يابورداب الدوحه انا من هسع كلمتكم قدام البورد ده مهرجان الدوحه الغنائي 2004

أرجو من كل الشعراء في هذا البورد التكرم بالاتي
ان يطرح كل منهم قصيدتين احداهما بالعربيه والاخري بالدارجه
وسوف تخضع ليس للتقييم ولكن للتداول والتفاكر حول اختيار اثنتين منهما للتجهيز لمهرجان الدوحه فبراير او ياناير 2004
كما سيتم اختيار ست قصائد اخري لتكملة سي دي يصدر ذلك العام
لذا اود من كل المشاركين في هذا البورد المساهمه بارائهم
ومطلوب من بورداب الدوحه متابعة طلبي مع اللجنه المنظمه
بالدوحه وانتظر مشاركه كبيره وانا ممكن اطرح نصوص
للكتيابي ويحي فضل الله وعبد العال السيد وطبعا مدني النخلي
ويا اخوانا واخواتنا مافي اي حساسيه
بس كلنا مع بعض عاوزين نحقق حلم مولد عمل فني ساهمت فيه اكبر مجموعه من السودانيين بالراي وبالمشوره
وحبذا ان كانت القصائد قصيره نسبيا حتي تجد فرصتها من الفيديو كليب ومن البث في العالم

هذه لعمرى ديمقراطية الفن

تنبع من فنان حساس
ديمقراطى

سلمت يا استاذنا

شكرا الحبيب نصار
ومنتظر مشاركتكم الفعاله لاحقا
وتسلم

استاذنا الموصلي

نفخر كثيرا بك وبما تقدمه لنا في هذا المنبر
وأعدك بأني سوف أكون معكم في كل خطوة
نحو تقديم السودان فنا للعالم أجمع



jamal

تشكر يا ابو جمال
ونحن في الانتظار
وكلما بدرنا كلما كان التجهيز رائعا

وينك انت الطال غيابك ياجمال
الخطاوي الباكيه ترحل كل يوم واقفات في بابك

عزيزي الموصلي
كل عام وأنت بخير
أعجبتني الفكرة والمشروع الرائد
وبرغم أنني لا أنشر ما أكتب من شعر بسبب الكسل في ارسال ما اكتب لكنني أشارك بثلاث قصائد لك حق اختيار واحدة من الشعر الفصيح ، أما الثالثة فهي دارجة . كما أرجو أن تنال اعجابكم .


صحو القوافي

كنت فاكر يا صبيه
أني راسي
وكنت فاكر ... ما بلين
وصعب مراسي
جيتيني يا زهو الحقيقه
زلزلتي جدران الوهم ...
وهدمتي ساسي
جيتيني من صحو الوجود
ذوبتي في قلبي الجليد
ونبشتي من تحت الرماد ....
نيران هواي ... وسعير حواسي
طليتي يا احلى الوعود
زي سيل عنيد
كسرتي حاجز المستحيل
في لحظه هديتي الرواسي
بس قولي لي ... كيفن أكابر ؟؟؟
وكيف أخون رقة مشاعري ...
وأبقى قاسي
يا مالكه سر الأغنيات ...
ما أنتي صحيتي القوافي
ناديتي زرياب والنواسي
ما انتي حمالة أسيه
وكم شلتي عن الناس مآسي
كفكقتي دمعات الغلابه
ووقفتي للمحروم تآسي
وأنا يوم اشوفك في جواري
يا مدايا ويا مداري
ببقى للكون كلو ناسي
وبوجودك تبقى زاهيه
بالحنان كل الأماسي
وأنا في هواك ...
يا غاليه ما بفتر حماسي
وصدقيني يا صبيه ...
يوم سفائن حبي تاهت ...
في ضراك لاقت مراسي


دي واحده بالدارجي ، وترفب القصيدتين بالفصحى .

والله ماليك حق ياخي شعرك مقعد وموهط يلا ورينا الفصيح
كمان
تسلم يا فاضل

الغايه من سكة هواك
شعر عبد القادر الكتيابي


الغايه من سكة هواك .. سكة هواك
وبقى المسير ـ هدف المسير
أسرح و احس قيدك مطوقني و أهز جنحاتي
ما أقدر أطير
أسرح واصدق إنه حسنك ـ أسره قبلان بي أسير
واني عصفورك
حريرة ريشي من نورك
رموشك عشي في الزمن العسير
عاشق حقيقة حبي لي حبك
مسافر للسفر
مالي محطة ولا مصير
لابد يوم
قبل الرياح أوصل إليك
لابد يوم
وافرد عليك خيمة هواي
واطلق غناي
في موسم الشوق المطير
واكتب على قيف الهدف
ريدك شرف
وانا جيته بالدرب الخطير

تحياتي يا استاذنا الموصلي
تحياتي يا رائع
تحياتي يا اصيل
واحشني

العزيز واحشني اتكالنا عليكم وعلي الله
ساهمو معانا يديكم العافيه

يا استاذ اهل الدوحة في الشوق لي فنك العالي والراقي

الدوحة كما العهد بيها تستقبل كل المبدعين السودانين والان تحتضن فنان افريقيا الاول الموسيقار وردي

وانا ما داير اقول بي النيابة عن اهل الدوحة لكن بقول انحن في انتظارك وان شالله نمد اليك يد العون في اي شي تطلبة

انحن في الخدمة يا موسيقار

يا استاذ اهل الدوحة في الشوق لي فنك العالي والراقي

الدوحة كما العهد بيها تستقبل كل المبدعين السودانين والان تحتضن فنان افريقيا الاول الموسيقار وردي

وانا ما داير اقول بي النيابة عن اهل الدوحة لكن بقول انحن في انتظارك وان شالله نمد اليك يد العون في اي شي تطلبة

انحن في الخدمة يا موسيقار

اشكرك من الاعماق ياود العباسيه
الناس ديل انا عملت ليهم ايميل
واللجنه ديه عايزه متابعه
لانو المره ديه حيكون تحدي فني عمل يبين اين وصلت موسيقانا
يلا عليكم وعلي الله

وهاكم دي من عصام أبكر ادم

فاحك نوار


الوجع الكان
مفضوحك في الجيه
عاداني بي حزنك
يابنيه
والروح في
الموج المنداحك
شبعت لما
النوار فاحك
اتخيلي ذاتك
في صباحك
واتفضلي بختك
ياصبيه

وانا يا امدرمان
عندي البلد
الجابك
متفتح للضحوي
الشابك
وانا في صباحك
بستكتب موالي
الضاحك
القاكي مسيره
عليكي وهج
وأشيلك لي

دوران الهاله
في خاطرنا
لوعندك حظ تلقي دمرنا
موعود الشوق
تاخدو البشري
حلمو يرفرف
علم الذكري
والحب اخر
والحب اول
بالحب زمن
الدهشه مدول
بالحب ياحب
نقرا الدنيا

لي قدام وانا حاي

تسلم يا موسيقار اتمنى مشاركتى المتواضعه تنال الرضا واوعدكم بالمزيد لكى تزيد فرص الاختيار وببدأ معاكم بى


رسالة غرام

رسالة غرام

انا ما حبيتك .. لكنى عشقتك ...
واتمنيتــــــــــــك ...
بى ريشة قلبى .. رسمتك...
وفى الاعماق ختيتك ...
بحنانى الفايض.. برضى شملتك ...
ما خليــــــــــــتك ...
واتخيلتك .. فى بستان الريده....
انى زرعتك ...
بى دمى رويتك ...
وكيف راعيتـــــــــــــــك ...
لما قطفتــــــــــــك ..
اتحسستك .. وريحة عطرك ...
نرجس نور .. ساحة بيتك ....
ويوم لاقيتك ..
لامست سحابة عرشك ...
واتنهدت عشان حسيتك ...
كتمت الاهه .. وراها التانيه ...
اتوهمت كمان ناديتك ...
كتبتك احلا قصائد ريد ...
كم لحنتك .. وكم غنيتك ....
وتانى بديتك .. وجيت تميتك ...
لما حفظتك واتوشحتك ...
واتغطتيــــــــــــــتك ...
ومن خوفى عليك ...
قريت حصنتك ...
وبى رمشى هناك ضاريتك ...
واتوسلتك .. واترجيـــــــتك ..
تعرف انى عشقتك ما حبيتك ..
والله عشقتك ..ما حبيتك ...

اسماء صديق الطيب الجنيد
مسقط سلطنة عمان
10/6/2002

مع تحياتى لكم جميعا وامنياتى للمشروع العملاق هذا بالنجاح ورفع اسم السودان عاليا
وتسلم يا وطن

ياسوما اولا حمدا لله علي سلامة رجوعك لينا ورمضان كريم
قصيدتك حلوجدا وانا والله كنت عايز اعمل بوست اسال عنك وانتي سبقتيني
بي
حتة زمن
تسلمي

الموصلي
هاك الباقي
عاشق الآرام

وتبحثين عن الهوى ...!!!
وزوارق العشاق تائهة ...تروم مرافئاً .
وتجوب خلجاناً وبحرا ...
ومواقد عشقي .. في حنايا القلب تخبو
فأشعليها أنت نيراناً وجمرا
الحب من عينيك يقطر رقة
ويتيه دفئاً ...
ويبوح في الآفاق جهرا
ولديك ... قد سمق الجمال
أناقة زهرة ...
وصفاء سوسنة ..... وسحرا
خصلاتك ...
الليل أرخى في زواياها سدولاً
فترنحت مداً ... وجزرا
ونثر الضياء على جبينك ....
ألف قنديل وتبرا
والطل بلل وجنتيك ..... فأضحتا
أكليل فيروز وزهرا
همساتك الولهى .... تفيض نداوة
تغتال قلبي
وتسوقه يمنى ويسرى
كل الدروب اذا احتوتك
تضمخت أرجاؤها طيباً ... وعطرا
أني عشقتك لا أبالي
حيث يكفي عاشق الآرام فخرا
كبليني ...!!
حيث محراب الهوى ....
فأنا لا أرجو خلاصاً من قيودي
ولا أرى في ذاك ضيرا

الفاضل عبدالقادر
ابوظبي في 27/10/1998




الى ملهمة

وتقرأين قصائدي ؟؟؟
هل أعجبتك حقيقة ...
تلك الحروف النابضات كثيرا ؟؟؟؟
وهل حقاً طربت لوقعها ..
فتسامقت في ناظريك حدائقاً ... وقصورا
يا سعد هذا الشعر ... حين قرأته
ما عاد طفلاً يافعاً ... وغريرا
يا سعده ... عبر السهوب
وحلق ... في المدى عصفورا
كم كنت أهفو ...
والليل ديجور يطيل صبابتي
سهداً أغالب ذلك الديجورا
وبداخلي … بركان حب خامد
قد كان قبلك هاجداً …. مهجورا
أيقظته أنت … فأضحى جدولاً …
ينساب لحناً صافياً وخريرا
أنت التي زرياب قد غنى لها
ومزاهر عزفتك … لحناً رائعاً … وأثيرا
ترف البريق … بوجنتيك يشدني
فوقفت أجني لؤلؤاً منثورا
وبوجنتيك … تذوب حبات الضحى
فسنابل …. ونمارق …. وحريرا
وبفاهك الهمسات تسبي خافقي
قدري … أجن لهمسك المسحورا
ماذا يصيبك … حين يغرقك الهوى ... ؟؟
قولي ..... أما جاز الكلام أخيرا ؟؟؟؟؟
أنت التي ضحك الصباح بثغرها ....
فعدوت صوبك ... راكضاً ... وبصيرا
لأصوغ في عينيك ... روعة أحرفي
علي أكون بذاك صرت " جريرا "
الفاضل عبدالقادر
ابوظبي في 03/11/1998

يافاضل والله حيرتني
كل واحدة منهن احلي من الاخري تري هل اصبت الاحباب في البورد بنفس الحيره سلمت يداك واليراع الذي تكتب به

شيخ الطريقة وسيد الدكان الاستاذ موصلي :
نشركك علي اللفتة الحلوة وربنا يديك الصحة والعافية وتنعم بنجاح ما شافو زول قبلك قول آمين .
عندي وجهة نظر أرجو أن تجد بعض رحابة الصدر ليديكم :
** المهرجان في الدوحة يعني في دولة عربية .
** أعتقد وإلي حد كبير أن الحكام سيكونون عرب .
** من عرف هذه المهرجانات أن يزاع ما يقدم فيه سواء فاز أم لا .

كل هذه العناصر إستاذي الكريم تعتبر منابر ليس لتطل منها الاغنية السوادنية فإطلالة الاغنية السودانية حدثت مرات ومرات ولكن نريد لهذا المهرجان أن يكون تثبيت لشكل الاغنية السودانية المختلف كثيراً عن الاغنية العربية بشكلها العام وطالما أن المقام هنا لاختيار الكلمات التى ستغني وحيث أني لا أكتب الشعر فإني أنصحكم بإختيار كلمات عربية فصيحة أو بالعاميةالسودانية بشرط أن تكون عامية سهلة وليست مغدغة في العامية بمعني أن تكون سهلة التداول في الخليج وفي الشام وفي مصر وفي المغرب العربي . وأعتقد أن شاعرانا الكبير هاشم صديق يكتب بالعاميةالسودانية لغة مفهومة كثيراً لدي الكثير من أخوانا العرب .
أما عن الموسيقي ( التلحين والتوزيع ) فنحن متأكدين أن شيخ الطريقة ما حا يقصر .
مع تحياتي

عزيزي كمال الشادي
تحياتي واقتراحك جميل زي روحك الطيبه
كل القصائد التي نزلت هنا اقرب الي العربية في نظري من العاميه
وقد لحنت قصيده لهاشم صديق وسأتصل به
واعرضها هنا مع الاخريات وهي ملحنه جاهزه

وانا افضل العربية الفصحي من السهل الممتنع
ولكن سيكون المشروع شاملا معظم القصائد المختاره من نتاج هذا البورد
تسلم

يايوسف الموصلي ويا ناس الدوحة بالله من هسي كلمونا كيف ممكن نحضر المهجان نحن قراب منكم في الرياض يعني تكلة بالعربية كم ساعة ونكون معاكم ارجو أن تنشروا هنا وبشكل رسمي كيف إمكانية حضور المهرجان .

الاستاذ الغالي المبدع الموسيقار موصلي لك التحية بقدر عشقك لوطنك ولفنك ولكل ما هو راقي وجميل نزلت اهلا وحللت سهلا بين ديارك في دوحة الجميع فمرحبا بك استاذنا المبدع بين ربوعنا ونتمنى ان تقدموا لنا فنا راقيا وعملا مميزا يعكس الوجه المشرق للفن السوداني وهذا ليس بالمستغرب ولا البعيد عنكم فانتم ومن معك من الكوكبة الفنية المبدعة من شعراء وملحنين وموسيقين اهلٌ لهذا العمل القادم واتمنى لكم جميعا النجاح والتوفيق ودعاءنا لكم بذلك واتمنى ان نكون عند حسن ظنكم ونرحب بالجميع في دوحة العرب

شكرا يا ابراهيم
علي ترحيبكم السوداني الاصييييييييييييييييل
وحقيقة الامر انا اخترت عاما من الان كان الله امد في العمر
عشان الاستعداد الصحي والفني والبدني والمالي لهذا المشروع
وانتو مابتقصرو

وجودك ربما يكون فنيا ياكمال لانني اود ان يكون العمل شاملا للكورال الحديث
وناس الدوحه عليهم بالباقي

الاخ كمال

والله مرحب بيك في دوحة الخليج

والطريقة سهلة جدا ، لو عندك اي واحد قريبك هنا بعمل ليك زيارة ،او في تاشيرة سياحية لمدة شهر ودي بتكون عن طريق الخطوط القطرية

ومرحب بي كل المبدعين في الدوحة

ما بتقصرو يا ود العباسيه
وكمال كريم يستحق لقاء الكرام

وهاكم دي من يحيي فضل الله
انا سميتها مؤقتا

يامشتت


يامشتت
في بلاد نائيه
وبعيده
ياململم
في خواطر بت
تفرفر
في قلب عاشق
موزع
بين عيونا
وبين قصيده
احكي
عن هاجس نهارك
وكيف بتفلت
من حصارك
والمساءات
التكثف لي ودارك
والصباحات
عندك شريده
وكيف
خطاويك التوقع
لليالي
حزن نشيدا
مامشت
في درب وصل
واتسكعت في
منفي قيدا

وهاكم دي من الزاكي نايل ون

صاحبة الجلالة

أنا لا أدرى يامولاتى

كيف أعبر..

كيف يصور قلمى نحوك

صادق إحساساتى



مشكلتى دوما غاليتى

أن شعورى نحوك

أكبر من كلماتى

ومكانك غاليتى عندى

أسمى من كل كتاباتى



ماذا أكتب عنك فأنت

نغم ريان مخضر

يكسو بالخضرة واحاتى



هو نور حبك فى قلبى

يجلوها بيضا ظلماتى



يملؤها حبا وحنانا

يعطيها معنى أوقاتى



يجعلها عيدا ايامى

يكسوها بالبشر حياتى



حبك فى قلبى مولاتى

نغم يسرى

ينسينى كل عذاباتى



عفوا غاليتى

مولاتى

إن كانت مسخ أبياتى



أنا مهما أكتب غاليتى

عبثا تتطاول كلماتى

الزاكي عبد الله الزاكي

ممكن اسارك معاكم ... انا ما من الدوحة لكن !!

كيف يابوخدره انت ما من البورد وناس البورد هم المعنيين بالجانب الفني وعلي فكره ياقوت العرش محسوبه في السي دي
وياؤيت لوتنشر النص واسم الشاعر ولو عندك مقترحات قصيديه مرحب تب

شكراً جزيلاً يا موصلي للدعوة الحلوة دي والظاهر صيف 2004م حا يكون حاجة ممتعة ، وأنا أتشرف بالوقوف خلفكم والغناء في كورال الاغنية التي ستشارك بها في المهرجان ، وأرجو ساعتها ان اعرف التفاصيل كيف ومتى وأين .
تحياتي

بالتأكيد ياكمال وانا جادي بصوره لم تحدث في حياتي
وفرصه نتلاقي واهو كوالي قاعد افكر في اللحن المناسب للكلمات التي ستختار لياخذ شكلا جماعيا وفرديا
وجهز مشاعرك

وصلني هذا النص من شاعرنا اسحق الحلنقي


شالت عناقيك
علي عودك المياس
وحياة سواد عينيك
ماتنسي حولك ناس

ياريت عيونك يوم
لو تأمر الحراس
اتلم عليك لحظات
كان تهدا لي انفاس
انت الملوك أهلك
والغالي ليك ينداس
بيك الغيوم احباب
ليك النجوم جلاس

لو تبقي ريدتك نار
زود كمان نارك
انا اصلي ضعت زمان
في زحمة انوارك
انت البلد بلدك
اكرم غريب دارك
كان جيتني يوم زاير
تلقي الجمال زارك

علمتك البهجه و
علمتني السرحان
والكان مقدر لي
انا في غرامك كان
فتشت عن لونك
ما شفتو في الالوان
انا ياما حبيت فيك
احساسك الفنان

slam ustazy yousif almsoely
i would like to participate with my poor words

this no1

تصدق بقيت محتار

تصدق       بقيت      iiمحتار واطير       مع      iiالعصفورة من       دار       لي      دار واتنقل   في   قلوب  iiالناس صغار                       iiوكبار يعم         الحب        iiديارنا لو         السلام         iiذارنا وتخمد        عداوة       النار واترنم    مع    دفوف   iiالطار تصير       ايامنا      iiاعياد... يزغردوا     بالافراح     iiبنوتنا ويبشروا   مبتهجين   iiالاولاد ونتلمة والسعادة لينا تنضمة تصدق       بقيت      iiمحتار شذي                  iiالجنوب لي         شمالنا         iiذار وعطر                 iiالشروق لغربنا....                   iiسار تصدق       بقيت      iiمحتار ونتكاتف       كتار       iiوكتار وعدونا        فينا        iiيحتار وايدينا     الواحدة     iiتصفق وحبنا         للغير         iiمن كترتة             iiبيدفق....... والبيزعل                 iiبيناتنا حالتو              تشفق...... وينسوا   اهلنا   كلام   iiالتار يسامحوا  الغير  وينوو  الخير ومن  ما  عرفوا انو iiالصدقات اسرارها  في  iiالبسمات.... صاروا   يتكلموا  بالضحكات.. تصدق       بقيت      iiمحتار ولو     دا     ما     iiسودانا... يا     ريت    يصيبني    العار يا     ريت    يصيبني    العار عمر                       iiرجب

here my second poor poemاين . . . اختباتي
لن يصيبني الكلل. . . .
ولن ينتابني الملل. . .
الابالعثور. . . . . . .
عليك. . .
حبيبتي دعيني. . . .
اصل اليك. . . .
لاتحرميني من. . .
نظرات. .
عينيك. . . . .
فطيفك لعقلي
سارق. .
والعثور عليك. .
اصبح من. .
الخوارق. .
سالت . . . عليك.
السفن والمرافئ.
حتى الزوارق. . . .
مااندر شبيهاتك. .
وما اكثر الفوارق.
مشيت علي اليم. .
فاغرقتيني بالتفكير والهم.
عذرا انني. . .
لااجيد السباحة. . . . .
ولكنني . . . في. . .
حبك . . . غارق. . .


كلمات عمر رجب

اين . . . اختباتي  كلمات عمر رجب

اين     .     .     .     اختباتي لن   يصيبني  الكلل.  .  .  ii. ولن   ينتابني   الملل.   .  ii. الابالعثور.    .   .   .   .   .   ii. عليك.               .               . حبيبتي    دعيني.    .   .   . اصل      اليك.      .      .     . لاتحرميني      من.     .     ii. نظرات.                            ii. عينيك.       .       .      .      ii. فطيفك                   iiلعقلي سارق.                             ii. والعثور          عليك.         ii. اصبح             من.            ii. الخوارق.                          ii. سالت     .     .    .    iiعليك. السفن              والمرافئ. حتى     الزوارق.    .    .    . مااندر        شبيهاتك.       ii. وما        اكثر        iiالفوارق. مشيت     علي     اليم.    ii. فاغرقتيني بالتفكير والهم. عذرا        انني.        .       ii. لااجيد   السباحة.   .  .  .  ii. ولكنني   .   .   .   في.   .  . حبك   .   .   .   غارق.   .   ii.

ماقصرت يالحبيب عمر والامر متروك للجميع في الختيار للنصوص تسلم ياحلو

ألف مليون شكر ليك علي الترحاب يا ود العباسية .
الطريقة عرفتها واحد قريبي يرسل لي دعوة أو تأشيرة سياحية .
علي الطلاق إنت بس ياكا قريبي البفتش ليهو زاتو . رأيك شنو ؟ والتأشيرة حا تجي منك إنت .
مع تحياتي

ده الكلام
والقرابه بالبورد ده ذاتو يعني ود ابوك
لانو السودان الصغير متمثل في البورد ده

مرحب بيك استاذنا الموصلى ..تسلم كتير وكتر الف خيرك على السؤال .. اتمنى ليك مره اخرى النجاح فى مشوارك العظيم هذا وان شاء الله اقدر اشاركك واساعدك قدر المستطاع من قصائدى المتواضعه ..
وشكرا ليك مره اخرى على اعجابك بالقصيده ..

تسلمي يابت يلدنا ولاعدمناك ابدا

مرحب بيك استاذنا الموصلى ..تسلم كتير وكتر الف خيرك على السؤال .. اتمنى ليك مره اخرى النجاح فى مشوارك العظيم هذا وان شاء الله اقدر اشاركك واساعدك قدر المستطاع من قصائدى المتواضعه ..
وشكرا ليك مره اخرى على اعجابك بالقصيده ..

أستاذنا يوسف

في البدء نرحب بك عملاقا ينضم إلى العمالقة الذين تضمهم الدوحة هذه الأيام فيشرفنا الشاعر المبدع محجوب شريف

شكرا يانادوس وسلم لي عليهم وبلغ اشتياقي الزايد وحبي ليهم
وتسلم

يا جمال السنوسي سيبك من كلام المجاملات : يوسف طلب قصيديتن وإنت جاي هنا تتلكم عن المجاملات خليك أكرم منه وخت لينا ثلاث قصائد علي فكرة يا جمال إنت فنان وراجل شاعر طويل القامة ولك كلمة حلوة والمقام هنا مناسب أرجو أن تضع لنا أكثر من قصيدة مع تحياتي ..

ابو كمال احقيقه جمال كان اهدي لي قصائد وحأنزل منهم هنا
ولكن علي قولك لسه طمعانيين

وهاكم دي من بتنا الحديقه

شن لى؟
يالضهبت على.
تلّفت النجيض والنىْ
شن لى؟ يالنَفَس والعافية .. مانايبنى منك شىْ
شن لى؟ يالطبلت القيد ... بقيت غرقانه فى شبير مى
شن لى؟ فى الضلمة الكاسيه
وانت الباقى لمبة ضى
احضن حلمى زى الجاهل
اصحى بدار وألقى الصىْ
بعد ما يلبّن البناتنا ... حازر لا يختفوا حَدىْ
ياخلينى ابقى بلاكا ... واعرف راسى من كرعىْ
ولا كمان ترش تحيىّ الورق والعود
مواسمك .... يـــا خريف الرىْ.

تماضر

وهاكم دي جات هسع سخنه من العزيز عبد العال

سلافة المغنى
ست الدنيا سلافة المغنى
عنك ما بقدر استغنى
والايام يا " صفا " ايامي
غيرك جد ما عندها معنى
انتي النفس البطلع مني
هاكي الروح يا روحي اتمني
وطمني عمري خلاص ياعمري
اعلني حبك ما تستني
وانا من جانبي بقيف اتحد ى
وانزف بين السيف والورده
يا محتكره عليا حياتي
يا زغرودة الفرح الآتي
ريدك ساكن
في جوايا باني مساكن
فكري شوفي
يا الزودتي عذابي وخوفي
يا الدوزنته عليكي حروفي
رسمتك لوحه في داخل جوفي
بقيت مجنون ومغني وصوفي
وما بتنازل عنك ابدا مهما كان حاكماني ظروفي
مهما كان حاكماني ظروفي

العزيز الموصلي اتمني لك التوفيق
في ما تصبو اليه
من مشروع جبار

اسمح لي ان ارشح لك القصيده التي قام الاخ ابو امنه (زي رين) بانزالها في البورد
وانت كانت الكلمات له فلم نزهب بعيداً وان كانت لغيره فهو ادري بالحقوق الادبيه والفنيه مني
ولك ان تستشيره

القيصده في اللنك التحت
على جناحِ أمنيةٍ نسافر -- قصيدة

شكرا علي امنياتك الطيبه يالخواض والقصيده رائعه والله
بس ياريت المطر يهطل علينا بالمعلومه القاطعه
تسلم حبيبنا

سلام يا اهل الطرب

يا كيمو ... ابشر وما عندك مشكلة بس قول ربنا يهون


عندي سوال يا استاذ الموصلي

هل المهرجان سنة 2004 ولا 2003 لانو هنا في الدوحة كل سنة بعملوا مهرجان لي الاغنية العربية


اتمني التوضيح

انا بقصد مهرجان2004
لاني فنيا مابقدر الحق ده وماعيز اخش مكلفت عايز اخش محضر وبي قوه
ياود العباسيه
والله يحينا

وهاكم دي من الكتيابي

لك ياديار

اني تهيمني هواك وشفني
ومسافر لك منذ كان النخل ينبت في الجبل
الزاد خير الزاد
نوري مقلتيك ومن استنار بمقلتيك فقد وصل
حتي ولو
رجع التراب
الي التراب
فالروح نحوك ياديار احبتي
لا البحر يحبس خيلها
لا الريح لا الطوفان يمنعها ولا كف الاجل
وانا تهيمني هواك وشفني
ومسافر لك من بعيد
لك ياديار غوافل الغرباء تتبعني
اثنتان لاثنتين
من كل عش عاشقان لعاشقين
واحب حبك لا ابي ان زاغ عنك ابي
لاجلك ياديار
ولا اهاب النار فيك
فهواك اقدم من حنان الام في قلبي
وحين حجارة الحمقاء ادمت ارجلي وانا وحيد
طربا ضحكت ضحكت
من جرح يشد عزيمتي
وعجبت من زاد
علي قدم يلذ
وحين انقصه يزيد

وصلتني عدة قصائد من الصديق علاء الدين شاموق وهو قد حاول الاشتراك ولكنه لم يستطع وهكم قصيدته الدارجه وساقوم ايضا بتثبيت قصيدته الفصحي في بوست لاحق

الوهم

الشمس ..

خجلت وغابت ..

لما شافت نور عيونك ..

والنجوم خلت بريقا ..

من غناوي الريد بريدك ..

قبلما أشوفك عشقتك ..

وفي بحورك ..

النفس صبحت غريقة ..

أجمل خيال ..

أجمل وهم ..

في الوجود انك حقيقة ..

كل يوم يصبح صباح ..

من جديد ..

قلبي يتوقف دقيقة ..

ديك ملاك ..

ولا باقة أمنيات ..

شكلي حلمان بي حديقة ..

كنتا واعي ..

ولا بحلم ..

ولا كانت ديك حقيقة ..

قلبي مدفون ..

في غرامك ..

قلبي مقتول يا رقيقة ..

نفسي لو ألقاها مرة ..

أبقى كراسة شعر ..

ولا نوتة ..

فيها مقطوعة موسيقى ..

أبقى غيمة ..

ولا أمواج في محيط ..

حرة فرحانة وطليقة ..

أبقى زولاً ..

ولا شجرة ..

ولا ضلاً في طريقا ..

كنتا واعي ..

ولا بحلم ..

ولا كانت ديك حقيقة ..



علاء الدين

17 / 7 / 2002 م

الأعزاء

أصدقاء الحرف وندامى النغم

معذرة للتأخير فى الولوج الى هذه الحديقة الندية بوجودكم وبكلماتكم المضيئة

وتحية وإعزاز لأخينا الخواض، أن رأى فى قصيدتى ما تستحق به الترشيح، فهى حتما لكم، ولمن إذن نقوم نحن بنشرها إن لم يكن لكم، وشكرا يفيض لك يا خواض وتحية مرة أخرى

أما إذا أردتم بعضا آخر من القصائد، فهى لكم أيضا، وحقيقة ليس لدى الكثير من القصائد بلغتنا الدارجة الجميلة، إذ لم يترك لنا الفطاحلة ما نقوله بعد قولهم ولكن سوف أبثكم واحدة، وعلى الله تنال إعجابكم وسو%D

ونحن في انتظار مطر الجمال الحسي والروحي

الأعزاء

أصدقاء الحرف وندامى النغم

معذرة للتأخير فى الولوج الى هذه الحديقة الندية بوجودكم وبكلماتكم المضيئة

وتحية وإعزاز لأخينا الخواض، أن رأى فى قصيدتى ما تستحق به الترشيح، فهى حتما لكم، ولمن إذن نقوم نحن بنشرها إن لم يكن لكم، وشكرا يفيض لك يا خواض وتحية مرة أخرى

أما إذا أردتم بعضا آخر من القصائد، فهى لكم أيضا، وحقيقة ليس لدى الكثير من القصائد بلغتنا الدارجة الجميلة، إذ لم يترك لنا الفطاحلة ما نقوله بعد قولهم ولكن سوف أبثكم واحدة، وعلى الله تنال إعجابكم وسوف اقوم بالبحث عنها وارسالها قريبا

وقبلها أيضا، قصيدة كانت قد نشرت قبل حين هنا بعنوان -- وعد --

وهاكم إياها
=================


بين عينيك وبينى
أينع المدى
امتد جسرُ الشوقِ موكبا و كرنفالْ
يزفُ طيفكِ الشهى
للهفتى اليتيمة

بينى وبينكِ
زهوُُ النداءِِِ وانتشاءةُ الصدى
قصيدةُ الليلِِ الموشّى بصندلِِ الوصالْ
وعذوبةُالمواويلِ الحميمة

بينى وبينك
تفتح الخريفِ، ووعدُ غيمةِ ضنينة
لهاثُ مهجتى على مداخلِ الندى
فى مسامِ صبوتى وفى دمى
أراك حولها وريفةً مضيئة
أستدينُ منكِ أنجمى
وتستعيرُ من ضياءك المدينةْ

وحين جمرُ البعدِ تحت الريحِ ينسينا
مرافئ الوصولِ و الإيابْ
تزورنى مواسمُ الصبابةِ الطوالْ
شهقةٌ الحنين فى جزائر السراب
ترتوى َتعبُ من نواهلِ الخيالْ

إغفاءةُ الأحلامِ فى وسائدِ السهاد
أنتِ
يا حجوةً قمريةً العيون والضياءْ
ترشٌ دهشةَ الصغارْ
بالنعاسِ فى المساءْ
تصب فى جفونهم حكاية الغياب

الى هناك طارَ سندباد
يصارعُ العنقاءَ يعارك البعادْ

لا تحزنوا
غداً يعودُ سندباد
من مفاوزِ الضياع
من ممالكِ الرماد
مكللا بالضوءِ هّدهُ السفارْ
غدا يؤوبُ يطفئ الهزيمةْ


وعدنا يضئُ كلما مدارْ
واللقاء قد بدا
بنفسجاً يغازلُ الندى
يلونُ النهارْ

ويحَ درب سندباد
من خطىً تهيم فى دوارْ
ينامُ فى عروقها الكفافْ
ويح دربه الخواء
ضجةٌ تضيعُ وسطَ صمته الهتافْ
تستقرُ فى دمى
ولوعتى الكليمة

بين عينيكِ وبينى
خضرة الديار
نشوةُ الحقولِ فى مواسمِ القطاف
رقصة النهرِ المغنى
وقبلةُ المياهِ للضفافْ
وحضنُ موجةٍ رحيمة

بينى وبينكِ
معارجُ البكاءِ رحلةُ البراقْ
صوبَ وجهكِ المزارْ
و حين عتّم اللقاءَ، كالحُ الفراق
أسرجتُ خيلَ منيتى العتاقْ
غادرتُ فرحتى الأليمة

بينى وبين منيتى
توسلٌ يؤججُ الشغافْ
يصلبُ الجوابَ فوق شرفةِ المحالْ
تموت فى رؤاى شهقةُ السؤالْ

بينى وبين منيتى الأفولْ
دهراً شرقتُ بالغناءِ بالنشيد
خذنا يا ليلُ نحو عشقهِا الهطولْ
خذنا يا ليلُ نحو وعدنا الوصولْ
فأنا ووجدى الشريد
فى ترقبٍ نرتّب الفصولْ
فى انتظارِ مطلعِ السناء
انبلاجِ فجرها الصفاء

ووعدنا مسمر على مسارح الذهول
معلقٌ على شواهدِ البكاء

ماشاء الله علي مطرك الغزير الذي يحمل خير الكلم والجمال شكرا ليك كتير
تشلم

بعد السلام عليكم ورحمة الله وبركاته

وكل عام وانتم بخير

ورمضان كريم

بس كيف انت تجي الدوحه ويكون يوم السعد لكل أعضاء البورد بالدوحه

مع اجمل امنياتي لك بالتوفيق .


ام هاني

ياسلام عليكم ياناس ياكرام
ياسلام يا ام هاني والله الواحد حاسي انو قاعد في بيتو ومتحكر وبقرا وبسمع وبشوف لكم تحياتي ويخلي ليكم هاني

لك يا صديقنا أن تختار ما تشاء من مقاطع في هذه القصيدة القديمة نوعاً ... مع خالص حبي
**************************
يا ملهمتي

********
الوجهُ الهاديءُ .. يتفرّد

والشعرُ الأسودُ .. يتوسد

والقلبُ المرهفُ .. يتمدد

والحب الطاهرُ.. يتجسد

يا ملهمتي .. إني أشهد

اللهُ تعالي .. أكرمني

صّورُكِ .. وأبدعَ في المشهد

فلهُ الشكرُ .. وله أحمد

وبه أتوكلُ .. أتعبّد

يا ملهمتي

الذوقُ العالي .. يدهشُني

والأدبُ الغالي.. يعلمُني

وصفاء الوجهِ.. يأسِرُني

ونقاءُ القلبِ.. يحاصرُني

فالحب الطاهرُ.. ينعشـُني

وحنان شعورُكِ..يجذبني

وحديث الوجد.. يداعبُني

همساتـُكِ.. تنسابُ وتجري
مجري التيارِ .. إلي بدني

ياملهمتي…000

اللحظة ُ .. تمضي والدهشه

والحبُّ .. يرفرفُ في عِـزّه

والليلُ قصيرُُ.. يسرقـُني

والقلبُ المُرهـَفُ .. في رعشه

فليهنأُ زمني.. بما يحوي

وليذهبُ عمريَ .. في لحظه

ياملهمتي

الشِعرُ.. يأتيني خجـِلا ً

حدثـتـُه يوماً .. أن يهدأ

لكنه .. يأبي يطاوعني

ويقاومُ أمري.. ويقحـِمُني

أنساهُ .. وأهربُ أيـاماً

وأعودُ إليه.. فيسجنني

كالطفلُ سعيداً .. منتـشـياً

في المهدِ .. أنامُ ويحضنـُني

يا ملهمتي000
أسـألـُكِ .. أن تبقي قـُربي

لتخففي عنيَ أحزاني

في الليلِ .. أُغالبُ أشجاني

عينايَ.. تسعدُ برؤاكِ

وخيالي يسرحُ .. وكياني

وبريقُ عيونك.. يسحُرني

أهديكِ .. زماني .. ومكاني

فالصبرُ الأجملُ .. من طبعك

أسقيكِ .. حبي .. وحناني

حياكِ اللهُ .. فاتـنتـي

أبقاكِ.. ياقمرَ زماني
************************

كتبها: صلاح الباشا 0000 الدوحة
[email protected]

لك الشكر الجزيل ياود الباشا علي القصيده ومنحكم ايانا الخيار
في الاختيار تسلم يايها الابي

الموصلى وأصدقاء الحرف والنغم

هاك يا موصلى دى قصيدة قديمة، ووحيدة فى نفس الوقت بالعامية، مع انه بخاق جدا من الكتابة بالعامية لما اتذكر ناس القدال وهاشم صديق ومدنى النخلى كدى شوفها بتنفع

========================

سايقك معاى
حسك مضمخ بالأريج
بيهدى آهات الطريق
ويطفى فى جوه المسام
وجع الحريق
ويهدى بركان الضجيج

سايقك معاى
لوحة بتشكل عمرى
فى حزن المنافى
شايل عويناتك
اتاوق بيها
فى فجج الوطن
حاضن محطاتك
اسابق بيها تبريح الزمن
وجوه فى قلب القصيدة
راسم تفاصيل المسافات البريده
ومعاى ريدك والشجن

سايقك معاى
ولو قربت بينا الدروب
لومك على
القاكى واغزل ليك
ريحة الليل ميعاد
لكن عذابات السهر والانتظار
الباقية فى عينينا دار
نجماته ما عرفت سهر
هيمانه تضحك لينا بيك
واغنى ليك
وانسى السهاد

سايقك معاى
لمتين عويناتك توافى
أدفر مراكبى الجايه ديك
واوصل مداينك والمرافى

يا فراقنا يا ريح الشقا
يا طول قساكا ووجعتك
فى بهجة القلب المودر من دهر
ودع سعادته وفارقا
وا شوقو لى عيونن حنان
بتلاشى فيها وبعشقا
لمن رموشا السايله ديك
تضحك وتهطل زى غمام
بلل مواسمنا وسقا

وسايقك معى

حبيبى الموصلى
البوست ده اقنعنى بأنو الابداع فى بلادى فعلا بخير طالما امثالك قايمين عليهو لعدة اسباب
الاول ديمقراطية الطرح وهى بتضمن وعى كبير جدا بأهمية مشاركة المتلقى واسهامه فى عملية الاختيار
ثانيا لان النصوص المطروحة كلها رائعة وتستحق ان تغنى
ثالثا
اتمنى ان تنفرد فى مهرجان الدوحة بالتغنى لاحد عباقرتنا الاوائل الى جانب الجيل الحالى من العباقرة واعنى ان تتغنى بقصيدة لجماع اوالتجانى او صلاح
رابعا وهى امنية شخصية واتمنى ان احضر هذا المهرجان ، وهو انك طالما ستكون بالدوحة فياليت تكون هناك لفتة للراحل المقيم مصطفى سيداحمد الذى عاش فترة فى الدوحة والغرض ان تلفت نظر العرب لهذه العبقرية السودانية الجبارة التى رحلت باكرا واقترح ان تستعد لغناء مريم الاخرى كأغنية بالفصحى يفهمها القاصى والدانى علاوة على ابهارها اللحنى ومعانيها العميقة
ولك حبى ومودتى صديقى الغالى وبالتوفيق انشاء الله ولا اشك لحظة فى انك ستمثل الابداع السودانى خير تمثيل

عزيزي وأخي الحبيب خالد عويس
نشكر لك هذا الاهتمام الذي هو من اصل فعلك الراقي
ومن صميم اهتمامك بفنوننا ومبدعيها
مقترحاتك جميله وراقيه وسأحاول العوده الي دواوين فطاحلنا وبالتأكيد سنجد عمل ان لم يكن للمهرجان فانه سيكون للسي دي المعاصر له ان شاء الله
اما عن مريم الاخري فهي بالتأكيد من عيون اغنياتنا نصا ولحنا واداءا
ومصطفي مغني من طبقة الباريتون الغليظه وفي هذه الاغنيه اداؤه لا يجاري فهي قد خلقت له
كما انني افكر في ابتداع عمل ربما يشاركني فيه اخرون
لذا فان اللحن سيفصل بحرفيه موسيقيه تجعل المقاطع مناسبه
للمغنيين كل حسب امكانياته ومداه الصوتي
ونحن في الانتظار للاختيار وانت باتساع ثقافتك المعرفيه نرجو ان تساهم ببعض الاختيارات من قرآتك من شعرنا السوداني الفصيح
ولك محبتي الخالصه

عزيزي مطر العشم
نشكر لك هذه الاريحيه وهذه الحاتميه الممزوجه بالجماليات

يا أستاذ الموصلي
أين قصيدة شاموق التي وعدتنا بها ؟

الاولي وباللغة الدارجيه نزلت وتبقت الثانيه
اليس كذلك ياصاحب المصباح السحري

لن انزلها انا
انزلها انت حتى أعرفها

عزيزنا الاستاذ موصلى
لك الود الاحترام
ننزل معاك مع انه عارف ناسك ديل كبار علينا شوية
نديك دارجى وبعدين نشوف الفصيح.


الحلم الباقى

كل احلامى بتتحقق
وانت الحلم
الباقى
ولما اتذكر اسمك
كل لحظة بكون
مشتاق
ولما اسمع صوتك
فى التفون
برجف من راسى
وساقى
انت عندى كل الدنيا
متى ياروحى
التلاق

اغمرينى بحبك لحظة
واقتلينى بحبل
الشناق
وادخلينى فى صدرك
جوى
داخل قلبك
الخفاق
ولما تكونى معاى
بكون ليك الدرع
الواق
ولما تسافرى عنى بعيد
بشوف طيفك فى
الآفاق

خلينا نكون اسرة من
طراز الجيل
الراقى
واطفالنا زهورنا الحلوة
تبسم لينا
كالاشراق

انت عندى كل الدنيا
مت ياروحى
التلاق

أنا غايتو عاجباني أزميرالدا

وانا شرحو

أزميرالدا ..

يا فتاة من بريق الماس ..
أغلى ..
وحياة ..
في قلوب الناس ..
أحلى ..
وقوافٍ من جمال ..
من ضياء ..
أنت أجلى ..
قمة من قمم الأولمب ..
أعلى ..
آية من روعة الإحساس ..
تتلى ..
يا نسيماً من جبال الهملايا ..
يا ندية ..
أنت أنفاس الضحايا ..
يحرقون ..
في أتون النار صبحاً ..
وعشية ..
و صبية ..
من ملايين الصبايا ..
يقتلون ..
وبلاداً من ضباب ..
وثلوج وأعاصير عتية ..
أزميرالدا ..
أنت للثوار ..
مدفع ..
أنت للشعب ..
قضية ..
أنت للأرواح ..
مهجع ..
أنت مأوى الكادحين ..
أزميرالدا ..
أنت آخر من ينام ..
وأول المستيقظين ..
بعض أحزاني تظلين ..
وبحراً من شجن ..
بعض أتراح اليتامى المتعبين ..
وبعض أفراح الزمن ..
وحين أسأل عن بلادي ..
أزميرالدا ..
أنتي لي نعم الوطن ..
أزميرالدا ..
كلنا أحدب ..
نوتردام ..
نقرع الناقوس ..
في جنح الظلام ..
معلنين الحرب ..
ضد الحرب ..
نبحث عن سلام ..
نرفع الصوت علياً ..
ضد حكم الجور ..
ضد البربرية ..
فكلنا نعشق سراً ..
سحر عين غجرية ..

علاء الدين شاموق
01/01/2001 م

أظنها أفضل الموجود في دفتر أشعاري

حلوه والله ياود شاموق

الله يبارك فيك يا أستاذ
لكن لسع يا خي 2004 دا ما بعيد ؟
الله يحيينا، ما تخش القريب دا ؟
القصايد ما يهندي راقدة رز، البورد
كلو شعار أعزل بس أتنين وقول
بسم الله

بعد ان يتم اختيار الاغنيه
ستلحن من اجل المهرجان وسيكون معا 12 اغنيه جديده من المختارات هنا
وهذه كلها تحتاج لتركيز وعدم تداخل للخلايا اللحنيه وعلي الاقل يجب ان تكون هنالك مسافه معقوله من الايام بين العمل الذي تم الانتهاء منه والذي سنبدأ فيه
ثم تأتي مرحلة التوزيع الموسيقي وهي الاصعب
عموما الله يقدرنا علي سنة 2004 بس في ياناير يعني ماتخاف اعتبر الامر في ديسمبر 2003
تسلم

تصحيح
أفضل الموجود في دفتر أشعاري

وليست
أفضل الموجود

ولا يهمك ياود شاموق نحن فهمناها صاح

يأخوانا بالله ساهمو بالراي بالمشوره بالقصيده

ليك يالكتيابي

أخي الفنان الشاعري ـ الموصلي ـ أعيد ماقاله أخي نصار ، إنها لديموقراطية الفن ـ وهو يعني ـ حينمايكون التمثيل قومياـ
أرشح لك من العامية قصيدة أخي الشاعر يحي فضل الله ـ وأهديك هذه الأبيات المتواضعة :ـ

()
أسـطـورة أنت لكـني أصـدقها
كـلا مطـلسـمة من غـير تأويل

مـثل التمائم يخفي رسمها لغــة
مجـهولة الرمز عاذت بالمجاهـيل

إن كـنت جـنية أو كـنت ساحرة
أو كـنت حـورية من غيهب النيل

كـوني فإنك ذات الأنت في هوسي
أحلى الحـقائق أو أحـلى الأباطيل

من وسـع البحر في عينيك أطلقني
في أفقـه كفـراشــات القـناديل

يا لسعة ـ وافت الوجدان شـفرتها
أيشعل اللسع قطن الروح ؟ قولي لي

أم أنني قمت بين الناس في حـلمي
أختـال في خيل أوهامي وتخييـلي

أم يا ترى خالقي للحسن مغنطـني
بالحسـن فانجذبت عفـوا تفاصيلي



كتيابي

هل هل
ماقتلك يازول
بالله عليك لاتبخل علينا

العزيز الموصلي

لك منى عاطر التحايا وانت تتربع على عرش العطاء المتفرد في نوعه..
واجدني اتابع كل ما يدور في هذه الصفحات واوجث في نفسي رهبة لمفردات من عباقرة مثل الكتيابي وودشاموق .. فتتوارى مفرداتي تلك الرتابة وراء جدران البورد حياءا ..

يالكم من مبدعين
وياليتنى اكون في مهرجان الدوحة حينها
وقبل الإقلاع
وما اني ما شاعرة زي ما انت عارف
هاك ديل

القرار

كل ما اقول أدور أمشى وأفوت وأنساك
الاقي خطاى ماشة عليك وماشة حداك
خطاى الضائعة في الدرب العريض يا ملاك
لقت دربك وضاعت فيه دون أسباب
انا التعبانة من تعبك
انا المحتارة من حيرتك
وأنا المشتاقة لشوفتك
وأقول يارب متين ألقاك

ووقت ألقاك
الاقي الكون صبح في سكون
والساعات جرت ضدي
وألاقي الكلمة تتكسر
وألاقي الخطوة تتعتر
وسهموم عينك في جواااااي تتخلل
تشتتنى
وتضهبنى
وما بقدر أنا اتحمل
وساعة الهجر
عيونك جافية قاسية عديل
متل ما تقول
سهم في الجوف سكن طول

وأقرر اقول افوت وأنساك
وبإصرار ودعدتك وفتا هنــــــاك
وأول وهلة في بعدك هلاك في هلاك
وافتش ليك وما بلقاك
وما بلاقي الشبيه لهواك
وأعاين في العيون في الكون
ألاقي عينك أحلى عيون
وأحلى جنون
وأحلى طريق سلكتو معاك
وصوتك نغمتو الحلوة
تزيد اللوعة في جواى
وأبقى اليك كتير بشتاق
وبرجع في القرار بسراع
وأتمناك وما ألقاك
وأقعد اصنع الأسباب
أكيد مزحوم
أكيد مهموم
أكيد وأكيد
وفي جواي يهتف صوت أكيد كذاب
وكل ما اقول اعاند واهجر الأشواق
يقيف الشوق يلح ويلح
يدق في الباب
واتمناك وما بلقاك
واقرر تاني انسى هواك
الا عينك قصب عني
تكسر العزة في جواى
وادور القاك
وأبقى معاك
ولا افوتك
ولا انســــــاك



و



اليك


الى من اتى حديثا الى زمانى
الى من جعل لكل شئ اسمى واحلى معانى
الى من تقلقل في وجدانى
وملك عقلي وقلبى وانسانى
الى عمري الى روحي الى مدائن العرسان
الى من ملك تفكيري في كل ساعة وثوانى
الى وطنى
الى بيتى وعنوانى
الى من اشتاق اليه في كل الاحيان
الى من احب بكل كيانى
الى حبيبى اليك اكتب الحانى
اليك يا بحيرتى
وانهري
وخلجانى
اليك يا مراكبى وسفنى وقرصانى
اليك يا شاطئ واصدافي وكل مكان
يا ايها الانسان
يا فتى احلامى
يا .......ـ
يا من احب حب يفوق مساحة قلبى ووجدانى
يا ليتنى اجيد سرد الشعر
فلو كنت شاعره لكتبت فيك اطول واحلى اغانى
ولو كنت كاتبه
لكتبت قصتى معك يا سيد زمانى
ولكننى كما ترى احاول
ولمن يحاول كما قيل اجران.......


و


عتاب

يا قلبى لا تعتب علي
انى رحلت بلا اختيار
يا قلبى لا تقسو علي
من كنت اهوى نسى وجار
عنوانه الشجن الاليم
ومن بعد ما عز المزار
كسر الفؤاد رحيله
ومذاق حلوي قدا مرار
وعشرة الايام زالت
وتبددت دون اعتبار
احببته دون اختيار
وتركته دون اختيار
فالاولى ويل حارق
والاخرى بين وانهيار
وانا بتلك وهذه
في حر نار اي نار
يا قلبى يا هذا الصريع
يا من اضمك في الضلوع
كف البكاء كفى انين
لا جدوى من طول الحوار
باع الحبيب واشتريت كرامتى
فهل كان ربحا ام خسار؟
يا قلبى ارحمنى كفاك
فذاك كان هو القرار
دون اختيار

و



يا قلب


بعد الجراح عادت لاقلامي الحياة
تكتب خواطر كل يوم تسرد شعر
ورنة الحزن الحزينة الفي العيون رحلت بعيد وغادرت
وكل الهموم والمشاغل هاجرت
اديتها تأشيرة خروج من غير رجوع
والمسافات البعيدة شافت عيونك وقربت
لقت الدفى
ولقت السكينة
وندمت انها اتغربت
ورجع السفر يرتاح معاك
وبيك يرتاح مرتين
هجر المراكب والسفن وكل الدروب
وقال تانى ابدا ما يفوت
يا البسمتك ضوت حياتى واشرقت
وبقت الشمس وكل النجوم تخجل تبين للعالمين
وبرت الجراح راحـــــــت وما تركت اثر
وضاق الحزن طعم الفرح وقال يا ســــــلام
اتاري مظلوم من زمان
يا ريتنى لو اقدر اوصف الفي الدواخل يا قلب
لكن عزاي انك معاي جوا الصميم
ويمكن تكون عارف العلي اكتر علي
انت الهنا
وانت الهناك
برجاك في كل الاماكن وبشتهيك
وبنوم وبلقاك في المنام
واتمنى ابدا ما اقوم
لكن
لكن
لكن بقوم
والقاك في كل الدروب والازمنة
والقاك هنا
جوا القلب
انت القلب


سماح

شكرا ياسماح علي مساهماتك النديه النابعه من القلب الرقيق
الموصلي

وهاكم دي من طارق التوم

البنية الامهرية
---------


منك الفرح المعطر
برحيقك يا صبية
وبيك لون الدنيا انضر
يا عيون صادقة ووفية
لما طليتى فى حياتى
وطلة الاحلام ندية
شايلة حنية وسماحة
وناشره عطرك صندلية
حاضنة عينيك البشائر
لسنين طيبه بهية
الزمن كان قاسى قبلك
والامل ما ناوى جيه
والمشاعر الحية نامت
والدروب صبحت قصية
جيتى صحيتى المشاعر
والامانى المخملية
جبتى لعمرى التفاؤل
وللعيون افراح وضية
يا صباح طال انتظارو
عندى ليك بالقول وصية
خلى بالك من عيونك
يالبنيه الامهريه


وشكرا لايهاب ابن عم الشاعر

من عيونك ..
تبرق النجمات معاني ..
والأماني ..
لي جمالك ما بتطول ..
حسنك الفرد المأصل ..
والجمال مخلوق عشانك ..
ليك مفصل ..
والأغاني ..
من سماكي علينا تمطر ..
زادت الغيمات هطول ..
من جمالك ..
عجزت الكلمات توصف ..
حسنك المزروع شتول ..
في قلوب الناس بيرسل ..
روعة الحسن البتسكن ..
في الضماير والعقول ..
حرة زي نسمة خريف ..
وزهرة من قلب المداين ..
يانعة في كل الفصول ..
عجزت الاقلام تسطر ..
زي جمالك في القصايد ..
من نسايمك في الحقول ..
تشرق الأنوار علينا ..
نجمة في ضل العتايم ..
ترسل الأفراح رسول ..

علاء الدين
26/11/2002 م

جميله ومعتقه

أبحرت سفن التمني ..
قاصدة لي أرض الشمال ..

غادرت كل البواخر ..
شدت السفن الرحال ..

والطيور ركبت سفينة ..

في دجى الليل والعتايم ..
راحلة في أرض الجمال ..

هجرة الطير المغني ..
تارك الأوطان جنوب ..

في وداع حسناً مسافر ..
تنزف أوتار القلوب ..

دمعة الفرح الحزينة ..

كلما مرت نسايم ..
والرياح هبت هبوب ..

أبحرت سفن التمني ..
باحثة عن جنة عدن ..

في فيافيك الزواخر ..
جنة أوتار الشجن ..

سافري في كل المواني ..
مينا مينا ..

وأطلقي الزفرات حمايم ..
في دياجير الزمن ..

علاء الدين
26/11/2002 م

لا بقي دي خطره عديل

تسلم يا عمنا الموصلي

الحبيب والرائع المبدع استاذنا الموصلي
شكرا لهذا البوست الرائع ابعث لك بهذه المقاطع من قصيدة أدمنتك لعبد المحمود السماني وهي ملحنه وجاهزه عندي مشاركا بها في هذا البوست ادمنتك محمود السماني
نقر صوتٍك سكون الليل
سكت هرج السموم الغم
لسان حالٍك خرير النيل
يصّحي بيات مشاتي القيف
وقتين فجرك يتبسم
ويبدو عليك نهيض الخيل
يحضنك موج كتم سرك
عصور الهجرة ما ملاّك
ولا هو نضم على جمرا تهبو الريح
حرس رجعة عيونك كم
********************
ملقلق طيفك الخمجان وما بندقّ
وحلّق في السما الراعش
جنون الفطرة من صفوة جبينو قلق
همسك للمطر نقنق
دلقك في دعاشو عبق
سبق بي غيمو ميقاتك
يغالط بي ميعادو الحق
مجرتق بالشفق والطين
حرق دفتر هويتو بخور
ومحّق للقيامة جريك
طلق غول الخيال في الدم
وكان مكتوف وخافك وعد
*********************
ويا ريتك يطابق ظني توقيتك
واعاديك بالارق والخوف
وعرّضتك قطاعتي تجيك
اهزمي موت فصول الرجعة
املى حياتي حــّد الشوف
هواك ما كان محض صدفه
ولا غابيك عدم عرفه
ولا ساقنى القدر مكفوف
انا مربيك من نطفه
ومتاتيك باقي ليك دفه
وبسابق في الزمن ملهوف
شبه مألوف
وانا الرامياني جبنة شوفتك
أدمنتــــــــــــــــــك

شكرا يامبدع
ومن الحاجات العاجباني فيك جدا
اختيارك الدقيق والموفق للنصوص
وياريت تسمعنا ليها هنا في البوست ده وتنزل الاغنيه جمب النص
وانا سعيد بيك جدا

استاذي الحبيب الموصلى
هذه مقاطع من قصيدة ادمنتك لعبد المحمود السماني وهي ملحنة وجاهزة
عندي ان شاءالله تسمعها في اقرب وقت ممكن
ادمنتـــــــك
نقر صوتك سكون الليل
سكت هرج السموم الغم
لسان حالك خرير النيل
يصِّحي بيات مشاتي القيف
ّوكتين فجرك يتبسم
ويبدو عليك نهيض الخيل
يحضنك موج كتم سرك
عصور الهجرة ما ملاّك
ولا هو نضم
علي جمرا تهبو الريح
حرس رجعة عيونك كم
*******************
ملقلق طيفك الخمجان وما بندّق
وحلّق في السما الراعش
جنون الفطرة من صفوة أديمو قلق
همسِك للمطر نقنق
دلقك في دعاشو عبق
سبق بي غيمو ميقاتك
يغالط في ميعادو الحق
مجرتق بالشفق والطين
حرق دفتر هويتو بخور
ومحّق للقيامة جرييك
طلق غول الخيال في الدم
وكان مكتوف وخافِك وعد
**********************
ويا ريتك يطابق ظني توقيتك
واعاديك بالارق والخوف
وعرّضتك قطاعتي تجييك
اهزمي موت فصول الرجعة
املي كياني حــدّ الشوف
هواك ما كان محضّ صدفة
ولا غابيك عدم عِرفة
ولا ساقني القدر مكفوف
انا مربيك من نطفة
ومتاتيك باقي ليك دفة
وبسابق في الزمن ملهوف
شبه مألوف
وانا الرامياني جبنة شوفتك
أدمنـــــتك

وهاكم دي من ياسر محجوب

وجهك كان بترجرج سائل ماء
جوهر حلمك كاشف
وجهك و الأصداف
إشعاع النهر الخابئ، في الأعشاب و الطمي الزاحف
وجهك، تعويذة الخوف الساعر
فجأه توتر
مرقت روح النهر سعالي، وحوش، الحلم إتعكر
المدن الممكنه غامت، بواباتها بعااااد... بدأت ترحل جوه الليل
نحرت روح النهر المرقت صمت الليل، كوراك
إتجمد صوتك صاح الخوف الساعر
ملء الفم الراعف و فاغر
أصداء، أصداء، أصداء وغياب
عرقك نافر، طلسم وعيك عين مثقوبه مجسم
طعم العرق المالح
يقظه

بتذكر وجهك لمن جاك الطلق الأول
برهة خاطر عابر
عندها جات الخيل
سقط الزمن العابر فوق الصخر البارد
وعيك فوق الجبل الصالد
بوابات الليل السبعة و قصر الخوف الساعر
وقع الحافر فوق الصخر و صوت الريح الدافر
وجوه الخيل مشتعله، البرق الشارد أسئله....
هل؟؟؟؟ تتساءل.....
وقع الحافر فوق الصخر وصهيل الخيل و الريح تكوين الصوت الماثل؟؟؟
هل في البرق وجوه الخيل مشتعله حضور؟؟؟
هل وعيك موجود؟؟ حاصل؟؟؟
بتذكر وجهك لمن جاك الطلق الأول
كنت جميله و حبلى إضاءه بصخب الطمي الواصل

بتذكر وجهك لمن جاك الطلق الأول
خاطر عابر، برهه وغبتي
ظلام.....

وهاكم دي من عبد العال السيد

موال على درب النخيل عبد العال السيد

سنة التساب في قريه في جوف الشمال

كانت بيوتا مشتته

وكان الزمن لسع صبي وكان الليالي عقاب شتا

وكانت رياح الليل تعربد تمشي بينات النخيل والجو مغبر والرياح والضفه والموج في كتال

وما في شي يجرح نعاس الليل بلا حس الرواويس والمراكب هاربه من برد الشمال

ونباح كلاب نص الليالي الصاحيات والقمره شالعه

على التلال

وفانوس يبقبق من على شباك قديم

واطياف حريم

متلفعات خايفات من الليل والسديم

والحان بتطلع من حلق وترن على وش الفجر

مبحوح بعد راح النديم

وهواكي بطلع من عبير نفس الشجر

من هدأت الليل البهيم

ومن سواليف السحر

ومن ترانيم البحر

يفرط عقد ايامي في طبق النسيم

يا مهره من بر الصحاري الكبرى يم ديسا

مهدل في الكتوف زي غيمه في آخر الليالي

زحمة مكاتيب بيني ما بينك قمر

نايم على حضن الدوالي

موال على درب النخيل والريح مغارب

في شتا البر الشمالي

دوباي وترنيمة لبيب حادي القوافل

والقمر صحيان يلالي

موسم طلاقات للربيع ومدن مسوره بالآلي

واعراس تقج فيها الزغاريد والدلاليك في السحر

مخنوقه تهبك كل ليله على التوالي

رمشك مظلات من حمو الشمس المداريه

وعيونك طاقه للغنا والسحاب

نفسك نسيم ليل الخريف والقبلي شايل

في الصعيد بعد اليباب

زولك حزين محقت سنين الغربه عمرو

وعده خلالهو الشباب

قاعد على قهوة محطات العمر

يحسب سنين عمرو المضت من غير اياب

والليل مواكب ضجه والشارع ضلام

لا همسه لا خطوات بتعبر لا كلام

غير نهنهات صوت البكا الموجوع

بتمرق من شبابيك البيوت آهات تؤثر في العظام

بيني ما بينك ممالك من سراديب

سيف وتفاحه وخيول

صيف مروح غيمه في آخر الفصول

ناي حزين فاتح شبايبك حسره للمندب

على ريح السهول

طفله ترقص في المدى المشحون بايقاع الطبول

غابه في نص المدار وقمر على طاقة الافول

بيني ما بينك معاني

وكلام قديم يا عمري ما سووهو في كتب الاغاني

وهواكي زي نار " السلم " موقوده في جوفي

وحشاي لاهلابه والشتا اربعاني

بيني ما بينك مصير

مسرجات الليل ومركب في رياح موسم مطير

صرخه في الجبانه تسرح في حشا الليل الاخير

بيني ما بينك وطن

غابه للشوق والعصافير والشجن

ريح بتمرق من جدار الليل تغربل زي طواحين الزمن

وهاكم دي من الصديق زمراوي

لا السلاح بمسح حبر مسكوب ضنا وهم واغتراب
لا الليالى الداكنة تبعد خطوة فى درب الاياب
وبين صميم المعنى والشوق ارتجيك
سكة فى خاطر الغنا
لوحة الوطن العنيد
لفحة النسمة الحنين
شهقة الوجع العنا
*******
صوتى فى صوتك هدير
شوق مطامير الهوى
تكية الريح فى النخيل
ومضة فى قول اتروى
شفع الشارع وسام
ضحكة الاطفال تميل
ترفدك نهر احتمالى
وعلى من صوتك مصير
شهقة الخاطر سوا
والعتامير لابتجير
حزن منسوب البحر
لاالسلاح بمسح حبر مسكوب ضنا وهم واغتراب

استاذي الموصلي
شنو الاخبار الجميلة
بما انه جديدة وكده اول مره اشوف البوست ده طبعا
واعرف انك حتشرفنا هنا
ياسلام
اخبار حلوة خالص
لقيت القصائد كتيرة وجميلة
ما عارفه تحب اشارك بقصيدة ؟
مع اني بفكر في موضوع تاني
دويتو كيف معاك؟؟؟؟؟؟؟؟ لوووووووووول
صوتي جميل والله احسن ليك فكر في الموضوع والشكل مابطال
فما تستعجل في الرد

لووووول
لنا لقاء
ودمت

لا طبعا احسن الدويتو لكن خليني اكون اناني شويه
القصيده مطلوبه كمان لانو كان الله
امد في العمر بعد فتره وجيزه ساعود
للتفرغ للفن تماما وبانتاج غزير لي ولي غيري
ساصب عصارة جهدي وخبرتي وعلمي
بس عايز اكلفك تتابعي لي الموضوع ده وتجيبي لي معلومات زياده
اصلو رسلت ليهم ايميل
وماردوا الظاهر شافوا التاريخ بعيد
وهم عندهم واحد قريب
تسلمي ولو صوتك حلو جد رسلي لي شريط او بالايميل
لانو نحن بنفتقد للصوت النسائي
وبرغم كده معاي صوت حأفاجئكم بيهو قريب
في البورد ومافي مانع يكون في واحد تاني وتالت

معقوله بس يااستاذ
انت تأمر
بس قول لي امشي اسأل وين بالظبط ؟ وكل المعلومات تكون عندك
والمهرجان 2003 خلاص انتهى بالنسبة للاغنية
بس رسل لي وريني شنو المعلومات وكده
واسم الحتة المسئولة
وبعدين
ااايييييي صوتي سمح شديد
احسن ليك انشاء الله اعمل ليك كورس

وبرضو انشاء الله حاضرين بالكتابات
ودمت

والله اكون صريح معاك
انا كنت اخذت الوب بتاعهم من الانترنت وختيتو في كومبيوتري وبعدين فقدت كل الداتا
وانتو الاقرب هناك والدوحه اصغر من حي العرضه ولا شتو ياهوزي انا متكل عليك وعلي الله وشوقي معاك ود الباشا ومدني النخلي
وابراهيم علي بساعدوك
تسلمي وانا سعيد بي اهتمامك ده

حاضــــــــــرين ولا يهمك
على العين
ودمت

الله يخليك لينا عزه معزه واقتدار
ياهوزي

خواء الروح

واقفات في قيوف الكون
نجمات من رماد النور
تبتّق في المتاهات ضي
وتعزف للوجود أنغام
عشان ما تفرهد الزهرات
تتشرب نضارة لون
وتمسح دمعة الأحزان
وتنده لي نداوة الطل
من القيف البعيد بي هناك
تبكّي الغيمة تسقي الصي
بقايا الذكرى والنسيان
تنبّت في دواخل الروح
تهبهب نفحة الفردوس
تصابح ثغرك البسام
عواصف من أمل مجنون
وغابات حرة من أبنوس
يهيم في حسنهن فنان
يبيت من بعدهن محزون
وينحت للجمال ربات
يفوقن في الجمال إيزيس
وأجمل من خيال منظور
تتوِّه في جمالا نفوس
وتختال بين بنات الحور
وكم في حسنَك المأنوس
أترعتا الكؤوس أحلام
شواهد لي قساوة الطوق
وقيد مكتوب على الإنسان
من حنضل زعاف السَّم
تعاني مرارة الأيام
ومن مر الألم والشوق
تفارق دورتا الأنسام
محملة بي عواصف الهم
وكم شوقاً سقانا المر
لي بسمة طريف فتان
حتبقى من الأمل نفحات
تقاوم قسوة الأزمان
ولا بد في الوجود لحظة
تحلي مرارة العبرات
وكل الكون أكان انقاس
أكيد ما بسوى ها الدمعات

علاء
17/01/2003

عزيزي شاموق والله حيرتني دعك من المبدعين وان قصائدك انت لوحدك اصابتني بالحيره لكن ماتخافو اخوكم جدع ويعرف كيف يرشد انتاجو الموسيقي

لا ينفع

علاء الدين شاموق


طواني ليلك الظمآنُ
يا ....... وهدهدني
كطفلٍ منك لا يشبعْ
ولا يقوى على الحرمانِ
لا قرباً يداوي القلبْ
أو بعداً له ينفعْ
أنا في حر ليل الصبِ
لا أقوى على الأحزانْ
لا أغفو ولا أهجعْ
سواد الليل في الأحداقْ
والظلماءِ
يشبه شعرك المشرعْ
وشوقُ الشوقِ للأشواقِ
للأشياءِ
شوقي للهوى المترعْ
فهذي حسرة العشاقِ
يا حسناءُ
قد تصرعْ
طواني الليل يا مشتاقُ
كيف تقول لا تفزعْ
أساري الليل يا .....
لعل الصبح لي يرجعْ
فأشكو قسوة الإنسانِ
كيف البسمة الهوجاء
تنسي قلبي الخفَقان
حتى إن طويت السرَ
في الظلماءِ
جنح ظلام ذاك الليلِ
أو أشهرته يُسمعْ
فلن أشكو ولن أجزعْ
يقول الحاسدون كفى
أقول كفاني المدمعْ
يقول الناس لا تحزن
أقول الحزن لي أنفعْ
ولا تسهر ولا تتعب
أقول جفاني المخدعْ
وأضناني فراق الوعدْ
كيف أعود للمهجعْ
سأصبو للهوى العذري
حتى تنجلي الأضواء
وأهفو كلما طافت
علي خواطري الحمقاء
في عهد الصبا الباكر
غزال الروض والمرتع
وحر الشوق في الخاطرْ
مواثيق الهوى الأولى
وليل خريفنا الماطرْ
على جدران نافذتي
تجاعيد بذاكرتي
فهذا العهد يا ........
وعهد الحب لا يقطعْ
رجائي في الوجود لقاءْ
فمن للقائنا يمنعْ

علاء الدين
11/02/2003


.

والله يا استاذ شكلك كدا ورطه نفسك

عارف كيف..؟

انا في البوست دا ممكن ماخد لي فيهو حوالي ساعتين بقارن بين القصائد المكتوبه من وجهة نظري لقيت انو صعب جدا تقدم قصيده علي قصيده .... غايتو ربنا يعينك

واي قصيده من المكتوبات ديل ممكن تكون تستاهل تشارك بيها باسم السودان

الله يعينك يا صديقي العزيز

يا موصلي نحن جاهزين انت كيف ؟ ورجاء إرسال نسخة من طلبك لدى اللجنة ،وللتنسيق بيننا لك عنواني البريدي

[email protected]

ابوساندرا تسلم
الحقيقه كنت ارسلت الطلب بالايميل لكن ماجاني رد لذا عاوزك تشوف الناس ديل بالانابه عني انت وكل الاحباب هناك وشوف معاك هوزي
وقدمو لي تاني وانا معتمد في اذاعة وتلفزيون قطر
ولو نسو ممكن يشوفو الموقع بتاعي
elmosley.org

الله يهون ياهوبلس انا ذاتي في حيره
لكن التوفيق من عند الله

الله يحفظك ياود شاموق
انت شاعر جد ومبدع جد
النصيحه لي رب العالمين

يا سلام عليك يا موصلي

دا من زوقك بس يا راقي

.

عزيزي ود شاموق ولا علي كيفي
انا قريت وتم الاعجاب
يعني ما عشان انت صاحبي
والله انت شاعر جميل
الله يحفظك ويغتيك

عينيك
مراحل ومضة فى افق الاغانى
وهجعة الغايب اذا
عاد للمدائن والمؤانى
وبين غناك وغمضة الشوق الشفيف
بذرة للارض الوطن
وضحكة للفرح الاليف
وهمسة الوكت العفيف
من جوة اعماق الزمن

متين ترجع مواعيدك
واقابلك مشتهى اللقيا
واناديلك اناالمبحر فى ضي عينيك
وابادلك فى الكلام باهى
واشوف مرساي فى عينيك
ومعنى الهمس فى شفتيك
وميعاد النهار منية
واصارحك منتهى الالفة
بانى اخدت معناك ودسيتو فى هواى
عنوان

عارفة لواحساسي فارق
لديارو بعود مسالم
يرصدك فى سكة الحزن الجريحة
ويبدى بيك كل العوالم
ويرسمك فى الساحة مسرح
وفى الدفاتر حرف يمرح
وفى الحقول الق السنابل
فى ضيا الشمس العنيدة


هذه مجموعة مقاطع كان من المفترض ان تصاحب تقديم
الخريجين فى جامعة برادلى بيوريا...

جليسا لعادةالنهر
تصحبنى الاغنيات
الى مساء هاطل بالتمنى
الى التشرد فى الحروف
وقصعة الحزن المؤلف
فى دماء عابرة
ارفض السير دونك
دونى النهر والانثيال
اوفيك نبضي
انا المجهد بالحنين

بيناتنا سؤال
وين غيبتك فينى
ووين القاك
السكك الجوة الفكرة تضج
بالذكرى ولحظة كون معناك
متصالح جدا ببدابك
واشرحلك كيف اتلم غناك
من حرف السير الغاربة هطول
من وجع المدن الخابرة هواك

زمراوي الجميل شكرا علي الروعة والاحاسيس النيه يديك العافيه

احنا منتظرين اليوم ده بفارق الصبر
بس انا بتمنى عشان الجمهور مايكون بس سوداني
انك تحاول ترسل شي
لقنوات تانية
يعني mbc or mazzika or nagham
مش احسن برضو شوية دعاية
والقصائد ماشاء الله
الله يعينك في الاختيار بس برضو برسل ليك واحدة
بس حاخجل ارسلها جنب الكتيابي وودشاموق والباقين
العباقرة
وقول لي اعمل شنو
انا جاهزة
تحياتي

المطلوب الاتي ياهوزي العزيزه
ان يتم التعاون بينك والاخ ابو ساندرا في التقديم للمهرجان باسمي من جديد واخطاري بالنتيجه عشان نحسم موضوع النص العربي للمهرجان
وكيفية تقديمه
اريد ان اعرف هل يمكن استضافة اوركسترا سودانيه كامله من اختياري
ام بعض من اراهم ضروريين من عازفين سودانييين
علما بانني ممكن اكتب اوركستراليا لاي اوركسترا في العالم
ولكن احتاج لي طعم سوداني خاص وسط الزخم الاوركسترالي
عايز اعرف مزيد من شروطهم عايز تجيبو لي عنوان الوب بتاعهم تاني
ولك مودتي

فكرة الاخت هوزي دي ممتازه
عشان الشغلانه برضو تاخد مساحته

وياريت يكون المهرجان دا بيخاطب العرب اكتر من السودانيين عشان نكون ساهمنا في توصيل الاغنيه السودانيه الجميله لاخوانا العرب
عشان كدا يا استاذنا ياريت النصوص والالحان تكون من النوع المستساغ لاخوانا العرب ممكن نقدر نقرب الفجوه
ولك ولجميع من يدعمك دعواتي بالتوفيق

ان شاء الله ياهوبلس
ولينا هوب كبير في النجاح في هذا المهرجان

عزيزنا الموصلي
تحياتي ، و لك كل التقدير في فرد أجنحة الفن السوداني عبر البسيطة.
طبعا المهرجان من الآن توجد جهات تخطط لفنانيها و موسيقييها للظهور ، و بما أنك بدأت أيضا مبكرا ، فأنا لا أرى تواجدا بالحجم المطلوب من إخوتنا و إخواتنا المبدعات.

أضم صوتي لصوت الأخت هوزي ، و التنسيق مع عدة قنوات فضائية للنقل .
أقترح ( لكى يتحمس الناس أكثر ) عمل نفس إعلانك هذا في المنتديات السودانية بإسمك لإختيار النص العامي و الفصيح.
و تسلم.
هل إستلمت عنواني الإليكتروني ؟

اليوم قضيت سحابة النهار ركضآ بالهاتف مابين الإذاعة والتلفزيون والمجلس الوطني للثقافة ، وآخيرآ عرفت ان المنسق العام للمهرجان الأستاذ محمد المرزوقي وحصلت على هاتفه الجوال ،لم لتمكن من الإتصال به لزحمة العمل ،قبل شوية حاولته وما رد علي وسوف اواصل وافيدك بما يتم

لاعدمناك يا ابو ساندرا عشمنا فيكم كبير

بو جهينة
علي بركة اله ياعزيزي افعل كل ماتري
انه لصالح هذا المشروع الهام وكلنا يد واحده

سلام يا موسيقار


تحياتي وانت تجتهد لتصبو بالفن السوداني للمراتب العليا


استاذي نحن ايضا في الخدمة ونتمني هذا اليوم بفارق الصبر لكي يتذين المهرجان

بالموسيقى ،والكلمة ،والتوزيع السوداني الجيد

وكل اهل الدوحة في الانتظار

والى الامام دوما

تتسلم اخي الحبيب وياها المحريه فيكم

اخر ما كتبه الدوش هديه للموصلى

العزيز ابو هديل
لك المحبه
هذه القصيده اسمها
امل شارد
كتبها المرحوم الدوش فى ايامه الاخيره الله يرحمه
وقالها لنا فى مكتب الاستاذ عبد المنعم الكتيابى
كاخر عمل له
وها هى القصيده اهديها لك واتمنى ان تجد فيها احساسك
لك المحبه

وقفت على امل شارد
ونازل من شعاع الروح
واقف فوق امل ناهد
وقفت معاى ظلال اشجار
على كل الحصل شاهد
بانك انتى روح الروح
وانت الماشى والصاعد
دوام بتلمى فى المغبون
وفى المحزون وفى القلبو الزمن قاعد
وقفت على امل مشبوك
باطراف الندى ومحبوك
على غره جبين نادر
وفوق صهوه فرح غامر
وانتى العامر العامر
وانتى المخفى والظاهر
وانتى فرح جنونى ومنتشى وامر
ويا غيمه زمان اثر
انت الفيك اصيل مخزون
من بهجه وحلاوه روح
بودى الزول محل ما يروح
يا نجمه صباح طلعت
على كون فى الدجى مسافر
اذا كان الزمن لقياك
انا الربحان وانا الخاسر
000000000000

Quote: شكرا ليك ياحمزه

شنو والله ابوساندرا
مشكور ماقصر
احسن مني مش كده يالموصلي؟
ها تاني شنو؟
الناقص والمطلوب وكده
في زول يشيل الساوند
اي حاجة يعني احنا جاهزين

هوزي بتنا الراقيه
كفاكي انك شايله همنا ربنا يحفظك وراجين منك الكتير
يلا حركو الموضوع قبل مايصبني نعاس التكاسل

يارحيل وهج المعانى
لما درت تزور ديارنا
كان معاك وجع المؤانى
يوم تفارق سر نهارنا
وكنا فى عينينا نضحك
من مجيك من ودارنا
اصلو عارفين انو مهما
المواعيد بينا طالت
يوم نعود لعشب اخضر
ونرسم الانجم مدارنا

النهر
يقعد زى اخوانو قديم العهد
بالالفة ودربو رحيل الليل
ومماثل سكة الاكوان
لو ختاها نبض السيل
لوفرتق حداهو الهم
ونبع الحس سكن فى الحيل
محكر بالغنا المالح
ومنقوش فى الفيافى النيل

لوصحيح يايمة فتك
كون غلط غيبتى الطويلة
تكون خطاوى الشوق اليك
راصدة فى الميعاد مقيلا
وكل نبضة حسن باسم
ليك يرسم شق نخيلا
لجروف مقلة عيونك
ولى لياليك الاصيلة

جاي راجع
من دروب الغربة راجع
شايل الالحان مؤانى
وجوة نبض الفرحة سامع
حس خطاوى الالفة فيك
وشوق معانى القلب ناصع
من جروف الدنيا راجع
للميادين والمزارع
للاناشيد والمدارس
للمؤانى وللمصانع
اصلو مهما غبت منك
جائ راجع وايوة راجع

انا ما انهزامى

لكن ظروفى وقفت امامى

خطفت طموحى وسرقت كلامى

ادمنت نوحى

ومليته روحى

ونار المجاذيب سكنت جروحى

معزوفه نازفه

والدنيا واقفه

عربان حفايا

ماشين ورايا

قطعوا العتامير

دقوا الطنابير

بكت السواقى

والنيل مجرتق لابس طواقى

يانيل حبابك انا فى رحابك

بقلع هدومى

وانده طلايع ود النجومى

واصبح نسايم واسراب حمايم

درويش وصوفى

واحرق حروفى

وانده واقولك يا عزه قومى

بيوضه تاهت كايسه الدميره

ترهاقا بشر وغنت مهيره

والنيل تبسم وخته الضريره

بنادى الخليفه

والدنيا زيفه

والخيل تجقلب

والناس تثكلب وين الخليل

ينادى كرومه يغنى العديل

يرقص بنات الاصول التقيل

فوق العمايم علقت سيفى

وعزمت ضيفى

قطعت بايدى رقاب النخيل

بنت القبايل

سقت الخمايل

ملت القداحه

وطقت مناحه

يا نيل حليلك اصبحت ساحه

لى كل هازل

وبا لحسره منك بكت المنازل

جات المواسم وين التقاوى

طفت الهبايب نار الخلاوى

مين اللى بسال مين البداوى

جلابه فاتت قطعت فيافى

والنغمه ماتت فوق القوافى

والناس تدافر كايسه المنافى

افتح جرابك

وسنن حرابك

واجه رياح السنين السوافى

ماالناس حيارى

فوق المصاطب قاعدين سهارى

واحد يروح واحد يجينا

يكتم علينا ويتفشه فينا

عايشين ما سى

نبكى ونقاسى

والدنيا دايره لعبة كراسى

هذا النص لكم ولكل من تحبون

يوسف الموصلى

عبد العال السيد

عملتو لي شنو يا احبابنا في الدوحه

أهلآ سلام

أتعهد ان ارابط للمرزوقي قدام التلفزيون ، كلما اتصل يقول لي انا في إجتماع ، انا مشغول جدآ ، سوف أتصل فيك لاحقآ ، ولايفعل وهوأخذ كل المعلومات بم فيها سؤالك عن احضار كل او بعض ألأوروكسترا معاك ، قال حا يرد
المهم من اليوم وحتى الغد ألأحد يا جيتك بالخبر اليقين يا اعلنت هزيمتي

في يناير حا اكون في إجازتي السنوية يعني المولد حا يفوتني ، ما تجي نتلاقى في الديم او في الرمل الدقاقة

يديك العافيه يا ابو ساندرا
ويعني مما ممكن تقدم او ناخر الاجازه وجودك مفرح
برغم ان اخوانا واخواتنا هناك مابقصرو

الموصلي
بعد السلام وللجميع
دي واحدة من نزار
صاحبي
حأحاول أكتب كمان لو قدرت
إنشاء الله تعجبكم
مع خالص الامنيات ليكم بالنجاح

أبنوسي


يا جاي عز المغربية
وفي عيونك
زحمة الشوق والخواطر
لو غشيت دنيا المشاعر
شيل معاك توب للحبيبة
ولهفة للبلد البعيدة
وبرضو شيل قنطار محبة
للعزيزة الغالية حوّه

جاي عز المغربية
وفي دواخلك
طفلة حلوة وسمهرية
وضحكة صادقة
وروح صبية
وزفة أفراح الأميرة
وروعة ألحانك فريدة
وواصلة لااا أعماقنا جوة

وإنت جاي
ميل علي النيل وأحتفلبو
والنخيل أهديهو عشقك
وللمدن ألفين تحية
وللقرى
وكل الفقارى
اللسة عينيهم وفية
صلّي بيهم
وعيش معاهم لحظة اللقيا الندية
وأستمد من ضي عيونهم
للخطاوي الجاية .... قوة

نزار فتحي
او انا


أبنوسي

اشكرك ياتبلدي علي النص الرقيق الحلو

ودي جاتنا من المبدع عصام ابكر ادم


استني صحيني
شعر عصام ابكر ادم

ياساريه روح بيني
قمرك مسليني
برتاح علي ميسو
وبنوم علي هسيسو
استني صحيني
++++++++++
عصب السكون اني
وانتي الصدي البركان
وانتي النجا الحالي
انتي المدار الكان
ده الملتقي التالي
اكبر من الامكان
++++++++++
ماغبتي عن ذاتك
بس فايته بي حنيني
سميتي حاجاتك
مليانه تلويني
سمتيني وحياتك
جات فجتك فيني

وصلنتني الرساله من العزيزي مدني النخلي يعرفني بصديق جديد وشاعر
مجيد وهو علي عبد الهادي من الدوحه فمرحبا به


بريق الضى
على عبد الهادى
فضح عينَي بريق الضـي

وطله قمرك الوقــــــــاد

سناك اتجاوز الأبعـــــــاد

وفي الأعماق توهج حي

..............................

شعرت الفرحة في جُـواي

بتصدح بي معاني هواي

هديلك زف صوت النـاي

وشف الدمعــة في عيني

...............................

صفاك برق الأماني الشال

حنـان الريد ومطر الفـال

هتف حُبك عليّ وقـــــال

تعــــال أسقيـكَ برد الفَي

..............................

طريـت اللقيـا وأيامــــــها

مشاعر بالشجــن يامــــــا

مشيت في موكب أحلامها

شايل روحي في ايـــــدَي

.............................

أعاد لقياك صدى الذكرى

وزاد تهويمي في الحضره

وحاتك ، وأنت بـي أدرى

هويتـك ما هويــت الغــي

***********************************************

زمن إرتحالك
علي عبد الهادي

بينى بين زمن إرتحالك
لوعة الوجد العنيـف

قسوة البعد انهمـالك

واحتدامى مع اللهيف

0000000000000

كان قدر مكتوب علينا

تبقى ليل همى واسايا

ينجرح عصب السكينه

وتنشده كلمات غنايا

تمشى ليك روحى الحزينه

ويجرى فى قلبى النزيف

0000000000000

ياما جينا وكم مشينا

فى دروب عرفت شقايا

لا تعبنا ولا اكتفينا

لا بدت بينا النهايه

شوقى وارهاصات وصالك

طلة البدر الشفيف

000000000000

والعذاب العدّ فينا

بيهو جاوزنا المنايا

طهرك الخطوه الرزينه

أسرك الشدّد خطايا

اسمك النسمه الحنينه

بسمك البوح العفيف

0000000000000

بينى ما بين اكتمالك

باقى ايامى المعايا

افتكاراتى وخيالك

*******************************************



موعـود
علي عبد الهادي



موعود بالفرحه ألفى عينيك

موعود بالبسمه الضوايه

ومن قبل يكون للدنيا وجود

الريد ممدود

وحكاوي الشوق ألفى دربك

ما ليها حدود

وألحانك أضحت مغناى

وأيامنا سعود

والفرحه تبهرج أنوارها

بستان الحب حافاه ورود

والكلمه الطلعت من قلبك

يا حلوه بتصبح سلواي

وبديع أشواقنا وأسرارها

في الخاطر دايما موجود

0000000000000000

موعود بي فرحك وحياتك

حسيتو زمان من قبل لقاك

وبعيش لي فرحك ولى ذاتك

مستني ألاقى الموعود
********************************************

ألأستاذ الموصلي

علمت ان المرزوقي خارج البلاد، وهنا بدأ موسم البيات الصيفي حتى سبتمبر القادم

علي عبد الهادي تعرفت عليه عبر مدني النخلي وهو صوت قادم بالجديد

جماعة دنفر_كلورادو في إنتظارك وعلى رأسهم عبدالرؤوف جميل

أمس تذكرت أغنية أرض الحبيب / الطيب عبدالله ، وتذكرتك وقلت من ينفض عنها الغبار ، وشوقي ليك طال ، قول لي متين أراك


وأيه بحر الشمال وإنت النيل حداك؟!

تشكر ابا ساندرا وماتتخيل
انا بعشق صوت الطيب الاصيل الفنان الذي اثر الانزواء المبدع الرائع
وفعلا حامشي ليهم الخميس القادم كان الله هون ولك المحبة كلها

عليك الله يا يوسف في كلورادو وعن طريق رؤوف جميل وصل الرسالة ادناه للحبيب عاطف مكاوي

يا حبيب الروح اعفيني من ظنك ، فأنا محاصر بالظنون والهواجس ، او تذكر ذاك الجمل ، الجمل الذي لم يحفل بالكلاب النابحة ، ولا اقعدته الجراح النازفة ، ما زال راكز يقاتل ، امس رؤوف اضحكني ساعتين غسل احزان الراهن ، وفي عتاب أخير مع ابو الطل توعدته بالنزال وعلق ضاحكآ عارفك ، ترى ياربي هل هل طاريني قلبو ، وهل إنت عارفني ، فلماذا شايل فيني ظنك؟ هل لإنك ، يا صديق لا المسافة ولا الخيال يبعدني عنك ،، نرجوك زودنا بالإيميل بتاعك وعنواني عند رؤوف

يوصل يا ابو ساندرا ان شاء الله
واحنا في ديك الساعه
زي مابقولو اولاد بمبه