عن البـوســتات المـأزومـة... ومـحـن أخـرى..

Post: #1
Title: عن البـوســتات المـأزومـة... ومـحـن أخـرى..
Author: نجوان
Date: 12-18-2008, 09:43 AM
Parent: #0

يفتح زيد من الناس.. بوست عن ندوة بالمكان الفلاني..
فيتداخل الأعضاء ما بين مهنّي.. معلّق حضر الندوة.. وأحد يستفسر عن ميعاد ندوة قادمة..
وآخر يحكي عن مؤهلات المتحدث بالندوة..
ولحدي هنا مية مية..
ثم يسأل عبيد أحدهم.. "ياخي ما شفناك في حنّة فلان؟"
أحدهم:"والله ده كان يوم دفن نسيب فلتكان..رجعنا من الدفن متأخرين"
عبيد "لا ما معقول؟!!.. لا حول ولا قوة إلا بالله!"
ثم يستمر الحوار.. (الذي بالتأكيد في طريقه للأزمة).. عن مآثر المرحوم..
وعلاقة أحدهم الوثيقة بأبنائه.. وينقلب البوست الى بيت فراش..
وينتهي الفيلم بزيد يرفع الفاتحة على بوسته الأصلي..

ثم تفتح فلانة بوست عن هموم المهاجرين..
فيتداخل المتداخلون ونقرأ بإهتمام عن المهاجر الكثيرة..أساليب معيشتها وهمومها..
الى أن يأتي فلان.. ويقول "والله أمريكا دي.. لولا الباسكيتبول كنت خليتها زماااان"..
ولحدي هنا البوست صحيح ومعافى.. يبدو أن فلان يجد في كرة السلة بعض السلوى في غربته..
فينبري فلتكان قائلا "بس أوعى تكون بتشجّع الليكرز؟؟؟"
فلان "ليكرز شنو ياخ! الكافاليرز ديل ما بفوّت ليهم قيم واحد"
فتتداخل علانة قائلة "غايتو أنا من فضيحة كوبي برايان ديك.. بطني طمّت عديل كده من الباسكيتبول"..
يرجع فلان بصور عن الكافاليرز.. يأتي محبو هذه الرياضة من كل صوب..
وآخر بفيديو من نهائي الدوري الماضي..
وصور عن بيت لابرون جيمس
وتذهب مع الريح همومناالمهجرية..

يفتح أحدهم بوست يسأل فيه عن صديق قديم وعزيز.. فرقّت بينهم الأيام..
فيتداخل متداخل.. "بعرف فلان.. راجع ايميلك.."
ويأتي فلتكان قائلا.."بعرفه والله.. قضينا أيام جميلة في بلد الصقيع..
وكان من أعز الناس.. لكن عملوا ليهو ديبورتيشن.. وتاني خبره إنقطع عني"..
ويأتي آخر "يا حليل فلان والله كان نعم الأخ والصديق.. هو الديبورتيشن كان قبل الطلاق ولا بعده..؟"..
فيجيب فلتكان "لا الديبورتيشن كان بعد الطلاق.. وقبل الذبحة"..
آخر "ذبحة؟.. لا حول ولا قوة إلا بالله.."..
يهرع صاحب البوست لبكري ليسحب البوست... سريع..

يفتح زيد بوست عن الفساد السياسي في أمريكا..
حاكم إلينوي ومحاولته لبيع مقعد أوباما في مجلس الشيوخ..
وفي المداخلة السابعة.. يأتي أحدهم ويكتب عن إلينوي .. شيكاغو ..آل كابون والمافيا..
"أصلو شيكاغو بلد المجرمين والعصابات من يومها.. حضرت سكارفيس؟؟"..
ومتداخل آخر"الأب الروحي.. هوليوود ما ح تكرّر شئ زيه.."
وندخل لهوليوود من أوسع الأبواب..
وصور لمارلون براندو .. أل باشينو ..كيفن كوسنر..
وحتى عادل إمام وجد طريقه للبوست..

وبوست لعضو آخر يتحدّث فيه عن العالم أبن الهيثم وإرسائه لدعائم علم العدسات..
يسافر بنا بين العراق ومصر وسيرة هذا العالم الجليل..
الى أن يقول قائل "ياخ مالك مذكّرنا هيثم مصطفى وعمايله؟"..
فيرد متداخل.. "والله يا هو الفضل ..الجمل ما بشوف عوجة رقبته يا مريخاب.."..
وفي لمح البصر.. تعصف كتاحات هلال مريخ بكيان البوست..
خلال ساعات يصل البوست الصفحة الخامسة عشر.. 3 مداخلات منها عن ابن الهيثم..
والباقي عارفنو..

________
ومعذرة لود جبرالله
إستلهمنا العنوان..من بوستك والذي هو أيضا مأزوم..

Post: #2
Title: Re: عن البـوســتات المـأزومـة... ومـحـن أخـرى..
Author: ABUHUSSEIN
Date: 12-18-2008, 09:50 AM

نجوان تحية طيبة

كلامك حـلـو شديد

Quote: وينقلب البوست الى بيت فراش..
وينتهي الفيلم بزيد يرفع الفاتحة على بوسته الأصلي..

المصيبة الكبرى إنو كتيرين بكونوا قاصدين إودوا البوست التوج

كل سنة و إنتي طيبة

أظن حافظت على المسار الصحيح للبوست

Post: #3
Title: Re: عن البـوســتات المـأزومـة... ومـحـن أخـرى..
Author: حمور زيادة
Date: 12-18-2008, 09:57 AM
Parent: #2

وين يا ابو الحسين
شايفك عاصر الزول داك شديد بغادي
براحه ياخ ربنا يهدينا كلنا

Post: #4
Title: Re: عن البـوســتات المـأزومـة... ومـحـن أخـرى..
Author: محمد البشرى الخضر
Date: 12-18-2008, 10:04 AM
Parent: #3

حمور ياخي ما رسلت ليك طلب إضافة للفيس بوك مالك عامل رايح منو؟

على سبيل المثال يا نجوان

Post: #16
Title: Re: عن البـوســتات المـأزومـة... ومـحـن أخـرى..
Author: نجوان
Date: 12-18-2008, 10:46 AM
Parent: #4

Quote: حمور ياخي ما رسلت ليك طلب إضافة للفيس بوك مالك عامل رايح منو؟

ما قصرّت يا ود البشرى

Post: #6
Title: Re: عن البـوســتات المـأزومـة... ومـحـن أخـرى..
Author: ABUHUSSEIN
Date: 12-18-2008, 10:07 AM
Parent: #3

Quote: وين يا ابو الحسين
شايفك عاصر الزول داك شديد بغادي
براحه ياخ ربنا يهدينا كلنا

الأخ حمور سلام

البوست الغرض منو معروف يا خوي علشان كدا ما محتاج لي عصر.

نجوان بيان بالعمل و مثال وااااااااضح
أهو بنساعد فيك و بس

Post: #14
Title: Re: عن البـوســتات المـأزومـة... ومـحـن أخـرى..
Author: نجوان
Date: 12-18-2008, 10:39 AM
Parent: #3

Quote: وين يا ابو الحسين
شايفك عاصر الزول داك شديد بغادي
براحه ياخ ربنا يهدينا كلنا

شكرا على إيراد مثال حي يا حمور..

Post: #17
Title: Re: عن البـوســتات المـأزومـة... ومـحـن أخـرى..
Author: حمور زيادة
Date: 12-18-2008, 10:47 AM
Parent: #14

Quote: شكرا على إيراد مثال حي يا حمور..

هدفنا ارضاءكم

تعرفي انا بمحني شنو ؟
اقرا عنوان البوست القاو مثلا : فلان ارجو المساعدة
افتح البوست القى موضوع بسيط جدا
الزميل فلان ارجو انك ترسل لي تلفونك على الايميل الفي البروفاي للاهمية
امين ضالين انتهينا
لكن كل ما اخش المنبر القى البوست في الصفحه الاولى
مداخلات بتزيد
ارقام مشاهدة عالية
بقول ياخ انا ما مركز .. خليو
ما بخشو
بعد شويه القاو قلب الصفحة التانية
و التالتة
الخش اشوف ده شنو
القى البوست فيو تلاتة مباحث عن الانشطار النووي و العلاقات الاقتصادية الكورية البورندية و التاريخ الاشوري
و اربعة شكلات بين مجموعات من البشر ما عندهم علاقة بالبوست
و اغنيتين واحدة لحنان النيل و التانية اكتوبرية لوردي و احتمال مدحة كمان
راسي بيلف و استغفر ربي و امرق برااااحه
شخصيا اعتقد انو عنوان البوست مفروض كون ملزم و الكاتب يتمسك باتجاهو بقوة حتى لو وصلت درجة طرد المتداخلين
( عملتها قبل كده مع واحد قلت ليو البوست ما عن موضوع مداخلت فلو سمحت امرق .. و كتر خيرو مرق و الله )

Post: #19
Title: Re: عن البـوســتات المـأزومـة... ومـحـن أخـرى..
Author: نجوان
Date: 12-18-2008, 10:52 AM
Parent: #17

Quote: هدفنا ارضاءكم
الصحيح ارضاؤكم يا حمور..

________
كده بيشبه البوستات المأزومة الأصلية..

Post: #21
Title: Re: عن البـوســتات المـأزومـة... ومـحـن أخـرى..
Author: حمور زيادة
Date: 12-18-2008, 10:56 AM
Parent: #19

الوش البيضحك الخاتاو ده ما متسوك

ــــــ
اها اوريك الأزمات على اصولا

Post: #25
Title: Re: عن البـوســتات المـأزومـة... ومـحـن أخـرى..
Author: نجوان
Date: 12-18-2008, 11:54 AM
Parent: #21

Quote: الوش البيضحك الخاتاو ده ما متسوك
ده بيكون بعد زراعة السنون بستة أسابيع..

Post: #13
Title: Re: عن البـوســتات المـأزومـة... ومـحـن أخـرى..
Author: نجوان
Date: 12-18-2008, 10:36 AM
Parent: #2

Quote: المصيبة الكبرى إنو كتيرين بكونوا قاصدين إودوا البوست التوج
والتوج ذاتو قاعد على الهبشة
بجي جاري جري..

Post: #5
Title: Re: عن البـوســتات المـأزومـة... ومـحـن أخـرى..
Author: Rihab Khalifa
Date: 12-18-2008, 10:05 AM

Quote: "والله أمريكا دي.. لولا الباسكيتبول كنت خليتها زماااان"..

سودانيز دي زاااتها، لولا الباسكتبول، كنا خليناها زماااان

صباحك ورد يا نجوان

Post: #18
Title: Re: عن البـوســتات المـأزومـة... ومـحـن أخـرى..
Author: نجوان
Date: 12-18-2008, 10:49 AM
Parent: #5

Quote: سودانيز دي زاااتها، لولا الباسكتبول، كنا خليناها زماااان
واوعى تكوني بتشجّعي الليكرز يا رحاب؟!

Post: #7
Title: Re: عن البـوســتات المـأزومـة... ومـحـن أخـرى..
Author: Hussein Mallasi
Date: 12-18-2008, 10:09 AM

كلو مفهوم .. غير المفهوم إنو يكون البوست مشعلل و يجي رهط خفة الدم يتخفف.

Post: #8
Title: Re: عن البـوســتات المـأزومـة... ومـحـن أخـرى..
Author: Rihab Khalifa
Date: 12-18-2008, 10:12 AM
Parent: #7

لسه ما لحق يشعلل كان يا حسين

Post: #9
Title: Re: عن البـوســتات المـأزومـة... ومـحـن أخـرى..
Author: Hussein Mallasi
Date: 12-18-2008, 10:15 AM
Parent: #8

Quote: لسه ما لحق يشعلل كان يا حسين

اللهم إلا إن كانت الشعللة تعني سفك الدماء

Post: #12
Title: Re: عن البـوســتات المـأزومـة... ومـحـن أخـرى..
Author: Rihab Khalifa
Date: 12-18-2008, 10:28 AM
Parent: #9

Quote: اللهم إلا إن كانت الشعللة تعني سفك الدماء

بلقي طريقه و بجاوبك و بوصل كلامي الكنت دايره اقوله لعصام،
لكن هنا نجوان بتطردنا بعد ده

Post: #20
Title: Re: عن البـوســتات المـأزومـة... ومـحـن أخـرى..
Author: نجوان
Date: 12-18-2008, 10:55 AM
Parent: #12

Quote: بلقي طريقه و بجاوبك و بوصل كلامي الكنت دايره اقوله لعصام،
قولي أمي.. يعني بقت على البوست ده..

_______
معذرة.. بتصرّف من ماركة ود البشرى المسجلة..
شكرا أبوي..

Post: #15
Title: Re: عن البـوســتات المـأزومـة... ومـحـن أخـرى..
Author: نجوان
Date: 12-18-2008, 10:44 AM
Parent: #7

Quote: كلو مفهوم ..
متأكد؟؟

Post: #10
Title: Re: عن البـوســتات المـأزومـة... ومـحـن أخـرى..
Author: عاطف عمر
Date: 12-18-2008, 10:20 AM

سلامات نجوان

أزمات معاشة
إن صح قولنا فهى ( أزمات في الموضوع )
هناك أزمات أخرى هى ( أزمات في الشكل )
بوست ماشي في أمان الله
صاحبه/ته سايقو بحرفنة عشان يوصل الرسالة المن أجلها فتح البوست
والناس تقرأ وتتناقش وبرضو في أمان الله
يقوم يجي واحد/ة طاخ ينزل صورة قدر الضربة
أها الصورة تفتل البوست فتلة رجل واحد
فتلة يتوجب معها على من أراد متابعة البوست أن يحرك ماوسه وعينيه يميناً ويساراً كمن يتابع مباراة في البنق بونق
وفي ظل عدم وجود ماسنجر لتنبيه ذلك العضو الفاتل يزهج حتى صاحب البوست ويتعوض الله في تعبو ويترك البوست ( يحتل ) لأسفل سافلين .

أو ذلك العضو/ة المعجب بصورة بروفايله يقوم ينزل صورة تأخذ 90% من المساحة وماتبقى منها يادوب السطر يأخذ كلمتين . يبقى الزول ماعارف يقرأ السطر أبو كلمتين دا أم يتأمل في صورة صاحبنا المعجب بيها

ومتابعين

Post: #11
Title: Re: عن البـوســتات المـأزومـة... ومـحـن أخـرى..
Author: نجوان
Date: 12-18-2008, 10:24 AM
Parent: #10

Post: #22
Title: Re: عن البـوســتات المـأزومـة... ومـحـن أخـرى..
Author: khaleel
Date: 12-18-2008, 10:57 AM
Parent: #11

نجوان

كل سنة وانتي طيبة

Post: #24
Title: Re: عن البـوســتات المـأزومـة... ومـحـن أخـرى..
Author: نجوان
Date: 12-18-2008, 11:12 AM
Parent: #22

وانت طيب يا خليل
وحمدالله على السلامة..

Post: #23
Title: Re: عن البـوســتات المـأزومـة... ومـحـن أخـرى..
Author: نجوان
Date: 12-18-2008, 10:59 AM
Parent: #10

Quote: لتنبيه ذلك العضو الفاتل
أقترح تعديل الفاء الى قاف
حتى يستقيم المعنى..

______
شكرا يا عاطف على عرض نماذج بعض الأزمات والمحن
والتي تأتي أحيانا جماعات..

Post: #26
Title: Re: عن البـوســتات المـأزومـة... ومـحـن أخـرى..
Author: esam gabralla
Date: 12-18-2008, 12:05 PM

يا نجوان

سرقة في نصة نهار .... العنوان الواحد يتعب فيهو ويازمو عديل يجي "نوعكم" ده يسرقو عينك عينك - اواصل و لا خفتى???

انا Bulls من زمن جوردان وبيبي .... للان رغم انهم سجمانين مع ولدنا السودانى لوال وولدنا السويسري سوفولوشا ... عقبال روز يصلح الحال شوية

لقيتينى مثقف و لا لأ?

الضبانة جاك "يعفن" ليك بوستك المازوم ده
ملافظى شينة عارف

رحاب

الكوتيشن بتاعك يهمنى معرفة الراى الوراهو .... لو لقيتى فرقه من ال NBA

Post: #27
Title: Re: عن البـوســتات المـأزومـة... ومـحـن أخـرى..
Author: ajaj
Date: 12-18-2008, 12:15 PM
Parent: #26

Quote: سلامات نجوان

أزمات معاشة
إن صح قولنا فهى ( أزمات في الموضوع )
هناك أزمات أخرى هى ( أزمات في الشكل )
بوست ماشي في أمان الله
صاحبه/ته سايقو بحرفنة عشان يوصل الرسالة المن أجلها فتح البوست
والناس تقرأ وتتناقش وبرضو في أمان الله
يقوم يجي واحد/ة طاخ ينزل صورة قدر الضربة
أها الصورة تفتل البوست فتلة رجل واحد
فتلة يتوجب معها على من أراد متابعة البوست أن يحرك ماوسه وعينيه يميناً ويساراً كمن يتابع مباراة في البنق بونق
وفي ظل عدم وجود ماسنجر لتنبيه ذلك العضو الفاتل يزهج حتى صاحب البوست ويتعوض الله في تعبو ويترك البوست ( يحتل ) لأسفل سافلين .

أو ذلك العضو/ة المعجب بصورة بروفايله يقوم ينزل صورة تأخذ 90% من المساحة وماتبقى منها يادوب السطر يأخذ كلمتين . يبقى الزول ماعارف يقرأ السطر أبو كلمتين دا أم يتأمل في صورة صاحبنا المعجب بيها

ومتابعين

دعاية لبوستي
صور بروفايلكم الكبيرة....آآآآه

-------------------------------------------
ازيك يا نجوان وكل سنة وانتي وزوار بوستك بالف خير

Post: #29
Title: Re: عن البـوســتات المـأزومـة... ومـحـن أخـرى..
Author: نجوان
Date: 12-18-2008, 12:25 PM
Parent: #27

Quote: دعاية لبوستي
صور بروفايلكم الكبيرة....آآآآه
أزمات في أزمات..

______
شكرا عجاج وكل سنة وانتي طيبة..

Post: #28
Title: Re: عن البـوســتات المـأزومـة... ومـحـن أخـرى..
Author: نجوان
Date: 12-18-2008, 12:18 PM
Parent: #26

Quote: سرقة في نصة نهار .... العنوان الواحد يتعب فيهو ويازمو عديل
يجي "نوعكم" ده يسرقو عينك عينك - اواصل و لا خفتى???
معليش يا عصام..
لطش العناوين وحقوق الطبع ده نوع تاني من الأزمات جاينو ..

Post: #30
Title: Re: عن البـوســتات المـأزومـة... ومـحـن أخـرى..
Author: Rihab Khalifa
Date: 12-18-2008, 01:15 PM
Parent: #28

ايوه يا نجوان، ده اسمه
Crowd Surfing

courtesy of istockphoto

Post: #31
Title: Re: عن البـوســتات المـأزومـة... ومـحـن أخـرى..
Author: Rihab Khalifa
Date: 12-18-2008, 02:36 PM

Quote: رحاب
الكوتيشن بتاعك يهمنى معرفة الراى الوراهو .... لو لقيتى فرقه من ال NBA

تمام يا عصام
--------------
يا نجوان
في روايه جميله جدا لي Nick Hornby اتعمل فيلم High Fidelity، من اجمل الافلام الشفتها لممثل
قريب من قلبي جدا John Cusack. بيحكي عن قصه الاخطاء البيقع فيها الواحد في علاقاته الانسانيه.
جون كيوساك او روب، اتاثر جدا لمن صاحبته سابته و صاحبت ليها زول تاني، المهم يا قول تبارك،
يطراهو الله بالخير، في لقطه في الفيلم بحبها جدا. اللقطه فيها جون او روب بيتخيل طرق رد مختلفه
للراجل صاحب البنيه الجديد، الجاهو زائر في محل الاسطوانات حقو عشان يقول ليهو، انسي صاحبتك
القديمه دي، لانها هي اختارتني انا بدلك، لكن في النهايه بيختار الرد الاقرب لمعظمنا
بالمناسبه boyfriend al الصاحب الجديد ده انسان مستفز جدا

ما يستفاد من اللقطه و علاقته بالحوار المازوم و البوستات المازومه متروك للقاريء
الاسئله عينه"ايييك، ده لسه من زمن الاسطوانات؟" تقبل بمناسبه البوست

Post: #32
Title: Re: عن البـوســتات المـأزومـة... ومـحـن أخـرى..
Author: عاطف عمر
Date: 12-18-2008, 04:05 PM
Parent: #31

سلامات عجاج

العتب على النظر وضيق ( ذات الوقت ) - على قول صديقنا أبو جودة - فلم أر بوستك من قبل وإلا لكنت شاركت فيه
فكلنا في ( الفتل ) شرق

__________________

شكراً نجوان لرحابة صدرك واستضافتنا

Post: #34
Title: Re: عن البـوســتات المـأزومـة... ومـحـن أخـرى..
Author: نجوان
Date: 12-18-2008, 08:58 PM
Parent: #32

تسلم عاطف عمر
ومرحبا

Post: #33
Title: Re: عن البـوســتات المـأزومـة... ومـحـن أخـرى..
Author: نجوان
Date: 12-18-2008, 08:55 PM
Parent: #31

رحاب يا خطيرة..

John Cusack ده من الدرر التي لا تتبيّن لأي حد
يا قول النخبة ..
(شوفي ليهو انترفيو مع جيمس لبتون..)

(وآمنت طبعا بتيم روبنز )

_______
ووصلني المورال من الكليب، ما يجاملوك في شينة يا بت أمي..
ولم ينحرف مسار البوست كما قال أبوحسين أعلاه

Post: #35
Title: Re: عن البـوســتات المـأزومـة... ومـحـن أخـرى..
Author: نجوان
Date: 12-18-2008, 09:04 PM
Parent: #33

Quote: ووصلني المورال من الكليب،
والبقنع الديك.. له جائزة قيمة..
جدا..

Post: #36
Title: Re: عن البـوســتات المـأزومـة... ومـحـن أخـرى..
Author: بت قضيم
Date: 12-18-2008, 11:06 PM

نجوان يا لذيذة