يا جماعة كورة أمبارح كيف !!

حقيقة لم أسمع عن كورة أمبارح إلا أمبارح ..
و على الرغم من كون الواحد صفوة و كدة لكن ما عارفي ليه ما أشتغلت بيها الشغلة ..
من العمل على البيت على مكة على الحجاج على الحرم على سكن الحجاج على البيت على النوم على الشغل و عليكم أمان الله حتى أصحابي البهنوني أو البكاووني ما في زول هبب لي ساكت ..
في الطريق من مكة لجدة ـ حوالي الساعة تلاتة صباحاً ـ شفت لي زول واقف ( بيأشر ) وقفت .. حق الله .. بق الله .. أتفضل .. حنك .. حنكين ونسة .. طلع هو من بورسودان و أنا من الأبيض و مع ذلك طلعنا معارف .. ( دردقتو ) لقيتو رشاشة .. سألتو الكورة طلعت كم .. قال لي و الله أنا جاي من السودان الليلة مع السواقين بتاعين الحجاج لكن ما عارف إنو في كورة أصلاً ؟؟
أشقائي في السودان كلهم ـ الله يشفيهم ـ رشاشات مرضانين و كان هلالم ( درن ) ساكت تلفوناتهم تتطاقش .. لكن ما فيهم جنس واحد عبرني ..
جرايد اليوم المهتمة بالكورة ( الرياضي ـ الرياضية ) ما جابت خبر ..
فتحت سودانيز أون لاين لقيت أخونا جمال السنوسي ماسكاهو أم فريحانة و قاعد ينطط ساكت قربت أغني ليهو ( طوٍل مفارق )..
دة شنو دة ..
الحاصل شنو ؟؟

و مالها مسييييخة كدة ..
غايتو ..

مبـيــريك عليكم يا الرشاشات
أفرحو أصلو فرحكم بقى مسارقة..

Quote: مبـيــريك عليكم يا الرشاشات أفرحو أصلو فرحكم بقى مسارقة..

يا مستشار.. سيكون الأمر مستقيماً إذا إبتعدنا عن منصات التتويج لخمس سنوات متتاليات.. والصحيح أن فرحكم أصبح مسارقة..

مرحبابك أستاذ / وراق

Quote: سيكون الأمر مستقيماً إذا إبتعدنا عن منصات التتويج لخمس سنوات متتاليات.. والصحيح أن فرحكم أصبح مسارقة..

سيكون الأمر أكثر إستقامة إن علمت يا أستاذي أنني أتكلم عما هو كائن و ما سيكون ..

يا رااااااااجل
كدي صلح مبيريك دي وبعدين نتفاهم....
تلقاك يا عصام من الساعة خمسة موقف جدة علي كراع واحدة
تجي تقول لينا ما عندك خبر...
؟؟؟
ايش دعوي يا استاذ..!!
اسمعني من حسع في كورة تاني وقريباااااات دي فخليك قريب المرة دي

عصام دهب الوجيه تلقاك قشرت
ديك يالبدلة الزرقاء
والقميص الأبيض
وعشان تكمل القشرة
تلبس كرفته حمرا
كيتن عليهم
عصام
شرفنا في موقعك
www.sudanawi.com[/B]

أستاذنا الرائع / محمد السني
تحيات كتيرات

Quote: تلقاك قشرت ديك يالبدلة الزرقاء والقميص الأبيض وعشان تكمل القشرة تلبس كرفته حمرا كيتن عليهم

القشرة الصحي صحي يوم الخميس ..
عراقي و سروال و طاقية حمرااااااء مشنوقة في الزاوية ..
و هاك يا تجدع ..
ــ
تشرفت و سعدت كثيراً بزيارة موقعكم الرائع
http://www.sudanawi.com
و يا أستاذي أنا واحد من تلاميذكم ..
عشقت التمثيل في فترة مبكرة منذ الإبتدائي ..
و كان لي الشرف أن مثلت مع قامات أجلهم ..
و شاركت في أعمال مسرحية و إذاعية ( محلية ) عديدة أذكر منها ..
مع المخرج بدر الدين مصطفى في مسرحية الأطفال ( فاطنة الهندل عود الصندل ) .
مع الأستاذ / ميرغني كرياكو و الأستاذ / محمد المجتبى موسى و الأستاذ / محمد الحافظ أحمد فضل الله في ( كلم الحيطة ، الحصة الأخيرة ) .
مع أستاذي و معلمي المبدع الرائع د. فيصل أحمد سعد في بعض الإسكتشات القصيرة قبل قدومه لفرقة الأصدقاء ..
و مثلت في الدورات المدرسية و أحرزت ميدالية فضية في ( مشهد من البيئة المحلية ) ..

ينفع تكتبوني تلميذ معاكم ؟؟

تحياتي و أسرتي لكم و اسرتكم الكريمة ..

يا هندسة ..

Quote: كدي صلح مبيريك دي وبعدين نتفاهم....

أصلحها كيف يعني أوزع معاها حلاوة ( بلي ) مثلاً ما ياهو قدر ( حقكم ) ..

Quote: تلقاك يا عصام من الساعة خمسة موقف جدة علي كراع واحدة تجي تقول لينا ما عندك خبر...

و الله يا باشمهندس أنا لم أعلم عن المباراة إلا عبر جريدة الخرطوم أمس ، و حتى خبر الجريدة كان مش و لا بد و المباراة ذاتا شكلها ( دكاكينية ) و كدة .. بعدين خليني أنا بسببي ، ناس ميدان الأمم المتحدة ديلاك تلاقيهم ذاتم ما أشتغلوا بيها الشغلة .. يعني الحكاية ( نايصة ) و ما قدر كدة ..

Quote: اسمعني من حسع في كورة تاني وقريباااااات دي فخليك قريب المرة دي

بإذن الله في الجاية حأكون قريب جداً ، بس الخوف يا غالي ( تشتت ) طوالي و ما نلاقيك ..

ـ
تحياتي وعبرك للمختفي الجميل صلاح اللمين ..

ألذ مافي كورة امبارح الرجل المائي افياني (ديك العدة)

هو الزول دا امبارح لمت فيهو الشعرانة ولا شنو؟ بيفنجط كدا مالو؟؟؟؟

Quote: والصحيح أن فرحكم أصبح مسارقة..

يا استاذنا عصام

خمس سنوات ومسارقة

ومال حقكم دا نسمي شنو " متاوقات"

ودمت للخميس بألف مسارقة

التوقيع
ماسورة وإنفتحت

الاخ عصام ..

سلام

المباراة نجمها حفياني .............وكفي