أبيت الكلام الفاضى

القدال منعوه من القاء شعره فى دبى. وهاهى قصيدته الشهيرة( ابيت الكلام المغتغت وفاضى وخمج) ترد على الذين يكرهون الشعر، ويحبون المال حبآ جمّآ
ــــــــــــــــــــــــــــــــــــ

رجعلك القدال

رجعلك قليبى المهضلم.. يراحع صنوف الغناوى العصيبة

يراجع معاك الكلام القبيل إستباك

الكلام المبهرج وفاضى الكلام المزين

ولافيه غير إحتلام وإنفصام

تموت الحروف يوم تقوم القصايد مقام الطبول و البخور

بشوفك جرايد شواكر حوامد ولا هامى فيها

عليها المصائب تمام التمام

مغائص بتفرم حشاها .. وقبائن بتنفخ بطون البسفوا التراب

وحايح لهيب البتلفح تلهلب و تشوى الجلود

أتف القصائد إذا ما القصائد بتنزل مريده وتسبح بحمد الذى

أيتلاك وهدانى الودار

بشوفك جرايد شواكر حوامد

طريتك و أنا الكنت قايل خيالك معشعش جواى سكنتك وما لاقى فجة

أخيرلك أقول البحرق حشايه

أخيرلك أفضفض جراب الخبايه

أقول الكلام البفكفك سوارك . ويوقف جدارك ويرفع عضاية

تضيع الرموز التغطى الكلام

أقول السكاكر أبتن ورمتنى .. وكفانا

أقول العساكر تبارى الكبارى وتفتش قلوب الجهال الشلوخهم هوية

وأغنى الزيوت والكنانة ..و كضب

أقول البنات الفتحن صدورهن وتقادلن رشاشك

ويخلن حبيبهن ..كضب

أخيرلك أقول البحرق حشايه

أخيرلك أفضفض جراب الخبايه

مراحك يعشى وغشى خضارك مرطب ويندى الضهارى

جرابك مقوسب يقوم دخن لو زرعتوا الحجارة

بلادك ولادك كروها السحالى .. تسفر سعيتك تقنب تبارى

الجداد العقالى

تجوع يا البشدر خريفك سوافى البطانة

يمطر رزازك عزازك حصاية

قموحك سنابل مشاط كردفانى

أبيت الكلام المغتغت وفاضى .. وخمج

ولادك قصاد الشعاع التحية .. يضوا الشقوق التلم الدوابى

ويوروا الدروب للقلوبهم عماية

بتهدر حرايق وتحمى البياكلوا المطايب وتسجن بطون الجياع العرايا

وشوشهم سمر حر أباطك صفوفهم مراحك وحلمك حلمهم رغيفة وكرامة وشلامة

مصانع بتحرق قبل تبدا فيها

ومزارع بتيبس ونيلك ممدد جنازة

عقيدك وسيدك بيكتب ويمحى وتبقى المحاية

أبيت الكلام المغتغت وفاضى

أبيت الكلام المغتغت وفاضى .. وخمج

حليوة فى ليلة المولد محمد طه القدال

"شليل"

بقول غنوات .. بقول غنوات

فى البلد البسير جنياتها لقدام .. بقول غنوات .. بقول غنوات

وفى البلد البفر ضرعاتو وفى العرضة ويطير فى الدارة صقرية ..

بقول غنوات .. بقول غنوات

ولو السمحة تلت إيد و مدت جيد و زول شايلاه هاشمية

بقول غنوات .. بقول غنوات

يشيل شبال و ختة ريد .. وفرة عيد .. و غيمة روح .. وظلمة عين و عيدية

بقول غنوات .. بقول غنوات

وفى الولد البشيل مدقاق و قولة خير على القمرة

يقابل الجاية متحزم ويقابل الجاية متلوم

كلام فاسك على أرضك يبقى عديلة يا بيضاء ويبقى

زفاف وغنت ليه قمرية

بقول غنوات .. بقول غنوات

و قبال حول تغيم غيمة قبلية ترش الدارة و الحدبة الصعيد الحلة

يا مرحب حباب الصفقة فى النسمة الصعيدية

يا هجرت نهار الليل بدرية فحيح جنياتنا فى

الحدبة الصعيد الحلة

يا قمحاتنا هو لبلب

يا فمراتنا هو لبلب

و يا للوز الفتق فى الوادى هو لبلب

ويا سمحاتنا يا قمحاتنا هو لبلب .. ويا البحر الطمح مدادى هو لبلب

ويا حجواتنا يا دعواتنا هو لبلب

سألتك بالذى ركز الأرضمعبد وسوى الناس عليها مقام

سألتك بى حجى الأمات ودعواتنا

سألتك بى قميراتن و دمعاتنا

شليل وين راح ..

يكون ضله الخريف فاتنا

وشليل وين فات يكون ضله الخريف فاتنا

وزى برق السمات الجاية دغشية

وزى زغرودة للبطن الكبارية

مدق من شامة القمرة

بريتك بوداعة الله ومقدم بالعديل يبراك

أبشروا تعالوا ياجنيات

شليل ما راح .. شليل ما فات

شليلي عند المسور حرق بقالو حصاد

شليل فوق التقانت قام خضار و بلاد

شليل مشوار.. شليل مسدار

شليلنا أرضنا يا جنيات

شليل ما راح .. شليل ما فات

حرازنا شليل .. شليلنا دليب

شليلنا دليل على البلدات بعد درب التبلدية

شليل ما راح .. شليل نا فات

شليل قايم نصاص الليل يتمتم ليلة وردية

مزارع بات على عشقين تراب بلدو

وسماح فوق بت مزارعية

بسم الله الرحمن الرحيم

بين الخليفة وأمونة بت حاج احمد



محمد طه القدال


ما ضهبت اقول لقيتك
وانتى فى كل الخواتم والمياتم
والنجيمات والعواتم
ما حزنت اقول بكيتك
ونحن فى حزن المخاليق
والمغنين المطاليق
الفرح جاييك وعد
غنوة اولاد التحاريك
السعد ولا البعد
البعد ولا السعد
وكنتى فى ليل الخوابى
تهاتى بينات الطوابى
تحاكى جقليب السعى
الجناييت خلو حجرك ريح يفوفى
وعين مزرزرة من شقى الفرح المرابى
ومنية الوعد الدعى
يا ديارى الوين ....أنى
تور عفين الشين .....أنى
ما اضينة وزين انى
تور عفين الشين انى
وانت فى شوفك تخاتل رفة الطير والحفيف
وانت فى خوفك تكاتل عينة الجلبت خريف
وانت فى اللالوبة مصلبة البنيات
النسيمات الهفيف
وانت فى اللالوبة مشنقة الوليدات
ناس نجومى ومحبس النفس الرهيف
بطنك كرشت غى البنات نافى
دقنك حمست جلدك خرش مافى
وكت الوهم نافيت .. صدق الوعد جافى
وكت العلم جافيت .. مر الصدق وافى
وكنا بنشيل الغباين والاناشيد
جهدية الاورطية
جهدية الحلبونا
شدو جمالم جونا
حلبنا ليهم سمسم
والسمسم ما كفاهم
جلبنالهم سعية
وجينا للبقعة ام قبايل
سيل من الوادى الكبير
الكفيف شايل الكسيح
يا عيون ود الضكير
واحدة من توشكى
تقلع
تانى تقلع فى المطامير
يا جبة الدرويش
البابا بسل العيش الله بسلا
والبابا خدمة الديش الله بسلا
البابا القول بى شويش
يا عيون ود الضكير
عماك فى حقك ديه
لى زمنا مو جهدية
جهدية الاورطية
جهدية الحلبونا
شدو جمالم جونا
وحلبنا ليهم سمسم
والسمسم ما كفاهم
جلبنالهم سعية
يا عيونى شن بتشوفى
ويا امونة شن بتشوقى
شدرا تال اليمامة
ولا الصقر الحمامة
ولا البطن التفوفى
يا امونة شن بتشوفى
ويا عيونى شن بتشوفى
جهدية وسيف وراية
تبروقة وخيل وشاية
اذان بالجوع اذن لى
ام خوفك فايت خوفى
يا امونة شن بتشوفى
ويا عيونى شن بتشوفى
تلت التلاتة شلق
تانى التلات محلق
والتالت جا يبشرنى
سرقوهو الدايرين حتوفى
يا امونة شن بتشوفى
ويا عيونى شن بتشوفى
شايفة الدموم واللمة
بين الدقون والعمة
ولانى فوق معلق
صقر الحدى مندوفى
يا عيونى شن بتشوفى
ويا امونة شن بتشوفى

عادل عثمان
عليك الله واصل ، كيتا فيهم ، وفي غباهم ،، وليظلوا هكذا دافنين رؤوسهم في الرمال ، والعالم يتجاوزهم ،،
لهم الموت ،،، والحياة للقدال وللذين أمّوا النادي السوداني بدبي للاستماع له ، ، والحياة لهذا الشعر الذي ينبض بالحياة ،،

العزيز
عادل عثمان
لك الود والشكر وانتحفنا بالقدال ..هو كالهواء لا يستطيع احد منع الحرف من الولوج الي اعماقنا
فواصل ايها الجميل

عبد الله جعفر

شكرآ ود قاسم وعبد الله جعفر على تجديد اعجابكما بالقدال، وموقفكما المبدئي من حرية التعبير التى لا معنى للابداع فى غيابها..

رفيق الدارس والمدارك

عادل محمد عثمان

التحايا نرفعها لك وانت تغمرنا بهذا الفيض المبارك

تحياتي يا غالي

تشكر يا زميل
نورة كيف يا ابو نورة؟

طيبة بتسلم عليك

يا عادل

خوش هنا وانا متاكد انك ستمتعنا

خاصة تراجم قصائد انكليزية الى العربية


من دفاتر عادل ود محمد عثمان