Post: #1
Title: عِندي ظن إنو بِت إبراهيم إتهكرت
Author: عزام حسن فرح
Date: 10-20-2008, 07:44 PM
قبُل يُومين كِده جوني ضُيوف رحمن مع المِغيرِب ...
- مرحب حبابكُم عشره ... أبقو جاي ... حباب الجانا
إنشاءالله طَيبين يا ناس ... الجيتو مِنهُم ... الأهل وجُملة الجيران ... إنشاءالله ماف زول أبى الكِسره ... أحمُد الله وأشكُر فضلو ... يا مره سَوي لينا جبنه
- يابا أُمي دايراك جُوه
- أنا فترت والله مِن خِدمة الضِيوف ... اليَوم جت أنا فوق الشاي والجبنه
- سمِح ننضُم عُقب الضِيوف يمشو
أها الضِيوف بعد ما فاتو مِني ... رجعت لِبِت إبراهيم ...
- مالِك يا مره قِبيل مُضايقة ؟
- فترت ساي مِن الخِدمة
- الشاي والجبنه بِقْن بِفتِرن يا بِت إبراهيم ؟
- أي بِفتِرن ... أنا بدرو تجيبلي خدامة مِتِل العِند أُختك تساعِدني
- أُختي مُوظفة علشان كدي عِندها شغالة ... إتِ سببِك شنو ؟
- سببي الخِدمة كِترت على بِجاي خِدمة أولادك وبِهناك خِدمة ضِيوفك ... أتحنن وأدخن ليك بِتين
- هسع الحشر الحِنه والدُخان في حديثا شنو ؟
- حشرا غدر الرُجال ... أكان ما إتحننو ليكُم وإدخنو ، بِتقنِبو معانا ؟
- يا مره أنا قادِر أعيش ، علشان أعرِس فوقِك ...
- وإت لما صافحتني كُتْ قادِر تعيش ... ما أدوني ليك بِالفاتحة ... السعلك مِن العيشه منو
- لا حَول ولا قُوة إلا بِالله ... يا زوله ده كلام شنو ... إتِ بِت إبراهيم ... معقول !!!
|
Post: #2
Title: Re: عِندي ظن إنو بِت إبراهيم إتهكرت
Author: الحاج حمد الحاج
Date: 10-21-2008, 06:31 AM
Parent: #1
تضامني مع بنت ابراهيم ، تستحق يجيبو ليها خدامة..ياخي انت بتشرب جبنة في اليوم مية مرة ..غير ضيوفك...
|
Post: #3
Title: Re: عِندي ظن إنو بِت إبراهيم إتهكرت
Author: tarig almakki
Date: 10-21-2008, 06:56 AM
Parent: #1
بت أبراهيم ما إتهكرت يا الحبيب
علا الباس وورد بتاعك ضايع ..
|
Post: #4
Title: Re: عِندي ظن إنو بِت إبراهيم إتهكرت
Author: ابو جهينة
Date: 10-21-2008, 07:09 AM
Parent: #3
عزام
تحياتي و مودتي
| Quote: حشرا غدر الرُجال ... أكان ما إتحننو ليكُم وإدخنو ، بِتقنِبو معانا ؟ |
بالعكس .. بت إبراهيم في كامل حضورها ... فأكثر الرجال الزائغين يتحججون بأن الزوجة ما عادت تهتم بنفسها رغم أنه هو قد يكون سبب ( بشتنتها ) ..
تحياتي و كامل مساندتي لبت إبراهيم
|
Post: #5
Title: Re: عِندي ظن إنو بِت إبراهيم إتهكرت
Author: shammashi
Date: 10-21-2008, 07:56 AM
Parent: #4
الخدامة يا عزو عشان تبل ليها الحنة وتجلبطا كمان بيها. وكمان عشان تولع ليها الدخان ، ويمكن كمان تقول ليها اتدخني بدالي عشان الدخان ما يدخل لي في عيوني.
شفت اللعب دا كيف؟؟؟؟
|
Post: #50
Title: Re: عِندي ظن إنو بِت إبراهيم إتهكرت
Author: Ahmed Abdallah
Date: 10-30-2008, 05:27 PM
Parent: #3
| Quote: علا الباس وورد بتاعك ضايع .. |
ود المكي
شكيت محنك ....
هو عليك الله الهم و الغم و مكابسة المعايش دي ما بتودر الباسويرد
هو الباسويرؤد ذاتو دايرين بيهو شنو ؟؟؟
|
Post: #6
Title: Re: عِندي ظن إنو بِت إبراهيم إتهكرت
Author: منتصر الامين
Date: 10-21-2008, 08:06 AM
Parent: #1
عزام يا دوب بت ابراهيم اتهكرت
لكن والله صمدت جنس صمود
ما دام ما اتهكرت الزمن الفات دا كلو
تخريمه :
اسم الهكر منو لكن ،،
|
Post: #8
Title: Re: عِندي ظن إنو بِت إبراهيم إتهكرت
Author: عماد الشبلي
Date: 10-21-2008, 08:45 AM
Parent: #6
يا عزام
خلي
قلبك
مع
بت
ابرهيم
شويه.......
|
Post: #7
Title: Re: عِندي ظن إنو بِت إبراهيم إتهكرت
Author: Adil Osman
Date: 10-21-2008, 08:40 AM
Parent: #1
هههههه
دى ما بت ابراهيم يا عزام. بت ابراهيم هدية ورضية لا تشكو ولا تتذمر.
ولكن دى فرصة عشان بت ابراهيم تعمل معاك اجتماع قمة لمناقشة كل القضايا العالقة.
|
Post: #9
Title: Re: عِندي ظن إنو بِت إبراهيم إتهكرت
Author: عزام حسن فرح
Date: 10-21-2008, 04:27 PM
Parent: #1
حاج حمد ...
| Quote: تضامني مع بنت ابراهيم ، تستحق يجيبو ليها خدامة..ياخي انت بتشرب جبنة في اليوم مية مرة ..غير ضيوفك... |
إتْ عارِف يا ود حمد لما كِرعيني دي إنتهت بي في البُطانة شِربت فيها أول فِنجان قَهوة ... ما عجبتني ... مُره وشينه والأهم غالية ... الوكِت داك أكان السُكر بتصرُفو لينا الحيكومة بالبِطاقة صرِف ... الزول أكان نصيبو في الإسبوع عدد واحِد وقِية ... أها في الزمن ده يا الحاج أكان عِندي مرتين سوا سوا ... ظنك في زول عاقِل بِفرِط في وقِيتو الات السُكر ... حرم تفرِط فوقا عِلا المراريا تمرُق روحك ... المِهِم يا الحاج لِغاية ما دخلت البُطانة في ذات يوم مِن أيام عينه العصا الفوقو الزِراعة ما بِتتنسا ، لِغاية الوكِت داك ما شِربت لي جبنه
طين ... بعد داك بِقَت بِت إبراهيم بتسيها لي يوماتي بين العصُر والمغرِب ... إتعَودت عليها وقننتها ليك ... قننتها كيف ؟ إتفقت مع بِت إبراهيم إنو نِقتا تنحصِر بِين الفِنجان الأول وآخِر فِنجان إدِلقو في حلقي ... بعد داك نِقه ماف عِلا في جبنه باكِر ... حرم نِدمت لإختِزالي كُل النِقه في < البُرهه القليلة > بِتاعت الجبنه ... كِمية الطلبات والشكوى بِتكون مقبولة أكان إتَوزعت على الـ24 ساعة ... لكِن كُل نِقه اليَوم تِتصرا في بُقجه وتِتفكا بِخِلقتك ... بِتكتُلك يا زول ... بِتجيبلك وجع القُلب ، حمانا الله مِنو ... بعد ده كلو تلومني يا الحاج وتعِد لي جبناتي عد ... هسِع أنا بِكلامك ده أقبِل وين ... والغُربة أقضيها كُلها في ماهِيه الخدامه وطلباتا ...
وكِت الجبنه جابت كمان تكليف ...
يا الجبنه بِقت القُروش تسليف ...
حكم الزمن غُربه وشقا وتنتيف ...
|
Post: #10
Title: Re: عِندي ظن إنو بِت إبراهيم إتهكرت
Author: عزام حسن فرح
Date: 10-21-2008, 04:40 PM
Parent: #1
تاج السِر الملِك ...
Quote: بت أبراهيم ما إتهكرت يا الحبيب
علا الباس وورد بتاعك ضايع .. |
الباس الوورد في السودان أب وقِيةً واحدة ما ضاع مِني ... شوف المِحن ... في الغُربه أُم < كيوي > يقوم باس ووردي يضيع ... أنا أخوك يا السارة ... أنا أبوك يا الدُرة ... أكان كلامك ده صِح ... أمانة ما وقع راجِل ... وأخير الننستِر ونجيب خدامة ساي لِلمره دي ما تشيل حسي بعد العُمر ده ... السُتره والفضيحة مُتباريات يا خوي السِر ... خدامة خدامة الله يلعن أبو الغُربة زاتا ... القليلة ندفعا مواهي ...
أسمع أمريكا دي يا خوي ما فوقا العِلم ... ما بلقى عِندك شيتاً يرجِع لي باس ووردي ... أنا ... لا لا ما لي ... عندي صاحباً لي باسوووردو ودرو وكتين أكان بِعتِل في تفاصيل الحياة وشقاها ...
يمكِن يكون وقع مِنو ...
يمكِن الكريم يِباصرو ليهو مِن مِنو ...
ألقاها مِن داك يا السِر ولا آخُد مِنو ؟
|
Post: #11
Title: Re: عِندي ظن إنو بِت إبراهيم إتهكرت
Author: عزام حسن فرح
Date: 10-21-2008, 05:10 PM
Parent: #1
أبو جُهَينة ...
الزول البريدو ... كيفك يا سيدي ...
Quote: بالعكس .. بت إبراهيم في كامل حضورها ... فأكثر الرجال الزائغين يتحججون بأن الزوجة ما عادت تهتم بنفسها رغم أنه هو قد يكون سبب ( بشتنتها ) ..
تحياتي و كامل مساندتي لبت إبراهيم |
قلبي يا سيدي بِريدِن ساي وأهلي ربوني ... ظنك مُمكِن الزول يريد إتنين ... يِبقالَن ليهو زي عينيه الإتنين ... بِت إبراهيم بريدا وحاتك ودايماً بلوما وبقولا ... مُش حرام عليك نبقى سوا بِالصُدفة كِده ... هسِع أكان ما جابني الدرِب بِالصُدفة في حِلتكُم وكتين كُت شاقي البُطانة كايِس لي بهايِم لِلمزرعة ... كيف أهون عليك ... كيف ياخدِك راجِل غيري ... تضحك وتقول سجمي يا ود أبوي ما كُت راجياك ، عارفاك بِتجي ... مرات بتبكي مِن كلامي ده وأنا ببكي لِبُكاها وبنبكي لامن نتخَيل إنو أكان ما مُمكِن نتلاقا ... بعد ده كلو يا سيدي قُمت حبيت مِن تاني ... لامِن شُفتا جهرتني ... بهرتني ... قُلتا ليها بريدِك قهرتني ... قلتا ليها برجاك نهرتني ...
أكان عُمري إتنين يبقى واحداً ليلا ...
والتاني مداساً لو ترضى هيلا ...
أكان يا الله ما فوقِن حريمي جِناني قيلا ...
|
Post: #12
Title: Re: عِندي ظن إنو بِت إبراهيم إتهكرت
Author: سناء عبد السيد
Date: 10-21-2008, 05:18 PM
Parent: #1
لا و الله يا ود خالي بت ابراهيم ما اتهكرت الا انتوا خدمتكم كتيرة نحن نسوي شنو و لا شنو
نشوفكم و للا نشوف ضيوفكم و لا نشوف اولادكم و لا نشوف روحنا عشانكم
جيبلا خدامة تريحا ما كتيرة علي ام الوليدات
|
Post: #13
Title: Re: عِندي ظن إنو بِت إبراهيم إتهكرت
Author: عبدالوهاب علي الحاج
Date: 10-21-2008, 05:32 PM
Parent: #1
|
Post: #14
Title: Re: عِندي ظن إنو بِت إبراهيم إتهكرت
Author: عزام حسن فرح
Date: 10-21-2008, 05:49 PM
Parent: #1
مُنتصِر الأمين ...
| Quote: اسم الهكر منو لكن ،، |
إسمو الرتابة ... اليوماتي مِنو ... إسمو الإهمال ... بِتتهكر البيناتكُم لامن يكون الحُب في القلُب وممنوع قولو على اللِسان ... لامن نخجل مِن قول < بحِبِك > البِتشنِف الأضان ... أو تموت المراده موت الضان ... بِتصون المراده لِلبِلولي والصان
|
Post: #15
Title: Re: عِندي ظن إنو بِت إبراهيم إتهكرت
Author: عزام حسن فرح
Date: 10-21-2008, 06:42 PM
Parent: #1
الفنان عماد الشبلي ...
Quote: يا عزام
خلي
قلبك
مع
بت
ابرهيم
شويه....... |
أنا يا سيدي بدور قلبي معاي شِوي ...
ماخداتنو معاهِن شاوينو شي ...
يا البُرعي يا الحسن لله شئ ...
|
Post: #16
Title: Re: عِندي ظن إنو بِت إبراهيم إتهكرت
Author: عزام حسن فرح
Date: 10-21-2008, 06:58 PM
Parent: #1
الحبيب عادِل عُثمان ...
يا حليلك ... إنت الزول البِريدك بتسوي معاهو قدُر ده ... وينك يا راجِل ...
Quote: دى ما بت ابراهيم يا عزام. بت ابراهيم هدية ورضية لا تشكو ولا تتذمر.
ولكن دى فرصة عشان بت ابراهيم تعمل معاك اجتماع قمة لمناقشة كل القضايا العالقة |
العالقة ما عاقلة ... أنا أكان إجتمعت مع بِت إبراهيم وصنقرنا ننضُم في القضايا العالقة الما عاقلة بنهزِم ... عِلا نضمي معاها بِالمراده الفي قلبي الخارتاهو خرِط ... أصلي ما بدافِع عن روحي ... هي روحي معاي ... روحي راتيا لي ... جايبه خبري هسِع أكان حي ولا مَيِت ...
بس قولي عادِل أخوي شِن أسو ...
البِنِيه بِقفاها أيامي سو ...
بدورلي مِن مايِرنو سَو ...
|
Post: #17
Title: Re: عِندي ظن إنو بِت إبراهيم إتهكرت
Author: عزام حسن فرح
Date: 10-21-2008, 07:12 PM
Parent: #1
سناء عبدالسيد ... سِري وضراي ... بِت عمتي
Quote: نشوفكم و للا نشوف ضيوفكم و لا نشوف اولادكم و لا نشوف روحنا عشانكم
جيبلا خدامة تريحا ما كتيرة علي ام الوليدات |
البركة العِندكُم < روح > نان نِحنا مالن روحنا يوت بنديها بلا جيها ... الزول يا سِري وضراي بلا روح ... بلا النفخة الربانِية < ... وَنَفَخْتُ فِيهِ مِن رُّوحِي ... > شِن بِبقى ... غير جسد خواء مِتل تور السامِري ...
نِحنا بلاكُم خواء وإنتن بلانا بِتبقْن ...
أكان كِتر القِرش في المسير تِتسبقْن ...
وإن قلْ مال الوراكِن تقول تنهلكن ...
|
Post: #18
Title: Re: عِندي ظن إنو بِت إبراهيم إتهكرت
Author: عزام حسن فرح
Date: 10-21-2008, 07:20 PM
Parent: #1
بكري أبوبكر ... الرماد كال حماد ... إتْ ما شايِف البسوي فيهو عبدالوهاب المشهور بـ < وهبه > هكر الهكر ظاتووو ...
بِالله دي سويتا كيف يا < وهبه > شكيتك على الرفع السما وما سالا شِعب ... والله إتْ مصلت ... مِحنك
|
Post: #19
Title: Re: عِندي ظن إنو بِت إبراهيم إتهكرت
Author: بدر الدين اسحاق احمد
Date: 10-21-2008, 07:49 PM
Parent: #18
الليلة ... الليلة ....
واللة تستاهــل ....
ويا بت ابراهيم هاك النصائح دى :البتخوف الرجال العينهم زائغة ( كمان قال بعرف يحب فى البنوت الصغار )
* اول حاجة تمشى الى الكفيل تدقـــى تاشيرة خروج نهائــى .
* تانى حاجة مافى واحد من الشفع يبراكى ( ترجعى براك زى ما جيتى من بيت ابوك ) .
* ثالث حاجة تدردقيهو لحدى ما يديك العصمة فى يدك ( طوالى تطلقيهو طلاق ثلاثة ...بينونة مجنونة كبرى قدر دى )
* وتخليهو يمشى الشغل والعيال للمدرسة وتقومى ( تهكرى البيت كلو ...حتى رصيد الكهرباء ما تخليهو فى العداد )
* وبعد دى تقولى الدعاء دى ( مجرب من وليــة صالحة ) :
* انشاء الله ود امو عزام ما يشوف ليـــه جكساية لحدى مايموت بعد خرف ( 5مرات )
* انشاء الله ود امو عزام يطلع كوز ( عندو اضانين ) وصاحب كوشيب زاتو وهاك يا اوكامبو ( 10) مرات .
* يا مجفف المنابع جفف منابع عزام المالية .
عليك امان الله كان ما لقيتيهو فى العزبة ...شغال اكياس وكوانين ...ما تدينى اضانك تانى .
هبشات :
انت يا عزام الهكر دى من اتحاد المكفوفين ولا شنو ...
عليك الله كلمو يجى يهكر الركشة حقتى دى ...
ودفار ....البيتاوق .
وقرقرقرقرقرقرقرقرقرقر قرقر
|
Post: #20
Title: Re: عِندي ظن إنو بِت إبراهيم إتهكرت
Author: عزام حسن فرح
Date: 10-21-2008, 07:55 PM
Parent: #1
- يعني شنو يا عزام أنا ما بستاهِل ... أختك أخير مِني ؟
- أنا ما قُلت ما بِتستاهلي ... وأمُرقي أُختي مِن الفِجه دي ! قُلت ليك أُختي راجِلا مُستطيع وهي عِندها عُذُر ... المرا شغالة
أها بِقت بِت إبراهيم شغالة معاي تِلِغرافات بس ...
أجيب الغدا
أسوي ليك جبنه
الشاي حداك ما يِبرد
خلاص القِرايا إنتهت أحضِر العشا
وأقوم مِن مقيلي ألقاها كتبت الراكِز حسن ولدا قائِمة بِالحاجات الدايراها مِن الدُكان
سُكر
شاي
بُن
صلصة
تانك أو فيمتو لِلمدرسة
الحِكاية فرقت معاي شديد ... بقيت قاعِد في الديوان وهُم في البيت جُوه ...
- خلاص نشوف أكان خدامة ناس أُختي دي عِندها أُختاً ليها سِميحه كدي نجيبا
بعد يومين كِده
- قول معليش يا ود أبوي
- في شنو ؟
- موضوع الخدامة شايفاهو مُزعِلك
- لا خلاص ماني زعلان ... إتصلت الليلة بِناجي وسألتو عن خدامتُم ... والله قالي كلاماً سمِح بِالحيل
- قال ليك شنو ؟
- قالي يا سيتي في التبادي خدامتُم بِتقري الوِليدات الإنكِليزي جت ... هي ما دارسة جامعة عديل كدي ... وبِتطبُخ طبيخ خواجات ... ما فوقو كُشنه ولا زحمة ... إستيك وشنو ما بعرِف ... وقال لي ماهِيتا 400 دولار بس وتذكِرة سفر كُل سنتين ... قُلت ليهو خلاص أسألا أكان عِندها أُخُت شقيقتا لزم ... نضيفة وظريفة زَيها كده
- والله الحِكاية دي بقيت ما دايراها ... قِنعتْ مِنا
- ليه يا بِت الناس ؟
- دي بِرقِدوها وين بعدين ؟
- ألترقُد في الديوان ... أنا برقُد معاك في العوضه
- بري يا يِمه ... ديوان شنو البرقِد فيهو الخدامه ... بِتبشتِنو لي ساي ... بري
- بشتنت شنو البِتسيها في الديوان ... ترقُد ضلام الليل وتصبِح تخُش جوه البيت تشوف شُغُلا
- وتمرُق لِلخلا وين ... علو في حمامك الفي الديوان
- مالو ؟
- بري يا يِمه ... شِن قدرا ... ده الحمام الوحيد الجيهناهو لِلضِيوف
- يا بِت إبراهيم أنا عِندي شُغل ... أتْ دايره شنو بِالضبط يعني
- ما بدور خدامه بس
- وكلامي مع الرجِل داك أوديهو وين
- إتْ مالك يا خوي سويت الموضوع حقك
- ما كرهتِني البيت ... داخلا صارا وشِك ... مارقة بارمه خشمك ... قُلت أجيبلك خدامه وأخلص
- خلاص قول معليش الله يرضى عليك ...
- خلاص خلاص بلاها الخدامه
- أسوي ليك جبنه
- سوي
مرقت وبِضهرا الضِحِك دايِر يكتُلني ... المرا مِن قُلت عاوِز خدامة ظريفة وسِميحه ونضيفة جنت جِن ... بِت المرا الما مِنا ... أنا أخوك يا السارة ...
|
Post: #21
Title: Re: عِندي ظن إنو بِت إبراهيم إتهكرت
Author: عزام حسن فرح
Date: 10-22-2008, 02:45 PM
Parent: #1
المدعو / بدرالدين إسحاق وآخرين ...
Quote: انشاء الله ود امو عزام ما يشوف ليـــه جكساية لحدى مايموت بعد خرف ( 5 مرات )
|
يا صاحبي لو الريد كان بِالسماحة البِشوفوها بِالعيون ، أكان يوماتي دمعي كاب ...
الريد بِالقُلب لمان يِدُق ناكِر عوايدو ...
لمان يِجيك دايِر رُسومو ويخلص عوايدو ...
لمان يِعود شبابك قبيل الراحَن فوايدو ...
إتْ قايِل الريد بِالعِيون ... أمانةً عليك ... ما كُتْ ... مُتْ ... عُقب الفُطامه وفُتْ
|
Post: #22
Title: Re: عِندي ظن إنو بِت إبراهيم إتهكرت
Author: Salah Abdulla
Date: 10-22-2008, 08:21 PM
Parent: #21
عزام ،، كيف حالك
| Quote: تاج السِر الملِك ... |
هسع عليك الله الاتهكر منو ، إنت واللا بت إبراهيم ؟؟
الجاب طارق المكي القاعد معاك في الدوحة دي ، للسر الملك الفي أمريكا شنو؟؟
يا زول إنت منو ؟ يمكن تكون ( هناي ) زاتووووووووو..
|
Post: #23
Title: Re: عِندي ظن إنو بِت إبراهيم إتهكرت
Author: عزام حسن فرح
Date: 10-23-2008, 04:33 AM
Parent: #1
صلاح عبدالله ...
Quote: الجاب طارق المكي القاعد معاك في الدوحة دي ، للسر الملك الفي أمريكا شنو؟؟
|
يا زول حرم تقول معليش ... لمن صنقرت أكتِب في الرِدود أكانت حداي بِت إبراهيم ... أكان ما بخاف الكِضِب إظني إدهَوبت وِكتين قالت لي :
العيد قرب بِندور مصاريفو ...
كُتار مازاهُم مشاريفو ...
حليلو أكان قبيل مشا ريفو ...
|
Post: #24
Title: Re: عِندي ظن إنو بِت إبراهيم إتهكرت
Author: عزام حسن فرح
Date: 10-23-2008, 05:15 PM
Parent: #1
الدهَوبة جات فيك يا ود سعادتو ... معليش ... الحِكاية ما حتمُر ساي كدي ... مشيت لِلمُزَيِن وحلقت نمرة (2) علشان تاني أعرِف شُغلي زي الناس ... والله صحي أنا عسكري ما مُنضبِط ...
أسمع ماف داعي تكلِم السَيِد الوالِد ... ماف داعي نزعِجو وكِده ... خلي المَوضوع بيناتنا ... بدخُرا ليك إنشاءالله ...
|
Post: #25
Title: Re: عِندي ظن إنو بِت إبراهيم إتهكرت
Author: طارق ميرغني
Date: 10-24-2008, 03:08 PM
Parent: #1
| Quote: إتِ بِت إبراهيم ... معقول !!! |
بت ابراهيم دي مالا ؟؟ كان بالا طويل..... يا ربي تكون اتهكرت ؟؟
|
Post: #26
Title: Re: عِندي ظن إنو بِت إبراهيم إتهكرت
Author: عادل التجانى
Date: 10-24-2008, 08:00 PM
Parent: #25
صاحبي عزام أب شنباً ملوي
أب شنباً تقول ساقيهو
أنا لقيت ليك الحل ودا حل مني ليك وليها وربنا بس يديني أجره
في واحده اثيوبية جارتنا وبيني وبينك حلوه جداً
قرت البوست دا وسالتني منك
وقالت لي أنا حنيت على صاحبكم ده عشان كده أنا مستعده أشتغل معاهم (مجاناً) تقديراً لظروفه
ومسالة المبيت دي ما مشكله أنا مستعده أسكن في البرنده أو المطبخ أو الحمام
وبالصباح هاك يا (ذقني)
وبت إبراهيم دي بريحه ليهو
المهم هي في انتظار رد بت إبراهيم فقط لأنها قالت (عارفه ردك)
وما في داعي نقوم نفت الموضوع دا أكتر من كدا (اشكر جميع المتداخلين يا عزام) المشكله اتحلت
|
Post: #27
Title: Re: عِندي ظن إنو بِت إبراهيم إتهكرت
Author: طارق ميرغني
Date: 10-25-2008, 07:28 AM
Parent: #1
يا عادل التجاني والله كتر خيرك لكن انا باقترح انو البنيه السمحه اللقيتا دي تودوها لي ناس اختو وتجيبوا ديك لي ناس عزام لانها
خبره في الجبنه وبتستحمل نقة بت ابراهيم ثم تانيا بي سماحتا دي احتمال بت ابراهيم تزيد نقه ...!!
|
Post: #28
Title: Re: عِندي ظن إنو بِت إبراهيم إتهكرت
Author: عزام حسن فرح
Date: 10-25-2008, 10:22 AM
Parent: #1
طارِق ميرغني ...
Quote: يا عادل التجاني والله كتر خيرك لكن انا باقترح انو البنيه السمحه اللقيتا دي تودوها لي ناس اختو وتجيبوا ديك لي ناس عزام لانها
خبره في الجبنه وبتستحمل نقة بت ابراهيم ثم تانيا بي سماحتا دي احتمال بت ابراهيم تزيد نقه ...!! |
يا طارِق أنا عندي إقتِراح تاني ... تمِش بِت إبراهيم تقنِب مع ِناس أُختي ... وتخلوني مع الأثيوبِية دي ...
بريد أثيوبيا بريد ناسا ...
بريدِن لو كانو في ناسا ...
وريد المعاي حاشاني أتناسا ...
|
Post: #29
Title: Re: عِندي ظن إنو بِت إبراهيم إتهكرت
Author: عزام حسن فرح
Date: 10-25-2008, 10:47 AM
Parent: #1
عادِل التِجاني ...
سألتك مِني ... ولا دي مِن مِنك
الحبش هبش القليبو مسردم ...
الحبش نبش الرقد وإدردم ...
الحبش جواي ريدُم كِبِر وتكردم ...
|
Post: #30
Title: Re: عِندي ظن إنو بِت إبراهيم إتهكرت
Author: طارق ميرغني
Date: 10-25-2008, 11:02 AM
Parent: #1
الصوره دي وريها لي بت ابراهيم وقول ليها دي بتاعة الشغاله الجديده......
|
Post: #31
Title: Re: عِندي ظن إنو بِت إبراهيم إتهكرت
Author: عزام حسن فرح
Date: 10-25-2008, 12:25 PM
Parent: #1
طارِق ميرغني ...
شكيتك على الله أكان دايِر تمسِخ على اليوم ... يا زول مالك علي ... لا حَول لا قُوة ... الشي
حور ...
قلبي ... قلبي مِن شافا مالو ...
إتْخجا ... قامت دِمـوعي سالو ...
نحنُ نُسْـأل ... هـو ما بِسالو ...
|
Post: #32
Title: Re: عِندي ظن إنو بِت إبراهيم إتهكرت
Author: طارق ميرغني
Date: 10-26-2008, 08:16 AM
Parent: #1
انت عارف يا عزام الصوره دي ذكرتني واحد بيبيع الباسطه في عطبره وشعاره لا يذكر فيه اسم السلعة المباعة وبس بيقول:
" ما بالسمنه وكده ...."
|
Post: #33
Title: Re: عِندي ظن إنو بِت إبراهيم إتهكرت
Author: عادل التجانى
Date: 10-26-2008, 09:24 AM
Parent: #32
ما دام صديقي
طارق ميرغني
استلم الموضوع يبقى (مافي عوجه) وربنا يصبرك با بت إبراهيم يا اختي
البضمن الرجال !!!!!
وأنا بره من الموضوع ده لا عملت (شخبطه ولا لخبطه) وقصدي أحل المشكله
ومن فرج كربة !!!!!
وبكره وروني فارشين وين يا عزام
عادل
|
Post: #34
Title: Re: عِندي ظن إنو بِت إبراهيم إتهكرت
Author: عزام حسن فرح
Date: 10-26-2008, 09:44 AM
Parent: #1
عادِل التِجاني ...
| Quote: وبكره وروني فارشين وين يا عزام |
إتْ يا خوي بِسراعين دايِر تسويلي بيت بكا ...
بيت البُكا تاني تب ما بِندُق ليه صيوان ...
كتره دِموعي الهايمة إتَوزعت في الفِجج عِنوان ...
مِحل تِتصنت إنين قول : ألطُفبو يا رب يا منان ...
|
Post: #35
Title: Re: عِندي ظن إنو بِت إبراهيم إتهكرت
Author: طارق ميرغني
Date: 10-26-2008, 11:27 AM
Parent: #1
استاذنا عادل التجاني ..والله كتر خيرك فرجت هم اخ ومسلم لكن الجاب البكا شنو ...؟؟ وفي منو ..؟؟ في الما اتلقت ولا في
الفوق دي ...؟؟
|
Post: #36
Title: Re: عِندي ظن إنو بِت إبراهيم إتهكرت
Author: Kamal Karrar
Date: 10-26-2008, 11:55 AM
Parent: #1
| Quote: نشوفكم و للا نشوف ضيوفكم و لا نشوف اولادكم و لا نشوف روحنا عشانكم |
عزام بالله دقيقة يا أخي
الضيوف بيمشوا ويجوا... الأولاد ملحوقين... قرطوا لينا على الأخيرة.. وكده
|
Post: #37
Title: Re: عِندي ظن إنو بِت إبراهيم إتهكرت
Author: مزمل التريكى
Date: 10-26-2008, 12:23 PM
Parent: #1
Quote: الريد بِالقُلب لمان يِدُق ناكِر عوايدو ...
لمان يِجيك دايِر رُسومو ويخلص عوايدو ...
لمان يِعود شبابك قبيل الراحَن فوايدو ... |
عزام يا جميل
ان الضحك شارطنى ما بقدر اتكلم
لكن حفظت الخطه بتاعة المخارجه من زنقة الشغاله دى
حا اطبقها فى الوليه بى حزافيرها
بس اصبر لى لامن أعرس
|
Post: #38
Title: Re: عِندي ظن إنو بِت إبراهيم إتهكرت
Author: عزام حسن فرح
Date: 10-26-2008, 01:26 PM
Parent: #1
ود التريكي ...
| Quote: بس اصبر لى لامن أعرس |
كدي إتْـمـهِـل ... قول بِسم الله ... عِرس شنو يا زول البِتْعرِسو بلا شوره ... ولا أبقالك مِتِل < أولاد الفرِع > ... إتْ ما عِندك قِصتُم ... سمِح أسمع :
قاليك يا سيدي الآمنتا ليك : خمسة رُجال راكبين حميرُم ماشين ليهُم لِواجِب وأكان الدرِب شاقي غابة صُنُط ... قُبال الحدبه المُقابلة الحِله العانَيِنا إتعارض لِحاج مُحُمُد فرِع قدا عينو تب وإتصفت مويتا وتسمع أُم م م ...
- خبارك يا حاج مُحُمُد بتْمومي ؟
- لا لا ماف شي أمشو ساي !
قام الفرِع إنغرز تب في عين علي ود فضل المرجي ود عبدالكريم وتسمع أُح ح ح
- خبارك يا جنا بتقنِد ؟
لا لا ماف شئ أمشو ساي !
لامن عقبو الغابة وخلوها في ضهرُم ... كانو جت إنقدت عيونُم ...
بِالله سِمعت بِغتاتاً مِتِل دي قبُل ؟
أها يا خوي حرم ما تسمع مِني أُم م م تب أنا أخوك يا السارة ... شان كدي بدور أوصيك وكتين نيتك في العِرِِس ... أوعاك مِن الشنا ... بِتعولك الجنا ...
- إتْ يابا < الحُب أعمى > دي شنو ؟
- أكان < الحب مو أعمى > جِنِس أُمك دي بياخدوا !
شوف يا ود التريكي ... العُمر مو بعزقه ... وياهو فِرِد واحِد ما ليهو تني ... أكان إختِرت فُلانه بِت فُلان ... شوف قوما ... وشوف حوما ... وشوف عوما ... حرم أكان بطلت علي لوما وأكان صحت عليك صوما
|
Post: #39
Title: Re: عِندي ظن إنو بِت إبراهيم إتهكرت
Author: عزام حسن فرح
Date: 10-26-2008, 01:44 PM
Parent: #1
كمال ...
| Quote: قرطوا لينا على الأخيرة.. وكده |
يا زول ده كلام جرايِد ساي ... لِلإستِهلاك ... لِكسب الجماهير ... إستِجداء العواطِف ... حرم ما تشوف مِنهِن الحبه ... إلا بِتمن ...
إن كِتر المال بِجنْك زي ريل الفلا ...
وإن قلا تسمع إن مرقَتْ تقولك بـلا ...
يزعلن وبرضو نقولهِن حبابكن هـلا ...
|
Post: #40
Title: Re: عِندي ظن إنو بِت إبراهيم إتهكرت
Author: مزمل التريكى
Date: 10-26-2008, 01:48 PM
Parent: #1
| Quote: شوف يا ود التريكي ... العُمر مو بعزقه ... وياهو فِرِد واحِد ما ليهو تني ... أكان إختِرت فُلانه بِت فُلان ... شوف قوما ... وشوف حوما ... وشوف عوما ... حرم أكان بطلت علي لوما وأكان صحت عليك صوما |
لسع ما اخترت
ومن ايدك دى لى ايدك دى
باص بينى :
انت (عزام الفراعى) صاحب اخوى منير التريكى ؟
|
Post: #41
Title: Re: عِندي ظن إنو بِت إبراهيم إتهكرت
Author: Kamal Karrar
Date: 10-26-2008, 01:50 PM
Parent: #1
Quote: إن كِتر المال بِجنْك زي ريل الفلا ...
وإن قلا تسمع إن مرقَتْ تقولك بـلا ...
يزعلن وبرضو نقولهِن حبابكن هـلا ... |
عزام...
أقول ليك أصبت كبد الحقيقة..
ولا "الحقيقة" تزعل مني ...أصلها "الحقيقة" من أخواتهن..
لوووووووووول يا عزمي
|
Post: #42
Title: Re: عِندي ظن إنو بِت إبراهيم إتهكرت
Author: هاشم أحمد خلف الله
Date: 10-26-2008, 01:54 PM
Parent: #1
عزام يا فردة لكن لقيتك حكاي جنس حكي التقول حبوبة بس
مشتاقين بعد التهكير وكده
وتحايا خاصة لابت إبراهيم والعيال
الشغالة لا  بث خلاس إنتهى
|
Post: #43
Title: Re: عِندي ظن إنو بِت إبراهيم إتهكرت
Author: عزام حسن فرح
Date: 10-28-2008, 08:05 PM
Parent: #1
مُزمِل التِريكي ...
| Quote: انت (عزام الفراعى) صاحب اخوى منير التريكى ؟ |
بِالله ... أخوك ... كدي في التبادي قولي أخوك ده أكبر مِنك ولا أصغر ... بعدين نشوف حِكاية < فرِع > ولا < أصِل > ...
ولا أقوليك يا زول شان ما نطَوِل الحِكاية ... أكان أخوك أكبر مِِنك ... أنا ما عزام القاصدو ... وأصلي ما قريت فوق مدرسة ... حدي خلَوة الخليفة طربوش بس ... بِالله شوف جِنِس ده ... هسِع ودالموج قدري ولا ودشيقوق لحم صدري ... أهو بِناضمو معاي كأنو ما في شئ ، عادي يعني ... وأنا زاتي يا خوي ما ظريفة أحسِسُم بِشئ ... أنضُم نضميك يا زول مالك مال أخوك ... قرا معاي ولا في قفاي ... ده شنو دايرين تكبِرو الزول ساي قبُل يومو ...
تسألو عن السمك أكان شين أو سمِح عمومو ...
أخوك أكان بعرفو ... نقص ولا كِبر كومو ...
|
Post: #44
Title: Re: عِندي ظن إنو بِت إبراهيم إتهكرت
Author: عزام حسن فرح
Date: 10-28-2008, 08:11 PM
Parent: #1
كمال ...
Quote: أصلها "الحقيقة" من أخواتهن..
|
أنا بس راجيها تسوي مِتِل إمرأة العزيز وتنصِفني ولو مرة < قَالَتِ امْرَأَةُ الْعَزِيزِ الآنَ حَصْحَصَ الْحَقُّ أَنَاْ رَاوَدتُّهُ عَن نَّفْسِهِ وَإِنَّهُ لَمِنَ الصَّادِقِينَ >
|
Post: #45
Title: Re: عِندي ظن إنو بِت إبراهيم إتهكرت
Author: عزام حسن فرح
Date: 10-28-2008, 08:26 PM
Parent: #1
هاشِم ...
الشغالة المِتِل الصورة الجلبا الجنى البِفوق دي ... حرم ما باباها ... أنا جنيت ... دي أكان أبيتا يعضِني جمل ...
الشئ سماحه فاتت سماحه أندادا ...
البِهِناك والبِجاي والقُراب أحدادا ...
الحيموت كُتار ورامي بعد عدادا ...
|
Post: #46
Title: Re: عِندي ظن إنو بِت إبراهيم إتهكرت
Author: طارق ميرغني
Date: 10-29-2008, 07:01 AM
Parent: #1
| Quote: الشغالة المِتِل الصورة الجلبا الجنى البِفوق دي |
والله يا عزام عايز اساعدك عملا ب" من فرج عن مؤمن كربه.."
عشان كده اديتك خيارات توريها لي بت ابراهيم يا الصوره الفوق دي يا الشغاله الفوق دي ... اها قصرت معاك في شي كما قال مولانا محمد
الحسن الشايقي في " الدين النصيحه " .
|
Post: #47
Title: Re: عِندي ظن إنو بِت إبراهيم إتهكرت
Author: عزام حسن فرح
Date: 10-29-2008, 04:00 PM
Parent: #1
- باكِر الخميس إن أراض الله بسوق الوِليدات ناس أُختي يرُقدو هِناك لِيوم السبِت ...
- وأنا ما بمشي معاهُم مالي ؟
- لا أنا دايِرِك تَولِعي لي حطب الصُباغ الجِبتو أمِس ... قالو لي ده العِلاج الوحيد
البِيمرُق الرُطوبة المُكسِراني دي
- سجمي تدخن بِالصُباااغ ؟
- أي بِالصُباااغ ! ما عِلاج داير أقدِل بيهو في الحِله !
- والفِتنه دي بتمُرُقا كيفِن عُقُب جِسمك يِشيلا ؟
- فِتنه شنو يا مرا ... دُخان الصُباغ بِتعرِكي إتِ مِني بِالليفة والمحلب
- قُت كدي ؟
- أيَوه
- أجييي
- لا ما تجي (بِالله شوف المرا إتهكرت حد وين)
|
Post: #48
Title: Re: عِندي ظن إنو بِت إبراهيم إتهكرت
Author: مزمل التريكى
Date: 10-30-2008, 05:13 PM
Parent: #1
| Quote: ده شنو دايرين تكبِرو الزول ساي قبُل يومو |
يا خينا ات ما تصبر ... اسع منير التريكى ده يمكن أصغر منى
| Quote: بالله شوف المره اتهكرت حد وين |
يعينك الله يا يابه ...
التكنولجيا الوصلت لا اااااا حد بت ابراهيم دى امرقها الله
رجوه :
راجى شورتك فى موضوع العرس
|
Post: #49
Title: Re: عِندي ظن إنو بِت إبراهيم إتهكرت
Author: عزام حسن فرح
Date: 10-30-2008, 05:16 PM
Parent: #1
طارق ميرغني ...
| Quote: كما قال مولانا محمد الحسن الشايقي في " الدين النصيحه " |
دحين دي < النصيحي > وكيفنا < الضبيحي >
|
Post: #51
Title: Re: عِندي ظن إنو بِت إبراهيم إتهكرت
Author: عزام حسن فرح
Date: 10-30-2008, 05:29 PM
Parent: #1
ود التريكي ...
| Quote: راجى شورتك فى موضوع العرس |
إتْ يا خوي مُرازي ...
دايِر تعازي ...
جوازك ما زي جوازي ...
بلا الريد يبقى حولك بِزازي ...
|
|