حوار لعيبة المريخ فى غرفة الملابس قبل بداية مباراة الواحدات بالاردن

لعيبة المريخ فى غرفة الملابس قبل بداية المبارة
o مازدا للعيبة :
الليلة يا معلمين لازم نطقطق الجماعة ديل عشان الشرتيت جمال الوالي قال راح يرقعنا تمام الليلة.
راح نلعب بخطة تكها والحقها.
o مجاهد : ياكوتش دي خطة جديدة ولا شنوا.

o قلق لمجاهد: يا درفة دي خطة كان بلعبوها ناس مازدا زمان.

o السعودي لمازدا: يا كوتش الخطة دي ما ادربنا عليها.

o مازدا يرد: انت شان فصاحتك دي انا ما قاعد بلعبك وكان عاوز تقع برا افتح خشمك ده تاني .


o ايداهور لمازدا: ولله الخطة دا بنلعبو بة طوالي فى نيجييييييييريا ووصلنا به كاس العالم كم مرة مع الكوتش شعيبو .

o اكرم : انا راح اقنمبر ليكم الكورة فى السماء لحدي ما تنزل اكون اخدت لي سفه.

o موسي الزومة لاكرم: يا وهم راح تتفها وين ما تفضحنا مع اولاد الحنانات ديل.
o
o العجب لمازدا : ولا يهمك يا مان خليهم على بس انت كلم الكونتي "جمال الوالي" بعد الكورة لازم الضحاكات ولا من ما راح سافر معاكم.
o بله جابر: ايوه حار حار لازم يا مان فى حفلات كتيرة فى راس السنة.

o اكرم لسفاري:الوهم شلبايا ده دردقه لي وانا بديهو ليك فى حنانو بطلع ....

o ابراهومة: ايوه ياشباب لازم عشان انا عندي شيكات مطلعها فى السوق وما عندي رصيد البنك.

o مازدا : دي خطتنا العاجبه عاجبه وما عاجبه يقلع الفلنه ويمشي الفندق .

o العجب برفع اصبعة فى وش مازدا: قصدك شنوا يا وهم!

o الدقير: يا عجب الراجل ما قاصد حاجة.

o مازدا: انا ماقاصدك انته انا بتكلم مع الوهم الباقين ديل.

o الدقير: يلا شباب خلونا نتفك من البرد ده.

فالح حبيبى ، المرة الجايه اكتب لينا نشيد

نشيد بروحك الرياضية

حوار لعيبة المريخ اثناء المباراة
o العجب :الوهم مازدا ده انسوا كلامة كان مشينا بكلامه راح نطقطق كان بفهم كورة من ما كان كان ختاني احتياطي فى البطول الافريقية فى غانا من ديك انا خاتيها ليهو.
o مجاهد : يا عجب احسن حاجة نلعب بخططة كروجر فى مبارة هلال كادقلي .
o العجب : ما متذكرة.
o سفاري: احسن حاجة كل واحد يلعب الحاجة بالعرفها لانو خلاص البرد دخل فى العضام.
o قلق: يلا يا فرد الحكم راح يصفر.
كل لاعب وقف فى مكانه :
o اكرم لدامر: يا مان انا لابس عشرين حاجة برضو بردان.
o سفاري : يا معلم انا اقول مالك ماشي زي ناس الفضاء.
o دامر: شكلوا يا درفة راح تملصه.
o اكرم : يا معلم اللبس ده راح يخليني اطير معاه فى اي حته.
o العجب من بعيد رافع يده : يا وهم انتو خلوا بالكم المان راح يصفر.
الحكم صفر :
من اول هجمة كرم ملصها واحد.
o سفاري: ما قلت ليك راح تملصها.
o بالله خلينا كده بريمة كان جابوه ما راح يقبضه.
o مازدا لابراهومة: انا ما قلت ليك حافظ احسن من الدب ده.
واحد ياساعدني شوية

ده حال كورتنا
o رئيس الاتحاد راجل بتاع فلسفة عندو نظريه عاوز يطبقها فى الكورة السودانية منذ 30 سنة وهو بجرب .
o اصبح لا يوجد نشاط رياضي فى روابط الاحياء نتيجة لنظرية الفيلسوف .
o اللاعب مفلس لا مهارة ، لا شطارة ، الطامة الكبري ولا اخلاق اكثر الاعبين الذين يحصلون على بطاقات ملونه فى العالم.
o المدرب شخصيتو ضعيفة مع اللعبين لا يفهم فى الكورة شئ.
o الحكام شخصيتهم حدث ولاحرج لا يستطيع تطبيق القانون علي لعيبة الهلال والمريخ ، لذلك حتي مستوي التحكيم ضعيف.
o مباريات هلال مريخ مصارعة تيران مما تسبب اصبة كثير من اللاعبين ونهاية المواهب قبل موعدها مثال على ذلك اللاعب كندورة .

o الصحافة حدث ولا حرج كذب ومديح فى واقع كروي غير حقيقي.

لا مستقبل لنا مع الـــــكــــــــــــــــــــــــــــــــــورة

Quote: الصحافة حدث ولا حرج كذب ومديح فى واقع كروي غير حقيقي. لا مستقبل لنا مع الـــــكــــــــــــــــــــــــــــــــــورة

اذا كان ما كتبت عن الهلال او الفريق القومي
انا معاك يا فالح
--------------------------------
ابوخليل

اهم الشروط المطلوبة عشان تكون مشجع مريخابي :
1. تكون كويس في الرياضيات . او تكون خاتي جنبك الة حاسبة .
2. يكون دمك صلصة . تقيلللللللللللللللللللل وبارد وبتتحمل . ممكن برضو تبلع ليك كم حبة مهدئة قبل الكورة .
3. ما تحضر اول عشرة دقايق من الكورة ويستحسن برضو ما تحضر اخر عشرة دقايق . علشان ما توجعك بطنك .
4. ما تحضر الكورة مع مشجعي الفريق الخصم . علشان ما تتبهدل وتتغم . يفضل تحضرة براك . قافل الباب وطافي النور وتحت البطانية ان امكن علشان تنوم احسن ليك .

5. ما تكون من النوع المتفائل . تكون متشائم طوالي
6. تكون شاغل نفسك بي تسالي ولا ترمس علشان الافلاسات اثناء الكورة
7. يكون معاك كتاب نفسيات . افتح صفحة الغلب . الفصل السابع . الصفحة السابعة برضو . الموضوع : سبعة طرق لعلاج اكتئاب المغلوبين بي بسبعة .

8. تحزير : يجب على كل من يشاهد مباريات فريق المريخ ان لا تذيد اعمارهم من الخمسين ( صحتكم تهمنا ) المريخ السوداني سبب رئيسي لامراض القلب والضغط والزهج والقرف الشديد .

تحياتي واحترامي للجميع
بهذه المشاركة لم اقصد شئ سواء توضيح حقيقة ان مستوي فهم اللاعب السوداني اواسلوبه لا يرقي لمستوي الذي يوهله لحمل شعار السودان .
انا حضرت واقعة حقيقية تعكس مدي مستوي وركاكة اسلوب اللعيبة السودانية حصل هذا فى ديسمبر2007 فى مطار الخرطوم كنت قادم الي الدوحة وصادف فى ذلك الوقت سفر بعثة الفريق القومي الي الامارات علاما اذكر لاقامة معسكر هنالك ،استعداداً لنهائيات بطولة الامم الافريقية بغانا ، كنت اتوقع ان يحضر جميع افراد البعثة ببص واحد حسب ما هو متعارف عالميا ، لكن المفاجات كانت حضور كل لاعب بعربته الخاصة او مع صديقه ، وصل جميع اللعيبة فى وقت واحد تقريباً فيما عدا اللاعب واحد هو (....) حضر متاخراً وكان يبدل ملابسه داخل سيارة كامري 2005 جاء احد الاشخاص واخبره بان السيد مجدي شمس الدين يطلب منه ان يسرع قليلاً فما كان من (....) الا ان تلفظ وقال لذلك الشخص قول ليه " ك.... ما جاي ".
ماذا نتوقع من فريق قومي يتم تجميعه بهذه بطريقه العشوائية وهذا مستوي الفاظ نجومة.
مع خالص ودي
معاذ

Quote: وصل جميع اللعيبة فى وقت واحد تقريباً فيما عدا اللاعب واحد هو (....) حضر متاخراً

اذا كان ماتروية يا جحا صحيح فلم لم تذكر اسم اللاعب
علم بان هذا المنبر عام ونحترم فية كل وجهات النظر
----------------------------

ابوخليل

اول حرف من اسمة
عـــــــــــــــــــــــــــــــــــــــلاء الدين

يا كافى البلا ، عربى مافى

تحزير : تحذير

تذيد : تزيد

----------

كمل كمل فالح حبيبى انا ( حاسى نفسى بصحح كراس املاء)

معاذ السر
اقبلني صديغاوقادي عربي برضو
تحياتي ,,يا زول كلامك سمح تب واصل..

,,,,,,,,,,,,,,,
يا ود الامين خلو روحكم رياضية

ابيت يا معاذ و بعدين ممنوع الكلام فى الحصه

امشى اقيف فى الركن و وشك للحيطه و ارفع يدك فوق

7UP