اسماك في حياتنا

نقتبس اسم البرنامج الشهير للاعلامي الكبير عمر الجزلي اسماء في حياتنا والذي يقوم فيه بالتوثيق لكبار الاسماء السودانية والعربية في شتي المجالات
اما هنا فلطالما راودتني فكرة الكتابة عن اشهر محلات تقدم الاسماك في جميع ارجاء السودان والعالم العربي والافريقي وحتي جميع الدول شرقا وغربا
واتوقع ان يتحفنا الجميع بكتابة اشهر محلات السمك في مناطقهم
من اشهر محلات الاسماك في امدرمان واقدمها محلات السكي بسوق الموردة
القي دكتور مبارك حسن الخليفة قصيدة البلطي ياسيد السمك فقام عثمان سكي باعطائه اكبر سمكة بلطي في الصاج هدية له والقصيدة تقول
البلطي ياسيد السمك حالتك تحنن ياملك
لمن تطقطق في الصباح في الصاج طرق فق طرق
صاحبتنا غابت ليه تغيب يوم ماكلك
والثانية قالت حساسة نحوك ياسمك
ما ارذلك لكن لذيذ في ماكلك
والخانجي يغرف ياكلك

كتب هذا المقال بجريدة الصحافة بتاريخ 18-3-2008م

عوضية ست السمك .....«مرا» بى عشرة رجال:
السوق دا زي البحر فيه الصير وفيه التماسيح!!! ...
امدرمان: محمد شريف
«أنا اصلا من جبال النوبة والسمك دا عرفتو فى البلد دى» هذه كانت بداية دردشتنا مع عوضية اشهر ست سمك بسوق الموردة بامدرمان، عوضية تعد نموذجا للمرأة السودانية المكافحة التى تبحث عن مهنة شريفة لتأكل هى وعيالها لقمة العيش الحلال ... سكنت عوضية حى الموردة بالقرب من محلات السكى للاسماك الشهيرة، ودخلت السوق لاول مرة بداية التسعينيات.. اخذت تتجول محتارة بين «قفف» سمك البياض والبلبوط وخشم البنات والقرموط وغيرها «أكبر سمكة خلعتنى كانت عجل وزنها 150 كيلوجراماً دى بقرة عديل» نزلت علوية البحر وتعرفت على «الحواتة» القدام «عمك ابو حديد وشيخ ادريس وبحيرى» عرفت سر المهنة «السمك سعرو غالى فى الشتاء لانو بغطس وصيدو صعب فى الخريف، وتجار الجملة بجيبوه من الدمازين والجنوب وحلفا». واشتغلت عوضية اولا في نظافة السمك وكسيرو، وبعدها اشتغلت «ست شاى وزلابية». وكانت بتظبط للمراكبية «شوربة القرقور والكمونية» وفى صاج الزلابية بترمى ليها سمكة سمكتين بعدها عملت ليها محل خاص لبيع السمك «المحمّر» تشترى كيلو العجل بى 25 الف جنيه «بالقديم» وكيلو البلطى الاكثر طلبا بى 10 آلاف وتبيع الطلب بى 20 الف معاه السلطة والرغيف والشطة، اما الفسيخ علبته بى الف والصير الطلب بى 2 الف «نعم البحر قريب لكن التكلفة غالية.. شوال الدقيق حصّل 95 الف وباغة الزيت 80 الف، دا اضافة لماهية العمال وايجار المحل وحق ناس المحلية».. زبون عوضية إما عضو بالمجلس الوطنى او محامى او رجل مرور، وهى تعامل الصحافيين بطريقة خاصة «أكتر ناس شنافين بسألونى سمكك دا ما يكون بايت والزيت دا ضرورى يكون جديد.. لكن لما يلقوا اليد طاعمة يطلبوا المزيد».. عوضية ابتعدت قليلا من نار صاج التحمير، واكتفت بادارة المحل والاشراف على النظافة والتمليح.. وتستعد الآن لافتتاح مقرها الجديد.. ومستقبلاً تحاول أن تخصص موبايلها الذى لا يفارقها لحظة واحدة، لانها تطارد به ديونها فى السوق. وتخطط لتقديم خدمة التوصيل الى البيوت.. عوضية قالت لنا انها تعلمت الصبر من اكل الدبسة، وعرفت كيف تدافع عن نفسها ومالها مثل البردة بضربات كهربائية «السوق دا يا ولدى زى البحر فيه السمك الصغار البياكلو السمك الكبار حقارة ساى.. وفيه كمان الله يكفينا شرهم التماسيح.. بس انا قايلنى عشان مرا بتاكل ليهم.. والله أنا عديل شوكة حوت»

من اشهر محلات السمك في ابوروف بلة علي النيل بالقرب من مكان صناعة المراكب ولسمك بلة طعم خاص اتحدي اي واحد يكون ضاق مثل هذا الطعم
الوجبة مكونة من سمك وبصل وشطة وعيش وبعد داك البيبسي البارد

العزيز متولي

بوست في غاية الجمال والروعة والله..
عيبو الوحيد إنو بجوّع..ذكرتنا بلة
والبيبسي البارد والهمبريب الضارب
من وش البحر..بالله واصل وما تنسى البربري،
مكان كان لنا فيه صولات وجولات وما كان يمنعنا عنه
إلا الفلس!

كم أنت جميل أيها الوطن..

لك الشكر الوافر والتقدير يا أخي العزيز..

الزاكي

لك الشكر والتقدير اخي الزاكي عبد الحميد وانشاء الله جوعتك تكون فكت
كذلك محل شعيب للسمك يعد من اميز المحلات في امدرمان له طعمه المميز وزبائنه العديدين

بوست دسم جدا
ايه رايك نفتح محل سمك نسميه اسماك في حياتنا
بشاركك بالنص.