Post: #1 Title: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: تيسير عووضة Date: 07-04-2009, 11:38 AM Parent: #0
بطبيعة الحال .. القيادة النسائية معروفة بالحذر والرزانة أكثر
ونادراً ما نجد إمرأة تقود السيارة بتهور في الشارع ومعظم تعطلات المرور نجد أن سببها سيدة في المقدمة تحاول تطبيق قواعد المرور "بحذافيرها" وأقل الحوادث المرورية تكون بفعل السيدات "دا كلام ناس المرور غايتو"
لذلك: إذا رأيت إحدى السيدات تقود السيارة بسرعة كبيرة فالرجاء إفساح الطريق
فقد تكون لاحقة الحلة في النار أو ماشة تجيب العيال من المدرسة أو محصلة الجزار ولا بتاع الخدار قبل ما يقفلوا
يعني يا جماعة مافي سيدة بتسوق بسرعة ساي كدا بس لازم في سبب وسبب قوي جداً
فالمرجو حسن تعاونكم يا جماعة
ما دعاني لقول هذا هو الكلام الذي وجهه لي أحد السائقين بغضب: خلينا لينا ليكم البيوت كمان جايين لاحقيننا في الشوارع !
جرح شعوري
Post: #2 Title: Re: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: tmbis Date: 07-04-2009, 11:57 AM Parent: #1
المرة الفاتت تراجي مصطفى .. قلبته اهـا إنت دقشتي لينــا منو الليلة من الصباح ؟؟
مفترض الواحده من الصباح تضيف شوية من عصير البرتقال المركز بمقدار ربع الكباية وذلك على كباية الشاي الصباحية بالحليب كانت أم ساده ..
Post: #3 Title: Re: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: Rihab Khalifa Date: 07-04-2009, 12:00 PM Parent: #2
Quote: يعني يا جماعة مافي سيدة بتسوق بسرعة ساي كدا بس لازم في سبب وسبب قوي جداً
مزاج ينفع كسبب قوي جدا؟
Post: #4 Title: Re: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: GamarBoBa Date: 07-04-2009, 12:28 PM Parent: #3
Post: #9 Title: Re: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: Isa Date: 07-04-2009, 12:59 PM
سـلامات يا تيسـير.. زمان كنت قايل السـودانيات بس ال ما بعرفن يسوقن،، لكن يبدو أنها ظاهرة عالمية وإنسانية كمان!..هـنا الهـولنديين عندهم مثل بقـول: Vrouw achter het stuur, bloed aan het muur وممكـن أحاول أترجمو بي: Woman on the wheels: bood on the wall! مثلاً وقبل فترة جـاني الإيميل الطريف دا، صحيح إنو السـتات بسـوقن بحـذر.. لكـن الحذر الزايد بتسبب في توتر السايقين الآخرين (الرجال)..
Quote: قام احد البنوك بعمل الإعلان التالي :
نهيب بالسادة العملاء أن البنك قد قام بعمل ماكينات جديدة لكي يتمكن العملاء من سحب النقود دون الحاجة منهم إلى مغادرة عرباتهم .
هذا وبعد مباحثات استمرت عدة شهور تم الاتفاق على وضع إرشادات لكيفية استخدام الماكينة لكل من الذكور والإناث .
نرجو من السادة العملاء إتباع الطريقة الملائمة لكل نوع .
أولا : الذكور
1 - قف بالسيارة إلى جوار الماكينة
2 - افتح نافذة السيارة
3 - ضع البطاقة فى المكان المخصص ثم أدخل الكود السرى
4 - أدخل المبلغ المطلوب سحبه
5 - اسحب المبلغ, البطاقة و الإيصال
6 - اغلق النافذة
7 - قد السيارة
?ثانيا : الإناث
1 - قودي السيارة إلى الماكينة
2 - عودي للخلف قليلا حتى تصبح النافذة بمحاذاة الماكينة
3 - ارفعي فرامل اليد وافتحي النافذة
4 - افرغي محتويات حقيبتك على المقعد المجاور إلى أن تجدي البطاقة
5 - انهي مكالمتك التليفونية مع وعد محدثك بإكمال المكالمة في وقت لاحق
6 - حاولي إدخال البطاقة في الماكينة
7 - افتحي الباب لمحاولة الوصول إلى الماكينة لبعد سيارتك عنها
8 - ادخلي البطاقة
9 - عاودي إدخال البطاقة بطريقة صحيحة
10- ابحثي في حقيبتك عن مفكرتك والتي بها الكود السري
11 - ادخلي الكود
12 - اضغطي إلغاء ثم ادخلي الكود الصحيح
13 - ادخلي المبلغ المطلوب سحبه
14- تأكدي من تمام زينتك في مرآة السيارة
15- اسحبي المبلغ والإيصال
16 - افرغي محتويات حقيبتك مرة أخرى حتى تجدي حافظة نقودك. ثم ضعي المبلغ المسحوب بها .
17 - دوني المبلغ المسحوب في مفكرتك وضعي الإيصال في الحقيبة
18- أعيدي التأكد من زينتك
19 - قودي السيارة لمسافة 0.5 متر فقط
20 - عودي للوراء إلى الماكينة مرة أخرى
21- اسحبي البطاقة
22- افرغي محتويات الحقيبة مرة ثالثة وضعي البطاقة في الحافظة الخاصة بها
23- أرمقي الرجل المنتظر وراءك بنظرة ازدراء
24 - شغلي المحرك
25 - أعيدي مكالمة محدثك على الهاتف
26 - قودي سيارتك لمسافة 2-3 كم
27 - أنزلي فرامل اليد
مـع التحايا
Post: #40 Title: Re: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: تيسير عووضة Date: 07-09-2009, 08:12 AM Parent: #9
Quote: سـلامات يا تيسـير.. زمان كنت قايل السـودانيات بس ال ما بعرفن يسوقن،، لكن يبدو أنها ظاهرة عالمية وإنسانية كمان!..هـنا الهـولنديين عندهم مثل بقـول: Vrouw achter het stuur, bloed aan het muur وممكـن أحاول أترجمو بي: Woman on the wheels: bood on the wall! مثلاً
والله ياعيسى ياخوي الإشاعة دي مطلعينها إنتو ديل والمشكلة إنو الكلام دا عالمياً في حين في بعض الرجال سواقتهم تبوظ الأعصاب وبعدين ياخي statistically women drive safer ودي مفروغ منها أها كمان غالطوا الإحصائيات
بس إنتو حقارين ساي ومادايرين زول يزاحمكم في الطريق زي ماقال لي أخونا الفوق داك
Post: #11 Title: Re: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: تيسير عووضة Date: 07-04-2009, 01:05 PM
قمر بوبا ..
ياخ أنا بضحك من أول ثانية لغاية الدقيقة 5:03
مبالغة
عمرو أديب مذيع لذيذ لكن المرة زودها شديد
Post: #27 Title: Re: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: HAIDER ALZAIN Date: 07-05-2009, 11:16 AM Parent: #11
...
Post: #41 Title: Re: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: تيسير عووضة Date: 07-09-2009, 08:23 AM Parent: #27
Quote:
حيدر الزين .. عليك الله دي عربية ولا طبلية
أي حاجة لونا بمبي طوالي يلصقوها في النسوان لكن بيني وبينك البمبي حلو بس ما للدرجة دي
حلاوة قطن بس ..
Post: #6 Title: Re: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: Hussein Mallasi Date: 07-04-2009, 12:34 PM Parent: #3
أفسح لها الطريق أياً كانت السرعة التي تقود بها.
____ العمر مش بعزقة.
Post: #42 Title: Re: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: تيسير عووضة Date: 07-09-2009, 08:30 AM Parent: #6
ملاسي ..
Quote: أفسح لها الطريق أياً كانت السرعة التي تقود بها.
____ العمر مش بعزقة.
ماسامع كلام عمرو أديب الفوق دا
أي ست سايئة سبوها تعدي
أي ست سايئة إعتبروها عربية إسعاف
Post: #8 Title: Re: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: تيسير عووضة Date: 07-04-2009, 12:51 PM Parent: #3
Quote: مزاج ينفع كسبب قوي جدا؟
حسب حرفنة السايقة طبعاً يا رحاب
Post: #5 Title: Re: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: تيسير عووضة Date: 07-04-2009, 12:30 PM Parent: #2
Quote: المرة الفاتت تراجي مصطفى .. قلبته اهـا إنت دقشتي لينــا منو الليلة من الصباح ؟؟
مفترض الواحده من الصباح تضيف شوية من عصير البرتقال المركز بمقدار ربع الكباية وذلك على كباية الشاي الصباحية بالحليب كانت أم ساده ..
لالا لسه ما دقشتاولا عربيتي إتكسرت ولا نسيت فردة شبشبي جمب العربية ولا أي شي
يا تامبا ياخ شاي اللبن ولا السادة دا بيشربوا معاهو حاجة؟
السادة الميرغنية ..
Post: #7 Title: Re: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: humida Date: 07-04-2009, 12:51 PM Parent: #5
السواقة هينة .. الكلام في الإندراوة ..!!
Post: #43 Title: Re: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: تيسير عووضة Date: 07-09-2009, 08:37 AM Parent: #7
حميدة ..
Quote: السواقة هينة .. الكلام في الإندراوة ..!!
شكراً على رفدك البوست بخلاصة فكرك وتجاربك وحكمتك
Post: #10 Title: Re: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: lana mahdi Date: 07-04-2009, 01:05 PM Parent: #5
النصيحة لي الله تايسا سواقتها غير مسبوقة: بنتحنطر
Post: #44 Title: Re: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: تيسير عووضة Date: 07-09-2009, 08:49 AM Parent: #10
لنو ..
Quote: النصيحة لي الله تايسا سواقتها غير مسبوقة: بنتحنطر
الحالة دي بدون وضو
طبعاًلا يفوتني أن أذكر للقارئ الكريم أن أغنية الحنطور - وهي من عيون الأغاني العربية - هي أغنيتنا المفضلة خسوساً لمن نكون راكبين أنا وهي وراوية
Post: #12 Title: Re: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: tmbis Date: 07-04-2009, 01:28 PM Parent: #5
Quote: لالا لسه ما دقشتاولا عربيتي إتكسرت ولا نسيت فردة شبشبي جمب العربية ولا أي شي
طيب ما تقولي كدا من الصباح .. من دقشة عادية بعد كلامك دا .. انا بعتبر دا تحرش
Post: #13 Title: Re: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: Emad Abdulla Date: 07-04-2009, 01:42 PM Parent: #12
ُيُحكي يا تايسا ياخوي .. قالوا زمان بوليس الحركة بيكون جنبو جردل مويه .. تجي زولتك دي طايره و لفخخخخ تعمل حادث .. و هي في مسماها داك جوه عربيتها البوليس بيجيب جردلو و يجي .. و .. شووووووووووووووووووو .
...... زمان المَرَات - جمع امرأة بحسب لسان عبدالله ولدي - كانن خوافاااااات .. لا بيسوقن ( بسرعة كبيرة ) .. و لا بينزلن من العربية .
Post: #14 Title: Re: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: سمير شيخ ادريس Date: 07-04-2009, 02:00 PM Parent: #13
Post: #15 Title: Re: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: عبدالله احيمر Date: 07-04-2009, 02:43 PM Parent: #14
Quote: ُيُحكي يا تايسا ياخوي ..
...... ألأخ عمـاد لك السـلام , الحـق أعمل تعديل ..... معليش تسير ألأخ عماد وما أظنـه قاصـد يقول ليك خلينـا ليكم التلفزيونات لحقننـا في البوســتات
Post: #48 Title: Re: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: تيسير عووضة Date: 07-09-2009, 09:44 AM Parent: #15
إحيمر أخوي ..
Quote: ألأخ عمـاد لك السـلام , الحـق أعمل تعديل ..... معليش تسير ألأخ عماد وما أظنـه قاصـد يقول ليك خلينـا ليكم التلفزيونات لحقننـا في البوســتات
شفت عماد دا حقار كيف كل مايخش لي بوست يشبكني ليك أخونا تيسير يا ود ياتايسا لمن خلاص يدلعني بقوم يقول لي "اللخو"
إتكلم معاهو عليك الله
Post: #16 Title: Re: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: Nazik Eltayeb Date: 07-04-2009, 02:49 PM Parent: #14
Quote: ]قالوا زمان بوليس الحركة بيكون جنبو جردل مويه .. تجي زولتك دي طايره و لفخخخخ تعمل حادث .. و هي في مسماها داك جوه عربيتها البوليس بيجيب جردلو و يجي .. و .. شووووووووووووووووووو .
جردل شنو ياخ حريقة هي؟ قصدك جك موية عشان تشرب وبعدين يسقط الجك ويندلق الماء و رغم صحة ما ذكرت من ناحية طبية بحتة لكن الزمن دا الاعصاب حديد لا موية ولا يحزنون ندقش ويدقشونا ونخت في الحراسة كمان
----------- بس غايظاني حكاية اكون خاشة الدوار (الصينية) و الاسبقية لي و سرعتي مناسبة وبتاع الحافلة البرة خالص وبعيد يدوس بنزين ويخش قبلي واضغط انا علي الفرامل عشان صاحبك يمر بكل عقده البسيطة و الركبة
Post: #17 Title: Re: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: Manal Mohamed Ali Date: 07-04-2009, 03:02 PM Parent: #16
Quote: المرة الفاتت تراجي مصطفى .. قلبته اهـا إنت دقشتي لينــا منو الليلة من الصباح ؟؟
تمبس يا ود امي انت كان ماجبت سيرة تراجي اصلوا ما بترتاح!!!؟؟؟!!!
الله ..يهدي سرك
Post: #18 Title: Re: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: Hadia Mohamed Date: 07-04-2009, 04:05 PM Parent: #17
جايبين فكرة النسوان ما بعرفن يسوقن دى من وين غايتو جنس حقارة, بعدين محلات المساج ووجع الضهر كلها رجال ليه من الحوادث وقليب العربيات الرجال فالحين فى السواقة داخل السودان عشان فى السودان رجالة ساى ما سواقة دفير وخبيت والديه رخيصة والبنى ادم رخيص لكن مرقتهم بره السودان تعالى شوفى الزوغان يخربهم .
Post: #19 Title: Re: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: محمد اشرف Date: 07-04-2009, 04:52 PM Parent: #18
التعديل لحذف كود الفيديو
Post: #20 Title: Re: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: أحمد الشايقي Date: 07-04-2009, 05:17 PM Parent: #19
Quote: إذا رأيت إحدى السيدات تقود السيارة بسرعة كبيرة فالرجاء إفساح الطريق
أكيد لاحقة على عزومـة
أحمد الشايقي
Post: #53 Title: Re: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: تيسير عووضة Date: 07-09-2009, 11:47 AM Parent: #20
أحمد الشايقي ..
Quote: أكيد لاحقة على عزومـة
Post: #52 Title: Re: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: تيسير عووضة Date: 07-09-2009, 11:41 AM Parent: #19
أخوي محمد أشرف ..
تسلم كتير على الفيديو وياريت تحاول تنزلو تاني لو أمكن ..
Post: #21 Title: Re: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: Nazik Eltayeb Date: 07-04-2009, 06:35 PM Parent: #18
الفيديو ادناه و برغم ما فيه من تهور رد بليغ يوضح براعة النساء في الباركنق
Post: #54 Title: Re: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: تيسير عووضة Date: 07-09-2009, 12:06 PM Parent: #21
نازك ..
الزولة دي كسرت الإعتقاد السائد بتاع إنو السيدات ما بيعرفو يبركنو العربية وكيتاً في عمرو أديب ومن لف لفه
لكن تقولي شنو في جنس دا
أكيد في مغرض جا وقف العربية بالعرض عشان يقولوا ديل النسوان
Post: #55 Title: Re: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: تيسير عووضة Date: 07-09-2009, 12:18 PM Parent: #54
شافع قليل أدب ..
Post: #56 Title: Re: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: تيسير عووضة Date: 07-09-2009, 12:23 PM Parent: #55
طبعاً في ناس كدا أمنية حياتهم يشوفوا المنظر دا على الطبيعة لما ما لقوا طريقة قاموا رسموهو ..
Post: #22 Title: Re: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: Hala Hassan Date: 07-04-2009, 07:31 PM Parent: #18
أنا غايتو بسوق بسرعة و باكل شوكولاتة لنفس السبب:
أخفف من التوتر،،،،،،،،
أخير ياتو؟؟؟؟؟
Post: #57 Title: Re: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: تيسير عووضة Date: 07-09-2009, 12:36 PM Parent: #22
هالة ..
Quote: أنا غايتو بسوق بسرعة و باكل شوكولاتة لنفس السبب:
أخفف من التوتر،،،،،،،،
أخير ياتو؟؟؟؟؟
نحن كدا زي بعض ..
أظن دا حل مناسب
مرة تسوقي ومرة تضوقي ..
Post: #25 Title: Re: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: علاء الدين يوسف علي محمد Date: 07-04-2009, 08:07 PM Parent: #18
تيسير عووضة سلامات الليلة نصت نهار في إشارة تقاطع السيد عبد الرحمن مع القصر و إحنا متجهين من الشمال للجنوب الإشارة فتحت الخط الأنا فيهو تاني واحد من الإشارة العربية القدامي حلفت ما تتحرك لحدي ما قفلت تاني و أنا جارِّي بوري طويييييييييييل و معاهو حاجات تانية لمن قفلت نزلت أول زول و كان وراي إتنين كللللللللللللللهم تأبّط شرا ذاتو أنا وصلت تاوقت و رجعت حمُّروا لي نظام متواطيء ولا شنو!!!؟ التاني لحقني و التالت لحقو عملوا نفس الحركة عاينت ليهموهم راجيعن و أنا بضحك المنظر كان واحدة ست رافعة يدها لكل من يأتي لينظر مع ابتسامة محرجة و رأس يتهوزز من الخوف و الخلعة و الخجل و غايتو الله يعين بس وريني نمرة عربيتك شان نوريك المقصات كيف
Post: #58 Title: Re: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: تيسير عووضة Date: 07-09-2009, 12:56 PM Parent: #25
علاء الدين ..
بيني وبينك الحركة دي غياظة شديد لأنو ساعة الزحمة نص الثانية بيفرق في الإشارة
في مقولة بتقول رغم عدم إيماني بيها إنو المرأة لو ماشة ما بتقيف في الإشارة ولو وقفت تاني ما بتمشي
السواقة عايزة سرعة تصرف وإنتباه ومراعاة لباقي السايقين الحولنا ودي أعتقد بتتوقف على الشخص نفسو وطبعو أكتر من كونو راجل ولا إمرأة
أو هكذا أظن ..
Quote: وريني نمرة عربيتك شان نوريك المقصات كيف
مش حتئدر مرة في الشارع واحد سايق نيسان أرمادا قدر الليلة وبكرة وعامل فيها عايز يتخطاني بالقوة أبيت كلو كلو إتغاظ طبعاً بإعتبار إنو عربيتي أصغر لما جا قدامي شوية حمر لي وقال: لا وكمان حرمة مافي زول بيقص لي يا علاء مالم آذن له بذلك إنت قايل براك النحل
Post: #28 Title: Re: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: شمائل النور Date: 07-05-2009, 11:40 AM Parent: #18
تيسير عووضة
يعوضك الله في شعوركـ المجروح
بالمناسبة دي في نكتة بتحكى دائما في مسالة السواقة وكدا والعاجباني جدا انو بطلها رجل ما مرة آآآآ
قالوا واحد من اخوانا الرجال ديل بيتعلم في سواقة العجلة ، وعصرية كدا ركز جرعة التدريب وبقى كاسح ليكـ في الشارع وقاصد ليكـ دكان فاتح على مشرعيه ، بتاع الدكان خاف على نفسه وصاحبنا زايد السرعة وجاي عليهو،بتاع الدكان بقى يقول ليهو يازول لف يمين لف يمين ، صاحبنا لانو مابعرف يلف يمين ، بقى يقوليهو:: لا لا قفل انت قفل انت
Post: #59 Title: Re: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: تيسير عووضة Date: 07-09-2009, 01:05 PM Parent: #28
شمايل ..
Quote: بالمناسبة دي في نكتة بتحكى دائما في مسالة السواقة وكدا والعاجباني جدا انو بطلها رجل ما مرة آآآآ
قالوا واحد من اخوانا الرجال ديل بيتعلم في سواقة العجلة ، وعصرية كدا ركز جرعة التدريب وبقى كاسح ليكـ في الشارع وقاصد ليكـ دكان فاتح على مشرعيه ، بتاع الدكان خاف على نفسه وصاحبنا زايد السرعة وجاي عليهو،بتاع الدكان بقى يقول ليهو يازول لف يمين لف يمين ، صاحبنا لانو مابعرف يلف يمين ، بقى يقوليهو:: لا لا قفل انت قفل انت
الغريبة سيد النكتة دي برضو راجل: بوليس الحركة سألو قال ليهو حرام عليك ياراجل تقتل ليك 56 روح في نفس الوقت قال ليهو ياجنابو على يميني كان في راجل وعلى شمالي في صيوان بتاع عرس إنت لو في محلي كنت حاتضرب ياتو فيهم قال ليهو أضرب الراجل العلي اليمين براهو قال ليهو أنا زاتي قلت كدا لكن هو جرى دخل الصيوان
Post: #51 Title: Re: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: تيسير عووضة Date: 07-09-2009, 11:11 AM Parent: #18
هادية ..
Quote: جايبين فكرة النسوان ما بعرفن يسوقن دى من وين غايتو جنس حقارة, بعدين محلات المساج ووجع الضهر كلها رجال ليه من الحوادث وقليب العربيات الرجال فالحين فى السواقة داخل السودان عشان فى السودان رجالة ساى ما سواقة دفير وخبيت والديه رخيصة والبنى ادم رخيص لكن مرقتهم بره السودان تعالى شوفى الزوغان يخربهم .
دا التنميط الماعندو أسس
البلد الأنا عايشة فيها دي يا هادية مشهورة بعدم إعطاء الرخص بسهولة في ناس بيمتحنوا خمسة ستة سنوات "مش مرات" لغاية ما يطلعوا الرخصة ولما تطلع بتبقى دي مناسبة سعيدة يكرموا ليها ويوزعوا بيبسي وحلاوة عشان كدا الناس بيسوقوا بمستوى إحترافي وكل زول عارف البيهو والعليهو سواقة المجاملة والواسطات دي أظنها بس في السودان ..
Post: #24 Title: Re: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: Hala Hassan Date: 07-04-2009, 07:37 PM Parent: #17
بعدين،،
Quote: ?ثانيا : الإناث
1 - قودي السيارة إلى الماكينة
2 - عودي للخلف قليلا حتى تصبح النافذة بمحاذاة الماكينة
3 - ارفعي فرامل اليد وافتحي النافذة
4 - افرغي محتويات حقيبتك على المقعد المجاور إلى أن تجدي البطاقة
5 - انهي مكالمتك التليفونية مع وعد محدثك بإكمال المكالمة في وقت لاحق
6 - حاولي إدخال البطاقة في الماكينة
7 - افتحي الباب لمحاولة الوصول إلى الماكينة لبعد سيارتك عنها
8 - ادخلي البطاقة
9 - عاودي إدخال البطاقة بطريقة صحيحة
10- ابحثي في حقيبتك عن مفكرتك والتي بها الكود السري
11 - ادخلي الكود
12 - اضغطي إلغاء ثم ادخلي الكود الصحيح
13 - ادخلي المبلغ المطلوب سحبه
14- تأكدي من تمام زينتك في مرآة السيارة
15- اسحبي المبلغ والإيصال
16 - افرغي محتويات حقيبتك مرة أخرى حتى تجدي حافظة نقودك. ثم ضعي المبلغ المسحوب بها .
17 - دوني المبلغ المسحوب في مفكرتك وضعي الإيصال في الحقيبة
18- أعيدي التأكد من زينتك
19 - قودي السيارة لمسافة 0.5 متر فقط
20 - عودي للوراء إلى الماكينة مرة أخرى
21- اسحبي البطاقة
22- افرغي محتويات الحقيبة مرة ثالثة وضعي البطاقة في الحافظة الخاصة بها
23- أرمقي الرجل المنتظر وراءك بنظرة ازدراء
24 - شغلي المحرك
25 - أعيدي مكالمة محدثك على الهاتف
26 - قودي سيارتك لمسافة 2-3 كم
27 - أنزلي فرامل اليد
أنا أعترض،،،،،،،،،،،،
الزى دى، نسحب منها و هى متحركة،،،،،
Post: #26 Title: Re: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: tmbis Date: 07-05-2009, 10:21 AM Parent: #17
Quote: تمبس يا ود امي انت كان ماجبت سيرة تراجي اصلوا ما بترتاح!!!؟؟؟!!! الله ..يهدي سرك
.. يا بت امي إنت كان طلعتي منها مش احسن ليك ؟؟
البوست دا دمو خفيف .. واخده بالك ؟؟ والزولة السايقة العربية دي قاعد ارتاح لي سواقته ولي كتابته لما تكون عايزه تكتب وتسوق بي مزاج . حسع في داعي يعني للمساخه دي من الصباح ؟؟
أنا ما عارف بكري بجيب لينـا النوعية دي من وين.. ؟؟
ـــ
Post: #50 Title: Re: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: تيسير عووضة Date: 07-09-2009, 09:59 AM Parent: #17
مرحب بيك يا منال ..
Post: #49 Title: Re: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: تيسير عووضة Date: 07-09-2009, 09:55 AM Parent: #16
نازك ..
Quote: بس غايظاني حكاية اكون خاشة الدوار (الصينية) و الاسبقية لي و سرعتي مناسبة وبتاع الحافلة البرة خالص وبعيد يدوس بنزين ويخش قبلي واضغط انا علي الفرامل عشان صاحبك يمر بكل عقده البسيطة و الركبة
في بعض السائقين وبالذات العربات الكبيرة لما يلقى السايقة إمرأة بيحاول يضيق عليها الشارع مستغلين حتة إنو النساء بيخافوا من العربات الكبيرة أنا غايتو لمن الشارع يكون حقي ما بديهو للبموت مش كدا وبس مرات كمان بتغول على حق التاني لوحسيت بيهو داير يحقر بي
Post: #47 Title: Re: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: تيسير عووضة Date: 07-09-2009, 09:40 AM Parent: #14
Post: #46 Title: Re: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: تيسير عووضة Date: 07-09-2009, 09:03 AM Parent: #13
يا عمدة ..
Quote: ُيُحكي يا تايسا ياخوي .. قالوا زمان بوليس الحركة بيكون جنبو جردل مويه .. تجي زولتك دي طايره و لفخخخخ تعمل حادث .. و هي في مسماها داك جوه عربيتها البوليس بيجيب جردلو و يجي .. و .. شووووووووووووووووووو .
...... زمان المَرَات - جمع امرأة بحسب لسان عبدالله ولدي - كانن خوافاااااات .. لا بيسوقن ( بسرعة كبيرة ) .. و لا بينزلن من العربية
أوشاعات .. صدقني أوشاعات
الراجل العلمني السواقة يا عماد باكستاني قدر الحيطة وشراني شر كلما كنت أغلط يديني ليك نهرة يوقف الدم في عروقي والغريبة كان بيقول نفس كلامك دا يقول لي خلي قلبك قوي وختي أعصابك في تلاجة عشان مايحصل زي كلامك الفوق دا مرات كنت بزعل وأقول هي دي سواقة ولا عسكرية وأقرب أخليها ليهو
لكن في النهاية جات بي فايدة بقت عندي مناعة نفسية قوية ضد مفاجآت الطريق
له التحايا من على البعد
Post: #45 Title: Re: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: تيسير عووضة Date: 07-09-2009, 08:53 AM Parent: #12
تمبس ..
Quote: طيب ما تقولي كدا من الصباح .. من دقشة عادية بعد كلامك دا .. انا بعتبر دا تحرش
لو إنت نسيت أنا ماااا نسيت
تحرش مروري
Post: #23 Title: Re: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: abas Date: 07-04-2009, 07:31 PM Parent: #1
يا فرده
قولي كلامك ده لي زول ما ئندو هديده
مأأأأأأأأأأأأأاك مألمين
خلي بالك ما تجيبي العين لي نفسك ساي
يديك خيرها ويكفيك شرها يايمه
طالبك سحبه فيها
ولا بتاجريها
تحيات يا فرده
Post: #29 Title: Re: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: محمد اشرف Date: 07-05-2009, 09:17 PM Parent: #23
.
Post: #30 Title: Re: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: نوسة Date: 07-05-2009, 09:30 PM Parent: #29
سلام
و الله لكن صحي إنتو ما شفتو السواقة!!!!!!
إنتو يا ناس السعودية عشان ما عندكم نسوان بسوقو و لا شنو؟؟؟؟؟
بننزل ليكم فيديوهات تاني، بس تابعونا.....
أنا شخصياً ما بتطمن لي سواقة زول غيري
و كدي أسألوا ناس البحرين من سواقتي "أنا في البحرين مسميني سواقة التيمس قدوم صغير"، إنتو أسي سمعتو بي (التيمس قدوم قصير) دة؟؟؟؟
((( غادي غادي الجزام بيعادي)))
(((أقعدوا سمح و نضفو القمح)))
ههههههههههههه
Post: #61 Title: Re: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: تيسير عووضة Date: 07-11-2009, 08:38 AM Parent: #30
نوسة ..
Quote: إنتو يا ناس السعودية عشان ما عندكم نسوان بسوقو و لا شنو؟؟؟؟؟
الموضوع ما السعودية بس العالم كلو بيسخر من سواقة السيدات على الأقل السعوديين أخدوها من قاصرها ومنعوهم من السواقة ودا أنا بعتبرو "إتساق بين القول والفعل" لكن الباقين ديل مالم؟
Quote: "أنا في البحرين مسميني سواقة التيمس قدوم صغير"، إنتو أسي سمعتو بي (التيمس قدوم قصير) دة؟؟؟؟
التيمس الجـدع العــربات في اللفة سواقو عصرو خلى الخلوق تتكفى
ياراعية التيمس
Post: #62 Title: Re: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: تيسير عووضة Date: 07-11-2009, 08:44 AM Parent: #61
يافطات السعودية لو سمحوا بسواقة السيدات ..
Post: #31 Title: Re: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: معتصم دفع الله Date: 07-05-2009, 09:38 PM Parent: #29
Quote: ما دعاني لقول هذا هو الكلام الذي وجهه لي أحد السائقين بغضب: خلينا لينا ليكم البيوت كمان جايين لاحقيننا في الشوارع !
يا تيسير ياخي الزول دا عصر عليك شديد غايتو أنااليوم جاني كابوس كان قالوا لي سوق ليك عربية تاني ما بسوقه ..
ربنا يحفظ الجميع ..
Post: #32 Title: Re: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: Rawia Date: 07-05-2009, 10:23 PM Parent: #31
مواطنين دولة الامارات وخاصة البسوقوا بالليل من العين لابوظبي بيبالغوا عديل يعني فيها شنو لو اتنين فرروا يتونسوا في السكة وهم سايقين على أقل من مهلهم وفي Lane بتاع السريع فيها حاجة دي يقطعوا قلبي وينتهوا مني كدا ليه؟
يخلوا الزول يحلف مايسوق في بلدهم تاني
_____________ صراحة ياتيسير اليوم داك معاك كان متعة لاتعدلها متعة ياخ مشوار ساعتين وصلنا البيت بعد ستة ساعات ونص مابين عطلة من لنا في العين لسواقة براحة لدخول (مخرج) غلط طلعنا منه قريب لدبي وبعد مادخلنا في الشارع عكس وإنتهاء بالبحث عن باركينج تحت البيت
Post: #33 Title: Re: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: AnwarKing Date: 07-05-2009, 10:47 PM Parent: #32
عسكري الحركة واقف قريب من خط العربات قدام إشارة المرور... سيدة في مقدمة صف العربات تنتظر الإشارة تضوي أخضر...
ولّع أصفر، ثم أخضر...وعربة السيدة ما تزال كما هي...لحدي ما ولّع أحمر تاني... و الجماعة من ورا يضربوا في البوري...
تاني ولّع أصفر...ثم أخضر...وعربة السيدة واقفة...
طرق عسكري الحركة على زجاج نافذة السيدة قائلاً: يا ماما والله دي كل الألوان المتوفرة...ممكن تمشي؟
Post: #64 Title: Re: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: تيسير عووضة Date: 07-11-2009, 09:13 AM Parent: #32
Quote: مواطنين دولة الامارات وخاصة البسوقوا بالليل من العين لابوظبي بيبالغوا عديل يعني فيها شنو لو اتنين فرروا يتونسوا في السكة وهم سايقين على أقل من مهلهم وفي Lane بتاع السريع فيها حاجة دي يقطعوا قلبي وينتهوا مني كدا ليه؟
يخلوا الزول يحلف مايسوق في بلدهم تاني
آخر لاين على الشمال في الـ high way أقل سرعة فيهو من +140 أها الست راوية متعودة على سواقة أمريكا وماشة في الشارع تتقدل بي 80 كل دقيقتين يجيها ليك واحد طاير من هنااااك وجاري نور طويل عشان تزح ليهو وهي تقعد تكورك معروف إنو الما عايز يمشي بسرعة يختا اللاين دا تحديداً راوية دايرة تتونس وتعطل الحركة وكمان ما دايرة زول يسألها
Quote: صراحة ياتيسير اليوم داك معاك كان متعة لاتعدلها متعة ياخ مشوار ساعتين وصلنا البيت بعد ستة ساعات ونص مابين عطلة من لنا في العين لسواقة براحة لدخول (مخرج) غلط طلعنا منه قريب لدبي وبعد مادخلنا في الشارع عكس وإنتهاء بالبحث عن باركينج تحت البيت
ياخي وجودك في حياتنا براهو متعة يا بت يا لذيذة بس ملاحظة إنو أهم حاجتين في الموضوع دا ما قلتيهم "وبيني وبينك أحسن زاتو"
Post: #63 Title: Re: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: تيسير عووضة Date: 07-11-2009, 08:54 AM Parent: #31
Quote: يا تيسير ياخي الزول دا عصر عليك شديد غايتو أنااليوم جاني كابوس كان قالوا لي سوق ليك عربية تاني ما بسوقه ..
ربنا يحفظ الجميع ..
الزول دا تلقى مرتو مكرهاو في البيت جا يتفشاها فيني أنا
هسي عليك الله يا معتصم في كابوس أكتر من مقابلة تمبس دا
Post: #60 Title: Re: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: تيسير عووضة Date: 07-09-2009, 01:17 PM Parent: #23
عباس صحبي ..
Quote: يا فرده
قولي كلامك ده لي زول ما ئندو هديده
مأأأأأأأأأأأأأاك مألمين
خلي بالك ما تجيبي العين لي نفسك ساي
يديك خيرها ويكفيك شرها يايمه
طالبك سحبه فيها
ولا بتاجريها
تحيات يا فرده
إنت ماسمعت المثل المنجور البيقول لاتستلف عربية زول لا تسلف عربيتك لي زول مش تبقى زي أخونا دا:
Post: #34 Title: Re: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: قاسم المهداوى Date: 07-05-2009, 11:46 PM Parent: #1
Quote: ]فالمرجو حسن تعاونكم يا جماعة
يا ناس زحمة الطريق ويا بوليس الغضب ( البوليس المسم ) بولبس المرور ارجو مراعة الظروف اعلاها !!!
قاسم المهداوى
هامش فصدت كبد الفرحة فينا
Post: #35 Title: Re: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: SHIBKA Date: 07-06-2009, 05:32 AM Parent: #34
وهنا القطريين عندهم مثل بيقولوا ليك
ما تمشي ورا مراة ولا ورا سوداني الاتنين بعطلوك
ودي حقيقة في نسوان بيكونوا ماسكين في الدركسون دا التقول حيطير
بركة الجبرونا على ربط الاحزمة والا....
صباح الخير ياتيسير
Post: #36 Title: Re: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: رأفت ميلاد Date: 07-06-2009, 09:39 AM Parent: #35
تيسير ما قريت كله وبتمه بعدين .. بس حرقتنى دى:
Quote: بطبيعة الحال .. القيادة النسائية معروفة بالحذر والرزانة أكثر
ونادراً ما نجد إمرأة تقود السيارة بتهور في الشارع
تعرفى هنا لم يعترفوا برخصتى السودانية ودخلونى مدرسة .. المعلمة إمرأة .. يوم تخطيت سيارة تقودها إمرأة .. ملاحظة المعلمة (يجب الحزر الشديد وأخذ مساحة ومسافة كافية للأمان .. خاصة فى الطرق السريعة .. عندما تخطى إمرأة أو الأفساح لها للتخطى .. لأن المرأة تقوم بتصرفات مفاجئة غير متوقعة وتكون خطيرة ) .. قلت لها ضاحكآ من الغريب سماع ذلك من إمرأة .. ردت بجدية (أولآ هذا حزء من الدرس وليس من عندها .. ثانيآ أنا نفسى أحيانآ أفعل أشياء أتحير لها .. نصيحتى دائمآ للنساء .. عدم القيادة لا فى الحزن ولا فى الفرح على حد سواء .. فى الحالتين يتقمصهن طفل أخرق)
قال رازانة وحزر قال
Post: #37 Title: Re: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: Hala Hassan Date: 07-06-2009, 10:53 AM Parent: #36
Quote: تعرفى هنا لم يعترفوا برخصتى السودانية ودخلونى مدرسة .. المعلمة إمرأة .. يوم تخطيت سيارة تقودها إمرأة .. ملاحظة المعلمة (يجب الحزر الشديد وأخذ مساحة ومسافة كافية للأمان .. خاصة فى الطرق السريعة .. عندما تخطى إمرأة أو الأفساح لها للتخطى .. لأن المرأة تقوم بتصرفات مفاجئة غير متوقعة وتكون خطيرة ) .. قلت لها ضاحكآ من الغريب سماع ذلك من إمرأة .. ردت بجدية (أولآ هذا حزء من الدرس وليس من عندها .. ثانيآ أنا نفسى أحيانآ أفعل أشياء أتحير لها .. نصيحتى دائمآ للنساء .. عدم القيادة لا فى الحزن ولا فى الفرح على حد سواء .. فى الحالتين يتقمصهن طفل أخرق)
تعرف يا رافت،، دة كلوو ما بينطبق علينا فى السودان،،
هنا التصرفات المفاجئة بتجى من ناس الركشات و الحافلات و الأمجادات،،
عمرك شفت ليك زول بتاع حافلة (فيها ركاب و ما بتصور فى فيلم اكشن) بتخطى و يمسك أقصى الشمال، و فجأة يكسر يمين عشان ينزل زول (طبعا ما فى محطة معينة)،،،
تقول لى سواقة النسوان؟؟؟؟ ياخى ديل رحمة،،،
بعد إذنك يا تيسير،،،
Post: #38 Title: Re: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: رأفت ميلاد Date: 07-06-2009, 11:10 AM Parent: #37
هالة با ظريفة ضحكتينى جد .. طبعآ زمن رقشالتكم ما حضرناه لكن الآكشن ده متخيلوا زى ما فى مصر .. الواحد يركب مشعلق فى الطبلون .. يوم واحد وقف فى الأستوب نزلت جرى .. أقول ليك يا هالة دراسة علمية تطبزيها
Quote: عمرك شفت ليك زول بتاع حافلة (فيها ركاب و ما بتصور فى فيلم اكشن) بتخطى و يمسك أقصى الشمال، و فجأة يكسر يمين عشان ينزل زول (طبعا ما فى محطة معينة)،،،
تقول لى سواقة النسوان؟؟؟؟ ياخى ديل رحمة،،،
ده زى البتقولى لى سواقة النسوان زى سواقة ناس الرقشات هههههه .. غايتو يا هالة بدون جندرة بخاف من سواقة النسوان .. زمان زوجة أخوى الله يرحمه تهانى ما بركب معاها إلا تدينى المفتاح .. ديك ما سواقة رقشات .. ديك قندرانات عديل .. ما تلم فى كتابتى دى إنشاءالله
مشتاقين يا هالة
Post: #39 Title: Re: إذا رأيت إحدى السيدات تقود السيارة بسرعة كبيرة فالرجاء إفساح الطريق Author: Hala Hassan Date: 07-06-2009, 01:15 PM Parent: #38
يا رأفت،
Quote: ده زى البتقولى لى سواقة النسوان زى سواقة ناس الرقشات هههههه .. غايتو يا هالة بدون جندرة بخاف من سواقة النسوان ..
ما حكاية كلام علمى و النساء عاطفيات، بالجد هنا الناس كلهم (بيضطروا (يكنكشوا) فى الدريكسون ليه؟؟ ما عشان الفيلم الفوق دة،
و لا ناس القندرانات الجد جد، وهم دايسين بسرعة الف فى الشارع،،
ياخى ديل الناس الوحيدين البملوا عينى فى الشارع، و بقيف ليهم إحتراما كدة،،،،
Quote: زمان زوجة أخوى الله يرحمه تهانى ما بركب معاها إلا تدينى المفتاح .. ديك ما سواقة رقشات .. ديك قندرانات عديل .. ما تلم فى كتابتى دى إنشاءالله
الله يرحمو و يرحم الجميع، لكن جندرة منى برضو، إنشالله تلم فى كتابتك،،،،، أها،،،،
