Post: #1 Title: لو كنتِ في مكان هذه العروس ... كيف تتصرفين؟ Author: ابو جهينة Date: 11-18-2008, 02:04 PM Parent: #0
هذا العريس الإيراني قمة في الحماقة و الرعونة
عضتْه العروس في أصبعه .. حتى لو كانت العضة عن قصد المفروض يستحمل ... أظن العروس قدمتْ السبت عشان الأحد جاي
فإذا بالعريس يدلق عليها هذا الكف و يتهددها و يتوعدها قدام الخلق
غايتو أنا من رأيي تطلب الطلاق حسسسسسسسسسع دي
رأيكن شنو ؟؟؟؟
Post: #2 Title: Re: لو كنتِ في مكان هذه العروس ... كيف تتصرفين؟ Author: Tabaldina Date: 11-18-2008, 02:07 PM Parent: #1
.. . والله يا ابوجهينة داالظاهر حيضوقهاالويل وسهر الليل
________
waiting 4 femalez comments
Post: #6 Title: Re: لو كنتِ في مكان هذه العروس ... كيف تتصرفين؟ Author: ابو جهينة Date: 11-18-2008, 07:15 PM Parent: #2
عزيزي تبلدينا
سلام و تحية
Quote: داالظاهر حيضوقهاالويل وسهر الليل
غايتو لو واصلتْ معاه تكون بالغتْ ...
يعني يوم العرس وسط أهلها عمل كدة ... بعدين تسوي شنو ؟
تخريمة :
ذات سفرية .. في مطار الخرطوم و نحن في آخر مرحلة و منها للطيارة .. سيدة سودانية ترصع زوجها كف و تقول ليه : أنا بعرف شغلك في الرياض. و هو كان السمسونايت ال في يدو نطق هو ينطق ... طيب يا زولة هو هنا أديتيه كف قدام خلق الله .. في شقة مقفولة بيناتكم حتسوي ليه شنو؟ غايتو دي شكلها حتدخل ليهو المفراكة في نخرتو و تديه فرْكة فركتين
Post: #3 Title: Re: لو كنتِ في مكان هذه العروس ... كيف تتصرفين؟ Author: سناء عبد السيد Date: 11-18-2008, 04:12 PM Parent: #1
والله ما اتحرك من مكاني ده الا و معاي ورقة الطلاق
ده عمل كده قدام الناس و يوم الزفاف لقدام حعمل شنو؟
Post: #4 Title: Re: لو كنتِ في مكان هذه العروس ... كيف تتصرفين؟ Author: ALazhary2 Date: 11-18-2008, 04:24 PM Parent: #3
. .
أستاذنا العزيز أبو جهينة
حسب فتوى الشيخ عبد المحسن العبيكان المفروض طوالي العروس ترد الكف كفين
ياخي دا عريس ثقيل جداً فاق باقل وهبنقة في الحماقة والرعونة .
قال الشيخ عبد المحسن العبيكان في تصريحات ل"إسلام أون لاين.نت": "يجوز للمرأة رد عنف زوجها بعنف مثله كدفاع عن النفس، فلو ضربها ضربته، بل ولو حاول قتلها فإنه يجوز لها قتله دفاعا عن نفسها، إن كانت هي الوسيلة الوحيدة لإنقاذ حياتها".
وبين أن دفاع المرأة عن نفسها إذا تعرضت للعنف من زوجها يقع في حكم "دفع الصائل"، ف"أي إنسان إذا صال عليه صائل كسبع أو حتى إنسان له أن يدافع عن نفسه، حتى لو وصل الأمر لقتل الصائل إن حاول قتله".
وتابع: ودفع الصائل بما يندفع به مشروع، ولكن على أن يدفع عن نفسه وذلك بالأخف فالأخف.
وفي هذا الصدد أوضح العبيكان أن دفع الصائل له مراتب "أقلها الكلام والصراخ والاستنجاد بعد الله بالجيران، أو الاتصال لطلب النجدة، أو بالمعنيين من أجل أن ينقذوها، ولا رخصة لها إذا غلب على ظنها أنها ستنجو"، بحسب جريدة شمس اليوم الأربعاء.
توضيح إضافى من الشيخ العبيكان:
الحمد لله وحده والصلاة والسلام على من لا نبي بعده .... أما بعد : فقد سُئلت عن المرأة إذا تعرضت للأذى و الاعتداء من قبل الزوج بدون حق, فهل لها أن تدافع عن نفسها؟ فأفتيت بأن كل من تعرض للأذى من قبل آدمي أو حيوان كسبع , فله أن يدفع الصيالة عن نفسه بالأسهلِ فالأسهل , كما نص على ذلك الفقهاء في حكم دفع الصائل قال الله تعالى وَجَزَاءُ سَيِّئَةٍ سَيِّئَةٌ مِثْلُهَا) الشُّورى:40 , وقال أيضاَ : ( فَمَنِ اعْتَدَى عَلَيْكُمْ فَاعْتَدُوا عَلَيْهِ بِمِثْلِ مَا اعْتَدَى عَلَيْكُمْ وَاتَّقُوا اللهَ وَاعْلَمُوا أَنَّ اللهَ مَعَ المُتَّقِينَ ) البقرة:194 , وقال أيضا ً : (وَإِنْ عَاقَبْتُمْ فَعَاقِبُوا بِمِثْلِ مَا عُوقِبْتُمْ بِهِ النحل:126, وعن سعيد بن زيد قال : سمعت النبي صلى الله عليه وسلم يقول : ( من قتل دون دينه فهو شهيد , ومن قتل دون دمه فهو شهيد , ومن قتل دون ماله فهو شهيد , ومن قتل دون أهله فهو شهيد ) رواه أبو داود والترمذي وصححه , ولم أقل إن المرأة تضرب زوجها ومن المؤسف أن الصحفي وضع عنواناً مخالفاً لما تضمنته الفتوى والله المستعان وصلى الله وسلم على محمد وعلى نبينا محمد .
Post: #17 Title: Re: لو كنتِ في مكان هذه العروس ... كيف تتصرفين؟ Author: ابو جهينة Date: 11-19-2008, 08:01 AM Parent: #4
الأزهري2
سلام و تحية
Quote: يجوز للمرأة رد عنف زوجها بعنف مثله كدفاع عن النفس، فلو ضربها ضربته، بل ولو حاول قتلها فإنه يجوز لها قتله دفاعا عن نفسها، إن كانت هي الوسيلة الوحيدة لإنقاذ حياتها".
الفتوى دي فيها خطورة على بعض النساء ... خاصة ذوات الأحجام القلينونة ... لأن مقابلة الزوجة لعنف زوجها فيه عدم تكافؤ القوة مما يؤدي إلى زيادة الأذى الجسماني لها. من الأحسن أن لا تبادله عنفا بعنف حتى تجدها حجة أقوى إن هي أرادت إنفصالا عن هذا المتنمر
دمت
Post: #14 Title: Re: لو كنتِ في مكان هذه العروس ... كيف تتصرفين؟ Author: ابو جهينة Date: 11-19-2008, 07:29 AM Parent: #3
تعرفي يا سناء
أمبارح واحد إتصل بي و قال :
واحد من أمرين :
يا إما العروس غتيتة و دايرة تفش غبينة معينة و عضتو عضة جامدة ( يمكن يكون كرْوتْ أبوها في المهر أو جاب شيلة ناقصة ) يا إما العريس كايس سبب و العضة كانت بسيطة و هو لقى الموضوع سبب .. و الدليل إنو العروس بعد الكف بتأشر ليه بإيدها و كأنها تقول له : ياخي إتْلهي كدة )
Post: #26 Title: Re: لو كنتِ في مكان هذه العروس ... كيف تتصرفين؟ Author: ihsan fagiri Date: 11-19-2008, 01:15 PM Parent: #3
اول حاجه تتسد الكف الحار دا والباقي هين
Post: #33 Title: Re: لو كنتِ في مكان هذه العروس ... كيف تتصرفين؟ Author: ابو جهينة Date: 11-19-2008, 06:37 PM Parent: #26
يا إحسان
هو كدة إفتكر نفسو إتسد للعضة ... مع إنو واحد تاني في محلو كان حياكل العضة و يخلي الأمور تعدي ، و لكن يبدو أن وراء الأكمة ما وراءها
Post: #5 Title: Re: لو كنتِ في مكان هذه العروس ... كيف تتصرفين؟ Author: Mohammed Elhaj Date: 11-18-2008, 04:34 PM Parent: #1
يا أبا جهينة 1- العروس ترجع ليهو كفو زي ماهو وفي رواية 8 كفوف حسوما 2- الشباب الاتحركو ديل شكلهم أهل العروس يطقطقوهو يخلو عضمو كلو يطقطق 3- ولا يقبل له زواج أبدا، الا ياخد كورسات ازالة هبل مكثفة
الطيرة دا وكت خايف من العض ما في اختراع اسمو معلقة ياااخ
حاشية في واحد صاحبنا قال لينا وهو شايف اليابانيين بياكلوا بالعصايات بتاعاتهم ديك: ياخ جدهم الاخترع العصايات دي بالغ، كا أسهل ليهو يخترع المعلقة LooooooooooooL
Post: #19 Title: Re: لو كنتِ في مكان هذه العروس ... كيف تتصرفين؟ Author: ابو جهينة Date: 11-19-2008, 08:59 AM Parent: #5
الأخ محمد الحاج
تحية طيبة و بعد
Quote: 1- العروس ترجع ليهو كفو زي ماهو وفي رواية 8 كفوف حسوما
مع زولنا الأحمق دة العرس كان حينقلب ساحة معركة
Quote: 2- الشباب الاتحركو ديل شكلهم أهل العروس يطقطقوهو يخلو عضمو كلو يطقطق
أنا الغايظاني العروس .. كانت مفروض تفرتق طوالي
Quote: 3- ولا يقبل له زواج أبدا، الا ياخد كورسات ازالة هبل مكثفة
يعملوا ليه تعميم لدى كل مكاتب عقد الزواج
شكرا للمرور
Post: #7 Title: Re: لو كنتِ في مكان هذه العروس ... كيف تتصرفين؟ Author: ناهد بشير الطيب Date: 11-19-2008, 01:45 AM Parent: #1
شنكل بسيط يخليه يتاوق ...لتركستان
Post: #21 Title: Re: لو كنتِ في مكان هذه العروس ... كيف تتصرفين؟ Author: ابو جهينة Date: 11-19-2008, 11:49 AM Parent: #7
ناهد
Quote: شنكل بسيط يخليه يتاوق ...لتركستان
و ديل شناكلم و القبر ... لكن الأحمق دة الظاهر متكل على شناكل من نوع غتيت
Post: #8 Title: Re: لو كنتِ في مكان هذه العروس ... كيف تتصرفين؟ Author: حنين للبلد Date: 11-19-2008, 02:57 AM Parent: #1
تستاهل...مش يكفتها...يكفنهاكمان....
لانه ارتبطت في الأصل بي زول خلاقة زي ده
عليك الله شوف جنس المخولق ده...
Post: #23 Title: Re: لو كنتِ في مكان هذه العروس ... كيف تتصرفين؟ Author: ابو جهينة Date: 11-19-2008, 12:39 PM Parent: #8
حنين للبلد
أنا أعتقد إنو الزوجين مجبورين على الزواج دة الزوجة قاصدة تستفزو و هو كان عاوز سبب و الأم قعدتو بالقوة و هو بيهدد و هي بتقول ليهو : ياخي روح إنت بدلة عرس ما عندك
و هلم جرا
Post: #9 Title: Re: لو كنتِ في مكان هذه العروس ... كيف تتصرفين؟ Author: ماجدة عوض خوجلى Date: 11-19-2008, 05:20 AM Parent: #1
مبالغة وكمان هو الزعلان وحردان وداير يمشى ابدا ده ماانسان لكن والله العظيم انا لو محلها ماانتظر لحظة واحدة اطلب الطلاق ولو اتقلبت الدنيا دى مابقعد معاهو لحظة والله اتوقعت انها ترمى ليهو الطرحه فى وشو وتمشى مش تغطيها اكتر ... تسلم يارب من كل شــــر ...
Post: #27 Title: Re: لو كنتِ في مكان هذه العروس ... كيف تتصرفين؟ Author: ابو جهينة Date: 11-19-2008, 01:21 PM Parent: #9
ماجدة
سلام كبير
Quote: والله اتوقعت انها ترمى ليهو الطرحه فى وشو وتمشى مش تغطيها اكتر ...
أو كانت تشيل طبق الجاتو و تديهو في راسو .. جاتو نيلة
Post: #10 Title: Re: لو كنتِ في مكان هذه العروس ... كيف تتصرفين؟ Author: طارق ميرغني Date: 11-19-2008, 06:21 AM Parent: #1
الغريبه يا ابو جهينه انو ثبتته امه او اخته يعني كان حردان وعايز يمشي كمان . حرد الفار لي جحرو .
يعدين ان شاء الله اهل العروس ما قصروا معاهو بي جلده ما ينساها.
Post: #15 Title: Re: لو كنتِ في مكان هذه العروس ... كيف تتصرفين؟ Author: othman mohmmadien Date: 11-19-2008, 07:46 AM Parent: #10
سلام عليكم ... يا أبو جهينة .. طيب إيه رأيك في دي .... هنالك حادثة في الأصل سبقت هذا الحادث ... وحيث جرت العادة كذلك في إيران بأن يلحس العريس العسل من أصابع عروسته .... فما كان إلا أن أدى ذلك لإنزلاق ظفر صناعي كبير كانت ترتديه العروس ... في حلق العريس مما أدى لوفاته .... يبدو أن العروس حاولت تحسس الاصبع حينما تذكرت ذلك الحادث .....
Quote:
ظـفــر الــعــروس يــقــتــل عــريــسـها في ليلة زفافهما طهران – وكالات الأنباء:
لم يكن عريس إيراني يدري ما يخفيه له القدر.. عندما لعق العسل من إصبع عروسه أثناء مراسم زفافهما، حسب العرف السائد المتبع في بلادهما
سقط العريس صريعا في الحال إذ أنه ابتلع ظفرا صناعيا كانت العروس تضعه في إصبعها....
قالت صحيفة إيرانية أوردت الخبر أمس الأربعاء إن العريس البالغ من العمر 28 عاما، توفي على الفور في مدينة قزوين بشمال غرب إيران، بينما نقلت العروس إلى المستشفى بعد فقدانها الوعي من هول الصدمة .....حليله
ويقضي العرف في إيران بان يلعق العروسان العسل من أصابع بعضهما البعض عند زواجهما تيمنا بأن يبدآ معا حياة سعيدة..............
Post: #31 Title: Re: لو كنتِ في مكان هذه العروس ... كيف تتصرفين؟ Author: ابو جهينة Date: 11-19-2008, 02:14 PM Parent: #15
الأخ العزيز عثمان محمدين
تحياتي و تقديري
Quote: هنالك حادثة في الأصل سبقت هذا الحادث ... وحيث جرت العادة كذلك في إيران بأن يلحس العريس العسل من أصابع عروسته .... فما كان إلا أن أدى ذلك لإنزلاق ظفر صناعي كبير كانت ترتديه العروس ... في حلق العريس مما أدى لوفاته .... يبدو أن العروس حاولت تحسس الاصبع حينما تذكرت ذلك الحادث .....
لا حول و لا قوة إلا بالله
يعني أخير منها العضة دي و الكف
تشكر للمرو
Post: #29 Title: Re: لو كنتِ في مكان هذه العروس ... كيف تتصرفين؟ Author: ابو جهينة Date: 11-19-2008, 01:36 PM Parent: #10
أستاذنا طارق ميرغني
تحياتي و سلامي
Quote: حرد الفار لي جحرو
أنا غايتو شاكك في العروس .. الظاهر عليها غتيتة جداً لأنو ما ممكن تقرم الجاتو قرمة تجيب ليها عضة ...
Post: #11 Title: Re: لو كنتِ في مكان هذه العروس ... كيف تتصرفين؟ Author: مريم بنت الحسين Date: 11-19-2008, 07:10 AM Parent: #1
احيي وحاة الله مصراني قام علي.. عليك النبي شوف الكريه ده.. وكمان قاعده ليه... انا اؤيد انه تتطلق منه، وتتم محامته كمان...
عمو ابو جهينة... بالغته في موضوع الكنش والسواطه ده في النخرة ده.. والله تصوّر سادي خلاص ... ياربي امكانيات التطبيق كيف؟
Post: #32 Title: Re: لو كنتِ في مكان هذه العروس ... كيف تتصرفين؟ Author: ابو جهينة Date: 11-19-2008, 06:34 PM Parent: #11
مريم بنت الحسين
سلام كبير و تقدير
أما بعد
Quote: عمو ابو جهينة... بالغته في موضوع الكنش والسواطه ده في النخرة ده.. والله تصوّر سادي خلاص ... ياربي امكانيات التطبيق كيف؟
عليك الله يا مريم مش هو دة التصور الوحيد؟ هو صحيح سادي و لكنه نظراً للشفناه هو ممكن يحدث و أكتر ...
غايتو زوجة تفتخر بإحتقار زوجها قدام الناس ، بتحتاج لعلاج نفسي
كوني بخير و تحياتي للأسرة الكريمة
Post: #12 Title: Re: لو كنتِ في مكان هذه العروس ... كيف تتصرفين؟ Author: Hala Hassan Date: 11-19-2008, 07:17 AM Parent: #1
الحكاية شكلها كدة، العريس داير يسبق بضبح (الأطة) الكديسة يعنى، و المصيبة العروس تكون جاهلة بحقوقها الزوجية، و سارقاها السكينة،،
تعرف يا أبو جهينة، عجبنى جدا تصرف بتاع عروس سودانية (قبطية)،
جات نازلة من العربية للكنيسة و معاها العريس، أظنها أتعترت فى فستانها و كانت دايرة تقع،
العريس بدل ما يحصلها و يمسكها، قال ليها: "إنتى عميانة؟؟"،
العروسة سكتت و ما ردت، قدام القسيس لما سألها و الخلق كلهم واقفين، هل تقبلين بفلان الفلانى زوجك؟؟
قالت ليه: لا أقبل،
و عفارم عليها،،،
Post: #34 Title: Re: لو كنتِ في مكان هذه العروس ... كيف تتصرفين؟ Author: ابو جهينة Date: 11-19-2008, 06:45 PM Parent: #12
هو ليه يا هالة كانوا بيضبحوا الأطط المسكينة ليلتها ؟ عشان العروس تخاف؟ تخيلي لو العروس قالت للعريس : خلي عنك يا بعلي .. و قامت مسكت الكديسة و قطعتْ ليها راسا و سلختها .. كان حيحصل شنو ؟؟؟؟
Quote: و المصيبة العروس تكون جاهلة بحقوقها الزوجية، و سارقاها السكينة،،
هنا الطامة الكبرى
Quote: تعرف يا أبو جهينة، عجبنى جدا تصرف بتاع عروس سودانية (قبطية)،
جات نازلة من العربية للكنيسة و معاها العريس، أظنها أتعترت فى فستانها و كانت دايرة تقع،
العريس بدل ما يحصلها و يمسكها، قال ليها: "إنتى عميانة؟؟"،
العروسة سكتت و ما ردت، قدام القسيس لما سألها و الخلق كلهم واقفين، هل تقبلين بفلان الفلانى زوجك؟؟
قالت ليه: لا أقبل،
بت رجال و الله
Post: #13 Title: Re: لو كنتِ في مكان هذه العروس ... كيف تتصرفين؟ Author: محمَّد زين الشفيع أحمد Date: 11-19-2008, 07:27 AM Parent: #1
Quote: هذا العريس الإيراني قمة في الحماقة و الرعونة
عضتْه العروس في أصبعه .. حتى لو كانت العضة عن قصد المفروض يستحمل ... أظن العروس قدمتْ السبت عشان الأحد جاي
فإذا بالعريس يدلق عليها هذا الكف و يتهددها و يتوعدها قدام الخلق
غايتو أنا من رأيي تطلب الطلاق حسسسسسسسسسع دي
رأيكن شنو ؟؟؟؟
إذا استَعْصَتِ الأُمورُ يا صديقي فأرَى
المَخْرَجَ أنْ يَتَوَكَّأَ ذلِكَ الرَّجُلُ قَوْلَهُ تعالى :
( فإمْسَاكٌ بمعروفٍ أوْ تَسْريحٌ بإحسانْ ) ..
ذات سفرية .. في مطار الخرطوم و نحن في آخر مرحلة و منها للطيارة .. سيدة سودانية ترصع زوجها كف و تقول ليه : أنا بعرف شغلك في الرياض.
وكلّ أشكال الموافقة التي تنأى بهم وتُبعِدُهُمْ عنْ جادَّةِ
الضَّربْ ..
أضحكتني يا أبا جُهينة ( الله يدِّيك العافية ) ..
تقبَّل احترامي وتقديري .
أخوك / محمَّد زين . ___________________
Post: #16 Title: Re: لو كنتِ في مكان هذه العروس ... كيف تتصرفين؟ Author: othman mohmmadien Date: 11-19-2008, 07:55 AM Parent: #13
شوف عديم المروة العايز يشد سرجو ده ..... للسيخ في السعودية استخدام آخر خلاف استخدامه في الخلافات السياسية في السودان وقمعها.
Quote:
تنفيذاً لنصيحة أمه ...
سعودي يدخل «عروسه» العناية المركزة بعد ثلاث ساعات على زواجهما جازان- محمد موسى
بعد ثلاث ساعات على انتهاء حفلة زفاف في إحدى محافظات جازان، ضجت ردهة المستشفى بعدد كبير من أقرباء العروس ( م.ع) الذين تجمعوا لمعرفة سر وجودها في غرفة العناية المركزة، وسرعان ما عرفوا من الشرطة أن العريس (س. م) اعتدى على قريبتهم بالضرب المبرح حتى أفقدها الوعي، والغريب أنه أقر بأنه ارتكب فعلته تلك بناء على نصيحة من أمه التي أفهمته أن ذلك سيجعل زوجته تدين له بالطاعة طوال حياتهما الزوجية، على حد قوله، وأضاف العريس، أن والدته شددت عليه أن يأخذ بنصيحتها حتى لا يواجه مصير أشقائه الذين تزوجوا قبله وأصبحت لزوجاتهم الكلمة العليا في البيت، بحسب تعبيره، وذكر أنه صفع عروسه ثلاث مرات على وجهها فردت بلكمه وشتمه، ما اضطره إلى ضربها بسيخ حديد إلى أن أغمي عليها، وبعد ذلك اتصل بوالدها الذي فوجئ بما حدث فأبلغ الشرطة قبل أن ينقل ابنته إلى المستشفى. وذكر مصدر طبي لـ «الحياة» أنه تبينبعد فحص العروس أنها تعاني من كسر في الجمجمة والحوض وبعض الرضوض في سائر جسدها، أضاف أنها في حال نفسية صعبة للغاية وأن علاجها قد يستغرق شهراً كاملاً. ومن جانبه، أكد والد العروس أنه سيرفع دعوى ضد صهره لأخذ حق ابنته التي لم تكمل فرحها بعشها الذهبي، على حد تعبيره .
أين حقوق الانسان عن جازان...يجب منع الزواج في جازان حتى يأخذ تعهد من الزوج بأن يعامل زوجته معامله حسنه ..... بسيخ حديد ياظالم .. وحوش على أشكال بشر
Post: #18 Title: Re: لو كنتِ في مكان هذه العروس ... كيف تتصرفين؟ Author: عواطف ادريس اسماعيل Date: 11-19-2008, 08:11 AM Parent: #16
أبوجهينة ..
يسعد صباحك الجميل ..
بيني وبينك دة يستاهل العضة ..
Post: #20 Title: Re: لو كنتِ في مكان هذه العروس ... كيف تتصرفين؟ Author: ممدوح عثمان Date: 11-19-2008, 10:34 AM Parent: #18
قريبي جلال
بس تفتكر العروس ليه عضتو العضة دي ؟
Post: #22 Title: Re: لو كنتِ في مكان هذه العروس ... كيف تتصرفين؟ Author: عبد الغفور حسين Date: 11-19-2008, 12:21 PM Parent: #20
العضة من العريس مش من العروس وبعدين انت بتسأل قريبك جلال ليه هو العريس وله شنو ؟
Post: #24 Title: Re: لو كنتِ في مكان هذه العروس ... كيف تتصرفين؟ Author: عصام دهب Date: 11-19-2008, 01:04 PM Parent: #22
العروس دي زولة شرفانة و دنية بس ..
ــ
مرة كنا في حفلة في الأبيض ، العريس من النوع البيخطب بي شريط الفيديو ، و أهل العروس من النوع بتاع الزول دة بيصرف كم .. أهة العريس جا مع السيرة من برة الأبيض و العروس ما شافته إلا في الكوافير لما جا يسوقها ،، لمن شافت شكلو و طريقة كلامو قامت خرخرت و قالت ما عايزة عرس .. الجماعة وقعوا فيها إقناع يا بت الناس خلي الليلة دي تعدي .. هسع الناس تقول شنو ؟؟ طيب أمشي أقعدي في الحفلة و الصباح يطلقك ؟؟ العروس رأسا و ألف سيف ، لكن بإصرار أهلها طلعت من الكوافير و جات محل الحفلة و قعدت جمب العريس في الكوشة .. فجأة و يا دوب ما الفنان بدأ يغني قوووومي يا العروس على حيلك و ملصي الجزمة بتاعتك و أرفعي طرف فستانك في يدك و فكي البيرق .. جرت جري شديييييد و قاعدة تكورك ما دايراهو ما دايراهو .. النسوان و البنات القاعدين جمب الكوشة كلهم جروا ورا العروس أفتكروا في حاجة جاياهم .. الرجال ذاتهم جزء منهم جرى من غير ما يعرف الحاصل .. العريس واقف مخلوع في الكوشة .. الناس و أهله أتلموا فيهو قال ليهو مالها البت دي قلت ليها شنو ؟؟ قال ليهم و الله ما قلت ليها أي حاجة لكن الزولة دي قاعدة ( تتشكشك ساكت ) .. طيب ياخي طلقها في محلها دة ـ طلع زول دغيل دغالة الجن ـ قال ليهم ( انا جبتها بي هين ) ورفض تطليقها ، و ظلت العروس معلقة حتى طلقتها المحكمة بعد فترة طويلة و لمن باص الرصيرص فات ..
Post: #39 Title: Re: لو كنتِ في مكان هذه العروس ... كيف تتصرفين؟ Author: ابو جهينة Date: 11-19-2008, 07:13 PM Parent: #24
عزيزي عصام دهب
سلام كبير
Quote: من النوع البيخطب بشريط الفيديو
Quote: قال ليهم ( انا جبتها بي هين ) ورفض تطليقها
يعني دو لو تعب فيها و حفيت رجليه في الأبيض ولا الخرطوم كان حيسوي شنو ؟
لكن العروس تمام و الله
شكرا كتير عصام
Post: #38 Title: Re: لو كنتِ في مكان هذه العروس ... كيف تتصرفين؟ Author: ابو جهينة Date: 11-19-2008, 07:08 PM Parent: #22
عبد الغفور
سلام
Quote: وبعدين انت بتسأل قريبك جلال ليه هو العريس وله شنو ؟
عشان عاوز يعمل حسابو من حسع .. يمكن بنات الزمن ديل دة طبعهم كدة
Post: #37 Title: Re: لو كنتِ في مكان هذه العروس ... كيف تتصرفين؟ Author: ابو جهينة Date: 11-19-2008, 07:04 PM Parent: #20
ولدنا الحبيب ممدوح
مشتاقون يا زول وينك؟
Quote: بس تفتكر العروس ليه عضتو العضة دي ؟
طبعا هناك عدة إحتمالات :
ما عاوزاه و مغيوظة منو للآخر قالت يمكن توريهو العين الحمرا يمكن يكون ( حنين ) بعدين و بما إنو العضة ظاهرة إنها شديدة ... فبظهر إنها قاصدة
غايتو ... ربنا يعوضها خير .. و الراجل سوقو حيقيف
Post: #36 Title: Re: لو كنتِ في مكان هذه العروس ... كيف تتصرفين؟ Author: ابو جهينة Date: 11-19-2008, 06:59 PM Parent: #18
عواطف
سلام
Quote: بيني وبينك دة يستاهل العضة
قبل الكف ولا بعدو؟
أكيد قبل العضة ... لأنو البيناتم ظاهر ما عامرة
Post: #35 Title: Re: لو كنتِ في مكان هذه العروس ... كيف تتصرفين؟ Author: ابو جهينة Date: 11-19-2008, 06:53 PM Parent: #13
وكلّ أشكال الموافقة التي تنأى بهم وتُبعِدُهُمْ عنْ جادَّةِ
الضَّربْ ..
ذكرتني الشايقية .. التي حاول زوجها ليلة الدخلة أن يستعمل القوة .. و كانت ذات بسْطة في الجسم فقالت له بعد أن ( دفرتْه ) بعيدا و هي تمد يدها : هاكْ ألِوا
( يعني تعال حاول ألوي اليد ) فأستكان المسكين
شكرا للمرور الباذخ
Post: #25 Title: Re: لو كنتِ في مكان هذه العروس ... كيف تتصرفين؟ Author: sama7 Date: 11-19-2008, 01:14 PM Parent: #1
يمكن أبوها أعور منو!!!!!!!!! قالت أخير تستحمل دا
Post: #41 Title: Re: لو كنتِ في مكان هذه العروس ... كيف تتصرفين؟ Author: ابو جهينة Date: 11-19-2008, 07:18 PM Parent: #25
سماح
Quote: يمكن أبوها أعور منو!!!!!!!!! قالت أخير تستحمل دا
قالوا إيه اللي جابرك على المر .. قال : ال أمرَّ منو
لو كدة كان الله في عونها
Post: #28 Title: Re: لو كنتِ في مكان هذه العروس ... كيف تتصرفين؟ Author: Safia Mohamed Date: 11-19-2008, 01:25 PM Parent: #1
استاذنا ازيك اها الكورسات خلصوا ولا شنو شايفاك مسجل حضور بكثافة بديت البحث ولا لسع بالله اطلعنا على سير احوال الدراسة
معليش ما قدرت اشوف الفيديو عندي مشكلة في كمبيوتري
لكن المهم ناكل على الوصف
مفروض العروس تقوم تطش طوااالي
Post: #42 Title: Re: لو كنتِ في مكان هذه العروس ... كيف تتصرفين؟ Author: ابو جهينة Date: 11-19-2008, 07:26 PM Parent: #28
صفية
سلام كبير و تحية
وين إنت؟
Quote: استاذنا ازيك اها الكورسات خلصوا ولا شنو شايفاك مسجل حضور بكثافة بديت البحث ولا لسع بالله اطلعنا على سير احوال الدراسة
خلاص هانت ... الشهر الجاي بنتهي من تقديم البحث بشكل نهائي و ربك يهون و شكرا على السؤال.
Quote: مفروض العروس تقوم تطش طوااالي
كدة هي طشتْ
كوني بخير
Post: #30 Title: Re: لو كنتِ في مكان هذه العروس ... كيف تتصرفين؟ Author: عبدالله كع Date: 11-19-2008, 02:04 PM Parent: #1
ابو جهينه سلامات يا ستاذي موضوع العروس بقي وااااضح زي الشمش ... حا تشتت اكيد
ـــــــــــــــــــ طيب لو كنت مكان العريس تعمل شنو ؟ تاكل العضه الحاره دي علي اللباد . وتتناسي ؟ وديي نتائجه وخيمه فيما بعد !! وللا تعمل كما عمل الايراني .؟؟؟ تاخد حقق حار حار .. والعرس تطايره عيشتو !!
ــــ وما تنسي العضه الزي والله عظيم حاااااااره وما متوقعه !!
خليتكم عافيه
Post: #40 Title: Re: لو كنتِ في مكان هذه العروس ... كيف تتصرفين؟ Author: فاروق أبوحوه Date: 11-19-2008, 07:16 PM Parent: #30
الزوله دايره تخُت السرج فوق الحمار من بدري.. لكن الحمار ( نطقه)..ههههههه
(عضة الريده).. لا تنفع هنايا أبو جهينه..
ولك وُدِّي .. الذي لا ( يعضِّي )
Post: #44 Title: Re: لو كنتِ في مكان هذه العروس ... كيف تتصرفين؟ Author: ابو جهينة Date: 11-19-2008, 07:39 PM Parent: #40
شاعرنا المفوه فاروق
تحياتي
Quote: عضة الريده).. لا تنفع هنايا أبو جهينه..
يعني البنية إستعجلت ساي
دمتم
Post: #43 Title: Re: لو كنتِ في مكان هذه العروس ... كيف تتصرفين؟ Author: ابو جهينة Date: 11-19-2008, 07:35 PM Parent: #30
عبد الله كع
سلام مربع
Quote: طيب لو كنت مكان العريس تعمل شنو ؟ تاكل العضه الحاره دي علي اللباد . وتتناسي ؟
أكيد لو كانت القلوب متصافية و حأعتبرها ما مقصودة لكن الما بدورك يحمر لك في الضلمة
أرقد عافية
Post: #45 Title: Re: لو كنتِ في مكان هذه العروس ... كيف تتصرفين؟ Author: محمد أبوالعزائم أبوالريش Date: 11-20-2008, 05:43 AM Parent: #1
صراحة أنا محتار فيكم إنتو ... مش العريس.
أولاً (السعرانة) دي عضتو ... وشكلها كانت عضة حاااارة، وفيها فش غبينة
تانياً ... شكلو كدة الكف بتاعو كان رد فعل لا إرادي، ودليل نواياهو السليمة إنو كان عايز يديها لقمة في قدوما السعران ده.
تالتاً ... مش ممكن يكون عايز يضبح الكديسة؟ ... هسي يا أبا جهينة زولك بتاع المطار داك لو كان ضبح الكديسة كان بقى في البقى فيهو دا؟ ..... وأكيد في كتيرين هاجموا العريس وبينهم وبين نفسهم كانوا بيتمنوا لو كان ضبحوا الكديسة في اليوم داك.
رابعاً ...... خلاص .. مافي حاجة تاني ..
Post: #47 Title: Re: لو كنتِ في مكان هذه العروس ... كيف تتصرفين؟ Author: ابو جهينة Date: 11-20-2008, 06:57 AM Parent: #45
محمد أبو العزائم
صباحك خير
Quote: أولاً (السعرانة) دي عضتو ... وشكلها كانت عضة حاااارة، وفيها فش غبينة
تمام ...
Quote: تانياً ... شكلو كدة الكف بتاعو كان رد فعل لا إرادي، ودليل نواياهو السليمة إنو كان عايز يديها لقمة في قدوما السعران ده.
برضو تمام .. لكن كان من الأولى الإنتظار .. و بعد يعرف النوايا يتصرف
Quote: تالتاً ... مش ممكن يكون عايز يضبح الكديسة؟ ... هسي يا أبا جهينة زولك بتاع المطار داك لو كان ضبح الكديسة كان بقى في البقى فيهو دا؟ ..... وأكيد في كتيرين هاجموا العريس وبينهم وبين نفسهم كانوا بيتمنوا لو كان ضبحوا الكديسة في اليوم داك.
لو كل عريس ضبح ليهو كديسة .. الكدايس كانت لحقتْ الديناصور
شكرا
Post: #46 Title: Re: لو كنتِ في مكان هذه العروس ... كيف تتصرفين؟ Author: هند محمد Date: 11-20-2008, 06:38 AM Parent: #1
فى الاول ترد الكف وبعدين ترجع مع اهلها من الافضل تسيبه واضح انه حامى وطبعه نارى فبالتالى حتكون عشرته صعبة شكرا على المساحة
Post: #48 Title: Re: لو كنتِ في مكان هذه العروس ... كيف تتصرفين؟ Author: ابو جهينة Date: 11-20-2008, 06:59 AM Parent: #46
هند
سلام
Quote: فى الاول ترد الكف وبعدين ترجع مع اهلها من الافضل تسيبه
هو من غباهو .. أولا خلى الناس تعرف إنو عضتو .. ثم إنفعل و ضربها كف .. و لو ما سابتو كان الله في عونها.
Quote: واضح انه حامى وطبعه نارى فبالتالى حتكون عشرته صعبة
مستحيلة مش صعبة
شكرا
Post: #49 Title: Re: لو كنتِ في مكان هذه العروس ... كيف تتصرفين؟ Author: عثمان دغيس Date: 11-20-2008, 07:00 AM Parent: #1
أبو جهينة .. والمتداخلين الكرام .. يا أخوانا ما تمسكوا الموضوع من نصو ساكت . إنتو عارفين ياتو شعوب دي وعندهم ياتو نوع من العادات ؟؟ مش يمكن ده أحسن و( أحر ) وسيلة عندهم للتعبير عن الحب وعادة متبعة في أعراسهم ... بدليل إنها عاجباهم ومصورنها ...! مش يمكن تعادل رش اللبن في وش العريس ولا العروس ما عارف في أعراسنا.. ما كله قرف في قرف في خمش.... يمكن يكون عندهم الراجل الما بيضرب زوجته كف في الكوشة يكون سبهلل ساكت وما بيقنع العروس ..! ما تبخسوا الناس ( كفوفهم ) ساكت وعاداتهم ..!
Post: #50 Title: Re: لو كنتِ في مكان هذه العروس ... كيف تتصرفين؟ Author: ابو جهينة Date: 11-20-2008, 07:34 AM Parent: #49
Quote: يمكن يكون عندهم الراجل الما بيضرب زوجته كف في الكوشة يكون سبهلل ساكت وما بيقنع العروس ..! ما تبخسوا الناس ( كفوفهم ) ساكت وعاداتهم ..!
