حمزة سليمان ... تاني صوتك فارق..

المتابع لقناة زول في العيد.. يلاحظ ظهور الفنان الزميل حمزة سليمان في أكثر من مناسبة..

حمزة جميل جداً في التأليف

وفنان جداً في اختيار المفردات

وحاجات كتيرة ظابطة معاهو..

لكن يا حمزة أراك مؤلفاً وملحناً صاحب مدرسة قادمة بقوة...

ولأنه صوتك بالجد قاعد يفرق..

أرجو أن تركز على التأليف والتوزيع..

لكن أن تكون مغني..

فهذا يحتاج إلى وقفة مع النفس..بسكون الفاء وفتحها إن شئت..

أقول قولي هذا..

سجن سجن غرامة غرامة..

وكل سنة وإنت والأسرة الكريمة بخير..

المشكلة الأساسية في صوت قناة زول.

الأخ حسين ملاسي... عيدك مبارك..

Quote: المشكلة الأساسية في صوت قناة زول.

والله جايز برضو.. لكن حمزة فارق.. كان بالعود ولا بالأورغن..

السلام عليكم
عيدكم مبارك
..
شخصياً أرى أن الصوت في قناة زول صوت رديء جداً ويبدو ان امكانيات القناة الضعيفة وربما بخلها على الصرف على الأنشطة التي تتبناها بحيث يكاد يتمثل تبنيها إلى مجرد "مايك" عليه شعار القناة يوضع أمام الفنان
شاهدت الحلقة الأخيرة للشاعر محجوب شريف
رجل يحمل المايكرفون يجلس بجانب الشاعر دوره أن يوجه المايك لوجه محجوب شريف كلما التفت يميناً ويساراً حتى انني خشيت أن يهشم "ما بقى " من أسنان للشاعر محجوب شريف وهو يحاول جاهداً المحافظة على درجة قرب توضح الصوت للقناة المسكينة.
ثم كانت الطامة الكبرى حينما وقف الشاعر على قدميه وبدأ الإلقاء الشعري وهو يتحرك ويتفاعل مع الجمهور ووراءه صاحبنا الذي انقطع نَفَسه و"نَفَسنا" وهو يطارد الشاعر...
....
نأتيً للفنان حمزة سليمان
فأنا لم اقتنع يوماً بأنه يملك صوتاً مطرباً ،
حمزة سليمان ملحن موهوب ورجل مهذب يحسن اختيار كلمات أغانيه
وملحن رائع ينقص كثيراً من قدر الحانه محاولاته تطويعها لتلائم صوته الضعيف وهو ما نحمد لقناة زول الضعيفة الصوت كشفه ، بالأضافه إلى جرأته للغناء بدون فرقة موسيقية كاملة كان يمكن أن تخفي الكثير من عيوب صوته .
كمستمع أنصح الفنان حمزة سليمان أن يكتفي بالتأليف الموسيقي والتلحين
وإن كان ولا بد من الغناء ، فقد يكون ذلك خياراً مقبولاً لو غنى ضمن فرقة.

...

Quote: نأتيً للفنان حمزة سليمان فأنا لم اقتنع يوماً بأنه يملك صوتاً مطرباً ، حمزة سليمان ملحن موهوب ورجل مهذب يحسن اختيار كلمات أغانيه وملحن رائع ينقص كثيراً من قدر الحانه محاولاته تطويعها لتلائم صوته الضعيف وهو ما نحمد لقناة زول الضعيفة الصوت كشفه ، بالأضافه إلى جرأته للغناء بدون فرقة موسيقية كاملة كان يمكن أن تخفي الكثير من عيوب صوته . كمستمع أنصح الفنان حمزة سليمان أن يكتفي بالتأليف الموسيقي والتلحين وإن كان ولا بد من الغناء ، فقد يكون ذلك خياراً مقبولاً لو غنى ضمن فرقة.

الزوول..

إنت مية مية والله العظيم..

عيدك مبارك..

اخ محمود شاهدت الحلقة

وفعلا فارق

ولو صوت قناة زول ردئ (زي فنانينا القاطعاها من راسا)

بيصلك الغنا السمح ولو في قمقم

لا سجن لا غرامة معاك شاهد

مع عزيز التقدير للسيد حمزة

العزيز أشرف طه..

عيدك مبارك يا أصيل..

Quote: فعلا فارق ولو صوت قناة زول ردئ (زي فنانينا القاطعاها من راسا) بيصلك الغنا السمح ولو في قمقم

ينصر دينك ياخ.. الغنا السمح سمح.. النصيحة ليك يا الله..

Quote: لا سجن لا غرامة معاك شاهد

شهادتك وشهادة الكثيرين نرجو أن تكون دعماً لمسيرة
الأستاذ حمزة سليمان في التأليف الموسيقى والألحان والتوزيع..

صادق التقدير والشكر على المرور والمساهمة..

اخ محمود شاهدت الحلقة

وفعلا فارق

ولو صوت قناة زول ردئ (زي فنانينا القاطعاها من راسا)

بيصلك الغنا السمح ولو في قمقم

لا سجن لا غرامة معاك شاهد

مع عزيز التقدير للسيد حمزة

كل سنة وانت طيب

تعرف انا لو قرأت قرأن كريم انت ح تقول كلام دة

وانا ما ح ابرر ليك

لكن اقول ليك

كن جميلا ترى الوجود جميلا

أستاذ حمزة سليمان..

كل سنة وإنت طيب..

Quote: تعرف انا لو قرأت قرأن كريم انت ح تقول كلام دة وانا ما ح ابرر ليك لكن اقول ليك كن جميلا ترى الوجود جميلا

تعرف يا أستاذ.. أريتك لو عملت فيها ما شايف البوست دا..

كان أحسن مليون مرة من تكتب مداخلة فارقة بالشكل دا..

شنو كن جميلاً ولا بطيخاً...

اخترنا يا أستاذ أن نكون غير جميلين... عشان نقول النصيحة..

قول النصيحة ألحان الدكتور الماحي سليمان.. جميلة والله


أديناك رأيناالإيجابي في مؤلفاتك وألحانك..
وأثنينا أيما ثناء على رؤيتك الجميلة في اختيار المفردة..
فنرجو أن يتسع صدرك لسماع آراء قد تبدو سالبة ولكنها قطعاً مفيدة..

المغنية قالت:
يا الضايقين حلوها ..مُرها ضوقوا..
الليلة دوبة.. دوبة والله بعيدة ميسو.. حجر الزلط مين بقيسو..

سؤال برئ:
المذيع ليه كان عنده إصرار غريب إنه يغني معاك ؟؟
عشان صوتك يفرق زيادة ؟؟

اللهم لا اعتراض في حكمك..

لو كان أداء حمزة الغنائي زي ما بتقولوا
عثمان النو ما كان خلاهو يغني في عقد الجلاد.

Quote: لو كان أداء حمزة الغنائي زي ما بتقولوا عثمان النو ما كان خلاهو يغني في عقد الجلاد.

والله كلامك ما بطال يا حسين..

لكن نحن هسي لم نتناول بدايات حمزة زمان وأيام المعهد وربشة وعقد الجلاد..

نحن موضوعنا حلقات (قناة زول)..

وعلى ذكر عثمان النو..

أستاذ التأليف وصاحب الألحان البديعة لعقد الجلاد.. أستاذ حمزة سليمان لا يقل إبداعاً

في نواحي التلحين لعقد الجلاد ذاتها.. ولحن ليهم أعمال ناجحة جداً.. لا يملك عثمان النو

إلا أن ينحني لها تقديراً ويتمايل لها طرباً ..

لكن خلي عثمان النو يغني ليك حتة صغيرة من أي من الأعمال بتاعة عقد الجلاد..

من أكعب الأصوات vocal عثمان النو.. ولكنه موسيقي شاطر ومؤلف لا يشق له غبار..

سمعت عثمان النو وهو يردد "المصير" كلمات أستاذ الأجيال سيف الدين الدسوقي وألحان عبد اللطيف خضر ود الحاوي أظنها؟؟

وأداء الراحل المقيم إبراهيم عوض؟؟


هوووووووي يا حسين.. كأني بك عايزني أتناول الحتة القال فيها حمزة إنه هو من ترك عقد الجلاد.. وليست عقد الجلاد المجموعة هي من تركته..والحتة بتاعة إنه إبداع حمزة كان ممكن يكون ضايع وسط ثمانية(عقد الجلاد)... أصلي ما حا أتناول الحتة دي..ولا الحتة بتاعة التعالي على الموسيقيين غير الخريجين.. كأنه دراسة التربية في جامعة الخرطوم اصابت صوت سيف الجامعة بعاهات مستديمة..

البوست دا موضوعه واضح وصريح.. حمزة سليمان صوته قاعد يفرق.. عايز يغني أوكي.. لكن يقوم يقيف مع نفسه ويشوف المشكلة وين..بس
أو يواصل ألحان وتوزيع وتأليف موسيقي.. والله ما عندنا أي حاجة غير التشجيع الشديد كمان في الحالة دي...

حسين بالله سلم لينا على طارق الأمين لو لاقيته قريب.. وقول ليهو يرد على الموبايل..

عاد انا دي اخير الننقدر علي خشمي ده

Quote: عاد انا دي اخير الننقدر علي خشمي ده

الأخت إيمان صالح..عيدك مبارك يا بت القبائل..


والله برضو راي..

أنا غايتو عافي ليك لو عايزة تقولي أي حاجة سالبة في حقي..

ومتوقع ناس كتار يجوا يسمعوني مليون كلمة فارغة في سبيل دعم صوت حمزة والدفاع عنه..

لكن كان قدرتي على خشمك ده.. أنا بصراحة حاولت قبل كدا.. وما قدرت...

الغريبة عندي 2 ريسيفير و (قُفَّة) بتاعة ريموتات..

السلام عليكم
حسين ملاسي عيدك مبارك

Quote: لو كان أداء حمزة الغنائي زي ما بتقولوا عثمان النو ما كان خلاهو يغني في عقد الجلاد.

ما اختلفنا
فقد قلت بمداخلتي أعلاه

Quote: كمستمع أنصح الفنان حمزة سليمان أن يكتفي بالتأليف الموسيقي والتلحين وإن كان ولا بد من الغناء ، فقد يكون ذلك خياراً مقبولاً لو غنى ضمن فرقة.

...

يبدو أن رأي معظم حضور تلك الأمسية كان من رأيكم با الزوول؛
فما أن يبدأ حمزة بالغناء إلا و تبدأ الونسات و المسالمات و المقالدة!!

الأخ حسين ملاسي.. أصبحتوا طيبين؟؟

Quote: يبدو أن رأي معظم حضور تلك الأمسية كان من رأيكم با الزوول؛ فما أن يبدأ حمزة بالغناء إلا و تبدأ الونسات و المسالمات و المقالدة!![/B]

هسي يا الزوول أخوي..حسين أخونا دا.. رأيو مقبل علي وين؟؟
أنا براي غايتو شايفو متل التقول مقبل على "حالة أن يكون المرء ليس جميلاً".. يعني رأيه من راينا..

لكن قاعد يعبر عنه بطريقته الخاصة..

دمتم سالمين..

Quote: هوووووووي يا حسين.. كأني بك عايزني أتناول الحتة القال فيها حمزة إنه هو من ترك عقد الجلاد.. وليست عقد الجلاد المجموعة هي من تركته..والحتة بتاعة إنه إبداع حمزة كان ممكن يكون ضايع وسط ثمانية(عقد الجلاد)... أصلي ما حا أتناول الحتة دي..ولا الحتة بتاعة التعالي على الموسيقيين غير الخريجين..

الاخ محمد وكل الحبان المتداخلين والمتداخلات

كل عام وانتم بالصحة والعافية


النقد غير مرفوض ولكن ، ما هي المعايير التي إستندت عليها لإطلاق هذا الحكم في صوت حمزة بإنو فارق؟


ولك ولضيوفك الود

الأخ أبو علاء الدين..

أيها النوبي الأصيل.. إبن عبري - تبج..


كل سنة وإنت ومن تحب بخير وعافية..

Quote: النقد غير مرفوض ولكن ، ما هي المعايير التي إستندت عليها لإطلاق هذا الحكم في صوت حمزة بإنو فارق؟

نقد عديل يا ترهاقا؟؟ وكمان بمعايير؟؟

الله يسامحك..

ياخوي والله بس إضنينا ديل بس..
يا إما يكون عندنا شمع من النوع الكعب.. يا إما كمان يكون صوت حمزة تحديداً فارق..

طبعاً مستحيل زول زي حمزة يكون عنده مشكلة في الزمن والإسكيل والحاجات دي.. نحن بنتكلم عن نوتات بسيطة قاعدة (تجلي) من صوت حمزة.. أحياناً يجيك إحساس إنه عنده لحمية أو نزلة.. وبالعدم خالص إلتهاب مزمن في الجيوب الأنفية.. على فكرة في حاجة اسمها ارتجاع الحامض المريئي.. كعب خالص بالنسبة للصوت..

لكن معايير تاني ما عندنا.. ريختر كيف معاك؟؟ خخخخخخخ

بالمناسبة.. جاري الشاعر الرقيق الأستاذ علاء الدين صالح ولدكم الجميل..أكيد تعرفه.. الرجل بخير ..

تيسير عووضة..

نجيكم في السمح إن شاء الله..

عيدكم مبارك

توقعت أن يزجر محجوب شريف المتقالدين أثناء فقرات حمزة الغنائية؛
و هو الذي بدا مهموماً بمشاعر الآخرين؛ إلا أنه و بدلاً عن ذلك كان محوراً للتقالد.

Quote: توقعت أن يزجر محجوب شريف المتقالدين أثناء فقرات حمزة الغنائية؛ و هو الذي بدا مهموماً بمشاعر الآخرين؛ إلا أنه و بدلاً عن ذلك كان محوراً للتقالد.

والله يا حسين الواحد بقى ما عارف .. لكن جاني إحساس إني زي بقيت زنديق أو مارق حتة واحدة .. بس عشان قلت رأي واضح

في صوت حمزة سليمان المغني...ولكن جدلية أن "يكون المرء جميلاً" دي غايتو أظنها قسمة ونصيب برضو..

بالله اتفرجتوا على سهرة النيل الأزرق الكان فيها سيف الجامعة؟؟ لا حول ولا قوة إلا بالله.. طرب أصيل.. وصوت مليان بالأصالة والجمال..

الغريبة قاري تربية عادي جداً..وإنت ماشي بعيد مالك؟؟ أنا بالمناسبة من أهل كروان الحقيبة بادي محمد الطيب عليه الرحمة..

أي زول في الحلة عندنا ممكن يغني حفلة الفاصل الواحد 15 أغنية..

والله أنا يبقوني عميد كلية الموسيقى والدراما إلا أعمل منهج تكون فيه مواد إجبارية "حقيبة: كرومة .. سرور..عبد الله الماحي.. زنقار.. حتى بادي" و"مديح: حياتي .. أبو شريعة.. حاج الماحي..ود سعد.. حتى الشيخ البرعي" و "الكاشف وحسن عطية وعبد الحميد يوسف والتاج مصطفى.. حتى مصطفى سيد أحمد"..وأعمل مواد إجبارية برضو "تراث منطقة النيل الأزرق" وتراث "منطقة جنوب كردفان"...إلخ.. عشان البيعرف يستمر والما بيعرف يتخارج بدري بدري يشوف ليهو اتصالات ولا هايس ولا أمجاد يترزق الله غادي غادي..


قال معايير قال..

أضف رد..