دقسـات الفنانيـن الشـباب

او البرنسات . . .

كما سماهم القامة والهامة السامقة

الراحل عبدالعزيز محمد داؤود ( رحمه الله )

في حفلة خطوبتي سنة كم كدا

اصحابي اصروا يجيبوا فنان من اياهم

وبدا يغني اغنية الراحل الخالدي (سلمى)

وقال : تحركي روميو من قبرو وعنتر في بوابيرو

كمان واحد من البرينسات طلب مني أكتب ليهو أغنية سيد روحي للراحل المقيم الفنان الذري (إبراهيم عوض) وبالرغم من كتابتي لها كما وهي إلا أنه وتحديداً في الدمام المنطقة الشرقية بالمملكة العربية السعودية وفي حفلٍ بهيج كان يتغنى بها وقال:

حسدوني فيك عهد الغرام!!! بينما هي حسدوني فيك أعداء الغرام.

وأيضاً قال: بهوى البعاد وأنا ليك أميل!!! بينما الصحيح، تهوى البعاد وأنا ليك أميل.

وبعدين حسع قرار إتحاد الفنانين دا حا يساهم في إنتشار الأغاني الرخيصة ما دام الأغاني المؤسسة يتلاعبو بيها كدا.

تحياتنا ،،،،

عبدالوهاب صباح الورد

Quote: او البرنسات . . .

خمسه شنكل..؟
.


واللا
.
.

اربعه شنكل ..؟

Quote: خمسه شنكل..؟ . واللا . . اربعه شنكل ..؟

كع ياجميل (رغما عن وقوفك في صف البوست بتاع المر )

عدد الشناكل انا ما جبت سيرتها ومتروكة للمشاركين

لكن للضمان كدا اي عدد شناكل بيشتغل معانا

الصول عبدالوهاب

Quote: في حفلة خطوبتي سنة كم كدا )

خليك واضح وبطل الف والدوران البتعمل فيهو ده هسع بجيب ليك التاريخ
والزمن تقنب تجرس وتقول مخترقاتي وشنو ما عارف

وهبه
صباح الخير

Quote: او البرنسات . . . كما سماهم القامة والهامة السامقة الراحل عبدالعزيز محمد داؤود ( رحمه الله )

قبل يومين حكي الفنان الاستاذ حسين شندي
بانوا من جيل الفنانين الذين اطلق عليهم ابو داؤود( البرينسات)
ويحكي بانوا يادوووووب جدييييييييييد
وفي حفلة في شندي مع الفنان محمد الامين وقف محمد الامين يوزن في العود
نص ساعة واخوانا الجعلية اتضايقوا خلااااااااص ....واحد منهم قام قال ليه
يازول ماتغني تخلصنا ....انت قايل نفسك حسين شندي.....؟
!!!!!!!!!!!!!!!!!!!!!!!!!

Quote: خليك واضح وبطل الف والدوران البتعمل فيهو ده هسع بجيب ليك التاريخ والزمن تقنب تجرس وتقول مخترقاتي وشنو ما عارف

هوي ياعجوز البوست دا جادي ما تجي تبوظو لي

وعلى العموم هؤلاء كانوا حضورا في تلك الحفلة :
1/ سلمى الشيخ سلامة

2/ الدكتورة اشراقة مصطفى

3/ دكتور كوجان

4/ بدر الدين اسحاق

5/..

وديل اعضاء هنا في المنبر للمعلومية عارفك بتكون ما بتعرف الا البنجضوك في المنبر دا والحفلة دي ياعجوز كانت السنة القبل الفاتت.

ودا مع خالص مودتي طبعاً

Quote: قبل يومين حكي الفنان الاستاذ حسين شندي بانوا من جيل الفنانين الذين اطلق عليهم ابو داؤود( البرينسات) ويحكي بانوا يادوووووب جدييييييييييد وفي حفلة في شندي مع الفنان محمد الامين وقف محمد الامين يوزن في العود نص ساعة واخوانا الجعلية اتضايقوا خلااااااااص ....واحد منهم قام قال ليه يازول ماتغني تخلصنا ....انت قايل نفسك حسين شندي.....؟

هارون ياجميل

شكرا للمرور

عبد الوهاب ..

Quote: تحركي روميو من قبرو وعنتر في بوابيرو

حلوة دي

أحكي ليك قصة ..

أيام هوجة الاورقنات ديك ظهر في كل حلة فنان وعازف وبتاع ساوند .. كان عندنا واحد بعام بتاع حفلات نفسو بس يمسك المايك ويغني مع إنو زول أشتر وما بيحفظ أي حاجة .، يوم ادوهو الفرصة وطلع وقام داير يغني أغنية (كل ما سألت عليك يقولو مشغولة) .. تخيل غناها كيف وبي ياتو لحن ؟!!

في غنية تانية بتقول (كل ما سألت عليك صدوني حراسك) .. صاحبنا لخبط الاغنيتين وغنى (كل ما سألت عليك يقولو مشغولة) لكن بي لحن (كل ما سألت عليك صدوني حراسك) !! فتخيل حجم الشتارة ..! والغريبة اللحن إنستر معاهو وإتناغم مع الكلمة والغنية مرت بسلام ..

Quote: (رغما عن وقوفك في صف البوست بتاع المر )

يا قريبك : انا بنظم فيكم وبفرزكم عشان المر ما يتلخبط ...
الرجاااال براهم الحريم براهم ..
وكمان عشان ما يبقو عليكم الاتنين ..
الهرجله والشنه ..
اما بخصوص .... بوابيورو ...
ده شكلو ..... كررااكه

Quote: يا قريبك : انا بنظم فيكم وبفرزكم عشان المر ما يتلخبط ...

ياكع رجعت بوست المر تاني

شايفك وااااقف في الصف

وابوساندرا البنظم في الناس

يعني نعتبرك مساعد منظم

في الفرقة بتاعت مدرسة الخرطوم الجديدة الغنائية كان معانا واحد من الأعضاء يمثل إزعاجا مستمرا لبقية الكورال (صوتو كان فيهو شتارة وفرقة واضحة) .. والمشكلة إنو كنا ما قادرين نتخلص منو لإنو قديم ومن المؤسسين بتاعين الفرقة .. والمشكلة إنو العروض مرات بتبوظ بسببوا ..

وعلي شتارة صوتو كان بيحاول يقلد عضو فرقة عقد الجلاد شمت محمد نور في حركاتو .. طبعا شمت عندو حكاية إنو في أثناء الغناء بيلف المايك حول رقبتو وفي يدينو وبيتحرك كتير ..

يوم كدة كان عندنا عرض مهم جدا في المركز الليبي قدام ضيوف مهمين منهم الدبلوماسيين وناس في الحكومة وشعراءء وفنانين .. يعني هيلمانة وكان لازم العرض ينجح عشان حايدينا دفعة قوية لي قدام وعلاقات كويسة بس كان صاحبنا الأشتر داك هو المشكلة ..

واحد من أصحابنا الخبثاء جدا أداني إقتراح إنو يقوم بفصل الجاك بتاع المايك الماسكو صاحبنا بدون ما داك يشعر وبالتالي ما في أي زول حايسمع صوتو إلا هو براو

غايتو وافقت على الفكرة لإنو ما كان في حل تاني .. وجينا يوم العرض أخر شياكة ونفسيات عالية ..
لمن بدأ العرض صاحبنا داك فصل الجاك والغنية الأولى عدت بدون ما الأشتر يشعر ..
والغنية التانية عدت برضو وأنا فرحان من النظرية

الغنية البعدا كانت غنية مسخنة بتاعت عقد الجلاد (الناس في بلدي يصنعون الحب) .. قام صاحبنا جاتو الهاشمية ودخل في تقمص شخصية شمت محمد نور وبدا يدور سلك المايك حول رقبتو ويلفو في يدينو ويتحرك كتير في المسرح ..

عاينت لي جهة الساون لقيت صاحبنا بتاع الإقتراح فلت السلك والوكت داك زولنا الأشتر بقى يلف المايك حول يدينو في أثناءء الغنية (زي الجبادة بتاعت السمك)

غايتو صاحبنا فضل يلف ويلف في السلك لحدي ما راس الجاك جاهو في يدو
طبعا إستغرب وقعد يتلفت وهو ماسك راس الجاك والجمهور بيعاين ليهو
عاين ناحية الساوند لقا الجماعة هناك زاغو
عاين ناحيتي عملت فيها رايح ومندمج مع الغنية
صاحبنا طوالي زعل ورمى المايك (دا كلو قدام الضيوف) وطلع طوالي ..
تتصور من اليوم داك تاني إصلو ما ظهر لينا ولا حتى جا سألنا ونحنا زاتنا حمدنا الله !!!

طبعا دا جذء من الغتاتات بتاعت الوسط الفني وكدة

وتاني

القصة دي قالوا منسوبة لي حسين شندي وحصلت ليه في واحدة من قرى الجزيرة (أمسك الخشب)
قالوا حسين شندي مشى لي حفلة عرس في الجزيرة .. طبعا في الجزيرة الأعراس للصبح .. الحفلة مدورة وحسين أخر إنشراح .. .. قريب الصباح كدة في واحد داقروا قدام المسرح ..
(هويا جنا ها .. ماخلاص أصبحت .. خلينا نشوف شغلنا..) ..
حسين شندي ما إشتغل بالرجال وواصل في غناهو والراجل مكوع يدينو وبحمر لي حسين ..
(يازول انا بجي طالع ليك أطعنك .. ما كفاك هنيق .. ال وا ط ة صوبحت على الشغل )..
حسين شندي جلا الراجل كم مرة والراجل زعلان وداير يسل السكينة ..
(إنتو الواحد إلا يطلع يطعنكم ولا شنو؟ ما تخلينا نشوف شغلنا داير تهونق فينا لا متين) ؟؟

غايتو في النهاية حسين إتشجع وقبل على الراجل قاليهو ..
(يا زول ما تمش تشوف شغلك ؟؟ أنا ماسكك) ؟؟!!
الراجل قال ليهو :
(نان الكارو البتهنق فوقو دا هيلك ؟؟! مو هيلي نا) !!!

تتصور لمن حسين إتلفت لقا المسرح الطالع فيهو عبارة عن الكارو بتاع الراجل داك

ود الصائم ..

Quote: وتاني

أبو حسين عندو فيني نظرية .. بيقول عندي عادة سيئة اللهي هي اخش بوست ما بتاعي ، أستلم البوست يقوم سيد البوست يزوغ

هسي أخونا عبد الوهاب زاغ وين ؟!! الظاهر أبو حسين كلامو صاح ..!!

لكن عشان جيتك هنا اديك واحدة تانية وإتخارج ..

خليك واضح وبطل الف والدوران البتعمل فيهو ده هسع بجيب ليك التاريخ
والزمن تقنب تجرس وتقول مخترقاتي وشنو ما عارف

انت يا نقابي عجوز حاسد ولا بقران ..

يعني انت عشان خطوبتك كانت سنة 1946 ميلادية ...



ود الباوقة

هاك القصة دي حصلت لي في الحلة الجديدة في عرس أخو عبد الوهاب نور الدائم ..

أنا جيت إشتغلتا ليهم في الحنة وكانت الشغلة أخر بهرجة والدنيا حلوة ..

فجأة بدون أي مقدمات حصل ضرب في نص الدايرة والكراسي إتطايرت وتسمع صج ... تاح .. كرج .. معطك وأصوات أفلام الكرتون ديك ...

جاني ليك واحد فوق المسرح من أهلو بتاعين الشيخ الطيب ديك .. يمين شنباتو تكتف حرامي .. حمر لي كدا وختف مني المايك وقال لي تنزل تتخارج ولا أخبتك بي عكازي دا ؟؟!!

طبعا سؤال وليس في السؤال والإجابة حرج قلت ليهو وأنا بعاين لي عكازو : بنزل بتخارج ..
جا ليك واحد من أهلو برضو شايل ليهو عكاز يمين تقول مجلدو بي جلد زول عديل كدة ، رفع العكاز وقال لي يمين ماك نازل أنحنا ما رجال ولا شنو ؟؟!!
قلت ليهو .. أيا .. إنتو بالحيل رجال وأنا ماني نازل ..

أنزل ما أنزل الشكلة وصلت في المسرح فوق وكلها في شان نزولي من عدمو..
حصل خبت وضرب في المسرح بتاع الساوند قال لي يا مان انا ما بشتغل .. بتاع الأورقن قال ما بشتغل في الظروف دي .. بتاع الدنب نفس الشئ

صحبك قلت ليهم خلاص أنا أمشي أشوف عبد الوهاب وأجي .. بعد تعب شقيت الخلق دي شق ومشيت وفي ناس بي وراي من الحفلة حارسيني خايفيني أزوغ ..

الضرب دور تاني وأنا ما لقيت عبد الوهاب ولقيت روحي برا الصيوان وما في زول متابعني طوالي ما كضبت ركبت لي أقرب تكسي واتخارجت بيتنا قلت جماعتي ديل بتصرفو ..

تاني يوم قابلت الجماعة قلت ليهم الحاصل شتو يا شباب ؟ أنا أمبارح ما لقيت طريقة أرجع ليكم .. قالوا لي الحاصل خير ... إنت بس تاني تختانا لا نشتغل معاك لا تشتغل معانا .. قلت ليهم : لييييهه أنا مالي ؟ ناس العرس وإتشاكلو .. قالوا لي ال شكلة هينة لكن ناس العرس زاغوا بالعداد وأبوا يدونا ليهو .. طيب أنا مالي ؟! قالوا عبد الوهاب قال إنت قلت ليهو حاتعوض الحفلة يوم تاني وبعد داك تدينا العداد ؟؟! .. قلتا ليهم طيب مالو ما نعوضا ليهم ؟؟!! بتاع الإيقاع قال لي إنتا جنيت ولا شنو والله ديل لو عملو الحفلة في القسم ذاتو ما إشتغل ليهم أنحنا ورانا مسؤليات ..

طبعا أحدي هسي ما عوضنا ليهم الحفلة وأصحابي متهمني إنو أنا نمت بالعداد

Quote: لكن عشان جيتك هنا اديك واحدة تانية وإتخارج ..

ناذر الرسول فيك كان تمش

سيد الحوش (البوست) عشان نفرق
حضرنا ولم نجدكم

شماراتكم تقيلة خلاس

بالمنافسة* رايك شنو في النيو لوك (بعد الحلاقة وكده!)

Quote: بالمنافسة* رايك شنو في النيو لوك (بعد الحلاقة وكده!)

نحن راينا مفيد بشنو ياحسين

ما تسأل شداد او ابوشنب

Quote: (نان الكارو البتهنق فوقو دا هيلك ؟؟! مو هيلي نا) !!!

الله يجازي محنك يا ابوالنيز

تعرف في الجزيرة دي مرة مشينا نزور واحد صاحبنا في ريفي المدينة عرب (تخيل) . المهم بالليل ما كان في كهربا والبلد هادئة جدا بعد شوية كدا سمعنا صوت مداحين ونقرة طار كدا عجبتني اقترحت على الجماعة نمشي ومشينا قعدنا في برش وسمعنا المديح لمن المسألة انتهت قلنا نرجع اصحاب البيت حلفوا طلاق الا نقعد نتعشى .

المهم دخلونا نحن مع المداحين وجابوا العشا وكان ( شعيرية بالملح ) والمداحين طبعا كانوا متوقعين الضبيحة واللحوم والشية وبدوا يطنطنوا تحت تحت . جا كلب البيت حايم جنب صينية المداحين واحد منهم واكتر واحد فيهم زعلان نهر الكلب وقال ليهو : جرررررررررر حاجة يجدعوها ليك مافي كان عندك ( معلقة) امشي جيبا .

هاك دي عبد الوهاب ..

اولاد حاج الماحي شغالين عن واحد مديح تقيل والزول ( متلحهم ) زلابية وشاي سادة الليل كلو .
المهم في الاخر قام طلب منهم مدحة اسد الله البضرع ..وطبعا هم زعلانين شديد منو . قام واحد فيهم رد عليهو يا زول انت ماك نصيح ولا شنو كمان الليلة اسد الله يضرع ليهو فوق زلابية ....



ود الباوقة

خطيرررررررررة يا ود الباوقة

!!!

Quote: جرررررررررر حاجة يجدعوها ليك مافي كان عندك ( معلقة) امشي جيبا .

Quote: الليلة اسد الله يضرع ليهو فوق زلابية ....

والله ياباوقة دي بالغت فيها

المداحين بحبوا الفتت والعضات المجيهة

لانو عداد ما عندهم !!!

Quote: المداحين بحبوا الفتت والعضات المجيهة لانو عداد ما عندهم !!!

يا حبيب مداحين الزمن ده
بقوا شغالين في الكهرباء
مركبين عداد وتحت تحت دفع مقدم

وهبة


واحد من البرنسيات برضو بغني

وين يا ناس حبيب الروح انا قلبي (ما ) مجروح

قلت ليهو الاغنية دي لو مافيها (ما) ما نافعة

واحد برضو

بقول يا نجوم الليل اشهدي علي بكاي (رقم حسي)

ما عارف جاب من وين رقم حسي دي

واحد برضو بقول

الدنيا تحلي (سحابة راحلة)

وبجييك تاني

Quote: الدنيا تحلي (سحابة راحلة)

خلي ياصديق

كويس دا قال الدنيا تحلى

قبال رمضان بسمع من البيت في حفلة

جنبنا في الحلة الفنان كان بغني نفس الاغنية دي كالاتي:

الدنيا كاحلة و سحابة راحلة دي عااااادي

ديل الفنانين

Quote: إنو أنا نمت بالعداد

وديل المداحين ..!!!!

Quote: لانو عداد ما عندهم !!!

نازر قويه وحاة النبي
( تاني اللا بالدلوكه ) ... ياقريبك

برنسات ده زمان ياعمك

اصبحوا هسه ركشاااااااااات وبس


ومليون سلام اخي عبدالوهاب ,,

Quote: الدنيا تحلي (سحابة راحلة)

ده بكون ساكن بيت ايجار

خليل ووهبة .. البوست ده ناقصه الارباب وتضربوا أزرق

Quote: خليل ووهبة .. البوست ده ناقصه الارباب وتضربوا أزرق

ومالو الخرطوم كانت ومازالت

ترتدي اللون الازرق الكامل

Quote: اصبحوا هسه ركشاااااااااات وبس ومليون سلام اخي عبدالوهاب

مسلمي ياخ انت وين

هاكم دي من أبو داوود :

لا لا ما بتاعت الضيق المع البلابل ... ديك براها ..

قالوا يوم كدة جاء واحد صاحب المرحوم أبوداؤؤد لي أبو داؤود في البيت ..
قال ليهو في فنان شاب بيقلدك في الحفلات والليلة هو عندو حفلة وأنا دايرك تمشي معاي
وتديني رايك في الولد دا ..

أبو داؤود وافق ومشى لي بيت الحفلة وقعد ورا عشان ما في زول يعرفو وفي الوكت داك كان
الفنان بيغني كيف الحياة غير ليمك لكن بالطريقة دي ..

كيف الحياة غير نيمك
أبو دا ؤود قدر مايرخي أضانو يسمع الولد بغني غير نيمك (ما ليمك) ..!! لمن الفاصل إنتهى أبو داؤؤد حاول يتأكد نادا الولد وسألوا الغنية بتقول شنو ؟؟!!

الولد أصر قال ليهو كيف الحياة غير نيمك ..
أبو داؤود زعل وقام تمى البيت للولد :
ومن بعدك أصبح حظي زي لون برسيمك

Quote: ومن بعدك أصبح حظي زي لون برسيمك

ابو داؤد ركبت معاه بنت ما بتعرفه وهو مشغل شريط حقه في العربية فقال للبنت بالله رايك في الفنان دا شنو؟ قالت ليه والله دا حمار، ابوداؤد اكلها في خاطره وقال ليها لا يمكن الاغنية ما عجبتك كدي اسمعني الغنية دي وجر الشريط قدام شوية وقال لها اها رايك شنو؟ قالت له والله برضه حمار، ابو داؤد ركن العربية ونزل على الباب حقها وفتحه وقال لها تنزلي ولا ارفسك.

قالوا كان في يوم من الأيام في دار إتحاد الفنانين كان الموسيقار الكبير
محمد الأمين في حوش الدار ويحاول يوزن في العود بتاعو برواقة لكن فشل في ذلك لأن الفنان المرحوم سيد خليفة كان في تلك اللحظة داخل غرفة البروفات في بروفة بالساوند لأغنية على الجمال تغار منا ..
إلى أن وصل إلى الكوبليه:

(مغنا فمغنا .. مغنا فمغنى .. مغنا فمغنا) .

فما كان من الأستاذ محمد الأمين إلا أن وضع عوده جانبا بضيق شديدومن ثم أشعل سجارته في محاولة لإستعادة تركيزه فسأله أحد الحضور :

يا أستاذ مالك ؟؟!! ما تواصل ؟! وقفت لييه ؟؟ّ

فأجابه محمد الامين بضيق شديد :

يا خي والله سيد خليفة دا فمغنا فمغ شديد خلاص .. ماقادرأركز والله

ودي عشان خاطر حسين وعبد الله كع :

كنت ولا زلت احب الغناء بألة العود لوحدها فقط في المنتديات الثقافية وجلسات الأصدقاء وأحيانا جلسات الندامى والتي تأتي دونما ترتيب مسبق ..

وبما ان الغناء بألة العود يحتاج لهدوء الحاضرين حتى يتسنى للجميع الإستمتاع والسماع فقد كنت أوقن في قرارة نفسي وحتى الأن بأن خير من يستمع للغناء ويقدره ويتذوقه ويحفظه هم مرتادوا هذه الجلسات العامرة .. والذين غالبا ما يتميزون بحس فني عالي وثقافة موسيقية رفيعة .. قل أن تجدها في مرتادوا الحفلات الموسيقية الاخرى والتي أكثرها ليست للإستماع بقدر ماهي للرقص ومقابلة العشاق ..

ذهبت بدعوة من أحد أصدقائي لحضور حفل خطوبة أحد معارفه .. وكانت الحفلة بهية من حيث حضورهاومن حيث هدوء موسيقاها المنبعث من أحد الإستريوهات الفخمة ..

وبعد نهاية الحفلة وإنصراف غالبية المدعويين إقترح أحد أهل الدار أن (لا زال الليل طفلا يحبو) .. ثم أدخلنا حوالي العشرين شخصا إلى إحدى فيرندات الدار الفخمة .. وهناك أخبرهم صديقي ذاك بأنني أغني وأعزف على العود .. فما كان من الجميع إلا وطلبوا مني الغناء لهم ..

فاجأني التصرف الذي لم أكن مستعدا له !!! وحاولت التملص بالقول أنني لا أستطيع الغناء إلا بمصاحبة عود وللأسف ليس معي واحدا الان .. فما كان من أحد الخبثاء إلا وهرع إلى الخارج وجاء بعد أقل من خمسة دقائق حاملا معه واحدا فخماً فأسقط في يدي !!

وبعد ذلك شرعت في دوزنة اوتار العود ثم شرع بقية القوم في توفير متطلبات الجلسة بحماس بالغ .. وبعد ذاك بدأت الغناء وصار القوم في طرب ..هم يطلبون الأغنيات وانا أغنيها لهم بقدر إستطاعتي ولكن حدث ما لم يكن في الحسبان ..

طلب مني أحدهم أغنية للفنان اللحو .. فشرعت أغني أغنيته (مادام نسى العشرة) .. والجميع في إنسجام تام .. ولكن ....

أبت ذبابة لعينة فاقدة لمكان مأواها إلا وأن تدخل إلى أنفي بسرعة الضوء واحدثت من الحركة داخله ما جعلني منزعجا وغير قادر على إفلات العود لمعالجة أمر الذبابة لأن الجميع كان في حالة من الطرب والأندماج وتركيز لأنظارهم نحوي ما جعلني أحاول اتناسى الأمر رغم أنها (الذبابة) شرعت في الدوران داخل أنفي بسرعة شديدة ..مما جعل عيناي تزغلل وتزرف الدموع بغزارة ..

وكنت في هذه اللحظة وصلت للمقطع الذي يقول :

يا ظالم من والاك إخترت غيري حبيب
ما بتدري للظالمين يوما شديد وعصيب ..

وعندمى رأى الندامى الدموع المنسالة بوجهي ظنوا أنني أمر بموقف عاطفي من أثر الأغنية ، فشرع بعضهم في البشير والتخفيف بقولهم (أنساها يا أستاذ) .. (البت دي والله تلقا أحسن منها) (البكا ما بيجيب حاجة) .. وهكذا عبارات .. أما الذين وصل بهم التطريب أشده وأقصاه فقد جاملوني ببكاءهم معي بحرقة شديدة !!..

وفي تلك الأثناء لم يكن يهمني إلا سرعة إنهاء الأغنية لمعالجة امر الذبابة اللعينة التي جعلتني أذرف الدموع .. وفي أخر مقطع من الأغنية توقفت الذبابة عن الدوران داخل أنفي وهمدت حركتها تماما .. فإستأذنت للذهاب إلى الحمام .. وهناك إكتشفت ان الذبابة الشقية التي جلبها حظها العاثر إلى أنفي قد لقيت مصرعها إختناقا ونفقت فيه ..

وبما أن (رب رمية من غير رام) فقد كانت هذه الحادثة هي سبب شهرتي الغنائية في ذاك الحي تهديدا حيث كنت بعدها فنان المنطقة الأساسي وعلى رأس المدعوين لأي مناسبة تقام فيه ..

بقى أن أذكر أن هذه أول مرة أحكي تلك الحكاية على الملأ بهذه الصورة لانني لو قصصتهابتلك الصورة المقرفة قبلا وذكرت إسم الحي وعرف الناس سبب بكائي ذلك اليوم لما كنت أبدا سأوسع من قاعدة أنتشاري الفنية

غايتو يا عبد الوهاب إتلومت معاي الليلة ..!!

الحاجات الأنا بكتبا ليك هنا دي كانت مشروع كتاب ضخم لكن الظاهر الشغلانية حا تخرب

تعرف يابوالنيز

ابو داؤود مرة جوهو اتنين من اولاد حلة الدناقلة جيرانو يعني قالوا والله يااستاذ نحن اولاد الحلة هنا وعملنا لينا فرقة غنائية وشكلنا ثنائي و طلبوا منو يسمعهم ويديهم رايو( ويقطع ليهم اسم) بدوا يغنوا وكان صوتهم كعب شديد وزمنهم فارق وحالتهم بالبلا .

ابوداؤود اتضايق منهم وقال ليهم يعني تمام . وقال ليهو مسألة الاسم دي كدي ادوني يومين تلاتة .
الجماعة مشوا وجوه بعد يومين دقوا الباب دق شديد وازعجوا ابوداؤود وطلع ليهم زعلان وقال ليهم : نعم قالوا ليهو: اها الاسم الاخترتو لينا شنو ؟
قال ليهم الاسم الاخترتو ليكم ( ثنائي اولاد الكلب )
والجماعة شتتوا ومسالة الغنا دي تاني ما اتطرقوا ليها .

Quote: قال ليهم الاسم الاخترتو ليكم ( ثنائي اولاد الكلب )

ذهبت في إحدى الحفلات للغناء في مناسبة عيد ميلاد أحد أبناء الأسر الأرستقراطية،(عيد ميلادو الكم وتلاتين كدة) وكان الحفل في قاعة فخمة بالمنزل وكانت مزينة بكمية هائلة من البلونات بدء من السقف وإنتهاء بالحوائط والأرضيات ..

قبل وصولي كان هنالك (نظام ديسكو وكدة) .. وجئت حوالي الساعة العاشرة مساء مع فرقة مصغرة ووجدت الحالة تمام التمام ولا شئ يعكر صفو الأجواء ..

يدأت الغناء وأكملت الأغنية الأولى والثانية والجميع في طرب تام ..

ولكن عند بداية الأغنية الثالثة تحديدا إنفجرت إحدى البالونات الكبيرة في السقف بدوي هائل لفت الانظار ...

وبعد أقل من الدقيقة إنفجرت واحدة أخرى في زاوية جديدة !!!..
ثم توالى إنفجار البالونات دونما سبب وجيه .. !!
إعتقدت أن هنالك أحد الخبثاء يريد الإيحاء بشي ما للحضور (صوت الفنان وكدة ) وتلفت بحذر ولم ألحظ شئ مريب ..!!!

إنتهت الأغنية وتريثت قليلا قبل مواصلة الفاصل لأعرف سر إنفجار البلونات ... والغريبة أنه في فترة توقفي لم الحظ شئ يدعو للتشكك إلا انني عندما بدأت أغني بدأت البالونات في مواصلة إنفجارها ...

وفي تلك اللحظة قرأت في عيون بعض الحاضرين شيئا من الخبث وبدأوا في الحديث مع بعضهم البعض وينظرون لي تارة وتارة لأماكن إنفجار البالونات والتي قاربت نصف العدد الموجود إن لم يكن أقل ووجوههم جميعا تتخذ الشكل مع تغطية جذء منه بأصابع اليد مفرودة (لا أجد الشكل هنا مع النماذج) إلا أنني تظاهرت انني لم ألحظ ما يحدث رغم أن التوتر أصابني بعدم التركيز .. هذا وتواصل إنفجار البلونات يستمر دون أي سبب طبيعي أو فوق طبيعي واضح .,.

المهم قاربت الوصلة على الإنتهاء ولم يتبق من البلونات إلا القليل وفي تلك الأثناء تقدم سيد الدار وهو يبشر وعندما إقترب مني همس في أذني قائلا (بالله يا أستاذ الحنابيك الفاضلة دي خليها عشان نوزعا للشفع)

Quote: (صوت الفنان وكدة )

Quote: (بالله يا أستاذ الحنابيك الفاضلة دي خليها عشان نوزعا للشفع)

ابداااااااااااااع ياود الخليفة والله دي بالغت فيها

تعرف يابوالنيز

نحن ساكنين في منطقة شعبية يعني كلنا اولاد عمال او صغار موظفين وجيلنا ذاتو عمال وصغار موظفين عشان كدا دايما بنفرح قدر قروشنا ويرتاد حينا صغار الفنانين والركشات زي ما قال المسلمي .
والركشات ديل بتموها اورغن وساوند وصولات ودايما ما حافظين .
مرة واحد بغني في الحلة اغنية البلابل ( عشة صغيرة )

قال ( ما تحرمنا جمال جياشة ) والمقصود طبعا جياتك

ود الفكي ::

Quote: ابو داؤد ركن العربية ونزل على الباب حقها وفتحه وقال لها تنزلي ولا ارفسك.

عبدالوهاب علي الحاج

ياخي ده اجمل بوست في سنة اولى وصافة

عارف يا دوب عرفت ليك ناس البطيخ ليه بسمو روحهم

المهم يا زول

ازرق جميل فتان
موجود في امدرمان
نادي حريف فنان
مين زيه بالامكان



شكرا كثير على محادثتك التلفونية

وعقبال ما نضحي ونضبح البطيخ ضبح شديد

Quote: ازرق جميل فتان موجود في امدرمان نادي حريف فنان مين زيه بالامكان

السنوسي ياجميل

يا ازرق يافنان

ياخي تاريها مسألة الوصافة دي حارة خلاص

الناس ديل كانوا مستحملنها خمس سنين كيف

جلدهم بقى تخين ودا الحالة وصافتهم عن جدارة واستحقاق

ونحن وصافتنا قايدها شداد ( تعيش كتير تشوف كتير )

جمال اخوي ارفع راسك فوق انت هلالابي

Quote: ياخي ده اجمل بوست في سنة اولى وصافة

وشهد شاهد من أهلها يا وهبة

بوست كامل الدسم

أواصل سرد المواقف الغريبة التي حدثت لي في المناسبات حيث سأعرج الأن لأروي قصة إعتقالي في منزل إحدى المناسبات لمدة ثلاثة ساعات بسبب فني الساوند ..

أصل القصة أنه في إحدى الأمسيات إتصل بي أحد فنيي الساونات الذين أتعامل معهم وذكر لي أنه قد (ربط) لي حفلة بمنطقة الجريف وأنه قد إستلم مبلغ الحفل كاملا .. ثم طلب مني الحضور في زمان ومكان حددهما ...

طبعا ذهبت للمكان ووجدت أن الحافلة في الإنتظار بعازفها وساونها وبعاميها فركبت فورا ومن ثم إنطلقت بنا الحافلة صوب الجريف حيث المأساة ..

وقد أكرم أصحاب المناسبة وفادتنا ولكن عند بداية الحفل وتركيب الأجهزة اكتشفت أن فني الساوند ذاك قد أحضر معه سماعات ساوند (دينا كورد) وهي شديدة القوة في إصدار الصوت ولكنه في المقابل أحضر معه (راس) ساوند والذي يتحكم في الصوت لا يواكب سماعات الدينا كورد العملاقة !!!! وكنت حين أبدأ الغناء يفصل الساوند على الفور وحين يبدأ عازف الأورغ العزف يفصل الساوند أيضا !!

ومن ثم نظرت إلى فني الساوند نظرة ما معناها (ضيعتنا يا فردة شوف لينا طريقة للمخارجة) .. ومن ثم بدأ التململ واضحا لدي اصحاب الحفل والذين تهيأوا لحفلة كاربة فتفاجأوا بعد صعودي للمسرح ومرور أكثر من نصف ساعة أننب لم أغني ولا كوبليه واحد ..

وهنا تقدم ثلاثة من العمالقة الحاضرين (شفوت أولاد الحلة وكدة) وبدأوا في الأسئلة بخشونة : الحاصل شنو يا أخوانا ؟؟!! الحركات بتاعتكم دي شنو ؟؟ .. وقد حاول فني الساوند مداراة الموقف فحاول يبرر لهم بقوله أن الكهرباء ضعيفة في الجريف ..

ولكنه تفاجأ بأن أحد هؤلاء الشفوت هو فني ساوند سابق وقد صرخ قائلا : إنتو قايليننا مواهيم ولا شنو ؟ جايبين لينا شماعات دينا كورد دايرين تشغلوها لينا بي أدابتر الإستريو دا ..!!!

وهنا تيقنت تماما أن الكارثة قادمة لا محالة إذ أعتزر فني الساوند على الفور وذكر أنه سيذهب ليعود ب راس ساوند جيد .. وهنا زمجر هؤلاء الشفوت وهاجوا وماجوا إذ فجأة رفع أحدهم يده و (قطع ليكم كف في بتاع الساوند) وعندما إلتفتوا ناحيتي هرشت وذكرت لهم أنني لا أعرف شيئا... طلبني بتاع الساوند وجئت معه .. فسألوني بخشونة : كم شلت للحفلة دي؟ : فأجبت بإنهيار ورعب حقيقي : والله العظيم ولا تعريفة القروش كلها عند بتاع الساوند دا ولسه ما إتحاسبنا ..

ولحسن الحظ تفهموا الموقف وكان أول ما فعلوه أن (قلعوا) العداد من بتاع الساوند والذي إستسلم لهم تماما ولكن ما مصير الحفل ؟؟!!!

أرهبنا الشفوت بقولهم أنهم لن يسلمونا للشرطة ولكن علبنا الذهاب لإحضار راس ساوند لمواصلة الحفل مع تعويض عبارة عن (OVER NIGHT) .. وطبعا لم يكن بوسعنا في تلك الأجواء المتكهربة سوى الإذعان .. وعن نفسي شخصيا فقد أضمرت في نفسي عدم الرجوع مرة أخرى وسأدع بتاع الساوند يتصرف لوحده خاصة أنني لم أستلم مليما أحمر ...

ولكن بما أن أولاد الحلة ديلك شفوت بحق وحقيقة فيبدو أن أحدهم قرأ ما يدور بخلدي فصاح في وحهي قائلا (الأستاذ دا ما يمشي يقعد معانا هنا لحدي ما صاحبو يرجع) ..!! وهنا واتتني قليلا من الشجاعة فقلت لهم (أقعد أعمل شنو !! أنا زاتي ما داير أغني ؟؟ في زول أداني تعريفة ولا داير مني حاجة)؟؟؟ ...

وكان هذا بالضبط ما ينتظرونه إذ إنفجروا جميعا : إنتوا ناس صعاليك ولا شنو !! بوظتو لينا الحفلة وكمان بتتلامض !! أها الليلة دب إنتا ما طالع من البيت دا ...

وبعد ذلك إقتادني عدد منهم وأدخلوني في غرفة منزوية في البيت وأغلقوا علي بابها من الخارج بإحكام في حين ذهب بعضهم مع بتاع الساوند حتى لا يهرب ..

وطبعا كانت تلك لحظة رهيبة بالنسبة لي إذ وجدت نفسي معتقلا وحيدا في غرفة منزوية وخارجها يوجد نفر من الناس الغاضبين بسبب بوظان الحفل وصرت افكر عما سيجري لي إذا لم يجد بتاع الساوند رأس يعود به ...

وبعد حوالي ساعة بالضبط فتح الباب وجاء أحدهم ووضع أمامي صحن عشاء وزجاجة بارد وهو يقول : هاك أكل تاكل السم .. فوجدتها فرصة وتمسكت به محاولا أن أشرح له الوضع وأنني لا دخل لي بما حدث وهو يحاول التملص والخروج .. لكنني لم أفلته وشرحت له لمحات من مسيرتي الفنية وبريته بإسهاماتي على الساحة وأنني فنان محترم ولا يصح سجني هكذا.. ثم عرجت أيضا للحديث عن الغناء السوداني ومحاولتي تأطير أدلجة المفاهيم المغلوطة في وجدان المستمعين ..

طبعا كل ما قلته لم يشفع لي عنده فهرب من الغرفة وتركني وحدي أبرطم فيها

المهم حوالي الساعة إتناشر منتصف الليل فتح باب المعتقل وجا الشفوت ومعهم بتاع الساوند وأخبروني أنهم قرروا الإفراج عني نهائيا وأحضروا فنانا أخر سيغني بدلا عني وأنني الأن FREE MAN وأستطيع الذهاب وأن مشكلتهم مع فني الساوند فقط ..

حينها كدت أصيح يحيا العدل .. يحيا العدل .. ومن ثم عرضوا علي فقط البقاء معهم لحضور الحفل فإعتزرت لهم وأصريت على الذهاب ..

وفي أثناء خروجي همس فني الساوند في أذني :

(ما شي وين يا أبو النيز ؟؟ حا تخليني براي في نص الجماعة ديل؟؟!) ..

فقلت له بغضب وحنق : (خليهم ....... أنا مالي ومالك) .. الكلمة مكان النقاط متروكة لفطنة القراء

فخرجت فورا وركبت أقرب رقشة وذهبت إلى منزلي ومن يومها وأنا حالف ما أمشي لي أي حفلة إلا أكون رابطا براي وأتأكد بنفسي من سلامة الأجهزة قبل الحفل ..

بقى أن أذكر أنه جاءني في اليوم التالي للحفل أنه بعد نهاية الحفل حوالي الثانية والنصف صباحا رفض أصحاب الحفل إعطاء فني الساوند عداده إنتقاما منهم لمحاولته التلاعب بهم إذ أعطوا العداد فقط لصاحب الأورغن والذي كان صامتا طوال زمن إعتقالي ولم يحاول التدخل ولم بعترض حتى على تعويض أهل الحفل بزمن إضافي ..

Quote: (خليهم ....... أنا مالي ومالك)

Quote: فقلت له بغضب وحنق : (خليهم ....... أنا مالي ومالك) .. الكلمة مكان النقاط متروكة لفطنة القراء

إنت يا أبوالنيز خليت فيها فطنة !!

يا جماعة قولو بسم الله

ناذر

Quote: وبعد ذلك شرعت في دوزنة اوتار العود ثم شرع بقية القوم في توفير متطلبات الجلسة بحماس بالغ

عشاء واتسممت، عود وجابوه ليك دوزنة ودوزنته باقي المتطلبات الشرع بقية القوم بحماس بالغ في توفيرها دي شنو؟!!!!!

Quote: عشاء واتسممت، عود وجابوه ليك دوزنة ودوزنته باقي المتطلبات الشرع بقية القوم بحماس بالغ في توفيرها دي شنو؟!!!!!

دي ياود الفكي متروكة لفطنة

القاري زي النقاط الفوق ديك

Quote: إنت يا أبوالنيز خليت فيها فطنة !!

والله يا استاذ جبرة

النقاط ذاتها انا ما شفتها

الا بعد مداخلتك دي

قبيل يتخيل لي قريتها عديل

!!!

Quote: باقي المتطلبات الشرع بقية القوم بحماس بالغ في توفيرها دي شنو؟!!!!!

لا تسألوا عن أشياء إن .............

والله يا أبو النيز حالتكـ سعبه عدييييييييييل!!




زي ما قال وهبة
النقط جات ماشة براااااااااااااها

وهبة انت ما سمعت الفنان البغني ويقول ..

قولي ليهو حبيبك ( امسك ) المجنون الليلة وين يا روحي ..

الفارقت ما لقيتا ....

ود الباوقة

انت سمعت فيصل عجب في السلام الجمهوري

قال نشتري النجدة

قلق قال ليهو السلام الجمهوري دا عوارة ساي

بلا نشتري النجدة بلا اسعاف كلو سفافير وازعاج

Quote: فقلت له بغضب وحنق : (خليهم ....... أنا مالي ومالك) .. الكلمة مكان النقاط متروكة لفطنة القراء

خليهم ..(يكسروك)..

نظام إجتهاد مني وكده..
تضامناً معاك يا ناذر.



لكن بيني وبينك ..
وحات النبي مالافقه.


شكراً وهبه علي البوست السمح بالحيل..
وتحياتي لكل المتداخلين..


محبتي لكم..

ياخي الواحد حاسي بروح معنوية عديل من البوست

يا ناذر ياخ ما اتسترت معانا في زواج اخوي بعد البلنتي العملو فينا محمود داك
جابو لينا كمساري بدل فاقد قرب يخلص الحافلة اوبس يخلص القاعة
عليك الله لو لاقيتو في عرس ولا ماسك مايك كان ما اديتو كف بالنيابة عني

استاذنا ابو حوة

Quote: نظام إجتهاد مني وكده.. تضامناً معاك يا ناذر.

مرورك اسعدنا كثيرا

كن بخير ياصديقي

ورائك شنو في الفنان البقول:
يادموع الدم الجارية في ميداني....؟

Quote: ورائك شنو في الفنان البقول: يادموع الدم الجارية في ميداني....؟

وانت رايك شنو في اللي قالت :

انا اتغيرت ما اتنكرت ليه

والاصل :

انا ما اتغيرت وما اتنكرت ليك

وهبة !!

إزيك ياخ ..

شوف نشيد العلم ..

فى روضة الجيل الجميل ...

ــــــــــــــــــــ

نحن جحد الله جحد الوتن

إن دعى الداء الف لا لن نكن..

نتهدى الموت إند المهن..

نرتشى المجرى باغلى تمن ..

هذه الأرض لنا فليعش سوداننا

عالما بين العمم ..

يابنى الصودان هذا رمزكم

يحمل العدة ويحمى أرضكم!!!

Quote: يابنى الصودان هذا رمزكم يحمل العدة ويحمى أرضكم!!!

يا ابودية

والله ليك وحشة

حاولت الاتصال بك عدة مرات مافي رد

وين اراضيك





_________________________
ادينا نمرة تلفون نتواصل بيها
0912239811

أساسي كيفك ...

Quote: يا ناذر ياخ ما اتسترت معانا في زواج اخوي بعد البلنتي العملو فينا محمود داك جابو لينا كمساري بدل فاقد قرب يخلص الحافلة اوبس يخلص القاعة عليك الله لو لاقيتو في عرس ولا ماسك مايك كان ما اديتو كف بالنيابة عني

تعرف أنا ما قعدت للنهاية اليوم داك لكن لمن بدت حفلتكم كانت الامور ماشة تمام التمام ..

غايتو الكماسرة كتار في السوق يعني لو بديت أكفت فيهم إلا تجيني فليتة يوماتي

يا فاروق أبو حوة ..

وين إنت ياخ وليه ما جيت تاني راجع بوست طارق الامين ..!

إسمك شرف الجريدة والمقال أنا نزلتو بي هناك ..

Quote: والله يا استاذ جبرة النقاط ذاتها انا ما شفتها الا بعد مداخلتك دي قبيل يتخيل لي قريتها عديل

أنا ذااااتى يا عبدالوهاب ياخوى قريتا عديل قمت لمن رجعت ليهاتانى لقيتا ليك بقت نقط .. إنت ناذر ده (حاوى) وإلا شنو؟

Quote: ود الباوقة انت سمعت فيصل عجب في السلام الجمهوري قال نشتري النجدة قلق قال ليهو السلام الجمهوري دا عوارة ساي بلا نشتري النجدة بلا اسعاف كلو سفافير وازعاج

العزيز وهبه
بوست ومتداخليه قمة في المُتعه لشطحات البرنسات والركشات والحمد لله قالو وقفوهم بالقانون أنو مايغنوا غُني الآخرين عشان الكوجين الحاصل وحقوق الملكيه الفكريه والادبيه والحقوق المجاوره.,
** بس السلام الوطني الفوق دا بالبوست كلو... قلت لي عواره ساكت كلو سفافير وإزعاج ونحنا دمنا إتحرق بالمطالبه بمدرب أجنبي للفريق القومي ,, احسن خلينا في مازدتنا...

Quote: قالو وقفوهم بالقانون أنو مايغنوا غُني الآخرين

ياتو قانون ده ؟؟ الناس دي شغـالة غنـا ساااااي

لكم جميعـا" الود .. كل سنة وانتو طيبين

أذكر إنو في حفل تأبين للراحل المقيم سيد خليفة ..
وكانت فقرة محمود عبد العزيز ..
وكان مشارك بأغنية ( في ربيع الحب كنا نتساقى ونغني ...إلى ..... ثم ضاع الأمس مني وإنطوت في القلب حسرة ...
والمزيكا دورت وكرر العازفين الميلودي مرتين تلاتة ..
وظهر الأستاذ ..
وفتحة خشمو ..قال ..
في ربيع ( الكن ) حبا ...
طبعا (الكن) كانت بضم الكاف وكسر النون ...!

قال أستاذ قال ...!
قسسسسسسسسسسس ...!

ده كلو كوم والقاعد يغنى فى (آسيا وأفريقيا) داك كوم تاااانى :

- صوت (طيفور)المغنى .. المغنى ..

يا دغيس ...

Quote: في ربيع ( الكن ) حبا ... طبعا (الكن) كانت بضم الكاف وكسر النون ...!

دا زول معذور وبي سببو ..

مرة في معهد الموسيقى والمسرح مشينا مع شباب رحلة وكان معانا أخونا عازف الشيلو البارع عثمان شيلو وهو برضو شاعر بالمناسبة ، الجماعة قالوا ليهو قول لينا قصيدة وفعلا بدا فيها .. وكان مطلعا بيقول (يا ماشي في درب الغرام) عثمان طوالي بدا وقال (يا ماشي فر غرم الدراب)

Quote: يا دغيس ... Quote: في ربيع ( الكن ) حبا ... طبعا (الكن) كانت بضم الكاف وكسر النون ...! دا زول معذور وبي سببو .. مرة في معهد الموسيقى والمسرح مشينا مع شباب رحلة وكان معانا أخونا عازف الشيلو البارع عثمان شيلو وهو برضو شاعر بالمناسبة ، الجماعة قالوا ليهو قول لينا قصيدة وفعلا بدا فيها .. وكان مطلعا بيقول (يا ماشي في درب الغرام) عثمان طوالي بدا وقال (يا ماشي فر غرم الدراب)

ده زااااتو يا ناذر بيكون بي سببو ..
وكان ما أخاف الكضب نفس السبب زااااااااااااااااتو ...!

هيبة
حفلة خطوبتك دى انا قاعد
وشاهدى اشراقة مصطفى
قول التاريخ
ولا نفتوا

وسلام لهنادى والعيال

اللقب: Tariq Mohamed Osman
: .

Quote: عدد البوستات: 281 تاريخ التسجيل: 23-03-2007 محل الاقامة: عنوان مكتبتى بسودانيزاونلاين دوت كم : اكلات مفضلة: الاسم الحقيقى: التلفون: الجامعة/المعهد: الحالة الاجتماعية: Single العنوان الدائم: الفنان المفضل: اللون السياسى: النوع: Male

طارق محمد عثمان

والله حيرتني عديل

اتلصصت على بروفايلك برضو احترت

حاضر حفلة خطوبتي وليوم الليلة سنقل

وضربت لي اشراقة ما رفعت التلفون

يا اخي والله الكبر حصل اكتب لي هنا[email protected] رسل لي صورة غششني باي حاجة ارفع عني الحرج دا

هنادي والعيال بالف خير واتمناك كذلك

استاذنا جبرا ..

Quote: - صوت (طيفور)المغنى .. المغنى ..

طيفور عديل !!

حليلو هو

استاذنا جبرا ..

Quote: - صوت (طيفور)المغنى .. المغنى ..

طيفور عديل !!

حليلو هو

>>>

في إحدى مراتنا التي رافقنا فيها أحد الأخوة في الحي الى حيث زواجه
بمدينة في وسط السودان فوجئنا بالفنان (( القابض الجو هناك ))
يعني أغنية الأمان

لكن المدهش أنه كان مصرا على أن يصيح بأعلى صوته بين الحضور

(( شيطان وإستمر في جوفي إستقر ))

والغريب أن الحفل كله يتمايل مع فنان المنطقة المدهش

عزالدين الصبابي قال لي :-
(( الحفلة دي بيكون إبليس حاضرها ))


...

Quote: يا خي والله سيد خليفة دا فمغنا فمغ شديد خلاص .. ماقادرأركز والله

قلت لي زولك اتجرس

Quote: بعد ذلك شرعت في دوزنة اوتار العود ثم شرع بقية القوم في توفير متطلبات الجلسة بحماس بالغ ..

زي شنو يا ناذر وضح!

Quote: وعندمى رأى الندامى الدموع المنسالة بوجهي ظنوا أنني أمر بموقف عاطفي من أثر الأغنية ، فشرع بعضهم في البشير والتخفيف بقولهم (أنساها يا أستاذ) .. (البت دي والله تلقا أحسن منها) (البكا ما بيجيب حاجة) .. وهكذا عبارات .. أما الذين وصل بهم التطريب أشده وأقصاه فقد جاملوني ببكاءهم معي بحرقة شديدة !!..

ههههههههههههههههههه والله ياعمك
قايلنك غرقان وهيمان

الله يجازيك يا ناذر جننتني جن

Quote: شيطان وإستمر في جوفي إستقر

بيكون جعان يا صلاح
والله مشتاغووووون يا صاحب

وينك انت

حسين ..

Quote: ههههههههههههههههههه والله ياعمك قايلنك غرقان وهيمان

غرقان مين ورضوان مين يا عم

Quote: في حفلة خطوبتي

ياتا فيهن ؟؟؟؟؟

مشاركة

أغنية الأهيف

قبل كم سنة كدة كانت في السلك

البرنسات شغالين ليك فيهامن طرف

واذكر انها كانت تغنى كالتالي :

آه يا الأهيف أبى ما (يلين) من بعدو صار قلبي (ضنين)


والجماعة شغالين ليك فيها كده وفي ناس اسماء كبيرة في الغنا سجلوها كده في شرايط كاسيت ماستر

طبعا الاغنية ما كده

لاحظنا نحن مجموعة كده معاناود الريح ( حساس محمد حساس ) الذي تبرع وصحح الاغنية دي على حقيقتها

وهي :

آه يا الاهيف أبا ما (يليم) من بعدو صار قلبي (ضريم)

وشتان ما بين هذا وذاك

ياقرجة منور البورد

والله فرحت جدا بمداخلتك دي

وحمدلله علي السلامة

Quote: ياتا فيهن ؟؟؟؟؟

الاولى ياقرجة

هسه في داعي للفضايح دي

Quote: وشتان ما بين هذا وذاك

ود السنوسي

شوف دا كمان :
مرة في واحدة من المناسبات كنا انا وواحد صاحبنا كدا طارحين نفسنا ناس كبار و قلنا نخليها تجوض شوية وننسحب وبعد العشا دخلنا جوة بيت المناسبة بعيدا عن الساوند وازعاجو وقعدنا نتونس .
بعد شوية كدا جابو جنبنا كراسي وتربيزة والشباب قالوا لينا معليش ياحجاج شوية كدا لانو القون دا والفرقة بتاعتو جايين يتعشوا هنا معليش وآسفين للازعاج وكدا ( وش مبتسم ومنتظر اجابة) قلنا ليهم جدا ياحلوين مافي مشكلة بس لما يجوا نحن بنتخارج ومشوا على كدا .
وبعد شوية جا (القون) وميزناهو باناقنتو المفرطة والظاهرة بالعين المجردة جابو العشا اتعشوا وطلعوا ليهم ترمسة كدا ما بعرفها (هينيكان ولا ما هينيكان) وبدا القون يتكلم :
فلان داك البيقلد عاصم البنا والله دا اكبر ( بيضة) تعرف يومتها بيغني في انة المجروح قال شنو ( حب الجبان للروح) بالله شوف البليد دا حب الجبان للروح لا اعمل ليك (.............)
ياخ الكاشف قال حب الجمال للروح ، حب الجمال للروح كررها كم مرة
واحد من الفرقة قال ليهو ياخ ديل كشا مشا دايرين عشا
وانا ذاتي ما عارف الكاشف قال شنو.
صاحبي قال لي تعرف (..........) دا الليلة حيبهدل الحفلة دي بهدلة شديدة وحيطلع (............) الناس القاعدين ديل .
لانو كلمات الاغنية فعلا بتقول حب الجبان للروح وشرح لي واقتنعت بكلام صاحبي والزول البيقلد عاصم البنا وبعد داك عرفت منو الكشا مشا.

ياخ انا بحب السودان ياخ

وبرضو النقاط متروكة لفطنة القارئ ياناذر

ألحق يا جبرا ..

Quote: وبرضو النقاط متروكة لفطنة القارئ ياناذر

صاحبك التقول خلى فيها فطنة ,,

حسين محي الدين

Quote: بيكون جعان يا صلاح والله مشتاغووووون يا صاحب وينك انت

الجميل حسين
عاطر ودي
(( جعان ساي ؟؟ بيكون مجوع الناس كمان .. الناس دي في جنوب أفريقيا ؟؟

ما الدنيا كلها من زمن سرور بتغني الأغنية دي ..

هو في الدنيا دي كلها في أغنية فيها شيطان ؟؟

صحيح من الحب ما قتل ..

دي شاعرها يكون إبليس ؟؟

...

ذهبت في رحلة صباحية لإحياء حفل بمناسبة زواج أحد أصدقاءنا الجعليين..
في الرحلة التي كانت في جناين بري وجدت أهلي الجعليين هؤلاء قد جهزوا مستلزمات الرحلة جيدا .. إذ كانوا يدهنون عددا من السياط بالزيت ويجربوه في ظهور بعضهم البعض !!

وعندما بدأت في الغناء بدأ بعضهم في الدخول وسط الدائرة وهم عاريين الظهر تماما ومكربين جلابيبهم في وسطهم ..

كنت حقيقة أول مرة أرى هذا المنظر أو على الأقل أول مرة أكون بقربه بهذه الدرجة ..
وبعد قليل من البشير وقف حوالي الخمسة أو الستة منهم في صف وأعطى أحدهم سوطا للعريس ليقوم بجلد الواقفين ..

وبعد شوية إستلم العريس السوط وبدأ في الجلد القاسي على ظهور هؤلاء (شبطك شبطك)
والمجلودين في سكون تام دون أن يطرف لهم رمش وسط زغاريد الحريم ...

طبعا هذه عادة متأصلة وسط أهلي الجعليين وبعد عدد من الأغنيات بدات أغني أغنية سيرة حسب الجو المهيمن ويبدو أنني لم أحسن الإختيار جيدا .. إذ في هذه الأجواء الحماسية غنيت أغنية ترباس (الجري دا ما حقي حقي المشنقة والمدفع الثكلي) ... فزاد جنون القوم وبدأو في جلد بعضهم بجنون وسط الزغاريد وتطاير رزاز الدم في كل الإتجاهات (زي بخة المكوجية) وفي تلك الأثناء أتاني أحد العقلاء وطلب مني إيقاف الأغنية فأوقفتها في الحال وإن لم يرض ذلك البعض ..

كان من ضمن المشاركين مغنية أحضروها خصيصا من شندي للغناء في هذه المناسبة .. وحقيقة كان بها شيئا من السادية وحب رؤية الدم إذ أن غناءها ودوبيتها فقط تركز
في التحريض للجلد ودعوة المجلود للثبات وتحقير كل من كان حاضرا ولم يخلع قميصه للجلد فإذداد القوم جنونا وبدأوا في خلع ملابسهم وأذني لا تسمع سوى كلمات (حرم ... على بالطلاق ... أنحنا مانا رجال ؟!) ..وسالت الدماء في كرري تلك ..

وبعد هنيهة إمتلاء المفرش الذي وضعوه للرقص دما وأنا فقط في موقف المتفرج !! ..
إلا أن أحد المجلودين ممن يسيل ظهره دما أتى نحوي وأقسم علي بالطلاق أن أمسك السوط وأجلد الموجودين جميعا كنوع من الإحتفاء والتكريم لي !!

أصبت بالذعر للفكرة ورفضت ذلك إلا أن الساحة بأكملها تكالبت علي لإقناعي بجلدهم وحاولت الرفض ولكنهم كادوا أن يفتكوا بي حقيقة فلم أجد مفرا من فعل ما يطلبون !!!

وقد كان هذا من أغرب المواقف التي وجدت نفسي فيها على الإطلاق إذ إصطف حوالي العشرين رجلا والدماء تسيل منهم والنساء تزغرد وتشجع .. وتلك المغنية مثيرة الفتنة بدأت تغني إحدى أغاني السيرة المحرضة لي للجلد والمحضة للأخرين للثبات ..

في هذا الموقف لم أجد بدا من أن ابدأ الجلد وتوجهت لأحدهم و(معطته) سوطا في ظهره ( لا يكفي لإيلام صبي في الخامسة من عمره) ولم تزغرد له الحريم.. مما زاد من جنونه وأخذ يحمر لي لأزيد من الضرب فزدت العيار قليلا ولم تزغرد الحريم أيضا فغضب الرجل وكاد أن يستل سكينه من ضراعه ويغرسها في أحشائي ...

عندها خفت على نفسي (فمحطته) واحدة أطارت كمية من الدم من على ظهره حتى ظننت أنه سيخر صريعا أمامي ولكن حدث العكس تماما إذ زغردت النسوان وكبر الرجال وثبت الرجل كالطود الأشم ..

بعد ذلك فهمت النظرية وإلتفتت لبقية الواقفين وشبكتهم ليك (شبطك .. محطك .. شبطك .. محطك) حتى أكفيتهم جميعا (وجاتني فليتة في يدي) وحقيقة كنت إقتربت من المغنية صاحبة الناقة وجال في رأسي أن أمحطها سوطا بسبب ما فعلته من تحريض وما أريق من دماء بسببها إلا أنني تراجعت في اللحظة الأخيرة ..

يلا يقوم يجي ليك واحد ضهب سكران كدة داخل في نص معركة كرري دي .. ويحلف بالطلاق علا ينجلد !! وفهمت كما فهم الباقين أنه ليس جعلي ولكنه (حماقة كدة) عاوز يوري الجعليين إنو قبيلتو ما أقل منهم ..

طبعا ما في زول إشتغل بيهو وشبكو ليك (يا راجل ما تتخارج .. أنحنا هنا بنجلد الرجال بس .. شوفلك شغلة أقضاها) .. مما أصاب هذا الضهب بالغضب الشديد ورفض الخروج قبل أن ينجلد .. طبعا الشغلة جاطت وكاد القوم أن يفتكوا به .. إلتفت إلى صديقي العريس وقلت ليهو با خي ما تدوهو سوطين تلاتة خلو يتخارج ؟؟!!

طبعا رفضوا أن يجلدوهو ولكن في النهاية أتى شيخ منهم نحوه يحمل سوطا لو ضرب به ديناصورا (لصرخ واااااااااااااااايييييييي) ورفع ذلك السوط ونزل ليك واحدة بس في ضهر السكران داك جعلته يصرخ ويولول وأراد أن يفر هاربا (بعد أن طارت منه السكرة وجاءته الفكرة) إلا أن القوم لم يتركوه فإجتمعوا فيه بسياطهم وشبكوهو ... محطك شحطك محطك شحطك حتى سالت منه الدماء كما التي سالت من جسد المسيح المصورة في فيلم ألامه .. وفي النهاية صرخ وبكى وتجرس وقالوا ليهو قول الروب فقال الروووووووب فأعتقوهو ..

طبعا دي عاقبة الضهب السكران ولو جبنا خمسة من أهلي الجعليين ديل في حفلات الديم لحراستها بسيطانهم تلك لما تجرأ أحد الضهابا على الدخول وأكاد أجزم أن علي دهب وعثمان ضيق لو كانا تضهبا في بداية نشاطاتهم لدي هؤلاء الجعليين وذاقا لسعات سيطانهم .. لكانا تركا التضهب في الاعراس للأبد

ناذر ....
و لا ننسى ضهب الإمارات أو قول دبايب الامارات الذين يقطعون المسافات من العين إلى أبوظبي و بالعكس للتضهب في حفلة أو لفرتقتها .........
و الضهب أشكال زي ما انت عارف

تراكا مذاكر البوست داك كويس يا ساري الليل

هاكم دي ..
في إجازتي الأخيرة قبل شهرين للسودان ..
كنت بعاما من الدرجة الأولى مع صديقي عازف الأورغن أبو الوفاء ..
والحفلة كانت في ( ريفي ) أمبدة ...!
فوجئنا عند وصولنا بأن أهل العروس جايبين فنان من عندهم وكان هنالك عدم تنسيق بين الطرفين ..
فقالوا خلاص أي فنان يعمل فاصل ..
وقد كان فقد بدأ فنان ناس العروس وبدأ الحفل بأغنية المرحوم خليل إسماعيل الأماني العذبة ...
وطبعاً لخبط ليك كيانها ...
وكان ينجر من عنده الكلمات ..
وعندما جاء في نهاية الكوبليه وتحديداً عند كلمة والسعااااااااااااااااااااادة ....
وأخذ يرددها مرات ومرات ...
قلت لي أبو الوفاء زولك ده بيكون رايحة ليه تكملة الكوبليه ..
وأخيراً تماها بي أغنية زيدان ( في بعدك يا غالي ..)
وكانت والسعااااااااااااادة بقت قسمة ونصيييييييييييييييييييييييييييب ...

Quote: وكانت والسعااااااااااااادة بقت قسمة ونصيييييييييييييييييييييييييييب ...

دغيس يجازي محنك ياخي

دا ببالغ عديل كدا

Quote: آه يا الأهيف أبى ما (يلين) من بعدو صار قلبي (ضنين)

إنتا فى كده يا جمال ؟ أنا مرة سمعت واحد بيغنيها : (طه الاهيف) !!

Quote: (طه الاهيف) !!

حوالينا و ما علينا يا الله

تسجيل للحضور والمتابعة

Quote: تسجيل للحضور والمتابعة

هويدا حضورك باهي

ومتابعتك تسعدنا كتير والله

..

Quote: وعندما جاء في نهاية الكوبليه وتحديداً عند كلمة والسعااااااااااااااااااااادة .... وأخذ يرددها مرات ومرات ... قلت لي أبو الوفاء زولك ده بيكون رايحة ليه تكملة الكوبليه .. وأخيراً تماها بي أغنية زيدان ( في بعدك يا غالي ..) وكانت والسعااااااااااااادة بقت قسمة ونصيييييييييييييييييييييييييييب

Quote: فلان داك البيقلد عاصم البنا والله دا اكبر ( بيضة) تعرف يومتها بيغني في انة المجروح قال شنو ( حب الجبان للروح) بالله شوف البليد دا حب الجبان للروح لا اعمل ليك (.............) ياخ الكاشف قال حب الجمال للروح ، حب الجمال للروح كررها كم مرة واحد من الفرقة قال ليهو ياخ ديل كشا مشا دايرين عشا وانا ذاتي ما عارف الكاشف قال شنو. صاحبي قال لي تعرف (..........) دا الليلة حيبهدل الحفلة دي بهدلة شديدة وحيطلع (............) الناس القاعدين ديل . لانو كلمات الاغنية فعلا بتقول حب الجبان للروح وشرح لي واقتنعت بكلام صاحبي والزول البيقلد عاصم البنا وبعد داك عرفت منو الكشا مشا.

غايتو يا ناذر عشان الناس (الما عندها فطنة) ما تفهم (وهبة) ده غلط أنا ح أملأ ليهم (الأماكن الخاليه وكده ... النقط الأولانية دى جروح صح يا وهبه ؟ والتانيةالزول
والتالتة زيت

دكتور عبد المنتقم،
كيفك؟

انا يا دوب عرفت الضيعك في الثانوي شنو؟ اسئلة املا الاماكن الخالية بكلمات مناسبة!!!! كلماتك مشاترة تب وماعندها اي علاقة بالموضوع.
انت يا اخي فوقك قريتها اول حاجة حتين بعد داك شفت النقط.
ونيابة عن ناذر ووهبة ابعدوا من سؤ النية بتاعكم دا "نحن قصدنا شريف" الا يكون شريف منير ولا شريف ابو الممثل محمد شريف على.

عثمان دغيس !!!!!!!!كيفنك اخوي ؟؟

بالله انت متذكر موضوع محمود عبدالعزيز ؟؟؟ الحفلة كانت في قاعة الصداقة

الجماعة(فرقةالنورس )علي حس قاعة الصداقة دقوا مزيكا مبالغة عديييل فجاء صاحبنا حوتة

في ربيع الكنا حبا ذي ماقلت بضم الكاف ..لكن بعداك استعدل فيها وغناها احسن مايكون

قلت لي مشيت السودان بقيت بعام؟؟ انشاء الله ماتكون راكب قدام.....؟؟؟

انت ماياكا عثمان بتاع الاكورديون والا انا غلطان ؟؟ مشيت مع القراية وهجرتنا وسبت البلد

ياحليلنا وياحليل ايام زمان .....

كدي صحح لي المعلومة دي اول ...؟؟؟

بوست جميل ...تسلم ياصاحب البوست

جبرا ..

Quote: غايتو يا ناذر عشان الناس (الما عندها فطنة) ما تفهم (وهبة) ده غلط أنا ح أملأ ليهم (الأماكن الخاليه وكده ... النقط الأولانية دى جروح صح يا وهبه ؟ والتانيةالزول والتالتة زيت

مالافقة يا عمنا .. صدقني ما لافقة

ناذر

شايفك فكيت لي المايك بتاعي

Quote: غايتو يا ناذر عشان الناس (الما عندها فطنة) ما تفهم (وهبة) ده غلط أنا ح أملأ ليهم (الأماكن الخاليه وكده ... النقط الأولانية دى جروح صح يا وهبه ؟ والتانيةالزول والتالتة زيت

استاذ جبرا

غايتو في الاولى قربت شديد

Quote: دي شاعرها يكون إبليس ؟؟

هسة كان عايز يدخل اتحاد الكتاب والادباء كيف يا صلاح

* مشاركة رقم 100 في هذا البوست
بين قوسين مية مية

ياوهبه
شفت المريخاب ديل خترين كيف......؟
ياناذر
جنس محن.....!!!!
اها ونقول....
سفحة جديدة

Quote: سفحة جديدة

هارون ياحبيب

اسفح ساااااي الايامات دي مدياكم شطرها

... إنتو بس أقعدوا أحكو كده؛ وأنا أشيل وأضرب لى أبوي -في السودان- وأحكي ليهو.

الدقسات دي كان ما كملت سريع قروشنا بتكمل كروت تلفون يا عبد الوهاب.
______________________

الله يستر؛ يا دوب شايفكم دخلتو على جيل ناس محمود عبد العزيز

ومن الأخطاء التى أغاظتنى شدييد خطأ جمال فرفور عندما تلاعب بالبيت:
يا مُقنَع الكاشفات،،، فغير فى تشكيل مُقنَع الى مُقنِع
،،، فغير المعنى الى نقيض تماماً....!

الشمالية .. الفنان يغني في اغنية عبد العزيز المبارك ليه يا قلب ليه تاني رجعت ليه ..
جمبي واحد مستمتع لامن عيونو مولعه و فاتح خشمو لحدي القواطع بتاعة سنه رابعه ديك ..
و شابكني ليك : اغنية جريحه ياخ .. اغنية جريحه ياخ ..
قمت شكيت في الزول فسألتو قلت ليو : الغنية دي سمحه قدر ده ؟
قال لي : كيف ياخ كلها مواعظ ..
قلت ليو يا زول مواعظ شنو ؟
قال لي ما سامعو بيقول جرحك بروح ؟ خلي بالك الزول ده حكيم خلاص


الكلام ده ليو حوالي خمسة سنه .. لا قادر افهم الحكمة و الموعظة .. لا قادر القى الحته دي في الاغنية

Quote: ... إنتو بس أقعدوا أحكو كده؛ وأنا أشيل وأضرب لى أبوي -في السودان- وأحكي ليهو. الدقسات دي كان ما كملت سريع قروشنا بتكمل كروت تلفون يا عبد الوهاب.

ود الريح الهلالابي الحلو

اديني تلفونو انا بضرب ليهو

Quote: انت سمعت فيصل عجب في السلام الجمهوري قال نشتري النجدة قلق قال ليهو السلام الجمهوري دا عوارة ساي بلا نشتري النجدة بلا اسعاف كلو سفافير وازعاج

العزيز وهبه
الموضوع الفوق دا مُمكن يكون مشروع أغنيه مع إيقاع السيره وهاااااااك ياعرضه (......)...

Quote: الكلام ده ليو حوالي خمسة سنه .. لا قادر افهم الحكمة و الموعظة .. لا قادر القى الحته دي في الاغنية

حمور هاك المواعظ

- يا ما حلفت قلت لو غرب تشرق ( دي افتكر فيها اشارة للجهات الجغرافية - جغرافيا )

- خلى الدنيا جنة وكل ايامنا عيد ( دي فيها مكان ومناسبة دينيتان - تربية اسلامية )

لكن المحيرني بالجد جريحة دي ( ياربي تكون اخت الدمغة )

كرومة

كيفك ياحبيب

Quote: الموضوع الفوق دا مُمكن يكون مشروع أغنيه مع إيقاع السيره وهاااااااك ياعرضه

يازول جماعتك ديل الايام بتضرعوا سااااي

ونحن نتاوق بس نسوي شنو عاد

يابخت من كان شداد عمو

Quote: انت سمعت فيصل عجب في السلام الجمهوري قال نشتري النجدة قلق قال ليهو السلام الجمهوري دا عوارة ساي بلا نشتري النجدة بلا اسعاف كلو سفافير وازعاج

والله بالغتوا بوليغ عجيب خلاس
ده هيثم ومرق! ياخ

Quote: الموضوع الفوق دا مُمكن يكون مشروع أغنيه مع إيقاع السيره وهاااااااك ياعرضه

ياتو عرضة يا شباب جنوب ولا (نتوب)
لاحظتوا أسم الزول الموزنبيقي داك "داريو (كان)" وكان فعل ماضي

يا ناذر الرسول فيك غني نسي الجماعة ديل

Quote: يا ناذر الرسول فيك غني نسي الجماعة ديل

حسين

صاحبك الدايرو يغني دا

امبارح رشو ليك هنا لمن آمن

لسه بيكون نائم واظنو شغال بتوقيت كندا اليومين دي

في إحدى الأيام إتصل بي أحد عازفي الأورغن ممن لا تربطني به أي علاقة وثيقة في المجال الفني ولم حدث ان تعامل معي إلا مرة واحدة فقط أو مرتين وبمحض الصدفة من واقع مجاملاتي الكثيرة في مناسبات الأصدقاء والمعارف ..
أقول أن هذا العازف إتصل بي في إحدى الايام وسألني إن كنت مرتبطا كي يربط لي حفلا اقيمه معه.. ولما سألته عن اليوم وكان يوم أربعاء وجدت نفسي غير مرتبط في ذلك اليوم ومن ثم فوضته في موضوع التعاقد مع اصحاب المناسبة وليتصل بي مرة اخرى ليخبرني بالتفاصيل ولم أستشعر رائحة اي نوع من الكوارث حينها ..

المهم انه إتصل بي في ذات يوم الأربعاء نهارا واخبرني أن الحفل قائم في المساء وأنه عليٌ ان اكون مستعدا مساء لأن هنالك عربة ستأتي لتقلني من المنزل ، كما ذكر أيضا أسماء ثلاثة عازفين اخرين أعرفهم بالأسم سيكونون معنا في الحفل .. الذي سيقام بمنطقة العمارات.. وفي المواعيد المحددة حضرت عربة حافلة ووقفت امام المنزل وكنت جاهزا تماما وحين صعدت للحافلة وجدتها خالية إلا من ساوند سيستم بعامليه وبعاميه.. وصاحبي عازف الاورغ ذاك !! ولما سألته عن بقية العازفين الذين ذكرهم .. قال لي أنه صاحب المناسبة طلب فقط أورغ وعازف وفنان نسبة لضيق المساحة بمنزلهم !! فلم أسأله بعدها عن أي تفاصيل كما لم اخوض معه في قيمة المبلغ أو العربون الذي إستلمه من أصحاب المناسبة إذ أنني عادة اتحدث في تلك الامور بعد نهاية الحفل خاصة إذا كان الوسيط احد زملاءنا العازفين ....

ولدهشتي الشديدة تخطت الحافلة في سيرها منطقة العمارات بأسرها فسألت عازفي ذاك عن السبب فقال لي ان المناسبة قد تم تحويلها إلى الصحافة شرق !! فتعجبت وسألته لم لم يخبرني بذلك ؟ فقال لي أن صاحب الحفل اخبره متاخرا بالمكان الجديد !! ..
لم اكترث كثيرا ولم يكن الأمر يمثل فارقا بالنسبة لي .. ومن ثم وصلنا إلى مكان الحفل ووجدنا كل شئ معد وتم إستقبالنا كأفضل ما يكون وإكتشفت هنالك ان بعض أصحاب الحفل هم من معارفي وزملائي قديما في الدراسة .. فبدأ الحفل وإنتهى كأروع ما يكون ولم يعكر صفو الجو أي شئ وتم وداعنا وإنطلقنا غافلين .. وفي الطريق أعطاني عازف الاورغ نصيبي من مبلغ الحفـل وكان شبه مضاعف عن العداد المتعارف به في تلك المناسبات، ففسر لي عازف الاورغ ان ذلك بسبب إلغاء بقية العازفين في اللحظة الاخيرة ..

المهم انني إستلمت المبلغ واوصلتني العربة إلى المنزل ومن ثم خلدت غلى النوم ..

وفي اليوم التالي حوالي الساعة الثانية ظهرا دق باب المنزل ولما فتحته وجدت شخصا غريبا لا أعرفه وسألني إن كنت الفنان ناذر خليفة فأجبته بالإيجاب ومن ثم أبرز لي امر قبض صادر من قسم شرطة العمارات وطلب مني الذهاب معه !!

أصبت بالدهشة واستفسرته عن التفاصيل !! إلا انه ذكر لي أنه ليس مخولا بذكر أي شئ وان علي فقط الذهاب معه للقسم فلم املك غير الإذعان وذهبت معه وفي ظني أن الامر متعلق بمسألة تخص العمل والتجارة في الشركة التي أعمل بها ..

وعندما وصلنا للقسم لم يكن المتحري موجودا ولكني وجدت شخصا اخر لا اعرفه وكان هائجا ومائجا وعندما راني إنفجر في وجهي (يعني شنو يعني !! عاملين فيها حرامية وصعاليك ؟ البلد دي ما فيها قانون ولا شنو؟ ) لم افهم طبعا سبب ثورة الرجل لأنني لا اعرفه وقبل ان الم باي تفاصيل ونسبة لغياب المتحري تم إدخالي للحراسة رأسا وانا في شدة ذهولي من هذا الموقف الغريب !! ولكن تفجر ذهولي أكثر عندما وجدت في الداخل عازف الاورغ إياه !!! وحاولت ربط الامر في ذهني ولم أستطع وقبل حتى ان اسلم على أي شخص من الموجودين بالداخل صحت في عازف الاورغ (تعال يا زول !! في شنو والحاصل شنو؟!) .. فحاول عازف الاورغ مداراة الموقف بالقول (لا لا سوء فهم بسيط إنتا بس خليك طبيعي وكل شي حا يمشي تمام التمام).. فصحت فيه بحدة (إنتا عبيط ولا شنو ؟؟.!! شايفني قاعد في بيتنا ؟ أنا قاعد جو حراسة وتقول لي خليك طبيعي ؟ الحاصل شنو؟) ..
وقبل أن يخوض في التفاصيل جاء أحد العساكر ونده إسمي وخرجت لمقابلة المتحري وهناك عرفت أن الموضوع اساساً يتعلق بشكوى مرفوعة ضدي من أحد الأشخاص بدعوى أنني إتفقت على إحياء حفل له ولم أحضر للحفل .. وإندهشت لذلك فأخبرت المتحري أنني لم اتعاقد مع أي شخص بالأمس لإحياء حفل له غير الحفل الذي كان في الصحافة شرق وإلتزمت به مع عازف الاورغ الذي بالداخل !! وطلبت مقابلة الشاكي فأحضروا لي الشخص الذي كان غاضبا ولا يزال فسأله المتحري إن كنت انا من تعاقدت معه .. فأجاب الشاكي بالإيجاب فإندهشت وسألته (يا زول أنا متين شفتك لما إتفق معاك وإنتا متين حصل قابلتني !!) فقال (مش إنتا ناذر خليفة ؟) قلت ليهو (ياخي أأي أنا زفت خليفة زاتو إنتا متين إتفقت معاي ؟؟!!) فصاح غاضبا (عازفك بتاع الأورغن المحبوس دا هو القال إنتا فوضتو عشان الإتفاق ) سألته (إنتا ساكن وين يا ابو الشباب وحفلتك دي كان المفروض تكون وين!!) قال لي (في العمارات) ..

وهنا أدركت الأمر برمته وهو ان عازف الأورغ ذاك هو الذي حول مكان الحفل لغرض في نفسه من العمارات للصحافة شرق دون إخباري فأقسمت للمتحري ولصاحب المناسبة انه لا علم لي بكل ذلك وان عازف الاورغ هو الذي تعاقد من تلقاء نفسه ولكنه لم يخبرني عن أصحاب الحفل .. فقال لي المتحري أن الشاكي الان يطالب بتعويض 2 مليون جنيه عن الأضرار التي تكلفها من جراء التحضير للحفل من صيوان وكراسي وعشاء وإضاءة ودعوات للضيوف وأن الحفل قد فشل بسبي وأن علي دفع التعويض !!!!!

فأخبرت المتحري بأن الأمر لا علاقة لي به وان الموضوع برمته قام به عازف الاورغ دون علم مني وطلبت شهادة فني الساوند سيستم والذي يعلم ذلك .. فوجد المتحري أن هنالك تناقضا في اقوالي واقوال عازف الاورغ مع ظهور إضطراب لدى الشاكي والذي لم يعد يعرف اين الحقيقة !! فطلبت من الشاكي ان يعطيني فقط موبايله كي أتصل بفني الساوند وفعلا إتصلت بفني الساوند وشرحت له الموقف ووعد بالحضور فما كان من المتحري إلا إرسالي للحراسة مرة اخرى لحين حضور فني الساوند للإدلاء بشهادته ....

وكنت في تلك اللحظة اغلي من شدة الغضب ولم أتحمل منظر أن أسير أمام العسكري في طريقي للحراسة أمام خلق الله هؤلاء وكنت اقرأ في وجوههم أسئلة من شاكلة (هسي يا اخوانا ود الناس دا يكون مالو ؟؟) و (الزول دا بيكون لاهط ليهو قروش شركة كبيرة) و (ياربي بيكون هو الكاتل الزول داك الجابوهو في جريدة الدار؟؟!) وكدت أصيح في وجوههم (يا بشرية هوي أنا فنان فناااااااااااان يعني مطرب وكدة ، والقصة ما زي ما إنتو متصورين كلها موضوع زوغة بي عداد حفلة ، وهسي الموضوع حا يتحل لمن يجي بتاع الساوند) ..
وعندما أدخلت الحراسة مرة أخرى وجدت بتاع الاورغ ذاك في وجهي مباشرة وسألني بتعاطف مفتعل (أها إنشالله عرفو إنك ما عندك علاقة بالموضوع؟؟!!) فصرخت في وجهه (ما عندي علاقة يا إبن الـ ....) وطوالي دخلت في الزول بلنجات وشلاليت وكفوف (لا حظتو !!انا هنا ذاتي فقدت المنطق وبقيت أكتب بالدارجي ) ..

ودورت ليك في الزول خبت وناس الحراسة حاولوا يفكونا وحصلت دربكة .. (تعملا فيني يا إبن الـ ..) ، الليلة إلا ...... في الحراسة دي ..(عشان الواحد ساكت ليكم والله لمن نطلع من هنا إلا ما تقابلني ) .. والجماعة في الحراسة شابكيني ليك (يا شباب عيب ..إنتو ناس كبار .. دا شنو القاعدين تعملوا فيهو دا .. هسي الناس يقولوا عليكم شنو ؟!) .. والغريبة إنو مافي ناس زاتو شايفننا إلا هم وهم أقل واحد فيهم يكون كاتل ليهو شافع صغير كدة .. طبعا حراسات السودان بدخلو كتال الكتلة مع حرامي غنم الحلة .. والسكران مع معتاد الكسر والمجنون مع الزايغين بالعداد الزينا كدة ...

طبعا جا العسكري داخل جوة الحراسة وأعاد النظام ... وكويس أنو العسكري كنت بعرفو وهو عارف القصة قام طلعني من الحراسة وختاني في الفرندة القداما وديك حتة أنضف شوية من الجوة .. وبقيت أأشر لي بتاع الأورغ وانا من محلي داك وبخت صباعي في رقبتي علامة الضبح بما معناهو (الليلة بضبحك انا) ... طبعا أخوكم من اليوم داك وبقى معتاد ضبح ذي ما شايفين في البوستات التانية ..

ومما زاد من توتري إنو بتاع الساوند إتاخر وقعدت في الحراسة لحدي ما جاء قريب المغرب وقابل المتحري وحكى ليهو القصة وبرا ساحتي من الموضوع بحكم إنو كان معانا وإنو هو زاتو اتفاجا بإنو الحفلة إتحولت من العمارات لي الصحافة شرق وبهذه الشهادة أستطعت الخروج من الحراسة بالضمانة الشخصية العادية أما بتاع الاورغ فقد ظل بالحراسة قرابة الثلاثة أيام لان اليوم الثاني تصادف يوم جمعة وهو إجازة ومن ثم أصدر وكيل النيابة قرارا بالإفراج عنه مقابل كفالة مالية توازي المبلغ الذي طالب به الشاكي ....

طبعا دي كانت (أول مرة ولحدي هسي اخر مرة) أدخل فيها حراسة أقسام الشرطة .. والغريبة أن قصتي تلك إنتشرت بين المغنيين الهواة وصرت مضرب مثل إذا ما جاء ذكر موقف مشابه إذ يقولون (ماتدقس دقسة ود الخليفة) ... وفي هذا معهم حق إذ ان في تلك الليلة فعلا ود الخليفة دقس ...

ناذر
عبد الوهاب
جبره
ده اجمل وامتع بوست علي الإطلاق
اقرا قصه من قصص ناذر اضحك ومره ابكي
املأ الاماكن الشاغره اتذكر ايام الشقاوه

ودابكدوك

Quote: طبعا دي كانت (أول مرة ولحدي هسي اخر مرة) أدخل فيها حراسة أقسام الشرطة ..

حلوة لغاية هسة دي
المهم بقت هندك خبرة كويسة
البلد دي ما مضمونة يا معلم

Quote: ( دقسة ود الخليفة)

دي مالها عاملة زي ( سكرة يني)

حسين ..

Quote: حلوة لغاية هسة دي المهم بقت هندك خبرة كويسة

لا حظ الكتابات دي انا محتفظ بيها من سنة 2005

يعني ما معروف إذا كنت دخلت الحراسة بعد داك ولا لا

في التسعينات ذهبنا (مجموعة من الاصدقاء) ومعانا الاستاذة سلمى الشيخ سلامة الى احتفال بوداع واحد من اصدقائنا .الاحتفال كان مبسط وانيق وجميل وكان فيهو فنان لذيذ جدا بعد المرطبات بدأ الفنان يغني اول اغنية مرت بسلام والتانية وفي التالتة وكانت اغنية عبدالقادر سالم( كردفان) بداها كدا بعد صنة للفرقة :

اطير غزال انا في القويز

وانفجر الموجودين كلهم بالضحك الا سلمى قنبت تكورك ليهو اسير اسير يامعلم والمفاجأة انو الراجل اتعقد وخلى الاغنية ودخل في واحدة تانية بكل برود زي الماحاصل شي .

إتذكرت لمن حيدر بورتسودان طان طالع في الكفر ..

واحد من فنانين الحلة كان بيغني عروس البحر كدة :

عروس البحر يا حورية يا بورسودان يا حنية من قلبي ساير في حبك أهدي سلامي وألف تحية ..

صورة نادرة للضبانة الدخلت لناذر في نخرتو

يا مان دي ضبانة ولا نحلة ؟

هاك دي من طرائف أبو داؤود:

في إحدى هيجات جعفر نميري أمر بالقبض على الفنان وردي وإدخاله السجن .. وقد توقع زملاءه الفنانين الا يمكث وردي في السجن طويلا وان نميري قد يأمر بالإفراج عنه في أقرب فرصة ولكن خاب أملهم بطول المدة فإجتمعوا لتدارس ما يفعلونه بشأن إقناع نميري بالإفراج عن وردي فكان أن إتفقوا بأن يقوموا بدعوة نميري في دارهم بإتحاد الفنانين وكلفوا المرحوم الظريف أبو داؤؤد بأن يقوم بتسلية نميري بإلقاء النكات نسبة لأن نميري كان يستلطف أبو داؤؤد كثيرا وعندما يصفو نميري يطلب منه أبو داؤود أن يفرج عن وردي وتوقعوا أن يستجيب نميري للطلب ..

وفي الموعد المعين حضر نميري للدار وكما أتفق تماما فقد جلس أبو داؤود جواره وأخذ يلقي عليه عددا من النكات والمواقف الطريفة ونميري يضحك بكل إنشراح مع إسترسال أبو داؤود في حكاياته الجميلة ..

عندها أشار زملاء أبو داؤود له بمعنى أن اللحظة المناسبة قد أتت ، فألقى أبو داؤود نكتة أخيرة (جوكر) في أذن نميري إرتج لها نميري من الضحك وهنا تحديدا طلب أبو داؤود من نميري الإفراج عن وردي ... ولكن حدث مالم بكن في الحسبان إذ تجهم وجه نميري فجأة وإحمرت عيونه وإلتفت بحدة لأبو داوؤد وصاح فيه بغضب : وردي مالو قلتا !!!

فخاف أبو داؤود خوفا شديدا مع تغير مزاج وردي لكنه أجاب بسرعة بديهة يحسد عليها ..
(وردي يا ريس تعبنا بي شيل أعمدة الأكل .. عليك الله حولوا لينا بورسودان)

وهنا تغير مزاج نميري مرة أخرى وإرتج من شدة الضحك ومن رد أبو داؤود المفاجئ وأمر فورا بالإفراج عن وردي .. ولم ينقض هذا المساء حتى كان وردي في منزله ..

بالغت لكن ياهيبة ياخ
غالبك يعنى ترسل لى رسالة تقول لى عن الدقسات دى
انت ماعارفنى داقسة اليومين ديل



لكن دقستك انت مباااااااااااالغة

تنسى طارق محمد عثمان ابو صلعة بالغت لكن- شينة منك نظام المديدة حرقتنى وكدى
طارق ده لو سألت منو تراب المين روود بتاع جامعة الخرطوم لحكى لك مايصلع بك..شباب والحمدلله اكبروا كان كبرتوا- مخير الله عليكم

وبما انك استشهدت بى اؤكد الآتى {دى لعناية نقابى عجوز}

حضرت خطوبتك الاولى اللى طرقشت بسبب الدقسات بتاعة الفلكسواجن

بصراحة مامتزكرة انو كوجان كان معانا
لكن متزكرة كويس حنان الطاهر وعنكوليبة واليوم داك انا كنت فى قمة بهجتى لشىء حدسى- عشان حلم جميل كانت الهيصة للصباح فى بحرى
سلمى سلامة فردة ياخ كانت ورفيقة درب من غير دقسات

اما خطوبتك التانية وعرستك الاولى انا كنت للاسف برة السودان- هو كان سنة كم بالله ياهيبة؟ ياخ ماتعيدوا لى تانى خلونا نهيص تمام
خاصة وانو ناذر فنان وبيختانا من ناس الدقسات..

غايتو ضحكت لمن الله غفر لى- شكرا ليك ولضيوفك



-------

كرومة انت شنو قصة العلم الماسك فيها دى؟ امشى شوف ليك كمبو ينفعنا

واحد من أصحابي البعامين ديلك ربط لي حفلة في منطقة اركويت .. وبما إنو بعام مشهور جدا قلت أعمل حسابي وما أوافق ليهو إلا يديني العربون بتاع الحفلة كامل .. المهم ولدهشتي الشديدة البعامي دة جاب لي مش العربون بس !! جاب لي قروش الحفلة كاملة (خمسمائة ألف جنيه بالتمام والكمال) .. المهم يوم العرس البعام داك مرازيني من الساعة أربعة عصر (تقول تمرين كورة ما حفلة) .. لمن جات المواعيد جا بتاع الحافلة الكنت رابطو في البيت وطلعنا جمعنا بقية العازفين والبعامين .. فرقة موسيقية مصغرة عبارة عن أورغن وساكس وبتاع إيقاع ودنب .. المهم مشينا بإرشاد البعام داك لبيت العرس وما كان في أي سب وجيه يخلي الواحد يتشكك في أي نوع من المقالب خاصة وإنو العداد في جيبي بالكامل ..

أها لمن وصلنا بيت العرس وبدوا الجماعة يركبوا في العدة جا ليك واحد طاير من أهل العرس وقعد يكورك (ديل شنو ديل !! دي فرقة منو !!) الجماعة إتحيروا قالوا للراجل دي فرقة ناذر خليفة ..الراجل إندهش وقام كورك (ناذر منو يا زول !! أنا ربطت الأمين عبد الغفار وهو جاي يغني في الحفلة دي .. يلا لمو العدة دي بسرعة) !!!!

طبعا أنا إندهشت من الموقف .. قمت ناديت البعام داك وقلت ليهو (يا زول الراجل دا منو ؟! وإنتا قروش الحفلة الأداك ليها منو؟؟!) الغريبة إنو البعام طلع هو زاتو ما بيعرف الزول وقال إنو إستلم المبلغ من أخو العروس شخصيا !!! طيب أخو العروس دا وينو !!

البعام لفة وجا جاب أخو العروس الكان متحرج من الموقف (لاحظوا دا كلو والعازفين ديل فوق المسرح قدام خلق الله الكانوا متابعين النظرية) .. أخو العروس قال لينا (والله يا جماعة أنا أسف لكن الزول دا خالي وهو مصر إنو يجيب الأمين عبد الغفار يغني لإنو ما بيعترف بي زول غيرو.. وأنا لمن ربطتكم هو كان ربط الامين في نفس اليوم وما كلمني وانا ماكلمتو) ..

في اللحظة دي قمت أنا سألت الراجل (طيب لمن عرفتا ماكان تتصل بالتلفون تورينا الحاصل بدل ما نتبهدل كدة) !! الراجل قعد يتعذر والقصة شكلها جاطت ..

قام بعد شوية جانا الراجل المتشنج داك يكورك (إنتو لسة قاعدين !! ما تفضوا لينا المسرح دا يا شباب .. الأستاذ الأمين عبد الغفار قرب يصل !!) ..

طبعا في الحتة دي كبست ليك ألف وجيت على الراجل قلت ليهو (يا ابن العم مالك بتكورك كدة !! يا خي الناس ديل ما جوكم هنا فرضوا نفسهم عليكم .. أنحنا جايين بي إرتياط رسمي .. وبما انو في سوء تفاهم بيتحلا هسي .. لكن مافي داعي لي إسلوبك دا !! أنحنا ناس محترمين وجايين محترمين وأحسن نرجع محترمين برضو والفنان الكان حايغني دا ما جاي متضهب ساكت .. عندو وزنو وعلاقاتو وإرتباطاتو برضو) ...

عمنا داك حمر لي كدة (يمين انا شفتا عينو حمراااااااااا زي الجواها حنبوكة) قال لي هو وينو فنانكم دا كدي النشوفو بي عيني دي .. في اللحظة دي خفت أقول ليهو (أهندا انا ذاااتي) يقوم يسل ليهو سكين من ضراعو ويغرزا في بطني .. أخدت لي لفيتة كدة لقيت البعام داك واقف بيسمع في الكلام بكل براءة وفوق راسو في ملاكين صغيرين بيدوروا فوقوا (علامة البراءة البنشوفا في أفلام الكرتون ديك) قلت ليهو (يا هو دا الأستاذ ناذر خليفة) .. البعام إنخلع وقبل ما يتكلم الراجل فتح فيهو (هسي عليك الله دي خلقة فنان ولا خلقة سباك !! يازول ماترحم نفسك !! بلا ناذر بلا بطيخ !! أمش لم جماعتك ديل قبل ما نجدع ليكم العدة برة) ..

طبعا بعد داك أنا طلعت برا والجماعة لموا العدة في الحافلة ووريت أخو العروس بإنو القروش كلها وزعتها على العازفين وتاني مافي طريقة ترجع ..

طبعا صاحبنا البعامي داك زعلان مني في الحافلة والطريق كلو يطنطن .. كييييييف أنا أقول للراجل داك إنو هو ناذر خليفة !!! طبعا الجماعة ماخدين الموقف ضحك وأنا كنت عامل نفسي جادي مع إنو بي جوة يقرب أبكي من الضحك قلتا ليهو (أمال إتبهدل ليك أنا وإنت السبب في الإحراج دا كنت عايزني أعمل شنو يعني ) ... قال لي (طيب القروش وينا ؟؟) قلت ليهو ( شالا الراجل المتشنج داك دايرني أقول ليهو ما بديك ليها!!) ثم خطبت في ناس الحافلة (يا شباب أنا والله أسف للمنظر دا .. لكن عشان كدة أنا الليلة عازمكم عشا كارب في البوادي رأيكم شنو!! ) الجماعة ما صدقوا إنو في تعويض للمسألة وطوالي الحافلة دورت لي نمرة إتنين ونزلنا البوادي وأنا عامل فيها عازم فيهم ونزلت ليهم كمية من الجداد تكفي ليها قطيع بتاع ثعالب ودفعت الفاتورة قريب المية ألف جنيه .. وبعد داك كل واحد أديتو بيبسي موبايل في يدو وقلت ليهم (أها يا شباب كدة كيف !!! ) قالوا كلهم بصوت واحد (تماااااااااام يا أبو النيز) ... قلت ليهم خلاص يلا وصلوني بيتنا وبعد داك أفوتكم بعافية ..

طبعا وصلوني البيت وتاني يوم طوالي مشيت برج البركة غيرت موبايلي وإشتريت لي شريحة شحن أبو خمسين ألف وقميصين وفتيل ريحة BLUE وجيت راجع البيت

يعني الواحد يتبهدل ويتحرج بدون تمن ولا شنو

أها يا وهبة والشباب ..

جبت ليكم مداخلة من الارشيف عمرها اكتر من تلاتة سنوات وكاتبا عضو المنبر الفنان ياسر حنا الله يطراهو بالخير ..

Quote: ما الحاصل في البلد ده والله يا ناذر بخليك تنسى اسمك زاتو وخصوصا الواحد لما يكون وبعيد وانت عارف القربة بضخم ليك الحاجات في راسك لما تقرب تتلحس، ان شاء الله بس تكون الامور هدءت وعادت لي نصابها تعرف يا ناذر مسيرتي الغنائية زاتها ما طولت كتير زي ما قلت ليك استلمت ليك المدرسة واجدعت ليك جديع بطال جدا، لما جات الطامة الكبرى، وانا معرفتها انها ديك الطامة الكبرى الا قريب ده( شفت انا بريء كيف ) اها مره عندنا كان تخريج بتاع الكشافة وبما اني كنت خريج وفنان المدرسة الأوحد يا زول استلمت الحفلة، وكان من ضمن الحضور الوالد، الله يديه الصحة، والفنان عبد الكريم الكابلي ونقيب المحامين في ذلك الوقت الاستاذ عبدالله الحسن كان رئيس مجلس الاباء وجمع غفير من الآباء. اها لي شلقاتي قلت اغني بين جناين الشاطئ وفوق قصور الروم(شفت اللخبطة دي كيف )، وانا تعرف لي هسع عندي مشكلة مع الاغاني، بحفظها بي طريقتي، يعني بنرمد ليك الكلمات فوق تحت، يعني مثلا غنية عبد المجيد عبدالله لغاية وقت قريب انا انا كنت بغنيها " اكبر غلط ينبض بحبك فؤادي" لغاية ما عرفت انها ما اكبر غلاك واذكر لما كنت صغير عندنا خالنا شامي ليك نميري شمة بطالة خلاص، بس كل مرة ينادني ليك ويطلعني ليك في الطربيزة فوق ويقول لي يلا غني لي نميري، اوقوم اغني ليه بالملاليم قلناها نعم قلناها نعم، والشعب قسم يقولها نعم ليك يا لاقائد المبهم وحاجات زي دي كتيرة لغاية ما حبوبتي الله يرحمة تهيج ليك ياولد انزل عايز تجيب لينا الكفوة مالك، وايام انقلاب هاشم العطا يناديني ليك عشان اقرا البيانات الكانو بذيعوها في الايام ديك، اقوم اقول ليه الرائد ماعارف فلان الفلاني الطرد من الخدمة والتطهير من الركبة اها دي حالتي مع الاغاني، اليوما ديك طبعا ما قصرت عست ليك الاغتية عواسها بي مزاج زي: خلي جات متبوعة حايمة كالدينار وفي الطريق ان مرت الناس عليها تقوم، ووحاجات تانية حامياني لو قلتها هنا بكرة بلحق امات طه في البورد فجأة كده شفت ليك الناس في الصف الامامي كانما صبت فيهم مطرة والاستاذ المسئول عننا عرق وبقى يبلع في ريقه، اها اول ما نزلنا جاني ليك طاير انت الغنية دي جبتها من وين والحفظك ليها منو قلت ليه بكل براءة سمعتها في الرادي وما في اي زول حفظني ليها، قال كدي قولها تاني وفعلا قلت زي حصل في المسرح، بدأ يسالني من بعض الجمل دي عارف معناتها شنو وانا ارد ليه بكل براءة وانا فعلا ما كنت قاصد اي حاجة ولغاية اللحظة ديك انا ما عارف الحصل شنووما عرفت معن الكلام ده الا بعد حين ، وبعدين ونحن راجعين في السكة مع الوالد آ عامل لي فيها فنان، عايز تطلع فنان، هسع الطلعوا فنانين عملوا شنو...يا ولد احسن ليك شوف قرايتك يازول انا بعد الاستجواب داك والهرشه بتاعت الحاج من ديك اعتزلت الغنا نهائي وتاني ما فكرت أغني الا وانا في جامعة ودي كمان ليها قصة طويلة لك مني خالص الود

Quote: لا تربطني به أي علاقة وثيقة

هسي دي براها ما دقسة؟
ناذر ياخ إما تشيل كلمة (وثيقة) أو تشيل (أي)

ونحن كمان (لا ينقصنا سوى عدم مشاهدتكم)

Quote: وردي يا ريس تعبنا بي شيل أعمدة الأكل .. عليك الله حولوا لينا بورسودان

مباااااااااااااااااااااالغة ياخ انت بتجيب الكلام ده من وين
فصلة السنين.. الله يجازي محنك


البوست ده حياخذ جائزة نوفل للفنون

Quote: حضرت خطوبتك الاولى اللى طرقشت بسبب الدقسات بتاعة الفلكسواجن

اشراقة

في داعي لشيل الحس دا هسه .

بس اهم من دا كلو نقابي عجوز ما يعرف التاريخ

وطارق دا والله ما اتذكرتو صورة في الايميل عسى ولعل الحق الراجل اعتذر ليهو

وسلمي لي على العيال وجليد فيينا

Quote: اها دي حالتي مع الاغاني، اليوما ديك طبعا ما قصرت عست ليك الاغتية عواسها بي مزاج زي: خلي جات متبوعة حايمة كالدينار وفي الطريق ان مرت الناس عليها تقوم، ووحاجات تانية حامياني لو قلتها هنا بكرة بلحق امات طه في البورد

أبو العزائم ..!!

Quote: هسي دي براها ما دقسة؟ ناذر ياخ إما تشيل كلمة (وثيقة) أو تشيل (أي) ونحن كمان (لا ينقصنا سوى عدم مشاهدتكم)

الكتابات دي طبعا محتاجة لي تنقيح وأنا ما فضيت ليها

وأرجو ألا تتقبلوا سوى أسفي الشديد ...

في الفترة التي اعقبت زواجي مباشرة تمنعت على كل اوض وبرندات بحري نسبة للهجمة البربرية التي شملتني بها النساء من صرف حتى تأكدوا تماما انني لا تجوز في الا الرحمة انصرفن الى اخر .
اتجهت الي اطراف العاصمة كي اجد سكنا معقولا ،الظروف ودتني امبدة شارع السبيل ومكثت بها حواى ست سنين تزيد او تنقص قليلا قبل عودتي الى بحري مسقط رأسي .
في امبدة سكنت في شارع فريد وغريب وجميل كان يسكن المنزل الذي امام منزلي الشاعر محمد طه القدال وعن يميني مباشرة الشاعر والصديق الراحل عمر الطيب الدوش رحمه الله واسكنه فسيح جناته .
ويمين الدوش مباشرة الشاعر الانسان التجاني حاج موسى الرجل ود البلد الطيب المعشر عليه وعلى كل الجيران بذلك الحي الجميل التحية والسلام .

المقدمة دي داير اوصلكم لانو حتة فيها شعرا بالحجم دا لابد ان يرتادها فنانين بشكل مستمر ودائم بحثا عن القصائد وكدا . القدال بيته كان كبير جدا وفيهو حوش واسع ومنجل ( من نجيلة ) وتقريبا مفصول من باقي البيت فكان مريحا جدا بالتالي قعادنا كلو بعد المغرب عند القدال والنصيحة لله هو رجل كريم واجواد واخو اخوان وانساني .
بنطلع العود ونغني كلنا بنعرف نعزف الا الدوش عليه رحمة الله . ولكنه كان بيقرا الشعر بطريقة مدهشة وتطربنا جدا وكان في مقطع بيرددو طوالي لاغنية للتاج مصطفي والذي انضم ابنه المحامي محمد التاج الى الشلة مؤخرا وهو ماهر جدا في عزف العود وامهرنا جميعا والمقطع بيقول : في اغنية انصاف
عودت روحي ......
نسيت الباقي
وتاني عندو مقطع دوبيت :
يا خالق الوجود انا قلبي كاتم سرو
ما لقيت من يدرك المعنى بيهو ابرو
قصبة منصح الوادي المخدر درو
قعدت قلبي تطوي وكل ساعة تفرو ( بياخد ليهو وقفة قبال ما يقول تفرو ويبسط يده اليمنى في محاولة لتصوير المشهد ) رحمه الله

في مرة كنا قاعدين دق الباب الفنان الامين عبدالغفار ودخل وجلس وشرب الشاي وصلى بينا المغرب وصوتو جميل في التلاوة وقعد كباقي الفنانين البيجو دايما يشكى من الزملاء الذين اصبحو يغنو اي حاجة والكلمة الغنائية انتهت في البلد وفلان داك غنى كدا والاغنية ما بتشبهو ويخش المرحوم الدوش يقرا المقطع بتاع التاج مصطفى واخيرا يقوم الفنان يتأهب للخروج ويقول للشعرا يا اخواننا ( ما تنسونا من صالح الدعاء ) ويمشي وبعد شوية يجي غيرو.
الامين عبدالغفار قعد كتير وحكى والقدال قال ليهو والله يا استاذ الامين انا كنت في لندن لاقيت وردي والكلام جاب الكلام وذكرك كواحد من الاصوات الجميلة في الساحة وقال صوتك اظنو سبرانو .
- الامين قال ليهو ابدا انا صوتي التو اول والسبرانو طبقة صوت خاصة بالنساء. لكن الامين اتكيف جدا عليك الله ياستاذ وردي ذكرني ليك بالاسم كدا
- القدال قال ليهو والله دا الحصل .
انا ما عارف الخلاني اخزن الحوار الدار دا شنو يوم من الايام مشيت المنطقة الصناعية لاصلاح سيارتي ولقيت الامين دا عند نفس الميكانيكي البصلح عندو اتحركت جواي قوة شريرة ما عارف جاتني من وين
قعدت جنبو وقلت ليهو الاستاذ الامين
- اهلا اهلا
- العربية مالها
- الفرملة
- قلت ليهو تعرف ياستاذ سنة كم كدا كنت في ( القاهرة) لاقيت وردي وذكرك لي بانك واحد من اجمل الاصوات في الساحة وقال لي صوتل التو اول .
الزول قام وضرب التربيزة الجنبو وقال صااااااااااااااااااااح.
طيبة الرجل خلتني اندم على هذه الفعلة واعترفت ليهو بانو الكلام دا ما صاح لكن الكلام دا حكاهو لينا استاذ القدال وكنا قاعدين سوا انت ما اتذكرتني ولا شنو ؟
قال لي ايوة اتذكرتك والله انت ما كنت بتتكلم خالص آي والله .
لكن عارفين المفاجأة وين المفاجأة انو لمن جا ماشي قال طيب يا استاذ (ما تنسانا من صالح الدعاء ) باعتبار انو انا شاعر

عبد الوهاب ..

Quote: قلت ليهو تعرف ياستاذ سنة كم كدا كنت في ( القاهرة) لاقيت وردي وذكرك لي بانك واحد من اجمل الاصوات في الساحة وقال لي صوتل التو اول . الزول قام وضرب التربيزة الجنبو وقال صااااااااااااااااااااح. طيبة الرجل خلتني اندم على هذه الفعلة واعترفت ليهو بانو الكلام دا ما صاح لكن الكلام دا حكاهو لينا استاذ القدال وكنا قاعدين سوا انت ما اتذكرتني ولا شنو ؟ قال لي ايوة اتذكرتك والله انت ما كنت بتتكلم خالص آي والله . لكن عارفين المفاجأة وين المفاجأة انو لمن جا ماشي قال طيب يا استاذ (ما تنسانا من صالح الدعاء ) باعتبار انو انا شاعر

الأستاذ الأمين عبد الغفار راجل طيب وقلبو أبيض وعلي نياتو .. صدق أنا ما بعرفو شخصيا لكن واضح دا من نوعية المفردات البيختارا لي غناهو .. يعني زول بيغني (ناس معزتنا) بي كل الشجن دا ..أو (خليل العازة) بي الخليط الفريد بين الحزن والفخر والحماسة ، تفتكر دا نيتو ولون قلبو كيفنها ..!!

لكن مرة والله حصل موقف بايخ جدا من حسين خوجلي تجاه الامين عبد الغفار ، وأنا كنت حاضر المشهد ..

كان في منتدى في مقر شركة ألوان في نمرة إتنين بيعملوا حسين خوجلي كل إسبوع وكان بيستضيف فيهو ناس في كل ضروب الفن والثقافة والادب والشعر وانا كنت من مرتادي النتدى دا إسبوعيا ..

مرة في رمضان إستضاف الأمين عبد الغفار في دردشة حول المديح وطبعا الامين لمن يمدح يعجبك .. المهم من ضمن الحوار الأمين بقى يسرد في موقف معين حصل ليهو مع الشيخ البرعي والناس منتبهة تمام وذكر الامين في القصة إنو شاف في المنام كذا وكذا وكذا ودا كلو إتحقق ..

المهم يقوم حسين خوجلي يقاطع الامين فجأة ويقول ليهو : يعني ياالامين داير تورينا إنك بقيت شيخ في أخر عمرك .!

طبعا الناس إتخلعت والامين إتحرك شديد وقال لي حسين : ليه يعني يا حسين مستكتر علي علي أبقى شيخ أو أشوف حلم يتحقق ؟! .. المهم حسين خوجلي ما إشتغل بي إحتجاج الامين كتير وغير الموضوع ..

طبعا الامين وشو بقى احممممممممممممممر من الغيظ والإحراج ودا إنعكس على باقي فقراتو كلها ..

Quote: (خليل العازة) بي الخليط الفريد بين الحزن والفخر والحماسة ، تفتكر دا نيتو ولون قلبو كيفنها ..!!

ناذر ... الأغنية دي عندنا واحد صاحبنا في ماليزيا .. مكرهنا بيها .. اتاريهو تحت تحت طلع قريب الأمين عبدالفغار ..........
المهم داير أحكي ليك عن ناس ماليزيا في الحفلات .... الحفلات هناك ما كتيرة ..... لكن اتعملت كم حفلة كدا ....... أخطر واحدة كان فيها عمر بانقا و ومعاهو ماهر السر ......
الحصل شنو ... و الرقيص كان كيف .. دي حكاية طويلة ....
اتضح لينا فيما بعد انو ناس ماليزيا دايرين كورسات جبجبة في الديم ...........................

ساري الليل ...

Quote: اتضح لينا فيما بعد انو ناس ماليزيا دايرين كورسات جبجبة في الديم ...........................

يا مان الناس البيقرو في أسيا وبالذات في جنوب شرقها أنا عندي فيهم نظرية أصلو ما بتخيب ...

شفت سلوك ناس الشهادة العربية لمن يجو السودان ..

اها هناك غي أسيا نفس الشي ..


وإنت ما بتفسر وأنا ما بقصر ..

ياخي داك مجتمع متخبط تخبط شديد ....
........ياخي حفلة عمر بانقا .... هو طبعا جا غنى في زواج اخت واحد صاحبنا .. و بعديها بي يومين كانت الحفلة ....... أخوك ما قصر كتل العرس و كتل الحفلة ...
المهم في الحفلة ... عينك ما تشوف الا النور ....الناس دي متجرسة من الرقيص عارفين روحم شتر لمن بي غادي ........
الشباب ما قادرين يقومو لأنو الجكس عامل رايح .........

فقام أحد الشرامة ..... و سخن الحفل و الربة دورت ........
بالمناسبة في كم بوردابي من بورداب ماليزيا كانو كاتلين الحفلة .. لكن عاملين راخين .....
أخوك طبعا في اللحظات ديك ..... جينات الحلة الجديدة اشتغلت .. و هجيج فوق ......

لكن ما زلت مصر على أنو يتم انتداب علوبة في ماليزيا و لمدة سنة عشان يعلم الناس الهناك أبجديات الهجيج

إنت يا وهبة قنعت من البوست دا ولا شنو ؟!!

Quote: إنت يا وهبة قنعت من البوست دا ولا شنو ؟!!

ابدا والله بس المعايش

لكن من الليلة معاك

مشينا عرض موسيقي مسرحي أيام كنا في مدرسة الخرطوم الثانوية لي مدرسا القديمة بنات .. طبعا أخوك كان رئيس الفرقة والوجيه بتاعا وكدة .. أها لمن جينا داخلين الفصل الحانعمل فيهو العرض دخلنا صف واحد وسط تصفيق الجكس .. طبعا كنت أنا أول واحد بحكم المنصب ..

قمنا بي نفس الصف دا قعدنا نسلم في البنات القاعدين ... كانوا قاعدين صفين .. أها السلام كيف ؟ بسلم على الأولى في الصف القدام وبسلم على الوراها في الصف الورا .. وناس الفرقة كلهم وراي وبيعملوا الأنا بعملوا ..

المشكلة إنو الصف التاني بتاع البنات كان بعيد شوية لإنهم خاتين قدامم طرابيز فيها مرطبات وموز وحاجات زي دي .. فكنت بتمطا شوية كدا عشان أحصل البنت الورا وأسلم عليها في يدها والجماعة بي وراي .. شفت الشلاقة والكبكبة

المهم أنحنا واصلنا في سلامنا ومطيطنا بالطريقة دي لحدي ما قربنا نكمل الصف ..

يلا شوف .. سلمت على البت القدام وطبعا كان لازم أسلم على البت الوراها ... قمت إتمطيت شديييييد عشان أحصل ديك (إتخيل عباطة منظري) ..

المهم وأنا في الحالة المطاطية دي مديت يدي للبنت فإتفاجأتا أنها أبت تسلم علي !!
ويدي ماديها ليها !! (طلعت من أخواتنا أنصار السنة) حمرت ليهاما نفع قالت لي ما بسلم على أولاد ....

إتحيرت حيرة شدية وأنا متشعلق في الهوا بالطريقة دي والمصيبة إنو البنات كلهم قعدوا يعاينوا لي وبقية الفرقة منتظرني أزح ليهم ..

لمن الشغلة طولت شوية كدة وأنا متمطي ما لقيت حل إلا أشيل قزازة البيبسي القداما وأمشي

والحصل إنو الوراي فهم المنظر وما سلم على البت والوراهو برضو.. لكن كان معانا واحد صاحبنا ما منتبه قام إتمطا عشان يسلم على البت ولمن حمرت لبهو وفهم الحكاية قام شال الصحن بتاع المرطبات بتاعا كلو ومشا

غايتو الحادثة دي أثرت على نفسياتي لمن الشغل طلع (بيض) ومن اليوم داك بطلت الشلاقة ومسالمة البنات في يدهم إلا يكون في زول قدامي سلم أول

Quote: حضرت خطوبتك الاولى التى طرشقت

اها جيتك تاني يا اشراقة

ياناذرانا واشراقة مصطفى دي فينا كمية بتاعة صخب مبالغ فيها وكانت صحبتي شديد هي واختها نجوى نمشي حفلة لواحد من الاصحاب خلاص الناس كلها بتقنع من الحفلة وبخلوها لينا غايتو بنجوطها جوطة شديدة وبنكون نجوم الحفلة كان رضوا الناس او ابووو .
قاموا الناس لاحظوا انهم لما يعزمونا ونجي نعمل الفوضى بتاعتنا دي المناسبة نتطرشق يعني كان خطوبة بتطرشق وكان زواج بحصلو المأذون قريب والناس بقت تتشائم مننا .
والحفلة بتاعة خطوبتي الطرشقت دي مارسنا نفس الجوطة بتاعتنا السالفة الذكر لمن خطيبتي زعلت جدا ولحدي ما الخطوبة فرتقت بعد سنة تقريبا كل مرة بتتذكر الحكاية دي ولكن الطامة الكبرى مرة خطيبتي ضربت لي تلفون على غير العادة وطبعا زمان لا في موبايل ولا اظهار رقم ولا يحزنون فرديت صوت نسائي معناتو اشراقة قلت ليها :
- اووووو ابو الشوش
- قالت ابو الشوش يا عواليق ( لاحظت انو الصوت متغير)
- منو معاي
- معاك نكير ( وقفلت الخط )!!! طبعا دا ما السبب الرئيسي للطرشيقة لكن ساهم برضو . اشراقة بدا يتسلل ليها وهم بانو نحن فعلا كج .
واكتر حاجة زعلتني من اشراقة انو الوهم بانو نحن كج سيطر عليها سيطرة كاملة وفي عرسها ما عزمتني تتخيل والله ما سمعت بيها الا وهي في فيينا. والله يااشراقة ما بالغت فيها عديل

Quote: ياناذرانا واشراقة مصطفى دي فينا كمية بتاعة صخب مبالغ فيها وكانت صحبتي شديد هي واختها نجوى نمشي حفلة لواحد من الاصحاب خلاص الناس كلها بتقنع من الحفلة وبخلوها لينا غايتو بنجوطها جوطة شديدة وبنكون نجوم الحفلة كان رضوا الناس او ابووو . قاموا الناس لاحظوا انهم لما يعزمونا ونجي نعمل الفوضى بتاعتنا دي المناسبة نتطرشق يعني كان خطوبة بتطرشق وكان زواج بحصلو المأذون قريب والناس بقت تتشائم مننا . والحفلة بتاعة خطوبتي الطرشقت دي مارسنا نفس الجوطة بتاعتنا السالفة الذكر لمن خطيبتي زعلت جدا ولحدي ما الخطوبة فرتقت بعد سنة تقريبا كل مرة بتتذكر الحكاية دي ولكن الطامة الكبرى مرة خطيبتي ضربت لي تلفون على غير العادة وطبعا زمان لا في موبايل ولا اظهار رقم ولا يحزنون فرديت صوت نسائي معناتو اشراقة قلت ليها : - اووووو ابو الشوش - قالت ابو الشوش يا عواليق ( لاحظت انو الصوت متغير) - منو معاي - معاك نكير ( وقفلت الخط )!!! طبعا دا ما السبب الرئيسي للطرشيقة لكن ساهم برضو . اشراقة بدا يتسلل ليها وهم بانو نحن فعلا كج . واكتر حاجة زعلتني من اشراقة انو الوهم بانو نحن كج سيطر عليها سيطرة كاملة وفي عرسها ما عزمتني تتخيل والله ما سمعت بيها الا وهي في فيينا. والله يااشراقة ما بالغت فيها عديل

عاد ياهيبة ناذر ده طال الزمن ولاقصر بلاقيهو وبفتو ليهو كلو

قلت لىّ طرقشها شنو؟ ياحليل سلمى سلامة تنجدنى وتفزعنى

ياخ انا صوتى كان زى صوتها؟ ماتزيد المحلبية يا هيبة ياخ
صوتها كان فى مزازيك وصوتى كان فيهو طبول ليوم الليلة لمن تنقر طبلتو بتتعطل السوزوكى فى شارع الحصاحيصا ولغادى- ياخ ده زمن بيشبه الزول اللى جوانا

محبين ومحبات للفرح- المرة الفاتت مشيت حديقة الحيوانات لاقيتها اتلحست وفضل أثر حميم تحت شجرة النيم اللى كانت جنب مكتب ضباط الصيد


بعدين عرسى ده ياكافى البلاء يعزموك ليهو؟
اها من غير كجك الكج حصلنى لكن عليك علىّ اعزمك فى عرساتى الجاية

عرسات نجاح ولدى واصل اللى بيواصل الناس بالمحبة
نجاحات روفى عسل امها- بتى وشمسى المابتغيب
وعرس قدرتى على التناسى
وعرس الغفران
وعرس الانجاز
وعرس الرضاء والتصالح مع الذات
وعرس كبت الغضب
وعرس التصالح مع الواقع
وعرس محبتى ليك ولناس بيتكم ولكل الصحاب والصاحبات

بعد العرسات دى كلها بختم بعرس الرفقة الابدية مع جبريل رضيت عنه الاشواق




حسع مالك علينا والدنيا صباح ومشاغل يا وهبة ياخ- الله يسامحك


--------

حسع ناذر يقوم يخاف ومايلاقينا يصدق انو نحنا كج- يازول ماتسمع كلام هيبة ده
والحياة رغم كل شىء مازالت صاخبة ولازم يستمر صخبها الجميل

Quote: .. (تعملا فيني يا إبن الـ ..) ، الليلة إلا ...... في الحراسة دي

الأولى : الذين
التانية : أسيبك

كسرة :
من أصاب فله أجران ومن أخطأ فله أجر واحد أو كما ...... قال !

كسرة تانااانى :
ما تمشو تملو النقط دى !!

إشراقة ووهبة .

تراكم كنتو بتاعين بلاوي متلتلة

ويا إشراقة نحن إتقابلنا كتير في الخرطوم .. ليه ما فتيتي لي الحاجات دي ..

وغايتو الحمد لله ما جيتو عرسي .. كنت لي يوم الليلة بكون عذابي

عمنا الفاتح :

Quote: الأولى : الذين التانية : أسيبك كسرة : من أصاب فله أجران ومن أخطأ فله أجر واحد أو كما ...... قال !

غايتو صدقني حا يكون عندك 3 أجور إنشاء الله ..

أجران للصوب وأجر للإجتهاد

Quote: عرسات نجاح ولدى واصل اللى بيواصل الناس بالمحبة نجاحات روفى عسل امها- بتى وشمسى المابتغيب وعرس قدرتى على التناسى وعرس الغفران وعرس الانجاز وعرس الرضاء والتصالح مع الذات وعرس كبت الغضب وعرس التصالح مع الواقع وعرس محبتى ليك ولناس بيتكم ولكل الصحاب والصاحبات

تسلمي ياغالية

لكين يا اشراقة تتذكري اسرع ناس من ضحايا الكج بتاعنا منو ؟

انا يتخيل لي الزولة الحمرا المشينا لخطوبتها في اشلاق السكة حديد ( نسيت اسمها ) ديل بتذكر ما شهدناهم ذاتوووو 3 يوم واعلنوا الحداد اليوم داك المحلبية كانت كتيرة شوية.
الراجل كلموه بانو جوز البنقز ديل كج ماحصل جوا حفلة الموضوع بتاعها ما طرشق الراجل والله جاني قال لي معقولة يا هيبة ياخ تكجوني انا والله افتكرتو جاي يشكرني ولا داير ليهو اسبير لعربيتو . قلت ليهو نكجك كيف ياخ قال لي والله اهل الزولة اتصلوا بي وقالوا لي والله البت جاتا نفسيات من الخطوبة دي وقالو لي اكتشفنا انك نتزوج قبل كدا عشان كدا الموضوع دا احسن تخليو وكتر خيرك لحدي هنا وكان تخليك واضح وتعال شيل الشبكة بتاعتك دي لو سمحت .
قلت ليهو طيب انا واشراقة ذنبنا شنو في الحتة دي . قال لي الناس ديل عارفين اني كنت متزوج قبل كدا وما كان عندهم اعتراض على المسالة دي لكن والله كلموني عنكم انت واشراقة دي الموضوع البتكونوا فيهو طوالي بطرشق . الزول دا ما عرفت ارد عليهو كيف الفها معاهو ياربي جادي ولا بهظر المهم جبت ليهو شاي واوحيت ليهو باني طالع مشوار قلت ياود دا انسان جريح ماممكن تعمل معاهو مشكلة . اتخارجت منو وطلعت بمقررات تاني حفلة ما بعرف الطرفين بتاعنها ما بمشي ما بمشي مهما يكون .

غايتو..
غايتو...


لحدى ماجىء لصاحبنا بتاع الاشلاق ده- ياخ رسل لىّ التفاصيل بالايميل وحاة الله اختك خلاااااص {عرس} النسيان عسلّ فيها للابد
ده كانو منو النبى فيك؟ بالايميل يا ابو شموسى بالله


بعدين تعال هنا كيف ماعزمتك لعرسى
يازول انا اتزكرت كويس- دى من الحاجات المابتتنسى
انا جيتكم بنفسى ومعاى نجوى اللى اقنعتها تودينى بعربيتها فى حرا يعلموا الله

ده كان قبل العرس بيوم وشكلى كان عروس عروس- دخاخين وقصص وحتى انت طولت يومها لسانك وبالحرف الواحد قلت

{ كلكن بترجعن تبقن نسوان- بلا ثقافة بلا جن معاكن} معلقا على شكلى الكان عروس عروس- لاحولااااااا ده كان سنة 1994

اتزكرت؟

ماتاكلنى حنك خاصة وانكم ماجيتوا
عليه طالباكم جية باثر رجعى ومعاكم الهدية المناسبة لعولمة الهدايا فى الوقت الراهن



-------

لمن اجىء المرة الجاية السودان بفتو ليك ياناذر
بس تعال براك وخلى ناس بيتكم بعيد من كج هيبة

Quote: الله يستر؛ يا دوب شايفكم دخلتو على جيل ناس محمود عبد العزيز

دا بالذات مع جمال صوتو هو الـ . . . . ام الاغنية السودانية
و عشان الناس الخيالها واسع النقاط دي = العفّص
قبل ما نجي لتعفيصه لـ " يوم ما زازا . . . و وصولاً لجادوا النقادا " الاتغنت بيها عشة الفلاتية
الغناها " يُمّة زازا . . . . جابوا النقادا "
النقادا تاريخياً اهل صنعة ( اسياد الشي ذاتا ) ما ناس تجارة ( جلابة ) غايتو الا كان متهجمين ساي

المهم في مرحلة المداحين و قبل " ساهور و الشرائط " نقاطتهم كان بختوها ليهم في قدح قدامهم " عداد لايف " و حسب ابداعهم . . .
مرة في ليلة مديح كان في واحد سكران ( الله موفقه خالص )* اصلوا ما طلع من دارة الذكر و كل مرة يجي ينقط في القدح و يبشر و يمشي . . .
و جمب المداحين طوالي دوريش غرقان سادر في هيامه و يبكي ساي . . . اصلوا ما سكت . . .
جا البوليس عاوز ينظم الشغلة مسك السكران عاوز يطلّعو بره . . .
المداحين جاطوا في البوليس : عليك الله دا خليهو . . . تعال سوق لينا الببكي دا .

حب الجبان للروح . . . وردت في النص الاصلي كدا
اها دي دقسة ذهبية و لا كيف ؟
الشباب ما براهم ؟

---------------------
سكرجي سألوه عن السكر : هل هو كاسات ( كوانتتي ) و لا ناسات ؟ و لا على الكوالتي ؟ قال ليهم : السكر دا توفيق من الله بس

Quote: دا بالذات مع جمال صوتو هو الـ . . . . ام الاغنية السودانية

Quote: وعشان الناس الخيالها واسع النقاط دي = العفّص

قيقراوي

ربنا وفقك في ملء الاماكن الخالية

Quote: المهم في مرحلة المداحين

المداح شاف ليهو موقع إستراتيجى فى المحطة الوسطى وقعد طلع طارو من المخلاية وختا عصايتو وفرش ليهو قطعة دمورية قدامو عشان الناس تخت ليهو فيها الفيها النصيب ، أول زول وقف قدامو طلع ليهو (جنيه) ختاهو ليهو فى القطعة وقال ليهو :
- بالله أمدح لينا مدحت (يا شفيع الأمة) !
المداح مسافت ما يرفع الطار جا شماسى طاير وكوووف ختف الجنية وقام جارى ... المداح خت الطار فى زعل وقال للزول :
- عليك الله دى أمة يشفعو ليها !!

الفنان زيدان ابراهيم ايام الجاهلية وبعد ما نميري اعلن تطبيق الشريعة الاسلامية وقفل كل البارات بقت مسألة انو الزول يتحصل على الشراب المستورد صعبة شوية وتحتاج لمغامرة .
زيدان عندو زبون قبال كل حفلة بيمشى يشيل منو قزازة ويسكي والراجل دا بيعمل حساب لزيدان طوالى بيكون عندو احتياطي وخصوصا يوم الخميس .
في مرة زيدان مشى للراجل في غير يوم الخميس وقال ليهو جيب واحدة . الراجل قال ليهو والله آخر واحدة شالوها قبال شوية ومعليش يا استاذ المرة الجاية .
زيدان قال ليهو بالله دا منو الشالها دا .
الراجل رد وقال ليهو شالها الفنان الامين عبدالغفار ( زمن الجاهلية) .
زيدان سالو الامين عبدالغفار دا منو دا كمان ؟
قال ليهو ياخ البغني اشيل الريد واشيل ودو
زيدان ضحك وقال والله دي مبالغة( يشيل الريد ويشيل الويسكي) الناس واحدة ما لاقنها.....

Quote: المداح شاف ليهو موقع إستراتيجى فى المحطة الوسطى وقعد طلع طارو من المخلاية وختا عصايتو وفرش ليهو قطعة دمورية قدامو عشان الناس تخت ليهو فيها الفيها النصيب ، أول زول وقف قدامو طلع ليهو (جنيه) ختاهو ليهو فى القطعة وقال ليهو : - بالله أمدح لينا مدحت (يا شفيع الأمة) ! المداح مسافت ما يرفع الطار جا شماسى طاير وكوووف ختف الجنية وقام جارى ... المداح خت الطار فى زعل وقال للزول : - عليك الله دى أمة يشفعو ليها !!

قبل فترة طويلة أيام الثانوي مشيت إشتغلت حفلة في القطينة المناسبة كانت حنة بتاعت عرس .. في أثناء أنا بغني شايف واحد من بعيد بيبشر لي وبيحاول يجي ناحيتي بصعوبة بسبب الزحمة ..

من طريقة مشيتو لا حظت إنو الزول سكران وكدة.. قمت إستعوذت ودعيت ربنا يجيب العواقب سليمة.. صحبك طلع بعد تعب المسرح وجايي بيبشر وأنا خاتي بالي معاهو ..

إتخيل في اللحظة ديك جات طالعة جكساية ظريفة ورشيقة من الناحية التانية للبشير والشبال .. قمت جليت صحبي السكران داك (مع إنو كان وصلني) وقعدت أبشر للجكساية والسكران واقف جنبي منتظرني أعاين ليهو ...

الجكساية طلعت غتيتة وكترت من البشير لمن السكران إتغاظ مني (ألف) .. لمن هناية ديك مشت قبلت على السكران عشان أجاملو بالبشير قام رفع يدو وصراني ليك كف صرررررر .. لمن أنا قلت الكهرباء قطعت ..

الجو إتكهرب والسكران قعد يكورك (يعني أنا ما راجل ولا شنو ؟؟ عشان هي بت وأحلى مني ؟؟!!) ...

طبعا الناس مسكوا السكران وبتاع الأورغن خاف على جهازو لماهو والمسرح إتملا فل .. طبعا أخوك جاهو إحراج وجاهو بهق من الكف

الجماعة شبكوني ليك (خلاص السكران طلعناهو ليك واصل الحفلة) .. لكن بي ياتو وش ؟؟!! قلت لو واصلت الناس دي بتضحك فيني ... قمت قلت ليهم أنا ماشي بيتنا .. قالو لي خلاص إتعشى أول .. قلت ليهم ماليش نفس ..

و من ديك (والقصة دي ليها أكتر من 8 سنوات) بقى حدي في الحفلات الكلاكلات بس .. لمن تجيني حفلة في القطينةأو الجبل أقول للزول : بللللايي !!! قايلني عوير ولا شنو ؟؟!! شوف ليك زول داقس غيري يتكفت هناك ..
شفت الصراحة دي كيف ..

من أطرف ما مررت به من مواقف أنني في إحدى الأيامات كنت متفقا مع احد اصدقائي على إحياء جلسة إستماع بالعود (جلسة في شكل قعدة) ولما ذهبت لمكان الجلسة حاملا العود خاصتي وجدت الجميع قد اكملوا تجهيزاتهم للجلسة .... وفي أثناء محاولتي دوزنة اوتار العود ... سمع الجميع صوتا مدويا وكان هذا الصوت في أذني مباشرة وعندما خرجت من ذهولي وخلعتي وجدت ان الكوبري الذي تربط عليه اوتار العود قد قفز من مكانه فجاة مما تسبب في إصدار هذا الصوت ....

وهنا اعتذرت للجميع عن أنني لن اتمكن من الغناء لهم هذه الليلة لأن العود قد تعطل تماما .. ولما لم يكن هنالك عود بديل فقد جاء بعضهم يإقتراحات من شاكلة (يا أستاذ ما مشكلة أنا أجر ليك الخشبة المربوطة فيها الأوتار بي هنا وإنت اعزف وغني بي هناك!!) قلت ليهم (كيف يعني !! العود دا ما داير ليهو شدة ووزنة معينة وما ممكن تجي بالطريقة دي!!) واحد نطة قال لي (خلاص ما مشكلة نحن نثبت خشية الأوتار دي في كراع السرير وانتا حاول حافظ على الشدة بي هناك وأعزف!!) (طبعا الجماعة كانوا معزورين وفي عالم تاني الوكت داك ) قلت ليهم (يا بشرية هوي ... عليكم الله ما تنظروا عندكم عود تاني جيبوهو ولو ما عندكم خلوني أمشي والمرة الجاية بعوضكم) ...

طبعا الجماعة إتحيروا لإنهم تعبوا جدا في ترتيبات الجلسة وقاموا اصروا انوا لازم اغني ساي بدون عود ... قلت ليهم والله ما بقدر إلا بمصاحبة الة موسيقبة ..

واحد منهم نطة وقال إنو عندو الة موسيقية وقام طلع برة عشان يجيبا .. أنا إتحيرت قلت الراجل دا ماشي يجيب بيانو ولا جيتار ولا ياتو مصيبة داير يحرجني بيها !!!! بعد شوية الزول جا داخل شايل معاهو دلوكة (بتاعت سد المال ديك المرسوم فيها مبخر ويد محننة) .. صاحبنا طوالي ختا ألتو الموسيقية دي في يديني وقال لي (حرم ما تقول حاجة .. أرح ابدأ الغناء!!!) ... قلت ليهو يا زول هسي دي ياها التك الموسيقية ؟؟!!) ..

الجماعة طوالي شيكوني ليك أها ما عندك تاني طريقة ارح البدا غني ... طبعا (أسقط في يدي) زي ما بيقولو المثقفاتية وفي النهاية وسط التحانيس إضطريت أغني بالدلوكة والجماعة اخر إنبساط وانا جد متحير من الوضع !!!!!

الظريفة انو الشغلة بعد شويتين سبكت معاي وقلت يا أبو النيز كدي إتأقلم مع جو الدلوكة دا .. وقلبت ليك مية كم وستين درجة وقلتا يالغنا الهابط جاك بلا ... وفي اليوم داك مافي غنية لي حنان بلوبلو أو عشة اركويت او علوية تيكو أو فايزة بمبر ما غنيتا والجماعة منداحين مع جلسة الإستماع الإتقلبت (تعليمة دي ) ....

ويا ريت الموضوع لو إنتها على كدة بالنسبة لي فنان محترم زيي المصيبة إنو في ناس من الحاضرين نسوا نفسهم وين وبقوا يجوا يبشروا ويلصقوا فيني (النقطة) وغايتو داك كان يوم بهدلة إصلوا ما انساهو وما إتخارجتا الا بعد تعب وتحانيس ..

بالمناسبة ,وإتساقا مع جو المنبر هذه الايام أقول انني في ذاك اليوم غنيت (قالوا القليب حرق .. حرقوهو بالنار حرق .. يا ناس ود الغرب)

ناذر تتخارج ولا أخبتك بعكازي ده؟

يا ايمان

هذا الوجه طيب وجميل

يا ايمان

هذا الوجه طيب وجميل

اها اسحروها

صورة بروفايل إيمان صالح ....!!!!!!!!



عين الحسود فيها عود
والعين التانية فيها كمنجة

Quote: والجماعة منداحين مع جلسة الإستماع الإتقلبت (تعليمة دي )

Quote: ويا ريت الموضوع لو إنتها على كدة بالنسبة لي فنان محترم زيي المصيبة إنو في ناس من الحاضرين نسوا نفسهم وين وبقوا يجوا يبشروا ويلصقوا فيني (النقطة) وغايتو داك كان يوم بهدلة إصلوا ما انساهو وما إتخارجتا الا بعد تعب وتحانيس .. بالمناسبة ,وإتساقا مع جو المنبر هذه الايام أقول انني في ذاك اليوم غنيت (قالوا القليب حرق .. حرقوهو بالنار حرق .. يا ناس ود الغرب)

Quote: ناذر تتخارج ولا أخبتك بعكازي ده؟

ناذر ده تطير عيشتو .. شئ (كفوف) وشئ (عكاكيز) وشئ ما بعرفو شنو داك !! يا (وهبة) ما تشيل من الزول ده شوية

إيمان

Quote: ناذر تتخارج ولا أخبتك بعكازي ده؟

ويييييينك مختفية ؟!!

أها لقيتي العريس ولا لسع ؟! :

الفاتح ..

Quote: ناذر ده تطير عيشتو .. شئ (كفوف) وشئ (عكاكيز) وشئ ما بعرفو شنو داك !! يا (وهبة) ما تشيل من الزول ده شوية

فاتتك قندهار يوم الجمعة ..

وينك ما ظهرت ؟!

يا أخوانا بتعرفو قصة الفنانة مريم عضلات ولا احكيها ليكم ؟!!

Quote: فاتتك قندهار يوم الجمعة .. وينك ما ظهرت ؟!

مافى زول كلمنى والله .. المرة الجاية أكان الله أدانا عمر !

-

Quote: يا أخوانا بتعرفو قصة الفنانة مريم عضلات ولا احكيها ليكم ؟!!

احكي يا حبيب
عجبتني شديد حكاية المطة والبيبسي
في زول بشيل حال روحوا يا ناذر ياخ

جدا يا ود محي الدين ..

أخكي ليك قصة الفنانة مريم عضلات ..

كنت أتحادث مع بعض الاصدقاء في الماسينجر امس وجاء ذكر لفنانة إسمها مريم عضلات !!! (أي والله) إشتهرت في أوساط الطبقات الوسيطة هنا بأدائها لأغنيات الصبحيات وحنة العروس وسد المال مع تعليم العروس الرقص قبل ميعاد الزفاف ..

مريم عضلات فنانة ذات صوت غريب إختلف الناس حوله من ناحية الجودة والرداءة ولكن ما يحبب الناس إليها انها ظريفة جدا ولا تتمسك كثيرا باجرها الذي تتفق عليه إذ انها مستعدة للتنازل حتى عن نصفه مقابل أن تحظى بونسة وجبنة مع أصحاب المناسبة ..

أهم ما يميز مريم عضلات انها جميلة جدا وبها دلال واضح وتلبس أفخر الثياب وتتحلى لالكثير من الذهب في جيدها ونحرها .. وربما جمالها هذا هو ما يدفع بعض الشباب (وربما بعض أعمامنا الشباب روحا) إلى التودد إليها ومغازلتها احيانا لبعض شئ في نفوسهم ..

طبعا هنالك ظاهرة جديدة في أوساط المغنيات هذه الايام إذ نجد أنهن جميعا قد إتخذن لهن حراسا شخصيين (BODY GARDS) لحمايتهن من معاكسات ىالشباب خلال إدائهن للوصلات الغنائية وغالبا ما يكون هؤلاء الحراس إثنين ومن إحدى مراكز الشباب التي تشتهر برفع الأثقال والحقيقة ان لهن كل الحق في ذلك إذ ان المعاكسة للفنانات أصبحت صفة ملازمة لهن أثناء الوصلات ..

مريم عضلات لم تكن من هذا النوع من الفنانات كانت تذهب للمناسبات لوحدها وتخرج منها وفي اثنائها دون ان تكترث للشباب الصائع الذي يغازلها او (رجال النسوان) الذين يتوددون إليها ..

ويبدو ان بعض الشباب ممن يتابعون مريم عضلات تلك قد إستهونوها جدا وأرادوا إستغلال طيبتها الزائدة وإستغلال عدم وجود أحد الدنجوانات مرافقا لها ... فكان في احدى المناسبات أن تعرض لها هؤلاء الشباب بالمشاغلات والالفاظ البذسئة في أثناء إدائها لوصلتها الغنائية وهي لا تلتفت لهم ولكنها اضمرت في نفسها شيئا !!!!

بعد ان انتهت الوصلة تظاهرت مريم بالوقوف لإصلاح ثوبها وإستعدال ذهبها الذي يثقلها .. ولكنها في الواقع كانت تتجرد من كل ذلك دون ان يلاحظ الحاضرون ذلك ..

وفجاة قفذت من مكانها بكل رشاقة رغم جسمها الممتلئ نسبيا ووصلت لمكان هؤلاء الشباب في لحظة وإستطاعت الغمساك بأربعة منهم دفعة واحدة وجذبتهم عنوة لوسط الساحة وسط صراخ الحاضرين وذهول الشباب .. وبدات في ضرب الشباب بكل انواع الضربات المعروفة (لكمات + شلاليت + صفعات+ معيط شعر +كربون + ضرب في مناطق تحت الحزام) .. كل ذلك والحاضرين يحاولون تخليص الشباب الاربعة منها دون جدوى .. تنتهي من هذا لتمسك ذاك تصفع هذا لتدلدم ذاك (تدلدم كناية لي أب دلدوم) .. وإستمرت هذه المعركة من طرف واحد لفترة وإنتهت على ان تناثر الاربعة في الحلبة ولم تتركهم إلا بعد قالت لهم (قولو الروب) فقالوا لها (الروب) وبعدها تركتهم في ذلتهم ولبست توبها ودهبها وإستعدلت من مكياجها وواصلت في وصلتها وكان شيئا لم يكن ...

ومنذ تلك الحادثة التي ذاع صيتها لدي معجبي ومعجبات مريم إشتهرت بذلك اللقب (عضلات) وصار الجميع يخشوها ويتجنبونها .. وهي حتى اليوم تصر على عدم اتخاذ أي حراس لها رغم انها احيانا تغني في المناطق الطرفية النائية والمشهورة بإنفلاتاتها الامنية ولكن حتى الان لم نسمع ان احد إستطاع النيل منها بأي شئ مما في باله ...

كانت هذه سادتي الفنانة مريم عضلات !!

فائدة: حاول ما

Quote: تغني في المناطق الطرفية النائية والمشهورة بإنفلاتاتها الامنية

لانه الشرطة لغاية ما تصل هناك بكون في كم شهيد

زمن ما سمعت بزول مسك التاني كربون (مريم دي قديمة قُدم)

ناذر اللذيذ.. عيدك فنان يا فنان..
وكل سنة وإنت بخير

وعبد الوهاب وهبة برضو .. صاحب البوست..

Quote: إتخذن لهن حراسا شخصيين (BODY GARDS) لحمايتهن

الصحيح BODY GUARDS القرادة التعضيك في كيس الـ.....



وهعهعهعهعهعهعهاااااااااعععععع يكة


دمتم سالمين..

Quote: زمن ما سمعت بزول مسك التاني كربون

:d

معليش المداخلة دي مفروض تمشي بوست ناذر طرائف البورد ولكن ساوردها هنا نظرا للتخصص :

كتب عضو المنبر الجديد ياسر تمتام

Quote: خلى روحك رياضية و عادى انا مشيت حفلة بغنى ساعتين و نصف بأحساس كبير بعد ما انتهيت واحد قال لى أبدعت يا هشام درماس ضحكت وعاااااااادى يادي ... هى يا داليا

هنا
Re: أها يا دينا خالد ... ده طرفي من البورد !

في مداخلة هنا لي الفنان طلال حلفا !!!

بس ما عارفو كتبا وين !!!

في جمعية الموسيقى والمسرح بمدرسة الجديدة حدثت لنا عدة مواقف مضحكة جدا ومبكية في أن واحد ...
لعل الموقف الذي لا ننساهو هو يوم أن تعرضنا جميعا للضرب على يد مجموعة من رجال الأمن بدار إتحاد طلاب ثانويات ولاية الخرطوم ...

ودا برضو بسبب الشلاقة وعدم وعينا السياسي أنذاك

ذهبنا لإقامة عرض مسرحي لمناسبة لا أذكرها .. وكان هنالك إسكتش تؤديه الفرقة ملخصه أن شابين يعاكسان فتاة في الشارع وظهر شيخ بجلباب يعترض على هذا المسلك ولكنه في الحقيقة يريد الفتاة لنفسه رغم علامات الإيمان التي تظهر في أقواله ..

كان الحوار كالتالي :

شاب 1 : يا حاج مالك علينا ما تخلينا في حالنا ؟؟!!

الشيخ : يا ولدي الكلام دا غلط شوفوا ليكم شغلة أقضوها ..

شاب 2 : نعمل شنو يعني ؟1 جانا شغل و أبينا ؟

الشيخ : أمشو الجهاد ؟؟!! أمشو الحصاد !! صعبة دي ؟؟!!

وبين الحديث يلتفت الشيخ إلى الفتاة الواقفة ويسألها يا بتي ممكن نمشي نا كل إسكريم ولا حاجة؟؟!! أنا عارف الأولادالصعاليك ديل شاغلوكي ..

فيصيح الشباب : يا حااااااااااج !!!!!!!!!
فيلتفت إليهم الشيخ مرة أخرى يحاول نصحهم بترك الفتاة والذهاب للحصاد والجهاد ...

فتقول له الفتاة بإذدراء : يا حاج أنا محترماك عشان الدقن الطويلة دي ..

يقول الشيخ : بحححححححححلقا .. (بطريقة درامية)
يصيح الشباب : ياحااااااااج !!!!

ويستمر الإسكتش بهذه الطريقة وفي النهاية تذهب الفتاة متجاهلة الجميع ...

المهم إنتهينا من الإسكتش وبعد نهاية العرض جاءنا أصحاب الدار وشكرونا على العرض وطلبوا منا عدم الإنصراف حتى يكرمونا ببعض المرطبات ..

فأخذونا وجمعونا في غرفة ضيافة فاخرة وجلسنا ونحن ننتظر حضور المرطبات ...
وبعد قلبل توافد على الغرفة كمية من ناس الأمن الطلابي معهم خراطيش وعكاكيز (وشوم) وحاجات تانية حامياني .

وبدون أي مقدمات بدأوا في تقديم المرطبات والتي كانت عبارة عن جلد وخبت وشلاليت وكفوف وأم دلاديم
وجاجات تانية كتيرة ما عندها إسم ولا وصف .. ونحنا بنحاول نفهم الحاصل شنو .. لكن مالقينا أي فرصة وعيننا ما تشوف إلا النور ..

غايتو المجذرة دي إستمرت حوالي نصف ساعة بدون أي مقاومة من المدنيين العزل لإنو في جزؤ من ناس الأمن ديل واقف في أركان غرفة الضيافة ومطلعبن مسدساتم ..

غايتو كانت مأساة لينا كجمعية لإنو في اليوم التاني المدير طوالي جمدا إلى أجل غير مسمى ولم يفرج عنها إلا قرب موعد الدورة المدرسية ...

غايتو كان درس غريب .. والأغرب من كدة إنو الإسكتش دا بالذات كنا بنراهن عليهو لنجاح أي عرض مسرحي وكل الحضور كانو بيضحكوا منو إلا الحضور داك (ماجاب ليهم إلا الكشير والقطيم) وما

.

البوست دا ظريف والله...

في حفلة زواج أخونا صديق أبكر في الحاج يوسف والدنيا برد ونحن ناس السيرة والحفلة بدت متأخخخخخخخخخرة.. الفنان الداقس غنى لينا أغنية بتاعة علي السقيد.. فرح النجوم:
فرحانة بيك كل النجوم ...
(ما دام بريدها ولا انطفا)..
جزاه الله خير... خلاني مشيت نمت في فرن بالقرب من مكان الحفل .. ولا أدرى كم دقسة ارتكبها ذلك الأستاذ المبدع..


عندنا برضو زول زمان عامل فيها مغني وطني..

كان يردد "يا شعباً لهبك ثوريتك"..

ويتجلى ابداعه عندما يصل الحتة دي:

(ومن بيناتك ماما تطلع تمسح راسك)

الصحيح والله أعلم : (ومن بينات أكمامك تطلع شمس أعراسك)..

لحدي قريبات دي أنا متخيل منظر أمه تمسح في الراس..

قرقرقرقر

Quote: فرحانة بيك كل النجوم ... (ما دام بريدها ولا انطفا)..

Quote: (ومن بيناتك ماما تطلع تمسح راسك)

محمد مصطفى
شكرا لمرورك ومشاركتك

Quote: لحدي قريبات دي أنا متخيل منظر أمه تمسح في الراس..

Quote: (ومن بيناتك ماما تطلع تمسح راسك)

العزيز وهبه
هو دا راس ولا بلاط ,, انشاء الله ماما تكون خلصت المسح عشان تقش الحوش...

ابو محمد فؤاد

Quote: هو دا راس ولا بلاط ,, انشاء الله ماما تكون خلصت المسح عشان تقش الحوش...

يا اخي دي بالغت فيها والله
لكن بيني وبينك انا ذاتي كنت
قايل وردي بيقول كدا

عثمان دغيس !!!!!!!!كيفنك اخوي ؟؟

بالله انت متذكر موضوع محمود عبدالعزيز ؟؟؟ الحفلة كانت في قاعة الصداقة

الجماعة(فرقةالنورس )علي حس قاعة الصداقة دقوا مزيكا مبالغة عديييل فجاء صاحبنا حوتة

في ربيع الكنا حبا ذي ماقلت بضم الكاف ..لكن بعداك استعدل فيها وغناها احسن مايكون

قلت لي مشيت السودان بقيت بعام؟؟ انشاء الله ماتكون راكب قدام.....؟؟؟

انت ماياكا عثمان بتاع الاكورديون والا انا غلطان ؟؟ مشيت مع القراية وهجرتنا وسبت البلد

ياحليلنا وياحليل ايام زمان .....

كدي صحح لي المعلومة دي اول ...؟؟؟

بوست جميل.. اخونا عبدالوهاب تسلم والله ذكرتنا ايام جميلة ..

تلبس توب العافيه

وهبة يا ولدنا

مالك انقطعتا؟؟

عارف ياناذر كلامك ده حيرني ...

قبل فترة طويلة أيام الثانوي مشيت إشتغلت حفلة في القطينة المناسبة كانت حنة بتاعت عرس .. في أثناء أنا بغني شايف واحد من بعيد بيبشر لي وبيحاول يجي ناحيتي بصعوبة بسبب الزحمة ..

تعرف ناس القطينة ..لو في زول عمل اي غلط مع ضيف والله يرموه البحر ..بالذات مع الفنانين

لو كلامك ده صاح يبقي ناس القطينة اتغيروا ..ياكمان غنيت في بلدا تانيه واحد سكران قاليك دي

القطينة..

زمان كنت بقول للفنانيين لو داير تغني غني في القطينة ...لانهم ناس راقيين جدا..

النشوف عثمان دغيس يمكن قاعدلو فوق رأي....

تسلم ياوهبة

شكرا اخونا عماد شمت

على المرور ولك التحايا

سلام يا عماد ..

Quote: عارف ياناذر كلامك ده حيرني ... قبل فترة طويلة أيام الثانوي مشيت إشتغلت حفلة في القطينة المناسبة كانت حنة بتاعت عرس .. في أثناء أنا بغني شايف واحد من بعيد بيبشر لي وبيحاول يجي ناحيتي بصعوبة بسبب الزحمة .. تعرف ناس القطينة ..لو في زول عمل اي غلط مع ضيف والله يرموه البحر ..بالذات مع الفنانين لو كلامك ده صاح يبقي ناس القطينة اتغيروا

ودا هو الحصل .. ناس القطينة دقوا السكران وطردوهو من الحفلة عشاني ..

بس أنا بعد داك الحفلة طلعت من نفسي

كنت في معهد الموسيقى وكان هنالك أحد الطلاب من دارسي الموسيقى يقوم بمصاحبة أخرين بعمل بروفة لأغنية ما وطلب ذلك الموسيقي من العازف ان أن يعزف له إيقاع عشرة بلدي المعروف ويبدو ان صاحب الإيقاع قد أخطا في هذا الإيقاع ولكن الموسيقي ذاك لم ينتبه .


فجأء أحد الطلاب الذين يدرسون دراما ومعروف بسخريته الشديدة فلاحظ إختلاف الإيقاع .. فقال للموسيقي

(أنا والله ما بقرا موسيقى لكن الإيقاع دا ما اظنو عشرة بلدي) .. فإستنكر طالب الموسيقى أن يأتي طالب دراما لتصحيحه فرد عليه (يا اخوي إنتا العرفك شنو بالموسيقى !!! دي شغلة ما شغلتك ما تتدخل فيها .. دا عشرة بلدي يعني عشرة بلدي)..

فتغالط الإثنان في الإيقاع طالب الدراما يجذم ان الإيقاع ليس عشرة بلدي وطالب الموسيقى يصر ان الإيقاع عشرة بلدي .. وفي تلك الأثناء جاء أحد الاساتذة فإحتكموا إليه وفعلا طلع ألإيقاع ما عشرة بلدي كما ذكر طالب الدراما ..

وبعد إنصراف الأستاذ إلتفت طالب الدراما لطالب الموسيقي :

(إنتا بتقرا في سنة كم يا أخونا) ؟؟؟!!

فرد عليه ذاك:

(بقرة في سنة خامسة بتسأل مالك ؟؟!)

فرد طالب الدراما ...

(هسي عليك الله لو كنت من سنة أولى عملت كل سنة 2 بلدي ... 2 بلدي هسي ماكانو تمو عشرة)