Post: #1
Title: خروف الكريسماس
Author: esam gabralla
Date: 12-22-2007, 05:15 PM
Parent: #0
ذاكرة الغريب ... عين المهاجر
في مكان ما قرات:
عين الغريب تخشي تمعنها في الجمال
الذاكرة يحملها معه الغريب شاء ام ابا ,هي بصمة روحه الابدية
الذاكرة حمالة اوجه
وجه اللعنة
هي لعنة غربته الابدية, تملاه بالاسي و المرارة , تجبره ان لا يري الاشياء كما تكون, بل مثلما تريد هي, المواقف تبدو و كانما حدثت مرات و مرات
لا شئ جديد... لا شئ, تاريخ توقف يوم الرحيل و حياة لا تحيا
وجه اللعنة يقفز في وجهك في لحظات الضعف الانسانى , يسل لسانه و يبدا في الضحك عليك , يعلم انك هش الدواخل, يعلم انك قابل للانكسار في اية لحظة
يعلم انك ينهشك الحنين/الوهم لاشياء ما عادت موجودة ..لوجوه غادرت او تغيرت ... لبيوت فارقت اراضيها ... لاشجار شاخت و لحب لن يعود
اواصل
|
Post: #2
Title: Re: خروف الكريسماس
Author: Emad Abdulla
Date: 12-22-2007, 06:08 PM
Parent: #1
| Quote: الذاكرة حمالة اوجه |
غابت يا عصام الأوجه ..
و غامت الذاكرة ..
بقيت الأحمال ..
معاك , الله يدينا خير خروف كريسماسك .
|
Post: #4
Title: Re: خروف الكريسماس
Author: esam gabralla
Date: 12-22-2007, 10:41 PM
يا صاحب
صاحبي بهاء الهيبيز و نحن مصنقرين في ميدان نجيلة في نص القاهرة لا نملك في الدنيا شئ سوى بعض اوهام و عشق مستحيل ... كنا صامتين لساعات, لا لاننا لا نملك ما نقوله بل لان ما نملكه - العالى الصوت - لا يحتاج ان يقال
قال فجاة: الاصدقاء رحلوا ... والحلم شاخ
كلما غدرتنى هذه اللعينة - ذاكرتى - ابحث عن اصدقائي لاتكئ عليهم, اواجه بفراغ تحتى و حولى , لاعلم من جديد مرات ومرات انى - والاصدقاء - رحلنا
تلفونك يا عماد ...
|
Post: #3
Title: Re: خروف الكريسماس
Author: Khalid Kodi
Date: 12-22-2007, 07:13 PM
Parent: #1
وديك روم الضحية.
تحياتى ياعصام وأمنياتى موسم أعياد سعيده.
.
|
Post: #5
Title: Re: خروف الكريسماس
Author: Ishraga Mustafa
Date: 12-22-2007, 10:46 PM
Parent: #3
عصام ياصاحبى مالك؟ قام عليك؟
عشان تآآآآآآآآآآآآآآآآآآمن!!
اها انا مستنية خروف الكريسماس وكلها بيناتنا حيطة فابالله ماتفوتنا ليها!
|
Post: #8
Title: Re: خروف الكريسماس
Author: esam gabralla
Date: 12-22-2007, 11:00 PM
Parent: #3
شوف يا اخونا ... "نحن" في اوروبا قصة الامركة ضد ما بتمشي علينا, اى نعم بناكل و نتحاسب اخوان هنا و هناك , نمشي ليكم بيزنس و لا حرب ... لكن ديوك ما معانا
امريكا لمى "ديوكك"
فاتفيل (دى حلتى الساكن فيها) تحذر امريكا للمرة القبل الاخيرة
سلام ولصاحبتنا الزمان و للشافع, ان شاءالله يكون حاميكم النوم تمام
|
Post: #6
Title: Re: خروف الكريسماس
Author: esam gabralla
Date: 12-22-2007, 10:55 PM
Parent: #1
احابيل ذاكرة المهاجر
المهاجر يعيش هنا و هناك , هو ليس هنا و هو ليس هناك
المهاجر يغريه ضمير الجمع نحن , ينتمى فجاة لمجموعة بشرية لا يجمعها معه شئ سوا هذه الحالة - مهاجر-
نحن و هم
نحن الغرباء ... و هم?
فجاة يصبح ال"هناك" هو جنة الله في الارض و ال"هنا" هو الجحيم , يحكى المهاجر عن وطنه الذى غادره لسبب ما - وغالبا هي اوطان طاردة - فيتداخل الخيال مع الوهم مع الامنيات مع الاكاذيب ليري المهاجر وطنا سعيد
قال سويسري ذكى و لئيم للمهاجر: وقت بلدك سمحة قدر ده طيب ما ترجع!!!
عاد المهاجر ملطوما للواقع ... مؤقتا
الذاكرة ... غواية الوهم, نسيان ما هو كائن لاجل ما لن يكون
|
Post: #7
Title: Re: خروف الكريسماس
Author: Ishraga Mustafa
Date: 12-22-2007, 10:58 PM
Parent: #6
Quote: المهاجر يغريه ضمير الجمع نحن , ينتمى فجاة لمجموعة بشرية لا يجمعها معه شئ سوا هذه الحالة - مهاجر-
نحن و هم
نحن الغرباء ... و هم? |
ولهذا حكاية تضاف لمسيرة الانهار ياصديقى...حكاية لها ايضا ذاكرة
|
Post: #9
Title: Re: خروف الكريسماس
Author: Hussein Mallasi
Date: 12-22-2007, 11:04 PM
Parent: #7
Quote: قال سويسري ذكى و لئيم للمهاجر:
وقت بلدك سمحة قدر ده طيب ما ترجع!!! |
كل من لا تنطلي عليه حيلكم على أنفسكم .. تصفونه باللؤم!!
|
Post: #11
Title: Re: خروف الكريسماس
Author: esam gabralla
Date: 12-22-2007, 11:17 PM
Parent: #9
مرحب ملاسي
لو ما جيت بى حكمك و نصائحك الخارقة
لصار خروفنا خروف ضحية عااااادى
لئيم هذه ليست بالضرورة ذم , في سياق كلامى ده كله هى بالتاكيد من باب المدح والاعجاب , لكن انت فاضي من اللفح والقراية بالربع!!!!!
اقعد ساكت و قطم بطل الخفة واللفة
|
Post: #10
Title: Re: خروف الكريسماس
Author: esam gabralla
Date: 12-22-2007, 11:09 PM
Parent: #1
اشراقة
ازيك
Quote: عصام ياصاحبى مالك؟ قام عليك؟
عشان تآآآآآآآآآآآآآآآآآآمن!!
اها انا مستنية خروف الكريسماس وكلها بيناتنا حيطة فابالله ماتفوتنا ليها |
!
يا زولة ما تنطى ساكت , لا قام لا قعد , انحنا قصتنا باظت كلو كلو , بقا مافي شئ بقوم الحالة, عشان كده التامل ساهل , لما تقعد بره منها بتقدر تشوفا. استهبال "المهاجرين و المهاجرات" ده تاريخى انسانى عادى جدا , نفس الكلام و الاوهام يفولها كل من هاجر لا يهم من اين اتى او الى اين ذهب , ينجو منه من انتبه لاحابيله
جاييك للخروف ... و هو سبب محاولة تجميع افكار و ملاحظات مشتتة و مبعثرة في مسيرة الهجرة دى
|
Post: #12
Title: Re: خروف الكريسماس
Author: Khalid Kodi
Date: 12-22-2007, 11:37 PM
Parent: #1
| Quote: سلام ولصاحبتنا الزمان و للشافع, ان شاءالله يكون حاميكم النوم تمام |
للتوثيق.
شافع قال...كدى خليها وأمها يصلو دول العالم الطغيان عشان يوروك ليهو.
ووالله ياهو الفضل، الست نجوى نواره بجلالة قدرها تقول عليها "شافع"...غايتو أرجى الجاييك.
|
Post: #13
Title: Re: خروف الكريسماس
Author: fadlabi
Date: 12-22-2007, 11:37 PM
Parent: #1
عصام
عنوانك ده جد جد 
فعلا خروف الكريسماس ..
واصل .. إحتمال خروفك يكون نوعه براه
|
Post: #19
Title: Re: خروف الكريسماس
Author: esam gabralla
Date: 12-22-2007, 11:55 PM
Parent: #13
فاضلابي سلام
اطلع بي خروفك
انا فكيت اخرى .... الفكرة اتنين: تشابه في بعض الاجراءات والطقوس
و حالة ذاكرة المهاجر
|
Post: #14
Title: Re: خروف الكريسماس
Author: esam gabralla
Date: 12-22-2007, 11:43 PM
Parent: #1
سوق خرفان الكريسماس
|
Post: #15
Title: Re: خروف الكريسماس
Author: esam gabralla
Date: 12-22-2007, 11:45 PM
Parent: #1
زبون بجس ليهو في خروف
|
Post: #16
Title: Re: خروف الكريسماس
Author: esam gabralla
Date: 12-22-2007, 11:48 PM
Parent: #1
خرفان بعد شراءها في طريقها للذبح
|
Post: #17
Title: Re: خروف الكريسماس
Author: esam gabralla
Date: 12-22-2007, 11:49 PM
Parent: #1
خروف الكريسماس
بعد توضيبه ... شيات مولعة
|
Post: #18
Title: Re: خروف الكريسماس
Author: esam gabralla
Date: 12-22-2007, 11:52 PM
Parent: #1
خروف و خروف
الصراع الخرافي العالمى .... هاتنقتون في تجلياته
|
Post: #20
Title: Re: خروف الكريسماس
Author: Hussein Mallasi
Date: 12-23-2007, 00:02 AM
Parent: #18
قطمنا .. تدفق و تداعى و .. ميري كريسماس!!
|
Post: #22
Title: Re: خروف الكريسماس
Author: اساسي
Date: 12-23-2007, 00:08 AM
Parent: #20
اها وخروف الكريسماس دا ضباحو بشيل الجلد والراس ؟
|
Post: #23
Title: Re: خروف الكريسماس
Author: esam gabralla
Date: 12-23-2007, 00:17 AM
Parent: #22
ملاسي
شكرا لاكرام الخروف
اساسي شخصيا ... دى بركة الكريسماس و لا الضحية
الجلد لى فريق الكورة و الراس لناس الجمعية
انت بالمناسبة بما انك في السعودية خليها حقتنا دى, ريسين و جلود الحج دى بعملو بيها شنو??
|
Post: #21
Title: Re: خروف الكريسماس
Author: Khalid Kodi
Date: 12-23-2007, 00:06 AM
Parent: #1
ياولد ماتبطل حركات "النباتيين" بتاعتك دى وأرجل.
نقول ليك خررروف خروف يعنى لحم ، ولحم أحمر وضبيحه فيها دموم ومرارات وضببابين متحاومه،
وراس نيفه وجلود، تقوم تقولينا ضابحين شدره!
ده كلام شنو ياعصام؟
يعنى هسع نقول لى أهلك شنو؟
حسبى الله.
|
Post: #24
Title: Re: خروف الكريسماس
Author: esam gabralla
Date: 12-23-2007, 00:29 AM
Parent: #21
خالد
سمعت بالجماعة جا زارهم واحد صاحبهم نباتى - بعيد عنك - و عندهم قريبهم زول طيبان يسمع ساكت نباتى نباتى. بعد كم شهر سال الجماعة "انتو وين صاحبكم الخضرجي داك.
يا اخينا كترتها.. في الاول تهددنى بالنسوان
| Quote: كدى خليها وأمها يصلو دول العالم الطغيان عشان يوروك ليهو. |
, اكلم ليك جماعة هنا يشيلوا حالك, بقيت تتضاير ورا النسوان كمان!!!!
تعرف انا حالتى عامل حريف قلت ازلقا "شافع" بتودر ججهجتى لكن زنقتنى ..
Quote: نقول ليك خررروف خروف يعنى لحم ، ولحم أحمر وضبيحه فيها دموم ومرارات وضببابين متحاومه،
وراس نيفه وجلود، تقوم تقولينا ضابحين شدره! |
تقول لى انا ليه??? ابقا راجل و امشي قولا للخواجات المعاك ... قول ليهم بنضبحححح الخروف جخخخخ وبنكون واقفين جمبو مبسوطين نمطق و نتضاحك و نساعد الجزار في "تقشيرو"
كان ما رفدوك بكره و طلعوك اكعب من الجنجويد
بينى وبينك..... تحت تحت
اللحم ده احسن منو مافي
نحو عالم مليئ باللحوم
يسقط كل نباتى .. وكل من يقول بضرر اللحمة
|
Post: #25
Title: Re: خروف الكريسماس
Author: Ishraga Mustafa
Date: 12-23-2007, 00:57 AM
Parent: #24
|
Post: #26
Title: Re: خروف الكريسماس
Author: esam gabralla
Date: 12-23-2007, 01:00 AM
Parent: #1
احابيل الذاكرة
المهاجر بارع في ايجاد او رؤية المتشابهات بين ذاكرته عن وطن و حيث يعيش , لا يري ما يعيشه الا عبر مراة الذاكرة, يقلقه ان لا يجد ما يشابهها , يبحث في كل ما يراه عن ما تركه خلفه.
..............
|
Post: #27
Title: Re: خروف الكريسماس
Author: Nasir Ahmed Elmustafa
Date: 12-23-2007, 06:58 AM
Parent: #26
اخي عصام كل سنة وانت طيب وكل الاخوان ان شاء الله السنة الجاية كل الطير المهاجر يكون وسط اهله واحبابه وربنا يرجعكم سالمين وغانمين ويكفيكم الغربة بخيرها وشرها....البلد محتاجة لكل اولادها كما انكم لا تستغنون عنها
|
Post: #37
Title: Re: خروف الكريسماس
Author: esam gabralla
Date: 12-24-2007, 12:53 PM
Parent: #27
سلام ناصر ... ود الهندسة اعتقد!!
شكرا على الامنيات و لك و لمن تحب مثلها...
| Quote: البلد محتاجة لكل اولادها كما انكم لا تستغنون عنها |
دى قصة طويلة، المقام ليس مناسب لنقاشها... بنتلاقي في براح تانى للكلام فيها ...
تحياتى
|
Post: #28
Title: Re: خروف الكريسماس
Author: Khalid Kodi
Date: 12-23-2007, 08:20 PM
Parent: #1
ياود عم جبر الله،
Quote: يا اخينا كترتها.. في الاول تهددنى بالنسوان
Quote: كدى خليها وأمها يصلو دول العالم الطغيان عشان يوروك ليهو.
, اكلم ليك جماعة هنا يشيلوا حالك, بقيت تتضاير ورا النسوان كمان!!!! |
أنا شايف القصة بقت زى الكتيح فى البحر، نقول نتقدم ووب، نقول نتضاير وراهن برضو ووب!
فيازول نجوى نواره تقوم الدنيا وماتقعده...غايتو الله يحضرنا زمانه ساكت.
Quote: تقول لى انا ليه??? ابقا راجل و امشي قولا للخواجات المعاك ... قول ليهم بنضبحححح الخروف جخخخخ وبنكون واقفين جمبو مبسوطين نمطق و نتضاحك و نساعد الجزار في "تقشيرو"
كان ما رفدوك بكره و طلعوك اكعب من الجنجويد |
تعرف ياعصام الخروف ساهل، واحد من أصحابى الملاعين ، عند حضوره لى بوسطن حلف بى راس أبوهو الا يقبض السناجيب ياكلم!! وصاحبك قرب يقنعنى إنو لحمن ألذ حاجه وزى لحم الارانب وووو!!
تذكر ناس تيك وتاك؟ صاحبك طالعين الشدره عينو عليهم، نازلين من الشدره عينو عليهم ومصمم...
ماوقفو إلا التهديد بانو لو قبضونا حايجيبونا فى الجرايد بالصور مع عنوان عريض يقول المتوحشين يلتهمون سناجيب بوسطن الامنه.
وبعد داك كلو حاشوه أولادو من بط الحديقه العامه...فياأخى خليها مستوره.
..تقول لى خروف؟
والقصه حقيقية.
|
Post: #29
Title: Re: خروف الكريسماس
Author: Emad Abdulla
Date: 12-23-2007, 08:31 PM
Parent: #28
| Quote: لا يري ما يعيشه الا عبر مراة الذاكرة, يقلقه ان لا يجد ما يشابهها , يبحث في كل ما يراه عن ما تركه خلفه. |
و خلفه بححححححححح ..
يا معلم ..
أمسك عندك : 129199734
و حاجزين الكوارع الكريسماسية لقعدة باكر .
|
Post: #30
Title: Re: خروف الكريسماس
Author: عبدالكريم الامين احمد
Date: 12-23-2007, 08:34 PM
Parent: #29
وين الليلة الراجل بتاع خرفان الكريسماس ده..
دايرين لينا خروف في شكل وردة..
المشكلة مافي الخروف الكلام في الشربوت بتاع الكريسماس
(ايش لونووو)
|
Post: #31
Title: Re: خروف الكريسماس
Author: Emad Abdulla
Date: 12-23-2007, 09:00 PM
Parent: #30
| Quote: خروف في شكل وردة.. |
وردة يا كبير
دي زي كُديانة في شكل برغل 
كيكي بالله خليك في الكنابي و الزقاقات الضلمة ..
مالك و مال الورد و الكريسماس و الحنكشة الما لافقة معاك دي !!
الزول ده يطلع بره يا عصام ياخ ..
بيخرب الرصة .
|
Post: #32
Title: Re: خروف الكريسماس
Author: عبدالكريم الامين احمد
Date: 12-23-2007, 10:20 PM
Parent: #31
Quote: الزول ده يطلع بره يا عصام ياخ ..
بيخرب الرصة . |
|
Post: #33
Title: Re: خروف الكريسماس
Author: محمد سنى دفع الله
Date: 12-23-2007, 10:29 PM
Parent: #32
صلاح جبرالله
العيد مبارك عليك
وكريسماس تقطعو بي عرق العافية
ماتفهمني غلط ما العافية بتاعة عماد عبدالله
شنو قصة الخرفان الواقفين جنب المهد
وخروفك اتمنى يكون مدوعلللل
مودني
|
Post: #34
Title: Re: خروف الكريسماس
Author: wadalzain
Date: 12-24-2007, 07:48 AM
Parent: #33
عصام جبرالله
كل سنه وانت طيب وميرى كريسماس وعام جديد سعيد انشاء الله
لكن كلامك ده شنو الكتر ده
( بقا مافي شئ بقوم الحالة )
سويسرا دى عرفناها محايده وبلد بارده الشى البروده دى ما بتقوم الشدر والمدر ولا شنو
|
Post: #35
Title: Re: خروف الكريسماس
Author: tmbis
Date: 12-24-2007, 08:42 AM
Parent: #34
| Quote: انت بالمناسبة بما انك في السعودية خليها حقتنا دى, ريسين و جلود الحج دى بعملو بيها شنو?? |
.. والله يا عصام جبر الله حالتك تحنن ..
بلاي ضابح ليك شجرة ( لبــخ )
جايب ليك شجرة ( لبخ ) وبعض حشائش ( إقليم التندرا ) وشابكنا دا خروفي ..؟
غايتو امسك في الشربوت دا كويس .. لكن كان دي شجرتك ودا خروفك يعوضك صاحب العوض ..
برد وتلج .. وبعض الخواجات بالجوار يتبادلون القبل الحارة .. تحت رزاز الفودكا..
وعصام جبر الله يجيب ليهو شجرة (مهوقني) واللا شجرة (طنطب) ما عارف ويقول دا خروفي ..
وعايزنا نصدقوا ..
مؤخرا يا عصام بديت اشفق عليك .. حالتك بقت تحنن حقو الواحد يرسل ليك ( شرموط بتاع سنكيت اسد )
من العندي دا.. احسن ليك من الجهجهة دي .. لانو لحمة الضان الهشة دي ممكن تعمل ليك ( اب عديلات ) من البلع
|
Post: #36
Title: Re: خروف الكريسماس
Author: Emad Abdulla
Date: 12-24-2007, 11:15 AM
Parent: #35
| Quote: مؤخرا يا عصام بديت اشفق عليك .. حالتك بقت تحنن حقو الواحد يرسل ليك ( شرموط بتاع سنكيت اسد ) من العندي دا.. احسن ليك من الجهجهة دي .. لانو لحمة الضان الهشة دي ممكن تعمل ليك ( اب عديلات ) من البلع |
أندرو و الأسد .
|
Post: #51
Title: Re: خروف الكريسماس
Author: esam gabralla
Date: 12-28-2007, 09:29 PM
Parent: #30
بالله شوف القصة دى قجت كيف ..
يا عمدة تعرف عينة كيكي دى مفروض تكون واقفة في صف براها .. شوف ليك جنس كلام ....
| Quote: خروف في شكل وردة الشربوت بتاع الكريسماس |
دى كان تقولا في البركس شان تآمن
الشربوت ما داير كريسماس ... شربوت الكريسماس هنا دم المسيح عدييييل كده
شفت "الشفافية" دى كيف
و تانى عشان تتوب
|
Post: #38
Title: Re: خروف الكريسماس
Author: esam gabralla
Date: 12-24-2007, 01:11 PM
Parent: #28
| Quote: نقول نتقدم ووب، نقول نتضاير وراهن برضو ووب! |
ما ده المجنن بوبي زاتو ... نتقطع انحنا نص قدام و نص ورا
الحل يا زول تقعد في محلك .. نصنقر ليهن نشوف اخرتا شنو
او زى ما قال احد المحتارين: الحل نبنى الحيطة تانى وكل زول يقعد في حوشو (حيطة زمان البتفصل حوش الرجال والنسوان)
اسمع كان الجماعة جو هنا انا الكلام ده ما كتبتو .. ده الهكر
| Quote: يقول المتوحشين يلتهمون سناجيب بوسطن الامنه |
زولك ده طفس و دنى ساكت ... تيك و داك ديل قرمه واحدة الصحن يكون فاضي, عينو في البفالو حقارتو في الصغار ديل
يشاع في بريطانيا ان احد السوادنة اعتدى ليلا على بط الملكة شخصيا و طلع منو حلة ممتازة
و يشاع ايضا ان شاعر ومثقف عظيم (الاسم عندى) قال مهددا النباتيين: والله الخرفان ديل ما تاكلوهم , بكره ي..... عديل كده, مكان النقاط متروك لخيالك
السوادنة محن محن بس ... كان لوتراب و لا ازيلاب ولا بيروقراطية دولية (UN و ما شابه)
|
Post: #39
Title: Re: خروف الكريسماس
Author: رأفت ميلاد
Date: 12-24-2007, 03:36 PM
Parent: #38
عصام
نحن ما ناس يأى حال عدت يا عيد ..
أنا لا خروف .. لا إجازة ..
قلت لى قال ليهو طيب ما ترجع بلدك .. قول ليه نلقاها منك ولا من بلوخر
واحد عندنا قال أجدادنا جابوهم قادين أضانم وجارنهم منها .. نحن جينا براااااانا
خم وصر
عماد التلفون لفحناهو .. تخت ليه 00 و يولع ؟ .. ولا فى شيئ تانى ناقص ؟
ملاسى ما تدينا تلفونك ياخى .. ولا نلقاهو عند عماد
كل سنة والجميع طيبين
|
Post: #40
Title: Re: خروف الكريسماس
Author: Tumadir
Date: 12-25-2007, 06:47 AM
Parent: #1
ياخوانا المنبر ده فيه جائزة احسن عنوان لهذا العام؟؟
خروف الكريسناس ...ألف مبروك يا عصام على هذا الاختراق اللذيذ ..
ذكرتنى السنة الفاتت راس السنة والضحية جو سوا
قمنا انا وخالدة نخيط فى الكلام ياهو زى حالتك دى ...
لغاية ما وصلنا لى نتايج "مبالغ فيها" ..............مش مريحة حكاية الزول يقول ليك "مبالغ فيها" دى اختصارا للعنايل والفعايل بمجملها؟
ميرى ضحية
|
Post: #41
Title: Re: خروف الكريسماس
Author: الجندرية
Date: 12-25-2007, 10:43 AM
Parent: #1
"عين الغريب تخشي تمعنها في الجمال"
القال كدا دا ما اظنيتو وقعت عينو على سفوح صنعاء
لم يهون غربتي علي شئ اكثر من استغرقي في الاستمتاع بجمال المكان
وبعدين تعال هنا وهو نحن هناك يعني مااغراب ؟
رحم الله النعمان وفضحه للغربتين في نصه البديع ذاك
والله يا عصام شكلك كدا لازمك شرومط سنيكت الاسد بتاع تمبس دا
قال هكر قال
يعلم الله دعيتونا ساكت وقلتو ربنا اشغلهم بانفسهم
الله غالب
كل سنة وكرسمسك وضحيتك وراس سنتك مباركات
والحبان الهنا كلهم / ن
|
Post: #42
Title: Re: خروف الكريسماس
Author: Hussein Mallasi
Date: 12-25-2007, 10:51 AM
Parent: #41
ياخي خروف كريسمساك ما كان تضبحو من زمان .. مرحب يا جندرية.
_____
أشرقت الأنوار و نحوها
|
Post: #50
Title: Re: خروف الكريسماس
Author: الجندرية
Date: 12-26-2007, 09:06 AM
Parent: #42
ترحب بيك السعادة والايام الطيبة يا حسين
وبرضو ما يفقدوك بشينة ونحوها.
على فكرة شفت بوستك الفقدت فيه بوستي بتاع التشطيبات ما قبل الارشفة ، تصدق شفتو قبل ايام بس؟
ايام لكن .
بالجد شكراً يا حسين على التفقد والسؤال.
|
Post: #43
Title: Re: خروف الكريسماس
Author: دينا خالد
Date: 12-25-2007, 03:44 PM
Parent: #1
عصام جبرالله ،، اقرا هذا الاسم من زمان وقايلاك بتاع
معافره بس !!!!!!
Quote:
الذاكرة يحملها معه الغريب شاء ام ابا ,هي بصمة روحه الابدية
الذاكرة حمالة اوجه
وجه اللعنة
هي لعنة غربته الابدية, تملاه بالاسي و المرارة , تجبره ان لا يري الاشياء كما تكون, بل مثلما تريد هي, المواقف تبدو و كانما حدثت مرات و مرات
لا شئ جديد... لا شئ, تاريخ توقف يوم الرحيل و حياة لا تحيا
وجه اللعنة يقفز في وجهك في لحظات الضعف الانسانى , يسل لسانه و يبدا في الضحك عليك , يعلم انك هش الدواخل, يعلم انك قابل للانكسار في اية لحظة
يعلم انك ينهشك الحنين/الوهم لاشياء ما عادت موجودة ..لوجوه غادرت او تغيرت ... لبيوت فارقت اراضيها ... لاشجار شاخت و لحب لن يعود
اواصل |
اوووووووووووووووه طلعت بتعرف تنجر ذى بتاع ناس عماد دا كمان ؟؟؟؟؟؟؟؟؟
وتتوالى عليك الردود من شاكلة ياصاحبى ويا صاح
والله نفسى افهم انتو بتقولو فى شنو ؟؟؟؟؟؟
مرة انا وابوى كنا بنتفرج فى التلفزيون ليلى المغربى بتسال
فى حسين خوجلى :: رائحة اللافندر تمطق البلور وعصف الوهد الانطباعات والتلقلق (دى اظنها من الق)
قلت لى دى بتقول فى كلام عجيب !!!!!!!!!!
قال لا ماهى العجيبة ،، الاعجب منها دا بجاوب !!!!!!!!
ياعصام ياخ هابى خروف
|
Post: #44
Title: Re: خروف الكريسماس
Author: Hussein Mallasi
Date: 12-25-2007, 03:51 PM
Parent: #43
في الحالات المماثلة تكون المقدمة النموذجية للإجابة كالتالي:
- كان فهمت سؤالك صاح ..... الخ!
و سوف لن يجرؤ المقدم – أو الكاتب – على التصحيح؛
لان الإجابة بعد التصحيح ستكون:
- كان فهمت تصحيحك للسؤال صاح ... الخ!!
|
Post: #45
Title: Re: خروف الكريسماس
Author: Emad Abdulla
Date: 12-25-2007, 06:38 PM
Parent: #44
| Quote: ينهشك الحنين/الوهم |
و لات ثمّ مفر ..
تتخمخم و ترجع في موسم حجك لكل الحنيت ليهو .. تلقاهو ما في , و ( لا كعبة للطواف ) .
تقوم تتنهش تاني بحنين جديد لأوجه و أصوات و أمكنة و أزمنة خليتا وراك .. و يتلايق عليك و تفضل مدّور جواك و طايف , و إنت أصلاً ما عندك جوه غير الضعف/الوهم داك ..
كله وهم .. في وهم .
عبثية يا صاح ( و صاح هذه كيّة لدينا خالد ) ..
الدوائر الكريتية يا عصام ..
كريتي يقول بأن أهل كريت كاذبون , إذن فهو كاذب , أذن فأهل كريت صادقون , إذن فهو صادق , إذن فأهل كريت كاذبون , إذن فهو كاذب .. و و و و و ..
آخر ما آخر يا أخينا تقوم تنطم و تتقوت بحبة صبر , و تمسك في شلاتيت ما ليها دعوة بالأمكنة و الشخوص و الروائح ..
إنعتاق من قيود الزمان و المكان و الشخوص , و حمولاتها من لغاويس الحنين و الشوق و الأشجان .. و الوهم .
مرقة فيها من إتساع الشوف ما فيها ..
و عودة للمنابع الأولى : إنسان و بس .. بمعناها المطلق الكبير .
قالت قريبتك الشايقية :
عاد يا بنات أمي الحيكومي دي شديدي شدي .
.....
هذا , و أجدع تلفونك هنا يا برعي ..
السر الملك و منعم الجزولي حاقصين ليك .. أنا هيّن .
## دينا .. ( وش صارّي و محمّر ) .
|
Post: #46
Title: Re: خروف الكريسماس
Author: Hussein Mallasi
Date: 12-25-2007, 07:12 PM
Parent: #45
سؤال كدا يا عماد .. اسه في ذمتك .. طلال عفيفي شاف ليك
كاريكاتير غير داك البهدلت فيهو ناس نجاة محمد علي!!
|
Post: #48
Title: Re: خروف الكريسماس
Author: طلال عفيفي
Date: 12-26-2007, 03:24 AM
Parent: #46
Quote: سؤال كدا يا عماد .. اسه في ذمتك .. طلال عفيفي شاف ليك
كاريكاتير غير داك البهدلت فيهو ناس نجاة محمد علي!! |
أوف كورس يا حسين شفت لعماد شغل كتير ؛
ومن ضمنه الشغل الذي وصفت فيه - أنت شخصياً- أخينا عماد،
قائلاً :
| Quote: ياخي انت راجل فنان جداً. |
______________
على إعتبار إنو السؤال
مفروض يتوجه لشخصي
النحيل .
|
Post: #47
Title: Re: خروف الكريسماس
Author: دينا خالد
Date: 12-25-2007, 07:30 PM
Parent: #1
عمدة !!!
Quote: ## دينا .. ( وش صارّي و محمّر ) .
|
برضو حلو !!
|
Post: #49
Title: Re: خروف الكريسماس
Author: Tagelsir Elmelik
Date: 12-26-2007, 04:50 AM
Parent: #47
| Quote: السر الملك و منعم الجزولي حاقصين ليك .. أنا هيّن . |
كدى لغاية ما نحاسب الفنانين.
|
Post: #52
Title: Re: خروف الكريسماس
Author: Emad Abdulla
Date: 01-02-2008, 03:17 PM
Parent: #49
ياخينا ..
في كلام هنا لسه ما تميتو لينا ..
راس السنة و خلاص ..
النايم ليها شنو ؟؟
تعال مارق ..
راجينك .
و بعدين لو ختيت تلفونك أو إيميلك ..!!
الله قال حرام ؟؟؟
|
Post: #53
Title: Re: خروف الكريسماس
Author: Adil Al Badawi
Date: 01-05-2008, 10:27 AM
Parent: #52
سلامات يا عِصَم وكل عام وأنتم بخير
زمان (زمن الدنيا بخيرها وشرّها) دخل خِدِر ود عبد العزيز الاندايةَ الضحى الأعلى والقى بتحية تضمّنت طلباً مغلّفاً بزهوِ من جلب للانداية شيئاً مختلفاً عن المعتاد من الجلافيط. كان طلبه أن إليّ بسكين وقد جاءه الرد، إثر نظرة خاطفة إلى عين الخُرُج المتورِّمة، بأحسن من تحيّته: زغرودة مجلجلة...لكنّ الجلجلة أطفأتها زلزلة تمثّلت في خيبة أمل المنتدين والمنتدِيات بتلك الانداية حين تكشّفت إحدى عيني خُرُج خِدِر عن بطيخة، عَقَاب سوق، خضراء يعتم لونها نظر الناظرين المتلهّفين لعتودٍ أو عتوت...
...وتلك خيبة أملٍ لا تضاهيها إلا خيبة أمل المنتدين والمنتدِيات بمنتدى سودانيزأونلاين وخروف الكريسماس يخرج من خُرُج الجبرلابي الذي أحببت ولا يعدو (أبداً) كونه جزء (جُزّ) من شجرة! أفّو...أفّو!
هذا، وثمة سؤال: ألا تألم الأشجار (وأنتم تجزّونها جنس الجز دا) كما تألمون (غرباء مهاجرين وغير ذلك) وكما تألم الخراف بمختلف ألوانها من بيضٍ مبرقعة وحمرٍ كموشية وغرابيب سود؟!
نقول شنو غير: "إنّما يخشى الَله من عباده العلماء"...والعلماء إذ يحلّون حلاله ويحرّمون حرامه يعلمون أنّه يُسنُّ للضبّاح أن يسِن سكينه لكي لا تألم ذبيحته كما يألم دعاة الرفق بها من ذلك ومن غيره مما يوصم بأنّه سوء ترتيبٍ للأولويّات إذ ربّما من المعلوم بالضرورة أنّ أولويّات المرء تتبعثر بقدر ما تتبعثر مشاعره حيال ما هم حوله من الناس والدواب والأنعام مما هو مختلف ألوانه كذلك.
|
|