Post: #1
Title: موسم الهجرة الى عطارد
Author: Tagelsir Elmelik
Date: 09-30-2008, 05:30 AM
Parent: #0
موسم الهجرة الى عطارد
تلقيت قبل عدد من الأيام، المكالمة السعيدة التي كنت انتظرها في شوق و لهفة، محادثة اقتصرت على كلمتين يتيمتين
عطارد فتح......
كلمتان تنزلتا بردا و سلاماعلى قلبي، أخيرا انفتحت فرص الهجرة و العمل في كوكب عطارد، آن الأوان لنا نحن معشر ( بني كجة) ان نخرج من وحسة الحلم الأمريكي الذي آل الى هضربة و كوابيس اقتصادية، آن لنا ان نخرج من كل اقطار الكرة الأرضية، بعد ان استنفدنا خيراتها ، من جهنم الربع الخالي و حتي مرابع التحنيط بالتجمد في القطبين و السكا، اسعدني الخبر فشرعت في مهمة (التستيف)، ستفت جوائجي مثلما ستف اسلافي من قبل اغراضهم، اجدادي الذين هجروا الغابة و الصحراء وفي متاعهم صفائح الحديد، و البقجة، و قراصة التمر و لحم ( ابو العفين) المقدد، و شريط ( حسنك أمر).
و سرحت اغني بأعلى صوتي
أنا يا علي
تطارد نطارد
في مطار عطارد
دايراك تجي
أقفلت جهاز التلفاز، فلم يعد يعنيني من امر انهيار البورصة و البنوك شىء، فأنا عطاردي الوجهة و المبتغى، و انا دائما، ابن بار للجهة التي تنتظر وصولي لتحتويني، اتصلت ببقية اهلي في السودان ظهر ذلك اليوم ( آخر دولارين في جيبي)، و اعلمتهم بفوزي باللوتري العطاردي، فصاحوا صيحات فرح حقيقي و هموا الباقين على ( باقي العقاب و العقاب)، ووعدتهم بأنني سأتصل بهم من هناك بمجرد و صولي ، و سأبعث لهم بشريط الكاسيت ايضا وفقا لشرائع الأغتراب الأصيلة، و سألني ابن أختي الشقي بفضول عن أهل عطارد ، فأجبته بأن الشياطين وحدها تقطن ذلك الكوكب، ففرح ايما فرح و حدث اصدقائه بأن الخال (بالمناسبة) شيطان كذلك، و اطمأن من خلال تأكيداتي له بأن (الأيبود) سيصله قريبا بعد ان عجزت عن شراءه من هنا نتيحة للأزمة الأقتصادية الراهنة.
نفضت الغبار عن جواز سفري السوداني و الذي كانت قيمته قد تضاءلت عقب ادائي للقسم الدستوري، و ذهبت الى نهر ( البوتوماك) اودعه جوازسفري الأمريكي خوفا من تعقيدات الأمن العطاردية، وفي المساء جلست في المكتبة العامة ( مقوقلا) فرص العمل في عطارد و طرائق السكنى، و امكانية مواصلة التغليم لأبنائى، و تبين لي خلال بحثي، أن الرحلة الى عطارد لا تتجاوز السنة الضوئية الواحدة، و ذلك يعني في الحساب البسيط، خمسمائة جيل سوداني تضيع هباءا وهدرا و دون حسرة، فقلت لنفسي ان ذلك ليس بكثير مقارنة بالصومال، و علمت فيما علمت، ان كوكب عطارد و نسبة لقربه من الشمس ، فأن حرارة سطحه تذيب الحديد، فلم ابتئس و شرحت لموظف الجوازات بأننا تعودنا العيش و (أ بوفرار) و الملاريا المستوطنة و كافة الأوبئة في حوش واحد طيلة فترة بقاءنا على الأرض، واننا نحكم من قبل اناس يذيبون الصخر فما تلاشينا، و حينما اتيت الى صفحة السكان قرأت ( غالبية سكان عطارد من الشياطين و المردة و كافة قبائل السفلي) ضحكت في سري فرحا للمصادفة السعيدة، فأنا سليل اقوام، حاربوا في العراق ، مع و ضد، و في حرب البوير و الكنغو، و ذبحوا الأبرياء في كل الأتجاهات، و ادمنوا الأنقلابات العسكرية و ما يعقبها من حمامات دم ، و تولوا سدة الحكم ذريعة لسحق الآخر، و تشريد البقية ، و الأستيلاء على الثروة، نفسد في الأسواق و نبيع الأوهام و الحجبات لصد الرصاص، ونبيع كذلك ما تيسر من الدين و الجغرافيا و نحج الى بيت الله دون فيزا.
ثم ان عمي هاتفني مباركا فقال( يابني توكل على الله، يمكن شواطين عطارد تطلع فيهم فايدة، اصيلين باين عليهم، احسن من شواطين الملجة ديل، اول ما تصل عرس ليك ( سعلوة) ، تتعلم منها اللغة، ما تنسى ترسل لى بكتة امواس ناسيت، معدومة ليها زمن)
و قد عن لي و انا في رحاب قوقل، أن انظر وسائل السفر الى عطارد، فوجدت المراكب الفضائية بأنواعها، و قوقلت فيما تبقى من الوقت السبل التي جربها أسلافي للهجرة و الذين ما تركوا ظهرا ما استبقوا على امتطائه، بدءا يظهور الجمال و الثيران و بصات الركبي و قطر كريمة و حتي احدث طائرات الجمبو جيت، ووجدت في صفحة لطائف المعارف، ان جدي ود الحسن، امتطي ظهر ارنب هربا من سوء الحال السياسي على زمانه، فتعجبت ان كيف للمضطر ان يركب الصعب و الأرض ملأى بالأرانب.
وقد تبين لي خلال بحثي في شأن الغربة و الأغتراب، ان ثقافة الحنية التي اشتهر بها مجتمعنا، تلك التي تدفع حبوباتنا الى اخذ قبضة من تراب اثر المفارق العزيز تيمنا بعودته، انقلبت الى ثقافة حنية مضادة، فقد ظلت خالتي توقظ ابنها العائد لتوه من الخليج كل صباح بصياحها ( اها قايم متين لى بلدكم السمحة ديك... قالوا عطارد فتحت).
عقدت العزم على الهجرة الى عطارد، و لم ادر كيف تسرب الأمر الى أصدقائي، فقد ظل هاتفي يرن طيلة النهار و الليل، شنو ياحبة قالوا كفيلك شمخروش.. كتر من الطواقي و السبح، و اسئلة عن ( الويلفير)، فطمأنتهم بان اسمه هناك ( البادفير) ، و أن (باب شريف) اسمه هناك ( باب ماشريف نهائيا) ، و تبرعت بكثير من المعلومات مثلي ومثل اى ضابط انقلابي سوداني، و افشيت بعضها و من ضمنها ساعة الصفر الى العقيد معمر و المخابرات المصرية، فصاح الناس من عجب ( بالله المصريين ديل عرفو كيف؟؟؟؟).
بيد انني لم اكن اود فوق كل ذلك، لمواطني الأمريكين معرفة خطتي و عزمي على الهجرة، و ذلك لأسباب انسانية بحتة، فقد حكى لي اسايلابي عريق بكثير من التاثر ( وهذه فصة حقيقية)، أن هجرة السودانيين في اوائل التسعينات من امريكا الى كندا، ازعجت الساطات الأمريكية ايما ازعاج و اصابت المسؤلين بالحرج، و سرد لي كيف ان كبار رجالات الكونغرس، قاموا بأذلال و تعنيف رجال الهجرة و كثير من القائمين على شأن الرعاية الأجتماعية، بل و صاحوا في وجوههم بغضب حقيقي...(السودانيين ديل تخلوهم يطلعوا من هنا زعلانين كيف.و يمشوا كندا، هسة نحنا نودي وشوشنا دي وين؟؟؟) انتهى.
و قد ظل عزو مؤمنا بحقيقية هذه الخرافة حتى يومنا هذا، فلم يبرح مكانه في بروكلين شبرا، خوفا منه على مشاعر الأمريكيين الرهيفة من الأنجراح.
هاقد حانت ساعة السفر الى عطارد، صعدت الى المركبة، وعلى كتفي ( لابتوب) و باليد الأخرى اوراقي الرسمية ووثائق التطعيم و ( جزء عم)، جلست في مقعدي وسط رهط من البنغال و الصومال وافواج من الهاربين من العدالة الدولية، و شعراء سئموا العيش في هذا الكوكب المتناحر اهله، تبدوا على سيماهم ملامح النجابة و الشاعرية، و المضيفات تتبعهن اذنابهن الأنيقات، يقدمن البنقو و العرقي للركاب مجانا، هاقد بدا ازيز المحركات يداعب اذني، و هانذا في طريقي الى عطارد، ليس في الأمر عجب، فأنا من صلب شعب (مارق للربا و التلاف)، فتلاف الى تلاف اولى به تلاف عطارد.
|
Post: #2
Title: Re: موسم الهجرة الى عطارد
Author: أيزابيلا
Date: 09-30-2008, 09:15 AM
Parent: #1
| Quote: و انا دائما، ابن بار للجهة التي تنتظر وصولي لتحتويني، |
وانا كذلك
كل سنة وانت طيب 
|
Post: #3
Title: Re: موسم الهجرة الى عطارد
Author: حسين محي الدين
Date: 09-30-2008, 09:20 AM
Parent: #2
Quote: أنا يا علي
تطارد نطارد
في مطار عطارد
دايراك تجي |
متأكد ده عطارد 
|
Post: #8
Title: Re: موسم الهجرة الى عطارد
Author: Tagelsir Elmelik
Date: 09-30-2008, 04:34 PM
Parent: #3
حسين محي الدين صديقي
ياهو زاتو عطارد
تحياتي و كل سنة ونت طيب
|
Post: #7
Title: Re: موسم الهجرة الى عطارد
Author: Tagelsir Elmelik
Date: 09-30-2008, 03:03 PM
Parent: #2
ونتي طيبة يا شذى
|
Post: #4
Title: Re: موسم الهجرة الى عطارد
Author: فاروق أبوحوه
Date: 09-30-2008, 09:51 AM
Parent: #1
| Quote: عقدت الأمر على الهجرة الى عطارد، |
وما أجمله من عزم.
.
.
كل سنه
وإنت طيب.
.
.
ودي لك.
|
Post: #9
Title: Re: موسم الهجرة الى عطارد
Author: Tagelsir Elmelik
Date: 09-30-2008, 08:53 PM
Parent: #4
وعاى قدر اهل الأمر تأتي المصائب أو كما قال
شكرا يا أبا حوه على الأطلالة العيدية السمحة
تحياتي
الملك
|
Post: #5
Title: Re: موسم الهجرة الى عطارد
Author: Adil Osman
Date: 09-30-2008, 10:19 AM
Parent: #1
ثم ان عمي هاتفني مباركا فقال( يابني توكل على الله، يمكن شواطين عطارد تطلع فيهم فايدة، اصيلين باين عليهم، احسن من شواطين الملحة ديل، اول ما تصل عرس ليك ( سعلوة) ، تتعلم منها اللغة، ما تنسى ترسل لى بكتة امواس ناسيت، معدومة ليها زمن) ،
التأريخ الاجتماعى والاقتصادى والسياسى والنفسى والعاطفى والفكرى والهجرى والميلادى للحالة السودانية. عيدك سعيد يا ابن عطارد. ابو عركى عنده حفلة فى زحل!
|
Post: #17
Title: Re: موسم الهجرة الى عطارد
Author: Tagelsir Elmelik
Date: 10-01-2008, 05:03 PM
Parent: #5
| Quote: التأريخ الاجتماعى والاقتصادى والسياسى والنفسى والعاطفى والفكرى والهجرى والميلادى للحالة السودانية. عيدك سعيد يا ابن عطارد. ابو عركى عنده حفلة فى زحل! |
عادل الحبيب
كل سنة و انت طيب يا أخي العزيز
لو كنت تبعد في زحل
الخوف نمشي عطارد بى جاى الجيكس يمشى زحل
كل سنة و انت طيب
|
Post: #6
Title: Re: موسم الهجرة الى عطارد
Author: Rihab Khalifa
Date: 09-30-2008, 11:57 AM
Parent: #1
ههههههههههههها
الا اجي تاني
كل سنه و انت طيب ابوي...
---------
قيقراوي, الحق، عطارد فتح
|
Post: #10
Title: Re: موسم الهجرة الى عطارد
Author: rosemen osman
Date: 09-30-2008, 09:06 PM
Parent: #6
| Quote: فأنا من صلب شعب (مارق للربا و التلاف)، فتلاف الى تلاف اولى به تلاف عطارد. |
قلت كدة أحسن
يا زول خير وشوف لينا طريقة معاك
شعبنا عجيب يا تاج
نفسى أكتب حاجة كويسة عنه لكن ما لاقية
غايتو الله يستر ماشين على وين ما عارفة
كل سنة وأنت طيب
|
Post: #24
Title: Re: موسم الهجرة الى عطارد
Author: Tagelsir Elmelik
Date: 10-02-2008, 10:33 PM
Parent: #10
روزمين كل سنة و انتي و الجميع بخير
و الله شعبنا ما عجيب لكن زروفو سعبة
الله في
الملك
|
Post: #18
Title: Re: موسم الهجرة الى عطارد
Author: Tagelsir Elmelik
Date: 10-01-2008, 07:44 PM
Parent: #6
Quote:
كل سنه و انت طيب ابوي... |
وانتي طيبة
قيقراوى وين
|
Post: #19
Title: Re: موسم الهجرة الى عطارد
Author: Rihab Khalifa
Date: 10-02-2008, 01:48 AM
Parent: #18
اخر حاجه قالها لي انه عطارد ماشي بتلاته عجلات اليومين ديل, و طلع التهجد
تاني ما شفته
|
Post: #11
Title: Re: موسم الهجرة الى عطارد
Author: mamkouna
Date: 09-30-2008, 10:32 PM
Parent: #1
Quote: أنا يا علي
تطارد نطارد
في مطار عطارد
دايراك تجي |
أتخيل هؤلاء البنغالة و المكاسيك و البني كجة و هم على ظهر سفينة الفضاء..
يفرفروا من الحر و الشمس..
يرددوا دون كلل....نشيد العلم..
وا ناري الما بقيت سواق..
أطلع العالي و أنزل الدقداق..
ناااااري الليلة وا ناري.
...
عيدك مبارك ( بالعطاردي ) و كل سنة و إنت طيب.
|
Post: #12
Title: Re: موسم الهجرة الى عطارد
Author: Ishraga Mustafa
Date: 09-30-2008, 11:09 PM
Parent: #11
دائما رامية نظرتك فى الغريق يا صاحب
كل سنة وانت ووليداتك ومن تحب طيبين
|
Post: #13
Title: Re: موسم الهجرة الى عطارد
Author: سيف النصر محي الدين محمد أحمد
Date: 09-30-2008, 11:19 PM
Parent: #12
| Quote: المضيفات تتبعهن اذنابهن الأنيقات، يقدمن البنقو و العرقي للركاب مجانا، |
غايتو يا تاج السر لو ما ركبنا طيارة عطارد و تمتعنا بخدمتها الجوية المميزة..
ما اظن الواحد فينا يقدر يكتب زي كتابتك دي.
|
Post: #14
Title: Re: موسم الهجرة الى عطارد
Author: Esam El-Khawad
Date: 10-01-2008, 01:01 AM
Parent: #13
| Quote: مثلما ستف اسلافي من قبل اغراضهم، اجدادي الذين هجروا الغابة و الصحراء وفي متاعهم صفائح الحديد، و البقجة، و قراصة التمر و لحم ( ابو العفين) المقدد، و شريط ( حسنك أمر). |
حبلت حروف اللغه عندك سنين ضوئيه ....سافرت معك فى نفس الرحله..شنطه حديد مكتوب فيها يا مسافر وناسى هواك...وورده كبيره بلونين ظهرى واحمر فى الجانب الاخر ....
|
Post: #15
Title: Re: موسم الهجرة الى عطارد
Author: mutwakil toum
Date: 10-01-2008, 02:56 AM
Parent: #14
أخ تاج
إنت وكت شايل الارض دي -تاني - معاك ( بنقو وجزء عمً ولاب توب وخلافو) هاجرا مالك؟..
أرجي القيامة هنا، على وشك (أظبط منبهك) . المسلمين هنا، مسلمين CIA، بعد ساحت أمولهم في Wall st قالوا دي علامات الساعة ( الساعة دي سيسكو ولا شنو؟) ..
المهم تصحبك السلامة (علي قول ناس الارض)..
*
كتابك نلقاو كيف؟
*
*
لو ناس عطارد ديل ما عندهم رمضان رسل ليً فيزا، نجي نعمل مطعم سوداني هناك (علي قول آل بندر )
|
Post: #16
Title: Re: موسم الهجرة الى عطارد
Author: Emad Abdulla
Date: 10-01-2008, 06:01 AM
Parent: #15
( قوم بي .. و خد سنده ) .
أيمان رحمن قام بيك ود العيش الداشر ..
فياهو ده الحاصل : من السنوات المشيها أحمسي ..
للسنوات الضوئية العطاردية , بمعية مؤخرات طاقم الضيافة الكبيرة ..
كبير الله ..
ثم أريتو حالنا .
كلام فاينال :
عيدك سعيد ..
و القابلة ليبتون و غادي .
|
Post: #20
Title: Re: موسم الهجرة الى عطارد
Author: ابو جهينة
Date: 10-02-2008, 02:08 AM
Parent: #16
الأستاذ تاج السر
عيدك سعيد
| Quote: وقد تبين لي خلال بحثي في شأن الغربة و الأغتراب، ان ثقافة الحنية التي اشتهر بها مجتمعنا، تلك التي تدفع حبوباتنا الى اخذ قبضة من تراب اثر المفارق العزيز تيمنا بعودته، انقلبت الى ثقافة حنية مضادة، فقد ظلت خالتي توقظ ابنها العائد لتوه من الخليج كل صباح بصياحها ( اها قايم متين لى بلدكم السمحة ديك... قالوا عطارد فتحت). |
تجسيد حى للمآلات يا عزيزي.
أحسب أن الحبوبات و الخالات سيقومن بمحو أثر كل مفارق لهذا الكوكب ، تيمناً بعدم العودة ... بل ربما يجعلن المسافر لا يلتفت للتزود بنظرة أخيرة حتى لا يحن
متعك الله
دمتم
|
Post: #31
Title: Re: موسم الهجرة الى عطارد
Author: Tagelsir Elmelik
Date: 10-04-2008, 02:49 PM
Parent: #20
اخي العزيز ا بو جهينة
تحياتي و كل سنة و انت و جميع الأهل بخير
أتمنى الا يجيء يوم تنعدم فيه الحنية.
تاج السر الملك
|
Post: #27
Title: Re: موسم الهجرة الى عطارد
Author: Tagelsir Elmelik
Date: 10-03-2008, 05:20 PM
Parent: #15
اخي متوكل
سعدت بلقئك الهاتفي يوم امس
و انشا الله الكتاب يكون وصلك
عماد عبالله يا صديق يا بديع
لبتون ده جنب ( نبتون)؟؟ ولا غادي؟؟
|
Post: #22
Title: Re: موسم الهجرة الى عطارد
Author: Tagelsir Elmelik
Date: 10-02-2008, 09:30 PM
Parent: #14
Quote:
حبلت حروف اللغه عندك سنين ضوئيه ....سافرت معك فى نفس الرحله..شنطه حديد مكتوب فيها يا مسافر وناسى هواك...وورده كبيره بلونين ظهرى واحمر فى الجانب الاخر ... |
عصام الخواض صديقي
ما تنسى دهان البريلكريم الأحمر و المعجون اب صفقة
كل سنة و انت طيب
تاج السر الملك
|
Post: #26
Title: Re: موسم الهجرة الى عطارد
Author: Tagelsir Elmelik
Date: 10-03-2008, 01:24 PM
Parent: #13
Quote:
غايتو يا تاج السر لو ما ركبنا طيارة عطارد و تمتعنا بخدمتها الجوية المميزة.. |
انت يا سيف بنلقى ليك ( جوب) فى الطيارة زااااتا
مصقوع و جنب الشباب الربة
انشورانس مافي لكن
لك تحياتي و كل سنة و انت بخير
عليك الله فك الحداد ده.
تاج السر
|
Post: #28
Title: Re: موسم الهجرة الى عطارد
Author: Tagelsir Elmelik
Date: 10-03-2008, 06:13 PM
Parent: #12
Quote:
دائما رامية نظرتك فى الغريق يا صاحب |
اسمها جنب جنب يا اشراقة
كل سنة و انتي و العيال بخير
الملك
|
Post: #21
Title: Re: موسم الهجرة الى عطارد
Author: Tagelsir Elmelik
Date: 10-02-2008, 03:11 PM
Parent: #11
| Quote: عيدك مبارك ( بالعطاردي ) و كل سنة و إنت طيب. |
ممكونة
كدى النعرس السعلوة اول حاجة عشان نتعلم اللغة و الكرت الأحمر ( القرين كارد بتاع عطارد) ههه
كل سنة و نتي طيبة
و كل الأهل
تاج السر
|
Post: #23
Title: Re: موسم الهجرة الى عطارد
Author: منى على الحسن
Date: 10-02-2008, 10:13 PM
Parent: #1
| Quote: أقفلت جهاز التلفاز، فلم يعد يعنيني من امر انهيار البورصة و البنوك شىء، فأنا عطاردي الوجهة و المبتغى، و انا دائما، ابن بار للجهة التي تنتظر وصولي لتحتويني، اتصلت ببقية اهلي في السودان ظهر ذلك اليوم ( آخر دولارين في جيبي)، و اعلمتهم بفوزي باللوتري العطاردي، فصاحوا صيحات فرح حقيقي و هموا الباقين على ( باقي العقاب والعقاب ) |
ملوكي كل عام وانت مبسوط في عطارد
خلي بالك مننا......(عذرا المرهفة حنان النيل )
اصلوا جراحنا ما بشفيها إلا رحلة بالسنة الضوئية
كل سنة وانت سعيد من غير احلام يقظة
ما تنسانا من لوتري عطارد
وسوقني معاك يا الحمام ....(عذرأ الرئعان محمد النصري وحميد...)
وعساك من عواده
|
Post: #35
Title: Re: موسم الهجرة الى عطارد
Author: Tagelsir Elmelik
Date: 10-04-2008, 07:22 PM
Parent: #23
| Quote: اصلوا جراحنا ما بشفيها إلا رحلة بالسنة الضوئية |
الجراح ما بشفيها الا الشيء البتوزع فيهو المضيفات ده
الحقي بالبستلة
كل سنة و انتي طيبة
الملك
|
Post: #25
Title: Re: موسم الهجرة الى عطارد
Author: تماضر الخنساء حمزه
Date: 10-02-2008, 10:44 PM
Parent: #1
أقترح فتح سفارة لتسهيل الاجراءات
والتأشيرة بي حلم
كل سنة وانت طيب تاج
|
Post: #29
Title: Re: موسم الهجرة الى عطارد
Author: Emad Abdulla
Date: 10-03-2008, 06:29 PM
Parent: #25
ياهو ..
تعمل ليبتون في نبتون ..
بلا واطـة بلا بلولة ..
و لا عزاء للكريبتونيت الأخضر .
حوّل .
|
Post: #37
Title: Re: موسم الهجرة الى عطارد
Author: Tagelsir Elmelik
Date: 10-05-2008, 04:12 AM
Parent: #25
Quote:
أقترح فتح سفارة لتسهيل الاجراءات
|
يا تماضر الخنساء
في الجزء التاني قريبا وصف لأجراءات السفر
و الوصول و حاجات عجيبة جدا
فترقبوه
كل عام و انتم بخير
الملك
|
Post: #30
Title: Re: موسم الهجرة الى عطارد
Author: ابراهيم عدلان
Date: 10-03-2008, 06:44 PM
Parent: #1
و مع وصول بني كجة سيجتمع العطارداب و يكونوا( التجمع العطاردي الديمقراطي )و ما بعيد كل واحد يسوي ليهو ( ثريا ) و يا خلا نيبتون جاك بلا
|
Post: #32
Title: Re: موسم الهجرة الى عطارد
Author: Esam El-Khawad
Date: 10-04-2008, 03:45 PM
Parent: #30
| Quote: و مع وصول بني كجة سيجتمع العطارداب و يكونوا( التجمع العطاردي الديمقراطي )و ما بعيد كل واحد يسوي ليهو ( ثريا ) و يا خلا نيبتون جاك بلا |
والله يا ود عدلان اول حاجه يحصل اختلاف منو يكون الرئيس..والتجمع ده يبقى عشرين حزب ...
يعنى معقوله حزب واحد والمعارضه منو طيب ...
العطاردى الدميقراطى
العطاردى من اجل التغير...
العطاردى للمهمشين فى الكواكب الاخرى ..
حزب المجموعه الشمسيه الاصلاح والتجديد..
العطاردى جناح المجره (القصر)
العطاردى جناح الشهب(المنشيه)
(القصر والمنشيه ديل فى عطارد ماعيزين اى فهم غلط)
|
Post: #34
Title: Re: موسم الهجرة الى عطارد
Author: ابراهيم عدلان
Date: 10-04-2008, 03:56 PM
Parent: #32
مشكلة فعلا يا عصام
غايتو الحاجة المتأكد منها
انو والي ( العطرون ) ودي عاصمة عطارد اسمو دكتور (المتلألأ)
|
Post: #33
Title: Re: موسم الهجرة الى عطارد
Author: Osman Musa
Date: 10-04-2008, 03:49 PM
Parent: #30
عيد مبارك
وانشاءالله 2009 كتابك التانى
يكون فى المكتبات ..
ومسعول من الخير
يا تاج بصح فى عطارد FREE HEALTH AND LIFE INSURANCE
وكمان خبر الوظائف شنو ؟
|
Post: #39
Title: Re: موسم الهجرة الى عطارد
Author: Tagelsir Elmelik
Date: 10-06-2008, 02:16 AM
Parent: #33
Quote: والله يا ود عدلان اول حاجه يحصل اختلاف منو يكون الرئيس..والتجمع ده يبقى عشرين حزب ...
يعنى معقوله حزب واحد والمعارضه منو طيب ...
العطاردى الدميقراطى
العطاردى من اجل التغير...
العطاردى للمهمشين فى الكواكب الاخرى ..
حزب المجموعه الشمسيه الاصلاح والتجديد..
العطاردى جناح المجره (القصر)
العطاردى جناح الشهب(المنشيه)
(القصر والمنشيه ديل فى عطارد ماعيزين اى فهم غلط) |
Amazing ya Khawad
|
Post: #40
Title: Re: موسم الهجرة الى عطارد
Author: Tagelsir Elmelik
Date: 10-06-2008, 01:48 PM
Parent: #33
Quote: عيد مبارك
وانشاءالله 2009 كتابك التانى
يكون فى المكتبات ..
ومسعول من الخير
يا تاج بصح فى عطارد FREE HEALTH AND LIFE INSURANCE
وكمان خبر الزظائف شنو ؟ |
انت يا عثمان خليك مع ناس برودواى دسل
مالك ماشي عطارد
ما شفناك في العيد.
|
Post: #38
Title: Re: موسم الهجرة الى عطارد
Author: Tagelsir Elmelik
Date: 10-05-2008, 04:17 PM
Parent: #30
| Quote: و مع وصول بني كجة سيجتمع العطارداب و يكونوا( التجمع العطاردي الديمقراطي )و ما بعيد كل واحد يسوي ليهو ( ثريا ) و يا خلا نيبتون جاك بلا |
ابراهيم عدلان الصديق
الخوف من عطارد صنقعت و عطار بالظلط
كام ختينا ( عمر قمر) القصة بتمش نفتح رادى عطارد الصباح
الصباح نلقاهو في حوار ، بعدين ما بتقدر تجيب سيرة بيوت الأشباح
هناك ( دى بلد الأشباح زاااااتا).... معادلات صعبة
لك تحياتي و اذا تمكنا سنحضر لفعاليتكم في نيويورك.
تاج السر
|
Post: #36
Title: Re: موسم الهجرة الى عطارد
Author: د.محمد حسن
Date: 10-04-2008, 08:19 PM
Parent: #1
بحلم بي عطارد
والسفر الفارق
والعرقي الخطر
-
وبالله يا ملك
اهدي ليك هذه الاغنية
يا الماشي لي عطارد
حيب لي معاك بارد
من من كاسهم المارد
-
نحن جزء شعب ادمن السفر
اما الجزء الاخر فقد ادمن الاستوزار
حتي صارت الحكمة اليومين ديل
يا وزير
يا سافر عطارد يا عوير
كل سنة وانت بالف خير
|
Post: #41
Title: Re: موسم الهجرة الى عطارد
Author: Tagelsir Elmelik
Date: 10-06-2008, 03:34 PM
Parent: #36
Quote:
بحلم بي عطارد
والسفر الفارق
والعرقي الخطر
-
وبالله يا ملك
اهدي ليك هذه الاغنية
يا الماشي لي عطارد
حيب لي معاك بارد
من من كاسهم المارد
-
نحن جزء شعب ادمن السفر
اما الجزء الاخر فقد ادمن الاستوزار
حتي صارت الحكمة اليومين ديل
يا وزير
يا سافر عطارد يا عوير
كل سنة وانت بالف خير |
العزيزد. محمد حسن
و انت بألف خير
ساعدنا فى تطوير الأغنية زيادة كمان
الملك
|
|