Post: #1
Title: سلاما من بلاد عوليس ... شــــعر
Author: Mannan
Date: 08-03-2006, 09:53 AM
سلاما من بلاد عوليس
|||||||||||||||||
بعيدة بعد بلاد عوليس
بعدا حت كبد العيس
لى زول من بلاد رمسيس
شارد من ظلام حنديس
درب تواه وقاسي غميس
وكتمة شديدة دون تنفيس
شايل شوق كتير وحبيس
ما لقيت في المفازة أنيس
غير شعري وغنايا جليس
وطن بالحيل عزيز ونفيس
ليهو العزة والتقديس
نموت فى هواه نحن فطيس
وطنا فى قلوبنا عريس
اخترنالو نحن لميس
فراشة صبية ديمة تميس
زى النسمة ليها هسيس
ودرنا الشوفة بي تحنيس
وكان أقرب عشم ابليس
||||||||||||||||||||
جرينا كتير ورا الايام
عسانا نحقق الاحلام
وضقنا الغربة كم من عام
وباكر قلنا يبقى تمام
ونحن نطير عليك طيران
ونزحف نحن لى قدام
للخرطوم وام درمان
ولى سودان جديد وامان
ونكسر حاجز الإرهاب
ونرفع للنصر أعلام
وتبقى الغربة أى كلام
وتبقى الأعلى
تبقى القبلة
وانت الأغلى
واحلى وأحلى
ضحكة طفلة
طلة فلة
يا سودان
نهديك من عمرنا زمان
ومن نيلنا العظيم شلال
خريرو يداعب الشطآن
ليك من النخيل شبال
ومن برق الشرق تيجان
واحلى غنانا فى موال
من نوباتيا لى ملكال
والابنوس عصا وشوتال
من اونور الى ملوال
وليك جرجار وعمة وشال
هدية لمجدى والأجيال
ومن صحرانا للأدغال
نمة جميلة للأطفال
||||||||||||||||
نحن أفارقة فينا عروبة
وعجنة من العجم والنوبة
فينا من الصحارى صعوبة
ومن غاباتنا نيل وعذوبة
بكرة بلادنا تلقى دروبا
ويبقى شمالا زيى جنوبا
تنسى أساها تنسى حروبا
ونبنى الوحدة طوبة وطوبة
||||||||||||||||||||||
خيرنا كتير ونحن كتار
والجايات كتار وكبار
شباب اكتوبر المغوار
ابريل ليك اكليل غار
كراما في الحمى والدار
اسودا لا تهاب النار
||||||||||||||||||
اكتوبر نديد ابريل
ميراث ثورة جيل عن جيل
مسجل في الأزل تسجيل
انك في عروقنا تسيل
تنساب يا حلو بالحيل
يا بلد النخيل والنيل
مهما قعدنا نحسب فيك
كل ما فيك جميل وأصيل
|||||||||||||||||||
تقيف عملاق في وجه الموت
الي أن يرحل الطاغوت
ونلعن خاش أبو الجبروت
أبو الكهنوت..
أبو الرهبوت
لن يرهبنا دكتاتور
ولن يحكمنا زول هلفوت
وحكم قرقوش مصيرو يفوت
|||||||||||||||||||||
يا وطنا تعالى تعال
نشيلك فى العلالى مثال
امة عتيدة.. امة عتية
امة تليدة.. امة فتية
نختك فى سمانا هلال
وفى الأفلاك مع المريخ
امةعريقة في التاريخ
امة عظيمة ما بتشيخ
|||||||||||||||||||
نورالدين منان ـ الولايات المتحدة فى 20 اكتوبر 1996
|
|