اسمه (ملتقى النقيين الاكترونى ) ماتفتشوا فى قوقل وتتعبوا روحكم لانه حتجيكم كتابتى دى ناطة زى كورة التنس .... الهدف منه هو لم النقيين والمنقنقين والمنقنقات والمتلقين للنقة داخل السودان وخارجه فى حيز واحد بهدف تبادل الخبرات والافكار الجديدة زى (كيفيية ذيادة العكننة على خلق الله) (والطريق الاسرع لتعلم النقه) و(النقه اساس المجتمع المعافى) وكثير من الاهداف التى تسعى لتطوير مسيرة الحركة النقية السودانية وهو نتاج لعمل مشترك بين اتحاد النقيين السودانيين وملتقى النقيين بالخارج الذى دشن امس الاول ببلاد الناق ناق ........وبلاد العم نق .....وجمهورية النقة الديمقراطية ...(وتحيا النقة السودانية) .......
قلت للناس هنا لما جيت من السودان بالله جايه رااااااااااااااااااااايقة ماادايرة نقة مغتربين وطرح مشاكل وكفيل وشغل مافى وكدة خلونى بالله وبمناسبة الضحاكات دى...... فى السودان ضحكنا جنس ضحيك من تصبح وانا بقح . اقصد بضحك .....لسه ماتكون فتحت عينك تكون مرقت 10 الف بعد تفتح عيونك بتكون مرقت 7 الف ....وبعد تشرب الشاى بتكون طلعت تانى 5 الف....وده كله ولسه والواحد مافطر الضحاكات مشت وين علمه عند الكريم غايتو ضحكنا هناك لما قلنا بس هناك الله يكون فى عون العالمين
سيرتك السمحة سابقاك......أها لو فى صمة خشم ما كان عرفناك.....
الكحة زى ماقال أخونا جمال السنوسى دلالة للمده..أى دفع المال أو الغمته ..أو العصرة..ويحكى أن مريض متأزم وعندو أزمة ألأثنين عليهو ياكافى البلاء...الدكتور عايز يكشف عليهو..قال ليهو كح...قال ليهو والله ماعندى ولا مليم..
ألف حمدآ لله على السلامة وبركة الجيتى طيبة..وكيف حال ألأولاد....
لم يشاء الله ان نلتقى ولكن الجايات أكتر من الرايحات....بأذن الله...
قلنا نمر فى أول بوست ليك بعد ماجيتى من السودان..ونعمل حاجة..والكحة ولا صمة الخشم....مودتى
ما تنسي إن في أنواع من الكحة .. أخير منها الصمة .. مثلا زي ( الكدكود ) .. دة ما عندو علاج إلا لبن الحمير الله يكرم السامعين .. عندي صاحبي في عطبرة شربوه اللبن دة لغاية ما إضنينة كبرن و صوتو بقى ( أجش ) ...
تصدقي يا ناهد .. بعض ( الصمة ) أبلغ من كلام كتير ... و دة موضوع تاني و كبير و عاوز ليهو بوست منفصل ..
استاذة ناهد .. تحايا طيبات .. المثل في اصله مقصود به الموت .. صمة الخشم المعنية هنا هي الموت .. فالمعاناة بالسعال ( القحه ) خير من الموت .. و يضرب في القبول بالمعاناة الاقل خوفا من البلاء الاعظم .. هو ان شئتي شقيق : ما رماني على المر الا الامر منه او ابن لـ " حنانيك بعض الشر اهون من بعض "
ثم اصبح يقال بمعنى الحركة خير من السكون .. و الفعل خير من اللافعل .. و اصبح تقريبا صنوا للاخر : " التسوي تندم و لا تخلي تندم " ..
ــــــــــــــــــــ
Quote: فى نقة بلون الياقوت وفى نقة بنار الزغاريد فى نقة فيها سيرة الوجع اما نقة (عواء المهاجر المغترب ) دى بتالمنى شديد
شكرا على الشرح المستفيض .....للمعنى ...... الدكتور امير تاج السر تعجبنى رواياته ....لا بل يعجبنى اكثر اسم الرواية ...الغارق فى التكوين له رواية جميلة باسم (سما بلون اليااقوت) تغنى له حمد الريح وحيدر بورتسودان اعجبتنى رواية (عواء المهاجر) ......... هو كاتب يحتفى بالواقع والاسطورة فى ان ______________ على العموم اتابع كتبه عبر معارض الكتب التى تقام ....
______________________________________
لقيتك متابع .......خالص الشكر والتقدير والاهتمام ..... وشكرا مرة اخرى لاهتمامك بكتابات الدكتور امير تاج السر ....
استاذنا الراقى صاحب الاماندا .......والابنوس .....الكاتب ابو جهينة كل التحايا
شكرا على المداخلة الثرة ......والتى لم تترك حرفا الا وعقبت عليه .....وكأنك قمت بزراعة كلى جديدة للبوست ......
فى موجة الهجرة العكسية للنقة .....وبعد الظروف و(نقنقة ) الكلام (نقنقة على وزن سعودة ) اضطر كثير من الاخوة المنقنقيين الى ان يعودوا عودة طوعية لصمة الخشم .....غانمين سالمين (بدون مايكون اتمسك فى قوالة ولا شىء تانى )
المهم فى موجة الهجرة التانية للمنقنقين فى دول المهجر وعواءهم وشكيتهم المرة مرارة الحنظل من الغربة وسنينها برز اخوة منقنقين جدد ذوو اصوات نقناقية جميلة ....وذووو قمصان ترقش .....يتصلون عليك ليشكون قلة الرواتب والبعض تأخيرها ... برايك استاذنا الفاضل ابو جهينه هل تمثل مثل هذه النقنقات الجديدة والتى برزت على الساحة الان هل تمثل تيارات جديدة فى النقة السودانية المتطورة مع تطور الاحداث ....
مع تطور شبكة الاتصالات والتى قامت بها الان شركة سوا مشكورة (شركة سوا شركة اتصالات سعودية ) فى فتح الخط بعد ال5 دقائق الاولى وتستمر قرابة الساعة وان كانوا (ناس سوا) اتبايخوا شوية وبقوا يقفلوا ليك الخط بعد نص ساعة من المكالمة ... ماعارفة ليه ......(بايخين)
استاذنا
الاتكفى النقة الموجودة اصلا والتى اكتفينا منها حتى الثمالة ...كى تأتى هذه الشركات وتفتح المجال اقصد ( النفوس ) (من فتحان النفس النفوس دى ) لليتصل بك احدهم دون موضوع فقط لان المكالمة مجان ... _________________________________
سأزور طبيب الانف والاذن والحنجرة بعد انتهاء عرض سوا من الجوال ........
سؤال
ليه رابطين تخصص الانف والاذن والحنجرة مع بعض وفى تخصص واحد .....غريبة __________________________
Quote: لكحة زى ماقال أخونا جمال السنوسى دلالة للمده..أى دفع المال أو الغمته ..أو العصرة..ويحكى أن مريض متأزم وعندو أزمة ألأثنين عليهو ياكافى البلاء...الدكتور عايز يكشف عليهو..قال ليهو كح...قال ليهو والله ماعندى ولا مليم..
الاخ العزيز اسماعيل
مرة واحدة ولدها الصغير عيان والكلام ده زمان ايام دواء الكحة كان معدوم ......اها ساقته الدكتور فى مركز صحى عادى الدكتور شاف الولد بيكح ....بدون مايكشف عليه وهو لسه الشافع شايلاه امه ....بس الشاف يكح والدكتور يقول ليه ( كر ....كر ......كر ....)
______________________________
ولسه زعلانه انى ما لاقيتك فى السودان الجريه كتير لمن مسيخ ده .....
سلامات يا ناهد وحمداً لله على السلامة جيتك تاني .. أصلي ما بتوب من ( الفط )
كنا - ولا نزال - رفقة زمن جميل ، بل إن شئت دقة عشرة عمر بحاله . إختلفنا في مدارس السياسة ومذاهب التدين ومجالات العمل ، لكننا إجتمعنا في عميق المحبة وتمام الإحترام . واجتمعنا أيضاً في تلك الهواية الغريبة أن " كل شئ خاضع للنقاش والتحليل " أو هي النقة في أجلى معانيها . قبل عقد أو نحوه من الزمان سافرت في إجازة سنوية ، تفقدت من ظل موجوداً لا يزال بالسودان ، زاروني ( حبايبي الحلوين ) فرادى أو مع أسرهم . لكن شئ ما كان ينقصنا ، تلك الأمسيات والكراسي في حوش الديوان أو خارج الحوش - وخارج الحوش هذا كان محطة ( فطتنا ) الأولى - كنت أمني النفس بمثل نقاشات ذلك الزمان التي قد تستمر حتى مطلع فجر اليوم التالي . لم تكن هذه الرغبة متاحة ، تغير الحالة الإجتماعية كان سبباً ، تغير الحالة الوظيفية كان آخر ، والظروف الإقتصادية التي يعاني منها الجميع ربما كانت سبباً في تغير الأولويات عندهم ، وسبب آخر ( نتهيبه ) وهو العمر ومايتبعه من إنخفاض لحماس ( الشباب ) . فاجأني أحدهم صباح أحد أيام الأربعاء ( وما عقاب شهر ) أن الشلة قد قررت أن تحضر بكاملها عندي غداَ الخميس لسهرة - على طريقة - ( أيامنا الخوالي ) . فرحت فرح الأطفال . نعم جاءوا كلهم وتسامرنا وتناقشنا واتفقنا واختلفنا وضحكنا وتذكرنا من فارق دروب حياتنا فبكينا .
قال لي صاحب الإتصال وهم يودعونني فجر اليوم التالي ما معناه
" يا أبو الشباب حاسين بي ( خرمتك ) لى ( نقة ) زمان ، لكين الزمان بقى ما زى زمان ، ونحن كمان بقت ظروفنا ما زى زمان ، لكين ما هان علينا نرجعك لى غربتك بى خرمتك . عشان كدا عملنا السهرة دي وما تتوقع زيها تاني ، تعال لينا وحنجيك لكنها حتكون زى زيارات ناس الزمن دا "
أها شفتي النقة جابت النقة
_________________________
وعلى ذكر الإجازات عليك الله يا بت أمي جهة الشغل البتدي إجازة أربعة أشهر دي ما تشوفي لينا فيها شاغر إن شاء الله رئيس مجلس إدارة أو حتى ( حتة ) مدير عام
ازيك ياعاطف يااخوى كيفك ......بالجدمااتمنيت شىء الا افتح بوست وافطك ....كدة بس .....(نفسى اتشخصن لى على زول حتى لو بالفططان) (وكلمنى حاول فطنى )
عارف يااخ عاطف .......عندى جارتين سودانيات بمشى لواحدة وافط التانية ...وهى فى نفس الطابق ....بعد كم يوم امشى للفطيتها ديك واخلى الاولى وهكذا دواليبك ......الطريقة دى حتقول ليه ...اقول ليك ليه .............بتعلم (الشوق) .......واصلو ماحااعمل بطريقة استاذنا الموصلى فى اغنيته الرائعة على قدر الشوق مايمد مديت ...لا لا لا ... دى دايرة ليها زمن طويل ....وانا خلاص صحتى فى النازل ......
دى حاجة
الحاجة التانية ....بالجد نقة زمان مازالت عالقة بالذاكرة بقت زى الحصوة المادايرة تتفتفت ديك ..... ليها طعم خاص وذكرى حلوة بنجتراها بين فترة والتانية ..لانه كان ليها فى يوم من الايام ... وقت وبال رايق وعدم مسؤولية ....وبالجد ناس زمان زاتهم الانت ممكن تنق معاهم مافى هسة ولا بيتكرروا وان وجدوا فااتوقع تسمع منهم الشكية فقط لاغير .....
(المنقنقين الجدد) على وزن (الاثرياء الجدد) ديل خالص ماتتعرف عليهم اسالنى انا .....ده نوعهم براه اخترعوا روحهم براهم منهم وليهم ....
لا وكمان على العليهم مفلهمين .....نظام (كان نقيت لى بنق ليك) ولا (ماتنق لى ولا بنق ليك ولافاضى ليك هسة) ولا التانية (انق ليك وتدفع كم )
اها ناس نوع ديل تخارج روحك منهم ....وتفتش على ناسك القدام ان لقيتهم لسه حييين . وظراف زى زمان ....طيب.... _______________________________
سمعت بى كتاب اسمه (المنقنق الذى مات واقفا) ؟ ده حيكون من تأليفى ان مد الله فى الاجال لانه مواده جاهزة .....الشخوص بتاعين النقة فى ...(الحبكة النقية) فى ....(السيناريو النقناقى )موجود باقى بس الحبر ......وابدأ فى كتابته ....وبعدها حاأعتزل ....الكلام .......وسأصنع من هذا الاعتزال عالما متكاملا .... فهمت حاجة ...... ولا انا .... فتك بعافية ... وسلامى لست بيتك واولادها ....
Post: #29 Title: Re: ليه اهلنا بيقولوا القحة ولا صمة الخشم ... Author: محمد عثمان Date: 11-10-2008, 10:24 PM Parent: #27
نااهد...
سلااااام
و ما كنا محظوظين و ما ساعدت الظروف ان نلتقيكم فى الخرطوم و طبعا السبب غتاتة من الانعامات...
غايتو الواحد لمن يقول ليك قح يعنى دخل يدك فى جيبك عشان كدا مرات صمة الخشم احسن...مش صمة الخشم بتاعت حيمور..
ياحليلك يامحمد عثمان .......والله ياسلاااااااام ........
كان نفسى الاقيك ...لكن الانعام بت حيمورة دى (اشوف فيها يوم) (غير يوم عرسها ) ...قلت ليها الجاى منو للرحلة ....قالت لى كتار ... قلت ليها النبى ادينى اللستة ....عشان اكون عارفاهم لمن اجى اسلم عليهم مايتلخبت على الاختساس وكده ...لانه بصراحة يانعومة عندى مشكلة ذاكرة غريبة.......... انعام قالت لى بورداب الخرطوم كلهم (ماشاءالله حافظاههم كلهم ) يكون من اكل السمك بتاع الجبل ده .... وانا راسى لفة لفة ...من كترة الاسامى .....(وهنا اتلخبط على الجدود) جد ده ختيته فى ده ...عندك مثلا ....
عمران سلمت عليه على اساس رغيم ورغيم محل تبلدينا ومعتصم مكان منو ماعارفة .... والراس جاط .... قلت كدى اضرب السمك ...بعدين اكيد الذاكرة منها وليها كده براها وترجع وكان فعلا ماحدث ورجعت الشبكة واكتشفت انك مامن ضمن الموجودين .... والصندوق الاسود مااتلقى ....وذاد عدد المفقودين ......
بحرى كويسة جدا جدا جداا .......والاهل كويسين ....وميتين فى بحرى .....مروق مابمرقوا منها .....
بقول للوالدة ( اثناء اجازتنا (حاليا نحن من سكان الخرطوم) حينما نزور بحرى .(الزيارة طبعا بامر الحاجة يوميا لبحرى ) ...ياحاجة امرقى ارح الواطة ليلت علينا ارح نلحق بسرعة نشترى كهرباء ...تقول ليك ....ا شتريها من بحرى دى..... مالها كهربتها كمان .... ياامى كهربتنا براها وديل كهربتهم براهم .... ارح يلا ...
وناس بحرى .....كان جاهم مغترب داير واطه فى اركويت بيشروها ليه فى بحرى ..... ويقولوا ليك الخدار يابتى ياناهد اخبر تشتريه من بحرى دى رخييييييييييييييييييص هنا ...وامانة ماخدار مفرهد وصاحى ولا الفلفلية شىء تانى ..... كله كوم وحكاية يودوك بيتك الكنت ساكن فيه زمان ويلفلفوك فيه رغم انف الساكن الجديد ......ويقولوا ليك عليك الله ده بيت تبيعوه...(طبعا هنا الساكن الجديد بتنتفخ اوداجه على البيت اللقطة ده) هسى شفتوا لو مارحلتوا الخرطوم السجم دى ....كنتوا فتحتوا دكان ...الزلط جاء بى شارعكم ....وكان البيلزكم مايرميكم
والحظتها انت غير ماتلم توبك فى خشمك وتتحسر مافى شىء تانى ....
_____________________
اللهم ادينا حسن ختامها وبيت الاخرة .....
عاطر التحايا وشكرا على الطرافة اليوتيوبية دى ....دى وجات فى محلها بالظبط تشكر يازعيم .... سلامى لاهلك العتبانية كلهم ....
خلاص نستضيفهم فى منتدى السرد النقى ليحدثونا عن تجربتهم الابداعية .... وتكون الندوة بعنوان (اقوان تحت الذاكرة ) ......
فى برنامج صدى الملاعب قبل كم يوم قالت الفنانة البحرينية احلام للمذيع مصطفى الاغا ...(انتوا على طول بتجيبوا اخبار الفرق الكبيرة ومتناسين الفرق الصغيرة .......) اها على ذكر كلام احلام .... اخبار نادى الكوكب شنو ونادى الزهرة ونادى الزيتون ونادى النقة
________________________
انا هلاريخيية.....مايجى زول ينط لى فى حلقى .....وبالذات اساسى ده ....
طبعا ياناهد فى شباب بقولوا القحة للشيرنج يعنى القروش او الفكة والكهربا والشرتيت او الضحاكات والكنجالات اتارى القروش دى مجهجهة الناس عشان كده قطعوا ليها مليون اسم ولقب اها قحيناوبنخلى باقيها لقحة تانية وبرضو القحة ولا صمة الخشم
مافى زول تانى ارد عليه ....... انا فااااااااااااضية هسة ....
طيب ننق شوية ............
حضارة النقة عندنا فى السودان بتمتد ل 7 الف سنة .....حيث ارسيت ثقافة (النقة) .....وقد استطعنا خلال تلك السنوات ان نخلق تواصل (نقاوى) بين الناقى والمتلقى للنقة (ابعضهم يتلقى هذه النقة كلاعب مبتدىء يواجه بطل العالم فى الملاكمة) عبر تنوير كثير من المتلقين للتعامل مع هذه النقة باستخدام كل الخامات اقصد كل الوسائل .....
النقة زى المهرجانات دائما لها برنامج مصاحب ...بتخلله فقرات من (العواسة الكلامية )الماعندها طعم .....والحكى الفاضى والشكية للناس بدل (الشكية لى الله) ....والكلام فى خلق الله ..... ده كله كوم اللوم كوم تانى ....انتوا مالكم مابتجونا...... ومالكم ..... وان كنت عايز تخارج روحك وتقول ا كدى ضرب ليهم اللوامين ديل .....وتقول ليهم (والله نحن جايينكم بكرة ) الرد يجيك بسرعة ...نحن طالعين والله بكرة ...... (بقيت بقول لاى زول بجيكم بكرة عشان اتخلص من اللوم الاجوف ده )
هناك ايضا منسقين للنقة ومشرفين للنقة وقسم للاخبار ....وده طبعا قسم خطير ...لانه بيبتث ليك كل راس ساعة (زى رحلة الرياض جدة المجدولة يوميا )....... وفى كمان قسم لتواصل اجيال الناقيين (اشبال الناقين) ديل بقى تدريباتهم يومية على النقة ... خاصة مع تخفيضات الاتصالات بتاعة اليومين دى فى قسم معارض للنقة وانواعها .....ده قسم كبير جدا ...(مول) على مستوى الشرق الاوسط وافريقيا ...
اسمه (ملتقى النقيين الاكترونى ) ماتفتشوا فى قوقل وتتعبوا روحكم لانه حتجيكم كتابتى دى ناطة زى كورة التنس .... الهدف منه هو لم النقيين والمنقنقين والمنقنقات والمتلقين للنقة داخل السودان وخارجه فى حيز واحد بهدف تبادل الخبرات والافكار الجديدة زى (كيفيية ذيادة العكننة على خلق الله) (والطريق الاسرع لتعلم النقه) و(النقه اساس المجتمع المعافى) وكثير من الاهداف التى تسعى لتطوير مسيرة الحركة النقية السودانية وهو نتاج لعمل مشترك بين اتحاد النقيين السودانيين وملتقى النقيين بالخارج الذى دشن امس الاول ببلاد الناق ناق ........وبلاد العم نق .....وجمهورية النقة الديمقراطية ...(وتحيا النقة السودانية) .......
حضارة النقة عندنا فى السودان بتمتد ل 7 الف سنة .....حيث ارسيت ثقافة (النقة) .....وقد استطعنا خلال تلك السنوات ان نخلق تواصل (نقاوى) بين الناقى والمتلقى للنقة (ابعضهم يتلقى هذه النقة كلاعب مبتدىء يواجه بطل العالم فى الملاكمة) عبر تنوير كثير من المتلقين للتعامل مع هذه النقة باستخدام كل الخامات اقصد كل الوسائل .....
النقة زى المهرجانات دائما لها برنامج مصاحب ...بتخلله فقرات من (العواسة الكلامية )الماعندها طعم .....والحكى الفاضى والشكية للناس بدل (الشكية لى الله) ....والكلام فى خلق الله ..... ده كله كوم اللوم كوم تانى ....انتوا مالكم مابتجونا...... ومالكم ..... وان كنت عايز تخارج روحك وتقول ا كدى ضرب ليهم اللوامين ديل .....وتقول ليهم (والله نحن جايينكم بكرة ) الرد يجيك بسرعة ...نحن طالعين والله بكرة ...... (بقيت بقول لاى زول بجيكم بكرة عشان اتخلص من اللوم الاجوف ده )
هناك ايضا منسقين للنقة ومشرفين للنقة وقسم للاخبار ....وده طبعا قسم خطير ...لانه بيبتث ليك كل راس ساعة (زى رحلة الرياض جدة المجدولة يوميا )....... وفى كمان قسم لتواصل اجيال الناقيين (اشبال الناقين) ديل بقى تدريباتهم يومية على النقة ... خاصة مع تخفيضات الاتصالات بتاعة اليومين دى فى قسم معارض للنقة وانواعها .....ده قسم كبير جدا ...(مول) على مستوى الشرق الاوسط وافريقيا ...
اتصل على فرد من افراد ا(لملتقى النقى ) واطلعنى على مجهودات النقييين الخريجين الجدد (دفعة تخفيضات ناس الاتصالات بتاعة اليومين دى ) ثانيا اطلعنى على اضخم مكالمة دولية فى السودان ....مليلنة شمارات ونقة فرز اول ......(ودى انا بعتبرها انجاز حقيقى للسودان)
المشكلة تكمن فى ان لهم مشاريع مستقبلية اللى هى :
انهم عايزين يشاركوا باسم السودان ويمثلونا ...(متأكدة من فوزهم كتأكدى من فوز اوباما) ....
ملتقى النقيين السودانيين حقق نجاحات كبيرة لاسيما فى الاسئلة المميته والمفاجئة ....مثل
ماهيتك كم عمرك كم راتبك بيتاخر ماقاعد تمشى السودان مالك بيتكم وين بتاكلوا شنو بيتكم ايجار ولا ملك مالكم مابتردوا على التلفون اولادكم مدارس حكومية ولاخاصة ناس امك ماجايين عمرة السنة دى و و و و ة اللذين يسالونك اسئلة نكير دى كتااااااااااااار .....اكتر من 27 (ناق وناقة ) فى الاسبوع بمعدل 3 ناقيين فى راسك ده يومى........(لمن جانا زهايمر) قدموا اكثر من الف الف سؤال تراوحت مابين وين وكيف وليه وبتين ......وعشان شنو (وعشان شنو ده السؤال الوحيد البيجننى ويخلينى اخت توبى فى خشمى واجرى)
والنجاح الاعظم الذى يحققونه هؤلاء الناقون ....هو تشبيك علاقتهم مع مؤسسات المجتمع المختلفة..... من جيران قدام واهل انت زاتك ماعارفهم فى ياتو بلد هسة (الواحد يقول ماشى هولندا تسمع بيه انه فى امريكا ) تجيك اخبارهم بالحته .......ده غير راى (الناقى) زاااتو فى اهلك واصحابك وناسك وناس شغلك ....مثلا يقول ليك انت حيدر شغال فى امريكا شنو والله حيدر ده ياخى مافى امريكا فى هولندا هولندة شنو يابقر انت ...حيدر ود خالتك ما اتسلل لامريكا قبال سنة ..وشغال فى مؤسسة كدة بجيب ليك تلفونه ..... بالله ...غريبة ...وانت عرفت كيف ؟ (ده طبعا مثال لى زول قريبك ...(الناقى) اداك خبرو ووين شغال ........... وكمان شتمك .....ببقر هولندا ....)
السؤال اللى حتسالونى ليه .... هل الناقى دة زول فاضى ولا شغال ومشغول ؟؟؟؟؟ الاجابة عندكم ...مع العلم ...انه انا (نقايينى ) كلهم شغالين ومشغوليين 48 ساعة فى اليوم بيجيبوا اخبارنا كيف مابعرف ....
ده سيناريو بكتبه هسه ليكم حيجيكم كيف ماعارفة المهم
نوع من التلفونات الممكن تجيك وانت بالك ممكن يكون مارايق وممكن تكونى شايلة ليك كمشة فى يدك وبتسوطى فى الحلة ويقوم زاتو الموبايل يقع جوة الحلة البتغلى ولا فى الحوض ....... يلا معاى ونشوف ....تلفون من السودان من برعى قرابة بعيدة لميسون المغتربة مع راجلها .......
تررن تررررن ترررن
الو ميسون ايوة منو معاى معاك برعى من السودان اهلا ازيك والاهل والوالدة كويسين قلت اضرب اسلم على الناس لانه عاملين لينا ناس شركة الاتصالات خدمات مجانية وكدة طيب اهلا الكركبة الجنبك دى شنو ياميسون بطبخ انت ماعندك خدامة لا والشغل وين خليتيه ولا شنو لا هو الخلانى منو الخلاك ؟ ياسين لا الشغل انتى بتعرفى ناس عبيد الكانوا فى مدنى ديلاك اى مالهم ولدهم جاى عمرة طيب المطلوب ولا حاجة قلت اكلمك بس عشان تمشوا ليه الميناء بكلم ياسين بعدين شفتى ناس الاتصالات ادونا تخفيض فى الاتصال الدولى و و وانا ذنبى شنو قلتى شنو ياميسون ابدا قلت كويس والله الناس احسن تتواصل انتى ياميسون الواحد كان داير يشترى اقامة بتتلقى بى كم كدة عندكم مابعرف اضرب لراجلى هو يوريك انتى عارفة قالوا فى الرياض ارخص طيب اتصل على ناس الرياض اها واعملها فيزة شنو يعنى...... البقدر اشتغل بيها بعدين .....وظيفتها تكون شنو ماعارفة والله...دى حاجات بيعرفوها الرجال هنا ..... ميسون عاينى لحلتك ماتحرق......طابخة شنو لياسين الليلة ممكن اقفل السماعة يابرعى لا اوعك كدى بتخسرينى لانه التلاته دقايق الاولى بتاعة العرض فاتت وكدة هسة المكالمة المجانية شغالة طيب وانا ذنبى شنو قلتى شنو ياميسون ماسمعتك لا ابدا قلت خدمات ممتازة ميسون ...ماجايين السنة دى السودان ان الله سهل بنجى جايين تنزلوا فى بيتكم ولا بيت نسابتك حسب الظروف ماتأجرى بيتك انشاءالله
صمت
ميسون اى ياابن الحلال شنو تانى ؟ متابعة مسلسل لحظة وداع لا ليه رهيييييييييييييييييب شفتى ليلى خلت اولادها وفاتت .... لا مافاضية للمسلسلات بالعكس انتوا المغتربات ديل فاضيات .... انت الفاضى قلتى شنو قلت ليك الله يفضى البال وبالك مالو مشغول ياسين ماشغال كويس ولا شنو لا شغال الحمدلله طيب مالك زهجانة براى لا مابراك انت عارفة انا حااكلم خالتى سعدية اقول ليها ميسون بتك دى مابراها شكلها زعلانة من راجلها ولا حاجة كدة ... يابرعى اوعى ...انا كويسة مالى هسة .... مالك كيف كلامك مسييييييخ مسيخ لانك انت ماعنك موضوع كيف ده عرض مقدم افوته ساااااااااى كده واصلك فوت طيارة ماتفوته كان فوته انتى عارفة الدقيقة زمان ليكم بى كم كانت ...هو زاتو كنا بنقدر نضرب ليكم يالله يابرعى .......حااقفل الخط دى ماحالة دى مع السلامة بتخسرينى ياميسون تمن المكالمة دى... تيت تيت تيت .......
___________________
بلا ياخدك وياخد تخفيضك معاك (تتطنطن ميسون) قال زعلانة من راجلى قال
الو مين فى الخط معاك امجد ااهلا يااخ امجد كويس نحمدالله نعم ممكن اخدمك بى شنو الحقيقة لقيت اسمك مسيف عندى وماعارفك.... انا الكاتب ود الزين........ اى ما مسجل عندى ود الزين وكدة ...... طيب اها المطلوب منى شنو ......عشان انا سايق فى الشارع وكدة طيب ماتركن و وشنو ؟ اركن ليه ...انت منو وداير شنو ولا حاجة بس قلت مع التخفيض العاملنوا لينا ده اضرب للناس الفى الموبايل العندى ديل كلهم لكن انت مابتعرفنى ؟ مالو نتعرف انا امجد ولقيت رقمك فى تلفونى انا الكاتب ود الزين نعم اى خدمة انت سايق بى سرعة كم هسة بى 80 مرخص عربيتك لا قلت بدل ارخص احسن القروش اعرس بيها .... وسايق سااااااااى كدة وانت دخلك شنو لا ابدا مالازم ترخص حكاية ال30 الف دى وقفوها بيودوك الساحة الخضراء انت وعربيتك انت مالك كيف مالى مش رقم تلفونك فى موبايلى ويعنى تقوم تقدنى بالكلام من صباحة الله لابنيى لابينك عرفة قبال كدة كدى قول لى انت اديب فى شنو شعر ولا نثر ولا نضمى سااااااااااااااى كدة لا انا راوى بتروى من بتين........... بتروى شنو....... ياتروى انت .......انا قاص...قاص قاص بتقص شنو ......شدر؟ اى بقص شدر عندكم شدر اجى اقصه ليكم وبالمرة اقص ليك راسك ده من بتين يااستاذ بديت الجز ...... اقصد القص القص شنو يا ابو قص انت مش انت قصاص انا كاااااااااااااااااااااااااتب اديب راوى بتكتب شنو ووين وبتين وليه بكتب فى الجرايد ونحن ربنا ابتلانا نقرا ليكم مش؟ هو فى بلوى اكتر منك بالله ....هسة دى .......عالم وهم اسمع ماتنبذ انا ضارب بس لانه لقيت رقمك فى موبايلى ثم انه زاتو الجاب رقمك شنو عندى هنا مابعرف شوف انت سيفته كيف وبتين ... الموبايل ده جديد اشتريته امبارح من واحد فى السوق العربى خلاص يكون ده تلفون واحد انا بعرفه انت بتعرف منو ومنو ومنو ياخى انت دخلك شنو مالك ياخى ماتخلينى فى حالى مع السلامة لا بالله دقيقة بس عندك كلمات اتغنت لا طيب اترقصت شنو؟ اقصد ا كلمات اترقصت قبل كده ..... لا حول ولا قوة الا بالله العلى العظيم بالله اصلوا ماسمعت بيك قبال كده ...ود الزين ...ود الزين ولا انا زاتو سمعت بى روحى دى .......بالله زح كدة ولا كده انت بتتكلم مع ناس المرور؟
شركات الجوال مازالت تقدم عروضها ...وهاهى امونة المغتربة مع زوجها فتاح ....
نشوف السيناريو برضو الارتجالى ده حيجيكم كيف (على الله ) غايتو بسم الله
فتاح انت مارق اى ماشى الشغل ليه فى حاجة كنت عايزاك قبل ماتمشى تتناول لى كرت تلفون بى 10 ريال من البقالة لى شنو .....ماقبال ساعتين جبت ليك واحد لما مشيت اجيب العيش دايرة تانى واحد دايرة اكلم فوقية صاحبتى لى شنو ....ومن بتين قاعدة تضربى ليها يخسى عليك يافتاح ماعشان التخفيضات دى وكدة وعشان التخفيضات دايرة تقد لى جيبى ده يعنى هسى نفوت التخفيض ده ساااااااااااكت كدة مانستفيد منو ما ..شنو ....نستفيد؟ نستفيد شنو كيف ........عارف بالعشرة دى اتكلم نص ساعة بى 7 ريال وتلاتين هلله بس وال 7 ريال ديل انت دافعاهم من بيت ابوك مامن جيبى الدايب ده طيب اها يعنى نفهم شنو هسة تفهمى انو الشركات دى بتخفض بمقابل مش سااااااااااااكت كدة طالقة ليكم الخط مفتوح كيف يعنى ....هسى معقول مع كترة الناس البتتصل دى بتكون استفادت شنو غير خدمة لينا وقدمتها كتر خيرها ياولية انتى جاهلة ديل بيدوك ليها ياليمين ويشيلوها بالشمال كيف ياابو العريف ورينا عاد التنظير ده يخلوه ليك هسى انتى كانت عندك الشريحة بتاعة الشركة دى من اصلوا لا مش جبتها ليك لما اعلنت الشركة دى عن تخفيضات اى ده اول مكسب استفادوا بعميل جديد وكمان حيعبى كارته مرة ومرتين وتلاته لانه العرض ماعاملين لية مدة محددة اى والله يلوى راسك المقودس ده ...هسى كم 10 شلتيهم من الصباح وشابكانى مامجانى يافتاح مامجانى يافتاح .... الجن اليزوزى بيك هسى حتجيب لى الكرت لا مالازم لانى ختيت صاحبتى مع ارقام العائلة وكدة يعلك رب العالمين زى ماعليتينى اى عليتك هو انت كنت كدة ...من ماعرستك زادو ليك ماهيتك ورقوك .....كمان انكر دى نكير اليشيلك ويريحنى
شركات الجوال مازالت تقدم عروضها ...وهاهى امونة المغتربة مع زوجها فتاح ....
نشوف السيناريو برضو الارتجالى ده حيجيكم كيف (على الله ) غايتو بسم الله
فتاح انت مارق اى ماشى الشغل ليه فى حاجة كنت عايزاك قبل ماتمشى تتناول لى كرت تلفون بى 10 ريال من البقالة لى شنو .....ماقبال ساعتين جبت ليك واحد لما مشيت اجيب العيش دايرة تانى واحد دايرة اكلم فوقية صاحبتى لى شنو ....ومن بتين قاعدة تضربى ليها يخسى عليك يافتاح ماعشان التخفيضات دى وكدة وعشان التخفيضات دايرة تقد لى جيبى ده يعنى هسى نفوت التخفيض ده ساااااااااااكت كدة مانستفيد منو ما ..شنو ....نستفيد؟ نستفيد شنو كيف ........عارف بالعشرة دى اتكلم نص ساعة بى 7 ريال وتلاتين هلله بس وال 7 ريال ديل انت دافعاهم من بيت ابوك مامن جيبى الدايب ده طيب اها يعنى نفهم شنو هسة تفهمى انو الشركات دى بتخفض بمقابل مش سااااااااااااكت كدة طالقة ليكم الخط مفتوح كيف يعنى ....هسى معقول مع كترة الناس البتتصل دى بتكون استفادت شنو غير خدمة لينا وقدمتها كتر خيرها ياولية انتى جاهلة ديل بيدوك ليها ياليمين ويشيلوها بالشمال كيف ياابو العريف ورينا عاد التنظير ده يخلوه ليك هسى انتى كانت عندك الشريحة بتاعة الشركة دى من اصلوا لا مش جبتها ليك لما اعلنت الشركة دى عن تخفيضات اى ده اول مكسب استفادوا بعميل جديد وكمان حيعبى كارته مرة ومرتين وتلاته لانه العرض ماعاملين لية مدة محددة اى والله يلوى راسك المقودس ده ...هسى كم 10 شلتيهم من الصباح وشابكانى مامجانى يافتاح مامجانى يافتاح .... الجن اليزوزى بيك هسى حتجيب لى الكرت لا مالازم لانى ختيت صاحبتى مع ارقام العائلة وكدة يعلك رب العالمين زى ماعليتينى اى عليتك هو انت كنت كدة ...من ماعرستك زادو ليك ماهيتك ورقوك .....كمان انكر دى نكير اليشيلك ويريحنى
Quote: ا كدي ورينا (قحيتي ولا جيتي صاماهن بي صَرتِن ) .... منتظرنـــــــــــــــــــــكـ
قحيت لمن جيت صارة وشى .............. قحيت فى بحرى الاملاك والشعبية والحلفايا والصافية وشمباات لغاية الكدرو ... وقحيت فى الخرطوم فى ال.....ولا اقول ليك امسكها من الكبرى ....وانت ماشى دى كلها (قحح) جمع قحة وكدة وفى ام درمان يطيب الجلوس اقصد .....تطيب القحة ......
____________________________________
وجاياكم بس خلى الشتاء يروح .........سلامى لست بيتك واولادها ......
الزرافة لها أطول رقبة بين مخلوقات الله سبحانه رغم كدة الأضنين صغار .. عشان الزرافة ما عندها صوت .. ما عندها أصلا حبال صوتية .. لو كان عندها حبال صوتية كانت حتكون حبال في طول ( السلبة ) .. و كان من أول ( نقة ) مع السيد ( زوجها ) حتنخرم طبلة أذنها .. عليه
فإن المزكوم ينخنخ في حديثه ( فيقول لا فض فو نقته ) : بشيت البستشبى أشوب باتنة بت البكي ) *
أتحداكي تعرفي قال شنو المزكوم النقاق دة
المهم
لذا فإن الحنجرة ترتاح إذا مرض الأنف .. و بالتالي ترتخي طبلة الأذن بل يصيبها طرش مؤقت
عندنا واحد معانا هنا في جمعيتنا زول نقاق 5 نجوم .. . بيكون سافي الصعوط و هارينا كلام دون توقف .. لما يجي يتف السفة تلقيه شادي شلوفتو و مقبل على الحيطة عشان يتف و بيقول لينا و هو بيأشر بإيدو التانية : دقيقة إدوني فرصة
اتخيل لى قال مشيت المستشفى اشوف فاطمة بت الفكى ..................
على العموم شكرا على الشرح ......لكن زولكم بتاع الجمعية ده مابالغ عدييييييل كدة .....مامدى روحه زاتا نفس .......الله يكون فى عونكم انا لو منك بعتزل الجمعية .....والرابطة ...والملتقى ...واى حتة هو بمشيها ..................(سؤال ...ده بيكون عامل شنو مع تخفيضات سوا من الجوال)
نخناخ لاقانى فى السودان راجل كبير دايرة اشترى منه حاجة ...من مايقعد لغاية مايمرق مابكون عرفت اصل البيعة شنو والمبيوع شنو ...والشارى اللى هو انا منو.... وبى كم وليه وبتين ....ده كله هين. لما الاقيه وش لوش .... لكن للمشكلة لما اضرب ليه .....لحظتها زى كأنى بكلم سريلانكى .مع هندى مع بنغالى ....الله يكون فى العون ....بس
______________________________
تحياتى للاسرة
Post: #54 Title: Re: ليه اهلنا بيقولوا القحة ولا صمة الخشم ... Author: حمد عبد الغفار عمر Date: 11-11-2008, 02:32 PM Parent: #51
الاستاذة ناهد
سلام
انا غايتو حسب تحليلي انو
صمة الخشم لفترة طويلة ممكن تؤدي الي روائح كريهة فيهو
عشان كدا الناس بفضلوا القحة بي رزازا دا و صوتها المزعج
علي الاقل الخشم بكون فاتح علي طول و بتحصل تهوية
لذلك جاء تعريف صرف القروش بالقحة عشان لو الواحد صماهن كتير ممكن يعفنن في الجيب
اصرفي ياخ عائزة تكوني مغتربة ساي كدة علي حساب الناس ديل