Post: #1 Title: عن عطبرة تعالوا نحكي....ونسة وغنا وشعر Author: أمين صديق Date: 11-15-2008, 01:05 AM
من السوق الكبير أم المحطة؟ من كبري الدامر أم من معدية الفاضلاب؟ الورش؟ المكاتب؟ العمال؟ الموظفين؟ شارع السلك؟ سوق القيقر؟ الحصايا؟ الموردة؟ الإمتداد؟ من أي حي؟ من أي بيت؟ من ياتو من اين ابدأ هذا السلام الكبير لأم الكلام الكبير عطبرة... كما كانت.. دائما.. مدينة العمال.. عاصمة الصبر.. والصبر.. والإرتحال.. عطبرة..
Post: #2 Title: Re: عن عطبرة تعالوا نحكي....ونسة وغنا وشعر Author: محمد عثمان محمد طه Date: 11-15-2008, 02:23 AM Parent: #1
وين المربعات
شارع كسلا
سينما الجمهورية
Post: #3 Title: Re: عن عطبرة تعالوا نحكي....ونسة وغنا وشعر Author: أمين صديق Date: 11-15-2008, 02:57 AM Parent: #2
المربعات يا محمد عثمان والسينما الجمهورية والجملة الشهيرة التي نطلقها عندما يظهر على الشاشة ذلك التشويش الذي يشبه البرق أو سلك كهربا (عامل شرار) - صلح الصورة يا حبشي وقد لا يكون باستطاعة حبشي أن يقدم أي مساعدة في ذلك الأمر,إلا أننا تعودنا ذلك الصراخ أو قل توارثناه, كما توارثنا معه إحتمال أن تخف عقولنا ونقذف - بزجاجات الليمونادة الفارغة- تلك الغرفة الصغيرة التي تتوسط (اللوج) والتي ينطلق منها الشعاع السحري الذي يحمل بين خيوطة القوية المنطلقة قوام آشا باريخ التاريخي وقوة عضلات شامي كابور وأحيانا إذا سمح لنا بالدخول (كانت جملة ممنوع الدخول لأقل من 18 سنة سارية تلك الأيام) تموجات جسد الراقصة المصرية سهير زكي. والتسالي يطقطق بين أحناكنا المتدلية مع مشاهد الإثارة والإثارة والمسدسات المدخنة والعربات التي تجرها الخيول الهاربة من عصابات الكاوبويات.. تسالي الحارث... أين كان محل الحارث سيد التسالي؟
Post: #4 Title: Re: عن عطبرة تعالوا نحكي....ونسة وغنا وشعر Author: mekki Date: 11-15-2008, 06:40 AM Parent: #1
Quote: من السوق الكبير أم المحطة؟ من كبري الدامر أم من معدية الفاضلاب؟ الورش؟ المكاتب؟ العمال؟ الموظفين؟ شارع السلك؟ سوق القيقر؟ الحصايا؟ ....
أمين صديق،يا خوى، مالك معذبنا من الصباح
Post: #5 Title: Re: عن عطبرة تعالوا نحكي....ونسة وغنا وشعر Author: حسين محي الدين Date: 11-15-2008, 08:36 AM Parent: #4
التحية لناس عطبرة السمحين عطبرة الحديد والنار
والتحية والمودة لك يا شاعرنا الحبيب
ليك مدة ما بنتا وأنا .....
Post: #6 Title: Re: عن عطبرة تعالوا نحكي....ونسة وغنا وشعر Author: عمر صديق Date: 11-15-2008, 08:54 AM Parent: #5
نسائم عطبرة الحلوة تهدينا و ترسينا نقابل فيها ناس طيبين فراقم كان مبكينا يا قطار الشوق متين توصل هناك حبيبنا راجينا متين نحضن عويناتو متين يسرع يحيينا
يا قطار الشوق دا ليل الغربة فيهو ودار متين تسرع متين بتكمل المشوار عشان ما نلقى سيد الناس و نطفى البينا من النار نشوفو عيونو نعسانة و لونو الزاهى كلو نضار
يا قطار الشوق حبيبنا هناك يحسب فى مسافاتك و لو تعرف غلاوة الريد كنت نسيت محطاتك وكان بدرت فى الميعاد و كان قللتة ساعاتك و كان حنيت على مرة و كان حركت عجلاتك
Post: #7 Title: Re: عن عطبرة تعالوا نحكي....ونسة وغنا وشعر Author: أمين صديق Date: 11-15-2008, 09:59 AM Parent: #6
Quote: أمين صديق،يا خوى، مالك معذبنا من الصباح
عاوزين نحكي الواجعنا دا ذاته يا مكي... أقعد بالراحة كدي وفش حنينك
Quote: التحية لناس عطبرة السمحين عطبرة الحديد والنار والتحية والمودة لك يا شاعرنا الحبيب ليك مدة ما بنتا وأنا .....
حسين محي الدين الحاضر دائما الله يخليك
ويا عمر صديق الغنية دي ما قدرت أدخلها معاي تعرف كنت عاوز البوست يفتح والغنية شغالة بلقى الحركة دي في البورد كتير لو بتعرف خلي البلابل يغنوا لينا في قمرة الونسة دي
Post: #8 Title: Re: عن عطبرة تعالوا نحكي....ونسة وغنا وشعر Author: Yassir Bainwi Date: 11-15-2008, 10:04 AM Parent: #6
امين صديق سلامات ياخ والله اليوم جميل خالص ياخ انا تلاتة سنة بفتش فيك وسامح فاروق وسامي القريش شهود
ياخي قبل ما نحكي عن المرمة والعموم وورشة الديزل عن السودنة والقيقر والسكة حديد جنوب وحلة البوليس ياريت ياريت ياريت تدينا ( صفارة السكة حديد )
وحقيقة نحن ما اتلاقينا لكن النص دا انا سمعت جزء منه من سامي القريش وحرك فيني حاجات صعبة خلاص واتمني ان يكون هذا عربون صداقة ( صحبة ناس اتبرة الحنينة )
ياسر بيناوي
Post: #9 Title: Re: عن عطبرة تعالوا نحكي....ونسة وغنا وشعر Author: أمين صديق Date: 11-15-2008, 10:31 AM Parent: #8
Quote: امين صديق سلامات ياخ والله اليوم جميل خالص ياخ انا تلاتة سنة بفتش فيك وسامح فاروق وسامي القريش شهود
يخليك ياسر ومحبة وشوق للأصحاب سامح وسامي يشهد علينا المنتدى الأدبي بجامعة القاهرة فرع الخرطوم زمن لا تملك الذاكرة إلا أن (تحتل) فيه، ولا تبحث عن قيف!!
Quote: ياخي قبل ما نحكي عن المرمة والعموم وورشة الديزل عن السودنة والقيقر والسكة حديد جنوب وحلة البوليس ياريت ياريت ياريت تدينا ( صفارة السكة حديد ) وحقيقة نحن ما اتلاقينا لكن النص دا انا سمعت جزء منه من سامي القريش وحرك فيني حاجات صعبة خلاص واتمني ان يكون هذا عربون صداقة ( صحبة ناس اتبرة الحنينة )
ح نكتب كل الشعر يا صاحب ح نفتح صنافور لقطر المحنة العميقة ونتونس ونسة ناس إتلاقوا بعد غياب واكتشفوا إنهم كانوا طول الزمن ساكنين سوا خليك قريب
Post: #10 Title: Re: عن عطبرة تعالوا نحكي....ونسة وغنا وشعر Author: Khalid Saeed Date: 11-15-2008, 11:38 AM Parent: #9
Post: #11 Title: Re: عن عطبرة تعالوا نحكي....ونسة وغنا وشعر Author: أمين صديق Date: 11-15-2008, 11:57 AM Parent: #10
تشكر يا خالد ومعليش ح أركز شوية معاك أنا شفت الميديا بلير بس ما سامع الصوت بيكون عندي مشكلة شنو في كمبيوتري؟ شفت الشبكة الشبكت نفسك فيها
Post: #12 Title: Re: عن عطبرة تعالوا نحكي....ونسة وغنا وشعر Author: عمر صديق Date: 11-15-2008, 12:03 PM Parent: #11
Post: #13 Title: Re: عن عطبرة تعالوا نحكي....ونسة وغنا وشعر Author: مدثر محمد عمر Date: 11-15-2008, 12:20 PM Parent: #12
امين ... هان نحن نلتقي في زقاق اخر سمها تجاوزاً مصادفه ... شغلتنا احزاننا واهلونا فاغفر لنا ....
Post: #17 Title: Re: عن عطبرة تعالوا نحكي....ونسة وغنا وشعر Author: أمين صديق Date: 11-15-2008, 12:52 PM Parent: #13
يخليك يا عمر وبرضه ح أركز معاك إنتو كمبيوتري دا مالو ما بيخلي البلابل يغنن؟!! يلا ... خلونا نتونس.. الحارث كان بيقيف في الركن الشمالي الشرقي لنادي الشبيبة الحارس ببيع تسالي أطعم من حب الرمان!! دا لو حب الرمان نموذج للطعم الطاعم!! تسالي الحارث كان جزء من أي موسيقى تصويرية لأي فيلم دخلناه لا وأكثر.. كان أهلنا كثيرا ما (يرسلونا) عصراَ أو ليلاَ - حتى- لشراء (قراطيس) من (تساليه)!!
(امين ... هان نحن نلتقي في زقاق اخر سمها تجاوزاً مصادفه ... شغلتنا احزاننا واهلونا فاغفر لنا .... )
أخوي مدثر العفو يا جميل واللقا أصلا مكتوب نحمد الله ونسأله العفو عنا والرجعة
Quote: أمين صديق سلامات يا صاحب ويا حبيب اللون والحرف أمبارح أنصاص الليالى شفت البوست ومن العنوان شميت رائحة الفلنكة جيت داخل أتمطق .. وممنى نفسى بقراءة القصيدة لقيت لستة شحمانة لأماكن لا أعرفها لأنو وللأسف الشديد علاقتى بعطبرة علاقة ترانسيت خرجت من البوست وعِدِل نحو السرير أُجرجر بخار القطار
الله يا منعم إنت طيب؟ والله شوق!!!! ح نكتب يا منعم يا جميل ونسة وغنا وشعر بس خلينا نتمطق بخار الذكريات أرقد ساي بس ما تنوم
Quote: كتبت لك قبل فترة عبر المسنجر فجاءنى رد أنيق من زميلنا البورد أمين صديق(بحروف لاتينية) مصححاً أنه ليس أمين المقصود
رسلها لي تاني ورسل لي معاها إيميلك إنت واحشنا يا شاب وحشة!!
أمين صديق سلامات يا صاحب ويا حبيب اللون والحرف أمبارح أنصاص الليالى شفت البوست ومن العنوان شميت رائحة الفلنكة جيت داخل أتمطق .. وممنى نفسى بقراءة القصيدة لقيت لستة شحمانة لأماكن لا أعرفها لأنو وللأسف الشديد علاقتى بعطبرة علاقة ترانسيت خرجت من البوست وعِدِل نحو السرير أُجرجر بخار القطار
كتبت لك قبل فترة عبر المسنجر فجاءنى رد أنيق من زميلنا البورد أمين صديق(بحروف لاتينية) مصححاً أنه ليس أمين المقصود
حكى لى الصديق فيصل عباس أنك بالدوحة أتمنى لك إقامة طيبة بينهم
سأسجل حضور دائم بالبوست فيبدو أننى سأتعرف أكثر بعطبرة من خلاله
تحياتى للجميع من مرتاديه وبجيكم صادى
Post: #15 Title: Re: عن عطبرة تعالوا نحكي....ونسة وغنا وشعر Author: صلاح الدين عبدالله محمد Date: 11-15-2008, 12:39 PM Parent: #14
Quote: حكى لى الصديق فيصل عباس أنك بالدوحة أتمنى لك إقامة طيبة بينهم
امين صديق تجيش الذكريات بين الذكرى والغربة عطبرة تبقى دوما فى المقدمة استوقفتنى تعليق منعم فتحولت الى ذكريات منزل ابوموج بالقبة سالت حسين صديق بطرفى فاجابنى نعم هو شقيقى امين صدف لك مليون تحية
ما يأتي ذكر أتبرا حتى أنتبه بكامل قواي العقلية و تنتفض الذاكرة
دعوتك عن الحكي عن عطبرة .. تمد يد الإستجابة بهذه الذكرى التي كتبتها من قبل في منتدانا الأتبراوي و هنا ...
***
إلى كل من شرب من ماء النيل الممزوج بماء نهر الأتبراوي الكاسح. إلى كل من قَرَش حلاوة مولد في ميدان المولد، و حلاوة سمسمية و عروس المولد المسكونة بنمل السكر الماكن. إلى كل من أكل فول مطاعم عطبرة المصلح بالثريني من عند العم شناكة اليماني .. إلى كل من أدمن المخدر المعطون في ذرات تراب الكتاحة في صيف عطبرة اللافح .. فأدمنه حتى النوم .. إلى كل من تمسح في عامل من عمال عطبرة و في أبروله المضمخ بزيت القطارات. إلى كل من وقف في محطة عطبرة مودعا أو مستقبلا. إلى كل من إشترى اللحم من الأتبراوي نهارا ، و جلس بكل إحترام ليلا ليشنف آذانه بصوته الجهوري. إلى كل من كركر الرعد فوق رأسه في خريف عطبرة. أهدي تسابيح هذه الذكريات. و ليعذرني من فاتني أن أذكر إسما أو مكانا عزيزا لديه ، فليصحح زلاتي و مزالقي.
أن تكون من أبناء أتبرا، هو إحساس بالإنتماء إلى جيل النضال.
أن تعيش في أي حى من أحياء أتبرا ، فهو شعور بأنك تتحدث بكل لهجات السودان.
حلفاويين ، و سكوت و محس و دناقلة و شوايقة و رباطاب و جعليين و تعايشة و نوبة و فور و جنوبيين و بجا. فتحنا أعيننا على هذا الزخم المعجون بحب المدينة الوطن.
تستقبل القطارات منذ أن كانت القطارات تنفث دخانها ، من الجنوب و الشمال و الشرق ، و ترتاح على صدرها ، لتنفثه مرة أخرى منطلقة في كل الإتجاهات. توقيت تضبط به ساعة يدك ، و نظافة يندر أن نجدها الآن. تستقبل نسمات الفجر الأولى بصفارات ندائها للعمال ، الذين يأتون من فجاجها العميقة على ( عجلاتهم ) ماركة ( الرالي ) من دكان الطير الأبيض و المشتراة بالتقسيط المريح. فتبتلعهم ورشة المرمة و العمرة في جوفها . يعملون في تناغم و صمت لا يرفعون روؤسهم حتى إنطلاقة الصفارة التي تؤذن بإنتهاء العمل ، فيخرجون منطلقين في إتجاهات المدينة ، ثم تهدأ المدينة ، و تعاود زخمها مع العصريات ، فتمتليء ميادين الدافوري و كرة الشراب ، و تمتليء ميادين الأميرية و عطبرة الحكومية ، و يلعلع الراديو في نادي الأمل و الشاطيء و الأمير و النسر ،
و يلعب معك الكوشتينة بكل تواضع كباتن أمثال اللبودي و عبد الله موسى و شوقي عبد العزيز و بربرينا. و في المساء ، تنساب عبر المايكروفونات أصوات حسن خليفة العطبراوي و فرقة دانا ، و أحيانا تحملها الرياح بعيدة ، لتأتيك أصوات المدائح و النوبة ، لتمضي و تسمع أصوات زغاريد يحملها لك النيل عبر صفحته الرقراقة من أم الطيور غرب النيل.
و رغم حواديت أبو جنزير ، لم تنفك المدينة تتسامر في بار ساكوتلس ، و قهوة ود البيه و السينما الوطنية و الجمهورية.
مع أولى نسمات الخريف ، تتعانق رائحة الورش مع الكتاحة الطوكرية التي لا تبخل على عطبرة بهذا العطر الملون ، فكنا صغارا نصحو و نحن نسخر من بعضنا البعض بسبب قناع الوجه المعمول بالكتاحة قسرا ليلا و نحن نيام.
السباحة في النيل كانت من الممنوعات ، و لكن كنا نتحايل على الأهل بالذهاب بعيدا للسباحة في الأتبراوي ، ثم أهدتنا المدينة حوض سباحة كفانا شر مشوار يومي للنهر العنيد.
الأبرول الأزرق ، و الجلابية أم لياقة ، و البنطلون الكاكي و القميص الأبيض ، و السروال و الصديري ، و العجلة و الفورد و الأوبل و اللاندروفر ، و السودنة و القيقر ، و زقلونا و أم بكول و الداخلة و شارع الرى ، و الفكي مدني و الحصايا ، و محطة حاج الريح و البولمنات ، و حسن خليفة و محمد عوارة ، و محمد المهدي الحاكم العسكري و محمد الحسن عبد الله ، و الحاج عبد الرحمن ، و طلسم ناظر الحكومية و حريقة ناظر الصناعية ، و محمود أمين ناظر الثانوية و الوجيه حسن عربي و المقرن و المكتبة القبطية و مدارس الأقباط و الكمبوني و الأب روفائيلو. دبورة و قرناص و مصنع الأسمنت و ميدان المولد و صالح عبد الله صاحب أول بوتيك في عطبرة و محطة السكة حديد و حى العمال و المسكيت و العمدة السرور السافلاوي و دار الرياضة و المدرسة الأمريكية الأنجيلية و روضتها.
إختار من شئت إن كنت من عطبرة ، فكل إسم من هذا سيذكرك بشيء ، ربما قد خانتني الذاكرة عن ذكر بعض الأعلام ، و لكن قصدت أن أستفز ذاكرة أهل عطبرة . كنا نتوغل قليلا في حى آخر ، حتى يبتدرنا أحد الرجال بأسماءنا و يسألنا لماذا نحن هنا. الكل يعرف الكل ، أسرة متماسكة. تجد في بار ساكوتلس المهندس و الطبيب و العامل و المعلم و التاجر ، يرتشفون كاسات مترعة من المنكر ، الشري أبو رحط و أبو كديس و أبو الزفت ، ثم أتى بعد إندثار موجة الشري العرقي أبو حمار. و تتوثق عرى الصداقة في الإندايات ، و لهم فيها مآرب أخرى ، فكل خرفان العيد للزبائن من ستات الإندايات ، مدعومة بالمشق ، مما يجعلها مكتنزة شحما يبشر برزق وفير من شحم الكركار و لحم الربيت.
تذكرني الآن المطارات بعطبرة ، رغم البون الشاسع و المقارنة التي لا مجال لها ، و لكن وجه الشبه هو في نقطة إلتقاء القطارات من الخرطوم و بورتسودان و حلفا و كريمة ، كلها تلتقي في عطبرة ، مركز للصيانة و تبديل السائقين و العطشجية و بوليس السكة حديد ، ثم طاقم الإستناتور ( البوفيه ) و تغيير رأس القطار البخاري و التأكد من صلاحية عربات الركاب و تغيير الكمسارية و المفتش. كل هذه تذكرني بها المطارات. لم نسمع يوما عن قطار تأخر عن موعده. حتى التأخير المنسوب لقطر كريمة كان بسبب شفقته على كل الركاب في المحطات الكبيرة و الصغيرة و السندات ، حيث يقف لينزل هذا و يركب ذاك و يشحن عفش هذا و ينزل عفش ذاك ( حنين كأهلنا الشوايقة ) ، ثم يواصل رحلته الطويلة ليعرج مع إلتواء النيل حتى مروي العظيمة.
شكرا لإستثارة الذكرى
واصلوا
Post: #18 Title: Re: عن عطبرة تعالوا نحكي....ونسة وغنا وشعر Author: أمين صديق Date: 11-15-2008, 01:08 PM Parent: #16
Quote: امين صديق تجيش الذكريات بين الذكرى والغربة عطبرة تبقى دوما فى المقدمة استوقفتنى تعليق منعم فتحولت الى ذكريات منزل ابوموج بالقبة سالت حسين صديق بطرفى فاجابنى نعم هو شقيقى امين صدف لك مليون تحية
وسلام من القلب ليك يا صلاح الغربة ما بتطشش القلب الدفيان وعطبرة خاصة ما بتدًي فرقة لبلد تاني في ناسها سلم لي على حسين وخلي يقرا معاك القصيدة الجاية دي
Post: #19 Title: Re: عن عطبرة تعالوا نحكي....ونسة وغنا وشعر Author: أمين صديق Date: 11-15-2008, 01:10 PM Parent: #18
Quote: الأخ أمين
تحية تحمل عبق أتبرا من أركانها الأربع
ما يأتي ذكر أتبرا حتى أنتبه بكامل قواي العقلية و تنتفض الذاكرة
دعوتك عن الحكي عن عطبرة .. تمد يد الإستجابة بهذه الذكرى التي كتبتها من قبل في منتدانا الأتبراوي و هنا ...
***
إلى كل من شرب من ماء النيل الممزوج بماء نهر الأتبراوي الكاسح. إلى كل من قَرَش حلاوة مولد في ميدان المولد، و حلاوة سمسمية و عروس المولد المسكونة بنمل السكر الماكن. إلى كل من أكل فول مطاعم عطبرة المصلح بالثريني من عند العم شناكة اليماني .. إلى كل من أدمن المخدر المعطون في ذرات تراب الكتاحة في صيف عطبرة اللافح .. فأدمنه حتى النوم .. إلى كل من تمسح في عامل من عمال عطبرة و في أبروله المضمخ بزيت القطارات. إلى كل من وقف في محطة عطبرة مودعا أو مستقبلا. إلى كل من إشترى اللحم من الأتبراوي نهارا ، و جلس بكل إحترام ليلا ليشنف آذانه بصوته الجهوري. إلى كل من كركر الرعد فوق رأسه في خريف عطبرة. أهدي تسابيح هذه الذكريات. و ليعذرني من فاتني أن أذكر إسما أو مكانا عزيزا لديه ، فليصحح زلاتي و مزالقي.
أن تكون من أبناء أتبرا، هو إحساس بالإنتماء إلى جيل النضال.
أن تعيش في أي حى من أحياء أتبرا ، فهو شعور بأنك تتحدث بكل لهجات السودان.
حلفاويين ، و سكوت و محس و دناقلة و شوايقة و رباطاب و جعليين و تعايشة و نوبة و فور و جنوبيين و بجا. فتحنا أعيننا على هذا الزخم المعجون بحب المدينة الوطن.
تستقبل القطارات منذ أن كانت القطارات تنفث دخانها ، من الجنوب و الشمال و الشرق ، و ترتاح على صدرها ، لتنفثه مرة أخرى منطلقة في كل الإتجاهات. توقيت تضبط به ساعة يدك ، و نظافة يندر أن نجدها الآن. تستقبل نسمات الفجر الأولى بصفارات ندائها للعمال ، الذين يأتون من فجاجها العميقة على ( عجلاتهم ) ماركة ( الرالي ) من دكان الطير الأبيض و المشتراة بالتقسيط المريح. فتبتلعهم ورشة المرمة و العمرة في جوفها . يعملون في تناغم و صمت لا يرفعون روؤسهم حتى إنطلاقة الصفارة التي تؤذن بإنتهاء العمل ، فيخرجون منطلقين في إتجاهات المدينة ، ثم تهدأ المدينة ، و تعاود زخمها مع العصريات ، فتمتليء ميادين الدافوري و كرة الشراب ، و تمتليء ميادين الأميرية و عطبرة الحكومية ، و يلعلع الراديو في نادي الأمل و الشاطيء و الأمير و النسر ،
و يلعب معك الكوشتينة بكل تواضع كباتن أمثال اللبودي و عبد الله موسى و شوقي عبد العزيز و بربرينا. و في المساء ، تنساب عبر المايكروفونات أصوات حسن خليفة العطبراوي و فرقة دانا ، و أحيانا تحملها الرياح بعيدة ، لتأتيك أصوات المدائح و النوبة ، لتمضي و تسمع أصوات زغاريد يحملها لك النيل عبر صفحته الرقراقة من أم الطيور غرب النيل.
و رغم حواديت أبو جنزير ، لم تنفك المدينة تتسامر في بار ساكوتلس ، و قهوة ود البيه و السينما الوطنية و الجمهورية.
مع أولى نسمات الخريف ، تتعانق رائحة الورش مع الكتاحة الطوكرية التي لا تبخل على عطبرة بهذا العطر الملون ، فكنا صغارا نصحو و نحن نسخر من بعضنا البعض بسبب قناع الوجه المعمول بالكتاحة قسرا ليلا و نحن نيام.
السباحة في النيل كانت من الممنوعات ، و لكن كنا نتحايل على الأهل بالذهاب بعيدا للسباحة في الأتبراوي ، ثم أهدتنا المدينة حوض سباحة كفانا شر مشوار يومي للنهر العنيد.
الأبرول الأزرق ، و الجلابية أم لياقة ، و البنطلون الكاكي و القميص الأبيض ، و السروال و الصديري ، و العجلة و الفورد و الأوبل و اللاندروفر ، و السودنة و القيقر ، و زقلونا و أم بكول و الداخلة و شارع الرى ، و الفكي مدني و الحصايا ، و محطة حاج الريح و البولمنات ، و حسن خليفة و محمد عوارة ، و محمد المهدي الحاكم العسكري و محمد الحسن عبد الله ، و الحاج عبد الرحمن ، و طلسم ناظر الحكومية و حريقة ناظر الصناعية ، و محمود أمين ناظر الثانوية و الوجيه حسن عربي و المقرن و المكتبة القبطية و مدارس الأقباط و الكمبوني و الأب روفائيلو. دبورة و قرناص و مصنع الأسمنت و ميدان المولد و صالح عبد الله صاحب أول بوتيك في عطبرة و محطة السكة حديد و حى العمال و المسكيت و العمدة السرور السافلاوي و دار الرياضة و المدرسة الأمريكية الأنجيلية و روضتها.
إختار من شئت إن كنت من عطبرة ، فكل إسم من هذا سيذكرك بشيء ، ربما قد خانتني الذاكرة عن ذكر بعض الأعلام ، و لكن قصدت أن أستفز ذاكرة أهل عطبرة . كنا نتوغل قليلا في حى آخر ، حتى يبتدرنا أحد الرجال بأسماءنا و يسألنا لماذا نحن هنا. الكل يعرف الكل ، أسرة متماسكة. تجد في بار ساكوتلس المهندس و الطبيب و العامل و المعلم و التاجر ، يرتشفون كاسات مترعة من المنكر ، الشري أبو رحط و أبو كديس و أبو الزفت ، ثم أتى بعد إندثار موجة الشري العرقي أبو حمار. و تتوثق عرى الصداقة في الإندايات ، و لهم فيها مآرب أخرى ، فكل خرفان العيد للزبائن من ستات الإندايات ، مدعومة بالمشق ، مما يجعلها مكتنزة شحما يبشر برزق وفير من شحم الكركار و لحم الربيت.
تذكرني الآن المطارات بعطبرة ، رغم البون الشاسع و المقارنة التي لا مجال لها ، و لكن وجه الشبه هو في نقطة إلتقاء القطارات من الخرطوم و بورتسودان و حلفا و كريمة ، كلها تلتقي في عطبرة ، مركز للصيانة و تبديل السائقين و العطشجية و بوليس السكة حديد ، ثم طاقم الإستناتور ( البوفيه ) و تغيير رأس القطار البخاري و التأكد من صلاحية عربات الركاب و تغيير الكمسارية و المفتش. كل هذه تذكرني بها المطارات. لم نسمع يوما عن قطار تأخر عن موعده. حتى التأخير المنسوب لقطر كريمة كان بسبب شفقته على كل الركاب في المحطات الكبيرة و الصغيرة و السندات ، حيث يقف لينزل هذا و يركب ذاك و يشحن عفش هذا و ينزل عفش ذاك ( حنين كأهلنا الشوايقة ) ، ثم يواصل رحلته الطويلة ليعرج مع إلتواء النيل حتى مروي العظيمة.
شكرا لإستثارة الذكرى
واصلوا
مافي كلام يا ابو جهينة كمل الكلام بعدك نقرا شعر أحسن
سلام ياشباب عطبرة لما اسمع شخص ينطقها او اقراءها تنتابنى احاسيس وشعور لاتوصف عطبرة دخلت لها عام 94 وخرجت منها عام 98 كل هذه السنين وانا بعيدا عن اهلى لم احس بالغربة فى عطبرة . دخلتها طالب تخرج من الثانوى وخرجت منها مهندس
عطبرها فضلها كبير على وعلى كل من دخل ونهل من علم اهلها الطيبين.
زرت شتى انحا السودان ولكن لم اجد مدينة تشابة عطبرة فى اجتماعيتها فى طيبة وصفاء قلوب اهلها رغم الظروف الاقتصادية التى كانوا يعشونها.
اول ماجئت لها احتضنتى مدينة او حى الدرجة برغم انه كان حى جديد لكن لم احس اننى غريب فيه لكرم اهله, ثم انتقلت الى الداخلة . وهنا اقف لانى مهما كتبت فلن اصف اهل الداخلة بمااريده من قلبى. ونواصل احبتى ابومحمد
Post: #22 Title: Re: عن عطبرة تعالوا نحكي....ونسة وغنا وشعر Author: أمين صديق Date: 11-15-2008, 01:45 PM Parent: #20
إلى أبي الذي كان..عاملاَ إلى أصدقائه الذين كانوا...عمالاَ
الحب ورائحة الفلنكة
أكتب يا قلم الجن داخر حبرك لي شن؟ ما دام الفرح الزائف.. زي صفق الشجر اتحتَ واتمد الحزن الصائف في الليل الطول وشتَ يا باقي العمر الخائف فتش عن قلب يحن عن ذكرى توصل نبضك في الليل الجنه يجن لأكتر لحظات عمرك حنية وفرحة وأمن
وقفنا فى الداخلة من جنوبها ( نبروا) او العمدة سرور , الى حى الصنفور شمالها كل هذه المناطق تجولنا وسكن فيها طيلة سنين دراستنا .
Post: #24 Title: Re: عن عطبرة تعالوا نحكي....ونسة وغنا وشعر Author: أمين صديق Date: 11-15-2008, 02:08 PM Parent: #21
أخوي النوراني مراحب وبرجع ليك نواصل...
الحب ورائحة الفلنكة
بتفكر؟! ليه بتفكر؟ يا قلب الجن ما تفكر من غير تفكير اتجرد من خوفك وابقى صريح شايقاك النخلة المدت قامة ديواننا البهتت أبوابه من التجديد لا شوقك أكبر منك لا النبض الفيك جريح لكنك داير تبكي قادر وما قادر تضحك واقف بين دهشة ولهفة في صمتك صوت بتخفى وفي صوتك صمت عنيد
Post: #25 Title: Re: عن عطبرة تعالوا نحكي....ونسة وغنا وشعر Author: أمين صديق Date: 11-15-2008, 02:38 PM Parent: #24
يا قلبي الجن بيتداوى لكن العقل الأول لو ضاع ما بيرجع تاني خليك مستني لوحدك وحدك خايف من وحدك ومداين الحب راجياني .......................... طلعوا الشفع من خورنا ولعبنا عصابة عصابة أدتني الكوشة عصاية مديتها كتلت الأول ورجعت كتلني التاني أدتني مدينتي ترابها ووقعت براي وحيد غمضت عيوني بشدة وكمان طلعت لساني شان أظهر متَ شديد مافيش واحد صحاني من موتي ولا هزَاني لاضجة لعب أصحابي لا الحجر القدَ أضاني مستمتع كنت بموتي مستني نهاية الدنيا لمان أصحابي يموتوا وأقوم من موتي وأحيا نلعب من أول وجديد لكن قبال ما تقوم قيامة اللعبة سمعت صوت الصفارة بيدا من أبعد حتة بعيييييد ويقرب مني شوية شوية شوية و(فُت) صنقرت ولقيت أصحابي الماتوا قاعدين يتصنتوا صوتها صحتنا من اطول موتة صفارة السكة حديد
Post: #26 Title: Re: عن عطبرة تعالوا نحكي....ونسة وغنا وشعر Author: أمين صديق Date: 11-15-2008, 02:53 PM Parent: #25
يا قلبي تعال واسمعني يا قلبي الطافش مني قرب من زمنك زمني دا الصوت الكان ساعتنا ميعاد مشيتنا ورجعتنا دا الزمن المنه مرقنا وال ليهو أكيد ح نعود
في المدرسة جنب الخور قبال ما نقيف طابور ناداني رفيقي وقال: - الليلة ح نطلع بدري قالت له عيوني سؤال؟ قال لي شان مافي فطور وكمان الناس بيقولوا ح يكون في اضراب عمال
Post: #27 Title: Re: عن عطبرة تعالوا نحكي....ونسة وغنا وشعر Author: أمين صديق Date: 11-15-2008, 02:57 PM Parent: #26
في الحصة الأولى سرحت يا ابوي مشغول بك كنت في التانية كمان تاوقت للناس من فوق السور ناداني استاذ النور وجلدني رجعت قعدت طول شرحه اتململت فسر فوق التفسير لكن رغم التأخير ما دق الجرس التاني قبال ما نسمع تاني صفارة السكة حديد
Post: #28 Title: Re: عن عطبرة تعالوا نحكي....ونسة وغنا وشعر Author: أمين صديق Date: 11-15-2008, 03:02 PM Parent: #27
حسيت بها ما زي أول ما شايلة غبار السكة لا ريحة زمناَ طول لا زيت ودخان وفلنكة مسكينة قضيبها اتحول أو فجأة (الباكم) فكَ وابوي ما عاد زي أول محزون مهجور في سكة يسمع صفارة الورشة يعصر في قلبه الشكَة - صوت الصفارة يا ابوي مليان صقًير وصديد
Post: #29 Title: Re: عن عطبرة تعالوا نحكي....ونسة وغنا وشعر Author: أمين صديق Date: 11-15-2008, 03:05 PM Parent: #27
حسيت بها ما زي أول ما شايلة غبار السكة لا ريحة زمناَ طول لا زيت ودخان وفلنكة مسكينة قضيبها اتحول أو فجأة (الباكم) فكَ وابوي ما عاد زي أول محزون مهجور في سكة يسمع صفارة الورشة يعصر في قلبه الشكَة - صوت الصفارة يا ابوي مليان صقًير وصديد
Post: #31 Title: Re: عن عطبرة تعالوا نحكي....ونسة وغنا وشعر Author: أمين صديق Date: 11-15-2008, 03:28 PM Parent: #29
جيتك في اليوم العاشر من برد امشير الكافر - يا ابوي النايم أصحى ما عادتك قبلي بتصحى وتصلي الصبح الحاضر غمضانة عيونك يابا في نور الفجر الساطع لو لاعب يابا عصابة عصابة.. كان شفت لسانك طالع!! لكن يا يابا أظنك لاقيت لي حزنك آخر إيديك فوق قلبك خالفة زي يافطة إشارة في سكة وسبايط النخلة الواقفة كانت في عينيك مشتبكة وصفارة الورشة الضربت في الدرب الآخره مقابر تشبه صوت شافع طائر..طائر - يا شافع هوي ما تكابر ما لحقت قطراَ جكة! ما قبضت شمساَ إيد!!
Quote: رسلها لي تاني ورسل لي معاها إيميلك إنت واحشنا يا شاب وحشة!!
وين بعد الحادث ده .. هو تانى فى مسنجر ! ؟ سأترك لك الإميل فى نهاية الرد وأرجو أن نتواصل
عطبرة .. أو أتبرا زى ماقال كاتبنا الجميل أبوجهينة مريت بها كتير ونحن فى طريقنا إلى الجزيرة مقرات أيام الصيف فى إجازات المدارس .. فلم أرى إلا المحطة وما حولها شدنى ما شدنى وقتها مشهد .. أظنه يؤسس لطابع هذه المدينة المختلف مشهد العجلات فى الشارع العطبراوى قرب المحطة، والعمال للورديات ماشين يسدو، أو مغادرين لبيوتهم .. وظل هذا المشهد كامن فى الذاكرة
طفح الكامن فىّ على السطح وتذكرت عطبرة عندما رأيت بونا فى الهند وعدّت نفسى وقتها فى سرى بالتسكع يوما ما فى حوارى عطبره، أنا العائد إلى سماء الخرطوم بعد أيام ببساطة لم يحدث .. ومرت سنين .. صاحبت فيها ناس كتار من عطبرة كل زول يزيدك شوق لى شوفة عطبرة .. وإنت واحد من الناس ديل يا صاحب. وبرضو لم يحدث أن أوفيت بوعدى.
مرقت على المَهَاجِر الذهللة .. وتذكرتها تانى حين دخولى أمستردام أول مرة .. فى مساء ذلك الأحد .. أحد الصراخات .. وعويل الأمهات تذكرتها وأنا .. مأزومٌ وحزين .. لا أجرؤ يا عطبرة أن أوعد نفسى هذه المرة .. لا أجرؤ ما بقدر .. يا أمين ومشيت فى الهم
Post: #32 Title: Re: عن عطبرة تعالوا نحكي....ونسة وغنا وشعر Author: أمين صديق Date: 11-16-2008, 12:25 PM Parent: #30
Quote: وين بعد الحادث ده .. هو تانى فى مسنجر ! ؟
Quote: عطبرة .. أو أتبرا زى ماقال كاتبنا الجميل أبوجهينة مريت بها كتير ونحن فى طريقنا إلى الجزيرة مقرات أيام الصيف فى إجازات المدارس .. فلم أرى إلا المحطة وما حولها شدنى ما شدنى وقتها مشهد .. أظنه يؤسس لطابع هذه المدينة المختلف مشهد العجلات فى الشارع العطبراوى قرب المحطة، والعمال للورديات ماشين يسدو، أو مغادرين لبيوتهم ..
نعم يا منعم..العجلات عمال!! بل أقرب من ذلك..ظلت عجلتنا الرالي السوداء وبالرغم من ركوبي المتكرر لها وأحيانا ركوب عبد الرحمن أخوي..ظلت تحمل رائحة أبي تامة كاملة نفاذة إلى القلب..تلك الرائحة التي تملأ صدري إلى الآن كلما تذكرته رحمه الله..فهل تحمل عطبرة طابعاَ يبدأ من تلك الصورة التي رسمتها؟ نعم..كانت تلك الحركة الدائبة للعجلات بآبائنا وإخواننا هي وببساطة صمام أمان حياتنا..مثلما كانت صمام أمان كل المسافرين عبر محطة عطبرة.. كل عجلة وعامل كانا مرتبطين بحياة تجمع أسرة كاملة حواليهما.. كل عجلة وعامل كانا يربطان مدن سودانية متفرقة بحياة واحدة مشتركة.
Quote: تذكرتها وأنا .. مأزومٌ وحزين .. لا أجرؤ يا عطبرة أن أوعد نفسى هذه المرة .. لا أجرؤ ما بقدر .. يا أمين ومشيت فى الهم
وانا برضه يا منعم تذكرتها وانا كذلك وانا لست جريئا أنا فقط إبنها الذي يحتاجها أنت تبحث عنها بين شوارع أمستردام وانا في خرطوم النجوم دي بفتش عن مكان خفي أبدأ فيه البكاء ولا أكتفي لم تعد تلك مدينة في داخلي يا منعم أصبحت حالة وح أكتب ليك يا صاحب
Post: #33 Title: Re: عن عطبرة تعالوا نحكي....ونسة وغنا وشعر Author: أمين صديق Date: 11-16-2008, 01:16 PM Parent: #32
Quote: عطبرة لما اسمع شخص ينطقها او اقراءها تنتابنى احاسيس وشعور لاتوصف عطبرة دخلت لها عام 94 وخرجت منها عام 98 كل هذه السنين وانا بعيدا عن اهلى لم احس بالغربة فى عطبرة . دخلتها طالب تخرج من الثانوى وخرجت منها مهندس عطبرها فضلها كبير على وعلى كل من دخل ونهل من علم اهلها الطيبين. زرت شتى انحا السودان ولكن لم اجد مدينة تشابة عطبرة فى اجتماعيتها فى طيبة وصفاء قلوب اهلها رغم الظروف الاقتصادية التى كانوا يعشونها.
هو كدا يا يا باشمهندس..عطبرة بلد من صبر الناس كتبت تاريخها، ومن حبهم لبعضهم وتماسكهم سجنوا الدنيا كلها في شوارعهم واكتفوا بعطبرة..ومن شوقهم لزمن يمرقهم من زمن الصبر والضيق والكهربا القاطعة والكتاحة لزموا الحق فافتعلت ضدهم حكومات البلد الما حق مواقف لا تعترف بالحق..فهل فتر القلب المحب وهل تعكر صفوه؟؟!أنا أعرف أنهم مازالوا يحتضنون بعضهم وسط هذا الأتون ويحلمون بعودة قطاراتهم الطاشة إلى الورشة ..يعيدون إليها مجدها القديم ويلعنون أبو الظروف التي فرقتهم ولا يحزنون...آمين
Post: #34 Title: Re: عن عطبرة تعالوا نحكي....ونسة وغنا وشعر Author: أمين صديق Date: 11-16-2008, 10:26 PM Parent: #33
طيب أنا ح ابدا من حلتنا.. ما انحياز لكنها دعوة لكل عطبراوي محب ليشارك في هذا السلام الخاص ولو بس بالكتابة عن حلته... الحصايا محطة بيرم ورا السبيل مباشرة بيت آل بيرم تجار القماش في سوق عطبرة الكبير تحياتي بمناسبة هذه الذكرى لصديقي العزيز خالد بيرم الحالم الجميل بالمدينة الفاضلة.. الطالب في تلك الأيام بالمدرسة المصرية المختلطة!!!!! يا الله على المدرسة المصرية المختلطة!! كانت جائزة فسحة الفطور بالنسبة لنا أن نركض- شوقا و"حبة" جوعاَ- من مدرستنا الثانوية الجديدة إلى بوفيه المدرسة المصرية! نجلس كما يجلس طلابها وطالباتها على حيطتها القصيرة نأكل سندويتشات الفول بالطعمية و"السريني" وندعَي أننا في بدايات قصص حبنا الرومانسية الخالدة.. خالد بيرم!! يا اخوي إنت سرحت بي ولاً شنو؟!! نحن كنا بنتكلم عن شنو؟!
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ السريني: هو عبارة عن توم وشطة وشمار على ماء وليمون
