Post: #1 Title: قصائدي الضائعة/ اكتوبر واحد وعشرين Author: Sami Talab Date: 10-21-2008, 10:26 AM
تحية اكتوبرية لكل الشرفاء في بلدي التحية لكل الشهداء وكل مناضل من اجل الحرية
هذه بعض القصائد التي فقدتها منذ فترة طويلة وعثرت عليها البارحة وقراتها مرارا لنفسي وبعض منها لصديقي الشاعر عوض شيخ ادريس ونحن نتنسم زكري اكتوبر المجيد.
غضب ( 1)
غابت شمس الحق حزينة
هدر الغضب الكامن فينا
ودق ابواب السر الليل
السر الضاع واللحقو شليل
شليل وينو..شليل وين راح
شليل مسروق...
شليل ما راح
وتفت شمس اليوم التاني صباح
في وش الليل مفتاح
الناس العانو جراح
الفقر الراكب صاح
الفقرا الجدع السبحة
النام الليل..الباع الدين
والكان مرتاح
اتلمو صباح
وجابو قرار السجم الاشتر
عسكر..عسكر..عسكر
وما بتزكر قصة جعفر
وبحر العسكر كيف اطفر
لما الغضب الفينا اتفجر
وجوه الناس الفيها احساس
الظلم محكر
لابد تزكر وما بتزكر
ناسي الناس الطاوية بطونه
الشاحب لونه..وغامضة جفونة
وما بتزكر
وكونك عسكر كيف تزكر
كل البلد الباقية معسكر
ودم الناس الصافي اتعكر
وما بتزكر..وكيف تزكر
لما الشيخ سوالو مزار
كيف تزكر والكلب الاعور
نوعو كتار
حتي الكلب كان محتار
لما النمل اتكاتف
وجرا قطار الناس الطالع زيته
وعرقه اتقطر
وكونك عسكر كيف تزكر
لانو الزكري اساسا فكرة
وين تلقاها يا شيخنا الفكرة
لمن تلقي في نص الشارع غيمة
وكل الشارع طالع يهتف
تسقط تسقط لينا حليمة
وما تزكر
Post: #2 Title: Re: قصائدي الضائعة/ اكتوبر واحد وعشرين Author: فيصل محمد خليل Date: 10-21-2008, 11:08 AM Parent: #1
Post: #3 Title: Re: قصائدي الضائعة/ اكتوبر واحد وعشرين Author: Sami Talab Date: 10-21-2008, 03:34 PM Parent: #2
الاستاذ فيصل
تحية اكتوبرية ويا سلام علي الرابط والابداع
باسمك يا اكتوبر
الشعب انتصر
حائط السجن انكسر
Post: #4 Title: Re: قصائدي الضائعة/ اكتوبر واحد وعشرين Author: Sami Talab Date: 10-21-2008, 11:35 PM Parent: #2
تحية اكتوبرية لمعلمي ومعلم الاجيال
الاستاذ محجوب شريف وهذه القصيدة علي نسق رائعة الاستاذ يا والدة يا مريم
وهي ياوالدة يا رقية التي احيها من علي البعد بتحية اكتوبر وهي تكافح
من اجل الصغار وكل الحب
يا والدة يارقية
يا زولة ثورية
ما تقولي جيتا جيت
يا شامخة بالفيا
يا ام لكل انسان
جواهو حرية
والعاش علي الحرمان
في المنفي كلية
والشردو الطغيان
لي هجرة قسرية
ديل ولادك ديل
يا والدة يا رقية
ما جرو فيك النم
ما زغردو التومات
ما غنن بنات العم
حبل العشم راجيك
يا ابوي ما تهتم
غير البنوه الناس
والجرتقو بالدم
والختو ليهو الساس
يا ابوي كان انتم
حلم الوليد كراس
اقرا اتعلم
اعرف حسابم كم
يا والدة عارفك لي
عارفة العليك والبي
فجر الخلاص راجيك
صحيها بتك مي
وسخ الدقون ماليك
فاكين كلاب الحي
بنك الشمال شاريك
يا والدة حقك لي
في الشارع المقفول
والجامعة زندية
مجاني دا التعليم
طلبة وافندية
حد الاجور معقول
عمال مزارعية
يا والدة يا رقية
يا زولة ثورية
Post: #5 Title: Re: قصائدي الضائعة/ اكتوبر واحد وعشرين Author: awad hassan Date: 10-22-2008, 06:10 AM Parent: #4
حقيقة لم اندهش وانا استمع له
لاول مرة يقرأ بعض قصائده وذلك لما عرفته عنه
من سعة في التفكير وبعد ثقافي واحساس رفيع
متميز ينعكس ذلك حتي في اسلوب حياته العادي
وان كان ثمة اندهاش لماذا لم تر هذه القصائد
النور رغم ما تمتاز به من شفافية نادرة وبعد
انساني عميق وقضايا تمس جذور المشكل السوداني
في التناول يجعلها لا تقل امتيازا عن اشعار لها
وضع خاص في خارطة الشعر السوداني النضالي.
الاخ سامي يمتاز كذلك بديناميكية وقدرة عالية
في فن ادارة وقيادة العمل الجماعي وهوانسان
ذو قيم أخلاقية وفكرية عالية.
Post: #6 Title: Re: قصائدي الضائعة/ اكتوبر واحد وعشرين Author: Sami Talab Date: 10-25-2008, 06:38 AM Parent: #5
الصديق الفنان عوض شيخ ادريس
عزرا للتاخير لكن الهكر اخرجني بعد كتابة قصيدة يا والدة يا رقية ولم اتمكن من الدخول الا الان بعد ان تدخل
الصديق بكري ورجع لينا الكهرباء
شكرا علي الكلام الجميل لكن يا ريت تنزل لينا الكلام المنضوم وجميل واللوحات الابداعية المركونة في البيت
وساواصل زي ما وعدتك تجميع وتنزيل ديواني المبعثر
سامي طلب
Post: #7 Title: Re: قصائدي الضائعة/ اكتوبر واحد وعشرين Author: Sami Talab Date: 10-25-2008, 08:42 PM Parent: #6
غفاري ( 3)
يلا اكتب يا غفاري
في سماوات كل الغلابة
لما حبر الدنيا ينشف
وانكشف ستر الكتابة
ولما قلب الدنيا يشهق
شهقة من ناسا تعابة
عاشو في دنيانا فرحة
وهسة عايشين الرتابة
في عيونم ضحكة دايمة
والتساؤل.. والاجابة
لي زمان عاشوهو ضلمة
لما عدت فوق نصابا
وفي انتظار الفجر اهلا
الف اهلا يا صحابة
لي السنين السودة ديا
اللي فيها الحق باهت
السنين السودة ديا
اللي فيها الدنيا شاهق
من اصابع غير امينة
واللي فيها الجرح نازف
البنادق ...الخزينة
الخنادق....الخزينة
الفنادق....الخزينة
الدقونة....الخزينة
البنوكة....الخزينة
يلا قومي وريحينا
يا بنوك الشوم
قومي وريحينا
ريحي الناس الحزينة
من شراب الدم محاية
ومن عرق كل الصبايا
الضاعو بين دقنين واية
اية من جوه البنوكة
اية لما البنك الوكه
تلقي انو البنك رابح
وفي حسابو الربح غاية
وما مهم الناس يجوعو
او يموتو...
ما كل زول راجيهو موتو
لو بي سببنا ...
او بي موت الله بيموتو
لكن يا داجل
موتو الجوع
وانت الماكل قوتو
واعرف انو الفجر حيشرق
الفجر حيملا بيوتو
وزي ما فاتو
السدنة قبلكم
انتو اكيد
حتفوتو
Post: #8 Title: Re: قصائدي الضائعة/ اكتوبر واحد وعشرين Author: Sami Talab Date: 10-30-2008, 03:19 PM Parent: #7
المنفي (4)
لقيتك انتي في جواي
زمانك ونحن المنفي
رجيتك......
يا حلم ضواي
تسوقو الريح
وما يخفي..
تشابي قلوبنا
لي دنياك..
تسابق خطوتك لهفة
نفوتك...
نحن ما بنقدر
عيون حاضنانة
بي الفة....
حرام ياغيمة ما تطلي
ربيع ايامنا ما جفة..
.....
وحاتك نحن بنعزك
وما كان ريدنا
ليك ..صدفة
Post: #9 Title: Re: قصائدي الضائعة/ اكتوبر واحد وعشرين Author: awad hassan Date: 11-16-2008, 05:09 AM Parent: #8
ياباهية زي طلت قمر
يازاهية زي عطر الزهر
ناسيانا ليه ايه الحصل
ماكنا ليك
المهدي داك المنتظر
وين الكلام المن عسل
وين العتاب
ليه الرسائل مابتصل
يا باهية ما كان العشم
نحصد سراب الحلم داك الترسم
قلبي الرهيف سايباهو ينزف في الالم
ناسياهو ليه
عارفاهو بحلف بيك قسم
اعلاه جزء من قصيدة للاخ سامي اتمني ان يتحفنا بالمزيد
Post: #10 Title: Re: قصائدي الضائعة/ اكتوبر واحد وعشرين Author: Sami Talab Date: 11-18-2008, 04:14 AM Parent: #9
الشاعر الفنان عوض شيخ ادريس
شكرا علي انزال القصيدة وقد وجدت الاصل المفقود ويحتوي علي بعض التصحيح في القصيدة
يا باهية -------------- يا باهية زي طلة قمر
يا زاهية زي عطر الزهر
ناسيانا ليه
وايه الحصل
ما كنا ليك
المهدي داك المنتظر
وايه الحصل
وين الكلام المن عسل
وين العتاب
ليه الرسائل ما بتصل
وايه الحصل
يا باهية ما كان العشم
نحصد سراب الحلم
داك الاترسم
وقلبي الرهيف
سايباهو انزف في الم
ناسياهو ليه
وعارفاهو بي حبك قسم
Post: #11 Title: Re: قصائدي الضائعة/ اكتوبر واحد وعشرين Author: Sami Talab Date: 11-21-2008, 12:00 PM Parent: #10
زينوبة --------------- راجيك يا زينوبة
بي خبر البشارة وفال
راجيك يا زينوبة
لما العم اقالد الخال
واشيل شبالو
من عروس الحي
راجيك ومعاي اطفال
تناجيك....
وتنادي البسمة
في زاتك....
فرح بنوتنا غنواتك
كلام من شب ما فاتك
وحلم الذادو تمراتك
اشيلو الليل
اناجو النيل
اجرو النم
زينوبة يا امل البعاين
لي مطيرة الدم
تجيهو صباح
تبل شوق الارض بالراح
تسيل وديان
تغني جروف
وصوت الساقية والشادوف
اعمق في صدور ناسنا
صوت زينوبة ميراثنا
وصوت زينوبة كراسنا
وصوت زينوبة في الوديان
اجو الصبيان
اسابقو الريح
اشيلو الليل
ابعدو الهم
وشان زينوبة ما تتخم
علي ناس الضلال تتلم
دقن الضلال منكوش
فيها الحرام عشعش
تيس الخلا المنبوش
في ريحتو تلقي الغش
زينوبة ما يهموك
لمة دقون ضالين
دقنا عليك مفكوك
سارق لسان الدين
زينوبة كان باعوك
باسم الضلال والدين
حنجيبو ليك الحق
ونهدو جبل الطين
حنجيبو ليك الحق
ونهدو جبل الطين
Post: #12 Title: Re: قصائدي الضائعة/ اكتوبر واحد وعشرين Author: awad hassan Date: 11-24-2008, 06:57 AM Parent: #11