موسم الأوكازيونات ؟؟
غايتو للضمان كده : كل عام وإنتي تيسير عووضة

Quote: أول مرة - رغم الصداقة - أعرف أنك أكبر مني بى سنتين بس

عاطف لو عاوز تكبر أكبر براك ما تكبرنا معاك
وبرضو كل سنة وإنت طيب



واحدة تنقص وواحد يزيد
خليكم صادقين

Happy Birthday Taisa

يا فردة لكن ما بيظهروها عاملة كده ..
الي عهد قريب نعرف أن عمر المرأة واحد من الأسئلة (العيب) في مجتمعاتنا ..
دي جندرية منكـ يعني ؟


_
ربنا يحقق ليكـ أمنياتكـ و يجعل كل حساباتكـ ربح بدون خسارة .. يا أكبر مربح .

Quote: يا فردة لكن ما بيظهروها عاملة كده .. الي عهد قريب نعرف أن عمر المرأة واحد من الأسئلة (العيب) في مجتمعاتنا .. دي جندرية منكـ يعني ؟

يا فلة قالوا الفيك بدربو

بعدين ما تفرح

دي أول وآخر سنة يتم فيها الإعلان عن عمر جلالتي
أصلو زي الظواهر الفلكية مرة في العمر ..



من هنا وجاي أنا مواليد خمسة وتمنين
وهذا منا للمعلومية

ـــــ

Quote: ربنا يحقق ليكـ أمنياتكـ و يجعل كل حساباتكـ ربح بدون خسارة .. يا أكبر مربح

تسلم يا فلة يا صديقي، ودعوتك دي براها بالدنيا ..

ثااااابت "تقرأ بنبرة عسكرية"

Quote: في تخفيضات ولا شنو ؟؟ ده موسم الأوكازيونات ؟؟ غايتو للضمان كده : كل عام وإنتي تيسير عووضة

أحسب سنتين التالتة مجاناً


ياخ إنتا دفعة الهادي آدم
أغداً ألقاك دي قالوا كتبها ليك في رفاعة وإنتو مارقين من الضمنة* بالليل



ــــــــ
*الضمنة = الدومينو بلغة الفرنجة، لعبة تجمع مسني الحي وأرباب المعاشات ..

Quote: لكبير السن مكانته المتميزة في المجتمع المسلم فهو يتعامل معه بكل توقير واحترام، يحدوه في ذلك قول الرسول صلى الله عليه وسلم، عن عمرو بن شعيب عن أبيه عن جده رضي الله عنهم قال: "ليس منا من لا يرحم صغيرنا ويعرف حق كبيرنا" رواه أبو داود والترمذي. ويظهر ذلك التوقير والاحترام في العديد من الممارسات العملية في حياة المجتمع المسلم، وجميع هذه الممارسات لها أصل شرعي، بل فيها حث وتوجيه نبوي فضلاً عن ممارساته صلى الله عليه وسلم، مع المسنين وتوجيه أصحابه نحو العناية بالمسنين وتوقيرهم واحترامهم وتقديمهم في أمور كثيرة منها على سبيل المثال لا الحصر: 1 ـ البدء بالكبير بالأمور كلها: كأن يتقدم الكبير على الصغير في صلاة الجماعة، وفي التحدث إلى الناس، وفي الأخذ والعطاء عند التعامل.. لما روي مسلم عن أبي مسعود قال: كان رسول الله صلى الله عليه وسلم يمسح مناكبنا في الصلاة ويقول: "استووا ولا تختلفوا فتختلف قلوبكم ليليني منكم أولو الأحلام والنهي (هم الرجال البالغون) ثم الذين يلونهم ثم الذين يلونهم وإياكم وهيشات الأسواق " أي اختلاطها والمنازعة والخصومات وارتفاع الأصوات واللفظ والفتن فيها. 2 ـ الترهيب من استخفاف الصغير بالكبير: روى الطبراني في الكبير عن أبي أمامة عن رسول الله صلى الله عليه وسلم أنه قال: "ثلاث لا يستخف بهم إلا منافق: ذو الشيبة في الإسلام، وذو العلم وإمام مقسط." والاستخفاف كأن يهزأ به ويسخر منه ويوجه كلاماً سيئاً إليه، ويسيء الأدب في حضرته، وينهر ه في وجهه وكم من مناظر يندي لها الجبين نشاهدها في الطرق ووسائل السفر المختلفة ونجبر على سماعها من داخل البيوت على ما يقال فيها تدمي لها القلوب. 3 ـ الحياء من الكبير: لأن الحياء خلق يبحث على ترك القبيح، ويمنع من التقصير في حق الكبير ويدفع إلى إعطاء ذي الحق حقه. روى ابن ماجة والترمذي عن أنس رضي الله عنه قال: قال رسول الله صلى الله عليه وسلم "ما كان الفحش في شيء إلا شانه، وما كان الحياء في شيء إلا زانه" وروى الشيخان عن أبي سعيد رضي الله عنه قال "لقد كنت على عهد رسول الله صلى الله عليه وسلم غلاماً فكنت أحفظ عنه فما يمنعني من القول إلا أن ها هنا رجالاً هم أسن مني". 4 ـ القيام للقادم: روى البخاري وأبو داود والترمذي عن عائشة رضي الله عنها قال: "ما رأيت أحداً أشبه سمتاً ودلاً وهدياً برسول الله صلى الله عليه وسلم ـ في قيامها وقعودها ـ من فاطمة بنت رسول الله صلى الله عليه وسلم، قال: وكانت إذا دخلت على النبي صلى الله عليه وسلم قام إليها فقبلها وأجلسها في مجلسه، وكان النبي صلى الله عليه وسلم إذا دخل عليها قامت من مجلسها وقبلته وأجلسته في مجلسها". 5 ـ تقبيل يد الكبير: أخرج أحمد والبخاري وأبو داود وابن الإعرابي عن زارع وكان في وفد "عبد القيس قال: لما قدمنا المدينة جعلنا نتبادر من رواحلنا، فنقبل يد النبي صلى الله عليه وسلم ورجله. وروى البخاري عن الوازع بن عامر قال: قدمنا فقيل ذلك رسول الله فأخذنا بيده ورجليه نقبلها. لأن هذا له أثر كبير في نفوس الكبار وإنزالهم المنزلة التي تليق بهم مع مراعاة: 1 ـ ألا يغالوا في ذلك لما للمغالاة من تغاضي عن المساويء، ومجافاة للحق، وانتكاس لحقيقة الاحترام. 2 ـ ألا يزيدوا عن الحد الذي أمر به الشرع الإسلامي كالانحناء أثناء القيام، أو الركوع أثناء التقبيل. 6 ـ إنزال الكبير منزلته اللائقة به: روى الإمام أحمد بإسناد صحيح عن شهاب بن عباد أنه سمع بعض وفد عبدالقيس وهم يقولون: قدمنا على رسول الله صلى الله عليه وسلم، فاشتد فرحهم، فلما انتهينا إلى القوم أوسعوا لنا فقعدنا، فرحب بنا النبي صلى الله عليه وسلم ودعانا، ثم نظر إلينا، فقال: من سيدكم وزعيمكم؟ فأشرنا جميعاً إلى المنذر بن عائذ.. فلما دنا منه المنذر أوسع القوم له حتى انتهى إلى النبي صلى الله عليه وسلم.. فقعد عن يمين رسول الله صلى الله عليه وسلم، فرحب به وألطفه وسأله عن بلادهم..". وهذا غيض من فيض وبعد، فإن توقير الكبير ذو الشيبة المسلم سمة من سمات المجتمع المسلم. **رعاية كبار السن من غير المسلمين:*** لم تقتصر هذه الرعاية على المسن المسلم بل امتدت يد الرعاية لتشمل غير المسلم طالما أنه يعيش بين ظهراني المسلمين. فها هي كتب التاريخ تسطر بأحرف ساطعة ، موقف عمر رضي الله عنه ـ مع ذلك الشيخ اليهودي الكبير فيذكر أبو يوسف في كتابة (الخراج) "أن عمر بن الخطاب رضي الله عنه ـ مر بباب قوم وعليه سائل يسأل ـ شيخ كبير ضرير البصر فضرب عضده من خلفه فقال: من أي أهل الكتب أنت؟ قال يهودي. قال: فما ألجأك إلى ما أرى؟ قال: أسأل الجزية، والحاجة، والسن. قال: فأخذ عمر ـ رضي الله عنه ـ بيده فذهب به إلى منزله فرضخ له ـ أي أعطاه ـ من المنزل بشيء ثم أرسل إلى خازن بيت المال فقال: انظر هذا وضرباءه، والله ما أنصفناه إذا أكلنا شبيبته ثم نخذله عند الهرم {إنما الصدقات للفقراء والمساكين..} سورة التوبة 60. .... وهذا من المساكين من أهل الكتاب، ووضع عنه الجزية وعن ضربائه". وبعد هل يمكن أن نؤثر الكبير في الجلوس في المكان المحدد له في وسيلة السفر والذي حددته الدولة أو المملكة أو الإمارة؟ هل يمكن أن نأخذ بأيديهم عند عبور الطريق؟ هل يمكن أن نقوم لهم عند حضورهم ونقبل أيديهم؟ هل يمكن إنهاء مصالحهم في أسرع وأيسر وقت مع البشاشة في وجوههم؟ هل يمكن أن نقوم على خدمتهم ونراعي فيهم تعاليم الإسلام ولاسيما إذا كانوا آباء أو أمهات؟ لأن دور المسنين تجأر إلى الله من عقوق الأبناء فما بال الذين لا يملكون دفع ثمن الإقامة فينامون في العراء ومن أنفقوا عليهم وقاموا على تربيتهم حتى وصلوا إلى المكانة المرموقة يتنعمون في المأكل والملبس والمشرب والفرش وظلم المعصية. هل يمكن أن نصغي لحديثهم ففيه عبر السنين؟ نسأل الله أن يرزقنا حب القيام على خدمة ورعاية الكبار.

منقول



مراجع هامة
- ليس منا من لا يوقر كبيرنا
- احترم من راي الشمس قبلكـ
- موش إتفقنا قبل كده ما تقولي عمرك تاني في مكان عام
- اكبر منك بيوم يعرف عنك بي سنة
- .. الخ

تيسير

كل سنة و إنت طيبة و عقبال الشمعة رقم 100

Quote: تيسير كل سنة و إنت طيبة و عقبال الشمعة رقم 100

وإنت طيب يا أبوجهينة يا تاج راسنا ..





غايتو كان تميت 100 سنة، الناس القاعدين معاي إلا يأجزولُن

عمو خدر أبوعبيدة ..

Quote: مراجع هامة - ليس منا من لا يوقر كبيرنا - احترم من راي الشمس قبلكـ - موش إتفقنا قبل كده ما تقولي عمرك تاني في مكان عام - اكبر منك بيوم يعرف عنك بي سنة - .. الخ

ما فضل ليك إلا تغني لي غنية كمال ترباس السغيلة ديك
شنو كدة ما بعرفو وأخشى عامل السن



ـــــــــــــ
مبروك دخولك الإسلام ..
قال منقول قال

يا نجلاء ..

Quote: الستين حبة اتمنى ليك 100 عام بس ما من العذلة ياخى انت ر صيد يضاف للمراة السودانية كل عام وانتى بخير والحركة النسوية للامام

يا ستي تسلمي وتعيشي

لكن وحياتك ستين كفاية جداً
يا ريت أقدر أعمل فيها نص العملتو في التلتين الأولى


الخوف أقوم أخرف قبل أصل ستين
والله حيكون فيني حلاة خرف

Quote: فرح .. حزن .. نجاح .. فشل .. غضب .. رضا .. طموح .. يأس

التشكلية أعلاه ينقصها أهم زول
بدونه بتكون الثلاثينية قد عبرت سااااكت
بدون طعم
الحب

Quote: فرح .. حزن .. نجاح .. فشل .. غضب .. رضا .. طموح .. يأس .. حب

رأيك شنو في التعديل بالاضافة هذا ؟

مع أمنياتي لك بعمر مديد و سديد وسعيد ومفيد

أبو ساندرا ..

Quote: التشكلية أعلاه ينقصها أهم زول بدونه بتكون الثلاثينية قد عبرت سااااكت بدون طعم الحب

شفت التشكيلة أعلاه دي كلها من تحت راس المدعو الحب دة
رغم إنها ممكن تتطبق بعد داك على باقي الأحداث ..

Quote: فرح .. حزن .. نجاح .. فشل .. غضب .. رضا .. طموح .. يأس = حب

كدة كيف؟




ــــــــــــ
* تقرأ هذه المداخلة مع أغنية سيرة الحب لأم كلثوم كخلفية موسيقية

كل سنة وانت طيبة وعقبال الشمعة المية




لكن قصة المرسوم العيني دي بالغتي فيها

تسلم يا ود البشرى وإنت طيب ..

المرسوم العيني دة فكرة فعالة لمن يريد تطوير نفسه




"تيسير عووضة مركبة مكنة معمر القذافي "

Quote: *الضمنة = الدومينو بلغة الفرنجة، لعبة تجمع مسني الحي وأرباب المعاشات ..

يعني أنا كنت من أرباب المعاشات ومسني الحي وأنا طالب ثانوي
غايتو جنس حال بتاع المابدورك في الضلمة بعمل حركات



يا تسيير تلاتين سنة إنتي بتنضفي كمونية*


----------------------------------
الكمونية بلغة أهل الجزارة هي :
الإمعاء الدقيقة .. قطع من القلب والكبد والبنكرياس
تقوم بنظافتها الحبوبات وكل من وصلت لسن اليأس (اللائي يئسن من خيراً في الحياة )

مودتي وتقدير .. تهدئة لعب

وإمرة تدخل "الثلاثين" بكامل مشمشها *

ياخ والله ياتيسير أجمل العمر ...
التلاتين دي بذكر في الفيلم بتاع جيفارا " موتر سايكل ديريز " كتب في يومياته : ها انا في الثلاثين ، ياله من عمر
مناسب للنصر والهزيمة ، ومناسب للحب والفشل والفرح.والثلاثين عمر مناسب للحياة كما انه مناسب للانتحار ...

اتذكرت مرة واحد صاحبنا بعد ما انا دخلت التلتين "قبل سبعة شهور" رسل لي مسج في فيس بوك ، دقيقة انقلها ليك ك

قال شنو :

Happy Birth day Hima , you know , The only time you really live fully is from thirty .
The young are slaves to dreams; the old servants of regrets. Only the middle-aged have all their
five senses in the keeping of their wits

enjoy your mid- age

إنتهى.

مبروك المشمش ياتيسير وسنة حلوة ياجميل ...

_____________

* محمود درويش من نص علي هذه الأرض ما يستحق الحياة بتصرف ، المشمش اصلا في الاربعين :)

تيسـير يا دفعـة
كل سنة وإنتي طيبة، وكل عام وأنتي بخير، والعـين بالعـين والسـين بالسـين والباقي يبقى، ومزيدا من النجاحات والإنجازات، وإنشاالله عمرك يطـول، متل مجاري البحـور، مش إلا الستين والمية الشوية دي!.. مع التحايا والسـلام..

Quote: وعقبال الثلاثينية القادمة

Quote: وعقبال الثلاثينية القادمة

الف الف مبروك يا أستاذة

يعني أنا أكبر منك بـ 10 سنوات و و4 شهور و5 يوم بس ؟؟؟

مرور سنة بالتمام والكمال حدث مهم في حياة الانسان
مرور عقد من السنوات حدث أهم
والـ 30 بالذات مغستا كتيرة يا بنتي ؟؟
اسعليني أنا


عمر مديد من الانجازات والهناءات
وكل سنة وانتي طيبة

Quote: عائلة عقل علم عمل عاطفة عبادة

كل سنة وانتي طيبة
وتاني كل سنة وانتي طيبة

وعبال الشمعة الع شرمية


خالص الود

بيناوي ..

تسلم يا ملك



ونبارك ليك أجمل سنين العمر ..



ـــــــــ
قيقراوي وينو
مالو ماجا بارك لي التلتين بتاعتي دي
بس فالحين اليوم كلو تكوركوا لي بعض وتحمونا النوم وتشيلوا اللوم
بيناوييييي
قيقراويييي

Quote: مرور سنة بالتمام والكمال حدث مهم في حياة الانسان مرور عقد من السنوات حدث أهم والـ 30 بالذات مغستا كتيرة يا بنتي ؟؟ اسعليني أنا

شكراً فتحي البحيري على الأماني الطيبة

كل ما تمر سنة من عمري بكون مبسوطة
مع إنو مفروض يحصل العكس ..

حكاية العمر دي زي قصة نصف الكوب المليان والفاضي
بقدر ما ناس بيسعدوا في يوم ميلادهم
بنلقى ناس بيحزنوا لأن عمرهم نقص سنة "كأنهم عارفين حيعيشوا قدر شنو"

أزهري عوض الكريم ..

Quote: وعقبال الثلاثينية القادمة

Quote: وعقبال الثلاثينية القادمة

دي نحسبها ليك ستين يعني ولا كيف ؟

يا عيسى ..

Quote: تيسـير يا دفعـة كل سنة وإنتي طيبة، وكل عام وأنتي بخير، والعـين بالعـين والسـين بالسـين والباقي يبقى، ومزيدا من النجاحات والإنجازات، وإنشاالله عمرك يطـول، متل مجاري البحـور، مش إلا الستين والمية الشوية دي!.. مع التحايا والسـلام..

تسلم على الكلام اللطيف والأمنيات ..
وحكاية العين والسين دي حلوة

عيد سعيد وعمر مديد ان شاء الله

تيسير..
كل سنة وانتي طيبة ويخلي ليك المعاك ويديك راحة البال....
ـــــــــــــــــــــــ
بم اني اكبر منك بما يناهز الـ14 عام فبتوقع منك حفظ المقامات والاحترام الكاااااامل..
(محترمين بعض لكن دايرين زيادة)..

تيسير

كل عام و أنت كما تشتهين أنت و من تحبين

و الأماني تصبح حقيقة

و الأحلام تصبح واقعاً

Quote: كل عام و أنت كما تشتهين أنت و من تحبين و الأماني تصبح حقيقة و الأحلام تصبح واقعاً

أحلى دعوة

تسلم سامي صلاح ..

Quote: بم اني اكبر منك بما يناهز الـ14 عام فبتوقع منك حفظ المقامات والاحترام الكاااااامل.. (محترمين بعض لكن دايرين زيادة)..

صحي يا خالتو؟



يا بت بلا 14 سنة بلا كلام فاضي معاك
المقامات محفوظة والإحترامات موجودة
لكن الزيادة دي خليني أشوف ليك حمور ..

شكراً عبدالله عثمان على الأمنيات الطيبة ..

جريفاوي ..

وينك ياخي؟


فعلاً أجمل العمر ..
شعور غريب ولذيذ ملاني أمبارح
وجدت نفسي أقف في المنتصف من كل شيء .. بين بين

Quote: The young are slaves to dreams; the old servants of regrets. Only the middle-aged have all their five senses in the keeping of their wits

صاحبك دا حكيم
فأنا الآن أستمتع بكامل إدراكي وحواسي الستة أو قل السبعة ..


تسلم يا إبراهيم
وسعيدة أن بدأت ثلاثينيتي ببضع كلمات من شاعرنا الهارب درويش ..

Quote: يعني أنا كنت من أرباب المعاشات ومسني الحي وأنا طالب ثانوي

وووب علي يا ثابت يعني إنت لمن كتبوا أغداً ألقاك كنت في الثانوي؟

Quote: تقوم بنظافتها الحبوبات وكل من وصلت لسن اليأس (اللائي يئسن من خيراً في الحياة )

نحيلك للقصة بتاعة المرة والرقشة والكمونية
كاتبها على ما أظن الفاتح جبرة عشان تشوف اليأس من الحياة الما خمج ..

كل سنة و انت بالف خير
عارفه يا تيسير انك بديتى اجمل سنين العمر بالنسبة لينا احنا (الجكس).?الثلاثينات و الاربعينات.
الواحده بتكون خلصت قريتها (لو عاوزه تقرا) و لقت ليها وظيفه (لو عاوزه تشتغل). و بتكون شخصيتها اتكونت تماما. عارفه منو يكونوا اصحابها و منو معارف بس و منو ما مهمين اصلا فى حياتها.
غالبا.. بالعمر ده بتكونى مستقلة فى حياتك. بعد كده مكن (بالجد) تستمتعى بيها (بحياتك).
حياتك ابدا ما ح تكون رسايكل...ابدا...ح تفرحى (كما لم تفرحى من قبل). و ح تندهشى . ح تحلمى احلام جديده و ح تحققيها -باذن المولى عز و جل. تعرفى ناس جداد و تحبى ناس زياده.
و صيتى...استمتعى بكل لحظة فى حياتك.You will love it

إلي الأمام

مزيدا من الانجازات
التقدم
النجاح

والفرح

تحياتي تيسير

سلام يا تيسير و كل عيد و انتى بالف خير

Quote: اليوم أتممت 30عاماً على سطح الكرة الأرضية

بس قرّطى على كدا (-!-)

Quote: قمت بإخفاء بعض "العينات" لدواعي ضبط الجودة

لو محتاجة لضابط ضبط جودة قولى عووووك

كل سنة و أنت طيبة و عقبال التسطيح لتسعين سنة أخرى
ربّنا يحفظك و يحقق كلّ آمالك و يذهب بكلّ آلامك

ممكن أطلب .. عايز كلمات متقاطعة فى دورة المنبر الجديدة و أهديها لعزاز شامى و الصديق نوبى و لجميع أهل العوض

سنه حلوه يا جميل

كل الاماني الطيبه تتحقق وعمرك فيهو البركه ان شاء الله

Quote: اليوم أتممت 30عاماً على سطح الكرة الأرضية

مع مراعاة فروق الوقت و حذف الجمع و ايام السبت لأن السبت اخدر و ايام الأحاد لأن الاحد أحد النصارى و ايام الاربعاء لانه اربعاء و عقاب شهر و حذف العطلات الرسمية و عيد الجلوس الملكي للمملكة العربية السعودية و يوم الاستقلال الامريكي و يوم الأرض و اجازات الكوارث الطبيعية و الاوبئة و عيد العمال و أيام عرض مواسم استار اكاديمي.

الإبن حمور زيادة ..


تعرف يا إبني، زماااان في الشتينات كنا بنطلع من ميدان المولد في بحري هناك ونتحرك على جهة كبري النيل الأزرق
ثورة أكتوبر 64 نحنا كنا حسب مأ أتذكر شغالين في الشكة حديد
أتذكر كنا بنطلع الشفع من المدارس والناس من البيوت والدكاكين والمكاتب عشان يمشي يتظاهروا معانا
لغاية ما قلبناها فوق راس الفريق عبود، خلي بالك يا إبني الشعب بتاعنا دا بينتفض كل 21 سنة
كان مفروض ينتفض سنة 2006 لكن دقت في العراضة ما مشكلة نشتنى الـ 21 سنة البعديها على 2027
لو الجماعة ديل لسة قاعدين يانا اللحقناهم عمك عبود وعمك نميري

Quote: و اجازات الكوارث الطبيعية

عليك الله في كارثة طبيعية أكتر منك؟

دلال عزالدين ..

Quote: سنه حلوه يا جميل كل الاماني الطيبه تتحقق وعمرك فيهو البركه ان شاء الله

الله يبارك فيك يا بت يا لطيفة




خالص الشكر ..

تسلم يا حلاوي وكل سنة وإنت بألف خير ..
ومشكور على الدعوات الطيبة

Quote: لو محتاجة لضابط ضبط جودة قولى عووووك

والله ممكن ضابط جودة وبالعدم ضابط إيقاع
زي بعضو

Quote: ممكن أطلب .. عايز كلمات متقاطعة فى دورة المنبر الجديدة و أهديها لعزاز شامى و الصديق نوبى و لجميع أهل العوض

طيب رايك شنو نخلي بكري يجيب لينا القديم داك زاتو ولا نعمل واحد جديد؟
بيني وبينك، مغرودين فيهو ..

محمد آدم ..

Quote: إلي الأمام مزيدا من الانجازات التقدم النجاح والفرح تحياتي تيسير

أشكرك على كلمات التشجيع والدعم
وتمنياتك الطيبة


وتسلم ..

سمارت إنتي ..

مرة كتبت في أحد البوستات زمان نفس كلامك دا
إنو أجمل عمر للمرأة "أو للجكس على قولك" هو الـ30s والـ40s

زمن جني الثمار يا سمارتي
ثمار الدراسة وسهر الليالي وثمار الشغل بإعتبار إنك بتبدي تترقي وفي نفس الوقت شغلك بيقل وما زي لما تكوني مطحونة في بداياتك المهنية
وثمار أمومتك لأنو أولادك بيبتدوا يكبروا ويبقوا واعين وبتظهر نتائج تربيتك ليهم

بتبدي تتذوقي طعم النجاح الحقيقي وبتبقي عند خياراتك لأنو الرؤية بتكون وضحت بالنسبة ليك في معظم الأشياء
قبل 10 سنين من الآن حاجات كتيرة كانت غير واضحة المعالم بالنسبة لي
أمور تتعلق بالدين والدنيا والمرأة والحداثة والتقليدية والفنون والسياسة والحياة عموماً
وحاجات كتيرة ماكان عندي ليها رؤية محددة
والغريب ما شعرت بي الكلام دا إلا قريب دا لما بدت شخصيتي تتبلور وتاخد شكلها النهائي الهسة دا واللي ما أظن إنو يتغير تاني بنفس المستوى داك
ما بقدر أتخيل إنو طريقة تفكيري وشخصيتي تتغير بعد 10 سنوات بنفس الريت دا "تبقى مصيبة "

Quote: حياتك ابدا ما ح تكون رسايكل...ابدا...ح تفرحى (كما لم تفرحى من قبل). و ح تندهشى . ح تحلمى احلام جديده و ح تحققيها -باذن المولى عز و جل. تعرفى ناس جداد و تحبى ناس زياده. و صيتى...استمتعى بكل لحظة فى حياتك.You will love it

يمكن أكون محتاجة شوية أوضح حكاية الريسايكلينق دي لأنو لاحظت معظم الناس فهمتها بشكل تاني
تحديداً قصدت إنو أنا بديت حياتي بالدراسة ثم الزواج ثم الأمومة ثم الطلاق ثم العمل وهسي رجعت تاني للدراسة وقد يكون في حياتي في مشروع زواج آخر وقد تكون أمومة أخرى وعمل آخر وهكذا دواليك

نفس الـ process بتاعة العشرة سنين الفاتت حا تكرر تاني بس دا ما معناهو إنو طعمها حا يتكرر
العملية بتتكرر لكن يظل طعم وإحساس كل واحد مختلف وغير مكرر ودا القصدتو وخلاني أكتب:

Quote: كل ما يمكن أن يفعله المرء في حياته على الصعيد الأكاديمي أو المهني أو الإجتماعي مر علي ولكن هذا لا يمنع أن يكون الطعم المعاد تدويره أحلى وأعذب

تسلمي يا سمارتي إنتي
مداخلتك فتحت شهيتي للكتابة ..

كل سنة وانتي كما تتمنين ... لكن حكاية اعادة التدوير حقو تراجعيها ... وتنتجي كل يوم جديد
على كل حال انا بقيت احسبها بالايام .. وفي يوم 9/11 اكملت 20,000 يوم .. وعملت بوست مافي زول قال لي مبروك او انعل ابوك .. وما عارف هي مناسبة سعيدة ام تعيسة .. لانو كل يوم زيادة معناها يوم اقل وما حأقول ليك عقبال 100 سنة لانها كتيرة وفيها احتمال الخرف .. لكن اقول ليك بارك الله لك في عمرك ان طال او قصر

11 سبتمبر عيد ميلادي رقم 20,000

كل سنة وانت طيبة ,, ومتعك الله بالصحة والعافية.


ده اجمل ايام في حياتك عيشيها بسعادة ما تندمي


علي اللفات واتهني بالجاي. نحن فتناك باكتر من


20 سنة والحمد لله مستمتعين بالحياة وكلنا امل في اللجاي.

انتو شنو الناس الجميلين كلهم تامين تلاتين في السنة دي ؟؟؟


قبل شهور اعلنتا نانسي عجاج
اليوم اعلان تيسير عووضة ..



تيسير كل يوم جديد وانتي طيبة
وعقبال الشمعة ال90
(اكتر من كدة بتكون لواقة ساااااي ) ....

Quote: أي شيء سيحدث لي أو تجربة سأمر بها بعد هذا العمر فهي بمثابة recycling أو إعادة تدوير لما حدث مسبقاً ..

ياتو عمر ده ..
إنتى يادوب ختبدى تجربى .. دى كانت المناظر
التلاتين ديل متذكرنها طشاش طشاش ..

كل سنة وأنتى طيبة .. ولما تصلى الأربعين مسكلينى

كل سنة وانتي طيبة
بالتوفيق والنجاح بإذن الله

تيسير كل سنة و انت طيبة
عمر مديد..وعقبال 100 شمعة..
السنة الجاية تكون احلي..





_____
انا ذكري ميلادي كانت 22\9 يعني
قبل منك بيوم واحد...
بس اكبر منك بشوية سنوات..
ههههههههه
عدت ايها الشقي.....!!
كدي شوفي هنا..
مع اطيب الامنيات

الف مبروك
وتمنياتى بى تلاتينتين تانى

احلى حاجة

نتجة الجرد

انا اقدر المتفائل والمتفائلة

كل سنة وإنت طيبة وعمر مديد بمزيد من محبة الناس لك



محي الدين جبريل

كل سنه وانت اكثر القا يا تيسير
امنياتي الصادقه ليك بكل ما هو جميل

كل سنة وانت بالف خير

Quote: أي شيء سيحدث لي أو تجربة سأمر بها بعد هذا العمر فهي بمثابة recycling

كلام نوهائي ؟؟؟؟
مافي مِني مِني ؟؟؟



.....
ياخي كل سنة و إنتي كده ..
أصلية و تجضيمة .

عمدة يا أصلي ..



وكل سنة وإنت فنان ومترف الريشة والقلم ..

وإنت بألف خير وصحة يا طارق جبريل ..

دوما ست الكل ..

Quote: كل سنه وانت اكثر القا يا تيسير امنياتي الصادقه ليك بكل ما هو جميل

يا ستي تسلمي ويسلم وعيك وربنا يخليك لينا ..

محي الدين جبريل ..

Quote: كل سنة وإنت طيبة وعمر مديد بمزيد من محبة الناس لك

ألف شكر ويديك العافية

محبتهم وسام على صدري ويستحقون مني أضعافها




تسلم ..

أستاذنا محمد سيدأحمد ..

Quote: الف مبروك وتمنياتى بى تلاتينتين تانى احلى حاجة نتجة الجرد انا اقدر المتفائل والمتفائلة

يا سيدي تسلم

ونحن يا دوب إبتدينا زي ما بيقول سيف الدين الدسوقي ..

هواري نمر ..
وإنت طيب وسالم

مشيت الرابط بتاعك وجبت منو الكلام دا:

Quote: ماهو الجديد في (عيد)الميلاد؟؟ او في ذكري يوم الميلاد؟؟؟ هي ذكري...ليست للمولود و لكن للوالدين في اعتقادي! فهما من قررا الانجاب.. واختبار الاسم! وعاشا معا... اقسي و اجمل ايام من عمر المولود..! حمل و وضوع و فطام و تربية و تنشئة... اذن هما الاحق بالاحتفال مني!

كلامك صحيح .. ذكرى للوالدين
فهما من صنع الحدث وعايشه بعد ذلك


والدتي يا هواري حافظة تاريخ ميلادي باليوم والساعة والدقيقة
وأنا ما حافظة غير التاريخ بس ..
طبعاً لحد الآن ما بقدر أتذكر ياتو يوم من أيام الأسبوع
كان أحد كان أربعاء ما متأكدة لكن أظنو كان واقع تلاتاء

طارق أحمد خالد ..

تسلم على الأمنيات الطيبة





خالص الشكر ..

Quote: ياتو عمر ده .. إنتى يادوب ختبدى تجربى .. دى كانت المناظر التلاتين ديل متذكرنها طشاش طشاش .. كل سنة وأنتى طيبة .. ولما تصلى الأربعين مسكلينى

رأفت ميلاد العزيز ..

بالله داك كلو مناظر؟



ياتو أربعين؟
أنا تاني من حتتي دي ما متحركة



ولا الأربعين ولا الشنقيطي

عادل عبدالعاطي ..

Quote: انتو شنو الناس الجميلين كلهم تامين تلاتين في السنة دي ؟؟؟ قبل شهور اعلنتا نانسي عجاج اليوم اعلان تيسير عووضة .. تيسير كل يوم جديد وانتي طيبة وعقبال الشمعة ال90 (اكتر من كدة بتكون لواقة ساااااي ) ....

البركة في التلتين البقت قاسم مشترك بيني وبين البت الطاعمة نانسي



وكل دقيقة وإنت طيب ومبسوط
وحا تنبسط زيادة وتشعر بالسعادة لما أتم ليكم 90 سنة وأكون لسة متحكرة في الليبرالي
وأشيل وأنظّر، زي ما جماعتك عاملين هسي لأحزابهم وللشعب الغلبان


بلَغني إنو عندك جن مع الديناصورات وأنا بصراحة ناوية أبقى واحدة منهم

سيف الدين كامل ..

Quote: كل سنة وانت طيبة ,, ومتعك الله بالصحة والعافية. ده اجمل ايام في حياتك عيشيها بسعادة ما تندمي علي اللفات واتهني بالجاي. نحن فتناك باكتر من 20 سنة والحمد لله مستمتعين بالحياة وكلنا امل في اللجاي.

وإنت طيب وسالم ..

يا سيدي الله لا جاب ندم بالعكس أنا سعيدة بكل لحظات حياتي حلوها ومرها
ومتأكدة إنو اللي جاي حيكون أحلى


وزي ما وردي دايماً بيردد: الحياة حلوة

الفضل عبداللطيف ..

Quote: على كل حال انا بقيت احسبها بالايام .. وفي يوم 9/11 اكملت 20,000 يوم .. وعملت بوست مافي زول قال لي مبروك او انعل ابوك .. وما عارف هي مناسبة سعيدة ام تعيسة .. لانو كل يوم زيادة معناها يوم اقل وما حأقول ليك عقبال 100 سنة لانها كتيرة وفيها احتمال الخرف .. لكن اقول ليك بارك الله لك في عمرك ان طال او قصر 11 سبتمبر عيد ميلادي رقم 20,000

ألف مبروك الـ 20,000 يوم وعقبال ما يبقوا 40,000 قول آمين
ومن رأيي تكون سعيد وتحتفي بكل يوم يمر بيك وتفرح وتفرح الحولك كمان


مشيت حسبت عمري بالكاونتر بتاعة الميلاد طلع لي الكلام دا:

Quote: 1561 أسبوع أو 358 شهر أو 10928 يوم أو 262272 ساعة أو 15736327 دقائق أو 944179630 ثواني

يعني أنا عايشة قريب 11,000 يوم لحد الآن؟

it's amazing

عادل عثمان صحبي ..


زولك دا قال نقش الحكاية كلها بعد الـ 30
الكلام دا كيف؟




خليني أتم 60 وأجي أقول ليك

Quote: ياخ إنتا دفعة الهادي آدم أغداً ألقاك دي قالوا كتبها ليك في رفاعة وإنتو مارقين من الضمنة* بالليل

Quote: وووب علي يا ثابت يعني إنت لمن كتبوا أغداً ألقاك كنت في الثانوي؟

الله عليك يا تايسا
ذكرتينا بالذي مضى
ياخ دي كانت أحلى شلة
يحكي ( أهلنا الكبار ) عن صالون أستاذنا الهادي آدم الأدبي ومن فرسانه ( عمنا ) ثابت محمد الجاك وأستاذنا محمد علي جناح وأستاذنا عمر الصديق وأستاذنا المرحوم محمد عبدالله الوجج

يقولون أن عمنا ثابت رغم أنه يماثلهم عمراً إلا أنه كان أكثرهم إلتصاقاً بحياة العصر
لذلك كان المستشار المفضل للأستاذ الهادي آدم لاستباط المعاني ومفردات العصر
ويقولون أيضاً أن قصيدة ( ممرضتي ) هى في الأصل أحد محاولات عمنا ثابت الجادة في الشعر عالجها شعرياً الأستاذ الهادي آدم وعندما قرأها عمنا ثابت بصورتها الجديدة إنتابته ( هوشة جعلية ) وحلف ( بالطلاق ) - كعادته دوماً - ألا تنسب القصيدة لإسمه بل لأبيها الشعري الأستاذ الهادي ( أصلو الأب ليس هو من يخلف وإنما الأب هو من يربي ) .

____________________

قال ما عاوز يكبر قال

تيسير كل سنة وإنت طيبة

عقبال المائة عام

وكمان عيد مبارك عليك وعلي جميع من تحبين

---------------------------------------
بس ما تبقى زي 30 امي العاجبة واقفة فيها لبكرة

beautiful...


إذن
صفقوا..


or

كلاب
يور
هاندس..

عمر الزهور
عمر الغرام
عمر المنى
عمر التلاتين
سنة:)


في غنيوة كدة
يا تيسير ممكونة
حتقول إنها
هابطة...
may be ...


وأنا ما ذلت مصرة
على مسألة
صنوف الأمزجة
والطقوس

:)

فيها سيرة
التلاتين..

"البنسلين
يا تمرجي..."

I can't remember
المقطع...



كل عام..
وإنتي أروع...



محبتي...

بالمناسبة عمر الثلاثين هو خريف العمر وليس ربيعه

للاسباب الاتية

اولا

لن يغتني شخص بعد الثلاثين عاما

ماراودنا ونافريتلوفا وبورغ السويدي ولينكر وفيدرر ونادال والتجاني يوسف بشير

وابو القاسم الشابي

كلهم عملو انجازاتهم قبل انجازاتهم

يعني راحت عليك والدنيا كانت حاسة بيك مع الاعتذار للفنانة اسرار بابكر


لكن برضو كل سنة وانتي طيبة

Quote: كل سنة وأنا طيبة وعقبال الشمعة الستين

ياه قبل كم وتلاتين سنة رصينا الكراسى لى عرس الوجيه عثمان عووضة وست الحسن والصون سميرة حمودة!
غايتو امك وابوكى كانوا اسمح عرسان يا شافعة مفعوصة!
ميلاد سعيد وعمر مديد والله يديكى الفى مرادك
عمك وخالك المعفوص جنى
تنويه
طبعا انا فى الاربعين وداخل على التسعة وتلاتين!

Quote: فرح .. حزن .. نجاح .. فشل .. غضب .. رضا .. طموح .. يأس = حب

كلام حكيم والايام الحلوة جاية الليلة دى بس تاكد لى
تعالى نشوف قدامنا يابت ياميسره للفرح







الله يخليك يابت ياسمحة يابتى وصاحبتى

Quote: كلام حكيم والايام الحلوة جاية الليلة دى بس تاكد لى تعالى نشوف قدامنا يابت ياميسره للفرح الله يخليك يابت ياسمحة يابتى وصاحبتى

ويخليك يا إشراقة يا شريكة ..


تعالي نشوف قدامنا يا شرّوق
ونغني مع الست ثومة:

واللي فات ننساه
ننسى كل أساه
يلا نلحق من الزمن أيام صفاه
دي الحياة من غير لقانا مش حياة
و إحنا مش حنعيش يا روحي مرتين

Quote: اليوم أتممت 30عاماً على سطح الكرة الأرضية

تيسير..وان شاء الله التلاتين الجاية حا تقضيها علي سطح ياتو كوكب...؟؟؟!!!
.
.
كل تلاتينية وانتي بألف خييير..

علاء الدين بابكر ..

Quote: تيسير..وان شاء الله التلاتين الجاية حا تقضيها علي سطح ياتو كوكب...؟؟؟!!!

والله لو لقيت أقضيها على سطح القمر يكون أحلى شيء

Quote: ياه قبل كم وتلاتين سنة رصينا الكراسى

رصيتوها ؟؟
أمانةً في ذمتك دي يا حيدر .. ما كنت وزير العريس ؟
البيرصوا الكراسي ديل الشفع السغار ..
الرجال الكبار - ناس إنتو - عندهم مهام أجل و أسمى منها ( استوزار العريس ) ..
و قيل تجهيز حوش الفنانين أو الديوان - و لوازم الفنانين التانية ديك -
و تلك لعمري مهام القوم العاقلين الراشدين الكبار كبار ذوي الحنكة و التجربة و الشلنكبات .



.....
قلت لي : ياه .. !!!؟
سمح .

Quote: بالمناسبة عمر الثلاثين هو خريف العمر وليس ربيعه

الملافظ سعد!
يعنى الواحد يدى نفسه طلقة بعد التلاتين!
انا شخصيا انجزت اشياءا كثيرة بعد الثلاثين واخفقت فى اشياء كثيرة قبل الثلاثين على كافة الاصعدة وكنت اعتبرها مصيرية!
اجمل ايامنا هى التى لم تاتى بعد واجمل اطفالنا هم الذين لم يولدوا بعد!سعد الله ونوس قال كلنا محكومون بالأمل وما يحدث اليوم لن يكون نهاية التاريخ!
فى الحياة لا يمكننا ان نتعامل مع تطلعاتنا وامانينا واهدافنا بنظام الشيك ليست check list
على طريقة الجرد فهو مدعة للاحباط او التوقف عند تحقيق كل الرغبات!
الامنيات والاهداف امور متبدلة ومتغيرة بتغير الظرف والاحتياجات والسعادة اسبابها متنوعة ثم ان الحياة كريمة فمثلا تهبك فرص استئناف كثيرة بعدد ابناءك وابناءك لتحقيق بعض ما اخفقت فيه!طم هى الحياة كريمة تهبنا اصدقاء واحبابا خلصاء يقاسموننا افراحنا واتراحنا ويجملون حياتنا بالتوادد والتراحم!!
من اسعد اللحظات عندى وانا اشاهد ابنائى يشاهدون افلام الكرتون ويجتاحهم ذلك الفرح الغامر وهو امر فى غاية اليسر!
كل سنة وانت طيب يا هليل
جنى

Quote: انا شخصيا انجزت اشياءا كثيرة بعد الثلاثين واخفقت فى اشياء كثيرة قبل الثلاثين على كافة الاصعدة وكنت اعتبرها مصيرية! اجمل ايامنا هى التى لم تاتى بعد واجمل اطفالنا هم الذين لم يولدوا بعد!سعد الله ونوس قال كلنا محكومون بالأمل وما يحدث اليوم لن يكون نهاية التاريخ! فى الحياة لا يمكننا ان نتعامل مع تطلعاتنا وامانينا واهدافنا بنظام الشيك ليست check list على طريقة الجرد فهو مدعة للاحباط او التوقف عند تحقيق كل الرغبات! الامنيات والاهداف امور متبدلة ومتغيرة بتغير الظرف والاحتياجات والسعادة اسبابها متنوعة ثم ان الحياة كريمة فمثلا تهبك فرص استئناف كثيرة بعدد ابناءك وابناءك لتحقيق بعض ما اخفقت فيه!طم هى الحياة كريمة تهبنا اصدقاء واحبابا خلصاء يقاسموننا افراحنا واتراحنا ويجملون حياتنا بالتوادد والتراحم!! من اسعد اللحظات عندى وانا اشاهد ابنائى يشاهدون افلام الكرتون ويجتاحهم ذلك الفرح الغامر وهو امر فى غاية اليسر!

جني يا خال وعم وفردة ..

Quote: ياه قبل كم وتلاتين سنة رصينا الكراسى لى عرس الوجيه عثمان عووضة وست الحسن والصون سميرة حمودة! غايتو امك وابوكى كانوا اسمح عرسان يا شافعة مفعوصة! ميلاد سعيد وعمر مديد والله يديكى الفى مرادك عمك وخالك المعفوص جنى تنويه طبعا انا فى الاربعين وداخل على التسعة وتلاتين!

والله لي هسى أسمح عرسان رغم الضغط والسكري والقاوت والنضارات وعمليات العيون والرُّكب

أربعين شنو يا جني ياخي إنتو قريتو في جامعة الخرطوم لمن كان إسمها كلية الخواجة غردون

Quote: بالمناسبة عمر الثلاثين هو خريف العمر وليس ربيعه للاسباب الاتية اولا لن يغتني شخص بعد الثلاثين عاما ماراودنا ونافريتلوفا وبورغ السويدي ولينكر وفيدرر ونادال والتجاني يوسف بشير وابو القاسم الشابي كلهم عملو انجازاتهم قبل انجازاتهم يعني راحت عليك والدنيا كانت حاسة بيك مع الاعتذار للفنانة اسرار بابكر لكن برضو كل سنة وانتي طيبة

خليل السغيل
عارف بعد كلامك دا جاني إحساس إني أعمل زي ما بيعمل توم فردة جيري:
أو ما يحس بالخطر يقوم يمشي يحفر ليهو قبر ويتمدد فوقو
ويلفح أقرب بوكيه بتاع زهور ويعمل ميت

صفاء يا صافية الروح والقلب ..

وأنا كمان حاولت أتذكر المقطع ما قدرت
لكن مني ليك يا دكتورة مقطع من أغنية سيد خليفة الما هابطة:


أموت في القصر العيني وتنقذني الطبيبة

سيف بخيت موسى ..

Quote: تيسير كل سنة وإنت طيبة عقبال المائة عام وكمان عيد مبارك عليك وعلي جميع من تحبين --------------------------------------- بس ما تبقى زي 30 امي العاجبة واقفة فيها لبكرة

تسلم ويديك العافية ..


عندنا حبوبتنا لغاية الآن بتقول أنا في الصيف عمري 19 وفي الشتا 25
يا حبوبة دا شنو؟
قالت عشان الشتا بيكرمش الزول

يا عاطف ..

Quote: الله عليك يا تايسا ذكرتينا بالذي مضى ياخ دي كانت أحلى شلة يحكي ( أهلنا الكبار ) عن صالون أستاذنا الهادي آدم الأدبي ومن فرسانه ( عمنا ) ثابت محمد الجاك وأستاذنا محمد علي جناح وأستاذنا عمر الصديق وأستاذنا المرحوم محمد عبدالله الوجج يقولون أن عمنا ثابت رغم أنه يماثلهم عمراً إلا أنه كان أكثرهم إلتصاقاً بحياة العصر لذلك كان المستشار المفضل للأستاذ الهادي آدم لاستباط المعاني ومفردات العصر ويقولون أيضاً أن قصيدة ( ممرضتي ) هى في الأصل أحد محاولات عمنا ثابت الجادة في الشعر عالجها شعرياً الأستاذ الهادي آدم وعندما قرأها عمنا ثابت بصورتها الجديدة إنتابته ( هوشة جعلية ) وحلف ( بالطلاق ) - كعادته دوماً - ألا تنسب القصيدة لإسمه بل لأبيها الشعري الأستاذ الهادي ( أصلو الأب ليس هو من يخلف وإنما الأب هو من يربي ) .

عمنا ثابت الجاك كب الزوغة يكون مشى يبلع حبوب الضغط والروماتيزم


ويحكى أن شاعرنا الهادي آدم كان لا يطيب له المجلس ولا يحب مناقشة إنتاجه الشعري إلا مع عمنا ثابت
والذي قيل فيما قيل أنه درّس الهادي آدم في الأولية وكان صاحب أخوانو الكبار ..

Quote: عائلة عقل علم عمل عاطفة عبادة قمت بإخفاء بعض "العينات" لدواعي ضبط الجودة طبعاً مسألة المراجعة والتقييم غير قابلة للنشر والإطلاع ولكن أحببت إشراككم في ثلاثينيتي هذه والإحتفاء معي بها وعقبال الثلاثينية القادمة

تايسا ..!!! و عصداقة ما حسبتيها ليه؟
لوووووووول
كل سنة و انتي طيبة يا صاحبتي و السكك الماهلة تعزمك تمشي فيها
و العوجة تفارقك و تقوم بينك و بينها حوائط مسلحة ...
يا تايسا، العمر ما بيحسبوه بالسنين يا بت امي،
بحسبوه بالتجارب و دموع الفرح و دموع التعب و دموع الحزن
وبيحسبوه بالوقعات و القومات من العترة،
و طول العمر بالحساب ده زيادة و قلتو جهالة بعيدة منك و من الغاليين ...
انتي يا يمة عمرك مديد و تعيشي و تفرح بي بعد عمر طويل لوووول ،
و قلبك أخضر، وعيك رصين وضميرك حي
عيناتك دي يا حبيبة تامة نصاب وواجبة عليك زكاة وفرة و خير فيهم،
و الله يتمهم عليك و باقي الاحرف الابجدية راجياك شايلة الفرح علشان
ترميهو في دربك ...

عمر مديد يا تايسا ... و تزين لوحة حياتك التفاصيل الجميلة البتشبهك،
و تزيني لوحات البيحبوك و تضوي ليهم نجمة في سما حياتهم ...

كل سنة و احنا طيبين وانت معانا

كل سنة و انا شخصيا طيبة و انتي اختي

Quote: كل سنة وأنا طيبة وعقبال الشمعة الستين

بس؟ ان شاء الله مية و كسر ... و تكبري لمن تفطي سطر و يجيبوك من راس الشارع

___________

علي الحلاوي سائلين منك و بنسأل الله تكون طيب كل ما تجي سيرتك في البال ...

Quote: مانةً في ذمتك دي يا حيدر .. ما كنت وزير العريس ؟

ليه أصلى وهبةولا العوض المسلمى!
انا سيم سيم حميدة وتمبس!
حسادتن تولدك البنات!
جنى

تيسر عوضه كل سنة وانتى طيبه وكلك زوق بعدين شنو حكاية التلاتين دى والله زمنى دا كلو كنت فاكرك اكبر منى من فهما عليك
ياخى والله عقدتونا عديل كدا
لكن أقولك حاجه كييب ذا قوود وورك

Quote: تيسر عوضه كل سنة وانتى طيبه وكلك زوق بعدين شنو حكاية التلاتين دى والله زمنى دا كلو كنت فاكرك اكبر منى من فهما عليك ياخى والله عقدتونا عديل كدا لكن أقولك حاجه كييب ذا قوود وورك

وإنت طيب ورايق يا ود الجعلي

وربنا يكبر العقول أكتر وأكتر

جني ..

Quote: ليه أصلى وهبةولا العوض المسلمى! انا سيم سيم حميدة وتمبس! حسادتن تولدك البنات!

تمبس ياتو؟

حميدة ما بعرفو لكن تمبس دا دفعة ناس محمد علي

(عـ) زوز يا صديقة ..

عصداقة دي من ضمن "علاقات إنسانية" من الحاجات الكتبتها ومسحتها بالمناسبة
وفضلت أخليها "حمدو في بطنو" ضمن عينات كتيرة تانية

عمر شنو دا الدايراني أحسبو بالتجارب ؟ لو كدة أنا عمري لا يقل عن خمسة وأربعين خمسين سنة
قال تجارب قال

حياتنا يا عزوز عبارة عن Puzzle كبيرة متكونة من قطع بكل الألوان
ألوان فاتحة . ألوان غامقة "أو مقفولة على قول سعد" ألوان فرايحية
وألوان كئيبة، مرات بنمسك قطعة منفردة ونقول هسي دي فايدتها شنو؟
وفرقها شنو من مئات القطع الزيها؟
وبننسى إنو كل قطعة من البازل دي وجودها مهم عشان نعرف بيها القطع المتصلة بيها
والحولها؛ لوفقدناها حيظل مكانها شاغر ومافي أي قطعة تانية ممكن تحل محلها
وحتفضل البازل ناقصة
بعد ما نخلص تجميع القطع دي مع بعض ونديها نظرة من بعيد
بنقدر نعرف شكل اللوحة النهائي بكل جمالو
ونعرف ليه القطعة دي هنا
وليه هنا لونها قاتم وهناك لونها فرايحي ..

Quote: كل سنة و انا شخصيا طيبة و انتي اختي

وكل سنة وأنا طيبة وإنتي أختي ..
لأنو من أجمل الأشياء الممكن تحصل للزول في حياتو إنو يكون فيها زول زيك
جواهو زي الألماس
نقي وشفاف .. ولا يُكسر

Quote: بس؟ ان شاء الله مية و كسر ... و تكبري لمن تفطي سطر و يجيبوك من راس الشارع

الكلام دا حالياً حاصل
شوفي غيرو

كل سنة وانتي طيبة يا تيسير

وعقبال الشمـــ100ــعة :)

.
.

[qb]

(1)
سكن الإنسان في القلب المنيف
لملمته الروح في حنوٍ وريف
بسمت دنيانا مُذ هلّتْ علينا
غيمة الأحلام، بالطلّ ارتوينا
نثر ال(تيسير)لحناً فانتشينا
(2)
رقص الضوء على شمعة روحي
من تلم الشعث تستنطق بوحي
بلسم الآلام تطبيب جروحي
وأمان النفس كالزهرات فوحي
***
كتبتهااللحظة
***

أيتها المغزولة من ضياء القمر
يونيكورن بشري بمعنى الكلمة
نبلاً واقتداراً
اليونيكورن حيي ومقدام
جواد كريم يرنو للقمر
وخرافي كا ينبغي للأسطورة أن تخطف أنفاسنا
لم ولن يرجعني شيء بعد قرار (العفو والعافيةوالمغادرة) لمكان أحببته كثيراً غير يوم عيدي..نعم يا تيسير..فيوم أطللت للدنيا هو عيدنا...من قلبي:ربنا يديكي على قدرنيتتك ويسعدك سعادة تفيض عليكي لمن تدفق وتحتاري توزعيها وين وتديها لي منو

شقيقة روحكـ لنا
[/qb]

كل سنة و انتي طيبة يا تيسير
عمر سعيد و عمر مديد ان شاء الله

كل سنة وإنتي طيبة

كل سنة وانتي طيبة وربنااديك طول العمر وحسن العمل

Quote: قيقراوي وينو مالو ماجا بارك لي التلتين بتاعتي دي بس فالحين اليوم كلو تكوركوا لي بعض وتحمونا النوم وتشيلوا اللوم بيناوييييي قيقراويييي

قيقراوي يعميهو و يطرش الجيران يا مولانا
الجيران الما بطرشم شنو نان ؟ أكان من سمعت الخبر السعيد مشغل ليهم و بأعلى سوط* :
خلاس كبرت و ليك تسعطاشر سنة . . و كمان تاني معاهن حداشر سنة . . دا غير الداسنو مننا

للضمان كدا
كل سنة و انت اروع


كنت مشغول بحفلة تانية

مامه دومه في ثياب العيد صور بالكوم قيقراوي كيكي بر... جبرالله وكل الرهط
ما تغشك ملابث العيد دي ساي ! . . الشغلة باربكيو على الطريقة الصاح
وريحة الشية ما تديك الدرب

بطاري الشية دي ،انتو العيد دا العيد الكبير ؟
طيب وكت ما فيهو " شربوت " انتو قصة البوستات الـ " غريبة " دي شنو ؟
واحد مفحط بالطريق الدائري السريع - سداري شاهد الله و عالم - بهناك !
واحد جاب لينا الدورة في صمة خشمنا !!
و ماما دومة عاملة فيها هاشم في العيد !!!
و تيسير حلاتا يا بنات امي !!!!



و الله يا مولانا مكسب لأي فضاء تحلي فيهو . . يا بخت الفضاءات الامتلأت بيك

------------------
* عنج ممسح بقطران ما زيت سمسم زي ما جاء في رواية نادية عثمان المصحّفة بالدليل القاطع لظهور بعض غير الثقاة في عننة حديسها - وشفناهم بعينا دي،
قال قيقاراوي في " تصحيح التصحيف و تحرير التحريف في احاديس السودانيز اونلايناب " بصحة رواية "البعيو " و قال حسنُ و حسن و حسنه حى حسن نجيلة ذاتو

Quote: تايسا

من نعم الله الكثيرة علي فقد زودني بصديقة وصديق ، لا أفضلهما عليكم
وكلاهما يدعى تيسير
وهذا من جمال الإسم الذي يركب على النوعين
وبهذا يكون من قليل الأسماء التي تعالت على التمييز النوعي
وفي الحقيقة هي كثيرة الأسماء المشتركة للجنسين
يعني زي جلابية الأنصاري كيفما لبستها بتتلبس
زي ، يعني مثلآ ، رحاب ، ولاء ، جمال ، قمر ، شمس
وعند العرب التانين نجد ، إحسان ، عرفة ... الخ
الشاهد إننا في السودان بس بنعتمد تيسير كإسم بيركب هنا وبيركب هناك

المهم ، صديقتي تيسير وصديقي تيسير ياطالما رغبت في تدليعهما وتدليلهم
مرة ناديت تيسير زيادة ب ( تايسو ) فرد علي وكان واضح انه لم يستسيغها
قال : أحسن تزيد ليها ن وأصير بتاع ملاكمة وعنف
ونفس الحال حصل لي مع تيسير النوراني
فأقلعت عن محاولة تدليع اي منهما
اليوم تأملت ( تايسا ) أعلاه فأشفقت على تيسير
وتضامنت مع تيسير و تيسير أصحابي ديلاك

ياتيسير ، إضافة ( = ) حب في السلك

كل سنة وانتي طيبة يا تيسير
وعقبال 100 شمعة ومرسوم عيني..
(-:

نجوان ..

وإنتي طيبة وتسلمي يا ستي



وشكراً على الشوكليتس

تيسير يا حبيبة كل سنة وانت طيببببببببببببببببة

ربنا يديك الفي بالك ويحقق مرادك.

عقبال تلاتين سنة ضوئية.

:).

hAPPY bIRTHDAY tAISEER

كل المنى أن تكون أعوامك القادمات ملئى بالسعادة والصحة و.. الحب


...

ياويلى من ال30(دا على ذمة الدعاية طبعا)

كل سنة مشرقة

كل سنة وانتى اكثر تسامحا ومحبة

تيسير ليك كل ماهو جميل ..................

والله صغيرة وجاهلة ..

غايتو حدك هنا في الحساب تاني كان قالوا ليك كم عينيك بتزغلل ..



كل سنة وانتي طيبة وعقبال الشمعة الستين ..




محبتي الاكيدة ..

الزولة الجدعة تيسير

كل سنة وإنتي طيبة وبخير ومليون عافية

وكل امنياتك واقع ملموس ... بس حقيقي

انتي مظلومة يعني الصحيح من حياتك 10

سنوات من الطفولة والجمال وبعد داك وعيييك

جاء الاوباش وخربوا كل جميل فشديد الاسف ودي

ربنا يعوضك عليها ومجايليك ...






...............................حجر.

كل سنة وانتي طيبة

كل عام وانتى بخير
عمر مديد
وفرح جديد
وعمل سديد

30 سنة والله لسع صغيرونة

تعيشي وتاخدي غيرهم

كل عام وانتم بخير

قلنا نكون احسن منك شوية لمراعاة فروق السن وكده

ارقدي عافية

زاتوووو

تيسير عووضة

مزيد من النجاحات و التقدم و السعادة

و عمر مـديــــــــــــد
يعنى تسعينات كدة مناسبة

+ إنتى أخت صاحبتنا تغريد؟

يا بتي مالك بتكبّري فينا ...
أصلوا ابوك كان مستعجل واتزوج وعمرو 18 سنة .. وهو نديدي ...
سلمي لي على أبوك ، وقولي ليهو همو ودقاسم قاليك سلم لي على عمو عثمان حامد ...

عمو ودقاسم ..

Quote: يا بتي مالك بتكبّري فينا ... أصلوا ابوك كان مستعجل واتزوج وعمرو 18 سنة .. وهو نديدي ...

الغريبة قال لي أنا عرست في الأربعينات، على كدا معناها إنتو داقين في السبعين

Quote: سلمي لي على أبوك ، وقولي ليهو همو ودقاسم قاليك سلم لي على عمو عثمان حامد ...

سلامك يوصل للعثمانين
عمو عثمان حامد إتصل على يوم ميلادي وقال لي حا أقول ليك نفس السطرين الكتبهم محمد توفيق صاحب الجمرات عندما إحتفل قراءه ببلوغه السبعين حيث قال:
من العته والجنون أن يحتفل المرء بتناقص عمره



لك المحبة والتقدير والإحترام ..

رأفت حسن عباس ..

عميق شكري على التهنئة والتمنيات

Quote: + إنتى أخت صاحبتنا تغريد؟

للأسف لست أخت تغريد
وللأسف أيضاً ليس لي أخوات شقيقات ..



لك التقدير ..

الزول زاتو ..

Quote: تعيشي وتاخدي غيرهم

دي على وزن كفارة ؟
لقيتك ما بتنسى كلو كلو



يا سيدي كل عام وأنت أيضاً بخير وصحة

خالص التقدير ..

ضحية إبراهيم ..

تسلم وتعيش
وكل عام وأنت أطيب ..

عمر عبدالله فضل المولى ..

وإنت طيب ومبسوط يا رب




خالص الشكر ..

Quote: الزولة الجدعة تيسير كل سنة وإنتي طيبة وبخير ومليون عافية وكل امنياتك واقع ملموس ... بس حقيقي انتي مظلومة يعني الصحيح من حياتك 10 سنوات من الطفولة والجمال وبعد داك وعيييك جاء الاوباش وخربوا كل جميل فشديد الاسف ودي ربنا يعوضك عليها ومجايليك ...

تسلم على الأمنيات الطيبة يا الرفاعي حجر ..

مرة في زول كان كاتب كلام هنا في البورد إنو الإنقاذ سرقت أجمل سنوات عمرنا
أظنني أتفق معه ..

أوووو الشاويش عطية يا حبيبنا ..

Quote: والله صغيرة وجاهلة .. غايتو حدك هنا في الحساب تاني كان قالوا ليك كم عينيك بتزغلل ..

هوي من هسي أنا تاني مواليد سبعة وتمنين ..



ــــــــ
الأيام دي ماااا شايفة شغلك يا شاويش

Quote: الأيام دي ماااا شايفة شغلك يا شاويش

والله عيني واقعة ليها فوق رأي .. بدور شورتك ..


ونجيب ضقلها يكركب

شاويش عطية ..

Quote: والله عيني واقعة ليها فوق رأي .. بدور شورتك ..

يا زولة ولا تشاوريني

رشي طوالي


النشوف آخرتا

تسلمي يا أميرة الأميرة على الكلام الجميل


وربنا يديك الفي مرادك يا رب ..

تسلمي يا رجاء ..

وأتمنى ليك السعادة والتوفيق وتحقيق الأمنيات ..

أميمة حبيبتنا ..

تسلمي على الدعوة الحلوة
وربنا يحقق أمنياتك إنتي كمان ويسعدك قولي آمين ..

تعرف يا أبو ساندرا إسمي دا زمان وأنا سغيرة قرب يعمل لي عقدة
أكتر سؤال كنت بكرهو إنو زول يسالني إسمك منو

لكن هسي ما ببدلو بأي إسم تاني للأسباب دي نفسها:

Quote: وهذا من جمال الإسم الذي يركب على النوعين وبهذا يكون من قليل الأسماء التي تعالت على التمييز النوعي وفي الحقيقة هي كثيرة الأسماء المشتركة للجنسين يعني زي جلابية الأنصاري كيفما لبستها بتتلبس

زي ما بتعرف الخواجات بيموتوا في الإختصار
سامنتا = سام
إريكسون = إريك
توماس = توم
الأوفيس بوي بتاعنا بنغالي غتيت يوم جاني ليك وشابكني يا (تيس !)
يا زول دا شنو؟ قال لي أنا عارف، شايف الجماعة هنا كلهم بينادوهم بي نص الإسم بس

قيقراوي ..

Quote: خلاس كبرت و ليك تسعطاشر سنة . . و كمان تاني معاهن حداشر سنة . . دا غير الداسنو مننا

جنس دس .. شي تحت السرير وشي في راس الدولاب
غايتو بعد تعب ولمليم قدرنا نعلن عن 30 أكتر من كدا ما في طريقة
دا الأوثرايزد كابيتال يا قيقا

Quote: بطاري الشية دي ،انتو العيد دا العيد الكبير ؟ طيب وكت ما فيهو " شربوت " انتو قصة البوستات الـ " غريبة " دي شنو ؟

واضح إنو الأخ قيقا كان جالد رمضان وشابكنا إفطار المحاسبين وسحور المراجعين
لا وكمان عايز يختما بي شربوت يا قوة عينك ياخي

Quote: و الله يا مولانا مكسب لأي فضاء تحلي فيهو . . يا بخت الفضاءات الامتلأت بيك

والله لو كان لهذه الفضاءات حسنة فهي أنها عرفتنا على زول زيك .. ون قيقا فهم وبديهة حاضرة
و تو قيقا مكاسب ..

تسلم يا محمد المسلمي وإنت طيب
خالص الشكر ..

ود الصايم ..

وإنت طيب وسالم

وربنا يديم عليك الضحكة المن الـ دي
والوش الأخدر المدور

ممكونة وصابرة

وكل سنة وأنت بألف خير وصحة
وربنا يديم المودة بين الناس ..

لنا صديقتي يا الأبيض ضميرك ..


صاحبة القلب الكبير

Quote: كتبتهااللحظة

ودائماً أنت هكذا ..
طازجة وتلقائية وعفوية
ولا تحملين للآخرين إلا الخير ..

كلماتك تاج يزين هامتي
وصداقتك ومعرفتك كنز يضاف لكنوزي التي حصلت عليها من هذه الدنيا

مكانك في القلوب قبل أن يكون هنا
مكانك بيننا في هذا المكان بكل مافيه
أعرف أنها لحظات إحباط كلنا مررنا بها وقررنا أن نبتعد
ثم نرجع لأن في هذا المكان أحبابٌ "لنا"

Quote: من قلبي:ربنا يديكي على قدرنيتتك ويسعدك سعادة تفيض عليكي لمن تدفق وتحتاري توزعيها وين وتديها لي منو

ومن قلبي أيضاً، أتمنى لك مثلما تمنيتي لي وأكثر فأنت تستحقينه ..

محبتي

وإنتي طيبة يا نهال



تسلمي وتعيشي ..

تلاتين طق ،،،

وحرقتي الناس فبكو ،،

فأشعلتى الترابيز فينا

دندنة بالعشق النبيل والمغنى المباح

هابي بيرز ذي تو يو تيسير ،،

تسلم يا نزار كروم

وعميق شكري على التهنئة ..



مرورك مقدّر ،،

..
.

سلام يا تيس ..
حلوة دى عجبتنى شديد ..
بالله ما تتعقدى منها لو اتكررت عليك
صراحة كلمات مقدمة المرسوم العينى بسيطة وعميقة للمتأمل

Quote: ثلاثون عاماً كانت حافلة بكل أنواع الأحاسيس الإنسانية بكل تناقضاتها فرح .. حزن .. نجاح .. فشل .. غضب .. رضا .. طموح .. يأس رغم حالات الإحباط التي كانت تعتريني حين أفشل وحالات اليأس التي تصيبني عندما لا أبلغ هدفي أستطيع أن أقول أن هذا الفشل كان بمثابة طاقة دفع للأمام مكّنتني من تحقيق ما أريد

30 عاماً يا مولانا كافية
لان يتعلم الانسان العاقل كيف له ان يعرف نفسه اولا ويعرف قدره
فاذا بقي الانسان يجهل نفسه سيعيش تا ئها وسيتعب كثيرا في هذه الحياه
30 عاماً تكفى
لا ن تدقق فى اختيار الاصدقاء فاذا لم نجتهد فيها وندقق سنتعلم بعد فترة من الزمن
اننا قد اضعنا اوقاتتنا مع اناس لايستحقون الصداقة او الوفاء
30 عاماً
تعلمك مهما اوجعتك الحياه وغدر بك الزمن ان تبقى صامدا
وعسى ان تكرهوا شيئ وهو خيرا لكم وعسى ان تحبوا شيء وهو كره لكم
30 عاما
يجب ان تعرفك ان التردد في امر موضوع ما بعد التفكير فيه جيدا
هو بداية الفشل لحياتك..
30 عاما
يجب ان تكون فيها قد حددت اهدافك ومسار حياتك ومجال نجاحك
الذى سوف تسير فيه لتكمله بقية المشوار .. بل ومن المفترض الانسان/ه
التى سترافقك فى هذا الدرب..
30 عاما تعتبر موعظة بان
لا تمر مرور الكرام على تجاربك الصغيرة وتجارب الاخرين من حولك ..
ويجب ان تفحصها وتمحصها وتستفيد منها..

دى طبعاً تأملات ما فوق الثلاثين ..
عموماً كل سنة وانت طيبة وكل المعاكـ والحوالينك
وقبال 75 سنة ( بس )

________

المحيرنى اول مره اشوف
قاضى درجة اولى عمره 30 سنة



تعديل لاعادة صياغة :)

تبلدينا حاجبنا كلامك عاجبنا ..

Quote: 30عاماً يا مولانا كافية لان يتعلم الانسان العاقل كيف له ان يعرف نفسه اولا ويعرف قدره فاذا بقي الانسان يجهل نفسه سيعيش تا ئها وسيتعب كثيرا في هذه الحياه 30 عاماً تكفى لا ن تدقق فى اختيار الاصدقاء فاذا لم نجتهد فيها وندقق سنتعلم بعد فترة من الزمن اننا قد اضعنا اوقاتتنا مع اناس لايستحقون الصداقة او الوفاء 30 عاماً تعلمك مهما اوجعتك الحياه وغدر بك الزمن ان تبقى صامدا وعسى ان تكرهوا شيئ وهو خيرا لكم وعسى ان تحبوا شيء وهو كره لكم 30 عاما يجب ان تعرفك ان التردد في امر موضوع ما بعد التفكير فيه جيدا هو بداية الفشل لحياتك.. 30 عاما يجب ان تكون فيها قد حددت اهدافك ومسار حياتك ومجال نجاحك الذى سوف تسير فيه لتكمله بقية المشوار .. بل ومن المفترض الانسان/ه التى سترافقك فى هذا الدرب.. 30 عاما تعتبر موعظة بان لا تمر مرور الكرام على تجاربك الصغيرة وتجارب الاخرين من حولك .. ويجب ان تفحصها وتمحصها وتستفيد منها..

ياخي دا كلام زي الورد
جعلكم الله ذخراً لهيئة المحكمة

Quote: المحيرنى اول مره اشوف قاضى درجة اولى عمره 30 سنة

يا تبلدينا ياخي 30 سنة دي في السلك القضائي بس
قبليها كان في 30 سنة هندسة و30 سنة بانكنق