Post: #1 Title: ياجماعة .. انتو الشاعر ( الجميل) ده ........ ! Author: محمد الجزولي Date: 10-30-2008, 10:51 PM
. .
وينو ؟؟!! ..
حقيقة مفقود .. مفقود ..
Quote: أسطورة الوردة
كلمات / حسين محي الدين
عين في الوردة وعين في النار ده الخلاني بقيت محتار وأيد في الموية وسيف بتار في عينيها كلام وأسرار في عينيها أطفال شطار يجرو ويملو الدنيا أزهار وتسأل كيف كان المشوار كان في يوم والدنيا نهار كنا في جنة وكنا صغار نلعب ونجري ننط أسوار في فرحتنا الناس تحتار في حلتنا وجوه الدار نلعب كورة ونرسم صورة ونبني بيوتنا من الصلصال كان ما كان الدنيا جميلة وفي شارعنا جنينة كبيرة فيها الوردة وفيها الطيرة فيها أشواقنا القايمة نضيرة وكان الدنيا كمان بي خيرها وجوه المدرسة أحلى حكاية يا حبان لو كنتو معايا كان الحصة الأولى رياضة وكان الواحد زايد الواحد يساوي اتنين هسع قالوا بيساوى تلاتة ويمكن خمسة و عندنا بعد الفسحة حصة إملا وأستاذ حافظ بدي الحصة الخامس علوم و يوم في يوم يا حلوة كبرت وليك عشقت وفيك محتار قربك جنة وبعدك حارق زي النار..
Post: #2 Title: Re: ياجماعة .. انتو الشاعر ( الجميل) ده ........ ! Author: محمد الجزولي Date: 10-30-2008, 10:52 PM Parent: #1
Post: #3 Title: Re: ياجماعة .. انتو الشاعر ( الجميل) ده ........ ! Author: محمد سنى دفع الله Date: 10-31-2008, 00:02 AM Parent: #2
مشى يجيب التلج ولي هسي منتظرين انت وهو في العافية والسلامة مودتي
Post: #5 Title: Re: ياجماعة .. انتو الشاعر ( الجميل) ده ........ ! Author: ASAAD IBRAHIM Date: 11-07-2008, 09:53 PM Parent: #4
يا بركي رجع للزول باسويردو
Post: #6 Title: Re: ياجماعة .. انتو الشاعر ( الجميل) ده ........ ! Author: Salahaldeen Nadir Date: 11-07-2008, 10:03 PM Parent: #5
ياسلام ياخ
البورد من غير محي الدين لا طعم له ولا رائحة
!
Post: #7 Title: Re: ياجماعة .. انتو الشاعر ( الجميل) ده ........ ! Author: حسين محي الدين Date: 11-08-2008, 06:12 AM Parent: #6
دقيتي باب شوقي الوجع بالاسي وحسي المجّرح بالحنين دخلت مجاري الدم حروفك وإتكت عزفت كما الناي الحزين سبحت في سري ومشيت ياريت حروفي بتشبهك وانا أصلي زيك ما لقيت
الحبيب محمد الجزولي و زواره الأفاضل ممتن جدا لهذا الشعور النبيل وحقيقة كانت غيبة إضطرارية
محبتي الأكيدة
حسين،،،
Post: #8 Title: Re: ياجماعة .. انتو الشاعر ( الجميل) ده ........ ! Author: حسين محي الدين Date: 11-09-2008, 10:37 PM Parent: #7
وأختفى صاحب البوست plz check your pass word
Post: #9 Title: Re: ياجماعة .. انتو الشاعر ( الجميل) ده ........ ! Author: محمد الجزولي Date: 11-10-2008, 07:55 PM Parent: #8
Quote: plz check your pass word
باسويردنا حديد والحمد لله ..
عِلا مشغولايات .. تني راجع ..
ـــــ البيت بيتك اخد راحتك
Post: #10 Title: Re: ياجماعة .. انتو الشاعر ( الجميل) ده ........ ! Author: محمد الجزولي Date: 11-10-2008, 07:58 PM Parent: #9
Quote: خواطر كلمات / حسين محي الدين
كانت كعادتها تغزل من بساطتها للشمس ألوان الفرح.. تلهم ذلك المدعو القزح معني الرزازات المطر.. ***
كُنا و بقدر حوجتنا لها نحتاج أكثر لنتمعن في تفاصيلها أسرارها كيف أصبحت تشكلفينا هذا البُعد كيف أمست في دفاترنا شعرا عذبا ولحناً شجيا .. كيف وكيف و كيف *** أدارت مؤشر المذياع إلي موجة القلب تحدث الوريد الأيمن عن ثورة الشرايين التاجية واحتمال حدوث ذبحة صدرية او جلطة دماغية و ربما بعض الأشواق الخفيفة هنا وهناك! إلا أنها كعادتها لا تصدق الأخبار *** هزت إليها بجذع الروعة فتساقط هواها بقلبي كما أشتهي انا الذي أدمنت الوقوف في ناصية قلبي فاءذا بها تمر بقربي أو بقلبي، يكفيني أنها مرت والسلام.. *** ما زال البحث جاري عنها وعنهم.. أولئك الساكنين في ناصية القلب
Post: #11 Title: Re: ياجماعة .. انتو الشاعر ( الجميل) ده ........ ! Author: محمد الجزولي Date: 11-10-2008, 08:02 PM Parent: #10
Quote: يا ناسية
كلمات / حسين محي الدين
يا ساكنة كل الأمكنة ويا ساحبة من تحتي البساط أحزاني بعدك مزمنة، يا سابحة في عمقي ودماي حلمي المعاك أصبح ضنا وحبي النبيل الشايلو ليك صابو العنا، يا وردة في وادي الفراش مزادنة زاهية ملونة، كيفن تمر أطياف هواك من غير أشوفها وأحضنها وكيفن يطيب طعم الرحيق من غير عيونك والمنى، قلبي العليل لو جاهو ليل دمعاتو مين بيسَكنها، يا ناسية لي عهدي المعاك خطوات بعيدة وممكنة.
Post: #12 Title: Re: ياجماعة .. انتو الشاعر ( الجميل) ده ........ ! Author: محمد الجزولي Date: 11-10-2008, 10:50 PM Parent: #11
الأحباء
محمد السني دفع الله فاروق أبو حوه اشرف ابراهيم صلاح الدين نادر
شكراً التوقف ومشاركتنا في استرداد الولد الوديع وشاعرنا الجميل ......
Quote: أكتب شعرا
كلمات / حسين محي الدين
إني أراني أكتب شعراً، أحاسيسا من الأعماق وبالأعماق شئ حارق جداً.. لا أنفك أن أعشق كما لو أنني أغرق! نعم أغرق، إذا ما الخاطر أستغرق بذات هواك.. وذات مساء أتاني هاجس مفجع بأن الناس قد جمعوا وأني قد وثقت بحبل لكي أشنق! نعم أشنق، لأجل هواك.. إني أراني أهمس سرا.
Post: #13 Title: Re: ياجماعة .. انتو الشاعر ( الجميل) ده ........ ! Author: حسين محي الدين Date: 11-14-2008, 08:01 PM Parent: #12
تسلم يا جزولي وأعتذر للغيبة مرة ثانية بسبب تواجدي خارج الخرطوم
ومرة تانية التحية لكل الأحباب أعلاه
مودتي
Post: #14 Title: Re: ياجماعة .. انتو الشاعر ( الجميل) ده ........ ! Author: حسين محي الدين Date: 11-20-2008, 07:21 AM Parent: #13
Quote: إني أراني أكتب شعراً
يا سلام انا محتاج فعلا للكتابة في اليومين دي دعواتكم معانا
Post: #15 Title: Re: ياجماعة .. انتو الشاعر ( الجميل) ده ........ ! Author: محمد الجزولي Date: 11-22-2008, 03:11 AM Parent: #14
Quote: الشوق بحر كلمات /حسين محي الدين
أشتقنا ليك والشوق بحر فاتح ضفافه على القلوب القلوب السائلة عنك كيف تخيلها وتفوت أشتقنا ليك والشوق بحر والدمع فوق العين مطر الالفة نار والريد جمر واشتقنا ليك لامن فتر حيل الصبر اشتقنا ليك راجين تمر يا أحلى مشوار في العمر يا أحلى إحساس في العمر
ــــــــ اكتب ساكت يازول ( ٌقشه) ماتعترليك ..
Post: #16 Title: Re: ياجماعة .. انتو الشاعر ( الجميل) ده ........ ! Author: حسين محي الدين Date: 11-22-2008, 11:18 AM Parent: #15
يا سلام ياجزولي القصيدة دي واحدة من النصوص الدار فيها حوار كتير مع اخوانا في منتدى (مشاعل) عليه الرحمة كذلك يا طالع الشجرة .. وبيوت .. والانتقال من الوصفية للبنوية في الكتابة
تسلم يا صديقي على هذه الاحتفائية الحميلة
Post: #17 Title: Re: ياجماعة .. انتو الشاعر ( الجميل) ده ........ ! Author: محمد الجزولي Date: 11-23-2008, 04:30 AM Parent: #16
Quote: يا سلام ياجزولي القصيدة دي واحدة من النصوص الدار فيها حوار كتير مع اخوانا في منتدى (مشاعل) عليه الرحمة كذلك يا طالع الشجرة .. وبيوت .. والانتقال من الوصفية للبنوية في الكتابة
تسلم يا صديقي على هذه الاحتفائية الحميلة
Quote: يا طالع الشجرة كلامات / حسين محي الدين
يا طالع الشجرة ليه يا قمر صاحي ..!؟ لا بتعرف الغربة ولا بتعرف الأحزان لا بتعرف الأشواق وقساوة الحبان فوق السحابة هناك بتغازل النجمات بتفّرح الغنوات تلهمني بالكلمات عارفني صاحي معاك بس يا قمر يا ريت لو تمشي للمحبوب وتقولو مني سلام أنا اصلي مشتاق ليك حال القمر حالي أصلو القمر صاحي بناجي محبوبة محبوبة القمره ساكنالا راكوبة راكوبة من القش وحبيبتي ساكنة هناك تسّمع في حبوبة يا طالع الشجرة جيب لي معاك بقرة وجيب لي معاك غنوات اسمع وأناجيها اضحك احجيها بي فاطنة والغولة والثعلب المكار ليه يا قمر صاحي !؟ وحبيبتي صاحية معاك لا بتعرف اللهفة ولا بتعرف الأشواق بس تلهم الكلمات والكلمة ملتهبة تحرقني بالعبرات يا طالع الشجرة جيب لي معاك بقرة وجيب لي معاك كتاب وبالمرة كوم ألوان ارسم حبيبتي هناك احضن عويناتها قول ليها جد مشتاق أنا ليك يا القمره ليه يا قمر صاحي ..!؟ يا طالع الشجرة جيب لي معاك بقرة وجيب لي معاك تذكار اهديه للقمره والقمره تهديه لي غيمة المطره والمطره يوم تنزل عند ناس حبيبتي هناك ترويها بالأشواق تسمع كلامي رزاز يبقى المطر غُنوه وتبقى الغناوي ملاذ يا طالع الشجرة جيب لي معاك بقرة وجيب للمسافر زاد في سكة القمره وجيب لي معاك ترياق لي علة الاشواق لي لهفة المطره لي لهفة القمره نامت خلاص الناس نامت حبيبتي خلاص وآماله في المطره ليه يا قمر صاحي !؟ ساهرت بيّا كفاك غطيني بالغنوات شان أصحى يوم بكره
وحنواصل .. لحدي ما نلحس (البرطمان) كلو ..
Post: #18 Title: Re: ياجماعة .. انتو الشاعر ( الجميل) ده ........ ! Author: حسين محي الدين Date: 11-23-2008, 10:03 AM Parent: #17
