صور من حلتنا ..

غنماية راقدة قي قعر الحيطة بكسل لذيذ
من أنا في خامسة ابتدائي وجمبها ربطة قش فرغت من أكله للتو

موية عدة مكشحة وفيها بواقي عجور وقشر بيض وشنو ما عارفة

دكان المكوجي بحباله الممدودة اول ما تدخل
وكم ترتار خاتين فيهم الطشاتة
ومنقد بيفوروا فيهو الصابون
وعم ابراهيم بيهز في المكوة عشان يحت الهبوت

حاجة السرة بشلوخها الاصيلة وهي راجعة من الخدار وشايلة قفتها
وتتهادى من بداية الشارع

دكان التموين لامي عواجيز الحلة
وعلى رأسهم عم بابكر بي نضاراتو قعر كباية
قاعدين بإهمال وهم بتداولوا كيس السفة
ويعيدوا ويزيدوا في قصص محفوظة عن ظهر قلب

الطيب سيد الدكان خاتي القدرة و بعدين خاتي كيس نايلون ومغطيها
وفوق الغطا حجر كبير لزوم الكبس وكده
ورابطا بسلك من الاضان للاضان (بريستو بلدي)

حاجة العافية قاعدة في ركن المدرسة وراصة حاجاتا قداما
والشفع ما يدوك الدرب
قراصة نبق، دقة قنقليز، لالوب، دوم، تبش بالشطة، حلاوة عكاز ...
والحاجات الحلوة ديك

مزيرة فيها تلاتة أزيار ومغطية بأغطية خشب
وكوز بتاع صلصة مقدود ومربوط بي حبل أخدر في واحد من الأغطية ديك
(بس ما زي ازيار ملاسي)

زريبة ود الزين بترابا الاسود وشوالات الفحم مردومة فوق بعض
وكيمان من الشاف والطلح وحطب العواسة ..
وميزان معمول من تلاتة عيدان
بتتلاقى في النص ونازل منها شنكل يستعمل كمعبار للحطب

عباس سيد الطعمية قاعد قصاد الدكان ويقلب في الطعمية :
- ياولد داير بي كم ؟
- اديني بي خمسين ...
يخت للولد قدر قروشو في قرطاس معمول من جريدة
ويرجع يقلب تاني في الطعمية

حاجة كلتوم قاعدة جمب التعاون بتاع الخضار
على يمينا كم برطمانية فيهم شطة وتوم منضف وبهارات ومرقة وظهرة
وعلى الشمال كوم بتاع مقاشيش وطباقة جميلة ملونة و بأحجام مختلفة



وتاني شنو ..؟

طفولة عمالية، كنا نلغي مباراة مهمة مع شفع فريق "فوق" حتى نذهب للطاحونة، لا أدري موقف الفيفا من مباراة تنتهي في الدقيقة 17، ومن لاعبين حفاة، وبكرة من شراب أخي عبد العزيز، ومع هذا يسجل "مدثر" أبن أختي، هدف بارع، في مرمى واهن مكون قائمته اليمنى من ثياب مزقها الفقر وقائمته اليسرى من طوبة فقدت وظيفتها لعرج لحق بظهرها، أما اللعيبة، فقط تأمرت علي أقدامهم الأشواك، وعلى رؤسهم التراب، وبدائية التربية، وعلى بطونهم الجوع، .. وحيناً آخر... وقبل أن أكمل رسم أرجل البقرة، يرسلني خالي لجلب كيس صعود، وحين أعود تكون الرياح وأرجل الغنم قد مسحت بقية جسد البقرة، لأن كراس الرسم لم يكن سوى الفسحة الواقعة قدام ظل الصالون، ألم تدري هذه الرياح الهوجاء إي ذنب ارتكبت، لقد رسمت بقرة لا وجود لها في الوجود، فهي لا ترعى إلا في خيالي، صفراء فاقع تسر الناظرين، ولو علمها اليهود لفدت تلك البقرة المكلومة بحكم الوقت... والأمطار... هذا التجلي الجمالي، كان جلالياً فوق بيوتنا الطينية، مع أبن أختي نصعد فوق الأسقف حتى نسد الثقوب ونصلح "السبلوقة" ونردم التراب على أركان الدار، كان البرنامج اليومي عبارة 5 كيلو متر للذهاب للمدرسة والإياب، و3 كيلو لإحضار الشاي والعدس والتنباك والفول، و30 دقيقة لحلب الغنم، وساعة لمحو ألم شوكة انغرزت في الأرجل الحافية، ونكف عن ثرثرتنا الطفولية 22 دقيقة خلال اليوم، فقد قطع نهيق حمارة مصطفى حبل تفكيرنا وكذا حمار طه.. وبتول.. وسعد.. وأما الليل، فلا تلفاز يعكر الصفو، فالتلفزيون هو هذه السماء العريضة الصافية، وأبطالها النجوم والقمر، ولكن سريعاً ما يفسد الغول والغول والبعاتي صفونا، فمن أوجه الطاقات تطل علينا، فقد ترك للحبوبات تربية ضميرنا المغيب، فصرنا نحس بالبعاتي مع كل هزه للباب، " والدعت" ولو لا "النبي نوح" هذه الروشتة الحافظة، لأمطرتنا الدوابي والعقارب..كنا برجوازية صغار، بفهم النبي ماركس، فأدوات الإنتاج مثل الملود، والسلوكة، والمنجل، كانت بحوزاتنا، ونجيد استخدامها بمهارة فائقة، كنا برجوازية صغار بحق، سقطنا سهوا من فكر ماركس، ليته قال " يا أطفال العالم اتحدو.. ليس لديكم ما تفقدونه سوى طواريكم وكوريكاتكم.. وغولكم وبعاتيكم.. وشوككم وغباركم.. والحسنة الوحيدة في هذه الطفولة.. كانت " قصة فاطمة السمحة" ... كنا نسترق السمع لقصتها عشرات المرات، ونحلم بها... بذلك الفردوس المفقود في حجرها، وبشعرها الطويل...

تيسير

لك كل الود و التقدير

Quote: وعم ابراهيم بيهز في المكوة عشان يحت الهبوت

أعجبتني هذه الصورة لدرجة أنها أرجعتني للوراء بذاكرتي سنوات عديدة .. إلى عطبرة مرتع الصبا ..

واصلي .. سآتيك بذكريات مماثلة ..

أرقدي عافية

أبو جهينة
إزيك ..

ليت زماننا يقف عند تلك الايام
جميلة هي
والاجمل تلك التفاصيل العادية
و

منتظرينك ..

عبد الغني كرم الله
الشكر لك وانت تصف لنا هذه الصورة الرائعة من الحلة
هي ما يعلق بالذاكرة
ويقتات من شوقنا لها

شكرا يا زول يا جميل
و خليك هنا ..

Quote: وعم ابراهيم بيهز في المكوة عشان يحت الهبوت

عمر عبد الخالق
إزيك ..

شايفاها عجبتك

Quote: غنماية راقدة قي قعر الحيطة بكسل لذيذ من أنا في خامسة ابتدائي وجمبها ربطة قش فرغت من أكله للتو موية عدة مكشحة وفيها بواقي عجور وقشر بيض وشنو ما عارفة دكان المكوجي بحباله الممدودة اول ما تدخل وكم ترتار خاتين فيهم الطشاتة ومنقد بيفوروا فيهو الصابون وعم ابراهيم بيهز في المكوة عشان يحت الهبوت حاجة السرة بشلوخها الاصيلة وهي راجعة من الخدار وشايلة قفتها وتتهادى من بداية الشارع

هي ... دي ما حلتنا.....

يالله ما اروعك ياتيسير

انتو ماملاحظين انو الاشياء دي كلها بتكون متشابهة في كل منطقة
رجعتني نفس الذكريات الى مدينة ودمدني ايام دراسة الابتدائي والمتوسطة

يالله نفس الغنمايه ونفس سلك الغسيل وبتاع اللبن بتاع النهار بيوزع في اللبن وبتاعين القزاز والشوالات طبعا(المعاه قزار بعدين قلبت المعاه جركانات وشوالات الفحم )

واصلوا في تلك الروائع

واتحفونا مع ذكريات الطفولة


ابومصطفى

keiga2000
هي ذكريات مشتركة
كأننا كنا نسكن حلة واحدة كبيرة

مش عندكم برضو حاجة السرة وعم ابراهيم المكوجي ..


لسه تاني في بس اتذكر

والدنيا بدايات عصــر شايف بخيت راكب حمارو المكادي ... ماش وين بدري كده يا حاج؟ ... والله ماشي الحواشة قالو المفتش جاي علينا بي غادي ...

تمشي ورا الحلة الشباب طالعين الميدان .. قالوا في تمرين كارب أصلو بيستعدوا للمباراة الجاية...

وأنا راجع لاقيت حاجة بتول ساكة الغنماية ... قالت لي مشيت الزريبة أجيب الغنماية المطموسة دي أتاري الغنماية دخلت في حواشة أولاد أحمد ود مساعد وودوها زريبة ود العامري ... والله بايتة ليها يومين وغرمونا جنيــه كامل ... عليك الله دي حالة دي...

الحلاوي
إزيك ..

Quote: وأنا راجع لاقيت حاجة بتول ساكة الغنماية ...

اما عن حاجات الحلة وسك الغنم فدا برنامج براه

تيسير


سؤال بره الموضوع

هل تيسير مذكر ام مؤنث

تابعت و لاحظت انك بتكتب بصيغة الذكر عندما تتحدث عن حالك

و الاخوة المتداخلين يخاطبو بي صيغة مؤنث !!!

فهل أخطأت !! ام اخطاء المتداخلون !!!




تهريجة:
** للعلم بالشيء و ليس للتشكيك ..

فيصل نوبي

Quote: هل تيسير مذكر ام مؤنث

البيعجبك نحن راضين بيهو

Quote: عمر عبد الخالق إزيك .. شايفاها عجبتك

دي كفاية

Quote: جبناها ليك كلها الايام دي انت محتاج لمصطفى شديد

عمر عبد الخالق

Quote: الايام دي انت محتاج لمصطفى شديد

صاحبك وانت أدرى بيهو

تيسير

شكرا على فتح هذه النافذة المطلة على ساحة الزكريات العطرة والحلوة والمغروسة بحرص على تربة المخيلة الخصبة آنذاك.

الأخ عبد الغني

Quote: طفولة عمالية، كنا نلغي مباراة مهمة مع شفع فريق "فوق" حتى نذهب للطاحونة، لا أدري موقف الفيفا من مباراة تنتهي في الدقيقة 17، ومن لاعبين حفاة، وبكرة من شراب أخي عبد العزيز، ومع هذا يسجل "مدثر" أبن أختي، هدف بارع، في مرمى واهن مكون قائمته اليمنى من ثياب مزقها الفقر وقائمته اليسرى من طوبة فقدت وظيفتها لعرج لحق بظهرها، أما اللعيبة، فقط تأمرت علي أقدامهم الأشواك، وعلى رؤسهم التراب، وبدائية التربية، وعلى بطونهم الجوع، .. وحيناً آخر... وقبل أن أكمل رسم أرجل البقرة، يرسلني خالي لجلب كيس صعود، وحين أعود تكون الرياح وأرجل الغنم قد مسحت بقية جسد البقرة، لأن كراس الرسم لم يكن سوى الفسحة الواقعة قدام ظل الصالون، ألم تدري هذه الرياح الهوجاء إي ذنب ارتكبت، لقد رسمت بقرة لا وجود لها في الوجود، فهي لا ترعى إلا في خيالي، صفراء فاقع تسر الناظرين، ولو علمها اليهود لفدت تلك البقرة المكلومة بحكم الوقت... والأمطار... هذا التجلي الجمالي، كان جلالياً فوق بيوتنا الطينية، مع أبن أختي نصعد فوق الأسقف حتى نسد الثقوب ونصلح "السبلوقة" ونردم التراب على أركان الدار، كان البرنامج اليومي عبارة 5 كيلو متر للذهاب للمدرسة والإياب، و3 كيلو لإحضار الشاي والعدس والتنباك والفول، و30 دقيقة لحلب الغنم، وساعة لمحو ألم شوكة انغرزت في الأرجل الحافية، ونكف عن ثرثرتنا الطفولية 22 دقيقة خلال اليوم، فقد قطع نهيق حمارة مصطفى حبل تفكيرنا وكذا حمار طه.. وبتول.. وسعد.. وأما الليل، فلا تلفاز يعكر الصفو، فالتلفزيون هو هذه السماء العريضة الصافية، وأبطالها النجوم والقمر، ولكن سريعاً ما يفسد الغول والغول والبعاتي صفونا، فمن أوجه الطاقات تطل علينا، فقد ترك للحبوبات تربية ضميرنا المغيب، فصرنا نحس بالبعاتي مع كل هزه للباب، " والدعت" ولو لا "النبي نوح" هذه الروشتة الحافظة، لأمطرتنا الدوابي والعقارب..كنا برجوازية صغار، بفهم النبي ماركس، فأدوات الإنتاج مثل الملود، والسلوكة، والمنجل، كانت بحوزاتنا، ونجيد استخدامها بمهارة فائقة، كنا برجوازية صغار بحق، سقطنا سهوا من فكر ماركس، ليته قال " يا أطفال العالم اتحدو.. ليس لديكم ما تفقدونه سوى طواريكم وكوريكاتكم.. وغولكم وبعاتيكم.. وشوككم وغباركم.. والحسنة الوحيدة في هذه الطفولة.. كانت " قصة فاطمة السمحة" ... كنا نسترق السمع لقصتها عشرات المرات، ونحلم بها... بذلك الفردوس المفقود في حجرها، وبشعرها الطويل...

هذه لوحة مرسومة بريشة فنان مدرك لما يفعله ، لا استطيع ان اقول سوى ما أروعك.

شرووم

شرووم
إزيك
..

ما يرسخ ايام الطفولة لايزحزحه بعد الزمان او المكان
تبقى الذكريات لنتداولها فيما بيننا ..

Quote: وتاني شنو ..؟

تاني و ين السلبة و درب البير بس .

حمد فتح الرحمن
إزيك ..

تاني كتييير
انت بس شيل الصبر .. وخلي بالك سلبة

حلتكم أكثرتطوراً من حلتنا لأنها لم تمارس لعبة حرب بالطين تلك اللعبة التي كان وقود الحرب فيها كرات طينية غير أن البعض كان يغش ويضع داخل كرة الطين حجر يحيل اللعب إلى حرب حقيقية ، ولم تعرف دافوري الشوارع ولا لعب الكوتشنيه أو الضمنة أو حتى البلي.
حلتكم أكثر وطنية لأنها لا تخرب المرافق العامة وممتلكات الدولة ممثلة في صيد لمبات الشوارع على قلتها وضعف إضاءتها الناتج عن رداءة نوعها ، أو كشيح موية البالوعات النتنه في قارعة الطريق .
حلتكم أكثر محافظة على البيئة لأن أغنامها ترقد في الضل وتمكث في رقادها ما بقي رزقها يأتيها رغداً وأمامها دون منازع عكس أغنام تقضي جميع حاجاتها في قارعة الطريق ، تقاتل وتسرح وتنكش كل شئ بدء من برميل الكوشة حتى تجد ما يسد رمقها من بواقي قشر بطيخ وشئ من سيقان ملوخية وبعض أكياس النايلون والدلاقين ومع ذلك تكون مطالبة بإنجاب عتوت للأكل ولبناً سائغاً لشاي الصباح وشاي المغرب.
حلتكم أقل تلوثاً لأن كوشتها لا يتم حرقها وسط السكان فتزيد الجو المخنوق أصلاً خنقة تبقيه بين الحياة والموت. ولا يقضي فيها البعض حاجاتهم في الميادين والفسحات ما أن تميل الشمس إلى الغروب فتحيل تلك الميادين والفحسات التي وجدت أصلاً كمتنفس إلى مكان أقل ما يوصف به أنه الأتعس.
حلتكم لا تسمع فيها صفارة قطار ولا صوت ساعة الحكومة ولا صوت نساء الجيران وهن يتجاذبن أطراف الحديث وبالحيطة لمن الحديث يقرب يموت من كثرة الجذب. ولا تمارس فيها شحدة الملح والملاح والبصل والتوم بين المنازل. أو تمارس فيها المشاجرات اليومية ليلاً ونهار بين نساء العالمين وبأصوات أقل ما يوصف بها أنها غير فنية البتة.
حلتكم أكثر أوتوكيتاً من غيرها فلا يشد فيها قميص ولا توب ولا فستان ولا ساعة ولا دهب من الجيران لمجرد حفلة أو مناسبة ، ولا تبدأ الزيارات فيها والتي لا تعرف التوقف للجيران من الصباح الباكر وحتى نهاية فيلم السهرة.
حلتكم أكثر حضارة لأن جدرانها لا تغطيها شخبطات العابثين ورسومات الغير موهوبين وما تتركه الأغنام من أثر على حيطان الجالوص من منطلق Scratch my back أو ممارسات بعض الحمير والتي أجبرت البعض على إعلانها صريحة ومدوية ممنوع ............ يا حمار
إنسان حلتكم أقل عدائية وعدوانية لأنه يمكن أن يمر السابلة أمثالي من أمامه فيرد على التحية بأحسن منها ، عكس أولئك الذين يردون على تحيتك أياً كان شكلها بسيل من حجارة يصيبك في مقتل وذلك بعد أن تديهم عنقرتك سلمت أم لم تسلم عليهم لن تسلم منهم أو من كلابهم.
حلتكم أقل فساداً من غيرها لأن برسيم خيول السواري لا تتلقفه أيدي العسس ومن اللوري مباشرة إلى ديارهم وتموت الخيل في الإسطبلات جوعاً وبرسيم حصين السواري تأكله غنم الإشلاق. أو يتم تأجير عربة الدولة لمواطن الدولة من مواطن الدولة الآخر عملاً من منطق من كان له فضل ظهر غير أن العيادة هنا تكون بقدر دنانيرك.
حلتكم أفضل لأن شيبها وشبابها نساءها وأطفالها تركوا منازلهم وأتخذوا من الطرقات مجالساً لهم لا يرعون فيها حرمة الطريق والما عاجبو ما يجي شاقي الحلة دي تاني.
ولكن برغم لحلتكم نكهة ولغيرها نكهات ، ولولا وجود حلة كحلتكم لم تكن حلة أو حلال أخر موجودات أصلاً.
ولأن حلتكم لا تسمع فيها لاغيه فأنت ساكن في الجنة عديل كده

Quote: البيعجبك نحن راضين بيهو

وهذا الشبل من ذاك الأسد!
فلاش باك وتداعى جميل رأيته بأم عينى تحياتى للأسد
جنى

الملاعمر
إزيك ..

Quote: بواقي قشر بطيخ وشئ من سيقان ملوخية

حتصدقني لو قلت ليك انو العبارة دي تحديدا انا كتبتها ومسحتها
بس بدل سيقان كنت كاتبة عيدان !
لمن قريتها لمن نططت عيوني


الفكي عمر والله منك خوووووف
بعدين انا لسه ماانتهيت خليك معانا ..

هذا ما يمكن تسمية توارد خواطر فالعاصمة والمدينة برغم ما فيها من سينمات وعربات وكهرباء ومسلسل يومي ودكاكين وميادين وصوالين وكوش تظل قرية بالمقاييس الحضرية لذلك لا غرابة من أن يحاكي ساكن الحاج يوسف حياة سكان بري الدرايسه و بيت المال أو شمبات الأراضي أو أمبده السبيل وحتى الثورة الحارة كم كده مش عارف ناهيك عن الكلاكلات وبقية المسميات.
من الظواهر التي غزت العاصمة هي كثرة محلات المكوجية فبين كل مكوجي وآخر مكوجي ولكن برغم تلقي هدوم الناس في حالة يصعب تصنيفها يا قديمة شديدة يا ما نضيفة.

Quote: الفكي عمر والله منك خوووووف

أبداً لا هي فراسة ولا فطنه كل من في الأمر أن الأشياء تتشابه والدليل أنني لمن أمشي لي وداعية وتقول لي الوحيد ده شنو أكيد ما حا أقول ليها أوضة بيتنا أو باب الشارع لأنه الوحيد هو دايماً بنطلون الجينز الذي أرتديه ليل نهار وصباح مساء.

الملاعمر

Quote: والدليل أنني لمن أمشي لي وداعية وتقول لي الوحيد ده شنو

على حس الوداعية ..
عندنا في حلتنا واحدة اسمها ساكنة بت البكري
قعداتها دايما الضحوية
مع القهوة والنسوان
وترمي الودع وتكشكشو
وتومات الودع
تحذر
وتبشر
شي يصيب وشي يخيب
وغايتو ..

جني الظريف


من شابه اباه فما ظلم
والاسد بيسلم عليك ..

...
...

جيرانا عديل كده

يا ملك كلنا في الهم والتنشئة شعبيين وناس حله وأولاد حاره

الملا عمر

Quote: كلنا في الهم والتنشئة شعبيين

الأخ مؤتمر شعبي

ناجي
إزيك ..

Quote: جيرانا عديل كده

خليت وقوفك تحت العمود الكتير داك

الزير سالم تحت الشجرة فى حوش الديوان!



للملا عمر /// غنماية حلتنا فى حصة الفسحة!




نساج العناقريب. بدل الحبال ظهر عصر البلاستيك




سودانية كريمة الملامح والمهنة: بياعة طواقى




بت حلتنا

عادل عثمان متعك الله بالصحة والعافية
شكراً على هذا النقل الحي وكل تلك الصور الرائعة التي تاكد تنطق. أنظروا إلى هذه الغنماية الكريمة إنها من سلالة ممتازة وهي قطعاً شامية أى من الشام وغالباً ما تكون سورية أو مقدسية ، وكانت عمتي عليها رحمة الله تمتلك كما كبيراً من تلك الأغنام 6 شنكل طويلة التيلة غير أنها كانت تطلق عليها أو تسميها بالغنماية الأمريكانية هذا في زمان سابق أيام أن كانت أمريكا في صلح مع نفسها ومع العالم أجمع وأيام أن كانت الغنماية تتمتع بالكثير من الدلال لها أسماء ولها حقوق شأنها في ذلك شأن كلاب الخواجات. ويظهر أصل هذه الغنماية وحسن سلالتها من طويل الأضنين وطول الشعر ، وقصر القوائم الأمامية.
الجميل في الزير يا عادل إنو لا يمكن أن يكون في حلتنا بأى حال من الأحوال لأنو لو سلم من أولاد الحلة لا يمكن أن يسلم من الغنم وفي الحالتين مصيره يقع أرضاً وينسكب الماء فيختلط ماء الزير الصافي النقي بموية البلاعة في أى حفرة من حفر الشارع.
أما صلاح العناقريب هكذا كان ينادي على بضاعته وصنعته "صلاح العناقريب بالحبال" أيام أن كانت مدخلات صناعته الحبال وتغير الحال وتبدلت الأحوال فحل البلاستيك محل حبال الحلفا والسعف فكان لابد أن يتغير إسم الصانع من صلاح إلى نساج وإن كنت أري أن الأولى أشمل حيث أن النساج هو فقط ينسج ويشتت أما الصلاح فيمكن أن يستبدل كراع عنقريب مكان أخرى أو يشد الكراب إلخ...
أما بشأن بت حلتكم فيبدو أنها الصورة مشفرة فلم أستطع فتح الصورة فذهبت حيث يجب أن أذهب لأجد نفسي متوهطاً في نص بوست بعنوان قوانين المنبر ، فقلت البوست وقفلت راجعاً.
التحية لصلاح العناقريب فهو هلاريخي يشجع فرقة الهلال بالأزرق وفرقة المريخ بالأصفر. ولا أحسب أن لأدواته تحت السرير أو العنقريب أى فائدة في عالم النسيج البلاستيكي فلا منشاره ينفع ولا القدوم يستطيع أن ينجر به شيئاً.

الاستاذ/ه
تيسير
عموماممكن اشارك؟





طبعا الحللال في السودان كوبي + بست


وفي حلتنا بنجيب المررو من حاجه فاطنه
وعمك (ود العجيل ) نجار من سنة حفرو البحر
كلما نمشي السوق لازم نجي قدام دكانو و(طروش)
احسن ترذي + (ود الباشاب )بخيطو الجلاليب (ودمسي)
تاجر الفواكه دكانو جنب النجار و(موسى ) الغسال
ودكان (محجوب ) تاجر العيش وفي حلتنا عندنا سوق
يوم الاتنين والخميس كل الحللال الجنبنا بيجو يوم السوق
(ود هرود) بيقوم بدري ينجض العيش وطابونتو توحي لنا بملامح
تاريخيه وعموما يوم السوق ده يوم مشاوي ساااااااااكت وذمان
كانت الاندايه تعج بالدوبيت والمنازلات المهم الناس حلوين
وكأنهم عايشين في بيت واحد


عموما الحله سوالفه كتيره
لكن جاينك ليها
سلام

عادل عثمان

شكرا لإيراد هذا الجمال
وتسلم ..
خليك قريب حنحتاجك معانا




صليييح سراييييييييييير
بوابير الجاز
عناقريييييييييييب

أحمد العربي

Quote: وطابونتو توحي لنا بملامح تاريخيه

انا هسه شامّة ريحة العيش الحار ..

زريبة ود الزين بترابا الاسود وشوالات الفحم مردومة فوق بعض
وكيمان من الشاف والطلح وحطب العواسة ..
وميزان معمول من تلاتة عيدان
بتتلاقى في النص ونازل منها شنكل يستعمل كمعبار للحطب

عباس سيد الطعمية قاعد قصاد الدكان ويقلب في الطعمية :
- ياولد داير بي كم ؟
- اديني بي خمسين ...
يخت للولد قدر قروشو في قرطاس معمول من جريدة
ويرجع يقلب تاني في الطعمية

تيسير

هناك محطات كثيرة في الحلة ترتبط بحياة الإنسان في كل مراحله ..
لا تبرح خياله ..

من هذه الأشياء التي لا تزال عالقة ..
كنت أحب الخريف ..
كل أحداث الخريف ..

بداية من تراكم السحب ..
صوت الرعد البعيد يكركر ثم يقترب لينطلق بعيداً ..
حبات المطر الأولى تداعب وجوهنا ..
ثم إنهمار المطر ..
سكون الحلة .. لا نسمع غير صوت نقرات حبات الماء على السقوف و إنهمار الماء من السباليق ..
أصوات تتنادى ..

و البرق يدخل الرهبة و الرعب في قلوبنا .. نغمض أعيننا ..
تسابيح العجايز تدخل الطمأنينة في النفوس
و ضوء البرق اللامع يشق دياجير الظلام



ثم صبيحة اليوم التالي .. ريحة الدعاش .. إختلاط الماء بالطين ..
و بعض القطرات تعانق صفق الشجر كأنها تتمسك بنداوة الوريقات قبل أن تنزلق في بطء على الحفرة التي كونتها سابقاتها ..



ثم فراشات جميلة .. نطاردها بشقاوة .. أو لحصة ( الطبيعة )



و نواصل

بت عوووووووضة

ليت الشباب يعود يوما ليرى مافعل بى المشيب

رجعتينا لايام زمان وحلتنا زمان والله البوست بتاعك بخلى الواحد يتمنى يرجع للوراء ولو ليوم واحد

تسلمى ياغالية

نجود
إزيك يا جميلة ..

حليل زمن الصبا الماضي

نعيش لنستعرض هذه الأيام
ونشوف زماننا ودانا وين
لكل شئ قديم نكهة محببة
البيت
المدرسة
الحلة
تسلمي وتسلم حلتكم

أبو جهينة
تحية خريفية..

الخريف عطاء الطبيعة
واكتمال دورة حياة
بدأت في الارض ..
صعدت السماء
وانتهت إلى الارض مرة أخرى ..
أما التفاصيل بينهما
فإنك بها قدير
وصفتها كأجمل ما يكون

Quote: ثم صبيحة اليوم التالي .. ريحة الدعاش .. إختلاط الماء بالطين ..

أها ريحة الدعاش دي موضوع تاني براهو
نكهة مطر
ريحة ارض
ما بعرفا شنو
لكن بحبها ..

تسلم أبو جهينة
وخليك معانا ..

كش ... كش .... كش"....

هل تحبون مثلي صوت المكشاشة، إنها تعني لي الأرض، تغوص شعيراتها في تراب وطني الصغير، دارنا، كي تمسح عنها بقايا حياة يوم كامل، بقايا حيوانات، ودجاج، وإنسان، ووضوء خالي (دفع الله)، وأثار ترابيز وسراير، وفوضى رياح (جلبت معها اوساخ فطرية، ورقيات نيم وبعر وقش وشعر مشاط سعدية)، وبول وبراز وخربشات (مدثر الصغير)... فهو يفعل ما يحلو له، (حر من كل القيود) كعادة الطفولة المقدسة... (هاهو عاريا، أمام البوابة المتهالكة ويلعب بشحمه سرته، وكأن شئ لم يكن)!!. بل مستمتع برؤية كارو (هيبات)، وهي تحمل الماء لحوش الناظر...

(كش ... كش .... كش)
(... دو .. ري .. مي ... فا)...

يبدأ عزف المشكاشة في الصبح، حين يعلو بالون الشمس الذهبي من الشرق، كعادته كل فجر، وينتهي طرف المكشاشة الأعلى بيد (رشا)، او (سوسن)، أو (سارة)، حسب وردية كتبها عرف تالد، (أعباء للفتاة، وبراح للأولاد)....

تزيح بشعيراتها، كفراشة الفنان، ضباب الفراغ والاوساخ، تجلو الصدأ عن تراب بيتنا، وتسمح، كالبشاورة من السبورة، بقايا حياة يوم كامل، وقد غرقت، وللأبد في فم الماضي، كما مسحت معها بقايا كوم تراب لعبة (السيجة)، ودفنت معها ضحكات خالي (صديق) المنتصر، وتأوهات جدي (سعد) المنهزم دوما في السيجة، ولكنه ينتصر (في قتل فراغ عريض في حياة قرتينا الساكنة المسالمة)....

والآن، تبدو الارض نظيفة، ساحرة، كي تقبل شعيعات الشمس وجه الدار، وكي تسير على اديمه كالملوك، أمي، وأخواتي، وأهلي، وكي نكتب عليه، أحداث يوم عادي آخر، ومعنا الدجاجات والاغنام والرياح والمطر...

(كش ... كش .... كش)...

حين تكنس الدار (رشا)، ترى لوحة متسقة من الزخرفة الفطرية، ترسم شعيرات المكشاشة على أرض حواشنا، الماهل، الحنون، موجيات ترابية، تبز في سحرها، موجيات النهر، إنها مويجات ساكنة (نهر تراب متجمد)، بلا هدير أو أنين، متداخله، فيبدو الحوش وكأنه سجاد من تراب....

ثم تأتي الأقدام، والنسم، والحيوانات، كي تطبع على الأرض بصماتها، وزخارفها، لا أحد يشبه الآخر، حتى في مشيته، إنها سفمونية الحياة، فهدا مركوب خالي (دفع الله)، فهو يسير بصورة متعرجة، وتلك سفنجة سعد، وتلك قمزات نعال (سعدية جارتنا)، فهي في عجل، ودايما، كي تنقل (شمار حار وطازج) وهدا المجرى الصغير، الصغير جداً، لدجاجة شقية، وقعت فريسة في شبك من شعر أختي (محاسن)، فعلقت في بقايا شعرها المتساقط، فتكوت في نهاية الشعرة قطعة طين كروية، (لا أدري لمادا تحب الفيزيا والميكانيكا الشكل الكروي)، وللحق كلما نطارد الدجاجة لكي نخلصها من هدا الأسر، تجري خائفة منها، وللحق فهي (لا تأمن بني آدم، وهو في قمة فضائلة)....

(كش ... كش.... كش)، اسمع هدا الايقاع وأنا شبه نائم في الحواش الوسيع، يالها من فنانة كبيرة، تكنس الدار بأحساس عظيم، تستشف من كل شئ جمالا، تنسج خطوط متوازية، ثم تكوم الأوساخ في زاوية بعيدة، ثم تجلس، ولمدة طويلة، غارقة في تأمل ثروة بسيطة، أخرجتها المكشاشة من باطن الأرض (بينسه، حبة سبحة، ريال، وخبايا أخر، رخيصة)، وغالية جدا، جداً!!....

وأحيانا يتوقف ايقاع المكشاشة، وقد انتظمت ضربات قلبي معها، فأرفع الغطاء عن رأسي لأرى ما جرى، فأرى (رشا) منحنية، تنظر بعمق لشي في الارض، أنها بلا شك ثورة كبرى، وحية، (قد تكون حشرة غريبة الشكل، فهي لم تمد يدها لحملها، بل أكتفت بتقليبها بطرف المكشاشة)، وحين حركت رشا رأسها كي تتابع اكشتافها السعيد، ايقنت بأنها حشرة، وما أكثرها في دارنا، ثم تبدأ عزفها، فيبتعد عني صوت المكشاشة، فالدار وسيعة، وحنونه!!.

للمرة الثالثة يتوقف ايقاع المكشاشة، مادا جرى؟ إنه راديو جارتنا سارة، فقد تسللت منه اغنية (فرحانة بيك كل النجوم لا نام بريقه ولا أنطفأ)، فتوقفت رشا عن القش، وهي منحنية، لم ترفع راسها، بل كانت منحنية وهي تسمع الأغنية، أحسست بأنها في صلاة، في سجود، ورأيت بأم عيني، سحب خضراء وبرتقالية تخرج من الراديو وتدخل عين وقلب رشا، وتنصب لها، قصر لا وصف له،...

إن الحياة لوحة كبيرة، والكل يحمل فرشاه، تزخرف اخواتي البرندة، والفضية ببقايا الجرايد، وتزخرف رشا الحوش (بفرشاة) المكشاشة، ويزخرف (عبد العزيز الصغير) البيت بصراخه، وفوضاه، وتزخرف امي الدار، بصوتها، بسمتها، بسكونها، بعاطفتها الريانة، والتي تملأ كالهواء، سماء وارض الدار....

حين تكنس (رشا)، تكون اللوحة منتظمة، (فهي تستمتع بكل شئ)، وحين تكنسها (سوسن)، أو (سارة)، ترى لا مبالاة، وخطوط شائهه، وشرود كمن يفكر في اللحظة المقبلة...ناسياً لحظته الحاضر...

تنظر لخلفها حين تسمع (يمه يمه مششيني)، يقولها مدثر وقد افسد عليها نظافة البيت، فتعود جزلى (فلا نضج ولا نثور)....

(دو...ري... مي...كش .. كش ..كش.).....

شكرا، تيسير، فقد برزت لسطح الذاكرة، أيام خوالي، عن حلتنا، ودرانا..واعتذر للإطالة، فقد جرى القلم بطفح، وشطح لا يقاوم...

عبد الغني كرم الله

إيقاع المقشاشة يدوزن حركة هذه الصورة الناطقة
شئ من الغبار يعلو الجو تتحاشاه رشا بمنديل صغير يغطي شعرها

Quote: إن الحياة لوحة كبيرة، والكل يحمل فرشاه، تزخرف اخواتي البرندة، والفضية ببقايا الجرايد، وتزخرف رشا الحوش (بفرشاة) المكشاشة، ويزخرف (عبد العزيز الصغير) البيت بصراخه، وفوضاه، وتزخرف امي الدار، بصوتها، بسمتها، بسكونها، بعاطفتها الريانة، والتي تملأ كالهواء، سماء وارض الدار....

وتزخرف أنت البوست بكتابتك الجميلة ..
تسلم
وخليك معانا ..

Quote: موية عدة مكشحة وفيها بواقي عجور وقشر بيض

لوووووووووووووووووووووووووووووول

ياخي مبالغة الحتة دي ..لانو فعلا قدام اي بيوت الحلة ساعة الضحى كده بتلقى التفاصيل اعلاه ..

وشوية تفل وبروة صابون غسيل على وشك..

وتسلمي يا تيسير..

والله لا وراكي مكروه في عزيز لديك يا وغدة ..

غنماية ناس حجه الشول
بيت ناس زينب سليمان
اسحاق الغسال
كنت بعيد لمن زهرة حبوبتي الكانت مارة ماحجه السرة
ديل ناس بيت المال




بتقولي كلام التكنك ما من هنا

دكين
إزيك ..

نسيت اكتب انو موية العدة فيها روسين طماطم مقطعة
لأنو ناس البيت اليوم داك كانو ماكلين طماطم بالدكوة
يا سيدي تسلم انت برضو
ولو اتذكرت حاجة جيبا وتعال ..

المحسي
إزيك ..

بتقولي كلام التكنك ما من هنا

كلامك دا انا لو فهمتو زي ما انت قاصدو
حأقول ليك انا فعلا من هنا ..

دي عبارة عن الانتماء فقط للمكان ، لكن ما تخافي انت من بيت المال او الصحافة او الملازمين او الشجرة ، ما عارف لكن انت من هنا وانا عندما ذكرتها كنت اود ان اضيف لون طريف ،فقط
على العموم زهرة حبوبتي زعلانة منك لاني كلمتها انو تيسير كانت قايلاك حاجة السرة ،زعلانة منك في حاجتين الاولى انك ما سلمتي عليها (طبعاً انا وضحت ليها هي سلمت على حاجة السرة لانها كانت قايلاك هي وطبعاً السلام من بعيد (هي قالت انو مسخرة ) ،دي قدرت امشيها ليك اما السبب التاني قالت ليك تعملي كل العمايل دي وما تكلميها لكن قالت ليك ممكن ترضى عليك لو جيتيها في البيت كمان عازماك جبنه وشمار (الغريبة ضحكت لمن قالت شمار))

سجمي يالمحسي يعني انا السلمت عليها دي ما حاجة السرة ؟
خلاس قول ليها بجي ارضيك واشرب معاك الجبنة ..

حاجة كلتوم قاعدة جمب التعاون بتاع الخضار
على يمينا كم برطمانية فيهم شطة وتوم منضف وبهارات ومرقة وظهرة
وعلى الشمال كوم بتاع مقاشيش وطباقة جميلة ملونة و بأحجام مختلفة

ما احلي اللمة جنب دكان عبدالله (العميان) الاضاءة ضعيفة ... وبعض الاولاد قاعدين في اللساتك
الجنب الدكان بيشربوا سرا في السجاير ..وصوت هيثم سيد واضح من مسافة بعيدة ... ولعبدالله العميان قدرات عجيبة فهو نجاد المراتب و باستطاعته ادخال الخيط في الابره اسرع من (المفتيحين)
وهو النجار ونساج العناقريب ...

عمر عبد الخالق
إزيك ..
أسعد جدا لما ألقى زول بيتذكر في حاجات
حصلت في حلتهم ويحكيها لينا
الذكرى بتجر الذكرى .. والونسة بتجيب الونسة
تسلم ياعمر
وخليك معانا..

مرة قاعدين جنب دكان سلمان جعفر بنتكلم في موضوع فريق الحلة نسميهو شنو جانا واحد جات سيرة الهلال والمريخ واسماها جات من وين واحد هلالابي قال ان الهلال اتسمى الاول بعدين ناس المريخ قعدوا عشان اسمو فريقهم واحد من الناس القاعدة في الاجتماع قال لازم نسمي الريق اسم يخلع ناس الهلال اسم حار مر مثلاً جات مارة مره قالت ليهم مر يييخ عليكم (يبدو من هنا ظهر اسم المريخ)

اتخيلو انا مريخابي

المحسي ..

Quote: اتخيلو انا مريخابي

البلولة من جهـة يصيح
أبو القاسم
قااااااااشر
ياشافع .. الطّرش .. مابتسمع ؟
أرفع البردعة فوق الحمار دا .. البرِد اللي يكنكشك
ولادة ما نافعة
الغنم ديل بعد يرجعن خت ليهن كُليقة قصب
إن لقيتك ما عشيتن ما ترجاني

من الناحية الأخري فاطنة تنادي
بت يا أميمة .. قِشيرة
ناولني التوب بتلقيهو مجدوع فوق العنقريب
خليني النمش أتحمدل السلامة لي علوية قبال الشمش تغيب
وأملي معاك التيبار ده
بت معاكسة البارح قلت ليك شوفي ليك حيمورة حكيهو بيها

الصغير فضل يأتي مُسرعاً من الخارج
عراقي دمورية يميل للون البني وعليه كل بُقع الشقاء
مناخيرو سايلة
نفسو قايم
يُما سويتو الشاي ؟؟

ونلتقي تيسـير
عندك في حِلتكم
أو
أهــل القُــرى .. اللغـة والعيش الكفــاف

Quote: ناولني التوب بتلقيهو مجدوع فوق العنقريب خليني النمش أتحمدل السلامة لي علوية قبال الشمش تغيب وأملي معاك التيبار ده

يا الله عليك يا ثابت سامعة صوت فاطنة جوة اضاني
تسلم ..
ونلتقي يا ثابت ..
نتذكر من حلتنا وحلتكم الصور دي

علوية في التكل تعجن في عجين القمح وتعوس في القراصة
وبدرية بعد ما قعطت اللحمة شدت الحلة في النار
وقعدت تهبب في الكانون وتجهز الدمعة للقراصة.
وتحت ضل الحيطة هناك زهرة قاعدة في الواطه
وممدده كرعينهاالمغبشات من كترة المشي
وبتول قاعدة في البنبر تمشط ليها شعرها
يتونسن ويقطعن في الجاي والرايح
فجأة سمعن صوت كواريك من بعيد..
قالوا ليهن علي ود حاج عثمان وولدك احمد كانوا بيلعبوا
قاموا عملوا شكلة
علي شال ليهو درابة وفلق بيها احمد في راسه لغاية ما كبت الدم
احمد قعد يكورك بطول حسو
بتول لما سمعت الخبر والكواريك خلت شعر زهرة
لفحت توبها وجات جارية
ولما شافت الدم كابي من راس احمد
قعدت تكورك وتقول سجمي سجمي الولد كتلو
عثمان ويوسف واقفين جمب سبيل المرحوم حاج احمد مضوي
يتفرجوا من بعيد ويشربوا موية من المزيرة
وبعيد هناك أطفال واحدين بيلعبوا بلي
وواحدين بيلعبوا سكج بكج
وبنات بيلعبن بٌََََُُربره
ناس الفريق كلهم اتلموا لما سمعوا الخبر
وجوا يشوفوا الحاصل شنو

عزيز عيسى
إزيك ..

شكرا لهذا الإستدعاء الجميل لصور راسخة
علوية .. بدرية .. حاج أحمد مضوي
هم من يصنعون هذه الصور ..

تسلم يا عزيز ..

http://www.sudaneseonline.com/amlnalbagi/collection/7obby_zady.wmv

Quote: علوية في التكل تعجن في عجين القمح وتعوس في القراصة وبدرية بعد ما قعطت اللحمة شدت الحلة في النار وقعدت تهبب في الكانون وتجهز الدمعة للقراصة. وتحت ضل الحيطة هناك زهرة قاعدة في الواطه وممدده كرعينهاالمغبشات من كترة المشي وبتول قاعدة في البنبر تمشط ليها شعرها يتونسن ويقطعن في الجاي والرايح فجأة سمعن صوت كواريك من بعيد.. قالوا ليهن علي ود حاج عثمان وولدك احمد كانوا بيلعبوا قاموا عملوا شكلة علي شال ليهو درابة وفلق بيها احمد في راسه لغاية ما كبت الدم احمد قعد يكورك بطول حسو بتول لما سمعت الخبر والكواريك خلت شعر زهرة لفحت توبها وجات جارية ولما شافت الدم كابي من راس احمد قعدت تكورك وتقول سجمي سجمي الولد كتلو عثمان ويوسف واقفين جمب سبيل المرحوم حاج احمد مضوي يتفرجوا من بعيد ويشربوا موية من المزيرة وبعيد هناك أطفال واحدين بيلعبوا بلي وواحدين بيلعبوا سكج بكج وبنات بيلعبن بٌََََُُربره ناس الفريق كلهم اتلموا لما سمعوا الخبر وجوا يشوفوا الحاصل شنو

ذكرتنى ايام بنمشى البلد(مروى) فى الاجازات
وحبوبة الف رحمة ونور تنزل عليها تقولى تعالى النمشطك ونعملك الكركار تساريح ناس البندر ودهنم دة بمعطكم اخاف واقول ليها لا لا
تقول لى لو ما اتمشطتى ما بسوقك معاى البحر ومابتمشى تجيبى معاى الموية من البير ..
اها اتبسط منها واجرى اجيب لى بمبر ولا فرشة(بفتح الفاء) اقول اختها عشان اقعد عليها/و تقولى لا صنقرى هنا فى ا########## اقوليها لكن مابتوسخ وامى بتدقنى ..
تقولى ماتخافى مابتسعلك قوليها دى حبوبة مشطتنى وسوت لى الكركار وقالت لى عشان شعرك يبقى طوال زى شعر أمك واقوم من المشطة ديك والكركار يرارى تحت الشمس ..

Quote: واقوم من المشطة ديك والكركار يرارى تحت الشمس ..

نجود والله إنتي لذيذة
عازمة روحي مشاط عندكم بي الكركار الماخمج ..

Quote: عازمة روحي مشاط عندكم بي الكركار الماخمج ..

طوااااالى ياعسسسسسسسسسسسل

وكمان عندنا ضمان انو الشعر بعد المشطة والكركار يقول

لبتاعين صانسيلك زحو كدى غادى

إزيك يا نجود
الضمان أمان
خلاس أنقض شعري من المشاط الفات وأجيكم

من أميز الأغاني الشايقية
بس شايفة عملوا ليها توزيع جديد
يديك العافية يا كيجا
وتسلم ..

Quote: دكان المكوجي بحباله الممدودة اول ما تدخل

لا تقاوم صورك تيسير،،

مكوجينا إسمو منو إنتي قايلة،،
إسمو وررردي،،
وردي ألطف زول في الحلة،،
دايماً ما يلخمني بي ونسة قبل دخول البيت بعد الرجعة من المدرسة،، و يحكي لي،،
لو تعرفيني متمنية معاهو لخمة قدر شنو،،

ميدان الكورة،، و العراضتين البلا،،البرا٭٭ شباك،،
بعد إسبوع من المطرة،، و صوت كركشة قشرة الأرض القايمة بفعل تبخر المياه عنها،،



و بعص فراشات أشجار الحناء،، ببيتنا،،

تاني فراشات،،

Quote: بعد إسبوع من المطرة،، و صوت كركشة قشرة الأرض القايمة بفعل تبخر المياه عنها،،

سوميتا قالت الكلام الظريف ده

عادل عثمان
إزيك يا راقي ..

سوميتا وصفت صورة رائعة
وانت دعّمتها بعرض أروع ..

تسلموا الإتنين ..

عادل عثمان،،

الأرض بتشبه لي المسلمية شديد،،
ما بتتقشر زي حلتنا،،
لكن بتتشقق و لونها يصبح أقرب إلي الحنة الناشفة،،

عمو عادل،،

شكراً!

الفراشة سوميتا
إزيك ..

Quote: مكوجينا إسمو منو إنتي قايلة،، إسمو وررردي،،

اسمو وردي
ومكوجي
بس أوعى يحاكي شعبان عبد الرحيم

بعدين مدام بتحبي الفراشات قدر دا

هاك دي

يا ناس الحله هوي دحين مودرنلنا غنمايه كرته
وعندها غره
ما جات ماشه فوكم بي جاي
والبشاره بقره صفراء فاقع تسر الناظرين

أحمد عربي
ما ياها الغنماية العن ناس عادل ود عثمان
غايتو كان ما اخاف الكضب واحدة شبه المودرنها دي عندهم بهناك

مش ياها دي

الله عليك يا تيسير

بوست جميييييييييييييييييييييييييييييل

من المتابعين

إنت الأجمل يا انعام
تسلمى
وخليك قريب ..

الشباب الحلوين كل سنه وانتم بالف خير وعافيه.
عجبني البوست وقلت اتاوق, عندي حاجات كتيرة عله لما ارجع ليكم,
رساله لي halema2 قدر ما قعت لي في netcafe اقول ارسل ليك الصور غلبني
كلها ايام واكون معاك يا.....

أبو مهند
وانت بألف خير
البوست تحت أمرك تاوق زي ما داير

منتظرينك ..

Quote: وعم ابراهيم بيهز في المكوة عشان يحت الهبوت

كدي تعالي النسالك....عملت ليك شنو علشان تذكريني التشه الحاره الفي بطن الكراع الحافيه من بواقي الهبوت والجمرات المتخفيه عز النهار

جد كانت حاره شديد ومن يومها بعمل الف حساب وانا ماري قدام اي مكوجي حتي في زمن الدراي كلين

إزيك يا وليم ..

Quote: كدي تعالي النسالك....عملت ليك شنو علشان تذكريني التشه الحاره الفي بطن الكراع الحافيه من بواقي الهبوت والجمرات

إنت المحوّمك حفيان شنو ؟

كلكم اولاد مُدن

ما بتعرفوا للقرى السودانية حاجة


مافى قرية فيها غسال ولا قدرة فول ياخى


الا قرى الالفية الثالثة ...


ومع ذلك فالوصف جميل يا ناس المدن


نحن قايلين ناس المدن ما عندهم غنم ياخى


قايلنهم بشربوا من اللبانى بس ....


طيب الغنم دى بتنوموها وين بالله

وعندها راعى ولا ما عندها


طيب لو عندها يسرح بيها وين


ولو ما عندها بتأكل شنو ؟؟؟


اوع تقولوا لى تاكل دلاقين


لانه فى الحالة دى انتو بتلبسوا شنو ؟؟


وتسلموا

قرشو
إزيك ..

Quote: نحن قايلين ناس المدن ما عندهم غنم ياخى

إنت قايل شنو ..
ناس القرى لمن يجوا يسكنوا في المدن بينقلوا معاهم كل ما يمكن نقله من قريتهم
ابتداء من الحيوانات من غنم وجداد وانتهاء بالزرع ..
تعرف يا قرشو أنا دنقلاوية .. معظم أهلي الدناقلة لمن يجو الخرطوم
بيكونوا شايلين معاهم شتلة تمر
بيزرعوها في نص البيت كدلالة لعدم انقطاعهم من البلد وارتباطهم بيها
وبعدين القرى والمدن في بلد زي السودان بيتشابهوا في أشياء كتيرة
واكيد الفرق بينهم ما حيكون زي الفرق
بين العاصمة الانجليزية والريف الانجليزي

Quote: طيب الغنم دى بتنوموها وين بالله

الغنم بنقرّش ليها جمب البيت ياقرشو فيما يعرف بالمراح أو بيت الغنم ..

أسعدني مرورك ..

العزيزة تيسير

اسعدنى رحابة صدرك عزيزتى وعدم ثورتك على كما هو حال ناس البورد

فما ان تختلف مع احدهم حتى يبادر باقصائك ووصفك بما لا تحب ...

تسلمى يا ستى فقد احببت المداعبة وأحببت المشاغبة قليلا

لأن الموضوع شيق وجميل ووصفك بصراحة ( لمثلى عاش اكثر من عقدين خارج الوطن ) يعيد الروح الهائمة الى موطنها ويجعلها تهيم هنالك فى تفاصيل صغيرة كادت أن تزول من الذاكرة ولكن طالما هنالك اصفياء مثلك فنحن دوما مرتبطون بجذورنا ونحن دوما نعود لاصالتنا ...

القرى والمدن عزيزتى صنوان وان اختلفت الشكليات الحياتية فيهما وهما امتداد لبعضهما

ويقينى ان اهل المدن لا يتبرأون من اهلهم ( أهل العوض ) كما فعل الولد ود موسى ..

لك تحياتى عزيزتى واحيي فيك اصالتك وتواضعك وتذكرك اشياء البعض يتنكر لها ..

مع كل الود

قرشو ..
مرحبا بي مشاغباتك ومكاواتك

فقط أردت أن أجتر ذكرى بداخلي
فوجدتها عند الكثيرين مثلي
أنا بحب حلتنا .. هي مني وأنا منها

مرة تانية أسعدني مرورك
تسلم يا ذوق
وخليك معانا

اجمل ما فى القرى الصحيه الفجرية البكريه ،
و رائحة لبن ( مقنن ) تؤدى للعطاس من قوة رائحتها،
و روث بهائم يتناثر فى برحة الحلة الواسعة
و الاجمل انك عندما تتحس اماكن رقاد هذه البهائم بعد ان تأخذها لكى يتم حلبها ، تحس بدفء مواطئ رقادها .... خاصة فى الشتاء الكئيب .

يؤثرنى بشدة رجع صدى صوت الكلاب فى ارجاء الحلة عقب توقف انسكاب المطر و سريان دعاش مطر الليل قرب الفجرية . ..... و كان اخى يطنطن دائمآ عندما يكون فى حالة دخول و خروج بالمرتبة من و الى داخل الغرفة عندما يكون المطر من النوع ( النقناق ) .

شكرآ الاخت تيسير ان استفزيتى فينا بعض التداعيات الكامنة بدون اطمئنان فى انتظار مثل هذه اللحظات .

إزيك يا كوستا ..

أعجبني نقلك الحي لهذه الصورة
ريحة القُنّان
صوت الكلاب والمطر
وطنطنة أخوك ..

تسلم كوستا
اتذكر وتعال تاني ..

تيسير عووضة ياصيادة،،
تشركي لي و تجيبي لي
الصور السمحة،،
و الفراشات البحبهــــــــــــــــا،،

و بقيت أبراك،،
فراشة فراشة،،

صورة تانية من حلتنا،،

أولاد الدافوري المتعبين ساعة المغرب،،
و جك الموية و الشطيف،،

و العجب كان فيهم واحد مكسر بت من بنات البيت،،
ما ضحكت اليوم داك،،

سوميتا
يا أحلى فراشة
إزيك ..

Quote: أولاد الدافوري المتعبين ساعة المغرب،، و جك الموية و الشطيف،، و العجب كان فيهم واحد مكسر بت من بنات البيت،،

عشان الورد يتسقي العليق
بسبب الواحد دا يهتموا بيهم كلهم

تسلمي ..

اها حلتنا زي حلاتكم
مرتع البرولتياريا
ففي واحد من حلتنا قام عزموه في العمارات فطور
قام صاحبنا مشى العزومة ورجع
لما جاء راجع قمنا سالناة
اها اكلت شنو في الفطور
قام قالينا
اكلت عيش ورغيف وشنو وشنو وحاجات


فيصل محمد خليل

فيصل محمد خليل
إزيك ..

ناس أي حلة دايما بيكونوا بسيطين وعلى سجيتهم
يديك العافية يا فيصل

وخليك معانا ..

تيسير
لك التحية والشكر على هذه الصور الدقيقة ...
والله عجبتني الصور ، سأحتفظ بها في البوم خاص ، وسيطلع عليها أولادي من وقت لآخر ...
ولكن متى نخرج عن هذا الواقع المتخلف ، وننفتح على حياة حديثة تنقلنا إلى مصاف الآخرين ؟؟ وهل سيأتينا يوم ننقل فيه حياتنا المتحفية إلى متاحفنا بدلا من أن نجعلها واقعا نظل نعيشه كل عمرنا ؟
تكاد ذكرياتنا تهزم تطلعاتنا يا تيسير ...

تيسير يا رايعة
شكرا ليك ولي حلتكم العامره بكل ماهو بسيط وجميل
شكرا لانو في زحمة التفاصيل المرهقة لغت الذاكرة دون قصد الكثير من الصور الجميلة
اكتر صورة مجبة لي دايما كانت شارع المدارس نهاية اليوم الدراسي - زحمة الطلبة وتسكعهم من ضل حيطة لي ضل عمود والزحمة حوالين بياعات الدنرمة والفول والتسالي ودقة النبق والقنقليس والتبش بالشطة وحلاوة شعيرية
مودتي ودمتي ودامت روعة واقعنا البسيط بي جماله

في حلتنا برضو في ناس ظريفين

عمك يوسف ود المقدم قال والله لو عندي بلدوزر اكسر الحلة دي كلها بس اخلي الجامع

عمك ابراهيم ود الامام قال ليهو لما تجي جنب الجامع انزل لي


عبدالله ود الامين وولده طه حاولو رفع شوال عيش علي ضهر الحمار بتاعهم

والشوال تقيل ووطه ضعيف

عمك عبدالله بقول ليهو ما ترفع يا ولد

وطه يقول برفع يابوي

وفجاة عفصت الحمارة رجل طه وابوها يقول ماترفع

رمي طه شوال العيش وقال لابوها ما رافعين ارفع(د.......)

حمل معك عبدالله عكازه وجري خلف ابنه طه

طه زاغ بين زقاقات الحلة

وعمك عبدالله يسال في الناس

يا اخوانا ما شفتو ليكن كويفر جاء بجاي

إزيك يا خليل ..

Quote: عمك ابراهيم ود الامام قال ليهو لما تجي جنب الجامع انزل لي

عمك ابراهيم بالغ لكن
حتى الجامع ما دايرو
ناس حلتكم لذاذ وعلمانيين

يديك العافية
ودمت بخير ..

أيمن تابر
إزيك ..

ما تتخيل الصور دي أنا بحبها كيف
لأنها بتحكي عن أجمل أوقات مرت علي
أنا هنا الآن بحاول اتذكر واذكِر
بشئ من هذا الجمال ..

بعدين شكلك كده مدمن شطة دكوة وقراصة نبق

أسعدني مرورك
وتسلم ..

الخال ود قاسم
ولا عمو
عشان صاحب ابوي
إزيك ..

لطالما تمنينا أن نكون مثل الآخرين حضارة وتطور ونظافة ..
قادَتنا قتلوا لدينا كل أمل في أن نصبح مثل البني آدمين
إذا كانوا للآن ما قادرين يحددوا اليحكمنا منو وبشنو
قلنا نرجع لقديمنا أحسن ياهو الفاضل لينا
بعدين عليك الله الصور الكلاسيك دي ما عندها طعم خاص ؟

يديك العافية
مداخلتك أعجبتني ..

تيسير عووضة
تحياتى الشافعة المفعوصة الحضرنا عرس أمها
فلاش باك
خالى شقيق أمى له ريكورد أبوسماعة واحدة لا يفارقه فى حله وترحاله حضر لزيارتنا منتصف السبعينات فى إمتدادنا الحبيب وهو متعب من سفر لوارى البلد حمل سريره ورقد فى نص الحوش وأدار اريكوردر لتسجيل صوت عثمان اليمنى الذى حمله الأثير من أحد مربعات الإمتداد وعندما صحى من النوم فى الصباح أدار جهاز التسجيل للإستمتاع باليمنى ولدهشته لم يجد إلا نبيح الكلاب ومواء القطط وثغاء البهائم!
خالى ود البلد البسيط يظن إن المسجل يصغى مثله بتركيز لصوت اليمنى الذى حملته نسايم الليل!
جنى

إزيك يا جدو جني

فلاش باك لطيف

Quote: ولدهشته لم يجد إلا نبيح الكلاب ومواء القطط وثغاء البهائم!

ناس البلد ناس بسيطين ونظيفين ما لوثتهم المدينة بتعقيداتها
عندنا قريبتنا في البلد بتقول للموبايل التلفون البلا حبل ..

تيسير،،،
عندي ليك صورة من حلة ما حلتنا،،
عاجباني ليك عجبة،،

صورة راسها عديل،،
و كمان شايل بطيخ،،

سوميتا..
الله يجازي محنك

الحمارة جمب العمارة

سوميتا يا بنيتى.. كيفك؟
لقيت ليك طين ناشف مشقق بعد المطرة، ان شاء الله يعجبك صوت قرقشته! القرقشة دى لما تاكليهو ولا لما تمشى عليهو؟

صديقى يجلس يالقرب منى قال لى تصدق أنا بتاع البطيخ دا انا حاسدوا!
قلت ليهو ليه؟
قالى لو مديون بكون عشرين ألف جنيه بس وممكن يبدأ من الصفر وأنا داير خمسة سنة عشان أبدأ من الصفر!
قال مغترب قال!!
جنى

البوست ده ما تراهو سمح..جادعنو مالو؟

الشكر است البوست
وللفاضلة تماضر الرفعتو..
لاحظت انو زكريات تيسير كلها دكاكين وباعة.. يمكن ودران ليك قرش والا شنو؟؟
نحن يومنا في حلتنا كان بيبدأ الصباح الدغش بي صياح
الديك (يعوعي) معلنا فجر يوم جديد.ز تبدأ الوالدة بعد دقائق بكركبة (التكل)
ومراسم شاي الصباح.. ثم خطاها وصوت السفنجات يطقطقن في اتجاه الزريبة
لتبدأ كركبة حلب الغنم.. وهي تتمتم ( يافتاح ياحليم رزاق ياكريم).. وحركة الحاج وهو يستعد للصلاة .. ونحن نرخي (لإضنينا) في انتظار
قوم يا ولد للصلاة.. أو كشحة كوز الموية..
دا ..جوة البيت برا البيت
تبدأ الكركبة متزامنة فجارنا العزيز يبدأ
في اخراج (الحمار) بعد تعليقه أي بعد تقديم طعام افطاره
ليعلق في الكارو.. وأصوات العجلات الغير مشحمة
تصرج لتصحى الحلة كلها.. ثم العم عبد النبي .. يدور (كومر) التراب
لتسخينه.. بعد أن يدردقه من الردمية المعمولة
خصيصاً للكومر أمام الباب.. بدل
(الاستارتر). فتهتز الحلة على أصوات
محرك الكومر العجوز وهي ترتعد.
نلتقي جميعاً في (ماسورة) الحلة الوحيدة
لنتوضأ .. الصغار وراء
البعض يجلس على ( وا ط ة ) الله مكرفسين ركبنا داخل عراريقنا التى نادراً ما تكون
من غبر رقع.ونتجمع في حلقة بانتظار أن ينتهي الكبار من
وضوئهم. فتجد بعضنا قد غفى أو نام..
عند العودة من المسجد.. نلتقى بالغنم وقد تم تسريحها
لتأكل من خشاش الأرض. وما خلفه البنو آدميين..في الشوارع
وكل ما تحصل عليه في طريقها.. وخصوصاً أشجار البلدية المهملة..
ونبقى في
وين الغنم
ساقوهن ناس الحملة!!! .

شوقي إدريس
إزيك ..

Quote: لاحظت انو زكريات تيسير كلها دكاكين وباعة.. يمكن ودران ليك قرش والا شنو؟؟

نقلتنا بروعة لصورك الجميلة
جوة البيت وبرة البيت ..

تسلم يا جميل ..

هَي
تماضر ست الناس في بيتنا ..

أجري يا ولد جيب ليك قزازة بيبسي من دكان الطيب

تيسير هي تماضر ميروده
جايبه ليها قزازة الببسي ولا شنو؟

تماضر ما ميرودة يا عربي
جبنا البيبسي عشان أول مرة تجي حلتنا ..

الطين الناشف اسمو البرجوب لمن الواحد يمشي فوقو تسمعو يقو "" خش خش خش خش "" وبعدين بيحبنو النسوان الحمل البتوحمن

عبدالرحمن أبوشيبة
إزيك ..

أحلى شي في الدنيا هو الطين دا
أنا يخيل لي اي زول بيحب ياكل الطين
إرتباطو بارضو وحتتو بيكون اقوى
مش كدا ..

شكرا على المرور اللطيف

عاديا تيسير بوستيك طاعم جنس طعم !!

بجي صادا اكيد
ولا غنماية عادل

عشة بت فاطنة ..

تخليني أتحاوم شارع شارع
وزقاق زقاق لغاية ما أجي ألقاك بي هنا ..

Quote: عاديا تيسير بوستيك طاعم جنس طعم !! بجي صادا اكيد ولا غنماية عادل

ما أطعم منك والله ..
ومنتظرينك ..

عمو عادل طيب إنشاءالله،،

يا سلاااااااااااااام علي اللمعة الفي الطين،،

لسسسع ده عليهو كم يوم شمس،،

لكن لمعة ولا أجد ديزل،،
صوت الكرش في الإضنين،،
مع إنو الفعل الرجلين،،

بتحس بيهو في الحلق كيف!

الله أعلم،،

كيف عدلتها،، و كيف قلبتها؟

زمان خالص يا سوميتا يا بتى كنا بناكل طين البحر. مش طين المطرة بشبه طين البحر؟
سمح هاك الشمس دى نشفت ريق الطين، وشققت جلده:

http://www.nationalparklover.com/images/Utah-Az/grand_c...-parashant-mud01.jpg

"طين المع من اجدّ قطر ديزل" سوميتا الظريفة
ده قطر الاكسبرس بتاع واو زمان لما كان فى هاجة اسمو سلام! قبل ما "واو بقى نار"!!

عمك قسم الله القطر القام

رجل خفيف الظل

كان يحمل عتود علي اكتافه

وكل ما مرة بناس من الحلة اسالوهو

يا قسم الله موديهو وين العتود دها

يقول الزربية يا اخوانا

وتكرر السوال وتكررت الاجابة

زهج عمك قسم الله

قابله صديقه الامين قدوم الابريق

موديهو وين يا قسم الله العتود دها

اجاب قسم الله

موديهو الروضة

Quote: الزربية يا اخوانا

عمك خلف الله ود الفاضل عشق الخمر لدرجة الوله وكان يشرب زجاجة عرقي لوحده

في زمن وجيز جدا.

واي شي يفوت حده ينقلب لضده اصاب الرجل الشلل التام ولكنه كان يحاول الاولاد في الحلة ان يحضرو له بعض العرقي.

يسكن بالقرب من النيل وكان اولاده جيرانه يشربون الخمر علي الرمال بالقرب من منزله سمع

حركتهم وقام يحبو حتي وصل للقيفة وهو قصير جدا وله لحية بيضاء

والشباب يشربون سقط عمك خلف الله من اعلي القيفة لداخل الرملة.

فزع الاولاد فرعا شديدا وجرو وهم يصرخون واي واي الشيطان

فناداهم عمك خلف الله تعالو يا اولاد انا ما الشيطان

انا عمكم خلف الله ادوني كاس

خليل الظريف

حكاياتك لطيفة ..

عمك خلف الله دا ذكرني واحد في حلتنا
24 ساعة سكران
اسمو سيف الدين السكران
بس ما يقوم يتشلّ زي عمك دا ..

سوميتا ..

دي زريبة ود الزين ذااااتا

إزيك يا عادل عثمان ..

Quote: كنا بناكل طين البحر

إنت برضو من أكَلة طين البحر
ياخ دا ألذ شئ في الدنيا ..

صور حــــــــــــــــــــــارة،، مسموعة،، كتيرة،،



تاوقت بي عيني اليمين جوة الشمال،،
من قلبي كان نازل مطر،،
لون المطر كان بشبهك،،
عبيت مشاعري من النسيم،،
زفرت طلعت الوحيح
قلت النسيم ما يجرحك،،



صورة مخالفة،، تذكر،،

والحمام :
يا تسيير ، الكسرة بالموية ، والحمام يلقط الحب
الحمام ، الحمام ، أنيق الخطي والهديل...


نهاية الضحي وأول الظهيرة،
وفي عمود النور



تيسير ، كان الحمام يمشي بيينا في الحي ، كـــأن..!

Quote: تيسير ، كان الحمام يمشي بيينا في الحي ، كـــأن..!

جريفاوي ..
الحمام يمشي بين الوداعة
ويرفرف فوق الإلفة
ويطعم وِلفو حتة سُكر ..



يلوحن لي حماماتـــن
همن عينى غماماتن
بريدن
شوقى لي لماتن

ياااا حليلو حمام حلتنا ..

تيسير

لسان حالى يقول .. يارمال حلتنا ... الباقى عارفنو

واقول مع الجابرى .. الجريف واللوبيا

نحن دوما الى الجريف .. والى حلتنا

نحن من منطقة تنام بين النيلين تماما تشرق الشمس من ثغر النيل الازرق لتقطع سحابة يومها

بحثا عن حضن النيل الابيض الوهيط

صورة من حلتنا .. عنوان كبير لحكاوى كتيرة

لكن الصورة ما زالت فى ذهنى طازجة حتى الان وقد تكون مختلفة من كل ماورد فى مداخلات الاعزاء

فى زمن مضى كن نساء حلتنا فيه يقمن مشروعا اقتصاديا يضاهى اضخم مبادىء الاقتصاد التعاونى

علما بان تاريخ المشروع يعود الى ما قبل الجمعيات التعاونية فى السودان ويتلخص المشروع

فى وضع كل ربة منزل لمبلغ معين بالتساوى ثم تقوم لجنة مصغرة بالذهاب الى السوق العربى

للشراء من تجار الجملة باسعار ارخص من القطاعى بطبيعة الحال ويرجعون اما بكارو او برينسة

الى الحلة وهناك منزل محدد ربما يكون غالبا فى الوسط تتم فيه

عملية التقسيم للاغراض التى عادة ما تكون السكر والزيت ولصابون والشاى الفلت وكل الاساسيات

والضروريات وحتى الحلوى

للصغار وكن نساء الحلة يسمين مشروعهم الفريد ( التومين ) اى التموين تلك كانت صورة تعاونية

مشرقة وجميلة من حلتناوذكرتنى بالذى مضى ..

جماعة من حلتنا مشو اخطبو لزول من حلتنا في حلة جنبنا

العريس ابوهو ميت وكان ولي امرو عمو

عم العريس اسمو تنبك والله العظيم اسمو تنبك

فالجماعة قالو لما امشو لناس العروس اغيرو اسم تنبك لعبد الفراج

وتم التعارف والخطوبة
.
عمك تمبك خرج بره والجماعة بنادو فيهو

يا عبد الفراج يا عبد الفراج

وتمبك نسي اسمو الجديد


عمك يونس ود مدني

لما زهج منو

قال

خلوهو

في تنمبكتو دي

خليل أبو دم خفيف ..
حلتكم دي أتاريها تحفة

هسي ما أخير تمبك من عبد الفراج

إزيك يا تيتاوي ..

صورتك تجسد معنى عميق من معاني التعاون و المشاركة
شئ عظيم من نسوان حلتكم إنو يتكاتفن ويتعاضدن
من أجل توفير إحتياجات كل منزل بهذه الطريقة المثمرة
مع مراعاة إنهن نسوان بسيطات وغالبا غير متعلمات
لكن هاهن يرسين أمتن قواعد للإقتصاد والتدبير
فعلا صورة تعاونية جميلة ومشرقة زي ما قلت

أسعدتني مداخلتك
يديك العافية
وخليك قريب ..

هووومي،،

كان بحيرني حمام امي،،
و حمام الناس،،
رغم ما يتوفر ليهو من رزق الحياة بالقرب من البرج،،
إلا إنو يفضل يمشي بعيد،،
و يرجع في كل يوم في نفس الميعاد ،،
يكون لي منظم كدة؟

حاسداهو،،
و لسة،،
ليتو لي ،،

حمام هنا،، أشتر،،
حتي قمريتهم،، شينة،،
إلا ود أبرقنا و عشوشة،، نفس الشبه،، و شناة الطبع،، و الطنيش،،

سوميتا

مديتي يدك للسحاب
شايلة الفرح
جايبة الدعاش
أديتي قلبك للصحاب
جواك سرح
أجمل فراش



إنتي يا بت إنتي قزازة ريحة
محل ما تمشي عطرك فايح ؟
البوست بدا بالغنم عاينوا سوميتا وصلتو وين ..

دى حلة ناس منو فى ام درمان؟
http://k41.pbase.com/u43/tiggy67/upload/27761336.DSCN5177.jpg

ما شايفة صورة الحلة

صورة من الخارج،،

في لقطة من اللقطات أول مرة كان يمشي في موعد مع الشابة الجملية التي تزوجها فيما بعد،،
قال ليها سامعة صوت رفرفة جناح الطيرة؟
قالت ليهو مافي طيرة هنا،،
قال ليها في،، إنتبهي،،
فاذا بها،، تغمض عينيها و تسترخي و يصبح كل الضجيج من حولها داخل الغرفة المطعمية سكون،،
و لا تسمع إلا صوت رفرفة جناح الطائر الصغير،، من النافذة ،،
ضحكت فرحاً بأكتشاف سر ان تكون كفيفاً و تري بسمعك مغمض العينين،،



تيسير،،
صحابي يبعدون الاف الاميال المؤلفة،،
لكنهم يسكنوني،،
حتي من لم يلمحهم قلبي بصراً،،
إتفقنا علي حب الفراش،،
فاصبح خليلي عند غيابهم،،
يصفون لي القمر في كل طور،،
فأرسم صوري بوصفهم،،
يحفظون سر ودادي و السبع نجمات و مفتاح البيبسي النجمي،،
فيزيد يقيني بالعودة للجلوس علي رمل جيرانهم المكوم علي الارض،،
في ليلة تختفي فيها النجوم و القمر،،
و من البعيد نسمع صوت نسوة يزغردن لعروسين شارفت مراسم زواجهم علي الإكتمال،،


خلينا نرجع من الاول عشان ح اعوج ليك البوست ده شكلي،،

سوميتا ..

Quote: سامعة صوت رفرفة جناح الطيرة؟

Quote: إتفقنا علي حب الفراش،،

Quote: يصفون لي القمر في كل طور،،

أنا جيت!
تيسير،،،
بعض السكنة علي ضفاف صورك/صورنا،،



ما شايفة أنا زاتي،،

لي يومين رايحة مني صورة الشمس،،
و صورة أمدرمان عشان نعرفها أمدرمان منو،،

دى صورة تانية من امدرمان.
الصورة الاولى ابت تفتح. ممكن تنسخوا الرابط وتختوهوا فى المتصفح. بفتح معاكم وحتشوفوا تراب احمر فى الشارع، وبيوت طين وبيوت طوب احمر، وفقر جميل طالع من شقوق البيوت، الا فى ام درمان!

علي احمد

لقبه علي الكنتبة

معوق في ظهره اي له سردوب

الشباب في الحلة بحبو اشاغلوهو

مرة كان فارش ليمون في الجزارة للبيع

جاء خالد واحمد خطف منو ليمونة وجري

الكنتبة لا يستطيع الجري

فقال لخالد من علي البعد

انشاء الله تعرف تحترم الليمونة

وتشتري ليها ربع رطل سكر

ما تمش تتفها في كراع العنقريب

جدك حاج محمد مداغ الشيك رجل يقشق النساء لدرجة الوله

متزوج من اربعة نساء

عندما يريد ان يتكلم لازم ابدا كلامو بكلمة لانو

مرة راكب المواصلات مع ولده حافظ

وفي البص بنات سمحات جدا

عجبو جدك

قام قال

لانو الساعة كم ومنتظر اجابة من البنات

فاجاب ولده حافظ

الساعة عشرة يا حاج


زعل حاج محمد وقال


لانو العايز ساعتك الطبلة دي منو

يا عادل ..
طريت أمدر طريت ناسا ..

خليل اشيل واكتب

والشكر لعادل

غايتو

قسمة وارادتنا

وانا الدايرو سويتو

وانا العالي وطيتو

خاين العشرة ذاتو

اضطهدتو ونسيتو

دي اغنية فاطنة بت الرزيقي المفضلة في حلتنا

تيسير والمتداخلون

امسياتنا في الليالي المقمرة ونحن نصيح "شليل وينو أكلو الدودو"

أو
هوي يا لبلب كم في الخط أمانة عليك تكضب اضنيك ما واحد؟
ويأتي الرد كضبا" كاضب
ما ستة؟
شد وأركب

Quote: امسياتنا في الليالي المقمرة ونحن نصيح "شليل وينو أكلو الدودو"

شكرا ليك يا عبد الخالق
ذكرتنا بواحدة من أجمل الصور التي عشناها في طفولتنا
يديك العافية ..

خليل الظريف
إزيك

إنت إنت بتتنسي
ما إنت ...........

تم الباقي موية يا خليل

يا خليل ..
لأنو مشيت أتغدى وأجي ..
بعدين ما تنسى
لأنو البوست دا انت شريك فيه بالنص

تيسير الجميلة الرائعة جدا

حضرت ولم اجدكم

وكتبت ليكم بالفحمة فى بابكم بتاع الزنكى

انا قاعد فى حجر جنب الدكان القدامو النيمة

لما تجوا رسلى لى موية من الزير ماعايز ببسى

تحياتى

خالد كسلا

زما فى حلتنا كنا بنقوم من الدغش بدرى فى الاجازات عشان ندور الدافورى فى نص الحلة وكنا عشان

نسخن العملية بنلم حق جايزة زى بيبسى ولا حلاوة المهم بنواصل اللعب من صباح الرحمن وما بنخلص

الا قبل الساعة 12 بشوية ولو صادفت الايام شتا بنديها طوالى لحدى قبل الغدا بحبة كمان كنا بنعمل

درقات يعنى درع من الخشب ونزينو ونقوم نعزم فرق المنطقة كلها ونتنافس على الدرقة بعد ان نزين

الملعب ونعمل قنايات للاقوان كانت ايام رائعة وجميلة ووممتعة ودى صورة بس من حلتنا


... انتظروا باقى الفيلم

إزيك يا خالد كسلا يا رائع ..

عاد ما إتلومنا تجينا تلقانا مافي ..؟
لكن نسوي شنو مع ناس الحلة
مشيت أحمدل السلامة لي التاية بت محجوب
قالوا كاسرة يدها دي جيتي ..
والمقعدك جمب الدكان شنو ما تدخل البيت لي جوة
نديك موية الزير وبيبسي الدكان الإتنين ..

الجميلة تيسير

ان شاء الله بجيكم بكرة لانوا قعدت كتير قدام

الدكان بعدين بتاع الدكان قالى ناس البيت

كلهم طلعوا عشان كدة مادخلت حصل خير بكرة قريبة

اتمنى اجى القاك .

خالد كسلا

الجميلة تيسير

جيت اليوم وبرضوا مالقيتكم الحكاية شنوا

تحياتى .

خالد كسلا

الجميل خالد كسلا ..

نحن قاعديييييييين

جر السلكة وأدخل ..

السلام عليكم

أهلا يا مرحبا

بيتنا نوّر

مرحب بيك ياتيسير فى حلتكم الجميلة وبيتكم

العامر انا جاى عشان تتوسطى لى باعتبارك فى

اللجنة وتشوفى لى موضوعى حصل فيهو شنوا

معليش انا عارف انتى مانعة موضوع الوساطات

ده بس صاحب صاحبك صاحبك .

Quote: معليش انا عارف انتى مانعة موضوع الوساطات ده بس صاحب صاحبك صاحبك .

خالد يا كسلا ..

قبال ما أعرف الموضوع الجاي ليهو إعتبرو محلول ..

إزيك يا تيتاوي ..

صورك دائما معبرة و حية
أي حلة تكاد لاتخلو من الدافوري
نشاط رياضي جميل ومتاح لكل الناس

تسلم ..
ومنتظرين باقي الفيلم

تيسير

البوست بشكل
واكتشفت الليلة و انا بتابعو انو عندي صوره

ممكن تنفع



سجن امدرمان جوار الاذاعة
دي حلة منو فيكم

يا خدر يا شرير

هسي في داعي
ذكرتني بأيام الله لا عادها
أيام كنا نزلاء الفندق الـ ولا نجمة دا ..

أسـمعي الفـول ده حـلو خـلاص..جـيبي معـاك بـة شـمار وليمـونه..

إزيك يا منى خوجلي ..

يعني العشا الليلة بوش ؟

الطيب محمد احمد عمل بوزارة الاسكان في مدني في وظيفة جنزرجي مع ناس المساحة

ضعيف جدا وزنو اربعين كيلو

هزج من مدني واغترب في العراق

ذهب للمعاينة والعراقي قال ليهو انت ضعيف البنية

الطيب لم يفهم ضعيف البنية

الشباب اكتشفو الحكاية دي

وقالو ليه يا سلام يا الطيب انت ضعيف البنية دي اشتغلتها وين

قال ليهم امال مدني دي الخططها منو

خليل الظريف ..
بركة الجيت بركة الجيت
أنا قايلاك حردت

أمال البوست دا الخططو منو ..

تيسير الجميلة

مافي شك دي صور من حلتنا كلها جميلة

متابعه لصيقة يومية للصور

إنعام يا ذوق ..
يديك العافية
تسلمي وخليك قريبة ..

ياخ انا مشتاقة لي البوست ده كيف،،


دي عشرة جيران ناس صحبتي في حلتم،،

وصحن الفول داك في حلة ناس ناجي الملك،،

و صورة من كل حلة،،
تيسير!!

يا بت إزيك،،

سوميتا يا سوميتا

مشتاغـوووووون

وينك يا بنية

الحلة بلاك خلا .. لما قام فيها العُشر

وطن النجوم
إيليا أبو ماضي


وطن النجوم انا هنا حدق اتذكر من انــا ؟
ألمحت في الماضي البعيد فتًى غريرا أرعنا؟
جذلان يمرح في حقولك كالنسيم مُُُدنــــــدنا
يتسلق الاشجار لا ضجراً يحس ولا ونــــــــى
ويعود بالاغصان يبريهاسيوفااو قنـــــــــــــــا
ويخوض في وحل الشتا متهللا متيمنــــــــــــا
لا يتقي شر العيون ولا يخاف الألسنـــــــــــــا
ولكم تشطين كي يدور القول عنه تشيطنــــــا
انا ذلك الولد الذي دنياه كانت هاهنـــــــــــــــا
انا من مياهك قطرة فاضت جداول من سنــــا
انا من ترابك ذرة ماجت مواكب من منـــــــى
انا من طيورك بلبل غني بمجدك فاغتنــــــى
حمل الطلاقة والبشاشة من ربوعك لدنــــــــى
كم عانقت روحي رباك وصفقت في المنحنـــى
للأرز يهزأ بالرياح وبالدهور وبالفنــــــــــــــا
للبحر ينشره بنوك حضارة وتـــمدنــــــــــــــا
لليل فيك مصلياللصبح فيك مؤذنــــــــــــــــــا
للشمس تبطىء في وداع ذراك كيلا تحـزنــــا
للبدر في نيسان يكحل بالضيياء الاعينـــــــــا
فيذوب في حدق المهى سحرا لطيفا ليــنــــــــا
للحقل يرتجل الروائع زنبقا او سوسنـــــــــــا
للعشب أثقله الندى للغصن أثقله الجنــــــــــــى
عاش الجمال مشردا في الارض ينشد مسكنــــا
حتى أنكشفت له فألقى رحله وتوطنــــــــا
واستعرض الفن الجبال فكنت أنت الأحسنــــا






من شعر إيليا ابو ماضي

الرائع عبد الغني كرم الله ..

Quote: انا ذلك الولد الذي دنياه كانت هاهنـــــــــــــــا انا من مياهك قطرة فاضت جداول من سنــــا انا من ترابك ذرة ماجت مواكب من منـــــــى انا من طيورك بلبل غني بمجدك فاغتنــــــى

إنها ذكرى صبا
مكان محفور في الوجدان
لطالما مارسنا فيه طفولتنا كأجمل ما يكون

كم منزلٍ في الأرضِ يعشقه الفتى
وحنينه أبداً لأول منزلِ

تيسير.. تيسيييييييييييييير.. تعالى شوفى دى


مكوة الفحم!


والمنقد

والفحم مولع. اوعى النار تتشك
http://www.gambler.pwp.blueyonder.co.uk/pyro/Charcoal/C...rbonExposedtoair.JPG

هي!

نار فحم !
لالالالا ديل شكلهم صُوّر خصيصاً يا عمو عادل،،

جبتهم من وين ديل؟

يا سلااااام،،

تقلة مكوة،،

عادل ..
صورك ساندة البوست دا
يديك العافية

يا أخواناالصور دي

صور من حلتنا إكسكلوزيف

يا عادل
يا سوميتا
هبابة للجمر

بابور الجاز ابو شريط نفر!


والفانوس الحرق القطية!


الرتينة وبابور الجاز الابيض لليوم الاسود!

سوميتا: تتذكرى الكرامة يوم نجحتى وجبتى 99% فى امتحان الحنين والنوستالجيا!

Nostalgia is futile

البابور جاز
خلي يشتغل
الشغل بالجاز

عمك صديق ود المجتبي سواق لوري

معه قريبه التهامي شغال معاهو مساعد

التهامي تعرض لحادث حركة وقطعت يده قبل كده

وللظروفه الاسرية قرر ان يواصل في مهنة المساعد مع عمك صديق

المهم التهامي بخلص القروش من الركاب

وبديها لعمك صديق

يوم عمك صديق شكي ان التهامي ما بجيب القروش كاملة

وبعمل فساد مالي

والشكلة دورت بينهم ونبذ جد

عمك صديق قال للتهامي

والله يوم تكون راكب معاي اللوري

وحاعمل حادث حركة

واقطع ليك يديك التانية

واخليك تنقد نقد زي الجدادة

يا خليل ..
في حلتنا سواق اللوري اسمو عطا ود الرمدان
ومشهور بتهورو في السواقة
تلقاهو جاي من هناك واللوري يتلولح يمين وشمال
بس الغريبة ما بيعمل حادث حريف شديد ..

أنا ما عارفة ود الرمدان دا اسمو بالجد ولا لقب
لأنو مخوف الناس بسواقتو المشاترة ديك ..

سوميتا. عليك الله هاك امشى جيبى لى علبة برنجى قبل ما الدكان يقفل. فالحة بتى. اشترى ليك حلاوة حربة
يللا قوام. امشى حفيانة. قوام الدكان بقفل.

عمو عــــــــــادل،،
سبقتني فيها،،

امس إتذكرتها و قلت ارفعها و انزلها ليك،،
لقيتك بترسلني ليها،،

لا حولاااا زمن مافي زول رسلني الدكان،،

بس انا دايرة حلاوة دررررربس،،

تيسير،،
لملمتي حلل الناس و قعدتي،،
و خليتينا نتمطق،،

يا عادل هاك دي ولع بيها السجاير

يا سوميتا جيبي لي معاك حلاوة كرملا

يا عادل ..
أها الكبريتة انطفت وانت ما ولعت بيها

تيسير شكرآ. عندى ولاعة جابا لى واحد صاحبى من السعودية.
بتحبى حلاوة كرملة؟
انا جبت ليكم حلاوة لكوم.

مسابقة:
ورونى الحاجات الفى الصينية دى شنو؟
انا غايتو عجبتنى الملاّحةّ!! اخر مرة شفت ملاحة يكون سنة 1975!!

حلاوة لكوم .. راحة حلقوم

يا عادل أنا غايتو عرفت السلطة الخضراء

صلاح وعبدالعظيم

اخوان جو ازورو عمهم ميرغني في ابوروف

بمجرد وصولهم البيت في سوق الشجرة

مشو الدكان عشان اشترو حنبوكة

وطبعا ناس امدرمان بسموها بلومة

وسالو بتاع الدكان عندك هنابيب بلغة القرية

بتاع الدكان ما عرف عايزينشنو

الجماعةمرقو في كبري شمبات بحثا عن الهنبوبة


ومافي زول عرف هم دايرين شنو

المهم في النهاية في واحد عرفهم وجابهم راجعين البيت


بعد خمسة وتلاتين سنة

الجماعة لسع بشاغلوهم عندك هنبوبة

شفع فى السودان بلعبو بى هنابيب/هنابيك/بلومات/بلونات على شكل سيوف
طبعآ الهنابيب بالانقليزى اسمها Balloons.

يا عادل ..

الهنابيك صديقة الأطفال ..
أي طفل يشوفا يتشبك فيها
والغريبة إجابة الأمهات واحدة
بتعمل ليك لَوز ..

خليل ..

على حس (الهنابيب)
عم السر في حلتنا مرتو مجنناهو ليك بولادة البنات
كلما تولد تجي بت لما بقو ستة وهو حالف إلا الإسم يكون
بحرف الهاء ..
هادية, هاشمية ,هالة ,هنادي ..... الباقي ما متذكراهو
اها لمن جات تولد للمرة السابعة قال ليها شوفي اسمعي
المرة دي تجي بت أنا ما عندي ليها اسم بالهاء
إلا كان أسميها هنبوكة

ألأخ خليل

تحياتي

أكيب لي علي هذا العنوان

[email protected]

انا مستمتع جدا بالبوست دا وبشوفه بي مزاااااااااااااااااج

إزيك يا طارق جبريل ..

ونحن سعداء إنك معانا

تسلم
وخليك قريب ..

سوميتا؟
حلاوة دربس دى شنو؟ ما عرفتها. كدى وصفيها لينا. ولو عندك صورة ليها كمان يكون "كتر خيرك وبارك الله فيك"
تيسير: دى اوضة ولا زنزانة؟

ضحكت من كلامك الاخير عن الهنابيك حتى طرشقت كآبتى. فالدنيا عندنا برد وتلج وضلام. هنا قلب الضلام الحقيقى مش قلب الضلام المجازى بتاع جوزيف كونراد Heart of Darkness

قلتى لى نفخ الهنبوكة بعمل لوز حسب تحذير وزارة الصحة الامومية؟ كانو برضو بحذرونا من اكل التلج. انا غايتو حفاظة التلج تعبت معاى جدآ. وقوالب التلج المربعات


بتذكر اول تلاجة اشتروها فى البيت كانت ادميرال. تلاجتكم كانت شنو؟ اول تلفزيون كان ناشيونال زمن الابيض واسود. إسود وملعقتين مربة توت!!



ما لقيت تلفزيون ماركة ناشيونال. لكن لقيت الشارب ده. سنة 1966. اسياده كانوا بتفرجو فى كاس العالم لكرة القدم من انقلتره! زمن!! زمن يمص الضوء من عينيك، كما قال مصطفى سند.

Quote: فالدنيا عندنا برد

يا عادل بدل تاكل التلج هاك أشرب دا سخن

Quote: إسود وملعقتين مربة توت!!

نحن تلاجتنا كانت وايت ويستنغهاوس والتلفزيون ناشيونال برضو لكن موبيليا
عارف شكلو كيف .. البيكون مغلف بالخشب داك

تسلم ايدك يا تيسير. شاييك صاموطى.
جبتى الفساتين من الترزى؟

يا عادل ..

الترزي الكضاب دا كل مرة يقول لي تعالي يوم كدا
ولما امشي ألقاه لسه ما خلص ..

قال ديموقراطي قال

الترزى الديمقراطى ده يا تيسير بكون بعمل للقماش شنو؟
اسمعى.. اقول ليك حاجة؟ انا اشتريت ليك مكنة الخياطة دى. امشى شيلى القماش من "الديمقراطى" ده، وخيطى براك فى البيت خياطة ديكتاتورية احتكارية! ويبقى قماشنا فى بيتنا. ونحقق شعار الثورة (نلبس مما نخيط فى البيت).

مكنة سنجر يا عادل ..
تسلم ..
خلاص أمشي جيب القماش الجابوهو ليك من الحج داك
عشان اخيطو ليك عراقي وسروال
وكده نبقى شموليين
قماش في البيت
خياطة في البيت
ولبس في البيت ..

تيسير!
قماش السعودية ما بدورو! بعمل لى حساسية. انا داير قماش من القطن السودانى ده. من المصنع السودانى ده. من يد عاملة الغزل والنسيج السودانية السمحة دى. شن قولك؟

اطفال فى قنتى، المديرية الشمالية، يغزلون القطن عام 1905

عادل ..
بيني وبينك حق بلدنا أحسن وأسمح
خلاص جيب دموريتك وتعال
منها هدوم
ومنها أكياس مراتب ..

تيسير

ماعنكم طايوق

ومشلعيب

عليك الله خلي

عادل اللذيذ

لو عندو ادينا شوية طايوق

وسحارة

الجزار قال الطايوق كمل!!

khaleel
انا ما شفت سحارة قبل كده. لكن من حكاوى الحبوبات بتخيل شكلها زى ده:



دى سحارة من سنة 1839!!

ما لقيت مشلعيب سودانى. ده واحد انقليزى!

تيسير!
فكرة الدمورية دى ممتازة. الدمورية باردة وغبشا زيىّ. وكمان المرحوم على المك قال فيها:
"الدمورية تصير رقيقة الملمس واجمل شـأنآ حين تدنو من الهلاك".. والنسى قديمو تاه زى ما قالو وزى ما قالن..
وهسه جبت ليك معاى نجادين مراتب امريكان! لا.. لا .. ما امبرياليين. ناس بسيطين. عندهم قطن كتير فى الجنوب. وكان عندهم كساد اقتصادى فى التلاتينات Depression. قام قالوا للناس سووا المراتب براكم فى بيوتكم. وحولوا القطن الفايض لى حاجة مفيدة. وعلموهم كيفن ينجدوا المراتب. بدل يشتروهن من السوق. يعنى زى كلام الصينيين: بدل تدينى سمكة، علمنى اصطاد!








شوفى سماحة المرتبة دى..

سجمي يا عادل ..
الأمريكان بيعرفوا ينجدوا المراتب
أمال مراتب الـ easy sleep دي سووها لي منو ؟
لكن بيني وبينك شغلهم نضيف
بيعرفوا يستفيدوا من الفايض في حل الأزمات الإقتصادية ..
ولا عم حسن الطاهر المنجِّد الفي حلتنا

صحي ذكرتني ما تجيب لي نساج عناقريب أمريكي
تلقاهو بينسج العناقريب بالريموت كنترول ..

Quote: سجمي يا عادل .. الأمريكان بيعرفوا ينجدوا المراتب أمال مراتب الـ easy sleep دي سووها لي منو ؟

مراتب "النوم السريع" دى سووها للناس العندها أرق. الناس السقد! واغلب هؤلاء الناس يجافيهم النوم، عندما ينطبق عليهم كلام عبد القادر سالم: (أعد نجوم الليل.. نار الغرام ضايق..)

تيسير!
عليك الله اكوى لى جلابيتى السمنية. الليلة معزومين غدا فى الثورة. فى واحد زميلنا عامل كرامة. كان كاسر رجلو. صدمته عربية لما كان قاطع شارع الظلط! رقد شهر فى مستشفى النو.. ما بقى كويس الا لما بتاع الترمس بقى يدق لى الباب كل يوم..

Quote: عليك الله اكوى لى جلابيتى السمنية. الليلة معزومين غدا فى الثورة

أنا كويت ليك الجلابية بمكوة بخار .. ما شايفا مهفهفة كيف ؟
مكوة الفحم المرة الفاتت طارت منها شرارة قدت الجلابية وخربتا ..


وبعدين في شوية تمر شيلو معاك لزميلكم المكسور دا
البلح برضو بيجبر الكسور ..
وقول ليهو دا من تيسير الدنقلاوية ..

المشلعيب السوداني يا عادل إسمو دوا كديس ..
يبقى الإنجليزي إسمو cat medicine ولا شنوووو ؟

Quote: الجزار قال الطايوق كمل!!

يا عادل ..
ما نحن الجينا أخدناهو
سبقناكم بشوية ..

يا خليل إزيك ..

الطايوق مسحنا بيهو صاج العواسة
والمشلعيب ياهو دا معلق ..
أما السحارة شكلو عادل ما لقاها
السحار ينفع ؟

تيسير: ترمس ترمس.. كبكبى.. اقلبك "حلبى" والعب بى..

تيسير

عادل

ما عندكم شوية حلومر

باقي رمضان قرب

بعدين لو في حبة قرنجان

وحرجل ومحريب وشوية حلبة

باقي ولدي دي مقبوض

عندو حمي وباليل قعورد

Quote: وحرجل ومحريب وشوية حلبة باقي ولدي دي مقبوض عندو حمي وباليل قعورد

حلبة يا خليل


وحرجل


ما لقيت محريب لانى ما عرفتو. لقيت ليك شيح. تعرف الشيح؟ دوا المغص ووجع البطن..

فى طريقة نكوى بيها اللولوة الشغالة فى السودان ليها 17 سنة؟

يا عادل لولوة السودان دي ما دايرة المكوة الهينة دي
دي دايرة ليها حاجات أسخن ..

Quote: ما عندكم شوية حلومر باقي رمضان قرب

يا خليل ..
جبتا ليك الحلومر وكمان معاهو
واحد عرديب و واحد قنقوليز ..

سلامة ولدك المقبوض ..
خليهو يسف حلبة حصا الجابا عادل دي
وإن شاء الله يصبح تمام ..

شكرآ يا تيسير الدنقلاوية. شكرآ على المكوة. وشكرآ على البلح. وشكرآ على ظرفك. وعلى كل شئ. شوفى المنظر ده من دنقلا. بت صغيرونة قاعدة تحت حيطة بيتهم. حلاتها:

وشكراً ليك إنت برضو
يا عادل يا ذوق ..

البنية الصغيرونة دي أظنها أنا لمن كنت صغيرة
وبلعب بالتراب

Quote: تيسير: ترمس ترمس.. كبكبى.. اقلبك "حلبى" والعب بى..

عادل بتاع الترمس
أنا جبت الكبكبي

جنس عواسة!

ياعادل ..

طرَقة الكسرة الحارة دي
بتستاهل أم رقيقة الحلوة دي ..

تيسيييييييييييييييير

عمو عادل،،

إشتقت ليكم،،

صورة من حلتي،،
و من بيتي
و من اوضتي دي،،

حلتنا الفي الجنوب،،
تصوير نجوووي الملك،،

سومييييييييتا
حبيبة قساي ..

إزيك يا بنية
حلتك الفي الجنوب حلوة
سماها غيم
وأرضها ريد ..

نزوق من الخلوه ..
ومن التسميع .. يا إما البحر جاك زول
ومنها الجناين جاك بلا ..
فتيل الزيت المخلوط مع الصابون مسوحنا
لتغطية الجريمه من اعين الوالده التي
( تشختك ) بي صباعها في صدرك عشان الغباشه
تكشفك ..
لم جينا البندر صعدنا لدوري الدرجه الاولي
وكنا بنلعب سباق باللساتك ( الدراتير )
وقت العصاري .. هذا بعد ان نقضي معظم النهار
في طحن الفحم وخلطه بالماء وتكوين ورنيش اللساتك
لإظهار جمالها اثناء السباق ..
امام باب الشارع الجالوص عمك رجب المكانيكي وفرحان
جدا عشان الليله مافي كوره حا تطير ليه في بيتهم
وعشان اللساتك بنات العربات اللي هو دكتورها ..

سودانية فى دارفور تضرب الطوب لبناء شفخانة فى احد معسكرات النازحين.
معسكر النازحين طبعآ حلة مؤقتة تضم الاف السودانيين الذين هجروا حلالهم وقراهم بسبب عنف الحكومة والمليشيات التابعة لها..

يا عادل ..
حتى الحلة المؤقتة دي الحكومة مستكتراها عليهم
وبرضو ما حتخليهم فيها
دايماً بتعاملهم كمواطنين درجة عاشرة
ليهم ربنا ..

درجة عاشرة لا ما صاح انا بقترح نديهم درجة تانية لكن بعد ما السودان يتوحد ومشكلة دارفور تتحلى ونشيل الحصة الكاملة من البترول ونعيش في وطن حر ديمقراطي بعد دا ما نفكر نديهم ياتو درجة لانها الدرجة التانية جاهزة ليهم( اسف اذا حولت شكل الكلام في البوست)

المحسي
إزيك ..
حبوبتك لسه زعلانة مني

Quote: درجة عاشرة لا ما صاح انا بقترح نديهم درجة تانية لكن بعد ما السودان يتوحد ومشكلة دارفور تتحلى ونشيل الحصة الكاملة من البترول ونعيش في وطن حر ديمقراطي بعد دا ما نفكر نديهم ياتو درجة لانها الدرجة التانية جاهزة ليهم

بعد ما السودان يتوحد ومشكلة دارفور تتحل تاني ما في درجات
المواطنين كلهم حيكونوا سواسية .. بس لكن الكلام دا حيحصل سنة كم يا ربي ؟

لا انا الزعلان لانو زهراء قالت لي انك جيتي وشربت القهوة وانا مافي على العموم محل ما يسري يمري وبالهنا
وحدة السودان لازم تكون زي ما قلتي اخلاقية قبل ما تكون سياسية يعني لازم نتأدب ادب السلام والديمقراطية عليك نور يا بت عووضة ( مكان ولا اسم؟) واسف مرة تانية للحوار شبة السياسي اجتماعي في البوست دا. الادب دا مهم

المحسي ..
قهوة حبوبة زهراء كانت حلوة إنت كنت وين ؟
وبعدين البوست يا محسي عام لانو عن حلتنا
وحلتنا فيها كل الأشياء بما فيها السياسة والكورة والفن
وانت قايل الرجال العجايز الجمب دكان الطيب ديل
بيتكلموا في شنو ما في السياسة دا ذاتا
يا زول ولا يهمك ..

Quote: يا بت عووضة ( مكان ولا اسم؟)

بت عووضة اسم (ما ليهو علاقة بمارنجان عووضة)

عمار بيلي
إزيك ..

Quote: وكنا بنلعب سباق باللساتك ( الدراتير ) وقت العصاري .. هذا بعد ان نقضي معظم النهار في طحن الفحم وخلطه بالماء وتكوين ورنيش اللساتك لإظهار جمالها اثناء السباق ..

صورة فيها كل براءة الطفولة وجمالها ..
والأجمل اعتزاز كل طفل بعربيتو المفترضة
ومحاولة الحفاظ عليها وتزيينها ..
نحن -البنات- كنا برضو بنعتني بأدوات اللعب ..
بت الدلاقين .. كل واحدة شايفة عروستا أجمل
الحصى بتاع أم الحفر والذي يتم انتقاؤه بعناية شديدة ..
الحجر بتاع الحجلة يكون نضيف وأملس وكل بت تتباهى بحجرها
وحاجات تانية كتييرة

تسلم يا بيلي ..

Quote: وكنا بنلعب سباق باللساتك ( الدراتير )

عادل ..
صورة الولد الماسك الترتار دي مبالغة
إنت بتجيب الحاجات دي من وين ؟
يا فنان ..


يا عادل بنية بتلعب الحجلة (البُربُرة) ..

تيسير ..
تثيرين ( البلاوي ) .. دائما
يا زولة يا رايعة ..

غريبة هي حلتنا ..
ليس من صور لها ..
بل عرض مستمر لفيلم روائي .. طويل .

تدخلها شمالاً من شارع ترابي عريض .. يبدأ بحوش فاروق ( المقابر ) ثم .. لا ينتهي منطقيا ، لكنه يتلاشى بين ( خيران .. ومباني متطاولة .. أخرى مموهة الشكل ) .. وتماما من حيث يبدأ ذاك الدرب الترابي ( قديماً ) تبدأ هرولة صور ذاكراتي تنازلياً ..
.....
( عثمان كوتود ) ..

كان حرياً تسميته ( عثمان كطود ) .. فكالطود هو .. قُدَّ من طينة أخرى ( أو ربما كنت أراه كذلك ) .. كان أسودا كالح السواد .. قصيراً في جَسَمةٍ صلبة .. لا تكاد تتبين له عمرا ، لكن بعض الشيبات الجعداء أعلى صدغيه تجاوز به الأربعين ، قال ( عوض جِنّي ) : يازووووول ، ده جريدة يدو واحدة .. ( و مازلت مؤمنا بذلك ) ، شفتاه غليظتان .. بل إنها المعلم الوحيد الذي يسرق عينيك في وجهه الوديع ، عيناه صغيرتان كعيني أم قيردون .. تلمعان ، تلازم ( سفته ) شفته السفلى - وردية اللون - وتظل تسترق عيناك الطريق إلي ابتسامته الخجول .
نهاره ظِلُ تلك ( اللالوبة ) كثيفة الخضرة قرب السور الشرقي للمقابر . لالوبة غريبة .. صنعت أغصانها المدلاة حولها ما يشبه الكهف .. ( قيل لنا أن تلك الشجرة تشرب دم الميتين .. و مسكونة بالشياطين .. فلا نقربها أو نأكل من ثمرها ) .. و كنا نمر بعيدا عنها متوجسين و في النفس شهوة لالتقاط حباتها العسلية الضخمة متناثرة تحت ظلها العظيم ذاك . وحده عثمان تذوق لالوبها العسلي الحرام .. وحده استظل بها ، وحرُّ الصيف لافحٌ للقبور العتيقة تلك .. و الأسوار الحديدية الصدئة ( لجَّبانات ) عليّة القوم .. و الخنافس السوداء لامعة الطهر ( خدامة العقرب ) .. و العظاءات الذهبية تتقافز كللمحات الخواطف بين ( شواهد ) الطين المتآكلة و الأحجار الصخرية المتناثرة .
وحده عثمان كان متآلفاً مع ذاك ( الوجود ) وسط تلك السكينة ( العدم ) .

غريب كان عثمان ..

ودوداً حد الريبة في وده ذاك ، مهاباً .. يخافه ( الرباطة ) حين يلف الليل عتمور ( فاروق ) ، فلا يعبرها إلا قطاع الطرق .. و لا يتخذ سورها الجنوبي ( مسطبةً ) سواهم ( ندماء الكؤوس الليلية ) .. و الغناء البَكّاء .
قليلاً ما تراه يرتاد الأزقة شرايين بيوتنا الطينية تلك ، لا يفعل ذلك إلا في طريقه لـ ( فريق السوق ) - تمر أبونا - كما تسميه حبوبة كُبري ، يملأ ( حُقّته ) مستنشقا عميقاً تلك الرائحة النافذة قبل أن ( يعبيء ) شفته السفلى بها .. ثم يبصق ميمماً تجاه الشمال في خطوه الخفيف على الطريق الترابي .. منتهياً إلى عالمه الأليف .. ( الجّبانة ) .

غريبٌ كان عثمان ..

لم تكن تبصر - وأنت عابر أسوار الجبانة الأربعة - إلا رشقات التراب تخرج من جوف الأرض في إيقاع منتظم .. تدرك حينها أن عثمان داخل تلك الحفرة .. يعدها لتكون قبرا ، سبعة .. عشرة .. إثنا عشر .. ما كان يحسب عددا للقبور التي يعدها لتضم أجداث ساكني الحي جنوب المقابر .. الحي الشعبي الوحيد جنوب المقابر .. ديم ( كوريا ) ثم حلتنا : ديم التعايشة .. تصطف خلفه بقية الديوم الوادعة في فوران تفاصيل الحياة .
شمال ( حوش فاروق ) كانت ( الخرطوم 2 ) : مجموعة من الفلل الصغيرة وطيئة الأسوار .. تتمرد أغصان أشجارها مادةً أغصانها خارجهُ .. كأنما تبحث عن فكاك من ذاك الصمت الإستقراطي في الداخل .. وسيارات و نساء ( كالجن ) طيبات العبير حين يعبرنك - متوجسات - و عيونهم تتهمك بالـ .. فقر المسكين .. المريب .
غربها مدرسة .. وعدد من الأسوار ذوات ( الجهنميات الحمراء ) .. تحجب ماهية المبنى خلفها . المساحة المتربة بين سور المقابر المتهالك و الجدران المأهولات تخذها الناس ( كوشة ) .. تمرح فيها ( غنيمات ) جدي مكاوي مع رفيقاتهن الراجلات إليها - في رحلة يومية - من بيوت الطين فقيرة ( الكوش ) .. و بعض أبناء الشوارع التعيسة .
شرق سورها العظيم السميك .. وأحجاره من ( الطوب الأحمر ) لا تشبه تلك التي نصنع منها أشياؤنا العجيبة بعد نحتها في أعمدة الكهرباء .
كان السور سميكاً .. يستلقي عليه بعد الغروب باعة ( الترمس ) .. وعمال ( كشك التلج ) .. وبعض الغرباء العابرين .
الشرق كان ( العمارات ) .. كائنٌ لا يشبهنا في شيء .. يرعب كما ترعب رائحة البخور و همهمات المشتكين و الحواريين و أنا أخبيء رأس في طيات ( توب الزراق ) تلبسه جدتي الزلال عند زيارة الفكي السنوسي . ليست قدسية تلك التي أحس حين أعبر شوارع ( العمارات ) الأسفلتية اللامعة حينها ( كانت الطرقات بين البيوت مسفلتة - لدهشتي - .. إذ كيف يتزاور الناس حينها إذ - يفصلهم - هذا السواد البارد اللامع ؟؟ .. عجيب ) . . غير أني كنت أعبرها من وسط الشوارع الصناعية تلك .
عيناي تلتقطان أحرف اللافتات يمنة و يسرى : إحترس من الكلب / فيللا ستاوروس / منزل أحمد المصطفى !!! كيف كان يغنى إذن في ( راديونا ) الخشبي في ( برندتنا ) : في ناس في المُره جافونا وبكره الحلوة بتجينا ؟؟؟ وهو ينام هنا .. في العمارات ؟؟؟
زجاجات الحليب فوق أسوار المنازل .. بيضاء ( تيترون ) رسمت عليها بقرة سوداء لامعة .. في خلفية خضرة أشجار الحدائق .
أعبر كل ذلك ( العالم ) متجهاً إلى الفضاء الذي يسبق المطار .. لأشرِّك للطير .

غريبٌ كان عثمان

يقول وهو خارجٌ من ود اللحد - بعد أن تأكد من تمام ( جمالية ) عمله .. يقول ناثراً ما تجمع في سبابته الغليظة من عرق غطى جبهته الضيقة : ( لله و الرسول .. لله والرسول ) .. ثم خفيفا يتقافز فوق القبور المتراصة في أبدية موتها ( تمامُ تراصها في حميمية حيواتها ) .. باصقاً ما علق في شفته من ( صعود ) .. مكوراً سفةً أخرى .. لقبرٍ جديد .
غريبٌ كان عثمان يا تيسير ..
و غريبٌ أن تزحمني - وإياك - تفاصيله اللصيقة بالذاكرة .

حبيبةٌ هي حلتنا .. بعيدة ..
بعيدٌ كل شيء الآن ..
و .. أقرب ما يكون .

تعبت ..
لك التحايا

عماد
يا زول يا أروع ..

دي ما صورة من حلتكم
دي رواية متماسكة الأطراف ..
لمن بقيت أسأل روحي
ياربي دا كلو عندكم
(مقابر فاروق) ومحيطها
والأحياء على جنباتها الأربعة
نمرة اتنين و العمارات
والديوم
وعثمان الغريب
والالوبة المحرمة والجهنمية
وصفتها وصف ولا أعمق ..
زي الكأني واقفة حالياً جمب الكشك بتاع التلج

يديك العافية يا عماد ..

still i have more I w`ll b back soon
fatih

يا أبومهند ..

الصور يعميني فيهم ما شايفة حاجة
كدي تعال ورينا الحاصل شنو ..

الأخت العزيزة تيسير
موضوع شيق ولذيذ

أهديك صورتين من سوق الملجة في مدني


خضار و فواكه من أيام زمان

تحياتي

مهيرة
إزيك ..

دايماً تلقي نسوان الحلة يتلموا ويمشوا سوق الخضار سوا
يشتروا سوا ويجوا راجعين لو في ملوخية يورقوها مع بعض
لو في بامية يقمعوها مع بعض .. كانوا بيتشاركوا في كل شئ ..
عشان كدا حياتهم كانت جميلة وصافية ..

شكراً عزيزتي ..
وتسلمي على الصور الجميلة ..

تيسير المرة الجاية حنجيب ليكم قراصة تركين حقيقية



دي صور من جمعيتنا

حمد الرحمن ..
التركين دا الطبق الرئيسي والأكثر شعبية أيام الجمع والعطلات الرسمية
كما و أنه وجبة قومية تبرز هويتنا نحن بني دنقل وأبناء عمومتنا من المحس ..


على جنب ..
مرة جاية من السودان أبوي ضرب قال لي جيبي معاك تركين
تاني بعد شوية ضرب قال لي وجيبي معاك تمباك
قلت ليهو الاتنين مستحيل اختار واحد بس
لانو يمكن ما يدخلوني الطيارة
وقلت أكيد حيختار التمباك (كنوع من الكيف)
تتخيل يا حمد اختار التركين !

خارجي / نهار :

: أريتو يا يُمه برسيم وشك .. مِن بشير ، عاد الليلة نازل مِنّو .
: الله واحد .. أريتو يدوم ، عِلا هُوْ ... !! بري .. الشكية لي اب إيداً قويه .
: اصُبري يا دي .. إتّي ناس بت الولي ديل .. المات ليهم منو ؟؟
: هي يا يُُمه حليل أبوي .. أمِس القريبة دي ، ما حدّستك نفيسة بت الياس ؟؟.. أجي يا يُمه !!
: بري و اللهي .. يطرشني .. ما سمعت وحات أبوي .. إن ما في الخدار سمعت محجوب الجزار يناغم في أم الحسن بت أب ضُراع ..
: النبي ؟
: أها عاد أكان كنت عارفه .. البيقعدني شنو ؟.. هووووي يا فاطنه هوي ، المطاعنه خليها .. آآآي .
: أجي يا اخواتي ؟.. قادر الله ، ما خشمي ده ؟.. أها قدرت عليهو .
: قدرتي ولا ما قدرتي .. ما يا هو كلامك عاد .. دايره تلوِّميني معَ بت الولي ؟؟ ، باكر تقول الرضية ما جات عزتني .. ما بعرفك أنا ؟؟
: ووب على ووب علي .. هسي يا اخواني المره دي أنا حدستها ؟؟.. هوي يا ختي هوي ، أنا ما فاضية ليك .. أكان بتكوسي ليك سبلة ، شوفي غيري . يعلم الله بي أضاني الماشي ياكولا الدود دي و قدام بيت ناس ود الأزرق ، أمونه علي كلمتك و قات ليك أكان بتمشي بيت البكا تعالي لينا .. نحن ماشات بعد الفطور .. أجي يا اخواتي !!
: شكيتك علي الله كان هجمتيني .. شاهد هوْ عاد .. يطرشني طراش الصح داك أكان سمعت ، لكين إتي !! الفيك انعرفت يا اللخباته يا السواطه .. أديتك القدرك عاد .
: هوي هه .. إتّي زااااتك شن طعمك مع الحريم البتلومن ؟.. أول إن عزيتيها ولا لأ ، ماشه تفرقي معاها ؟؟ قادر الله .
: سعدية هوي .. يقدر عليك القدرك اشا الله .. رجيت الله عليك ، ما الإستبالية دي ؟؟ خليتا ليك يا سعدية ، أها !! عندك كلام تاني ؟
: استغفر الله ، انتن يا حريم جنيتن ؟.. حسي الكلام ده لزومو شنو ؟..
: مريم هوي .. خشمِك و عليكْ ، حسّع في زول سعِلكْ ؟ ولّا يا هو .. غُزُّونا ما تنسونا ؟..
: أرحكي يا مريم .. المشتهي الحنيطير يطير ..
: أمشن .. قطر عجيب اشّا الله .. شوفي الخِِلقه و سِتَّها !!
: قااااادر الله .. سمحه يا يُمه الفلهَمَه عند أهلا ..... بِس .
: تبِسّي كديسه اشّا الله ..
: ........

( حلتنا .. حلاتنا ) ..

يا عماد ..
شكلة ليها ضل ..
لكن الرضية بالغت مالا شرانية كدي ؟
بالجد لكن حوار حلو وعفوي لا تخلو منه أي لمة نسوان
والظريف بعد دقيقتين برجعوا زي الماحاصل شي
لأنو قلوبهم نضيفة ..

أعجبني الحوار جداً
تسلم يا عماد ..

بيت ناس ست البنات والتومة جمب بعض ..
جيران حيطة بالحيطة , وبيناتهم طاقة ..
أها اليوم داك فانوس ناس التومة ماكان فيهو جاز
قامت ست البنات ختت الفانوس في الطاقة عشان يضوي البيتين !

افتحن البيبان والطاقة
امسحن الدمعة الحراقة..
انحنا البنحقق امانينا..
نزح الوجع المتحدينا..

جينا نخت إيدينا الخضرا
فوقك يا أرض الطيبين ..

كُرو رو رو رو رو رووور،،،
البوست البحبو و فيهو احبابي،،

إزييييييييكم،،
تيسيييير الصبوووحة الصبيحة،،
يا فرير داموور المسخ الارياح،،
مش انا عندي ليكم الشوق هنا؟
عمو عادل الحبيب،،
مطالب بعدد واحد صورة لعروسة مولد او اي شي ليهو علاقة بي الحلاوات المولدية،،
اصلو روحي مشحتفة علي سمسمية،، :S

حبيبة قساي سوميتا ..

إنتي جيتي ؟
وينك دا كلو البوست البتحبيهو فاقدك وأحبابك مشتاقين ..
يعني إلا المولد حتى تجي
خلاص لغاية ما عمو عادل يجيب الحلاوة هاك دي
عشان ما تطلعي من المولد بدون حمص

تيسير وسوميتا
بنياتى .. حبيباتى..
جبت ليكم حاجة متأكد ح تحبوها..
فيها ريحة الحلة.. وغباش اهلنا. ومسدار نيلنا..
عرفتوها؟
غمّدوا عيونكم..

أحلى عروسة مولد لسوميتا وتيسير

سوميتا تعالي شوفي عمو عادل جاب لينا شنو !
بس الحاجة الفوق دي ماعرفناها ..



شكراً يا عمو عادل ..

تيسووووورة،،
إنتي بتخربي طبعي كدة،،
عروستين مرة وحدة،،
ده انا كل حلمي قطمة سمسمية،،

عارفة انا مرة كبيرة كدة و متمنية يوم امشي مولد،،
و اجي كرعيني غبارن لي السما،،
و بي سفنجة،،
و لافحة توب امي،،

دي من الصور الحلوة الإتمنين اخدها،،

سبحة اللالوب
الدراويش اللابسين أخدر
عروسة المولد والحصان
السمسمية والفولية والحمصية
وحلاوة لكوم
صوت الطار البيدخل جوة الروح
مُدّاح الرسول الكريم
والنوبة
وفتة الرز
والشفع الفرحانين
وسوميتا لافحة توب أمها
وكرعينا مكتحات وشايلة حتة سمسمية بتاكل فيه
وعيونا بيلمعو زي انوار ميدان المولد من الفرحة ..

عمو عاااااادل إزيك،،

قدر ما سغرت عيوني ما عرفت ده شنو؟

دووم؟ نان العرب شن عرفتن بي دومنا،،
لالوب،، بري ،، لالوبنا اسغر،، و برضو شن عرفتن،،
نبق،، فااااااااملي سايز،، برضك ما اظنش،،

و الصورة التانية ما ظاهرة،،